NMG Doh – Page 105 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Oct 22

KK Park မှ ကျားဖြန့်လုပ်သား ရာနှင့်ချီ ရွှေ့ပြောင်း၊ ဖိအားကြောင့် ပြန်လွှတ်ခြင်းဟု BGF ပြော   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ မြန်မာ-ထိုင်းနယ်စပ် မြဝတီမြို့နားရှိ နာမည်ဆိုးဖြင့် ကျော်ကြားသော KK Park ဆိုက်ဘာငွေလိမ်ခြံဝန်းအတွင်းမှ လူပေါင်းရာနှင့်ချီသည် ရွှေ့ပြောင်းထွက်ခွာနေကြသည်။ ကရင်နယ်ခြားစောင့်တပ် (BGF) ၏ စီမံမှုဖြင့် အောက်တိုဘာလ ၂၁ ရက်နေ့ ညကစတင်ကာ အလျင်အမြန် ရွှေ့ပြောင်းထွက်ခွာနေကြကြောင်း မျက်မြင်တွေ့ရှိသူများနှင့် ဒေသခံများထံမှ သိရသည်။ မျက်မြင်တွေ့ရှိချက်များအရ BGF အဖွဲ့ဝင်များ၏ ကားကြီး/ငယ်များဖြင့် လူအများအပြား အထုပ်အပိုးများဖြင့် ထွက်ခွာနေကြပြီး တရုတ်လူမျိုးများ အများဆုံး ပါဝင်ကြောင်း သိရသည်။ ဒေသခံများ၏ ပြောကြားချက်အရ စစ်ကောင်စီတပ်က ထပ်မံဝင်ရောက် စီးနင်းမည်ဟူသော သတင်းများကြောင့် ယခုကဲ့သို့ ရွှေ့ပြောင်းခြင်းဖြစ်နိုင်သည်ဟု သုံးသပ်ကြသည်။ သို့သော် BGF တာဝန်ရှိသူ ဗိုလ်မှူးချုပ် စောတင်ဝင်းကမူ "ကျားဖြန့်လို့ နာမည်ထွက်နေလို့ ဖိအားကြောင့် ပေးပြန်တာ" ဖြစ်ကြောင်း ကရင်သတင်းဌာနဖြစ်သည် KIC သတင်းဌာနကို ပြောဆိုထားသည်။ နိုင်ငံတကာအသိုင်းအဝိုင်းတွင် နာမည်ကြီးနေသော KK Park စီမံကိန်းနယ်မြေမှ လူအများအပြား အလျင်အမြန် ရွှေ့ပြောင်းထွက်ခွာနေခြင်းသည် ဒေသတွင်း စစ်ရေး၊ နိုင်ငံရေးအပြင် နိုင်ငံတကာ ဖိအားတို့နှင့် ဆက်စပ်မှု ရှိနေနိုင်ကြောင်း သုံးသပ်ချက်များ ထွက်ပေါ်လျက်ရှိသည်။

KK Park မှ ကျားဖြန့်လုပ်သား ရာနှင့်ချီ ရွှေ့ပြောင်း၊ ဖိအားကြောင့် ပြန်လွှတ်ခြင်းဟု BGF ပြော

Oct 22

မန္တလေးတိုင်းတွင် လေကြောင်းတိုက်ခိုက်မှုများကြောင့် ကလေးငယ် ၄ ဦး အပါအဝင် အရပ်သား ၈ ဦး သေဆုံး   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ မန္တလေးတိုင်းဒေသကြီးရှိ သပိတ်ကျင်းနှင့် မိုးကုတ်မြို့နယ်များအား စစ်ကော်မရှင်တပ်က လေကြောင်းနှင့် ဒရုန်းများဖြင့် ဗုံးကြဲတိုက်ခိုက်ခဲ့ရာတွင် တစ်နှစ်အရွယ် ကလေးငယ်အပါအဝင် အရပ်သား ၈ ဦး ခဲ့သည်။ မန္တလေးတိုင်းတွင် လေကြောင်း တိုက်ခိုက်မှုများကြောင့် ကလေးငယ် ၄ ဦး အပါအဝင် အရပ်သား ၈ ဦး သေဆုံး ပြီး အယောက် ၂၀ ကျော် ထိမှန်ဒဏ်ရာ ရခဲ့သည်ဟု ဒေသခံသတင်းရင်းမြစ်များနှင့် တအာင်းတပ် TNLA ၏ ထုတ်ပြန်ချက်အရ သိရသည်။ သပိတ်ကျင်းမြို့နယ်၊ ဇရပ်ကွင်းရွာကို အောက်တိုဘာလ ၂၁ ရက်နေ့၊ ညနေ ၆ နာရီခန့်တွင် စစ်ကော်မရှင်တပ် ထိန်းချုပ်ထားသော ဖော့တောလမ်းဆုံမှ ဒရုန်းဖြင့် တိုက်ခိုက်ခဲ့ခြင်းဖြစ်သည်။ ယင်းတိုက်ခိုက်မှုကြောင့် တစ်နှစ်သားလေး အပါအဝင် ဒေသခံ ၅ ယောက် သေဆုံး ပြီး ၈ ယောက်ထက်မနည်း ဒဏ်ရာရခဲ့ကြောင်း ဒေသခံများက ပြောသည်။ အလားတူ တအာင်းတပ် TNLA ထိန်းချုပ်ရာ မိုးကုတ်မြို့ ကိုလည်း အောက်တိုဘာ ၂၁ ရက်နေ့၊ မွန်းလွဲ ၃ နာရီ ဝန်းကျင်တွင် တိုက်ပွဲဖြစ်ပွားမှုမရှိဘဲ လေကြောင်းမှ ဗုံးကြဲခဲ့သည်။ ကန်တော်ရပ်ကွက်ရှိ ဖူဆယ်ဘောလုံးကွင်းအနီးကို ပေါင် ၂၅၀ ဗုံး ၂ လုံး ကြဲချခဲ့ရာ အသက် ၆ နှစ်၊ ၁၀ နှစ်နှင့် ၁၂ နှစ်အရွယ် ကလေးငယ် ၃ ယောက် သေဆုံး ခဲ့ပြီး ၁၂ ယောက် ဒဏ်ရာရရှိခဲ့သည်။ ယင်းတိုက်ခိုက်မှုကြောင့် အိမ် ၁၁ လုံးနှင့် ဖူဆယ်ကွင်းလည်း ပျက်စီးခဲ့သည်။ TNLA ၏ ထုတ်ပြန်ချက်များအရ အောက်တိုဘာလ တစ်လတည်းအတွင်း စစ်ကော်မရှင်တပ်၏ လေကြောင်း တိုက်ခိုက်မှုများကြောင့် ကလေးငယ်များ အပါအဝင် အရပ်သား ၄၀ ကျော် သေဆုံးပြီး ၅၀ ကျော် ဒဏ်ရာရရှိ ထားကြောင်း ဖော်ပြထားသည်။

