သတင်း

လက်နက်ကြီးကြောင့် မျက်မမြင် အဖွားတစ်ဦး ဒဏ်ရာရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၇ ရက်။   ထားဝယ်ခရိုင်၊ ရေဖြူမြို့နယ်၊ နတ်တွင်းကျေးရွာတွင် စစ်ကောင်စီတပ်က ပစ်ခတ်လိုက်သည့် လက်နက်ကြီး ကျည် ကျရောက်ပေါက်ကွဲပြီး အဖွားအိုတစ်ဦး ထိခိုက်ဒဏ်ရာရရှိခဲ့သည်ဟု ရွာသားများက ပြောသည်။   နတ်တွင်းကျေးရွာ အထဲပိုင်းရှိ မျက်မမြင်အဖွား ဒေါ်သန်းရီ၏ နေအိမ်ပေါ်သို့ ဇန်နဝါရီလ ၁၅ရက်နေ့ နံနက်ပိုင်း က လက်နက်ကြီးကျည် ကျရောက်ပေါက်ကွဲခဲ့ပြီး အဖွား၏ နောက်ကျောတွင် ကျည်စထိမှန် ဒဏ်ရာရခဲ့ခြင်း ဖြစ် သည်။   အသက် ၅၀ ခန့်အရွယ်နတ်တွင်း ရွာသားတစ်ဦးက “အဖွားတစ်ယောက်ထဲ ရှိနေတဲ့အချိန် အိမ်ခေါင်မိုး တည့် တည့်အပေါ်ကို လက်နက်ကြီးကျည် လာကျတာ၊ ကံကောင်းတယ်လို့ ဆိုရမယ် ဒဏ်ရာလောက်ပဲရလို့၊ အိမ် အနားမှာ ကပ်နေတဲ့ ကောက်ရိုးပုံလည်း မီးတော့ လောင်သွားတယ်” ဟု ပြောသည်။   နတ်တွင်းကျေးရွာ အထဲပိုင်းနှင့် အပြင်ပိုင်းကို လက်နက်ကြီးကျည် နှစ်လုံး ကျရောက်ပေါက်ကွဲခဲ့ခြင်း ဖြစ်ပြီး ရွာအပြင်ပိုင်းပေါက်ကွဲမှုတွင် ထိခိုက်ပျက်စီးခြင်းမရှိခဲ့ဘူးဟု ရွာသားတစ်ဦးက ဆိုသည်။   လက်နက်ကြီး ပစ်ခတ်မှုကို ကျောက်ကညာကျေးရွာ အခြေစိုက် စစ်ကောင်စီ အမြောက်တပ် အမတ - ၃၀၄ တပ်ရင်းမှ တိုက်ပွဲမရှိဘဲ ပစ်ခတ်ခဲ့ခြင်း ဖြစ်သည်ဟု ရွာသားများက ဆိုသည်။   အလားတူ မြိတ်ခရိုင် ပုလောမြို့နယ်အတွင်း၌လည်း စစ်ကောင်စီတပ်၏ ရှို့မီးများကြောင့် ယနေ့အထိတိုင်အောင် မီးလောင်နေဆဲဖြစ်ကြောင်း ရွာသားများက ပြောသည်။   ဇန္နဝါရီလ ၁၁ ရက်နေ့မှ စတင်၍ ပုလောမြို့နယ်အတွင်းရှိ တပိုကျေးရွာနှင့် စက်တော်ရာကျေးရွာအကြားမှ နေအိမ်နှင့် ရော်ဘာခြံများကို စစ်ကောင်စီမှ မီးရှို့ခဲ့ခြင်းဖြစ်ပြီး ဇန္နဝါရီလ ၁၇ ရက်နေ့အထိ စက်တော်ကျေးရွာ၏ အနောက်ဘက်တောင်တန်းများအထိ မီးလောင်နေဆဲ ဖြစ်သည်။

လက်နက်ကြီးကြောင့် မျက်မမြင် အဖွားတစ်ဦး ဒဏ်ရာရ

လက်နက်ကြီးကြောင့် မျက်မမြင် အဖွားတစ်ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၇ ရက်။ ထားဝယ်ခရိုင်၊ ရေဖြူမြို့နယ်၊ နတ်တွင်းကျေး…

  • January 17, 2025
ဇဝဲတပ်ရင်းဂိတ်ကို ဝင်တိုက်၊ တပ်ကြပ်ကြီးတစ်ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၇ ရက်။   မြိတ်ခရိုင်၊ တနင်္သာရီမြို့နယ်အတွင်းရှိ ဇဝဲကျေးရွာ အခြေစိုက် တပ်ရင်းဂိတ် ဝင်ရောက် တိုက်ခိုက်ခံရပြီး စစ်ကောင်စီဘက်မှ တပ်ကြပ်ကြီးတစ်ဦး သေဆုံးသွားခဲ့သည်ဟု KNDO တပ်ဖွဲ့တာဝန်ရှိသူ တစ်ဦးက ပြော သည်။   ခြေမြန်တပ်ရင်း အမှတ် ၅၅၆ အရှေ့ရှိ စစ်တပ်ဂိတ်ကို KNDO တပ်ရင်း (၇)၊ တပ်ခွဲ (၃) ဘိုနီတပ်စုနှင့် ဗိုလ်ခရင်း တပ်ဖွဲ့ တို့မှ ဇန္နဝါရီလ ၁၄ ရက်နေ့၊ နံနက် ၈ နာရီခွဲ အချိန်ခန့်က သွားရောက် ပစ်ခတ်တိုက်ခိုက်ခဲ့ခြင်း ဖြစ်သည်။   ဗိုလ်ခရင်းတပ်ဖွဲ့မှ ပြန်ကြားရေး တာဝန်ရှိသူက “၄၀ မမနဲ့ သူတို့ဂိတ်ကို အရင်ပစ်တာ၊ ပြီးမှ သေနတ်တွေနဲ့ ဆက်တိုက် ထပ်ပစ်တာ၊ သူတို့ဘက်က ငြိမ်နေတယ် ဘာနဲ့မှ ပြန်မပစ်ဘူး၊ ပြန်ဆုတ်လာပြီးမှ တပ်အထဲကနေ လက်နက်ကြီးတွေနဲ့ ပြန်ပစ်တယ်” ဟု ပြောသည်။   သွားရောက် တိုက်ခိုက်ခဲ့ချိန်တွင် ခမရ - ၅၅၆ စစ်တပ်ဂိတ်တွင် စစ်ကောင်စီတပ်ဖွဲ့ဝင် ၇ ဦးဝန်းကျင်ခန့် ရှိနေပြီး ၄၀ မမ လက်နက်ကြီးနှင့်အတူ လက်နက်ငယ်များဖြင့် ချောင်းမြောင်းပစ်ခတ်ခဲ့ခြင်း ဖြစ်သည်ဟု တိုက်ခိုက်ရာ တွင် ပါဝင်ခဲ့သူ KNDO တပ်ဖွဲ့ဝင်တစ်ဦးက ဆိုသည်။   ခမရ - ၅၅၆ တပ်ရင်း၏ စစ်တပ်ဂိတ်ကို ပစ်ခတ်တိုက်ခိုက်ခဲ့ရာတွင် တပ်ကြပ်ကြီးတစ်ဦး ကျဆုံးခဲ့ပြီး KNDO နှင့် ပြည်သူကာကွယ်ရေးတပ်ဖွဲ့များဘက်မှ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း ဆိုသည်။   ခမရ - ၅၅၆ တပ်ရင်း၏ စစ်ဆေးရေး အဝင်ဂိတ် တိုက်ခိုက်ခံရပြီးနောက် တပ်ရင်းအရှေ့တွင် လုံခြုံရေး တိုးမြှင့် ထားကာ အနီးဝန်းကျင်၌ စစ်ကောင်စီတပ်ဖွဲ့ဝင် အယောက် ၃၀ ဦးခန့်ကို ကင်းချထားကြောင်း ရွာသားများက ပြောသည်။   အလားတူ ဇန္နဝါရီလ ၁၁ ရက်နေ့ ညပိုင်းကလည်း တနင်္သာရီမြို့နယ် အရှေ့မော်တုန်းကျေးရွာ အခြေစိုက် အမြောက်တပ်ရင်း အမတ - ၃၀၆ ကိုလည်း တောဗုံးကြီး ပြည်သူ့ ကာကွယ်ရေးတပ်ဖွဲ့က သွားရောက် တိုက် ခိုက်ခဲ့သေးသည်။

