NMG Doh – Page 194 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Aug 28

ဝက်လက်ကို စစ်ကော်မရှင် ဗုံးကြဲ၊ အရပ်သား ၄ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။ စစ်ကိုင်းတိုင်း၊ ဝက်လက်မြို့နယ် အရှေ့တောင်ခြမ်းက ရုံပင်ကုန်းကျေးရွာ ပတ်ဝန်းကျင်ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ပြည်သူ ၄ ဦး သေဆုံးခဲ့သည်။ ဩဂုတ်လ ၂၇ ရက်နေ့ ညနေပိုင်းတွင် ဂျက်ဖိုက်တာနှင့် ၄ ကြိမ် ပစ်ခတ်ဗုံးကြဲခဲ့ခြင်း ဖြစ်သည်ဟု Wetlet Informational Network က ထုတ်ပြန်သည်။ ဒေသခံတစ်ဦးက “ရုံပင်ကုန်းရွာ အနီးတဝိုက်ကို တံတားဦးကနေ တက်လာတဲ့ ဂျက်ဖိုက်တာနဲ့ ကြဲသွားတာပါ။ ညနေ ၅ နာရီကျော်လောက်မှာ ၄ - ၅ ကြိမ်လောက် ဆက်တိုက် ကြဲသွားတာဗျ။ အမျိုးသား ၃ ယောက်၊ အမျိုးသမီး တစ်ယောက် သေသွားတယ်။ အမျိုးသမီးက အသက် ၅၀ လောက်ရှိပြီ။ ဒဏ်ရာရတဲ့လူတွေလည်း ရှိတယ်။ ၆ ယောက်ထင်တယ် ဒဏ်ရာ ရသွားတာကလေ” ဟု ပြောသည်။ စစ်ကော်မရှင်တပ်၏ လေကြောင်း ဗုံးကြဲတိုက်ခိုက်မှုထဲ အမျိုးသမီးတစ်ဦး အပါအဝင် ပြည်သူ ၄ ဦး သေဆုံးခဲ့ပြီး ၆ ဦး ဒဏ်ရာ ရခဲ့သည်။ ဝက်လက်မြို့နယ်ထဲက ရုံပင်ကုန်းကျေးရွာကို လေကြောင်းမှ ဗုံးကြဲတိုက်ခိုက်ပြီးနောက် မတ္တရာမြို့ပေါ်မှပါ လက်နက်ကြီးများနှင့် အဆက်မပြတ် ပြန်လည် ပစ်ခတ်ခဲ့သေးသည်ဟု ဒေသခံများက ပြောသည်။ မြေပြင်တွင် တိုက်ပွဲဖြစ်ပွားခြင်းမျိုး မရှိဘဲ စစ်ကော်မရှင်တပ်က ရုံးပင်ကုန်းကျေးရွာကို လေကြောင်းမှ တိုက်ခိုက်ခဲ့ခြင်း ဖြစ်ပြီး ဟောင်ဝှစ်ဇာ လက်နက်ကြီးများနှင့်ပါ အဆက်မပြတ် ပစ်ခတ်ခဲ့ခြင်း ဖြစ်သည်။

ဝက်လက်ကို စစ်ကော်မရှင် ဗုံးကြဲ၊ အရပ်သား ၄ ဦးသေဆုံး

Aug 28

ကျောက်မဲတွင် တိုက်ပွဲပြင်းထန်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။ စစ်ကော်မရှင်တပ်က ရှမ်းမြောက်ရှိ ကျောက်မဲမြို့ကို ပြန်လည်ရရှိရေး မြေပြင်ထိုးစစ်အပြင် လေကြောင်းမှပါ ဗုံးကြဲတိုက်ခိုက်မှုများ ဆက်လုပ်နေသောကြောင့် ယနေ့အချိန်ထိ နှစ်ဖက်ကြား တိုက်ပွဲများ ပြင်းထန်စွာ ဖြစ်ပွားနေသည်။ ကျောက်မဲမြို့နယ်၊ နောင်ပိန်ကျေးရွာတွင် ဩဂုတ်လ ၂၈ ရက်နေ့အထိ တိုက်ပွဲများ ပြင်းထန်နေပြီး စစ်ကော်မရှင် တပ်က လေကြောင်းကနေပါ ဆက်တိုက် ဗုံးကြဲနေသည်ဟု မြေပြင် သတင်းအရင်းအမြစ်များက ပြောသည်။ မြေပြင် သတင်းအရင်းအမြစ် တစ်ဦးက “နောင်ပိန်မှာက တိုက်ပွဲ ဆက်ဖြစ်နေတယ်။ လေယာဉ်လည်း လာ တယ်။ မနေ့က Y-12 လာတယ်။ ဒီလေကြောင်း တိုက်ခိုက်မှုထဲမှာတော့ အသေအဆုံးမရှိဘူး။ ၂၅ ရက်နေ့ တုန်း ကတော့ ထိခိုက်တာတွေ ရှိခဲ့တယ်။ ကိုရင် ၃ ပါး ဒဏ်ရာရတယ်။ အရပ်သားတစ်ယောက် ဒဏ်ရာရတယ်။ ဒီရက်ပိုင်းက ဆက်တိုက်ပဲ ဖြစ်နေတာ” ဟု ပြောသည်။ ဩဂုတ်လ ၂၇ ရက်နေ့ကလည်း Y-12 လေယာဉ်နှင့် နောင်ပိန်ကျေးရွာ အုပ်စုထဲ ဗုံးကြဲတိုက်ခိုက်မှုများ လုပ်ခဲ့သည်ဟု ဆိုသည်။ ထို့အပြင် အသေခံ ဒရုန်းများ အသုံးပြုပြီး ဆက်တိုက် ဗုံးကြဲတိုက်ခိုက်နေသည်ဟု ကျောက်မဲမြို့၏ စစ်ရေးအခြေအနေကို စောင့်ကြည့်နေသည့် မြေပြင် သတင်းအရင်းအမြစ်များက ဆိုသည်။ နောင်ပိန်ကျေးရွာ အုပ်စုထဲက နေရာ အများစုကို သိမ်းပိုက်ထားသည့် စစ်ကော်မရှင်တပ်က ကားလမ်ကြီးကိုပါ ထိန်းချုပ်နိုင်ရေး မြေပြင်၊ လေယာဉ်အပြင် ဒရုန်းတို့ကို သုံးပြီး ထိုးစစ်ဆင်နေခြင်း ဖြစ်သည်။ နောင်ချိုမြို့ကို ထိန်းချုပ်ပြီးနောက် စစ်ကော်မရှင်တပ်သည် ကျောက်မဲမြို့နှင့် နောင်ချို-မိုးကုတ်လမ်းမ နေရာတို့ကို အင်အားအလုံးအရင်းဖြင့် ထိုးစစ်ဆင်တိုက်ခိုက်နေပြီး တိုက်ပွဲများ ပြင်းထန်နေခြင်း ဖြစ်သည်။