မန္တလေးတိုင်းတွင် လေကြောင်းတိုက်ခိုက်မှုများကြောင့် ကလေးငယ် ၄ ဦး အပါအဝင် အရပ်သား ၈ ဦး သေဆုံး  

Oct 22

ရေတာရှည်စခန်းသိမ်းတိုက်ပွဲတွင် တပ်ရင်းမှူးအပါအဝင် ၁၅ ဦးကျဆုံး၊ စစ်သုံ့ပန်း ၂ ဦး ဖမ်းမိ   သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ ပဲခူးတိုင်းဒေသကြီး၊ ရေတာရှည်မြို့နယ်ရှိ စစ်ကော်မရှင်၏ အထိုင်စခန်းတစ်ခုကို တော်လှန်ရေး ပူးပေါင်းတပ်ဖွဲ့ များက ဝင်ရောက်တိုက်ခိုက် သိမ်းပိုက်နိုင်ခဲ့ရာ စစ်ကော်မရှင်ဘက်မှ တပ်ရင်းမှူးအပါအဝင် ၁၅ ဦး သေဆုံးပြီး စစ်သုံ့ပန်း ၂ ဦးကို အရှင်ဖမ်းဆီးရမိခဲ့သည်။ နေပြည်တော်တိုင်းစစ်ဌာန (NPT DSC) လက်အောက်ခံ တပ်ရင်းများ စုဖွဲ့ထားသည့် ဗျူဟာစစ်ကြောင်းက စစ်တောင်းမြစ် အရှေ့ဘက်ကမ်းရှိ ရွာသစ်ရွာတွင် အင်အား ၆၀ ခန့် အထိုင်ချထားသော အဆိုပါ စစ်ကော်မရှင် တပ်စခန်းကို အောက်တိုဘာလ ၂၀ ရက်နေ့က ဝင်ရောက်တိုက်ခိုက်ခဲ့ခြင်း ဖြစ်သည်။ တိုက်ပွဲအတွင်း စစ်ကော်မရှင်ဘက်မှ လေကြောင်းရန် ကာကွယ်ရေးတပ် (လကတ-၂၀၂၉) မှ တပ်ရင်းမှူး ဒုတိယဗိုလ်မှူးကြီး ညီညီနိုင် အပါအဝင် ၁၅ ဦး ကျဆုံး ခဲ့သည်။ ဖမ်းဆီးရမိသော စစ်သုံ့ပန်း ၂ ဦးအပြင်၊ တပ်ရင်းမှူး ညီညီနိုင်မှာ ဖမ်းဆီးချိန်တွင် ပစ္စတိုထုတ်ကာ ခုခံမှုပြုလုပ် သဖြင့် အသေပစ်သတ်ခဲ့ရကြောင်း နေပြည်တော် တိုင်းစစ်ဌာန၊ ပြည်သူ့ကာကွယ်ရေးတပ်မတော် က ထုတ်ပြန် ထားသည်။ တိုက်ပွဲအပြီးတွင် တော်လှန်ရေးတပ်ဖွဲ့များက ရွာသစ်ရွာရှိ အထိုင်စခန်းနှင့် ကင်းစခန်းများအားလုံးကို အောင်မြင် စွာ သိမ်းပိုက်နိုင်ခဲ့သည်ဟု နေပြည်တော် PDF အဖွဲ့က ဆိုသည်။ ရေတာရှည် စခန်းသိမ်းတိုက်ပွဲအတွင်း လက်နက်ခဲယမ်းများကိုလည်း သိမ်းဆည်းရရှိခဲ့ကြသည်။ သိမ်းဆည်းရမိသည့် လက်နက်ခဲယမ်းများထဲတွင် ဒရုန်းဂျမ်ပါ အထိုင်စက်ကြီး (၁) လုံး၊ MA11 (၁) လက်၊ MA3 (၁) လက်၊ G3 (၃) လက်၊ ၆၀ မမ (၁) လက်၊ ပစ္စတို (၁) လက်အပြင် ကျည်မျိုးစုံ ၁,၀၀၀ ခန့်နှင့် စစ်အသုံးအဆောင်ပစ္စည်းများ ပါဝင်သည်။ တော်လှန်ရေးတပ်ဖွဲ့ဘက်မှ ရဲဘော် ၂ ဦးသာ ထိခိုက်ဒဏ်ရာရခဲ့ပြီး၊ တိုက်ပွဲကြောင့် လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုများကြား ပိတ်မိနေသည့် ရွာသားများကိုလည်း ဘေးလွတ်ရာသို့ ကယ်ထုတ်ပေးနိုင်ခဲ့ ကြောင်း ထုတ်ပြန်ထားသည်။ ယခု စစ်ဆင်ရေးကို အမျိုးသား ညီညွတ်ရေး အစိုးရ NUG ကာကွယ်ရေး ဝန်ကြီးဌာန၏ လမ်းညွှန်ချက်ဖြင့် အကောင်အထည်ဖော် ဆောင်ရွက်ရခြင်း ဖြစ်သည်ဟု နေပြည်တော်တိုင်းစစ်ဌာနက ထုတ်ပြန်ခဲ့သည်။

ရေတာရှည်စခန်းသိမ်းတိုက်ပွဲတွင် တပ်ရင်းမှူးအပါအဝင် ၁၅ ဦးကျဆုံး၊ စစ်သုံ့ပန်း ၂ ဦး ဖမ်းမိ  

