NMG Doh – Page 113 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Dec 28

လွိုင်ကော် မဲရုံအနီးလျော့တိုက်ဒုံးများ ကျရောက်ပေါက်ကွဲ၊ မဲပေးသူ နည်းပါး

Dec 28

နိုင်ငံ ၆ နိုင်ငံမှ ရွေးကောက်ပွဲ စောင့်ကြည့်သူများ ရောက်ရှိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်က ကြီးမှူး ကျင်းပသည့် ရွေးကောက်ပွဲကို နိုင်ငံအများအပြားက စောင့်ကြည့်သူ စေလွှတ်ခြင်း မရှိခဲ့ပဲ နိုင်ငံ ၆ နိုင်ငံကသာ ရွေးကောက်ပွဲ စောင့်ကြည့်သူများ စေလွှတ်ခဲ့သည်ဟု ပြည်တွင်း သတင်းမီဒီယာ များက ထုတ်ပြန်သည်။ စောင့်ကြည့်သူ စေလွှတ်ခဲ့သည့် နိုင်ငံများမှာ တရုတ်၊ အိန္ဒိယ၊ ရုရှား၊ ဘယ်လာရုစ်၊ ကာဇက်စတန်နှင့် ကမ္ဘောဒီးယား နိုင်ငံများ ဖြစ်သည်။ ဘီလာရုစ် နိုင်ငံမှ စောင့်ကြည့်ရေး အဖွဲ့သည် ၂၅ ရက်နေ့ကတည်းက မြန်မာနိုင်ငံတွင် ရောက်ရှိနေခဲ့သည်။ အနောက်နိုင်ငံများနှင့် အဓိက နိုင်ငံတကာ ရွေးကောက်ပွဲ စောင့်ကြည့်ရေးအဖွဲ့ကြီးများမှာမူ ယနေ့ရွေးကောက်ပွဲကို "လွတ်လပ်ပြီး တရားမျှတသည့် အခြေအနေမရှိ" ဟု ယူဆသဖြင့် စောင့်ကြည့်သူများ စေလွှတ်ခြင်း မပြုခဲ့ကြပါ။ ယင်းတို့တွင် ဥရောပသမဂ္ဂ (EU)၊ The Carter Center၊ ကုလသမဂ္ဂ (UN)နှင့် အာဆီယံ (ASEAN) အသင်းကြီး တို့ ပါဝင်သည်။ အာဆီယံ အသင်းကြီးက မကြာသေးမီက ကျင်းပခဲ့သည့် ထိပ်သီး အစည်းအဝေးတွင် မြန်မာ့ ရွေးကောက်ပွဲကို တရားဝင် စောင့်ကြည့်သူ စေလွှတ်ခြင်း ပြုမည်မဟုတ်ကြောင်း ကြေညာခဲ့သည်။ အဖွဲ့ဝင် တစ်နိုင်ငံချင်းလာရောက်မှုကိုမူ တားမြစ်မည်မဟုတ်ကြောင်းလည်း ဖော်ပြခဲ့သည်။ မြန်မာ စစ်ကော်မရှင်က ဖိတ်ကြားထားပြီး လာရောက်မည်ဟု အကြောင်းပြန်ထားသော နိုင်ငံ ပေါင်း ၁၀ နိုင်ငံရှိပြီး ရောက်ရှိနေသော နိုင်ငံများအပြင် ထိုင်း၊ လာအို၊ ပါကစ္စတန်နှင့် ဖိလစ်ပိုင်နိုင်ငံများ ပါဝင်သည်ဟု စစ်ကော်မရှင် သတင်းရင်းမြစ်များက ပြောသည်။ ယနေ့ကျင်းပနေသော ရွေးကောက်ပွဲသည် နိုင်ငံတစ်ဝန်းလုံးရှိ နယ်မြေအားလုံးတွင် ကျင်းပနိုင်ခြင်း မရှိဘဲ လုံခြုံရေးအရ ကန့်သတ်ချက်များ ရှိနေသည့်အတွက် နိုင်ငံတကာ စောင့်ကြည့်သူများ၏ လှုပ်ရှားမှုမှာလည်း အစိုးရမှ သတ်မှတ်ပေးထားသည့် နေရာအချို့ (အထူးသဖြင့် နေပြည်တော်နှင့် ရန်ကုန်) တွင်သာ အဓိက သွားရောက် ကြည့်ရှုနိုင်မည် ဖြစ်သည်။ မြန်မာနိုင်ငံရှိ မြို့နယ် ၃၃၀ တွင် ယနေ့ရွေးကောက်ပွဲ ကျင်းပခြင်း လုံးဝ မပြုလုပ်နိုင်သော မြို့နယ် ၆၅ မြို့နယ် ရှိသည်။