ကျောက်မဲတွင် တိုက်ပွဲပြင်းထန်နေ

Aug 28

အမြင့်ဆုံးမှာ ကျန်ရစ်ခဲ့တဲ့ နာတာလီယာ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။ Natalia Nagovitsyna (နာတာလီယာ နဂိုဗစ်နာ) နဲ့ ခင်ပွန်းသည် Sergei (ဆာဂျီး) တို့ဟာ တောင်တက် ဝါသနာပါတဲ့ ရုရှားလူမျိုး ဇနီးမောင်နှံ ဖြစ်ပါတယ်။ Sergei ဟာ ၂၀၂၁ ခုနှစ်မှာ ၂၃,၀၂၈ ပေမြင့်တဲ့ အာရှ အလယ်ပိုင်း ကာဇက်စတန် နိုင်ငံရဲ့ အမြင့်ဆုံး တောင်ထိပ် ဖြစ်တဲ့ Khan Tengri (ခန်တန်ဂရီ)ကို တက်ရင်း လေဖြတ်သွားခဲ့ပြီး သေဆုံး သွားခဲ့ပါတယ်။ အဲဒီ အချိန်ကတော့ လေဖြတ်ထားတဲ့ ခင်ပွန်းသည်ကို စွန့်ခွာမသွားဖို့ တင်းခံနေခဲ့တဲ့ Natalia ဟာ သတင်းဌာန တွေရဲ့ ထိပ်တန်း သတင်း ဖြစ်ခဲ့တယ်လို့ ဒေးလီးမေးလ် သတင်းမှာ ဖော်ပြပါတယ်။ အခု နှစ်မှာတော့ အသက် ၄၇ နှစ်ရှိပြီဖြစ်တဲ့ Natalia ဟာ နောက်ထပ် အလယ်ပိုင်း အာရှနိုင်ငံဖြစ်တဲ့ ကာဂျစ္စတန် နိုင်ငံက အမြင့်ဆုံး တောင်ထိပ်ကို တက်နေခဲ့ပါတယ်။ အမြင့်ပေ ၂၄,၄၀၆ ပေမြင့်တဲ့ Victory Peak တောင်ထိပ်ကို တက်နေရင်း ပေ ၂၃,၀၀၀ လောက်အရောက်မှာ ခြေထောက်ကျိုးသွားပြီး အဲဒီနေရာမှာ သောင်တင်နေခဲ့ပါတယ်။ သူဟာ လိမ္မော်ရောင် စခန်းချ တဲလေးထဲမှာ တစ်ယောက်ထဲ ရှိနေခဲ့တာပါ။ သူ့ကို ကယ်ဖို့ ကြိုးစားခဲ့တဲ့ အီတလီလူမျိုး Luca Sinigaglia (လူကာ ဆီနီဂါဂလီယာ) ဟာလည်း မအောင်မြင်ပဲ ဩဂုတ်လ ၁၅ ရက်နေ့က သေဆုံးသွားခဲ့ပါတယ်။ ကယ်ဆယ်ရေး ဟယ်လီကော်ပတာ တစ်စီးလည်း ပျက်ကျသွားခဲ့ပါတယ်။ နောက်ထပ် ကယ်ဆယ်ရေး ကြိုးပမ်းမှုတွေကိုလည်း တောင်တက်သမားတွေ နာမကျန်းဖြစ်ပြီး ပြင်းထန်တဲ့ ရာသီဥတုကြောင့် ရုတ်သိမ်းခဲ့ရပါတယ်။ အခြေအနေကို စုံစမ်းတဲ့ ဒရုန်းတစ်စီးကတော့ ဩဂုတ်လ ၁၉ ရက်နေ့အထိ Natalia ဟာ အသက်ရှင် နေသေး တယ်ဆိုတာ အတည်ပြုနိုင်ခဲ့ပါတယ်။ ဒါပေမယ့် ဩဂုတ်လ ၂၁ ရက်နေ့မှာတော့ အပူလှိုင်းရှာဖွေတဲ့ ဒရုန်းတစ်စီးနဲ့ အဲဒီနေရာကိုပဲ ပျံသန်းကြည့်ရှုတဲ့ အခါမှာ Natalia ဟာ အသက်ရှင်တဲ့ အရိပ်အယောင် မတွေ့ရတော့ပါဘူး။ သူ့ရဲ့ တဲငယ်လေးဟာလည်း လေပြင်းဒဏ်ကြောင့် ဆုတ်ပြတ်သွားခဲ့ပါပြီ။ ဩဂုတ်လ ၂၇ ရက်နေ့မှာတော့ ကာဂျစ္စတန် အရာရှိတွေက Natalia အသက်ရှင်နိုင်တဲ့ အလားအလာ မရှိတော့ဘူးလို့ ကြေညာချက် ထုတ်ပြန်ခဲ့တယ်လို့ လန်ဒန်တိုင်းမ် သတင်းက ဖော်ပြပါတယ်။ တောင်တန်းတွေကိုချစ်တဲ့ Natalia တစ်ယောက်တော့ သူ့ခင်ပွန်းလိုပဲ တောင်တန်းပေါ်မှာ ထာဝရ လဲလျောင်းခဲ့ ပြီ ဖြစ်ပါတယ်။

