သတင်း

ကရင်နီတော်လှန်ရေး အဖွဲ့များ ဘဏ်ဖွင့်မည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   ကရင်နီတော်လှန်ရေး အဖွဲ့များက ၂၀၂၅ ခုနှစ်ထဲတွင် ဘဏ်တစ်ခုကို  ဖွင့်လှစ်နိုင်အောင် ပြင်ဆင်လုပ် ဆောင်နေသည်ဟု ကရင်နီအမျိုးသားများ ကာကွယ်ရေးတပ် (KNDF) က ပြောသည်။   ငွေကြေးဆိုင်ရာ ကိစ္စရပ်များကို လုပ်ဆောင်ရာတွင် အဆင်ပြေစေရန် ကရင်နီပြည်နယ်တွင် ဘဏ်လုပ်ငန်း စတင်လုပ်ဆောင်မည့် အခြေအနေနှင့် ပတ်သက်၍ KNDF ဥက္ကဋ္ဌ ခွန်းဘီထူး ယခုကဲ့သို့ ပြောသည်။   “ကျနော်တို့ အနေနဲ့ ဒီ ၂၀၂၅ ထဲမှာပေါ့နော်။ အထူးသဖြင့်ပေါ့နော်။ ကရင်နီပြည်ရဲ့ ဘဏ်လုပ်ငန်း တစ်ခုကို လည်း ကျနော်တို့ ဒါအစပြုနိုင်ပြီးမှပေါ့နော် ဒီပြည်သူတွေရဲ့ ငွေပေးငွေလွှဲတဲ့ ကိစ္စတွေရော ချေးငွေကိစ္စတွေ ရော ပေါ့နော်။ လုပ်ငန်းငယ်လေးကို ပြန်လည် တည်ထောင်နိုင်ဖို့ အတွက် အသေးစား ချေးငွေ လုပ်ငန်းတွေ ရောပေါ့နော်။ ကျနော်တို့ ဘက်ကဒါ တိုးမြှင့်ပြီးတော့မှ လုပ်ဆောင်သွားဖို့ ပြင်ဆင် နေပါတယ်” ဟု ပြောသည်။   အဆိုပါ ဘဏ်သည် ကရင်နီ တော်လှန်ရေး အင်အားစုများက တော်လှန်ရေးကာလအတွင်း ဖွင့်လှစ်မည့် ပထမဆုံးဘဏ် ဖြစ်လာမည် ဖြစ်သည်။   ထို့အပြင် ကရင်နီပြည်ရှိ လုပ်ငန်းရှင်နှင့် အခြားသော လုပ်ငန်းရှင်များ ချိတ်ဆက်ပြီး လူမှုစီးပွားရေး တိုးတက် အောင်မြင်စေရန် လုပ်ဆောင်သွားကြမည်ဟု ကရင်နီအမျိုးသားများ ကာကွယ်ရေးတပ် ဥက္ကဋ္ဌ ခွန်းဘီထူးက ဇန်နဝါရီလ ၁ ရက်နေ့ နှစ်သစ်ကူး မိန့်ခွန်းထဲတွင် ထည်သွင်းပြောကြားခဲ့သည်။   ကရင်နီပြည်၏ လူမှုစီးပွားရေး တိုးတက်အောင်မြင်ရေးသည် အစိုးရ၏ တာဝန်ဝတ္တရားများ ဖြစ်ပြီး  ပြည်သူ လူထုများနှင့် အတူတကွ ပူးပေါင်းဆောင်ရွက်သွားမည်ဟု KNDF ဥက္ကဋ္ဌ က ဆိုသည်။   ၂၀၂၅ ခုနှစ်အတွင်း ပိုမို ကောင်းမွန် ကျစ်လစ်သည့် ယန္တရားများဖြင့် ဌာနအသီးသီးက လုပ်ဆောင်သွားကြရန် ပြင်ဆင်ထားသည် ဟု KNDF ဥက္ကဋ္ဌ ခွန်းဘီထူးက ပြောသည်။   ၎င်းက “ကျနော်တို့ရဲ့ နေ့စဉ် ဘတ်ဂျက်တွေ ကျနော်တို့ရဲ့ မြို့နယ်အုပ်ချုပ်ရေးတွေ ကျနော်တို့ရဲ့ ဌာနအသီး သီးက ပေါ့နော်။ ဒီလုပ်ပေးရမယ့် ပညာရေး ကျန်းမာရေး ဝန်ဆောင်မှုတွေကို ပေါ့နော်။ ကျနော်တို့ ပြည် သူတွေ ထည့်ဝင်တဲ့ အကူငွေတွေ ကျနော်တို့ကောက်ခံရတဲ့ အခွန်ငွေတွေကနေပြီးတော့မှ ကျနော်တို့ ပွင့်လင်း မြင်သာမှုရှိစွာနဲ့ အကျိုးရှိစွာနဲ့ ကျနော်တို့ သုံးသွားမှာ ဖြစ်ပါတယ်ပေါ့နော်။ ဒီနှစ်ကျနော်တို့ ကရင်နီပြည်မှာ ရောက်နေတဲ့ ပြည်သူတွေ အားလုံးကပေါ့နော် ဒါ ဆန်စပါး မပြတ်လတ်လေအောင်ပေါ့နော်။ ကျနော်တို့ ကြိုး စားပြီးတော့မှ ဆောင်ရွက်တာတွေရှိပါတယ်။ အဲ့ဒီအတွက်လည်း တောင်သူတွေတစ်ချို့ နစ်နာတာတွေ ကျနော်တို့ ကြားရတယ်။ ဒါပေမဲ့ အခု ၂၀၂၅ ထဲမှာပေါ့နော် တောင်သူတွေဘက်က မနစ်နာရလေအောင် နောက် စိုက်ပျိုးမှုတွေ ပိုလုံခြုံပြီး‌တော့မှ ပိုကောင်းမွန်အောင် ပြီးတော့မှ ရေကြီးတဲ့ ဘေးအန္တရာယ် မကြုံရလေအောင် ကျနော်တို့ အကောင်းဆုံး ကြိုးစားပြီးမှ ပူးပေါင်း ဆောင်ရွက်ကြမှာ ဖြစ်ပါတယ်“ ဟု ပြောသည်။   ထို့အတူ အမျိုးသားညီညွှတ်ရေး အစိုးရ NUG နှင့် ချိတ်ဆက်ပြီး ပိုမို အားကောင်းသည့် အစိုးရဖြစ်ရန်နှင့် ပိုမို ကောင်းမွန်ကျယ်ပြန့်သည့် အုပ်ချုပ်ရေးအား အတူတကွ ဆက်လက်လုပ်ဆောင်သွားရန် ပြင်ဆင်နေသည် ဟု ခွန်းဘီထူးက ဆိုသည်။   ၂၀၂၅ ခုနှစ်တွင် စစ်ရေး အောင်မြင်မှု၊ အုပ်ချုပ်ရေး အောင်မြင်မှု ရရှိရန်အပြင် အာဏာရှင်၏ ရက်စက် ယုတ်မာ မှုများနှင့် မတရား အာဏာသိမ်းယူမှုကို ချေဖျက်ပြီး အောင်မြင်သည့် နှစ်တစ်နှစ် ဖြစ်လာရန် ယုံကြည်သည်ဟု KNDF ပြောသည်။ ထိုသို့ ဖြစ်လာစေရန်အတွက် KNDF အနေဖြင့် ကရင်နီပြည်နယ် အတွင်းရှိ တော်လှန်ရေး အင်အား စုများအားလုံးနှင့် စုပေါင်းအဖြေရှာပြီး လုပ်ဆောင်သွားမည်ဟု ခွန်းဘီထူးက ဆိုသည်။

