NMG Doh – Page 114 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Feb 22

မန္တလေး-မြစ်ကြီးနားလမ်း ပိတ်ဆို့မှုကြောင့် မြစ်ကြီးနားတွင် ကုန်စည်ပြတ်လပ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၁ ရက်။ မန္တလေး-မြစ်ကြီးနားလမ်းပိုင်း ပိတ်ဆို့နေမှုကြောင့် မြစ်ကြီးနားတွင် ကြက်သားတစ်ပိဿာ ၄ သောင်းကျပ်အထိ စံချိန်တင်ဈေးတက်နေပြီး အခြေခံစားသောက်ကုန်များပါ ပြတ်လပ်နေပြီဟု မြို့ခံများက ပြောသည်။ ကချင်ပြည်၏ မြို့တော် မြစ်ကြီးနားသို့ ကုန်စည်များ အဓိက စီးဆင်းရာ မန္တလေး-မြစ်ကြီးနား လမ်းပိုင်းတွင် တိုက်ပွဲများကြောင့် ကုန်ကားများ ပိတ်မိနေသည်မှာ တစ်လဝန်းကျင် ရှိလာပြီဖြစ်ရာ မြို့အတွင်း၌ ကြက်သား ဈေးနှုန်းမှာ တစ်ပိဿာလျှင် ကျပ် ၄ သောင်းအထိ စံချိန်တင် မြင့်တက်လာကြောင်း ဒေသခံများက ပြောသည်။ လက်ရှိ ဈေးကွက်အခြေအနေနှင့်ပတ်သက်၍ အသက် ၅၀ ဝန်းကျင်အရွယ် ကြက်သားဒိုင် အမျိုးသားတစ်ဦးက “ကြက်သားတစ်ပိဿာ ၃ သောင်း ၂ ထောင်ကနေ ၄ သောင်းအထိ တက်သွားတယ်။ တရုတ်ကဝင်တာက ၂ သောင်းခွဲပဲ။ ရေခဲရိုက်ထားတဲ့ဟာတွေ၊ ကျန်းမာရေးနဲ့မညီညွှတ်တဲ့ဟာတွေပေါ့။ ကျနော်တို့ ကြက်ခြံတွေက နေကျ ကြက်သားဈေးက ၄ သောင်းဆိုတော့ ဈေးကအများကြီးကွာနေတာ။ တရုတ်ကလာတဲ့ ကုန်တွေက တော့ မတက်ဘူးပေါ့” ဟု ပြောသည်။ ပြီးခဲ့သည့် ၂၀၂၅ ခုနှစ် ဒီဇင်ဘာလမှစတင်ကာ စစ်ကိုင်းတိုင်း၊ ကန့်ဘလူခရိုင်အတွင်းရှိ မြို့နယ်များတွင် စစ်ကော်မရှင်တပ်နှင့် တော်လှန်ရေးအင်အားစုများ အကြား စခန်းသိမ်းတိုက်ပွဲများ ပြင်းထန်လာခဲ့ခြင်းဖြစ်သည်။ ထိုသို့ စစ်ရေးတင်းမာမှုများကြောင့် မန္တလေး-မြစ်ကြီးနားလမ်းပိုင်းကို နှစ်ဖက်တပ်များက အကန့်အသတ်ဖြင့်သာ သွားလာခွင့်ပြုထားပြီး ကုန်ကားကြီးများမှာမူ လမ်းခရီးအဆင်မပြေမှုကြောင့် ဂိတ်များတွင် ပိတ်မိနေခြင်း ဖြစ်သည်။ တရုတ်-မြန်မာနယ်စပ် ကန်ပိုက်တီဂိတ်မှ တစ်ဆင့် ဝင်ရောက်လာသည့် ကုန်ပစ္စည်းများမှာ ဈေးနှုန်းသက်သာ သော်လည်း မြစ်ကြီးနားမြို့အဝင် ဗလမင်းထင်တံတားရှိ မိုင်းနားဂိတ်တွင် ကုန်ကားများ မကြာခဏ ပိတ်ဆို့ စစ်ဆေးခံရခြင်းကြောင့် မြို့တွင်း၌ ကုန်စည်ပြတ်လပ်မှုနှင့် ဈေးနှုန်းမြင့်တက်မှုကို ပိုမိုဆိုးရွားစေကြောင်း ဒေသခံ များက ထောက်ပြကြသည်။ လက်ရှိတွင် မြစ်ကြီးနားမြို့၌ ငွေတိုးဆန်တစ်အိတ်လျှင် ကျပ် ၈ သောင်းမှ ၁ သိန်းအထိ ဈေးတက်သွားသည့် အပြင် အခြေခံဆေးဝါးများနှင့် အခြားစားသောက်ကုန်များလည်း ပြတ်လပ်လာနေသည်။ လမ်းပိုင်းအခြေအနေနှင့်ပတ်သက်၍ ခရီးသွားကား မောင်းသူတစ်ဦးက “လမ်းကတော့ ဒီလိုပဲ ပိတ်ထားသေး တယ်။ ခရီးသွားကားလေးတွေကတော့ ကွင်းလမ်းတွေကနေသွားလို့ရနေသေးတယ်။ ၄ - ၅ ရက်တော့ ကြာတယ်။ အခုက နေရာတကာကိုပိတ်ထားသေးတယ်” ဟု ပြောသည်။ မြစ်ကြီးနား-မန္တလေးလမ်းပိုင်းရှိ ကိုးပင်ဂိတ်နှင့် ကျောက်တန်းဂိတ်တို့တွင် စစ်ကော်မရှင်တပ်က အထိုင်ချထား ပြီး၊ ခင်ဦးလမ်းဆုံအကျော် ကုက္ကိုကုန်းဂိတ်တွင်မူ အမျိုးသားညီညွတ်ရေး အစိုးရ (NUG) လက်အောက်ခံ ကာကွယ်ရေးတပ်များ၊ အာရက္ခတပ်တော် AA နှင့် နယ်မြေခံ ပကဖ ပူးပေါင်းတပ်များက နေရာယူထားကာ စစ်ရေးအခြေအနေပေါ်မူတည်၍ ခရီးသွားလာခွင့်ကို စိစစ်ခွင့်ပြုနေခြင်းဖြစ်သည်။ အမှတ် (၁) စစ်ဒေသ၏ ဖေဖော်ဝါရီ ၁၁ ရက်နေ့ ထုတ်ပြန်ချက်အရ ကန့်ဘလူနှင့် ကောလင်းမြို့နယ်အတွင်းရှိ စစ်ကော်မရှင်တပ် စခန်းအချို့ကို တော်လှန်ရေးအင်အားစုများက သိမ်းပိုက်နိုင်ခဲ့ပြီး ဖေဖော်ဝါရီလ ဒုတိယ အပတ်အထိ တိုက်ပွဲများ ဆက်လက်ပြင်းထန်နေဆဲဖြစ်ရာ လမ်းကြောင်းများ ပြန်လည်ပွင့်လစ်ရန်မှာမူ ဆက်လက် စောင့်ကြည့်ရမည့် အခြေအနေတွင် ရှိနေသည်။ #ကုန်စည်ပြတ်လပ်မှု #မန္တလေးမြစ်ကြီးနားလမ်းပိတ်ဆို့