နိုင်ငံ ၆ နိုင်ငံမှ ရွေးကောက်ပွဲ စောင့်ကြည့်သူများ ရောက်ရှိ

Dec 28

စစ်ကော်မရှင်၏ ဝါဒဖြန့်မှုများ နားမယောင်ရန် နိုင်ငံတကာကို တိုက်တွန်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်၏ ဝါဒဖြန့်မှုများအပေါ် အခြေခံ၍ မြန်မာ့အရေးကို အဆုံးအဖြတ်မပေးရန် နိုင်ငံတကာ အသိုင်း အဝိုင်းကို တော်လှန်ရေးအင်အားစုများ တိုက်တွန်းလိုက်သည်။ စစ်ကော်မရှင်က ကျင်းပရန် ပြင်ဆင်နေသည့် ရွေးကောက်ပွဲသည် ၎င်းတို့၏ ရာဇဝတ်မှုများကို ဖုံးကွယ်ရန် လုပ်ဆောင်သည့် ဝါဒဖြန့်မှုသာဖြစ်ပြီး ယင်းအချက်အပေါ် အခြေခံ၍ မြန်မာ့အရေးကို အဆုံးအဖြတ်မပေးရန် တော်လှန်ရေး အင်အားစုများက နိုင်ငံတကာအသိုင်းအဝိုင်းသို့ တိုက်တွန်းပြောဆိုလိုက်သည်။ စစ်ကော်မရှင်၏ ရွေးကောက်ပွဲ ကော်မရှင်သည် ဒီဇင်ဘာလ ၂၈ ရက်နေ့မှ စတင်ကာ အပိုင်း ၃ ပိုင်းခွဲ၍ ရွေး ကောက်ပွဲ ကျင်းပမည်ဟု ထုတ်ပြန်ထားချိန်တွင် တော်လှန်ရေး အင်အားစုများက မြေပြင်ပကတိ အခြေအနေကို ရှုမြင်ပေးရန် ယခုကဲ့သို့ တုံ့ပြန်လိုက်ခြင်း ဖြစ်သည်။ ကရင်နီပြည်နယ် အင်အားစုကိုယ်စားလှယ် ခွန်းသောမတ်စ်က “နိုင်ငံတကာ အသိုင်းအဝိုင်းတွေကလည်း ကျနော် တို့ရဲ့ ပကတိ အခြေအနေကို မျှော်ကြည့်ပေးဖို့ လိုပါမယ်။ ကျနော်တို့ လူထုတွေရဲ့ အခြေအနေကို မျှော်ကြည့် ပေးဖို့ လိုမယ်ပေါ့နော်။ စစ်ကောင်စီရဲ့ မဟုတ်မမှန် ဝါဒဖြန့်မှုတွေကို ကြည့်ပြီးတော့ ကျနော်တို့ရဲ့ နိုင်ငံကို ဆုံးဖြတ်လိုက်တာမျိုး၊ အဆုံးအဖြတ်တွေ ပေးတာမျိုးကတော့ မလုပ်သင့်ဘူးလို့ ကျနော်ယူဆတယ်” ဟု ပြော သည်။ လက်ရှိတွင် စစ်ကော်မရှင်သည် ရွေးကောက်ပွဲတွင် မဲပေးရန် ပြည်သူများကို နည်းမျိုးစုံဖြင့် ခြိမ်းခြောက်နေ ခြင်း ဖြစ်သည်။ ကရင်နီပြည်တွင် စစ်ဘေးရှောင်များ ပြန်မလာပါက နေအိမ်များကို ချိတ်ပိတ်မည်ဟု အကျပ်ကိုင်နေသည့်အပြင်၊ တက္ကသိုလ် ကျောင်းသားများကိုလည်း ကြိုတင်မဲမပေးပါက ကျောင်းတက်ခွင့်မပေးဟု ဆိုကာ လူ့အခွင့်အရေး ချိုးဖောက်လျက်ရှိသည်။ ကျေးလက်မြေအဖွဲ့ ဒါရိုက်တာ ဒေါ်မူစဲက “ကရင်နီမှာ ကြည့်မယ်ဆိုလို့ရှိရင် စစ်ဘေးရှောင်တွေကို ပြန်မလာလို့ ရှိရင် နေအိမ်တွေ ချိတ်ပိတ်မယ်၊ ပြီးတော့မှ တော်လှန်ရေးအဖွဲ့နဲ့ တစ်ဖွဲ့တည်းလို့ သတ်မှတ်မယ်ဆိုတဲ့ အရာ တွေက ဒါက ခြိမ်းခြောက်မှု ဖြစ်တယ်။ ဒါသည် လူ့အခွင့်အရေးနဲ့ လုံးဝဆန့်ကျင်တယ်။ ဒီအတွက်ကြောင့်မို့လို့ ဒီရွေးကောက်ပွဲ အတုအယောင်ကို နိုင်ငံတကာက လက်မခံဖို့ လိုအပ်တယ်” ဟု ထောက်ပြသည်။ စစ်ကော်မရှင်၏ ရွေးကောက်ပွဲသည် လက်ရှိမြန်မာ့နိုင်ငံရေး အကျပ်အတည်းအတွက် အဖြေမဟုတ်ကြောင်း KNU-NUG (တပ်မဟာ ၄ ပူးပေါင်းညှိနှိုင်းရေးအဖွဲ့) – BCT-4 ပြောရေးဆိုခွင့်ရှိသူ ဦးဟိန်းထက်ကလည်း သတိပေးထားသည်။ “အကြမ်းဖက် စစ်အုပ်စုရဲ့ အတုအယောင် ရွေးကောက်ပွဲဟာ တိုင်းပြည်ရဲ့ လက်ရှိ ဖြစ်ပျက်နေတဲ့ ဒီအကြမ်း ဖက် လုပ်ရပ်တွေ၊ ဒီမငြိမ်းချမ်းမှုတွေကို ဖြေရှင်းဆောင်ရွက်နိုင်လိမ့်မယ်လို့ ဒါ ယုံကြည်နေကြတဲ့ နိုင်ငံတကာ အစိုးရတွေ၊ နိုင်ငံတကာ အသိုင်းအဝန်းကိုလည်း ဒါက အကြမ်းဖက်စစ်အုပ်စုရဲ့ သူ့ရဲ့ အကြမ်းဖက်လုပ်ရပ်တွေ ကို ဖုံးဖိနိုင်ဖို့အတွက် ဒီလှည့်ဖျားတဲ့ လုပ်ရပ်တစ်ခုသာ ဖြစ်တယ်။ ဒီငြိမ်းချမ်းတဲ့ မြန်မာနိုင်ငံရဲ့ လူ့ဘောင် အဖွဲ့ အစည်းကို တည်ဆောက်ဖို့တဲ့နေရာမှာ ဘယ်လိုမှ ဒီရွေးကောက်ပွဲက အဖြေမဟုတ်ဘူး ဆိုတာကို ကောင်းစွာ သိရှိနားလည်စေချင်တယ်။” စစ်ကော်မရှင်သည် ရွေးကောက်ပွဲအတွက် ပြင်ဆင်နေစဉ်အတွင်း၌ပင် အရပ်သားပစ်မှတ်များကို လေကြောင်းမှ ဗုံးကြဲခြင်း၊ ကျေးရွာများကို မီးရှို့ခြင်းနှင့် ပြည်သူများကို သတ်ဖြတ်ခြင်းများကို ဆက်တိုက်ကျူးလွန်နေကြောင်း လူ့အခွင့်အရေး လှုပ်ရှားသူများက ပြောသည်။ ဦးဟိန်းထက်က “ဒီအကြမ်းဖက် စစ်အုပ်စုအနေနဲ့ သူ့ရဲ့ ဒီအကြမ်းဖက် သတ်ဖြတ်မှုတွေ အပါအဝင် သူ့ရဲ့ ရပ် တည်မှုအတွက်၊ သူ့ရဲ့ ကိုယ်ကျိုးအတွက်ဆိုရင် သေချာတာတစ်ခုကတော့ ဒီလိုမျိုး ဒီရွေးကောက်ပွဲကနေ တစ်ဆင့် အဖြေဟုတ်မနေဘဲနဲ့ ပြည်သူတွေကို ဆက်လက်ပြီးတော့ သတ်ဖြတ်မှုတွေကို လုပ်ဆောင်နေဦးမယ် ဆိုတဲ့ဟာကိုလည်း ကျနော်တို့ လက်ခံယုံကြည်ထားတယ်” ဟု ဆက်ပြောသည်။ တော်လှန်ရေး အင်အားစုများက နိုင်ငံတကာ အသိုင်းအဝိုင်းအနေဖြင့် စစ်ကော်မရှင်၏ လုပ်ရပ်များကို အသိ အမှတ် မပြုရန်နှင့် လက်ရှိ တော်လှန်ရေး အင်အားစုများ ဖော်ဆောင်နေသည့် အုပ်ချုပ်ရေးဆိုင်ရာ ကိစ္စရပ်များ ကိုသာ အမြန်ဆုံး အသိအမှတ်ပြု ကူညီပေးကြရန် တောင်းဆိုထားသည်။

စစ်ကော်မရှင်၏ ဝါဒဖြန့်မှုများ နားမယောင်ရန် နိုင်ငံတကာကို တိုက်တွန်း

Dec 28

ရွေးကောက်ပွဲမှာ စစ်ကော်မရှင်၏ လှည့်ကွက်သာ ဖြစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင် ရွေးကောက်ပွဲသည် ချောင်ပိတ်မိနေသည့် စစ်အုပ်စုအတွက် နိုင်ငံရေးထွက်ပေါက်ရှာသည့် လှည့် ကွက်သာ ဖြစ်ကြောင်း တနင်္သာရီတော်လှန်ရေး အင်အားစုများက သတိပေးလိုက်သည်။ စစ်ကော်မရှင်က ကျင်းပရန် ကြံစည်နေသည့် ရွေးကောက်ပွဲသည် နိုင်ငံရေးအရ ချောင်ပိတ်မိနေသည့် စစ်အုပ်စု အတွက် အသက်ရှူပေါက်ရရန်နှင့် ၎င်းတို့၏ ရာဇဝတ်မှုများကို ဖုံးကွယ်ရန် ကြိုတင်ပြင်ဆင်ထားသည့် လှည့် ကွက်တစ်ခုသာ ဖြစ်ကြောင်း တနင်္သာရီတိုင်းအတွင်းရှိ တော်လှန်ရေးအင်အားစုများက နိုင်ငံတကာသို့ အသိပေး ပြောဆိုလိုက်သည်။ KNU တပ်မဟာ (၄) အပါအဝင် တနင်္သာရီတိုင်းရှိ တော်လှန်ရေးအဖွဲ့အစည်း ၁၅ ဖွဲ့ဖြင့် ဖွဲ့စည်းထားသည့် KNU-NUG (တပ်မဟာ ၄ ပူးပေါင်းညှိနှိုင်းရေးအဖွဲ့) BCT- 4 က ဒီဇင်ဘာလ ၂၃ ရက်နေ့တွင် ပူးတွဲသဘောထား ထုတ် ပြန်ချက်တစ်ရပ် ထုတ်ပြန်ကာ ထိုသို့ ပြောဆိုလိုက်ခြင်း ဖြစ်သည်။ အဆိုပါ ပူးတွဲထုတ်ပြန်ချက်နှင့် ပတ်သက်၍ အဖွဲ့အားလုံး၏ ပြောရေးဆိုခွင့်ရှိသူ ဦးဟိန်းထက်က “နိုင်ငံတကာ အစိုးရတွေ နိုင်ငံတကာအသိုင်းအဝန်းကိုလည်း ဒါက အကြမ်းဖက်စစ်အုပ်စုရဲ့ သူ့ရဲ့ အကြမ်းဖက်လုပ်ရပ်တွေကို ဖုံးဖိနိုင်ဖို့အတွက် ဒီလှည့်ဖျားတဲ့ လုပ်ရပ်တစ်ခုသာ ဖြစ်တယ်ဆိုတဲ့ဟာရယ်။ တစ်ဆက်တည်းမှာပဲ ဒီရွေး ကောက်ပွဲက ဒီအတုအယောင် ရွေးကောက်ပွဲကလေပေါ့နော် ဆိုတော့ တိုင်းပြည်ရဲ့ လက်ရှိရှိနေတဲ့ ဒီအကြပ် အတည်းတွေ၊ အကြမ်းဖက်စစ်အုပ်စုရဲ့ ဒီသတ်ဖြတ်မှုတွေ အပါအဝင် ဒီငြိမ်းချမ်းတဲ့ ဒီမြန်မာနိုင်ငံရဲ့ ဒီလူ့ဘောင် အဖွဲ့ အစည်းကို တည်ဆောက်ဖို့တဲ့ နေရာမှာ ဘယ်လိုမှ ဒီရွေးကောက်ပွဲက အဖြေမဟုတ်ဘူးဆိုတဲ့ဟာကိုလည်း ကျနော်တို့ ကောင်းစွာ သိရှိနားလည် သဘောပေါက်စေချင်တယ်ပေါ့” ဟု ပြောသည်။ စစ်ကော်မရှင်သည် ဒီဇင်ဘာလ ၂၈ ရက်နေ့တွင် ပြုလုပ်မည့် အဆိုပါ တရားမဝင် ရွေးကောက်ပွဲကို ဒီမိုကရေစီ အရေခြုံပြယုဂ်အဖြစ် အသုံးချကာ နိုင်ငံတကာ၏ အသိအမှတ်ပြုမှု ရရှိစေရန် အငမ်းမရ ကြိုးပမ်းနေခြင်း ဖြစ် သည်ဟု BCT-4 က ထောက်ပြထားသည်။ ပူးတွဲထုတ်ပြန်ချက်တွင် ပါဝင်သည့် ကော့သောင်းခရိုင် နိုင်ငံရေးအင်အားစု ကိုယ်စားလှယ် ဒေါ်ထိပ်ထားက လည်း စစ်အုပ်စု၏ ဖိနှိပ်မှုများကြားမှ ပြုလုပ်မည့် ရွေးကောက်ပွဲ၏ သဘာဝကို အခုလို မေးခွန်းထုတ်ထားသည်။ “အရပ်သားပြည်သူတွေကို နေ့စဉ်နဲ့အမျှ ပစ်မှတ်ထားပြီး ဖမ်းဆီးထောင်ချခြင်း၊ မတရားသတ်ဖြတ်ခြင်း၊ မတရားပေါ်တာဆွဲ စစ်မှုထမ်းခိုင်းစေခြင်း၊ လေယာဉ်နဲ့ ဗုံးကြဲသတ်ဖြတ်ခြင်း၊ လက်နက်ပစ်ခတ်သတ်ဖြတ်ခြင်း စသည့် ဖိနှိပ်မှုပေါင်းများစွာနဲ့ ခြိမ်းခြောက်ပြီး ပြုလုပ်တဲ့ ဒီမိုကရေစီခံယူတဲ့ ရွေးကောက်ပွဲက စစ်မှန်တဲ့ ဒီမို ကရေစီလို့၊ စစ်မှန်တဲ့ရွေးကောက်ပွဲလို့ ပြောနိုင်ပါသလား။ ဒါကြောင့် ဒီရွေးကောက်ပွဲက အာဏာရှင်အဓွန့်ရှည် တည်တံ့ဖို့၊ အာဏာရှင်ကောင်းစားဖို့လုပ်တဲ့ အတုအယောင်ရွေးကောက်ပွဲသာ ဖြစ်တယ်” ဟု ၎င်းက ပြောသည်။ BCT-4 ၏ ထုတ်ပြန်ချက်တွင် စစ်ကော်မရှင်သည် ၎င်းတို့အလိုကျ ရေးဆွဲထားသည့် ၂၀၀၈ အခြေခံဥပဒေကို ကိုင်စွဲ၍ ရွေးကောက်ပွဲ ကျင်းပရန် ကြိုးပမ်းခြင်းမှာ နိုင်ငံရေး အကျပ်အတည်း၏ အဖြေမဟုတ်ဘဲ တိုင်းပြည်ကို ပိုမိုဆိုးရွားသည့် အခြေအနေသို့သာ တွန်းပို့နေခြင်းဖြစ်ကြောင်း ဖော်ပြထားသည်။ ဦးဟိန်းထက်ကလည်း “ဒီရွေးကောက်ပွဲကနေ တစ်ဆင့်ပေါ့လေနော် ဆိုတော့ နိုင်ငံရေးအရ ချောင်ပိတ်မိနေတဲ့ အကြမ်းဖက်စစ်အုပ်စုအတွက် နိုင်ငံရေးအရ အသက်ရှူပေါက်ရဖို့အတွက်ကို ကြိုးစားလုပ်ဆောင်တဲ့ဟာမျိုး ဖြစ်တယ်ပေါ့လေနော်။ ဒီရွေးကောက်ပွဲကနေတစ်ဆင့် ဒီနိုင်ငံတကာရဲ့ အသိအမှတ်ပြုမှုကို ရယူပြီးတော့ သူ့ရဲ့ အကြမ်းဖက်လုပ်ရပ်တွေ၊ အကြမ်းဖက်မှုတွေ အားလုံးကို ဒါပြည်ဖုံးကားချနိုင်ဖို့အတွက် ဆောင်ရွက်နေတဲ့ လုပ်ရပ်တစ်ခုသာ ဖြစ်တယ်ပေါ့” ဟု စစ်ကောင်စီ၏ ရည်ရွယ်ချက်ကို ထပ်လောင်းရှင်းပြသည်။ ပြည်သူများအား အဓမ္မခြိမ်းခြောက်၍ ပြုလုပ်မည့် အဆိုပါ “သွေးစွန်းသော ရွေးကောက်ပွဲ” သည် ဖက်ဒရယ် ဒီမိုကရေစီ အနှစ်သာရနှင့် ကင်းကွာနေသည့်အတွက် BCT-4 အနေဖြင့် လုံးဝလက်ခံမည် မဟုတ်ဘဲ ပြင်းပြင်း ထန်ထန် ရှုတ်ချကြောင်းနှင့် ရွေးကောက်ပွဲကို အထောက်အပံ့ဖြစ်စေမည့် မည်သည့် ပူးပေါင်းပါဝင်မှုမျိုးကို မဆို ခွင့်ပြုမည်မဟုတ်ကြောင်း အတိအလင်း ကြေညာထားသည်။ လက်ရှိတွင် တနင်္သာရီတိုင်း အတွင်း၌ စစ်ကော်မရှင်က ရွေးကောက်ပွဲ အတွက် ပြင်ဆင်မှုများ ရှိနေသော်လည်း ဒေသခံ တော်လှန်ရေး အဖွဲ့အစည်းများ၏ စစ်ရေးလှုပ်ရှားမှုများကြောင့် နယ်မြေအများအပြားတွင် စိုးမိုးမှု ကင်းမဲ့နေသည့် အခြေအနေဖြစ်ကြောင်း မြေပြင် သတင်းရင်းမြစ်များက ပြောသည်။

