နိုင်ငံတကာသတင်း

လိမ်လည်မှု တရားခံ ၅ ဦးကို ထိုင်းတရားရုံးက ထောင်ဒဏ် ၄၉,၁၁၀ နှစ်စီ ချမှတ်   သတင်းနှင့် မီဒီယာ ကွန်ရက်။
၂၀၂၆ ခုနှစ် ဩဂုတ်လ ၁၇ ရက်။   ထိုင်းနိုင်ငံ ရာဇဝတ်တရားရုံးက နာမည်ကျော် Forex-3D ငွေကြေးလိမ်လည်မှုတွင် ပါဝင်သည့် Apiruk Kothi နှင့် အဓိက တရားခံ ၄ ဦး၊ စုစုပေါင်း ၅ ဦးကို ထောင်ဒဏ် ၄၉,၁၁၀ နှစ်စီ အသီးသီး ချမှတ်လိုက်ကြောင်း ကြာသပတေးနေ့က အမိန့်ဒီကရီ ထုတ်ပြန်လိုက်ပါသည်။   တရားရုံးက ထောင်ဒဏ် အပြင် နစ်နာသူများအတွက် လျော်ကြေးငွေ ဘတ် ၄.၉၁၁ ဘီလီယံ ပြန်လည်ပေးလျော်ရန်လည်း အမိန့်ပေးခဲ့သည်။   ၎င်းငွေလိမ်ဂိုဏ်းသည် ရင်းနှီးမြှုပ်နှံသူ လူပေါင်းများစွာထံမှ စုစုပေါင်း ဘတ် ၂ ဘီလီယံကျော် လိမ်လည်ခဲ့ခြင်း ဖြစ်သည်။   အဆိုပါ အမှုတွင် ပါဝင်ပတ်သက်သည်ဟု စွပ်စွဲခံခဲ့ရသည့် နာမည်ကြီး ထိုင်းသရုပ်ဆောင် မင်းသမီး ပင်းကီး (Pinky - Savika Chaiyadej)၊ ၎င်း၏ မိခင်နှင့် အစ်ကိုဖြစ်သူ အပါအဝင် အခြား ပါဝင်သူအချို့ကိုမူ သက်သေအထောက်အထား မခိုင်လုံသဖြင့် တရားရုံးက ပြစ်ဒဏ်မှ လွှတ်ပေးခဲ့သည်။   Forex-3D သည် လိမ်လည်မှုတစ်ခုဖြစ်ပြီး၊ မင်းသမီး ပင်းကီး အပါအဝင် နာမည်ကြီး အနုပညာရှင်များ၏ ပုံရိပ်ကို အသုံးချကာ ရင်းနှီးမြှုပ်နှံသူ အသစ်များ၏ ငွေဖြင့် အဟောင်းများကို အမြတ်ငွေ ခွဲဝေပေးသည့် နည်းလမ်းဖြင့် လိမ်လည်ခဲ့ခြင်း ဖြစ်သည်။   #Apiruk_Kothi #Pinky_Savika_Chaiyadej

လိမ်လည်မှု တရားခံ ၅ ဦးကိုထိုင်းတရားရုံးက ထောင်ဒဏ် ၄၉,၁၁၀ နှစ်စီ ချမှတ်

လိမ်လည်မှု တရားခံ ၅ ဦးကိုထိုင်းတရားရုံးက ထောင်ဒဏ် ၄၉,၁၁၀ နှစ်စီ ချမှတ် သတင်းနှင့် မီဒီယာ ကွန်ရက်။၂၀၂၆ ခုနှစ် ဩဂုတ်လ ၁၇ ရက်။  ထိုင်းနိုင်ငံ ရာဇဝတ…

