ဒေါ်အောင်ဆန်းစုကြည် – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Tag Archive

Tag: ဒေါ်အောင်ဆန်းစုကြည်

ICRC နှင့် တွေ့ဆုံမှုအပေါ် သားဖြစ်သူ ကင်မ်အဲရစ် ကြိုဆိုပြီး ချက်ချင်းလွှတ်ပေးရန် တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၃ ရက်။ အပြည်ပြည်ဆိုင်ရာ ကြက်ခြေနီကော်မတီ (ICRC) ၏ ကိုယ်စားလှယ်တစ်ဦးသည် ဩဂုတ်လ ၃ ရက်နေ့တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံ သွားရောက်တွေ့ဆုံခဲ့ကြောင်း ICRC က ထုတ်ပြန် လိုက်သည်။ အဆိုပါ တွေ့ဆုံမှုအပေါ် ဒေါ်အောင်ဆန်းစုကြည်၏ သားဖြစ်သူ ကင်မ်အဲရစ်က ကြိုဆိုလိုက်ပြီး နိုင်ငံရေး အကျဉ်းသားအားလုံးကို လွှတ်ပေးရန် တောင်းဆိုလိုက်သည်။ ကင်မ်အဲရစ်က “ဒီနေ့ဟာ မျှော်လင့်ချက်ကို ယူဆောင်လာပါတယ်။ အပြည် ပြည်ဆိုင်ရာ ကြက်ခြေနီကော်မတီ (ICRC) မှ ကျနော့်မေမေ ဒေါ်အောင်ဆန်းစုကြည်နဲ့ တွေ့ဆုံခဲ့တယ်ဆိုတဲ့ သတင်းတွေကို ကျနော် ကြိုဆိုပါ တယ်။ ဒီသတင်းကို အတည်ပြုနိုင်မယ်ဆိုရင်တော့ ဒါဟာ ငါးနှစ်ကျော်အတွင်း မေမေနဲ့ ပတ်သက်တဲ့ အပြု သဘောဆောင်တဲ့ ပထမဆုံးတိုးတက်မှု ဖြစ်ပါလိမ့်မယ်” ဟု ၎င်း၏ လူမှုကွန်ရက်စာမျက်နှာတွင် ရေးသားထား သည်။ အဆိုပါ သွားရောက်တွေ့ဆုံမှုကို လွတ်လပ်ခွင့် ထိန်းချုပ်ခံထားရသူများထံ သွားရောက်ကြည့်ရှုသည့် ICRC ၏ လုပ်ထုံးလုပ်နည်း စံနှုန်းများနှင့်အညီ ဆောင်ရွက်ခဲ့ခြင်းဖြစ်ပြီး ဒေါ်အောင်ဆန်းစုကြည်နှင့် သီးသန့်တွေ့ဆုံ ဆွေးနွေးခွင့် ရရှိခဲ့ကြောင်း ICRC က ထုတ်ပြန်ထားသည်။ ထိုကဲ့သို့ တွေ့ဆုံခြင်းအားဖြင့် အကျဉ်းကျခံထားရသူများနှင့် ၎င်းတို့၏ မိသားစုဝင်များအကြား အပြန်အလှန် သတင်းအချက်အလက် ဖလှယ်နိုင်ခွင့်ကို ရရှိစေကြောင်းလည်း ပါရှိသည်။ ICRC က သတင်းမထုတ်ပြန်မီ ဒေါ်အောင်ဆန်းစုကြည်ကို ၎င်းတို့၏ မြန်မာနိုင်ငံဆိုင်ရာ ဌာနေကိုယ်စားလှယ် Mr. Arnaude de Baqque က ယနေ့ နံနက်ပိုင်းတွင် လာရောက်တွေ့ဆုံခဲ့ကြောင်း စစ်အုပ်စုက ဓာတ်ပုံများနှင့် တကွ ဦးစွာ ထုတ်ပြန်ခဲ့သည်။ သို့သော် စစ်အုပ်စု၏ ထုတ်ပြန်ချက်အပေါ် လူမှုကွန်ရက်တွင် ဝေဖန်မှုများနှင့် သံသယများ မြင့်တက်နေချိန်၌ ICRC ကပါ ထပ်ဆင့် သတင်းထုတ်ပြန်ခဲ့ခြင်း ဖြစ်သည်။ ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်အာဏာသိမ်းချိန်က စတင်ကာ လူထုခေါင်းဆောင် ဒေါ်အောင်ဆန်းစုကြည်ကို စစ်တပ်က မတရားဖမ်းဆီးထိန်းသိမ်းခဲ့ရာ ယခုအခါ ရက်ပေါင်း ၂,၀၀၀ ကျော် ကြာမြင့်လာပြီ ဖြစ်သည်။ စစ်တပ်က ရက်ပေါင်း ၂,၀၀၀ ကျော် ကြာသည့်တိုင် မိသားစုဝင်များနှင့်သာမက ပြင်ပကမ္ဘာနှင့်ပါ တွေ့ဆုံ ဆက်သွယ်ခွင့် မပေးဘဲ ဖုံးကွယ်ထားခဲ့ကြောင်း သားဖြစ်သူ ကင်မ်အဲရစ်က ပြောဆိုထားသည်။ ယခု ICRC နှင့် တွေ့ဆုံခွင့်ရသည်အထိ ဖိအားပေးဆောင်ရွက်ခဲ့သူများ အားလုံးကိုလည်း ၎င်းက ကျေးဇူးတင်ကြောင်း ပြောဆို ထားသည်။ သို့သော် ဒေါ်အောင်ဆန်းစုကြည် အသက်ရှင်ကြောင်း အထောက်အထားသည် နောက်ဆုံးမဟုတ်ကြောင်းနှင့် ရှေ့ဆက်ရမည့် လုပ်ငန်းစဉ်များ ရှိသေးကြောင်း ကင်မ်အဲရစ်က ထောက်ပြထားသည်။ “ဒါဟာ အရေးပါတဲ့ပထမခြေလှမ်းဖြစ်ပါတယ်။ ဒါပေမဲ့ နောက်ဆုံးခြေလှမ်းမဖြစ်စေရပါဘူး။ ဒီအခြေ အနေကနေ လူသားချင်းစာနာမှုဆိုင်ရာ တိုးတက်မှုတွေ ဆက်လက်ဖြစ်ပေါ်လာဖို့ ကျနော် မျှော်လင့်ပါတယ်” ဟု ၎င်းက ပြောသည်။ ဆက်လက်၍လည်း ကင်မ်အဲရစ်က “အဲဒီထဲမှာ မေမေနဲ့ တိုက်ရိုက်စကားပြောခွင့်ရရှိရေး၊ မိသားစုနဲ့ တွေ့ဆုံ ခွင့်ရရှိရေး၊ မေမေ့ရဲ့ ကျန်းမာရေးအခြေအနေကို ယုံကြည်စိတ်ချရပြီး လွတ်လပ်စွာ အတည်ပြုနိုင်တဲ့ သတင်း အချက်အလက် ရရှိရေးနဲ့ နိုင်ငံရေး အကျဉ်းသားအားလုံးနဲ့အတူ မေမေ့ကို ချက်ချင်းနဲ့ ခြွင်းချက်မရှိ လွှတ်ပေး ရေးတို့ ပါဝင်ပါတယ်” ဟု ပြောသည်။ ဒေါ်အောင်ဆန်းစုကြည်နှင့် တွေ့ဆုံခွင့်ကို တရုတ်နှင့် အာဆီယံ သံတမန်များက တောင်းဆိုခဲ့သော်လည်း စစ်အုပ်စုက ငြင်းပယ်ခဲ့ပြီး ယခုနောက်ဆုံးတွင်မှ ICRC နှင့် တွေ့ဆုံမှုကို ထုတ်ပြန်ခဲ့ခြင်း ဖြစ်သည်။ #ICRC #ကင်မ်အဲရစ် #ဒေါ်အောင်ဆန်းစုကြည်

ICRC နှင့် တွေ့ဆုံမှုအပေါ် သားဖြစ်သူ ကင်မ်အဲရစ် ကြိုဆိုပြီး ချက်ချင်းလွှတ်ပေးရန် တောင်းဆို

