NMG Doh – Page 107 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Jan 12

အစာ စိန်ခေါ်မှု နောက်ကျမှ လိမ်နေကြောင်းသိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၂ ရက်။ ဘန်ကောက်မြို့က နာမည်ကြီး ကာရီထမင်းဆိုင်တစ်ခုဖြစ်တဲ့ Gold Curry Bangkok ဟာ သူတို့ရဲ့ အစားအသောက်စိန်ခေါ်ပွဲမှာ လူလိမ်နဲ့ တိုးသွားတဲ့အကြောင်းကို လူမှုကွန်ရက်မှာ ဖွင့်ဟလိုက်ပါတယ်။ သူတို့ ထမင်းဆိုင်ဟာ ကြော်ငြာ အနေနဲ့ အစား စိန်ခေါ်မှု တစ်ခုကို လုပ်ထားပါတယ်။ ထမင်းနဲ့ ဟင်း ၈ ကီလိုဂရမ်ကို ၄၅ မိနစ် အတွင်း စားနိုင်ရင် ဆုကြေး ဘတ်ငွေ ၂၀,၀၀၀ နဲ့ အဲဒီထက်နည်းတဲ့ ၆ ကီလို ဂရမ် စားနိုင်ရင် ဆုကြေးငွေ ၁၀,၀၀၀ ပေးမယ်လို့ ကြေညာထားခဲ့တာပါ။ ဒီဇင်ဘာလ ၁၂ ရက်နေ့မှာတော့ နိုင်ငံခြားသား တစ်ယောက်ဟာ အချိန် မပြည့်ခင် ၅ မိနစ်အလိုမှာပဲ ထမင်းအားလုံးကို ပြောင်စင်အောင် စားပြသွားခဲ့တာကြောင့် ဆိုင်ကလည်း "၁၀ မှတ်မှာ ၁၀ မှတ်ပေးတယ်၊ တကယ့်ကို ထူးချွန်တဲ့ စွမ်းဆောင်ရည်ပဲ" ဆိုပြီး ဖေ့စ်ဘွတ်ခ်စာမျက်နှာမှာ ဂုဏ်ပြုဖော်ပြခဲ့ပါတယ်။ ဒါတင်မကသေးပါဘူး၊ သူဟာ အရင်ကလည်း ၆ ကီလိုဂရမ် စိန်ခေါ်မှုကို အောင်မြင်ထားတာကြောင့် ဆုကြေးငွေ စုစုပေါင်း ဘတ် ၃၀,၀၀၀ (မြန်မာငွေ သိန်း ၄၀ နီးပါးလောက်) ကို ရရှိပြီး ပျော်ပျော်ပါးပါး ပြန်သွားခဲ့ပါတယ်။ ဒါပေမဲ့ ဒီအောင်ပွဲဟာ ၆ ရက်ပဲ ခံခဲ့ပါတယ်။ ဒီဇင်ဘာ ၁၈ ရက်နေ့မှာတော့ ဆိုင်က CCTV မှတ်တမ်းတွေကို ပြန်လည်စစ်ဆေးကြည့်တဲ့အခါမှာတော့ အမှန်တရားကို တွေ့လိုက်ရပါတယ်။ ဒီလူဟာ ထမင်းတွေကို စားနေရင်း ဝန်ထမ်းတွေ အမှတ်မထင်ဖြစ်နေတဲ့အချိန်မှာ ထမင်းလုံးတွေကို သူ့ရဲ့ အဝတ်အစား အိတ်ကပ်တွေထဲကို ခိုးပြီး ထည့်နေခဲ့တာ ဖြစ်ပါတယ်။ ဆိုင်ဝန်ထမ်းတွေဟာ ပြိုင်ပွဲကာလတစ်လျှောက် အနီးကပ်စောင့်ကြည့်လေ့ရှိပေမဲ့ ဒီလူရဲ့ လက်သွက်မှုကြောင့် နှစ်ကြိမ်စလုံး (၆ ကီလိုဂရမ်ရော ၈ ကီလိုဂရမ်ပါ) အလိမ်ခံလိုက်ရတာပါ။ လက်ရှိမှာတော့ အဲဒီ နိုင်ငံခြားသားဟာ ဆုကြေးငွေ ဘတ် ၃၀,၀၀၀ ကို ယူဆောင်ပြီး ပျောက်ကွယ်သွားပြီဖြစ်သလို ဆိုင်ကိုလည်း ငွေပြန်လာမပေးတော့ပါဘူး။

အစာ စိန်ခေါ်မှု နောက်ကျမှ လိမ်နေကြောင်းသိ

Jan 12

ထိုင်း-ကမ္ဘောဒီးယား ငြိမ်းချမ်းရေးအတွက် အမေရိကန်က ဒေါ်လာ ၄၅ သန်း ကူမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၂ ရက်။ ထိုင်းနှင့် ကမ္ဘောဒီးယားနိုင်ငံတို့အကြား နယ်စပ်တည်ငြိမ်ရေးနှင့် ငြိမ်းချမ်းရေးအတွက် အမေရိကန်အစိုးရက အမေရိကန်ဒေါ်လာ ၄၅ သန်း ထောက်ပံ့မည်ဟု ကြေညာခဲ့သည်။ အမေရိကန် လက်ထောက်နိုင်ငံခြားရေးဝန်ကြီး မိုက်ကယ် ဒီဆောင်ဘရေးက ဘန်ကောက်မြို့တွင် ထိုင်းအရာရှိများနှင့် တွေ့ဆုံစဉ် ထိုသို့ ပြောကြားခဲ့ခြင်း ဖြစ်သည်။ အဆိုပါ အကူအညီများကို နယ်စပ်ပြန်လည်ထူထောင်ရေး၊ မြေမြှုပ်မိုင်းရှင်းလင်းရေးနှင့် အွန်လိုင်းငွေလိမ်ဂိုဏ်းများ တိုက်ဖျက်ရေးတို့တွင် အသုံးပြုမည် ဖြစ်သည်။ တဖက်တွင်လည်း တရုတ်နိုင်ငံက ကမ္ဘောဒီးယားသို့ ဒေါ်လာ ၂.၈ သန်း ကူညီထားပြီး ထိုင်းနိုင်ငံကိုလည်း ကူညီရန် ကမ်းလှမ်းထားသည်။