Oct 22

KK Park ငွေလိမ်ဂိုဏ်းကိစ္စ KNU နှင့် သက်ဆိုင်ခြင်းမရှိကြောင်း KNU ပြောခွင့်ရ တုန့်ပြန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ မြန်မာ - ထိုင်းနယ်စပ်ရှိ လူကုန်ကူးမှုနှင့် အွန်လိုင်း ငွေလိမ်လည်မှု နေရာတစ်ခုဖြစ်သော KK Park ကို စစ်ကော်မရှင် တပ်က ဝင်ရောက်စီးနင်းခဲ့ခြင်းသည် ကရင်အမျိုးသားအစည်းအရုံး (KNU) အပေါ် နိုင်ငံရေးအရ ထိုးနှက် တိုက်ခိုက်ရန် ရည်ရွယ်ချက်သာ ဖြစ်ကြောင်း KNU တာဝန်ရှိသူက ပြောသည်။ စစ်ကော်မရှင်တပ်၏ စီးနင်းဖမ်းဆီးမှုကြောင့် KK Park ကိစ္စသည် နိုင်ငံတကာ၏ အာရုံစိုက်မှုကို ပိုမိုရရှိခဲ့သော် လည်း KNU အနေဖြင့် ဤပြဿနာနှင့် လုံးဝပတ်သက်ခြင်း မရှိကြောင်း ထပ်မံအတည်ပြုခဲ့သည်။ KNU ပြောရေးဆိုခွင့်ရှိသူ ပဒိုကလယ်စေး၏ သုံးသပ်ချက်အရ စစ်ကော်မရှင်တပ်၏ စွပ်စွဲမှုများမှာ KK Park တည်ရှိရာ မြေနေရာသည် KNU နှင့် ဒေသတွင်း အခြား အဖွဲ့ အစည်းတစ်ခုတို့ ယခင်က ချုပ်ဆိုခဲ့ဖူးသော စာချုပ် စာတမ်းပါ မြေနေရာနှင့် နီးစပ်နေခြင်းအပေါ် အခြေခံနေသည်။ ပဒိုကလယ်စေးက “သူတို့က နဂိုကတည်းက ဆွဲသွင်းထားတဲ့ အပေါ်မှာ ယနေ့အချိန်မှာ ဒီဟာကို အစဆွဲထုတ်ပြီး KNU ကို ထပ်ပြီးတော့ နိုင်ငံရေးအရ တိုက်ခိုက်ချင်တဲ့ ရည်ရွယ်ချက် ဖြစ်တယ်” ဟု ပြောသည်။ စစ်ကော်မရှင်၏ ပြောရေးဆိုခွင့်ရှိသူ ဗိုလ်ချုပ် ဇော်မင်းထွန်းက KK Park စီးနင်းမှုနှင့် ပတ်သက်၍ KNU (ကရင် အမျိုးသား အစည်းအရုံး) အပေါ် ပြင်းထန်သော စွပ်စွဲချက်သုံးရပ်ကို ထုတ်ပြန်ခဲ့သည်။ KK Park စီမံကိန်းတွင် KNU ထိပ်ပိုင်းခေါင်းဆောင်များ ကိုယ်တိုင် ငွေကြေးရယူလိုမှုဖြင့် ပါဝင်ပတ်သက်နေ သည်ဟု စွပ်စွဲထားသည်။ ထို့အပြင် KK Park တည်နေရာသည် နိုင်ငံတော်ပိုင်မြေဖြစ်ပြီး KNU က ဥပဒေမဲ့ လက်ညှိုးထိုးရောင်းစားခြင်း (သို့မဟုတ်) အလွဲသုံးစားလုပ်ခဲ့ကြောင်း၊ တရားဝင် ခွင့်ပြုစာရွက်စာတမ်း တစ်စုံတစ်ရာမရှိကြောင်း ပြောဆို သည်။ ဗိုလ်ချုပ်ဇော်မင်းထွန်းက KNU ကို “ပိုက်ဆံအတွက် တစ်နိုင်ငံလုံးကို ရောင်းစားမည့် ကြေးစားအကြမ်းဖက် သမားများ” ဟု သုံးနှုန်းကာ နိုင်ငံတကာနှင့် ပြည်သူများက ဝိုင်းဝန်းဆန့်ကျင်ကြရန် တောင်းဆိုခဲ့သည်။ “မြေနေရာနဲ့ ပတ်သက်ပြီး ခွင့်ပြုထားတာတို့ လုပ်ဆောင်ထားတာတို့ တရားဝင်တစ်ခုမှ မရှိကြောင်း တွေ့ရပါ တယ်။ နောက်ပြီး အဲဒီမြေပေါ်မှာ လုပ်ဆောင်နေတဲ့ လောင်းကစားလုပ်ငန်းတွေကိုလည်း အခကြေးငွေယူပြီး ကြေးစား ကာကွယ်မှုများ လုပ်ဆောင်ပေးနေတာ ဖြစ်ပါတယ်။ ဒီလုပ်ငန်းက ရရှိတဲ့ ငွေတွေနဲ့ နိုင်ငံတော်နဲ့ တိုင်းရင်းသား ပြည်သူလူထုအပေါ်မှာ အကြမ်းဖက် သတ်ဖြတ်မှုတွေ ကျူးလွန်နေတာ ဖြစ်ပါတယ်” ဟု ဗိုလ်ချုပ်ဇော်မင်းထွန်းက စွပ်စွဲထားသည်။ KNU အနေဖြင့် KK Park နှင့် အွန်လိုင်း ငွေလိမ်လည်သည့် လုပ်ငန်းများတွင် လုံးဝ ပါဝင်ပတ်သက်ခြင်း မရှိကြောင်း ခိုင်မာစွာ ကြေညာသည်။ ပဒိုကလယ်စေးက “ကျနော်တို့ KNU ရဲ့ ထုတ်ပြန်ချက်ထဲမှာလည်း KNU ထဲမှာ ပါဝင်ပတ်သက်တဲ့သူ ရှိရင် တာဝန်ခံရမယ်လို့ ကျနော်တို့ ထုတ်ပြန်ကြေညာထားပြီး