အမြင့်ဆုံးမှာ ကျန်ရစ်ခဲ့တဲ့ နာတာလီယာ

Aug 28

ရုပ်ဝတ္ထုပစ္စည်း တစ်ခုလို လေလံပစ်ခံရတဲ့ ကြောင်ကလေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။ ဒီတခါတော့ “Coal Ball” (မီးသွေးလုံး) လို့ လူအများက နာမည်ပေးထားတဲ့ ကြောင်လေး အကြောင်း ပြောပြ မှာပါ။ မီးသွေးလုံး ဆိုတဲ့ ကြောင်လေးက အသက် သုံးနှစ် အရွယ် တရုတ် လီဟွာ အမျိုးအစား ကြောင်လေး ဖြစ်ပါ တယ်။ ဩဂုတ်လ ၂၃ ရက်နေ့ကတော့ သူ့ကို တရုတ်နိုင်ငံ အရှေ့ပိုင်းမှာရှိတဲ့ ဘဏ်တစ်ခုက လေလံပစ်တဲ့ ပွဲမှာ တခြား ပစ္စည်းတွေနည်းတူ လေလံ ပစ္စည်းတစ်ခု အနေနဲ့ လေလံ ပစ်ခဲ့တာပါ။ ကြောင်ကလေးရဲ့ ပိုင်ရှင်က ဘဏ်ကို အကြွေးပေးစရာ ရှိတာတွေ မပေးနိုင်လို့ မီးသွေးလုံးလေးကို ပိုင်ရှင်ရဲ့ ပိုင်ဆိုင်မှု ထဲက တစ်ခု အဖြစ် ဘဏ်က သိမ်းယူ ထားခဲ့တာပါ။ သူ့ကို ဒေါ်လာ ၁၀၀ နဲ့ တန်ဖိုး ဖြတ်ပြီး အကြွေးရဲ့ အစိတ်အပိုင်း ငယ်တစ်ခု အဖြစ် သိမ်းယူခဲ့တာ ဖြစ်ပါတယ်။ ကြောင်ကလေး “မီးသွေးလုံး” ကြောင့် အဲဒီ လေလံပွဲကို လူတွေ စိတ်ဝင်စားသွားကြပြီး အွန်လိုင်း လေလံပွဲကို ဝင်ရောက်ကြည့်ရှုသူ ၄၅၀,၀၀၀ ကျော်သွားခဲ့ပါတယ်။ ကြောင်လေးကိုလည်း လိုချင်သူတွေ များသွားပြီး ကြိုတင်စပေါ်ငွေ ယွမ် ၅၀ စီ ပေးထားတဲ့ ဝယ်ယူလိုသူက ၅၀၀၀ ရှိခဲ့ပါတယ်။ ကြောင်ကလေးကို လေလံပစ်တဲ့ သတင်းက လူအများကြားမှာ ပြန့်နှံ့သွားပြီး နောက်ဆုံးမှာ တရားရုံးက သိသွားပြီးတဲ့နောက် ကြောင်ကလေးကို ပစ္စည်းတစ်ခုအနေနဲ့ လေလံ ပစ်တာကို တရားရုံး အမိန့်နဲ့ ဖျက်သိမ်း ခဲ့ပါတယ်။ နောက်ဆုံးမှာတော့ ကြောင်ကလေးကို လူတစ်ယောက်က တာဝန်ခံပြီး မွေးစားဖို့ ခေါ်သွားခဲ့တယ်လို့ Hongxing (ဟောင်ဇင်း) သတင်းဌာနက ဖော်ပြပါတယ်။ သူ့ကို လိုချင်လို့ စဘော်ငွေ ပေးထားသူတွေကိုတော့ လေလံပွဲက ငွေပြန်အမ်းပေးခဲ့တယ်လို့ ဆိုပါတယ်။

