NMG Doh – Page 102 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Oct 27

စစ်အုပ်စု၏ ရွေးကောက်ပွဲကို ပြတ်သားစွာ ငြင်းပယ်ရန် JFM က အာဆီယံသို့ တောင်းဆို   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ အောက်တိုဘာ ၂၆ ရက်နေ့ မှ ၂၈ ရက်နေ့အထိ မလေးရှားနိုင်ငံ၊ ကွာလာလမ်ပူတွင် ကျင်းပမည့် ၄၇ ကြိမ်မြောက် အာဆီယံ ထိပ်သီးအစည်းအဝေး မတိုင်မီ Justice For Myanmar (JFM) အဖွဲ့ကြီးက အာဆီယံသို့ အရေးပေါ် တောင်းဆိုမှုတစ်ခု ပြုလုပ်ခဲ့သည်။ JFM သည် မြန်မာစစ်အုပ်စု၏ တရားမဝင် ရွေးကောက်ပွဲကို ပြတ်ပြတ်သားသား ငြင်းပယ်ရန် နှင့် စစ်အုပ်စု၏ နိုင်ငံတကာရာဇဝတ်မှုများတွင် အာဆီယံ၏ ကြံရာပါပတ်သက်နေမှုကို အဆုံးသတ်ရန် အောက်တိုဘာလ ၂၃ ရက်နေ့တွင် ထုတ်ပြန်တိုက်တွန်းခဲ့ခြင်း ဖြစ်သည်။ JFM ၏ ထောက်ပြချက်အရ အာဆီယံအဖွဲ့ဝင် နိုင်ငံများတွင် အခြေစိုက်သော ကုမ္ပဏီ ၅၄ ခု ၏ စီးပွားရေး ဆက်နွှယ်မှုများသည် စစ်အုပ်စု၏ အကြမ်းဖက်စစ်ဆင်ရေးကို အသက်ဆက်ပေးနေသည်ဟု ဆိုသည်။ Justice For Myanmar ၏ ပြောရေးဆိုခွင့်ရှိသူ မရတနာမောင်က စစ်အုပ်စု၏ အမည်ခံရွေးကောက်ပွဲသည် ဒီမိုကရေစီလမ်းကြောင်းမဟုတ်ဘဲ 'အကြမ်းဖက်အုပ်ချုပ်မှုကို တရားဝင်မှုပေးရန် လှည့်ကွက်' သာဖြစ်သည်ဟု ဝေဖန်ပြောဆိုခဲ့သည်။ ထို့အပြင် စစ်အုပ်စုသည် ဒဏ်ခတ်ပိတ်ဆို့မှုများကို ရှောင်ရှားရန် "နစက" မှ "နလအက" အဖြစ် အမည် ပြောင်းလဲ ခဲ့ခြင်းသည်လည်း ပရိယာယ်သက်သက်ဖြစ်ကြောင်း JFM က အာဆီယံကို သတိပေးခဲ့သည်။ JFM ၏ အဓိကတောင်းဆိုချက် သုံးချက်မှာ စစ်အုပ်စု၏ ရွေးကောက်ပွဲကို ငြင်းဆန်ရန်၊ အာဆီယံ အဖွဲ့အစည်းများတွင် စစ်အုပ်စု၏ ကိုယ်စားလှယ်များကို ပိတ်ပင်ရန်နှင့် စစ်အုပ်စုထံ ငွေကြေး၊ လေယာဉ်ဆီ စီးဝင်မှုလမ်းကြောင်းများ ဖြတ်တောက်ရန်တို့ဖြစ်သည်။ စစ်အုပ်စု၏ ရာဇဝတ်မှုများမှ မြန်မာပြည်သူများကို သာမက ဒေသတွင်းကိုပါ ကာကွယ်ရန် အာဆီယံတွင် တာဝန်ရှိကြောင်း JFM က တိုက်တွန်းထားသည်။

စစ်အုပ်စု၏ ရွေးကောက်ပွဲကို ပြတ်သားစွာ ငြင်းပယ်ရန် JFM က အာဆီယံသို့ တောင်းဆို  

Oct 27

တိုက်ပွဲပြင်းထန်ရာ ဒေသများတွင် Spy Balloon များဖြင့် ထောက်လှမ်းနေဟု MDSI သတိပေး   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ မြန်မာနိုင်ငံ၏ စစ်ရေးပဋိပက္ခ ပြင်းထန်ရာဒေသများတွင် သူလျှိုပူပေါင်း (Spy Balloon) များ အသုံးပြု၍ ထောက်လှမ်းနေသည်ကို မြန်မာ့စစ်ဘက်ရေးရာနှင့် လုံခြုံရေးဆိုင်ရာ လေ့လာရေးအဖွဲ့ (MDSI) က အောက်တိုဘာလ ၂၅ ရက်နေ့တွင် သတိပေး ထုတ်ပြန်လိုက်သည်။ အဆိုပါ ပူပေါင်းများကို ၂၀၂၂ ခုနှစ်ကတည်းက စတင်တွေ့ရှိခဲ့ပြီး၊ လက်ရှိတွင် နယ်စပ်ဒေသများနှင့် ကရင်နီ၊ ကချင်၊ ရှမ်း၊ ကရင်နှင့် ရခိုင်ပြည် စသည့် တိုက်ပွဲပြင်းထန်ရာ ဒေသများတွင် ပေ ၆၀,၀၀၀ အထက် အမြင့်မှ ပျံသန်းနေသည်ကို သတိပြုရမည်ဟု ဆိုသည်။ ပူပေါင်းများ၏ အန္တရာယ်မှာ GPS အချက်ပြမှုများ၊ စစ်လက်နက်ပစ္စည်းများ၏ သတင်းအချက်အလက် အားလုံး ကို ခိုးယူနိုင်ခြင်း၊ Drone များနှင့် Wi-Fi ဆက်သွယ်မှုများကို ချိတ်ဆက်ကာ လေထဲမှ ထောက်လှမ်းခြင်း (Air Threat) တို့ကို လုပ်ဆောင်နိုင်ခြင်း ဖြစ်သည်။ ထို့ကြောင့် MDSI က ပြည်သူများကို အချက် သုံးချက် အလေးထား ဆောင်ရွက်ရန် တိုက်တွန်းထားသည်။ နံပါတ် တစ် အနေဖြင့် စောင့်ကြည့် သတင်းပို့ရန်၊ သံသယဖြစ်ဖွယ် အရာဝတ္ထုတွေ့ရှိပါက သတင်းပေးပို့ရန် ဖြစ်သည်။ နံပါတ် နှစ် အချက်မှာ ဖုံးကွယ် ကာကွယ်ရန်၊ စစ်စခန်းများနှင့် အရေးကြီးနေရာများကို အနီအောက်ရောင်ခြည် ခံနိုင်ရည်ရှိသည့် ပစ္စည်းများဖြင့် ဖုံးကွယ်ရန် တိုက်တွန်းထားသည်။ အချက် သုံးမှာ တန်ပြန်ဆောင်ရွက်ရန်၊ လိုအပ်ပါက ပစ်ခတ်ဖျက်ဆီးခြင်း (သို့မဟုတ်) လှိုင်းဖြတ်တောက်ခြင်း (Electronic Countermeasure) ဖြင့် တားဆီးကာကွယ်ရန်တို့ ဖြစ်ကြသည်။ နယ်မြေထောက်လှမ်းရေး Spy Balloon များ၏ အန္တရာယ်ကို သတိပြုပြီး မိမိတို့၏ လုံခြုံရေးအတွက် သက်ဆိုင် ရာ ကာကွယ်ရေးအဖွဲ့အစည်းများ၏ ညွှန်ကြားချက်ကို လိုက်နာကြဖို့ MDSI က တိုက်တွန်းထားသည်။