ကရင်နီတော်လှန်ရေး အဖွဲ့များ ဘဏ်ဖွင့်မည်

ကရင်နီတော်လှန်ရေး အဖွဲ့များ ဘဏ်ဖွင့်မည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  ကရင်နီတော်လှန်ရေး အဖွဲ့များက ၂၀၂၅ ခုနှစ်ထဲတွင် …

  • January 7, 2025
တနင်္သာရီတွင် ဖုန်းများအတွင်း VPN ပါမပါ စစ်ဆေးပြီး ငွေတောင်းနေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   မြိတ်ခရိုင်အတွင်းရှိ စစ်ကောင်စီဂိတ်များတွင် ခရီးသွား ပြည်သူများ၏ လက်ကိုင်ဖုန်းများအတွင်း VPN ဆော့ဝဲလ် အသုံးပြုမှု ရှိမရှိ စစ်ဆေးမှုများ ပြန်လည် လုပ်လာနေသည်ဟု ပြောသည်။ 
စစ်ကောင်စီက VPN အသုံးပြုမှုကို တင်းကျပ်သည့် ဥပဒေ ထုတ်ပြန်လိုက်ပြီးသည့်နောက် ပုလောနှင့် တနင်္သာရီ ဘက်များရှိ စစ်ကောင်စီ စစ်ဆေးရေးဂိတ်များတွင် VPN ဆော့ဝဲလ်များကို ပြန်လည်စစ်ဆေးလာခြင်း ဖြစ်သည် ဟု ခရီးသွား ပြည်သူများက ပြောသည်။   တနင်္သာရီတံတား စစ်ဆေးရေးဂိတ်တွင် ပိုက်ဆံပေးခဲ့ရသည့် အသက် ၄၀ ခန့်အရွယ် ကားသမားတစ်ဦးက “သူတို့နဲ့ ရင်းနှီးနေပေမယ့် အဲဒီနေ့က ဖုန်းတောင်းပြီး စစ်တာပါပဲ။ VPN ဆော့ဝဲလ်တွေ့တာနဲ့ ပိုက်ဆံတောင်း တော့တာပဲ” ဟု ပြောသည်။   ဇန်နဝါရီလ ၁ ရက်နေ့မှ စတင်ပြီး တနင်္သာရီမြို့နယ်ထဲရှိ တနင်္သာရီ တံတားနှင့် ဗိုလ်ချုပ်ကြေးရုပ် စစ်ဆေးရေး ဂိတ်၊ ပုလောမြို့နယ်ထဲမှ မကျည်းကုန်းကျေးရွာ စစ်ဆေးရေးဂိတ်များတွင် VPN ဆော့ဝဲလ်ကို ပြန်စစ်ဆေးလာ သည်ဟု ခရီးသည်တင်ယာဥ်မောင်းများက ဆိုသည်။   ဖုန်းများအတွင်း၌ VPN ဆော့ဝဲလ်ရှိနေသည်ကို တွေ့ခဲ့ပါက ငွေကျပ်တစ်သောင်းမှ သုံးသောင်းကျပ် အထိ တောင်းယူနေသည်ဟု ဆိုကြသည်။   နောက်တစ်ကြိမ်စစ်ဆေးသည့် အခါ VPN ဆော့ဝဲလ် ထပ်မံတွေ့ရှိပါက နိုင်ငံတော်က ချမှတ်ထားသည့် ဥပဒေ အတိုင်းအရေးယူသွားမည် ဖြစ်ကြောင်း စစ်ကောင်စီဂိတ်များ တာဝန်ကျ တပ်ဖွဲ့ဝင်များက ပြောဆိုလိုက်သေး သည်ဟု ခရီးသွား ပြည်သူများက ဆိုသည်။   ဖုန်းများအတွင်း၌ VPN ဆော့ဝဲလ်တွေ့ရှိပါက ဖမ်းဆီးငွေညှစ်ခြင်းများကို အာဏာသိမ်းကာလ အစောပိုင်း၌ တွင် ကျယ်စွာ လုပ်ခဲ့ကြပြီး နောက်ပိုင်းတွင် စစ်ဆေးခြင်းများ မရှိသလောက် နည်းပါးခဲ့ပြီးနောက် ယခုနှစ်အစပိုင်းမှ စတင်၍ ပြန်လည် စစ်ဆေးမှု တင်းကျပ်လာခြင်းဖြစ်သည်။   ခွင့်ပြုချက်မရှိပဲ VPN ထူထောင်ခြင်း၊ သို့မှမဟုတ် ဝန်ဆောင်မှုပေးခြင်းနှင့် အွန်လိုင်း လောင်းကစားစနစ် တည် ဆောက်ခြင်းများ အတွက် ပြစ်ဒဏ်ချမှတ်နိုင်မည့် ဆိုက်ဘာ လုံခြုံရေးဥပဒေကို စစ်ကောင်စီက ဇန်နဝါရီ ၁ ရက် နေ့တွင် ပြဋ္ဌာန်းခဲ့ခြင်း ဖြစ်သည်။   နိုင်ငံအချုပ်အခြာအာဏာနှင့် တည်ငြိမ်အေးချမ်းရေးကို ထိခိုက်စေခြင်းများကို ကာကွယ်နိုင်ရန်နှင့် ဆိုက်ဘာ မှုခင်းများကို ထိရောက်စွာ စုံစမ်းဖော်ထုတ် အရေးယူနိုင်ရန်အတွက် ယခုကဲ့သို့ ပြဌာန်းလိုက်ခြင်းဖြစ်ကြောင်း ဆိုထားသည်။   တရားမဝင် VPN ဝန်ဆောင်မှုအတွက် ဒဏ်ငွေအနည်းဆုံး ကျပ်ဆယ်သိန်းမှ ကျပ်သိန်းတစ်ရာ အထိ ချမှတ်ခံရ မည်ဖြစ်ပြီး၊ ထောင်ဒဏ်အများဆုံး ခြောက်လအထိ ချမှတ်နိုင်သလို ဒဏ်နှစ်ရပ်လုံးကိုလည်း ချမှတ်နိုင်သည်ဟု ဖော်ပြထားသည်။    

တနင်္သာရီတွင် ဖုန်းများအတွင်း VPN ပါမပါ စစ်ဆေးပြီး ငွေတောင်းနေ

တနင်္သာရီတွင် ဖုန်းများအတွင်း VPN ပါမပါ စစ်ဆေးပြီး ငွေတောင်းနေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  မြိတ်ခရိုင်အတွင်းရှိ စစ်…

