သတင်း

ဗန်းမော်မြို့သိမ်းတိုက်ပွဲ ပြင်းထန်ဆဲ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၂၀ ရက်။   ကချင်ပြည် ဗန်းမော်မြို့သိမ်းတိုက်ပွဲမှာ ဆက်လက် ပြင်းထန်နေပြီး မြို့ကိုရတဲ့အထိ တိုက်သွားမည်ဟု ကချင် လွတ်လပ်ရေးအဖွဲ့ KIO က ပြောသည်။   KIA နှင့် ပူးပေါင်းတပ်တို့ အနေဖြင့် ဗန်းမော်ရှိ ခလရ ၄၇၊ စကခ (၂၁) တပ်များ အပါအဝင် စစ်ကောင်စီတပ် စခန်းအားလုံးကို အပြီးသတ်သိမ်းပိုက်နိုင်ရေး ဆောင်ရွက်နေကြသည်။   ကချင်လွတ်လပ်ရေးအဖွဲ့ (KIO) ၏ သတင်းနှင့်ပြန်ကြားရေး တာဝန်ခံ ဗိုလ်မှူးကြီးနော်ဘူက “ဗန်းမော်ဘက်မှာ တိုက်ပွဲတွေ ဆက်ရှိတာပေါ့။ ဗန်းမော်ဘက်က အခြေအနေ မပြီးမချင်းကတော့ ဆက်ရှိမှာပေါ့နော်။ ရမှာပါ၊ ရအောင်တော့ တိုက်မှာပါ” ဟု ပြောသည်။   ဇန္နဝါရီလ ၁၉ ရက်နေ့ညတွင်လည်း ဗန်းမော်မြို့၊ ရွှေကျီးနား ရပ်ကွက်ထဲ စစ်ကောင်စီတပ်က  လေကြောင်းတိုက် ခိုက်မှု လေးကြိမ် ပြုလုပ်ခဲ့ပြီး ဇန္နဝါရီလ ၂၀ ရက်နေ့ (ယနေ့) နံနက်ပိုင်းကလည်း ကရင်ကုန်း၊ ပင်စင်ကုန်းနှင့် ရွှေ ကျီးနားရပ်ကွက် ၀န်းကျင်‌တွင် လက်နက်ကြီးလက်နက်ငယ်ဖြင့် ပစ်ခတ်မှုရှိနေပြီး နေအိမ်များလည်း မီးလောင် ပျက်စီးမှုများ ရှိနေသည်ဟု မြို့ခံအချို့က ဆိုသည်။   ဗန်းမော်မြို့သည် စစ်ကောင်စီ၏ စစ်ဆင်ရေးကွပ်ကဲမှု ဌာနချုပ် (စကခ) ၂၁၊ ခလရ ၄၇၊ ၁၂၁၊ ၂၃၆၊ ၂၃၇၊ အမြောက်တပ်၊ သံချပ်ကာတပ်၊ တင့်ကားတပ်များအပြင် ဆက်သွယ်ရေးတပ်၊ စစ်မြေပြင် စစ်လက်နက် ပစ္စည်း တပ်၊ ထောက်ပံ့ရေးတပ်၊ အင်ဂျင်နီယာတပ်၊ ဆေးတပ် စသည့် လက်ရုံးတပ်ဖွဲ့များ အခြေစိုက်ထားသော မြို့ ဖြစ်သည်။   စစ်ကောင်စီတပ်က ဗန်းမော်မြို့ကို လက်မလွှတ်ရရေးအတွက် လေကြောင်းမှ ပစ်ကူနေသည့်အပြင် ဒရုန်းများ ဖြင့်ပါ ဗုံးကြဲတိုက်ခိုက်နေသည်ဟု ဗိုလ်မှူးကြီးနော်ဘူက ပြောသည်။   “မြေပြင်ကနေတော့ သူတို့က ထိုးလို့တော့ မရဘူး။ အကုန်လုံး သူတို့ကတော့ စခန်းမှာပဲ အောင်းပြီးမှ ခုခံနေတာ။ အဓိကတော့ လက်နက်ကြီးတို့ နောက်လေကြောင်းကိုပဲ အားပြုပြီးမှ တုန့်ပြန်နေတာ။”   ကချင်လွတ်လပ်ရေး တပ်မတော် KIA အနေဖြင့် မြို့သိမ်း၊ စခန်းသိမ်းစစ်ဆင်ရေးများ ဆက်လက် ဆောင်ရွက် နေပြီး ထိုးစစ်အရှိန်ကို တဆင့်ပြီး တဆင့် မြှင့်တင်လျှက်ရှိသည့်အပြင် အသက်မသေလိုသည့် စစ်ကောင်စီ တပ်ဖွဲ့ဝင်များကိုလည်း ခုခံတိုက်ခိုက်ခြင်းမပြုဘဲ အမြန်ဆုံးအလံဖြူထောင် လက်နက်ချကြရန် တိုက်တွန်းမှုများ ရှိနေသည်။   ဗန်းမော်မြို့တိုက်ပွဲထဲ ကလေးများအပါအဝင် အရပ်သားပြည်သူ သေဆုံးထိခိုက်မှုများ ဆက်တိုက်ရှိနေပြီး ဒီဇင် ဘာလကုန်အထိ အနည်းဆုံး အယောက် ၃၀ သေဆုံးခဲ့သည်ဟု ကချင်လူ့အခွင့်အရေး စောင့်ကြည့်ရေးအဖွဲ့ KHRW က ဆိုသည်။   ဗန်းမော်မြို့သိမ်း တိုက်ပွဲကြောင့် ဗန်းမော်၊ မိုးမောက်၊ ရွှေကူနှင့် မံစီမြို့နယ်တို့က ပြည်သူ လေးသောင်းခန့်က မြစ်ကြီးနားနှင့် မန္တလေးမြို့ကို ထွက်ပြေးတိမ်းရှောင်နေကြရပြီး နေစရာနေရာနှင့် စားနပ်ရိက္ခာ၊ ဆေးဝါး အကူ အညီများ လိုအပ်နေသည်။   ကချင်လွတ်လပ်ရေး တပ်မတော် KIA နှင့် တော်လှန်ရေးပူးပေါင်းတပ်တို့က ၂၀၂၄ ခုနှစ် ဒီဇင်ဘာလ ၄ ရက်နေ့က စတင်၍ ဗန်းမော်မြို့နှင့် မံစီမြို့တို့ကို တစ်ပြိုင်နက်တည်း ထိုးစစ်ဆင်ခဲ့ပြီးနောက် ၂၀၂၅ ခုနှစ် ဇန္နဝါရီလ ၈ ရက် နေ့ တစ်လကျော်အကြာတွင် မံစီမြို့ကို အပြီး တိုက်ခိုက် သိမ်းပိုက်နိုင်ခဲ့ကြသည်။   ဗန်းမော်မြို့သိမ်းတိုက်ပွဲက ဇန္နဝါရီလ တတိယပတ်အထိ ဆက်လက်ပြင်းထန်နေပြီး မြို့၏ နေရာအများအပြား ကိုမူ KIA နှင့် ပူးပေါင်းတပ်ဖွဲ့တို့က ယူထားပြီဟု မြေပြင်သတင်းအရင်းအမြစ်များက ဆိုသည်။