တိုက်ပွဲပြင်းထန်ရာ ဒေသများတွင် Spy Balloon များဖြင့် ထောက်လှမ်းနေဟု MDSI သတိပေး 

Oct 27

ကရင်ဆရာ၊ ဆရာမ ၁ သောင်းကျော်အတွက် ထောက်ပံ့ကြေး ၄၁% လိုအပ်နေ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ ကော်သူးလေဒေသ၊ ကရင်ပြည်အတွင်းရှိ ကျောင်းဆရာ၊ ဆရာမများ ပညာရေးလုပ်ငန်းများ ဆက်လက် လုပ်ကိုင်နိုင်ရန်အတွက် နှစ်စဉ်ထောက်ပံ့ကြေး ရန်ပုံငွေ အရေးပေါ် လိုအပ်နေကြောင်း ကရင်ပညာရေးနှင့် ယဉ်ကျေးမှုဌာန (KECD) နှင့် ကရင်ဆရာ၊ ဆရာမများအသင်း (KTWG) တို့က ပူးတွဲတောင်းဆိုလိုက်သည်။ ၂၀၂၅-၂၀၂၆ ပညာသင်နှစ်အတွက် ဆရာ၊ ဆရာမ ၁၀,၈၈၀ ဦးအတွက် တစ်ဦးလျှင် ထိုင်းဘတ်ငွေ ၁၂,၀၀၀ ဘတ်နှုန်း ပံ့ပိုးရန် ရည်ရွယ်ထားသော်လည်း၊ လက်ရှိတွင် ရန်ပုံငွေ ၅၉% သာ ရရှိထားပြီး ၄၁% ကို အရေးပေါ် ဖြည့်ဆည်းရန် လိုအပ်နေကြောင်း KTWG က အောက်တိုဘာလ ၂၀ ရက်နေ့ ထုတ်ပြန်ချက်တွင် ဖော်ပြသည်။ ရန်ပုံငွေ မလုံလောက်မှုသည် စီးပွားရေး မတည်ငြိမ်မှုနှင့် ကုန်ဈေးနှုန်း မြင့်တက်မှုတို့ကြောင့် ဆရာ၊ ဆရာမများ ၏ မိသားစုဝန်ထုပ်ဝန်ပိုးကို ပိုမိုကြီးလေးစေသည်ဟု KTWG က ထောက်ပြသည်။ ကျောင်းအုပ်ဆရာ စောဆဲဝါး၏ ပြောကြားချက်အရ ဒရုန်းပျံသန်းမှုနှင့် လေကြောင်းတိုက်ခိုက်မှုများကြောင့် ကြောက်ရွံ့စိတ်ဖြင့် တောထဲတွင် သင်ကြားနေရခြင်း၊ ခိုလှုံရန် မြေကျင်းများ တူးရခြင်း စသည့် အခက်အခဲများ ကြုံတွေ့နေရကြောင်း သိရသည်။ သို့သော် နှစ်စဉ်ထောက်ပံ့ကြေးသည် အခြေခံလိုအပ်ချက်များကို ဖြည့်ဆည်းပေးနိုင်၍ စာသင်ကြားရေးအပေါ် စိတ်အားထက်သန်မှုကို တိုးမြှင့်ပေးကြောင်း ၎င်းက ပြောကြားခဲ့သည်။ ဆရာ၊ ဆရာမ တစ်ဦးချင်းစီအတွက် ပံ့ပိုးကူညီနိုင်ပြီး စိတ်ဖိစီးမှုမရှိဘဲ ပညာရေးကို ဆက်လက် လုပ်ဆောင်နိုင် ရန် အတွက် အရေးပေါ် လိုအပ်နေသည့် ရန်ပုံငွေကို ဝိုင်းဝန်းကူညီပေးကြဖို့ KECD နှင့် KTWG တို့က အလေးအနက် တောင်းဆိုထားသည်။

