NMG Doh – Page 104 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Oct 23

ကလေး-တမူးလမ်းမတွင် စစ်ကြောင်းနှစ်ကြောင်း ညှပ်ထိုး၊ ဒေသခံ ၁ သောင်းကျော် ထွက်ပြေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၃ ရက်။  စစ်ကိုင်းတိုင်းဒေသကြီး၊ ကလေးမြို့နှင့် တမူးမြို့နယ်ကြားရှိ မြန်မာ - အိန္ဒိယ နယ်စပ်ကို ဆက်သွယ်ထားသော အာရှလမ်းမကြီးပေါ်တွင် စစ်ရေးတင်းမာမှုများ မြင့်တက်နေပြီး ဒေသခံတစ်သောင်းကျော် ဘေးလွတ်ရာကို ထွက်ပြေးနေရသည်။ စစ်ကောင်စီတပ်က အဆိုပါလမ်းမကြီးပေါ်သို့ စစ်ကြောင်းနှစ်ကြောင်းခွဲ၍ ညှပ်ပိတ်ထိုးနေသဖြင့် တိုက်ပွဲများ ပြင်းထန်လျက်ရှိကြောင်း ဒေသခံသတင်းရင်းမြစ်များက ပြောသည်။ ထိုသို့ စစ်ကြောင်းထိုးမှုကြောင့် ဒေသခံ ကျေးရွာပေါင်း ၅၀ ကျော်မှ ပြည်သူ တစ်သောင်းကျော် သည် ဘေးလွတ် ရာသို့ ထွက်ပြေးတိမ်းရှောင်နေရပြီး လူသားချင်းစာနာမှုဆိုင်ရာ အကူအညီများ အရေးပေါ် လိုအပ်လျက်ရှိ ကြောင်း သိရသည်။ ကလေးမြို့ဘက်မှ စစ်ကြောင်းတစ်ကြောင်း၊ တမူးမြို့နယ် ပန်းသာကျေးရွာဘက်မှ စစ်ကြောင်းတစ်ကြောင်း သည် အင်အားအလုံးအရင်းဖြင့် အာရှလမ်းမကြီးပေါ်သို့ ဝင်ရောက်လာခြင်းဖြစ်သည်။ အောက်တိုဘာ ၂၂ ရက်နေ့တွင် ကလေးဘက်မှ စစ်ကြောင်းသည် စော်ဘွားရေရှင်ကျေးရွာအနီး၊ တမူးဘက်မှ စစ်ကြောင်းက နန်းမွန်းတားကျေးရွာအနီး တွင် PDF ပူးပေါင်းတပ်ဖွဲ့များနှင့် တိုက်ပွဲဖြစ်ပွားနေပြီး စစ်ကြောင်း နှစ်ခုမှာ ညှပ်ပိတ်ထိုးသည့် အနေအထား ဖြစ်နေကြောင်း စစ်ရေးသတင်းရင်းမြစ်များက သုံးသပ်သည်။ ဤထိုးစစ်ကြောင့် ကလေးမြို့နယ်မြောက်ပိုင်းရှိ တော်လှန်ရေးတပ်ဖွဲ့များ၏ စခန်းအချို့ကိုလည်း ယာယီ လက်လွှတ်ခဲ့ရသည်။ စစ်ကြောင်းထိုးမှုများကြောင့် ကလေး - တမူး လမ်းမကြီးတစ်လျှောက်နှင့် မြောက်ပိုင်းဒေသတစ်လျှောက်မှ ရွာပေါင်း ၅၀ ကျော်က ပြည်သူများသည် တောတောင်များထဲသို့ ထွက်ပြေးတိမ်းရှောင်နေရပြီး စစ်ရှောင်ဦးရေ မှာ တစ်သောင်းကျော် ခန့် ရှိနေသည်။ စစ်ရှောင်အများစုမှာ ကိုယ်လွတ်ရုန်း ထွက်ပြေးလာကြရသဖြင့် အစားအသောက်၊ ဆန်၊ မိုးကာ၊ အိုးခွက်ပန်းကန် စသည့် အခြေခံပစ္စည်းများ လုံးဝမပါလာသည့် မိသားစုများ အများအပြား ရှိနေသည်။ စစ်ရှောင်များအနက် ကိုယ်ဝန်ဆောင်မိခင်၊ သက်ကြီးရွယ်အိုနှင့် နာမကျန်းဖြစ်သူများ ပါဝင်နေ သောကြောင့် ဆေးဝါးနှင့် ကျန်းမာရေးစောင့်ရှောက်မှုများ အရေးပေါ် လိုအပ်နေသည်။ စစ်ကော်မရှင်တပ်၏ စစ်ကြောင်းထိုးမှုများအတွင်း ကလေး - တမူး လမ်းပိုင်းတစ်လျှောက်ရှိ ကျေးရွာများတွင် အောက်တိုဘာ ၁၇ နှင့် ၁၈ ရက်နေ့များ၌ အရပ်သား ၁၀ ဦးထက်မနည်း သတ်ဖြတ်ခံခဲ့ရသည် ဟု ဒေသခံများက ပြောဆိုသည်။ စစ်ကိုင်းတိုင်းဒေသခံများသည် စစ်အာဏာသိမ်းပြီးနောက်ပိုင်း နေအိမ်များ မီးရှို့ခံရခြင်း၊ အိုးမဲ့အိမ်မဲ့ ဖြစ်ရခြင်း တို့နှင့် ကြုံတွေ့ခဲ့ရပြီး ယခုအခါ စစ်ကြောင်းများကြောင့် ဘေးလွတ်ရာ ထပ်မံ ထွက်ပြေးတိမ်းရှောင်နေရကာ လူသားချင်းစာနာမှု အကူအညီများ အရေးပေါ် လိုအပ်လျက်ရှိသည်။