ရွေးကောက်ပွဲမှာ စစ်ကော်မရှင်၏ လှည့်ကွက်သာ ဖြစ်

Dec 28

ဝန်ထမ်းများနှင့် ဝန်ထမ်းမိသားစုများ မဲထည့်ရန် USDP ဖိအားပေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ ပုသိမ်မြို့တွင် ဝန်ထမ်းများနှင့် မိသားစုဝင်များအား ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) ကို မဲထည့်ရန် စစ်ကော်မရှင်က ဖိအားပေးနေ သည်ဟု ဒေသခံများက ပြောသည်။ စစ်ကော်မရှင်က ကျင်းပရန်ပြင်ဆင်နေသည့် ရွေးကောက်ပွဲ နီးကပ်လာချိန်တွင် ဧရာဝတီတိုင်းဒေသကြီး၊ ပုသိမ် မြို့ရှိ ဌာနဆိုင်ရာဝန်ထမ်းများနှင့် ၎င်းတို့၏ မိသားစုဝင်များအား (USDP) ကို မပျက်မကွက် မဲပေးကြရန် စစ်ကော်မရှင်ဘက်က ဖိအားပေး ခြိမ်းခြောက်မှုများ ပြုလုပ်နေကြောင်း ဝန်ထမ်းအသိုင်းအဝိုင်းက ပြောသည်. အဆိုပါ ရွေးကောက်ပွဲအတွက် ဝန်ထမ်းများကိုသာမက ၎င်းတို့၏ မိသားစုဝင်များကိုပါ မဲစာရင်းတွင် မဖြစ်မနေပါဝင်စေရန်နှင့် မဲထည့်သည့်အခါတွင်လည်း USDP ပါတီ ကိုသာ ရွေးချယ်ရန် ဌာနဆိုင်ရာအကြီးအကဲများက တိုက်ရိုက်ညွှန်ကြားနေခြင်း ဖြစ်သည်။ ဝန်ထမ်းမိသားစုဝင်တစ်ဦးက “မဲမပေးရင် ဘာဖြစ်သွားမယ် ညာဖြစ်သွားမယ်ဆိုပြီး ကြမ်းကြမ်းတမ်းတမ်းကြီး တော့ မဟုတ်ဘူးပေါ့။ ခုကျင်းပမယ့် လွတ်လပ်ပြီး တရားမျှတတဲ့ ရွေးကောက်ပွဲကနေပြီး ပြည်သူရွေးချယ်တဲ့ ကောင်းမွန်တဲ့ အစိုးရတစ်ရပ် ပေါ်ပေါက်လာမှ တိုင်းပြည် ငြိမ်းချမ်းသာယာဝပြောမှာ၊ အဲဒါကြောင့် မဲထည့်ကြ ရမယ်၊ ကြံ့ခိုင်ရေးပါတီကိုသာ ထည့်ကြဆိုပြီးကို ဒဲ့ပြောတာ” ဟု ပြောသည်။ ထို့ပြင် ဝန်ထမ်းများသည် မိမိတို့နေထိုင်သည့် ရပ်ကွက်များတွင် မဲစာရင်းပါဝင်ခြင်း ရှိ၊ မရှိကို မဖြစ်မနေ သွားရောက် ကြည့်ရှုရပြီး၊ အကယ်၍ မဲစာရင်းတွင် အမည်မပါဝင်ပါက ပုံစံ (၃) ဖြင့် လျှောက်ထားကာ မိမိတို့၏ ဌာနသို့ ပြန်လည်တင်ပြရကြောင်း ဆိုသည်။ အသက် ၅၀ အရွယ် အမျိုးသားဝန်ထမ်းတစ်ဦးက “ကိုယ်တစ်ယောက်တည်းတင် မဟုတ်ဘူး၊ မိသားစုဝင်တွေရဲ့ နာမည်ပါ မပါလာရင် ပြန်ပြီး လျှောက်လွှာတင်ပေး ရသေးတာ။ နောက် ဘယ်ရပ်ကွက်က မဲရုံ၊ မဲနံပါတ်က ဘယ်လောက်ဆိုတာတွေ ဌာနကို ပြန်တင်ပြရသေးတာ” ဟု ဆိုသည်။ ပုသိမ်မြို့ပေါ်တွင် ရွေးကောက်ပွဲ ကျင်းပရန် ရက်ပိုင်းသာ လိုသည့် အချိန်အထိ နိုင်ငံရေးပါတီများ၏ မဲဆွယ် စည်းရုံးမှုမှာ အလွန်အားနည်းနေပြီး၊ မြို့တော်ခန်းမရှေ့တွင် ရွေးကောက်ပွဲတိုက်တွန်းသည့် ဆိုင်းဘုတ်တစ်ခုနှင့် ရေပေါ်ဈေးရှေ့တွင် ပြည်သူ့အကျိုးပြုပါတီ (PPP) ၏ ဆိုင်းဘုတ်တစ်ခုသာ မြင်တွေ့ရကြောင်း မြို့ခံများက ပြောသည်။ နိုင်ငံရေးလေ့လာသူများကမူ ယခုရွေးကောက်ပွဲသည် USDP ပါတီ အသာစီးရစေရန် စနစ်တကျ ရေးဆွဲထား သည့် ပုံစံဖြစ်သည်ဟု ဝေဖန်နေကြသည်။ ပါတီတစ်ခုမှ နုတ်ထွက်စာတင်ထားသူတစ်ဦးက “ကန့်သတ်ချက်တွေ ချုပ်ချယ်ထားတာတွေ အများကြီးပဲ၊ ဘာမှလှုပ်လို့မရဘူး။ နိုင်သူအကုန်ယူရော၊ PR ဆိုပြီး အမျိုးမျိုးလုပ်ထားတာ ကြံ့ခိုင်ရေးအတွက် အသာစီးတွေ ချည်းပဲ။ ရွေးကောက်ပွဲ ဝင်ပြိုင်တာကိုက သူတို့ရဲ့ ရည်ရွယ်ချက် ပြည့်စုံအောင် ဖြည့်ဆည်းပေးနေကြတာ” ဟု ပြောဆိုသည်။ လက်ရှိတွင် ပုသိမ်မြို့၌ လူထုကြား မဲဆွယ်စည်းရုံးမှုများ ထင်သာမြင်သာ မရှိသော်လည်း ရပ်ကွက်များအတွင်း အသံချဲ့စက်များဖြင့် မဲပေးရန် နှိုးဆော်ခြင်းနှင့် ဝန်ထမ်းများကို ဌာနဆိုင်ရာ လမ်းကြောင်းမှ တစ်ဆင့် ဖိအားပေး စည်းရုံးခြင်းများကိုသာ အဓိက လုပ်ဆောင်နေခြင်း ဖြစ်သည်။ စစ်ကော်မရှင်သည် ၎င်းတို့၏ ရွေးကောက်ပွဲကို တရားဝင်မှုရှိစေရန်အတွက် ဝန်ထမ်းထုကို အဓိကအသုံးချကာ မဲရုံများသို့ ပို့ဆောင်ရန် ကြိုးပမ်းနေခြင်းဖြစ်သည်ဟု ဒေသခံများက သုံးသပ်နေကြသည်။