ဇဝဲတပ်ရင်းဂိတ်ကို ဝင်တိုက်၊ တပ်ကြပ်ကြီးတစ်ဦး သေဆုံး

ဇဝဲတပ်ရင်းဂိတ်ကို ဝင်တိုက်၊ တပ်ကြပ်ကြီးတစ်ဦး သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၇ ရက်။ မြိတ်ခရိုင်၊ တနင်္သာရီမြို့နယ်အတွင်…

  • January 17, 2025
ရှမ်းမြောက် ကားသမားများအား တော်လှန်ရေး အဖွဲ့များ၏ ယာယီကတ်များ လုပ်ခိုင်း   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၆ ရက်။   ရှမ်းပြည်မြောက်ပိုင်းတွင် ပြေးဆွဲနေသည့် ကားသမားများကို ဒေသတွင်း အုပ်ချုပ်နေသည့် တိုင်းရင်းသား တော် လှန်ရေး လက်နက်ကိုင်များက ယာဉ်ဖြတ်သန်းသွားလာခွင့် ယာယီကတ်များ လုပ်ခိုင်းနေသည်ဟု ပြောသည်။   ဇန္နဝါရီလ ပထမပတ်မှ စတင်၍ ရှမ်းမြောက်၊ လားရှိုးမြို့တွင် ကိုးကန့်တပ်မတော် MNDAA က ၎င်းတို့ထိန်းချုပ် ထားသည့် နယ်မြေအတွင်း ဖြတ်သန်းသွားလာနေသည့် ယာဉ်များအား ယာယီကတ်များ ထုတ်ပေးနေခြင်း ဖြစ်သည်။   လားရှိုးမြို့မှ ယာဉ်မောင်းတစ်ဦး က “ခဏတဖြုတ်က ဒီကပြန်လုပ် နောက်တစ်ခုက ပြန်လုပ် ဘယ်နှစ်နှစ် ကား လိုင်စင်လည်း မဟုတ်ဘူး။ မနှစ်တုန်းကဆိုရင်လည်း အမျိုးမျိုးလုပ်ရတယ်။ လူကတ်ကော ကားကတ်ကော အကုန်လုံး လုပ်နေရတာ။ အခက်အခဲတော့ နည်းနည်းရှိတယ်။ အခုဟာကလည်း ကားသက်တမ်းက မရေးထား ဘူး” ဟု ပြောသည်။   လာရှိုးမြို့တွင် ကိုးကန့်တပ်မတော် MNDAA တပ်ထိန်းချုပ်ထားသည့် ဒေသအတွင်း ဝင်ထွက်သွား လာနေသည့် ကားသမားများအား ကားမောင်းနှင်ခွင့် ယာယီကတ်များကို ဇန္နဝါရီလ ၄ ရက်နေ့မှ စတင်၍ ထုတ်ပေးနေခြင်း ဖြစ်သည်။   ထိုယာယီကတ်အတွက် ကားတစ်စီးလျှင် ကျပ်ငွေ တစ်သောင်းခွဲဖြင့် လုပ်နေကြရပြီး ကိုးကန့်တပ်ဖွဲ့ ထိန်းချုပ် ထားသည့် ဒေသအတွင်း၌သာ အသုံးပြုနိုင်ကြောင်း ကားသမားများက ပြောသည်။   ၁၀၂၇ စစ်ဆင်ရေး နောက်ပိုင်းတွင် ရှမ်းမြောက်ဒေသထဲက မြို့နယ်များကို ကိုးကန့်တပ်ဖွဲ့ (MNDAA)၊ တအာင်း အမျိုးသား လွတ်မြောက်ရေး တပ်မတော် (TNLA) နှင့် ကချင်လွတ်လပ်ရေး တပ်မတော် (KIA) တို့က နယ်မြေ အလိုက် ထိန်းချုပ်ထားကြခြင်း ဖြစ်သည်။   ထို့ကြောင့် မန္တလေး - မူဆယ် ပြည်ထောင်စု လမ်းမကြီးတလျှောက် ဖြတ်သန်းသွားလာနေရသည့် ယာဉ်များအား လုံးမှာ ထိန်းချုပ်နယ်မြေအလိုက် သတ်မှတ်ချက်များအတိုင်း ယာဉ်ဖြတ်သန်းသွားလာခွင့် ယာယီကတ်များ လုပ်နေကြရခြင်း ဖြစ်သည်။   အလားတူ စစ်ကောင်စီ ထိန်းချုပ်ထားသည့် နယ်မြေထဲရောက်သည့် အခါတွင်လည်း ၎င်းတို့က ထုတ်ပေးထား သည့် လက်မှတ်၊ လိုင်စင်များကို ပြန်လည် အသုံးပြုနေကြရခြင်း ဖြစ်သည်။   ထိုသို့သော အခြေအနေများကြောင့် တိုင်းရင်းသား တော်လှန်ရေး လက်နက်ကိုင်တပ်များမှ ထုတ်ပေးသည့် ယာဉ်ဖြတ်သန်းသွားလာခွင့် ယာယီကတ်ပြားများအား စစ်ကောင်စီ ထိန်းချုပ်နယ်မြေထဲသို့ ဖြတ်သန်းမောင်း နှင်ချိန်တွင် မတွေ့အောင်ဝှက်ထားရသည်ဟု ကားသမားများက ပြောသည်။   ယာဉ်မောင်းတစ်ဦးက “သူကတ်ကတော့ သူ့နေရာနဲ့ သူသုံး ကျန်တဲ့နေရာမှာတော့ အသုံးမဝင်ပါဘူး။ ကျန်တဲ့ နေရာတော့ အသုံးမဝင်ပါဘူး။ သူတို့ဒေသဖြတ်တဲ့ အခါမှာပဲ အသုံးဝင်မှာ။ စကစဘက် ရောက်သွားရင်တော့ ဖွက်ထားရမှာပေါ့။ ဘာလိုလဲဆို တစ်ခါတစ်လေကိုယ့်မှာ အန္တရာယ်ရှိတယ်လေ။ ဒီကတ်က နေရာတကာ သုံးလို့ မရဘူးလေ။ ပြလို့မရဘူးလေ။ စကစနေတဲ့ မြို့မှာတော့ အဲ့ဒီကတ် တွေ့ရင်တော့ ကိုယ့်ကကိုယ် အတွက်က မလုံခြုံဘူးပေါ့ဗျာ။ အချိန်မရွေး ဆွဲလို့ရတာပေါ့ဗျာ ရှင်းရှင်းပြောမယ်ဆိုရင်” ဟု ပြောသည်။   MNDAA လုပ်ပေးနေသည့် ယာယီကတ်များ မလုပ်ပါက ၎င်းတို့ ထိန်းချုပ်ထားသည့် ဒေသများထဲ ဖြတ်သန်း မောင်းနှင် သွားလာခွင့် မပြုကြောင်း နမ့်ခမ်းမြို့မှ ကားသမားတစ်ဦးက ပြောသည်။   “ကချင်ဘက်ကဆို ကချင်ဟာလုပ်၊ ပလောင်ဘက်ကဆို ပလောင်ဟာလုပ်၊ အကုန်လုံးဟာ ကြည့်ရတာပေါ့။ စကစနယ်မြေထဲ ရောက်လာရင်တော့ ပြန်ဖွက်လိုက်ရတာပေါ့။ အလှည့်ကျသွားရတော့ မလုပ်ရင် လောက်ကိုင် တက်မယ်ကွာ တက်ခွင့်မရှိဘူး” ဟု ပြောသည်။   လားရှိုးမြို့ထဲရှိ လိုင်စင်ကားများ၊ လိုင်စင်မဲ့‌ကားများ၊ ကုန်တင်ကား၊ ယာဉ်ကြီး/ငယ် မှန်သမျှကို MNDAA က ယာဉ်ဖြတ်သန်းသွား၊ မောင်းနှင်ခွင့် ယာယီကတ်များ ပြုလုပ်ပေးနေခြင်း ဖြစ်သည်ဟု လားရှိုးဒေသခံများနှင့် ယာဉ်မောင်းများက ပြောသည်။ အဆိုပါကတ်အား သက်ဆိုင်ရာ ရပ်ကွက်ရုံးတွင် သွားရောက်လုပ်နေကြရခြင်း ဖြစ်သည်ဟု ဆိုကြသည်။   လားရှိုးမြို့တွင်း စက်တပ်ယာဉ် မောင်းနှင်ခွင့် ယာယီကတ်၏ သက်တမ်းမှာ တစ်နှစ်သက်တမ်းဖြစ်ပြီး နောက် ပိုင်းတွင် သက်တမ်းတိုးခြင်း၊ လိုင်စင် လုပ်ပေးခြင်းများကိုလည်း လုပ်ဆောင်ပေးသွားမည်ဟု MNDAA က ဆိုသည်။