  • August 17, 2026
အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၆ ရက်။   အဖြစ်အပျက်ကတော့ Facebook တို့ YouTube တို့မှာ တွေ့ရတဲ့ ဇာတ်လမ်းဆန်ဆန် ပါပဲ။   ဘယ်လ်ဂျီယံ နိုင်ငံ အရှေ့ဖလန်းဒါးစ် (East Flanders) ဒေသမှာရှိတဲ့ နေအိမ် တလုံးမှာ ရေဆိုးထုတ်တဲ့ ပိုက်တွေ အသစ် တပ်ဆင်ဖို့ အလုပ်သမားတွေ အလုပ်လုပ်နေကြပါတယ်။   အဲဒီအထဲမှာ နွေရာသီကျောင်းပိတ်ရက် အချိန်ပိုင်း အလုပ်လုပ်နေတဲ့  အသက် ၁၈ နှစ်အရွယ် ကျောင်းသား တယောက်လည်း ပါပါတယ်။   သူတို့ အဖွဲ့ဟာ အဆောက်အအုံရဲ့ မြေအောက် နံရံတွေကို တူးဖော်တဲ့ အခါမှာတော့ အလုပ်သမားတွေဟာ နံရံ အတွင်း ဝှက်သိမ်းထားတဲ့ ရွှေချောင်းတွေနဲ့ ရွှေဒဂါးတွေကို တွေ့လိုက်ရပါတယ်။   ရွှေတွေ အားလုံးရဲ့ တွက်ချက်ထားတဲ့ တန်ဖိုးအရ ဆိုရင်တွေ့ရှိတဲ့ ရွှေတွေဟာ ပိဿာ ၆၀ ကနေ ၇၀ (ကီလို ဂရမ် ၁၀၀ ကနေ ၁၂၀ ) အတွင်းမှာ ရှိမှာ ဖြစ်ပါတယ်။     အဖွဲ့ခေါင်းဆောင်က ခိုးမှု ဖြစ်သွားမှာ စိုးတဲ့အတွက် ရဲကို အကြောင်းကြားဖို့ ဆုံးဖြတ်ခဲ့ပြီး ရဲကို ချက်ချင်း အကြောင်းကြားခဲ့ပါတယ်။   ရဲတပ်ဖွဲ့က ရွှေတွေကို ဘေးကင်းလုံခြုံတဲ့ နေရာကို ပြောင်းရွှေ့လိုက်ပြီး ပြင်ပမှ ရတနာ လာရောက်ရှာဖွေသူများ ဘေးအန္တရာယ် မဖြစ်စေရန်အတွက် ထိုဆောက်လုပ်ရေး လုပ်ငန်းခွင်ထဲကို မဝင်ဖို့ သတိပေးထားလိုက်ပါတယ်။   ဘယ်လ်ဂျီယံ ဥပဒေအရ မူလပိုင်ရှင်အစစ်အမှန်ဟာ ၁,၈၂၃ ရက် (၅ နှစ်) အတွင်း လာရောက် ထုတ်ယူခွင့် ရှိပါတယ်။   ၅ နှစ်ပြည့်တဲ့အထိ ပိုင်ရှင်ပေါ်မလာပါက (နှင့် ရာဇဝတ်မှုနှင့် မကင်းရှင်းသည့် ပစ္စည်းမဟုတ်ပါက) ရွှေရဲ့ တန်ဖိုးကို တွေ့ရှိသူ အလုပ်သမားတွေနဲ့ အဲဒီ မြေနေရာကို ပိုင်ဆိုင်တဲ့ သာရေးနာရေး ကူညီမှု ပရဟိတအဖွဲ့ (CAW Oost-Vlaanderen) တို့အကြား အညီအမျှ ခွဲဝေယူကြရမှာ ဖြစ်ပါတယ်။   ပရဟိတအဖွဲ့၏ ဒါရိုက်တာကလည်း ရရှိလာမည့် ရတနာတွေကို အဖွဲ့ရဲ့ ကူညီထောက်ပံ့ရေး လုပ်ငန်းတွေမှာ အသုံးပြုနိုင်ဖို့ မျှော်လင့်ထားတယ်လို့ ပြောပါတယ်။   #gold #East_Flanders