ဗန်းမော်မြို့သိမ်းတိုက်ပွဲ ပြင်းထန်ဆဲ 

ဗန်းမော်မြို့သိမ်းတိုက်ပွဲ ပြင်းထန်ဆဲ  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၂၀ ရက်။ ကချင်ပြည် ဗန်းမော်မြို့သိမ်းတိုက်ပွဲမှာ ဆက်လက် ပ…

  • January 20, 2025
ဒီးမော့ဆို စစ်ရှောင် စခန်းများ ရေရှားမှု ကြုံ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၂၀ ရက်။   ကရင်နီပြည်၊ ဒီးမော့ဆိုမြို့နယ်အတွင်းရှိ စစ်ဘေးရှောင်စခန်း အများစုသည် ရေရှားပါးသည့် အခက်ခဲနှင့် ရင်ဆိုင် နေကြရသည်ဟု စစ်ဘေးရှောင်များနှင့် အကူအညီပေးနေသည့် အသင်းအဖွဲ့များက ပြောသည်။   ဒီးမော့ဆိုမြို့နယ် အတွင်းရှိ စစ်ဘေးရှောင်အများစုသည် ရေရရှိရန် ခက်ခဲသည့်အတွက် အကန့်အသတ်ဖြင့်သာ သုံးစွဲနေကြရသည်ဟု ကရင်နီလူသားချင်း စာနာထောက်ထားမှုအသင်း (KHT) မှ တာဝန်ရှိသူ ဦးရန်နှောင်ဟိန်းက ပြောသည်။   ၎င်းက “ကျနော်တို့ ရေ လုံလုံလောက်လောက် မဖြည့်ဆည်း ပေးနိုင်ဘူး ပေါ့နော်။ လူဦးရေများလာတဲ့ အခါကြ တော့ ကျနော်တို့ ရေသွားလှူတဲ့ အချိန်မှာ ကော်မတီ တစ်ဦးကတော့ သူပြောပြတယ် ပေါ့နော်။ တစ်ပတ်ကို ပုံးဝါ ပဲဆီပုံးနဲ့ တစ်ပတ်ကို ၃ ပုံး အဲ့လောက်ထိပဲ သုံးခွင့်ပေးတယ် ပေါ့နော်။ ရေမလုံလောက်တာနဲ့ ပတ်သက်ပြီး လို့ရှိရင် ကျနော်တို့ အဝတ်တွေ လျှော်တာတို့ ဘာတို့ ကျနော်တို့ ပိတ်ပင်လိုက်တယ် ပေါ့နော်။ အဝတ်လျှော်တာ ရေအဆင်ပြေမှ အလှူရှင်လာမှ အဝတ်လျှော်ခွင့် ပေးတာမျိုးတွေ ကျနော်တို့ လုပ်ပေး နေရတယ်ပေါ့နော်။ ပြီး တော့ဆိုရင် ကျနော်တို့ ပန်ကန်ဆေး ထမင်း၊ ဟင်းချက် အဲ့သလောက်လောက်ပဲ ကျနော်တို့ သုံးခွင့်ရှိတယ် ပေါ့။ အဲ့လိုမျိုး သုံးခွင့်ပေးတဲ့ ခါကြတော့ သူတို့ အတွက် ရေလုံလောက်မှုက အရမ်းကို ခက်ခဲတယ်” ဟု ပြောသည်။   ကရင်နီပြည်အတွင်းရှိ စစ်ဘေးရှောင်များအား အကူအညီပေးနေသည့် ကျေးလက်မြေအဖွဲ့မှ ဦးဇော်မင်းထိုက် က “လက်ရှိကရင်နီရဲ့ စစ်ဘေးရှောင်စခန်း တော်တော်များများပေါ့နော်။ အားလုံးတော့ မဟုတ်ဘူးပေါ့။ ရေရှား ပါးမှုကို ကြုံတွေ့လာရပြီ ဖြစ်ပါတယ်ဗျ။ တစ်ချို့တွေ ကြတော့ ရေချောင်းနဲ့ နီးတဲ့လူတွေ တစ်ချို့ ကြတော့ ရေတွင်း နက်နက်လေးတူးလို့ရတဲ့ နေရာတွေ ရှိတာပေါ့။ တစ်ချို့နေရာက လုံးဝကို ချောင်းရေလည်း မနီး၊ တွင်းရေလည်း မနီးတဲ့နေရာတွေ ဆိုတာလည်း ရှိတယ်ပေါ့နော်” ဟု ပြောသည်။   ဒီးမော့ဆို အရှေ့ခြမ်းသည် အနောက်ဖက်ခြမ်းထက် ရေရရှိရန် ပိုမိုခက်ခဲနေသည် ဟု ဦးရန်နှောင်ဟိန်းက ဆက် ပြောသည်။   “ကျနော်တို့ ဒီးမော့ဆို အရှေ့ခြမ်းဆိုရင် ကျနော်တို့ ရေအလှူရှင် ရှိရင်တောင်မှ ကျနော်တို့ သွားဖို့ အရမ်း ခက်ခဲ တယ်။ တစ်ခေါက် ကျနော် သွားဖူးတယ်။ ၂၀၀၀ ဂါလံကား နဲ့ပေါ့နော်။ အရမ်းကို ခက်ခဲတယ်။ တောင်က လည်း မတ်သလို ကျောက်အကြီးကြီးတွေလည်း ရှိတဲ့ခါကြတော့လေး လမ်းမှာ တောက်လျှောက် ဘီး ပေါက် တယ်။ တာယာတွေ ပွင့်ထွက်၊ ကွဲထွက် ကျနော်တို့ရေ ဟို့ဘက်ခြမ်းကို ရောက်ဖို့ အတွက်ကို ကျနော်တို့ မိုးချုပ် သွားတယ်။ လုံးဝ ခက်ခဲရင်တောင်မှ ဒီးမော့ဆို အနောက်ခြမ်းက ကျနော်တို့ အဆင်ပြေသေးတယ်ပေါ့နော်။ ဆိုင်ကယ်လေးနဲ့ သွားပြီး‌တော့ သွားတင်တာတို့ ဘာတို့ ရသေးတယ် ပေါ့နော်။ ဒါကတော့ အနည်းစုပါပဲ။ ဒီးမော့ဆို အရှေ့ခြမ်းကတော့ အဆိုးဆုံးပဲလို့ ကျနော် အနေနဲ့တော့ ပြောချင်တယ်။”   ရေပို့ဆောင်ခအတွက် ကားတစ်စီးလျှင် ၅၀,၀၀၀ ကျပ်နှင့် ထော်လာဂျီ တစ်စီးလျှင် ၂၀,၀၀၀ ကျပ် ပေးရသည် ဟု ဒီးမော့ဆို အနောက်ဘက်ခြမ်းရှိ စစ်ရှောင်စခန်းတစ်ခုမှ စစ်ရှောင်အမျိုးသမီးတစ်ဦးက ယခုကဲ့သို့ ပြောသည်။   “ဒီဖက်မှာတော့ ရေတော့ ရှားတယ်။ ဒါပေမဲ့ တစ်နေရာနဲ့ တစ်နေရာ မတူဘူး။ တစ်ချို့နေရာခါကြတော့ ရေလုံးဝမရှိဘူး။ ရေအဝေးက သယ်ယူရတာပေါ့နော်။ ကားနဲ့ သယ်ယူလို့ရှိရင် ရေက တစ်စီးကို ၅သောင်း ပေးရတယ်ပေါ့နော်။ ထော်လာဂျီနဲ့ဆိုရင် ၂သောင်း အဲ့လိုပေးရတယ်။ တစ်ချို့ခါကြ‌တော့ ကိုယ်ပိုင်စက်တွေရှိ တဲ့လူခါကြ ကိုယ့်ကို ရေရှိတဲ့နေရာထိ သွားသယ်ယူ ရတာရှိတယ်။”   ရေသွားသယ်သည့် နေရာမှ စစ်ဘေးရှောင်ရှိသည့်နေရာကို နေ့တစ်ပိုင်း ကြာမောင်းပို့ရသည့် အနေအထားတွင် ရေ၏တန်ဖိုးမှာ အနည်းဆုံး ကျပ် ၁ သိန်းဖြစ်ပြီး ၁,၀၀၀ ဂါလံလျှင် ကျပ် ၂သိန်းမှ ၃သိန်းအထိ ပေးရသည် ဟု ဦးရန်နှောင်ဟိန်းက ဆိုသည်။   ကရင်နီပြည် ဒီးမော့ဆိုမြို့နယ်ရှိ နေရာအများစုသည် နိုဝင်ဘာလမှ စတင်၍ ရေရှားပါးသည့် ပြဿနာကို စတင် ကြုံတွေ့လာကြခြင်း ဖြစ်သည်။   ယခုနှစ်သည် ပြီးခဲ့သည့်နှစ်ကထက် စစ်ရှောင်လူဦးရေ ပိုများလာပြီး စက်သုံးဆီးဈေးနှုန်း မြှင့်တက်လာမှုများ ကြောင့် သောက်သုံးရေ အခက်အခဲက ပိုမိုဆိုးရွားနေသည်ဟု ကရင်နီလူသားချင်း စာနာထောက်ထားမှု အသင်း (KHT) က ဆိုသည်။   စစ်ရှောင်များအား ကူညီပေးသည့် အသင်းအဖွဲ့များမှ သောက်သုံးရေ လှူဒါန်းမှုများကို လုပ်ပေးနေကြသော်လည်း စစ်ရှောင် စခန်းများလည်း ပိုမိုတိုးလာသည့်အတွက် လိုအပ်သူ အားလုံးဆီ မရောက်နိုင်သေးဘူးဟု အကူအညီ ပေးနေသူများက ဆိုသည်။   စစ်ဘေးရှောင် အများစုသည် ရေရှားပါသည့် အခက်အခဲအပြင် နေ့စဉ် အလုပ်အကိုင် မရှိသည့်အတွက် စားဝတ် နေရေးနှင့် ငွေရေးကြေးရေးဘက်၌လည်း ခက်ခဲနေကြသည်ဟု စစ်ရှောင်များက ပြောသည်။ 

