သတင်း

ကော်သူးလေ အမျိုးသမီး ကွန်ရက် ဖွဲ့စည်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၆ ရက်။   အမျိုးသမီးများ၏ ပါဝင်မှု အခန်းကဏ္ဍကို မြှင့်တင်ရန် ကော်သူးလေ အမျိုးသမီးများ ကွန်ရက်ကို ဖွဲ့စည်းလိုက် သည်။   ကော်သူးလေ ဆိုသည်မှာ ကရင်များက သူတို့ စကားဖြင့် ကရင် လူမျိုး/နိုင်ငံကို ခေါ်ဆိုခြင်း ဖြစ်သည်။   ကော်သူးလေ နယ်စပ်တစ်နေရာတွင် မေလ ၂၇ ရက်နေ့မှ  ၂၉ ရက်နေ့အထိ သုံးရက်တာ ကျင်းပပြုလုပ်ခဲ့သည့် ကော်သူးလေ အမျိုးသမီးများ နှီးနှောဖလှယ်ပွဲမှ ဖွဲ့စည်းလိုက်ခြင်း ဖြစ်သည်ဟု နှီးနှောဖလှယ်ပွဲ ဖြစ်မြောက်ရေး ကော်မတီ ဥက္ကဋ္ဌ နော်ထူးထူးက ပြောသည်။   “ကော်သူးလေ အမျိုးသမီး Network ကို သဘောတူပြီးတော့ ဖွဲ့လိုက်တယ်။ အမျိုးသမီးတွေရဲ့ အသံကို ပိုပြီးတော့ မြှင့်တင်ဖို့အတွက် ရည်ရွယ်ပြီးတော့ ဖွဲ့လိုက်တာပါ” ဟု နော်ထူးထူးက ပြောသည်။   ကော်သူးလေ အမျိုးသမီးများကွန်ရက် ဖွဲ့စည်းရခြင်း၏ အဓိက ရည်ရွယ်ချက်ကို နော်ထူးထူးက ယခုကဲ့သို့ ဆက်ပြောသည်။   ၎င်းက “ကော်သူးလေ နှီးနှောဖလှယ်ပွဲမှာ အလွှာပေါင်းစုံက အမျိုးသမီးတွေ အတူတကွ စုရုံးပြီးတော့ အားလုံး ပါဝင်ကြတယ်။ ရည်ရွယ်ချက်ကတော့ ကိုယ်ပိုင်အုပ်ချုပ်ခွင့်နဲ့ ဒီမိုကရေစီရှိတဲ့ ကော်သူးလေ ယူနစ်ကို တည် ဆောက်ဖို့အတွက် ကျမတို့ရဲ့ ပထမခြေလှမ်းပေါ့” ဟု ပြောသည်။   ဖွဲ့စည်းလိုက်သည့် ကော်သူးလေ အမျိုးသမီးများ ကွန်ရက်တွင် ကရင်အမျိုးသမီးများ အဓိက ပါဝင်မည်ဖြစ်ပြီး ကရင်အမျိုးသား အစည်းအရုံး KNU ၏ ခရိုင် (၇) ခရိုင်နှင့် မြို့နယ်များမှ အမျိုးသမီး ကိုယ်စားလှယ်များ၊ ဒေသခံ လူမှု အဖွဲ့အစည်းများနှင့် တစ်သီးပုဂ္ဂလများ ပါဝင်မည်ဖြစ်ပြီး အခြားလူနည်းစု တိုင်းရင်းသား အမျိုးသမီးများ ပါဝင်နိုင်ရေး အတွက်လည်း ဆက်လက်ဆောင်ရွက်သွားမည်ဟု နော်ထူးထူးက ဆိုသည်။   နှီးနှောဖလှယ်ပွဲတွင် ကရင်အမျိုးသားအစည်းအရုံး KNU ၏ လာမည့် ၁၈ ကြိမ်မြောက် ညီလာခံ (ကွန်ဂရက်) တွင် ဌာနဆိုင်ရာများ၊ ခရိုင်၊ စစ်ဖက်နှင့် အရပ်ဖက်အသီးသီးမှ အမျိုးသမီးညီလာခံ ကိုယ်စားလှယ် ၃၀ ရာခိုင်နှုန်း အနည်းဆုံးပါဝင်ရန် တိုက်တွန်းတောင်းဆိုသည့် သဘောတူညီချက် တစ်ရပ်လည်း ချမှတ်ခဲ့သည်ဟု နော်ထူးထူး က ပြောသည်။   ထို့အပြင် နှီးနှောဖလှယ်ပွဲမှ အခြားအရေးကြီးသည့် သဘောတူညီချက်များအဖြစ် ကော်သူးလေနယ်မြေ အတွင်း အွန်လိုင်း ငွေကြေးလိမ်လည်မှု အပါအဝင် တရားမဝင် စီးပွားရေး လုပ်ငန်းများနှင့် လောင်းကစားများအား ဆန့်ကျင်တိုက်ဖျက်ရန်၊ လူသားချင်းစာနာမှု အကူအညီများ အတားအဆီးမရှိ ရောက်ရှိရေး ပူးပေါင်းဆောင် ရွက်ရန် ဖြစ်သည်။   ထို့အတူ စစ်ကောင်စီ၏ လေကြောင်း တိုက်ခိုက်မှုများအား ပြင်းထန်စွာရှုတ်ချပြီး နိုင်ငံတကာမှ အရေးယူဆောင် ရွက်ရန်၊ ဒုက္ခသည်များနှင့် နေရပ်စွန့်ခွာသူများအား အရေးပေါ် အကူအညီများ ပေးအပ်ရန်နှင့် ထိုင်းအစိုးရအား နယ်စပ် ဒုက္ခသည်များ၏ ကျွမ်းကျင်မှုကို အသိအမှတ်ပြု၍ တရားဝင် အလုပ်လုပ်ခွင့်ပေးရန် တောင်းဆိုချက် များလည်း ပါဝင်သည်။   ကော်သူးလေ အမျိုးသမီးများ နှီးနှောဖလှယ်ပွဲသို့ ကရင်အမျိုးသားအစည်းအရုံး KNU၊ နေရာဒေသ အသီးသီးရှိ ကရင်အရပ်ဖက် အဖွဲ့အစည်းများမှ တာဝန်ရှိသူများ၊ ကိုယ်စားလှယ်များအပြင် တစ်သီးပုဂ္ဂလ ပညာရှင်များနှင့် မြန်မာနိုင်ငံ၏ ဒီမိုကရေစီအရေး လှုပ်ရှားမှုတွင် ဦးဆောင်နေသည့် ခေါင်းဆောင်များ အပါအဝင် ကိုယ်စားလှယ် စုစုပေါင်း အယောက် ၁၄၀ ကျော် တက်ရောက်ခဲ့ကြသည်။   Photo credit- Seminar Committee  

ကော်သူးလေ အမျိုးသမီး ကွန်ရက် ဖွဲ့စည်း 

ကော်သူးလေ အမျိုးသမီး ကွန်ရက် ဖွဲ့စည်း  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၆ ရက်။  အမျိုးသမီးများ၏ ပါဝင်မှု အခန်းကဏ္ဍကို မြှင့်တင်ရန် …