  • January 7, 2025
မြစ်ကြီးနားတွင် လူငယ်များ ပျောက်ဆုံးနေ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၇ ရက်။   ကချင်ပြည်၊ မြစ်ကြီးနားတွင် လူငယ်၊ လူလတ်ပိုင်း အမျိုးသားများ သတင်းအစအန မရဘဲ ဆက်တိုက် ပျောက် ဆုံးမှုများ ဖြစ်နေသည်ဟု မြို့ခံများက ပြောသည်။   ဒီဇင်ဘာလ ဒုတိယပတ်ထဲတွင် ပျောက်ဆုံးသွားသည့် လူငယ်တစ်ဦးမှာလည်း ယနေ့အချိန်ထိ အဆက်အသွယ် မရသေးဘူးဟု မြစ်ကြီးနား မြို့ခံ အမျိုးသား တစ်ဦးက ပြောသည်။   “ငါတို့အိမ်နားက ကောင်လေးတစ်ယောက် ပျောက်သွားတယ်။ ဒီဇင်ဘာ ၁၁ ရက်နေ့လောက်ကပေါ့နော်။ အသက် က ၃၀ ကျော်လောက်ရှိတယ်။ ပျောက်တော့ လိုက်ရှာတယ်။ မြို့အနှံ့ရှာတယ်။ ပျောက်တာက သူငယ် ချင်းရဲ့ မောင် လေးပါ။ ရဲစခန်းမှာလည်း အမှုဖွင့်ထားတယ်။ အခုထိ ဘာသတင်းမှ မရဘူး။ မြောက်ပိုင်းတိုင်းမှာ လည်း မေးကြည့်ပြီ၊ KIA လည်း ဆက်သွယ်ကြည့်တယ်၊ ဘယ်မှာမှ ရှာမတွေ့ဘူး။”   မြစ်ကြီးနားမြို့၊ မြို့သစ်ကြီး ရပ်ကွက်မှ အသက် ၃၀ ကျော်အရွယ် အဆိုပါ အမျိုးသား ပျောက်ဆုံးနေသည့်အပြင် ဒီဇင်ဘာလအတွင်း ပျောက်ဆုံးနေသူများထဲတွင် အသက် ၁၂ နှစ်အရွယ် ကလေးငယ် တစ်ဦးလည်း ပါသည်ဟု မိသားစုနှင့် နီးစပ်သူများက ပြောသည်။   မိသားစုဝင်များ အနေဖြင့် လူမှုကွန်ရက် စာမျက်နှာရှိ Group Page များတွင် လူပျောက်ကြေညာပြီးနောက် ငွေကြေးဖြင့် လာရွေးယူရန် လိမ်လည် ဖုန်းဆက်လာမှုများလည်း ရှိနေသည်ဟု မြစ်ကြီးနားမြို့ခံများက ပြော သည်။   မြို့သစ်ကြီးရပ်ကွက်နေ ပြည်သူတစ်ဦးက “သူငယ်ချင်း မိသားစုက သူတို့သားလေး ပျောက်သွားတော့ နှစ်ရက် လောက် အကြာမှာ ဖေ့ဘုတ်မှာ လူပျောက်ကြေညာလိုက်တာ၊ ကြေညာပြီး တစ်နှစ်ရီလောက်ဆို ဖုန်းကို ဆက် လာတယ်။ ခင်များတို့သားကို ခင်များတို့ မောင်ကို စစ်ကြောရေးမှာ ဖမ်းထားတယ်။ အကြမ်းဖက်နဲ့ ပတ်သက် ပြီး ဆက်နွယ်မှုရှိလို့ ငါတို့ဖမ်းထားတယ်၊ သိန်းနှစ်ဆယ်နဲ့ လာရွေးပါ ဆိုပြီး ဖုန်းဆက်ပြော၊ မိသားစုကလည်း စိုးရိမ်ပြီး တဝက်အရင် လွှဲလိုက်တယ်။ တဝက်ကိုတော့ ဘယ်မှာလာပေး၊ အဲ့လိုဆို လွှတ်ပေးမယ်ပေါ့ အဲ့လိုမျိုး ပြောပြီး အခုထိ အဆက်အသွယ် မရတော့ပြန်ဘူး” ဟု ပြောသည်။   အလားတူ ဒီဇင်ဘာလ ၁၀ ရက်နေ့တွင်လည်း မြို့သစ်ကြီးရပ်ကွက်ရှိ နေအိမ်မှ မြစ်ကြီးနားမြို့ထဲသို့ စျေးသွား ဝယ်သော အသက် ၂၀ ကျော် အရွယ် အမျိုးသားတစ်ဦး ပျောက်ဆုံးသွားခဲ့သည်။   ထို့အပြင် မြစ်ကြီးနားမြို့၊ မန်ခိန်ရပ်ကွက်မှလည်း အသက် ၃၆ နှစ်အရွယ် အမျိုးသားတစ်ဦးမှာလည်း ၄ လ နီးပါးအကြာ ပျောက်ဆုံးနေပြီး ယနေ့အချိန်ထိ အဆက်အသွယ်မရသေးဘူးဟု မိသားစုနှင့်နီးစပ်သူ တစ်ဦးက ပြောသည်။   “ဇန်နဝါရီလ ၆ ရက်နေ့အထိ မတွေ့သေးဘူး။ အဆက်အသွယ်လည်း လုံးဝ မရတော့ဘူး။ ပျောက်နေတာကြာ ပြီ၊ ရဲစခန်းမှာလည်း တိုင်ထားတယ်။ အပြင်သွားလိုက်တာ အဲ့ဒီနေ့ကစပြီး အခုထိ ပြန်မလာတော့တာ။ ဖုန်းလိုင်း တွေကလည်း မရတာကြာပြီလေနော်၊ အစပိုင်းတော့ သူ့ဖုန်းဆက်ရင် ဆက်သွယ်မှု ဧရိယာပြင်ပလို့ ဆိုတာမျိုး ကနေ ၃ ရက်လောက်ကြတော့ စက်ပိတ်ထားပါတယ်ရှင် ဖြစ်သွားတာ။ စက်ပိတ်ထားပါတယ်ရှင်က ဒီနေ့ အချိန်ထိပဲ” ဟု ပြောသည်။   မြစ်ကြီးနားမြို့၊ ရှမ်းစုမြောက်ရပ်ကွက်မှ လူငယ်တစ်ဦးလည်း ပျောက်ဆုံးနေသည့်အပြင် အသက် ၁၇ နှစ်အရွယ် မောင်ချန်းဒေးဗစ်ဆန်းလွင် ဆိုသူလည်း ပျောက်ဆုံးနေသည်ဟု မြစ်ကြီးနားနှင့် သက်ဆိုင်သော Group Page များတွင် လူပျောက်ကြော်ငြာထားကြသည်။   မြစ်ကြီးနားမြို့သည် ၂၀၂၄ ခုနှစ်၊ ဇူလိုင်လ ၂၁ ရက်နေ့မှ စတင်၍ ယနေ့အချိန်ထိ ဖုန်းလိုင်းများ နှင့် အင်တာနက် လိုင်းများ ပြတ်တောက်ကာ ဆက်သွယ်ရေးပိုင်းခက်ခဲနေပြီး လယ်ကုန်း၊ ကျွန်းပင်တာ၊ ဒူကထောင်၊ စီတာပူ၊ အစိုးရ ရုံးပတ်ဝန်းကျင်နေရာများနှင့် MPT ရုံးအနီးအနား၌သာ MPT ဖုန်းလိုင်းရရှိနေခြင်း ဖြစ်သည်။   ထိုသို့သော အခြေအနေများကြောင့် မိသားစုဝင်များနှင့် အဆက်အသွယ်လုပ်ရန်ပင် အခက်အခဲများ ဖြစ်နေကြ ခြင်း ဖြစ်သည်။

မြစ်ကြီးနားတွင် လူငယ်များ ပျောက်ဆုံးနေ

မြစ်ကြီးနားတွင် လူငယ်များ ပျောက်ဆုံးနေ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇန္နဝါရီလ ၇ ရက်။  ကချင်ပြည်၊ မြစ်ကြီးနားတွင် လူငယ်၊ လူလတ်ပိုင်း အမ…