ရှမ်းမြောက် ကားသမားများအား တော်လှန်ရေး အဖွဲ့များ၏ ယာယီကတ်များ လုပ်ခိုင်း

ရှမ်းမြောက် ကားသမားများအား တော်လှန်ရေး အဖွဲ့များ၏ ယာယီကတ်များ လုပ်ခိုင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၆ ရက်။  ရှမ်းပြည်မြေ…

  • January 16, 2025
ကယားပြည်နယ်နေ့ ဗုံးကြဲမှု မိသားစုဝင် ၃ ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၆ ရက်။   ကယားပြည်နယ်နေ့တွင် ကရင်နီပြည်ထဲရှိ စစ်ဘေးရှောင်စခန်းတစ်ခု လေကြောင်းမှ တိုက်ခိုက်ခံရပြီး မိသားစု ဝင် ၃ ဦး သေဆုံးသွားခဲ့သည်။   ကရင်နီပြည်၊ ဒီးမော့ဆိုမြို့နယ် အရှေ့ဘက်ခြမ်းရှိ စစ်ဘေးရှောင်စခန်းတွင် စစ်ကောင်စီက လေကြောင်းမှ ဗုံးကြဲ တိုက်ခိုက်မှုကြောင့် မိသားစုဝင် အရပ်သား ၃ ဦး သေဆုံးခဲ့ပြီး အခြား စစ်ရှောင်ရွာသား ၄ ဦး ပြင်းထန် ဒဏ်ရာရသည်ဟု ဒေသတွင်း ကူညီဆောင်ရွက် ပေးနေသူများက ပြောသည်။   မိသားစုနှင့် နီးစပ်သည့် စစ်ဘေးရှောင် အမျိုးသမီးတစ်ဦးက “ဒီးမော့ဆိုက သူတို့မကြဲတာ နည်းနည်းကြာပြီ။ ဒီလတော့ ခဏ ခဏပြန်ကြဲတယ်။ လက်နက်ကြီးလည်း ပစ်တယ်။ အခု ဆုံးတဲ့ ၂ ယောက်လုံးက အဲ့နေရာမှာ တင် ပွဲချင်းပြီးပဲ” ဟု ပြောသည်။   ဒီးမော့ဆိုမြို့နယ်၊ ဘိုးလျားနှင့် ဒေါဆိုခူကျေးရွာတို့အား ဇန္နဝါရီလ ၁၅ ရက်နေ့၊ နေ့လည် ၁ နာရီဝန်းကျင် အချိန် ခန့်တွင် စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်။   ပွဲချင်းပြီးသေဆုံးသူများမှာ အသက် ၃၁ နှစ်အရွယ် အမျိုးသား တစ်ဦးနှင့် အသက် ၃၈ နှစ်အရွယ် အမျိုးသမီး တစ်ဦးတို့ ဖြစ်ပြီး အသက် ၇၀ ဝန်းကျင်အရွယ် အမျိုးသမီး တစ်ဦးမှာ ဦးခေါင်းခွံ အက်ကွဲဒဏ်ရာဖြင့် ဆေးရုံတွင် သေဆုံးသည်ဟု ကူညီဆောင်ရွက်ပေးနေသူများက ပြောသည်။   ပွဲချင်းပြီး သေဆုံးသူ ၂ ဦးမှာ မောင်နှမတော်စပ်ပြီး ဆေးရုံတွင် သေဆုံးသူမှာ ၎င်းတို့၏ မိခင်ဖြစ်ကာ မိသားစု ၃ ဦးတည်း နေထိုင်ကြသည်ဟု နီးစပ်သူများက ပြောသည်။   ထို့အပြင် ဗုံးကြဲတိုက်ခိုက်ခံရစဉ်အတွင်း လူလတ်ပိုင်းအရွယ် အမျိုးသား၂ ဦးနှင့် အမျိုးသမီး ၂ ဦးမှာလည်း ပြင်းထန်ဒဏ်ရာများ ရရှိခဲ့ပြီး ရက်အတော်ကြာ ဆေးကုသမှု ခံယူရဦးမည်ဟု ဆိုသည်။   ဒီးမော့ဆိုမြို့နယ်အတွင်း စစ်ရေးလှုပ်ရှားနေသည့် မြေပြင်သတင်းအရင်းအမြစ် တစ်ဦးက “ကယားဒေးမှာ သူတို့ ဒီလို လုပ်တယ်ဆိုတော့ သူတို့ဖက်က မလျှော့တော့ဘူး။ အဆုံးထိသွားမယ်ဆိုတဲ့ သဘောလို့ ယူဆလို့ရတယ်။ သူတို့ စစ်ခေါင်းဆောင်တွေလည်း ရောက်နေတယ်။ ဒီဖက်ကလည်း လိုင်းပေါ်မှာ စိန်ခေါ်ထားတာတွေရှိတော့ မင်းတို့ မလုပ်ခင် ငါတို့ အရင်လုပ်တယ် အဲလိုမျိုးလည်း သုံးသပ်လို့ ရတာပေါ့။ လေကြောင်းကတော့ ရှေ့ လျှောက် ဒီထက် ပိုဆိုးလာမယ့် သဘောရှိတယ်” ဟု သုံးသပ်သည်။   ၂၀၂၅ ခုနှစ် အစောပိုင်းအတွင်း ဒီးမော့ဆိုမြို့နယ်ထဲ၌ ကင်းထောက်လေယာဉ်များ မကြာခဏ ပျံဝဲလေ့ရှိသည့် အပြင် စစ်ကောင်စီ၏ ငွေတောင်အခြေစိုက် ခြေလျှင်တပ်ရင်း (ခလရ ၁၀၂) မှလည်း ဇန္နဝါရီလ ၁၅ ရက်နေ့၊ ညတွင် စစ်ဘေးရှောင်စခန်းများအား လက်နက်ကြီး ပစ်ခတ်ခဲ့သည်ဖြစ်ရာ ထိခိုက်ပျက်စီးမှု အခြေအနေမျာအား စုံစမ်းနေဆဲ ဖြစ်သည်။   အလားတူ ဇန္နဝါရီလ ၁၄ ရက်နေ့ည သန်းခေါင်ယံအချိန်၌လည်း လွိုင်ကော်မြို့နယ်၊ ဘုရားနီနှင့် ပဒါးညေးကျေး ရွာတို့အား စစ်ကောင်စီက လေကြောင်းမှ ဗုံးကြဲ တိုက်ခိုက်ခဲ့သေးသည်။

ကယားပြည်နယ်နေ့ ဗုံးကြဲမှု မိသားစုဝင် ၃ ဦး သေဆုံး 

ကယားပြည်နယ်နေ့ ဗုံးကြဲမှု မိသားစုဝင် ၃ ဦး သေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၆ ရက်။  ကယားပြည်နယ်နေ့တွင် ကရင်နီပြည်ထဲရှိ …