ရုပ်ဝတ္ထုပစ္စည်း တစ်ခုလို လေလံပစ်ခံရတဲ့ ကြောင်ကလေး

Aug 28

တရုတ်သုတေသန ပညာရှင်ကို သူလျှိုမှုဖြင့် အမေရိကန် ဖမ်းဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၈ ရက်။ တရုတ် သုတေသန ပညာရှင် တစ်ဦးကို အမေရိကန် က သူလျှိုလုပ်သည်ဟု စွပ်စွဲပြီး ဖမ်းဆီးလိုက်သည်။ ဖမ်းဆီးခံခဲ့ရသည့် တရုတ်နိုင်ငံသား ပါရဂူဘွဲ့လွန် ပညာရှင် Yunhai Li (ယွန်ဟိုင်း လီ) သည် သုတေသန ပညာရှင် ဗီဇာ ဟုခေါ်သည့် ပညာရေး ဗီဇာ အမျိုးအစားဖြင့် အမေရိကန်သို့ လာရောက်ခဲ့ခြင်း ဖြစ်သည်။ ၎င်းကို အမေရိကန် အစိုးရက ထောက်ပံ့ထားသည့် ကျန်းမာရေး အစီရင်ခံစာအား ခိုးယူပြီး တရုတ်ပြည်သို့ ယူဆောင်သွားရန် ကြိုးပမ်းသည်ဟု ဆိုကာ ဖမ်းဆီးခဲ့ခြင်း ဖြစ်သည်။ အသက် ၃၅ နှစ်အရွယ် မစ္စတာ လီ သည် ၂၀၂၂ ခုနှစ်မှ စတင်၍ MD Anderson Cancer Centre တွင် အလုပ်ဝင်ခဲ့ပြီး အမေရိကန် အမျိုးသား ကျန်းမာရေး သိပ္ပံ နှင့် ကာကွယ်ရေး ဝန်ကြီးဌာနက ငွေကြေး ထောက်ပံ့ထားသည့် သုတေသန စီမံကိန်းတွင် လုပ်ကိုင်ခဲ့သည်။ မစ္စတာလီ က ရင်သားကင်ဆာ ကာကွယ်ဆေး သုတေသန လုပ်ငန်းတွင် Texas ပြည်နယ်အစိုးရ၏ ဝန်ထမ်း တစ်ဦးအဖြစ် တာဝန်ထမ်းဆောင်ခဲ့ခြင်းလည်း ဖြစ်သည်။ မစ္စတာလီသည် ဖက်ဒရယ် အစိုးရက ငွေကြေးထောက်ပံ့ထားသည့် စီမံကိန်းမှ လျို့ဝှက်ဖိုင် ၉၀ Gigabytes ကို ဒေါင်းလုဒ် လုပ်ယူပြီးနောက်ပိုင်း ဇူလိုင်လ ၁ ရက်နေ့တွင် တာဝန်မှ နှုတ်ထွက်သွားခဲ့သည်။ ၎င်းကို အမေရိကန်နိုင်ငံမှ ထွက်ခွာခါနီးတွင် လေဆိပ် အကောက်ခွန်ဌာန၌ ဖမ်းဆီးလိုက်ခြင်း ဖြစ်သည်။ Herris ကောင်တီ ခရိုင် တရားရုံး ရှေ့နေရုံးက စုံစမ်းစစ်ဆေးရေးမှူးများက မစ္စတာလီကို စစ်ဆေးသည့် အခါ ထိရှလွယ်သည့် အချက်အလက်များအား နိုင်ငံ ပြင်ပ ထုတ်ယူသွားရန် ကြိုးပမ်းမှုကို အထောက်အထားများ ရထားသည်ဟု ဆိုသည်။ မစ္စတာလီက အဆိုပါ သုတေသန အချက်အလက်များ အလဟာသ မဖြစ်စေရန် နှင့် တရုတ်ပြည်တွင် ဆက်လက် သုတေသန လုပ်ရန် ယူဆောင်ခဲ့ခြင်း ဖြစ်သည်ဟု စစ်ဆေးသူများကို ပြောသည်။ တရားရုံး မှတ်တမ်းများက မစ္စတာလီသည် တရုတ် အစိုးရ ထိန်းချုပ်ထားသော သိပ္ပံဖောင်ဒေးရှင်းမှ ထောက်ပံ့ငွေများ ရယူနေပြီး အစိုးရနှင့် သက်ဆိုင်သည့် ဆေးရုံမှလည်း လစာငွေကို ရယူနေသည်ဟု ဆိုထားသည်။ ပြစ်မှု ထင်ရှားခဲ့မည် ဆိုပါက တရုတ် သုတေသနမှူးသည် ထောင်ဒဏ် ၁၀ နှစ် အထိ ကျခံရနိုင်သည်။ မစ္စတာလီကို အစောပိုင်းတွင် ပြန်လွှတ်ထားပေးပြီး ဩဂုတ်လ ၂၂ ရက်နေ့တွင် ဒုတိယအကြိမ်ထပ်မံ ဖမ်းဆီးခဲ့ခြင်း ဖြစ်သည်။

