ဖားကန့် – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Tag Archive

Tag: ဖားကန့်

ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၂၃ ရက်။ ကချင်ပြည် ဗန်းမော်၊ ဝိုင်းမော်နှင့် ဖားကန့်တို့တွင် စစ်ရေးတင်းမာမှုများနှင့်အတူ တိုက်ပွဲများ ဆက်လက် ဖြစ်ပွား နေပြီး စစ်ကော်မရှင်တပ်က တပ်အင်အားတိုးချဲ့ဖြည့်တင်းမှုများ လုပ်ဆောင်နေသည်ဟု ကချင်လွတ်လပ်ရေး အဖွဲ့ KIO/KIA က ပြောသည်။ ရွေးကောက်ပွဲမတိုင်ခင် ရှုံးဆုံးသွားသည့် နယ်မြေများအား ပြန်လည်ထိန်းချုပ်နိုင်ရေး ဗန်းမော်၊ ဝိုင်းမော်နှင့် ဖားကန့်ဒေသတို့ကို စစ်ကော်မရှင်က ပြင်းပြင်းထန်ထန် ထိုးစစ်ဆင် တိုက်ခိုက်နေသည်ဟု KIO ပြောရေးဆိုခွင့် ရှိသူ ဗိုလ်မှူးကြီးနော်ဘူက ပြောသည်။ “ကချင်ပြည်နယ်ရဲ့ စစ်ရေးအခြေအနေကတော့ ဗန်းမော်ဘက်က ခါတိုင်းပြောသလိုပေါ့ အမြဲတမ်း တိုက်ပွဲတွေ ရှိပါတယ်။ နောက်ဝိုင်းမော်ဘက်မှာ တိုက်ပွဲရှိပါတယ်။ ဖားကန့်ဘက်မှာ တိုက်ပွဲတွေ ရှိပါတယ်။ အဲဒီ ၃ နေရာ ကတော့ လောလောဆယ် ကချင်ပြည်နယ်မှာ တိုက်ပွဲအခြေအနေတွေ စစ်ရေးအခြေအနေကတော့ တင်းမာတဲ့ အနေအထား ဖြစ်ပါတယ်။ အခု လောလောဆယ်ကတော့ သူတို့လည်း ဒီဇင်ဘာလမှာ ရွေးကောက်ပွဲလုပ်မယ်လို့ အားလုံးအသိ ဖြစ်ပါတယ်။ ရွေးကောက်ပွဲမရောက်ခင်မှာ သူတို့ ကချင်ပြည်နယ် တော်တော်များများမှာ သူတို့ က မဲပုံးတွေထောင်နိုင်ဖို့ မဲရုံတွေထောင်နိုင်ဖို့ စစ်ရေးကနေ တော်တော်ကြိုးစားတဲ့ဟာမျိုး ကြိုးစားတာလို့ ကျနော် သုံးသပ်မိပါတယ်။” တိုက်ပွဲဖြစ်ပွားနေသည့် မြို့နယ် ၃ မြို့နယ်ထဲ စစ်ကော်မရှင်တပ်က တပ်အင်အား ဖြည့်တင်းထားသည်ဟု ဗိုလ်မှူးကြီးနော်ဘူက ဆက်ပြောသည်။ “ဗန်းမော်ဘက်မှာကတော့ သူတို့ရဲ့ ၈ လပိုင်းမှာ သင်္ဘောဝင်တဲ့ အဲဒီနောက်ပိုင်းမှာ သင်္ဘောမှာ စစ်အင်အားတွေ လက်နက်အင်အားတွေ ဖြည့်ထားတယ်။ အဲဒါကြောင့် သူတို့က စစ်ဆင်ရေးတွေလည်း တော်တော် ပြင်းပြင်း ထန်ထန် သူတို့လှုပ်ရှားတာတွေ့ရပါတယ်။ ကျန်တဲ့ ဖားကန့်တို့ ဝိုင်းမော်တို့မှာကတော့ မပခ အင်အားတွေပဲ ဖြစ်မှာ။ အပြင်ကနေ စစ်အင်အားတွေ ဝင်လာတာကတော့ မကြားရသေးပါဘူး။” ဖားကန့်မြို့နယ်ထဲကို ကာမိုင်းဘက်မှ ဝင်လာသည့် စစ်ကော်မရှင် စစ်ကြောင်းမှာ ဖားကန့်ကို ဝင်ရောက်သွားပြီ ဟု ဗိုလ်မှူးကြီးနော်ဘူက ပြောသည်။ ဖားကန့်ကို ဝင်ရောက်ရာ၌ လက်နက်ကြီးများ၊ ဒရုန်းများဖြင့် လူနေရပ်ရွာများထဲ ပစ်ခတ်ခဲ့သည့်အတွက် အရပ် သား ပြည်သူ သေဆုံးမှုများ ရှိခဲ့သည်။ ထို့အပြင် ဗန်းမော်ဘက်တွင် နှစ်ဖက်ကြား စစ်ရေးတင်းမာမှုများနှင့် အတူ စစ်ကော်မရှင်တပ်က လက်နက်ကြီး ဖြင့် ပစ်ခတ်မှုများကို ဆက်တိုက် လုပ်ဆောင်နေသည်ဟု ဆိုသည်။ ဗန်းမော်မြို့က နေရာအချို့ကိုလည်း စစ်ကော်မရှင်တပ်က စက်တင်ဘာလ ဒုတိယပတ်မှစတင်၍ ပြန်လည် ထိန်း ချုပ်နိုင်ပြီ ဖြစ်သည်ဟု KIO ပြောခွင့်ရက ဆိုသည်။ ပြောဆိုပါတယ်။ ဗိုလ်မှူးကြီး နော်ဘူ က “သူတို့ကတော့ ထိန်းချုပ်နိုင်တယ်လို့တော့ ပြောတယ်။ ဒါပေမဲ့ အပြီးအပိုင်ပေါ့နော အားလုံး သူတို့ ထိန်းချုပ်တဲ့အနေအထားတော့ မရှိပါဘူး။ ကျနော်တို့ KIA နဲ့ ပူးပေါင်းတပ်တွေလည်း မြို့တွင်း မှာလည်း နဂိုအတိုင်း ရှိပါတယ်။ နောက် သူတို့ရဲ့တပ်စခန်းတွေ သူတို့ရဲ့ တပ်ရင်းဌာနချုပ် ပတ်ဝန်းကျင်မှာ လည်း ကျနော်တို့လည်း နေရာယူထားတာရှိပါတယ်။ ဆိုတော့ သူတို့လည်း ရှိတယ်။ ကျနော်တို့လည်း ရှိတာ ပေါ့။ အချင်းချင်း စောင့်ကြည့်တဲ့ အနေအထား ဖြစ်ပါတယ်ခင်ဗျာ” ဟု ပြောသည်။ စစ်ကော်မရှင်တပ်က စက်တင်ဘာလ ၁၁ ရက်နေ့တွင် ဗန်းမော် သံချပ်ကာကားတပ်ရင်းနှင့် ခလရ ၂၃၆ ကို ပြန်လည်ထိန်းချုပ်ထားပြီဟု ဗိုလ်မှူးကြီးနော်ဘူက ပြောသည်။ စစ်ကော်မရှင်တပ်က ကချင်ပြည်အပြင် တစ်နိုင်ငံလုံးအတိုင်းအတာဖြင့် ၎င်းတို့ ရှုံးဆုံးထားရသည့် နယ်မြေများ ကို ရွေးကောက်ပွဲ မတိုင်မီ ပြန်လည်ရယူနိုင်ရေး ပြင်းပြင်းထန်ထန် ထိုးစစ်ဆင် တိုက်ခိုက်နေခြင်း ဖြစ်သည်။ ပြန်လည်ရယူဖို့ ကြိုးစားနေသည့် နယ်မြေများ၌ ရွေးကောက်ပွဲ ပြုလုပ်နိုင်ရေး ရည်ရွယ်ချက်ဖြင့် ယခုကဲ့သို့ အင်အား အလုံးအရင်းဖြင့် ထိုးစစ်ဆင် တိုက်ခိုက်နေခြင်း ဖြစ်သည်ဟု တော်လှန်ရေး အင်အားစုများက ပြော သည်။ #ကချင် #ဗန်းမော် #ဖားကန့် #ဝိုင်းမော် #စစ်ကော်မရှင်

ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့

ဝိုင်းမော်တွင် တိုက်ပွဲပြင်းထန်၊ ကျောင်းအချို့ ပိတ်ထားရ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ စက်တင်ဘာလ ၁၀ ရက်။ ကချင်ပြည်၊ ဝိုင်းမော်မြို့နယ်အတွင်း စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းတပ် တို့ အကြား တိုက်ပွဲများ ဖြစ်ပွားနေပြီး ကျောင်းအချို့ ပိတ်ထားရသည်ဟု ဒေသခံများက ပြောသည်။ ဝိုင်းမော်မြို့နယ်အတွင်းက တိုက်ပွဲများထဲ စစ်တပ်က လေကြောင်းမှ ဗုံးကြဲတိုက်ခိုက်မှုများ လုပ်နေသည်ဟု ဒေသခံများက ပြောသည်။ ဒေသခံ အမျိုးသား တစ်ဦးက “ဒီလိုလေကြောင်း တိုက်ခိုက်မှုတွေကြောင့် စက်တင်ဘာလ ၉ ရက်နေ့ မနေ့က စပြီး ကျောင်းတချို့ ပိတ်ထား လိုက်ရတယ်။ ဒီနေ့လည်း ကျနော်တို့က ကလေးတွေကို စိုးရိမ်လို့ ကျောင်းမပို့ ဘူး။ အခြေနေကို ဆက်စောင့်ကြည့်နေတုန်းဗျ။ မနေ့ကဆို တနေကုန်နီးပါးပဲ အသံတွေ ကြားနေရတာ” ဟု ပြော သည်။ ကျောင်းသားမိဘများ ကလေးများအတွက် စိုးရိမ်ပြီး ကျောင်းမပို့ဘဲ အခြေအနေကို ဆက်ပြီး စောင့်ကြည့်နေကြ သည်ဟု ဆိုသည်။ စက်တင်ဘာ ၉ ရက်နေ့တွင် ဝိုင်းမော်မြို့နယ်ထဲ စစ်တပ်က လေယာဉ်ဖြင့် ဗုံးကြဲခဲ့သည့်အပြင် လမြန်ကျေးရွာနှင့် နမ့်ဝါကျေးရွာ ပတ်ဝန်းကျင်ကိုလည်း မြောက်ပိုင်းတိုင်း စစ်ဌာနချုပ် (မပခ) ဘက်ကနေပါ လက်နက်ကြီးများဖြင့် ဆက်တိုက် လှမ်းပစ်နေသည်ဟု ဆိုသည်။ ထို့အပြင် ဖားကန့်မြို့နယ်ထဲတွင်လည်း စက်တင်ဘာလ ၉ ရက်နေ့က စစ်ကော်မရှင်တပ်၏ လက်နက်ကြီးဖြင့် ပစ်ခတ်မှုတို့ကြောင့် အရပ်သား ၁၀ ဦး ထိမှန်ဒဏ်ရာ ရခဲ့သည်။ ဖားကန့်ဗျူဟာကုန်းမှ ဆိပ်မူကျေးရွာဘက်ခြမ်းကို အကြောင်းမဲ့သက်သက် လက်နက်ကြီး အလုံး (၂၀) ခန့် ပစ်ခဲ့သည်ဟု ဖားကန့်ဒေသခံ တစ်ဦးက ပြောသည်။ ဆိပ်မူကျေးရွာအုပ်စု၊ ဘဇံချောက်ကျေးရွာက အရပ်သားပြည်သူ ၁၀ ဦး ထိမှန်ဒဏ်ရာရခဲ့ပြီး ၄ ဦးမှာ စိုးရိမ်ရ သည်ဟု ဆိုသည်။ အလားတူ စက်တင်ဘာလ ၉ ရက်နေ့၊ နေ့လည် ၂ နာရီအချိန်ခန့်တွင် ဆိပ်မူကျေးရွာ အုပ်စုထဲက ဆန်းကြွယ် ကျေးရွာရှိ ဘုရားကုန်းနေရာဘက်ကို လေယာဉ်ဖြင့် ဗုံးကြဲသွားခဲ့သေးသည်ဟု ဒေသခံများက ပြောသည်။