  • January 16, 2025
တပ်ဖွဲ့ဝင် ၅ ဦးကို ပအိုဝ်း ပြည်သူ့စစ်အဖွဲ့က သတ်ဖြတ်သည်ဟု PNLA ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၆ ရက်။   ပအိုဝ်းအမျိုးသား လွတ်မြောက်ရေး တပ်မတော် (PNLA) မှ တပ်ဖွဲ့ဝင် ၅ ဦး နှိပ်စက်သတ်ဖြတ် ခံရသည်ဟု အဖွဲ့တာဝန်ရှိသူများက ပြောသည်။   ရှမ်းပြည်တောင်ပိုင်း၊ ဆီဆိုင်မြို့နယ်၊ ထီစုံကျေးရွာအနီး ဖြစ်ပွားခဲ့သည့် တိုက်ပွဲအတွင်း PNLA တပ်ဖွဲ့ဝင် ၅ ဦး ဖမ်းဆီးခံရပြီးနောက် ဇန္နဝါရီ ၁၃ ရက်နေ့၊ နံနက်ပိုင်းတွင် ပအိုဝ်းပြည်သူ့စစ် (PNA)က နှိပ်စက် သတ်ဖြတ်ခဲ့ခြင်း ဖြစ်သည်ဟု ဆိုသည်။   PNLA စစ်ဖက်ဆိုင်ရာ ပြောရေးဆိုခွင့်ရှိသူ ခွန်ရိန်းယံက “ဒီလိုမျိုး ဖမ်းဆီးရမိတဲ့ စစ်သုံ့ပန်းကို သတ်ဖြတ်တယ်၊ နှိပ်စက်တယ် ဆိုတာက စစ်ရဲ့ စည်းမျဉ်းစည်းကမ်း ဥပဒေနဲ့လည်း မကိုက်ညီဘူးပေါ့။ လုပ်လို့မရဘူး။ နိုင်ငံ တကာ စစ်သုံ့ပန်း ဥပဒေနဲ့လည်း မကိုက်ညီဘူး လုပ်လို့မရဘူး။ ဒါကတော့ စစ်ရာဇဝတ်မှု ကျူးလွန်တာပဲ ဖြစ်ပါတယ်” ဟု ပြော သည်။   PNLA နှင့် စစ်ကောင်စီ၊ PNA ပူးပေါင်းတပ်တို့ အကြား ဇန္နဝါရီလ ၁၂ ရက်နေ့၌ တစ်နေကုန်နီးပါး တိုက်ပွဲ ဖြစ် ပွားခဲ့ရာ PNLA တပ်ဖွဲ့ဝင် တစ်ဦးကျဆုံးခဲ့ပြီးနောက် ၅ ဦးမှာ ဖမ်းဆီးခံခဲ့ရသည်ဟု မြေပြင်အရင်းအမြစ်များ က ဆိုသည်။   အဆိုပါ တပ်ဖွဲ့ဝင် ၅ ဦးအား PNA က ဇန္နဝါရီလ ၁၂ ရက်နေ့၊ ညပိုင်းတွင် ညှဉ်းပန်းနှိပ်စက်ခံထားသည့် ဓါတ်ပုံ များအား ထုတ်ပြန်ခဲ့ပြီးနောက် နောက်နေ့ နံနက် ၁၀ နာရီ အချိန်ခန့်တွင် သတ်ဖြတ်ထားသည့် ဓါတ်ပုံများအား ထပ်မံထုတ်ပြန်ခဲ့ခြင်း ဖြစ်သည်။   ခွန်ရိန်းယံက “PNO မှာ ဦးဆောင်နေတဲ့ လူတွေအနေနဲ့ ကိုယ့်လုပ်ရပ် ကိုယ် ပြန်ပြီးတော့ စဉ်းစား သုံးသပ် ကြည့်ကြပါ။ စစ်ကောင်စီရဲ့ အကျိုးအတွက်၊ စစ်အာဏာရှင်အတွက် ကိုယ့်လူမျိုး အချင်းချင်းကို ဒီလိုမျိုး ဖမ်းဆီးနှိပ်စက် သတ်ဖြတ်နေတာက လုပ်ရက်ကြသလား။ ကိုယ့်လူမျိုးအချင်းချင်း နှိပ်စက်ရတာ ပျော်နေ ကြသလားပေါ့” ဟု ဆက်ပြောသည်။   ဆီဆိုင်တိုက်ပွဲ စတင်သည့် ၂၀၂၄ ခုနှစ်၊ ဇန္နဝါရီလ ၂၄ ရက်နေ့ စ၍ ယနေ့အချိန်ထိ PNLA မှ စစ်ကောင်စီနှင့် PNO တပ်ဖွဲ့ဝင်များအား ဖမ်းဆီးရမိသည့် ဖြစ်စဉ်များ ရှိခဲ့သော်လည်း တစ်ကြိမ်တစ်ခါမျှ နှိပ်စက်ခြင်း၊ သတ် ဖြတ်ခြင်း မရှိဘဲ လူ့အခွင့်ရေးနှင့်အညီ ထိန်းသိမ်းထားသည်ဟု PNLA ဗဟို တာဝန်ရှိသူများ၏ ပြောပြချက်အရ သိရသည်။   ထီစုံကျေးရွာအနီး ဖြစ်ပွားခဲ့သည့် ဇန္နဝါရီလ ၁၂ ရက်နေ့ တိုက်ပွဲအတွင်း စစ်ကောင်စီ၊ PNO ပူးပေါင်းတပ်ဖက်မှ စစ်ကြောင်းမှူး တစ်ဦးအပါအဝင် ၂၀ ကျော် သေဆုံးခဲ့သည်ဟုလည်း မြေပြင်အရင်းအမြစ်များက ပြောသည်။   ၂၀၂၂ ခုနှစ်၊ စက်တင်ဘာလ ၁၄ ရက်နေ့ကလည်း ပင်လောင်းမြို့နယ်၊ ပင်မွန်းကျေးရွာအုပ်စု၊ ဝါးပြုံးရွာသို့ နေရပ် အလည်ပြန်လာသည့် PNLA တပ်ဖွဲ့ဝင် ၅ ဦးအား PNA က ဖမ်းဆီးသတ်ဖြတ်ခဲ့ဖူးသည်။

တပ်ဖွဲ့ဝင် ၅ ဦးကို ပအိုဝ်း ပြည်သူ့စစ်အဖွဲ့က သတ်ဖြတ်သည်ဟု PNLA ပြော

တပ်ဖွဲ့ဝင် ၅ ဦးကို ပအိုဝ်း ပြည်သူ့စစ်အဖွဲ့က သတ်ဖြတ်သည်ဟု PNLA ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၆ ရက်။  ပအိုဝ်းအမျိုးသား လ…

  • January 16, 2025
လွိုင်ကော်မြို့နှင့် အနီးဝန်းကျင်ကို စစ်တပ်က လက်နက်ကြီးများဖြင့် ပစ်ခတ်နေ

လွိုင်ကော်မြို့နှင့် အနီးဝန်းကျင်ကို စစ်တပ်က လက်နက်ကြီးများဖြင့် ပစ်ခတ်နေ

လွိုင်ကော်မြို့နှင့် အနီးဝန်းကျင်ကို စစ်တပ်က လက်နက်ကြီးများဖြင့် ပစ်ခတ်နေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၅ ရက်။ ကရင်နီပြည်၊ လ…