ဝန်ထမ်းများနှင့် ဝန်ထမ်းမိသားစုများ မဲထည့်ရန် USDP ဖိအားပေး

Dec 28

စစ်တပ်မှလာသည့် ဒုထောင်မှူးက နိုင်ကျဉ်းများအား ဦးဆောင် ဖိနှိပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ ဒိုက်ဦးထောင်တွင် စစ်တပ်မှ အသွင်ပြောင်းလာသည့် ဒုထောင်မှူးက နိုင်ငံရေးအကျဉ်းသားများအား ဦးဆောင် ဖိနှိပ်နေသည်ဟု နိုင်ကျဉ်းအရေး လုပ်ဆောင်နေသူများက ပြောသည်။ ပဲခူးတိုင်း၊ ညောင်လေးပင်ခရိုင် အတွင်းရှိ ဒိုက်ဦးအကျဉ်းထောင် (ကျိုက်စကော) ၌ စစ်ကော်မရှင်တပ်မှ အသွင် ပြောင်းလာသည့် ဒုထောင်မှူးက နိုင်ငံရေးအကျဉ်းသားများ အပေါ် စစ်တပ်ပုံစံဖြင့် ပြင်းထန်သော ဖိနှိပ်မှုများ ဦးဆောင် ကျူးလွန်နေခြင်းကြောင့် အကျဉ်းသားများ၏ အသက်အန္တရာယ် စိုးရိမ်ရသည့် အခြေအနေသို့ ရောက်ရှိနေသည်ဟု ဆိုသည်။ ယခု ဒီဇင်ဘာလနှောင်းပိုင်း အတွင်း ထောင်အာဏာပိုင်များက နိုင်ငံရေးအကျဉ်းသား (နိုင်ကျဉ်း) များအပေါ် လူ့အခွင့်အရေး ချိုးဖောက်မှုများ ဆိုးရွားစွာ ပြုလုပ်နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ယက် (PPNM) က ထုတ်ပြန်ထားသည်။ PPNM ပြောရေးဆိုခွင့်ရှိသူ မလင်းက “ဒိုက်ဦးအကျဉ်းထောင်ကလည်း အရင်ကတည်းက အဲလို ညှဉ်းပန်း နှိပ်စက်တာမျိုးတွေ ရှိတယ်။ ဒါပေမဲ့ အခု ပိုဆိုးလာတယ်ဆိုတာက ကျတော့ အခု ဒီ ဒုထောင်မှူး ပြောင်းလာ တယ်ပေါ့နော်။ သူပြောင်းလာကတည်းက ပိုပြီးတော့ ဆိုးတာပေါ့။ သူကတော့ အသွင်ပြောင်းထားတဲ့ လူဖြစ် တာပေါ့နော်။ ဒီစစ်တပ်ဘက်ကနေ အသွင်ပြောင်းလာတာ ဖြစ်တဲ့အတွက် အာ ဒီစစ်တပ်ရဲ့ လက်မရွံ့မှုတွေ သူ့မှာ ရှိနေတယ်ပေါ့နော်။ တစ်မိန့် တစ်အာဏာ ပေါ့နော် စနစ်နဲ့ ထောင်ကို ဒီစစ်တပ်ပုံစံမျိုး ထိန်းချုပ်နေတာ ကို တွေ့ရပါတယ်” ဟု ပြောသည်။ အဆိုပါ ဖိနှိပ်မှုများကို စစ်တပ်မှ အကျဉ်းဦးစီးဌာနသို့ အသွင်ပြောင်းလာသူ ဒုထောင်မှူး က အဓိက ဦးဆောင်နေခြင်းဖြစ်ပြီး၊ ၎င်းရောက်ရှိလာပြီးနောက်ပိုင်း ထောင်တွင်းအခြေအနေများ ပိုမိုဆိုးရွားလာခြင်း ဖြစ်သည်။ ထောင်အာဏာပိုင်များသည် ထောင်တွင်း ရှာဖွေရေးကို အကြောင်းပြကာ နိုင်ငံရေးအကျဉ်းသားများ ကျန်းမာ ရေး အတွက် ဆောင်ထားသည့် ဆေးဝါးများ၊ စာပေလေ့လာသင်ယူသည့် စာအုပ်များနှင့် စာရွက်စာတမ်းများကို လိုက်လံသိမ်းဆည်းလျက်ရှိသည်။ ထိုသို့ သိမ်းဆည်းရာတွင် မိသားစုဝင်များက ခက်ခဲစွာ ပို့ဆောင်ထားသည့် အရေးကြီးဆေးဝါးများပါ ပါဝင်နေ သဖြင့် နာတာရှည် ရောဂါဝေဒနာရှင်များအတွက် ကြီးမားသော အခက်အခဲဖြစ်နေသည်။ ဆေးကုသခွင့်နှင့် ပတ်သက်၍လည်း မလင်းက “ထောင်ထဲမှာ ဆေးကုသခွင့်လည်း ပေးပါတယ်။ အပြင်ဆေးရုံ ကုသခွင့်တွေလည်း ပေးတယ်။ ဒါပေမဲ့ အဆင့်ဆင့် သူတို့က တင်ရတာဖြစ်တယ်။ ကျန်းမာရေး ဖြစ်တဲ့ အခါမျိုးမှာ ဒီဆေးဝါးကို အရင်ပေးတယ်။ ပြီးတော့မှ ဟို မနေနိုင်တော့ဘူး၊ အဆင်မပြေတော့ဘူး ဆိုတော့ကျမှ ထောင်ဆေးရုံကို ပို့တာမျိုး ရှိတယ်” ဟု ပြောသည်။ သို့သော် ထောင်ဆေးရုံ သို့မဟုတ် အပြင်ဆေးရုံသို့ ပို့ဆောင်ရန် တင်ပြရာတွင် အဆင့်ဆင့်သော လုပ်ငန်းစဉ်များ ကြောင့် အချိန်အလွန် ကြန့်ကြာနေရသည်ဟု ဆိုသည်။ “အဲဒီအခါမှာ ထောင်ဆေးရုံ မပို့ခင်မှာလည်း အဆင့်ဆင့် တင်ပြရတာတွေက အချိန်အရမ်းကြာတယ်။ အဲဒီ အခါမှာ ဝန်ထမ်းတွေရဲ့ လျစ်လျူရှုမှုကြောင့်မို့လို့ အချိန်ကြာသွားတာမျိုးတွေ ရှိတယ်။ နောက်ပြီးတော့ အပြင် ဆေးရုံကို ပို့ရမယ်ဆိုလို့ရှိရင် ပိုပြီးတော့ အချိန်ကြာတာပေါ့နော်။ ထောင်မှူးရဲ့ လက်မှတ်တွေ ဘာတွေညာတွေ လိုသေးတာဆိုတော့ သူတို့ဘက်ကနေမှာ အချိန်မီပေါ့နော်။ ဟို မတင်ပို့နိုင်ဘူး ဆိုလို့ရှိရင် ဒီလူရဲ့ အသက် အန္တရာယ်က စိုးရိမ်ရတဲ့ အခြေအနေမျိုး ဖြစ်ပါတယ်” ဟု မလင်းက ဆက်လက် ရှင်းပြသည်။ ထို့အပြင် နိုင်ကျဉ်းများသည် စားနပ်ရိက္ခာ အခက်အခဲနှင့်လည်း ရင်ဆိုင်နေကြရသည်။ မိသားစုက ပို့ပေးသည့် ရိက္ခာများအပြင် ထောင်တွင်းဈေးဆိုင်မှ မတန်တဆဈေးဖြင့် ဝယ်ယူထားသည့် အစားအစာများကိုပါ အာဏာပိုင် များက လိုက်လံ သိမ်းဆည်းလေ့ရှိကြောင်း အကျဉ်းထောင်နှင့်နီးစပ်သူများက ပြောသည်။ အဆိုးရွားဆုံး အချက်မှာ ကျန်းမာရေး စောင့်ရှောက်မှု မလုံလောက်ခြင်းကို တင်ပြတောင်းဆိုသည့် အကျဉ်းသားများအား အမည်စာရင်း မှတ်သားထားပြီး လေးဖက်ထောက် တွားသွားခိုင်းခြင်း၊ ရိုက်နှက်ခြင်းနှင့် တိုက်ပိတ်ခြင်း စသည့် နှိပ်စက်မှုများကိုပါ ပြုလုပ်နေခြင်း ဖြစ်သည်။ ဒိုက်ဦးအကျဉ်းထောင် တည်ရှိရာ ပဲခူးတိုင်းဒေသကြီးသည် စစ်ရေးတင်းမာမှုများ ရှိနေသည့် နယ်မြေဖြစ် သကဲ့ သို့၊ ထောင်အတွင်း၌လည်း အသွင်ပြောင်း စစ်ဘက်အရာရှိများ၏ တင်းကျပ်သော အုပ်ချုပ်မှုကြောင့် နိုင်ငံရေးအကျဉ်းသားများ၏ အခွင့်အရေးများမှာ လုံးဝ ဆုံးရှုံးနေရသည်။ ယခုကဲ့သို့ ဆေးကုသခွင့် နှောင့်နှေးခြင်းနှင့် စနစ်တကျ ဖိနှိပ်နေခြင်းများကြောင့် နောက်နောင်တွင် အကျဉ်းသား များ အသက်သေဆုံးသည်အထိ ဖြစ်လာနိုင်ကြောင်း PPNM က သတိပေး သုံးသပ်ထားသည်။