ဓါတ်ပုံ - Zaw Min Htike

ဒီးမော့ဆို စစ်ရှောင် စခန်းများ ရေရှားမှု ကြုံ

ဒီးမော့ဆို စစ်ရှောင် စခန်းများ ရေရှားမှု ကြုံ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၂၀ ရက်။  ကရင်နီပြည်၊ ဒီးမော့ဆိုမြို့နယ်အတွင်းရှိ …

  • January 20, 2025
ရပ်စောက်မြို့နယ် အတွင်း စစ်ရေး တင်းမာနေဆဲဖြစ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၂၀ ရက်။   ရှမ်းပြည်တောင်ပိုင်း၊ ရပ်စောက်မြို့နယ်၊ ကျောက်ဂူဒေသအနီး တစ်ဝိုက်တွင် ၂ ဖက်တပ်များအကြား စစ်ရေး အခြေအနေများ ဆက်လက်တင်းမာနေဆဲ ဖြစ်သည်ဟု မြေပြင်အရင်းအမြစ်များက ပြောသည်။   ကျောက်ဂူဒေသတွင် ဇန္နဝါရီလအတွင်း ဓနုပြည်သူ့လွတ်မြောက်ရေး တပ်ဦး (DPLF) နှင့် စစ်ကောင်စီတပ်၊ ပအိုဝ်းပြည်သူ့စစ် (PNA) ပူးပေါင်းတပ်များကြား တိုက်ပွဲများ ပြင်းထန်လျက်ရှိပြီး လာမည့် ရက်ပိုင်းများတွင် မြေပြင်ရော ဝေဟင်မှပါ တိုက်ခိုက်မှု ထပ်မံပြုလုပ်လာနိုင်သည်ဟု ဆိုသည်။   DPLF စစ်ဖက်ဆိုင်ရာ ပြောရေးဆိုခွင့်ရှိသူ ကိုအမောင်က “စစ်ရေးအခြေနေကတော့ ၂ ဖက်တပ်တွေ ဆိုင်ထား တုန်း ရှိနေပါသေးတယ်။ စစ်ရေးဗျူဟာကတော့ အနည်းအကျဉ်းတော့ ပြောင်းလဲလာတာတွေ ရှိတယ်။ ပြည် သူ့ စစ်တွေ တချို့ ထုတ်သုံးလာတာတော့ တွေ့ရတယ်။ စကစရဲ့ ကျရှုံးမှု အပိုင်းမှာကြတော့ ဇန္နဝါရီလထဲမှာ ထိတွေ့ တိုက်ပွဲတွေတော့ ဖြစ်တယ်။ ဒါပေမယ့် အတည်တော့ မပြုနိုင်သေးပါဘူး” ဟု ပြောသည်။   ဇန္နဝါရီလ ၁၆ ရက်နေ့က ဖြစ်ပွားခဲ့သည့် တိုက်ပွဲအတွင်း၌လည်း စစ်ကောင်စီတပ်က လေကြောင်းမှ ဗုံး ၅၆ လုံး တိတိ ကြဲချတိုက်ခိုက်ခဲ့ရာ ကျောက်ဂူဒေသ၊ လွယ်ဟောင်ကျေးရွာတွင် နေထိုင်သည့် အသက် ၃၀ ဝန်းကျင် အမျိုးသားတစ်ဦး၊ အသက် ၄၀ နှင့် ၅၀ ဝန်းကျင် အမျိုးသမီး ၂ ဦးတို့ ပွဲချင်းပြီး သေဆုံးခဲ့သည်။   ထို့အပြင် ထိခိုက်ဒဏ်ရာရသူလည်း ၁၃ ဦး အထိရှိပြီး DPLF ဆေးအဖွဲ့မှ ကုသပေးလျက်ရှိသည်ဟု ကိုအမောင် က ဆက်လက်ပြောဆိုသည်။   “လေကြောင်းတိုက်ခိုက်မှုကြောင့် ပြည်သူလူထု ၁၃ ဦး ဒဏ်ရာရရှိသွားတာတော့ ရှိတယ်။ ၄ ဦးတော့ အနည်း ငယ် စိုးရိမ်ရတယ်။ လက်ရှိမှာတော့ ကျနော်တို့အနေနဲ့ ဆေးကုသပေးလျက် ရှိပါတယ်။”   အလားတူ ဇန္နဝါရီလ ၁၄ ရက်နှင့် ၁၅ ရက်နေ့ကလည်း စစ်ကောင်စီတပ်၏ လေကြောင်း တိုက်ခိုက်မှုကြောင့် ကျောက်ဂူဒေသတွင် လူနေအိမ် ၂ လုံးမီးလောင်ပြာကျ ပျက်စီးခဲ့ပြီး အမျိုးသားတစ်ဦးလည်း ပြင်းထန်ဒဏ်ရာ ရရှိခဲ့သေးသည်ဟု ဒေသခံများက ဆိုကြသည်။   ဇန္နဝါရီလ ၁၀ ရက်နေ့ဝန်းကျင်စတင်၍လည်း ကျောက်ဂူ၊ ပယင်းကုန်း၊ ထမင်းပေါင်း စသည့်ကျေးရွာများက ပြည်သူများ စစ်ဘေးရှောင်ခဲ့ကြရသည့်အပြင် စစ်တပ်၏ လေကြောင်း မှ တိုက်ခိုက်မှုများကြောင့် ဇန္နဝါရီလ ၁၈ ရက်နေ့မှ စတင်၍ ကျောက်မီးခတ်၊ ခဲကြားနှင့် လွယ်ဟောင်ကျေးရွာများပါ ထပ်မံတိမ်းရှောင်နေကြရသည်။   “အဓိကတော့ ပြည်သူ့လူထုအနေနဲ့ ဘေးကင်းလုံခြုံစွာ စစ်ရှောင်ကြဖို့ရယ်၊ နောက်တခုက စစ်ရေးပစ်မှတ်နဲ့ နီးတဲ့နေရာတွေမှာ စစ်မရှောင်ဖို့ရယ်။ အဲဒီဟာကတော့ ကျနော်တို့လည်း ပြောချင်ပါတယ်။ အဓိကတော့ စစ်ရေးဖြစ်နေတဲ့ ဒေသတွေပဲ ပြောချင်ပါတယ်” ဟု ကိုအမောင်က သတိပေးသည်။   DPLF အနေဖြင့် ဓနုကိုယ်ပိုင်အုပ်ချုပ်ခွင့်ရ ဒေသများ အပါအဝင် ရှမ်းတောင်ဒေသများသို့ ထိုးဖောက် ဝင်ရောက် လျက်ရှိပြီး နောင်ချိုမြို့၊ တောင်းခမ်းကျေးရွာတွင်လည်း တအာင်း အမျိုးသား လွတ်မြောက်ရေး တပ်မတော် (TNLA) နှင့် မဟာမိတ်ပြု၍ စစ်ကောင်စီတပ်နှင့် စစ်ရေး ဆက်လက် တင်းမာနေဆဲ ဖြစ်သည်။