  • June 6, 2025
စစ်ကောင်စီ စစ်ကြောင်းကြောင့် ပေါက် နယ်ခံများ ထွက်ပြေးနေရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၆ ရက်။   ပခုက္ကူ မြို့နယ်အတွင်း စစ်ကောင်စီ စစ်ကြောင်းထိုးလာသောကြောင့် ဒေသခံများ တိမ်းရှောင်ထွက်ပြေး နေရသည်။   မကွေးတိုင်း၊ ပခုက္ကူမြို့နယ်မှ ပေါက်မြို့သို့ စစ်ကောင်စီ တပ်ဖွဲ့များက အင်အား ၄၀၀ ဖြင့် စစ်ကြောင်းထိုးလာခဲ့ခြင်း ဖြစ်သည်ဟု မြေပြင်အရင်းအမြစ်များက ပြောသည်။   စစ်ကောင်စီတပ်များသည် ဇွန်လ ၅ ရက်နေ့၊ နံနက်ပိုင်းမှ စတင်၍ တစ်နေကုန်နီးပါး ကမ္မမြို့ဈေး အရှေ့ဘက် ခြမ်းရှိ ရပ်ကွက်များနှင့် ပေါက်မြို့နယ်အတွင်းရှိ ပြည့်အိုင်၊ အင်ကြင်းပင် စသည့်ကျေးရွာများတွင် မွှေနှောက် ရှာဖွေနေကြသည်ဟု ဆိုသည်။   အညာမြေတပ်ပေါင်းစု ပြန်ကြားရေးတာဝန်ခံ ကိုဘိုဘိုသန့်ဇင်က “ဒေသခံတွေရဲ့ စိုးရိမ်ချက်ကတော့ အဓိက စစ်ကြောင်းထဲမှာ ဖမ်းမိသွားမှာကိုပေါ့ ဒါက နံပါတ် ၁ ပေါ့။ ဒုတိယကတော့ စစ်ကြောင်းထိုး လမ်းတစ် လျှောက်မှာ ထိတွေ့မှုဖြစ်နေတဲ့ အချိန် မဆိုင်တဲ့ အရပ်သားတွေကို စစ်တပ်က ဗုံးကြဲတဲ့အခါမျိုးတွေမှာ ထိခိုက် မှုတွေ ဖြစ်လာမှာ စိုးရိမ်တယ်” ဟု ပြောသည်။   ယခင်လများအတွင်း ပေါက်မြို့နယ်ရှိ ကျေးရွာများသို့ စစ်ကောင်စီ စစ်ကြောင်းထိုးသည့် အခါမျိုးတွင် လူနေအိမ် များအား မီးရှို့ခြင်း၊ လုယက်ခြင်းတို့ ကျူးလွန်ခဲ့ဖူးသဖြင့် တောင်ယာအဓိက လုပ်ကိုင်သည့် အဆိုပါ ဒေသတွင် မျိုးစေ့များ၊ မျိုးစပါးများ ဆုံးရှုံးမည်ကို စိုးရိမ်နေရခြင်း ဖြစ်သည်။   ထို့အပြင် စစ်ကြောင်းထိုးသည့် အခါ၌ ဖမ်းဆီး ပစ်သတ်ခံရခြင်း၊ လူသားဒိုင်းများ ပြုလုပ်ခြင်းများလည်း ကြုံခဲ့ရ သည့်အပြင် လက်ရှိ စစ်ကြောင်းထိုးလာသည့် တပ်မ ၁၀၁ ကလည်း ယာဉ်မောင်းတစ်ဦးအား ပစ်သတ်ခဲ့သည်ဟု ဆိုသည်။   အညာမြေတပ်ပေါင်းစု ပြန်ကြားရေးတာဝန်ခံ ကိုဘိုဘိုသန့်ဇင်က “ဒီတခေါက်ထိုးတဲ့ စစ်ကြောင်းက ၂ ကြောင်း စာဆိုတော့ အင်အားက တော်တော်များတာ ဖြစ်တဲ့အတွက် ကျနော်တို့အနေနဲ့ ကိုယ့်ဘက်ကနေ ဆုံးရှုံးနစ်နာမှု တွေ မရှိအောင် ကြိုတင်ကာကွယ်ထားပြီးတော့ လုပ်စရာရှိတာကို ဆက်လုပ်နေပါတယ်။ ဒေသခံတွေအနေနဲ့ လည်း စစ်ရေးသတင်းတွေကို မျက်ခြေမပြတ် စောင့်ကြည့်လေ့လာပြီးတော့ ကြိုတင်ကာကွယ်မှုတွေ ပြုလုပ်ဖို့ လည်း တိုက်တွန်းပါတယ်” ဟု ပြောသည်။   လက်ရှိတွင် ဇွန်လ ၁ ရက်နေ့က ထွက်ခွာလာသည့် အင်အား ၄၀၀ ခန့်ပါသည့် စစ်ကြောင်းမှာ ညောင်ဂျစ်ပင် (ပျူစောထီးကျေးရွာ)နှင့် ပျူစောထီးဘုန်းကြီး ဝါယမကျောင်း၌ တပ်စွဲထားသည်ဟု ဆိုသည်။   ထို့အပြင် မေလ ၂၇ ရက်နေ့က ထွက်ခွါလာသည့် အင်အား ၁၅၀ ခန့်ပါသော စစ်ကြောင်းမှာလည်း ပခုက္ကူ လမ်းမကြီးမှတဆင့် ပေါက်မြို့နယ်၊ ရွှေလံကျေးရွာတွင် တပ်စွဲထားသည်ဟု ဆိုသည်။   အဆိုပါ စစ်ကောင်စီ စစ်ကြောင်းသည် ကာကွယ်ရေး ပစ္စည်းစက်ရုံ (ကပစ-၂၄) သို့ တပ်ပြောင်း ပြပြီး မြိုင် စက်မှု - ၂ သို့ ဆက်လက်ချီတက်နိုင်သည့် အပြင် နီးစပ်ရာ ကျေးရွာများတွင်လည်း ပေါ်တာဆွဲနိုင်သဖြင့် တိမ်းရှောင်နေသည့် ဒေသခံများအား သတိရှိကြရန် အညာမြေတပ်ပေါင်းစုက သတိပေးထားသည်။

စစ်ကောင်စီ စစ်ကြောင်းကြောင့် ပေါက် နယ်ခံများ ထွက်ပြေးနေရ

စစ်ကောင်စီ စစ်ကြောင်းကြောင့် ပေါက် နယ်ခံများ ထွက်ပြေးနေရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၆ ရက်။  ပခုက္ကူ မြို့နယ်အတွင်း စစ်ကောင်စီ …

