NMG Doh – Page 115 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Dec 23

ရွေးကောက်ပွဲမတိုင်မီ အကြမ်းဖက်မှုနှင့် ဖိနှိပ်မှုများ အရှိန်မြင့်လာကြောင်း ကုလသမဂ္ဂ သတိပေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၃ ရက်။ မကြာမီကျင်းပတော့မည့် စစ်ကောင်စီ၏ ရွေးကောက်ပွဲ မတိုင်မီ အကြမ်းဖက်မှုများ၊ ဖိနှိပ်မှုများနှင့် ခြိမ်းခြောက်မှုများ ပိုမိုပြင်းထန်လာကြောင်း ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံးက ယနေ့ (အင်္ဂါနေ့) တွင် ထုတ်ပြန် သတိပေးလိုက်သည်။ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗော့လ်ကာ တာ့ခ် (Volker Türk) က "မြန်မာစစ်အာဏာပိုင်တွေအနေနဲ့ လူထုကို မဲပေးဖို့အတွက် ရက်စက်တဲ့ အကြမ်းဖက်မှုတွေနဲ့ ဖိအားပေးတာတွေကို ရပ်တန့်ရမှာဖြစ်သလို၊ သဘောထားကွဲလွဲမှုကို ဖော်ပြသူတွေကို ဖမ်းဆီးနေတာတွေကိုလည်း အဆုံးသတ်ရမယ်" ဟု တိုက်တွန်း ပြောကြားခဲ့သည်။ အဆိုပါ ထုတ်ပြန် ကြေညာချက်တွင် ဒီဇင်ဘာ ၂၈ ရက်တွင် ကျင်းပတော့မည့် ရွေးကောက်ပွဲနှင့် ပတ်သက်၍ လွတ်လပ်စွာ ထုတ်ဖော်ပြောဆိုခွင့်ကို ပိတ်ပင်ထားကြောင်း ထောက်ပြထားသည်။ လွတ်လပ်စွာ ထုတ်ဖော်ခွင့် ကျင့်သုံးသူ အမြောက်အမြားသည် "ရွေးကောက်ပွဲ ကာကွယ်ရေးဥပဒေ" ဖြင့် ဖမ်းဆီးခံနေရကြောင်း သိရသည်ဟု ဖော်ပြထားသည်။ ရန်ကုန်တိုင်း၊ လှိုင်သာယာမြို့နယ်အတွင်း ရွေးကောက်ပွဲ ဆန့်ကျင်ရေး ပိုစတာများ ကပ်ခဲ့သည့် လူငယ် ၃ ဦးကို ထောင်ဒဏ် ၄၂ နှစ်မှ ၄၉ နှစ်အထိ ပြင်းထန်သော ပြစ်ဒဏ်များ ချမှတ်ခဲ့သည့် ဖြစ်စဉ်များကိုလည်း ထောက်ပြထားသည်။ ထို့အပြင် ရွေးကောက်ပွဲ ဝါဒဖြန့်ရုပ်ရှင်ကို ဝေဖန်ခဲ့သည့် ရုပ်ရှင်ဒါရိုက်တာ မိုက်တီး၊ သရုပ်ဆောင် ကျော်ဝင်းထွဋ်နှင့် လူရွှင်တော် အုန်းဒိုင်တို့အား ပြည်သူလူထု၏ ယုံကြည်မှု ပျက်ပြားအောင် လုပ်ဆောင်သည်ဟုဆိုကာ ထောင်ဒဏ် ၇ နှစ်စီ ချမှတ်ခဲ့ကြောင်းလည်း ထောက်ပြထားသည်။ မန္တလေးတိုင်း အပါအဝင် ဒေသအသီးသီးရှိ စစ်ဘေးရှောင် ပြည်သူများသည် မဲပြန်ပေးရန် ပျက်ကွက်ပါက တိုက်ခိုက်ခံရမည် သို့မဟုတ် နေအိမ်များ သိမ်းဆည်းခံရမည်ဟု ခြိမ်းခြောက်ခံနေရကြောင်း ကုလသမဂ္ဂက ဆိုသည်။ "မဲပြန်ပေးဖို့ မြို့ကိုပြန်လာကြ၊ ပြန်မလာရင် ဆက်ပြီး ဗုံးကြဲမယ်" ဟု ခြိမ်းခြောက်ပြောဆိုမှုများ ရှိနေကြောင်း သတင်းရင်းမြစ်များကို ကိုးကား၍ ဖော်ပြထားသည်။ မဟာမင်းကြီး တာ့ခ်က စစ်ဘေးရှောင်များအား ၎င်းတို့၏ ဆန္ဒမပါဘဲ ဘေးကင်းမှုမရှိသော နေရာများသို့ အဓမ္မပြန်ခိုင်းခြင်းသည် လူ့အခွင့်အရေး ချိုးဖောက်မှုဖြစ်ကြောင်း ပြောကြားခဲ့သည်။ တစ်ဖက်တွင်လည်း စစ်ကောင်စီကို ဆန့်ကျင်သည့် လက်နက်ကိုင် အဖွဲ့အစည်းများထံမှ ခြိမ်းခြောက်မှုများ ရှိနေကြောင်း ကြေညာချက်တွင် ပါရှိသည်။ ပြီးခဲ့သည့် နိုဝင်ဘာလက ကျိုက်ထိုမြို့နယ်၌ မဲပေးရန် သင်တန်းတက်ရောက်မည့် ဆရာမ ၉ ဦး ဖမ်းဆီးခံရပြီး သတိပေးချက်များဖြင့် ပြန်လည်လွတ်မြောက်ခဲ့သည့် ဖြစ်စဉ်နှင့် ရန်ကုန်ရှိ လှည်းကူးနှင့် မြောက်ဥက္ကလာပ အုပ်ချုပ်ရေးရုံးများတွင် ဗုံးပေါက်ကွဲမှုများကြောင့် ရွေးကောက်ပွဲ ဝန်ထမ်းအချို့ ဒဏ်ရာရရှိခဲ့သည့် ဖြစ်စဉ်များကို ထောက်ပြထားသည်။ "အခုကျင်းပမယ့် ရွေးကောက်ပွဲဟာ အကြမ်းဖက်မှုနဲ့ ဖိနှိပ်မှုတွေကြားမှာ ကျင်းပနေတာ ဖြစ်ကြောင်း သိသာထင်ရှားနေပါတယ်" ဟု လူ့အခွင့်အရေးဆိုင်ရာ မဟာမင်းကြီး က ဆိုသည်။ လက်ရှိ အခြေအနေတွင် လွတ်လပ်စွာ ဖော်ပြခွင့်၊ သင်းပင်းဖွဲ့စည်းခွင့်နှင့် ငြိမ်းချမ်းစွာ စုဝေးခွင့်များ မရှိသည့်အတွက် ပြည်သူများအနေဖြင့် အနှစ်သာရရှိရှိ လွတ်လပ်စွာ ပါဝင်နိုင်သည့် အခြေအနေ မရှိကြောင်း ၎င်းက ကောက်ချက်ချ ပြောကြားခဲ့ပါသည်။