ကလေး-တမူးလမ်းမတွင် စစ်ကြောင်းနှစ်ကြောင်း ညှပ်ထိုး၊ ဒေသခံ ၁ သောင်းကျော် ထွက်ပြေး

Oct 23

ခေါင်လန်ဖူး စခန်းနှစ်ခု KIA သိမ်းပိုက်၊ စစ်တပ်က လန်ဆယ်ဒေသကို ၃ ရက်ဆက်တိုက် လေကြောင်းဖြင့် လက်တုံ့ပြန်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၃ ရက်။ ကချင်ပြည် မြောက်ဖျား ပူတာအိုခရိုင်၊ ခေါင်လန်ဖူးမြို့နယ်တွင် စစ်ကော်မရှင်တပ်၏ စခန်း ၂ ခု လက်လွှတ်ရပြီး နောက် လန်ဆယ်ဒေသ ၃ ရက်တိုက် လေကြောင်းကြောင်းမှ ဗုံးကြဲတိုက်ခိုက်ခံနေရသည်။ ကချင်လွတ်လပ်ရေး တပ်မတော် (KIA) နှင့် ပူးပေါင်းတပ်ဖွဲ့များ၏ ထိုးစစ်ကြောင့် စစ်ကော်မရှင် ပူးပေါင်း တပ်ဖွဲ့ဝင်များ၏ စခန်းနှစ်ခု လက်လွှတ်ခဲ့ရပြီးနောက် စစ်တပ်က လန်ဆယ်ဒေသကို သုံးရက်ဆက်တိုက် လေကြောင်းမှ ဗုံးကြဲတိုက်ခိုက် နေကြောင်း KIA ရှေ့တန်းသတင်းရင်းမြစ်များက ပြောသည်။ KIA ပူးပေါင်းတပ်ဖွဲ့များသည် အောက်တိုဘာလ ၂၀ ရက်နေ့တွင် ခေါင်လန်ဖူးမြို့နယ်ထဲရှိ စစ်ကော်မရှင် ပူးပေါင်းတပ်စခန်းနှစ်ခုကို တိုက်ခိုက်သိမ်းပိုက်နိုင်ခဲ့ခြင်းဖြစ်သည်။ သိမ်းပိုက်ခံရသည့် စခန်းများမှာ ရှလာန်ဒမ်းပြည်သူ့စစ်စခန်း နှင့် မခေါင်ဒမ်းရွာ ဆုတောင်းတောင်ကုန်းပေါ်ရှိ ပြည်သူ့စစ်စခန်းကြီး တို့ဖြစ်ပြီး ၎င်းတို့သည် လန်ဆယ်နှင့် ခေါင်လန်ဖူးကြား၊ KIA တပ်ဖွဲ့များရှိရာ ဒေသနှင့် အနီးကပ်ဆုံး တည်ရှိသည့် စခန်းများဖြစ်သည်။ KIA ဘက်က ခေါင်လန်ဖူးဘက်သို့ ဆက်လက်ထိုးစစ်ဆင်နေသဖြင့် စစ်ရေးတင်းမာမှု မြင့်တက်နေသည်။ စခန်းများ လက်လွှတ်လိုက်ရပြီးနောက် စစ်ကော်မရှင်တပ်သည် အောက်တိုဘာ ၂၀ ရက်နေ့မှ ၂၂ ရက်နေ့အထိ သုံးရက်ဆက်တိုက် လန်ဆယ်ဒေသကို လေကြောင်းဖြင့် လက်တုံ့ပြန် ဗုံးကြဲတိုက်ခိုက်နေသည်။ အောက်တိုဘာ ၂၂ ရက်နေ့ နေ့လယ်ပိုင်းတွင် လန်ဆယ်မှ တစ်မိုင်ခန့်အကွာရှိ ရွှေမှော်တစ်ဝိုက်ကို ဗုံးအလုံး ၂၀ ထက်မနည်း ကြဲချခဲ့ကြောင်း ဒေသခံများက ပြောသည်။ အောက်တိုဘာ ၂၀ ရက်နေ့ ဗုံးကြဲတိုက်ခိုက်မှုကြောင့် လန်ဆယ်အနီး လပေါကျေးရွာမှ ရွာခံအမျိုးသား တစ်ဦး သေဆုံး ခဲ့ရသည်။ ထို့အပြင် လန်ဆယ်မြို့ထဲရှိ စျေးဆိုင်များ၊ နေအိမ်များနှင့် ဘုရားကျောင်းဆောင်များပါ ထိခိုက်ပျက်စီးခဲ့ကြောင်း ဒေသခံများက ပြောသည်။ ခေါင်လန်ဖူးအပြင် ဝိုင်းမော်မြို့နယ် လမြန်ဒေသနှင့် ဖားကန့် KIA တပ်ရင်း ၆ နယ်မြေအပါအဝင် KIA ထိန်းချုပ်နယ်မြေ ၁၁ နေရာ ကိုလည်း စစ်ကောင်စီတပ်က လေကြောင်းမှ ဆက်တိုက် ဗုံးကြဲတိုက်ခိုက်နေ ကြောင်း KIA သတင်းရင်းမြစ်များက အတည်ပြု ပြောဆိုသည်။

ခေါင်လန်ဖူး စခန်းနှစ်ခု KIA သိမ်းပိုက်၊ စစ်တပ်က လန်ဆယ်ဒေသကို ၃ ရက်ဆက်တိုက် လေကြောင်းဖြင့် လက်တုံ့ပြန်  