  • June 6, 2025
ရခိုင်နှင့် မကွေးအစပ် တာဝါတိုင်ကုန်းကို AA သိမ်းပိုက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။   ရခိုင်ပြည်နှင့် မကွေးတိုင်းနယ်စပ်၊ ငဖဲမြို့နယ်အပိုင် အမ်း - ပဒါန်းလမ်းပေါ်ရှိ စစ်ကောင်စီ၏ နတ်ရေကန် ဗျူဟာကုန်း၏ ရှေ့ကာကင်း စခန်းတစ်ခုကို အာရက္ခ တပ်တော် AA နှင့် ပူးပေါင်းအဖွဲ့ က သိမ်းယူလိုက်သည်။   အမ်း - ပဒါန်းလမ်းပေါ်ရှိ စစ်ကောင်စီ၏ MPT ဆက်သွယ်ရေး တာဝါတိုင်ကုန်းစခန်းကို AA က ဇွန်လ ၄ ရက် နေ့က အပြီးသတ် သိမ်းယူနိုင်ခဲ့ခြင်း ဖြစ်သည်ဟု မြေပြင် သတင်းအရင်းအမြစ်က ပြောသည်။   မြေပြင် သတင်းအရင်းအမြစ် တစ်ဦးက “နေရာကို ပြောရမယ်ဆိုရင် မကွေးတိုင်း၊ ငဖဲမြို့နယ်နဲ့ ရခိုင်ပြည်၊ အမ်းမြို့နယ်ကြားက ရိုးမလမ်းဖြစ်တဲ့ ခေါ်တဲ့ ဒီ အမ်း - ပဒါန်းလမ်းပေါ်က စခန်းပေါ့ဗျာ။ စစ် ကောင်စီရဲ့ နတ်ရေကန်ဗျူဟာကုန်းနားက ဆက်သွယ်ရေး တာဝါတိုင်စခန်းကို AA က သိမ်းလိုက်တာပါ။ အသေးစိတ် တော့ AA က ထုတ်ပြန်ပါလိမ့်မယ်ဗျ” ဟု ပြောသည်။   အမ်း - ပဒါန်းလမ်းပေါ်ရှိ စစ်ကောင်စီ၏ MPT ဆက်သွယ်ရေး တာဝါတိုင်ကုန်းစခန်းကို သိမ်းယူပြီးနောက်တွင် အနီးရှိ နတ်ရေကန် ဗျူဟာကုန်းနားတဝိုက်တွင်လည်း တိုက်ပွဲများ ဆက်လက်ပြင်းထန်သည်မှာ ဇွန်လ ၅ ရက်နေ့ အထိဖြစ်သည်ဟု ဆိုသည်။   ထို နတ်ရေကန် ဗျူဟာကုန်း အနီးဝိုက်တွင် ဖြစ်ပွားနေသည့် တိုက်ပွဲအတွင်း စစ်ကောင်စီက လေကြောင်း တိုက် ခိုက် ပစ်ကူပေးမှုအပြင် အနီးအနားရှိ ဘုံဘောခမောက် တောင်စခန်းမှလည်း လက်နက်ကြီးဖြင့် ပစ်ကူပေးနေ သည်ဟု ဆိုသည်။   အာရက္ခတပ်တော် (AA) နှင့် ပူးပေါင်းအဖွဲ့က ဖေဖော်ဝါရီလဆန်းပိုင်းမှ စတင်၍ အမ်း- ပဒါန်းလမ်းပိုင်းကို ပိတ် ဆို့ ဖြတ်တောက်ထားပြီး နတ်ရေကန်ဗျူဟာကို ထိုးစစ်ဆင်တိုက်ခိုက်နေခြင်း ဖြစ်သည်ဟု ရခိုင်အခြေစိုက် သတင်းဌာနများက ဖော်ပြကြသည်။   အမ်း - ပဒါန်းလမ်းပေါ်ရှိ စစ်ကောင်စီ၏ မထုံးကာကင်းစခန်းကို AA က တိုက်ခိုက် သိမ်းပိုက်ပြီးနောက် နတ်ရေကန် ဗျူဟာစခန်းကို ဖေဖော်ဝါရီလမှ စတင်၍ ယနေ့အချိန်ထိ ဆက်လက်ထိုးစစ်ဆင်နေခြင်း ဖြစ်သည်။   မကွေးတိုင်းအတွင်းရှိ ကာကွယ်ရေးပစ္စည်း စက်ရုံ (ကပစ) များကို ထိုးစစ်ဆင်သိမ်းပိုက်မည်ကို စိုး၍ ခံစစ်ပြင် ထားသည့် နတ်ရေကန် ဗျူဟာကုန်းကို AA နှင့် ပူးပေါင်းတပ်များက ထိုးစစ်ဆင် တိုက်ခိုက်ခဲ့ခြင်း ဖြစ်သည်။   အမ်းမြို့နယ်အတွင်းရှိ စစ်ကောင်စီ၏ ကမြင်းကန်ဗျူဟာစခန်းနှင့် ပိန်းရေစမ်း‌ကျေးရွာရှိ စစ်ကောင်စီ စခန်းတို့ကို အာရက္ခတပ်တော် (AA) က ဇန္နဝါရီလ ၂၁ ရက်နေ့က သိမ်းပိုက်ရရှိခဲ့သည်။   လက်ရှိတွင် AA ပူးပေါင်းတပ်များနှင့် စစ်ကောင်စီတို့သည် ရခိုင်-မကွေး အစပ်နေရာများတွင် သာမကဘဲ ပဲခူးတိုင်း၊ ပန်းတောင်းမြို့နယ်နှင့် ဧရာဝတီတိုင်းအတွင်းက ရေကြည်နှင့် လေးမျက်နှာမြို့တို့တွင်လည်း နှစ်ဖက် ကြား စစ်ရေးတင်းမာလျှက်ရှိသည်။

ရခိုင်နှင့် မကွေးအစပ် တာဝါတိုင်ကုန်းကို AA သိမ်းပိုက်

ရခိုင်နှင့် မကွေးအစပ် တာဝါတိုင်ကုန်းကို AA သိမ်းပိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။  ရခိုင်ပြည်နှင့် မကွေးတိုင်းနယ်စပ်၊ င…