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ

အိမ်ဟောင်းနံရံတွင် ဝှက်သိမ်းထားသည့် ယူရို ၉ သန်းတန်ဖိုး ရွှေများ တွေ့ရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၆ ရက်။  အဖြစ်အပျက်ကတော့ …

  • August 15, 2026
လင်ကွန်းကို ဂျော့ဝါရှင်တန်ဖြင့် အစားထိုးမည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၁၄ ရက်။   အမေရိကန်၏ လေယာဉ်တင် သင်္ဘော တစ်စီးဖြစ်သည့် USS George Washington သည် အရှေ့အလယ်ပိုင်းဒေသသို့ ဦးတည်ထွက်ခွာနေသည်ဟု နိုင်ငံတကာသတင်းများတွင် ဖော်ပြထားသည်။    အရှေ့အလယ်ပိုင်းတွင် တာဝန်ထမ်းဆောင်နေသည့် USS Lincoln သင်္ဘောပေါ်ရှိ စစ်သားများ စိတ်ကျန်းမာရေးနှင့် ထောက်ပံ့ရေး ပြဿနာများ ရှိနေသည်ဆိုသည့် သတင်းများ ပေါ်ထွက်လာပြီးနောက်ပိုင်း ယခုကဲ့သို့ လေယာဉ်တင် သင်္ဘောတစ်စီး ပင်လယ်ကွေ့သို့ ထွက်ခွာလာခြင်း ဖြစ်သည်။   Lincoln သင်္ဘောသည် အီရန်နှင့် ဖြစ်ပွားနေသည့် စစ်ပွဲကို ကူညီရန် စေလွှတ်ခြင်းခံထားရပြီး ပင်လယ်ပြင်တွင် ဆက်တိုက် တာဝန်ထမ်းဆောင်ခဲ့သည်မှာ ရက်ပေါင်း ၂၆၀ ကျော် ရှိနေပြီဖြစ်သည်။   စစ်ပွဲ အခြေအနေများကြောင့် ထောက်ပံ့ရေး လမ်းကြောင်းများ ထိခိုက်ခဲ့သဖြင့် ရိက္ခာများ ရောက်ရှိရန် ကြန့်ကြာမှုများ ရှိခဲ့သည်။   စစ်သည်များ၏ စိတ်ဓာတ်နှင့် စိတ်ကျန်းမာရေးဆိုင်ရာ စိုးရိမ်မှုများ ထွက်ပေါ်နေသော်လည်း ရေတပ်ဘက်က မိမိကိုယ်ကို သေကြောင်းကြံစည်မှု တိုးပွားလာခြင်း မရှိဟု ငြင်းဆိုထားသည်။   သို့သော် ဩဂုတ်လဆန်းပိုင်းက စစ်သည်တစ်ဦး သင်္ဘောပေါ်မှ ရေထဲသို့ ပြုတ်ကျခဲ့ဖူးပြီး ပြန်လည်ကယ်ဆယ်နိုင်ခဲ့သည်ဟု ဆိုသည်။   အမေရိကန် ဒီမိုကရက်တစ် လွှတ်တော်အမတ်များက စစ်သည်များ၏ တာဝန်ထမ်းဆောင်ရသည့် အခြေအနေများနှင့် ပတ်သက်၍ အစိုးရနှင့် ပင်တဂွန် (ကာကွယ်ရေးဝန်ကြီးဌာန) ကို စုံစမ်းစစ်ဆေးရန် ကြိုးပမ်းနေကြသည်။   ဗီယက်နမ်နိုင်ငံ ဒါနန်းမြို့မှ ထွက်ခွာလာသည့် USS George Washington သည် လက်ရှိတွင် စင်ကာပူနှင့် မလက္ကာ ရေလက်ကြားတို့ကို ဖြတ်သန်းနေပြီး Lincoln သင်္ဘောနေရာတွင် အစားထိုး တာဝန်ယူသွားမည့် အလားအလာရှိနေသည်။   #USS_George_Washington #USS_Lincoln