စစ်တပ်မှလာသည့် ဒုထောင်မှူးက နိုင်ကျဉ်းများအား ဦးဆောင် ဖိနှိပ်

Dec 28

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ ရွေးကောက်ပွဲ ကျင်းပသည့် ယနေ့ ဒီဇင်ဘာလ ၂၈ ရက်နေ့တွင် ရွေးကောက်ပွဲ မကျင်းပနိုင်သည့် မြို့နယ် ၉ ခုကို ထပ်မံ ဖြည့်စွက်ခဲ့သည်။ စစ်ကော်မရှင် ရွေးကောက်ပွဲ မကျင်းပနိုင်သည့် မြို့နယ် ၆၅ ခုအထိ ရှိလာပြီး စံချိန်တင်နယ်မြေများ ဆုံးရှုံးနေ သည်။ စစ်ကော်မရှင်က အတင်းအကျပ် ကျင်းပရန် ကြိုးပမ်းနေသည့် ရွေးကောက်ပွဲကို ယနေ့တွင် စတင်လိုက်သော် လည်း ရွေးကောက်ပွဲကျင်းပရန် နာရီပိုင်းအလိုအထိ မကျင်းပနိုင်သည့် မြို့နယ်စာရင်းကို ထပ်မံတိုးမြှင့် ကြေညာခဲ့သည်။ ထို့ကြောင့် တစ်နိုင်ငံလုံးအတိုင်းအတာဖြင့် မြို့နယ် ၆၅ ခုအထိ ရှိလာပြီး ရွေးကောက်ပွဲ သမိုင်းတစ်လျှောက် မကျင်းပနိုင်သည့် နယ်မြေအရေအတွက် အများဆုံးအဖြစ် စံချိန်တင်သွားခဲ့သည်။ စစ်ကော်မရှင် လက်အောက်ခံ ပြည်ထောင်စု ရွေးကောက်ပွဲကော်မရှင် (UEC) သည် ရွေးကောက်ပွဲ ကျင်းပရန် နာရီပိုင်းအလိုတွင် ချင်းပြည်မှ ၃ မြို့နယ်၊ စစ်ကိုင်းတိုင်းမှ ၂ မြို့နယ်နှင့် ရခိုင်ပြည်မှ ၄ မြို့နယ်၊ စုစုပေါင်း မြို့နယ် ၉ ခုကို ရွေးကောက်ပွဲ မကျင်းပနိုင်သည့် မြို့နယ်စာရင်းထဲသို့ ထပ်မံဖြည့်စွက်ခဲ့ခြင်း ဖြစ်သည်။ ယခင်က ရွေးကောက်ပွဲ မကျင်းပနိုင်ဟု ကြေညာထားသည့် မြို့နယ် ၅၆ မြို့နယ်ရှိရာမှ ယခုထပ်တိုးစာရင်းအရ မြန်မာနိုင်ငံရှိ မြို့နယ်ပေါင်း ၃၃၀ အနက် မြို့နယ် ၆၅ ခုတွင် ရွေးကောက်ပွဲ လုံးဝကျင်းပနိုင်ခြင်း မရှိတော့ကြောင်း စစ်ကော်မရှင်က တရားဝင်ဝန်ခံလိုက်ရခြင်းလည်း ဖြစ်သည်။ အဆိုပါ ထပ်တိုးမြို့နယ်များမှာ ချင်းပြည်ရှိ တွန်းဇံ၊ ဖလမ်းနှင့် ထန်တလန်၊ စစ်ကိုင်းတိုင်းရှိ ကောလင်းနှင့် ဗန်းမောက်၊ ရခိုင်ပြည်ရှိ အမ်း၊ သံတွဲ၊ ဂွနှင့် တောင်ကုတ်မြို့နယ်တို့ ဖြစ်သည်။ မြို့နယ်အဆင့်သာမက ရပ်ကွက် နှင့် ကျေးရွာအုပ်စုအဆင့်တွင်လည်း မကျင်းပနိုင်သည့် နေရာများစွာ ရှိနေသည်။ ဒီဇင်ဘာလ ၂၇ ရက်နေ့ ထုတ်ပြန်ချက်အရ ရွေးကောက်ပွဲ အပိုင်း (၃) တွင် မကျင်းပနိုင်သည့် ရပ်ကွက်နှင့် ကျေးရွာ အုပ်စုပေါင်း ၁,၀၆၄ ခု ရှိနေပြီး ယခင်အပိုင်း (၁) နှင့် (၂) တို့ရှိ မကျင်းပနိုင်သည့် နေရာ ၂,၉၃၁ ခုနှင့် ပေါင်းစပ်လိုက်ပါက တစ်နိုင်ငံလုံးတွင် ရွေးကောက်ပွဲ တစ်စိတ်တစ်ပိုင်း မကျင်းပနိုင်သည့် ရပ်ကွက်၊ ကျေးရွာအုပ်စု ၄,၀၀၀ နီးပါးအထိ ရှိလာသည်။ ယခုကဲ့သို့ စစ်ကော်မရှင်က မကျင်းပနိုင်သည့် နယ်မြေစာရင်းကို နောက်ဆုံးအချိန်အထိ ထုတ်ပြန်နေရခြင်းမှာ မြေပြင်တွင် တော်လှန်ရေးအင်အားစုများ၏ စိုးမိုးမှုနှင့် တိုက်ပွဲများကြောင့်ဖြစ်ကြောင်း ဒေသခံများက သုံးသပ်ကြသည်။ စစ်ကိုင်းတိုင်းမှ ဒေသခံတစ်ဦးက "သူတို့ ဘယ်လိုပဲ အတင်းလုပ်ချင်လုပ်၊ ကျနော်တို့ဆီမှာတော့ ဘယ်သူမှ မဲမပေးသလို သူတို့လည်း ရုံးမဖွင့်နိုင်ဘူး။ မဲစာရင်းကပ်တဲ့ရက်ကတည်းက မြို့ထဲမှာ ပေါက်ကွဲသံတွေ ကြားနေရတာ။ မနေ့ညကဆိုရင်လည်း ဗန်းမောက်ဘက်မှာ အသံတွေ ကြားနေရတယ်။ ဒီရွေးကောက်ပွဲက စာရွက်ပေါ်မှာပဲ ရှိတာပါ” ဟု မြေပြင်အခြေအနေကို ပြောပြသည်။ ထို့အပြင် ရွေးကောက်ပွဲကျင်းပသည့် မြို့ကြီးများတွင်လည်း မဲရုံများအနီး ပေါက်ကွဲမှုများ ဖြစ်ပွားနေသဖြင့် ပြည်သူများမှာ စိုးရိမ်ထိတ်လန့်နေကြသည်။ ဧရာဝတီတိုင်းမှ ဝန်ထမ်းမိသားစုဝင်တစ်ဦးက "မနက်ပိုင်းကစပြီး မဲရုံတွေ ဖွင့်တယ်ဆိုပေမယ့် လမ်းပေါ်မှာ လူသူသိပ်မရှိဘူး။ စစ်တပ်နဲ့ ပျူစောထီးတွေတော့ ရှိတယ်။ မဲမပေးရင် အိမ်တွေကို ချိပ်ပိတ်မယ်၊ တော်လှန် ရေး အဖွဲ့တွေနဲ့ ပတ်သက်တယ်လို့ သတ်မှတ်မယ်ဆိုပြီး ခြိမ်းခြောက်ထားလို့သာ လူတချို့ ထွက်လာကြတာ" ဟု ပြောသည်။ စစ်ကော်မရှင်၏ ၂၀၂၅ ရွေးကောက်ပွဲသည် နိုင်ငံတကာ၏ အသိအမှတ်ပြုမှုရရန်နှင့် နိုင်ငံရေးထွက်ပေါက်ရှာရန် ကြိုးပမ်းခြင်းဖြစ်သော်လည်း၊ မြေပြင်တွင် နယ်မြေ အများအပြား ဆုံးရှုံးနေခြင်းနှင့် ပြည်သူလူထု၏ သပိတ်မှောက် ဆန့်ကျင်မှုများကြောင့် ရွေးကောက်ပွဲမှာ တရားဝင်မှု ကင်းမဲ့နေကြောင်း နိုင်ငံရေးလေ့လာသူများ က သုံးသပ်နေကြသည်။

