သတင်း

လွတ်ငြိမ်းချမ်းသာခွင့်တွင် နိုင်ငံရေး အကျဉ်းသား ၃၅၀ နီးပါးသာ လွတ်မြောက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၈ ရက်။   စစ်ကောင်စီ ကြေညာသည့် နိုင်ငံရေး အကျဉ်းသား လွတ်မြောက်သည့် အရေအတွက်မှာ မြေပြင် အခြေအနေနှင့် ကွဲလွဲနေသည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ယက် (PPNM)  က ပြောသည်။   PPNM အနေဖြင့် မြန်မာနိုင်ငံတစ်ဝှမ်းရှိ အကျဉ်းထောင် ၄၀ ကျော်အား စောင့်ကြည့် စာရင်းကောက်ယူခဲ့ရာတွင် နိုင်ငံရေး အကျဉ်းသား ၂၀၈ ဦး၊ နိုင်ငံရေး အကျဉ်းသူ ၁၃၁ ဦး စုစုပေါင်း ၃၄၄ ဦးခန့်သာ လွတ်မြောက်လာ ကြ သည်ဟု ဆိုသည်။   မြန်မာနိုင်ငံတစ်ဝှမ်း ၇၇ ကြိမ်မြောက် လွတ်လပ်ရေးနေ့ အထိမ်းအမှတ်အဖြစ် စစ်ကောင်စီက အကျဉ်းသား ၅၈၆၄ ဦး အား လွတ်ငြိမ်းချမ်းသာခွင့် ပြုခဲ့သည်ဟု ၎င်းတို့ လက်အောက်ခံ မီဒီယာများတွင် ဖော်ပြထားပြီး နိုင်ငံရေး အကျဉ်းသား ၆၀၀ ကျော်ပါဝင်သည်ဟု စစ်ကောင်စီက ပြောခဲ့သည်။   ယင်းပြောကြားချက်မှာ မြေပြင်အခြေအနေနှင့် ကွဲလွဲနေသည်ဟု (PPNM) ဦးဆောင်ကော်မတီဝင်ဖြစ်သူ ကိုသိုက်ထွန်းဦးက ပြောသည်။   “မြေပြင်အခြေအနေမှာ စစ်ကောင်စီ ထိန်းချုပ်ထားတဲ့ ထောင်အများစုက လွှတ်ပေးခဲ့တာတွေ ရှိတယ်ပေါ့ နော်။ ဗန်းမော်မှာလည်း စစ်ရေးတင်းမာနေတယ်။ စစ်ကောင်စီ ထိန်းချုပ်မှုအောက်မှာ ရှိနေဆဲ ဖြစ်တယ်။ အဲမှာရှိတဲ့ နိုင်ငံရေး အကျဉ်းသားတွေလည်း လွတ်လာတာလည်း မတွေ့ရဘူး။ ပြီးတော့ စစ်တွေမှာလည်း မတွေ့ ရဘူး။ အဲတော့ မြေပြင်အခြေ အနေနဲ့တော့ မဆိုင်ဘူးထင်တယ်။ ကျနော်တို့ ပြောလို့ရတာကတော့ ၅၀၅ ပုဒ်မ တွေ သူတို့ဆီမှာ ရှိတဲ့စာရင်းတွေကို ထည့်တွက်ထားသလားဆိုတာတော့ စစ်ကောင်စီကို မေးခွန်း ပြန်ထုတ်ရမှာ ဖြစ်တယ်။ ဒါပေမယ့် ဒီလိုမျိုး မေးခွန်းထုတ်လိုက်ခြင်း အားဖြင့် သူတို့တွေရဲ့ မှားယွင်းမှုကို ဒီဖက်ကိုလည်း ရောချ နိုင်တယ်ပေါ့နော်။ ကလိန်ဉာဏ်ဆင်ပြီး ပြန်ပြောတာမျိုးလည်း ဖြစ်နိုင်ပါတယ်။”   ထို့အပြင် စစ်ကောင်စီ၏ လွတ်ငြိမ်းချမ်းသာခွင့်ပေးသည့် ထုတ်ပြန်ချက်ထဲတွင်လည်း တစ်သက်တစ်ကျွန်း ပြစ်ဒဏ်ကျခံရမည့် အကျဉ်းသား/သူ ၁၄၄ ဦးကိုလည်း ထောင်ဒဏ် ၁၅ နှစ်သို့ ပြောင်းလဲကျခံရမည်ဟု ပါရှိပြီး ၎င်းတို့မှာ မည်သူမည်ဝါ ဖြစ်သည်ဟု ဖော်ပြမထားသဖြင့် ဆက်လက်စောင့်ကြည့် စစ်ဆေးသွားမည်ဟု ကိုသိုက်ထွန်းဦးက ပြောသည်။   “နိုင်ငံရေး အကျဉ်းသား အများစုက လွတ်ရက် နီးတဲ့သူတွေလို့ ပြောချင်ပါတယ်။ ကျနော်တို့ နိုင်ငံရေး အကျဉ်း သားတွေ ထပ်သိရရင်လည်း ထုတ်ပြန်ချက်မှာပဲ Update ထည့်သွားဖို့ပါပဲ။ အဓိကအားဖြင့်တော့ မှတ်တမ်း မှတ်ရာတွေ ကျန်ရှိစေချင်တဲ့ဆန္ဒ ဖြစ်ပါတယ်။ နောက်တချက်က စစ်ကောင်စီရဲ့ လိမ်လည်မှုတွေကို ကျနော်တို့ အနေ နဲ့ ဖော်ထုတ်နိုင်ဖို့ ရည်ရွယ်ခဲ့တာ ဖြစ်တဲ့အတွက် ကျနော်တို့ ဒီစာရင်းတွေဟာ အရေအတွက်အားဖြင့်ပဲ ပြု စုနိုင်သေးတာ ဖြစ်တယ်။ နာမည်အသေးစိတ်တွေကအစ ပြုစုဖို့ကြတော့ ဒီကာလ အရမ်းခက်ခဲတယ်ပေါ့။ ဒါ ပေမယ့် ဘယ်လောက် လွတ်လာတယ်၊ ဘယ်လောက်ကျန်သေးတယ် ဆိုတာကိုတော့ ခန့်မှန်းတွက်ချက်နိင်ရေး အတွက် ကြိုးစားဆောင်ရွက်နေပါတယ်။”   ယခင်နှစ် လွတ်ငြိမ်းချမ်းသာခွင့်ပေးသည့် ရက်များတွင်လည်း လွတ်ငြိမ်းစာရင်း ပါရှိသည့် နိုင်ကျဉ်းများအား ထောင်အာဏာပိုင်များက အခြား ရာဇဝတ် အကျဉ်းသားများဖြင့် စောင့်ကြည့်ခိုင်းခြင်း၊ သတင်းပို့ခိုင်းခြင်း၊ ပြဿနာများ ဖန်တီး၍ တိုက်ပိတ်ခြင်းများ ပြုလုပ်ဖူးသဖြင့် အလားတူ ဖြစ်ရပ်များ ထပ်မံကြုံရမည်ကို စိုးရိမ်ရ သည်ဟု နိုင်ကျဉ်းဟောင်းများက ဆိုသည်။   စစ်ကောင်စီ၏ လွတ်ငြိမ်းချမ်းသာခွင့်တွင် ထောင် ၄၀ ကျော်အနက် ရွှေဘို၊ အိုးဘို၊ မြင်းခြံ၊ ပြည်၊ မအူပင်၊ တောင်ငူ၊ ပခုက္ကူ၊ အင်းစိန်၊ ဟင်္သာတ၊ ကလေး၊ မကွေး၊ ပေါင်းတည်၊ မိတ္တီလာ၊ ဒိုက်ဦး၊ မိုးညှင်း၊ သာယာဝတီ စသည့်ထောင်ပေါင်း ၁၆ ခုသာ ပါဝင်ခဲ့ပြီး ကျန်သည့်ထောင်များတွင် နိုင်ကျဉ်း တစ်ဦးတစ်ယောက်မျှ မပါဝင်ခဲ့ ဟု PPNM က ကောက်ယူရရှိခဲ့သည့် စာရင်းများအရ သိရသည်။   လွတ်ငြိမ်းချမ်းသာခွင့် ပြုရာ၌လည်း အကျဉ်သားများအား နောက်တစ်ကြိမ် ပြစ်မှုထပ်မံ ကျူးလွန်ပါက ယခင် ပြစ်ဒဏ်ကိုပါ တပေါင်းတစည်းတည်း ကျခံရမည်ဆိုသည့် ကန့်သတ်ချက်နှင့် ပြန်လွှတ်ပေးခဲ့ခြင်း ဖြစ်သည်။

လွတ်ငြိမ်းချမ်းသာခွင့်တွင် နိုင်ငံရေး အကျဉ်းသား ၃၅၀ နီးပါးသာ လွတ်မြောက်

လွတ်ငြိမ်းချမ်းသာခွင့်တွင် နိုင်ငံရေး အကျဉ်းသား ၃၅၀ နီးပါးသာ လွတ်မြောက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၈ ရက်။  စစ်ကောင်စီ ကြေည…