ဒေါ်အောင်ဆန်းစုကြည်နှင့် ICRC ကိုယ်စားလှယ် တွေ့ဆုံဟု စစ်တပ်ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၃ ရက်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အပြည်ပြည်ဆိုင်ရာ ကြက်ခြေနီကော်မတီ (ICRC) ၏ မြန်မာနိုင်ငံဆိုင်ရာ ဌာနေကိုယ်စားလှယ် Mr. Arnaude de Baqque က ယနေ့ (ဩဂုတ်လ ၃ ရက်) နံနက်ပိုင်းတွင် လာရောက်တွေ့ဆုံခဲ့ကြောင်း စစ်အုပ်စုဘက်က ဓာတ်ပုံများနှင့်တကွ ထုတ်ပြန်လိုက်သည်။ အဆိုပါ တွေ့ဆုံမှုနှင့် ပတ်သက်၍ စစ်အုပ်စု၏ ပြောရေးဆိုခွင့်ရှိသူ ဒေါက်တာခိုင်ခိုင်စိုး၏ ဖေ့ဘွတ်စာမျက်နှာ ဖြစ်သော Myanmar Presidential Spokesperson တွင် သတင်းထုတ်ပြန်ထားခြင်း ဖြစ်သည်။ “ဒေါ်အောင်ဆန်းစုကြည်ကို အပြည်ပြည်ဆိုင်ရာ ကြက်ခြေနီကော်မတီ (ICRC) မှ မြန်မာ နိုင်ငံဆိုင်ရာ ဌာ‌နေ ကိုယ်စားလှယ်ဖြစ်သူ Mr. Arnaude de Baqque က ယနေ့ နံနက်ပိုင်းတွင် လာရောက် တွေ့ဆုံခဲ့ပါသည်” ဟု Myanmar Presidential Spokesperson ၏ လူမှုကွန်ရက် စာမျက်နှာတွင် မြန်မာ၊ အင်္ဂလိပ် နှစ်ဘာသာဖြင့် ရေးသားထားသည်။ သို့သော်လည်း ထိုကဲ့သို့ တွေ့ဆုံခဲ့ကြသည်ဟု စစ်တပ်ဘက်က ထုတ်ပြန်ထားသော်လည်း အပြည်ပြည်ဆိုင်ရာ ကြက်ခြေနီကော်မတီ (ICRC) ဘက်မှမူ ယခုတွေ့ဆုံမှုနှင့် ပတ်သက်ပြီး တစ်စုံတစ်ရာ တရားဝင် ထုတ်ပြန်ထား ခြင်းမျိုး မရှိသေးပေ။ Myanmar Presidential Spokesperson ၏ လူမှုကွန်ရက် စာမျက်နှာတွင် ထုတ်ပြန်လာသည့် ဓာတ်ပုံလေးပုံ အနက် မွေးနေ့ကိတ်ပါရှိသည့်ပုံတွင် ဖော်ပြထားသော မွေးနေ့ရက်စွဲမှာ ‘၁၉’ လား၊ ‘၂၉’ လားဆိုသည်မှာ မသဲကွဲ ဘဲ ဝေဖန်မှုများ ထွက်ပေါ်နေလျက် ရှိသည်။ အလားတူ စစ်တပ်ဘက်က ထုတ်ပြန်လာသည့် ဓါတ်ပုံ လေးပုံ အနက် မွေးနေ့ကိတ်ခွဲနေသည့် ပုံပါ ဒေါ်အောင်ဆန်းစုကြည် ဝတ်ဆင်ထားသည့် “အင်္ကျီ” မှာ အခြား တွေ့ဆုံသည့် ပုံများတွင် ဝတ်ဆင်ထားသော အင်္ကျီနှင့် ကွဲပြား ခြားနားနေသည်ကိုလည်း တွေ့ရသည်။ ထို့ပြင် မည်သည့်နေရာတွင် ပြုလုပ်ခဲ့သည်၊ မည်သည့်အကြောင်းအရာများကို ဆွေးနွေးခဲ့ကြသည်နှင့် တွေ့ဆုံချိန် မည်မျှကြာမြင့်ခဲ့သည် စသည့် အသေးစိတ်အချက်အလက်များကိုလည်း စစ်တပ်ဘက်က ဆက်လက် ဖုံးကွယ် ထားဆဲ ဖြစ်သည်။ ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်အာဏာသိမ်းချိန်ကစတင်ကာ လူထုခေါင်းဆောင် ဒေါ်အောင်ဆန်းစု ကြည်ကို စစ်တပ်က မတရားဖမ်းဆီးထိန်းသိမ်းခဲ့ရာ ယခုအခါ ရက်ပေါင်း ၂,၀၀၀ ကျော် ကြာမြင့်လာပြီ ဖြစ် သည်။ စစ်တပ်က ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ စစ်အာဏာသိမ်းချိန်မှ စတင်ပြီး လူထုခေါင်းဆောင်၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို မတရားဖမ်းဆီးကာ ရက်ပေါင်း ၂,၀၀၀ ကျော် ကြာသည့်တိုင် မိသားစုဝင်များနှင့်သာမက ပြင်ပကမ္ဘာနှင့်ပါ တွေ့ဆုံဆက်သွယ်ခွင့် မပေးဘဲ ဖုံးကွယ်ထားတယ် ဟု သားဖြစ်သူ ကင်မ်အဲရစ် (Kim Aris) က ပြောဆိုထားသည်။ သားဖြစ်သူ ကင်မ်အဲရစ် (Kim Aris) “မေမေ့ကို ရက်ပေါင်း ၂၀၀၀ ကျော် မိသားစုနဲ့ကော ကမ္ဘာကြီးနဲ့ပါ ပေး မတွေ့ဘဲ ဖုံးကွယ်ထားပါတယ်။ မေမေ ဘယ်မှာရှိလဲဆိုတာ ကျနော် မသိရသေးပါဘူး။ မေမေ့ရဲ့အခြေအနေကို မသိရသေးပါဘူး။ အသက် ၈၁ နှစ်အရွယ် နိုဘယ်ငြိမ်းချမ်းရေးဆုရှင်ကို စစ်အာဏာရှင်တွေ ဘာကြောင့် ဖွက် ထားရတာလဲ။ သားတစ် ယောက်က သူ့မိခင်နဲ့ ဘာလို့ စကားမပြောခွင့်မရတာလဲ။ သက်ရှိထင်ရှား ရှိနေသေး တယ်ဆိုတာကို လွတ်လပ်စွာအတည်ပြုထားတဲ့ အထောက်အထားတစ်ခုတောင်မှ မရရှိသေးတာလဲ” ဟု ပြော သည်။ ထို့ပြင် မိခင်ဖြစ်သူ အသက်ရှင်နေဆဲဖြစ်ကြောင်း ယုံကြည်စိတ်ချရပြီး လွတ်လပ်စွာ အတည်ပြုနိုင်သည့် သက် သေ အထောက်အထား တစ်စုံတစ်ရာကို ယနေ့အချိန်အထိ မရရှိသေးကြောင်းကိုလည်း သားဖြစ်သူ ကင်မ်အဲရစ် က လူမှုကွန်ရက်မှတစ်ဆင့် ဇူလိုင်လ ၂၉ ရက်နေ့တွင် ပြောဆိုထာသည်။ လက်ရှိတွင် ဒေါ်အောင်ဆန်းစုကြည်သည် စစ်တပ်က ပုဒ်မမျိုးစုံ တပ်ဆင်ကာ မတရားအမှုဆင် အပြစ်ပေးထား ခြင်းကြောင့် ထောင်ဒဏ်နှစ်ရှည်များစွာ ချမှတ်ခံထားရဆဲဖြစ်ပြီး ပြင်ပကမ္ဘာနှင့် အဆက်အသွယ် ပြတ်တောက် နေချိန် ယခုကဲ့သို့ စစ်တပ်ဘက်က ICRC ဌာနေကိုယ်စားလှယ်နှင့် တွေ့ဆုံမှုအား ထုတ်ပြန်လာခြင်း ဖြစ်သည်။ #ဒေါ်အောင်ဆန်းစုကြည် #ICRC