ဝိုင်းမော်တွင် တိုက်ပွဲပြင်းထန်၊ ကျောင်းအချို့ ပိတ်ထားရ

ဝိုင်းမော်၊ ဗန်းမော်နှင့် ဖားကန့်မြို့နယ်တို့တွင် တိုက်ပွဲများ ပြင်းထန် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ကချင်ပြည်ထဲက ဝိုင်းမော်၊ ဗန်းမော်နှင့် ဖားကန့်မြို့နယ်တို့တွင် စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ကြား တိုက်ပွဲများ ဖြစ်နေပြီး အရပ်သားသေဆုံးမှုများ ရှိနေသည်။ မြစ်ကြီးနားတဖက်ကမ်းက ဝိုင်းမော်မြို့နယ်ထဲတွင် စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ကြား တိုက်ပွဲများ ဖြစ်နေပြီး လေကြောင်းကနေလည်း ဗုံးကြဲတိုက်ခိုက်နေသည်ဟု ဒေသခံများက ပြောသည်။ ဝိုင်းမော်မြို့နယ်ထဲက လမြန်ကျေးရွာဘက်ကို စစ်ကော်မရှင်တပ်က စစ်ကြောင်းထိုးလာသောကြောင့် တိုက်ပွဲ များ ပြန်ဖြစ်နေပြီး ဩဂုတ်လ ၂၆ ရက်နေ့တွင် လေကြောင်းမှ ဗုံးကြဲတိုက်ခိုက်ခဲ့သည်ဟု ဒေသခံများက ပြော သည်။ ဒေသခံတစ်ဦးက “လမြန်ရွာဘက်ကို လက်နက်ကြီးတွေနဲ့ အရင်ပစ်တာပါ။ ဩဂုတ် ၂၆ ရက်နေ့ မနက်ပိုင်း မှာပေါ့နော်။ လက်နက်ကြီးနဲ့ ပစ်တယ်။ အဲ့ဒါပြီးမှ နေ့လည် ၁ နာရီလောက် ဖြစ်မယ်ထင်တယ်။ လေယာဉ်နဲ့ ပြန်လာပစ်တာက။ ဂျက်ဖိုက်တာပေါ့နော်၊ အဲ့ဒါနဲ့ နှစ်ကြိမ် ပစ်သွားတာပါ” ဟု ပြောသည်။ ဝိုင်းမော်မြို့နယ်ထဲ့ လမြန်နှင့် ဝူယန်ကျေးရွာ အနီး ပတ်ဝန်းကျင်တွင် တိုက်ပွဲများ ဖြစ်ပွားနေသည်ဟု အဆိုပါ ဒေသခံက ပြောသည်။ ကချင်ဒေသထဲက တိုက်ပွဲများမှာ ဝိုင်းမော်မြို့နယ်အပြင် ဗန်းမော်နှင့် ဖားကန့်မြို့နယ်ထဲတွင်ပါ ပြင်းပြင်းထန်ထန် ဖြစ်ပွားနေခြင်း ဖြစ်သည်။ ဖားကန့်မြို့နယ်ထဲတွင် ဩဂုတ်လ ၂၆ ရက်နေ့ကလည်း ပစ်ခတ်မှုများ ရှိခဲ့သည်ဟု ဒေသခံများက ပြောသည်။ အထူးသဖြင့် ဖားကန့်မြို့နယ်ထဲက မှော်ဝမ်းလေး၊ မှော်ဝမ်းကြီးကျေးရွာဘက်၌ တိုက်ပွဲများ ဖြစ်နေပြီး အမှိုက်ပုံ (ခေါ်) ဆွတ်ဘွမ်ကျေးရွာဘက်၌လည်း တိုက်ပွဲသံများ ကြားနေရသည်ဟု ဆိုသည်။ ထို့အပြင် စစ်ကော်မရှင်၏ ဖားကန့်ဗျူဟာကုန်းမှ လက်နက်ကြီးနှင့် ပစ်ခတ်ခဲ့သောကြောင့် ဖားကန့်မြို့မ မဏိဇေယျုံ ဘုန်းကြီးကျောင်းက ဆွမ်းချက်ဆောင်ပေါ် ပေါက်ကွဲခဲ့ပြီး ကိုရင် နှစ်ပါး ထိခိုက် ဒဏ်ရာရခဲ့သည်။ ဆိပ်မူကျေးရွာအုပ်စုထဲတွင်လည်း လက်နက်ကြီးကျခဲ့ပြီး အမျိုးသားတစ်ဦး ထိမှန်ဒဏ်ရာ ရခဲ့သည့်အပြင် လုံးခင်းကျေးရွာအုပ်စုထဲကျခဲ့သည့် လက်နက်ကြီးကြောင့် ပြည်သူ ၄ ဦး ထိမှန်ဒဏ်ရာ ရခဲ့သည်။ အလားတူ ဗန်းမော်မြို့နယ်ထဲတွင်လည်း တိုက်ပွဲများ ပြင်းထန်နေသည်။ စကခ−၂၁ အပါအဝင် နေရာ သုံးနေရာ ထက် မနည်း၌ ဩဂုတ်လ ၂၆ ရက်နေ့က တိုက်ပွဲ ပြင်းပြင်းထန်ထန် ဖြစ်ခဲ့သည်ဟု မြေပြင် သတင်းအရင်းအမြစ် က ဆိုသည်။ ဗန်းမော်ခရိုင်ထဲက ရွှေကူမြို့နယ်တွင်လည်း စစ်တပ်က လက်နက်ကြီးနှင့် ပစ်ခတ်ခဲ့ရာ တပတ်အတွင်း အရပ်သား ၃ ဦး သေဆုံးခဲ့သည်။ အဆိုပါ တိုက်ပွဲများ အပြင် မြို့တော် မြစ်ကြီးနားတွင်လည်း လက်နက်ကြီး ကျရောက်ပေါက်ကွဲမှုကြောင့် အရပ်သား သေဆုံးမှုများ ရှိနေသည်။ ဩဂုတ်လ ၂၄ ရက်နေ့၊ ညနေပိုင်းတွင် မြစ်ကြီးနားမြို့၊ ရမ်ပူရပ်ကွက်ထဲ လက်နက်ကြီးကျည် ကျရောက် ပေါက်ကွဲခဲ့သောကြောင့် ကလေးတစ်ဦး သေဆုံးပြီး အမျိုးသမီး ၂ ဦး ထိမှန်ဒဏ်ရာ ရခဲ့သည်။