Oct 23

မြဝတီတောင်ပိုင်း မင်းလက်ပံအနီး တိုက်ပွဲပြင်းထန်၊ အရပ်သားသားအမိနှစ်ဦး လက်နက်ကြီးထိမှန် သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၃ ရက်။ မြန်မာ-ထိုင်းနယ်စပ်၊ ကရင်ပြည်နယ်၊ မြဝတီမြို့တောင်ပိုင်းရှိ မင်းလက်ပံရွာအနီးတွင် စစ်ကော်မရှင်တပ်နှင့် ကရင်အမျိုးသား လွတ်မြောက်ရေး တပ်မတော် (KNLA) ပူးပေါင်းတပ်ဖွဲ့များကြား တိုက်ပွဲများ အရှိန်မြင့်နေပြီး အောက်တိုဘာ ၂၂ ရက်နေ့တွင် အရပ်သား သားအမိနှစ်ဦး လက်နက်ကြီးထိမှန် သေဆုံးခဲ့ကြောင်း မြေပြင်သတင်းအရင်းအမြစ်များက ပြောသည်။ စစ်ကော်မရှင်တပ်သည် လေးကေကော်မြို့သစ်မှ စွယ်တော်ကုန်းကို ထိန်းချုပ်ပြီးသည့်နောက် မြဝတီကနေ ဝေါလေမြိုင်တစ်လျှောက်ကို အင်အားအလုံးအရင်းဖြင့် စစ်ကြောင်းထိုးလာခြင်းဖြစ်သည်။ လက်ရှိ တိုက်ပွဲများသည် အင်ကြီးမြိုင်နှင့် မင်းလက်ပံရွာကြားတွင် ဖြစ်ပွားနေပြီး စစ်ကော်မရှင်ဘက်က လက်နက်ကြီးနှင့် ကာမီကာဇေဒရုန်းများ ကိုပါ အသုံးပြု၍ တိုက်ခိုက်နေကြောင်း စစ်ရေးသတင်းအရင်းအမြစ် များက ပြောသည်။ အောက်တိုဘာလ ၂၂ ရက်နေ့ တိုက်ပွဲအတွင်း မင်းလက်ပံရွာထဲရှိ ပုန်းခိုကျင်းထဲတွင် ရှိနေသည့် အရပ်သား သားအမိနှစ်ဦးသည် စစ်ကော်မရှင်တပ်၏ လက်နက်ကြီးကျည် ကျင်းထဲသို့ တည့်တည့်ကျရောက်ခဲ့သဖြင့် ပွဲချင်းပြီး သေဆုံးခဲ့ရကြောင်း ဒေသခံများက အတည်ပြုခဲ့သည်။ မြို့တောင်ပိုင်း တိုက်ပွဲများကြောင့် မြဝတီမြို့ပေါ်ရှိ စစ်ရှောင်စခန်း ၇ ခုတွင် စစ်ရှောင်ဦးရေမှာ အနည်းဆုံး ၃,၅၀၀ ကျော် အထိ ရှိလာနေပြီး စစ်ဘေးရှောင် ဒေသခံများ နေ့စဉ် တိုးလာနေသည်။ နယ်စပ်တိုက်ပွဲများ၏ အခြေအနေကြောင့် အိမ်နီးချင်း ထိုင်းနိုင်ငံကလည်း နယ်စပ်လုံခြုံရေး တိုးမြှင့်ကာ အနီးကပ် စောင့်ကြည့်နေကြောင်း ထိုင်းသတင်းမီဒီယာများတွင် ဖော်ပြထားသည်။ ကရင်ပြည်၊ မြဝတီမြို့တောင်ပိုင်း၌ တိုက်ပွဲများ ဆက်လက်ပြင်းထန်နေပြီး၊ လက်နက်ကြီးနှင့် ဒရုန်းများ၏ အန္တရာယ်မှာ စစ်ဘေးရှောင်နေသည့် အရပ်သားပြည်သူများအတွက် စိုးရိမ်စရာ အခြေအနေတစ်ခုအဖြစ် ဆက်ရှိနေသည်ဟု အကူအညီပေးနေသူများက ပြောသည်။

မြဝတီတောင်ပိုင်း မင်းလက်ပံအနီး တိုက်ပွဲပြင်းထန်၊ အရပ်သားသားအမိနှစ်ဦး လက်နက်ကြီးထိမှန် သေဆုံး  