ရွေးကောက်ပွဲမတိုင်မီ အကြမ်းဖက်မှုနှင့် ဖိနှိပ်မှုများ အရှိန်မြင့်လာကြောင်း ကုလသမဂ္ဂ သတိပေး

Dec 23

စစ်ရှောင်များ ခိုလှုံနေသည့် စာသင်ကျောင်းကို စစ်ကော်မရှင် ဗုံးကြဲ၊ အရပ်သား ၆ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၃ ရက်။ စစ်ကိုင်းတိုင်း၊ ကောလင်းမြို့နယ်အတွင်းရှိ စစ်ဘေးရှောင်ပြည်သူများ ခိုလှုံရာ စာသင်ကျောင်းကို စစ်ကော်မရှင်တပ်က ပေါင် ၅၀၀ ဗုံးဖြင့် လေကြောင်းမှ ဗုံးကြဲတိုက်ခိုက်ခဲ့သဖြင့် အရပ်သားပြည်သူ ၆ ဦး ထိခိုက်ဒဏ်ရာရရှိခဲ့ကြောင်း ဒေသခံများနှင့် တော်လှန်ရေးအင်အားစုများက ပြောသည်။ ဒီဇင်ဘာလ ၂၂ ရက်နေ့ ညနေ ၅ နာရီကျော် အချိန်ခန့်တွင် ကောလင်းမြို့ အနောက်ခြမ်းရှိ နတ်အင်းကျေးရွာရှိ စာသင်ကျောင်းကို စစ်ကော်မရှင်၏ ဂျက်ဖိုက်တာတစ်စီးက ပေါင် ၅၀၀ ဗုံးဖြင့် လာရောက်ကြဲချခဲ့ခြင်း ဖြစ်သည်။ အဆိုပါကျောင်းသည် ဘေးလွတ်ရာသို့ တိမ်းရှောင်လာကြသည့် စစ်ဘေးရှောင်များ ခိုလှုံနေသည့် နေရာတစ်ခု လည်း ဖြစ်သည်။ ဗုံးကြဲတိုက်ခိုက်မှုကြောင့် အသက် ၅၀ ကျော်အရွယ် ဦးမြင့်ဝင်း အပါအဝင် ဦးကျော်ပိုင်ဦး၊ ဦးစိုးသူအောင်၊ ဦးအောင်မျိုးသူ၊ ဒေါ်အေးနှင့် ဒေါ်နှင်းမိုးအေးတို့ ထိခိုက်ဒဏ်ရာရရှိခဲ့ပြီး စာသင်ကျောင်းဆောင်များ ပျက်စီးကာ ကျွဲနွားအချို့လည်း ထိမှန်သေဆုံးခဲ့သည်။ နတ်အင်းကျေးရွာသည် လေကြောင်းတိုက်ခိုက်မှုကို ပထမဆုံးအကြိမ် ကြုံတွေ့ရခြင်းဖြစ်ပြီး ဗုံးဒဏ်ကြောင့် ကျေးရွာတစ်ရွာလုံး ထိတ်လန့်တုန်လှုပ်ခဲ့ကြသည်။ ကောလင်းဒေသခံတစ်ဦးက “စစ်ရှောင်တွေ နေတဲ့ စာသင်ကျောင်းကို တည့်တည့်လာကြဲသွားတာပဲ။ ဗုံးသံက အရမ်းကျယ်တော့ ရွာထဲက အိမ်တွေတောင် တုန်သွားတယ်။ ပေါင် ၅၀၀ ဗုံးဆိုတော့ သိတဲ့အတိုင်းပဲ အကျယ် ကြီး။ ဒဏ်ရာရတဲ့သူတွေကတော့ အသက်အန္တရာယ် မစိုးရိမ်ရတော့ပေမဲ့ အခုထိတော့ ကြောက်နေကြတုန်းပဲ။ စိတ်မပြယ်ကြသေးဘူး။ ရွာထဲ ပြန်နေကြပေမယ့် သတိနဲ့ နေရတာပေါ့။ တခြားလည်း ပြေးစရာမှ မရှိတာ” ဟု ပြောသည်။ ကောလင်းမြို့နယ်အတွင်း စစ်ကော်မရှင်တပ်သည် လေကြောင်း တိုက်ခိုက်မှုများကို ဆက်တိုက်လုပ်ဆောင် နေပြီး ဒီဇင်ဘာလ ၂၁ ရက်နေ့ကလည်း မိတ္ထီလာလေတပ်မှ တက်လာသည့် လေယာဉ်ဖြင့် မြို့အရှေ့ခြမ်းရှိ မုတ်ဝကျေးရွာရှိ စာသင်ကျောင်းကို ဗုံးကြဲဖျက်ဆီးခဲ့သေးသည်။ ကောလင်းခရိုင် အမှတ် (၂) တပ်ရင်းနှင့် Kawlin Revolution (KR) တို့၏ ထုတ်ပြန်ချက်များအရ စစ်ကော်မရှင် တပ်သည် စစ်ရေးပစ်မှတ်မဟုတ်သည့် စာသင်ကျောင်းနှင့် အရပ်သားများရှိရာ နေရာများကို တမင်ပစ်မှတ်ထား တိုက်ခိုက်နေခြင်းဖြစ်ကြောင်း သိရသည်။ လတ်တလောတွင် နတ်အင်းရွာသားအချို့ ကျေးရွာအတွင်း ပြန်လည်ဝင်ရောက်နေပြီ ဖြစ်သော်လည်း လေယာဉ် သံ ကြားတိုင်း ထပ်မံတိုက်ခိုက်ခံရမည်ကို စိုးရိမ်နေကြသည်ဟု ပြောသည်။ ဓါတ်ပုံ - မုတ်ဝကျေးရွာ စာသင်ကျောင်း ဗုံးကြဲခံရပုံ (Kawlin Revolution KR)

စစ်ရှောင်များ ခိုလှုံနေသည့် စာသင်ကျောင်းကို စစ်ကော်မရှင် ဗုံးကြဲ၊ အရပ်သား ၆ ဦး ဒဏ်ရာရ