ဝိုင်းမော်၊ ဗန်းမော်နှင့် ဖားကန့်မြို့နယ်တို့တွင် တိုက်ပွဲများ ပြင်းထန်

ဖားကန့် ပစ်ခတ်မှု အမျိုးသမီး ၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ကချင်ပြည်၊ ဖားကန့်မြို့တွင် စစ်ကော်မရှင်တပ်၏ ပစ်ခတ်မှုကြောင့် အမျိုးသမီးတစ်ဦး သေဆုံးပြီး ၃ ဦး ထိမှန် ဒဏ်ရာရခဲ့သည်ဟု ဒေသခံများက ပြောသည်။ တိုက်ပွဲများ ဖြစ်ပွားနေသည့် ဖားကန့်မြို့တွင် စစ်ကော်မရှင်တပ်က စစ်ကြောင်းထိုးရင်း ပစ်ခတ်မှုကြောင့် ဒေသခံ ပြည်သူများ ထိမှန်သေဆုံး ဒဏ်ရာရခဲ့ခြင်း ဖြစ်သည်ဟု ဆိုသည်။ ဒေသခံတစ်ဦးက “မှော်စီစာ တောင်ပေါ်ကျောင်းမှာ တပ်စွဲထားတဲ့ စစ်ကောင်စီအုပ်စုထဲက အင်အား ၁၀၀ ကျော်က ဖားကန့်ကို ခြေလျင် စစ်ကြောင်းထိုးတယ်။ တစ်လမ်းလုံး ဟိုပစ်ဒီပစ် လုပ်သွားတာတွေ ရှိတယ်။ အမျိုးသမီး တစ်ဦးကတော့ ပန်းတင်တံတား ထိပ်မှာတော့ ပြည်သူတွေ ပစ်ခတ်ခံရတယ်။ အမျိုးသမီးတစ်ဦးက ပွဲချင်းပြီး သေဆုံးသွားတယ်။ အဲ့ဒီနောက်တော့ အဲ့ဒီစစ်ကြောင်းက ဗျူဟာကုန်းကို ထပ်ဝင်သွားတယ်။ စုပေါင်း ရုံးမှာလည်း နေရာယူထားကြတယ်လို့ သိရတယ်” ဟု ပြောသည်။ ဩဂုတ်လ ၂၅ ရက်နေ့ (ယမန်နေ့)၊ နံနက်ပိုင်း ၇ နာရီ အချိန်ခန့်တွင် မှော်စီစာကျေးရွာ ဘုရားကုန်း၌ တပ်စွဲထား သည့် အင်အား ၁၀ ၀ကျော်ရှိသော စစ်ကော်မရှင် ပူးပေါင်းတပ်ဖွဲ့သည် ဖားကန့်မြို့ ဗျူဟာကုန်းသို့ ခြေလျင်ဖြင့် သွားရောက် ပူးပေါင်းစဥ် လမ်းတစ်လျှောက် ပစ်ခတ်မှုများ ပြုလုပ်ခဲ့ခြင်း ဖြစ်သည်။ ထို့ကြောင့် ဖားကန့်မြို့အဝင် ပန်းတင်တံတားအနီးတွင် အထက်ပါ ဒေသခံများ ပစ်ခတ်ခံခဲ့ရခြင်း ဖြစ်ပြီး အဆိုပါ စစ်ကြောင်းသည် ဖားကန့်မြို့ပေါ်သို့ ဆက်လက် ထွက်ခွာသွားသည်ဟု ဒေသခံများက ပြောသည်။ ပြီးခဲ့သည့် ဩဂုတ်လ ၂၄ ရက်နေ့ကလည်း နမ္မဖြစ်ကျေးရွာတစ်ဝိုက်တွင် စစ်ကော်မရှင် တပ်ဖွဲ့ဝင်များ စီးလာသည့် အိမ်စီးကားတစ်စီးကို ကချင်လွတ်လပ်ရေး တပ်မတော် KIA နှင့် ပူးပေါင်းတပ်တို့က ကြားဖြတ် တိုက်ခိုက်ခဲ့ရာ ဒရုန်း ၅ စီး၊ ကားတစ်စီး အပါအဝင် စစ်သုံ့ပန်းများကို အရှင်ဖမ်းမိခဲ့သေးသည်။ ကင်းထောက်ဒရုန်း ၁ စီးနှင့် တိုက်ခိုက်ရေး ဒရုန်း ၄ စီးကို KIA က သိမ်းဆည်းရမိခဲ့သည်ဟု သိရပြီး အဆိုပါ ဖြစ်စဥ်နောက်ပိုင်း ဩဂုတ်လ ၂၄ ရက်နေ့တွင် ဖားကန့် - လုံးခင်း လမ်းမကြီး၌ အရပ်သား ကားတစ်စီးကို စစ်တပ်က ဖမ်းဆီးခဲ့သည်။ ဖားကန့်မြို့ မြောက်ဘက်ခြမ်းရှိ မှော်ဝမ်းကြီး၊ မှော်ဝမ်းလေး၊ ရှရော်ခ၊ ညောင်ပင်ကုန်း၊ အမှိုက်ပုံကျေးရွာ တစ်ဝိုက်တွင်လည်း နှစ်ဖက်ကြား စစ်ရေး ဆက်လက် တင်းမာနေပြီး ဒရုန်းအသုံးပြု တိုက်ခိုက်မှုများ ဆက်တိုက် လုပ်နေသည်ဟု ဒေသခံများက ပြောသည်။ ဖားကန့် စစ်ရေး အခြေအနေ စောင့်ကြည့်နေသူ တစ်ဦးက “လက်ရှိ စစ်ရေးအခြေအနေကတော့ မှော်ဝမ်းကြီး၊ မှော်ဝမ်းလေး တစ်ဝိုက်ဘက်မှာတော့ စစ်ရေး တင်းမာနေတယ်။ အမှိုက်ပုံရွာဘက်မှာတော့ တောက်လျှောက် အပြန်အလှန် ပစ်ခတ်မှုတွေ ရှိတယ်။ စစ်တပ် ဘက်ကတော့ ဒရုန်းများများ အသုံးပြုပြီးတော့ ဒရုန်းဗုံးတွေ ကြဲချတာတွေ လက်နက်ကြီး ပစ်ခတ်တာ တွေ ပြင်းပြင်းထန်ထန် လုပ်တယ်လို့ ကြားရတယ်” ဟု ပြောသည်။ ဖားကန့်မြို့တွင် စစ်ကော်မရှင်တပ်နှင့် ရှမ်းနီတပ် ပူးပေါင်းအဖွဲ့က ပြီးခဲ့သည့် မေလနောက်ဆုံး အပတ်မှ စတင်ကာ ဖားကန့်မြို့ကို ထိုးစစ်ဆင်ခဲ့ပြီး KIA ပူးပေါင်းတပ်နှင့် နေ့စဥ် ထိတွေ့မှုများ ဖြစ်ပွားနေသည်။ ထို့အပြင် ဖားကန့်မြို့ကို ဝင်ရောက်နိုင်သည့်လမ်းများကိုလည်း စစ်တပ်နှင့် ရှမ်းနီတပ်က ပြန်လည် ထိန်းချုပ်ထား သည်။ လက်ရှိတွင် တင်းမာလာသည့် နှစ်ဖက်ကြားက စစ်ရေးအခြေနေများကြောင့် ဖားကန့်မြို့နယ်အတွင်းရှိ ရှရော်ခ၊ လုံးခင်း၊ ဆိုင်းတောင်၊ မှောစီစာစသည့် ကျေးရွာများ အပါအဝင် ရွာပေါင်းများစွာက ဒေသခံထောင်နှင့်ချီမှာ ဘေးလွှတ်ရာများသို့ စစ်ဘေး တိမ်းရှောင်နေကြရသည်။ အလားတူ ဖားကန့်မြို့ကို ဝင်ရောက်နိုင်သည့် လမ်းကြောင်းများကို စစ်တပ်နှင့် ပူးပေါင်းအဖွဲ့တို့က ပိတ်ဆို့ထား သည့်အတွက် ဒေသတွင်း ကုန်ဈေးနှုန်းများ မြင့်တက်ကာ စက်သုံးဆီပါ ပြတ်တောက်နေသည်။ စစ်ကောင်စီတပ်သည် မြန်မာနိုင်ငံတစ်ဝှမ်းရှိ ၎င်းတို့လက်လွှတ်ထားရသည့် မြို့များကို ပြန်လည် ရယူရန် အရှိန် အဟုန်မြင့် ကြိုးစားလာနေပြီး ကချင်ပြည်တွင် ဖားကန့်မြို့၊ ဗန်းမော်မြို့နှင့် အင်းတော်ကြီးဒေသ အပါအဝင် ဝိုင်းမော်မြို့တွင်လည်း တိုက်ပွဲများ ဆက်လက် ဖြစ်ပွားနေသည်။