ရွေးကောက်ပွဲနေ့တွင် မကျင်းပနိုင်သည့် မြို့နယ် ၉ ခု ထပ်တိုး

Dec 28

မန္တလေး၊ မုံရွာ၊ ထားဝယ်၊ ပြည်၊ မြဝတီနှင့် ဖားကန့်တို့တွင် ရွေးကောက်ပွဲနေ့မနက် ပေါက်ကွဲမှုများ ဖြစ်ပွား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၈ ရက်။ စစ်ကော်မရှင်၏ ရွေးကောက်ပွဲကို ယနေ့ (ဒီဇင်ဘာ ၂၈) နံနက်ပိုင်းတွင် စတင်ခဲ့သော်လည်း နာရီပိုင်းအလိုကပင် မြို့အများအပြားတွင် ပေါက်ကွဲမှုများ ဆက်တိုက်ဖြစ်ပွားခဲ့သည်။ မန္တလေး၊ မုံရွာ၊ ထားဝယ်၊ ပြည်၊ မြဝတီနှင့် ဖားကန့်မြို့နယ်တို့တွင် ပေါက်ကွဲမှုများ ဖြစ်ပွားခဲ့သည်။ တစ်နိုင်ငံလုံး အတိုင်းအတာဖြင့် ရွေးကောက်ပွဲ မကျင်းပနိုင်သည့် နယ်မြေအရေအတွက်မှာလည်း စံချိန်တင် များပြားနေသည်။ ပြည်ထောင်စု ရွေးကောက်ပွဲကော်မရှင် (UEC) ၏ ဒီဇင်ဘာ ၂၇ ရက် ထုတ်ပြန်ချက်အရ ယနေ့ပြုလုပ်သည့် ရွေးကောက်ပွဲ အပိုင်း (၃) တွင် ရွေးကောက်ပွဲ မကျင်းပနိုင်သည့် ရပ်ကွက်နှင့် ကျေးရွာအုပ်စုပေါင်း ၁,၀၆၄ ခု ရှိနေသည်။ ယခင်ကြေညာထားသည့် အပိုင်း (၁) နှင့် (၂) တို့မှ စာရင်းများ အပါအဝင်ဆိုလျှင် ယခု ၂၀၂၅ ရွေးကောက်ပွဲတွင် တစ်နိုင်ငံလုံး အတိုင်းအတာဖြင့် မြို့နယ် ၆၄ မြို့နယ်၌ ရွေးကောက်ပွဲ လုံးဝ မကျင်းပနိုင်ခြင်း ဖြစ်ရာ ရပ်ကွက်နှင့် ကျေးရွာ အုပ်စုပေါင်း ၄,၀၀၀ နီးပါးတွင် မကျင်းပနိုင်ခြင်း ဖြစ်သည်။ ဤသည်မှာ မြန်မာ့ရွေးကောက်ပွဲ သမိုင်းတစ်လျှောက် ရွေးကောက်ပွဲ မကျင်းပနိုင်သည့် နယ်မြေဒေသ အများဆုံးအဖြစ် စံချိန်တင်ခဲ့ခြင်းလည်း ဖြစ်သည်။ ရွေးကောက်ပွဲ စတင်ရန် နာရီပိုင်းအလို ဒီဇင်ဘာလ ၂၇ ရက်နေ့ ညပိုင်းတွင် ထားဝယ်၊ ပြည်၊ မြဝတီ နှင့် ဖားကန့် မြို့များ၌ ပြင်းထန်သော ပေါက်ကွဲမှုများ ဖြစ်ပွားခဲ့သည်။ ပဲခူးတိုင်း၊ ပြည်မြို့တွင် မဲရုံများနှင့် ရဲစခန်းအနီး၌ ပေါက်ကွဲမှု သုံးကြိမ်ဖြစ်ပွားခဲ့သည်။ ပြည်မြို့ခံတစ်ဦးက “ဒီမှာက ရွေးကောက်ပွဲကို ဘယ်သူမှ စိတ်မဝင်စားကြဘူး။ တခြားမြို့တွေမှာလိုပါပဲဗျာ။ ဒီနေ့တော့ ရ ဘာတွေဆက်ဖြစ်မယ်ဆိုတာ မသိဘူး။ ပေါက်ကွဲမှုတွေ ဖြစ်နေတော့ လူထုကတော့ စိုးရိမ်နေတာ ပေါ့။ မဆိုင်တဲ့လူတွေကို ဆွဲစိမှာတို့၊ ပေါက်ကွဲမှု ဖြစ်လို့ဆိုပြီး လုံခြုံရေး ပိုပြီး တင်းကျပ်လာမှာတို့က အစပေါ့ ဗျာ။ အခုလည်း စစ်တပ်က ခြိမ်းခြောက်ပြီး မဲရုံတွေကို လာခိုင်းထားတယ်” ဟု မြေပြင်ဖိအားပေးခံရမှု အခြေအနေကို ပြောသည်။ အလားတူ ထိုင်း-မြန်မာနယ်စပ် မြဝတီမြို့တွင်လည်း ကြံ့ခိုင်ရေးပါတီ USDP ရုံး နှင့် ရပ်ကွက်အုပ်ချုပ်ရေးမှူးရုံး များ အနီး၌ ဗုံးသုံးကြိမ်ထက်မနည်း ပေါက်ကွဲခဲ့သည်။ မြဝတီမြို့ခံတစ်ဦးက "အုံးဆိုတဲ့အသံက တော်တော်ကို ကျယ်တာ။ သတိနဲ့ နေရတယ်။ ဒရုန်းနဲ့ ကြဲတာလိုလို၊ ဗုံးကွဲတာလိုလိုပဲ ပြောနေကြတယ်။ ကြံ့ဖွတ်ရုံးကို ချတာ၊ လူထိတယ်လို့ ကြားတယ်" ဟု ဆိုသည်။ ပေါက်ကွဲမှုများဖြစ်ပြီးနောက် စစ်ကော်မရှင်တပ်နှင့် BGF များက မြို့အတွင်း ရမ်းသမ်းပစ်ခတ်မှုများ ပြုလုပ်ခဲ့ ကြောင်း မြေပြင်သတင်းရင်းမြစ်က ပြောသည်။ အလားတူ မန္တလေးမြို့တွင်လည်း ယနေ့ (ဒီဇင်ဘာ ၂၈ ရက်) နံနက် ၁ နာရီကျော် အချိန်တွင် အောင်မြေသာစံ မြို့နယ် အတွင်း ရှော့တိုက်ဒုံးတစ်လုံး ကျရောက်ပေါက်ကွဲခဲ့သဖြင့် အိမ်တွင်းအိပ်ပျော်နေသည့် ဇနီးမောင်နှံ နှစ်ဦး ထိခိုက်ဒဏ်ရာရရှိခဲ့ကာ ဇနီးဖြစ်သူမှာ ခြေကျင်းဝတ်ပြတ်တောက်သွားသည့် စိုးရိမ်ရဒဏ်ရာ ရရှိခဲ့သည်။ စစ်ကိုင်းတိုင်း၊ မုံရွာမြို့ပေါ်တွင် ယမန်နေ့ ည ၁၀ နာရီဝန်းကျင် အချိန်တွင် ပေါက်ကွဲသံများ ထွက်ပေါ်ခဲ့ပြီး စစ်တပ်နှင့်ရဲ၊ ပျူစောထီးများက ကင်းလှည့်နေသည်ဟု မြို့ခံများက ပြောသည်။ လက်ရှိတွင် ရန်ကုန်နှင့် မန္တလေးကဲ့သို့ မြို့ကြီးများ၌ စစ်ကော်မရှင်က လုံခြုံရေးအင်အား အပြည့်ဖြင့် မဲရုံများ ဖွင့်လှစ်ကာ ရွေးကောက်ပွဲကို အရှိန်မြှင့်လုပ်ဆောင်နေသော်လည်း၊ တော်လှန်ရေးအင်အားစုများကမူ ယခု ရွေးကောက်ပွဲကို ဝိုင်းဝန်းဆန့်ကျင်ကြရန်နှင့် မဲရုံများအနီးသို့ မသွားကြရန် ပြည်သူများကို သတိပေးထားသည်။ စစ်ကော်မရှင်ဘက်ကမူ ဝန်ထမ်းများနှင့် ဒေသခံများကို မဲပေးရန် ခြိမ်းခြောက်ဖိအားပေးမှုများ ဆက်တိုက်လုပ် ဆောင်နေသဖြင့် မြေပြင်တွင် တင်းမာမှုများ မြင့်တက်လျက်ရှိသည်။