Dec 23

ကရင်နီပြည်အတွင်း တော်လှန်ရေး တပ်မတော် တစ်ခုထဲ ရှိရန် လူငယ်များတောင်းဆို သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၃ ရက်။ တော်လှန်ရေးအင်အားစု အမျိုးမျိုး ကွဲပြားလှုပ်ရှားနေသည့် ကရင်နီပြည်အတွင်း ပြည်နယ်ကိုယ်စားပြု “တပ်မတော် တစ်ရပ်တည်း” နှင့် “အစိုးရတစ်ရပ်တည်း” အမြန်ဆုံး ပေါ်ထွန်းလာရေးအတွက် ကရင်နီလူငယ်ထု က တိုက်တွန်းတောင်းဆို လိုက်သည်။ အဆိုပါ တိုက်တွန်းတောင်းဆိုချက်သည် ဒီဇင်ဘာလ ၁၈ ရက်နေ့မှ ၂၀ ရက်နေ့အထိ သုံးရက်ကြာ ကျင်းပခဲ့သည့် “ကရင်နီပြည် လူငယ်ထု နှီးနှောဖလှယ်ပွဲ” မှ ထွက်ပေါ်လာခြင်းဖြစ်ပြီး ကရင်နီပြည်၏ အနာဂတ်ကို စုပေါင်း အင်အားဖြင့် တည်ဆောက်ရန် ပြင်ဆင်နေကြခြင်းလည်း ဖြစ်သည်။ လက်ရှိ ကရင်နီပြည်အတွင်း ကရင်နီတပ်မတော် (KA)၊ ကရင်နီအမျိုးသားများ ကာကွယ်ရေးတပ် (KNDF)၊ ကရင်နီပြည် ပြည်သူ့လွတ်မြောက်ရေး တပ်မတော် (KNPLF)၊ ကယန်းပြည်သစ်တပ်မတော် (KNLP) နှင့် PDF တပ်ရင်းများ အပါအဝင် အဖွဲ့အစည်းပေါင်းစုံ လှုပ်ရှားနေသည်။ အဆိုပါအဖွဲ့များအားလုံး ပေါင်းစည်းပြီး ပြည်နယ်ကိုယ်စားပြု စစ်တပ်တစ်ခုတည်း ဖြစ်တည်လာရေးကို လူငယ်ထုက အဓိက တောင်းဆိုခဲ့ကြသည်။ ကရင်နီပြည်နယ် အင်အားစုကိုယ်စားလှယ် ခွန်းသောမတ်စ်က “ကျနော်တို့ ဖိုရမ်ကနေ သဘောတူ ချမှတ်ထားတဲ့ လုပ်ငန်းစဉ်တွေကတော့ ဒါ ကရင်နီပြည် တပ်တစ်တပ်တည်း ဖြစ်ရေးကိစ္စမှာ ကျနော်တို့ လူငယ်ထုတွေအနေနဲ့ တတ်အားသမျှ ပါဝင်ပေးဖို့ဆိုတဲ့ ဆုံးဖြတ်ချက်တွေရှိတယ်။ နောက်တစ်ခုကတော့ ကရင်နီပြည်နယ်မှာ အစိုးရ တစ်ရပ်တည်း ပေါ်ထွန်းရေးကိစ္စမှာလည်း ကျနော်တို့ လူငယ်ထုတွေအနေနဲ့ တတ်အားသမျှ ပူးပေါင်းပါဝင်ဖို့ ကျွန်တော်တို့ တောင်းဆိုထားတာရှိတယ်” ဟု ပြောသည်။ နှီးနှောဖလှယ်ပွဲ တက်ရောက်လာသည့် လူငယ်ကိုယ်စားလှယ် ၁၀၈ ဦးသည် ပြည်နယ်၏ အုပ်ချုပ်ရေး၊ တရား စီရင်ရေးနှင့် ဥပဒေပြုရေးစသည့် မဏ္ဍိုင်ကြီးများတွင် လူငယ်များ ကိုယ်စားပြုမှု ရရှိရန်နှင့် ဆုံးဖြတ်ချက်ချမှတ် သည့် အဆင့်များ၌ ပါဝင်နိုင်သည့် ခင်းအကျင်းတစ်ခုကို သက်ဆိုင်ရာ အစုအဖွဲ့များက အထူးစီမံပေးရန်လည်း ထည့်သွင်းတောင်းဆိုခဲ့ကြသည်။ ထို့အပြင် စစ်ကော်မရှင်က ပြုလုပ်မည့် ရွေးကောက်ပွဲအပေါ် ကရင်နီလူငယ်ထု၏ သဘောထားမှာ အလွန်ပြတ် သားပြီး ပြင်းထန်သည်။ အဆိုပါ ရွေးကောက်ပွဲတွင် ဝင်ရောက်ယှဉ်ပြိုင်မည့် ကရင်နီအမျိုးသားများကို “အမျိုးသားသစ္စာဖောက်” အဖြစ် သတ်မှတ်ရန်ပင် တစ်ညီတစ်ညွတ်တည်း ဆုံးဖြတ်ခဲ့ကြသည်။ ခွန်းသောမတ်စ်က ဆက်လက်၍ “စစ်ကော်မရှင်ရဲ့ အတုအယောင် ရွေးကောက်ပွဲကို ကျနော်တို့ လူငယ်ထုတွေ အနေနဲ့ ဒါ လုံးဝဆန့်ကျင် ကန့်ကွက်တယ်။ စစ်ကော်မရှင်ရဲ့ အတုအယောင် ရွေးကောက်ပွဲမှာ ဝင်ပြိုင်တဲ့ ကိုယ်စားလှယ်လောင်းတွေကိုလည်း ဒါ ကရင်နီပြည် အမျိုးသားများဖြစ်တဲ့သူတွေ ဝင်ပြိုင်ရင် ကျနော်တို့က အမျိုးသားသစ္စာဖောက်အဖြစ် တစ်ညီတစ်ညွတ်တည်း ဆုံးဖြတ်ခဲ့ကြတာပါ” ဟု ပြောသည်။ ဤနှီးနှောဖလှယ်ပွဲသို့ ကရင်နီ လူငယ်ထု နှီးနှောဖလှယ်ပွဲသို့ ကရင်နီပြည် အတိုင်ပင်ခံကောင်စီ KSCC လူငယ် ကိုယ်စားလှယ်များ၊ ကရင်နီပြည် လူငယ်ရေးရာ ကော်မတီကိုယ်စားလှယ်များ၊ ကရင်နီပြည် ကြားကာလ အုပ်ချုပ်ရေး ကောင်စီ၏ လူငယ်ရေးရာဌာန - DoYA ကိုယ်စားလှယ်များ၊ ကရင်နီပြည် လူငယ်များ သမဂ္ဂ - UKSY ကိုယ်စားလှယ်များ၊ ကျောင်းသားလူငယ် ကိုယ်စားလှယ်များ၊ အရပ်ဖက် လူငယ်အဖွဲ့အစည်း ကိုယ်စား လှယ်များနှင့် ကရင်နီပြည်ရှိ ဌာနေတိုင်းရင်းသား လူမျိုးစုလူငယ်များ တက်ရောက်ခဲ့ကြပြီး ကရင်နီပြည်၏ နိုင်ငံရေး၊ စစ်ရေး အခြေအနေများအပေါ် ဆွေးနွေးခဲ့ကြသည်။ လက်ရှိတွင် ကရင်နီပြည်နယ်အတွင်း စစ်ရေးတင်းမာမှုများ ဆက်ရှိနေသော်လည်း လူငယ်ထု၏ ဤတောင်း ဆိုချက်သည် တော်လှန်ရေး အဖွဲ့အစည်းများအကြား ညီညွတ်ရေးကို ဖော်ဆောင်ရန်နှင့် ကြားကာလ အုပ်ချုပ် ရေး ယန္တရားကို ခိုင်မာအောင် တည်ဆောက်ရန်အတွက် အရေးကြီးသော တွန်းအားတစ်ရပ် ဖြစ်လာရေး မျှော်လင့်ထားကြသည်။