ဒေါ်အောင်ဆန်းစုကြည်နှင့် ICRC ကိုယ်စားလှယ် တွေ့ဆုံဟု စစ်တပ်ထုတ်ပြန်

ဒေါ်အောင်ဆန်းစုကြည် သက်ရှိထင်ရှားရှိကြောင်း သက်သေ ဆက်လက်တောင်းဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ မေလ ၁ ရက်။ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို နေအိမ်၌ ပြစ်ဒဏ်ဆက်ခံရန် ပြောင်းလဲသတ်မှတ်လိုက် ကြောင်း စစ်အုပ်စုက ကြေညာခဲ့သော်လည်း ယင်းသည် နိုင်ငံတကာကို လှည့်ဖြားသည့် နိုင်ငံရေးလှည့်ကွက်သာ ဖြစ်ပြီး မိခင်ဖြစ်သူ သက်ရှိထင်ရှားရှိနေကြောင်း သက်သေပြရန် သားဖြစ်သူနှင့် တော်လှန်ရေး အင်အားစုများက တောင်းဆိုလိုက်သည်။ စစ်အုပ်စုသည် ဒေါ်အောင်ဆန်းစုကြည်ကို နေပြည်တော် အကျဉ်းထောင်မှ သတ်မှတ်ထားသည့် နေအိမ် တစ်နေရာသို့ ရွှေ့ပြောင်းလိုက်ကြောင်းနှင့် ထောင်ဒဏ်အချို့ လျှော့ပေါ့ပေးကြောင်း ဧပြီလ ၃၀ ရက်နေ့တွင် ထုတ်ပြန်ခဲ့သည်။ သို့သော် အဆိုပါထုတ်ပြန်ချက်တွင် ဒေါ်အောင်ဆန်းစုကြည်၏ ရုပ်သံဗီဒီယို သို့မဟုတ် ပြောကြားချက်များ လုံးဝ ပါဝင်ခြင်းမရှိဘဲ အတည်မပြုနိုင်သည့် ဓာတ်ပုံတစ်ပုံကိုသာ အသုံးပြုခဲ့သောကြောင့် အများပြည်သူအကြား သံသယများ မြင့်တက်နေခြင်းဖြစ်သည်။ အမျိုးသားညီညွတ်ရေးအစိုးရ (NUG) ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က “နေအိမ်အကျယ်ချုပ်ပြောင်းပြီး သတ်မှတ်ထားတဲ့နေအိမ်ကို ရွှေ့ပြောင်းတယ်ဆိုတဲ့အကြောင်း စစ်အုပ်စုဘက် က ဓါတ်ပုံတပုံထုတ်ပြလာပါတယ်။ အဲဒီ့ဓါတ်ပုံဟာ ယခုလက်ရှိကာလ ရိုက်ထားတဲ့ ပုံ ဟုတ် မဟုတ်၊ ၅၄ နေအိမ်ကိုလည်း ပြန်လည်ရောက်ရှိခြင်း မရှိတဲ့အတွက် ဘယ်မှာတကယ်ရှိနေတာလဲ စတဲ့ အချက်တွေကို ကျနော်တို့ စိစစ်ဖို့လိုပါဦးမယ်” ဟု ပြောသည်။ NUG နိုင်ငံခြားရေးဝန်ကြီး ဒေါ်ဇင်မာအောင်ကလည်း ယခုလုပ်ရပ်သည် နေအိမ်အကျယ်ချုပ်မဟုတ်ဘဲ နိုင်ငံတကာကို လှည့်ဖြားရန် ဒေါ်အောင်ဆန်းစုကြည်ကို ဓားစာခံအဖြစ် ဆက်လက်ဖမ်းဆီးထားခြင်းသာ ဖြစ်သည်ဟု ဝေဖန်ခဲ့သည်။ တစ်ဖက်တွင်လည်း ဒေါ်အောင်ဆန်းစုကြည်၏ သားငယ် ဦးထိန်လင်း (ခ) ကင်မ်အဲရစ်က မိခင်ဖြစ်သူအား မည်သည့်နေရာတွင် ထိန်းသိမ်းထားသည်ကို မသိရသေးဘဲ ပြင်ပကမ္ဘာနှင့် အဆက်အသွယ် ဖြတ်တောက် ခံထားရဆဲ ဖြစ်ကြောင်း ယခုကဲ့သို့ ပြောသည်။ "သူမကို ရွှေ့ပြောင်းခြင်းက လွှတ်ပေးခြင်း မဟုတ်ပါဘူး။ ထောင်ဒဏ်လျှော့ပေါ့ခြင်းနဲ့ မသိနိုင်တဲ့ နေရာ တစ်ခု ကို ရွှေ့ပြောင်းခြင်းဟာ အခြေအနေကို မပြောင်းလဲစေပါဘူး။ မေမေဒေါ်အောင်ဆန်းစုကြည်ဟာ အခုထိ ဓားစာခံအဖြစ် ဖမ်းဆီးထိန်းသိမ်းထားခံနေရပြီး ပြင်ပကမ္ဘာနဲ့ အဆက်အသွယ်ပြတ်တောက်နေဆဲပါ။ သား တစ်ယောက်အနေနဲ့ ကျနော့်မှာ ဘာသတင်းအချက်အလက်မှ မရရှိသေးပါဘူး။ ကျနော်ရဲ့ တောင်းဆိုချက်က ရိုးရှင်းပါတယ်။ မေမေ အသက်ရှင်နေကြောင်း အတည်ပြုနိုင်တဲ့ အချက်အလက်၊ သူမနဲ့ ဆက်သွယ်နိုင်ခွင့်၊ နဲ့ သူမ လွတ်မြောက်ရေးပါ။ အသက်ရှင်နေတယ်ဆိုရင် အတည်ပြုနိုင်တဲ့ ယုံကြည်ခိုင်မာရတဲ့ သက်သေပြပါ။" သို့သော် ရိုက်တာ (Reuters) သတင်းဌာန၏ ဖော်ပြချက်အရ ဒေါ်အောင်ဆန်းစုကြည်သည် သူမ၏ ရှေ့နေ အဖွဲ့နှင့် လာမည့် မေလ ၃ ရက်နေ့ (ယခုသီတင်းပတ်ကုန်) တွင် တွေ့ဆုံခွင့်ရမည်ဟု သိရသည်။ ရှေ့နေအဖွဲ့ဝင်တစ်ဦး၏ ပြောကြားချက်အရ ဒေါ်အောင်ဆန်းစုကြည်သည် လက်ရှိတွင် နေပြည်တော်၌ပင် ရှိနေသေးပြီး ယခုတွေ့ဆုံမှုသည် ပုံမှန်ထောင်ဝင်စာတွေ့ခြင်းမျိုး မဟုတ်ဘဲ အရေးကြီးကိစ္စရပ်များ ဆွေးနွေးရန် ရှိကြောင်း သိရသည်။ အသက် ၈၀ အရွယ်ရှိပြီဖြစ်သော ဒေါ်အောင်ဆန်းစုကြည်သည် ၂၀၂၁ ခုနှစ် အာဏာသိမ်းပြီးနောက်ပိုင်း မတရား စွဲချက်များဖြင့် ထောင်ဒဏ် ၃၃ နှစ် ချမှတ်ခံခဲ့ရကာ၊ နောက်ပိုင်းတွင် ပြစ်ဒဏ်အချို့ လျှော့ပေါ့ပေးခဲ့သော်လည်း ယနေ့ထက်တိုင် မိသားစုဝင်များ သို့မဟုတ် ရှေ့နေများနှင့် လွတ်လပ်စွာ တွေ့ဆုံခွင့် မရရှိသေးပေ။ နိုင်ငံတကာ အသိုက်အဝန်းကလည်း ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားအားလုံးကို ခြွင်းချက်မရှိ ပြန်လွှတ်ပေးရန် ဖိအားပေးမှုများ ဆက်တိုက်လုပ်ဆောင်နေကြသည်။ #ဒေါ်အောင်ဆန်းစုကြည် #AungSanSuKyi