ထိုင်း-ကမ္ဘောဒီးယား ငြိမ်းချမ်းရေးအတွက် အမေရိကန်က ဒေါ်လာ ၄၅ သန်း ကူမည်

Jan 12

အီရန်ဆန္ဒပြပွဲများအပေါ် အမေရိကန်သမ္မတ သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၂ ရက်။ အီရန်နိုင်ငံအတွင်း ဆန္ဒပြသူများအပေါ် အစိုးရ၏ အကြမ်းဖက်နှိမ်နင်းမှုများနှင့် ပတ်သက်၍ အမေရိကန်သမ္မတ ဒေါ်နယ်ထရန့်က ပြင်းထန်စွာ သတိပေးလိုက်သည်။ အီရန်အစိုးရသည် အပြစ်မဲ့အရပ်သားများကို သတ်ဖြတ်နေပြီး အမေရိကန်က သတ်မှတ်ထားသည့် "အနီရောင်မျဉ်း" (Red lines) ကို စတင်ကျော်လွန်နေပြီဟု သမ္မတထရန့်က ပြောကြားခဲ့သည်။ အကယ်၍ အမေရိကန်၏ အကျိုးစီးပွားကို ထိပါးလာပါက သို့မဟုတ် အခြေအနေများ ပိုမို ဆိုးရွားလာပါက အလွန်ပြင်းထန်သည့် နည်းလမ်းများနှင့် တုံ့ပြန်ရန် ပြင်ဆင်ထားသည်ဟု ပြောသည်။ ယင်းတုန့်ပြန်မှုသည် မြေပြင်စစ်သားစေလွှတ်ခြင်းမျိုး မဟုတ်ဘဲ အီရန်အစိုးရ နာကျင်စေမည့် တုံ့ပြန်မှုမျိုး ဖြစ်မည်ဟု ဆိုသည်။ လက်ရှိတွင် အီရန်နိုင်ငံ၏ မြို့ပေါင်း ၁၉၀ ကျော်တွင် အစိုးရဆန့်ကျင်ရေး ဆန္ဒပြပွဲများ ပြန့်နှံ့နေပြီး အစိုးရ၏ နှိမ်နင်းမှုကြောင့် လူပေါင်း ၅၀၀ ကျော် သေဆုံးကာ ၁၀,၀၀၀ ကျော် ဖမ်းဆီးခံထားရသည်။ အီရန်ပြည်သူများကလည်း “ဒါဟာ နောက်ဆုံးတိုက်ပွဲ ဖြစ်တယ်” ဆိုပြီး လမ်းပေါ်ထွက် ဆန္ဒ ပြနေကြသည်။ ဆန္ဒပြသူများအပေါ် သတ်ဖြတ် ဖမ်းဆီးမှုများ ရှိနေသော်လည်း ဆက်လက် ဆန္ဒပြနေကြခြင်း ဖြစ်သည်။ အီရန်အစိုးရက သတင်းအချက်အလက်များ အပြင်ကိုမထွက်စေရန် အင်တာနက်များကိုလည်း တစ်နိုင်ငံလုံးအတိုင်းအတာနှင့် ပိတ်ပင်ထားသည်။ အီရန်ဘက်ကတော့ အမေရိကန်ကသာ ကြားဝင်စွက်ဖက်မည် ဆိုပါက အရှေ့အလယ်ပိုင်းရှိ အမေရိကန်တပ်ဖွဲ့များနှင့် အစ္စရေးနိုင်ငံတို့ကို ပစ်မှတ်ထား တိုက်ခိုက်သွားမည်ဟု ပြန်လည်ခြိမ်းခြောက်ထားသည်။

အီရန်ဆန္ဒပြပွဲများအပေါ် အမေရိကန်သမ္မတ သတိပေး

Jan 12

ICJ ကြားနာမှု တရားလိုဘက်၌ နိုင်ငံကြီးများ ပူးပေါင်းပါဝင်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၂ ရက်။ ယနေ့ ဇန်နဝါရီလ ၁၂ ရက်၊ တနင်္လာနေ့တွင် နယ်သာလန်နိုင်ငံ၊ သည်ဟိဂ်မြို့ရှိ အပြည်ပြည်ဆိုင်ရာတရားရုံး (ICJ) ၌ မြန်မာနိုင်ငံနှင့် ပတ်သက်သည့် အမှုကို ဆက်လက်ကြားနာမည် ဖြစ်သည်။ ယခုကြားနာမှုတွင် တရားလိုဖြစ်သော ဂမ္ဘီယာနိုင်ငံအပြင် ဒိန်းမတ်၊ ပြင်သစ်၊ ဂျာမနီ၊ နယ်သာလန်၊ ဗြိတိန်၊ ကနေဒါနှင့် မော်လ်ဒိုက် စသည့် နိုင်ငံ (၇) နိုင်ငံကလည်း တရားလိုဘက်မှ ကြားဝင်ပူးပေါင်းဆောင်ရွက်ကြမည် ဖြစ်သည်။ အဆိုပါနိုင်ငံများသည် ဥပဒေကျွမ်းကျင်သူ ရှေ့နေများဖြင့် ပါဝင်ကူညီမည့်အပြင် ၎င်းတို့ရရှိထားသော အထောက်အထားများကို တင်ပြခြင်းနှင့် အမှုစရိတ်များ ပံ့ပိုးပေးခြင်းတို့ကို လုပ်ဆောင်သွားကြမည် ဖြစ်သည်။ မြန်မာနိုင်ငံဘက်မှ ဤသို့ ကြားဝင်ပါဝင်မှုများကို ကန့်ကွက်ခဲ့သော်လည်း တရားရုံးက ပယ်ချခဲ့သည်။ အဆိုပါအမှုမှာ ၂၀၁၆-၁၇ ခုနှစ်အတွင်း ရခိုင်ပြည်နယ်၌ ဖြစ်ပွားခဲ့သော ဖြစ်စဉ်များသည် လူမျိုးသုဉ်းသတ်ဖြတ်မှု မြောက်၊ မမြောက် စစ်ဆေးနေခြင်း ဖြစ်သည်။