ကရင်နီပြည်အတွင်း တော်လှန်ရေး တပ်မတော် တစ်ခုထဲ ရှိရန် လူငယ်များတောင်းဆို

Dec 23

မြစ်ဆုံစီမံကိန်း ဝေဖန် ကန့်ကွက်သူကို အရေးယူမည်ဟု စစ်ကော်မရှင် ခြိမ်းခြောက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၃ ရက်။ မြန်မာပြည်သူတို့၏ အမျိုးသားရေး အမှတ်လက္ခဏာနှင့် အသက်သွေးကြောဖြစ်သော ဧရာဝတီမြစ်ဆုံ စီမံကိန်းကို စစ်ကော်မရှင်က အာဏာသုံး၍ ပြန်လည် အကောင်အထည်ဖော်ရန် ပြင်ဆင်လာနေသည်။ အထူးခြားဆုံးမှာ စစ်ခေါင်းဆောင်ကိုယ်တိုင် ဦးဆောင်သည့် နိုင်ငံတော် ကာကွယ်ရေး နှင့် လုံခြုံရေး ကော်မတီ (ကာလုံ) က စီမံကိန်းများကို အထောက်အထား မခိုင်လုံဘဲ ကန့်ကွက်ပါက အရေးယူမည်ဟု ဒီဇင်ဘာလ (၁၉) ရက်နေ့တွင် အမိန့်ထုတ်ပြန် ကာ ပြည်သူလူထုကို ခြိမ်းခြောက်လာခြင်း ဖြစ်သည်။ ပြီးခဲ့သည့် ဒီဇင်ဘာလ ၁၆ ရက်နေ့က ဒုတိယစစ်ခေါင်းဆောင် ဒုတိယ ဗိုလ်ချုပ်မှူးကြီး စိုးဝင်းကိုယ်တိုင် ကချင်ပြည်သို့ သွားရောက်ခဲ့ပြီး မြစ်ဆုံစီမံကိန်းအတွက် ဒီဇိုင်းအသစ်များကို တရုတ်နိုင်ငံနှင့် ညှိနှိုင်းနေပြီဖြစ်ကြောင်း လူသိရှင်ကြား ထုတ်ဖော်ပြောဆိုခဲ့သည်။ ဤလှုပ်ရှားမှုသည် ၂၀၁၁ ခုနှစ်ကတည်းက ပြည်သူ့ဆန္ဒအရ ရပ်နားထားခဲ့ရသည့် စီမံကိန်းကို စစ်ရေး၊ နိုင်ငံရေး ကျပ်တည်းနေချိန်တွင် အတင်းအကျပ် ပြန်စရန် ကြိုးပမ်းမှုအဖြစ် ရှုမြင်ခံနေရသည်။ သဘာဝပတ်ဝန်းကျင် အရေး တက်ကြွလှုပ်ရှားသူ မြစ်ကြီးနားမြို့ခံတစ်ဦးက “ဒါဟာ နည်းပညာအရ ညှိနှိုင်းတာ ထက် ပြည်သူ့ဆန္ဒကို အမိန့်နဲ့ နင်းခြေလိုက်တာပါ။ အခုထုတ်တဲ့ အမိန့်က မြစ်ဆုံကို ကန့်ကွက်မယ့်သူ မှန်သမျှ ကို ထောင်ထဲထည့်မယ်လို့ ကြိုပြီး လက်သီးပြလိုက်တာပဲ” ဟု ပြောသည်။ စီမံကိန်းပြန်စမည့် သတင်းများကြောင့် မြစ်ဆုံဒေသခံများနှင့် သဘာဝပတ်ဝန်းကျင် တက်ကြွလှုပ်ရှားသူများ အကြား စိုးရိမ်မှုများမှာ မြင့်တက်လာနေသည်။ စီမံကိန်းကြောင့် အိုးအိမ်စွန့်ခွာရမည့်အရေးနှင့် ဘိုးဘွားပိုင်မြေများ ရေအောက်ရောက်သွားမည့် အရေးမှာ ဒေသခံတို့အတွက် အကြီးမားဆုံးသော ခြိမ်းခြောက်မှု ဖြစ်နေသည်။ မြစ်ဆုံဒေသခံ အမျိုးသမီးတစ်ဦးက “မသိရင် ဧရာဝတီမြစ်က ကချင်တွေနဲ့ပဲ ဆိုင်တယ် ထင်သလား မသိဘူး။ ဒီစစ်ခေါင်းဆောင်တွေက တော်တော်ဆိုးတယ်။ မြစ်ဆုံစီမံကိန်းသာ တကယ်လုပ်ဖြစ်သွားရင် တနိုင်ငံလုံး ဒုက္ခရောက်မှာလေ။ နည်းပညာတွေ ဘယ်လောက်ကောင်းကောင်း၊ ဒီဇိုင်းတွေ ဘယ်လိုပဲပြောင်းပြောင်း အလကားပဲ။ အခုက ကန့်ကွက်ရင်လည်း အရေးယူမယ်ဆိုတော့ ကျမတို့မှာ ပြောစရာ ပါးစပ်တောင် မရှိတော့တဲ့ဘဝ ရောက်နေပါပြီ” ဟု ပြောသည်။ သဘာဝ ပတ်ဝန်းကျင်ထိန်းသိမ်းရေး တက်ကြွလှုပ်ရှားသူများကလည်း စစ်ကော်မရှင်၏ လုပ်ရပ်အပေါ် ဝေဖန်နေကြသည်။ စီမံကိန်း၏ ဒီဇိုင်းကို ပြောင်းလဲနိုင်သော်လည်း ဧရာဝတီမြစ်၏ ဂေဟစနစ် ပျက်စီးမှု၊ နုန်းတင်မြေနု စီးဆင်းမှု ပြတ်တောက်မှုနှင့် မြစ်အောက်ပိုင်းဒေသများရှိ စိုက်ပျိုးရေးအပေါ် သက်ရောက်မှုများကိုမူ မည်သည့် နည်းပညာကမျှ အစားထိုးနိုင်မည်မဟုတ်ကြောင်း ထောက်ပြနေကြသည်။ စစ်ကော်မရှင်သည် ၎င်းတို့ကျင်းပမည့် အတုအယောင် ရွေးကောက်ပွဲအတွက် တရုတ်နိုင်ငံ၏ ထောက်ခံမှုကို ရယူရန် မြစ်ဆုံစီမံကိန်းကို ‘အလဲအထပ်’ တစ်ခုအဖြစ် အသုံးပြုနေခြင်း ဖြစ်ကြောင်း နိုင်ငံရေးလေ့လာသူများက သုံးသပ်နေကြသည်။ အဆိုပါ စီမံကိန်းကြီးများကို အတင်းအကျပ် လုပ်ဆောင်နေသကဲ့သို့ပင် ရွေးကောက်ပွဲကို ဆန့်ကျင်သူများကို လည်း တစ်ဖက်တွင် အပြင်းအထန် ဖမ်းဆီးနှိမ်နင်းမှုများ ပြုလုပ်လျက်ရှိသည်။