  • January 7, 2025
မြန်မာပြည်သူများအား အကာအကွယ်ပေးရန် ကရင်နီ အဖွဲ့များက နိုင်ငံတကာကို တောင်းဆို   သတင်းနှင့် မီဒီယာ ကွန်ရက်။ ၂၀၂၄ ခုနှစ်၊ ဒီဇင်ဘာလ ၂၆ ရက်။   စစ်ကောင်စီက ကျူးလွန်နေသည့် စစ်ရာဇဝတ်မှုများနှင့် လူမျိုးသုဉ်း သတ်ဖြတ်မှုများကို အားပေးထောက်ခံမှု မပြုကြရန် နှင့် လူ့အခွင့်အရေး ချိုးဖောက်ခံနေရသည့် မြန်မာပြည်သူများကို အကာအကွယ်ပေးရန်  ကရင်နီ ပြည် ကြားကာလ အုပ်ချုပ်ရေးကောင်စီ၊ အတိုင်ပင်ခံ ကောင်စီနှင့် အမျိုးသမီး အစည်းအရုံးတို့က နိုင်ငံတကာ အား တောင်းဆိုလိုက်သည်။   ဖရူဆိုမြို့နယ်၊ မိုဆိုကျေးရွာအနီး စစ်ကောင်စီတပ်သားများမှ အပြစ်မဲ့ကလေးသူငယ်များ အပါအဝင် အရပ်သား များအား ၂၀၂၁ ဒီဇင်ဘာလ ၂၄ ရက်နေ့တွင် အစုလိုက်အပြုံလိုက် မီးရှို့သတ်ဖြတ်ခဲ့သည့် (၃) နှစ်ပြည့်နေ့တွင် တောင်းဆိုလိုက်ခြင်း ဖြစ်သည်။   ကရင်နီပြည်ကြားကာလ အုပ်ချုပ်ရေးကောင်စီ  IEC အမျိုးသမီးနှင့် ကလေးသူငယ်ရေးရာဌာန မှ ဒု-ဌာနမှုူး-၁ မော်သဲမာ “နိုင်ငံတကာ အဖွဲ့အစည်းတွေကိုပေါ့နော်။ အဓိကကတော့ ဒီလိုမျိုး စစ်ကောင်စီရဲ့ လူမျိုးသုဉ်း သတ် ဖြတ်မှုနဲ့ စစ်ရာဇဝတ်မှု ကျူးလွန်တာတွေကိုပေါ့နော်။ ဆက်လက်ပြီးတော့မှ ထောက်ခံ အားပေးတာမျိုး၊ အဲ့လို လုပ်ရပ်မျိုးတွေကို ရှောင်ကျဉ်းပြီး တော့မှပေါ့နော်။ ဒီရာဇဝတ်မှုအတွက် တရားမျှတမှုနဲ့ ပြန်လည်ကုစား ခွင့် လမ်းကြောင်းတွေကို ဖွင့်ပေးဖို့အတွက် ပြောချင်တယ် ပေါ့နော်။ အချိန်ကာလက ကြာသွားပြီဆိုပေမဲ့လည်း ကျမတို့က ဒီဟာကို ဘယ်တော့မှ တရားမျှတမှု မရရှိနေသရွေ့တော့ ဆက်လက်ပြီးတော့ ဖော်ဆောင်သွားမှာ  ဖြစ်တယ်ပေါ့နော်။ အဲ့တာကြောင့် နိုင်ငံတကာ အဖွဲ့အစည်းတွေကို ပြောချင်ပါတယ်။ ဒီလိုမျိုးဖြစ်နေတာကို ထောက်ခံအားပေးမှု မလုပ်ကြဖို့ပေါ့နော်။ ဒီလုပ်ရပ်တွေကို ရှောင်ပေးကြဖို့ပေါ့နော်။ အဓိက ပြောချင်တယ်” ဟု ပြောသည်။   ဖရူဆိုမြို့နယ်၊ မိုဆိုကျေးရွာအနီးတွင် စစ်ကောင်စီ၏ တပ်မ ၆၆ လက်အောက်ခံ၊ ဓနုဖြူတပ်ရင်း ခမရ ၁၀၈ မှ တပ်ဖွဲ့ဝင်များ၏ သတ်ဖြတ်မှုကြောင့် စစ်ဘေးရှောင်ပြည်သူ ၃၅ ဦးထက်မနည်းနှင့် နယ်ခြားစောင့် တပ် ၁၀၀၄ တပ်ဖွဲ့မှ တပ်ဖွဲ့ဝင် ၄ ဦး တို့ အစုလိုက် အပြုံလိုက် သေဆုံးမှု ဖြစ်ပွားခဲ့ရသည်မှာ ယခုနစ် ဒီဇင်ဘာလ ၂၄ ရက်နေ့ က ၃ နှစ်တိုင်တိုင် ပြည့်ခဲ့ပြီး ဖြစ်သည်။   အဆိုပါ ဖြစ်ရပ်သည် ၃ နှစ်ပြည့်ပြီဖြစ်သော်လည်း လက်ရှိ အချိန်အထိ တရားမျှတမှု မရရှိသေးကြောင်း ကရင်နီ တော်လှန်ရေး အင်အားစုများက ပြောသည်။   ကရင်နီပြည် အတိုင်ပင်ခံ ကောင်စီ KSCC ကလည်း နိုင်ငံတကာ အဖွဲ့အစည်းများ အနေဖြင့် စစ်ကောင်စီ၏ စက် ဆုပ်ရွံရှာဖွယ်ကောင်းသော လူမျိုးတုံး သတ်ဖြတ်မှုနှင့် စစ်ရာဇဝတ်မှု ကျူးလွန်ခြင်းများကို အားပေး ထောက်ခံ သော လုပ်ရပ်များအား ရှောင်ကျဉ်၍ ထိုလူမျိုးသုဉ်း သတ်ဖြတ်မှုကို တားဆီးရန် ဒီဇင်ဘာလ ၂၄ ရက်နေ့က ထုတ်ပြန် တောင်းဆိုထားသည်။   ထို့အပြင် ပြည်သူများအား အကြမ်းဖက် တိုက်ခိုက်မှု ပပျောက်ရေး အပါအဝင် လူ့အခွင့်အရေး စံနှုန်းများအား အကောင်အထည်ဖော် ဆောင်ရွက်ခြင်းကို မြှင့်တင်ပေးနိုင်မည့် တရားမျှတမှု ရရှိရေးနှင့် ပြည်လည်ကုစားမှု ရရှိ ရေး လမ်းကြောင်းများကို ဖော်ဆောင်သွားရန် လိုအပ်သည်ဟု KSCC က ထုတ်ပြန်ချက်ထဲတွင် ပြောဆို ထား သည်။

ကလေးငယ်များနှင့် အမျိုးသမီးများ အပါအဝင် ပြည်သူများကို အရှင်လတ်လတ် မီးရှို့သတ်ဖြတ်ခဲ့သည့် ဖြစ်ရပ် အတွက် တရားမျှတမှုရရှိရန် ကရင်နီပြည်နယ်ရှိ မတူညီ ကွဲပြားသည့် အစုအဖွဲ့ များစုပေါင်း၍ ဆက်လက် ကြိုး စားနေကြသည်ဟု ကရင်နီအမျိုးသမီး အစည်းအရုံး (KNWO) ဥက္ကဋ္ဌ မော်ဖရေးမြာ က ပြောသည်။   မော်ဖရေးမြာ က “ဒီအကြမ်းဖက် စစ်ကောင်စီနဲ့ ပတ်သက်ပြီးတော့မှ ကျမတို့ ပြည်သူလူထုတွေပေါ့နော်။ အထူးသဖြင့် ကလေးငယ်နဲ့ အမျိုးသမီးတွေ အပါအဝင် အရှင်လတ်လတ် မီးရှို့သတ်ဖြတ်တဲ့ ဟာတွေက ဒါ ကမ္ဘာကို တုန်လှုပ်စေတဲ့ သမိုင်းကြီးကြီးတစ်ခု ပြောလို့ရတယ်ပေါ့နော်။ အခုဆိုလို့ရှိရင် ၃ နှစ်ပြည့်သွားပြီး ဒါ ပေမဲ့ ရှင်သန်ကျန်ရစ်ခဲ့တဲ့ မိသားစုဝင်တွေရော ပေးဆပ်သွားတဲ့ သူတွေရော အကုန်လုံးကတော့ ကျမတို့ အရမ်း ကြီး စိတ်ကျေနပ်အားရတဲ့ အဖြေတစ်ခုလိုမျိုး တရားမျှတမှုတော့ မရရှိနေသေးဘူး။ သို့ပေမဲ့ ဒီဟာတွေကို ရောက်ရှိဖို့ ဆိုလို့ရှိရင်တော့ ကျမတို့ပြည်နယ်ရဲ့ မတူညီ ကွဲပြားတဲ့ အစုအဖွဲ့ အမျိုးမျိုးသော ကြိုးစားမှု တွေ လည်း ရှိကြတယ်။ ဥပမာ IEC ဆိုလို့ရှိရင်လည်း သူတို့တတ်နိုင်တဲ့ဘက်ကနေ ဒါတွေ တရားမျှတမှု ရရှိ အောင် ကြိုးစားနေသလို KSCC လည်း ကြိုးစားနေတယ်။ ကျမတို့ အမျိုးသမီး အစုတွေလည်း ကြိုးစားကြတယ်” ဟု ပြောသည်။   မိုဆိုကျေးရွာအနီးတွင် အပြစ်မဲ့ပြည်သူများအား မီးရှို့သတ်ဖြတ်ခဲ့သည့်  ဖြစ်စဉ်အတွင်း ပါဝင်ပတ်သက်ခဲ့သည့် စစ်ကောင်စီတပ်ဖွဲ့ဝင်များကို အပြစ်ပေး အရေးယူနိုင်သည့်အထိ လုပ်ဆောင် သွားမည်ဟု ကရင်နီပြည် ကြား ကာလ အုပ်ချုပ်ရေး ကောင်စီ IEC အတွင်း ရေးမှူး -၂ ဦးဗညားကလည်း  ပြောသည်။   “အပြစ်မဲ့ပြည်သူ ၄၀ ကျော် သတ် ဖြတ်ခံရခြင်းကို ကျနော်တို့အနေနဲ့ ဖြေလျှော့ပေးမှာ မဟုတ်ဘူး ပေါ့နော်။ ခွင့်လွှတ်ပေးနိုင်မှာ မဟုတ်ဘူး ပေါ့နော်။ ဆိုတဲ့ အဓိပ္ပာယ်တဲ့ တရားဥပဒေ အကြောင်းအရ ကျနော်တို့က မရ ရအောင် ရတဲ့နည်းနဲ့ ကျနော်တို့က ဒီကျူးလွန်သူတွေ အမိန့်ပေးသူတွေကို ကျနော်တို့က အပြစ်ပေး အရေးယူ သွားနိုင်အောင် ကျနော်တို့ ကြိုးစားသွားမယ်ပေါ့နော်။ ဒါကျနော်တို့ ကရင်နီ သမိုင်းဖြစ်တယ်။ ကျနော်တို့ မြန်မာနိုင်ငံရဲ့ အဆိုးဝါးဆုံး လူ့အခွင့်အရေး ချိုးဖောက်မှု ဒုတိယဖြစ်တဲ့အတွက်ကြောင့်မို့ ကျနော်တို့ ဒါက အလွယ်တကူ မေ့ပျောက်လို့ရတဲ့ ခွင့်လွှတ်လို့ရတဲ့ အရာမဟုတ်ဘူးပေါ့နော်။ အပြစ်ရှိတဲ့သူတွေကိုတော့ သေချာ တာ တစ်ခုကတော့ အပြစ်ကင်း လွှတ်ခွင့်ကိုတော့ ကျနော်တို့ ပေးနိုင်မှာမဟုတ်ဘူး ဆိုတာကို ကျနော်တို့ အနေနဲ့ ရဲရဲပဲ ပြောလိုပါတယ်။”   အခြားတဖက်တွင်လည်း IEC အနေဖြင့် အမျိုးသားညီညွှတ်ရေးအစိုးရ (NUG) ၏ လူ့အခွင့်အရေးရာ ဝန်ကြီး ဌာန နှင့်လည်း ချိတ်ဆက်ပြီး မိုဆိုဖြစ်ရပ်ကို တရားမျှတမှု ရရှိရန် လုပ်ဆောင်နေသည်ဟု ဆိုသည်။   ထိုသို့ လုပ်ဆောင်ရာတွင် နိုင်ငံတကာ အဖွဲ့အစည်း ဖြစ်စေ၊ လူ့အခွင့်အရေး အဖွဲ့အစည်းဖြစ်စေ IEC နှင့်အတူ ပူးပေါင်း ဆောင်ရွက်ရန်လိုသည်ဟု  ဦးဗညားက ပြောသည်။   စစ်ကောင်စီသည် ကရင်နီပြည်နယ်အတွင်း နေရပ်စွန့်ခွာကာ စစ်ဘေးတိမ်းရှောင်နေရသည့် ပြည်သူများအား လူမျိုးတုံးသတ်ဖြတ်ရန်နှင့် နေ့စဉ်အသက်ရှင်နေထိုင်မှု ဘဝခက်ခဲစေရန် လေကြောင်း အသုံးပြု၍ သော်လည်း ကောင်း လက်နက်ကြီး ဖြစ်သော်လည်းကောင်း ပစ်မှတ်ထား တိုက်ခိုက်မှုများကို ယနေ့အထိ နေ့စဉ် နှင့်အမျှ လုပ်နေဆဲဖြစ်သည်ဟု ကရင်နီ တော်လှန်ရေး အင်အားစုများက ဆိုသည်။

မြန်မာပြည်သူများအား အကာအကွယ်ပေးရန် ကရင်နီ အဖွဲ့များက နိုင်ငံတကာကို တောင်းဆို

မြန်မာပြည်သူများအား အကာအကွယ်ပေးရန် ကရင်နီ အဖွဲ့များက နိုင်ငံတကာကို တောင်းဆို သတင်းနှင့် မီဒီယာ ကွန်ရက်။၂၀၂၄ ခုနှစ်၊ ဒီဇင်ဘာလ ၂၆ ရက်။  စစ်ကောင်စီ…