ICJ ကြားနာမှု တရားလိုဘက်၌ နိုင်ငံကြီးများ ပူးပေါင်းပါဝင်မည်

Jan 12

ရွာအဝင်အထွက်ပိတ်ပြီး ရွာသားများကို မဲထည့်ခိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၂ ရက်။ စစ်ကော်မရှင် ရွေးကောက်ပွဲ ဒုတိယပိုင်းတွင် ကရင်ပြည်နယ် လှိုင်းဘွဲ့မြို့နယ်အတွင်းက ကျေးရွာ အချို့တွင် စစ်တပ်က ရွာအဝင်အထွက် ပိတ်ထားပြီး ရွာသားများကို အတင်းအကြပ်မဲထည့်စေခဲ့သည်ဟု မြေပြင် သတင်းရင်းမြစ်များက ပြောသည်။ လှိုင်းဘွဲမြို့နယ်အတွင်းရှိ ပိုင်ကျုံမြို့အပါအဝင် အနီးအနားရှိ ကျေးရွာ ၃ ရွာတွင် ရွာသားများကို ရွာပြင် ထွက်ခွင့် မပြုဘဲ မဲရုံများသို့ သွားရောက်မဲထည့်ရန် စစ်တပ်က ဖိအားပေးထားသည်ဟု ဒေသခံများက ပြောသည်။ ဒေသခံ သတင်းရင်းမြစ်တစ်ဦးက “မဲရုံမှာ မဲထည့်ဖို့အတွက် ရွာသားတွေကို ရွာပြင်ထွက်ခွင့်မပေးဘဲ Lockdown ချထားတာ။ တချို့ကတော့ ကြောက်လို့ သွားပေးကြပေမဲ့ တိုက်ပွဲဖြစ်မှာစိုးလို့ ကြိုပြေးတဲ့ သူတွေလည်း အများကြီးပဲ” ဟု ပြောသည်။ လှိုင်းဘွဲမြို့နယ်တွင် မဲရုံပေါင်း ၁၄၉ ရုံဖွင့်လှစ်ကာ မဲဆန္ဒရှင် ၁ သိန်း ၆ သောင်းကျော်ရှိသည်ဟု မြို့နယ် ကော်မရှင်က ထုတ်ပြန်ထားသော်လည်း မြေပြင်တွင်မူ စစ်ကော်မရှင်တပ်နှင့် KNLA ပူးပေါင်းအဖွဲ့များအကြား စစ်ရေးအလွန်တင်းမာနေသည်။ ကရင်ပြည် ရွေးကောက်ပွဲကို လေ့လာစောင့်ကြည့်နေသူ တစ်ဦးက “ရွာထဲကို စစ်ကားတွေ အများကြီးနဲ့ ဝင် လာပြီး ဘုန်းကြီးကျောင်းမှာ တပ်စွဲ လိုက်တာ။ ရွေးကောက်ပွဲလုပ်ဖို့ လုံခြုံရေးယူတာလို့ ပြောပေမဲ့ ရွာသား တွေကိုတော့ အပြင်ပေးမထွက်တော့ ဘူး။ မဲမပေးရင် အရေးယူမယ်ဆိုတဲ့ လေသံမျိုးတွေနဲ့ လာပြောတော့ ရွာသားတွေက တိုက်ပွဲဖြစ်မှာရော၊ ဖမ်းဆီးခံရမှာရော ကြောက်ပြီး တောထဲကိုပဲ ကြိုပြေးရတော့တာပဲ” ဟု ပြောသည်။ ဇန်နဝါရီလဆန်းပိုင်းမှ စတင်ကာ အရှေ့တောင်တိုင်းစစ်ဌာနချုပ် လက်အောက်ခံ စစ်ကားတန်းများ လှိုင်းဘွဲမြို့သို့ ရောက်ရှိလာပြီး ကစို၊ ကမာလင်း၊ ငှက်ပျောတောနှင့် နောင်ခလုံး စသည့်ကျေးရွာရှိ ဘုန်းကြီးကျောင်းများတွင် တပ်စွဲနေရာယူထားသဖြင့် ဒေသခံများ စိုးရိမ်ထိတ်လန့်နေကြခြင်း ဖြစ်သည်။ အဆိုပါ ကျေးရွာများသည် KNU တပ်မဟာ (၇) နယ်မြေအတွင်း ရှိနေသလို၊ ကရင်နယ်ခြားစောင့်တပ် (BGF) မှ အသွင်ပြောင်းထားသည့် ကရင်အမျိုးသားတပ်မတော် (KNA) ထိန်းချုပ်ရာ နယ်မြေများလည်း ဖြစ်သည်။ စစ်ကော်မရှင်က လှိုင်းဘွဲနှင့် ကမမောင်းမြို့ပေါ်ရှိ အကန့်အသတ်ရှိသော နေရာများတွင်သာ ရွေးကောက်ပွဲ ပြုလုပ်နိုင်ခြင်းဖြစ်ပြီး၊ ဖာပွန်နှင့် ရှမ်းရွာသစ်မြို့အပါအဝင် နယ်မြေအများစုမှာ ရွေးကောက်ပွဲ မကျင်းပနိုင်သည့် နယ်မြေများအဖြစ် ကြေညာထားရသည်။ ပြီးခဲ့သည့် ရွေးကောက်ပွဲ အပိုင်း (၁) တွင် ဘားအံနှင့် မြဝတီမြို့နယ်တို့၌ ကရင်ပြည်နယ်အခြေစိုက် KNDP နှင့် PSDP ပါတီတို့သည် ကြိုတင်မဲများကြောင့် စစ်တပ် ကျောထောက်နောက်ခံပြု ကြံ့ခိုင်ရေးပါတီကို ရှုံးနိမ့်ခဲ့ဖူး သည်။ ယခုအကြိမ်တွင်လည်း လှိုင်းဘွဲမြို့နယ်အတွင်း ပါတီပေါင်း ၇ ခု ဝင်ရောက်ယှဉ်ပြိုင်နေသော်လည်း စစ်တပ်၏ အတင်းအကျပ် ဖိအားပေးမှုများနှင့် ကြိုတင်မဲများအပေါ် ပြည်သူများက ယုံကြည်မှု ကင်းမဲ့နေကြသည်။ ဖာပွန်မြို့နယ်တွင်မူ စစ်ကော်မရှင်က နေ့စဉ်လေကြောင်းမှ ဗုံးကြဲတိုက်ခိုက်နေပြီး မြေပြင်စစ်ကူ စေလွှတ်ထား သော်လည်း တော်လှန်ရေးအင်အားစုများ၏ ပိတ်ဆို့တိုက်ခိုက်မှုကြောင့် ကမမောင်းမြို့အနီး ဝါးဒူးရွာဝန်းကျင် တွင်သာ ပိတ်မိနေကြသည်။ စစ်ကော်မရှင်၏ ရွေးကောက်ပွဲ အပိုင်း (၃) ကိုမူ လာမည့် ဇန်နဝါရီလ ၂၅ ရက်နေ့တွင် ကော့ကရိတ်နှင့် ကြာ အင်းဆိပ်ကြီးမြို့နယ်တို့၌ ဆက်လက်ကျင်းပရန် စီစဉ်ထားသော်လည်း နိုင်ငံတကာနှင့် တော်လှန်ရေး အင်အားစု များကမူ ဤရွေးကောက်ပွဲကို အတုအယောင်အဖြစ်သာ သတ်မှတ်ထားကြသည်။   ဓါတ်ပုံ - MOI