  • June 5, 2025
နေရပ်ပြန် စစ်ရှောင်များ နေထိုင်ရပ်တည်ရေး အခက်အခဲရှိ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။   ကရင်နီ တပ်ဖွဲ့များနှင့် စစ်ကောင်စီနှင့် ပအိုးဝ် ပြည်သူစစ် ပူးပေါင်း တပ်ဖွဲ့များအကြား တိုက်ပွဲဖြစ်ပွားခဲ့သည့် ရှမ်းပြည်တောင်ပိုင်း ပင်လောင်းမြို့နယ်အတွင်း ကျေးရွာသို့ နေရပ်ပြန်သော စစ်ရှောင်များ နေထိုင်ရပ်တည်ရေးအတွက် အခက်အခဲရှိသည်ဟု ဒေသတွင်း သတင်းရင်းအမြစ် များက ပြောသည်။   ပြီးခဲ့သည့် မေလအတွင်း ကရင်နီအမျိုးသားများ ကာကွယ်ရေးတပ် (KNDF)၊ တော်လှန်ရေးအင်အားစုများနှင့် စစ်ကောင်စီ၊ ပအိုဝ်းပြည်သူ့စစ်အဖွဲ့ (PNA)တို့ အကြား ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ပင်လောင်းမြို့နယ်၊ ဆောင်းပြောင်းကျေးရွာတွင် တိုက်ပွဲများ ပြင်းထန်ခဲ့သော်လည်း ယခု ဇွန်လ၌ စစ်ကောင်စီက နယ်မြေစိုးမိုးထားသဖြင့် စစ်ဘေးရှောင်များ နေရပ်ပြန်လာကြခြင်း ဖြစ်သည်။   အသက် ၃၅ နှစ်ဝန်းကျင်အရွယ် နေရပ်ပြန် စစ်ဘေးရှောင်တစ်ဦးက “သုံးပုံ နှစ်ပုံတော့ ပြန်လာကြပြီ။ ရှောင် တာကြာရင်လည်း စားဖို့က လိုလာပြီလေ။ အခု ပြန်လာပြီဆိုတော့လည်း အလုပ်က မရှိကြတော့ဘူး။ ထောက် ပံ့တာတွေကလည်း ရှောင်တဲ့ အချိန်လောက်ပဲ ထောက်ပံ့ကြတာ။ တကယ်လိုအပ်တာက ပြန်လာတဲ့အချိန် ပိုလိုတယ်။ အခုဆို လူအုပ်လိုက်ကြီး ရွာမှာ စားဖို့မရှိ၊ အလုပ်လည်း မရှိ” ဟု ပြောသည်။   ဆောင်းပြောင်းကျေးရွာတွင် တိုက်ပွဲများကြောင့် စိုက်ခင်းများ ပျက်စီးခြင်း၊ နေ့စားအလုပ်အကိုင်များ မရှိခြင်း၊ စိုက်ခင်းနေရာ အများစုကို PNA က သွားလာခွင့် ကန့်သတ်ထားခြင်း စသည့် အကြောင်းအရာများကြောင့် စစ်ဘေးရှောင်များမှာ အလုပ်ကိုင်များ ရှားပါးနေကြသည်။   လက်ရှိတွင် နေရပ်ပြန် စစ်ဘေးရှောင်များမှာ ချေးငှား၍ စားဝတ်နေရေး ဖြေရှင်းနေရခြင်း၊ ဝေးလံခေါင်ဖျား သည့် ကျေးရွာများတွင် လုပ်အားခ အနည်းငယ်ဖြင့် သွားရောက် လုပ်ကိုင်နေရခြင်းများ ကြုံနေရပြီး အချို့မှာ အခြားမြို့များသို့ ပြောင်းရွှေ့ရန် စီစဉ်နေကြသည်ဟု ဆိုကြသည်။   ဆောင်းပြောင်းတိုက်ပွဲတွင် ပါဝင်ခဲ့သည့် တော်လှန်ရေးအင်အားစု ပူးပေါင်းအဖွဲ့ တာဝန်ရှိသူက “အခုတော့ ခွေးတွေ (စစ်ကောင်စီ) နယ်မြေစိုးမိုးသွားပြီ။ သူတို့က ဟိုမလုပ်ရ၊ ဒါမလုပ်ရဆိုတော့ ရွာသားတွေက ဒုက္ခ ရောက် နေကြတယ်။ သူတို့ မသင်္ကာတဲ့ အိမ်ဆို အတွင်းပစ္စည်းတွေ ယူထုတ်ပြီး မီးပုံရှို့တယ်။ အခုက ရပ်တည် ရခက်တာ တစ်ခုတည်းတော့ မဟုတ်ဘူး။ သူတို့ရှိတာနဲ့ ထိတ်လန့်နေရတာ” ဟု ပြောသည်။   ဆောင်းပြောင်းကျေးရွာတွင် မေလ ၁၆ ရက်မှစ၍ လကုန်နီးပါးအထိ တိုက်ပွဲပြင်းထန်ခဲ့ပြီး လက်နက်ကြီးများ ကြောင့် လူနေအိမ်များ ပျက်စီးခြင်း၊ အချို့နေအိမ်များအား စစ်ကောင်စီ ပူးပေါင်းတပ်က မီးရှို့ဖျက်ဆီးခြင်းများ ကျူးလွန်ခဲ့သည်။   အလားတူ ၂၀၂၄ ခုနှစ် ဇူလိုင်လတွင်လည်း ဆောင်းပြောင်းကျေးရွာတွင် တစ်လနီးပါးအကြာ နှစ်ဖက်ကြား တိုက်ပွဲများ ပြင်းပြင်းထန်ထန် ဖြစ်ခဲ့ပြီး လူနေအိမ်အလုံး ၅၀ နီးပါးအထိ ထိမှန်ပျက်စီးခဲ့ရသည်ဟု ဒေသတွင်း သတင်းအရင်းအမြစ်များက ဆိုသည်။

နေရပ်ပြန် စစ်ရှောင်များ နေထိုင်ရပ်တည်ရေး အခက်အခဲရှိ

နေရပ်ပြန် စစ်ရှောင်များ နေထိုင်ရပ်တည်ရေး အခက်အခဲရှိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။  ကရင်နီ တပ်ဖွဲ့များနှင့် စစ်ကောင်စီနှင့…