Oct 23

Starlink ချိတ်ဆက်မှု ၂,၅၀၀ ကျော် ပိတ်သိမ်း၊ မြန်မာ ကျားဖြန့်ဂိုဏ်းများ အင်တာနက်ပြတ်တောက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၃ ရက်။ မြန်မာနိုင်ငံရှိ အွန်လိုင်းငွေလိမ်လုပ်ငန်း၊ ခေါ်ဝေါ်နေကြသည့် ‘ကျားဖြန့်’ လုပ်ငန်းများနှင့် ဆက်နွှယ်နေသော Starlink အင်တာနက် ချိတ်ဆက်မှု ကိရိယာပေါင်း ၂,၅၀၀ ကျော် ကို ပိတ်ချလိုက်ပြီဖြစ်ကြောင်း Starlink ၏ မိခင်ကုမ္ပဏီ SpaceX က တရားဝင် ထုတ်ဖော်ပြောကြားခဲ့သည်။ အီလွန် မတ်စ် (Elon Musk) ထူထောင်ထားသည့် SpaceX ကုမ္ပဏီ၏ ဒုတိယဥက္ကဋ္ဌ ဖြစ်သူ လော်ရန် ဒရိုင်ယာ (Lauren Dreyer) က အောက်တိုဘာ ၂၂ ရက်နေ့တွင် လူမှုကွန်ရက် X မှတစ်ဆင့် ဤအကြောင်းကို အသိပေးခဲ့ခြင်း ဖြစ်သည်။ SpaceX သည် အင်တာနက်ကို လက်ခံနိုင်သည့် အခြေအနေများတွင်သာ သုံးစွဲရန် စောင့်ကြည့်သည့် မူဝါဒရှိပြီး ချိုးဖောက်ပါက အရေးယူကြောင်း ဆိုသည်။ မြန်မာနိုင်ငံရှိ ကျားဖြန့်စင်တာများတွင် အဆိုပါစက်များ အသုံးပြုနေသည်ကို တွေ့ရှိရခြင်းသည် မူဝါဒ ချိုးဖောက်မှု ဖြစ်သောကြောင့် အင်တာနက်သုံးမရအောင် ပိတ်လိုက်ခြင်းဖြစ်ကြောင်း ၎င်းက ရှင်းပြခဲ့သည်။ လူ့အခွင့်အရေးအဖွဲ့များက ထိုင်း-မြန်မာနယ်စပ် ကျားဖြန့်စင်တာများသည် Starlink ကို အသုံးချကာ အမေရိကန် ပြည်သူများအား ထိခိုက်စေသည့် ရာဇဝတ်မှုများ ကျူးလွန်နေသည်ဟု အမေရိကန် လွှတ်တော်တွင် ထောက်ပြခဲ့ ကြသည်။ မြန်မာ - ထိုင်းနယ်စပ် ဒေသရှိ အွန်လိုင်းငွေလိမ်လုပ်ငန်းများ (ကျားဖြန့်ဂိုဏ်းများ) သည် လက်ရှိတွင် နိုင်ငံတကာ ဖိအားများစွာကို ရင်ဆိုင်နေရသည်။ Starlink ကွန်ရက်ကို ပိတ်သိမ်းရန် SpaceX ၏ ဆုံးဖြတ်ချက်သည် မြဝတီမြို့တောင်ဘက်ခြမ်းရှိ နာမည်ဆိုး ထွက် KK Park စီမံကိန်းထဲသို့ မြန်မာစစ်ကောင်စီတပ်က ဝင်ရောက်စီးနင်းမှု ဖြစ်ပြီးသည့်နောက် ရက်ပိုင်း အကြာတွင် ထွက်ပေါ်လာခြင်းဖြစ်သည်။ နယ်စပ်တစ်လျှောက်ရှိ ကျားဖြန့်ဂိုဏ်းများသည် အိမ်နီးချင်း တရုတ်နှင့် ထိုင်းနိုင်ငံတို့၏ ဖိအားပေးမှုများကို အဓိက ရင်ဆိုင်နေရသည်။ ထိုဖိအားများကြောင့် ကရင်နယ်ခြားစောင့်တပ် (BGF) နှင့် ကရင်လက်နက်ကိုင်တပ် (DKBA) တို့သည် ၎င်းတို့ ထိန်းချုပ်ထားသည့် ဖလူး၊ မင်းလက်ပံနှင့် ကျောက်ခတ်ကဲ့သို့ နေရာများတွင် ယခုနှစ်အစောပိုင်းက စတင်၍ ကျားဖြန့်လုပ်ငန်းများကို နှိမ်နင်းခဲ့သည်။ ဤနှိမ်နင်းမှုများကြောင့် တရုတ်နိုင်ငံသား အများစု ပါဝင်သော ထောင်သောင်းချီသည့် ကျားဖြန့်လုပ်သားများကို သက်ဆိုင်ရာ နိုင်ငံများဆီ လွှဲပြောင်းပေးရသည့်အထိ ဖြစ်ခဲ့သည်။ Starlink ကွန်ရက်ကို ယခုလို ပိတ်သိမ်းရသည့် အဓိက အကြောင်းရင်းတစ်ခုမှာ ထိုင်းအစိုးရသည် နယ်စပ် ကျားဖြန့်လုပ်ငန်းများအတွက် အင်တာနက် ထောက်ပံ့မှုကို ဖြတ်တောက်ခဲ့ပြီးနောက် ဂိုဏ်းများက Starlink ကွန်ရက်ကို မှီခိုအသုံးပြုလာကြခြင်းကြောင့် ဖြစ်သည်။ စစ်ကော်မရှင်တပ်ကလည်း KK Park ကို ဝင်ရောက်စီးနင်းကာ Starlink စက် ၃၀ ခန့် သိမ်းဆည်းရမိခဲ့ကြောင်း ကြေညာခဲ့သော်လည်း ကျားဖြန့်ဂိုဏ်းများ လက်တွေ့သုံးစွဲသည့် အရေအတွက်နှင့် နှိုင်းယှဉ်ပါက အနည်းငယ်သာ ရှိနိုင်ကြောင်း လေ့လာသူများက သုံးသပ်ကြသည်။

Starlink ချိတ်ဆက်မှု ၂,၅၀၀ ကျော် ပိတ်သိမ်း၊ မြန်မာ ကျားဖြန့်ဂိုဏ်းများ အင်တာနက်ပြတ်တောက်