ဒေါ်အောင်ဆန်းစုကြည် သက်ရှိထင်ရှားရှိကြောင်း သက်သေ ဆက်လက်တောင်းဆို

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဧပြီလ ၂၂ ရက်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် မတရားဖမ်းဆီးခံထားရသည့် နိုင်ငံရေး အကျဉ်းသား အားလုံး ခြွင်းချက်မရှိ အမြန်ဆုံး လွတ်မြောက်ရေးအတွက် နိုင်ငံတကာ အသိုင်းအဝန်း အနေဖြင့် ယခုထက်ပို၍ ထိရောက်ပြီး လက်တွေ့ကျသည့် ဖိအားပေးမှုများ လုပ်ဆောင်ရန် Blue Shirt Movement-Myanmar နှင့် မဟာမိတ်အဖွဲ့ ၅၈ ဖွဲ့က တောင်းဆိုလိုက်သည်။ ဧပြီလ ၁၀ ရက်နေ့မှ ၂၁ ရက်နေ့အထိ (၁၂) ရက်တိုင်တိုင် ပြုလုပ်ခဲ့သည့် Blue Shirt Campaign လူထုလှုပ်ရှားမှု နှင့်အတူ ကုလသမဂ္ဂ (UN)၊ ဥရောပသမဂ္ဂ (EU)၊ အာဆီယံနှင့် အမေရိကန်အပါအဝင် အိမ်နီးချင်းနိုင်ငံများမှ ခေါင်းဆောင်များ အနေဖြင့် မြန်မာ့နိုင်ငံရေးအကျဉ်းသားအရေးကို အထူးအလေးထား ဆောင်ရွက်ပေးရန် တိုက်တွန်းခဲ့ခြင်း ဖြစ်သည်။ Blue Shirt Movement-Myanmar မှ ပြောရေးဆိုခွင့်ရှိသူ ကိုကောင်းယံလင်းက “အမှန်တကယ်တော့ နိုင်ငံရေး အကျဉ်းသားအများစု မလွတ်မြောက်သေးပါဘူး။ လွတ်ငြိမ်းချမ်းသာပေးတယ်ဆိုတဲ့ နေရာမှာလည်း ထောင်ထဲမှာ နှစ်အကြာကြီးနေပြီး လွတ်ရက်စေ့ခါနီးသူတွေက အများစုပါ။ ဒါကြောင့် စစ်အုပ်စုရဲ့ အကျဉ်းထောင်တွေထဲမှာ ခံစားနေရတဲ့ လူ့အခွင့်အရေးချိုးဖောက်မှုတွေနဲ့ ဒေါ်အောင်ဆန်းစုကြည်အပါအဝင် အားလုံးလွတ်မြောက်ဖို့အတွက် နိုင်ငံတကာက အစဉ်တစိုက် ဖိအားပေးစေချင်ပါတယ်” ဟု ပြောသည်။ လက်ရှိတွင် အသက် ၈၀ ကျော်အရွယ်ရှိပြီ ဖြစ်သည့် ဒေါ်အောင်ဆန်းစုကြည်၏ ကျန်းမာရေးနှင့် ပတ်သက်၍ စစ်အုပ်စုက သတင်းအမှောင်ချထားသည့်အပေါ် နိုင်ငံရေးအင်အားစုများက အထူးစိုးရိမ်နေကြသည်။ ဆိုရှယ်ဒီမိုကရက်တစ်ပါတီ (SDP) အထွေအထွေအတွင်းရေးမှူး ကိုကျော်ကိုကိုက “လက်ရှိ ထောင်ထဲမှာရှိတဲ့ ဒေါ်အောင်ဆန်းစုကြည် အပါအဝင် ကျန်တဲ့ နိုင်ငံရေးအကျဉ်းသားအားလုံးရဲ့ အသက်အန္တရာယ်က အင်မတန်မှ စိုးရိမ်စရာကောင်းတယ်။ အခု အခြေအနေ ဘာတွေဖြစ်နေမှန်းလည်း မသိဘူး။ သတင်းအမှောင် ချထားတာ တွေလည်း ရှိတယ်” ဟု ထောက်ပြသည်။ အလားတူ နိုင်ငံရေးအကျဉ်းသူများအဖွဲ့ (WOPP) ဦးဆောင်တာဝန်ခံ မဇူးဇူးမေယွန်းကလည်း “အတုအယောင် အစိုးရက လက်ရှိအထိ ဘာမှ တိတိကျကျ မဖော်ပြတဲ့အတွက် ကျမတို့အနေနဲ့က ဒေါ်အောင်ဆန်းစုကြည်နဲ့ တကွ ကျန်ရှိနေတဲ့ နိုင်ငံရေး အကျဉ်းသားတွေ လွတ်မြောက်ဖို့အရေးကို ပိုပြီးတော့ အရွေ့တစ်ခုကို သွားဖို့ လိုအပ်လာပြီလို့ သုံးသပ်ချင်ပါတယ်” ဟု ပြောသည်။ အထူးသဖြင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျန်းကျန်းမာမာနှင့် အသက်ရှင်လျက်ရှိ ကြောင်း ခိုင်မာသည့် သက်သေပြရန် "Proof of Life" ကမ်ပိန်းကို သားဖြစ်သူ ဦးထိန်လင်းနှင့်အတူ ပြည်သူများ က ယခုရက်ပိုင်းအတွင်း စတင်လိုက်ကြသည်။ All in One Piece Movement အဖွဲ့က ဦးဆောင်သည့် ဤလှုပ်ရှားမှုသည် မိခင်ဖြစ်သူ၏ ကျန်းမာရေး အခြေ အနေကို သားတစ်ဦးအနေဖြင့် သိရှိခွင့်ရရှိရန်ဟူသော အခြေခံလူသားအခွင့်အရေးအပေါ် မူတည်ကာ တောင်းဆိုထားခြင်း ဖြစ်သည်။ ကိုထိန်လင်းနှင့်အတူ မြန်မာ့အရေးလှုပ်ရှားနေသူများက ကုလသမဂ္ဂနှင့် အမေရိကန်အပါအဝင် နိုင်ငံတကာ အသိုင်းအဝန်းအနေဖြင့် စစ်အုပ်စုအပေါ် ဖိအားပေးရန်၊ အတုအယောင်ရွေးကောက်ပွဲကို အသိအမှတ်မပြုရန်နှင့် ပြည်သူကို ဗုံးကြဲနေသည့် လေယာဉ်ဆီတင်သွင်းမှုများကို ရပ်တန့်ပေးရန် တိုက်တွန်းထားသည်။ လက်ရှိတွင် ဒေါ်အောင်ဆန်းစုကြည်၏ သတင်းများကို စစ်အုပ်စုဘက်က လုံးဝအမှောင်ချထားသည့်အတွက် ၎င်း၏ အသက်အန္တရာယ်အတွက် ပြည်တွင်းပြည်ပရှိ ပြည်သူများက အထူးစိုးရိမ်ပူပန်နေကြသည်။ PPNM ၏ မှတ်တမ်းများအရ အာဏာသိမ်းကာလအတွင်း အကျဉ်းထောင်တွင်း ကျန်းမာရေးစောင့်ရှောက်မှု မလုံလောက်ခြင်းနှင့် ညှဉ်းပန်းနှိပ်စက်ခံရခြင်းတို့ကြောင့် နိုင်ငံရေးအကျဉ်းသား ၂၇၉ ဦးခန့် အသက်ဆုံးရှုံးခဲ့ရပြီး ဖြစ်သည်။ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ဦးဆောင်ကော်မတီဝင် ကိုသိုက်ထွန်းဦးက “ကျနော်တို့ ပြည်သူလူထု တစ်ရပ်လုံးက ရောက်ရှိရာနိုင်ငံတွေမှာ ကြိုးစားနေကြသလိုပဲ၊ နိုင်ငံတကာ အသိုင်း အဝန်း အနေနဲ့လည်း ပိုပြီး လက်တွေ့ကျတဲ့ ဆောင်ရွက်မှုတွေ၊ မလွတ်လာခင်စပ်ကြားမှာ ကူညီစောင့်ရှောက်မှု တွေ ပိုပေးဖို့ အတွက် ကျနော်တို့ ရည်ရွယ်ပါတယ်” ဟု ပြောသည်။ AAPP ၏ ထုတ်ပြန်ချက်အရ လက်ရှိအချိန်ထိ ကလေးသူငယ် ၆၀၀ ကျော်အပါအဝင် နိုင်ငံရေးအကျဉ်းသား ၁၄,၀၀၀ ကျော် ဖမ်းဆီးချုပ်နှောင်ခံထားရဆဲ ဖြစ်သည်။ ထို့ကြောင့် နိုင်ငံတကာအနေဖြင့် စစ်အုပ်စုအား အသိအမှတ်မပြုရန်နှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် တာဝန်ခံစေရေး အရှိန်မြှင့် ဆောင်ရွက်ပေးရန် Blue Shirt Movement က အလေး အနက် တိုက်တွန်းထားသည်။ ဓါတ်ပုံ - PPNM #ဒေါ်အောင်ဆန်းစုကြည် #နိုင်ကျဉ်း #PPNM #ကိုထိန်လင်း #စစ်အုပ်စု