  • January 8, 2025
မံစီမြို့ကို KIA သိမ်းပိုက် ထိန်းချုပ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၈ ရက်။   ကချင်ပြည်၊ မံစီမြို့ရှိ လက်ကျန်စခန်းများကို ကချင်လွတ်လပ်ရေး တပ်မတော် KIA နှင့် ပူးပေါင်းအဖွဲ့တို့က သိမ်းယူပြီးနောက် ဇန္နဝါရီလ ၈ ရက်နေ့တွင် မြို့အားအပြီး သိမ်းပိုက်လိုက်ပြီ ဖြစ်သည်။   တစ်ကျော့ပြန် ထိုးစစ်တစ်လကျော် အကြာ  ဇန္နဝါရီလ ၈ ရက်နေ့၊ နံနက် ၁၁ နာရီအချိန်တွင် မံစီမြို့ကို အပြီး သိမ်းပိုက်လိုက်ပြီ ဖြစ်ကြောင်း မြေပြင်က သတင်းပို့လာသည်ဟု KIO သတင်းနှင့် ပြန်ကြားရေး တာဝန်ခံ ဗိုလ်မှူးကြီးနော်ဘူက ပြောသည်။   “ဟုတ်ကဲ့ပါ confirm ဖြစ်ပါပြီ။ မံဂျယ်(မံစီ)က ခမရ ၃၁၉၊ ၆၀၁ ရယ်၊ ဟိုအမတ ၅၂၃ ရယ်ပေါ့နော် confirm ဖြစ်ပါပြီ၊ ၁၁ နာရီ ဝန်းကျင်မှာ။ အားလုံးပါတယ်၊ တိုင်းရင်းသား လက်နက်ကိုင်တွေ၊ တော်လှန်ရေး အဖွဲ့တွေ ခါတိုင်းလိုပဲ အားလုံးပါပြီး သိမ်းတာပါ။ အားလုံးကြားသိရတဲ့အတိုင်း ဒီဇင်ဘာလ ၄ ရက်နေ့ကနေ ဗန်းမော်၊ မံစီဘက်ကို တကျော့ပြန်ပြီးမှ တိုက်ပွဲဖော်ဆောင်တာ၊ ဒီနေ့မှရတာဆိုတော့ တစ်လကျော်တာပေါ့ နော်။”   KIA နှင့် တော်လှန်ရေး ပူးပေါင်းတပ်တို့သည် ၂၀၂၄ ခုနှစ်၊ ဒီဇင်ဘာလ ၄ ရက်နေ့မှ စတင်ပြီး ဗန်းမော်မြို့နှင့် မံစီမြို့တို့ကို တစ်ပြိုင်နက်တည်း ထိုးစစ်ဆင်ခဲ့ပြီးနောက် ၂၀၂၅ ခုနှစ်၊ ဇန္နဝါရီလ ၈ ရက်နေ့ တစ်လကျော် အကြာ တွင် မံစီမြို့ကို အပြီး တိုက်ခိုက်သိမ်းပိုက်နိုင်လိုက်ခြင်း ဖြစ်သည်။   မံစီမြို့အခြေစိုက် စစ်ကောင်စီ၏ နောက်ဆုံးလက်ကျန် တပ်ရင်းများဖြစ်သည့် ခမရ ၆၀၁၊ ခမရ ၃၁၉ နှင့် အမြောက်တပ် ၅၂၃ တပ်ရင်းဌာနချုပ်တို့ကို ကချင်လွတ်လပ်ရေး တပ်မတော် KIA နှင့် တော်လှန်ရေး ပူးပေါင်း တပ်တို့က တိုက်ခိုက်သိမ်းပိုက်လိုက်ပြီးနောက် မြို့ကို ထိန်းချုပ်ထားလိုက်ပြီ ဖြစ်သည်။   မြို့ကို သိမ်းပိုက်ပြီ ဖြစ်သော်လည်း လက်ရှိတွင် ပြည်သူများ နေရပ်ပြန်ရန် မဖြစ်နိုင်သေးသည့်အပြင် ထွက် ပြေးနေသည့် စစ်ကောင်စီတပ်သားများကိုလည်း KIA နှင့် ပူးပေါင်းတပ်တို့က လိုက်လံချေမှုန်းနေသောကြောင့် တိုက်ပွဲများ ဆက်ရှိနေသေးသည်ဟု ဆိုသည်။   ဗိုလ်မှူးကြီးနော်ဘူ “ကျနော်တို့ အခု မံစီဘက်က စခန်းတွေက သိမ်းလို့ရပါပြီ။ ကျနော်တော့ ဖြည်းဖြည်း ဖြည်း ဖြည်းနဲ့ ပြည်သူလူထု လည်း ကိုယ့်ရဲ့ အိမ်တွေကို ရွာတွေကို ပြန်လို့ရမှာပါ။ ဒါပေမယ့် အခုလောလောဆယ်က တော့ မရသေးဘူး။ တပ်စန်းတွေ သိမ်းတာနဲ့တော့ ပြည်သူလူထုတွေ ပြန်ဝင်လို့ မရသေးဘူး။ အခုက စစ်တလင်း ဖြစ်နေတာ။ အချိန် ကတော့ ယူရမယ်။ စောင့်ရမယ်။ အခုလိုမျိုး သိမ်းနိုင်တာက အားလုံးဝိုင်းဝန်း ကြိုးစားပြီးမှ အားလုံးရဲ့ အောင်ပွဲဖြစ်ပါတယ်” ဟု ပြောသည်။   မံစီမြို့အပြင် ဗန်းမော်မြို့တွင်လည်း နှစ်ဖက်ကြား တိုက်ပွဲများ ဆက်လက်ပြင်းထန်နေပြီး ပြည်သူများမှာမူ ဘေးလွှတ်ရာသို့ ထွက်ပြေးတိမ်းရှောင်နေကြသည့် အပြင် အချို့မှာ မြို့တွင်း၌ ပိတ်မိနေကြသည်။   မံစီမြို့သိမ်း တိုက်ပွဲအတွင်း စစ်ကောင်စီဘက်က လေကြောင်းမှ ဗုံးကြဲတိုက်ခိုက်ခြင်း၊ လက်နက်ကြီး ပစ်ကူပေးခြင်းနှင့် ဒရုန်းအသုံးပြု တိုက်ခိုက်ခြင်းများ ဆက်တိုက်ပြုလုပ်နေပြီး အမြောက်တပ် အမတ-၅၂၃ မှ လက်နက်ကြီးများဖြင့် ပစ်ခတ်တိုက်ခိုက်မှုများကြားမှ ယခုကဲ့သို့ သိမ်းယူနိုင်ခဲ့ခြင်း ဖြစ်သည်။   မံစီမြို့သည် ဗန်းမော်-မန္တလေး ကားလမ်းပေါ်က မြို့ဖြစ်ပြီး စစ်ရေးအရ ဗန်းမော်မြို့ကို လုံခြုံရေးယူထားပေး သည့် တပ်ရင်းများ ရှိနေသည့် မြို့ဖြစ်သည်။ မံစီမြို့ကို ၂၀၂၄ ခုနှစ်၊ မေလတွင် KIA က စတင်ထိုးစစ်ဆင်ခဲ့ချိန် မြို့ကို တစ်စုံတစ်ရာ ထိန်းချုပ်ထားနိုင်ခဲ့ပြီးနောက် ယနေ့တွင် မြို့၌ ကျန်နေသည့် တပ်ရင်းစခန်းများကို အပြတ်ချေမှုန်း တိုက်ခိုက်သိမ်းယူလိုက်ခြင်း ဖြစ်သည်။

မံစီမြို့ကို KIA သိမ်းပိုက် ထိန်းချုပ်

မံစီမြို့ကို KIA သိမ်းပိုက် ထိန်းချုပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၈ ရက်။  ကချင်ပြည်၊ မံစီမြို့ရှိ လက်ကျန်စခန်းများကို ကချင…