ကရင်ဆရာ၊ ဆရာမ ၁ သောင်းကျော်အတွက် ထောက်ပံ့ကြေး ၄၁% လိုအပ်နေ

Oct 27

စစ်အုပ်စု ရွေးကောက်ပွဲကြောင့် နိုင်ငံရေး အဖြေရှာရန် ပိုမိုခက်ခဲမည် KIO ဥက္ကဋ္ဌ ပြော   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ ကချင်လွတ်လပ်ရေး အဖွဲ့ (KIO) ဥက္ကဋ္ဌ ဗိုလ်ချုပ်ကြီး အင်ဘန်လ က စစ်အုပ်စု၏ လာမည့် ဒီဇင်ဘာလ ရွေးကောက်ပွဲ အပေါ် အထူးစိုးရိမ်ကြောင်း KIO ၆၅ နှစ်ပြည့်နေ့ မိန့်ခွန်း၌ ထုတ်ဖော်ပြောကြားခဲ့သည်။ ဗိုလ်ချုပ်ကြီး အင်ဘန်လက စစ်ပွဲများ အဆုံးသတ်ရန်အတွက် နိုင်ငံရေးဆွေးနွေးအဖြေရှာခြင်းသည်သာ တစ်ခုတည်းသော လမ်းဖြစ်ကြောင်း အောက်တိုဘာလ ၂၅ ရက်နေ့တွင် ကျရောက်သော KIO ၆၅ နှစ်ပြည့်နေ့ မိန့်ခွန်း၌ အလေးပေးပြောကြားခဲ့သည်။ သို့သော် ရွေးကောက်ပွဲကျင်းပခြင်းကြောင့် နိုင်ငံရေး အင်အားစုများအကြား ထောက်ခံသူနှင့် ကန့်ကွက်သူဟူ၍ အုပ်စုနှစ်စု ကွဲပြားသွားမည်ကို စိုးရိမ်ပြီး၊ ယင်းသည် ပြည်တွင်းစစ် ပိုမိုရှည်ကြာစေနိုင်ကြောင်း သတိပေးခဲ့သည်။ ဗိုလ်ချုပ်ကြီး အင်ဘန်လက “ဒီအဖွဲ့နှစ်ဖွဲ့က လွယ်လွယ်နဲ့ ညှိနှိုင်းဖို့ ခက်ခဲသွားတော့မယ်။ ပြည်တွင်းစစ်က လည်း ပိုပြီး ကြာရှည်သွားနိုင်တယ်” ဟု ရွေးကောက်ပွဲ၏ ရေရှည်အကျိုးဆက်ကို ထောက်ပြပြောကြားခဲ့သည်။ စစ်ကောင်မရှင်သည် ဒီဇင်ဘာ ၂၈ ရက်နေ့တွင် ရွေးကောက်ပွဲ ပထမပိုင်းကို ကျင်းပရန် ပြင်ဆင်နေပြီး၊ ကချင်ပြည် အတွင်း မြစ်ကြီးနား၊ မိုးညှင်း၊ တနိုင်း၊ ပူတာအို မြို့နယ်များတွင်ပါ ကျင်းပသွားမည်ဟု ကြေညာထား သည်။ ဗိုလ်ချုပ်ကြီးအင်ဘန်လက စစ်အုပ်ချုပ်မှု အောက်မှ ပြည်သူများကို ရွေးကောက်ပွဲတွင် ပါဝင်သည်ဖြစ်စေ၊ မပါဝင်သည်ဖြစ်စေ သတိပြုရန် တိုက်တွန်းခဲ့ပြီး၊ တစ်ဦးချင်း၏ ဆုံးဖြတ်ချက်သည် နိုင်ငံအတွင်း အတူယှဉ်တွဲ နေထိုင်သူများ၏ ဘဝကံကြမ္မာကို ဆုံးဖြတ်နိုင်သည်ဟု သတိပေးခဲ့သည်။ ထို့အပြင် ဌာနေတိုင်းရင်းသားများကြား သွေးခွဲပြီး လက်နက်ပေးကိုင်နေသည့် လုပ်ရပ်သည် ဆွေမျိုးအချင်းချင်း ကို သွေးခွဲနေခြင်းသာဖြစ်ကြောင်း ပြည်သူများကို ပြန်လည်ရှင်းပြရန် KIO တာဝန်ရှိသူများကို တိုက်တွန်းခဲ့ သည်။ “တစ်ဦးတစ်ယောက်ရဲ့ ပါဝင်မှုက နိုင်ငံထဲမှာ အတူယှဉ်တွဲနေထိုင်ကြတဲ့ ပြည်သူတွေရဲ့ ဘဝကံကြမ္မာကို ဆုံးဖြတ်ပေးတယ် ဆိုတာကိုလည်း သတိပြုကြပါ” ဟု ဗိုလ်ချုပ်ကြီးအင်ဘန်လ က ရွေးကောက်ပွဲတွင် ပါဝင်သူ များ၏ တာဝန်ယူမှု ကို အလေးပေး ပြောကြားခဲ့သည်။ KIO အနေဖြင့် နိုင်ငံရေးနှင့် စစ်ရေးကို ချိန်ခွင်လျှာညီမျှစွာ ညှိနှိုင်းကာ တော်လှန်ရေးလမ်းစဉ်များကို အောင်မြင် အောင် ဖော်ဆောင်သွားမည်ဟု ဗိုလ်ချုပ်ကြီး အင်ဘန်လက အတည်ပြု ပြောကြားခဲ့သည်။

စစ်အုပ်စု ရွေးကောက်ပွဲကြောင့် နိုင်ငံရေး အဖြေရှာရန် ပိုမိုခက်ခဲမည် KIO ဥက္ကဋ္ဌ ပြော  