မန္တလေး-မြစ်ကြီးနားလမ်း ပိတ်ဆို့မှုကြောင့် မြစ်ကြီးနားတွင် ကုန်စည်ပြတ်လပ်နေ

Feb 22

ထားဝယ်ခရိုင်အတွင်း ကျေးရွာများကို လေကြောင်း၊ ရေကြောင်းမှ ပစ်ခတ်တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၁ ရက်။ ထားဝယ်ခရိုင်၊ သရက်ချောင်းမြို့နယ်အတွင်းရှိ ကျေးရွာငါးရွာထက်မနည်းကို စစ်ကော်မရှင်တပ်က လေကြောင်း မှ ဗုံးကြဲတိုက်ခိုက်ခဲ့သည့် အပြင် ပင်လယ်ပြင်ရှိ စစ်သင်္ဘောပေါ်မှလည်း လက်နက်ကြီးများဖြင့် ပစ်ခတ် တိုက်ခိုက်မှုများ လုပ်ဆောင်နေကြောင်း ဒေသခံရွာသားများက ပြောသည်။ သရက်ချောင်းမြို့နယ်အတွင်းရှိ ချောက်ချောင်းကျေးရွာအနီးကို ဖေဖော်ဝါရီလ ၂၀ ရက်နေ့၊ မွန်းတည့် ၁၂ နာရီခန့်အချိန်တွင် စစ်ကော်မရှင်၏ ဂျက်တိုက်လေယာဉ် တစ်စီးက ဗုံးနှစ်လုံး ကြဲချခဲ့ပြီးနောက် ချောင်းဝပြင်၊ ဂုံညင်းဆိပ်၊ စုံစင်ဖျားနှင့် ပြင်းဖြူသားကျေးရွာများကိုမူ Y-12 လေယာဉ်တစ်စီးက ဗုံး ၁၀ လုံးခန့် ထပ်မံကြဲချတိုက်ခိုက်ခဲ့ခြင်းဖြစ်သည်။ လေကြောင်းတိုက်ခိုက်မှုများ သာမက ကနက်သီရိကျေးရွာအနီး ပင်လယ်ပြင်တွင် ဆိုက်ကပ်ထားသည့် ရေတပ် စစ်သင်္ဘောကလည်း ကျေးရွာများဘက်သို့ လက်နက်ကြီးများဖြင့် အဆက်မပြတ် ပစ်ခတ်နေကြောင်း ဒေသခံ များက ပြောသည်။ မြေပြင်အခြေအနေနှင့် ပတ်သက်၍ အသက် ၅၀ ခန့်အရွယ်ရှိ ချောင်းဝပြင်ရွာသားတစ်ဦးက ယခုကဲ့သို့ ပြော သည်။ “စစ်ကောင်စီရဲ့ ကနက်သီရိရွာအနီး ပင်လယ်ပြင်မှ ရေတပ်စစ်သင်္ဘောဆီကလည်း လက်နက်ကြီးတွေနဲ့ လှမ်းပစ်နေသေးတယ်၊ ဂျက်ဖိုက်တာနဲ့ Y-12 လေယာဉ်တွေနဲ့လည်း ရွာတွေကို ဗုံးကြဲနေတယ်။” ထိုသို့ ဗုံးကြဲတိုက်ခိုက်မှုများအပြင် လေယာဉ်ပေါ်မှ စက်သေနတ်များဖြင့်လည်း လှည့်ပတ်ပစ်ခတ်ခဲ့ခြင်းကြောင့် ဒေသခံများမှာ ဘေးလွတ်ရာသို့ အပူတပြင်း ထွက်ပြေးတိမ်းရှောင်နေကြရသည်။ နေအိမ် အဆောက်အအုံများ နှင့် လူထိခိုက်မှုအခြေအနေ အသေးစိတ်ကိုမူ မသိရှိရသေးပေ။ ယခုကဲ့သို့ စစ်ကော်မရှင်တပ်က လေကြောင်းတိုက်ခိုက်မှုများ ပြုလုပ်လာရခြင်းမှာ ပြီးခဲ့သည့် ဖေဖော်ဝါရီလ ၁၉ ရက်နေ့က သရက်ချောင်းမြို့နယ်၊ မြိတ်-ထားဝယ် လမ်းပိုင်းရှိ စစ်ကော်မရှင်၏ ဝင်းဝစခန်းကို ပြည်သူ့ကာကွယ်ရေး ပူးပေါင်းတပ်များက ဒရုန်းဖြင့် တိုက်ခိုက်ခဲ့ခြင်းကြောင့် ဖြစ်နိုင်ကြောင်း ဒေသခံများက သုံးသပ်နေကြသည်။ အဆိုပါ ဝင်းဝစခန်းသည် ပုလောမြို့နယ်၊ ပလောက်မြို့အနီးရှိ ဆင်ထိုးကြီးကျေးရွာအထိ မြိတ်-ထားဝယ် သွား သည့် အမှတ်(၈) ပြည်ထောင်စု လမ်းမကြီး တစ်လျှောက်တွင် စစ်ကော်မရှင်ဘက်က နောက်ဆုံးထိန်းချုပ်ထား နိုင်သည့် တစ်ခုတည်းသော စခန်းဖြစ်ကြောင်း ဒေသခံများက ဆိုသည်။ လက်ရှိတွင် စစ်ကော်မရှင်တပ်ဘက်က လေကြောင်း၊ ရေကြောင်းပစ်ကူများ အပြင် မြေပြင်တွင်လည်း အင်အား ၂၀၀ ခန့်ပါဝင်သည့် ခြေလျင်စစ်ကြောင်းဖြင့် သရက်ချောင်းမြို့နယ်အတွင်း စစ်ကြောင်းထိုးနေသဖြင့် ဒေသတွင်းစစ်ရေးအခြေအနေမှာ ဆက်လက်တင်းမာနေဆဲဖြစ်သည်။ #ထားဝယ်ခရိုင် #လေကြောင်းတိုက်ခိုက် #စစ်ကော်မရှင် #သရက်ချောင်းမြို့နယ်