ဒေါ်အောင်ဆန်းစုကြည်နှင့် နိုင်ကျဉ်းများ လွတ်မြောက်ရေး အဖွဲ့ ၅၉ ဖွဲ့ တောင်းဆို

စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဧပြီလ ၁၇ ရက်။ မြန်မာနှစ်ဆန်း (၁) ရက်၊ ယနေ့တွင် ထုတ်ပြန်သည့် လွတ်ငြိမ်းချမ်းသာခွင့်တွင် အာဏာသိမ်းချိန်ကတည်းက ဖမ်းဆီးထောင်ချခံထားရသည့် နိုင်ငံတော်သမ္မတ ဦးဝင်းမြင့်အား လက်ရှိကျခံနေရသော ပြစ်ဒဏ်အားလုံးမှ လွတ်ငြိမ်းခွင့်ပြုလိုက်ကြောင်း စစ်တပ်ဘက်က တရားဝင် ထုတ်ပြန်လိုက်သည်။ ယနေ့ ထုတ်ပြန်သည့် စစ်အသွင်ပြောင်း အစိုးရ နိုင်ငံတော်သမ္မတရုံး၏ အမိန့်အမှတ် ၄၂ / ၂၀၂၆ အရ တောင်ငူအကျဉ်းထောင်တွင် ပြစ်ဒဏ်ကျခံနေရသော သမ္မတဦးဝင်းမြင့်အား ရာဇဝတ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ ကျန်ရှိနေသည့် ပြစ်ဒဏ်များအပေါ် လျှော့ပေါ့၍ လွတ်ငြိမ်းခွင့်ပြုလိုက်ခြင်းဖြစ်သည်။ အဆိုပါ လွတ်ငြိမ်းခွင့်အမိန့်တွင် သမ္မတဦးဝင်းမြင့် အနေဖြင့် နောက်တစ်ကြိမ် ပြစ်မှုထပ်မံကျူးလွန်ပါက ယခုလျှော့ပေါ့ပေးခဲ့သည့် ပြစ်ဒဏ်များကိုပါ ဆက်လက်ကျခံရမည်ဟူသော စည်းကမ်းချက်ပါဝင်ပြီး စစ်ခေါင်းဆောင် ဦးမင်းအောင်လှိုင်က နိုင်ငံတော်သမ္မတအဖြစ် လက်မှတ်ရေးထိုး ထုတ်ပြန်ထားခြင်းဖြစ်သည်။ သမ္မတဦးဝင်းမြင့်သည် ၂၀၂၁ ခုနှစ် ဖေဖော်ဝါရီလ ၁ ရက်၊ အာဏာသိမ်းမှုစတင်ကတည်းက ဖမ်းဆီး ထိန်းသိမ်းခံခဲ့ရသူဖြစ်ပြီး စစ်အုပ်စု၏ မတရားစွပ်စွဲချက်များဖြစ်သော အဂတိမှုများနှင့် ရွေးကောက်ပွဲဆိုင်ရာ ပုဒ်မ ၁၃၀(က) အပါအဝင် အမှုပေါင်းများစွာဖြင့် စုစုပေါင်း ထောင်ဒဏ် (၁၄) နှစ်အထိ ချမှတ်ခံခဲ့ရသူဖြစ်သည်။ သမ္မတဦးဝင်းမြင့် လွတ်မြောက်လာသည့် သတင်းများနှင့်အတူ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစု ကြည်ကိုလည်း နေအိမ်အကျယ်ချုပ်သို့ ပြောင်းရွှေ့ထားရှိမည်ဆိုသည့် သတင်းများ ကျယ်ကျယ် ပြန့်ပြန့် ထွက်ပေါ်နေသည်။ အဆိုပါ သတင်းများကြောင့် အမျိုးသားဒီမိုကရေစီအဖွဲ့ချုပ် (NLD) ပါတီမှ ဗဟိုအလုပ်အမှုဆောင်အဖွဲ့ဝင် အချို့နှင့် ရှေ့နေများသည် နေပြည်တော်သို့ သွားရောက်နေကြပြီဖြစ်သည်။ ပါတီဥက္ကဋ္ဌ ဒေါ်အောင်ဆန်းစုကြည်အား နေအိမ်အကျယ်ချုပ်သို့ ပြောင်းရွှေ့မည်ဟူသော သတင်းများကြောင့် လူကိုယ်တိုင် တွေ့ဆုံခွင့်ရရှိရန် ကြိုးပမ်းသွားမည်ဖြစ်ကြောင်းနှင့် လက်ရှိတွင် ရှေ့နေများလည်း နေပြည်တော်သို့ ရောက်ရှိနေပြီဖြစ်ကြောင်း NLD ဗဟိုအလုပ်အမှုဆောင်အဖွဲ့ဝင် ဒေါက်တာမျိုးညွန့်က အတည်ပြုပြောဆိုထား သည်။ အတိုင်ပင်ခံဒေါ်အောင်ဆန်းစုကြည်နှင့် သမ္မတဦးဝင်းမြင့်တို့သည် ဖမ်းဆီးထိန်းသိမ်းခံထားရသည်မှာ ရက်ပေါင်း ၁,၉၀၀ ကျော် ရှိလာပြီဖြစ်သည်။ ပြီးခဲ့သည့် ရက်ပိုင်းအတွင်းကလည်း ဒေါ်အောင်ဆန်းစုကြည်အား စစ်အုပ်စု၏ ထိပ်တန်းစစ်ဗိုလ်ချုပ်ကြီး အချို့ က သွားရောက်တွေ့ဆုံခဲ့သည်ဆိုသည့် သတင်းများကြောင့် ယခုနှစ်ဆန်း ၁ ရက်တွင် ၎င်းတို့၏ အခြေအနေနှင့် ပတ်သက်၍ နိုင်ငံရေးအရ စိတ်ဝင်စားမှု မြင့်တက်လျက်ရှိသည်။ လက်ရှိတွင် စစ်အုပ်စုသည် စစ်ရေးအရ အရှုံးများနှင့် ရင်ဆိုင်နေရချိန်တွင် နိုင်ငံရေးထွက်ပေါက်အဖြစ် ယခု ကဲ့သို့ အပြောင်းအလဲအချို့ကို ဖန်တီးလာခြင်းဖြစ်နိုင်ကြောင်း နိုင်ငံရေးလေ့လာသူများက သုံးသပ်နေကြသော် လည်း၊ သမ္မတဦးဝင်းမြင့်၏ လွတ်မြောက်လာပြီးနောက်ပိုင်း အခြေအနေနှင့်ပတ်သက်၍ သီးခြားအတည်ပြုချက် များကိုမူ ဆက်လက်စောင့်ကြည့်နေရဆဲ ဖြစ်သည်။ #သမ္မတဦးဝင်းမြင့် #ဒေါ်အောင်ဆန်းစုကြည်