ရပ်စောက်မြို့နယ် အတွင်း စစ်ရေး တင်းမာနေဆဲဖြစ်

ရပ်စောက်မြို့နယ် အတွင်း စစ်ရေး တင်းမာနေဆဲဖြစ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၂၀ ရက်။  ရှမ်းပြည်တောင်ပိုင်း၊ ရပ်စောက်မြို့နယ်၊ …

  • January 20, 2025
မြိတ်တွင် တစ်နေ့တည်း မီး ၂ ကြိမ်လောင်၊ အလောင်းတစ်လောင်းတွေ့

မြိတ်တွင် တစ်နေ့တည်း မီး ၂ ကြိမ်လောင်၊ အလောင်းတစ်လောင်းတွေ့ 

မြိတ်တွင် တစ်နေ့တည်း မီး ၂ ကြိမ်လောင်၊ အလောင်းတစ်လောင်းတွေ့  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၉ ရက်။ မြိတ်မြို့တွင် တစ်နေ့တည်း …

  • January 19, 2025
အပစ်ရပ် တိုင်းရင်းသား လက်နက်ကိုင်အဖွဲ့များ နိုင်ငံရေး တွေ့ဆုံမှုအတွက် ကြိုးပမ်းမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၈ ရက်။   စစ်ရေးပဋိပက္ခများကို လျော့ချရန် နိုင်ငံတကာ၏ တွန်းအားကို ရယူပြီး သက်ဆိုင်သူများ အားလုံးပါဝင်သော နိုင်ငံရေး တွေ့ဆုံဆွေးနွေးမှုများ ဖြစ်ပါ်လာအောင် လုပ်ဆောင်သွားမည်ဟု တိုင်းရင်းသား လက်နက်ကိုင်အဖွဲ့ အစည်း (၇) ဖွဲ့၏ မဟာမိတ်အဖွဲ့ - 7 EAO Alliance က ပြောသည်။   တိုင်းရင်းသား လက်နက်ကိုင် အဖွဲ့အစည်း (၇) ဖွဲ့ ၏ မဟာမိတ်အဖွဲ့ - 7 EAO Alliance က ဇန္နဝါရီလ ၁၄ ရက် နေ့တွင် ပြုလုပ်ခဲ့သည့် (၃/၂၀၂၅) အစည်းအဝေး၌ ထည့်သွင်း ဆွေးနွေးခဲ့ကြသည်ဟု 7 EAO Alliance ၏ ပြော ခွင့်ရ ဗိုလ်မှူးကြီး စောကျော်ညွန့်က ပြောသည်။   “လက်ရှိ နိုင်ငံရေးအကျပ်အတည်းကို ကျော်လွှားနိုင်ဖို့ဆိုရင် နိုင်ငံတကာရဲ့ ပံ့ပိုးဆောင်ရွက်မှုကို ကျနော်တို့က မျက်ကွယ်ပြုလို့ မရဘူး လိုအပ်တယ်။ အလေးထားသင့်တယ်လို့ ကျနော်တို့အနေနဲ့ ယုံကြည်တဲ့အတွက်မလို့ မြန်မာနိုင်ငံရဲ့ အိမ်နီးချင်းနိုင်ငံတွေပေါ့ တရုတ်တို့ ထိုင်းတို့ အိန္ဒိယတို့ အိမ်နီးချင်းနိုင်ငံတွေက ခေါင်းဆောင်တွေနဲ့ လည်း လက်ရှိ အကြပ်အတည်းကို ကျော်လွားနိုင်ဖို့ ဘယ်လို ညှိနှိုင်းဆောင်ရွက်မှုတွေ လုပ်နိုင်မလဲဆိုတဲ့ ထိတွေ့ ဆက်ဆံပြောဆိုမှုတွေ လုပ်နိုင်အောင် ကြိုးပမ်းဆောင်ရွက်မယ့် အစီစဉ်တွေလည်း ကျနော်တို့ ညှိနှိုင်းဆွေးနွေး နိုင်ခဲ့တယ်။”   လက်ရှိပြည်တွင်း စစ်ရေးပဋိပက္ခများသည် ပိုမိုကျယ်ပြန်လာပြီး နိုင်ငံရေးအရ တွေ့ဆုံဆွေးနွေးမှုများ ကျဉ်း မြောင်းလာသည့် အတွက် ပြဿနာများကို ဖြေရှင်းရန် သက်ဆိုင်သူများအားလုံးပါဝင်သည့် တွေ့ဆုံဆွေးနွေးပွဲ ဖြစ်ပေါ်လာရန် လိုအပ်သည်ဟု 7 EAO Alliance ၏ပြောခွင့်ရ ဗိုလ်မှူးကြီး စောကျော်ညွန့်မှ ပြောသည်။   “ပြည်တွင်း နိုင်ငံရေးဘောင် ချဲ့ထွင်ဖို့ဆိုတာက နိုင်ငံရေးဘောင်ဆိုတာကတော့ ဒီအချိန်မှာ အင်မတန်မှ ကျဉ်းကြပ်ပါတယ်။ စစ်ရေးဘောင်က အရမ်းကို ကျယ်ပြန့်ပြီးတော့ နိုင်ငံရေးဘောင်က တော်တော်လေးကို ပိတ်လုပိတ်ခင်ကို ကျဉ်းမြောင်းနေတဲ့ ကာလတစ်ခုမှာ ကျနော်တို့က ကြိုးပမ်းနေတာပါ အခက်အခဲတွေ စိန်ခေါ်မှုတွေ ရှိတယ်ဆိုတာတော့ အမှန်ပါပဲ ဒါက ပကတိ အရှိတရားပါ။”   မြန်မာပြည်တွင်း စစ်ရေးပဋိပက္ခများ ကြာရှည်လာသည်နှင့်အမျှ အင်အား လိုအပ်ချက်ရှိလာသော စစ်ကောင်စီ တပ်သည် စစ်မှုမထမ်းမနေရ ဥပဒေဖြင့် ပြန်လည် အင်အား ဖြည့်တင်းမှုများ ရှိနေသလို တော်လှန်ရေးတပ် ဘက်မှလည်း ၂၀၂၅ ခုနှစ်အတွင်း စစ်ကောင်စီ အပြီးတိုင် ကျဆုံးရေး ကြွေးကြော်ထားသောကြောင့် စစ်ရေး ဘောင် ပိုကျယ်ပြန့်လာနိုင်သည်ဟု သုံးသပ်ချက်များ ရှိနေသည်။   လက်ရှိ အကြပ်အတည်းအား ကျော်လွှားနိုင်ရန် နိုင်ငံတကာ၏ တွန်းအားကို ရယူသွားမည်ဟု ဗိုလ်မှူးကြီး စောကျော်ညွန့်မှ ပြောသည်။   ထို့အပြင် အာဆီယံ၏ အခန်းကဏ္ဍသည်လည်း အရေးကြီးနေဆဲဖြစ်ပြီး လာမည့်အာဆီယံ အလှည့်ကျ ဥက္ကဋ္ဌ ဖြစ်လာမည့် မလေးရှား နိုင်ငံခြားရေး ဝန်ကြီးသာမက အာဆီယံနိုင်ငံမှ ခေါင်းဆောင်များနှင့်လည်း အနီးကပ် ထိတွေ့ဆက်ဆံနိုင်ရန် ကြိုးပမ်းသွားမည်ဟု ဆိုသည်။   ထို့အတူ 7 EAO Alliance အနေဖြင့် လက်ရှိ အဖွဲ့ဝင်များကြားတွင် ထိတွေ့ဆက်ဆံ ဆွေးနွေးမှုများ ပုံမှန်ပြုလုပ် နေပြီး နိုင်ငံတကာမှ အကူညီပေးနိုင်သည့် ပုဂ္ဂိုလ်များနှင့်လည်း လက်လှမ်းမှီသလောက် ချိတ်ဆက် ဆောင်ရွက် ခြင်း၊ ပြည်တွင်း ရှိ အရပ်ဖက်ဆိုင်ရာ လူမှုအဖွဲ့အစည်းများနှင့် နိုင်ငံရေးပါတီ အချို့တို့အား ထိတွေ့ ပြောဆိုမှုများ ကို လုပ်ဆောင်လျက်ရှိသည်ဟု ပြောသည်။   ဗိုလ်မှူးကြီး စောကျော်ညွန့် က “ကျနော်တို့နိုင်ငံမှာ ပြည်တွင်းစစ်တွေကလည်း ရာစုနှစ်ဝက်ကျော် ရှည်ကြာခဲ့ တယ် ပြည်တွင်းစစ်ကို အပြီးသတ် ချုပ်ငြိမ်းချင်တယ်။ ပြည်ထောင်စု ငြိမ်းချမ်းရေးကို ကျနော်တို့ ဖော်ဆောင် ချင်တယ်။ ပြည်ထောင်စု ငြိမ်းချမ်းရေးကို ဖော်ဆောင်မယ်ဆိုရင်လည်းပဲ ကျနော်တို့ နိုင်ငံကို ဖက်ဒရယ် ဒီမိုကရေစီ ပြည်ထောင်စုလို့ပဲ ခေါ်ခေါ်၊ ဒီမိုကရေစီနဲ့ ဖက်ဒရယ် ပြည်ထောင်စုကို အခြေခံတဲ့ ပြည်ထောင်စုလို့ပဲ ခေါ်ခေါ် အဲဒီပြည်ထောင်စုမျိုးကို ကျနော်တို့အားလုံး ညှိနှိုင်း သဘောတူညီချက်နဲ့ ဖော်ဆောင်ဖို့ ဒါလိုအပ် တယ်လို့ ကျနော်တို့က ယုံကြည်တယ်” ဟု ပြောသည်။   7 EAO Alliance ၏ ဇန္နဝါရီလ ၁၄ ရက်နေ့က ပြုလုပ်ခဲ့သည့် အစည်းအဝေးသို့ ဗိုလ်ချုပ်ကြီးယွက်စစ် ဦးဆောင် သော အဖွဲ့ဝင်များ၊ အတွင်းရေးမှူး အဖွဲ့ဝင်များနှင့် လုပ်ငန်းကော်မတီ အသီးသီးတို့၏ တာဝန်ရှိသူများ စုစုပေါင်း ၂၂ ဦး တက်ရောက်ခဲ့ပြီး လက်ရှိဖြစ်ပေါ်နေသော နိုင်ငံရေး၊ စစ်ရေး၊ စီးပွားရေးနှင့် လူထုက နေ့စဥ် ရင်ဆိုင် ကြုံတွေ့နေရသော လူမှုဒုက္ခမျိုးစုံအား သုံးသပ် ဆွေးနွေးခဲ့ကြသည်ဟု ဆိုသည်။   ဆွေးနွေးပွဲတွင် လက်ငင်း နိုင်ငံရေး အကြပ်အတည်းမှ လွန်မြောက်နိုင်ရေးအတွက် ၂၀၂၅ ခုနှစ်အတွင်း ဖြစ်ပေါ်လာ နိုင်မည့် နိုင်ငံရေး အခင်းအကျင်းနှင့်အညီ ဆောင်ရွက်နိုင်ရေး ကြိုတင်ပြင်ဆင်ထားရှိရေး၊ သက်ဆိုင်သူများအားလုံး ပါဝင်သော နိုင်ငံရေးတွေ့ဆုံဆွေးနွေးမှုများ ဖြစ်ပါ်လာစေရေး၊ ငြိမ်ချမ်းရေးလုပ်ငန်းစဥ် ဖော်ဆောင်ရေး၊  EAO များအတွင်း Coordination and Cooperation ပိုမိုရရှိလာစေရေး၊ ပြည်တွင်းနိုင်ငံရေးဘောင် ချဲ့ထွင်ရေးလုပ် ငန်းစဥ်အား တိုးမြှင့်ဆောင်ရွက်ရေးတို့ကို ဆက်လက် ကြိုးပမ်းဆောင်ရွက်သွားရန် ဆွေးနွေးခဲ့ကြသည်ဟု 7 EAO Alliance ပြောသည်။   7 EAO Alliance အဖွဲ့ကို အပစ်ရပ် လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့များ ဖြစ်သည့် ရှမ်းပြည် ပြန်လည်ထူထောင်ရေး ကောင်စီ (RCSS)၊ မွန်ပြည်သစ်ပါတီ (MNSP)၊ ဒီမိုကရေစီ အကျိုးပြု ကရင့်တပ်မတော် (DKBA)၊ ကရင်ငြိမ်းချမ်းရေး ကောင်စီ (KNU/KNLA (PC)၊ လားဟူဒီမိုကရက်တစ် အစည်းအရုံး (LDU) ၊ ဗိုလ်မှူးကြီး ခွန်ဥက္ကာ ဦးဆောင်သော ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO) နှင့် ရခိုင်ပြည်လွတ်မြောက်ရေးပါတီ (ALP) တို့ဖြင့် ဖွဲ့စည်းထားပြီး အဖွဲ့ခေါင်းဆောင်မှာ (RCSS) မှ ဗိုလ်ချုပ်ကြီး ယွက်စစ် ဖြစ်သည်။