Oct 27

ကချင် နယ်စပ် ဂိတ် အချို့ ပြန်လည် ဖွင့်လှစ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ ကချင်လွတ်လပ်ရေးအဖွဲ့ KIO/KIA ထိန်းချုပ်ရာ လွယ်ဂျယ်၊ လိုင်ဇာ၊ မိုင်ဂျာယန် နယ်စပ်ဂိတ် ၃ ခု ပြန်လည် ဖွင့်လှစ်လိုက်သည်ဟု ဒေသခံများက ပြောသည်။ KIO/KIA က ထိန်းချုပ်ထားသည့် မြန်မာ-တရုတ်နယ်စပ်ဂိတ်များအနက် လွယ်ဂျယ်၊ လိုင်ဇာ (နားဘန်း) နှင့် မိုင်ဂျာယန် နယ်စပ်ဂိတ် (၃) ခုကို တရုတ် အာဏာပိုင်များနှင့် ညှိနှိုင်းကာ အောက်တိုဘာလ ၂၅ ရက်နေ့မှစ၍ ပြန်လည်ဖွင့်လှစ်လိုက်ပြီဖြစ်ကြောင်း KIA က သတင်းမီဒီယာများကို အတည်ပြု ပြောကြားသည်။ ဒေသခံ ပြည်သူလူထု အတွက် အဓိကလိုအပ်သည့် စားသုံးကုန်ပစ္စည်းများကို တရုတ်နိုင်ငံဘက်မှ တင်သွင်းရန် နှင့် မြန်မာဘက်မှ ငှက်ပျောအပါအဝင် သစ်သီးဝလံနှင့် သီးနှံများကို ပြန်တင်ပို့နိုင်ရန် တရုတ်ဘက်နှင့် ညှိနှိုင်းပြီး ပြန်ဖွင့်ခြင်းဖြစ်ကြောင်း ဒေသခံများက ပြောသည်။ လိုင်ဇာဒေသခံ အမျိုးသားတစ်ဦး က “လိုင်ဇာ နယ်စပ်ဂိတ် လွတ်လွတ်လပ်လပ်ကြီးတော့ မဟုတ်ပေမဲ့ လူအဝင် အထွက်တော့ ရပြီ။ တရုတ်ဘက်က ဆောက်လုပ်ရေး ပစ္စည်းတွေ သယ်ယူလို့ ရသလို မြန်မာဘက်ခြမ်းက လူတွေလည်း သွားလို့ရပြီ” ဟု ပြောသည်။ လက်ရှိတွင် ပြန်လည်ဖွင့်လှစ်သည့် ဂိတ်သုံးခုမှာ (လွယ်ဂျယ်၊ လိုင်ဇာ၊ မိုင်ဂျာယန်) မှလွဲ၍ KIA ထိန်းချုပ်ထား သည့် ကန်ပိုက်တီမြို့နယ် နယ်စပ်ဂိတ်နှင့် မံစီမြို့နယ်ထဲက မန့်ဝိန်းကြီးဂိတ်တို့ကမူ လတ်တလော ပြန်မဖွင့် သေးဘူးဟု ဒေသခံများ၏ ပြောပြချက်အရ သိရသည်။ ကျန်ရှိသည့် နယ်စပ်ဂိတ်များ ပြန်ဖွင့်နိုင်ရန် KIO/KIA တာဝန်ရှိသူများက တရုတ်နှင့် ဆက်လက် ဆွေးနွေးညှိနှိုင်း နေကြောင်း ဒေသခံများက ပြောသည်။ လိုင်ဇာနှင့် မိုင်ဂျာယန် နယ်စပ်ဂိတ်များ ပြန်လည်ဖွင့်လှစ်လိုက်သည့် အောက်တိုဘာလ ၂၅ ရက်နေ့မှ စတင်၍ လူအဝင်အထွက်နှင့် ကုန်စည်အချို့ သယ်ဆောင်မှုများ စတင်ခဲ့ပြီဖြစ်ကြောင်း ဒေသခံများက အတည်ပြုသည်။ အခြား ဒေသခံ အမျိုးသားတစ်ဦး ကလည်း နယ်စပ်ဂိတ်အနီး အခြေအနေကို “လိုင်ဇာ နယ်စပ်ဂိတ်မှာတော့ လူအဝင်အထွက်လုပ်နေပြီ။ ဒီဘက်ခြမ်းက လူတွေလည်း သွားကြတယ်။ တရုတ်ဘက်ခြမ်းက လူတွေလည်း လာကြတယ်။ ကုန်ပစ္စည်းနဲ့ ပတ်သက်တာတော့ ဘယ်လိုလဲတော့ မသိဘူး” ဟု ဆိုသည်။ လက်ရှိတွင် မြန်မာဘက်ခြမ်းမှ နယ်စပ်ဖြတ်ကျော် လိုသူများအတွက် လိုအပ်သည့် နယ်စပ်ဖြတ်ကျော်ခွင့် အထောက်အထား (Border Pass) အတွက် ညှိနှိုင်းနေဆဲဖြစ်ကြောင်း သိရသည်။ KIO/KIA က လိုင်ဇာနှင့် မိုင်ဂျာယန် နယ်စပ်ဂိတ်များ ပြန်လည်ဖွင့်လှစ်သည့် အောက်တိုဘာ ၂၅ ရက်မှ နိုဝင်ဘာ ၁ ရက်နေ့အထိ နယ်စပ်ဂိတ်မှ လူအဝင်အထွက်နှင့် ကုန်စည်သယ်ဆောင်မှု အခြေအနေကို နေ့တိုင်း ညနေ ၆ နာရီထက် နောက်မကျဘဲ ကချင်လွတ်လပ်ရေး ကောင်စီ (KIC) ရုံးသို့ အချိန်မီ တင်ပြရန် ညွှန်ကြားစာ ထုတ်ထားသည်။ KIO/KIA သည် ၂၀၂၄ ခုနှစ် မတ်လမှ စတင်၍ ကချင်ဒေသထဲရှိ စစ်တပ်စခန်းများကို ထိုးစစ်ဆင်ခဲ့ပြီး၊ ၂၀၂၄ နှစ်ကုန်ပိုင်းတွင် လွယ်ဂျယ်မြို့နှင့် နယ်စပ်ဂိတ်ကို ထိန်းချုပ်နိုင်ခဲ့ကာ ၂၀၂၅ ဇန်နဝါရီလတွင် မံစီမြို့နှင့် နိုဝင်ဘာလတွင် ကန်ပိုက်တီမြို့တို့ကို ဆက်လက်သိမ်းပိုက်ခဲ့သည်။