  • June 5, 2025
တနင်္သာရီတွင် တိုက်ပွဲကြောင့် နေရပ်စွန့်ခွာရသူ သောင်းနှင့် ချီရှိပြီ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။   တနင်္သာရီတိုင်းတွင်းက တိုက်ပွဲများကြောင့် နှစ်လအတွင်း နေရပ်စွန့်ခွာ ထွက်ပြေးတိမ်းရှောင်ရသူ ခုနှစ်သောင်းခွဲ အထက် ရှိသွားပြီဟု မွန်ပြည် လူ့အခွင့်အရေး ဖောင်ဒေးရှင်း (HURFOM) က ပြောသည်။   ၂၀၂၅ ဧပြီလမှ စ၍ တနင်္သာရီတိုင်းအတွင်း စစ်ကောင်စီတပ်နှင့် ဒေသခံ တော်လှန်ရေးတပ်တို့ကြား တိုက်ပွဲများ ပြင်းထန်းမှုကြောင့် ဒေသခံပြည်သူ စစ်ဘေးတိမ်းရှောင်နေရသည်ဟု မွန်ပြည် လူ့အခွင့်အရေး ဖောင်ဒေးရှင်း (HURFOM) ဒါရိုက်တာ နိုင်အဲမွန်က ပြောသည်။   “ဒေသခံပြည်သူ ထွက်ပြေးတိမ်းရှောင်မှုတွေက မနှစ်ကထက်စာရင် ပိုများလာတယ်။ ကျနော်တို့ တွက်တာ တော့ (၇) သောင်း၊ (၈) သောင်း ပေါ့နော် အနည်းဆုံးတွက်ထားတာအဲ့ဒါက။ အများဆုံးကတော့ ကျနော် ထင်တယ် တစ်သိန်းကျော်ဗျ။ ကျနော်တို့က လက်ဆုပ်လက်ကိုင် မပြနိုင်လို့သာ မပြောတာ။ သွားရေးလာရေး ခက်ခဲတာလည်း တစ်ကြောင်း၊ အတည်ပြုမှု ရယူတဲ့ဟာလည်း ခက်ခဲတယ်လေ။”   လက်ရှိတွင် တနင်္သာရီတိုင်းထဲက လောင်းလုံးမြို့နယ်၊ ရေဖြူမြို့ အရှေ့မြောက်ဘက်၊ ထားဝယ် အရှေ့ဘက်ခြမ်း၊ တောင်ဘက်ခြမ်းနှင့် ‌သရက်ချောင်းမြို့နယ်တို့တွင် ဒေသခံတော်လှန်ရေး ပူးပေါင်းတပ်များနှင့် စစ်ကောင်စီတပ် တို့ တိုက်ပွဲများ ဖြစ်ပွားလျှက်ရှိသည်။   နိုင်အဲမွန်က “ပြီးခဲ့တဲ့ နှစ်ပတ် သုံးပတ်ကလည်း တိုက်ပွဲဖြစ်ပွားတာရှိတယ်။ လေကြောင်း တိုက်ခိုက်မှုတွေ လည်း ရှိတယ်။ တိုက်ပွဲတွေက ဆက်နေတဲ့ သဘောမှာရှိတယ်။ အလုံးအရင်း နေ့တိုင်း ပြင်းပြင်းထန်ထန် ဖြစ် ပွားနေတာမျိုး၊ စခန်းသိမ်းတိုက်ပွဲ ဖြစ်ပွားနေတာမျိုး မဟုတ်ဘဲနဲ့ သူတို့ နယ်မြေစိုးမိုးရေးကို အဓိက ပစ်မှတ် ထားပြီးတော့ တိုက်ပွဲဖြစ်နေတဲ့ သဘောရှိတယ်” ဟု ပြောသည်။   တိုက်ပွဲကြောင့် ဒေသခံပြည်သူများသည် ရေဖြူမြို့၊ ထားဝယ်မြို့နှင့် လောင်းလုံးမြို့နယ်ထဲက ကျောက်ဖြူ၊ ကြက်ယက်တွင်း၊ သဝင်ကျေးရွာများတွင် ထွက်ပြေးခိုလှုံနေကြသည်ဟု ဆိုသည်။   တနင်္သာရီတိုင်းအတွင်းရှိ စစ်ဘေးရှောင်ဒေသခံများ၏ အခြေအနေကို နိုင်အဲမွန်က “လောလောဆယ် အင်မတန် ခက်ခဲတဲ့အခြေအနေမှာရှိတယ်။ ပြဿနာက တိုက်ပွဲကမရပ်သွားပဲနဲ့ ကြိုကြား ကြိုကြား ဆက်ပြီးဖြစ်နေ တယ်။ တစ်နေရာထဲမှာ ဖြစ်တာလည်း မဟုတ်ဘူး။ ဆိုတဲ့ခါကြတော့ တစ်ချို့က ဘယ်သွားလို့ ဘယ်ပြေးရမလဲ ဆိုတဲ့ အခြေအနေမှာတော့ ရှိပါတယ်” ဟု ပြောသည်။   ထို့အတူ မြေပြင်တွင် တိုက်ပွဲများ ဆက်တိုက်ဖြစ်နေသကဲ့သို့ မိုးရာသီကာလလည်း ဖြစ်သည့်အတွက် အဆိုပါ စစ်ဘေးရှောင် ပြည်သူများအတွက် အမိုးအကာများ၊ ဆေးဝါးနှင့် စားနပ်ရိက္ခာများ အထူးလိုအပ်သည်ဟု (HURFOM) ဒါရိုက်တာ နိုင်အဲမွန်က ပြောသည်။   ဓါတ်ပုံ - နွေဦးမေတ္တာ စစ်ရှောင်ကူညီရေး အဖွဲ့

တနင်္သာရီတွင် တိုက်ပွဲကြောင့် နေရပ်စွန့်ခွာရသူ သောင်းနှင့် ချီရှိပြီ

တနင်္သာရီတွင် တိုက်ပွဲကြောင့် နေရပ်စွန့်ခွာရသူ သောင်းနှင့် ချီရှိပြီ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန်လ ၅ ရက်။  တနင်္သာရီတိုင်းတွင်းက …