  • January 8, 2025
မြိတ်တွင် ရာအိမ်မှူး တစ်ဦး သတ်ခံရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   မြိတ်ခရိုင်၊ မြိတ်မြို့နယ်၊ သကန်တောင်ပုကျေးရွာတွင် ရာအိမ်မှူးတစ်ဦး ပစ်သတ်ခံခဲ့ရသည်ဟု ရွာသားများက ပြောသည်။   ရာအိမ်မှူး ဦးကျော်ဒင်၏ အိမ်သို့ ရောက်ရှိလာသည့် လူသုံးဦးက နေအိမ်အရှေ့တွင် သေနတ်ဖြင့် ပစ်သတ်သွားခဲ့ ခြင်း ဖြစ်သည်။   အသက် ၄၀ ခန့်အရွယ် ရွာသားတစ်ဦးက “ဦးကျော်ဒင်က အိမ်အပေါ်ထပ်မှာ အိပ်နေတာကို နာမည်ခေါ်ပြီးနိုး တယ်။ ပြီးမှ အိမ်အပြင်ကို ခေါ်ထုတ်တာ။ သူ့သားပါ ထွက်လိုက်လာလို့ အိမ်ထဲ ပြန်ဝင်ခိုင်းလိုက်တယ်၊ ပြီး တော့မှ နောက်ကျောဘက် ဦးခေါင်းကို သေနတ်နဲ့ပစ်သတ်တာ” ဟု ပြောသည်။   သကန်တောင်ပုကျေးရွာက ရာအိမ်မှူး ဦးကျော်ဒင်မှာ ဇန္နဝါရီလ ၄ ရက်နေ့ ည ၁၁ နာရီအချိန်ခန့်က ပစ်သတ် ခံလိုက်ရခြင်း ဖြစ်သည်။   သတ်ဖြတ်ခံရသူ ရာအိမ်မှူး ဦးကျော်ဒင်မှာ အသက် ၇၀ ကျော်အရွယ်ဖြစ်ပြီး စစ်တပ်နှင့် နီးစပ်သူတစ်ဦးလည်း ဖြစ်သည်ဟု ရွာသားများက ဆိုသည်။   စစ်ကောင်စီက တပ်စွဲထားတဲ့ ရွှေကြက်ယက် ဘုရားတောင်နှင့် သကန်တောင်ပုကျေးရွာ ရာအိမ်မှူး ဦးကျော်ဒင် ၏ နေအိမ်မှာ ဓါတ်တိုင် ၂တိုင်ကျော်ခန့်သာ ကွာဝေးသည်ဟု ရွာသားတစ်ဦးက ဆိုသည်။   ဦးကျော်ဒင် အသတ်ခံရပြီးသည့်နောက် ဇန္နဝါရီလ ၅ ရက်နေ့ နံနက်အစောပိုင်းတွင် စစ်ကောင်စီတပ်ဖွဲ့ဝင် ၇ ဦး ခန့် ရောက်ရှိလာပြီး အနီးမှ နေအိမ်များကို စစ်ဆေးမေးမြန်းမှုများ ပြုလုပ်ခဲ့သည်ဟု ရွာသားများက ပြောသည်။   ဇန္နဝါရီလ ၄ ရက်နေ့၊ ည ၇နာရီ အချိန်ခန့်ကလည်း မြိတ်မြို့နယ်၊ လသာကျေးရွာရှိ ဘုရားတောင်ပေါ်တွင် တပ်စွဲ ထားသည့် စစ်ကောင်စီတပ်ဖွဲ့မှ ဆိုင်ကယ်ဖြင့် ဖြတ်သန်းသွားလာသူ တစ်ဦးကို သေနတ်နှင့် ပစ်ခတ်ခဲ့ရာ ပွဲချင်း ပြီး သေဆုံးသွားကြောင်း လသာရွာသားများက ဆိုသည်။   အဆိုပါ ပစ်သတ်ခံရသည့် အမျိုးသားမှာ အသက် ၄၀ ခန့် အရွယ်ရှိကာ မြိတ်မြို့နယ်၊ ဘုတ်ချောင်းကျေးရွာမှဖြစ် ပြီး တုံးဗျောကြီးကျေးရွာဘက်မှ လသာကျေးရွာဘက်သို့ ဆိုင်ကယ်နှင့် မောင်းနှင်လာစဥ် ပစ်ခတ်ခံရခြင်း ဖြစ် သည်။   စစ်ကောင်စီတပ်ဖွဲ့မှ ပစ်သတ်ခဲ့သည့် ဘုတ်ချောင်းကျေးရွာမှ အမျိုးသားဖြစ်သူ၏ အလောင်းကိုမူ မြိတ်မြို့သို့ ညတွင်းချင်း သယ်ယူသွားကြသည်ဟု လသာရွာသားများက ပြောသည်။

မြိတ်တွင် ရာအိမ်မှူး တစ်ဦး သတ်ခံရ

မြိတ်တွင် ရာအိမ်မှူး တစ်ဦး သတ်ခံရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  မြိတ်ခရိုင်၊ မြိတ်မြို့နယ်၊ သကန်တောင်ပုကျေးရွာတွင် ရာ…

  • January 8, 2025
ရေတပ်သင်္ဘောကြီးများဖြင့် ပင်လယ်ပြင် စစ်ဆေးရေး လုပ်ဆောင်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၈ ရက်။   ထားဝယ်ခရိုင်၊ လောင်းလုံးမြို့နယ် အနောက်ဘက်ရှိ ပင်လယ်ပြင်တွင် စစ်ကောင်စီက သင်္ဘောကြီး နှစ်စီးဖြင့် ရေကြောင်း စစ်ဆေးရေးကို တင်းကျပ်စွာ လုပ်နေသည်ဟု အနီးဝန်းကျင်ရှိ ရွာသားများက ပြောသည်။   ကမ်းဝေးတွင် ယခင်က ကင်းလှည့်သွားလာနေသည့် စစ်ကောင်စီ သင်္ဘောနှစ်စီးက ၂၀၂၄ ခုနှစ်၊ ဒီဇင်ဘာလ အတွင်း၌ ကမ်းရိုးတန်းအနီးထိ ဝင်ရောက်လာပြီး လှေကြီး၊ လှေငယ်အားလုံးကို အစစ်အဆေး တင်းကျပ်နေခြင်း ဖြစ်သည်။   အသက် ၅၀ အရွယ် တံငါလုပ်ငန်း လုပ်ကိုင်နေသည့် တီဇစ်ရွာသားတစ်ဦးက “သင်္ဘောပေါ်ကနေ မှန်နဲ့ထိုးပြီး တော့လည်း ခေါ်တယ်။ စစ်သား လေးငါးယောက်ပါတဲ့ ဂျွန်ဆင်လှေနဲ့လည်း ကင်းလှည့်ရာကနေပြီး ခေါ်တယ်။ တခါတလေ လှေတွေဆီကို သွားကပ်ပြီးတော့လည်း စစ်ဆေးရှာဖွေသေး တယ်။ ဘယ်ရွာကလည်းဆိုတာ မေး တယ်။ PDF အကြောင်းကို အဓိကမေးတယ်” ဟု ပြောသည်။   ခေါ်ယူခဲ့ရာတွင် မလာသည့် လှေများကိုမူ သေနတ်ဖြင့် ခြိမ်းခြောက်ပစ်ခတ်ပြီး ခေါ်ယူတာမျိုးလည်း ရှိနေသည် ဟု တီဇစ်ရွာသားများက ဆိုသည်။   ဇန္နဝါရီလ ပထမအထိ လောင်းလုံးမြို့နယ်ထဲက တီဇစ်ကျေးရွာ အနောက်ဘက်တွင် အမှတ် - ၅၆၅ စစ်သင်္ဘော တစ်စီးနှင့် စစ်ကောင်စီ၏ ဂျွန်ဆင် လှေတစ်စီး ပုံမှန်ကင်းလှည့်နေပြီး ထော့နန်းကျေးရွာ အနောက်ဘက်တွင် လည်း  နောက်ထပ် စစ်သင်္ဘောတစ်စီး ရှိနေသည်ဟု ရွာသားများက ဆိုသည်။   စစ်ကောင်စီ၏ ဝါဒဖြန့် ချန်နယ်များတွင်လည်း တီဇစ်ကျေးရွာနှင့် ပညစ်ကျေးရွာတို့ အပါအဝင် လောင်းလုံးမြို့ နယ် အတွင်းက ဆိပ်ကမ်းအချို့ကို ပြည်သူ့ကာကွယ်ရေးတပ်များ အသုံးပြုနေသည်ဟု ဒီဇင်ဘာလမှ စတင်ပြီး လှုံဆော်ရေးသားမှုများ ရှိနေသည်။   စစ်ကောင်စီတပ်ဖွဲ့က ရေကြောင်းမှ အစစ်အဆေး တင်းကျပ်လာခြင်းကြောင့် လုံခြုံရေးနှင့် ပတ်သက်ပြီး တံငါလုပ်ကိုင်သည့် ရွာသားများက စိုးရိမ်နေကြသည်။   တံငါရွာလေးတစ်ရွာဖြစ်သည့် တီဇစ်ကျေးရွာတွင် တီဇစ်ကမ်းခြေနှင့် ဖိုးလမော်ကမ်းခြေဟူ၍ ကမ်းခြေနှစ်ခုရှိပြီး ရွာသားများ၏ အဓိက အသက်မွေးဝမ်းကျောင်း လုပ်ငန်းမှာ ငါးဖမ်းလုပ်ငန်း ဖြစ်သည်။   လက်ရှိတွင် စစ်တပ်၏ စစ်ဆေးမှုများ တင်းကျပ်လာသောကြောင့် ၎င်းတို့၏ အသက်မွေးဝမ်းကျောင်း လုပ်ငန်းအား ထိခိုက်လာမည်ကို စိုးရိမ်နေကြသည်။   PDF များနှင့် သက်ဆိုင်သည့် သတင်းများကို ရယူချင်သောကြောင့် စစ်ကောင်စီမှ ယခုကဲ့သို့ လုပ်နေကြခြင်း ဖြစ်သည်ဟု လောင်းလုံးမြို့နယ် ပြည်သူ့ကာကွယ်ရေးအဖွဲ့၏ တာဝန်ရှိသူတစ်ဦးက ပြောသည်။   အလားတူ ပြီးခဲ့သည့် ၂၀၂၂ နှစ်ကုန်ပိုင်းကလည်း ကျွန်းစုမြို့နယ်နှင့် ပုလောမြို့နယ်ရှိ ပင်လယ်ပြင်များတွင် ရေကြောင်း စစ်ဆေးမှုများကို တင်းကျပ်စွာ ပြုလုပ်ခဲ့ဖူးသည်။

