NMG Doh – Page 109 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Jan 8

နိုင်ကျဉ်း ၃၀ ကျော် ရိုက်နှက် တိုက်ပိတ် ခံနေရ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ မကွေးထောင်တွင် နိုင်ငံရေးအကျဉ်းသား အယောက် ၃၀ ကျော်ကို ရိုက်နှက်နှိပ်စက်ပြီး တိုက်ပိတ်ထားသည်ဟု အကျဉ်းဦးစီးနှင့် နီးစပ်သူများက ပြောသည်။ မကွေးအကျဉ်းထောင် အတွင်းရှိ နိုင်ငံရေး အကျဉ်းသား ၃၅ ဦးကို ထောင်အာဏာပိုင်များက ဝါယာကြိုးများ၊ နံပါတ်တုတ်များဖြင့် အကြမ်းဖက်ရိုက်နှက်နှိပ်စက်ပြီးနောက် တစ်လနီးပါးကြာသည်အထိ တိုက်ပိတ်ပြစ်ဒဏ် ပေးထားသည်ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်သည်။ အဆိုပါဖြစ်စဉ်နှင့် ပတ်သက်၍ အကျဉ်းသားမိသားစုဝင်နှင့် နီးစပ်သူတစ်ဦးက “ထောင်ထဲမှာက အခုထိ တိုက် ပိတ်ထားတုန်းပဲလို့ သိရတယ်။ အရိုက်ခံရတဲ့သူတွေထဲမှာ ဒဏ်ရာပြင်းပြင်းထန်ထန် ရထားတဲ့သူတွေလည်း ပါတော့ ကျန်းမာရေးအတွက် အရမ်းစိုးရိမ်ရပါတယ်။ ထောင်ဝင်စာတွေ့ဖို့လည်း ကန့်သတ်ထားတာတွေ ရှိနေတော့ သူတို့ ဘယ်လိုအခြေအနေရှိနေလဲဆိုတာ အတိအကျမသိရဘဲ ရင်တမမ ဖြစ်နေရတယ်” ဟု ပြောသည်။ ဖြစ်စဉ်မှာ ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၈ ရက်နေ့က စတင်ခဲ့ခြင်းဖြစ်ပြီး အကျဉ်းထောင်တစ်ခုလုံးရှိ စားပြီးသားပန်းကန်များကို ဆေးကြောရန် ထောင်အာဏာပိုင်များက ခိုင်းစေခဲ့ရာမှ စတင်ခဲ့သည်။ ထိုသို့ခိုင်းစေမှုကို မဆောင်ရွက်နိုင်ကြောင်း ပြောဆိုသည့် နိုင်ငံရေးအကျဉ်းသားများကို မျက်နှာအဝတ်စည်းကာ ခေါင်းကွဲဒဏ်ရာများ ရရှိသည်အထိ အုပ်စုဖွဲ့ရိုက်နှက်ခဲ့ခြင်း ဖြစ်သည်။ ဤအကြမ်းဖက်မှုတွင် ထောင်ဝန်ထမ်းများ ပါဝင်ကျူးလွန်ခဲ့သည့်အပြင် တန်းစီးများနှင့် အခန်းလူကြီးများကိုပါ လုပ်ပိုင်ခွင့်ပေးကာ ရိုက်နှက်ခိုင်းခဲ့ကြောင်း (PPNM) က ဇန်နဝါရီလ ၅ ရက်နေ့က ထုတ်ပြန်ထားသည်။ ထို့ပြင် ထောင်တွင်းဈေးဆိုင်များ၌ ကုန်ဈေးနှုန်း