ထားဝယ်ခရိုင်အတွင်း ကျေးရွာများကို လေကြောင်း၊ ရေကြောင်းမှ ပစ်ခတ်တိုက်ခိုက်

Feb 22

ထားဝယ် စီးပွားရေး ဇုန်အနီး ကျေးရွာအတွင်း စစ်ကော်မရှင် လက်နက်ကြီးဖြင့် ပစ်ခတ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဖေဖော်ဝါရီ ၂၁ ရက်။ ထားဝယ် အထူးစီးပွား‌ရေးဇုန် အနီးရှိ ကျေးရွာ တစ်ရွာအတွင်းသို့ စစ်ကော်မရှင်တပ်က တိုက်ပွဲဖြစ်ပွားခြင်းမရှိဘဲ ညအချိန်မတော် လက်နက်ကြီးများဖြင့် ရမ်းသမ်းပစ်ခတ်ခဲ့ သဖြင့် ဒေသခံပြည်သူများ အထူးစိုးရိမ်ထိတ်လန့်နေကြသည်။ ထားဝယ်မြစ်၏ အရှေ့ဘက်ကမ်းတွင် အခြေစိုက်ထားသည့် စစ်ကော်မရှင်၏ အမြောက်တပ်ရင်း (အမတ - ၃၀၄) မှနေ၍ ရေဖြူမြို့နယ်ရှိ ရလိုင်ကျေးရွာဘက်သို့ ပြီးခဲ့သည့် ဖေဖော်ဝါရီလ ၁၉ ရက် ည ၉ နာရီခွဲခန့်အချိန်တွင် လက်နက် ကြီးများဖြင့် လေးကြိမ်ထက်မနည်း ပစ်ခတ်ခဲ့ခြင်းဖြစ်သည်။ အဆိုပါ လက်နက်ကြီးကျည်များသည် ကျေးရွာအနီးဝန်းကျင်သို့ ကျရောက်ပေါက်ကွဲခဲ့သော်လည်း လူနှင့် နေအိမ်ထိခိုက်ပျက်စီးမှုတော့ မရှိခဲ့ပေ။ ယခုကဲ့သို့ တိုက်ပွဲမရှိဘဲ ပစ်ခတ်ခံရသည့် အခြေအနေနှင့်ပတ်သက်၍ အသက် ၄၀ ခန့်အရွယ်ရှိ ရလိုင်ရွာသား တစ်ဦးက ယခုကဲ့သို့ ပြောသည်။ “ဖေဖော်ဝါရီလအစတုန်းက စစ်တပ်က အိမ်တွေကို မီးရှို့ဖျက်ဆီးခဲ့ပြီးကတည်းက တိုက်ပွဲမရှိဘဲနဲ့ လက် နက်ကြီးနဲ့ ပစ်ခတ်တာ ဒါဟာ ပထမဆုံးပါပဲ။” ပြီးခဲ့သည့် ဖေဖော်ဝါရီလ ပထမပတ်အတွင်းက ရလိုင်ကျေးရွာနှင့် ထိစပ်နေသည့် ပုဂေါဇွန်းကျေးရွာအနီးတွင် စစ်ကော်မရှင်တပ်နှင့် ပြည်သူ့ကာကွယ်ရေး ပူးပေါင်းတပ်ဖွဲ့များအကြား တိုက်ပွဲများ ပြင်းထန်ခဲ့ဖူးသည်။ ထိုစဉ်က တိုက်ပွဲအပြီးတွင် စစ်ကော်မရှင်တပ်က လက်တုံ့ပြန်သည့်အနေဖြင့် ရလိုင်ကျေးရွာအတွင်းရှိ နေအိမ် ၅၃ ဆောင်နှင့် သစ်တိုထောင့်ကျေးရွာမှ နေအိမ် ၅ ဆောင်တို့ကို မီးရှို့ဖျက်ဆီးခဲ့ကြောင်း ဒေသခံများက ပြောသည်။ လက်ရှိတွင် အိမ်မီးရှို့ခံရသည့် ရွာသားအများစုမှာ ဘုန်းကြီးကျောင်းများနှင့် ဆွေမျိုးများအိမ်တွင် ခိုလှုံနေကြရ ပြီး၊ နေအိမ်တစ်စိတ်တစ်ပိုင်းသာ ပျက်စီးသူများမှာမူ မိမိတို့အစီအစဉ်ဖြင့် ပြန်လည်ပြုပြင်ကာ နေထိုင်နေကြ ရခြင်း ဖြစ်သည်။ ထိုသို့သော ဒုက္ခများကြားမှပင် ယခုကဲ့သို့ ညဘက်တွင် လက်နက်ကြီးများဖြင့် ထပ်မံခြိမ်းခြောက်ခံရခြင်းကြောင့် ဒေသခံများမှာ ညဘက်တွင် ကောင်းမွန်စွာ မအိပ်စက်ရဲဘဲ ဘေးလွတ်ရာသို့ ထွက်ပြေးတိမ်းရှောင်ရန် အမြဲပြင် ဆင်နေကြရသည်။ ထားဝယ် အထူးစီးပွားရေးဇုန် နယ်မြေအတွင်းတွင် စစ်ကော်မရှင်တပ်က လုံခြုံရေးအကြောင်းပြကာ စစ်ကြောင်းထိုးခြင်း၊ လက်နက်ကြီးဖြင့် ပစ်ခတ်ခြင်းနှင့် အရပ်သားနေအိမ်များကို မီးရှို့ခြင်းများ မကြာခဏ လုပ်ဆောင်လေ့ရှိရာ၊ ယခုလုပ်ရပ်မှာလည်း ဒေသခံများအား ကြောက်ရွံ့ထိတ်လန့်စေရန် ရည်ရွယ်ချက်ရှိရှိ လုပ်ဆောင်ခြင်းဖြစ်နိုင်ကြောင်း စစ်ရေးလေ့လာသူများက သုံးသပ်နေကြသည်။ #ထားဝယ် #စစ်ကော်မရှင် #လက်နက်ကြီးပစ်ခတ် #စီးပွားရေးဇုန်