ရေတပ်သင်္ဘောကြီးများဖြင့် ပင်လယ်ပြင် စစ်ဆေးရေး လုပ်ဆောင်

ရေတပ်သင်္ဘောကြီးများဖြင့် ပင်လယ်ပြင် စစ်ဆေးရေး လုပ်ဆောင် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၈ ရက်။ ထားဝယ်ခရိုင်၊ လောင်းလုံးမြို့နယ…

  • January 8, 2025
ကရင်နီရှိ စစ်ကောင်စီ စခန်းများအားလုံး ယခုနှစ်အတွင်း အပြီး သိမ်းပိုက်မည်ဟု KNDF ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   ကရင်နီပြည်ရှိ စစ်ကောင်စီတပ်စခန်း အားလုံးကို ယခုနှစ်ထဲ အပြီးပြတ် သိမ်းပိုက်နိုင်ရန် လုပ်ဆောင် သွားမည် ဟု ကရင်နီပြည် ကြားကာလ အုပ်ချုပ်ရေးကောင်စီ IEC ဒု ဥက္ကဋ္ဌ နှင့် ကရင်နီအမျိုးသားများ ကာကွယ်ရေးတပ်  KNDF ဥက္ကဋ္ဌလည်းဖြစ်သူ ခွန်းဘီထူးက ပြောသည်။   ၂၀၂၅ ခုနှစ်ထဲ ကရင်နီပြည်နယ်ရှိ စစ်ကောင်စီတပ်စခန်း အားလုံးကို အပြီးသတ်သိမ်းပိုက်နိုင်ရန် ကြိုးစား လုပ် ဆောင်သွားကြမည်ဟု ခွန်းဘီထူးက ဇန္နဝါရီလ ၁ ရက်နေ့ နှစ်သစ်ကူး မိန့်ခွန်းတွင် ထည့်သွင်း ပြောကြား ခဲ့သည်။   ခွန်းဘီထူးက “နှစ်သစ်တွေတိုင်းမှာ ကျနော်တို့ သံန္ဓိဌာန် အသီးသီးတွေ ချကြတဲ့ထဲမှာပေါ့နော်။ ကျနော်တို့ အတွက်ဆိုရင် အရှင်းလင်းဆုံးချရမဲ့ သံန္ဓိဌာန်က ထမ်းဆောင်ရမယ့် တာဝန်ဝတ္တရားကတော့ တော်လှန်ရေး တာဝန် တွေပဲ ဖြစ်တယ် ပေါ့နော်။ ကျနော်တို့ ၂၀၂၅ ထဲမှာ ကရင်နီပြည်မှာ ဆိုရင်တော့ စခန်းတွေကို အပြတ် သိမ်းနိုင်ဖို့ အတွက် ကျနော်တို့ လုပ်ပါ့မယ်” ဟု ပြောသည်။   ကရင်နီအမျိုးသားများ ကာကွယ်ရေးတပ် KNDF အနေဖြင့် ၂၀၂၅ ခုနှစ်အတွင်း အောင်ပွဲများ ရရှိနိုင်ရန် ပြင်ဆင် နေပြီဟု ခွန်းဘီထူး က ဆက်ပြောသည်။   “ကျနော်တို့ အနေနဲ့ ဒီ ၂၀၂၅မှာ ကျနော်တို့ရဲ့အောင်ပွဲတွေကို ပိုဆွတ်ယူနိုင်ဖို့အတွက် ကျနော်တို့ ပြင်နေတယ်။ အဲ့ဒီအတွက်ကို ကျနော့် အနေနဲ့လည်း confident လုံးဝ ရှိလာတယ်ပေါ့နော်။“   ကရင်နီပြည်ရှိ စစ်ကောင်စီ တပ်စခန်းအားလုံးကို ယခုနှစ်ထဲ အပြီးပြတ် သိမ်းပိုက်နိုင်ရန် မိဘနှင့် ပြည်သူလူထု အားလုံး၏ အားပေး ထောက်ပံ့မှုများသည် အဓိက ကျသည် ဟု KNDF ဥက္ကဋ္ဌ ခွန်းဘီထူးက ယခုကဲ့သို့ ပြော သည်။   ၎င်း က “အားပေးမှုတွေက မိဘတွေရဲ့ အားပေးမှုမပါဘဲနဲ့ ပြည်သူတွေရဲ့ ထောက်ပံ့မှု မပါဘဲနဲ့ ကျနော်တို့ လုပ် နိုင်မှာ မဟုတ်ဘူးပေါ့နော်။ ဒါကြောင့်မို့လို့ လက်ရှိ စခန်းသိမ်းတဲ့ဟာတွေကို ၂၀၂၅ ထဲမှာ အပြီးပြတ်လုပ်နိုင်ဖို့ အတွက်ကို ကျနော်တို့ ကြိုးစားမယ် ဆိုတာကိုလည်း ပြောပြလိုပါတယ်” ဟု ပြောသည်။   ကရင်နီပြည်အတွင်း ၂၀၂၃ ခုနှစ်ထဲ လွိုင်ကော်မြို့သိမ်း တိုက်ပွဲဖြစ်သည့် တစ်လေးလုံး စစ်ဆင်ရေး အတွင်း ကရင်နီ တော်လှန်ရေး ပူးပေါင်းတပ်များသည် အားတက်သရော ပါဝင်ခဲ့ကြပြီး ၂၀၂၄ ခုနှစ်မှ စတင်၍ တိုက်ပွဲအရှိန် အနည်းငယ်လျော့သွားခဲ့သည်ဟု ခွန်းဘီထူးက ပြောသည်။   လက်ရှိကာလတွင် ကရင်နီတော်လှန်ရေးတပ်များ အနေဖြင့် စစ်ကောင်စီ၏ ထိုးစစ်များကို စောင့်ကြည့်နေသည် ဟု ခွန်းဘီထူးက ဆိုသည်။   စစ်ကောင်စီတပ်သည် တော်လှန်ရေးတပ်ဖွဲ့များ ထိန်းချုပ်ထားသည့် နယ်မြေများကို ပြန်လည် တိုက်ယူနိုင်ရန် တပ်သားသစ်များ အတင်းအဓမ္မ စုဆောင်းခြင်း၊ မြေပြင်ထိုးစစ်များဆင်ခြင်း၊ စစ်အင်အားတိုးချဲ့ခြင်းများ အပြင်း အထန် လုပ်နေသော်လည်း အောင်မြင်မှုမရရှိကြောင်း ခွန်းဘီထူးက ပြောသည်။   လက်ရှိအချိန်ထိ ယိုင်နဲ့နေပြီ ဖြစ်သော်လည်း မပြိုလဲသေးသည့် စစ်အာဏာရှင်စနစ်ကို အဆုံးသတ်စေရန် အမြန် ဆုံး ဆက်လက် လုပ်ဆောင် ကြိုးစားသွားကြမည် ဟု ခွန်းဘီထူးက ဆိုသည်။

ကရင်နီရှိ စစ်ကောင်စီ စခန်းများအားလုံး ယခုနှစ်အတွင်း အပြီး သိမ်းပိုက်မည်ဟု KNDF ပြော

ကရင်နီရှိ စစ်ကောင်စီ စခန်းများအားလုံး ယခုနှစ်အတွင်း အပြီး သိမ်းပိုက်မည်ဟု KNDF ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၈ ရက်။  ကရင…