တရုတ်သုတေသန ပညာရှင်ကို သူလျှိုမှုဖြင့် အမေရိကန် ဖမ်းဆီး

Aug 28

ထိုင်း-မြန်မာ နယ်စပ်က ဒုက္ခသည်များကို အလုပ် လုပ်ခွင့်ပေးရေး ထိုင်းအစိုးရက မူအားဖြင့် သဘောတူ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ထိုင်း-မြန်မာ နယ်စပ်တလျှောက်က မြန်မာဒုက္ခသည်များကို အလုပ်လုပ်ခွင့်ပေးရန် ထိုင်းအစိုးရက မူအားဖြင့် သဘောတူလိုက်သည်။ မြန်မာဒုက္ခသည်များကို ထိုင်းအစိုးရက တရားဝင် လုပ်ကိုင်ခွင့်ပြုမည်ဟု ထုတ်ဖော်ပြောဆိုလာကြောင်း ဒုက္ခသည်အရေး တက်ကြွလှုပ်ရှားသူများက ပြောသည်။ ထိုင်း - မြန်မာနယ်စပ်က ဒုက္ခသည်စခန်း များတွင် နေထိုင်ကြသည့် ဒုက္ခသည်များကို ထိုင်းနိုင်ငံထဲတွင် အလုပ် လုပ်ခွင့်ပြုရေး ဆွေးနွေးမှုနေမှုများနှင့် ပတ်သက်၍ ထိုင်းအစိုးရက မူအားဖြင့် လက်ခံသဘောတူလိုက် ခြင်း ဖြစ်သည်။ သို့သော် အသေးစိတ်အခြေအနေကိုမူ မသိရသေးသလို ဒုက္ခသည်စခန်းများကိုလည်း တရားဝင် အကြောင်း ကြားလာခြင်းမျိုး မရှိသေးဘူးဟု မယ်လဒုက္ခသည်စခန်းက ဒုက္ခသည်အချို့က ပြောသည်။ ယခုကဲ့သို့ ထိုင်းနယ်စပ်က ဒုက္ခသည်စခန်းများတွင် ခိုလှုံနေကြရသည့် မြန်မာဒုက္ခသည်များကို စခန်းအပြင် ထွက်ပြီး တရားဝင် အလုပ်လုပ်ခွင့်ပြုမည် ဆိုသည့်အပေါ် ကုလသမဂ္ဂ ဒုက္ခသည်များ ဆိုင်ရာ အေဂျင်စီ (UNHCR)က ကြိုဆိုလိုက်သည်။ အဆိုပါ ဆုံးဖြတ်ချက်မှာ ကြီးမားသည့် အလှည့်အပြောင်းတစ်ခု ဖြစ်ပြီး ဒုက္ခသည်များကို ထောက်ပံ့ပေး ရုံသာမက ဒေသတွင်း စီးပွားရေးကိုပါ အကျိုးပြုစေမည်ဟု ထိုင်းနိုင်ငံရှိ UNHCR ကိုယ်စားလှယ် က ဆိုသည်။ ဇူလိုင်လကုန်မှ စတင်၍ စားနပ်ရိက္ခာထောက်ပံ့မှုများ ရပ်ဆိုင်းခံလိုက်ရသည့်အတွက် မြန်မာဒုက္ခသည်များမှာ အခက်အခဲ အမျိုးမျိုးနှင့် ရင်ဆိုင်နေရခြင်း ဖြစ်သည်။ ထိုင်း-မြန်မာ နယ်စပ် တလျှောက်တွင် ဒုက္ခသည်စခန်း ၉ ခုရှိပြီး စုစုပေါင်း လူဦးရေ ၁၀၇,၅၀၀ ကျော်ရှိသည်ဟု ဒုက္ခသည်များကို အကူအညီပေးနေသည့် နယ်စပ် အကူအညီပေးရေး ညွှန့်ပေါင်းအဖွဲ့ TBC ၏ စာရင်းများ အရ သိရသည်။

ထိုင်း-မြန်မာ နယ်စပ်က ဒုက္ခသည်များကို အလုပ် လုပ်ခွင့်ပေးရေး ထိုင်းအစိုးရက မူအားဖြင့် သဘောတူ