ထားဝယ် စီးပွားရေး ဇုန်အနီး ကျေးရွာအတွင်း စစ်ကော်မရှင် လက်နက်ကြီးဖြင့် ပစ်ခတ်

Feb 20

အမေရိကန်ကို ရောက်ရှိတာ တနှစ်ပြည့်ပြီးနောက် Green Card လျှောက်ထားခြင်း မရှိတဲ့ ဒုက္ခသည်တွေ ဖမ်းဆီးခြင်း ခံရနိုင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၀ ရက်။ မြန်မာအပါအဝင် အမေရိကန်ရောက် ခိုလှုံခွင့် လျှောက်ထားတဲ့ ဒုက္ခသည်တွေဟာ Green Card လျှောက်ထားတာ မရှိသေးရင် အဖမ်းခံရနိုင်တဲ့ အခြေအနေ ကြုံတွေ့နေရပါတယ်။ အမေရိကန် အစိုးရရဲ့ ဖေဖော်ဝါရီလ ၁၈ ရက်နေ့က ထုတ်ပြန်တဲ့ မူဝါဒအသစ်ကြောင့် ဒုက္ခသည်အဖြစ် အမေရိကန်ကို ရောက်ရှိပြီး တစ်နှစ်ပြည့်တဲ့ အခါမှာ အမြဲတမ်းနေထိုင်ခွင့် Green Card မလျှောက်ထားရသေးရင် အဖမ်း ခံရနိုင်ပါတယ်။ ဒါမှမဟုတ် ရင်တော့ စစ်ဆေးမေးမြန်းခံဖို့ သက်ဆိုင်ရာဌာနကို ကိုယ်တိုင်သွားရောက် အစီရင်ခံရမယ် လို့ ဆိုပါတယ်။ ဒီမူဝါဒဟာ အထူးသဖြင့် ဂျိုး ဘိုင်ဒင်အစိုးရလက်ထက် က ရောက်ရှိလာတဲ့ ဒုက္ခသည်သောင်းနဲ့ချီအပေါ် သက်ရောက်မှုရှိနိုင်တယ်လို့ NRP သတင်းလွှာမှာ ဖော်ပြထားပါတယ်။ အစိုးရသစ်က အရင်အစိုးရလက်ထက်က ဝင်ခွင့်ပြုခဲ့တဲ့ ဒုက္ခသည်အားလုံးရဲ့ အခြေအနေကို ပြန်လည်စစ်ဆေး ဖို့ ဆုံးဖြတ်ထားတာကြောင့် သူတို့ရဲ့ တရားဝင်နေထိုင်ခွင့် အဆင့်အတန်း ဆုံးရှုံးနိုင်ခြေ ရှိနေပါတယ်။ အရင်က Green Card မလျှောက်ထားနိုင်သေးရုံနဲ့ ဒုက္ခသည်တွေကို ပြည်နှင်ဒဏ်ပေးတာမျိုး မရှိခဲ့ပါဘူး။ အခု မူဝါဒသစ်ကတော့ Green Card လျှောက်ထားဆဲ ကာလမှာတောင် လူဝင်မှုကြီးကြပ်ရေး အချုပ်ခန်းထဲ ထိန်းသိမ်းထားနိုင်တယ်လို့ ဆိုပါတယ်။ လူဝင်မှုကြီးကြပ်ရေးမှာ လိမ်လည်မှုတွေကို တားဆီးဖို့၊ အမျိုးသားလုံခြုံရေးအတွက် ပြန်လည်စစ်ဆေးဖို့နဲ့ ရာဇဝတ်မှုမှတ်တမ်း ရှိ၊ မရှိ စစ်ဆေးဖို့အတွက် ဒီလိုလုပ်ရတာဖြစ်တယ်လို့ အစိုးရက အကြောင်းပြပါတယ်။ ဒုက္ခသည် ကူညီစောင့်ရှောက်ရေး အဖွဲ့အစည်းတွေ (ဥပမာ- HIAS) ကတော့ ဒါဟာ တရားဝင်ရောက်ရှိနေသူတွေကို မတရားဖမ်းဆီးဖို့ ကြိုးပမ်းတာဖြစ်ပြီး၊ ဒုက္ခသည်တွေအပေါ် ကတိဖျက်တာဖြစ်တယ်လို့ ပြင်းပြင်းထန်ထန် ဝေဖန်နေကြပါတယ်။ မင်နီဆိုတာ (Minnesota) ပြည်နယ်မှာ ဒုက္ခသည်အချို့ကို စတင်ဖမ်းဆီးမှုတွေ ရှိခဲ့တာကြောင့် ဖက်ဒရယ်တရားရုံးမှာ တရားစွဲဆိုမှုတွေ ဖြစ်ပွားနေပါတယ်။ တရားသူကြီးက အချို့သော ဖမ်းဆီးမှုတွေကို ယာယီရပ်တန့်ဖို့ အမိန့်ထုတ်ထားပေမယ့်၊ အစိုးရကတော့ ဒီမူဝါဒကို တစ်နိုင်ငံလုံးအတိုင်းအတာနဲ့ ကျင့်သုံးဖို့ ကြိုးစားနေပါတယ်။ #အမေရိကန် #ဒုက္ခသည် # GreenCard