ကချင် နယ်စပ် ဂိတ် အချို့ ပြန်လည် ဖွင့်လှစ်

Oct 27

စဉ့်ကူး လေကြောင်း တိုက်ခိုက်မှု အရပ်သား ၁ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ မန္တလေးတိုင်းဒေသကြီး၊ စဉ့်ကူးမြို့နယ် နှစ်ရက်ဆက်တိုက် လေကြောင်းတိုက်ခိုက်ခံရပြီး အရပ်သား ၁ ဦး သေဆုံး ၁၃ ဦး ထိမှန်ဒဏ်ရာရခဲ့သည်။ စဉ့်ကူးမြို့နယ်သည် အောက်တိုဘာလ ၂၅ ရက်နေ့နှင့် ၂၆ ရက်နေ့တို့တွင် နှစ်ရက်ဆက်တိုက် စစ်ကော်မရှင် တပ်၏ လေကြောင်းတိုက်ခိုက်မှုကို ခံခဲ့ရရာ အရပ်သားပြည်သူ ၁ ဦး သေဆုံးပြီး ၁၃ ဦး ထိခိုက်ဒဏ်ရာရခဲ့ သည်ဟု ဒေသခံ သတင်းအရင်းအမြစ်များက ပြောသည်။ နောက်ဆုံးဖြစ်စဉ်ဖြစ်သည့် အောက်တိုဘာ ၂၆ ရက် နေ့လည် ၃ နာရီ ၁၅ မိနစ်ဝန်းကျင်တွင် စဉ့်ကူးမြို့နယ်၊ ပဲလှော်ဖိုကျေးရွာနှင့် ပတ်လည်အင်းကျေးရွာကြားရှိ ကောင်းဆက်သာဆီဆိုင်ကို မိတ္ထီလာရှမ်းတဲ လေတပ်မှ တက်လာသည့် ဂျက်ဖိုက်တာ ၂ စီး က ဗုံး ၆ လုံး ကြဲချတိုက်ခိုက်ခဲ့ခြင်းဖြစ်သည်။ ယင်းတိုက်ခိုက်မှုကြောင့် အသက် ၃၇ နှစ်အရွယ် ဆီဆိုင်မန်နေဂျာ အမျိုးသားတစ်ဦး သေဆုံးခဲ့ပြီး၊ အရပ်သား ပြည်သူ ၆ ဦး ထိခိုက်ဒဏ်ရာရခဲ့သည်။ မြေပြင်အခြေအနေ သိရှိသူတစ်ဦးက “ဂျက် ၂ စီးနဲ့ လာကြဲသွားတာဗျ။ အဲ့ဒီမှာရှိတဲ့ ဆီဆိုင်ကို အကြဲခံလိုက်ရ တယ်။ အမျိုးသား လူလတ်ပိုင်း တစ်ယောက် သေတယ်။ ဒဏ်ရာရတာ ၆ ယောက် ရှိတယ်။ စဉ့်ကူးက ခဏ ခဏ ကြဲခံရတာပါ” ဟု အတည်ပြုပြောဆိုခဲ့သည်။ တိုက်ခိုက်ခံရသည့် ဆီဆိုင်သည် မတ္တရာ - စဉ့်ကူး ကားလမ်းမပေါ်တွင်ရှိပြီး၊ စစ်တပ်က မတ္တရာမြို့၏ မြောက် ဘက်သို့ စစ်ကြောင်းထိုးရန် ပြင်ဆင်နေချိန်နှင့် တိုက်ဆိုင်နေသည်ဟု ဒေသခံများက သုံးသပ်သည်။ စဉ့်ကူးမြို့နယ် အခြေအနေကို စောင့်ကြည့်နေသူ ဒေသခံတစ်ဦးက “ဒီရက်ပိုင်း စစ်တပ်က မြေပြင် စစ်ကြောင်း မထိုးနိုင်တော့ လေကြောင်းနဲ့ပဲ ဆက်တိုက် ဖိအားပေးနေတာပါ။ လက်ပန်လှရော၊ ဆီဆိုင်ရောကိုပါ ပစ်မှတ် ထား တိုက်ခိုက်တော့ ပြည်သူတွေရဲ့ လုံခြုံရေးက လုံးဝမရှိတော့ပါဘူး” ဟု ပြောသည်။ အောက်တိုဘာ ၂၅ ရက်နေ့ကလည်း စဉ့်ကူးမြို့နယ်၊ လက်ပန်လှကျေးရွာကို စစ်တပ်က လေကြောင်းတိုက်ခိုက်မှု ပြုလုပ်ခဲ့ရာ ပြည်သူ ၇ ဦး ထိခိုက်ဒဏ်ရာရခဲ့သည်။ အဆိုပါ ဖြစ်စဉ်တွင်လည်း လူစည်ကားသည့် ဓာတ်ဆီဆိုင်ကို အဓိကထား တိုက်ခိုက်သွားခြင်း ဖြစ်သည်ဟု ဆိုသည်။ စစ်ကော်မရှင်တပ်သည် တော်လှန်ရေးတပ်များ ထိန်းချုပ်ထားသည့် စဉ့်ကူး၊ မတ္တရာ၊ သပိတ်ကျင်း စသည့် မြို့နယ်များ အတွင်း ထိုးစစ်ဆင်မှုများ ဆက်တိုက် လုပ်ဆောင်နေပြီး၊ နယ်မြေစိုးမိုးမှု ရယူရန် လေကြောင်း တိုက်ခိုက်မှုများကို အရှိန်မြှင့် လုပ်ဆောင်နေခြင်း ဖြစ်သည်။ စဉ့်ကူးမြို့နယ်သည် ဩဂုတ်လမှ စတင်၍ လေကြောင်းတိုက်ခိုက်မှု ခံနေရသည့် ဒေသတစ်ခု ဖြစ်သည်။ ဩဂုတ်လအတွင်း စဉ့်ကူးမြို့နယ်မှ စစ်ကြောင်းတစ်ခု ထိုးခဲ့ပြီးနောက် လေကြောင်းပစ်ကူများပါ ယူခဲ့ရသည်။ စက်တင်ဘာလအတွင်း စဉ့်ကူးမြို့နယ်ထဲရှိ တော်လှန်ရေးအင်အားစု ထိန်းချုပ်နယ်မြေများကို လေယာဉ်ဖြင့် ဗုံးကြဲတိုက်ခိုက်ခဲ့သည့် ဖြစ်စဉ်များ ရှိခဲ့သည်။ အောက်တိုဘာလ ၂၄ ရက်နေ့ကလည်း စဉ့်ကူးနှင့် နီးစပ်သည့် သပိတ်ကျင်းမြို့နယ် ရင်ခတ်ပင်ကျေးရွာကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ ဒေသခံ ၃ ဦး ပွဲချင်းပြီး သေဆုံးကာ ၁၃ ဦး ထက် မနည်း ဒဏ်ရာရခဲ့သည်။ စစ်ကော်မရှင် တပ်ဘက်ကမူ ၎င်းတို့ ထိန်းချုပ်မှုမရှိသည့် နယ်မြေများကို ဗုံးကြဲတိုက်ခိုက်နေခြင်းနှင့် ပတ်သက် ပြီး တစ်စုံတစ်ရာ သတင်းထုတ်ပြန်ထားခြင်း မရှိပေ။ စစ်တပ်က မန္တလေးတိုင်းအတွင်းရှိ နွားထိုးကြီး၊ မြင်းခြံ၊ တောင်သာနယ်တို့အထိ မြေပြင်စစ်ကြောင်းများပါ ထိုးဖောက်လျက်ရှိနေသည်။