Aug 28

လေကြောင်းတိုက်ခိုက်မှုထဲ ၅ နှစ်အတွင်း အရပ်သား ၄၀ ဦးသေဆုံးဟု မင်းတပ် ပအဖ ထုတ်ပြန်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ချင်းပြည် တောင်ပိုင်း၊ မင်းတပ်မြို့နယ်ထဲ စစ်တပ်၏ လေကြောင်း တိုက်ခိုက်မှုများကြောင့် ၅ နှစ်အတွင်း ကလေးများ အပါအဝင် အရပ်သားပြည်သူ အယောက် ၄၀ သေဆုံးခဲ့သည်ဟု မင်းတပ်မြို့နယ် ပြည်သူ့ အုပ်ချုပ် ရေး အဖွဲ့က ထုတ်ပြန်သည်။ ထို့အပြင် ကလေးများနှင့် အမျိုးသမီးများ အပါအဝင် အရပ်သားပြည်သူ အယောက် ၁၂၀ ထိခိုက်ဒဏ်ရာရခဲ့ သည်ဟု ထုတ်ပြန်ချက်ထဲတွင် ဖော်ပြထားသည်။ အဆိုပါ အရေအတွက်မှာ စစ်တပ်က အာဏာသိမ်းပြီးနောက် ၂၀၂၁ ခုနှစ်၊ မေလ ၂၇ ရက်နေ့မှ ၂၀၂၅ ခုနှစ်၊ ဩဂုတ် ၃ ရက်နေ့ အထိ ကောက်ခံရရှိသော စာရင်း ဖြစ်သည်ဟု မင်းတပ်မြို့နယ် ပြည်သူ့ အုပ်ချုပ်ရေး အဖွဲ့က ဆိုသည်။ ၅ နှစ်တာအတွင်း မင်းတပ်မြို့ကို လေကြောင်းမှ ဗုံးကြဲတိုက်ခိုက်မှု အကြိမ်ရေ ၁၇၆ ကြိမ်ထက်မနည်း ကြဲခဲ့ သည်ဟု ဩဂုတ်လ ၂၃ ရက်နေ့ ထုတ်ပြန်ချက်ထဲ၌ ဖော်ပြထားသည်။ သို့သော် ၂၀၂၄ ခုနှစ်၊ နိုဝင်ဘာ ၉ ရက်နေ့မှ ဒီဇင်ဘာလ ၂၁ ရက်နေ့ အထိ CDF - မင်းတပ်နှင့် မဟာမိတ်တို့က ဆင်နွှဲခဲ့သော မြို့သိမ်းတိုက်ပွဲကာလအတွင်း လေကြောင်းတိုက်ခိုက်မှု အကြိမ်ရေ ၃၀၀ ကျော်နှင့် ထိခိုက်ပျက်စီး မှုတို့ကို ထည့်သွင်းမထားဘူးဟု ဆိုသည်။ လေကြောင်း ဗုံးကြဲ တိုက်ခိုက်မှုများ ဒေသခံပြည်သူများ၏ အိမ်အလုံးရေ ၁၇၂ လုံး၊ စာသင်ကျောင်း၊ ဆေးရုံ၊ ဆေးခန်းနှင့် အစိုးရ အဆောက်အအုံပေါင်း ၄၀၊ ဘုရားကျောင်း၊ ဘုန်ကြီးကျောင်း စသည့် ဘာသာရေး အဆောက်အအုံ ၁၈ လုံး ထိမှန် ပျက်စီးခဲ့သည်။ အထက်ပါ လေကြောင်းတိုက်ခိုက်မှုများကိုပါ ထည့်သွင်းရေတွက်မည်ဆိုပါက မင်းတပ်မြို့နယ်အတွင်း စစ်ကော်မရှင်တပ်က လေကြောင်းတိုက်ခိုက်မှု အကြိမ်ရေပေါင်း ၄၇၆ ကြိမ်ထက် မနည်း ကြဲခဲ့သည်ဟု ဆိုရမည်။ မင်းတပ်မြို့နယ်ကို CDF - မင်းတပ်နှင့် မဟာမိတ်တပ်ဖွဲ့တို့က ၂၀၂၄ ခုနှစ်၊ ဒီဇင်ဘာလတွင် တိုက်ခိုက် သိမ်းပိုက် နိုင်ခဲ့ခြင်း ဖြစ်သည်။ လက်ရှိတွင် မင်းတပ်မြို့နယ် ပြည်သူ့အုပ်ချုပ်ရေးအဖွဲ့က မြို့တွင်း အုပ်ချုပ်ရေးနှင့် ပြန်လည် ထူထောင်ရေး လုပ်ငန်းများကို လုပ်ဆောင်နေခြင်း ဖြစ်သည်။