အမေရိကန်ကို ရောက်ရှိတာ တနှစ်ပြည့်ပြီးနောက် Green Card လျှောက်ထားခြင်း မရှိတဲ့ ဒုက္ခသည်တွေ ဖမ်းဆီးခြင်း ခံရနိုင်

Feb 20

သူခိုးဖမ်းတဲ့ ခြင်္သေ့ရုပ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၀ ရက်။ တရုတ်နှစ်သစ်ကူးပွဲတော်တွေမှာ စင်တို (Sinto) လို့ခေါ်တဲ့ ခြင်္သေ့အက ကပြဖျော်ဖြေတာကို မြင်တွေ့ရတာဟာ ပျော်စရာကောင်းတဲ့ မြင်ကွင်းတစ်ခုပါ။ ဒါပေမဲ့ ပြီးခဲ့တဲ့ ဗုဒ္ဓဟူးနေ့က ထိုင်းနိုင်ငံ ဘန်ကောက်နားက နွန်ထဘူရီခရိုင်က ဘုရားကျောင်းပွဲတစ်ခုမှာတော့ အဲဒီခြင်္သေ့ကပြမှုဟာ ပျော်ပွဲရွှင်ပွဲသက်သက်မဟုတ်ဘဲ "ရာဇဝတ်သားဖမ်းပွဲ" တစ်ခု ဖြစ်သွားခဲ့ပါတယ်။ ဘန်ကောက်ရဲတပ်ဖွဲ့ဟာ လက်သွက်လွန်းတဲ့ ဝါရင့်သူခိုးတစ်ယောက်ကို ဖမ်းဖို့ အတော်လေး ခေါင်းခဲနေခဲ့ရပါတယ်။ အသက် ၃၃ နှစ်အရွယ်ရှိတဲ့ ဒီသံသယရှိသူဟာ ဘန်ကောက်က ရဲမှူးကြီးတစ်ယောက်ရဲ့ အိမ်ကိုတောင် (၃) ကြိမ်တိုင်တိုင် ဝင်ရောက်ခိုးယူခဲ့ပြီး ဘတ် ၂ သန်း (အမေရိကန်ဒေါ်လာ ၆၄,၀၀၀ ခန့်) တန်ဖိုးရှိ ပစ္စည်းတွေကို ယူဆောင်သွားခဲ့သူပါ။ သူ့ကိုဖမ်းဖို့ ရဲတပ်ဖွဲ့က အကြိမ်ကြိမ် ကြိုးစားခဲ့ပေမဲ့ ရဲကိုမြင်တာနဲ့ ချက်ချင်းရိပ်မိပြီး သူဟာ လက်မတင်လေးတွေ ထွက်ပြေးလွတ်မြောက်သွားလေ့ရှိတာကြောင့် ရဲတပ်ဖွဲ့က အစီအစဉ်သစ်တစ်ခုကို တီထွင်လိုက်ပါတော့တယ်။ တရုတ်နှစ်သစ်ကူး အငွေ့အသက်တွေ ကျန်နေသေးတဲ့ ဘုရားကျောင်းပွဲအတွင်း ရဲတပ်ဖွဲ့ဟာ ရဲယူနီဖောင်းတွေ၊ အရပ်ဝတ်တွေကို စွန့်ခွာပြီး "ခြင်္သေ့ဝတ်စုံ" ကို ရွေးချယ်ခဲ့ပါတယ်။ ရွှေရောင်နဲ့ အနီရောင် ရောထားတဲ့ ခြင်္သေ့ဝတ်စုံအောက်မှာ ရဲအရာရှိတွေ ပုန်းအောင်းပြီး သံသယရှိသူရှိရာဆီကို ပွဲလမ်းသဘင် ကပြဖျော်ဖြေသူတွေအသွင်နဲ့ တဖြည်းဖြည်း ကခုန်ပြီး ချဉ်းကပ်သွားခဲ့ပါတယ်။ သံသယရှိသူကတော့ ဘေးမှာကခုန်နေတဲ့ ခြင်္သေ့ဟာ သူ့ကိုဖမ်းမယ့်သူတွေလို့ အိပ်မက်တောင် မက်ခဲ့ပုံ မရပါဘူး။ အခွင့်သာတဲ့အချိန်မှာတော့ ခြင်္သေ့ခေါင်းကို ကိုင်ထားတဲ့ ရဲအရာရှိဟာ ဝတ်စုံကို ခွာချပြီး သံသယရှိသူကို လျှပ်တစ်ပြက်အတွင်း မြေပြင်ပေါ် ဖိနှိပ်ဖမ်းဆီးလိုက်ပါတော့တယ်။ ရဲတပ်ဖွဲ့ဟာ သူခိုးဆီကနေ ရောင်းချလိုက်တဲ့ "ဘုရားရုပ်ပွားတော် အဆောင်” (Amulets)" တွေကို ခြေရာခံခဲ့ပါတယ်။ အဲဒီလို ခြေရာ ခံရာကနေ သံသယ ရှိသူဟာ နွန်ထဘူရီက ဘုရားကျောင်းတွေကို မကြာခဏ လာတတ်မှန်း သိခဲ့ရတာပါ။ သူဟာ ပါးနပ် လွန်းတာကြောင့် ရဲတွေက ရဲဝတ်စုံနဲ့ မဖမ်းတော့ပါဘူး။ ပွဲတော်ရဲ့ အရှိန်အဝါကို အကာအကွယ်ယူပြီး ဒီလို "ကိုယ်ဖျောက်ဗျူဟာ" ကို အသုံးပြုခဲ့ရခြင်း ဖြစ်ပါတယ်။ ဖမ်းဆီးခံရသူကတော့ သူခိုးမှုတွေကို ဝန်ခံသွားခဲ့ပြီး ခိုးယူရတဲ့ ငွေတွေကို မူးယစ်ဆေးဝါးသုံးစွဲဖို့နဲ့ လောင်းကစားလုပ်ဖို့ အသုံးပြုခဲ့တယ်လို့ ထွက်ဆိုသွားပါတယ်။ #ခြင်္သေရုပ် #ထိုင်းရဲ #သူခိုးဖမ်းပွဲ