ရွာအဝင်အထွက်ပိတ်ပြီး ရွာသားများကို မဲထည့်ခိုင်း

Jan 12

တန့်ယန်း မိုင်းရယ် ခြိမ်းခြောက်သော်လည်း မဲပေးသူနည်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၂ ရက်။ စစ်ကော်မရှင်၏ ရွေးကောက်ပွဲ ဒုတိယပိုင်းတွင် ရှမ်းပြည် မြောက်ပိုင်း၊ တန့်ယန်းနှင့် မိုင်းရယ်မြို့နယ်တို့တွင် အုပ်ချုပ်ရေးပိုင်းမှ နည်းမျိုးစုံဖြင့် ခြိမ်းခြောက်ဖိအားပေးခဲ့သော် လည်း မဲလာပေးသူ အလွန်နည်းပါးနေကြောင်း ဒေသခံများနှင့် နိုင်ငံရေးပါတီနှင့် နီးစပ်သူများက ပြောသည်။ တန့်ယန်းမြို့နယ်တွင် မဲမပေးလျှင် ခရီးသွားလာခွင့် ကန့်သတ်မည်ဟု ဌာနဆိုင်ရာများက ခြိမ်းခြောက်ခဲ့သည့် အပြင်၊ မဲရလဒ် ကွာဟမှုမရှိဘဲ မတိမ်းမယိမ်းဖြစ်ပါက မဲပေးသူစာရင်းကို ပြန်လည်စိစစ်ပြီး မဲမပေးသူများကို အရေးယူမည်ဟု အုပ်ချုပ်ရေးမှူးအချို့က ထပ်မံခြိမ်းခြောက်ခဲ့သည်ဟု ဆိုကြသည်။ သို့သော်လည်း မဲရုံများတွင် စစ်တပ်နှင့် နီးစပ်သူအနည်းငယ်သာ လာရောက်ကြပြီး အီလက်ထရောနစ် မဲပေးစက် (EVM) ကို ပထမဆုံး အသုံးပြုခြင်းကြောင့်လည်း ဒေသခံများမှာ အခက်တွေ့ခဲ့ရသည်။ တန့်ယန်းဒေသခံတစ်ဦးက “အရင် ရွေးကောက်ပွဲတွေနဲ့ ယှဉ်ရင် မဲပေးသူက အရမ်းကို နည်းပါတယ်။ ဒီနယ်မြေ က အရင်က ကျားခေါင်းပါတီ (SNLD) ကိုပဲ အားပေးကြတာ။ အခုက ကြံ့ခိုင်ရေးရယ်၊ ကျားဖြူရယ်၊ ‘ဝ’ ပါတီရယ် သုံးခုပဲရှိတော့ ဘယ်သူမှ စိတ်မဝင်စားကြဘူး” ဟု ပြောသည်။ မိုင်းရယ်မြို့နယ်တွင်လည်း အလားတူ မဲပေးသူနည်းပါးခဲ့ပြီး ရွေးကောက်ပွဲမတိုင်မီ ဇန်နဝါရီလ ၉ ရက်နေ့က စစ်ကော်မရှင်တပ်မှ ဂျက်ဖိုက်တာဖြင့် မြို့နယ်အတွင်း ဗုံးကြဲတိုက်ခိုက်ခဲ့ခြင်းကြောင့် ဒေသခံများမှာ စိုးရိမ် ထိတ် လန့်ကာ မဲရုံသို့ မလာရဲကြကြောင်း ဆိုသည်။ ဇန်နဝါရီလ ၁၁ ရက်တွင် မိုင်းရယ်နှင့် တန့်ယန်းမြို့နယ်တို့၌ ဆက်လက်ပြုလုပ်ခဲ့ရာ မြို့နယ်နှစ်ခုစပေါင်း မဲရုံ အရေအတွက် ၁၀၀ နီးပါးဖြင့် ကျင်းပခဲ့သည်။ မိုင်းရယ်မြို့နယ်အတွင်းရှိ ကျေးရွာအုပ်စု ၂၀ ရှိ မဲရုံပေါင်း ၃၃ ရုံတွင် ဒေသခံပြည်သူများ ဆန္ဒမဲပေးလျက်ရှိ ကြောင်း စစ်ကော်မရှင်၏ မြို့နယ်ရွေးကောက်ပွဲကော်မရှင် အဖွဲ့ခွဲက ထုတ်ပြန်ထားသည်။ အလားတူ တန့်ယန်းမြို့နယ်တွင်လည်း ရပ်ကွက်နှင့် ကျေးရွာအုပ်စုများအတွင်း မဲရုံစုစုပေါင်း ၆၇ ရုံ ဖွင့်လှစ်ထား ရှိပြီး မဲပေးပိုင်ခွင့်ရှိသူ မဲဆန္ဒရှင်ပြည်သူ စုစုပေါင်း ၈၅,၀၅၉ ဦး ရှိကြောင်း မြို့နယ်ကော်မရှင်အဖွဲ့ခွဲ၏ စာရင်း များအရ သိရသည်။ သို့သော်လည်း မြေပြင်တွင်မူ မဲပေးသူအရေအတွက်မှာ စစ်ကော်မရှင်က ထုတ်ပြန်ထားသည့် မဲဆန္ဒရှင် စာရင်း နှင့် ကွာဟမှုများရှိနေပြီး၊ အုပ်ချုပ်ရေးပိုင်း၏ ခြိမ်းခြောက်ဖိအားပေးမှုများကြောင့်သာ မဲရုံများသို့ လာရောက် နေကြရခြင်းဖြစ်သည်ဟု ဒေသခံများက ဆိုသည်။ သျှမ်းသံတော်ဆင့် သတင်းဌာန အယ်ဒီတာချုပ် စိုင်းမိဏ်းက “ရှမ်းပြည် မြောက်ပိုင်းမှာ ဒုတိယအကြိမ်မှာက ၂ မြို့နယ်ပဲ လုပ်မှာ။ တန့်ယန်းရယ် မိုင်းရယ်မြို့နယ်။ ရှင်းရှင်းပြောရရင် မဲပေးပိုင်ခွင့်က လူထုရဲ့ အခွင့်အရေး၊ အသဲကြားက မဲတစ်ပြား၊ အမှန်တကယ်က လူထုက မဲမပေးဘူးဆိုတဲ့ဟာလည်း လူထုရဲ့ အခွင့်အရေးပဲ။ မပေး လိုရင်လည်း မပေးတဲ့ အခွင့်အရေး ပိုင်ဆိုင်ရမှာ။ အခုက အဲ့လိုမဟုတ်ဘူး။ တကယ့်ကိုဖိပြီးတော့မှ ခြိမ်း ခြောက်ပြီး မဲပေးခိုင်းတဲ့ပုံစံဖြစ်နေတော့ ရှင်းရှင်းပြောရရင် လူထုက လွတ်လွတ်လပ်လပ်မဲပေးခွင့် မရှိဘူးဆို တာကို ပြတယ်” ဟု ပြောသည်။ မိုင်းရယ်မြို့တွင် မြို့ပေါ်ရပ်ကွက်များကို စစ်ကော်မရှင်က အဓိက ထိန်းချုပ်ထားသော်လည်း ကျေးရွာအများစုမှာ ရှမ်းပြည်တိုးတက်ရေး ပါတီ (SSPP/SSA) စိုးမိုးထားပြီး လားရှိုး-မိုင်းရယ် လမ်းပိုင်းရှိ ကျေးရွာအချို့ကိုမူ ကိုးကန့် တပ် (MNDAA) က ထိန်းချုပ်ထားသည်။ နိုင်ငံရေးပါတီများနှင့် နီးစပ်သူများ၏ အဆိုအရ တန့်ယန်းနှင့် မိုင်းရယ်တွင် ဇန်နဝါရီလဆန်းပိုင်းကတည်းက ကြိုတင်မဲများကို အတင်းအကျပ် ထည့်ခိုင်းထားခြင်းဖြစ်ပြီး ယင်းကြိုတင်မဲများတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) က အသာရနေသည်ဟု ဆိုသည်။ ပြီးခဲ့သည့် အပိုင်း (၁) ရွေးကောက်ပွဲတွင်လည်း မူဆယ်နှင့် လားရှိုးမြို့များ၌ ကြိုတင်မဲများကြောင့် ကြံ့ခိုင်ရေး ပါတီက နေရာအားလုံး အနိုင်ရခဲ့သည်ဟု ဝေဖန်မှုများ ထွက်ပေါ်ခဲ့သည်။ တန့်ယန်းမြို့တွင် ‘ဝ’ တပ်ဖွဲ့ UWSA က ဝင်ရောက်တပ်စွဲထားပြီး မိုင်းရယ်တွင်လည်း SSPP/SSA တပ်ဖွဲ့များ ရှိနေသည့်ကြားမှ စစ်ကော်မရှင်က အယောင်ပြ ရွေးကောက်ပွဲကို ကျင်းပရန် ကြိုးပမ်းခြင်းဖြစ်သည်။ စစ်ကော်မရှင်သည် ရှမ်းပြည် အတွင်းရှိ မြို့နယ် ၁၇ ခုတွင် ရွေးကောက်ပွဲ ဒုတိယပိုင်း ပြုလုပ်ရန် စီစဉ်ထားသော် လည်း လုံခြုံရေး အခြေအနေကြောင့် တန့်ယန်းနှင့် မိုင်းရယ်ရှိ ကျေးရွာအုပ်စု ၂၄ အုပ်စု အပါအဝင် ဒေသ အများ အပြားတွင် ရွေးကောက်ပွဲ မကျင်းပနိုင်ခဲ့ကြောင်း စောင့်ကြည့်နေသူများက ဆိုသည်။ ဓါတ်ပုံ - MOI