စစ်အသွင်ပြောင်း သမ္မတက နိုင်ငံတော် သမ္မတအား လွတ်ငြိမ်းချမ်းသာခွင့်ပေး

ဒေါ်အောင်ဆန်းစုကြည် သေဆုံးနေပြီး ဖြစ်နေမှာကို စိုးရိမ်ကြောင်း သားဖြစ်သူ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၆ ရက်။ စစ်ကော်မရှင်၏ အကျဉ်းချထားခြင်းခံနေရသော နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်၏ ကျန်းမာရေး အခြေအနေနှင့် သတင်းအချက်အလက်များ မရရှိနိုင်ခြင်းကြောင့် ၎င်းသည် အသက်ရှင်လျက် ရှိသေးခြင်း ရှိ၊ မရှိ မသေချာတော့ကြောင်း သားဖြစ်သူ Kim Aris (ဦးထိန်လင်း) က စိုးရိမ်ပူပန်စွာ ထုတ်ဖော် ပြောဆိုလိုက်သည်။ Kim Aris က မိခင်ဖြစ်သူသည် စစ်တပ်၏ ဖမ်းဆီးထိန်းသိမ်းမှု အောက်တွင် ကွယ်လွန်သွားပြီ ဖြစ်သည်ကိုပင် မသိနိုင်မည်ကို စိုးရိမ်ကြောင်း ဒီဇင်ဘာလ ၁၄ ရက်နေ့က ဂျပန်နိုင်ငံ၊ တိုကျိုမြို့တွင် ပြုလုပ်သည့် 'All In One Piece' လှုပ်ရှားမှုအတွင်း ရိုက်တာ (Reuters) သတင်းဌာနနှင့် အင်တာဗျူးရာတွင် ပြောဆိုခဲ့ခြင်း ဖြစ်သည်။ Kim Aris သည် မိခင်ဖြစ်သူ၏ ကျန်းမာရေးနှင့် ပတ်သက်ပြီး နှစ်အတော်ကြာ ဆက်သွယ်ခွင့်မရခဲ့ဘဲ စစ်အာဏာ သိမ်းပြီးနောက်ပိုင်းတွင် နှလုံး၊ အရိုး၊ သွားဖုံးဆိုင်ရာ ကျန်းမာရေး ပြဿနာများ ရှိနေသည်ဟူသော သတင်းများ ကို တဆင့်စကားဖြင့်သာ ကြားသိခဲ့ရသည်ဟု ဆိုသည်။ Kim Aris က “ဒီနေ့ ကျနော်ဟာ သားတစ်ယောက်အနေနဲ့ စကားပြောနေတာဖြစ်ပြီး အဓိပ္ပာယ်ရှိတဲ့ နိုင်ငံတကာ လုပ်ဆောင်မှုအတွက် တောင်းဆိုနေသူ တစ်ဦးလည်း ဖြစ်ပါတယ်။ ကျနော့်ရဲ့ မိခင်ဖြစ်သူ ဒေါ်အောင်ဆန်း စုကြည်ဟာ မိသားစုနဲ့ အဆက်ဖြတ်ခံရပြီး၊ သူမရဲ့ အခွင့်အရေးတွေ ချုပ်ချယ်ခံရကာ အသံတိတ် ဆိတ်နေတဲ့ အနေအထားနဲ့ ငါးနှစ်နီးပါးခန့် အဆက်အသွယ် လုံးဝဖြတ်တောက်ခံထားရပါတယ်” ဟု ၎င်း၏ လူမှုကွန်ရက် စာမျက်နှာတွင် ပြောဆိုထားသည်။ ၎င်းက မိခင်ဖြစ်သူ၏ ကျန်းမာရေးနှင့် လုံခြုံရေးအပေါ် အလေးအနက် စိုးရိမ်ကြောင်း ပြောကြားရာတွင် ဒေါ်အောင်ဆန်းစုကြည်မှာ အသက် ၈၀ အရွယ်ရှိပြီဖြစ်ပြီး ကျန်းမာရေးပြဿနာများ ဆက်လက်ခံစားနေရဆဲ ဖြစ်ကြောင်း ထောက်ပြခဲ့သည်။ ထို့ပြင် ဒေါ်အောင်ဆန်းစုကြည်၏ နှလုံးရောဂါ အခြေအနေမှာ ပိုမိုဆိုးရွားလာနေသည်ဟု နားလည်ထားပြီး၊ “နှလုံးရောဂါက ဘယ်အချိန်မဆို အသက်ဆုံးသွားနိုင်တယ်ဆိုတာ ကျနော်တို့အားလုံး သိပါတယ်” ဟု သား ဖြစ်သူ Kim Aris က ရိုက်တာ (Reuters) သတင်းဌာနနှင့် အင်တာဗျူးရာတွင် ထည့်သွင်းပြောဆိုထားသည်။။ မိသားစု၊ ရှေ့နေများနှင့် အဆက်အသွယ် လုံးဝဖြတ်တောက်ခံထားရသော မိခင်၏ လုံခြုံရေးသည် ၎င်း၏ အဓိက စိုးရိမ်စရာဖြစ်ကြောင်း ပြောသည်။ ၎င်းက မိခင်ဖြစ်သူသည် နေပြည်တော်၌ အကျဉ်းချခံထားရသည်ဟု ယုံကြည်ပြီး လွန်ခဲ့သည့် နှစ်နှစ်က နောက် ဆုံး ရရှိခဲ့သော စာထဲတွင် အကျဉ်းခန်းတွင်း နွေနှင့် ဆောင်းရာသီတို့၌ အပူချိန်လွန်ကဲမှုကို ခံစားရကြောင်း ရေးသားထားသည်ဟုလည်း ထုတ်ဖော်ခဲ့သည်။ Kim Aris က ကမ္ဘာအနှံ့ ပဋိပက္ခများစွာ ဖြစ်ပွားနေချိန်တွင် လူအများ မြန်မာနိုင်ငံအကြောင်းကို မေ့လျော့နေ မည်ကို စိုးရိမ်မိကြောင်း ပြောသည်။ ဒေါ်အောင်ဆန်းစုကြည်သည် အရင်က နိုင်ငံတကာ၏ အလေးထားမှုကို အလွန်ရရှိခဲ့သော်လည်း ရခိုင်ပြည် အရေးအခင်းကြောင့် နိုင်ငံတကာပုံရိပ် ကျဆင်းသွားပြီးနောက် မြန်မာ့အရေးကို လူအများ လျစ်လျူရှုလာ ကြောင်း ထောက်ပြခဲ့သည်။ Kim Aris က မိခင်ဖြစ်သူ၏ လွတ်လပ်မှု ဆုံးရှုံးရခြင်းသည် မြန်မာပြည်သူ သန်းပေါင်းများစွာ၏ လွတ်လပ်မှုကို ထင်ဟပ်နေကြောင်းနှင့် "All in One Piece" လှုပ်ရှားမှုသည် လူသန်းပေါင်းများစွာအတွက် ဂုဏ်သိက္ခာ၊ တရားမျှတမှုနှင့် ငြိမ်းချမ်းရေးကို ပြန်လည် ဖော်ဆောင်ရန် ဖြစ်ကြောင်း ရှင်းပြသည်။ ၎င်းက မြန်မာနိုင်ငံသည် ပဋိပက္ခလမ်းကြောင်းကို တစ်ယောက်တည်း ရုန်းကန်နေရသည်ဟု ထောက်ပြပြီး နိုင်ငံတကာ အသိုက်အဝန်းကို ပြတ်ပြတ်သားသား ရပ်တည်ရန် တောင်းဆိုခဲ့သည်။ “ခင်ဗျားတို့ရဲ့ သံတမန်ရေးရာ ဖိအားပေးမှုဟာ အရေးကြီးပါတယ်။ ခင်ဗျားတို့ရဲ့ ပြတ်ပြတ်သားသား ပြောဆိုလုပ်ဆောင်လိုစိတ်ဟာ အသက်တွေကို ကယ်တင်နိုင်ပါလိမ့်မယ်” ဟု ၎င်းက တိုက်တွန်းထားသည်။ Kim Aris သည် စစ်ကော်မရှင်၏ ရွေးကောက်ပွဲများကို ပယ်ချရန်၊ နိုင်ငံရေးအကျဉ်းသားများ လွတ်မြောက်ရေး ကို တောင်းဆိုပေးရန်နှင့် ကမ္ဘာလုံးဆိုင်ရာ စင်မြင့်ပေါ်မှာ မြန်မာနိုင်ငံ မမေ့လျော့ခံရဖို့ အားထုတ်ပေးရန် ဂျပန် နိုင်ငံရေးသမားများ၊ အစိုးရအရာရှိများနှင့် တွေ့ဆုံစဉ် မေတ္တာရပ်ခံခဲ့သည်။ ပြည်တွင်းပြည်ပရှိ မြန်မာပြည်သူများအား ရည်ညွှန်းပြောဆိုရာတွင် ဒီမိုကရေစီရေး လှုပ်ရှားမှုသည် လေးနှစ် ကျော် ကြာမြင့်နေပြီဖြစ်သော်လည်း အရှုံးမပေးဘဲ ရုန်းကန်ခဲ့ကြသည့်အတွက် ချီးကျူးခဲ့သည်။ ဒေါ်အောင်ဆန်းစုကြည်အား စစ်ကော်မရှင်က လူထုလှုံ့ဆော်မှု၊ အဂတိလိုက်စားမှု စသည့် အမှုပေါင်းစုံဖြင့် စုစုပေါင်း ထောင်ဒဏ် ၂၇ နှစ် ချမှတ်ထားပြီး လက်ရှိတွင် နေပြည်တော်၌ ထိန်းသိမ်းထားသည်ဟု သတင်းများ ထွက်ပေါ်လျှက်ရှိသည်။ ၎င်း၏ သားဖြစ်သူက မိခင်သည် နိုင်ငံရေးကိစ္စတွင် ဝင်မပါစေလိုသော်လည်း လက်ရှိအနေအထားအရ မိမိကိုယ်တိုင် လုပ်ဆောင်ရခြင်းဖြစ်ကြောင်းလည်း ထုတ်ဖော်ခဲ့သည်။  ဓါတ်ပုံ - Kim Aris - Htein Lin ကိုးကား - Reuters