  • December 26, 2024
တရုတ်ဖောက်မည့် ရထားလမ်းတလျှောက် အရပ်သား ထိခိုက်သေဆုံးမှုများ ရှိနေ   သတင်းနှင့် မီဒီယာ ကွန်ရက်။ ၂၀၂၄ ခုနှစ်၊ ဒီဇင်ဘာလ ၂၆ ရက်။   စစ်ကောင်စီ၏ လေကြောင်းဗုံးကြဲ တိုက်ခိုက်မှုများကြောင့် တရုတ်အစိုးရက ဖောက်လုပ်ရန် ပြင်ဆင်နေသည့် မူဆယ် - မန္တလေး ရထားလမ်း ဖြတ်သန်းသွားသည့် မြို့များတွင် နှစ်လအတွင်း အရပ်သား ၂၀၀ ခန့် ထိခိုက် သေဆုံးမှုများ ရှိခဲ့သည်ဟု ရှမ်းလူ့အခွင့်အရေးမဏ္ဍိုင် (SHRF) က ထုတ်ပြန်သည်။   ရှမ်းပြည် မြောက်ပိုင်း၊ မူဆယ် - မန္တလေး အမြန်ရထားလမ်း ဖောက်လုပ်ရန် တရုတ်စီမံကိန်းရှိသည့် မြို့နယ် ၉ မြို့နယ်တွင် စစ်ကောင်စီတပ်၏ လေကြောင်းနှင့် လက်နက်ကြီးတိုက်ခိုက်မှုကြောင့် ထိခိုက်သေဆုံးမှုများနှင့် ပတ် သက်၍ ဒီဇင်ဘာလ ၂၀ ရက်နေ့က ထုတ်ပြန်လိုက်ခြင်း ဖြစ်သည်။   SHRF ပြောရေး ဆိုခွင့်ရှိသူ ယိင်းလျန်းဟန် က “ထိခိုက်ဒဏ်ရာရတာ ၇၀ ကျော်သေပြီးမှ ထိခိုက်ဒဏ်ရာရတာ က စုစုပေါင်းပေါ့နော်။ သေဆုံးထိခိုက်တာကို စုပြီး ၂၀၀ ကျော်သွားပြီ ပြောတာပါ။ ၂၀၀ ကျော်ကတော့ ၉ မြို့ နယ်ထဲ ကပါပဲ” ဟု ပြောသည်။   ယခုနှစ် အောက်တိုဘာလ ၉ ရက်နေ့မှ စတင်ကာ ဒီဇင်ဘာလ ၁၀ ရက်နေ့အထိ စစ်ကောင်စီတပ်၏ တိုက်ခိုက်မှု ကြောင့် အရပ်သား ၆၈ ဦး သေဆုံးခဲ့ပြီး ထိခိုက်ဒဏ်ရာရသူ ၁၃၆ ဦး ရှိခဲ့ကြောင်း ယိင်းလျန်းဟန်က ပြောသည်။   စစ်ကောင်စီ၏ လေကြောင်းနှင့် လက်နက်ကြီး ပစ်ခတ်မှုကြောင့် အရပ်သားများ ထိခိုက်သေဆုံးသွားသည် မြို့ နယ်များမှာ သီပေါ၊ မိုင်းရယ်၊ သိန္နီ၊ လားရှိုး၊ ကွမ်းလုံ၊ နောင်ချို၊ နမ့်ဆန်၊ ကွတ်ခိုင်၊ မိုးကုတ်နှင့် ကျောက်မဲ မြို့နယ် တို့ ဖြစ်သည်။   စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင်၏ နိုဝင်ဘာလ ၆ ရက် တရုတ်ခရီးစဉ် အပြီးတွင်  သဘောတူထားခဲ့သည့် အဆိုပါ မီးရထား စီမံကိန်းဖြတ်သွားမည့် လမ်းကြောင်းတလျှောက်က မြို့နယ်တွေမှာ လေကြောင်း တိုက်ခိုက်မှု ပိုများလာသည်ဟု လူ့အခွင့်အရေး စောင့်ကြည့်ရေး အဖွဲ့များက ပြောသည်။   တရုတ်အစိုးရ၏ မီးရထားစီမံကိန်းမှာ အပိုင်း၂ ပိုင်း ပါရှိပြီး ပထမတပိုင်းက တရုတ်နယ်စပ် ရှမ်းမြောက် မူဆယ် မြို့မှ မန္တလေးအထိ၊ ဒုတိယတပိုင်းကမူ မန္တလေးမှ ရခိုင်ပြည်၊ ကျောက်ဖြူမြို့အထိ ဖြစ်သည်။   ကီလိုမီတာ ၄၀၀ ကျော်ရှည်ပြီး အမေရိကန်ဒေါ်လာ ၉ ဘီလီယံနီးပါး အကုန်အကျခံပြီး တရုတ်က ဆောက်လုပ် သွားမှာ ဖြစ်သည်။   ယခုစီမံကိန်းသည် တရုတ်နိုင်ငံအတွက် အရေးပါသည့် အဓိက စီမံကိန်းကြီးဖြစ်ကြောင်း ယိင်းလျန်းဟန်က ပြောသည်။   “သူက တရုတ်ရဲ့ BRI လမ်းမကြီးမှာ အဓိကအနေနဲ့ အဓိက ပင်မ အရေးပါတဲ့ အရင်းအမြစ် ဖြစ်တဲ့ ရထား စီမံ ကိန်း ဖြစ်တစ်ခုဖြစ်တဲ့ အတွက်ကြောင့် တော်တော် အရေးပါးတယ်လို့ ပြောလို့ရပါတယ်။ ၁၀၂၇  မတိုင်ခင် က တချို့ဒီလက်စစ် ပါဝါ စီမံကိန်းတွေ စပြီး အကောင်အထည်ဖော်နေပြီး ဒီနောက်ပိုင်းမှာတော့ ရေအား လျှပ်စစ် စီမံကိန်းတွေကော တိုက်ပွဲတွေ ဖြစ်နေတယ် ဆက်တော့ ဆက်လုပ်နေဆဲပဲ။”   အဆိုပါ စီမံကိန်း အကောင်အထည်ဖော်ရန် ရှိနေသည့် မြို့နယ် ၁၀ မြို့နယ်အနက် ၈ မြို့နယ်ကို မြန်မာအမျိုး သား ဒီမိုကရက်တစ် တပ်မတော် MMDAA၊ တအာင်း အမျိုးသား လွတ်မြောက်ရေး တပ်မတော် TNLA နှင့် ပြည်သူ့ ကာကွယ်ရေး တပ်ဖွဲ့ PDF များက သိမ်းပိုက်ထားသည်။   ထိုမြို့နယ်များကို စစ်ကောင်စီတပ်က လေယာဉ်မှ ဗုံးကြဲမှုနှင့် လက်နက်ကြီးဖြင့် ပစ်ခတ်မှုများ ဆက်တိုက် လုပ် နေသည့်အတွက် အများပိုင် အဆောက်အအုံများ ဖြစ်သည့် စာသင်ကျောင်းများ၊ ဆေးရုံဆေးခန်းများ၊ ဘုန်းကြီး ကျောင်းများ၊ ဘုရားကျောင်းများ၊ စက်ရုံအလုပ်ရုံများနှင့် ဈေးဆိုင်များ ပျက်စီးသွားသည်ဟု SHRF က ထုတ်ပြန် ထားသည်။

တရုတ်ဖောက်မည့် ရထားလမ်းတလျှောက် အရပ်သား ထိခိုက်သေဆုံးမှုများ ရှိနေ

တရုတ်ဖောက်မည့် ရထားလမ်းတလျှောက် အရပ်သား ထိခိုက်သေဆုံးမှုများ ရှိနေ သတင်းနှင့် မီဒီယာ ကွန်ရက်။၂၀၂၄ ခုနှစ်၊ ဒီဇင်ဘာလ ၂၆ ရက်။  စစ်ကောင်စီ၏ လေကြောင်…

  • December 26, 2024
ကုန်စုံဆိုင်တစ်ဆိုင်တွင် ရွှေခုနစ်ကျပ်သား နှင့် ငွေကျပ်သိန်းသုံးရာ ဓားပြတိုက်ခံရ

 သတင်းနှင့်မီဒီယာ ကွန်ရက်။ ၂၀၂၄ ခုနှစ်၊ ဒီဇင်ဘာလ ၂၅ ရက်။   မြိတ်မြို့နယ်၊ တညက်ကျေးရွာအုပ်စု အတွင်းရှိ ပလုံးကျေးရွာ လမ်းမပေါ်မှ ကုန်စုံဆိုင်တစ်ဆိုင် ဓားပြတိုက်ခံရ သည်ဟု ရွာသားများက ပြောသည်။   လက်နက်ကိုင်ဆောင်ထားသူ လူ ၁၀ ဦးက‌ ဒီဇင်ဘာလ ၂၁ ရက်နေ့၊ ည ၁၀ နာရီ‌ခန့်က ဆိုင်ကယ် ၅ စီးဖြင့် တောင်းရှည်တံတားဘက်မှ ပုလုံးကျေးရွာထဲသို့ ရောက်ရှိလာခြင်းဖြစ်သည်။   အသက် ၅၀ ခန့်အရွယ် ရွာသားတစ်ဦးက “မျက်နှာဖုံး စွပ်ထားတဲ့ သုံးယောက်က အိမ်ထဲဝင်ပြီး ပိုက်ဆံထားတဲ့ နေရာကို သေနတ်ပြ ခြိမ်းခြောက်ပြီး မေး တယ်၊ ကျန်တဲ့သူတွေက အပြင်ဘက်မှာစောင့်နေကြတယ်” ဟု ပြော သည်။   ဓားပြတိုက်ခံရပြီး ရွှေ ၇ ကျပ်သား၊ ငွေကျပ် သိန်း ၃၀၀ ကျော် နှင့် လက်ကိုင်ဖုန်း ၂ လုံးကို ယူဆောင်သွားခဲ့သည် ဟု ရွာခံအမျိုးသားတစ်ဦးက ဆိုသည်။   ရွာခံများက ဓားပြတိုက်သည့်အဖွဲ့မှာ ရွာထဲသို့ ရောက်ရှိလာသည်ကို စစ်မှုထမ်းရန် လူလိုက်ရှာနေသည်ဟု ထင်မှတ်သဖြင့် ကြောက်ရွံ့စိုးရိမ်ကာ ထွက်မကြည့်ကြကြောင်း နှင့် ထွက်ပြေးကြသူများပင် ရှိနေကြောင်း ရွာသားများက ဆိုသည်။   ဓားပြတိုက်ခံရသည့် ကုန်စုံဆိုင်ပိုင်ရှင်ကို မြိတ်မြို့၊ မြို့မရဲစခန်းက ခေါ်ယူ၍ စုံစမ်းမေးမြန်းနေကြောင်း ရွာသားတစ်ဦးက ဆိုသည်။   တညက်ကျေးရွာအုပ်စုတွင် စစ်ကောင်စီမှ လက်နက်တပ်ဆင်ပေးထားသည့် ပြည်သူ့စစ် အဖွဲ့ဝင်များ ကြီးစိုးနေသည့် ကျေးရွာတစ်ရွာ ဖြစ်သည်။   ဓားပြတိုက်သည့် အဖွဲ့တွင် သေနတ်အရှည်များကို ကိုင်ဆောင်ထားပြီး ပေါ်ပေါ်ထင်ထင် သွားလာနေခြင်းကြောင့် ပြည်သူ့စစ်အဖွဲ့ဝင်များသာ ဖြစ်နိုင်နေကြောင်း ရွာသားများက ပြောဆိုနေသည်။   ပြီးခဲ့သည့် ၂၀၂၃ ခုနှစ် နှစ်လယ်ပိုင်းကလည်း တညက်ကျေးရွာအုပ်စုထဲရှိ နေအိမ်တစ်ဆောင် ဓားပြတိုက်ခံရပြီး ငွေကျပ် သိန်း ၄၀ ကျော် ပါသွားခဲ့သည်။