မန္တလေး၊ မုံရွာ၊ ထားဝယ်၊ ပြည်၊ မြဝတီနှင့် ဖားကန့်တို့တွင် ရွေးကောက်ပွဲနေ့မနက် ပေါက်ကွဲမှုများ ဖြစ်ပွား

Dec 25

ထိုင်းမှာ ဖမ်းမိတဲ့ DJI ဒရုန်းတွေ ဘယ်လောက် အသုံးဝင်သလဲ။ သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ ဒီဇင်ဘာလ ၂၄ ရက်။ လတ်တလော ဘန်ကောက်မြို့တွင် ထိုင်းအာဏာပိုင်များ သိမ်းဆည်းရမိခဲ့သော ဒရုန်းများအနက် တရုတ်နိုင်ငံထုတ် DJI (Mavic Series) ဒရုန်းများသည် စစ်မြေပြင်တွင် အသုံးများသည့် အဆင့်မြင့်ဒရုန်းများ ဖြစ်သည်။ အဆိုပါဒရုန်းများသည် ထိန်းချုပ်သူရှိသည့်နေရာမှ ၁၂ မိုင်အကွာအဝေးအထိ ပြတ်တောက်မှုမရှိဘဲ ပျံသန်းနိုင်သည့်အပြင်၊ ပင်လယ်ရေမျက်နှာပြင်အထက် ပေပေါင်း ၁၉,၀၀၀ (၆,၀၀၀ မီတာ) အထိ မြင့်မားစွာ ပျံသန်းနိုင်သောကြောင့် မြေပြင်မှ သာမန်မျက်စိဖြင့် မမြင်နိုင်သလို အသံကိုလည်း မကြားနိုင်ပေ။ DJI ဒရုန်းများ၏ ကင်မရာမှန်ဘီလူးသည် ၂၈ ဆအထိ ဆွဲကြည့်နိုင်သောကြောင့် လူတစ်ဦး၏ လှုပ်ရှားမှုကို အဝေးမှ အသေးစိတ် ထောက်လှမ်းနိုင်ပါသည်။ အချို့အမျိုးအစားများတွင် အပူလှိုင်းဖမ်းကင်မရာ ပါဝင်သည့်အတွက် ညဖက်အမှောင်အတွင်းရှိ လူနှင့် ယာဉ်များ၏ အပူရှိန်ကို သိရှိနိုင်ပါသည်။ ထို့ပြင် အဆိုပါဒရုန်းများသည် ၀.၅ ကီလိုဂရမ်မှ ၂ ကီလိုဂရမ်အထိ အပိုပစ္စည်းများ သယ်ဆောင်နိုင်သောကြောင့် အောက်ခြေတွင် စက်ခလုတ်ငယ်များ တပ်ဆင်၍ ဗုံးကြဲယာဉ်အဖြစ် ပြောင်းလဲအသုံးပြုနိုင်ပါသည်။ တိကျကောင်းမွန်သော GPS စနစ်ကြောင့် ပစ်မှတ်ပေါ်သို့ တည့်တည့်ရောက်ရှိအောင် မောင်းနှင်နိုင်ပြီး ၎င်းတို့၏ ဘက်ထရီသက်တမ်းမှာ မိနစ် ၃၀ မှ ၄၅ မိနစ်အထိ ရှိသောကြောင့် ထောက်လှမ်းရေးနှင့် တိုက်ခိုက်ရေးလုပ်ငန်းများအတွက် အလွန်ထိရောက်သော ကိရိယာများ ဖြစ်ကြပါသည်။

ထိုင်းမှာ ဖမ်းမိတဲ့ DJI ဒရုန်းတွေ ဘယ်လောက် အသုံးဝင်သလဲ။

« Prev 1 … 111 112 113 114 115 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close