လေကြောင်းတိုက်ခိုက်မှုထဲ ၅ နှစ်အတွင်း အရပ်သား ၄၀ ဦးသေဆုံးဟု မင်းတပ် ပအဖ ထုတ်ပြန်  

Aug 28

ဝိုင်းမော်၊ ဗန်းမော်နှင့် ဖားကန့်မြို့နယ်တို့တွင် တိုက်ပွဲများ ပြင်းထန် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ကချင်ပြည်ထဲက ဝိုင်းမော်၊ ဗန်းမော်နှင့် ဖားကန့်မြို့နယ်တို့တွင် စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ကြား တိုက်ပွဲများ ဖြစ်နေပြီး အရပ်သားသေဆုံးမှုများ ရှိနေသည်။ မြစ်ကြီးနားတဖက်ကမ်းက ဝိုင်းမော်မြို့နယ်ထဲတွင် စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ကြား တိုက်ပွဲများ ဖြစ်နေပြီး လေကြောင်းကနေလည်း ဗုံးကြဲတိုက်ခိုက်နေသည်ဟု ဒေသခံများက ပြောသည်။ ဝိုင်းမော်မြို့နယ်ထဲက လမြန်ကျေးရွာဘက်ကို စစ်ကော်မရှင်တပ်က စစ်ကြောင်းထိုးလာသောကြောင့် တိုက်ပွဲ များ ပြန်ဖြစ်နေပြီး ဩဂုတ်လ ၂၆ ရက်နေ့တွင် လေကြောင်းမှ ဗုံးကြဲတိုက်ခိုက်ခဲ့သည်ဟု ဒေသခံများက ပြော သည်။ ဒေသခံတစ်ဦးက “လမြန်ရွာဘက်ကို လက်နက်ကြီးတွေနဲ့ အရင်ပစ်တာပါ။ ဩဂုတ် ၂၆ ရက်နေ့ မနက်ပိုင်း မှာပေါ့နော်။ လက်နက်ကြီးနဲ့ ပစ်တယ်။ အဲ့ဒါပြီးမှ နေ့လည် ၁ နာရီလောက် ဖြစ်မယ်ထင်တယ်။ လေယာဉ်နဲ့ ပြန်လာပစ်တာက။ ဂျက်ဖိုက်တာပေါ့နော်၊ အဲ့ဒါနဲ့ နှစ်ကြိမ် ပစ်သွားတာပါ” ဟု ပြောသည်။ ဝိုင်းမော်မြို့နယ်ထဲ့ လမြန်နှင့် ဝူယန်ကျေးရွာ အနီး ပတ်ဝန်းကျင်တွင် တိုက်ပွဲများ ဖြစ်ပွားနေသည်ဟု အဆိုပါ ဒေသခံက ပြောသည်။ ကချင်ဒေသထဲက တိုက်ပွဲများမှာ ဝိုင်းမော်မြို့နယ်အပြင် ဗန်းမော်နှင့် ဖားကန့်မြို့နယ်ထဲတွင်ပါ ပြင်းပြင်းထန်ထန် ဖြစ်ပွားနေခြင်း ဖြစ်သည်။ ဖားကန့်မြို့နယ်ထဲတွင် ဩဂုတ်လ ၂၆ ရက်နေ့ကလည်း ပစ်ခတ်မှုများ ရှိခဲ့သည်ဟု ဒေသခံများက ပြောသည်။ အထူးသဖြင့် ဖားကန့်မြို့နယ်ထဲက မှော်ဝမ်းလေး၊ မှော်ဝမ်းကြီးကျေးရွာဘက်၌ တိုက်ပွဲများ ဖြစ်နေပြီး အမှိုက်ပုံ (ခေါ်) ဆွတ်ဘွမ်ကျေးရွာဘက်၌လည်း တိုက်ပွဲသံများ ကြားနေရသည်ဟု ဆိုသည်။ ထို့အပြင် စစ်ကော်မရှင်၏ ဖားကန့်ဗျူဟာကုန်းမှ လက်နက်ကြီးနှင့် ပစ်ခတ်ခဲ့သောကြောင့် ဖားကန့်မြို့မ မဏိဇေယျုံ ဘုန်းကြီးကျောင်းက ဆွမ်းချက်ဆောင်ပေါ် ပေါက်ကွဲခဲ့ပြီး ကိုရင် နှစ်ပါး ထိခိုက် ဒဏ်ရာရခဲ့သည်။ ဆိပ်မူကျေးရွာအုပ်စုထဲတွင်လည်း လက်နက်ကြီးကျခဲ့ပြီး အမျိုးသားတစ်ဦး ထိမှန်ဒဏ်ရာ ရခဲ့သည့်အပြင် လုံးခင်းကျေးရွာအုပ်စုထဲကျခဲ့သည့် လက်နက်ကြီးကြောင့် ပြည်သူ ၄ ဦး ထိမှန်ဒဏ်ရာ ရခဲ့သည်။ အလားတူ ဗန်းမော်မြို့နယ်ထဲတွင်လည်း တိုက်ပွဲများ ပြင်းထန်နေသည်။ စကခ−၂၁ အပါအဝင် နေရာ သုံးနေရာ ထက် မနည်း၌ ဩဂုတ်လ ၂၆ ရက်နေ့က တိုက်ပွဲ ပြင်းပြင်းထန်ထန် ဖြစ်ခဲ့သည်ဟု မြေပြင် သတင်းအရင်းအမြစ် က ဆိုသည်။ ဗန်းမော်ခရိုင်ထဲက ရွှေကူမြို့နယ်တွင်လည်း စစ်တပ်က လက်နက်ကြီးနှင့် ပစ်ခတ်ခဲ့ရာ တပတ်အတွင်း အရပ်သား ၃ ဦး သေဆုံးခဲ့သည်။ အဆိုပါ တိုက်ပွဲများ အပြင် မြို့တော် မြစ်ကြီးနားတွင်လည်း လက်နက်ကြီး ကျရောက်ပေါက်ကွဲမှုကြောင့် အရပ်သား သေဆုံးမှုများ ရှိနေသည်။ ဩဂုတ်လ ၂၄ ရက်နေ့၊ ညနေပိုင်းတွင် မြစ်ကြီးနားမြို့၊ ရမ်ပူရပ်ကွက်ထဲ လက်နက်ကြီးကျည် ကျရောက် ပေါက်ကွဲခဲ့သောကြောင့် ကလေးတစ်ဦး သေဆုံးပြီး အမျိုးသမီး ၂ ဦး ထိမှန်ဒဏ်ရာ ရခဲ့သည်။