သူခိုးဖမ်းတဲ့ ခြင်္သေ့ရုပ်

Feb 20

ဂါဇာပြန်လည်ထူထောင်ရေးအတွက် အသစ်ဖွဲ့လိုက်သော ငြိမ်းချမ်းရေးဘုတ်အဖွဲ့က ဒေါ်လာ ၇ ဘီလီယံ ကူညီမည်

Feb 20

ဗြိတိန် တော်ဝင် မင်းသားဟောင်း အင်ဒရူး ဖမ်းဆီးခံရပြီး ပြန်လည် လွတ်မြောက်၊ စစ်ဆေးခံနေရဆဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၀ ရက်။ ဗြိတိန်တော်ဝင်မင်းသားဟောင်း အန်ဒရူး မောင့်ဘက်တန် ဝင်ဆာ (Andrew Mountbatten-Windsor) သည် ဂျက်ဖရီ အပ်စတိန်း (Jeffrey Epstein) အရှုပ်တော်ပုံနှင့် ဆက်စပ်၍ ဖမ်းဆီးစစ်ဆေး ခံရပြီးနောက် ပြန်လည်လွတ်မြောက်လာသော်လည်း စုံစမ်းစစ်ဆေးမှုများ ဆက်လက်ရင်ဆိုင် နေရဆဲဖြစ်သည်။ အန်ဒရူးသည် နှစ်ပေါင်း ၄၀၀ နီးပါးအတွင်း ဖမ်းဆီးခြင်းခံရသည့် ပထမဆုံးသော ဗြိတိန်တော်ဝင်မိသားစုဝင် အဆင့်မြင့်ပုဂ္ဂိုလ် ဖြစ်သည်။ ဗြိတိန်ဘုရင် ချားလ်စ် အမှတ် (၃) ၏ ညီတော် မင်းသားဟောင်း အန်ဒရူးသည် အစိုးရရာထူးဖြင့် တာဝန်ထမ်းဆောင်စဉ်အတွင်း မလျော်မကန် ပြုမူခဲ့သည်ဟူသော စွပ်စွဲချက်ဖြင့် ဖေဖော်ဝါရီလ ၁၉ ရက်နေ့တွင် ဖမ်းဆီးခံခဲ့ရသည်။ ၁၂ နာရီနီးပါးကြာ စစ်ဆေးမေးမြန်းခံရပြီးနောက် ၎င်းကို ပြန်လည်လွှတ်ပေးခဲ့သော်လည်း အမှုမှာ ပြီးပြတ်သွားခြင်း မဟုတ်ဘဲ စုံစမ်းစစ်ဆေးမှုများ ဆက်လက်ပြုလုပ်နေဆဲ ဖြစ်သည်။ အန်ဒရူးသည် ဗြိတိန်နိုင်ငံ၏ ကုန်သွယ်ရေး အထူးကိုယ်စားလှယ်အဖြစ် ၁၀ နှစ်ကြာ တာဝန်ယူစဉ်အတွင်း နျူကလီးယားနှင့် ကုန်သွယ်ရေးဆိုင်ရာ လျှို့ဝှက်ချက်များ အပါအဝင် ထိရှလွယ်သည့် အစိုးရသတင်းအချက်အလက်များကို လိင်ပိုင်းဆိုင်ရာ ရာဇဝတ်ကောင် ဂျက်ဖရီ အပ်စတိန်းထံ ပေးပို့ခဲ့သည်ဟု ရဲတပ်ဖွဲ့က သံသယရှိနေသည်။ ဘုရင် ချားလ်စ် (၃) က ဤဖြစ်ရပ်အပေါ် "အလွန်အမင်း စိုးရိမ်ပူပန်မိကြောင်း" ဖော်ပြခဲ့ပြီး "ဥပဒေသည် ၎င်း၏လမ်းစဉ်အတိုင်းသာ ဆက်လက်သွားရမည်" ဟု အလေးပေး ပြောကြားခဲ့သည်။ အန်ဒရူးသည် ၎င်းအပေါ် စွပ်စွဲထားသည့် ပြစ်မှုအားလုံးကို ငြင်းဆိုထားပြီး ကွယ်လွန်သူ အပ်စတိန်း၏ မလျော်ကန်သော အပြုအမူများကိုလည်း မြင်တွေ့ခဲ့ခြင်း သို့မဟုတ် သံသယရှိခဲ့ခြင်း လုံးဝမရှိဟု အခိုင်အမာ ပြောကြားထားသည်။ သို့သော် လတ်တလော ထွက်ပေါ်လာသည့် အစိုးရရာထူး မလျော်မကန်အသုံးပြုမှု စွပ်စွဲချက်များနှင့် ပတ်သက်၍မူ လူသိရှင်ကြား မှတ်ချက်ပေးခြင်း မရှိသေးပေ။ အပ်စတိန်း၏ ကျူးလွန်မှုမှ လွတ်မြောက်လာသူတစ်ဦးက အန်ဒရူးကို ဖမ်းဆီးနိုင်ခြင်းမှာ "အောင်ပွဲအသေးစားလေးတစ်ခု" ဖြစ်ကြောင်းနှင့် အမေရိကန်နိုင်ငံတွင်လည်း တာဝန်ယူမှု တာဝန်ခံမှုရှိစေရန် တောင်းဆိုခဲ့သည်။ #အင်ဒရူး #အပ်စတိန်း #JeffreyEpstein #AndrewMountbattenWindsor

ဗြိတိန် တော်ဝင် မင်းသားဟောင်း အင်ဒရူး ဖမ်းဆီးခံရပြီး ပြန်လည် လွတ်မြောက်၊ စစ်ဆေးခံနေရဆဲ