  • January 8, 2025
ပုသိမ်တွင် ကုန်တင်ကားများ မဲနှိုက်ပြီး ချောလိုက်နေရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   ဧရာဝတီတိုင်း၊ ပုသိမ်မြို့တွင် စစ်ကောင်စီက ကုန်တင်ကားပိုင်ရှင်များကို အစည်းအဝေး‌ခေါ်ကာ ချောလိုက်ရမည့် ကုန်တင်ကားများကို မဲနှိုက်ရွေးချယ်ရန် ဆုံးဖြတ်ခဲ့ကြသည်ဟု အုပ်ချုပ်ရေးအဖွဲ့နှင့် နီးစပ်သူများက ပြောသည်။   ကုန်တင်ယာဉ် ပိုင်ရှင်များက ဆုံးရှုံးမှုများလွန်းသဖြင့် ချောကားလိုက်ရန် ငြင်းဆန်ကြရာ တိုင်းစစ်ကောင်စီက ဇန္နဝါရီလ ၂ ရက်နေ့တွင် ကုန်တင်ယာဉ်များ ပြေးဆွဲခွင့်ကို ပိတ်လိုက်သည်ဟု ယာဉ်မောင်းအချို့က ပြောသည်။   ယာဉ်ပိုင်ရှင်တစ်ဦးက “ထွက်ခွင့်ပိတ်ပြီး အကျပ်ကိုင်တာပေါ့ဗျာ။ မလိုက်လျောရင် ဒါ့ထက်ပြင်းထန်တဲ့ နောက် ထပ် တစ်မျိုးမျိုးနဲ့ ရစ်ဦးမှာပဲ။ ဒါ့ကြောင့် မဲနှိုက်ပြီး ပေါက်သူ လိုက်ဆိုပြီး သဘောတူလိုက်ကြရတာ” ဟု ပြော သည်။   ပုသိမ်မြို့မှ ကုန်တင်ကား ၅ စီးကို စစ်ကောင်စီက ချောကားအဖြစ် အသုံးပြုခဲ့ရာ တစ်စီး‌မှာ ချောက်ထဲကျကာ တစ်စီးမိုင်းထိခဲ့ပြီး တစ်စီးမှာ တာယာ ၄ လုံး သစ်ငုတ်ထိုးခံရသဖြင့် ပျက်စီးဆုံးရှုံးမှု ကြီးမားခဲ့ရကြောင်း ကုန်တင်ယာဉ်ပိုင်ရှင် အချို့က ပြောသည်။   ကုန်တင်ယာဉ် ပိုင်ရှင်များနှင့် နီးစပ်သူတစ်ဦးက “ချောက်ထဲကျသွားတဲ့ ယာဉ်မောင်းက ဆေးရုံမှာ အခြေအနေ မကောင်းဘူး။ သေဖို့ကများတယ်။ ချောက်ထဲက ကားကိုလည်း အခုထိ ဆွဲမတင်နိုင်သေးဘူး။ တိုက်ပွဲ ဧရိယာ ထဲမှာလေ” ဟု ပြောသည်။   ထိုသို့သော ပျက်စီးဆုံးရှုံးမှုများအပြင် လူထိခိုက်မှုများနှင့် တိုက်ပွဲများ၊ စစ်ရေးပဋိပက္ခများကြား ပိတ်မိနိုင်သည့် အနေအထားများ၊ နှစ်ဖက်လက်နက်ကိုင်ကြား ကြားညှပ်နိုင်သည့် အနေအထားများကြောင့် ချောကားလိုက်ရန် အားလုံးက ငြင်းဆန်နေကြခြင်း ဖြစ်သည်။   ထို့အပြင် ချောကားလိုက်ရန် မဲပေါက်ထားသူက အကြောင်းတစ်ခုခုကြောင့် ယာဉ်ပေးရန် ပျက်ကွက်ပါက စစ်ကောင်စီအား ကျပ် ၂၅ သိန်းကို လျော်ကြေးအဖြစ် ပေးရမည်ဟု ခံဝန်ထိုးထားကြရသေးသည်ဟု ကုန်တင် ယာဉ် ပိုင်ရှင်များက ပြောသည်။   အချို့ ကုန်တင်ယာဉ်မောင်းများမှာ အသက်အန္တရာယ်ပိုင်း ထိခိုက်လာသည့်အတွက် အလုပ်မှ ထွက်လိုက်ကြသူ များပင် ရှိနေပြီဟု ဆိုကြသည်။   ကုန်တင်ယာဉ်မောင်းတစ်ဦးက “ကိုယ်မောင်းတဲ့ကား မဲပေါက်မှ မလိုက်နိုင်ဘူးလို့ ငြင်းဖို့က မလွယ်နိုင်ဘူး။ ဒါ့ကြောင့် ကားမမောင်းတော့ဘူး ဆိုပြီး အလုပ်က ကြိုထွက်ခဲ့တာ။ မဖြစ်စလောက် ခေါက်ကြေးလေးနဲ့ အသက်တော့ အသေမခံနိုင်ဘူးဗျာ” ဟု ပြောသည်။   ပုသိမ်မြို့က ကုန်တင်ယာဉ်များကို စစ်ကောင်စီမှ ချောဆွဲ၍ ရခိုင်ပြည် ဂွမြို့နှင့် ပန်းတောင်း - တောင်ကုတ် လမ်းများသို့ စားနပ်ရိက္ခာ၊ ဆေးဝါးနှင့် စစ်လက်နက်ပစ္စည်းများ ပို့ဆောင်ခိုင်းခြင်း၊ ဒဏ်ရာရလူနာများနှင့် လူသေ အလောင်းများအား သယ်ဆောင်ခိုင်းနေခြင်း ဖြစ်သည်ဟု ဆိုကြသည်။   ရခိုင်ပြည်၊ ဂွမြို့နယ်နှင့် ဧရာဝတီတိုင်း၊ ရေကြည်မြို့နယ်အစပ်တွင် စစ်ကောင်စီနှင့် အာရက္ခတပ်တော်(AA) တို့ တိုက်ပွဲများ ဖြစ်ပွားနေကြောင်း စစ်ရေးသတင်းရင်းမြစ်များက ဆိုသည်။   အာရက္ခတပ်တော် AA သည် ဂွမြို့နယ်ကို ၂၀၂၄ ခုနှစ်၊ ဒီဇင်ဘာလ ၂၉ ရက်နေ့တွင် သိမ်းပိုက်ထိန်းချုပ်ပြီးနောက် ဂွ - ဧရာဝတီအစပ်ရှိ စစ်ကောင်စီ၏ စစ်ရေးဂိတ် အပါအဝင် တပ်စခန်းများကို AA  နှင့် ဒေသခံ PDF များက ထိုးစစ်ဆင်နေပြီ ဖြစ် သည်။   ဇန္နဝါရီလ ၂ ရက်နေ့တွင် ရေကြည်မြို့နယ်၊ ငသိုင်းချောင်းမြို့နှင့် ၅၇ မိုင် အကွာရှိ စစ်ကောင်စီ၏ နယ်ခြားစစ် ဆေးရေးဂိတ် ဖြစ်သည့် ဗေဒါစစ်ဆေးရေးဂိတ်ကို AA က စတင် ထိုးစစ်ဆင်ခဲ့ရာ နှစ်ဖက်ကြား တိုက်ပွဲများ ဖြစ်ပွားနေသည်။

ပုသိမ်တွင် ကုန်တင်ကားများ မဲနှိုက်ပြီး ချောလိုက်နေရ

ပုသိမ်တွင် ကုန်တင်ကားများ မဲနှိုက်ပြီး ချောလိုက်နေရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  ဧရာဝတီတိုင်း၊ ပုသိမ်မြို့တွင် စစ်ကေ…