Oct 22

အုပ်ချုပ်ရေးမှူးနှင့် ပျူခေါင်းဆောင် ၃ ဦး ထွက်ပြေးသဖြင့် အသေဖမ်းဆီးခဲ့ရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ ကော့သောင်း၌ အုပ်ချုပ်ရေးမှူးနှင့် ပျူခေါင်းဆောင် (၃) ဦး ပစ်ခတ်မှုအတွင်း သေဆုံးခဲ့သည့်အပြင် တော်လှန်ရေးအဖွဲ့က လက်နက်ခဲယမ်းများ သိမ်းဆည်းရမိခဲ့သည်။ တနင်္သာရီတိုင်း၊ ကော့သောင်းခရိုင်အတွင်း လှုပ်ရှားနေသည့် တော်လှန်ရေးပူးပေါင်းအဖွဲ့များသည် ခမောက်ကြီး မြို့နယ်အတွင်း စစ်ကော်မရှင်၏ အုပ်ချုပ်ရေးယန္တရားနှင့် ပျူစောထီးအဖွဲ့ဝင်များကို စီးနင်းဖမ်းဆီးရာ၌ ခုခံမှု ကြောင့် အုပ်ချုပ်ရေးမှူးနှင့် ပျူခေါင်းဆောင် (၃) ဦး သေဆုံးခဲ့ ကြောင်း ယင်းတော်လှန်ရေးပူးပေါင်းအဖွဲ့များက အောက်တိုဘာလ ၂၀ ရက်နေ့တွင် သတင်းထုတ်ပြန်ခဲ့သည်။ ဖြစ်စဉ်မှာ အောက်တိုဘာလ (၁၄) ရက်နေ့၊ နံနက် (၈) နာရီခန့်တွင် တော်လှန်ရေးပူးပေါင်းအဖွဲ့များသည် ခမောက်ကြီးမြို့နယ်၊ လုံးဖောကျေးရွာအတွင်းသို့ ရှောင်တခင် ဝင်ရောက်ပြီး ကျေးရွာအုပ်ချုပ်ရေးမှူး ဦးဝင်းမြင့် နှင့် ပျူခေါင်းဆောင် ဦးအေးစိုး တို့ကို ဖမ်းဆီးခဲ့သည်။ ၎င်းတို့ (၂) ဦးကို စစ်ဆေးမေးမြန်း ညှိနှိုင်းရန် လုံခြုံသည့်နေရာသို့ ခေါ်ဆောင်လာစဉ် အုပ်ချုပ်ရေးမှူး ဦးဝင်းမြင့် ၏ Hilux Vigo ကားကိုပါ ယူဆောင်လာခဲ့သည်။ လုံးဖောကျေးရွာ အလွန်တစ်နေရာတွင် နမ္မနွယ်ကျေးရွာမှ ပျူခေါင်းဆောင် ဦးသက်ဦး ကို ထပ်မံတွေ့ရှိခဲ့သဖြင့် ၎င်းကိုပါ ထပ်မံခေါ်ဆောင်လာခဲ့သည်။ ထို့နောက် နေ့လည် (၁၂) နာရီခန့် လမ်းခုလပ်တစ်နေရာ၌ နေ့လည်စာ စားနေကြချိန်တွင် ခေါ်ဆောင်လာသည့် ပျူခေါင်းဆောင် ဦးသက်ဦးသည် ၎င်းတွင် အသင့်ပါလာသော မက်(ဂ်)နန်း ပစ္စတို ဖြင့် ရုတ်တရက် ပစ်ခတ်ခုခံ ခဲ့ပြီး ၎င်းတို့ (၃) ဦးလုံး ထွက်ပြေးခဲ့ကြသည်။ တော်လှန်ရေး ရဲဘော်များက လိုက်လံပစ်ခတ်ဖမ်းဆီးရာတွင် ၎င်းတို့ (၃) ဦးလုံး ကျည်ထိမှန် သေဆုံးသွားခဲ့ ကြောင်း ထုတ်ပြန်ချက်တွင် ဖော်ပြထားသည်။ ကော့သောင်းခရိုင် ပြည်သူ့ကာကွယ်ရေး အဖွဲ့ တာဝန်ရှိသူက “မွန်းတည့် ၁၂ နာရီလောက်က လမ်းခုလတ် တစ်နေရာ အရောက်မှာ ခေတ္တနားကြပြီး နေ့လည်စာ စားနေကြတဲ့အချိန်မှာ ပျူစောထီးခေါင်းဆောင် ဦးသက်ဦးက သူ့မှာ အသင့်လျှို့ဝှက်ယူလာတဲ့ မက်(ဂ်)နန်း ပစ္စတိုနဲ့ ပစ်ခတ် ခုခံပြီး ၃ ဦးစလုံး ထွက်ပြေးခဲ့တာ ကြောင့် ပြည်သူ့ကာကွယ်ရေး တပ်ဖွဲ့ဝင်တွေက လိုက်လံပြီး ၃ ဦးလုံးကို အသေပစ်ခတ် ဖမ်းဆီးခဲ့ရတာ” ဟု ပြောသည်။ ဤပစ်ခတ်မှုကြောင့် တော်လှန်ရေးရဲဘော် (၁) ဦးမှာ ညာဘက်ပေါင်တွင် ကျည်ရှပ်ထိဒဏ်ရာ ရရှိခဲ့သည်။ တော်လှန်ရေးပူးပေါင်းအဖွဲ့များအနေဖြင့် ဖြစ်စဉ်အတွင်း စကားပြောစက် (၄) လုံး၊ ဖုန်း (၄) လုံး၊ ကိုးလုံးကျည် ခေါက်ချိုးအရှည် (၁) လက်နှင့် ကျည် (၃) တောင့်၊ မက်(ဂ်)နန်းပစ္စတို (၁) လက်နှင့် ကျည် (၅) တောင့်၊ ပြည်သူ့စစ် စိစစ်ရေး ကတ်ပြားများ နှင့် Hilux Vigo ကား တို့ကို သိမ်းဆည်းရမိခဲ့သည်။ ကော့သောင်းခရိုင်ရှိ တော်လှန်ရေးအင်အားစုများက ယခုဖြစ်စဉ်နှင့်ပတ်သက်၍ နောင်တွင် ယခုကဲ့သို့ မဖြစ်ပွား စေရန်အတွက် မြို့နယ်အတွင်းရှိ အုပ်ချုပ်ရေးအဖွဲ့ဝင်များနှင့် ပျူအဖွဲ့ဝင်များသည် တော်လှန်ရေး အင်အားစုများ ၏ ခေါ်ယူပြောဆိုမှုကို ကောင်းမွန်စွာ ပြန်လည်ဆက်ဆံပြီး ပြည်သူနှင့်အတူ ပူးပေါင်းပါဝင် ရပ်တည်သွားကြရန် တိုက်တွန်းပြောကြားခဲ့သည်။ ထို့အပြင် ပြည်သူ့ဘက် မရပ်တည်သော၊ စစ်ကော်မရှင်တပ်နှင့် အပေါင်းအပါ မှန်သမျှကို ကော့သောင်းခရိုင် တော်လှန်ရေးအင်အားစုများမှ လုပ်ထုံးလုပ်နည်းနှင့်အညီ ဆက်လက်အရေးယူ ဆောင်ရွက်သွားမည်ဖြစ်ကြောင်း ထုတ်ပြန် အသိပေးထားသည်။