မြစ်ဆုံစီမံကိန်း ဝေဖန် ကန့်ကွက်သူကို အရေးယူမည်ဟု စစ်ကော်မရှင် ခြိမ်းခြောက်

Dec 22

ကျိန္တလီတွင် စစ်ကျန်ဗုံးသီးပေါက်ကွဲ၍ ကလေးတစ်ဦးသေဆုံး၊ ဆေးကုသစရိတ် အရေးပေါ်လိုအပ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ ရခိုင်ပြည် တောင်ပိုင်း၊ ဂွမြို့နယ်၊ ကျိန္တလီမြို့တွင် စစ်ကျန်လက်နက် ပေါက်ကွဲမှုကြောင့် အသက် ၁၄ နှစ်အရွယ် ကလေးငယ်တစ်ဦး သေဆုံးကာ အခြားကလေးငယ် နှစ်ဦး ပြင်းထန်ဒဏ်ရာရရှိခဲ့သည်။ ပြီးခဲ့သည့် ဒီဇင်ဘာလ ၂၀ ရက်နေ့ မွန်းလွဲပိုင်းတွင် ကျိန္တလီမြို့မှ အသက် ၁၃ နှစ်နှင့် ၁၄ နှစ်အရွယ် ကလေးငယ် သုံးဦးသည် မြို့အနီးရှိ တောင်ပေါ်သို့ သွားရောက်ကစားရာမှ စစ်ကျန်ဗုံးသီးတစ်လုံးကို ကောက်ရခဲ့ခြင်း ဖြစ်သည်။ အဆိုပါဗုံးသီးအား ကလေးငယ်များက ဆော့ကစားရင်း ထုခွဲလိုက်သည့်အချိန်တွင် ပေါက်ကွဲမှုဖြစ်ပွားခဲ့ပြီး အသက် ၁၄ နှစ်အရွယ် ကလေးတစ်ဦးမှာ နေရာချင်းတင် သေဆုံးသွားခဲ့ရသည်။ ကျန်ရှိသည့် ကလေးငယ်နှစ်ဦးဖြစ်သော အသက် ၁၄ နှစ်အရွယ် မောင်အောင်သူစိုးနှင့် ၁၃ နှစ်အရွယ် မောင်နေမျိုးကျော်တို့မှာ ခန္ဓာကိုယ်တွင် ဒဏ်ရာအပြင်းအထန် ရရှိခဲ့ကြသည်ဟု ၎င်းတို့အား အကူအညီပေးနေသူများက ပြောသည်။ ၎င်းတို့၏ မိသားစုများသည် ဆင်းရဲနွမ်းပါးသည့် စစ်ဘေးရှောင်များဖြစ်ကြသဖြင့် လက်ရှိတွင် ဆေးကုသ စရိတ်အတွက် များစွာအခက်အခဲ ဖြစ်ပေါ်နေကြောင်း ဂွမြို့နယ် စစ်ဘေးရှောင်ကူညီရေးအဖွဲ့မှ တာဝန်ရှိသူ တစ်ဦးက ပြောသည်။ “ကလေးတွေက ဒါက အသက်အန္တရာယ်ရှိမှန်း မသိဘဲ ကောက်ဆော့မိကြတာ။ အခုက မိသားစုတွေမှာ ဆေးကု ဖို့ ငွေကြေးက လုံးဝမရှိဘူး။ သူတို့က စစ်ရှောင်တွေဆိုတော့ တစ်နေ့စာ တစ်နေ့တောင် မနည်း ရုန်းကန်နေ ရတာ။ အခု ဒဏ်ရာရတဲ့ ကလေးနှစ်ယောက်အတွက်ကတော့ အရေးပေါ် အကူအညီတွေ လိုနေပါတယ်။” ရခိုင်ပြည် အတွင်း မြို့နယ်အတော်များများကို အာရက္ခတပ်တော် (AA) က တိုက်ခိုက်သိမ်းပိုက် ထားနိုင်သော် လည်း၊ တိုက်ပွဲများအပြီး ကျန်ရှိခဲ့သည့် မပေါက်ကွဲသေးသော စစ်ကျန်လက်နက်များနှင့် မိုင်းအန္တရာယ်များမှာ ဒေသခံများအတွက် ‘အသံတိတ်လူသတ်သမား’ ကဲ့သို့ ခြိမ်းခြောက်လျက်ရှိသည်ဟု ရခိုင်ပြည်သူများက ပြောသည်။ ဂွမြို့နယ် စစ်ဘေးရှောင်ကူညီရေးအဖွဲ့မှ တာဝန်ရှိသူက “မြို့ထဲမှာ တိုက်ပွဲတွေမရှိတော့ပေမဲ့ တောတောင်တွေ ထဲမှာ ဒီလိုမျိုး ဗုံးသီးတွေ၊ မိုင်းတွေက ကျန်နေသေးတယ်။ အခုလို ကလေးတွေ သေဆုံးရတာမျိုး နောက်ထပ် မဖြစ်အောင် သက်ဆိုင်ရာ အနေနဲ့ မိုင်းရှင်းလင်းရေးတွေကို အမြန်ဆုံးလုပ်ပေးစေချင်တယ်။ နောက်ပြီး မိုင်းအသိပညာပေးတာတွေကိုလည်း ထိထိရောက်ရောက် လုပ်ပေးဖို့ လိုနေပြီ” ဟု ပြောသည်။ လက်ရှိတွင် ဂွမြို့နယ်အတွင်း စစ်ရေးတင်းမာမှုများ လျော့ပါးနေသော်လည်း စစ်ကျန်လက်နက်များကြောင့် အရပ်သား ထိခိုက်သေဆုံးမှုများ ဆက်တိုက်ရှိနေသဖြင့် ဒေသခံများအနေဖြင့် သွားလာကစားရာတွင် အထူးသတိပြုရန် လူမှုကူညီရေးအဖွဲ့များနှင့် စစ်ရှောင်အရေး ကူညီပေးနေသူများက နှိုးဆော်ထားသည်။  ဓါတ်ပုံ - ဂွမြို့နယ် စစ်ဘေးရှောင်ကူညီရေး ပူးပေါင်းအဖွဲ့

ကျိန္တလီတွင် စစ်ကျန်ဗုံးသီးပေါက်ကွဲ၍ ကလေးတစ်ဦးသေဆုံး၊ ဆေးကုသစရိတ် အရေးပေါ်လိုအပ်နေ