  • June 5, 2025
ကရင် အမျိုးသမီးများ ဦးဆောင်မှု ကဏ္ဍတွင် ပါဝင်မှု နည်းနေသေး  သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ ဇွန်လ ၅ ရက်။  နိုင်ငံရေးတွင်သာမက အခြား ဦးဆောင် နေရာများတွင်လည်း အမျိုးသမီး ပါဝင်မှု ရာနှုန်း နည်းပါးနေဆဲဖြစ် ကြောင်း ကော်သူးလေ (ကရင်) အမျိုးသမီးများ နှီးနှော ဖလှယ်ပွဲ တက်ရောက်သည့် အမျိုးသမီးများက ပြော သည်။  နိုင်ငံရေး ဦးဆောင်မှုတွင်သာမက ကဏ္ဍအသီးသီးတွင် အမျိုးသမီးပါဝင်မှု ၃၀ ရာခိုင်နှုန်းကို ပြည့်မီနိုင်ရန် အခက် အခဲများနှင့် စိန်ခေါ်မှုများ ရှိနေဆဲဖြစ်သည်ဟု ဆိုသည်။  ကော်သူးလေ အမျိုးသမီးများ နှီးနှောဖလှယ်ပွဲကို ကော်သူးလေ နယ်စပ်တစ်နေရာတွင် မေလ ၂၇ ရက်နေ့မှ  ၂၉ ရက်နေ့အထိ သုံးရက်တာ ကျင်းပပြုလုပ်ခဲ့ကြသည်။ ကော်သူးလေ အမျိုးသမီး နှီးနှောဖလှယ်ပွဲ ဖြစ်မြောက်ရေး ကော်မတီ ဥက္ကဋ္ဌ နော်ထူးထူးက “အမှန်ဆို ဒီ ၃၀ ရာခိုင်နှုန်း Quota ကို တောင်းဆိုခဲ့တာ ကရင်အမျိုးသမီးတွေပါ။ KNU ရဲ့ ကွန်ဂရက်မှာတော့ သဘောတူထား တယ်။ ဒါပေမယ့် တစ်ကယ့်လက်တွေ့မှာ အမျိုးသမီးတွေ အုပ်ချုပ်ရေးဘက်ပိုင်းမှာရော၊ ကာကွယ်ရေး ဘက် ပိုင်းမှာရော၊ တခြားကဏ္ဍဘက်ပိုင်းမှာရော ပါဝင်ဖို့ ဒီ ၃၀ ရာခိုင်နှုန်းပြည့်ဖို့ဆိုတာ အခက်အခဲတွေ အများကြီး ရှိသေးတယ်။ မပြည့်သေးတဲ့အတွက် ဒီနှီးနှောဖလှယ်ပွဲမှာ ညီလာခံ ကိုယ်စားလှယ်တွေကနေ ၃၀ ရာခိုင်နှုန်းကို ရဖို့အတွက် ဆက်ပြီးတော့ တိုက်တွန်းနေတာပါ” ဟု ပြောသည်။ နှီးနှောဖလှယ်ပွဲတွင် ကရင်အမျိုးသားအစည်းအရုံး KNU ၏ လာမည့် ၁၈ ကြိမ်မြောက် ညီလာခံ (ကွန်ဂရက်) တွင် ဌာနဆိုင်ရာများ၊ ခရိုင်၊ စစ်ဖက်နှင့် အရပ်ဖက်အသီးသီးမှ အမျိုးသမီးညီလာခံ ကိုယ်စားလှယ် ၃၀% အနည်းဆုံး ပါဝင်ရန် တိုက်တွန်းတောင်းဆိုသည့် သဘောတူညီချက် တစ်ရပ်လည်း ချမှတ်ခဲ့သည်ဟု နော်ထူး ထူးက ဆိုသည်။ အမျိုးသမီးများ အုပ်ချုပ်ရေးနှင့် အခြားကဏ္ဍများတွင် ပါဝင်လာနိုင်ရေးအတွက် စိန်ခေါ်မှုများစွာရှိနေပြီး အသိပညာပိုင်းနှင့် နည်းပညာပိုင်းဆိုင်ရာ အခက်အခဲများ ရှိနေသေးသည်ဟု ပြောသည်။ နော်ထူးထူးက“အဟန့်အတားစိန်ခေါ်မှုကတော့ ဒေသအလိုက်၊ နယ်မြေအလိုက် မတူညီဘူး။ တချို့အမျိုးသမီး တွေက အုပ်ချုပ်ရေးကဏ္ဍမှာ ပါဝင်ဖို့ အဆင်သင့်ဖြစ်နေပေမယ့် တချို့က Ready မဖြစ်သေးဘူး။ Gender နဲ့ပတ်သက်တဲ့ မူဝါဒကို အပြီးသတ်ရေးဆွဲဖို့ လိုအပ်သလို၊ တစ်ဖက်ကလည်း အမျိုးသမီးတွေကလည်း အဆင် သင့်ဖြစ်နေဖို့ အများကြီးလိုအပ်နေသေးတယ်” ဟု ပြောသည်။ ကရင်အမျိုးသား အစည်းအရုံး KNU အနေဖြင့်လည်း ဂျဲန်ဒါဆိုင်ရာ မူဝါဒ မူဘောင် ရေးဆွဲပြဌာန်းပြီး အုပ်ချုပ် ရေး အဆင့်ဆင့်တွင် လက်တွေ့ အကောင်အထည် ဖော်သွားရန်လည်း နှီးနှောဖလှယ်ပွဲက တိုက်တွန်းထားသည်။

နော်ထူးထူးက“ကျမတို့ အမျိုးသမီးအသံက နေရာတိုင်းမှာ ပါဝင်ဖို့လိုအပ်တယ်။ တိုက်ပွဲတွေပြီးမှ၊ တော်လှန် ရေးကာလပြီးမှ ဒါတွေ စလုပ်မယ်ဆိုရင် အရမ်းနောက်ကျသွားမယ်လို့ ကျမထင်တယ်။ ဒါကြောင့်မို့ အမျိုးသမီးတွေရဲ့ တန်းတူရေး၊ အုပ်ချုပ်ရေး နယ်ပယ်မှာ ပိုပြီးတော့မှ ပါဝင်လာနိုင်ဖို့ ကျမတို့အမျိုးသမီးတွေ ကြိုးစားရမယ်၊ စိတ်လည်း ဝင်စားဖို့သင့်တယ်။ ဒီအရွေ့တစ်ခုကို တွန်းဖို့အတွက် အမျိုးသမီးတွေရဲ့ အသံတွေက အရမ်း အရေးကြီးပါတယ်” ဟု ပြောသည်။ ကော်သူးလေ အမျိုးသမီး နှီးနှောဖလှယ်ပွဲသို့ တက်ရောက်လာသော ကိုယ်စားလှယ်များအနေဖြင့် ကော်သူးလေ လူမှုဝန်းကျင်အတွင်းရှိ အမျိုးသမီးများ၏ အခွင့်အရေး၊ တရားမျှတမှု၊ ငြိမ်းချမ်းမှုနှင့် ဘေးကင်းလုံခြုံမှုကို မြှင့်တင်ရန် စည်းလုံးညီညွတ်စွာ ကတိကဝတ် ပြုခဲ့ကြသည်ဟု နှီးနှောပွဲနှင့် ပတ်သက်သည့် ကရင်အမျိုးသမီး အစည်းအရုံး KWO ၏ ထုတ်ပြန်ချက်တွင် ဖော်ပြထားသည်။ ကော်သူးလေ အမျိုးသမီးများ နှီးနှောဖလှယ်ပွဲသို့ ကရင်အမျိုးသားအစည်းအရုံး KNU မှ တာဝန်ရှိသူများ၊ တစ်သီးပုဂ္ဂလ ပညာရှင်များ၊ နေရာဒေသ အသီးသီးရှိ ကရင်အရပ်ဖက်အဖွဲ့အစည်းများနှင့် ဒီမိုကရေစီအရေး လှုပ်ရှားမှုတွင် ဦးဆောင်နေသည့် ခေါင်းဆောင်များ အပါအဝင် ကိုယ်စားလှယ် စုစုပေါင်း အယောက် ၁၄၀ ကျော် တက်ရောက်ခဲ့ကြသည်။ Photo credit- Seminar Committee

ကရင် အမျိုးသမီးများ ဦးဆောင်မှု ကဏ္ဍတွင် ပါဝင်မှု နည်းနေသေး 

ကရင် အမျိုးသမီးများ ဦးဆောင်မှု ကဏ္ဍတွင် ပါဝင်မှု နည်းနေသေး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။  နိုင်ငံရေးတွင်သာမက အ…