ဖြစ်တယ်” ဟု ပြောသည်။ စစ်ကော်မရှင်တပ်က KK Park ကို ရှင်းလင်းစဉ် ‘ဘာမှ ထွေထွေထူးထူး မတွေ့ရ’ ဟု ပြောဆိုခဲ့ခြင်းနှင့် Starlink ဂြိုလ်တု အင်တာနက် ကိရိယာများကို သိမ်းဆည်းခဲ့ကြောင်း ထုတ်ပြန်မှုများ အပေါ် KNU ဘက်က ပြန်လည် ရှင်းလင်းခဲ့သည်။ ဤပြောဆိုချက်သည် KNU အား စွပ်စွဲရန် ရည်ရွယ်ချက်ဖြင့် ထွက်ပေါ်လာခြင်းဖြစ်ကြောင်း KNU က ရှုမြင် သည်။ Starlink ကိရိယာ သိမ်းဆည်းမှုမှာ အမေရိကန်လွှတ်တော်၏ ကျားဖြန့်လုပ်ငန်းများအား အားပေးသည့် ဆက်သွယ်ရေး ကွန်ရက်ကို အရေးယူရန် တောင်းဆိုမှုမှ ဖြစ်ပေါ်လာခြင်းဖြစ်ပြီး၊ Starlink ကုမ္ပဏီ ကိုယ်တိုင် ကပင် အဆိုပါ ကိရိယာများကို အသုံးပြု၍မရအောင် လော့ခ်ချထားပြီးဖြစ်သည့်အတွက် စစ်ကော်မရှင်၏ သိမ်းဆည်းမှု ရည်ရွယ်ချက်ကို ပြောရန်ခက်ခဲကြောင်း KNU က ထောက်ပြသည်။ KNU သည် ဥပဒေအရ သော်လည်းကောင်း၊ အဖွဲ့အစည်း အဆုံးအဖြတ်အရ သော်လည်းကောင်း ရာဇဝတ်မှုများ ကို လက်မခံဘဲ၊ လက်ပူးလက်ကြပ် ဖမ်းမိပါက ဥပဒေလုပ်ငန်းစဉ်အတိုင်း အရေးယူသွားရန် လုပ်ထုံးလုပ်နည်း များ ချမှတ်ထားကြောင်း အတည်ပြု ပြောဆိုသည်။ ဒေသတွင်းရှိ ရှုပ်ထွေးသော လက်နက်ကိုင်အဖွဲ့အစည်းများ၏ အခြေအနေများနှင့် ပတ်သက်၍ “ကျနော်တို့ ထိန်း ချုပ်ရခက်တဲ့ နယ်မြေဆိုတာ အားလုံးလည်း သိပြီးသားဖြစ်တယ်။ တပ်မဟာ ၄ ကနေ တပ်မဟာ ၅ အထိ ပေါ့နော်။ အထူးသဖြင့်ကတော့ အခု တပ်မဟာ ၇ နဲ့ တပ်မဟာ ၆ လို နေရာမျိုးမှာ နယ်စပ်ဒေသတွေမှာ လက် နက်ကိုင် အဖွဲ့အစည်းတွေ ရှိတယ်။ လူထုကလည်း နားမလည်နေဘူး။ ကရင်တွေလည်း ဖြစ်တော့ KNU လို့ပဲ ထင် ကြတယ်။ ဒီမတူညီနေတဲ့ လက်နက်ကိုင် အဖွဲ့အစည်းတွေ နိုင်ငံရေး ရည်ရွယ်ချက်မရှိတဲ့ ကရင်လက်နက် ကိုင် အဖွဲ့အစည်းတွေ” ဟု ပဒိုကလယ်စေးက ရှင်းပြသည်။ ၎င်းတို့အနေဖြင့် ထိန်းချုပ်ရခက်ခဲသော နယ်မြေများတွင် နိုင်ငံရေး ရည်ရွယ်ချက် မရှိသည့် အချို့ ကရင် လက်နက်ကိုင် အဖွဲ့များရှိနေပြီး၊ ၎င်းတို့ကို ဒေသခံအများစုက KNU အဖြစ်သာ မှားယွင်းထင်မှတ်နေကြသည်ဟု ဆိုလိုရင်း ဖြစ်သည်။ KK Park ကဲ့သို့သော လောင်းကစားနှင့် ငွေလိမ်ဂိုဏ်းလုပ်ငန်းများ ပေါ်ပေါက်လာရခြင်းမှာ KNU ၏ တရားဥပဒေ စိုးမိုးမှုနှင့် ထိန်းချုပ်မှု အပြည့်အဝ မရှိသေးသည့် နယ်မြေများတွင် ဖြစ်ပေါ်လာခြင်းဖြစ်ပြီး၊ လက်ရှိ စစ်ကော်မရှင်၏ လုပ်ရပ်သည် နိုင်ငံရေးအရ အမြတ်ထုတ်ရန် ရည်ရွယ်ချက်သက်သက်သာ ဖြစ်ကြောင်း ပဒိုကလယ်စေးက ထောက်ပြပြောဆိုသည်။ စစ်ကော်မရှင်တပ်သည် KK Park ကို စီးနင်းစဉ် လူပေါင်း ၂,၁၉၈ ဦး ကို ဖမ်းဆီးထိန်းသိမ်းခဲ့ပြီး၊ Starlink ကိရိယာ ၃၀ စုံကို သိမ်းဆည်းရမိခဲ့သည်ဟု အောက်တိုဘာလ ၁၉ ရက်နေ့ တွင် ထုတ်ပြန်ခဲ့သည်။ စစ်တပ်က ၎င်းတို့၏ လုပ်ရပ်ကို နယ်စပ်ဖြတ်ကျော် ရာဇဝတ်မှု နှိမ်နင်းခြင်းဟု ဆိုသော်လည်း၊ လေ့လာသူ အချို့ ကမူ စစ်တပ်သည် တရုတ်အစိုးရ၏ ဖိအားနှင့် ဒေသတွင်း မဟာမိတ်များ၏ ထောက်ခံမှုကို ရရှိစေရန် ရည်ရွယ် သည့် နိုင်ငံရေးအရ ပြသခြင်း (Political Theater) သက်သက် ဟုတ်၊ မဟုတ်ကို မေးခွန်းထုတ်နေကြသည်။