  • January 15, 2025
ဘော်လခဲတွင် စစ်ကောင်စီ ထောက်ပို့ စစ်ကြောင်း ကြားဖြတ်တိုက်ခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန်နဝါရီလ ၁၄ ရက်။     ကရင်နီပြည်၊ ဘော်လခဲမြို့နယ်၊ ဘော်လခဲဗျူဟာကုန်းသို့ ကျည်နှင့် ရိက္ခာများ သယ်ဆောင်လာသည့် အင်အား ၃၀ ပါ စစ်ကောင်စီယာဉ်တန်း ကြားဖြတ်တိုက်ခိုက်ခံရသည်ဟု မြေပြင်အရင်းအမြစ်များက ပြောသည်။   စစ်ဆင်ရေးအတွင်း စစ်ကောင်စီ တပ်ဖွဲ့ဝင် ၆ ဦး၏ အလောင်းများ တွေ့ရှိခဲ့သည့်အပြင် သေနတ် ၄ လက်၊ ခဲယမ်းနှင့် ရိက္ခာများကို ကရင်နီမဟာမိတ် တော်လှန်ရေးတပ်ပေါင်းစုများက သိမ်းဆီးရမိခဲ့သည်ဟု ဆိုသည်။   ဖားဆောင်း PDF ပြန်ကြားရေး တာဝန်ခံ တစ်ဦးက “ဘော်လခဲကနေ ထွက်လာတဲ့ စစ်ကောင်စီ စစ်ကြောင်းကို မိုင်းထန်နဲ့ ဝမ်မလန်းရွာကြားမှာ တပ်ပေါင်းစုကနေပြီးတော့ မိုင်းဆွဲတိုက်ခိုက်တာပေါ့နော်။ မြေပြင်မှာတော့ စစ်ကောင်စီရဲ့ အလောင်းတွေ့ရှိမှုကတော့ ၆ လောင်းပေါ့။ ဒါပေမယ့် လက်နက်ကြီးနဲ့ လှမ်းပစ်နေတော့ လုံခြုံ ရေးအရ နောက်ပြန်ဆုတ်လာတယ်ပေါ့” ဟု ပြောသည်။   ကရင်နီမဟာမိတ် တော်လှန်ရေး တပ်ပေါင်းစုများမှ ဇန္နဝါရီလ ၁၂ ရက်နေ့၊ နံနက်ပိုင်းတွင် စစ်ကောင်စီ ယာဉ် တန်းအား ပဒေသာမိုင်း အလုံး ၃၀ ဖြင့် ဝင်ရောက် တိုက်ခိုက်ခဲ့ခြင်း ဖြစ်သည်။   အလစ်အငိုက် တိုက်ခိုက်ခံရပြီးနောက် စစ်ကောင်စီ ယာဉ်တန်းမှာ အထိအခိုက် အကျအဆုံး များစွာဖြင့် ဘော်လခဲဗျူဟာကုန်းသို့ ဝင်ရောက်သွားသည်ဟု မြေပြင်အရင်းအမြစ်များက ဆိုသည်။   စစ်ကောင်စီတပ်များမှာ တပ်ရင်းအထိုင်စခန်းများ လက်မလွှတ်ရရေးအတွက် ၂၀၂၅ ခုနှစ် အစောပိုင်း ကတည်း က စဉ်ဆက်မပြတ် လက်နက်နှင့် လူအင်အား ဖြည့်တင်းနေကြသည့်အပြင် ထောက်ပို့လမ်းကြောင်းအတွက် လေကြောင်းကိုပါ အသုံးပြုနေသည်ဟု ဆိုသည်။   ဘော်လခဲခရိုင်တွင် ခလရ ၁၃၄၊ ၁၃၅ အပါအဝင် စစ်ကောင်စီ စခန်း ၄ ခုခန့်သာ ကျန်ရှိနေပြီး တော်လှန်ရေး အင်အားစုများ အနေဖြင့်လည်း အပြီးသတ် သိမ်းယူရန်အတွက် အခက်အခဲများစွာ ရှိသည်ဟု ဖားဆောင်း PDF ပြန်ကြားရေး တာဝန်ခံက ဆက်ပြောသည်။   “တပ်ရင်းတွေကို သိမ်းဖို့တော့ နည်းနည်းလေး အခက်အခဲ ရှိသေးတယ်ပေါ့။ ဘယ်လို အကြောင်းအရာကြောင့် လဲဆို တချို့ လိုအပ်ချက်လေးတွေ ရှိသေးလို့ပေါ့။ လိုအပ်တဲ့ အပိုင်းတွေရှိတယ်။ ခဲယမ်းကအစ လိုအပ်ချက် ရှိတယ်ပေါ့။”   ယနေ့ မြေပြင်အခြေအနေအရ ဘော်လခဲခရိုင်အတွင်း တိုက်ပွဲများငြိမ်သက်လျက် ရှိသော်လည်း မြို့စွန် နေရာ များတွင် စစ်ကောင်စီတပ်က ကင်းလှည့်နေပြီး မြို့တွင်းနေရာများကိုလည်း ရှောင်တခင် စစ်ဆေးနေသည် ဟု ဒေသခံများနှင့် မြေပြင်ရှိ စစ်ရေးသတင်း အရင်းအမြစ်များက ဆိုသည်။

ဘော်လခဲတွင် စစ်ကောင်စီ ထောက်ပို့ စစ်ကြောင်း ကြားဖြတ်တိုက်ခံရ

ဘော်လခဲတွင် စစ်ကောင်စီ ထောက်ပို့ စစ်ကြောင်း ကြားဖြတ်တိုက်ခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန်နဝါရီလ ၁၄ ရက်။  ကရင်နီပြည်၊ ဘော်လခဲမြို့န…