တန့်ယန်း မိုင်းရယ် ခြိမ်းခြောက်သော်လည်း မဲပေးသူနည်း

Jan 11

မန္တလေးတွင် ခြိမ်းခြောက် မဲထည့်ခိုင်းမှုများ ရှိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၁ ရက်။ မန္တလေးတွင် ခြိမ်းခြောက် ဖိအားပေးမှုများကြားမှ ရွေးကောက်ပွဲ ဒုတိယပိုင်းပြုလုပ်ခဲ့ရာ မဲပေးသူနည်းပါးသဖြင့် အသံချဲ့စက်ဖြင့် လိုက်လံနှိုးဆော်နေကြသည်ဟု မြို့ခံများက ပြောသည်။ စစ်ကော်မရှင်က ကျင်းပသည့် ရွေးကောက်ပွဲ ဒုတိယပိုင်းကို ယနေ့ ဇန်နဝါရီလ ၁၁ ရက်နေ့တွင် မန္တလေးမြို့ပေါ် ရှိ မဟာအောင်မြေ၊ ပြည်ကြီးတံခွန်နှင့် အမရပူရမြို့နယ်တို့ အပါအဝင် မန္တလေးတိုင်းအတွင်းရှိ မြို့နယ် ၉ ခု၌ ပြုလုပ်ခဲ့သော်လည်း မဲပေးသူ အလွန်နည်းပါးနေကြောင်း မြို့ခံများနှင့် မဲရုံစောင့်ကြည့်သူများက ပြောသည်။ မန္တလေးတိုင်း ဝန်ကြီးချုပ်က တပ်နှင့် ရဲတပ်ဖွဲ့ဝင်များကို အသုံးပြုကာ လုံခြုံရေးအပြည့်ယူထားသည်ဟု ဆိုသော် လည်း မြေပြင်တွင်မူ မဲပေးသူ နည်းပါးလှသဖြင့် ရပ်ကွက်အုပ်ချုပ်ရေးမှူးများနှင့် ပျူစောထီးအဖွဲ့ဝင်များက ကားများ၊ အသံချဲ့စက်များဖြင့် ရပ်ကွက်အတွင်း လှည့်လည်ကာ ‘မဲမပေးရသေးသူများ မဲလာပေးကြရန်’ တိုက်တွန်း နှိုးဆော်မှုများ ရှိခဲ့သည်ဟု ဆိုသည်။ မဟာအောင်မြေမြို့နယ်တွင်မူ မဲမပေးလျှင် စစ်မှုထမ်းစာရင်းထဲ ထည့်မည်ဟု ခြိမ်းခြောက်မှုများရှိနေကြောင်း ဒေသခံတစ်ဦးဖြစ်သူ ဦးမောင်မောင် (အမည်လွှဲ) က ယခုကဲ့သို့ ပြောသည်။ “ဒေသခံတွေအနေနဲ့ မဲပေးဖို့ စိတ်ဝင်စားမှု မရှိပေမဲ့လည်း ဖိအားတွေ၊ ခြိမ်းခြောက်မှုတွေကြောင့် မဲပေးကြရတဲ့ သူတွေ ရှိတယ်။ မဟာအောင်မြေမှာဆိုရင် အသက်ပြည့်ပြီးသူတိုင်း မဲမထည့်ရင် စစ်မှုထမ်းခေါ်မယ်ဆိုပြီး အုပ်ချုပ်ရေးမှူးတွေက လိုက်ခြိမ်းခြောက်နေတာ။” ယနေ့နံနက်ပိုင်း လူအစည်ကားဆုံးအချိန်ဟု ဆိုနိုင်သည့် မနက် ၆ နာရီမှ ၈ နာရီအတွင်း၌ပင် မဲရုံအများစုတွင် လူ ၅၀ မှ ၁၀၀ ဝန်းကျင်သာ တန်းစီစောင့်ဆိုင်းနေသည်ကို တွေ့ရပြီး မွန်းလွဲပိုင်းတွင်မူ လူ ၂၀ ခန့်သာ ရှိတော့သည် အထိ ကျဲပါးသွားခဲ့သည်။ မန္တလေးမြို့ပေါ်ရှိ မဲရုံအချို့ကို လှည့်ပတ်ကြည့်ရှုခဲ့သူတစ်ဦးက “မနက်ပိုင်း မဲရုံဖွင့်စမှာတောင် လူ ၁၀၀ လောက် တန်းစီနေတဲ့ မဲရုံက အတော်လေး နည်းပါတယ်။ မွန်းလွဲ ၁၂ နာရီ နောက်ပိုင်းမှာတော့ အချိန်စောင့်စရာတောင် မလိုဘဲ မဲပေးလို့ရတဲ့အထိ လူမရှိတော့တာ” ဟု ပြောသည်။ စစ်ကော်မရှင်သည် မဲရုံများတွင် လူစည်ကားဟန်ပြနိုင်ရန် မဟာအောင်မြေ ကျောက်ဝိုင်းကိုပင် ဖွင့်လှစ်ထားရန် ညွှန်ကြားခဲ့ပြီး မဲပေးပြီးအပြန်တွင် အချိုရည်၊ မုန့်နှင့် ရေသန့်ဘူးများ ပေးဝေကာ စည်းရုံးမှုများ ပြုလုပ်ခဲ့သည်။ သို့သော်လည်း လမ်းဘေးဈေးသည်များကိုမူ ရွေးကောက်ပွဲကာလအတွင်း ဈေးရောင်းချခွင့် ပိတ်ပင်ထားခဲ့သည်။ မန္တလေးတိုင်းအတွင်းရှိ စဉ့်ကိုင်၊ ကျောက်ပန်းတောင်း၊ သာစည်၊ ဝမ်းတွင်း၊ တံတားဦးနှင့် မတ္တရာမြို့နယ်တို့ တွင်လည်း ရွေးကောက်ပွဲ ကျင်းပခဲ့သော်လည်း မတ္တရာမြို့နယ်ကဲ့သို့ တိုက်ပွဲများကြောင့် ပြည်သူများ စစ်ဘေးရှောင်နေရသည့် ဒေသများတွင်လည်း အယောင်ပြကျင်းပမှုများသာ ရှိခဲ့သည်ဟု စောင့်ကြည့်နေသူ အချို့က ဆိုသည်။ စစ်ကော်မရှင်၏ ရွေးကောက်ပွဲ တတိယပိုင်းကို လာမည့် ဇန်နဝါရီ ၂၅ ရက်တွင် ဆက်လက်ပြုလုပ်မည် ဖြစ်ပြီး ယင်းအကြိမ်တွင် တိုက်ပွဲများ ပြင်းထန်နေသည့် သပိတ်ကျင်းမြို့နယ် အပါအဝင် မန္တလေးမှ ကျန်ရှိသည့် ၈ မြို့နယ် ပါဝင်မည်ဖြစ်ကြောင်း စစ်ကော်မရှင်က ထုတ်ပြန်ထားသည်။ ဓါတ်ပုံ - MOI