စဉ့်ကူး လေကြောင်း တိုက်ခိုက်မှု အရပ်သား ၁ ဦး သေဆုံး

Oct 27

ထွက်ပြေး သုံ့ပန်းအချို့ ပြန်ဖမ်းမိ သတင်းနှင့် မီဒီယာ ကွန်ရက်။ ၂၀၂၅ ခုနှစ် အောက်တိုဘာလ ၂၇ ရက်။ အင်းတော်တိုက်ပွဲမှ စစ်သုံ့ပန်း ၁၃ ဦး ထွက်ပြေးမှုတွင် ၅ ဦး ပြန်လည် ဖမ်းမိပြီး လက်နက် ၃ လက် ပြန်ရသည်ဟု မြေပြင် သတင်းအရင်းအမြစ်က ပြောသည်။ စစ်ကိုင်းတိုင်းဒေသကြီး၊ အင်းတော်မြို့သိမ်း တိုက်ပွဲအတွင်း ဖမ်းဆီးရမိခဲ့သည့် စစ်သုံ့ပန်း ၁၃ ဦး ထွက်ပြေး လွတ်မြောက်သွားခဲ့ပြီး ရက်ပိုင်းအကြာတွင် ၎င်းတို့အနက်မှ ၅ ဦးကို ပြန်လည် ဖမ်းဆီးနိုင်ခဲ့သည်ဟု အမည်မဖော်လိုသည့် မြေပြင်သတင်းရင်းမြစ်များက ပြောသည်။ အဆိုပါ ထွက်ပြေးလွတ်မြောက်မှုသည် ပြီးခဲ့သည့် အောက်တိုဘာလ ၂၅ ရက်နေ့၊ နံနက်ပိုင်းက ဖြစ်ပွားခဲ့ခြင်း ဖြစ်ပြီး၊ စစ်သုံ့ပန်း ၁၃ ဦးသည် ကင်းစောင့်နေသည့် ရဲဘော် ၃ ဦးကို ကြိုးတုတ်ကာ ၎င်းတို့၏ လက်နက်များပါ ယူဆောင်၍ ထွက်ပြေးသွားခဲ့ခြင်း ဖြစ်သည်။ လွတ်မြောက်ပြီးနောက် ပြန်လည်ဖမ်းဆီးရမိသည့် အခြေအနေနှင့်ပတ်သက်၍ အမည်မဖော်လိုသည့် စစ်ရေး သတင်းရင်းမြစ် တစ်ဦးက ယခုကဲ့သို့ အတည်ပြု ပြောကြားခဲ့သည်။ “ဒီရက်ပိုင်းတွေဘဲ ပြန်ဖမ်းမိတာ။ သူတို့တွေ ပြေးဖို့နေရာမရှိပါဘူး။ ဒီတစ်ဝှိုက်က ကျနော်တို့ သိမ်းထားတဲ့ နယ်မြေတွေဘဲလေ။ အခုက ပါသွားတဲ့သေနတ် ၃ လက်လည်း ပြန်ရတယ်။ လူကတော့ ၅ ယောက် ပြန်မိပြီ။ ဒီကောင်တွေလည်း ဘယ်အချိန်ထဲက ပြင်ဆင်နေတာလည်း မသိဘူး။” ထွက်ပြေးလွတ်မြောက် သွားသူများထဲတွင် ရဲမှူး မောင်မောင်လှတင့်အပါအဝင် မြို့နယ်မှူး အောင်မြင့်နိုင်၊ တပ်ရင်းမှူး မျိုးမြင့်သူ၊ မြင့်မောင်မောင်စိုး (G2)၊ အောင်ဖြိုးထွန်း (G2)၊ ကျော်စိုးဦး (G3)၊ ကွန်မန်ဒိုတပ်စုမှူး ဝေဖြိုးဦး၊ ဆက်သွယ်ရေးတပ်ခွဲမှူး ဝေဖြိုးအောင်၊ တပ်စုမှူး မျိုးမင်းအောင် (အမြောက်တပ်စုမှူး)၊ ခွဲမှူး ဘုန်းထက် အောင်၊ ဆေးမှူး ကျော်နိုင်စိုး၊ ဟန်လင်းထွန်း (G3) နှင့် တပ်စုမှူး ဝေလွင်ဖြိုးမောင် စသည့် ရာထူးရာခံ မြင့်သူများ ပါဝင်ကြောင်း သိရသည်။ လက်ရှိတွင် ထွက်ပြေးသွားသူများ အနက် မည်သူမည်ဝါကို ပြန်လည် ဖမ်းဆီးရမိသည် ဆိုသည်နှင့် ပတ်သက်၍ မူ လုံခြုံရေးအရ အတည်မပြုနိုင်သေးကြောင်း အခြေအနေကို သိရှိသူများက ဆိုသည်။ ကချင်ပြည်နှင့် အစပ်တွင်ရှိသည့် အင်းတော်မြို့ကို တော်လှန်ရေးအင်အားစုများက ပြီးခဲ့သည့် ဧပြီလတွင် အပြီးသတ် သိမ်းပိုက်နိုင်ခဲ့ခြင်းဖြစ်ပြီး မြို့သိမ်းတိုက်ပွဲသည် ၈ လကြာမြင့်ခဲ့သည်။ အဆိုပါမြို့သိမ်းတိုက်ပွဲတွင် ဟောင်ဝစ်ဇာအပါအဝင် လက်နက်ခဲယမ်းများစွာ သိမ်းပိုက်ရမိခဲ့သည့် အပြင် တပ်မ ၇၇ တပ်မမှူး ဗိုလ်မှူးချုပ်အောင်သက်ဦး နှင့် စစ်သုံ့ပန်း အများအပြားကို ဖမ်းဆီးရမိခဲ့သည်။ အောက်တိုဘာလ ၂၅ ရက်နေ့တွင် ထွက်ပြေး လွတ်မြောက်သွားသည့် စစ်သုံ့ပန်းများသည်လည်း အဆိုပါ တပ်မမှူးနှင့်အတူ ဖမ်းဆီးရမိခဲ့သူများ ဖြစ်သည်ဟု သတင်းအရင်းအမြစ်များက ပြောသည်။