  • January 14, 2025
ကယားပြည်နယ်နေ့ အခန်းအနားကြောင့် လွိုင်ကော်တွင် လုံခြုံရေး တင်းကြပ် သတင်းနှ့င် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၄ ရက်။ ဇန္နဝါရီလ ၁၅ ရက်နေ့တွင် ကျရောက်မည့် ၇၃ နှစ်မြောက် ကယားပြည်နယ်နေ့ အခမ်းအနားအတွက် လွိုင်ကော် မြို့တွင် လုံခြုံရေး တင်းကျပ်ထားသည်ဟု ဒေသခံများက ပြောသည်။ ၇၃ နှစ်မြောက် ကယားပြည်နယ်နေ့ ဖွင့်ပွဲ အခမ်းအနားအား ဇန္နဝါရီလ ၁၂ ရက်နေ့တွင် မြို့တော်မခန်းမ၌ စစ်ကောင်စီခန့် ပြည်နယ်ဝန်ကြီးချုပ် ဦးဇော်မျိုးတင် တက်ရောက် ဖွင့်လှစ်ခဲ့ပြီး ဖွင့်ပွဲကျင်းပနေစဉ် လုံခြုံရေး တင်းကျပ်ကာ မြို့တော်ခန်းမရှေ့ လမ်းမကြီးအား ဖြတ်သန်းသွားလာခွင့် ပိတ်ထားခဲ့သည်ဟု ဆိုသည်။ လွိုင်ကော်ဒေသခံ တစ်ဦးက “မြို့တော်ခန်းမမှာ သူတို့ပြခန်းတွေ ဘာတွေတောင် လုပ်နေကြတယ်။ ဝန်ထမ်း တွေ အလှည့်ကျ စောင့်နေရတယ်။ ဟိုနေ့က သူတို့ဖွင့်ပွဲတဲ့ လမ်းတောင် ဖြတ်လို့မရဘူး” ဟု ပြော သည်။ ကယားပြည်နယ်နေ့ အခမ်းအနားသို့ စစ်ကောင်စီ၏ ထိပ်ပိုင်းခေါင်းဆောင်များထဲမှ တစ်ဦးဖြစ်သည့် ဒု-စစ်ခေါင်း ဆောင် ဒုတိယ ဗိုလ်ချုပ်မှူးကြီး စိုးဝင်း တက်ရောက်မည် ဆိုသည့် သတင်းများကြောင့် ယခုကဲ့သို့ လုံခြုံရေး တင်းကျပ်ရခြင်း ဖြစ်နိုင်သည်ဟု မြို့ခံများက ပြောသည်။ ယခုနှစ် ကယားပြည်နယ်နေ့ အခမ်းအနားအတွင်း ဌာနဆိုင်ရာ ပြခန်းများနှင့် အသေးစား ကုန်စည်ပြပွဲများ ခင်းကျင်း ပြသထားသည်ဟု ဖွင့်ပွဲအခမ်းနား တက်ရောက်သူများက ဆိုသည်။ အဆိုပါ အခမ်းအနားသို့ ဌာနဆိုင်ရာ ဝန်ထမ်းများမှအပ လာရောက်ကြည့်ရှုသော ပြည်သူများ မရှိသလောက် နည်းနေသည်ဟု ဆိုကြသည်။ စစ်ကောင်စီက ယခုကဲ့သို့ ကယားပြည်နယ်နေ့ အခမ်းအနားကို မဖြစ်မနေကျင်းပရခြင်းမှာ လွိုင်ကော်မြို့အား အပြည့်အဝ ပြန်လည် ထိန်းချုပ်နိုင်ပြီဟု ပြလိုသဖြင့် ကျင်းပခြင်းဖြစ်သည်ဟု မြို့ခံများက ဆိုသည်။ လွိုင်ကော် ဒေသခံ အမျိုးသမီးတစ်ဦးက “သူတို့ဝန်ထမ်းတွေရှိတဲ့ ကျောင်းပြခန်းလေးတွေတော့ အထဲမှာ အခန်းကျဉ်းကျဉ်းလေးထဲမှာပဲ လုပ်နေကြတယ်၊ အဲ့လိုမျိုးတော့ သူတို့လုပ်ရတယ်။ ပြခန်းလေး ဘာလေး လည်း သူတို့လုပ်ထားတယ်၊ ဟန်ဆောင်ပန်ဆောင် ရှေ့ပြပေါ့ မလုပ်မဖြစ်ပေါ့၊ ငါတို့ လူတွေစုရုံးနိုင်ပြီ အဲလို မျိုးပေါ့” ဟု ပြောသည်။ မြေပြင်အခြေနေအရ လွိုင်ကော် - ဆီဆိုင် လမ်းအား