ကုန်စုံဆိုင်တစ်ဆိုင်တွင် ရွှေခုနစ်ကျပ်သား နှင့် ငွေကျပ်သိန်းသုံးရာ ဓားပြတိုက်ခံရ

ကုန်စုံဆိုင်တစ်ဆိုင်တွင် ရွှေခုနစ်ကျပ်သား နှင့် ငွေကျပ်သိန်းသုံးရာ ဓားပြတိုက်ခံရ သတင်းနှင့်မီဒီယာ ကွန်ရက်။၂၀၂၄ ခုနှစ်၊ ဒီဇင်ဘာလ ၂၅ ရက်။ မြိတ်မြိ…

  • December 25, 2024
ဘိလိယက်ခုံတွင် လူငယ်ခုနစ်ဦးဖမ်းဆီးခံရ   သတင်းနှင့်မီဒီယာ ကွန်ရက်။ ၂၀၂၄ ခုနှစ်၊ ဒီဇင်ဘာလ ၂၅ ရက်။   မြိတ်ခရိုင်၊ မြိတ်မြို့၊ ထားဝယ်ကမ်းရပ်ကွက်ရှိ ဘိလိယက်ခုံ တစ်ခုတွင် စရဖ (စစ်ဖက်ဆိုင်ရာ လုံခြုံရေး) တပ်ဖွဲ့ဝင်များနှင့် ပျူစောထီးအဖွဲ့များက လူငယ်ခုနစ်ဦးကို ဝင်ရောက်ဖမ်းဆီးသွားခဲ့သည်ဟု ရပ်ကွက်သားများက ပြောသည်။   ထားဝယ်ကမ်းရပ်ကွက် တံတားထိပ်မှ ဘိလိယက်ခုံတစ်ခုကို ဒီဇင်ဘာလ ၂၂ ရက်နေ့ ည ၁၁ နာရီခန့်က ဝင်ရောက် ဖမ်းဆီးခဲ့ခြင်း ဖြစ်သည်။   အသက် ၄၅ နှစ်အရွယ် ထားဝယ်ကမ်းရပ်နေထိုင်သူ အမျိုးသားတစ်ဦးက “လူစုနေတာရော အချိန်သိပ် နောက်ကျနေတာရောကြောင့် ဖမ်းတာလို့ပဲ သိရသေးတယ်၊ အဖမ်းခံရသူတွေ အထဲမှာ အသက် ၂၀ ကျော်နဲ့ ၃၀ ကျော် အရွယ်တွေချည်းပဲ” ဟု ပြောသည်။   လူငါးဦးထက် ပိုစုနေခြင်းကြောင့်နှင့် ညဘက် အချိန်လွန်နေခြင်းကြောင့် ဖမ်းဆီးရခြင်းဖြစ်သည်ဟု စရဖနှင့် ပျူစောထီးများက ပြောဆိုခဲ့သည်ဟု ရပ်ကွက်သားတစ်ဦးက ဆိုသည်။   ဘိလိယက်ခုံပိုင်ရှင် အပါအဝင် အမျိုးသား ၇ ဦးကို ဖမ်းဆီးခဲ့ပြီးနောက် မြိတ်တောင်နယ်မြေ ရပ်ကွက် အုပ်ချုပ်ရေးမှူးရုံးသို့ ခေါ်ဆောင်သွားကြသည်။   ဘိလိယက်ခုံ ပိုင်ရှင်ကိုမူ ညတွင်းချင်း ပြန်လွှတ်ပေးခဲ့သော်လည်း ကျန်သည့် ၆ ဦးကိုမူ စရဖနှင့် ပျူစောထီးများ က တစ်ဦးကို ကျပ်သိန်း ၂၀ နှင့် ပြန်လာထုတ်ခိုင်းခဲ့ကြောင်း ရွာသားများက ဆိုသည်။   ငွေကြေးဖြင့် ပြန်မထုတ်နိုင်သူများကို စစ်မှုထမ်းဆောင်ရန် အတွက် ပို့ဆောင်ခြင်းခံရမှာ ဖြစ်ကြောင်း ခြိမ်းခြောက်ခဲ့သေး သည်ဟု ဆိုကြသည်။   လက်ရှိတွင် အဖမ်းဆီးခံရသူများ၏ မိသားစုဝင်များမှာလည်း တတ်နိုင်ကြသူများ မဟုတ်သဖြင့် အဖမ်းခံရသူ ၆ ဦးစလုံးကို ပြန်ထုတ်နိုင်ရန်အတွက် အခက်အခဲများ ဖြစ်နေပြီး ညှိနှိုင်းနေရဆဲ ဖြစ်သည်ဟု ရပ်ကွက်သားများ က ဆိုသည်။ မြိတ်မြို့တွင် ဒီဇင်ဘာလတတိယပတ် မှ စတင်ပြီး ညဘက်တွင် ပေါ်တာဆွဲဖမ်းဆီးနေသည့် သတင်းများ ထွက်ပေါ်နေပြီး ရပ်ကွက် အုပ်ချုပ်ရေးမှူးများကလည်း ည ၈ နာရီနောက်ပိုင်း အပြင်မထွက်ကြရန်နှင့် ည ၈ နာရီ မတိုင်ခင် ဆိုင်ပိတ်သိမ်းကြရန် သတိပေးလျက် ရှိနေသည်ဟု မြိတ်မြို့ခံများက ပြောသည်။   ပြီးခဲ့သည့် ဒီဇင်ဘာလ ၁၄ ရက်နေ့ ညကလည်း ထားဝယ်ကမ်းရပ်ကွက်တွင် နေအိမ်ရှေ့ ဂီတာတီးနေသူနှင့် ဂိမ်းဆော့နေသူ လူငယ် ၃ ဦးကို စစ်တပ်က ဖမ်းဆီးခေါ်ဆောင် သွားခဲ့သေးသည်။