ဖားကန့် ပစ်ခတ်မှု အမျိုးသမီး ၃ ဦး ဒဏ်ရာရ

စစ်ကော်မရှင် ဒရုန်းကြောင့် ကျောင်းသား တစ်ဦး အပါ အရပ်သား ၅ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၅ ရက်။ ကချင်ပြည်၊ ဖားကန့်မြို့တွင် စစ်ကော်မရှင်တပ်က ဒရုန်းနှင့် ဗုံးကြဲတိုက်ခိုက်ခဲ့သဖြင့် ကျောင်းသားတစ်ဦး အပါအဝင် အရပ်သား ၅ ဦး ထိခိုက်ဒဏ်ရာရခဲ့သည်။ ဩဂုတ်လ ၁၄ ရက်နေ့ ယနေ့မွန်းလွှဲ ၁ နာရီဝန်းကျင် အချိန်တွင် ဖားကန့်မြို့၊ အေးမြသာယာ အုပ်စုထဲက ရှရော်ခကျေးရွာ အတွင်းရှိ နေအိမ်ခြံဝင်းထဲတွင် ဒရုန်းဖြင့် ဗုံးကြဲခဲ့ခြင်း ဖြစ်သည်။ ဖားကန့် ဒေသခံတစ်ဦးက “ရှရော်ခရွာထဲ ဒရုန်းဗုံးသီးချတာက စစ်ကောင်စီက လုပ်တာဟုတ်တယ်။ အဲ့ဒီဘက် တစ်ဝိုက်မှာက နှစ်ဖက်တပ်တွေ မျက်နှာချင်းဆိုင်ထားတဲ့ အနေအထားဖြစ်ပေမဲ့ တိုက်ပွဲ ဖြစ်ပွားတာ မရှိဘဲနဲ့ ရည်ရွယ်ချက်ရှိရှိ ဒရုန်း ဗုံးသီးချတာပေါ့ဗျာ” ဟု ပြောသည်။ ထိခိုက်ဒဏ်ရာ ရသူများထဲပါဝင်သည့် ကျောင်းသားမှာ ဆယ်တန်းကျောင်းသား ဖြစ်သည်။ စစ်ကောင်စီတပ်က ဖားကန့်မြို့ရှိ အရပ်သားများ နေထိုင်သည့် ရပ်ရွာများထဲ ယခုကဲ့သို့ ဒရုန်းဖြင့် ဗုံးကြဲချခြင်း၊ လက်နက်ကြီးများဖြင့် ပစ်ခတ်ခြင်းများကို မကြာခဏ ပြုလုပ်လေ့ရှိသည်ဟု ဒေသခံများက ပြောသည်။ ထိခိုက်ဒဏ်ရရှိသူများသည် အသက် ၁၆ နှစ် အရွယ် ၁၀ တန်းကျောင်းသား မောင်ထန်ရှမ်းခိုင်၊ ကိုဝင်းနိုင် အသက် ၅၂ နှစ် အရွယ် ကိုဝင်းနိုင်၊ အသက် ၅၆ နှစ်အရွယ် ကိုရဲနိုင်၊ အသက် ၅၇ နှစ်အရွယ် ကိုထူးကျော် နှင့် အသက် ၅၀ နှစ်အရွယ် ကိုတင်ထွဋ် ၅၀ တို့ဖြစ်ကြသည်။ ထိခိုက်ဒဏ်ရာရှိခဲ့သူများနက် နှစ်ဦးမှာ ပြင်းထန်ဒဏ်ရာများကြောင့် အသက်အန္တရာယ် စိုးရိမ်ရသည်ဟု နီးစပ်သူ များက ပြောသည်။ အခြား ဖားကန့်ဒေသခံတစ်ဦးက “တိုက်ပွဲမရှိဘဲ ပြည်သူလူထုကို အကြောက်တရားပေးသွင်းတဲ့ အနေနဲ့ ရွာထဲ လူစုတဲ့ နေရာတွေကို ဒရော့ဗုံးချတာလို့ ထင်ပါတယ်” ဟု စစ်ကောင်စီ၏ လုပ်ရပ်အပေါ် သုံးသပ်ပြောဆိုသည်။ စစ်ကော်မရှင်တပ်နှင့် ရှမ်းနီ အမျိုးသားတပ်မတော် SNA ပူးပေါင်းတပ် စစ်ကြောင်းတို့သည် မေလနောက်ဆုံး အပတ်မှ စတင်ကာ ဖားကန့်မြို့ကို ဝင်ရောက်နိုင်ခဲ့ပြီး မြို့ကို ဝင်ရောက်နိုင်သည့် လမ်းပိုင်းများကိုပါ ထိန်းချုပ် ထားသည့် အပြင် နေရာအချို့ကိုပါ ပြန်လည်နေရာယူထားနိုင်ပြီ ဖြစ်သည်။ အဆိုပါ စစ်ကြောင်းမှာ ကချင်လွတ်လပ်ရေး တပ်မတော် KIA ပူးပေါင်းတပ်ဖွဲ့များနှင့် စစ်ရေးတင်းမာနေပြီး ရှရော်ခ၊ လုံးခင်း၊ ဆိုင်းတောင်၊ မှောစီစာစသည့် ကျေးရွာများ အပါအဝင် ရွာပေါင်းများစွာက ဒေသခံ အရပ်သား ထောင်နှင့်ချီမှာ ဘေးလွှတ်ရာသို့တွင် တိမ်းရှောင်နေကြရသည်။