အပစ်ရပ် တိုင်းရင်းသား လက်နက်ကိုင်အဖွဲ့များ နိုင်ငံရေး တွေ့ဆုံမှုအတွက် ကြိုးပမ်းမည်

အပစ်ရပ် တိုင်းရင်းသား လက်နက်ကိုင်အဖွဲ့များ နိုင်ငံရေး တွေ့ဆုံမှုအတွက် ကြိုးပမ်းမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၈ ရက်။  စစ်…

  • January 18, 2025
ရှမ်းတောင် စစ်ရှောင် ၂ သောင်းကျော်အတွက် အရေးပေါ် အကူအညီလိုအပ်နေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၈ ရက်။   ရှမ်းပြည်တောင်ပိုင်းတွင် ခိုလှုံနေသည့် စစ်ဘေးရှောင် အယောက် ၂ သောင်းကျော်အတွက် အရေးပေါ် အကူအညီများ လိုအပ်နေသည်ဟု ဒေသတွင်း ကူညီဆောင်ရွက်ပေးနေသူများ က ပြောသည်။   ရှမ်းပြည်တောင်ပိုင်းတွင် ခိုလှုံနေသည့် စစ်ဘေးရှောင်ဦးရေ ၆ သောင်းခွဲကျော်ရှိပြီး ၎င်းတို့အနက် ၃ ပုံ ၂ ပုံခန့်မှာ စားနပ်ရိက္ခာ၊ သောက်သုံးရေ နှင့် ကျန်းမာရေး စောင့်ရှောက်မှု အကူအညီများ လိုအပ်နေကြခြင်း ဖြစ်သည်။   ရှမ်းတောင်ဒေသအတွင်း စစ်ဘေးရှောင်များကို ကူညီဆောင်ရွက်ပေးနေသည့် ပအိုဝ်းအမျိုးသား တစ်ဦးက “မဲနယ်တောင် လုံးဟီးဘက်မှာ တိုက်ပွဲဖြစ်ကတည်းက ရောက်လာတာဆိုတော့ တစ်နှစ်လောက် ရှိပြီလေ။ ကယားဘက်က လာတာတွေလည်း ၃ နှစ်ကျော်ပြီ။ ကြားထဲက အလုပ်လည်းမရှိ။ အလုပ်ကိုင်လေးရမှပဲ သူတို့ စားဝတ်နေရေး ပြေလည်မှာပါ။ ကြာပြီဆိုတော့ အလှူရှင်တွေလည်း နည်းပြီလေ” ဟု ပြောသည်။   စစ်ဘေးရှောင်များမှာ ကရင်နီပြည်အတွင်း ၂၀၂၃ ခုနှစ် နိုဝင်ဘာလ ၁၁ ရက်နေ့တွင် စတင်ခဲ့သည့် တစ်လေးလုံး စစ်ဆင်ရေးနှင့် ဟိုပုံးမြို့နယ်၊ မဲနယ်တောင်ဒေသ၌ ၂၀၂၄ ခုနှစ် ဇန္နဝါရီလအတွင်း ဖြစ်ပွားခဲ့သည့် တိုက်ပွဲများ ကြောင့် တိမ်းရှောင်လာရခြင်း ဖြစ်သည်။   စစ်ဘေးရှောင်များမှာ တောင်ကြီး၊ ညောင်ရွှေ၊ ပင်လောင်း၊ ကလော စသည့်မြို့နယ်များနှင့် တောတောင်များထဲ တွင် ခိုလှုံနေကြပြီး တောတောင်များ၌ နေထိုင်ကြသူများမှာ စားဝတ်နေရေးအတွက် ဟင်းသီးဟင်းရွက်များ ခူးရောင်းပြီး ရှာဖွေလုပ်ကိုင် စားသောက်နေကြရသည် ဟု နီးစပ်သူများက ပြောဆိုသည်။   စစ်ရှောင်များကို ကူညီပေးနေသူ တစ်ဦးက “တချို့က ကုန်စိမ်းရောင်းတဲ့နား နေ့စားလိုက်ကြတာပေါ့။ ပေးသ လောက်ပဲ ယူကြတာပေါ့။ စစ်ရှောင် အလုပ်မရှိ ဆိုတာသိတော့ ဈေးနှိမ်တယ်လေ။ စခန်းတွေမှာလည်း ထမင်း တစ်နပ် လျှော့စားနေရတယ်” ဟု ဆက်ပြောသည်။   အလားတူ ပင်လောင်းမြို့နယ် တောင်ပိုင်းတွင်လည်း ရေရှားပါးလာသည်ဖြစ်ရာ ဝါလီး၊ ဆောင်းပြောင်း၊ ထီဗွား၊ လိန့်ညား စသည့်ကျေးရွာများတွင် ခိုလှုံနေသည့် စစ်ဘေးရှောင်များအတွက် သောက်သုံးရေ ခက်ခဲသည့် ပြဿနာနှင့် ရင်ဆိုင်နေကြရသည်။   သောက်သုံးရေအတွက်လည်း ပေပါပုံး တစ်ပုံးလျှင် ၃,၀၀၀ ကျပ် ပေးဝယ်နေရပြီး ရေမသန့်ရှင်းမှုကြောင့် ကလေးအချို့မှာ အရေပြားယားယံခြင်းနှင့် ဝမ်းရောဂါများ ဖြစ်ပွားနေကြသည်ဟု ကူညီဆောင်ရွက်ပေးနေ သူများ က ဆိုသည်။   ပင်လောင်းမြို့နယ် တောင်ပိုင်းတွင် စစ်ရှောင်နေရသည့် အသက် ၄၀ အရွယ် စစ်ဘေးရှောင် အမျိုးသမီး တစ်ဦး က “ဒီနှစ်က ရေတော်တော်ရှားတယ်။ နွေတောင် မရောက်သေးဘူး။ မိုးရေလှောင်ထားတာ ကုန်ပြီလေ။ တစ်ပေပါဝယ်ရင် မိသားစုလိုက်ဆို တစ်ရက်တောင် မခံဘူး။ ရေသပ်သပ် လှူပေးတဲ့သူ ရှိစေချင်တယ်။ ရေနဲ့ ရိက္ခာက အဓိကပဲ” ဟု ပြောသည်။   ရှမ်းပြည်နယ် တောင်ပိုင်းအတွင်း ခိုလှုံနေကြသည့် စစ်ဘေးရှောင်များမှာ တောင်ကြီးမြို့နယ်တွင် အများဆုံး နေထိုင်ကြပြီး လက်ရှိ ဆောင်းရာသီကာလ၌ အအေးဒဏ်ကြောင့် ဝမ်းရောဂါများ ဖြစ်နေကြသည်ဟု ဆိုသည်။   သို့ဖြစ်ရာ တောင်ကြီးမြို့နယ်ရောက် စစ်ဘေးရှောင်များ အတွက်လည်း ဆေးအကူအညီနှင့် အနွေးအထည်များ၊ စောင်များ လိုအပ်လျက်ရှိသည်။   ရှမ်းပြည် တောင်ပိုင်းရောက် စစ်ဘေးရှောင်များအား စစ်ကောင်စီ လက်အောက်ခံ ထွေအုပ်ဦးစီးဌာန၊ အုပ်ချုပ် ရေးမှူးနဲ့ ရဲတပ်ဖွဲ့များက မကြာခဏ ရှောင်တခင် ဧည့်စာရင်းစစ်ခြင်း၊ အလှူခံပစ္စည်းများအပေါ် ခေါင်းပုံဖြတ်ခြင်း၊ ဖိအားပေး နေရပ်ပြန်ခိုင်းခြင်းများ လုပ်နေကြသည်ဟု စစ်ရှောင်များက ဆိုသည်။