လင်ကွန်းကို ဂျော့ဝါရှင်တန်ဖြင့် အစားထိုးမည်

လင်ကွန်းကို ဂျော့ဝါရှင်တန်ဖြင့် အစားထိုးမည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၄ ရက်။  အမေရိကန်၏ လေယာဉ်တင် သင်္ဘော တစ်စီးဖြစ်သည့် US…

  • August 14, 2026
ဘရူးနိုင်းဘုရင်က ချွေးမဖြစ်သူ၏ တော်ဝင်ဘွဲ့တံဆိပ်များရုပ်သိမ်း   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ် ၁၄ ရက်။   ဘရူနိုင်းဘုရင် ဟာဆာနယ် ဘိုကီးယား (Sultan Hassanal Bolkiah) သည် တော်ဝင်မိသားစုနှင့် မလျော်ကန်သော ပြုမူနေထိုင်မှုများရှိခဲ့သည်ဟုဆိုကာ ချွေးမဖြစ်သူ၏ တော်ဝင်ဘွဲ့တံဆိပ်များ အားလုံးကို ပြန်လည်ရုပ်သိမ်းလိုက်ကြောင်း အစိုးရရုပ်သံ RTB News က သတင်းထုတ်ပြန်သည်။   ဘွဲ့တံဆိပ် ရုပ်သိမ်းခံရသူမှာ အသက် ၃၃ နှစ်အရွယ် ပန်ဂီရန် ရာဘီရာတူး အာဒါဝီယာ (Pengiran Raabi’atul Adawiyyah) ဖြစ်ပြီး၊ အသက် ၈၀ အရွယ် ဘရူနိုင်းဘုရင်အပေါ် လေးစားမှုမရှိသော ပြုမူဆောင်ရွက်ချက်များကြောင့် ရာထူးဘွဲ့တံဆိပ်များ ရုပ်သိမ်းခံရခြင်း ဖြစ်သည်။   အဆိုပါ လုပ်ဆောင်ချက်သည် ဘုရင်မင်းမြတ်၏ တိုက်ရိုက်အမိန့်တော်ဖြင့် ပြုလုပ်ခြင်းဖြစ်ကြောင်း နန်းတော်ပြန်ကြားရေးဌာနက ထုတ်ပြန်သော်လည်း သီးခြားအသေးစိတ် အကြောင်းအရင်းကို ထုတ်ဖော်ပြောကြားခြင်း မရှိပေ။   ပန်ဂီရန်သည် ၂၀၁၅ ခုနှစ်တွင် ဘရူနိုင်းထီးနန်း ဆက်ခံပိုင်ခွင့် အဆင့် ၄ ရှိသူ မင်းသား အဗ္ဗဒူ မာလစ် (Prince Abdul Malik) နှင့် ထိမ်းမြားလက်ထပ်ခဲ့သူ ဖြစ်သည်။   မိခင်ဖြစ်သူ၏ ဘွဲ့တံဆိပ်များ ရုပ်သိမ်းခံရသော်လည်း ၎င်း၏ သမီးတော်လေးဦး၏ တော်ဝင်ဘွဲ့တံဆိပ်များနှင့် ရပိုင်ခွင့်များမှာမူ မူလအတိုင်း တည်ရှိမည်ဖြစ်သည်ဟု ဆိုသည်။   Photo:AFP #Pengiran_Raabiatul_Adawiyyah  

ဘရူးနိုင်းဘုရင်ကချွေးမဖြစ်သူ၏ တော်ဝင်ဘွဲ့တံဆိပ်များရုပ်သိမ်း

ဘရူးနိုင်းဘုရင်ကချွေးမဖြစ်သူ၏ တော်ဝင်ဘွဲ့တံဆိပ်များရုပ်သိမ်း သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ် ၁၄ ရက်။  ဘရူနိုင်းဘုရင် ဟာဆာနယ် ဘိုကီး…