အုပ်ချုပ်ရေးမှူးနှင့် ပျူခေါင်းဆောင် ၃ ဦး ထွက်ပြေးသဖြင့် အသေဖမ်းဆီးခဲ့ရ

Oct 22

အမေ၊ အဖေရဲ့ Mobile ဖုန်းထဲက ဒေါ်လာ ၁၀၀၀၀ ခန့်ကို ၈ နှစ်သမီးလေးက သုံးစွဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ တရုတ်နိုင်ငံ ရှင်ကျန်း ပြည်နယ်က အသက် ၈ နှစ် ကလေးဟာ မိဘတွေ စုထားတဲ့ ပိုက်ဆံ ယွမ် ၇၀,၀၀၀ ကျော်ကို အွန်လိုင်း တိုက်ရိုက် လက်ဆောင်တွေ အဖြစ် ပေးခဲ့တယ်လို့ ဘန်ကောက်ပို့စ် သတင်းစာမှာ ဖော်ပြထားပါတယ်။ ဒေသတွင်း သတင်းတွေအရတော့ ကလေးဟာ မိဘတွေရဲ့ ဖုန်းတွေကို ယူဆော့လေ့ရှိပါတယ်။ ပြီးတော့ ငွေပေးချေတဲ့စကားဝှက်တွေကို အလွတ်မှတ်ထားခဲ့တာ ဖြစ်တယ်လို့ ဘန်ကောက်ပို့စ် သတင်းမှာ ရေးထားပါတယ်။ မေလမှာတော့ ကလေးက တိုက်ရိုက်ထုတ်လွှင့်တဲ့ လူမှု မီဒီယာ ကွန်ရက်တစ်ခုကို အမှတ်မထင် ဝင်ရောက်မိခဲ့ပါတယ်။ အဲဒီ လူမှု ကွန်ရက်မှာက ကြည့်ရှုသူတွေက အကောင့်ပိုင်ရှင်တွေကို အွန်လိုင်းကနေ လက်ဆောင်တွေ ပေးပို့ထားကို သတိထားမိခဲ့ပါတယ်။ သူကလည်း တခြားသူတွေ လုပ်သလို လက်ဆောင်တွေ ပေးပါတော့တယ်။ အသံလွှင့်ထုတ်နေသူတွေကို အွန်လိုင်းကနေ လက်ဆောင်တွေ ဝယ်ပေးခဲ့ပါတယ်။ အဲဒီလို လက်ဆောင်ပေးခဲ့တာဟာ ၂ လလောက် ကြာခဲ့တယ်လို့ ဆိုပါတယ်။ သူက လက်ဆောင်တွေ ပိုပိုပေးလာခဲ့တာကြောင့် အဲဒီ လူမှု ကွန်ရက်မှာ ထိပ်တန်း ပံ့ပိုးသူ တယောက်ဖြစ်လာခဲ့ပါတယ်။ မိဘတွေက အလုပ်သမားတွေကို လုပ်အားခပေးဖို့ ဘဏ်အကောင့်ကို ပြန်ဖွင့်ကြည့်တဲ့အခါကျမှ သူတို့ရဲ့ ယွမ် ၇၀,၀၀၀ ကျော် (အမေရိကန် ဒေါ်လာ ၁ သောင်းခန့်) ရှိတဲ့ ဘဏ်အကောင့်ထဲမှာ ၂၅ ယွမ်ပဲ ကျန်တော့တာကို သိခဲ့ရတယ်လို့ ဆိုပါတယ်။ မိဘတွေက ရဲကိုတိုင်ကြားခဲ့ပြီး ရဲက အဲဒီ လူမှုမီဒီယာ ကွန်ရက် ကိုင်တွယ်သူတွေကို ဆက်သွယ်ပြီး ကလေးဟာ မိဘ ခွင့်ပြုချက်မရပဲ ငွေလွှဲပေးခဲ့တာဖြစ်လို့ ပြန်ပေးဖို့ တောင်းဆိုပေးခဲ့ပါတယ်။ လူမှု မီဒီယာ ကွန်ရက်က ဘဏ်မှတ်တမ်းတွေကို ကြည့်ပြီး ဩဂုတ်လထဲမှာတော့ ကလေးမိဘတွေကို ယွမ် ၇၁,၈၀၃ ပြန်လည် လွှဲပေးခဲ့ပါတယ်။