ထွက်ပြေး သုံ့ပန်းအချို့ ပြန်ဖမ်းမိ

Oct 27

မော်လိုက်-ကလေး အကျဉ်းထောင်တွင် ဆေးကုသခွင့်အတွက် လာဘ်ထိုးနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ စစ်ကိုင်းတိုင်းဒေသကြီး၊ ကလေးမြို့နယ်ရှိ မော်လိုက် - ကလေး အကျဉ်းထောင်တွင် ထောင်အာဏာပိုင်များ၏ လာဘ်ပေးလာဘ်ယူမှုကြောင့် အကျဉ်းသားများ၏ အသက်ရှင်သန်ခွင့်ကိုပါ ခြိမ်းခြောက်နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) က ထုတ်ဖော် ပြောကြားလိုက်သည်။ အထူးသဖြင့် အရေးပေါ် ဆေးကုသခွင့် ရရှိရန် ငွေကြေးပေးချေနေရပြီး၊ ငွေကြေးမတတ်နိုင်သူများမှာမူ အသက်အန္တရာယ်နှင့် ရင်ဆိုင်နေရကြောင်း သိရသည်။ PPNM ၏ ထုတ်ပြန်ချက်အရ မော်လိုက် - ကလေး အကျဉ်းထောင်၌ နိုင်ငံရေး အကျဉ်းသားများ အပါအဝင် အကျဉ်းကျသူများသည် ဆေးဝါး မလုံလောက်မှုနှင့် ရင်ဆိုင်နေရပြီး၊ အရေးပေါ်လူနာများ ပြင်ပဆေးကုသခွင့် ရရန်အတွက် ထောင်ပိုင်ကြီးနှင့် အရာရှိတချို့ကို လာဘ်ငွေပေးမှသာ ခွင့်ပြုပေးနေခြင်း ဖြစ်သည်။ အရေးပေါ် ဆေးကုသခွင့် တစ်ကြိမ်အတွက် ပေးဆောင်ရသည့် ပမာဏမှာ မြန်မာငွေကျပ် ၅ သိန်းမှ ကျပ်သိန်း ၂၀ ကြား ရှိနေပြီး၊ တစ်ခါတရံတွင် ထောင်အာဏာပိုင်များ၏ ကိုယ်ပိုင်အပျော်အပါး KTV ဖိုးကိုပါ တောင်းဆိုနေ သည်ဟု PPNM က ဆိုသည်။ ဒီလို စနစ်တကျ ငွေတောင်းခံမှုများကြောင့် တကယ်ကျန်းမာရေးဆိုးဝါးပြီး ငွေကြေးမတတ်နိုင်သူများသည် အချိန်မီ ကုသခွင့်မရဘဲ မသန်စွမ်းဖြစ်သွားရခြင်း၊ သို့မဟုတ် အသက်ဆုံးရှုံးရခြင်းမျိုးများ ကြုံနေရသည်။ PPNM မှ ဦးဆောင်ကော်မတီဝင် ကိုသိုက်ထွန်းဦးက အခြေအနေကို ယခုကဲ့သို့ ဝေဖန်ပြောဆိုသည်။ “လူ့အသက်ကို အခြေတည်ပြီးတော့မှ စီးပွားရေး လုပ်နေတယ်၊ စီးပွားရေး လုပ်ကွက် လုပ်ငန်းတစ်ခုလို့ပဲ ကျနော် မြင်ပါတယ်။ ဒါဟာ လူတစ်စုရဲ့ မတရား ဖမ်းဆီးခံထားရတဲ့ နိုင်ငံရေး အကျဉ်းသား အပါအဝင် အခြား အကျဉ်းသားတွေရဲ့ ချွေးတွေသွေးတွေပေါ့နော်၊ ဒီကျန်းမာရေး မကောင်းမှုတွေကို ခုတုံးလုပ်ပြီးတော့မှ ငွေရှာ တဲ့ လုပ်ငန်း တစ်ရပ်ကို ပုံဆောင်နေတာကတော့ အင်မတန်ကိုမှ စိတ်ပျက်ဖို့ ကောင်းတဲ့ အခြေအနေလို့ပဲ ကျနော် ပြောချင်ပါတယ်။” PPNM ၏ စာရင်းများအရ ၂၀၂၅ ခုနှစ်၊ ဇန်နဝါရီလမှ အောက်တိုဘာလအထိ ဆေးကုသမှု မရရှိခြင်းကြောင့် အကျဉ်းထောင်အသီးသီးမှ နိုင်ငံရေးအကျဉ်းသား ၂၈ ဦးအထိ ကျဆုံးခဲ့ပြီး ဖြစ်သည်။ ကိုသိုက်ထွန်းဦးက ဆက်လက်၍ “အကျဉ်းသားတစ်ယောက်ရဲ့ အခွင့်အရေးအရ သော်လည်းကောင်း၊ လူသား တစ်ယောက်ရဲ့ အခွင့်အရေးအရ သော်လည်းကောင်း အသက်ရှင်သန်ပိုင်ခွင့်ဟာ အခြေခံ အခွင့်အရေး ဖြစ်ပါ တယ်။ သို့သော်လည်းပဲ အကျဉ်းထောင်ထဲမှာတော့ အကျဉ်းသား၊ အထူးသဖြင့် နိုင်ငံရေးအကျဉ်းသား ဖြစ်တည် မှု အပေါ်မှာ မူတည်၍ သော်လည်းကောင်း၊ ငွေကြေး အဆင်မပြေမှုပေါ်မှာ အခြေတည်ပြီးတော့မှ ခွဲခြား ဆက်ဆံ ခံနေရတဲ့ အခြေအနေတစ်ခုဖြစ်ပါတယ်” ဟု လူ့အခွင့်အရေး ချိုးဖောက်ခံနေရမှုကို ထောက်ပြသည်။ PPNM က ထောင်အာဏာပိုင်များသည် ဖိနှိပ်မှုများအပေါ် ပြည်ထဲရေးကို ဟန်ပြရန်အတွက် ကျန်းမာရေး ဟောပြောပွဲကဲ့သို့သော သရုပ်ပြဓာတ်ပုံများ ရိုက်ကူးပြီး တင်ပြလေ့ရှိကြောင်းလည်း ထောက်ပြခဲ့သည်။ ထို့အပြင် ၂၀၂၂ ခုနှစ် ကာလများက မော်လိုက် - ကလေး အကျဉ်းထောင်တွင် နိုင်ငံရေး အကျဉ်းသားများကို ပစ်ခတ် ဖြိုခွင်းမှုများ၊ လွှတ်ပေးပြီးနောက် ထောင်ဝတွင် ပြန်ဖမ်းဆီးမှုများအထိ ဖိနှိပ်မှုများ ရှိခဲ့သည်ဟု PPNM က ဆိုသည်။ PPNM က လူ့အခွင့်အရေး စံနှုန်းများကို ပေါ်ပေါ်ထင်ထင် ချိုးဖောက်နေသည့် လာဘ်ပေးလာဘ်ယူမှုများနှင့် ဆေးကုသခွင့် ပိတ်ပင်မှုများကို ချက်ချင်း ရပ်တန့်ပေးရန် တောင်းဆိုထားကြသည်။