  • August 14, 2026
ဂျပန်တွင် မိုးသည်းထန်စွာရွာသွန်းပြီး ၄ ဦးသေဆုံး၊ နာရီတာ လေဆိပ် ခရီးသွားများ သောင်တင်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ် ၁၄ ရက်။     ဂျပန်နိုင်ငံ၊ တိုကျိုမြို့နှင့် ထိစပ်နေသော ချီဘား (Chiba) ခရိုင်တွင် စံချိန်တင် မိုးသည်းထန်စွာ ရွာသွန်းခဲ့သည်။   မိုးသည်းထန်မှုကြောင့် ရေကြီးမြေပြိုမှုများ ဖြစ်ပွားခဲ့ရာ အနည်းဆုံး လူလေးဦး သေဆုံး၊ ငါးဦး ဒဏ်ရာရရှိပြီး တစ်ဦး ပျောက်ဆုံးနေသည်ဟု ဂျပန် အစိုးရက ထုတ်ပြန်သည်။   ဘေးအန္တရာယ်ကြောင့် ဒေသခံ အိမ်ထောင်စု ၁ သိန်းကျော်အား အရေးပေါ် ဘေးလွတ်ရာသို့ ရွှေ့ပြောင်းရန် သတိပေးထားရသည်။   မိုးလေဝသဌာနကလည်း အမြင့်ဆုံး အန္တရာယ်အဆင့် ၅ ထိ သတိပေးချက် ထုတ်ပြန်ခဲ့သည်။   ယင်းသည် ချီဘားခရိုင်သမိုင်းတွင် ပထမဆုံးအကြိမ် အမြင့်ဆုံး သတိပေးချက် ထုတ်ပြန်ရခြင်း ဖြစ်သည်။   မုန်တိုင်းကြောင့် ဒေသတွင်း အိမ်ထောင်စု ၂ သောင်း ၃ ထောင်ကျော် လျှပ်စစ်မီး ပြတ်တောက်လျက်ရှိသည်။   ထို့ပြင် တိုကျို နာရိတာ (Narita) အပြည်ပြည်ဆိုင်ရာ လေဆိပ်သို့ ဆက်သွယ်ထားသော လမ်းကြောင်းများ ပိတ်ဆို့သွားခဲ့သဖြင့် ခရီးသွား ၇,၀၀၀ ခန့် လေဆိပ်တွင် ညလုံးပေါက် သောင်တင်ခဲ့ရသည်။   Photo:AFP   #Chiba

ဂျပန်တွင်မိုးသည်းထန်စွာရွာသွန်းပြီး ၄ ဦးသေဆုံး၊ နာရီတာ လေဆိပ် ခရီးသွားများ သောင်တင် 

ဂျပန်တွင်မိုးသည်းထန်စွာရွာသွန်းပြီး ၄ ဦးသေဆုံး၊ နာရီတာ လေဆိပ် ခရီးသွားများ သောင်တင်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ် ၁၄ ရက်။   …