  • January 7, 2025
တရုတ်သွားမည့် ရွှေ့ပြောင်း အလုပ်သမားများ မူဆယ်တွင် ပိတ်မိနေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   တရုတ်နိုင်ငံဘက်ခြမ်းသို့ သွားရောက် အလုပ်လုပ်ကိုင်ကြမည့် မြန်မာနိုင်ငံအနှံ့မှ ပြည်သူများ ရှမ်းမြောက်၊ မူဆယ်မြို့ တွင် ပိတ်မိနေကြသည်ဟု ဒေသခံများက ပြောသည်။   ရန်ကုန်တိုင်း၊ မန္တလေးတိုင်း၊ စစ်ကိုင်းတိုင်း၊ မကွေးတိုင်း၊ ဧရာဝတီတိုင်း၊ ရခိုင်၊ ကချင်နှင့် ရှမ်းပြည်တောင်ပိုင်း စသည့် ဒေသများမှ ပြည်သူများသည် တရုတ်နိုင်ငံတွင် အလုပ်လုပ်ရန်သွားရာ နယ်စပ်ဖြတ်ကျော်ရေး ဂိတ်များ တင်းကျပ်မှုအပြင် ပွဲစားများ၏ လိမ်လည်မှုများကြောင့် မူဆယ်မြို့ တွင် ပိတ်မိနေကြခြင်း ဖြစ်သည်။   မူဆယ် ဒေသခံတစ်ဦးက “အောက်ပိုင်းက လူတွေ အလုပ်လာရှာတာပေါ့လေ။ ဒီမူဆယ်မှာ ရောက်တော့ ချက် ချင်း ဝင်မရတော့ အဲမှာ နေရာလည်း မရှိ၊ စားစရာလည်း မရှိ၊ အဲမှာ ဒုက္ခရောက်တာပေါ့လေ။ အဲမျိုးတွေတော့ ရှိတယ်။ အဲ့ဂိတ်မှာ လူတွေ အများကြီးပဲ။ တစ်ချို့ရက်တွေဆို ထောင်ချီတောင် ရှိတယ်ပေါ့လေ” ဟု ပြော သည်။   မူဆယ်မြို့ရှိ ကောင်းမှုတုံရပ်ကွက်ထဲက (ဒေသအခေါ်) စည်ပင်ကုန်းဆိုသည့် နေရာနှင့် သိန်းသန်းချီ ကားကြီး ကွင်းနေရာအပြင် အချို့ရပ်ကွက်များရှိ ဂိုဒေါင်များတွင် အလုပ်သမားများ သောင်တင်နေကြသည်။   စည်ပင်ကုန်းဆိုသည့် နေရာရှိ အလုံပိတ်ဂိုဒေါင်တွင် လူအယောက် ၄၀၀ ခန့် ပိတ်မိနေပြီး သိန်းသန်းချီ ကားကြီး ကွင်းနေရာတွင်မူ လူအယောက် ၅၀၀ ခန့် ပိတ်မိနေသည်ဟု မူဆယ်မြို့ခံ အချို့က ပြောသည်။   မူဆယ်ရောက် ရခိုင်အမျိုးသမီးငယ် တစ်ဦးကလည်း “သူငယ်ချင်းတချို့ ခိုးလမ်းကနေ ဝင်သွားတာရှိတယ်။ ဟိုရောက်တော့ ဖမ်းခံရပြီး အဆက်အသွယ် မရဖြစ်တယ်။ ကျမတော့ မသွားရဲဘူး။ ဒီလိုပဲ စောင့်နေတယ် မူဆယ်ရောက်တာ ၄ လကျော်သွားပြီ။ ကိုယ့်မှာက ပိုက်ဆံလည်း မလောက် အဲ့လိုဖြစ်နေတာ။ ဂိတ်တွေက တော့ ဖွင့်ထားတယ် အရမ်း အစစ်အဆေးများလို့လေ၊ တချို့ကလည်း ရခိုင်ဆိုရင် ဂိတ်မှာ ပေးမဝင်ဘူး၊ အရမ်း စစ်တယ် ပြောတာလည်းရှိတယ်။ တချို့အသိဆိုရင် ပွဲစားတွေက အပြင်ပေးမထွက်ဘူး အဲ့လိုမျိုးလည်းရှိတယ်။ ကျမက ကိုယ့်ဟာကိုယ် ရောက်လာတာဆိုတော့ ပြဿနာတော့ မရှိဘူး” ဟု ပြောသည်။   တရုတ်နယ်စပ် မူဆယ်မြို့တွင် အလုပ်ပွဲစားများ၏ လိမ်လည်မှုကြောင့် တရုတ်နိုင်ငံထဲ မဝင်ရဘဲ ခြောက်လကြာ အထိ ပိတ်မိခဲ့ဖူးကြောင်း မန္တလေးမြို့က အမျိုးသားတစ်ဦးက ပြောသည်။   “ပွဲစားတွေကြောင့်လည်း ပါတယ်။ တရုတ်က အဝင် တင်းကျပ်နေလို့လည်း ပါတယ်။ ကျနော်တို့လည်း တရုတ် မှာ အလုပ် လုပ်ဖို့ တက်လာတာပါ၊ ပွဲစား မတူတာပေါ့နော်။ တချို့ ငါးလ၊ ခြောက်လ ကြာနေပါပြီ။ စားစရိတ် ချပေးတော့ မပြန်ပဲစောင့်ကြပါတယ်။ ကျနော်တို့ ပွဲစားကကျ လူတွေ ၁၀၀ ကျော်ခေါ်ထားပြီး စရောက်တုန်း က  ဆန်တစ်အိတ်၊ ဆီဗူးကြီး တစ်ဗူး၊ ကြက်ဥ ခုနှစ်ကတ် နောက်ထပ် ဆန်ခြောက်ပြည်၊ ကြက်ဥ ငါးကတ်၊ ဆီ ၅၀ သား၊ လူ ရှစ်ယောက် တစ်လတောင် စားခိုင်းတယ်” ဟု ပြောသည်။   တရုတ်နိုင်ငံသို့ အလုပ်လုပ်ရန် သွားသည့် မြန်မာနိုင်ငံသား အယောက် ငါးရာကျော် မူဆယ်မြို့တွင် ပိတ်လှောင် ခံထားရပြီး အခက်အခဲများနှင့် ကြုံနေရကြောင်း တအာင်းအမျိုးသား လွတ်မြောက်ရေးတပ်မတော် (TNLA) က ၂၀၂၄ ခုနှစ်၊ ဒီဇင်ဘာ ၂၄ ရက်နေ့တွင် ထုတ်ပြန်ထားသည်။   TNLA ၏ ထုတ်ပြန်ချက်အရ အသက် ၂၀ ကျော်အရွယ် အမျိုးသမီးများ အများဆုံး ပါဝင်ပြီး မူဆယ်မြို့က သိန်းသန်းချီကားကြီးကွင်းဂိုဒေါင်တွင် ပိတ်လှောင်ခံထားရသူများအပြင် ရပ်ကွက်အချို့က ဂိုဒေါင်များ၌လည်း ပိတ်လှောင်ခံထားရသူ အများအပြားရှိနေသည်ဟု သိရသည်။   မူဆယ်မြို့တွင် သောင်တင်နေသည့် အမျိုးသားတစ်ဦးက “ကိုယ်ဘာသာကိုယ် ရှာကြံ စားနေကြရပါတယ်။ ကျ နော်ကတော့ နေ့စား အလုပ်လေးရှိရင် လိုက်လုပ် လိုက်။ မရှိရင် မလုပ်လိုက်။ အဆောင်မှာ သိပ်မနေ ဖြစ်ပါ ဘူး။ တော်တော်များက အိမ်ကတောင်း ဘေးကချေးနေပြီး နေ နေကြရတာပါပဲ။ ကျနော်ကတော့ အိမ်က အဆင်မပြေတော့ ရှာကြံစားရပါတယ်” ဟု ပြောသည်။   ပွဲစား (အကျိုးဆောင်) များနှင့် ဆက်သွယ်၍ မူဆယ်မြို့သို့ ရောက်လာကြသူများမှာ WeChat, Tiktok, Facebook စသည့် လူမှုကွန်ရက် စာမျက်နှာများတွင် တင်ထားသည့် အလုပ်ခေါ်စာများကြောင့် ဖြစ်သည်ဟု ဆိုကြ သည်။   အဆိုပါ အလုပ်ခေါ်စာများတွင် တရုတ်နိုင်ငံ၊ ရွှေလီ၊ မန်ရှီ၊ ကူမင်း စသည့်မြို့များရှိ အလုပ်ရုံများ၊ စက်ရုံ များနှင့် အထည်ချုပ် လုပ်ငန်းများတွင် တစ်လလျှင် အနည်းယွမ် ၁၇၀၀ အထက် ရမည်ဟု ကြော်ငြာ ထားသည် ဟု ဆိုကြသည်။   မြန်မာနိုင်ငံအနှံ့မှ အလုပ်လုပ်ချင်သူများကို ပွဲစားများက တရုတ်နိုင်ငံတွင် အလုပ်ကောင်းပြီး လစာကောင်း ရမည်ဟု မက်လုံးပေး ပြောဆိုခေါ်ယူထားကာ ဂိုဒေါင်များတွင် ပိတ်လှောင်ထားသည်ဟုလည်း TNLA ၏ ဒီဇင်ဘာလ ၂၄ ရက်နေ့ ထုတ်ပြန်ချက်က ဆိုသည်။   အစားအသောက်များလည်း ပုံမှန်မကျွေးသည့်အပြင် နေရပ်ကို ပြန်လိုသူများကို ပွဲစားများက လျော်ကြေးငွေ ကျပ်သိန်း ၆၀ တောင်းနေကြောင်း ပိတ်လှောင်ခံထားရသူများထဲမှ အချို့ ထွက်ပြေးလွတ်မြောက်ခဲ့သော်လည်း ကျန်ရှိနေသူများမှာ အကူအညီမရဖြစ်နေသည်ဟု TNLA က ဆိုသည်။ (ဓါတ်ပုံ - ပုံဟောင်း)

တရုတ်သွားမည့် ရွှေ့ပြောင်း အလုပ်သမားများ မူဆယ်တွင် ပိတ်မိနေ

တရုတ်သွားမည့် ရွှေ့ပြောင်း အလုပ်သမားများ မူဆယ်တွင် ပိတ်မိနေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  တရုတ်နိုင်ငံဘက်ခြမ်းသို့ သွ…