အမေ၊ အဖေရဲ့ Mobile ဖုန်းထဲက ဒေါ်လာ ၁၀၀၀၀ ခန့်ကို ၈ နှစ်သမီးလေးက သုံးစွဲ

Oct 22

ဘီလာရုစ် မော်ဒယ် ပျောက်ဆုံးမှုနှင့် ပတ်သက်၍ ထိုင်းနိုင်ငံတွင် တာဝန်မရှိဟု ထိုင်းက ထုတ်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ ထိုင်းနိုင်ငံ မြောက်ပိုင်း မြန်မာ နယ်စပ်မှာ အသတ်ခံရပြီး ခန္ဓာကိုယ် အစိတ်အပိုင်းတွေ ရောင်းစားခံလိုက်ရတယ်လို့ သတင်းတွေမှာပါခဲ့တဲ့ ဘီလာရုစ် နိုင်ငံက မော်ဒယ်ဟာ ထိုင်းနိုင်ငံကနေ အတင်းအဓမ္မ ဖမ်းဆီး ခေါ်ဆောင်သွားခံရတာ မဟုတ်ဘူးလို့ ထိုင်း လူဝင်မှု ကြီးကြပ်ရေးက သတင်းထုတ်ပြန်ပါတယ်။ ဘီလာရုစ် သတင်းဌာန တစ်ခုဖြစ်တဲ့ Mash ဆိုတဲ့ သတင်းမီဒီယာ တစ်ခုက Vera Kravtsova (ဗီရာ ကရဗ်ဆိုဗာ). လို့ ခေါ်တဲ့ မော်ဒယ်ဟာ ထိုင်းနိုင်ငံကို မော်ဒယ် အလုပ် သွားလျောက်ရာမှာ အတင်းအကြပ် ဖမ်းဆီးခံရတယ်လို့ ရေးထားပါတယ်၊ အဲဒီနောက်မှာ မြန်မာနယ်စပ်မှာ အနှိပ်စက်ခံရပြီးနောက် သတ်ဖြတ်ခံရပြီး ကိုယ်အင်္ဂါတွေ ရောင်းစား ခဲ့ရတယ်လို့ ရေးသား ထားခဲ့တာပါ။ အဲဒီ သတင်းကို အခြေခံပြီး နိုင်ငံတကာ သတင်းတွေဖြစ်တဲ့ Daily Mail တို့ The Sun တို့မှာလည်း ဖော်ပြမှု ရှိခဲ့ပါတယ်။ Vera Kravtsova စက်တင်ဘာ ၁၄ ရက်က ထိုင်းနိုင်ငံ သုဝဏ္ဏ ဘုမ္မိ လေဆိပ်ကနေ ဝင်ရောက်လာခဲ့ပြီး စက်တင်ဘာ ၂၀ ရက်မှာတော့ ရန်ကုန်ကို ထိုင်းလေကြောင်းလိုင်း လေယာဉ်နဲ့ ပြန်ထွက်သွားခဲ့တာ ဖြစ်တယ်လို့ လူဝင်မှု ကြီးကြပ်ရေး အရာရှိ ရဲဗိုလ်ချုပ် Choengron Rimpadee က ပြောပါတယ်။ လေဆိပ်မှာရှိတဲ့ CCTV မှတ်တမ်းတွေ အရ ရန်ကုန်ကို လေယာဉ်နဲ့ ထွက်ခွာတဲ့ အချိန်မှာ သူ့ကို အတင်းအကြပ် စေခိုင်းနေတဲ့ လက္ခဏာတွေ မတွေ့ရဘူးလို့လည်း ထိုင်း လဝက က ပြောပါတယ်။ ထိုင်းနိုင်ငံလူဝင်မှု ကြီးကြပ်ရေးကတော့ အဲဒီမော်ဒယ် မြန်မာပြည်ကို ထွက်သွားပြီး ဘာဖြစ်တယ်ဆိုတာ သူတို့ မသိရဘူးလို့ ဆိုပါတယ်။

ဘီလာရုစ် မော်ဒယ် ပျောက်ဆုံးမှုနှင့် ပတ်သက်၍ ထိုင်းနိုင်ငံတွင် တာဝန်မရှိဟု ထိုင်းက ထုတ်ပြန်

Oct 22

အမေရိကန် ရုရှား ထိပ်သီးတွေ့ဆုံပွဲ မရေမရာ ဖြစ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ အမေရိကန် နဲ့ ရုရှား သမ္မတနှစ်ဦး ထိပ်သီး တွေ့ဆုံပွဲ လုပ်ကြမည်ဟု ပြောဆိုပြီးနောက်တွင် တွေ့ဆုံမှု ဖြစ်ချင်မှ ဖြစ်တော့မည်ဟု အမေရိကန် ဘက်က ပြောလာသည်။ ရုရှားဘက်က ချက်ချင်း အပစ်အခတ် ရပ်စဲမှု မလုပ်နိုင်ဟု ပြောဆိုလာသည့်နောက်တွင် သမ္မတပူတင် နှင့် တွေ့ဆုံမည့် အစီအစဉ်ကို ရွှေ့ဆိုင်းထားမည်ဟု အမေရိကန် သမ္မတ ဒေါ်နယ် ထရန့်က ပြောလိုက်သည်။ အချိန်ဖြုန်းရုံ အစည်းအဝေးကို မလုပ်ချင်ဘူးဟု သမ္မတထရန့်က ပြောလိုက်သည်။ မကြာသေးမီက အိမ်ဖြူတော်တွင် ယူကရိန်း သမ္မတနဲ့ တွေ့ဆုံစဉ်က အပစ်အခတ်ရပ်စဲရေးအတွက် ယူကရိန်းနယ်မြေ အချို့ကို ရုရှားကို ပေးလိုက်ရန် အမေရိကန် သမ္မတ ထရန့်က တိုက်တွန်းခဲ့သည်။ ထို အစည်းအဝေး မတိုင်မီလေးတွင်ပင် သမ္မတ ထရန့်က ရုရှား သမ္မတ ပူတင်နှင့် တယ်လီဖုန်း စကားပြောပြီး ပူတင်နှင့် မကြာမီ ရက်ပိုင်းတွင် တွေ့ဆုံမည်ဟု ကြေညာခဲ့သည်။ ထို့နောက်တွင် ရုရှားက မူလ တောင်းဆိုချက်များကို အလျော့ပေးမည် မဟုတ်ကြောင်း နယ်မြေအများအပြားကို လိုချင်ကြောင်း အမေရိကန်ကို အကြောင်းကြားခဲ့ခြင်း ဖြစ်သည်။ ထိုအကြောင်းကြားမှုနောက်တွင် သမ္မတ ဒေါ်နယ်ထရန့်က သမ္မတ ပူတင်နှင့် ဆွေးနွေးပွဲ လုပ်ဖြစ်ချင်မှ လုပ်ဖြစ်တော့မည် ဟု ပြောဆိုလာခြင်း ဖြစ်သည်။ အောက်တိုဘာ ၂၁ ရက် ကတော့ ဥရောပ ခေါင်းဆောင်များက သမ္မတ ထရန့်အား ယူကရိန်း စစ်ပွဲနှင့် ပတ်သက်လို့ ဆွေးနွေးမည်ဆိုပါက ရုရှားဘက်က ချက်ချင်း အပစ်အခတ် ရပ်စဲမည် ဆိုသည့် အချက်ကို အခိုင်အမာရအောင် လုပ်ဆောင်ရန် တိုက်တွန်းခဲ့သည်။