စစ်ကောင်စီဘက်မှ ထိန်းချုပ်ထားသော်လည်း ရှမ်း -ကရင်နီ နယ်စပ်တွင် ကရင်နီ တော်လှန်ရေးတပ်များနှင့် စစ်ကောင်စီတပ်တို့အကြား တိုက်ပွဲများ ဆက်လက် ဖြစ်ပွားနေသောကြောင့် လက်ရှိထွက်ပေါ်နေသည့် သတင်းများအရ စစ်ကောင်စီတပ်မှ ထိပ်ပိုင်း ခေါင်းဆောင် တစ်ဦး လာရောက်မည်ဆိုပါက လေကြောင်းမှ တစ်ဆင့်သာ လာရောက်လိမ့်မည်ဟု ဒေသခံများ က ခန့်မှန်း ပြောဆိုနေကြသည်။ လွိုင်ကော်ဒေသခံ အမျိုးသမီးက “သူတို့လာရင်လည်း သူတို့သိတယ်မို့လား ဟတ်စကီးလေးနဲ့ပဲ ခဏပဲဆင်းမှ မိုးပေါ်ကနေပဲပြန်မှာပဲ ခါတိုင်းနှစ်ဆို အဲလိုမျိုးပဲကော” ဟု ပြောသည်။ လုံခြုံရေးအရလည်း လက်နက်ကြီး ရှော့တိုက်ဒုန်းနှင့် ဒရုန်းဗုံးများ အချိန်မရွေး ကျရောက်နိုင်ပြီး ပြီးခဲ့သော ၂၀၂၄ ခုနှစ်၊ စက်တင်ဘာလ ၄ ရက်နေ့ကလည်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် လွိုင်ကော်သို့ လာရောက်စဉ် ရှော့တိုက်ဒုန်းများဖြင့် ပစ်ခတ်ခံခဲ့ရသေးသည်။ ထို့အပြင် စစ်ကောင်စီသည် လွိုင်ကော်မြို့အတွင်းရှိ ခလရ (၅၄) တပ်မှ လွိုင်လင်လေး၊ မိုးဗြဲဘက်နှင့် အနီးအနား ရှိ ကျေးရွာများသို့ လက်နက်ကြီးများဖြင့် တစ်ရက်ခြား ပစ်ခတ်နေမှုများ ရှိနေသလို ကင်းထောက် ဒရုန်းများဖြင့် လည်း ပျံသန်းစောင့်ကြည့်နေသည်ဟု လွိုင်ကော်ဒေသခံများက ပြောသည်။ ၂၀၂၄ ခုနှစ်တွင် ကျရောက်ခဲ့သည့် (၇၂) နှစ်မြောက် ကယားပြည်နယ်နေ့ အခမ်းအနားအား တိုက်ပွဲအခြေအနေ ကြောင့် ဒေသကွပ်ကဲမှု စစ်ဌာနချုပ်အတွင်း၌သာ အကျဉ်းချုပ် ပြုလုပ်နိုင်ခဲ့ပြီး ယခုနှစ်တွင် လွိုင်ကော်မြို့အား စစ်ကောင်စီမှ ပြန်လည်ထိန်းချုပ်ခဲ့ပြီးနောက် မြို့နယ်ခန်းမတွင် အခမ်းအနား ပြန်လည်ကျင်းပရန် စီစဉ်နေကြ ခြင်း ဖြစ်သည်။ အလားတူ ၂၀၂၃ ခုနှစ်ကလည်း လွိုင်ကော်မြို့၊ ပြည်နယ်ခန်းမတွင် ကျင်းပခဲ့သည့် (၇၁) နှစ်မြောက် ကယားပြည်နယ်နေ့ အခမ်းအနား ကျင်းပနေစဉ် ဒရုန်းဖြင့် တိုက်ခိုက်ခံရမှုကြောင့် တစ်ဦးသေဆုံးပြီး ရှစ်ဦး ထိခိုက်ဒဏ်ရာရရှိခဲ့သည့် ဖြစ်စဉ်များလည်း ဖြစ်ပွားခဲ့သေးသည်။

ကယားပြည်နယ်နေ့ အခန်းအနားကြောင့် လွိုင်ကော်တွင် လုံခြုံရေး တင်းကြပ်

ကယားပြည်နယ်နေ့ အခန်းအနားကြောင့် လွိုင်ကော်တွင် လုံခြုံရေး တင်းကြပ် သတင်းနှ့င် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၄ ရက်။ ဇန္နဝါရီလ ၁၅ ရက်နေ့တ…