Feb 20

ဂျာမနီက ပြင်သစ်နှင့် တိုက်လေယာဉ် ပူးတွဲ ထုတ်လုပ်မှုကို ရပ်ဆိုင်းပြီး အမေရိကန် လေယာဉ်များ ဝယ်ယူမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၀ ရက်။ ဂျာမနီနိုင်ငံသည် ပြင်သစ်နိုင်ငံနှင့် ပူးတွဲလုပ်ဆောင်နေသော တိုက်လေယာဉ်သစ် ထုတ်လုပ်ရေးစီမံကိန်းကို စွန့်လွှတ်ကာ အမေရိကန်နိုင်ငံထုတ် F-35 ကိုယ်ပျောက်တိုက်လေယာဉ်များကို ထပ်မံမှာယူရန် စဉ်းစားနေကြောင်း ရိုက်တာ (Reuters) သတင်းဌာနက ဖော်ပြခဲ့သည်။ ဤလုပ်ရပ်သည် ဥရောပ၏ ကိုယ်ပိုင်ကာကွယ်ရေးကဏ္ဍ အားကောင်းစေရန် ရည်ရွယ်သည့် ပြင်သစ်၏ မျှော်မှန်းချက်နှင့် ဆန့်ကျင်ဘက်ဖြစ်နေပြီး ဂျာမနီအနေဖြင့် အမေရိကန်၏ စစ်ဘက်နည်းပညာအပေါ် ပိုမိုမှီခိုလာမည့် အခြေအနေလည်း ဖြစ်သည်။ ဂျာမနီနိုင်ငံသည် ၂၀၂၂ ခုနှစ်အတွင်းက F-35 တိုက်လေယာဉ် အစီးရေ (၃၅) စီး ဝယ်ယူရန် မှာယူထားပြီးဖြစ်သည်။ လက်ရှိတွင် နောက်ထပ် အစီးရေ (၃၅) စီးကျော်ကို ထပ်မံဝယ်ယူရန် ဆွေးနွေးလျက်ရှိရာ လေယာဉ်တစ်စီးလျှင် အမေရိကန်ဒေါ်လာ သန်း ၈၀ ကျော် ကုန်ကျမည် ဖြစ်သည်။ ဂျာမနီက မှာယူသည့် အမျိုးအစားမှာ F-35A ဖြစ်ပြီး ပုံမှန်လေတပ်သုံး ပြေးလမ်းများမှ တက်ဆင်းပြုလုပ်နိုင်သည့် အမျိုးအစား ဖြစ်သည်။ ပြင်သစ်နှင့် ဂျာမနီတို့ ၂၀၁၇ ခုနှစ်ကတည်းက စတင်ခဲ့သော ယူရိုဘီလီယံ ၁၀၀ တန် Future Combat Air System (FCAS) စီမံကိန်းသည် စက်မှုလုပ်ငန်းဆိုင်ရာ ပြိုင်ဆိုင်မှုများကြောင့် ရှေ့မတိုးနိုင်ဘဲ ဖြစ်နေသည်။ သတင်းရင်းမြစ်များအရ နှစ်နိုင်ငံစလုံးသည် တိုက်လေယာဉ်ကို အတူတူထုတ်လုပ်မည့် အစီအစဉ်ကို စွန့်လွှတ်ဖွယ်ရှိပြီး ဒရုန်းနှင့် ဒစ်ဂျစ်တယ်ကွန်ရက်ပိုင်းတွင်သာ ဆက်လက်ပူးပေါင်းဆောင်ရွက်တော့မည်ဟု သိရသည်။ F-35 များကို ဝယ်ယူခြင်းဖြင့် ဂျာမနီအနေဖြင့် နောင်တွင် မျိုးဆက် (၆) တိုက်လေယာဉ် ထုတ်လုပ်ရန်အတွက် အခြားမဟာမိတ်သစ်များ ရှာဖွေရန် အချိန်ရရှိသွားမည်ဖြစ်သည်။ F-35 တိုက်လေယာဉ်၏ ထူးခြားသည့် စွမ်းဆောင်ရည်များ F-35 ကို "ပျံသန်းနေသော ကွန်ပျူတာ" ဟု တင်စားကြပြီး ၎င်း၏ အဓိက စွမ်းဆောင်ရည်များမှာ အောက်ပါအတိုင်း ဖြစ်သည် - • ကိုယ်ပျောက်စနစ် (Stealth Technology): ရေဒါတွင် မပေါ်အောင် ဖုံးကွယ်နိုင်သဖြင့် ရန်သူ့နယ်မြေအတွင်းသို့ သတိမထားမိအောင် ဝင်ရောက်တိုက်ခိုက်နိုင်သည်။ • ၃၆၀ ဒီဂရီ အာရုံခံစနစ်: လေယာဉ်တွင် တပ်ဆင်ထားသော Sensor များမှတစ်ဆင့် အချက်အလက်အားလုံးကို ပေါင်းစပ်ကာ လေယာဉ်မောင်းသူ၏ မျက်မှန် (Helmet) ပေါ်တွင် တိုက်ရိုက်ပြသပေးသည်။ လေယာဉ်မောင်းသူသည် လေယာဉ်ကြမ်းပြင်ကို ငုံ့ကြည့်လျှင်ပင် အောက်ဘက်ရှိ မြင်ကွင်းကို ကင်မရာများမှတစ်ဆင့် ဖောက်မြင်နိုင်သည်။ • ဘက်စုံသုံးနိုင်မှု: တိုက်လေယာဉ်အချင်းချင်း ပစ်ခတ်ခြင်း၊ မြေပြင်ပစ်မှတ်များကို တိုက်ခိုက်ခြင်း၊ ထောက်လှမ်းရေးလုပ်ခြင်းနှင့် အီလက်ထရွန်နစ်စစ်ဆင်ရေး (Electronic Warfare) များတွင် အသုံးပြုနိုင်သည်။ • နျူကလီးယားစွမ်းဆောင်ရည်: အဆင့်မြင့်ဆုံး B61-12 နျူကလီးယားဗုံးများကို ကိုယ်ပျောက်စနစ်မပျက် သယ်ဆောင်ပစ်ခတ်နိုင်ရန် အသိအမှတ်ပြုလက်မှတ် ရရှိထားသည့် တစ်ခုတည်းသော ကိုယ်ပျောက်လေယာဉ် ဖြစ်သည်။ ဤကဲ့သို့ တိုက်လေယာဉ်များ ဝယ်ယူရန် ပြင်ဆင်နေသော်လည်း ဂျာမနီဝန်ကြီးချုပ် ဖရိုင်းဒရစ် မာဇ် (Friedrich Merz) ကမူ အနာဂတ်စစ်ပွဲများတွင် လူမောင်းသည့် တိုက်လေယာဉ်များ လိုအပ်နေဦးမည်လောဟူ၍ မေးခွန်းထုတ်ခဲ့သည်။ ၎င်းက နောက်ထပ် အနှစ် ၂၀ ကြာလျှင် နည်းပညာပြောင်းလဲမှုများကြောင့် လူမောင်းတိုက်လေယာဉ်များ၏ အခန်းကဏ္ဍကို Podcast တစ်ခုတွင် သံသယဖြင့် ပြောကြားခဲ့ခြင်း ဖြစ်သည်။ #ဂျာမဏီ #တိုက်လေယာဉ်