မတန်တဆကြီးမြင့်နေမှုကို တွန်းလှန်ရန်အတွက် ‘ကွမ်းဖြတ် တောက်ရေး လှုပ်ရှားမှု’ ပြုလုပ်ခဲ့သည့် နိုင်ငံရေးအကျဉ်းသား ၁၁ ဦးကိုလည်း ထောင်ဝန်ထမ်းများက ထပ်မံ ရိုက်နှက်ကာ ခြေကျင်းခတ်၍ တိုက်ပိတ်ထားကြောင်း မြန်မာနိုင်ငံလုံးဆိုင်ရာ (PPNM) က ဆိုသည်။ PPNM ၏ တာဝန်ရှိသူတစ်ဦးက "ဒါဟာ အကျဉ်းသားအခွင့်အရေးနဲ့ နိုင်ငံတကာ စံချိန်စံညွှန်းတွေကို ပြောင် ပြောင် တင်းတင်း ချိုးဖောက်တာပါ။ ထောင်ဝန်ထမ်းတွေ ကိုယ်တိုင် အကြမ်းဖက်မှုမှာ ပါဝင်နေသလို၊ တန်းစီး တွေကို လုပ်ပိုင်ခွင့်ပေးပြီး ရိုက်နှက်ခိုင်းနေတာတွေကို ကျနော်တို့ PPNM အနေနဲ့ ပြင်းပြင်းထန်ထန် ရှုတ်ချ ပါတယ်" ဟု ပြောသည်။ လက်ရှိတွင် မကွေး အကျဉ်းထောင်အတွင်း၌ ထောင်ဝင်စာပစ္စည်း ပေးပို့မှုများကိုပါ ကန့်သတ်ပိတ်ပင်ထားပြီး ဧည့်တွေ့ခွင့်အတွက်ပါ ငွေကြေးတောင်းခံမှုများ ရှိနေသည်ဟု အကျဉ်းဦးစီးနှင့် နီးစပ်သူများက ပြောသည်။ ၊

နိုင်ကျဉ်း ၃၀ ကျော် ရိုက်နှက် တိုက်ပိတ် ခံနေရ

Jan 8

ရွေးကောက်ပွဲ နှောက်ယှက်သည်ဆိုကာ လူ ၃၃၀ ကျော် ဖမ်းဆီးထား သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ ရွေးကောက်ပွဲကို ဆန့်ကျင်နှောင့်ယှက်သည်ဟု ဆိုကာ ဇန်နဝါရီလ ၅ ရက်နေ့အထိ ပြည်သူ ၃၃၅ ဦးကို ဖမ်းဆီးအရေးယူထားကြောင်း စစ်ကော်မရှင်၏ ရွေးကောက်ပွဲကာလ လုံခြုံရေးဆိုင်ရာ ကြီးကြပ်မှု ဗဟိုကော်မတီက ထုတ်ပြန်လိုက်သည်။ ဖမ်းဆီးခံရသူများတွင် အမျိုးသမီး ၆၀ ဦးအထိ ပါဝင်နေပြီး ၎င်းတို့ကို သေဒဏ်အထိ ချမှတ်နိုင်သည့် ပြင်းထန် သော ဥပဒေများဖြင့် အမှုဖွင့်ထားခြင်း ဖြစ်သည်။ အဆိုပါ ဖမ်းဆီးမှုများနှင့် ပတ်သက်၍ လုံခြုံရေးအရ အမည်မဖော်လိုသည့် ရန်ကုန်မြို့ခံတစ်ဦးက အခြေအနေကို ယခုကဲ့သို့ ပြောသည်။ “အခုက အွန်လိုင်းမှာ တစ်ခုခုရေးတာနဲ့တင် အဖမ်းခံနေရတာ။ ရွေးကောက်ပွဲကို မကြိုက်လို့ ဆန့်ကျင်တာက ပြည်သူ့အခွင့်အရေးပဲလေ။ ဒါကို သေဒဏ်အထိပေးနိုင်တဲ့ ဥပဒေတွေနဲ့ ခြိမ်းခြောက်ပြီး