မော်လိုက်-ကလေး အကျဉ်းထောင်တွင် ဆေးကုသခွင့်အတွက် လာဘ်ထိုးနေရ

Oct 27

ကလေးမြို့နယ် စစ်ရှောင်တစ်သောင်းကျော် အတွက် ဆေးဝါးနဲ့ စားနပ်ရိက္ခာ အရေးပေါ်လိုအပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၇ ရက်။ စစ်ကိုင်းတိုင်းဒေသကြီး၊ ကလေးမြို့နယ်တွင် စစ်ဘေးရှောင် တစ်သောင်းကျော်အတွက် ဆေးဝါးနှင့် စားနပ်ရိက္ခာ အရေးပေါ် လိုအပ်နေသည်။ ကလေးမြို့နယ်တွင် စစ်ကော်မရှင်တပ်၏ အင်အားအလုံးအရင်းဖြင့် ထိုးစစ်ဆင်မှုများကြောင့် ဒေသခံပြည်သူ တစ်သောင်းကျော်သည် ဘေးလွတ်ရာသို့ အရေးပေါ် ထွက်ပြေးတိမ်းရှောင်နေရပြီး၊ ယင်းစစ်ရှောင်များအတွက် စားနပ်ရိက္ခာ၊ ဆေးဝါးနှင့် ကျန်းမာရေးအကူအညီများ အရေးပေါ် လိုအပ်နေကြောင်း အကူအညီပေးသူများက ပြောသည်။ အောက်တိုဘာလ ၁၆ ရက်နေ့မှ စတင်၍ စစ်ကော်မရှင်တပ်က လေကြောင်းမှ စစ်အင်အား ဖြည့်တင်းကာ ကလေး - တမူး နှင့် ကလေး - ဂန့်ဂေါ လမ်းပိုင်းတစ်လျှောက် စစ်ကြောင်းထိုးလာခြင်းကြောင့် ဒေသခံများ နေရပ်စွန့်ခွာ ထွက်ပြေးနေကြရခြင်း ဖြစ်သည်။ ကလေးမြို့လူထုတိုက်ပွဲ ဦးဆောင်ကော်မတီမှ ပြောရေးဆိုခွင့်ရှိသူ၏ ပြောကြားချက်အရ ထွက်ပြေးတိမ်းရှောင် နေရသူ အရေအတွက်မှာ အိမ်ထောင်စုပေါင်း ၄,၀၀၀ ခန့်နှင့် လူဦးရေ တစ်သောင်းခန့် ရှိနေသည်။ ကလေးမြို့လူထုတိုက်ပွဲ ဦးဆောင်ကော်မတီ ပြောရေးဆိုခွင့်ရှိသူ က “ဒီကျနော်တို့ ဒီ ကလေး - တမူး၊ အိန္ဒိယ -မြန်မာ ချစ်ကြည်ရေး လမ်းမတစ်လျှောက်က ဒီရွာတစ်လျှောက်လုံးပေါ့ဗျာ။ အဲဒီ ကျနော်တို့ ဆယ်ရွာကနေ ရွာပေါင်း ၂၀ လောက်ရှိမယ်။ အဲဒီရွာတွေမှာရှိတဲ့ အိမ်ထောင်စု ဒီ ၄၀၀၀ လောက်က ဒီလူဦးရေဆိုလို့ရှိရင် တစ်သောင်းလောက် ခန့်မှန်းရတယ်။ ဒီဟာတွေဆိုလို့ရှိရင် ကျနော်တို့ အရေးပေါ် တိမ်းရှောင်နေပါတယ်” ဟု လက်ရှိအခြေအနေကို ရှင်းပြသည်။ လက်ရှိတွင် တောတောင်များအတွင်း အဆင်ပြေသလို ခိုလှုံနေကြရသည့် စစ်ရှောင်များထဲ၌ သက်ကြီးရွယ်အို များ၊ ကိုယ်ဝန်ဆောင်မိခင်များ၊ ကလေးသူငယ်များနှင့် မသန်စွမ်းသူများ အများအပြား ပါဝင်နေသည်။ အထူးသဖြင့် ရာသီ အကူးအပြောင်းကာလ ဖြစ်သောကြောင့် ဖျားနာမှုများ များပြားနေပြီး အကူအညီပေးရေး လုပ်ငန်းများအတွက် ဆေးဝါးနှင့် ကျန်းမာရေးစောင့်ရှောက်မှုသည် အဓိက စိန်ခေါ်မှုဖြစ်လာနေသည်။ ကလေးမြို့လူထုတိုက်ပွဲ ဦးဆောင်ကော်မတီ ပြောရေးဆိုခွင့်ရှိသူ က “အခုရှိနေတဲ့အခြေအနေမှာတော့ ဒီအရေး ပေါ် ဆန်နဲ့ရိက္ခာနဲ့၊ ဒီအရေးပေါ်လူသုံးကုန်ပစ္စည်းတွေနဲ့ လက်ရှိ ရာသီဥတုပြောင်း ကာလကြောင့်မို့လို့ ဒီဖျားနာ တာတွေရော တွေ့ရတဲ့အတွက်ကြောင့်မို့လို့ ဒီအရေးပေါ် ကျန်းမာရေး ကူညီစောင့်ရှောက်မှု အလုံအလောက် လိုအပ်ပါတယ်” ဟု ဆက်ပြောသည်။ စစ်ရှောင်ပြည်သူ အချို့အတွက် စေတနာ့ဝန်ထမ်း အဖွဲ့အစည်းများက ကျန်းမာရေးစောင့်ရှောက်မှုကို လက်လှမ်း မီသလောက် လုပ်ဆောင်ပေးနေသော်လည်း၊ မသန်စွမ်း၊ ကလေးသူငယ်များ၏ ကျန်းမာရေးစောင့်ရှောက်မှုကမူ အရေးပေါ် လိုအပ်နေကြောင်း ၎င်းက ဖြည့်စွက်ပြောသည်။ စစ်ရေးလှုပ်ရှားမှုများကြောင့် ဒေသခံများသည် အသက်မွေးဝမ်းကျောင်း လုပ်ငန်းများနှင့် စိုက်ပျိုးရေး လုပ်ငန်း များကိုပါ စွန့်လွှတ်ခဲ့ရခြင်းကြောင့် ရေရှည်တွင် စားဝတ်နေရေး အကျပ်အတည်းများလည်း ရင်ဆိုင်ရဖွယ်ရှိနေ သည်။ အကူအညီပေးရေးအဖွဲ့များကမူ အရေးပေါ်အကူအညီများ အချိန်မီမရပါက လူသားချင်း စာနာမှုဆိုင်ရာ အကျပ် အတည်းသည် ပိုမိုဆိုးလာနိုင်သည်ဟု သုံးသပ်ထားသည်။ ကလေးမြို့ လူထုတိုက်ပွဲ ဦးဆောင် ကော်မတီကလည်း အရေးပေါ် တုံ့ပြန်ရေးအဖွဲ့ကို ဖွဲ့စည်းကြောင်း ကြေညာ ပြီး၊ နိုင်ငံတကာ အဖွဲ့အစည်းများ အပါအဝင် ပြည်တွင်းပြည်ပက အင်အားစုများ အနေဖြင့် စစ်ဘေးရှောင် ပြည်သူများကို အရေးပေါ်ပံ့ပိုးကူညီမှုများ ပြုလုပ်ပေးကြပါရန် မေတ္တာရပ်ခံ တောင်းဆိုထားသည်။

ကလေးမြို့နယ် စစ်ရှောင်တစ်သောင်းကျော် အတွက် ဆေးဝါးနဲ့ စားနပ်ရိက္ခာ အရေးပေါ်လိုအပ်

« Prev 1 … 100 101 102 103 104 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ 
ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက်

Archives

Archives

×Close