  • August 14, 2026
ဂျာမဏီက ထောက်လှမ်းရေးအဖွဲ့များအား အခွင့်အာဏာတိုးမြှင့်ပေးမည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ် ၁၄ ရက်။   ဆိုက်ဘာနှင့် ဟိုက်ဘရစ် (Hybrid) ခြိမ်းခြောက်မှုများကို တုံ့ပြန်ရန်အတွက် ပြည်တွင်းနှင့် ပြည်ပ ထောက်လှမ်းရေးအဖွဲ့များအား လုပ်ပိုင်ခွင့်အာဏာ တိုးမြှင့်ပေးမည့် စီမံကိန်းကို ဂျာမနီအစိုးရအဖွဲ့က အတည်ပြုလိုက်သည်။   မူဝါဒသစ်အရ ဂျာမနီ၏ BND (ပြည်ပထောက်လှမ်းရေး) နှင့် BfV (ပြည်တွင်းထောက်လှမ်းရေး) အဖွဲ့များသည် ဒစ်ဂျစ်တယ် ဆက်သွယ်ရေးများကို ကြားဖြတ်ဝင်ရောက်ခြင်း၊ အချက်အလက် ကောက်ယူခြင်းနှင့် တိုက်ခိုက်မှုများကို တားဆီးရန် တိုက်ရိုက် ပါဝင်ဆောင်ရွက်ခြင်းများကို လုပ်ဆောင်ခွင့် ရရှိမည်ဖြစ်သည်။   ပြင်ပခြိမ်းခြောက်မှုများအတွက် မဟာမိတ်နိုင်ငံများကိုချည်း မှီခိုနေ၍ မရတော့ကြောင်းနှင့် ယခုလုပ်ဆောင်ချက်သည် လုံခြုံရေးစနစ်ကို အဆင့်မြှင့်တင်လိုက်ခြင်းဖြစ်ကြောင်း ဂျာမန် ပြည်ထဲရေးဝန်ကြီး အဲလက်ဇန်းဒါး ဒိုဘရင့်စ် (Alexander Dobrindt) က ပြောကြားသည်။   အဆိုပါ စီမံကိန်းကို ပါလီမန်တွင် ဆက်လက်အတည်ပြုရမည်ဖြစ်သည်။     အတည်ပြုပါက ထောက်လှမ်းရေးများအနေဖြင့် တိုက်ခိုက်သူများ၏ ကွန်ပျူတာစနစ်အတွင်း ဝင်ရောက်ကာ အချက်အလက်များ ဖျက်ဆီးခြင်း သို့မဟုတ် ကူးယူခြင်းများ ပြုလုပ်နိုင်မည်ဖြစ်သည်။   သို့သော်လည်း ပြည်တွင်းထောက်လှမ်းရေးအား အာဏာတိုးမြှင့်ပေးမှုသည် တရားဥပဒေစိုးမိုးရေးနှင့် ပြည်သူ့လွတ်လပ်ခွင့်ကို ထိခိုက်နိုင်ကြောင်း အတိုက်အခံများနှင့် လူ့အခွင့်အရေးအဖွဲ့များက ဝေဖန်နေကြသည်။   Photo:EPA   #Alexander_Dobrindt

ဂျာမဏီကထောက်လှမ်းရေးအဖွဲ့များအား အခွင့်အာဏာတိုးမြှင့်ပေးမည်

ဂျာမဏီကထောက်လှမ်းရေးအဖွဲ့များအား အခွင့်အာဏာတိုးမြှင့်ပေးမည်  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ် ၁၄ ရက်။  ဆိုက်ဘာနှင့် ဟိုက်ဘရစ် (…