  • June 5, 2025
ပြည်သူ့စစ် အသုံးစားရိတ် ပြည်သူများထံမှ ကောက်ခံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန် လ ၅ ရက်။   ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်တွင် စစ်အသုံးစရိတ်အတွက် ခြိမ်းခြောက်ငွေကြေး ကောက်ခံနေမှုများ ကြုံနေရသည်ဟု ဒေသတွင်း သတင်းအရင်းအမြစ်များက ပြောသည်။   ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ဘုရားဖြူနှင့် တီကျစ်ကျေးရွာ အုပ်စုရှိ ကျေးရွာအားလုံးကို စစ်ကောင်စီနှင့် ပအိုဝ်းပြည်သူ့စစ် အဖွဲ့ (PNA) ပူးပေါင်းတပ်တို့က ယခု ဇွန်လ စစ်အသုံးစရိတ်အတွက် တစ်အိမ် ၂ သောင်းကျပ်နှုန်းဖြင့် ကောက်ခံ နေခြင်း ဖြစ်သည်။   နန်းဆောင်ကျေးရွာတွင် နေထိုင်သည့် အသက် ၅၀ အရွယ် အမျိုးသား တစ်ဦးက “အခု ဖယ်ခုံအရှေ့ဖက်ကမ်းမှာ ဖြစ်နေတဲ့ တိုက်ပွဲအတွက်ပေါ့။ ပြည်သူ့စစ် အသုံးစရိတ်အတွက် ပြည်သူကပဲ ထည့်ရမယ်လို့ ပြောထားတယ်။ ဒီတခါကောက်တာက ပြည်သူ့စစ်အတွက်သီးသန့်။ နောက်တစ်ကြိမ် စစ်တပ်အတွက်ထပ်လာမှာ။ စစ်မှုထမ်း ကြရင်လည်း ထပ်ကောက်မယ်လို့ ကြားထားတယ်” ဟု ပြောသည်။   လက်ရှိ ကျေးရွာအုပ်စု ၂ ခုတွင် ကျေးရွာပေါင်း ၂၀ ကျော်ခန့် ပါဝင်ပြီး ကျေးရွာအုပ်စုတစ်စုစီ၌ ကျပ်သိန်းပေါင်း ၄၀၀ ခန့် ကောက်ခံသွားမည်ဟု အုပ်ချုပ်ရေးအဖွဲ့နှင့် နီးစပ်သူများက ဆိုသည်။   အဆိုပါ ကျေးရွာအုပ်စုရှိ ကျေးရွာတိုင်းကိုလည်း သက်ဆိုင်ရာ PNA အုပ်ချုပ်ရေးမှူးများက တစ်အိမ်တက်ဆင်း လိုက်လံ ဖိအားပေးနေပြီး မထည့်ဝင်နိုင်သည့် အိမ်ထောင်စုများအား လူမှုအသိုင်းအဝိုင်းမှ ဖယ်ကျဉ်ခြင်းများ ပြုလုပ်နေသည်ဟု ဆိုကြသည်။   ဆည်ခေါင်းကျေးရွာတွင် ခိုလှုံနေသည့် စစ်ဘေးရှောင် တစ်ဦးက “မထည့်ရင် တစ်ရွာလုံးက ဖယ်ကျဉ်တာပေါ့။ သာရေး၊ နာရေးဆိုရင် မဖိတ်တော့ဘူး အဲလို။ စစ်ဖြစ်လို့ အိမ်တွေဘာတွေ ပျက်စီးရင်လည်း သူတို့ ထောက်ပံ့ ကြေး မပေးဘူးပေါ့။ မရှိလည်း ချေးငှားပြီး ထည့်ကြတယ်” ဟုပြောသည်။   ယခင်လများတွင်လည်း ပင်လောင်းမြို့နယ်ရှိ ကျေးရွာများအား စစ်အသုံးစရိတ် ကောက်ခံခြင်း၊ စစ်မှုထမ်း ကောက်ခံခြင်းများ ပြုလုပ်ခဲ့ပြီး မထည့်ဝင်နိုင်သည့် နေအိမ်များအား ခြိမ်းခြောက်ခြင်း၊ ပိုင်ဆိုင်သည့် မော်တော် ယာဉ်များအား ချောဆွဲ၍ ရှေ့တန်းတွင် အသုံးပြုခြင်းများ ကျူးလွန်ခဲ့ဖူးသည်။   ထို့အပြင် လက်ရှိ မြေပြင် အခြေအနေ၌လည်း ပင်လောင်းမြို့နယ်တွင် ၂ မျဉ်းစောင်း မှတ်ပုံတင် ကိုင်ဆောင် သည့် ကရင်နီလူမျိုးများအား ပြင်းပြင်းထန်ထန် စစ်ဆေးမှုများ ပြုလုပ်နေသည်ဟု ဒေသခံများက ပြောသည်။

ပြည်သူ့စစ် အသုံးစားရိတ် ပြည်သူများထံမှ ကောက်ခံ

ပြည်သူ့စစ် အသုံးစားရိတ် ပြည်သူများထံမှ ကောက်ခံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇွန် လ ၅ ရက်။  ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လော…

  • June 5, 2025
ဆေးကုသခွင့် တားမြစ်ခံရပြီးနောက် လက်နက်ကြီး ဒဏ်ရာရသူ သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ် ဇွန်လ ၅ ရက်။   တနင်္သာရီတိုင်း ပြည်ကြီးမဏ္ဍိုင်မြို့က လက်နက်ကြီး ကျည်စ ထိမှန်သူမှာ အချိန်မှီ ဆေးကုသခြင်း မခံရပဲ သေဆုံးသွားသည်ဟု မြို့ခံများက ပြောသည်။   တနင်္သာရီတိုင်း ဘုတ်ပြင်းမြို့နယ်၊ ပြည်ကြီးမဏ္ဍိုင်မြို့၊ လေညာ အနောက်ရပ်ကွက်ရှိ တစ်မိုင်ခွဲကျေးရွာတွင် စစ်ကောင်စီတပ်မှ ပစ်ခတ်လိုက်သည့် လက်နက်ကြီးကျည် ထိမှန်သည့် အမျိုးသားတစ်ဦးကို စစ်ကောင်စီက ဆေးရုံတက်ခွင့် မပြု၍ တားမြစ်ထားခြင်းကြောင့် အချိန်မှီ ဆေးကုသခွင့် မရဖြစ်ခဲ့သည်။   လူနာမှာ ဆေးရုံသို့ နောက်ကျမှ ရောက်ရှိသွားခဲ့ပြီး သေဆုံးသွားခဲ့သည်ဟု ဒေသခံ တစ်ဦးက ပြောသည်။    ဒေသခံတစ်ဦးက “ဘုတ်ပြင်းဆေးရုံမှာ ဆေးကုသနေရင်းနဲ့ တပတ်ကျော် အကြာ ဇွန်လ ၁ ရက်နေ့မှာ သေဆုံး သွား တယ်၊ ဆုံးသွားချင်းမှာပဲ သူနေခဲ့တဲ့အိမ်ကို ပြန်သယ်လာခဲ့တယ်” ဟု ပြောသည်။   အသက် ၅၀ နှစ်အရွယ် ဦးဘိုဟိန်း ဆိုသူ၏ နေအိမ်အနီးသို့ မေလ ၂၂ ရက်နေ့၊ ည ၈ နာရီခွဲ အချိန်ခန့်က လက်နက်ကြီး ကျရောက်ပေါက်ကွဲခဲ့ကာ ဒဏ်ရာပြင်းထန်စွာ ရသွားခဲ့ခြင်း ဖြစ်သည်။   လက်နက်ကြီးစ ထိမှန်မှုကြောင့် ညာဘက်နားရွက် ပြတ်သွားပြီး ဦးခေါင်းတွင် ဒဏ်ရာရရှိခဲ့သည်။   ထို့ကြောင့် ဒဏ်ရာရထားသည့် ဦးဘိုဟိန်းကို ဘုတ်ပြင်းဆေးရုံသို့ ညတွင်းချင်း ပို့ဆောင်ခဲ့သော်လည်း စစ်ကောင်စီတပ်မှ ခွင့်မပြုခဲ့ခြင်းကြောင့် မေလ ၂၃ ရက်နေ့ နံနက်ပိုင်းရောက်မှသာ ဘုတ်ပြင်းဆေးရုံတင်ခွင့်ခဲ့ရ သည်ဟု မိသားစုဝင်တစ်ဦးက ပြောသည်။   ဆေးရုံသို့ အချိန်မှီ တက်ရောက် ဆေးကုသခွင့် မရခဲ့သောကြောင့် ဦးဘိုဟိန်းမှာ ဇွန်လ ၁ ရက်နေ့တွင် သေဆုံးသွားခဲ့သည်။   အလားတူ ဇွန်လ ၁ ရက်နေ့ ည ၉ နာရီ အချိန်ခန့်ကလည်း ပြည်ကြီးမဏ္ဍိုင်မြို့ အတွင်းရှိ စစ်ကောင်စီ ရဲစခန်းမှ ချောင်းမွန်ကျေးရွာ ဘက်သို့  လက်နက်ကြီးဖြင့် ၄ ချက် ပစ်ခတ်ခဲ့သည့်အပြင် လက်နက်ငယ်များဖြင့်ပါ ပစ်ခတ်ခဲ့ သေးကြောင်း ရွာသားများက ပြောသည်။   ထို့အပြင် ပြီးခဲ့သည့် ဧပြီလ ၁၇ ရက်နေ့ကလည်း ပြည်ကြီးမဏ္ဍိုင်မြို့ပေါ်တွင် စစ်ကောင်စီတပ်၏ ဒရုန်းဖြင့် ဗုံးသီးချ တိုက်ခိုက်မှုကြောင့် ဆယ်တန်းကျောင်းသူတစ်ဦး ဒဏ်ရာရသွားခဲ့သည်။   မေလအတွင်းကလည်း ပြည်ကြီးမဏ္ဍိုင်မြို့ပေါ်တွင် စစ်ကောင်စီတပ်နှင့် ပြည်သူ့ကာကွယ်ရေးပူးပေါင်းတပ်ဖွဲ့များအကြား ထိတွေ့တိုက်ပွဲများ ခပ်စိပ်စိပ်ဖြစ်ပွားခဲ့သေးသည်။