Dec 22

ပလက်ဝတွင် လူငယ်များ မြို့ပြင်ထွက်ခွာခွင့် CDF ကန့်သတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ ချင်းပြည်၊ ပလက်ဝမြို့နယ် အတွင်းရှိ အရွယ်ရောက်ပြီးသူ လူငယ်များအနေဖြင့် မြို့နယ်ပြင်ပသို့ ထွက်ခွာခြင်း မပြုရန် ချင်းလဲန်းကာကွယ်ရေးတပ်ဖွဲ့ (CDF-Paletwa) က ခရီးသွားလာခွင့် ကန့်သတ်မိန့် ထုတ်ပြန်လိုက်သည်။ ဒီဇင်ဘာလ ၂၀ ရက်နေ့စွဲဖြင့် ထုတ်ပြန်လိုက်သော အဆိုပါညွှန်ကြားချက်တွင် ဒေသတွင်းရှိ လူငယ်များအနေဖြင့် CDF-ပလက်ဝတွင် ပူးပေါင်းပါဝင်ပြီး ဒေသကာကွယ်ရေးတာဝန် ထမ်းဆောင်ရန်မှာ "သမိုင်းပေးတာဝန်" ဖြစ်သည်ဟု ဖော်ပြထားသည်။ ကျန်းမာရေးနှင့် ပညာရေးဆိုင်ရာ အရေးပေါ်ကိစ္စရပ်များမှလွဲ၍ အခြားကိစ္စများအတွက် လူငယ်များ မြို့နယ် ပြင်ပသို့ ထွက်ခွာခွင့်ကို ပိတ်ပင်ထားခြင်းဖြစ်သည်။ လက်ရှိတွင် ပလက်ဝမြို့နယ်ကို အာရက္ခတပ်တော် (AA) က အလုံးစုံသိမ်းပိုက် ထိန်းချုပ်ထားသဖြင့် စစ်ကော်မရှင်၏ စစ်မှုထမ်းဥပဒေဒဏ်မှ ကင်းလွတ်နေသော်လည်း၊ ဒေသခံကာကွယ်ရေးတပ်ဖွဲ့များ၏ အင်အားစုဆောင်းမှုနှင့် ကန့်သတ်ချက်များကြောင့် လူငယ်များမှာ အကြပ်ရိုက်နေကြသည်။ ပလက်ဝမြို့မှ ရန်ကုန်ကို ရောက်နေသာ လူငယ်တစ်ဦးက “ဖြစ်သင့်တာကတော့ စစ်မှုထမ်းတယ်ဆိုတာက လူငယ်တွေအနေနဲ့ သူတို့ရဲ့ ဆန္ဒအလျောက် ထမ်းတာမျိုးကပဲ ကောင်းတယ်။ မဟုတ်ရင် အတင်းအကျပ် စစ်မှုထမ်းခိုင်းတယ် ဆိုတာမျိုး ဖြစ်သွားမှာနော်” ဟု ပြောသည်။ အဆိုပါ ပိတ်ပင်ကန့်သတ်မှုသည် မြေပြင်တွင် ထိရောက်မှုအားနည်းနေပြီး၊ ဖမ်းဆီးထိန်းသိမ်းခံရမည့် အန္တရာယ် ကြားမှပင် အခြားဒေသများသို့ နည်းလမ်းမျိုးစုံဖြင့် ခိုးထွက်နေကြသူများ ရှိနေကြောင်း ဒေသခံ သတင်း ရင်းမြစ်များက ပြောသည်။ အဆိုပါ လူငယ်က “အခုက ကျနော်တို့ ပြည်သူတွေက စစ်တပ်ရဲ့ စစ်မှုထမ်း ဥပဒေကို ကြောက်ရတယ်။ ကိုယ့် ဒေသမှာ ရှိတဲ့ တော်လှန်ရေး အဖွဲ့တွေကိုလည်း ကြောက်ရတယ်။ ပလက်ဝမှာ ကျန်ခဲ့တဲ့ သူငယ်ချင်းတွေဆိုရင် လမ်းကြောင်း အမျိုးမျိုးကနေ ခိုးထွက်ဖို့ ကြိုးစားနေကြတယ်” ဟု ဆက်ပြောသည်။ ပလက်ဝမြို့နယ်သည် စစ်ရေးအရရော၊ ပထဝီဝင် အနေအထားအရပါ အချက်အချာကျသဖြင့် တော်လှန်ရေး အင်အားစုများအကြား နယ်မြေစိုးမိုးရေးနှင့် အင်အားတည်ဆောက်ရေး အတွက် ယခုကဲ့သို့ တင်းကြပ်မှုများ ပြုလုပ်လာခြင်းဖြစ်သည်ဟု နိုင်ငံရေးလေ့လာသူများအချို့က သုံးသပ်ကြသည်။ သို့သော်လည်း တစ်ဖက်တွင် လူငယ်များ၏ လွတ်လပ်စွာ သွားလာခွင့်နှင့် အနာဂတ် ရွေးချယ်ခွင့်များအပေါ် ကန့်သတ်ချက်ဖြစ်နေသဖြင့် ဒေသခံမိဘပြည်သူများအကြား ဝေဖန်စိုးရိမ်မှုများလည်း ရှိနေသည်။

ပလက်ဝတွင် လူငယ်များ မြို့ပြင်ထွက်ခွာခွင့် CDF ကန့်သတ်

Dec 22

ရွေးကောက်ပွဲကျင်းပရန် ၁၀ ရက်အလို လားရှိုးမြို့တွင် တစ်ရက်တည်း ဗုံး ၃ ကြိမ်ပေါက်ကွဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ စစ်ကော်မရှင်က ကြီးမှူးကျင်းပမည့် ရွေးကောက်ပွဲ အတွက် ပြင်ဆင်မှုများ ပြုလုပ်နေသည့် ရှမ်းပြည် မြောက်ပိုင်း၊ လားရှိုးမြို့ပေါ်တွင် တစ်ရက်တည်း၌ပင် ဗုံးပေါက်ကွဲမှု သုံးကြိမ် ထက်မနည်း ဖြစ်ပွားခဲ့ရာ မြို့ခံများ ထိတ်လန့်စိုးရိမ်နေကြသည်။ ရွေးကောက်ပွဲကျင်းပရန် ၁၀ ရက်ခန့်သာ လိုတော့သည့်အချိန်တွင် ဖြစ်ပွားခဲ့သော အဆိုပါပေါက်ကွဲမှုများသည် ဒီဇင်ဘာလ ၂၁ ရက်နေ့၊ နံနက် ၉ နာရီကျော်တွင် အမှတ် (၁၂) ရပ်ကွက်၌ တစ်ကြိမ်၊ ညနေ ၅ နာရီနှင့် ၆ နာရီ ဝန်းကျင်တို့တွင် အမှတ် (၂) အုပ်ချုပ်ရေးမှူးရုံးအနီးနှင့် အမှတ် (၅) ရပ်ကွက်တို့တွင် တစ်ကြိမ်စီ ဖြစ်ပွားခဲ့ခြင်း ဖြစ်သည်။ ပေါက်ကွဲမှု ဖြစ်ပွားခဲ့သည့် အခြေအနေနှင့် ပတ်သက်၍ လားရှိုးမြို့ခံတစ်ဦးက “မနက်ပိုင်း တစ်ခါကြားရပြီး ညနေပိုင်းမှာ နှစ်ခါဆင့်တိုက်သံ ကြားလိုက်ရတာ။ ရပ်ကွက်ရုံးနားဆိုတော့ ပိုလန့် သွားတယ်” ဟု ပြောသည်။ လားရှိုးမြို့ကို စစ်ကော်မရှင်တပ်က ယခုနှစ် ဧပြီလအတွင်း တရုတ်အစိုးရ၏ ကြားဝင်ညှိနှိုင်းမှုဖြင့် ကိုးကန့်တပ် (MNDAA) ထံမှ ပြန်လည်လွှဲပြောင်းရယူခဲ့ခြင်းဖြစ်သော်လည်း မြို့ပတ်ပတ်လည်ရှိ ကျေးရွာအုပ်စု ၇၅ အုပ်စု ခန့်ကိုမူ MNDAA က ဆက်လက် ထိန်းချုပ်ထားဆဲ ဖြစ်သည်။ စစ်ကော်မရှင်တပ်သည် လားရှိုးမြို့ပေါ် ရပ်ကွက် (၁၂) ခုအပြင် MNDAA ထိန်းချုပ်နယ်မြေအချို့တွင်ပါ ရွေးကောက်ပွဲ ကျင်းပရန် ကြိုးပမ်းနေသော်လည်း MNDAA ဘက်ကမူ ၎င်းတို့နယ်မြေအတွင်း မဲပုံးချခွင့် ပေးမည်မဟုတ်ကြောင်း ပြောဆိုထားသည်။ လက်ရှိ အခြေအနေအပေါ် လားရှိုးမြို့မှ ရှမ်းလူငယ်တစ်ဦးက “ဒီပေါက်ကွဲမှုတွေဟာ ရွေးကောက်ပွဲကို ဆန့် ကျင်တဲ့ နိုင်ငံရေး သတိပေးချက်လို့ မြင်ပါတယ်။ မြို့ပေါ်ကို စစ်တပ်က ထိန်းထားတယ်ဆိုပေမဲ့ ပတ်ပတ်လည် မှာ တော်လှန်ရေး အင်အားစုတွေ ရှိနေကြတယ်။ အခု အခြေအနေကို ပြောရမယ်ဆိုရင်လည်း လုံခြုံရေးက ဘယ်လိုမှ စိတ်မချရဘူး။ အခုလို အခြေအနေမျိုးမှာ ကျင်းပမယ့် ရွေးကောက်ပွဲက ပြည်သူတွေအတွက်တော့ အန္တရာယ်ကြားက ပွဲတစ်ခုလို ဖြစ်နေတယ်” ဟု ပြောသည်။ စစ်ကော်မရှင်၏ အစီအစဉ်အရ လာမည့် ဒီဇင်ဘာ ၂၈ ရက်နေ့မှ စတင်ကာ ရွေးကောက်ပွဲကို အပိုင်း ၃ ပိုင်းခွဲ၍ နှစ်ပတ်စီခြား ကျင်းပသွားရန် ရည်ရွယ်ထားသော်လည်း ယခုကဲ့သို့ မြို့ပြပြောက်ကျား တိုက်ခိုက်မှုများနှင့် နယ်မြေ မတည်ငြိမ်မှုများကြောင့် ရွေးကောက်ပွဲ ဖြစ်မြောက်နိုင်စွမ်းအပေါ် မေးခွန်းထုတ်မှုများ ရှိနေသည်။  ဓါတ်ပုံ - Wa News Land