KK Park ငွေလိမ်ဂိုဏ်းကိစ္စ KNU နှင့် သက်ဆိုင်ခြင်းမရှိကြောင်း KNU ပြောခွင့်ရ တုန့်ပြန်

Oct 22

အပစ်ရပ်ထားသည့် ဂါဇာတွင် အစ္စရေးက လေကြောင်းတိုက်ခိုက်မှုများ လုပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ ဂါဇာကမ်းမြှောင်ဒေသတွင် အပစ်အခတ်ရပ်စဲရေး ပျက်ပြီးသည့် နောက်ပိုင်းတွင် အပစ်ရပ် သဘောတူညီချက်ကို ပြန်လည်ထိန်းသိမ်းသွားမည်ဟု အစ္စရေးက ပြောလိုက်သည်။ ဟားမာ့စ်တို့က သဘောတူညီချက်ကို ချိုးဖောက်ပြီး ဂါဇာတောင်ပိုင်း ရာဖာရှိ အစ္စရေး တပ်ဖွဲ့များကို တင့်ကားဖျက် ဒုံးကျည်များနှင့် ပစ်ခတ်ခြင်းကြောင့် အစ္စရေး စစ်သား ၂ ယောက် သေဆုံးခဲ့ရသည်ဟု အစ္စရေးက စွပ်စွဲခဲ့သည်။ သို့သော်လည်း အဆိုပါ စွပ်စွဲချက်နှင့် ပတ်သက်၍ ဟားမာ့စ်တို့က သူတို့ ဘာမျှ မသိရကြောင်း တုန့်ပြန်ခဲ့သည်။ ထို့နောက် တနင်္ဂနွေနေ့ညနေပိုင်းတွင် ဂါဇာ တလျောက် အစ္စရေးက လေကြောင်းတိုက်ခိုက်မှုများ ပြုလုပ်ခဲ့ခြင်း ဖြစ်သည်။ ဆေးရုံ သတင်းရင်းမြစ်များ အဆိုအရ အစ္စရေး၏ လေကြောင်းတိုက်ခိုက်မှုကြောင့် လူ ၄၄ ယောက် သေဆုံးခဲ့ရသည်။ တိုက်ခိုက်မှုများနောက် ညပိုင်းတွင်တော့ အစ္စရေး ကာကွယ်ရေး တပ်ဖွဲ့ (IDF) က အပစ်အခတ်ရပ်စဲရေးကို ဆက်လက်ထိန်းသိမ်းသွားမည် ဖြစ်ပြီး ဟားမာ့စ်ဘက်က ချိုးဖောက်မှုများကို အခိုင်အမာ တုန့်ပြန်သွားမည်ဟု ကြေညာချက် ထုတ်ပြန်ပါတယ်။ အမေရိကန်၏ ကြားဝင် စေ့စပ်မှုဖြင့် အစ္စရေးနှင့် ဟားမာ့စ်တို့ အကြား အပစ်အခတ်ရပ်စဲရေးသဘောတူညီမှုကို အောက်တိုဘာ ၁၀ ရက်နေ့တွင် စတင်ခဲ့ပြီး ပစ်ခတ်မှုများ ချက်ချင်းရပ်ခဲ့သည်။ ထို့နောက်တွင် ဟားမာ့စ်က အစ္စရေး ဓါးစာခံများနှင့် သေဆုံးသူ ၁၂ ဦး၏ ရုပ်ကျွင်းများကို ပြန်လည် ပေးအပ်ခဲ့သည်။ အစ္စရေးက ပါလက်စတိုင်း အကျဉ်းသား ၂၅၀ နှင့် ဂါဇာတွင် ထိန်းသိမ်းထားသည့် လူ ၁၇၁၈ ယောက်ကို ပြန်လွှတ်ပေးခဲ့သည်။ ပါလက်စတိုင်း ၁၅ ဦး၏ ရုပ်ကျွင်း များကိုလည်း ပြန်ပေးခဲ့သည်။

အပစ်ရပ်ထားသည့် ဂါဇာတွင် အစ္စရေးက လေကြောင်းတိုက်ခိုက်မှုများ လုပ်

Oct 22

ဒရုန်း တိုက်ခိုက်မှုကြောင့် ရုရှား၏ ဧရာမ သဘာဝ ဓါတ်ငွေ့ထုတ်လုပ် သန့်စင်စက်ရုံ လုပ်ငန်း ရပ်ဆိုင်း သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ ယူကရိန်းက ပစ်လွှတ်ခဲ့သော ဒရုန်းများသည် ရုရှားနိုင်ငံရှိ ကမ္ဘာ့ အကြီးဆုံး သဘာဝ ဓါတ်ငွေ့ စက်ရုံများမှ တစ်ခုပေါ်ကျရောက်ပြီး စက်ရုံ ရပ်ဆိုင်း သွားခဲ့သည်။ တနင်္ဂနွေနေ့က ပစ်လွှတ်လိုက်သည့် ယူကရိန်း ဒရုန်းများသည် ရုရှားနိုင်ငံ တောင်ပိုင်းရှိ ကာဇက်စတန်၊ ရုရှားနှင့် ကာဇက် ဒေသမှ သဘာဝ ဓါတ်ငွေ့များကို ပြုပြင်သန့်စင် ထုတ်လုပ်သည် စက်ရုံကို ထိမှန်ပြီး စက်ရုံ အစိတ်အပိုင်းတချို့ မီးလောင် သွားခဲ့ခြင်း ဖြစ်သည်။ အိုရင်ဘတ် ခေါ် ရုရှား အစိုးရပိုင် ကုမ္ပဏီက လည်ပတ်သည့် အဆိုပါ စက်ရုံသည် ရုရှား အနေနှင့်သာမက ကမ္ဘာ့ အတိုင်း အတာ အရပါ အကြီးမား ဆုံး စက်ရုံများထဲတွင်ပါဝင်ပြီး တစ်နှစ်လျှင် သဘာဝ ဓါတ်ငွေ့ရည် ကုဗမီတာ ၄၅ ဘီလီယံ ထုတ်လုပ်သည့် စက်ရုံ ဖြစ်သည်။ ကာဇက်အာဏာပိုင်များ အဆိုအရ ဒရုန်းတိုက်ခိုက်မှုသည် အလုပ်ရုံ တစ်ခုကို ထိခိုက်ပြီး မီးလောင် သွားသည့် အတွက် လုပ်ငန်းများ ရပ်ဆိုင်းထားရသည်။ ရုရှား၏ စစ်အသုံးစားရိတ်များကို အဓိက ပံ့ပိုးပေးနေသည့် အရင်းအမြစ်များဟု ဆိုကာ လောင်စာ ဆီ ထုတ်လုပ်မှုများကို မကြာခင် လများအတွင်း ယူကရိန်းက ပစ်မှတ်ထား တိုက်ခိုက်လာခြင်းလည်း ဖြစ်သည်။ အောက်တိုဘာ ၁၇ ရက် အိမ်ဖြူတော်တွင် အမေရိကန် သမ္မတ ဒေါ်နယ်ထရန့် နှင့် ယူကရိန်း သမ္မတ ဗိုလိုဒီမာ ဇယ်လန်းစကီး တို့ တွေ့ဆုံရာတွင် ယူကရိန်းကတောင်းသည့် တာဝေးပစ် ပဲ့ထိန်း ဒုံးကျည် တိုမာဟော့ခ် များ ပေးရန် ထရန့်က ငြင်းဆိုခဲ့ပြီး နောက်တွင် တိုက်ခိုက်မှုများ ဆက်လက် လုပ်ဆောင်ခဲ့ခြင်း ဖြစ်သည်။