ဒေါ်အောင်ဆန်းစုကြည် သေဆုံးနေပြီး ဖြစ်နေမှာကို စိုးရိမ်ကြောင်း သားဖြစ်သူ ပြော

ဒေါ်အောင်ဆန်းစုကြည် ကျန်းမာကြောင်း သက်သေပြရန် စစ်ကော်မရှင်ကို သားဖြစ်သူ ကိုထိန်လင်း တောင်းဆို သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၁ ရက်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ကျန်းမာရေးနှင့်ပတ်သက်ပြီး သားငယ်ဖြစ်သူ ကိုထိန်လင်း (ခေါ်) Kim Aris က ၎င်း၏ မိခင် ကျန်းမာရေး ကောင်းမွန်နေကြောင်း သက်သေပြရန် စစ်ကော်မရှင် အား တောင်းဆိုလိုက်သည်။ စစ်ကော်မရှင် ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဒေါ်အောင်ဆန်းစုကြည်၏ ကျန်းမာရေး ဆိုးရွား နေသည်ဟူသော သတင်းများသည် မဟုတ်မှန်ကြောင်း ငြင်းဆိုခဲ့ပြီးနောက် ကိုထိန်လင်း က လူမှုကွန်ရက် စာမျက်နှာမှ တစ်ဆင့် စက်တင်ဘာလ ၁၀ ရက်နေ့တွင် တောင်းဆိုလိုက်ခြင်း ဖြစ်သည်။ ကိုထိန်လင်းက “စစ်တပ်ရဲ့ ပြောရေးဆိုခွင့်ရှိသူက ‘မေမေ နေမကောင်းဘူး’ ဆိုတာ မမှန်ကန်တဲ့သတင်းလို့ ဆိုတယ်။ ဒါဆိုရင် မေမေ့ ကျန်းမာရေး အခြေအနေ အတိအကျကို အတည်ပြုဖို့ မေမေနဲ့ တိုက်ရိုက် ဆက်သွယ်ခွင့်ကို ကျနော် တောင်းဆိုပါတယ်” ဟု ပြောသည်။ စက်တင်ဘာလ အစောပိုင်းတွင် အသက် ၈၀ အရွယ် ဒေါ်အောင်ဆန်းစုကြည်မှာ နုလုံးပိုင်းဆိုင်ရာ အခြေအနေ ပိုဆိုးလာနေပြီး အရေးပေါ် ဆေးကုသမှု လိုအပ်နေကြောင်း သားဖြစ်သူ ကိုထိန်လင်းက ထုတ်ဖော်ပြောဆိုခဲ့ သည်။ ဒေါ်အောင်ဆန်းစုကြည်သည် အကျဉ်းကျနေသည့် အချိန်ကာလအတွင်း လုံလောက်သော ဆေးဝါးကုသမှု မရသည့်အပြင် အခြေခံ လူ့အခွင့်အရေးများလည်း ဆုံးရှုံးနေကြောင်း ကိုထိန်လင်းက ထောက်ပြသည်။ လွတ်လပ်ရေးနှင့် ဒီမိုကရေစီအတွက် တိုက်ပွဲဝင်ခဲ့သည့် မိခင်သည် အကျဉ်းထောင်တွင်း သေဆုံးမှုမျိုးနှင့် မရင်ဆိုင်သင့်ကြောင်းလည်း ၎င်းက ပြောသည်။ ကိုထိန်လင်းက “အသက် ၈၀ အရွယ် ကျနော် မေမေကို ဖမ်းဆီးချုပ်နှောင်ထားတဲ့ အကျဉ်းထောင် အခြေအနေ တွေက မေမေ့ရဲ့ ကျန်းမာရေးကို ထိခိုက်စေမှာ အသေအချာပါ။ မေမေဟာ သူ့ရဲ့ အခြေခံ လူ့အခွင့်အရေးတွေ ကို ပိတ်ဆို့ခံနေရပါတယ်။ မြန်မာပြည်သူတွေ၊ မေမေ့ရဲ့ မိသားစုတွေနဲ့ ကမ္ဘာတစ်ဝန်းက မေမေ့အကြောင်း သိ လိုသူတွေဟာ မေမေရဲ့ အမှန်တကယ် အခြေအနေကို သိခွင့်ရှိတယ်။ မေမေ့မှာလည်း အမှန်တရား၊ လွတ်လပ် ခွင့်၊ လူ့ဂုဏ်သိက္ခာနဲ့ နေထိုင်ဖို့ အခွင့်အရေးရှိတယ်” ဟု ဆက် ပြောသည်။ မိခင်ကြီးက နှလုံးအထူးကုဆရာဝန်ကို တွေ့ချင်ကြောင်း တောင်းဆိုထားသော်လည်း ယနေ့အချိန်ထိ မည်သည့် နေရာတွင် ထိန်းသိမ်းခံရသည်ကိုပင် မသိရသေးဘူးဟု ဆိုသည်။ ဒေါ်အောင်ဆန်းစုကြည်ကို စစ်ကော်မရှင်တပ်က နှစ်ပေါင်း ၂၀ ကျော် ထောင်ဒဏ်ချမှတ်ထားခြင်း ဖြစ်သည်။ သားငယ်ဖြစ်သူ ကိုထိန်လင်းက မိခင် ဒေါ်အောင်ဆန်းစုကြည်နှင့် တွေ့ဆုံခွင့်ပေးဖို့အပြင် ဆေးကုသခွင့်ပေးဖို့ကို တောင်းဆိုထားသည်။ အလားတူ အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်ကလည်း ကင်မ်အဲရစ်နှင့် ယခုလ ၆ ရက်နေ့တွင် အွန်လိုင်း၌တွေ့ဆုံစဉ် ဒေါ်အောင်ဆန်းစုကြည်၏ ကျန်းမာရေးအတွက် စိုးရိမ်ကြောင်း ထုတ်ဖော် ပြောကြားခဲ့သည်။ မကြာသေးမီက ဗြိတိန် နိုင်ငံခြားရေး ဝန်ကြီးဟောင်း William Hague ကလည်း ဒေါ်အောင်ဆန်းစုကြည်ကို ချက်ချင်းလွှတ်ပေးရန် တောင်းဆိုထားသည်။ ဒေါ်အောင်ဆန်းစုကြည်၏ ကျန်းမာရေး နှင့် လွတ်မြောက်ရေးအတွက် နိုင်ငံတကာ အသိုင်းအဝိုင်းနှင့် ပြည်သူများ ၏ ဖိအားပေးမှုများ ဆက်လက်မြင့်တက်နေသည်။

ဒေါ်အောင်ဆန်းစုကြည် ကျန်းမာကြောင်း သက်သေပြရန် စစ်ကော်မရှင်ကို သားဖြစ်သူ ကိုထိန်လင်း တောင်းဆို

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ နိုင်ငံတဝှမ်းက အကျဉ်းထောင်များ အတွင်းရှိ နိုင်ငံရေး အကျဉ်းသားများ အားလုံး၏ ကျန်းမာရေးနှင့် အသက် အန္တရာယ်မှာ အထူးစိုးရိမ်နေရဟု အမျိုးသား ညီညွတ်ရေး အစိုးရ (NUG) ပြောသည်။ ဖမ်းဆီး ထိန်းသိမ်းခံနေရသော သမ္မတ ဦးဝင်းမြင့်နှင့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် အပြင် နိုင်ကျဉ်းအားလုံး၏ ကျန်းမာရေး အခြေအနေနှင့် အသက်အန္တရာယ်အတွက် အထူးစိုးရိမ်သည်ဟု NUG က ဆိုသည်။ NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းဘတ်က “နိုင်ငံ့ ခေါင်းဆောင်တွေ ဖြစ်တဲ့ နိုင်ငံတော် သမ္မတ ဦးဝင်းမြင့်၊ နိုင်ငံတော် အတိုင်ပင်ခံ ပုဂ္ဂိုလ် ‌ဒေါ်အောင်ဆန်းစုကြည်တို့ဟာလည်း အကြမ်းဖက် စစ်တပ်ရဲ့ မတရား ဖမ်းဆီးချုပ်နှောင်မှုကို ခံထားရပြီး လုံလောက်တဲ့ ဆေးဝါးကုသမှုတွေ ရရှိမနေကြတာကြောင့် ဒီနိုင်ငံ ခေါင်း ဆောင်တွေနဲ့ နိုင်ငံရေး အကျဉ်းသား အားလုံးရဲ့ ကျန်းမာရေးနဲ့ အသက်အန္တရာယ်ကို အမျိုးသား ညီညွတ်ရေး အစိုးရ အနေနဲ့ အထူးပင် စိုးရိမ်မကင်း ဖြစ်မိပါတယ်” ဟု ပြောသည်။ ဇူလိုင်လ ၁ ရက်နေ့တွင် ပြုလုပ်သော ပြည်သူလူထုနှင့် နိုင်ငံတကာသို့ သတင်းစကား ပြောကြားခြင်း အစီအစဉ် ၌ ဦးနေဘုန်းလတ်က ပြောဆိုလိုက်ခြင်း ဖြစ်သည်။ ဇွန်လ ၂၇ ရက်နေ့က မန္တလေး အိုးဘိုထောင်အတွင်း မန္တလေးတိုင်း လွှတ်တော် ဥက္ကဋ္ဌ ဦးအောင်ကျော်ဦး သည် အချိန်မှီ ဆေးကုသခွင့် မရသောကြောင့် သေဆုံးခဲ့ပြီးနောက် နိုင်ငံရေး အကျဉ်းသားများသည် ထောင်တွင်း ကျန်းမာရေး စောင့်ရှောက်မှု လုံလုံလောက်လောက် မရရှိမှုနှင့် ဖိနှိပ်မှုများကြောင့် မသေဆုံးသင့်ဘဲ အသက် ဆုံးရှုံးနေကြရသည် ဟု ဦးနေဘုန်းလတ်က ဆိုသည်။ အိုးဘိုထောင်တစ်ခု တည်းမှာပင် ၂၀၂၄ ခုနှစ်အတွင်း မန္တလေးတိုင်း ဝန်ကြီးချုပ် ဒေါက်တာဇော်မြင့်မောင် အပါ အဝင် နိုင်ငံရေး အကျဉ်းသား ၃ ဦး ဆက်တိုက် သေဆုံးခဲ့သည်။ ထို့အပြင် မတ်လ ၂၈ ရက်နေ့ကလည်း စစ်ကိုင်းငလျင်အပြင် ဆေးကုသမှု အချိန်မှီမရဘဲ နှောင့်နှေးမှုများကြောင့် မသေဆုံးသင့်ဘဲ သေဆုံးခဲ့ရသည့် နိုင်ငံရေးအကျဉ်းသား အ ယောက် ၅၀ ဦးကျော် ရှိခဲ့သည်။ အဆိုပါ အသက်ဆုံးရှုံးမှုများ အတွက် အကျဉ်းထောင်အတွင်း တာဝန်ရှိသူများ အနေဖြင့် တာဝန်ယူ တာဝန်ခံ ရမည်ဟု ဦးနေဘုန်းလတ်က ဆက်ပြောသည်။ “အကြမ်းဖက် စစ်အုပ်စုရဲ့ လက်အောက်ခံ အကျဉ်းထောင်တွေက အကျဉ်းဦးစီး အရာရှိတွေနဲ့ တာဝန်ရှိသူတွေ အနေနဲ့ နိုင်ငံရေး အကျဉ်းသားတွေ အပေါ် ရက်စက်စွာ ပြုမူ ဖိနှိပ်နေတဲ့ လုပ်ရပ်တွေအတွက် တာဝန်ယူ တာဝန် ခံ ကြရမှာဖြစ်ကြောင်း ပြောကြားလိုပါတယ်။” ထို့အပြင် စစ်ကိုင်းငလျင် လှုပ်ခတ်ခဲ့သည့်နေ့၌ ဒေါ်အောင်ဆန်းစုကြည်၏ ဘယ်ဘက်လက် ဒဏ်ရာရရှိခဲ့ပြီး စိုးရိမ်ရသော အခြေအနေ ရှိနေကြောင်း Suu Foundation က ဇွန်လ ၁၈ ရက်နေ့တွင် ထုတ်ပြန်ထားသည်။ မတ်လ ၂၈ ရက်နေ့က စစ်ကိုင်းမြို့အနီး အခြေပြုလှုပ်ခတ်ခဲ့သော ငလျင်ကြောင့် နေပြည်တော်တွင် ထိခိုက် ပျက်စီးမှု များပြားခဲ့ပြီး ဒေါ်အောင်ဆန်းစုကြည်အား ချုပ်နှောင်ထားသည့် ထောင် အဆောက်အအုံမှာ ပျက်စီးခဲ့ ကာ ဒေါ်အောင်ဆန်းစုကြည်၏ ဘယ်ဘက်လက် ထိခိုက်ဒဏ်ရာရခဲ့သည်ဟု Suu Foundation က ထုတ်ပြန်ထားသည်။