ဆေးကုသခွင့် တားမြစ်ခံရပြီးနောက် လက်နက်ကြီး ဒဏ်ရာရသူ သေဆုံး 

ဆေးကုသခွင့် တားမြစ်ခံရပြီးနောက် လက်နက်ကြီး ဒဏ်ရာရသူ သေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ် ဇွန်လ ၅ ရက်။  တနင်္သာရီတိုင်း ပြည်ကြီးမဏ…

  • June 5, 2025
ထားဝယ်ခရိုင်တွင် မိုင်းပေါက်ကွဲမှုကြောင့် အရပ်သား တစ်ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။   ထားဝယ်ခရိုင်အတွင်း မိုင်းပေါက်ကွဲမှုကြောင့် အရပ်သား အမျိုးသား တစ်ဦး သေဆုံး သွားခဲ့သည်။   တနင်္သာရီတိုင်း ထားဝယ်ခရိုင်၊ ရေဖြူမြို့နယ်၊ သစ်တိုထောင့်ကျေးရွာ အနီး၌ ‌မိုင်းကြိုးတိုက်မိပြီး ပေါက်ကွဲခဲ့ခြင်းကြောင့် အမျိုးသားတစ်ဦး သေဆုံးသွားခဲ့သည်ဟု ရွာသားများက ပြောသည်။   သစ်တို့ထောင့်ကျေးရွာ အနီးရှိ ရော်ဘာခြံမှ အခြားဥယျာဉ်ခြံတစ်ခုသို့ သွားသည့်အချိန် လမ်းတစ်နေရာ၌ မေလ ၃၁ ရက်နေ့ မွန်းလွဲ ၂ နာရီခန့်က မိုင်းနင်းမိခြင်း ဖြစ်သည်။   မိုင်းထိမိပြီး သေဆုံးသွားသူမှာ သစ်တို့ထောင့်ရွာသား အသက် ၆၀ နှစ်အရွယ် ဦးလှကြည် ဆိုသူဖြစ်သည်။ အသက် ၄၀ ကျော်အရွယ် ရွာသားတစ်ဦးက “မိုင်းက တိုက်မိုင်းလို့ ပြောရမှာပေါ့၊ ကြိုးကို တိုက်မိတဲ့အချိန်မှာ ထပေါက်ကွဲတာ၊ ခြေသလုံးတစ်ဖက် စုတ်ပြတ်သွားတယ်။ နောက်ထပ် ရင်ဘတ်မှာလဲ ထိတယ်၊ အဲဒီ ဒဏ်ရာ တွေနဲ့ပဲ ပွဲချင်းပြီး ဆုံးသွားတာ” ဟု ပြောသည်။   မိုင်းနင်းမိသော နေရာအနီးတစ်ဝိုက်တွင် ဗထူးတပ်ဖွဲ့နှင့် ပြည်သူ့ကာကွယ်ရေး ပူးပေါင်းတပ်ဖွဲ့များ ယခင်က နေထိုင်ခဲ့ဖူးကြောင်း ရွာသားများက ဆိုသည်။   မိုင်းပေါက်ကွဲခဲ့သည့် နေရာ အနီးတဝိုက်တွင် စစ်ကောင်စီ စစ်ကြောင်းအား တိုက်ခိုက်ရန်အတွက် ထောင်ထား သည့် မိုင်းများရှိနေသည့် အကြောင်းကို ပြည်သူ့ကာကွယ်ရေး တပ်ဖွဲ့မှ သတိပေးထားခဲ့ကြောင်း ရွာသားများက ပြောသည်။   မိုင်းထိမိ၍ သေဆုံးသွားသူ ဦးကြည်လှ၏ ရုပ်အလောင်းကို ဇွန်လ ၂ ရက်နေ့ မွန်းလွဲပိုင်းက ကျေးရွာသင်္ချိုင်းတွင် သင်္ဂြိုဟ်လိုက်သည်ဟု ရွာသားတစ်ဦးက ပြောသည်။   ရေဖြူမြို့နယ်အတွင်း၌ မေလ တတိယပတ်မှ စတင်၍ အင်အား ၁၅၀ ခန့်ရှိသည့် စစ်ကောင်စီ စစ်ကြောင်းမှာ ထားဝယ် အထူးစီးပွားရေးဇုန်ဘက်သို့ စစ်ကြောင်းထိုးနေသောကြောင့် ရွာသားများက စိုးရိမ်နေကြသည်။    

ထားဝယ်ခရိုင်တွင် မိုင်းပေါက်ကွဲမှုကြောင့် အရပ်သား တစ်ဦး သေဆုံး 

ထားဝယ်ခရိုင်တွင် မိုင်းပေါက်ကွဲမှုကြောင့် အရပ်သား တစ်ဦး သေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇွန်လ ၅ ရက်။  ထားဝယ်ခရိုင်အတွင်း မိုင်းပ…

  • June 5, 2025
×Close