  • January 14, 2025
ဖားကန့် နွံကန်ပြိုကျမှု အနည်းဆုံး ၂၁ ဦး သေဆုံး၊   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၁၄ ရက်။   ကချင်ပြည်၊ ဖားကန့်မြို့နယ်အတွင်းက ကျောက်စိမ်းတွင်းဟောင်း နွံကန်ပေါက်ကျမှုအတွင် သေဆုံးသွားသူများ အနက် ရုပ်အလောင်း ၂၁ လောင်း တွေ့ရှိပြီဟု ကူညီကယ်ဆယ်ရေး လုပ်နေသူများက ပြောသည်။   ဖားကန့်မြို့နယ်၊ ဆိမ့်မူ (ဆိုင်းတောင်) ကျေးရွာအုပ်စုထဲက စပေါ့ကျေးရွာတွင် ဇန္နဝါရီလ ၁၃ ရက်နေ့၊ နံနက် အစောပိုင်း ၁ နာရီအချိန်ခန့်က ကျောက်စိမ်းတွင်းဟောင်း နွံကန် ပေါက်ကျမှု ဖြစ်ပွားခဲ့သည်။   နွံကန်ပေါက်ကျမှု ဖြစ်စဉ်နှင့် ပတ်သက်၍ ဒေသခံတစ်ဦးက “ဖြစ်တာက ညအိပ်ချိန်ကြီးဆိုတော့ ဘယ်နှစ် ယောက် ဆိုတာမျိုး ပြောရခက်တယ်။ အိမ်တွေကအစ မြေကြီးအောက်ကို ရောက်သွားတဲ့ အိမ်တွေလည်း လေးငါးဆယ်ရှိတယ်။ ဒါတောင် ခန့်မှန်းပြောတာနော်။ အဲ့ထက်လည်း များနိုင်တယ်။ အလောင်းတွေကတော့ တချို့တော့ ရပြီ။ မြေကြီးအောက်ဆိုတော့ ရှာဖွေရေး လုပ်ဖို့ အရမ်းခက်တယ်။ ရသလောက်ထဲမှာ တော့ ကလေးက ၄ လောင်းပါတယ်။ ဒီနေ့မနက်ထိဆိုရင် ရထားတာ ၂၀ လောင်းရှိပြီ” ဟု ဇန္နဝါရီလ ၁၄ ရက်နေ့တွင် ပြောသည်။   ဇန္နဝါရီလ ၁၄ ရက်နေ့အထိ ရှာဖွေတွေ့ရှိထားသည့် ရုပ်အလောင်းများထဲတွင် ကလေးငယ် ၄ ဦး၏ အလောင်း များလည်း ပါရှိသည်ဟု မြေပြင်၌ ကူညီကယ်ဆယ်ရေး လုပ်နေသူများက ပြောသည်။   အဆိုပါ နွံကန်ပေါက်ကျမှုအတွင်း ဒေသခံပြည်သူများ၊ ရေမဆေးကျောက် ရှာဖွေသူများ ပေါက်ဆုံးနေပြီး အိမ် အလုံးရေ ၅၀ ထက်မနည်းလည်း မြေအောက်ရောက်သွားခဲ့သည်ဟု ဒေသခံများက ပြောသည်။   မြေပြင်တွင် ကူညီကယ်ဆယ်ရေး ဆောင်ရွက်ပေးသူနေတစ်ဦးကလည်း “သေဆုံးတာက လောလောဆယ် ခန့်မှန်းတာက တစ်ရာအထက်မှာ ရှိတယ်လို့လည်း ခန့်မှန်းနေကြတယ်။ အစုံပေါ့ ရေမဆေးတွေကော ကျောက် ဝယ် လောပန်းတွေကော‌ ဈေးသူဈေးသားတွေကော များတယ်ပေါ့။ အဲ့ဒီနားက ကျောက်ကျောလည်း ကောင်း တော့ အဲ့နားမှာ အုံကြတာလေ။ ကုမ္ပဏီ လုပ်ကွက်တွေကောပါမှာပေါ့” ဟု ပြောသည်။   ထိုနွံကန်မှာ ရတနာအဓိပတိ ကျောက်စိမ်းတူးဖော်ရေး ကုမ္ပဏီက တူးဖော်ခဲ့သည့် နွံကန်အဟောင်းနေရာ ဖြစ် သည်ဟု ဒေသခံများက ပြောသည်။ အဆိုပါ နွံကန်အဟောင်း၌ တွင်းအသစ်က မြေစာများ ပြန်ဖို့ရင်း မြေအလေး ချိန် မထိန်းနိုင်ဘဲ ယခုကဲ့သို့ ပေါက်ကျမှု ဖြစ်ပွားခဲ့ရခြင်း ဖြစ်သည်ဟု ဆိုကြသည်။   နွံကန်ပေါက်ကျမှု ဖြစ်ပွားခဲ့သည့် နေရာတွင် ကျောက်စိမ်းတူးဖော်မှုကို အလွန်အကျွံ ဆက်လက် တူးဖော်နေကြပြီး အနီးပတ်ဝန်းကျင်ရှိ လုပ်ကွက်များက မြေစာများ ဆက်တိုက်ဖို့နေကြသည်ဟု ဆိုသည်။   စပေါ့ကျေးရွာ ဒေသခံတစ်ဦးက “အဓိက ကတော့ စက်ယန္တရားကြီးတွေနဲ့ အလွန်အကျွံ တူးဖော်ကြလို့ ဖြစ်တာ ပါပဲ၊ နွံကန်ဘေးမှာ ပတ်ပတ်လည်က ကျောက်ိစမ်းကျောက မြေတွေ နွံကန်ထဲကို ဖို့လိုက်ကြတာပေါ့။ မြေစာ လည်း အဲ့ထဲပစ်ချတယ် အစက ရေကန်ပေါ့ကွာ နောက်ပိုင်း နွံကန်ဖြစ်သွားတယ်” ဟု ပြောသည်။   ယခုပေါက်ကျမှု ဖြစ်ပွားခဲ့သည့် စပေါ့ကျေးရွာရှိ နွံကန်မှာ ခန့်မှန်းခြေအားဖြင့် အကျာ် နှစ်ဧကခန့်ရှိပြီး အနက်ပေ ပေတစ်ထောင် ခန့်ရှိသည်။ ထို့အပြင် နွံကန်ပေါက်ကျမှု ဖြစ်ပွားခဲ့သည့်နေရာမှာ စစ်တပ်က အာဏာသိမ်းပြီး နောက် ကချင်လွတ်လပ်ရေးတပ်မတော် KIA က ထိန်းချုပ်ထားသည့် နေရာဖြစ်သည်။   ၂၀၂၄ ခုနှစ်၊ မတ်လ ၁၃ ရက်နေ့တွင်လည်း ဖားကန့်မြို့နယ်၊ အေးမြသာယာကျေးရွာအုပ်စုထဲက မနကျေးရွာရှိ ကျောက်စိမ်းလုပ်ကွက်ဟောင်း နွံကန်ပြိုကျမှုထဲတွင်လည်း ဒေသခံနှင့် ရေမဆေးသမား ၁၂ ဦးထက် မနည်း သေဆုံးခဲ့သေးသည်။  

ဖားကန့် နွံကန်ပြိုကျမှု အနည်းဆုံး ၂၁ ဦး သေဆုံး

ဖားကန့် နွံကန်ပြိုကျမှု အနည်းဆုံး ၂၁ ဦး သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၁၄ ရက်။  ကချင်ပြည်၊ ဖားကန့်မြို့နယ်အတွင်းက ကျောက…

  • January 14, 2025
×Close