  • January 7, 2025
မြိတ်နှင့် ထားဝယ်ထောင်မှ နိုင်ကျဉ်း ၈ ဦးသာ လွတ်မြောက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   မြိတ်အကျဉ်းထောင်နှင့် ထားဝယ်အကျဉ်းထောင်မှ နိုင်ကျဉ်း ၈ ဦး လွတ်မြောက်လာခဲ့သည်ဟု အကျဉ်းဦးစီးနှင့် နီးစပ်သူများက ပြောသည်။   စစ်ကောင်စီက ၇၇ နှစ်မြောက် လွပ်လပ်ရေးနေ့ အထိမ်းအမှတ် အနေဖြင့် ဇန္နဝါရီလ ၄ ရက်နေ့တွင် လွတ်ငြိမ်း ချမ်းသာခွင့် ပေးခဲ့ရာတွင် တနင်္သာရီတိုင်းဒေသကြီးအတွင်းရှိ မြိတ်အကျဥ်းထောင်မှ နိုင်ငံရေးအကျဥ်းသား ၆ ဦး ပြန်လည်လွတ်မြောက်ခဲ့ သည်ဟု မြိတ်အကျဥ်းထောင်မှအရာရှိတစ်ဦးက ပြောသည်။   မြိတ်အကျဥ်းထောင်မှ အကျဥ်းသား၊ အကျဥ်းသူ စုစုပေါင်း ၃၂ ဦး  ပြန်လည်လွတ်မြောက်လာရာတွင် နိုင်ငံ ရေးအကျဥ်းသား ၃ ဦးနှင့် အကျဥ်းသူ ၃ ဦးသာ ပါရှိခဲ့သည်။   မြိတ်အကျဉ်းထောင်မှ ပြန်လည် လွတ်မြောက်လာသည့် နိုင်ငံရေး အကျဥ်းသားများ အထဲတွင် တနင်္သာရီမြို့နယ် မှ ထောင်ဒဏ် တစ်သက်တစ်ကျွန်း ချမှတ်ခံထားရသူ မဝါဝါမြင့်၊ ပုလောမြို့နယ်မှ ထောင်ဒဏ် ၇ နှစ်ချမှတ်ခံ ထားရသူ မသီသီချို နှင့် ထောင်ဒဏ် ၃ နှစ်ကျခံထားရသည့် ဒေါ်အေးအေးဝင်းတို့ ဖြစ်ပြီး အမျိုးသား ၃ ဦးကိုမူ စိစစ်နေဆဲဖြစ်ကြောင်း အကျဥ်းထောင်အရာရှိတစ်ဦးက ဆိုသည်။   အလားတူ ထားဝယ်အကျဥ်းထောင်မှ လွတ်ငြိမ်းချမ်းသာခွင့်ဖြင့် နိုင်ငံရေး အကျဥ်းသားနှစ်ဦး အပါအဝင် အကျဥ်းသား ၁၃ ဦးလွတ်မြောက်လာသည်ဟု အကျဥ်းဦးစီးဌာနမှ တာဝန်ရှိသူတစ်ဦးက ပြောသည်။   လွတ်မြောက်လာသည့် နိုင်ငံရေး အကျဥ်းသားများမှာ လောင်းလုံးမြို့နယ် အတွင်းမှ နိုင်ငံရေးအကျဥ်းသူ မဝင်းဝင်းအိနှင့် ထားဝယ်မြို့မှ နိုင်ငံရေး အကျဥ်းသား ကိုဖြိုးထိုက်ဇော်တို့ ဖြစ်သည်။   ပြန်လွတ်မြောက်လာသည့်  နိုင်ငံရေးအကျဥ်းသူမှာ အကြမ်းဖက်ဥပဒေ ပုဒ်မ ၅၀-ည ဖြင့် ထောင်ဒဏ် ဆယ်နှစ် ကျထားသူဖြစ်ပြီး နိုင်ငံ ရေးအကျဥ်းသားက ပုဒ် ၅၀၅-က နှင့် ထောင်ဒဏ် သုံးနှစ် ကျခံထားရသူဖြစ်သည်။ ထားဝယ်အကျဥ်းထောင်တွင် နိုင်ငံရေး အကျဥ်းသား ၄၀၀ ကျော် အပါအဝင် အကျဥ်းသား စုစုပေါင်း တစ်ထောင်ကျော် ရှိသည်။   ထားဝယ်အကျဉ်း ထောင်တွင် အကျဉ်းကျနေသည့် နိုင်ကျဉ်းတစ်ဦး၏ မိခင်က “လွတ်ငြိမ်းချမ်းသာခွင့် ပေးမယ် ကြားလို့ မနက်အစောကြီး ကတည်းက အားရဝမ်းသာ သွားစောင့်နေတာ၊ အိမ်က သားလည်း မပါလာဘူး၊ ကိုယ့်လိုပဲ နိုင်ငံရေးအကျဥ်းသား မိသားစုတွေနဲ့ တခြားအကျဥ်းသား မိသားစုတွေ အတော်များများ စောင့်နေ ကြတာ” ဟု ပြောသည်။   ယခု လွှတ်ပေးခဲ့သည့် အကျဉ်းသား၊ အကျဉ်းသူများကို နောက်တစ်ကြိမ် ပြစ်မှုကျူးလွန်ခဲ့ပါက အဆိုပါ ကျူး လွန်ခဲ့သည့် ပြစ်မှုအပြင် လက်ရှိကျခံရန် ကျန်နေသည့် ပြစ်မှုကိုပါ ဆက်လက်ကျခံပါ့မည် ဆိုသည့် ခံဝန်ချက်နှင့် လွှတ်ပေးခဲ့ခြင်း ဖြစ်သည်။   မြိတ်အကျဥ်းထောင်ရှေ့မှ အသက် ၅၅ နှစ်အရွယ် နိုင်ငံရေး အကျဥ်းသားတစ်ဦး၏ ဖခင်ဖြစ်သူက “လွတ်ငြိမ်း ချမ်းသာခွင့် ပေးမယ်လို့ ကြားရတာကြောင့် မနက်အစောကြီးကတည်းက ထောင်ဗူးဝမှာ သွားစောင့်တာ၊ ကျနော့်သားတော့ လွတ်တဲ့ထဲ မပါလာဘူး။ တခြား နိုင်ငံရေးအကျဥ်းသားတွေ လွတ်တာမြင်ရတော့ ဝမ်းလည်း သာတယ် ဝမ်းလည်းနည်းမိတယ်” ဟု ပြောသည်။   မြိတ်အကျဥ်းထောင်တွင်  လွတ်ငြိမ်းခွင့်တွင် မပါဝင်ခဲ့သည့် နိုင်ငံရေးအကျဥ်းသား၊ အကျဥ်းသူ များစွာ ကျန်နေ ဆဲဖြစ်သည်ဟု နိုင်ငံရေး အကျဥ်းသားမိသားစုဝင်များ က ဆိုသည်။   နိုင်ငံပိုင် အသံလွှင့်ဌာနများကလည်း ၇၇ နှစ်မြောက်လွတ်လပ်ရေးနေ့ အထိမ်းအမှတ်အဖြစ်ပြည်သူများ စိတ် အေးချမ်းရန်နှင့် လူမှုရေးအရ ငဲ့ညှာထောက်ထားသော အားဖြင့် မြန်မာနိုင်ငံတဝှမ်းရှိ အကျဥ်းထောင်များမှ အကျဥ်းသား အကျဥ်းသူ ၅၈၆၄ ဦးကို ပြစ်ဒဏ်မှ လွတ်ငြိမ်းခွင့်ပြုလိုက်ကြောင်း ကြေညာထားသည်။   စစ်ကောင်စီ၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက နိုင်ငံတော်အကြည်ညို ပျက်စေမှု ၅၀၅ ပုဒ်မနှင့် တရားစွဲဆို ထောင်ချခံထားရသည့် နိုင်ငံရေးအကျဥ်းသား ၆၀၀ ခန့်ကို ပြန်လွှတ်ပေးမှာဖြစ်ကြောင်း ပြန်ကြား ရေးမီဒီယာမှ တဆင့်ပြောဆိုခဲ့သည်။   လွတ်ငြိမ်းချမ်းသာခွင့်ဖြင့် နိုင်ငံရေးအကျဉ်းသား ၆၀၀ ဦးခန့် ပြန်လွှတ်ပေးမည်ဟု ဗိုလ်ချုပ် ဇော်မင်းထွန်းက ပြောဆိုထားသော်လည်း အကျဉ်းထောင် ၁၀ ခုမှ လက်ရှိ စုစည်းထားသော စာရင်းများအရ နိုင်ငံရေး အကျဉ်း သား ၁၅၀ ဝန်းကျင်သာ ပြန်လည်လွတ်မြောက် လာသေးကြောင်း မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ရက် PPNM ၏ စာရင်းများအရ သိရသည်။   ဓါတ်ပုံ - (ပုံဟောင်း - မြိတ်အကျဉ်းထောင်မှ အကျဉ်းသူ/သားများ ပြန်လွတ်လာပုံ)