ရွေးကောက်ပွဲကျင်းပရန် ၁၀ ရက်အလို လားရှိုးမြို့တွင် တစ်ရက်တည်း ဗုံး ၃ ကြိမ်ပေါက်ကွဲ

Dec 22

ရန်ကုန် ပြည်သူ့ပါတီရုံးအနီး ဗုံးပေါက်ကွဲ၊ ကိုယ်စားလှယ်လောင်းတစ်ဦး အမှုဖွင့်ခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ ၂၀၂၅ ခုနှစ် အထွေထွေရွေးကောက်ပွဲ အတွက် ပြင်ဆင်မှုများ ပြုလုပ်နေစဉ်အတွင်း ရန်ကုန်မြို့၊ မင်္ဂလာတောင်ညွန့်မြို့နယ်ရှိ ဦးကိုကိုကြီး ဦးဆောင်သော ပြည်သူ့ပါတီ (People’s Party) ရန်ကုန်တိုင်းရုံး၌ ညပိုင်းက ပေါက်ကွဲမှုတစ်ခု ဖြစ်ပွားခဲ့သည်။ ဤသည်မှာ မဲဆွယ်ကာလအတွင်း နိုင်ငံရေးပါတီရုံးတစ်ခု ပထမဆုံးအကြိမ် ပစ်မှတ်ထား တိုက်ခိုက်ခံရခြင်း လည်း ဖြစ်သည်။ ဒီဇင်ဘာလ ၂၁ ရက်နေ့၊ ည ၇ နာရီခွဲခန့်တွင် ဖြစ်ပွားခဲ့သော အဆိုပါပေါက်ကွဲမှုသည် ပါတီရုံးအဝင် လှေကား အနီးတွင် ဖြစ်ပွားခဲ့ခြင်းဖြစ်ပြီး လူထိခိုက်ဒဏ်ရာရမှု မရှိသော်လည်း အဆောက်အအုံရှိ မှန်များကွဲအက်ခြင်း၊ ပါတီအောင်နိုင်ရေး ဆိုင်းဘုတ်များနှင့် ရပ်နားထားသော မော်တော်ယာဉ်အချို့ ပျက်စီးသွားခဲ့သည်။ ပေါက်ကွဲမှုဖြစ်ပွားရာအနီးတွင် နေထိုင်သည့် ဒေသခံတစ်ဦးက ထိုစဉ်က အခြေအနေကို ယခုကဲ့သို့ ပြောသည်။ “ညဘက်ကြီး အုန်းခနဲ အကျယ်ကြီးပဲ၊ မြေကြီးတောင် တုန်သွားတယ်။ အစကတော့ မီးသွေဖောက်တာလား အောက်မေ့တာ၊ နောက်မှ ပါတီရုံးနားမှာ မီးခိုးတွေထွက်နေတာ တွေ့ရတာ။ လမ်းထဲမှာလည်း ရုတ်ရုတ်သဲသဲတွေ ဖြစ်သွားပြီး ခဏနေတော့ လုံခြုံရေးတွေ ရောက်လာတာပဲ။” ယခုတိုက်ခိုက်မှုသည် ရွေးကောက်ပွဲလုပ်ငန်းစဉ်များအပေါ် ခြိမ်းခြောက်မှုတစ်ခု ဖြစ်လာနိုင်သဖြင့် မြို့ခံများ အကြား စိုးရိမ်မှုများ မြင့်တက်လျက်ရှိသည်။ အခြားတစ်ဖက်တွင်လည်း ပြည်သူ့ပါတီ၏ သင်္ဃန်းကျွန်းမြို့နယ် ကိုယ်စားလှယ်လောင်း ဦးလွင်မြင့်သည် မဲဆွယ် စည်းရုံးရေး ဟောပြောရာတွင် ‘အရေးတော်ပုံ’ ဆိုသည့် စကားလုံးကို သုံးနှုန်းခဲ့ခြင်းကြောင့် ရွေးကောက်ပွဲ ဥပဒေဖြင့် အမှုဖွင့်အရေးယူခြင်း ခံထားရသည်။ အဆိုပါ စကားလုံး အသုံးအနှုန်းသည် လက်ရှိ တည်ဆဲဥပဒေနှင့် ငြိစွန်းသည်ဟုဆိုကာ တိုင်ကြားခံရခြင်း ဖြစ်သည်ဟု ၎င်းနှင့်နီးစပ်သူများက ပြောသည်။ ပြည်သူ့ပါတီသည် ရှစ်လေးလုံးကျောင်းသား ခေါင်းဆောင်ဟောင်း ဦးကိုကိုကြီး ဦးဆောင်သည့် ပါတီဖြစ်ပြီး လာမည့် ၂၀၂၅ ရွေးကောက်ပွဲတွင် ပြည်ထောင်စုအဆင့်၌ ဝင်ရောက်ယှဉ်ပြိုင်ရန် ပြင်ဆင်နေသည့် ပါတီတစ်ခု ဖြစ်သည်။ ယခုဖြစ်စဉ်များနှင့် ပတ်သက်၍ ပါတီဗဟိုမှ တရားဝင် ထုတ်ပြန်ချက် ထွက်ပေါ်လာခြင်း မရှိသေးပေ။ ရန်ကုန်မြို့နေ ပြည်သူများမှာမူ ယခုဖြစ်ပွားခဲ့သည့် ပေါက်ကွဲမှုကို အကြောင်းပြ၍ စစ်ကော်မရှင်တပ်က လုံခြုံရေးများ တိုးမြှင့်ပြီး အစစ်အဆေး ယခင်ကထက် တင်းကျပ်လာမှာကို စိုးရိမ်နေကြသည်။