ရှမ်းတောင် စစ်ရှောင် ၂ သောင်းကျော်အတွက် အရေးပေါ် အကူအညီလိုအပ်နေ

ရှမ်းတောင် စစ်ရှောင် ၂ သောင်းကျော်အတွက် အရေးပေါ် အကူအညီလိုအပ်နေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၈ ရက်။  ရှမ်းပြည်တောင်ပိုင်းတွ…

  • January 18, 2025
ဆီဆိုင်တွင် လေယာဉ်ဗုံးကြဲမှုကြောင့် ရဲစခန်းနှင့် ဘာသာရေး အဆောက်အအုံများ ပျက်စီး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၈ ရက်။   လေကြောင်း တိုက်ခိုက်ခံရမှုကြောင့် ပအိုဝ်းကိုယ်ပိုင် အုပ်ချုပ်ခွင့်ရ ဒေသ၊ ဆီဆိုင်မြို့နယ်ထဲရှိ စစ်ကောင်စီ လက်အောက်ခံ ရဲစခန်းနှင့် ဘာသာရေး အဆောက်အအုံများ ပျက်စီးသွားသည်ဟု ဒေသခံများက ပြောသည်။   ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဆီဆိုင်မြို့နယ်၊ နောင်ထော်ကျေးရွာကို စစ်ကောင်စီ တပ်က ဇန္နဝါရီလ ၁၅ ရက်နေ့၌ ဂျက်ဖိုက်တာဖြင့် ၄ ကြိမ်တိတိ ဗုံးကြဲတိုက်ခိုက်ခဲ့သည်ဟု ဒေသတွင်း သတင်း အရင်းအမြစ်များက ပြောသည်။   လေကြောင်း တိုက်ခိုက်မှုအတွင်း စစ်ကောင်စီ လက်အောက်ခံ နောင်ထော်ရဲစခန်းနှင့် ကျေးရွာဓမ္မရုံတစ်ခု မီးလောင်ပြာကျ ပျက်စီးခဲ့သည်ဟု အဝေးရောက် စစ်ဘေးရှောင်များက ဆိုသည်။   နောင်ထော်ဒေသခံ စစ်ဘေးရှောင် တစ်ဦးက “အဲဒီမှာက ရဲမရှိတော့ဘူး။ ရဲတွေက ဆီဆိုင်တိုက်ပွဲ ဖြစ်ကတည်း က ပြေးသွားတာ။ PNO နဲ့ စစ်တပ်က ဝင်လိုက်ထွက်လိုက်ပဲ။ အခုတော့ သူတို့ လကနက်နဲ့ သူတို့ ပြန်ထိတယ် ပြောရမှာပေါ့” ဟု ပြောသည်။   ဆီဆိုင်မြို့နယ်၊ တောင်ရှေ့ကျေးရွာအုပ်စု၊ နောင်ထော်ကျေးရွာအား ဇန္နဝါရီလ ၁၄ ရက်နေ့ ညနေ ၃ နာရီခန့်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီက ၄ ကြိမ်တိတိ ဗုံးကြဲတိုက်ခိုက်ခဲ့ခြင်း ဖြစ်သည်။   နောင်ထော်ကျေးရွာမှာ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLA) ၏ ဗဟိုဌာနချုပ်ဟောင်း ဖြစ်သော် လည်း လက်ရှိတွင် PNLA တပ်ဖွဲ့ဝင်များ တစ်ဦးတစ်ယောက်မျှ မရှိတော့သည့်အပြင် စစ်ရေးလှုပ်ရှားမှုလည်း မရှိဘူးဟုဆိုကြသည်။   PNLA စစ်ဖက်ဆိုင်ရာ ပြောရေးဆိုခွင့်ရှိသူ ခွန်ရိန်းယံက “ဟုတ်ပါတယ်။ ၁၅ ရက်နေ့ ညနေ ၃ နာရီမှာ ရည်ရွယ် ချက်ရှိရှိ လာကြဲသွားတာပါ။ ဒါတွေက ဘာကိုပြနေသလဲဆိုတော့ စစ်ကောင်စီတပ်တွေက စစ်ရာဇဝတ်မှုတွေကို ရည်ရွယ်ချက်ရှိရှိ ဆက်တိုက် ကျူးလွန်နေတဲ့ပုံစံပဲ ဖြစ်ပါတယ်” ဟု ပြောသည်။   ဆီဆိုင်တိုက်ပွဲစတင်သည့် ၂၀၂၄ ခုနှစ် ဇန္နဝါရီလ ၂၄ ရက်နေ့၊ နောက်ပိုင်းမှစတင်၍ နောင်ထော်ကျေးရွာနေ ပြည် သူများမှာ တိမ်းရှောင်နေရပြီး ပအိုဝ်းပြည်သူ့စစ်အဖွဲ့ (PNA) နှင့် စစ်ကောင်စီတပ်များ မကြာခဏ ဝင်ရောက် စစ်ရေးလှုပ်ရှားလျက် ရှိသည်ဟု ဆိုသည်။   အလားတူ တောင်ရှေ့ကျေးရွာအုပ်စု၊ ထီစုံကျေးရွာတွင်လည်း ဇန္နဝါရီလ ၆ ရက်နေ့က စစ်ကောင်စီက လေကြောင်းမှ ဗုံးကြဲ တိုက်ခိုက်မှုကြောင့် လူနေအိမ် ၂ လုံးနှင့် တန်ဖိုးမြင့် ကားတစ်စီး မီးလောင်ပြာကျ ပျက်စီး ခဲ့သည်။   ၂၀၂၅ ခုနှစ် အစောပိုင်းအတွင်းလည်း အဆိုပါ ပအိုဝ်းကျေးရွာဖြစ်သည့် ထီစုံကျေးရွာအတွင်း စစ်ကောင်စီ လေကြောင်းမှ တိုက်ခိုက်မှု ကြောင့် သားအမိ ၂ ဦး ပွဲချင်းပြီး သေဆုံးခဲ့ပြီး လူနေအိမ် ၂ လုံး၊ ဘာသာရေး အဆောက်အအုံ တစ်ခု၊ ရဲစခန်း တစ်ခုနှင့် မော်တော်ကားတစ်စီး မီးလောင်ပြာကျပျက်စီးခဲ့ပြီး ဖြစ်သည်ဟု PNLA တာဝန်ရှိသူများက ပြောသည်။