ဂျာမနီက ပြင်သစ်နှင့် တိုက်လေယာဉ် ပူးတွဲ ထုတ်လုပ်မှုကို ရပ်ဆိုင်းပြီး အမေရိကန် လေယာဉ်များ ဝယ်ယူမည်

Feb 20

ထရန့်က အီရန်ကို ၁၀ ရက် အချိန်ပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၂၀ ရက်။ အမေရိကန်သမ္မတ ဒေါ်နယ်ထရန့်က အီရန်နိုင်ငံနှင့် နျူကလီးယားဆိုင်ရာ သဘောတူညီချက်အသစ် တစ်ရပ် ရရှိခြင်း ရှိ၊ မရှိကို လာမည့် (၁၀) ရက်အတွင်း သိရှိရမည်ဖြစ်ကြောင်း ထုတ်ဖော်ပြောကြား လိုက်သည်။ သမ္မတထရန့်က အီရန်အနေဖြင့် အဓိပ္ပာယ်ရှိသော သဘောတူညီချက်တစ်ရပ်ကို အဆိုပါကာလအတွင်း မရရှိခဲ့ပါက "မကောင်းသော အကျိုးဆက်များ" ဖြစ်ပေါ်လာလိမ့်မည်ဟု သတိပေးခဲ့ရာ၊ ယင်းမှာ စစ်ရေးအရ အရေးယူဆောင်ရွက်မှုများ ပြုလုပ်လာနိုင်သည့် အခြေအနေကို ဆိုလိုခြင်းဖြစ်သည်။ လက်ရှိတွင် အမေရိကန်ပြည်ထောင်စုသည် အရှေ့အလယ်ပိုင်းဒေသသို့ လေယာဉ်တင်သင်္ဘော အပါအဝင် စစ်အင်အားများကို တိုးမြှင့်စေလွှတ်ထားပြီး ဖြစ်သည်။ အိမ်ဖြူတော်ကမူ အီရန်အနေဖြင့် ဆိုးကျိုးများကို ရှောင်လွှဲနိုင်ရန် သဘောတူညီချက်တစ်ရပ် ရရှိအောင် ကြိုးပမ်းခြင်းမှာ အသိဉာဏ်ရှိသော လုပ်ရပ်ဖြစ်လိမ့်မည်ဟု တိုက်တွန်းထားသည်။ တစ်ဖက်တွင်လည်း ဆွစ်ဇာလန်နိုင်ငံ၌ အမေရိကန်နှင့် အီရန် ကိုယ်စားလှယ်များအကြား ဆွေးနွေးမှုများ ရှိနေသည်။ သမ္မတထရန့်၏ အထူးစေလွှတ်ရေးမှူးများဖြစ်သည့် စတိဗ်ဝတ်ကော့ဖ် (Steve Witkoff) နှင့် ဂျာရက် ကပ်ရှ်နာ (Jared Kushner) တို့သည် အီရန်ကိုယ်စားလှယ်များနှင့် တွေ့ဆုံဆွေးနွေးမှုများ ပြုလုပ်လျက်ရှိကြောင်း သိရသည်။ သမ္မတထရန့်အနေဖြင့် အီရန်အပေါ် စစ်ရေးအရ အရေးယူရန် ပြင်ဆင်နေသော်လည်း အခြားတစ်ဖက်တွင် ဖိအားပေး ကန့်ကွက်မှုများနှင့် ရင်ဆိုင်နေရသည်။ ဗြိတိန်အစိုးရက အမေရိကန်အနေဖြင့် အီရန်ကို တိုက်ခိုက်မည်ဆိုပါက ဗြိတိန်ပိုင် စစ်အခြေစိုက်စခန်းများကို အသုံးပြုခွင့်ပေးမည်မဟုတ်ကြောင်း အတိအလင်း ပြောကြားထားသည်။ အမေရိကန်လွှတ်တော်တွင် ဒီမိုကရက်တစ်နှင့် ရီပတ်ဘလီကန် အမတ်အချို့က လွှတ်တော်၏ ခွင့်ပြုချက်မပါဘဲ အီရန်ကို စစ်မတိုက်ရန် ကန့်ကွက်နေကြသည်။ ၎င်းတို့သည် "စစ်ပွဲအာဏာဥပဒေ" (War Powers Act) ကို အသုံးပြု၍ သမ္မတ၏ စစ်ရေးဆိုင်ရာ လုပ်ပိုင်ခွင့်ကို ထိန်းချုပ်နိုင်ရန် ကြိုးပမ်းလျက်ရှိသည်။ အီရန်၏ အဓိပတိခေါင်းဆောင် အယာတိုလာ ခါမေနီ ကမူ အမေရိကန်၏ ခြိမ်းခြောက်မှုကို လူမှုကွန်ရက်မှတစ်ဆင့် တုံ့ပြန်ခဲ့သည်။ ၎င်းက အမေရိကန်၏ စစ်သင်္ဘောများကို ပင်လယ်အောက်ခြေသို့ နှစ်မြှုပ်ပစ်နိုင်သည့် လက်နက်များ အီရန်တွင် ရှိနေကြောင်း သတိပေး ခြိမ်းခြောက်ထားသည်။

ထရန့်က အီရန်ကို ၁၀ ရက် အချိန်ပေး

« Prev 1 … 112 113 114 115 116 … 1,114 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို — August 20, 2026 2:35 pm
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ် — August 20, 2026 2:33 pm
ထိုင်း-မြန်မာ နယ်စပ်ဖြတ်ကျော်ရာဇဝတ်မှုများ နှိမ်နင်းရန် စစ်ဦးစီးချုပ်များဆွေးနွေး — August 20, 2026 2:30 pm

Recent Posts

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ်

Archives

Archives

×Close