ရန်ကုန် ပြည်သူ့ပါတီရုံးအနီး ဗုံးပေါက်ကွဲ၊ ကိုယ်စားလှယ်လောင်းတစ်ဦး အမှုဖွင့်ခံရ

Dec 22

NUG က စစ်ခေါင်းဆောင် ၃၃ ဦးကို အကြမ်းဖက်သမားအဖြစ် ကြေညာ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၂၂ ရက်။ အမျိုးသားညီညွတ်ရေး အစိုးရ (NUG) သည် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် အပါအဝင် စစ်ကော်မရှင် အဖွဲ့ဝင် ၃၃ ဦးကို အကြမ်းဖက်သမားများအဖြစ် ဒီဇင်ဘာလ ၂၁ ရက်နေ့တွင် တရားဝင် ကြေညာ လိုက်သည်။ ယခုထုတ်ပြန်ချက်သည် ယခင်ကကဲ့သို့ ဥပဒေကြောင်းအရ အရေးယူမည်ဆိုသည့် အသုံးအနှုန်းထက် “လက်ရ ဖမ်းဆီးရမိရေး” ကို အဓိကဦးတည်လာခြင်းကြောင့် ထူးခြားနေသည်။ အမည်ပျက် စာရင်းတွင် စစ်ဗိုလ်ချုပ်ကြီးများ သာမကဘဲ စစ်တပ်နှင့် ပူးပေါင်းဆောင်ရွက်နေသည့် အရပ်သား နိုင်ငံရေးသမားများ ဖြစ်သော ဦးသိန်းညွန့်၊ ဦးခင်မောင်ဆွေနှင့် ဖဒိုမန်းငြိမ်းမောင်တို့ကဲ့သို့ ပုဂ္ဂိုလ်များလည်း ပါဝင်နေသည်။ NUG အနေဖြင့် အာဏာသိမ်းချိန်မှ ၂၀၂၅ ခုနှစ်အထိ စစ်ကော်မရှင်တွင် ပါဝင်ခဲ့သူများကို အကြမ်းဖက် တိုက် ဖျက်ရေး ဥပဒေဖြင့် အရေးယူရန် ဆုံးဖြတ်ခဲ့ခြင်း ဖြစ်သည်။ ယခုကဲ့သို့ ဖမ်းဆီးရမိရေး ကြိုးပမ်းမည့်အပေါ် မြေပြင်ရှိ ရခိုင်လူငယ်တစ်ဦးက ၎င်း၏အမြင်ကို ယခုကဲ့သို့ ပြောသည်။ “အရင်ကတော့ တရားစွဲမယ်ဆိုတာမျိုးပဲ ကြားရတာ။ အခုက လက်ရဖမ်းဖို့အထိ ပါလာတော့ တော်လှန်ရေးက တကယ်ကို အရှိန်တက်လာပြီလို့ ခံစားရတယ်။ တဖက်မှာလည်း ဒါက ဖြစ်နိုင်ချေရှိရဲ့လား ဆိုတာမျိုးလည်း စဉ်းစားမိတယ်။ ဘာပဲပြောပြော စစ်ဗိုလ်ချုပ်တွေတင်မကဘဲ သူတို့ရဲ့ ထောက်တိုင် ဖြစ်တဲ့သူတွေကိုပါ ထည့် လိုက်တာက ပိုထိရောက်ပါတယ်။ ကျနော်တို့ ရခိုင်ကဆိုလည်း ဒေါ်အေးနုစိန်တို့၊ ဒေါက်တာဘရွှေတို့ပါ ပါတယ်။ ဆိုတော့ သူတို့တွေကလည်း စစ်တပ်ရဲ့ အကြမ်းဖက်မှုတွေမှာ တာဝန်ရှိနေကြသူတွေပဲလေ။” NUG ဘက်က အဆိုပါ ၃၃ ဦးအား ဖမ်းဆီးနိုင်ရန် အတွက် တော်လှန်ရေး အင်အားစုများနှင့် ပြည်သူများ ပူးပေါင်းကြရန် တိုက်တွန်းထားချိန်တွင်၊ မြေပြင်၌လည်း စစ်တပ်က ပြုလုပ်မည့် ရွေးကောက်ပွဲဆိုင်ရာ နေရာများတွင် ပေါက်ကွဲမှုများ ဆက်တိုက် ဖြစ်ပွားနေသည်။ “အခုက မြို့ပေါ်တွေမှာလည်း မအေးချမ်းတော့ဘူး။ ရွေးကောက်ပွဲလုပ်မယ့် နေရာတွေနားမှာ ပေါက်ကွဲ တာတွေ ခဏခဏဖြစ်နေတော့ ဘယ်သူမှလည်း မဲသွားထည့်ရဲမှာ မဟုတ်ဘူး။ စစ်တပ်က အတင်းလုပ်နေပေမဲ့ မြေပြင်မှာတော့ သူတို့ရဲ့ အုပ်ချုပ်ရေးက လုံးဝပျက်ပြားနေပြီဆိုတာ သိသာနေတယ်” ဟု ရန်ကုန်မှ လူငယ် တစ်ဦးက ပြောသည်။ NUG အစိုးရအနေဖြင့် သတ်မှတ်ထားသည့် အကြမ်းဖက်သမား ၃၃ ဦးကို အမြန်ဆုံး ဖမ်းဆီးရမိနိုင်ရန် နည်း လမ်းပေါင်းစုံဖြင့် ကြိုးပမ်းသွားမည်ဖြစ်ပြီး၊ ဤလုပ်ငန်းစဉ်တွင် တော်လှန်ရေး အင်အားစုများအပြင် ပြည်သူ တစ်ရပ်လုံးကလည်း တက်ကြွစွာ ပူးပေါင်း ပါဝင်ကြရန်လည်း ပန်ကြားထားသည်။

NUG က စစ်ခေါင်းဆောင် ၃၃ ဦးကို အကြမ်းဖက်သမားအဖြစ် ကြေညာ

« Prev 1 … 113 114 115 116 117 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close