ဘိလိယက်ခုံတွင် လူငယ်ခုနစ်ဦးဖမ်းဆီးခံရ

ဘိလိယက်ခုံတွင် လူငယ်ခုနစ်ဦးဖမ်းဆီးခံရ သတင်းနှင့် မီဒီယာ ကွန်ရက်။၂၀၂၄ ခုနှစ်၊ ဒီဇင်ဘာလ ၂၅ ရက်။ မြိတ်ခရိုင်၊ မြိတ်မြို့၊ ထားဝယ်ကမ်းရပ်ကွက်ရှိ ဘိလိ…

  • December 25, 2024
လူ့အခွင့်အရေး ချိုးဖောက်မှုများ ပိုများလာနေ

လူ့အခွင့်အရေး ချိုးဖောက်မှုများ ပိုများလာနေ

လူ့အခွင့်အရေး ချိုးဖောက်မှုများ ပိုများလာနေ သတင်းနှင့် မီဒီယာ ကွန်ရက်။၂၀၂၄ ခုနှစ်၊ ဒီဇင်ဘာလ ၂၅ ရက်။  စစ်ရေးပဋိပက္ခ ကြာရှည်လာပြီး စစ်ဘောင် ကျယ်ပြ…

  • December 25, 2024
သိန်ခွန်း နယ်စပ်ကုန်သွယ်ရေးလမ်းတွင် ရွာသား ၂၀ ကျော်ကို ဖမ်းဆီး   သတင်းနှင့် မီဒီယာ ကွန်ရက်။ ၂၀၂၄ ခုနှစ်၊ ဒီဇင်ဘာလ ၂၄ ရက်။   တနင်္သာရီမြို့နယ် နယ်စပ်ကုန်သွယ်ရေး လမ်းကြောင်းပေါ်ရှိ သိန်ခွန်းကျေးရွာတွင် စစ်ကောင်စီတပ်ဖွဲ့က ရွာ သား အယောက် ၂၀ ကျော်ကို ဖမ်းဆီးထားပြီးနောက် ကျန်သည့် ရွာသားများကိုလည်း ရွာထဲမှ ထွက်ခွင့် မပေးဘူးဟု ရွာသားများက ပြောသည်။   ဒီဇင်ဘာလ ၂၂ ရက်နေ့တွင် သိန်ခွန်းကျေးရွာသို့ ရောက်ရှိနေသည့် စစ်ကောင်စီတပ်မှ အမျိုးသမီး၊ အမျိုးသား ၂၀ ကျော်ခန့်ကို ဖမ်းဆီးထားခြင်း ဖြစ်သည်။   အသက် ၄၀ ခန့်အရွယ်ရွာသားတစ်ဦးက “အဖမ်းခံရတဲ့အထဲမှာ အမျိုးသမီးတွေက ပိုပြီးများတယ်၊ သတင်းပေး လို့ သံသယရှိတဲ့သူတွေကို ဖမ်းထားတာ” ဟု ပြောသည်။   တနင်္သာရီ - မောတောင် ကားလမ်း တလျောက်ရှိ ကျေးရွာများ ဖြစ်ကြသည့် ရေဖြူ၊ ထုံခါနှင့် သိန်ခွန်းကျေးရွာ များတွင် ဒီဇင်ဘာလ ၁၇ ရက်နေ့မှ စတင်ပြီး စစ်ကြောင်းထိုးလာသည့် စစ်ကောင်စီတပ်နှင့် ပြည်သူ့ ကာကွယ် ရေး ပူးပေါင်းတပ်ဖွဲ့များ အကြား နှစ်ဘက်တိုက်ပွဲများ ဆက်တိုက် ဖြစ်ပွားနေခြင်း ဖြစ်သည်။   စစ်ကောင်စီ စစ်ကြောင်းက အင်အား ၃၀၀ ခန့်ဖြင့် ကားလမ်းအတိုင်း မောတောင်မြို့ဘက်ကို ဦးတည်ကာ စစ် ကြောင်းထိုးနေခြင်း ဖြစ်သည်။   ဒီဇင်ဘာလ ၂၁ ရက်နေ့တွင် သိန်ခွန်းကျေးရွာသို့ စတင် ဝင်ရောက်လာခဲ့ခြင်း ဖြစ်ပြီး ရောက်ရှိလာသည့် နေ့မှာပင် ပြည်သူ့ကာကွယ်ရေး ပူးပေါင်းတပ်ဖွဲ့များနှင့် နှစ်ဘက်တိုက်ပွဲများ ဖြစ်ပွားခဲ့သည် ဟု ရွာသားတစ်ဦးက ဆိုသည်။   နှစ်ဖက် တိုက်ပွဲများကြောင့် သိန်ခွန်းကျေးရွာမှ ရွာသားအများစု ကြိုတင် စစ်ရှောင်ကြသော်လည်း ကျေးရွာတွင် ကျန်ခဲ့သူ အမျိုးသမီးများနှင့် အချို့ အမျိုးသားများ ဖမ်းဆီးခံရခြင်း ဖြစ်သည်ဟု ဆိုသည်။   ရွာသားများကို ဖမ်းဆီးခြင်းများအပြင် နေအိမ်များကို ဖျက်ဆီးခြင်းနှင့် ပစ္စည်းများကို ယူသွားခြင်းများလည်း ရှိနေသည်ဟု ဆိုသည်။ 
လက်ရှိတွင် သိန်ခွန်းကျေးရွာထဲတွင် စစ်ကောင်စီတပ်မှ တပ်စွဲထားသလို ကျေးရွာအပြင် ပတ်လည်တွင်လည်း တပ်ဖြန့်ထားသည်ဟု ရွာသားများက ပြောသည်။   တနင်္သာရီ - မောတောင် ကားလမ်းတလျှောက်ရှိ လယ်တောင်ယာ၊ တမုတ်ချုံး၊ ရှမ်းအင်းတော်၊ ရေဖြူ၊ ထုံခါ၊ ကော့ယွန်း၊ ချောင်းနှစ်ပေါက်၊ သိန်ခွန်း၊ သဲဖြူနှင့် အမှတ် (၉) ကျေးရွာများမှ ရွာသားများ တိုက်ပွဲ အခြေအနေ များကြောင့် အရေးပေါ် စစ်ရှောင်နေကြရဟု ဆိုသည်။   ဒီဇင်ဘာလ ၁၈ ရက်နေ့နှင့် ၁၉ ရက်နေ့တွင်လည်း ရေဖြူနှင့် ထုံခါကျေးရွာတို့ အနီးတွင် တိုက်ပွဲများ ဖြစ်ခဲ့သေးကြောင်း ရွာသားများက ပြောသည်။   တိုက်ပွဲ စဖြစ်ခဲ့သည့် ဒီဇင်ဘာလ ၁၈ ရက်နေ့ကလည်း စစ်ကောင်စီဘက်က တိုက်လေယာဥ်ဖြင့် ချောင်းနှစ် ပေါက်ကျေးရွာ အနီးတဝိုက်ကို ၃ ကြိမ် ဗုံးကြဲတိုက်ခိုက်ခဲ့သေးသည်။   နှစ်ဖက်တိုက်ပွဲ အခြေအနေများကြောင့် ရေဖြူ - မောတောင် နယ်စပ်ကုန်သွယ်ရေး လမ်းပိုင်းကို ဖြတ်သန်းခွင့် ပိတ်ထားလိုက်ပြီ ဖြစ်ကြောင်း မောတောင်မြို့ခံများက ဆိုသည်။

သိန်ခွန်း နယ်စပ်ကုန်သွယ်ရေးလမ်းတွင် ရွာသား ၂၀ ကျော်ကို ဖမ်းဆီး

သိန်ခွန်း နယ်စပ်ကုန်သွယ်ရေးလမ်းတွင် ရွာသား ၂၀ ကျော်ကို ဖမ်းဆီး သတင်းနှင့် မီဒီယာ ကွန်ရက်။၂၀၂၄ ခုနှစ်၊ ဒီဇင်ဘာလ ၂၄ ရက်။ တနင်္သာရီမြို့နယ် နယ်စပ်က…

  • December 24, 2024
×Close