အမေရိကန် ရုရှား ထိပ်သီးတွေ့ဆုံပွဲ မရေမရာ ဖြစ်နေ

Oct 22

ဒေသမတည်ငြိမ်မှု၏ ရေသောက်မြစ် စစ်အုပ်စုအား အာဆီယံက အရေးယူရန်လိုဟု JFM တောင်းဆို   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ ဒေသတွင်း မတည်ငြိမ်မှုများနှင့် နိုင်ငံဖြတ်ကျော် ရာဇဝတ်မှုများ၏ အဓိက ရေသောက်မြစ်မှာ မြန်မာစစ်အုပ်စု ဖြစ်သည့် အတွက် အာဆီယံနှင့် နိုင်ငံတကာအသိုက်အဝန်းအနေဖြင့် မဖြစ်မနေ အရေးယူဆောင်ရွက်ရန် Justice for Myanmar (JFM) အဖွဲ့က တောင်းဆိုလိုက်သည်။ JFM အဖွဲ့၏ အောက်တိုဘာလ ၂၁ ရက်နေ့ ထုတ်ပြန်ချက်အရ ပြီးခဲ့သည့် တနင်္ဂနွေနေ့က စစ်အုပ်စုသည် နာမည် ဆိုးဖြင့် ကျော်ကြားသော KK Park ဆိုက်ဘာငွေလိမ် ခြံဝန်းကြီးကို အယောင်ပြ စီးနင်းခဲ့သည် ဟု ဖော်ပြထား သည်။ ယင်းလုပ်ရပ်မှာ လာမည့် အာဆီယံအစည်းအဝေး မတိုင်မီ စစ်အုပ်စုနှင့် ၎င်းတို့၏ လက်အောက်ခံ ကရင်နယ်ခြားစောင့်တပ် (BGF) ၏ ရာဇဝတ်မှုများအပေါ် အာရုံပြောင်းရန် ကြိုးပမ်းခြင်းသာဖြစ်ကြောင်း သုံးသပ်သူများက ထောက်ပြထားသည်ဟု JFM က ဆိုသည်။ မြန်မာစစ်တပ်သည် BGF နှင့်အတူ လူကုန်ကူးမှု၊ ငွေလိမ်လည်မှုစသည့် နိုင်ငံဖြတ်ကျော် ရာဇဝတ်စီးပွား ကွန်ရက်ကြီး တစ်ခုကို ကြီးကြပ်လည်ပတ်နေသည် ဟု JFM က စွပ်စွဲသည်။ BGF ခေါင်းဆောင်များသည် KK Park အပြင်၊ Apollo Park နှင့် Yulong Bay Park ကဲ့သို့သော အခြားသော ဆိုက်ဘာငွေလိမ်ခြံကြီးများတွင်လည်း ပါဝင်ပတ်သက်နေကြောင်း နိုင်ငံတကာ အစီရင်ခံစာများက ဖော်ပြခဲ့ပြီး ဖြစ်သည်။ စစ်အုပ်စုသည် အကြမ်းဖက်အဖွဲ့အစည်းဖြစ်ပြီး ဒေသမတည်ငြိမ်မှု၏ တရားခံဖြစ်သည့်အတွက် လာမည့် အာဆီယံထိပ်သီး အစည်းအဝေးတွင် အစိုးရများအနေဖြင့် စစ်အုပ်စုကိုရော၊ ၎င်းတို့၏ အတုအယောင် ရွေးကောက်ပွဲကိုပါ ပြတ်သားစွာ ဆန့်ကျင်ရန် JFM က တောင်းဆိုသည်။ ထို့အပြင် စစ်တပ်၏ ဘဏ္ဍာငွေနှင့် စစ်လက်နက် လမ်းကြောင်းများကို ဖြတ်တောက်ရန်နှင့် စစ်ရာဇဝတ်မှုများ အတွက် နိုင်ငံတကာ အရေးယူ တာဝန်ခံမှုကို ရရှိစေရန်တို့ကိုလည်း တောင်းဆိုထားသည်။

ဒေသမတည်ငြိမ်မှု၏ ရေသောက်မြစ် စစ်အုပ်စုအား အာဆီယံက အရေးယူရန်လိုဟု JFM တောင်းဆို  

« Prev 1 … 102 103 104 105 106 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ 
ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက်

Archives

Archives

×Close