မန္တလေးတွင် ခြိမ်းခြောက် မဲထည့်ခိုင်းမှုများ ရှိ

Jan 11

ရန်ကုန်တွင် မဲပေးသူနည်း၊ မဲမပေးက စစ်မှု ထမ်းရမည်ဟု ခြိမ်းခြောက် သတင်းနှင့် မီဒီယာ ကွန်ရက်။ ၂၀၂၆ ခုနှစ် ဇန္နဝါရီလ ၁၁ ရက်။ ရန်ကုန်တွင် မဲပေးသူနည်းပါးခဲ့ပြီး မဲမပေးလျှင် စစ်မှုထမ်းခိုင်းမည်ဟု ခြိမ်းခြောက်၍ အတင်းအကျပ် မဲထည့်ခိုင်းနေသည်ဟု မြို့ခံများက ပြောသည်။ စစ်ကော်မရှင်၏ ရွေးကောက်ပွဲ ဒုတိယပိုင်းကို ရန်ကုန်မြို့ရှိ မြို့နယ် ၁၆ ခုတွင် ယနေ့ ဇန်နဝါရီလ ၁၁ ရက်နေ့၌ ကျင်းပရာတွင် စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ကိုယ်တိုင် မဲရုံများ လိုက်ကြည့်သော်လည်း မဲပေးသူ အလွန်နည်းပါးနေခဲ့သည်ဟု ဆိုသည်။ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ကိုယ်တိုင် မဲရုံများသို့ လာရောက် ကြည့်ရှုချိန်၌ လုံခြုံရေး အထပ်ထပ် တင်းကျပ်ထားသလို ပြည်သူများကိုလည်း အမျိုးမျိုးသော ဖိအားပေး ခြိမ်းခြောက်မှုများဖြင့် မဲရုံသို့ အတင်းအကျပ် ခေါ်ဆောင်နေကြောင်းဆိုသည်။ ရန်ကုန်မြို့လယ်ရှိ လသာမြို့နယ်က အခြေအနေနှင့် ပတ်သက်၍ “မဲပေးဖို့ လုံးဝစိတ်မဝင်စားဘူး။ ဒါပေမဲ့ မဲမပေးရင် မှတ်ပုံတင်လုပ်ပေးမှာ မဟုတ်ဘူး၊ ပြည်ပထွက်ခွင့် ပိတ်ပင်မယ်ဆိုတဲ့ နိုင်ငံသားအခွင့်အရေးတွေနဲ့ ခြိမ်းခြောက်နေတော့ မတတ်သာလို့ သွားပေးရတာ” ဟု လှိုင်မြို့နယ်မှ လူငယ်တစ်ဦးက ပြောသည်။ ယနေ့ ကျင်းပသည့် ရွေးကောက်ပွဲတွင် ရန်ကုန်တိုင်းအတွင်းရှိ လသာ၊ ပန်းဘဲတန်း၊ လှိုင်၊ အင်းစိန်၊ ဗဟန်း၊ ပုဇွန်တောင်၊ ဒဂုံမြို့သစ် အပါအဝင် မြို့နယ် ၁၆ ခု ပါဝင်ပြီး ဗိုလ်ချုပ်မှူးကြီး မင်းအောင်လှိုင် ကိုယ်တိုင် လသာ၊ လှိုင်နှင့် အင်းစိန်မြို့နယ်ရှိ မဲရုံအချို့သို့ လာရောက်စစ်ဆေးခဲ့သည်။ စစ်ခေါင်းဆောင် လာရောက်မည့် လမ်းကြောင်း တစ်လျှောက်နှင့် မဲရုံများတွင် ပထမပိုင်းထက် ပိုမိုတင်းကျပ် သည့် လုံခြုံရေးများ ချထားကြောင်း မြို့ခံများက ဆိုသည်။ မဲပေးသူနည်းပါးလှသဖြင့် ရပ်ကွက်အုပ်ချုပ်ရေးအဖွဲ့များက အသံချဲ့စက်ဖြင့် လိုက်လံနှိုးဆော်နေရသလို၊ မဲမပေး ပါက ဈေးသည်များကို ဈေးရောင်းခွင့်ပိတ်မည်ဟု ခြိမ်းခြောက်ခြင်း၊ လူငယ်များကို စစ်မှုထမ်းစာရင်းထဲ ထည့်မည်ဟု ကြောက်လန့်အောင် ပြောဆိုခြင်းများ ပြုလုပ်နေသည်။ အင်းစိန်က အခြေအနေနှင့် ပတ်သက်၍လည်း “အင်းစိန်ဘက်မှာတော့ မဲရုံရှေ့တင် မဟုတ်ဘူး၊ လမ်းထိပ်တွေ မှာပါ စစ်သားတွေရော ရဲတွေရော အပြည့်ပဲ။ အုပ်ချုပ်ရေးပိုင်းကလည်း မဲမပေးရင် အိမ်ထောင်စုစာရင်းထဲက စစ်မှုထမ်းရမယ့် လူစာရင်းကို အရင်ဆွဲထုတ်မယ်ဆိုပြီး လာပြောတော့ အိမ်ကလူငယ်တွေအတွက် စိုးရိမ်ပြီး သွားပေးခဲ့ရတာပါ။ မဲရုံထဲရောက်တော့လည်း ဘယ်ပါတီကို ပေးပေးဆိုတဲ့ ပုံစံမျိုးနဲ့ လုပ်ကြတာ” ဟု ပြော သည်။ ရန်ကုန်မြို့လယ်က မဲရုံများတွင်လည်း မဲပေးသူမရှိသဖြင့် မဲရုံဝန်ထမ်းများသာ ငူငူငိုင်ငိုင် ထိုင်နေရကြောင်း ပြောသည်။ ပုဇွန်တောင်မြို့နယ်တွင်မူ မဲလာပေးသူအချို့မှာ မဲစာရင်းနံပါတ် မသိရှိခြင်းကြောင့် မဲပေးခွင့်မရဘဲ ပြန်လွှတ် ခံရသည့် ဖြစ်စဉ်များလည်း ရှိနေသည်။ မဲပေးခဲ့သူ ပြည်သူအချို့ကို မေးမြန်းရာတွင် စစ်ကော်မရှင်၏ ဖိအားပေး ခြိမ်းခြောက်မှုများကြောင့်သာ ကြောက်လန့်ပြီး မဲလာပေးခဲ့ရခြင်း ဖြစ်ကြောင်း ပြောဆိုကြသည်။ ရပ်ကွက်ဥက္ကဋ္ဌများက အသံချဲ့စက်ဖြင့် မဲလာပေးရန် အော်ဟစ်နေသော်လည်း မွန်းလွဲပိုင်းတွင် မဲရုံများမှာ လူသူကင်းမဲ့နေသည်ကို တွေ့ရသည်ဟု ဆိုကြသည်။ စစ်ကော်မရှင်သည် ရွေးကောက်ပွဲ ဒုတိယပိုင်းအဖြစ် တစ်နိုင်ငံလုံးရှိ မြို့နယ်ပေါင်း ၁၀၀ တွင် ရွေးကောက်ပွဲ ကျင်းပနေခြင်းဖြစ်ပြီး၊ တတိယပိုင်းကို ဇန်နဝါရီ ၂၅ ရက်တွင် ကျန်ရှိသည့် မြို့နယ် ၆၃ ခု၌ ဆက်လက်ကျင်းပရန် စီစဉ်ထားသည်။ သို့သော်လည်း အမျိုးသားညီညွတ်ရေးအစိုးရ (NUG) နှင့် တော်လှန်ရေးအင်အားစုများကမူ ဤရွေးကောက်ပွဲကို အတုအယောင်အဖြစ် သတ်မှတ်ထားသလို၊ ကုလသမဂ္ဂအပါအဝင် နိုင်ငံတကာကလည်း တရားမျှတမှုမရှိသည့် ရွေးကောက်ပွဲအဖြစ် ကန့်ကွက်ထားကြသည်။   ဓါတ်ပုံ - MOI