စစ်ကော်မရှင် ဒရုန်းကြောင့် ကျောင်းသား တစ်ဦး အပါ အရပ်သား ၅ဦး ဒဏ်ရာရ

ဖားကန့်တွင် ဓါတ်ဆီဈေးတက်၊ ဆိုင်အချို့ပိတ်ထားရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၅ ရက်။ ကချင်ပြည်၊ ကျောက်စိမ်းမြို့တော် ဖားကန့်တွင် စက်သုံးဆီ တစ်ဂါလံကို ကျပ် ၇ သောင်းထိ ဈေးနှုန်းမြင့်တက် လာပြီး ဆိုင်အချို့ ပိတ်ထားရသည်ဟု ဒေသခံများက ပြောသည်။ စစ်ကော်မရှင်တပ် တကျော့ပြန် ဝင်ရောက်လာပြီး နောက်ပိုင်း ဖားကန့်မြို့သို့ ဝင်ရောက်နိုင်သည့် လမ်းပိုင်း များကို ထိန်းချုပ်လာနိုင်သည်နှင့်အတူ စက်သုံးဆီနှင့် အခြေခံစားသောက်ကုန် သယ်ယူခွင့်ကို ကန့်သတ်လိုက် ခြင်း ဖြစ်သည်။ ဒေသခံတစ်ဦးက “လမ်းကြောမှာက ထိန်းချုပ်မှုတွေ ရှိတာပေါ့။ SNA၊ ပြည်သူ့စစ်၊ စစ်ကောင်စီဂိတ်တွေက ထိန်းချုပ်ထားတာ ဟုတ်ပါတယ်။ ကာမိုင်း၊ လဝါး ဟိုးဘက် အင်းတော်ကြီးဒေသဘက်မှာ ဆိုရင် နန့်မွန်း တောင် လုံးတုံဂိတ်ကနေပြီးမှ တားဆီးထားတာ မှန်ပါတယ်” ဟု ပြောသည်။ ဖားကန့်မြို့ကို မေလနောက်ဆုံးပတ်မှ စတင်ကာ စစ်ကောင်စီတပ်နှင့် ရှမ်းနီအမျိုးသား တပ်မတော် SNA ပူးပေါင်းတပ် အင်အား ၆၀၀ ကျော်ဖြင့် စစ်ကြောင်းထိုး ဝင်ရောက်ခဲ့ပြီး မြို့ကို ဝင်ရောက်နိုင်သည့် လမ်းကြောင်း များကို ၎င်းတို့က ထိန်းချုပ်ထားခြင်း ဖြစ်သည်။ ထို့နောက် ဖားကန့်ဒေသတွင်း ကုန်စည်များ ပြတ်လပ်ခြင်း၊ စျေးတက်ခြင်းနှင့် ယခုတွင် စက်သုံးဆီပါ စျေးနှုန်း ထိုးတက်သွားခဲ့ခြင်း ဖြစ်သည်ဟု ဒေသခံများ ပြောသည်။ ယခုကဲ့သို့ ဈေးနှုန်း မတက်ခင်ကာလက စက်သုံးဆီ တစ်ဂါလံကို ကျပ် ၂သောင်းဝန်းကျင်း၊ တစ်လီတာ ၈,၃၀၀ ကျပ်ရှိခဲ့သည်ဟု ဆိုသည်။ လက်ရှိ စက်သုံးဆီ ဈေးနှုန်းအခြေအနေနှင့် ပတ်သက်၍ ဖားကန့်ဒေသခံက “ဈေးနှုန်းကတော့ တစ်မြို့နယ်လုံး တစ်ဂါလံ ဈေးနှုန်းကတော့ တသတ်မတ်တည်း ရောင်းတာမျိုး မဟုတ်ဘူးဗျ။ အခြေအနေ ကြည့်ပြီး ရောင်း တာမျိုးလည်း တွေ့ရတယ်။ တစ်ချို့နေရာတွေကလည်း တစ်ဂါလံ ၅ သောင်း၊ တစ်ချို့က ၇ သောင်း ရောင်းကြ တယ်။ လောလောဆယ်တော့ ဆီမရှိတော့ဘူးလို့ သိရတယ်။ ဆိုင်တွေ အားလုံး ပိတ်ထားကြတယ်တဲ့” ဟု ပြော သည်။ ပြီးခဲ့သည့် ဇူလိုင်လတွင်မူ ဖားကန့်မြို့ကို ဝင်ရောက်နိုင်သည့် လမ်းကြောင်းပေါ်တွင် ရှိနေသော စစ်ကော်မရှင် တပ်နှင့် ရှမ်းနီ အမျိုးသား တပ်မတော် SNA တပ်ဖွဲ့တို့က ဆန်နှင့် အခြား ကုန်စည် သယ်ယူခွင့်ကို တားမြစ်ခဲ့ သဖြင့် ကြက်သား တစ်ပိဿာ ကျပ် ၁ သိန်းထိ စျေးနှုန်း မြင့်တက်ခဲ့သည်။ စစ်တပ်နှင့် SNA တပ်များ ဝင်ရောက်လာသည့် နောက်ပိုင်းမှ စတင်ကာ ဖားကန့်မြို့နယ်ကို တစ်နှစ်ကျော် အကြာ ထိန်းချုပ်နိုင်ခဲ့သည် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့နှင့် မကြာခဏ ထိတွေ့တိုက်ပွဲများ ပြင်းထန်လေ့ ရှိသည်။ လက်ရှိ တင်းမာလာသည့် နှစ်ဖက်ကြားက စစ်ရေးအခြေနေများကြောင့် ဖားကန့်မြို့နယ် အတွင်းရှိ ရှရော်ခ၊ လုံးခင်း၊ ဆိုင်းတောင်၊ မှော်စီစာစသည့် ကျေးရွာများ အပါအဝင် ရွာပေါင်းများစွာက ဒေသခံထောင်နှင့်ချီ ကလည်း ဘေးလွတ်နိုင်သည့် နေရာများဆီ စစ်ဘေးရှောင်နေကြရသည်။ စစ်ကော်မရှင်တပ်သည် မြန်မာနိုင်ငံ တစ်ဝှမ်းရှိ ၎င်းတို့ လက်လွှတ်ထားရသည့် မြို့များကို ပြန်လည် ရယူရေး အရှိန်အဟုန်မြင့် ကြိုးစားလာနေပြီး ကချင်ပြည်တွင် ဖားကန့်မြို့နှင့် ဝိုင်းမော်မြို့တို့ကို ပြန်လည်ရယူနိုင်ရေး ကြိုးစားလျှက်ရှိသည်။ အထူးသဖြင့် စီးပွားရေး၊ စစ်ရေးအပြင် အဘက်ဘက်က အချက်အချာကျသည့် ဖားကန့်မြို့ကို ပြန်လည်ရရှိရေး ကြိုးစားလာနေပြီး ကချင်လွတ်လပ်ရေး တပ်မတော် KIA နှင့် ကာကွယ်ရေး ပူးပေါင်းတပ်များသည်လည်း သိမ်း ပိုက်ထားသည့် ကျေးရွာအချို့နှင့် ဖားကန့်မြို့ကို ဝင်ရောက်နိုင်သည့် လမ်းကြောင်းအချို့ကို ပြန်လည် လက်လွှတ် ထားရသည်။ ဓါတ်ပုံ - MC Saw Lay

ဖားကန့်တွင် ဓါတ်ဆီဈေးတက်၊ ဆိုင်အချို့ပိတ်ထားရ

ဖားကန့်ဗျူဟာကုန်းမှ လက်နက်ကြီးဖြင့် ပစ်ခတ်မှုကြောင့် အရပ်သား နှစ်ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ ကချင်ပြည်၊ ဖားကန့်မြို့နယ်ထဲက ယူမာကျေးရွာကို စစ်ကော်မရှင်တပ်၏ ဖားကန့်ဗျူဟာကုန်းမှ လက်နက်ကြီး နှင့် ပစ်ခတ်ခဲ့သောကြောင့် အရပ်သား နှစ်ဦး သေဆုံးခဲ့သည်။ ဩဂုတ်လ ၅ ရက်နေ့၊ ည ၈ နာရီအချိန်ခန့်တွင် ယူမာကျေးရွာဘက်ကို ဖားကန့်ဗျူဟာကုန်မှ လက်နက်ကြီးနှင့် ပစ်ခတ်သောကြောင့် အရပ်သား ၂ ဦး သေဆုံးခဲ့ပြီး ၁၄ ဦး ပြင်းထန်ဒဏ်ရာများ ရခဲ့သည်ဟု ဖားကန့်ဒေသခံများ က ပြောသည်။ ဖားကန့်ဒေသခံတစ်ဦးက “အေး လိုင်းပေါ်မှာလည်း သူများတွေ တင်ထားတာ တွေ့မှာပါ။ ယူမာရွာကို လက် နက်ကြီးနဲ့ လှမ်းပစ်တာ။ ဖားကန့် ဗျူဟာကုန်းကနေပေါ့နော်။ အေး ပစ်တာက ဒီမြန်မာစစ်တပ်ပေါ့။ ပြောရ ရင်တော့ နှစ်ယောက် သေသွားတယ်” ဟု ပြောသည်။ ထို့အပြင် ဩဂုတ်လ ၅ ရက်နေ့တွင် ရှရော်ခကျေးရွာထဲက နေအိမ်တစ်လုံးပေါ်လည်း လက်နတ်ကြီးကျည် ကျရောက်ခဲ့ပြီး မီးလောင်ပျက်စီးသွားသည်ဟု ဆိုသည်။ အလားတူ ဩဂုတ်လ ၄ ရက်နေ့ကလည်း ဖားကန့်ဗျူဟာကုန်းမှ ပစ်ခတ်လိုက်သော လက်နက်ကြီးကျည်မှာ ရှရော်ခကျေးရွာထဲ ကျရောက်ခဲ့သောကြောင့် သေဆုံးသူ တစ်ဦး ရှိခဲ့သည်ဟု ဖားကန့်ဒေသခံ အမျိုးသားတစ်ဦး က ပြောသည်။ ဖားကန့်ဒေသ၌ စစ်ကော်မရှင်တပ်၏ လက်နက်ကြီးဖြင့် ပစ်ခတ်မှုများကြောင့် အရပ်သား သေဆုံးမှုများ ဆက် တိုက်ရှိနေပြီး ဩဂုတ်လ ၃ ရက်နေ့နှင့် ၄ ရက်နေ့ နှစ်ရက်တာ တိုက်ပွဲထဲတွင် ကလေးတစ်ဦး အပါအဝင် အရပ်သား ၃ ဦး သေဆုံးခဲ့သည်။ ဩဂုတ်လ ၂ ရက်နေ့တွင် ကချင်လွတ်လပ်ရေး တပ်မတော် KIAနှင့် PDF ပူးပေါင်းအဖွဲ့တို့က ရှရော်ခကျေးရွာရှိ ညောင်ပင်ကုန်းစခန်းနေရာကို လက်လွှတ်ခဲ့ရပြီးနောက် နှစ်ဖက်ကြား တိုက်ပွဲများ ပြင်းထန်နေခြင်း ဖြစ်သည်။ အဆိုပါ ညောင်ပင်ကုန်းနေရာကို KIA နှင့် PDF ပူးပေါင်းအဖွဲ့တို့က ပြန်လည်ရရှိရေး ထိုးစစ်ဆင်ခဲ့ရာ ဩဂုတ်လ ၄ ရက်နေ့တွင် ပြန်လည် သိမ်းပိုက်နိုင်ခဲ့သည်ဟု ဒေသခံများက ပြောသည်။ ဖားကန့်မြို့၊ အေးမြသာယာအတက်က ညောင်ပင်ကုန်း စခန်းနေရာတွင် ဩဂုတ်လ ၆ ရက်နေ့၊ မွန်းလွှဲ ၁ နာရီ ၄၅ မိနစ် အချိန်ခန့်တွင်လည်း လက်နက်ကြီး၊ လက်နက်ငယ် ပစ်ခတ်သံများ ကြားနေရသည်ဟု ဆိုသည်။