ဝိုင်းမော်၊ ဗန်းမော်နှင့် ဖားကန့်မြို့နယ်တို့တွင် တိုက်ပွဲများ ပြင်းထန်

Aug 27

အင်းလေးတွင် စစ်သားစုဆောင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ အင်းလေးတွင် ကျေးရွာအုပ်စုအလိုက် ၂ ဦးနှုန်းဖြင့် စစ်မှုထမ်း စုဆောင်းနေသည်ဟု ဒေသခံများက ပြောသည်။ ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသရှိ ကျေးရွာများတွင် စစ်မှုထမ်း အပတ်စဉ် ၁၇ အတွက် လူသစ်များ စတင်စုဆောင်းနေပြီဟု ဒေသတွင်း နေထိုင်သူများက ပြောသည်။ ညောင်ရွှေမြို့ရှိ ထွေအုပ်နှင့် နီးစပ်သူ တစ်ဦးက “အင်းထဲမှာက NLD နိုင်တယ်ဆိုပေမယ့် ဘာမှမသိ နားမလည် တဲ့သူတွေ တော်တော်များများ ကျန်သေးတယ်။ သူတို့က စကစ ထောက်ခံတာလည်း မဟုတ်ဘူး။ ခေါ်ရင် သွား မယ်ဆိုတဲ့ လူတွေပေါ့။ တချို့ အုပ်ကြီးတွေကလည်း သူတို့ အမျိုးတွေကို မထည့်တာတွေနဲ့ လာဘ်စားတာ တွေနဲ့ ဆိုတော့ ဒီလက ဖိအားပေးထားတာ” ဟု ပြောသည်။ အင်းလေးဒေသရှိ ကျေးရွာအုပ်စုပေါင်း ၃၄ စုအနက် တစ်အုပ်စုလျှင် ၂ ဦးနှုန်းဖြင့် ခေါ်ယူရန် အုပ်ချုပ်ရေးမှူးများ အား ယခု ဩဂုတ်လ နောက်ဆုံးပတ်အတွင်း ဖိအားပေးထားခြင်း ဖြစ်သည်ဟု ဆိုကြသည်။ လတ်တလောတွင် ရာအိမ်မှူးများက ဖောင်ဖြည့်လျှင် စစ်မှုထမ်း မသွားရဟု ဆိုကာ စစ်မှူထမ်း စာရွက်များအား လူငယ်များကို လက်မှတ် ထိုးခိုင်းနေသည့်အပြင် စစ်အသုံးစရိတ်အဖြစ် ကျပ် တစ်သောင်းခွဲ ကိုလည်း ကောက်ခံ နေသည်ဟု ဆိုသည်။ ထို့အပြင် စစ်မှုထမ်း ခေါ်ယူမည့် လူငယ်များကိုလည်း ညောင်ရွှေမြို့၌ ကျန်းမာရေး စစ်ဆေးခြင်း မရှိဘဲ တိုက် ရိုက် ခေါ်ယူနေပြီး ၎င်းတို့ ကန့်သတ်ထားသည့် အိမ်ထောင်ရှိသူ၊ အသက်မပြည့်သူများလည်း ပါဝင်လျက်ရှိ သည်ဟု ဆိုသည်။ စစ်မှုထမ်း ခေါ်ယူဖူးသည့် သာလေးကျေးရွာအတွင်း နေထိုင်သူ အမျိုးသား တစ်ဦးက “အုပ်ကြီးကတော့ အရင် က ဆေးသမားတွေ ဖမ်းဖမ်းပို့တယ်။ သူတို့ဆို ဆေးမအောင်ဘူး။ ပါသွားတာပဲ။ ကျန်တဲ့လူတွေတော့ နားလည် မှုနဲ့ လုပ်ပေးတာ ဘာညာ ရှိတယ်။ အခုက သူလည်း ဖိအားပေးခံရပြီဆိုတော့ မလွယ်တော့ဘူး” ဟု ပြောသည်။ အင်းလေးဒေသတွင် ကျေးရွာအုပ်စု ၃၄ စု (တိုးချဲ့ထားသည့် မြို့အပါ)၊ ကျေးရွာပေါင်း ၄၄၆ ရွာတွင် စစ်မှုထမ်း မခေါ်ယူရသေးသည့် ကျေးရွာများအား ဦးစားပေးခေါ်ယူသွားရန် စစ်ကော်မရှင်က ပြင်ဆင်နေခြင်း ဖြစ်သည်။ စစ်ကောင်မရှင်က ထိန်းချုပ်ထားနိုင်သည့် ရှမ်းပြည်တောင်ပိုင်း၌ မိုးဗြဲမြို့မှအပ ကျန်သည့် ဒေသများတွင် စစ်ရေး အခြေအနေ ငြိမ်သက်လျက်ရှိပြီး အပတ်စဉ်တိုင်း လွယ်ကူစွာ စုဆောင်းလျက်ရှိသည်ဟု ဒေသခံများက ပြောဆိုနေကြသည်။

အင်းလေးတွင် စစ်သားစုဆောင်း

« Prev 1 … 192 193 194 195 196 … 1,115 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု — August 21, 2026 8:07 pm
ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု — August 21, 2026 8:04 pm
အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း — August 21, 2026 8:02 pm

Recent Posts

ရွှေကူ လေကြောင်းတိုက်ခိုက်မှုတွင် ကိုယ်ဝန်ဆောင် အမျိုးသမီးအပါ အရပ်သားများ ဒဏ်ရာရ
သောင်ရင်းမြစ်ရေတက်ပြီး မြဝတီနှင့် မဲဆောက်တွင် ရေကြီးရေလျှံမှုဖြစ်
အင်းလေးရေ မြင့်တက်လာ၍ ကြိုတင်ရွှေ့ပြောင်းမှုများ ပြုလုပ်
မြောင် ဘုန်းကြီးကျောင်း ဥပုသ်နေ့တွင် ဗုံးကြဲခံရ၍ ၁၂ ဦး ထက်မနည်း သေဆုံး
ဂွနှင့်သံတွဲကို စစ်တပ်က လေယာဉ်အုပ်ဖွဲ့ ဗုံးကြဲမှုကြောင့် စစ်ဘေးရှောင်များ ဒဏ်ရာရ

Archives

Archives

×Close