ဒရုန်း တိုက်ခိုက်မှုကြောင့် ရုရှား၏ ဧရာမ သဘာဝ ဓါတ်ငွေ့ထုတ်လုပ် သန့်စင်စက်ရုံ လုပ်ငန်း ရပ်ဆိုင်း

Oct 22

ဩစတေးလျတွင် မြေရှား သတ္တု ဒေါ်လာ ၈.၅ သန်းဖိုး ထုတ်ရန် စာချုပ်ချုပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ အမေရိကန် သမ္မတ ဒေါ်နယ်ထရန့်က အမေရိကန် ဒေါ်လာ ၈.၅ ဘီလီယံ တန်ဖိုးရှိသည့် မြေရှား သတ္တုများ ဝယ်ယူရန် ဩစတေးလျ ဝန်ကြီးချုပ် Anthony Albanese (အန်ထိုနီ အယ်လဘာနီးစ်) နှင့်စာချုပ်ချုပ်ဆို လိုက်သည်။ သမ္မတ ထရန့်သည် ဩစတေးလျ ဝန်ကြီးချုပ် အန်ထိုနီ အယ်လ်ဘာနီးစ် ကို အောက်တိုဘာ ၂၀ ရက် တနင်္လာနေ့က အိမ်ဖြူတော်တွင် လက်ခံတွေ့ဆုံပြီး သတင်းမီဒီယာများ ရှေ့မှောက်တွင် လက်မှတ်ရေးထိုးခဲ့ကြသည်။ သဘောတူညီချက်အရ အမေရိကန်နှင့် ဩစတေးလျ နှစ်နိုင်ငံလုံးသည် လာမယ့် ၆ လ အတွင်း မြေရှား သတ္တု တူးဖော်ရေးနှင့် သန့်စင်ရေး လုပ်ငန်းများတွင် ဒေါ်လာ ၁ ဘီလီယံစီ ထည့်ဝင်သွားကြမည် ဖြစ်သည်။ တူးဖော်ထုတ်လုပ်ရေး စီမံကိန်းကို ဩစတေးလျ နိုင်ငံတွင် အကောင်အထည်ဖော်သွားမည် ဖြစ်သည်။ စီမံကိန်းတွင် အုပ်စု သုံးခု ပါဝင်မည်ဖြစ်ပြီး အမေရိကန်-ဩစတေးလျ ဖက်စပ်စီမံကိန်း တစ်ခု၊ ဩစတေးလျ သီးသန့် စီမံကိန်းနှင့် အမေရိကန်-ဩစတေးလျ-ဂျပန် ဖက်စပ် စီမံကိန်းတို့ ဖြစ်သည်။ ဩစတေးလျ နိုင်ငံရှိ ၈.၅ ဘီလီယံ တန်ဖိုးရှိသည့် မြေရှားသတ္တုများကို တူးဖော် သန့်စင်ကြမည် ဖြစ်သည်။ လျှပ်စစ်ကားများ၊ ဖုန်းများ၊ ကွန်ပြူတာများ စသည့် အီလက်ထရွန်းနစ်ပစ္စည်းများ၊ လေအားတာဘိုင်များ၊ ဆိုလာဆဲလ်များ၊ လစ်သီယမ် ဘက်ထရီများ၊ LCD မော်နီတာများ အစရှိသည့် ခေတ်မီနည်းပညာ ပစ္စည်းများ ထုတ်လုပ်ရာတွင် မရှိမဖြစ် လိုအပ်သည့် မြေရှား သတ္တုကို တရုတ် အပေါ်မှီခိုနေရမှုအား လျော့ချနိုင်ရန် အတွက် အမေရိကန်က ကြိုးစားနေခြင်းလည်း ဖြစ်သည်။ တရုတ်နိုင်ငံက မြေရှားသတ္တု တင်ပို့မှုကို ကန့်သတ်မှု အသစ်များ ထပ်မံ ချမှတ်လိုက်ပြီး အမေရိကန်က တရုတ်ပို့ကုန်များကို နိုဝင်ဘာလမှစ၍ ၁၀၀% အခွန်ကောက်ခံရန် ပြင်ဆင်နေသည့် အချိန်တွင် ဒီသဘောတူညီချက်ကို လက်မှတ်ရေးထိုးခဲ့ခြင်းလည်း ဖြစ်သည်။