ဖားကန့်ဗျူဟာကုန်းမှ လက်နက်ကြီးဖြင့် ပစ်ခတ်မှုကြောင့် အရပ်သား နှစ်ဦးသေဆုံး

ဖားကန့်တိုက်ပွဲအတွင်း ကလေးအပါအဝင် အရပ်သား ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ ကချင်ပြည်၊ ဖားကန့်မြို့နယ်ထဲ စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ အကြား တိုက်ပွဲများ ဆက်တိုပ်ဖြစ်နေပြီး အရပ်သား ထိမှန်သေဆုံးမှုများ ရှိနေသည်ဟု ဒေသခံများက ပြောသည်။ ဩဂုတ်လဆန်းမှာ ဩဂုတ်လ ၄ ရက်နေ့အထိ တိုက်ပွဲများ ဆက်တိုက် ဖြစ်နေသည်ဟု ဖားကန့်ဒေသခံများက ပြောသည်။ ဩဂုတ်လ ၃ ရက်နေ့နှင့် ၄ ရက်နေ့ နှစ်ရက်တာ တိုက်ပွဲအတွင်း ကလေးတစ်ယောက် အပါအဝင် အရပ်သား ၃ ဦး သေဆုံးခဲ့ပြီး ၁၀ ဦးထက်မနည်း ထိမှန်ဒဏ်ရာ ရခဲ့သည်ဟု ဖားကန့်ဒေသခံများက ပြောသည်။ ဖားကန့်ဒေသခံ အမျိုးသားတစ်ဦးက “ဗျူဟာကုန်းဘက်နေ လက်နက်ကြီးတွေနဲ့ ပစ်တာ။ အဲ့ဒီ လက်နက်ကြီး က မျောက်ဖြူမော်ရွာကို ကျပြီး အရပ်သားနဲ့ ကလေးသုံးနှစ်အရွယ်ကလေး လက်နက်ကြီးကျည် ထိပြီးသေ သွားတာဗျ။ လူကြီးလည်း တစ်ယောက်သေတယ်။ ဒဏ်ရာရတာက ၇ ယောက်ရှိတယ်။ ၃ ရက်နေ့တုန်းက တစ်ယောက် လက်နက်ကြီးထိပြီး သေတယ်။ သုံးယောက်ဒဏ်ရာရတယ်” ဟု ပြောသည်။ ကချင်လွတ်လပ်ရေး တပ်မတော် KIA နှင့် KPDF ပူးပေါင်းတပ်က ရှရော်ခကျေးရွာရှိ ညောင်ပင်ကုန်းနေရာကို ပြန်လည်ရရှိရေး ထိုးစစ်ဆင်နေပြီး နှစ်ဖက်ကြား တိုက်ပွဲများ ဆက်ဖြစ်နေသည်ဟု ဆိုသည်။ လက်နက်ကြီး လက်နက်ငယ် ပစ်ခတ်မှုများ ဆက်တိုက် ရှိနေပြီး စစ်တပ်က ပစ်လိုက်တဲ့ လက်နက်ကြီးကျည် များမှာ အရပ်သား ပြည်သူများ နေထိုင်သည့်ဘက်ကို ကျရောက်ပေါက်ကွဲမှုများ ဆက်တိုက်ဖြစ်နေသည်ဟု ဆိုကြသည်။ ဩဂုတ်လ ၄ ရက်နေ့မှာတော့ မျောက်ဖြူကျေးရွာက အသက် ၃ နှစ်အရွယ် ကလေးတစ်ဦးနှင့် အသက် ၃၅ နှစ်အရွယ် အမျိုးသားတစ်ဦး ထိမှန်သေဆုံးခဲ့ပြီး ဩဂုတ်လ ၃ ရက်နေ့တွင်မူ ရှရော်ခကျေးရွာမှ အမျိုးသား တစ်ဦး ထိမှန်သေဆုံးခဲ့သေးသည်။ အလားတူ ဆန်းကြွယ်ကျေးရွာတွင်လည်း လက်နက်ကြီးကျရောက် ပေါက်ကွဲခဲ့ခြင်းကြောင့် အသက် ၈၀ ကျော်အရွယ် အဘွားတစ်ဦးအပါအဝင် အရပ်သား ၄ ဦး ထိမှန်ဒဏ်ရာ ရခဲ့သည်ဟု ဖားကန့်မြို့ခံများက ပြော သည်။ စစ်ကော်မရှင်တပ်သည် ပြီးခဲ့သည့် ဧပြီလကတည်းက ဖားကန့်ဒေသထဲသို့ အင်အားအလုံးအရင်းဖြင့် စစ်ကြောင်းများ ခွဲကာ ဝင်ရောက်လာပြီး ဖားကန့်မြို့ကို ပြန်လည်ထိန်းချုပ်နိုင်ရေး ကြိုးပမ်းနေခြင်း ဖြစ်သည်။ မြေပြင်ရှိ စစ်ကော်မရှင် စစ်ကြောင်းအား ဖားကန့်ဗျူဟာကုန်းမှ လက်နက်ကြီး ပစ်ကူမှုများအပြင် လေကြောင်း မှပါ ဗုံးကြဲကာ စစ်ကူပေးနေသည်ဟု ဒေသခံများက ပြောသည်။