ရန်ကုန်တွင် မဲပေးသူနည်း၊ မဲမပေးက စစ်မှု ထမ်းရမည်ဟု ခြိမ်းခြောက်

Jan 10

တောင်ကြီး ပြည်နယ်ကစားကွင်း ပတ်လည်ရှိ ဆိုင်ခန်းများ ဖျက်ရန် ဒုတိယအကြိမ် သတိပေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၉ ရက်။ ရှမ်းပြည်နယ်မြို့တော် တောင်ကြီးမြို့ရှိ ပြည်နယ် အားကစားကွင်း (ရှမ်းကွင်း) ပတ်လည်ရှိ နှစ်ရှည်ဆိုင် ခန်းများကို ဖျက်သိမ်းရန် စစ်ကော်မရှင် ထပ်မံသတိပေးလာသဖြင့် ဆိုင်ခန်းရှင်များ အခက်ကြုံနေရသည်။ ပြည်နယ်အားကစားကွင်း (ရှမ်းကွင်း) ပတ်ပတ်လည်တွင် ဖွင့်လှစ်ထားသည့် နှစ်ရှည်ဈေးဆိုင်ခန်းများကို အမြန် ဆုံး ဖျက်သိမ်းပေးရန် စစ်ကော်မရှင်က ဒုတိယအကြိမ်မြောက် သတိပေးလိုက်ပြီးနောက် ဆိုင်ခန်းရှင်များမှာ လုပ်ငန်းခွင်ပျက်စီးမည့် အရေးနှင့် ရင်ဆိုင်နေရခြင်း ဖြစ်သည်။ နှစ်ပေါင်း ၂၅ နှစ်ကျော်ကြာ အခြေခိုင်လာသည့် လုပ်ငန်းများ ရုတ်တရက်ရပ်ဆိုင်းရမည့်အပေါ် အားကစားကွင်း ရှေ့မှ စားသောက်ဆိုင်ပိုင်ရှင်တစ်ဦးက ယခုကဲ့သို့ ပြောသည်။ “နှစ်ပေါင်းများစွာ အခြေခိုင်လာတဲ့ ဆိုင်ကြီး အခုကျ ရုတ်တရက်ရွှေ့ရမယ်ဆိုတော့ လာလည်း အရုပ်ကြိုးပြတ် ပဲ။ သူတို့က နေရာတော့ ပြန်ပေးပါတယ်။ အဲနေရာမှာက ဖောက်သည်ရှိဦးမှလေ။ ပြီးရင် ကုန်ဈေးနှုန်း တက် ရတဲ့အထဲ ဆိုင်ရွှေ့တဲ့စရိတ်တွေ၊ ပြင်ဆင်ရတာတွေက အပိုထပ်ကုန်ဦးမယ်။ သက်သက် သူတို့ စားပေါက် ရှာကြ တာပါ။” စစ်ကော်မရှင်က အဆိုပါနေရာတွင် နိုင်ငံတကာ အဆင့်မီ အားကစားကွင်း၊ ရေကူးကန်နှင့် လူငယ်စင်တာများ တည်ဆောက်မည့် စီမံကိန်းလုပ်ရန် အတွက် ဆိုင်ခန်းများကို ဖယ်ရှားခိုင်းနေခြင်းဖြစ်သည်။ ပြီးခဲ့သည့် ၂၀၂၅ ခုနှစ် ဒီဇင်ဘာလ ၃ ရက်နေ့က ပထမအကြိမ် သတိပေးခဲ့သော်လည်း ဆိုင်ခန်းရှင်များဘက်က လိုက်နာခြင်းမရှိသဖြင့် ယခုနှစ် ဇန်နဝါရီလ ၅ ရက်နေ့တွင် ဒုတိယအကြိမ်အဖြစ် ထပ်မံသတိပေးကာ မလိုက်နာ ပါက အတင်းအကျပ်ဖျက်သိမ်းမည်ဟု ခြိမ်းခြောက်ထားခြင်း ဖြစ်သည်။ လက်ရှိတွင် ပြောင်းရွှေ့ရမည့် နောက်ဆုံးရက်ကို တိတိကျကျ ကြေညာထားခြင်း မရှိသဖြင့် ဆိုင်ခန်းရှင်များမှာ အချိန်မရွေး ဖျက်သိမ်းခံရမည်ကို စိုးရိမ်ကာ ဆိုင်များကို ပိတ်၍ ကြိုတင်ပြင်ဆင်နေကြရသည်။ ကားအပိုပစ္စည်းရောင်းချသည့် ဆိုင်ခန်းရှင်တစ်ဦးကလည်း “အားကစားက ကျနော်တို့လည်း အားပေးပါတယ်။ အခုသူတို့ လုပ်ပုံက အားကစားတိုးတက်ဖို့ မဟုတ်ဘူး။ သက်သက် စားပေါက်ရှာတာ။ ပြီးရင်လည်း ချောင်ထိုး ထားမှာလေ။ အခု ဆိုင်ပိတ်ပြီး အသင့်ပြင်ထားရတယ်။ တက္ကသိုလ်ဖက်က ဆိုင်ခန်းတွေလို ရုတ်တရက် လာဖျက်ရင် မမီမှာစိုးလို့လေ” ဟု ပြောသည်။ စစ်ကော်မရှင်ဘက်က ဆိုင်ခန်းများကို ကျောင်းကြီးစုရပ်ကွက်၊ အဝေရာမီးပုံပျံကွင်းနှင့် ရှမ်းကွင်းအကြားရှိ အစိုးရပိုင်မြေနေရာများသို့ ပြောင်းရွှေ့ခွင့်ပေးမည်ဟု ဆိုသော်လည်း ယင်းနေရာများသည် လူစည်ကားမှု မရှိသဖြင့် စီးပွားရေးအရ တွက်ခြေမကိုက်နိုင်ကြောင်း လုပ်ငန်းရှင်များက တွက်ဆထားကြသည်။ အဆိုပါ ဆိုင်ခန်းများနှင့် လူနေတိုက်ခန်းများသည် လွန်ခဲ့သည့် ၂၅ နှစ်ခန့်က ထိုစဉ်က တိုင်းမှူးဖြစ်သူ ဗိုလ်ချုပ်မောင်ဘို (ငြိမ်း) ၏ ခွင့်ပြုချက်ဖြင့် စနစ်တကျ ဆောက်လုပ်ခဲ့ခြင်းဖြစ်ပြီး ရောင်းချသူများမှာလည်း ယင်းကာလကတည်းက အခြေချလာသူများ ဖြစ်သည်။ အာဏာသိမ်းပြီးနောက်ပိုင်း တောင်ကြီးမြို့တွင် စီမံကိန်း အကြောင်းပြချက်ဖြင့် ဆိုင်ခန်းနှင့် နေအိမ်များစွာ ဖျက်ဆီးခံခဲ့ရသည်။ လက်ရှိတွင်လည်း စစ်ကော်မရှင်ခန့် ပြည်နယ်ဝန်ကြီးချုပ် ဦးအောင်အောင်က ဗိုလ်ချုပ်ပန်းခြံ ကို အဆင့်မြင့်ပြင်ဆင်ပြီး ဆိုင်ခန်းသစ်များ ပြန်လည်တည်ဆောက်ကာ စီးပွားဖြစ်ရောင်းချရန် စီစဉ်နေသည်ဟု မြို့ခံများအကြား တီးတိုးဝေဖန် နေကြသည်။

တောင်ကြီး ပြည်နယ်ကစားကွင်း ပတ်လည်ရှိ ဆိုင်ခန်းများ ဖျက်ရန် ဒုတိယအကြိမ် သတိပေး

« Prev 1 … 105 106 107 108 109 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close