ဆီဆိုင်တွင် လေယာဉ်ဗုံးကြဲမှုကြောင့် ရဲစခန်းနှင့် ဘာသာရေး အဆောက်အအုံများ ပျက်စီး

ဆီဆိုင်တွင် လေယာဉ်ဗုံးကြဲမှုကြောင့် ရဲစခန်းနှင့် ဘာသာရေး အဆောက်အအုံများ ပျက်စီး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၈ ရက်။  လေကြော…

  • January 18, 2025
ထိုင်းနယ်စပ် မောတောင်မြို့တွင် ဆန်ဈေးများ မြင့်တက်

ထိုင်းနယ်စပ် မောတောင်မြို့တွင် ဆန်ဈေးများ မြင့်တက်

ထိုင်းနယ်စပ် မောတောင်မြို့တွင် ဆန်ဈေးများ မြင့်တက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၈ ရက်။  မြိတ်ခရိုင် တနင်္သာရီမြို့နယ်အတွင်း…

  • January 18, 2025
တမူးမြို့နယ်က လေကြောင်းတိုက်ခိုက်ခံရမှုထဲ ပြည်သူ ၆ ဦးသေဆုံး   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၇ ရက်။   စစ်ကိုင်းတိုင်း၊ တမူးမြို့နယ်၊ ခမ်းပါတ်မြို့နှင့် ကနန်ကျေးရွာအား စစ်ကောင်စီက လေကြောင်းဖြင့် ၃ ကြိမ် တိုက်ခိုက်ခဲ့ရာ လူ ၆ ဦး သေဆုံးသည်ဟု ဒေသတွင်း ကာကွယ်ရေး တပ်ဖွဲ့ဝင်များက ပြောသည်။   အမျိုးသားညီညွှတ်ရေး အစိုးရ (NUG) မှ စစ်ကိုင်းတိုင်းရှိ ထိန်းချုပ်နယ်မြေများတွင် ယခု ဇန္နဝါရီလအတွင်း ရုံးဖွင့်လှစ်မည်ဟု ကြေညာပြီးနောက် ယမန်နေ့ (ဇန္နဝါရီ ၁၆ ရက်နေ့) ည ၈ နာရီ အချိန်ခန့်၌ ဗုံးကြဲခံရခြင်း ဖြစ်သည်။   ခမ်းပတ်မြို့မှ တိမ်းရှောင်လာသူ အမျိုးသား တစ်ဦးက “ရုတ်တရက်ကြီး ကြဲချလာတာ။ ဒီနောက်ပိုင်းက ကင်းထောက် လေယာဉ်တောင် မလာတော့ဘူး။ သိရသလောက်တော့ ၄ ယောက်က ပွဲချင်းပြီးပဲ။ ဒဏ်ရာ ရသူတွေလည်း များတယ်။ ဆေးရုံမှာလည်း တစ်ယောက် တစ်ပေါက်နဲ့ဆိုတော့ တိတိကျကျက နောက်ရက်မှ သိရမယ် ထင်တယ်” ဟု ပြောသည်။   လေကြောင်းတိုက်ခိုက်မှုကြောင့် ခမ်းပတ်မြို့ပေါ်ရပ်ကွက်မှ ကလေး ၂ ဦး၊ အရပ်သား တစ်ဦး၊ ရဲဘော်တစ်ဦး အပြင် ကနန်ဘုန်းကြီးကျောင်းမှ သံဃာတော်တစ်ပါးနှင့် အရပ်သား တစ်ဦး စုစုပေါင်း ၆ ဦး သေဆုံးသည်ဟု ဒေသတွင်း ကာကွယ်တပ်ဖွဲ့ဝင်များ၏ ပြောပြချက်အရ သိရသည်။   ထို့အပြင် ကနန်ဘုန်းကြီးကျောင်း အပါအဝင် လူနေအိမ် ၃၀ ခန့် မီးလောင်ပြာကျ ပျက်စီးခဲ့ပြီး ထိခိုက်ဒဏ်ရာရ သူ စုစုပေါင်း ၁၀ ဦးကျော်ခန့် ရှိနိုင်သည်ဟု ခမ်းပါတ်မြို့မှ တိမ်းရှောင်လာသူများက ဆိုသည်။   ကနန်ကျေးရွာအနီး စစ်ရေးလှုပ်ရှားနေသည့် မြေပြင်အရင်းအမြစ် တစ်ဦးက “NUG အနေနဲ့ လျို့ဝှက်သင့်တဲ့ ကိစ္စတွေကို လျို့ဝှက်စေချင်တယ်။ မီဒီယာမှာ တစ်ခါဖြေပြီးတိုင်း တစ်ခါဗုံးကြဲခံနေရတာ တိုက်ဆိုင်မှုတော့ မဟုတ်ဘူး။ အခုသူတို့ ရုံးဖွင့်မယ် ပြောတယ်။ ဘယ်တော့လဲ ဘာလဲတော့ မသိဘူး။ ဗုံးတော့လာကြဲပြီ။ သူတို့ ရုံးက ဘယ်နားနေမှန်းတောင် မသိဘူး” ဟု ပြောသည်။   ခမ်းပါတ်မြို့အား ၂၀၂၃ ခုနှစ် နိုဝင်ဘာ ၅ ရက်နေ့တွင် NUG လက်အောက်ခံ PDF တပ်ရင်းများမှ တိုက်ခိုက် သိမ်းယူခဲ့ပြီး လက်ရှိတွင်လည်း ပြည်သူ့အုပ်ချုပ်ရေး လည်ပတ်နေဆဲ ဖြစ်သည်။   ခမ်းပါတ်မြို့အနီး ကနန်ကျေးရွာကို ၂၀၂၄ ခုနှစ် ဇန္နဝါရီ ၇ ရက်နေ့တွင်လည်း စစ်ကောင်စီတပ်က လေကြောင်းမှ တိုက်ခိုက်ခဲ့ပြီး အသက် ၁၈ အောက် ကလေးငယ် ၆ ဦး အပါအဝင် ၁၉ ဦး သေဆုံးခဲ့ဖူးသည်။

တမူးမြို့နယ်က လေကြောင်းတိုက်ခိုက်ခံရမှုထဲ ပြည်သူ ၆ ဦးသေဆုံး

တမူးမြို့နယ်က လေကြောင်းတိုက်ခိုက်ခံရမှုထဲ ပြည်သူ ၆ ဦးသေဆုံး သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၇ ရက်။ စစ်ကိုင်းတိုင်း၊ တမူးမြို့နယ…

  • January 17, 2025
×Close