  • August 14, 2026
အငြင်းပွားနေသည့် ကျွန်းစုသို့ သမ္မတပူတင် သွားရောက်မှုကို ဂျပန် ကန့်ကွက်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ် ၁၄ ရက်။   ရုရှားနှင့် ဂျပန်နိုင်ငံတို့အကြား ပိုင်ဆိုင်မှု အငြင်းပွားနေသည့် ကူရီးလ်ကျွန်းစု (Kuril Islands) သို့ ရုရှားသမ္မတ ဗလာဒီမီယာ ပူတင် ပထမဆုံးအကြိမ် သွားရောက်ခဲ့မှုအပေါ် "လုံးဝ လက်ခံနိုင်ဖွယ်မရှိကြောင်း" ဂျပန်ဝန်ကြီးချုပ် စနိုင်း တာကာအိချိ (Sanae Takaichi) က ပြင်းထန်စွာ ဝေဖန်ကန့်ကွက်လိုက်သည်။   သမ္မတပူတင်သည် ဂျပန်ဘက်က အီတိုရိုဖူ (Etorofu) ဟုခေါ်ဆိုပြီး ရုရှားဘက်က အီတူရပ်ပ့် (Iturup) ဟု ခေါ်ဆိုသော ကျွန်းသို့ သွားရောက်ခဲ့ခြင်းဖြစ်ကြောင်း ရုရှားနိုင်ငံပိုင် မီဒီယာများက ဖော်ပြသည်။   အဆိုပါခရီးစဉ်သည် ဂျပန်ပြည်သူများ၏ ခံစားချက်ကို ထိခိုက်စေပြီး ရုရှားအပေါ်ထားရှိသည့် သဘောထားကို ပိုမိုဆိုးရွားစေကြောင်း၊ ထိုကျွန်းစုများသည် သမိုင်းကြောင်းအရရော အပြည်ပြည်ဆိုင်ရာ ဥပဒေအရပါ ဂျပန်နိုင်ငံ၏ ပိုင်နက်နယ်မြေဖြစ်ကြောင်း ဝန်ကြီးချုပ် တာကာအိချိက ထပ်လောင်းအတည်ပြု ပြောကြားခဲ့သည်။   ဒုတိယကမ္ဘာစစ်အပြီးတွင် ဆိုဗီယက်ယူနီယံက အဆိုပါကျွန်းစုများကို သိမ်းပိုက်၍ ဒေသခံ ဂျပန်နိုင်ငံသား ၁၇,၀၀၀ ခန့်ကို နှင်ထုတ်ခဲ့သည်။   ယင်းပိုင်နက်အငြင်းပွားမှုကြောင့် ယနေ့ထက်တိုင် နှစ်နိုင်ငံအကြား ငြိမ်းချမ်းရေးစာချုပ် မချုပ်ဆိုနိုင်သေးပေ။   ဂျပန်ဘက်က မြောက်ပိုင်းနယ်မြေများ (Northern Territories) ဟု ခေါ်ဆိုသော ထိုကျွန်းစုများသည် ရုရှားအတွက် စစ်ရေးအရ အဓိကဗျူဟာမြောက် နယ်မြေတစ်ခု ဖြစ်သည်။   #Kuril_Islands #Putin #Sanae_Takaichi

အငြင်းပွားနေသည့်ကျွန်းစုသို့ သမ္မတပူတင် သွားရောက်မှုကို ဂျပန် ကန့်ကွက်

အငြင်းပွားနေသည့်ကျွန်းစုသို့ သမ္မတပူတင် သွားရောက်မှုကို ဂျပန် ကန့်ကွက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ် ၁၄ ရက်။  ရုရှားနှင့် ဂျပန်နိ…

  • August 14, 2026
ထိုင်း-တရုတ် လေတပ် ပူးတွဲ စစ်လေ့ကျင့်ရေး ပြုလုပ်   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၁၃ ရက်။   ထိုင်းနှင့် တရုတ် လေတပ်တို့ "Falcon Strike 2026" (စွန်ရဲသုတ် ၂၀၂၆) ပူးတွဲစစ်ရေးလေ့ကျင့်မှုကို ထိုင်းနိုင်ငံ ဥဒွန်ဌာနီ အမှတ် ၂၃ လေတပ်စခန်းတွင် စတင် လုပ်ဆောင်လျက်ရှိသည်ဟု Khaosod သတင်းတွင် ဖော်ပြသည်။   အဆိုပါ စစ်ရေးလေ့ကျင့်မှုတွင် တရုတ်နိုင်ငံဘက်မှ J-10C နှင့် J-11 တိုက်လေယာဉ်များအပြင် AWACS ကြိုတင်သတိပေးစနစ်ပါ လေယာဉ်များကို စေလွှတ်ပါဝင်စေခဲ့သည်။   ထိုင်းနိုင်ငံဘက်မှ ဆွီဒင်နိုင်ငံထုတ် Gripen တိုက်လေယာဉ်များနှင့် Alpha Jet လေယာဉ်များဖြင့် ပူးပေါင်းပါဝင်လေ့ကျင့်လျက်ရှိသည်။   ယခုလေ့ကျင့်ခန်းတွင် လေကြောင်း နည်းဗျူဟာမြောက် စစ်ဆင်ရေးများ၊ ဝေဟင် ပျံသန်းစဉ် စက်သုံးဆီ ဖြည့်တင်းခြင်းနှင့် ပူးတွဲစစ်ဆင်ရေး တာဝန်များ ပါဝင်သည်။ ထို့ပြင် အကြီးစား ရေကြီးရေလျှံမှု ဖြစ်စဉ်ကို အခြေခံထားသည့် လူသားချင်းစာနာထောက်ထားမှု အကူအညီပေးရေးနှင့် သဘာဝဘေးအန္တရာယ် ကယ်ဆယ်ရေး (HADR) လေ့ကျင့်မှုများကိုပါ ထည့်သွင်းပြုလုပ်သွားမည်ဖြစ်ကြောင်း သိရသည်။   #Falcon_Strike_2026