ဩစတေးလျတွင် မြေရှား သတ္တု ဒေါ်လာ ၈.၅ သန်းဖိုး ထုတ်ရန် စာချုပ်ချုပ်

Oct 22

မိုးကုတ်ဗုံးကြဲမှုကလေးသုံးဦး သေဆုံး၊ အရပ်သား ၁၂ ဦး ဒဏ်ရာရ သတင်းနှင့် မီဒီယာ ကွန်ရက်။  ၂၀၂၅ ခုနှစ်၊ အောက်တိုဘာလ ၂၂ ရက်။ မိုးကုတ်မြို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုကြောင့် ကလေးငယ် (၃) ဦး သေဆုံးကာ အရပ်သား (၁၂) ဦး ဒဏ်ရာရခဲ့သည်။ တအာင်းတပ်မတော် (PSLF/TNLA) ထိန်းချုပ်ထားသော မိုးကုတ်မြို့ကို စစ်ကော်မရှင်တပ်က အောက်တိုဘာလ ၂၁ ရက်၊ မွန်းလွှဲ ၃ နာရီဝန်းကျင် အချိန်တွင် လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ကလေးငယ် (၃) ဦး သေဆုံးပြီး (၁၂) ဦး ထိခိုက်ဒဏ်ရာများ ရရှိခဲ့ကြောင်း TNLA က သတင်းထုတ်ပြန်သည်။ ဖြစ်စဉ်မှာ တိုက်ပွဲဖြစ်ပွားမှုမရှိဘဲ မိုးကုတ်မြို့အရှေ့ပိုင်း၊ ရှောလီဝိုင်းအုပ်စု၊ ကန်တော်ရပ်ကွက်ရှိ ကန်သုံးလုံး ဖူဆယ်ဘောလုံးကွင်း အနီးကို စစ်ကော်မရှင်တပ်၏ လေယာဉ်က ပေါင် (၂၅၀) ဗုံး (၂) လုံး ကြဲချတိုက်ခိုက်ခဲ့ ခြင်း ဖြစ်သည်။ မိုးကုတ်ဒေသခံ အမျိုးသားတစ်ဦးက “ဘုရားငါးဆူအနီးနဲ့ ရှမ်းဘုန်းကြီးကျောင်း နားက ဖူဆယ်ကွင်းမှာ ကျတာ ဟုတ်တယ်။ အဲ့ဒီမှာ ကစားနေကြတဲ့ ကလေးတွေ ထိသွားတယ်။ ကလေး ၃ ယောက်က သေတယ်။ ဒဏ်ရာ ရတာက ၁၂ ရတယ်။ ဒဏ်ရာရတဲ့ထဲမှာလည်း ကလေးတွေ ပါသေးတယ်” ဟု ပြောသည်။ ယင်းဗုံးကြဲတိုက်ခိုက်မှုကြောင့် ဖူဆယ်ကွင်းတွင် ဘောလုံးကစားနေသည့် ကလေးငယ်များ ထိမှန်ခဲ့ပြီး အသက် (၆) နှစ်၊ (၁၀) နှစ်နှင့် (၁၂) နှစ်အရွယ် ကလေးငယ် (၃) ဦး သေဆုံးခဲ့သည်ဟု ဖြစ်စဉ်သိရှိသူ မိုးကုတ်မြို့ခံ အမျိုးသားတစ်ဦး က ပြောသည်။ ဒဏ်ရာရရှိသူ (၁၂) ဦးတွင်လည်း ကလေးငယ်များ ပါဝင်ပြီး၊ အသက် (၇) နှစ်နှင့် (၁၂) နှစ်အရွယ် ကလေးငယ်များ အပါအဝင် အသက် (၃၈) နှစ်မှ (၇၁) နှစ်အရွယ်ရှိ အမျိုးသား (၇) ဦးနှင့် အမျိုးသမီး (၅) ဦးတို့ ထိမှန်ဒဏ်ရာရရှိခဲ့ သည်။ ထို့ပြင် ဗုံးကြဲမှုကြောင့် အရပ်သားနေအိမ် (၁၁) လုံးနှင့် ဖူဆယ်ဘောလုံးကွင်းတစ်ခု ပျက်စီးခဲ့သည်။ စစ်ကော်မရှင်တပ်သည် TNLA ထိန်းချုပ်ထားသော မြို့ရွာများကို လေကြောင်း စစ်ဆင်ရေးများ ဆက်တိုက် ပြုလုပ်နေသည်။ TNLA ၏ ထုတ်ပြန်ချက်အရ ယခု အောက်တိုဘာလ တစ်လတည်းတွင်ပင် ကလေးငယ်များ အပါအဝင် အရပ်သား (၄၀) ကျော်၊ သေဆုံးကာ (၅၀) ကျော် ဒဏ်ရာရရှိခဲ့သည်။ အောက်တိုဘာလအတွင်း မန်တုံ၊ ကျောက်မဲ၊ သီပေါ၊ မိုင်းငေါ့၊ မိုင်းလုံ၊ နမ့်ဆန်၊ နမ္မတူ၊ မိုးမိတ်နှင့် မိုးကုတ်မြို့များ အပါအဝင် မြို့ရွာများကို လေကြောင်း တိုက်ခိုက်မှု အကြိမ် (၃၀) ကျော် ပြုလုပ်ခဲ့ကြောင်း TNLA က ထုတ်ပြန်သည်။ TNLA သည် စစ်ကော်မရှင်တပ်၏ ဗုံးကြဲမှုများ ဆက်တိုက် ဖြစ်ပေါ်နေခြင်းကြောင့် ပြည်သူများ စစ်ရေး သတိရှိရန်နှင့် လေကြောင်းရန် ကာကွယ်ရေး ဆိုင်ရာ နည်းလမ်းများ လိုက်နာရန် နှိုးဆော်ထား သည်။ ထို့အပြင် ပြည်သူကို ပစ်မှတ်ထား တိုက်ခိုက်ခြင်းသည် စစ်ရာဇဝတ်မှု ကျူးလွန်ခြင်း ဖြစ်သည်ဟုလည်း TNLA က ပြင်းထန်စွာ ရှုတ်ချထားသည်။ အလားတူ ယမန်နေ့ အောက်တိုဘာလ (၂၀) ရက်နေ့ကလည်း မိုင်းငေါ့မြို့မစျေးကို စစ်ကော်မရှင်တပ်က ဗုံးကြဲ တိုက်ခိုက်ခဲ့ခြင်းကြောင့် ဒေသခံ (၂) ဦး သေဆုံးကာ (၂) ဦး ဒဏ်ရာရရှိခဲ့သည့် အပြင် မြို့မစျေးလည်း မီးလောင် ပျက်စီးသွားသည်။