ဖားကန့်တိုက်ပွဲအတွင်း ကလေးအပါအဝင် အရပ်သား ၃ ဦး သေဆုံး

ဖားကန့်တွင် လက်နက်ကြီးကျ၊ အမျိုးသမီးတစ်ဦး ထိမှန်သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၃၁ ရက်။ ကချင်ပြည်၊ ဖားကန့်မြို့၊ မှော်စီစာကျေးရွာအုပ်စုထဲက ဖြူစင်ကုန်း ခေါ် မနောကုန်းနေရာတွင် လက်နက်ကြီး ကျရောက်ပေါက်ကွဲခဲ့ပြီး အမျိုးသမီးတစ်ဦး သေဆုံးခဲ့သည်။ ဇူလိုင်လ ၃၀ ရက်နေ့ ည ၉ နာရီအချိန်ခန့်တွင် မည်သည့် အဖွဲ့အစည်းက ပစ်ခတ်လိုက်မှန်းမသိသော လက်နက် ကြီး တစ်လုံးမှာ ဖြူစင်ကုန်းက နေအိမ်တစ်လုံးပေါ် ကျရောက်ပေါက်ကွဲခဲ့ခြင်း ဖြစ်သည်။ ဖားကန့်မြို့ခံ အမျိုးသားတစ်ဦးက “ဘယ်က ပစ်တယ်ဆိုတာမျိုးတော့ ကျနော်တို့က မသိဘူးပေါ့နော်။ မအေ ဖြစ်တဲ့သူက ဆေးရုံကိုပို့တာ လမ်းမှာတင်သေသွားတယ်။ သမီးကတော့ လက်တစ်ဖက် ဖြတ်လိုက်ရတယ်လို့ ပြောတယ်။ မိသားစုဝင်တွေပါ့။ နောက်ထပ်အမျိုးသား တစ်ယောက်လည်း ဒဏ်ရာရတယ်။ တည့်တည့် ထိသွား တဲ့ အိမ်ကတော့ လုံးဝပျက်စီးသွားတယ်။ ဘေးကအိမ်တွေလည်း ပျက်ကုန်တာပါ့” ဟု ပြောသည်။ မိခင်ဖြစ်သူ အမျိုးသမီးမှာ ဆေးရုံသို့ ပို့နေချိန် လမ်း၌ပင် သေဆုံးသွားပြီး သမီးဖြစ်သူမှာ လက်တစ်ဖက် ဖြတ် လိုက်ရသည်ဟု အကူအညီပေးနေသူများက ပြောသည်။ အဆိုပါ နေအိမ်အနီးတွင် ရောက်နေသည့် အမျိုးသား နှစ်ဦးလည်း လက်နက်ကြီး ကျည်စ ထိမှန်ကာ ဒဏ်ရာများ ရရှိခဲ့သေးသည်။ နီးစပ်သူတစ်ဦးက “လုံးခင်းကျေးရွာအုပ်စု မှော်စီစာကျေးရွာအပိုင် ဖြူစင်ကုန်းမှာ ဖြစ်သွားတာ။ ၃၀ ရက်နေ့ ည ၈ နာရီ ၅၀ ပေါ့။ ဖြူစင်ကုန်းရော မနောကုန်းက အတူတူပဲ အခေါ်အဝေါ်လေးကွဲသွားတာပါ။ ဒဏ်ရာရတဲ့ ထဲက မထိုက်ထိုက်ဝင်းက သေသွားတယ်။ သူ့သမီးလေးက လက်ဖြတ်လိုက်ရတယ်။ သမီးလေးက ၁၅ နှစ်ပဲ ရှိသေး တယ်ဗျ” ဟု ပြောသည်။ အလားတူ ဇူလိုင်လ ၃၀ ရက်နေ့၊ နံနက်ပိုင်းတွင် ဖားကန့်မြို့၊ မရှီကထောင်ရပ်ကွက်တွင် မိုင်းပေါက်ကွဲမှု တစ်ခု ဖြစ်ခဲ့ပြီး အမျိုးသားတစ်ဦး သေဆုံးခဲ့သေးသည်ဟု ဒေသခံများက ပြောသည်။ စစ်ကောင်စီတပ်သည် ဖားကန့်မြို့အား ပြန်လည်ထိန်းချုပ်နိုင်ရေး မေလနောက်ဆုံးပတ်မှ စတင်၍ ပြန်လည် ထိုးစစ်ဆင်လာခြင်း ဖြစ်သည်။ ထိုသို့ ထိုးစစ်ဆင်လာပြီးနောက် စစ်ကြောင်းမှာ ခွဲကာ အသုတ်လိုက် ဖားကန့်မြို့ထဲကို ဝင်လာခဲ့သည်။ ထို့နောက် ဖားကန့်မြို့တွင်း၌ တိုက်ပွဲသံများ၊ လက်နက်ကြီး ပစ်ခတ်သံများ၊ ဒရုန်းဖြင့် ပစ်ခတ်မှုနှင့် လေကြောင်း မှ ဗုံးကြဲတိုက်ခိုက်မှုများ ဆက်တိုက် လုပ်နေသည်ဟု ဖားကန့်ဒေသခံများက ပြောသည်။ အလားတူ မြန်မာနိုင်ငံ အလယ်ပိုင်းမှ လာသည့် အသား၊ ငါးနှင့် ကုန်စည်များကို အဓိက အားထားရသော ဖားကန့်မြို့ကို ကုန်စည်အဝင်ကိုပါ ပိတ်ထားလိုက်သောကြောင့် ဒေသခံများ အခက်အခဲများနှင့် ရင်ဆိုင်နေကြရ သည်။ ဇူလိုင်လကုန်ရက် အထိ ကားမိုင်း - နန့်ယားလမ်းနှင့် အင်းတောင်းကြီး - ဝှေခါလမ်း နှစ်ခုစလုံးကို စစ်ကောင်စီ ဘက်က ဖြတ်သန်းခွင့်ပိတ်ထားဆဲ ဖြစ်သည်။

ဖားကန့်တွင် လက်နက်ကြီးကျ၊ အမျိုးသမီးတစ်ဦး ထိမှန်သေဆုံး

တနင်္လာနေ့ ည ရုပ်သံသတင်း (၅-၅-၂၅)

တနင်္လာနေ့ ည ရုပ်သံသတင်း (၅-၅-၂၅)

ဒီနေ့ အစီအစဉ်ထဲမှာတော့ … TNLA သိမ်းပိုက်ထားတဲ့ နယ်မြေတွေ ပြန်ပေးဖို့ ဘယ်သူတွေက ဖိအား ပေးနေတာလဲ။ ကချင်၊ ကရင်၊ ကရင်နီ၊ ရှမ်းမြောက်က စစ်ရေး အခြေအနေတွေ။ ရုရှားရဲ့ မဟာအောင်ပွဲနေ့ အခမ်းအနားကို ဘယ်သူတွေ တက်မှာလဲ။ မလေးကျားက ထိုင်းနယ်စပ်မှာ ဘာလို့ ရောက်နေတာလဲ ဆိုတာတွေကို တင်ဆက်ထားပါတယ်။

×Close

News

IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm
Junta-Aligned Pa-O Militia Bans Residents from Leaving Villages — October 29, 2024 2:23 pm

Recent Posts

ဗီယက်နမ် အမျိုးသမီးတစ်ဦး ခင်ပွန်းနှင့် တူ နှစ်ဦး သတ်မှုဖြင့် တရားစွဲခံရ
တိုင်ဖုန်း ရာဂါဆာကြောင့် ထိုင်းနှင့် မြန်မာ မိုးကြီးမည်
ပါလက်စတိုင်းနိုင်ငံ အား နိုင်ငံအများအပြား အသိအမှတ်ပြု
ကချင်တွင် တိုက်ပွဲများဖြစ်၊ စစ်ကော်မရှင်က တပ်အင်အား တိုးချဲ့
စစ်ကော်မရှင်တပ်က အရပ်သားများ၊ ဘာသာရေး အဆောက်အဦများ၊ ဘုရားကျောင်းများအား ပစ်မှတ်ထား၊ စစ်ရာဇဝတ်မှုများကျူးလွန်နေဟု IEC ပြော

Archives

Archives

×Close