ထိုင်း-တရုတ် လေတပ် ပူးတွဲ စစ်လေ့ကျင့်ရေး ပြုလုပ်

ထိုင်း-တရုတ် လေတပ် ပူးတွဲ စစ်လေ့ကျင့်ရေး ပြုလုပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၃ ရက်။  ထိုင်းနှင့် တရုတ် လေတပ်တို့ "Falcon…

  • August 13, 2026
ဟာဝိုင်ယီ မီးတောင်ပေါက်၊ ချော်ရည်များ အမြင့်ပေ ၄၀၀ ထိ ပန်းထွက်   သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၁၃ ရက်။   ဟာဝိုင်ယီရှိ ကီလာအွေးယာ (Kīlauea) မီးတောင် ပေါက်ကွဲအား ပြင်းထန်နေပြီး ချော်ရည်များ အမြင့်ပေ ၄၀၀ အမြင့်အထိ ပန်းထွက်ခဲ့သည်။   ၂၀၂၆ ခုနှစ်၊ သြဂုတ် ၁၂ ရက် (ဗုဒ္ဓဟူးနေ့) မွန်းလွဲ ၃:၄၅ နာရီတွင် ဟာလီမောင်မောင် Halemaumau မီးတောင်ဝ၌ အကြိမ် ၅၃ မြောက် ပေါက်ကွဲမှု စတင်ခဲ့သည်။   ပေါက်ကွဲမှု ပြင်းအား လျှင်မြန်စွာ မြင့်တက်လာခဲ့ပြီး မြောက်ဘက်အပေါက်မှ ချော်ရည်များ ပေ ၄၀၀ အထိ အမြင့်သို့ ပန်းထွက်ခဲ့သည်။ မီးတောင်ပြာခိုး တိမ်တိုက်သည် ပေ ၁၆,၀၀၀ အထိ မြင့်တက်ခဲ့ကာ ညဘက်တွင် မီးတောင်ဝ ကြမ်းပြင်၏ ၃၀% မှ ၄၀% အထိ ချော်ရည်များ ဖုံးလွှမ်းသွားခဲ့သည်။   လေတိုက်ခတ်မှုကြောင့် မီးတောင်ပြာနှင့် ဓာတ်ငွေ့များသည် အနောက်တောင်နှင့် အနောက်ဘက်ရှိ Hawaii Volcanoes အမျိုးသားဥယျာဉ်အတွင်းသို့ လွင့်ပါးသွားနိုင်သည်ဟု ခန့်မှန်းထားသော်လည်း ဒေသခံလူထုအပေါ် သက်ရောက်မှု နည်းပါးမည်ဟု ဆိုသည်။   #Kīlauea #Halemaumau #HawaiiVolcanoes

ဟာဝိုင်ယီ မီးတောင်ပေါက်၊ ချော်ရည်များ အမြင့်ပေ ၄၀၀ ထိ ပန်းထွက်

ဟာဝိုင်ယီ မီးတောင်ပေါက်၊ ချော်ရည်များ အမြင့်ပေ ၄၀၀ ထိ ပန်းထွက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၁၃ ရက်။ ဟာဝိုင်ယီရှိ ကီလာအွေးယာ (Kī…

  • August 13, 2026
×Close