မိုးကုတ်ဗုံးကြဲမှုကလေးသုံးဦး သေဆုံး၊ အရပ်သား ၁၂ ဦး ဒဏ်ရာရ

Oct 22

ပါရာမော်တာ တိုက်ခိုက်မှု စစ်ရှောင်တစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၂ ရက်။ စစ်ကိုင်းတိုင်း၊ ဆားလင်းကြီးမြို့နယ်၌ စစ်ကော်မရှင်တပ်၏ စက်တပ်လေထီး (ပါရာမော်တာ) ဗုံးကြဲတိုက်ခိုက်မှု ကြောင့် စစ်ရှောင်တစ်ဦး သေဆုံးသွားသည်။ ဆားလင်းကြီးမြို့နယ်ရှိ ထန်းပုကျေးရွာကို စစ်ကော်မရှင်တပ်က စက်တပ်လေထီး (ပါရာမော်တာ) ဖြင့် လေကြောင်းမှ ဗုံးကြဲတိုက်ခိုက်မှုကြောင့် စစ်ဘေးရှောင်တစ်ဦး သေဆုံးခဲ့ရကြောင်း ဒေသခံ သတင်းရင်းမြစ်များ ၏ ပြောဆိုချက်အရ သိရသည်။ အောက်တိုဘာလ ၂၀ ရက်နေ့၊ ညနေ ၅ နာရီဝန်းကျင်တွင် မုံရွာ အနောက်မြောက်တိုင်း စစ်ဌာနချုပ် (နမခ) မှ တက်လာသည့် စက်တပ်လေထီး (ပါရာမော်တာ) နှစ်စီးသည် ထန်းပုကျေးရွာကို ဗုံးကြဲချခဲ့ရာ ကျေးရွာဘုန်းကြီး ကျောင်းကို ထိမှန်ခဲ့ခြင်း ဖြစ်သည်။ တိုက်ခိုက်ခံရမှုကြောင့် စစ်ဘေးရှောင် လင်မယားနှစ်ဦးအနက် အမျိုးသားဖြစ်သူ သေဆုံးခဲ့ရသည်။ ထို့အပြင် အခြား ဒေသခံ (၂) ဦးလည်း ထိမှန်ဒဏ်ရာရခဲ့ပြီး တစ်ဦးမှာ ခြေထောက်ဖြတ်လိုက်ရသည် အထိ ဒဏ်ရာပြင်းထန်သည် ဟု သိရသည်။ ဒေသခံအမျိုးသမီးတစ်ဦးက “ပါရာမော်တာနဲ့က နေ့တိုင်းလိုလို လာကြဲတာပါ။ မနေ့ကလေးတင် လေကြောင်း တိုက်ခိုက်လို့ ၁ ဦးသေတယ်လို့ ကြားသိရတယ်။ စစ်ကြောင်းကလည်း ထိုးနေတယ်။ ၁၇ ရက်နေ့လောက်က စပြီးတော့ပေါ့” ဟု ပြောသည်။ ပြီးခဲ့သည့် အောက်တိုဘာလ ၁၇ ရက်နေ့မှ စတင်ကာ စစ်ကော်မရှင်တပ်သည် အင်အား (၂၀၀) ကျော်ဖြင့် ဆားလင်းကြီးမြို့နယ်အတွင်း စစ်ကြောင်းပတ်ထိုးနေခြင်း ဖြစ်သည်။ ထို့အပြင် လေကြောင်းမှ ကင်းထောက် စောင့်ကြည့်မှုများ ပြုလုပ်နေရာကနေ ယခုကဲ့သို့ တိုက်ခိုက်မှုမျိုးကိုပါ ပြုလုပ်ခဲ့ခြင်းဖြစ်သည်ဟု ဒေသခံများက ပြောသည်။ စစ်ကော်မရှင်တပ်သည် ဝမ်ပေါင်ကြေးနီစက်ရုံ အနီးတစ်ဝိုက်ကို အဓိက စစ်ကြောင်းထိုး စစ်ရေးလှုပ်ရှားနေခြင်း ဖြစ်ပြီး၊ ၎င်းတို့၏ လှုပ်ရှားမှုကြောင့် ကျေးရွာပေါင်း (၂၀) ကျော်မှ ဒေသခံများ ဘေးလွတ်ရာသို့ တိမ်းရှောင်နေရ ကြောင်း စစ်ရှောင်အရေး ဆောင်ရွက်နေသည့် အညာပစ်တိုင်းထောင်လေးများ အဖွဲ့က ပြောသည်။ စစ်ကော်မရှင်တပ်သည် စစ်ကြောင်း နှစ်ကြောင်းခွဲ၍ ရွာစဉ်ပတ် စစ်ရေးလှုပ်ရှားနေခြင်းဖြစ်ပြီး အောက်တိုဘာ လ ၂၁ ရက်နေ့တွင် စစ်ကြောင်းသည် ဆည်တည်းကျေးရွာ တစ်ဝှိုက်တွင် ရှိနေကာ မြို့ပေါ်သို့ ဆက်လက် ဦးတည်နိုင်သည်ဟု စစ်ရေးအခြေအနေ စောင့်ကြည့်နေသူများက သုံးသပ်သည်။ ထို့ကြောင့် ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့က ဆားလင်းကြီး - ညောင်ပင်ကြီးလမ်း၊ မုံရွာ -ပုသိမ်လမ်းနှင့် ချင်းတွင်းမြစ်ကြောင်း လမ်းများကို အရေးပေါ်ကိစ္စမှအပ အသုံးမပြုကြရန် သတင်းထုတ်ပြန်ကာ သတိပေးထားသည်။  ဓာတ်ပုံ - အညာပစ်တိုင်းထောင်လေးများ အဖွဲ့

ပါရာမော်တာ တိုက်ခိုက်မှု စစ်ရှောင်တစ်ဦး သေဆုံး

« Prev 1 … 103 104 105 106 107 … 1,047 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်
ဖိလစ်ပိုင် လွှတ်တော်အတွင်းမှ ပစ်ခတ်သံများ ကြားရ
ရွှေဆိုင်ပိုင်ရှင်ကို ပစ်သတ်ပြီး ရွှေ ၃ ပိဿာ လုယူသူများ လွတ်မြောက်နေ 
ရွာငံမြို့မရဲစခန်းမှ သက်ငယ်မုဒိန်းမှုတရားခံ လက်ထိပ်ခတ်လျက် ထွက်ပြေးလွတ်မြောက်

Archives

Archives

×Close