နိုင်ကျဉ်းများ အသက်အန္တရာယ် စိုးရိမ်ရဟု NUG ပြော

ဒေါ်အောင်ဆန်းစုကြည် မွေးနေ့ ကဗျာရွတ်သော နိုင်ကျဉ်းများ တိုက်ပိတ်ခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃ ရက်။ ဒေါ်အောင်ဆန်းစုကြည် မွေးနေ့တွင် ကဗျာရွတ်ဖတ် ဂုဏ်ပြုကြသည့် နိုင်ကျဉ်းများ ရိုက်နှက် တိုက်ပိတ်ခံထားရ သည်။ မန္တလေးတိုင်း၊ မြင်းခြံခရိုင်၊ မြင်းခြံအကျဉ်းထောင်တွင် နိုင်ငံရေးအကျဉ်းများကို ထောင်အာဏာပိုင်များနှင့် အကျဉ်းဦးစီးဌာန ဝန်ထမ်းများက ရိုက်နှက်၍ တိုက်ပိတ်ထားကြသည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ယက် (PPNM) က ထုတ်ပြန်သည်။ PPNM ဦးဆောင် ကော်မတီဝင်ဖြစ်သူ မရောင်နီလင်းက “မြင်းခြံထောင်မှာရှိတဲ့ နိုင်ငံရေး အကျဉ်းသားတွေက ကဗျာ ရွတ်ဖတ်ခဲ့တယ်ပေါ့နော်။ ကဗျာရွတ်ဖတ်ခဲ့မှု အပေါ်မှာ ချက်ချင်းပဲ အဲဒီ လူတွေကို ထုတ်တယ်။ ထုတ် ပြီးတော့ ရိုက်နှက်တယ်။ တချို့လူတွေကိုတော့ ခြေကျင်းခတ်ပြီးတော့ တိုက်ပိတ်ခဲ့တယ်။ ရိုက်နှက်ပြီးတော့ နေပူ လှန်းသေးတယ်ပေါ့နော်။ ၂ ရက်လောက် နေပူခေါ်လှန်းပြီးမှပဲ ခြေကျင်းခတ်ပြီးတော့ တိုက်ပိတ်တာမျိုး တွေ လုပ်ခဲ့တယ်ပေါ့” ဟု ပြောသည်။ ဇွန်လ ၁၉ ရက်နေ့၌ ကျရောက်သည့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် မွေးနေ့တွင် ကဗျာရွတ်ဖတ် ဂုဏ်ပြုခဲ့သဖြင့် ရိုက်နှက်တိုက်ပိတ် ခံထားရခြင်း ဖြစ်သည်။ ဇူလိုင်လ ၂ ရက်နေ့ အထိ တိုက်ပိတ်ခံထားရသည့် နိုင်ကျဉ်းများအား ဆေးကုသခွင့် မပေးဘဲ ထောင်ဝင်စာနှင့် ပါဆယ်များလည်း ပိတ်ထားသဖြင့် အကူညီများ လိုအပ်နေကြသည်ဟု အကျဉ်းဦးစီးနှင့် နီးစပ်သူများက ပြော သည်။ အဆိုပါ ဖြစ်စဉ်မှာ ထောင်စည်းမျဉ်းစည်းကမ်းများ ချိုးဖောက်ခြင်း၊ ထောင်၏ လုံခြုံရေး ပေါက်ကြားသည့် ကိစ္စရပ်များ မဟုတ်သဖြင့် တိုက်ပိတ်သည့် ပြစ်ဒဏ်အား လက်မခံနိုင်ဟု PPNM တာဝန်ရှိသူများက ဆို သည်။ မရောင်နီလင်းက “မြန်မာနိုင်ငံလုံးဆိုင်ရာ နိုင်ငံရေးအကျည်းသားများ ကွန်ယက်အနေနဲ့ ဒီလိုမျိုး ကဗျာလေး ဖတ်ရုံမျှနဲ့ပေါ့နော်။ လူအခွင့်ရေး ချိုးဖောက်နေတဲ့ အကစဝန်ထမ်းတွေ၊ အာဏာပိုင်တွေပေါ့နော် ကျနော်တို့ လူအခွင့်ရေး ပြန်လည်ရရှိတဲ့ အချိန်မှာ တရားမျှတမှု ပြန်လည် ရရှိရန်အတွက် ကြိုးစားအားထုတ်သွား ပါမယ် ရှင့်။ ကြိုးစားဆောင်ရွက်သွားပါမယ်” ဟု ဆက်ပြောသည်။  စစ်ကိုင်းတိုင်း၊ မုံရွာထောင်မှ မန္တလေးတိုင်း၊ အိုးဘိုထောင်သို့ ပြောင်းရွှေ့လာသည့် နိုင်ငံရေးအကျဉ်းသားများ အပါအဝင် အကျဉ်းသား ၂၀၀ ခန့်မှာ ဇွန် ၁၂ ရက်နေ့တွင် ရိုက်နှက်ခံခဲ့ရပြီး ရိုက်နှက်ခံရသူများအတွင်း မုံရွာသပိတ်ခေါင်းဆောင် ကိုဝေမိုးနိုင်မှာ သွေးထွက်လွန်မှုကြောင့် သတိလစ်သွားခဲ့သည်။ အလားတူ မြန်မာတစ်နိုင်ငံလုံးရှိ စစ်ကောင်စီ ထိန်းချုပ်ထားနိုင်ဆဲဖြစ်သော အကျဉ်းထောင်များတွင်လည်း ဒေါ်အောင်ဆန်းစုကြည် မွေးနေ့၌ ကမ်ပိန်း ပြုလုပ်သူများ၊ ကဗျာရွတ်ဖတ်သူများ၊ သံချပ်ထိုးသူများကိုလည်း ဖိနှိပ်မှုများ ပြုလုပ်ခဲ့သေးသည်ဟု ထောင်နှင့် နီးစပ်သူများက ဆိုကြသည်။

ဒေါ်အောင်ဆန်းစုကြည် မွေးနေ့ ကဗျာရွတ်သော နိုင်ကျဉ်းများ တိုက်ပိတ်ခံရ

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အင်ဒိုနီးရှား ကူးတို့ သင်္ဘောမီးလောင်၊ အနည်းဆုံး လူ ၅ ဦး သေဆုံး — August 3, 2026 3:03 pm
တောင်ကိုရီးယားနိုင်ငံတွင် သမိုင်းတစ်လျှောက် အမြင့်ဆုံးအပူချိန် 41.4°C အထိ စံချိန်တင် — August 3, 2026 2:15 pm
အကြမ်းဖက်ဆန့်ကျင်ရေး ဆန္ဒပြရာ အသေခံဗုံးခွဲသဖြင့် ၁၄ ဦး သေဆုံး — August 3, 2026 2:03 pm

Recent Posts

ICRC နှင့် တွေ့ဆုံမှုအပေါ် သားဖြစ်သူ ကင်မ်အဲရစ် ကြိုဆိုပြီး ချက်ချင်းလွှတ်ပေးရန် တောင်းဆို
အင်ဒိုနီးရှား ကူးတို့ သင်္ဘောမီးလောင်၊ အနည်းဆုံး လူ ၅ ဦး သေဆုံး
တောင်ကိုရီးယားနိုင်ငံတွင် သမိုင်းတစ်လျှောက် အမြင့်ဆုံးအပူချိန် 41.4°C အထိ စံချိန်တင်
အကြမ်းဖက်ဆန့်ကျင်ရေး ဆန္ဒပြရာ အသေခံဗုံးခွဲသဖြင့် ၁၄ ဦး သေဆုံး
အမျိုးသမီးဖောက်ခွဲရေးသမားသယ်လာသော ဗုံးပေါက်ကွဲ ပြီး အနည်းဆုံး ၃ ဦး သေဆုံး

Archives

Archives

×Close