မြိတ်နှင့် ထားဝယ်ထောင်မှ နိုင်ကျဉ်း ၈ ဦးသာ လွတ်မြောက်

မြိတ်နှင့် ထားဝယ်ထောင်မှ နိုင်ကျဉ်း ၈ ဦးသာ လွတ်မြောက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  မြိတ်အကျဉ်းထောင်နှင့် ထားဝယ်အကျဉ်…

  • January 7, 2025
စစ်ကောင်စီ၏ ရာဇဝတ်မှုများကို ICC တွင် တရားစွဲရန် NUG ပြင်ဆင်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   အာဏာသိမ်းပြီးနောက်ပိုင်း စစ်ကောင်စီက ကျူးလွန်နေသည့် စစ်ရာဇဝတ်မှုများကို အပြည်ပြည်ဆိုင်ရာ ရာဇဝတ်တရားရုံး ICC ၌ တရားစွဲဆိုနိုင်ရေး အမျိုးသားညီညွတ်ရေးအစိုးရ NUG က ဆောင်ရွက်မည်ဟု  ပြော ဆိုလိုက်သည်။   စစ်တပ်က အာဏာသိမ်းပြီးချိန်မှ လက်ရှိအချိန်ထိ ကျူးလွန်နေသည့် ရာဇဝတ်မှုများကို ICC ကနေ စုံစမ်း စစ်ဆေးမှုများ ပြုလုပ်နိုင်ရေး တောင်းဆိုသွားမည်ဟု ဆိုသည်။   အမျိုးသား ညီညွတ်ရေး အစိုးရ NUG လူ့အခွင့်အရေး ဆိုင်ရာဝန်ကြီးဌာန၏ ပြည်ထောင်စုဝန်ကြီး ဦးအောင်မျိုးမင်းက ဇန်နဝါရီလ ၃ ရက်နေ့တွင် အွန်လိုင်းမှ ပြုလုပ်သည့် လူ့အခွင့်အရေးဆိုင်ရာ သတင်းစာ ရှင်းလင်းပွဲတွင် ပြောဆိုလိုက်ခြင်း ဖြစ်သည်။   ဦးအောင်မျိုးမင်းက “အခုလောလောဆယ် ဝရမ်းထုတ်ဖို့အတွက် ကြိုးစားနေတာကတော့ ရိုဟင်ဂျာများ အပေါ်မှာ ဘင်္ဂလား ဒေ့ရှ်ကို မောင်းထုတ်ခဲ့တဲ့ အဖြစ်အပျက်နဲ့ ပတ်သက်ပြီးတော့ ဖြစ်ပါတယ်၊ ဒါတင်မကသေးဘဲနဲ့ လက် ရှိ အကြမ်းဖက် စစ်တပ်ကျူးလွန်နေတဲ့ အချက်တွေက တစ်တိုင်းပြည်လုံးက ပြည်သူတွေကို ပစ်မှတ်ထားပြီး War Crime ကျူးလွန်တာဖြစ်တဲ့ အတွက် ICC ရဲ့ တရားစီရင်မှု အပိုင်းကို ပိုမိုကျယ်ကျယ်ပြန့်ပြန့်နဲ့ လုပ် ဆောင်ဖို့အတွက် နောက်ထပ် ကျူးလွန်နေတဲ့ အခုထိကျူးလွန်နေတဲ့ လေကြောင်းတိုက်ခိုက်မှုတွေ ဒါတွေကို ရာဇဝတ်မှုအနေနဲ့ သတ်မှတ်ပြီးတော့မှ စုံစမ်းစစ်ဆေး အရေးယူမှု ဖြစ်လာဖို့အတွက် ဆက်လက်တောင်းဆို လျှက် ရှိပါတယ်” ဟု ပြောသည်။   ၂၀၂၃ ခုနှစ်တွင် လူ့အခွင့်အရေး ချိုးဖောက်မှုပေါင်း ၄,၃၇၂ ခုရှိခဲ့ရာမှ ၂၀၂၄ ခုနှစ်တွင်မူ ၇,၃၉၄ ခုအထိ နှစ်ဆ နီးပါးရှိလာသည်ဟု NUG ၏ လူ့အခွင့်အရေးဝန်ကြီးဌာနက ပြောသည်။   အဆိုပါ ချိုးဖောက်မှုများထဲ အရပ်သားများအပေါ် စစ်ကောင်စီတပ်၏ တရားလက်လွတ် သတ်ဖြတ်မှုက အများဆုံး ပါဝင်နေသည်ဟု ဆိုသည်။   မြန်မာနိုင်ငံက အပြည်ပြည်ဆိုင်ရာ ရာဇဝတ်တရားရုံး ICC ၏ ရောမ သဘောတူညီချက် စာချုပ်တွင် လက်မှတ် မရေးထိုးထားရသေးသော်လည် လက်မှတ်ရေးထိုးထားသည့် နိုင်ငံများနှင့် ပူးပေါင်းပြီး စစ်ခေါင်းဆောင်ကို အရေးယူနိုင်ရေး လုပ်သွားမည်ဟု ဦးအောင်မျိုးမင်းက ဆက်ပြောသည်။   “ဒီဝရမ်းထုတ်လာရင် Roam statute ကိုလက်မှတ်ရေးထိုးထားတဲ့နိုင်ငံတွေက ဝရမ်းထုတ်ထားတဲ့ သူတွေ သူ့နိုင်ငံကို ရောက်လာရင် ဖမ်းပြီးတော့ပို့တာ ICC တရားရုံးကို လွဲပြီးတော့ ပို့တာ လုပ်ရတဲ့ တာဝန်ရှိပါတယ်။ ဒါတွေကို မဖြစ်မနေ လုပ်ဆောင်ပေးဖို့ရယ် ထိထိရောက်ရောက် အရေးယူ ဆောင်ရွက်နိုင်ဖို့ အတွက် နိုင်ငံတွေ အားလုံးကနေ လက်တွဲ လုပ်ဆောင်ဖို့အတွက် သီးသန့်တိုက်တွန်းချက်တွေ အဖွဲ့ဝင်နိုင်ငံတွေကို ဦးစားပေးပြီး တော့ တိုက်တွန်းချက်တွေ လုပ်ဆောင်လျှက်ရှိပါတယ်။ ဒါမှသာဝရမ်းက ဝရမ်းဆိုပြီးတော့  မဟုတ်ဘဲနဲ့ ဝရမ်းနဲ့အတူ တစ်ကယ်တမ်း အရေးယူဆောင်ရွက်မှုတွေ လုပ်ဆောင်နိုင်မယ့် အဆင့်ဖြစ်ပါလိမ့်မယ်။”   ရခိုင်ပြည်အတွင်းရှိ ရိုဟင်ဂျာလူမျိုးစုအပေါ် ကျူးလွန်သည့် ရာဇဝတ်မှုများအတွက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ရန် ICC ၏ ရှေ့နေချုပ်က ICC တရားရုံးကို နိုဝင်ဘာလ ၂၇ ရက်တွင် လျှောက်ထားခဲ့သည်။   ထို့အပြင် ကမ္ဘာလုံးဆိုင်ရာ တရားစီရင်ပိုင်ခွင့် Universal Jurisdiction အနေဖြင့်လည်း ရိုဟင်ဂျာအမှုအတွက် ဗိုလ်ချုပ်မှူးကြီး မင်းအောင်လှိုင်ကို အာဂျင်တီးနား၊ တူရကီ၊ ဖိလစ်ပိုင်နိုင်ငံတို့တွင် အမှုဖွင့် စစ်ဆေးမှုများ လုပ်နေ ပြီး မကြာခင် အရေးယူဆောင်ရွက်မှုများ တစ်စုံတစ်ရာ ထွက်ပေါ်လာမည်ဟု ဦးအောင်မျိုးမင်းက ဆိုသည်။   NUG သည် တရားစွဲဆိုနိုင်သော အဖွဲ့အစည်း မဟုတ်သော်လည်း တရားစွဲဆိုနိုင်သည့် အဖွဲ့အစည်းများက လိုအပ်သည့် အချက်လက်များ၊ သက်သေအထောက်ထားများကို ပံ့ပိုးကူညီပြီး တရားမျှတမှုအတွက် နည်းလမ်း ပေါင်းစုံကို အသုံးပြုနေပြီး စစ်ကောင်စီကို အပြစ်ပေး အရေးယူနိုင်ရေး ဆောင်ရွက်နေသည်ဟု ဆိုသည်။  

စစ်ကောင်စီ၏ ရာဇဝတ်မှုများကို ICC တွင် တရားစွဲရန် NUG ပြင်ဆင်

စစ်ကောင်စီ၏ ရာဇဝတ်မှုများကို ICC တွင် တရားစွဲရန် NUG ပြင်ဆင် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  အာဏာသိမ်းပြီးနောက်ပိုင်း စ…

  • January 7, 2025
×Close