အတင်းမဲပေးခိုင်းဖို့ လုပ်နေတာကတော့ တရားမျှတမှု လုံးဝမရှိတဲ့ လုပ်ရပ်ပဲ။” စစ်ကော်မရှင်၏ ပြည်ထဲရေးဝန်ကြီး ဒုတိယဗိုလ်ချုပ်ကြီး ထွန်းထွန်းနောင်က ဇန်နဝါရီလ ၆ ရက်နေ့ အစည်း အဝေးတွင် ၂၀၂၅ ခုနှစ်၊ ဇူလိုင်လတွင် ပြဋ္ဌာန်းခဲ့သည့် ‘ပါတီစုံဒီမိုကရေစီ အထွေထွေ ရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ’ ဖြင့် အမှုပေါင်း ၂၄၀ ဖွင့်လှစ်ခဲ့သည်ဟု ပြောသည်။ မြန်မာအမျိုးသမီး သမဂ္ဂ BWU ၏ မူဝါဒရေးရာ ဦးဆောင်အဖွဲ့ဝင် တင်တင်ညိုက “အခုလိုမျိုး အွန်ုလိုင်းခေတ် မှာ ရွေးကောက်ပွဲနဲ့ ပတ်သက်တာကို reaction ပေးတာတောင် မရတဲ့ခေတ် ဖြစ်နေတယ်။ ရွေးကောက် ပွဲ ကာကွယ်ပေးတဲ့ ဥပဒေဆိုတာက ခိုင်ခိုင်မာမာနဲ့ကို ထုတ်ပြန်ပေးခဲ့တာ။ ရွေးကောက်ပွဲကို ဘယ်လိုနည်းနဲ့ပဲ ဆန့်ကျင် ဆန့်ကျင် ဖမ်းမယ်။ ထောင်ချမယ်ဆိုတဲ့ဟာမျိုး အကြီးလေးဆုံး အပြစ်တွေလည်း ပေးလို့ရတယ်။ သေဒဏ်လည်း ပေးလို့တယ်။ တရားစီရင်ရေး စနစ်ကလည်း စစ်တပ်အောက်မှာပဲ ရှိနေတာ” ဟု ပြောသည်။ ဖမ်းဆီးခံရသူများသည် လူမှုကွန်ရက်စာမျက်နှာပေါ်တွင် ရွေးကောက်ပွဲ ဆန့်ကျင်ရေး ရေးသားခြင်း၊ စည်းရုံးလှုံ့ဆော်ခြင်းနှင့် ရွေးကောက်ပွဲဆိုင်ရာ ဆိုင်းဘုတ်များကို ဖျက်ဆီးခြင်းတို့ကြောင့် ဖြစ်သည်ဟု ဆိုသည်။ ဧရာဝတီသတင်းဌာန အမှုဆောင်အယ်ဒီတာ ဦးရဲနည်က “ကန့်ကွက်ပိုင်ခွင့် ဝေဖန်ပိုင်ခွင့် မရှိဘူး ဆိုကတည်းက အဲ့ဒါ ခြိမ်းခြောက်တာပေါ့။ ခြိမ်းခြောက်ရုံတင် မကဘူး။ အဲ့လိုမျိုး ကန့်ကွက်တဲ့ ဝေဖန်တဲ့ လူတွေပါ ထောင်ချ ဖမ်းဆီးမယ် ဆိုတဲ့ဟာက ဖိနှိပ်တာပေါ့။ ဆိုတော့ ဒီဟာက ကာကွယ်ရေး ဥပဒေလို့သာ ပြောပေမယ့် ဥပဒေ မဟုတ်ဘဲနဲ့ အဲ့လိုမျိုး ဖိနှိပ်ရေးယန္တရား တစ်ခုပဲ ဖြစ်တယ်လို့ပဲ ပြောရမှာပေါ့” ဟု ပြောသည်။ စစ်ကော်မရှင်သည် ဒီဇင်ဘာလ ၂၈ ရက်က ရွေးကောက်ပွဲ အပိုင်း (၁) ကို ကျင်းပခဲ့ပြီးဖြစ်ကာ ကျန်ရှိနေသည့် အပိုင်း (၂) နှင့် (၃) ကို လာမည့် ဇန်နဝါရီ ၁၁ ရက်နှင့် ၂၅ ရက်တို့တွင် ဆက်လက်လုပ်ဆောင်ရန် ပြင်ဆင်နေ သည်။ သို့သော်လည်း အမျိုးသားညီညွတ်ရေးအစိုးရ (NUG) အပါအဝင် တော်လှန်ရေးအင်အားစုများကမူ ဤရွေး ကောက်ပွဲကို ‘အတုအယောင်’ အဖြစ် သတ်မှတ်ထားပြီး အသိအမှတ်မပြုကြောင်းနှင့် နည်းမျိုးစုံဖြင့် ဆက်လက် ဆန့်ကျင်သွားမည်ဖြစ်ကြောင်း အတိအလင်း ကြေညာထားသည်။ နိုင်ငံရေးလေ့လာသူများကမူ စစ်ကော်မရှင်သည် ရွေးကောက်ပွဲကို လူထုထောက်ခံမှုရရှိရန်ထက် ၎င်းတို့၏ အာဏာတည်မြဲရေးအတွက် တရားဝင်မှုရှာဖွေသည့် နည်းလမ်းတစ်ခုအဖြစ်သာ အသုံးချနေခြင်းဖြစ်ပြီး၊ ပြည်သူများကို အကြောက်တရားဖြင့် ဖိနှိပ်ဖမ်းဆီးနေခြင်းမှာ ရွေးကောက်ပွဲ၏ ဂုဏ်သိက္ခာကို ပိုမိုပျက်ပြား စေကြောင်း သုံးသပ်နေကြသည်။

ရွေးကောက်ပွဲ နှောက်ယှက်သည်ဆိုကာ လူ ၃၃၀ ကျော် ဖမ်းဆီးထား

Jan 8

တနိုင်းဒေသ တိုက်ပွဲများ ပြင်းထန်၊ ဗျူဟာ စခန်းနှင့် မှော်များကို စစ်ကော်မရှင် ထိုးစစ်ဆင် သတင်းနှင့် မီဒီယာ ကွန်ရက် ၂၀၂၆ ခုနှစ်၊ ဇန္နဝါရီလ ၈ ရက်။ ကချင်ပြည်၊ တနိုင်းမြို့နယ်အတွင်းရှိ အချက်အချာကျသော နမ်ဗျူစခန်းနှင့် ပယင်း၊ ရွှေမှော်ဒေသများကို ထိန်းချုပ်နိုင်ရန် စစ်ကော်မရှင်တပ်က အင်အားအလုံးအရင်းဖြင့် အပြင်းအထန် ထိုးစစ်ဆင်နေ သည်ဟု ဒေသခံများနှင့် မြေပြင်သတင်းရင်းမြစ်များက ပြောသည်။ လွန်ခဲ့သည့် ဒီဇင်ဘာလ ဒုတိယပတ်ကတည်းက စတင်ခဲ့သည့် ထိုးစစ်ဆင် တိုက်ခိုက်မှုများသည် ယနေ့အထိ ပြင်းထန်နေ ဆဲဖြစ်ပြီး စစ်ကော်မရှင်တပ်သည် ဒရုန်းများ၊ လက်နက်ကြီးများနှင့် လေကြောင်းတိုက်ခိုက်မှုများကို အဆက် မပြတ် အသုံးပြုနေသည်။ ထိုသို့ ထိုးစစ်ဆင်မှုကြောင့် နမ်ဗျူနှင့် လမုန်ခ မှော်အနီးရှိ ကချင်လွတ်မြောက်ရေးတပ်မတော် (KIA) တပ်ရင်း (၁၄) ၏ ကာကင်းစခန်းအချို့ လက်လွှတ်ခဲ့ရသည်။ တိုက်ပွဲများကြောင့် မှော်လုပ်သား သောင်းနှင့်ချီ၍ မြို့ပေါ်၌ ခိုလှုံနေကြရသည်။ ပယင်းမှော်မှ ထွက်လာသည့် မှော်လုပ်သားတစ်ဦးက “မှော်ထဲမှာက နေလို့ အဆင်မပြေတော့လို့ပါ။ ဦးလေးက ပြီးခဲ့တဲအပတ်ထဲက မြစ်ကြီးနားကို ပြန်ရောက်လာပြီလေ။ မှော်ထဲမှာလည်း အများကြီး ကျနေသေးတယ်။ ဦးလေးတို့ မှော်ထဲမှာ ရှိနေတုန်းကဆိုရင် လက်နက်ကြီးတွေက နေ့တိုင်းကျနေတာ၊ အလုပ်လည်း လုပ်လို့မရ ဘူး။ တချို့ကတော့ အခြေအနေစောင့်ကြည့်အုံးမယ်ဆိုပြီး နေခဲ့ကြတာ” ဟု ပြောသည်။ ထို့ပြင် စစ်ကော်မရှင်နှင့် လက်တွဲနေသော ဝါရာဇွပ်ပြည်သူ့စစ်နှင့် ရှမ်းနီပြည်သူ့စစ်အဖွဲ့များသည်လည်း ပယင်းနှင့် ရွှေမှော်များကို စီးနင်းရန်အတွက် နမ်ဗျူစခန်းဘက်သို့ ဦးတည်ကာ စစ်ကော်မရှင်တပ်နှင့်အတူ စစ်ကြောင်းထိုးလျက်ရှိသည်ဟု မြေပြင် သတင်း ရင်းမြစ်က ပြောသည်။ စစ်ကော်မရှင်၏ တနိုင်းဒေသကွပ်ကဲမှု စစ်ဌာနချုပ် (ဒကစ) က မှော်ဒေသများအတွင်းသို့ လက်နက်ကြီးများဖြင့် ဆက်တိုက်ပစ်ခတ်နေပြီး မှော်အတွင်းရှိ ပြည်သူများကို အမြန်ဆုံးထွက်ခွာရန် အမိန့်ထုတ်ပြန်ထားသည်။ စစ်ဘေးရှောင်များ ရုတ်တရက် အလုံးအရင်းနှင့် ရောက်ရှိလာခြင်းကြောင့် တနိုင်းမြို့ပေါ်ရှိ အိမ်ငှားခနှင့် အခန်းခ များသည် ယခင်ကထက် ၃ ဆနီးပါးအထိ ဈေးတက်သွားကြောင်း ဒေသခံများ၏ ပြောဆိုချက်ကို ကိုးကား၍ ကချင်သတင်းဌာနက KNG က ဖော်ပြထားသည်။ ယခင်က ကျပ်နှစ်သိန်းဝန်းကျင်သာရှိသည့် လုံးချင်းအိမ်ငှားခမှာ ကျပ်ငါးသိန်းအထိ ဖြစ်လာပြီး အခန်းငှားခများ မှာလည်း တစ်သိန်းခွဲအထိ စျေးတက်လာသဖြင့် လက်လုပ်လက်စား မိသားစုများမှာ နေရေးထိုင်ရေး အကျပ် အတည်းနှင့် ရင်ဆိုင်နေရသည်ဟု ဆိုသည်။ တနိုင်းဒေသခံ လူငယ်သူတစ်ဦးက “သူတို့ ဒီဗမာစစ်တပ်က ရွေးကောက်ပွဲလုပ်ဖို့ နယ်မြေစိုးမိုးရေးအတွက် မှော်တွေကို ထိုးစစ်ဆင်နေတာလို့ မြင်တယ်။ ဒီမှာက အဲ့လိုမျိုးလည်း သုံးသပ်ကြတာပေါ့နော်။ ဒါပေမဲ့ လက်တွေ့မှာတော့ လူထုက မဲပေးဖို့ထက် အသက်ရှင်ဖို့အတွက် တနိုင်းမြို့ပေါ်ကို ပြေးနေရတာပါ။ အိမ် ငှားခတောင် မတတ်နိုင်တဲ့ ပြည်သူတွေအတွက် ဒီရွေးကောက်ပွဲက ဘာမှအဓိပ္ပာယ်မရှိပါဘူး” ဟု ပြောသည်။ လက်ရှိတွင် စစ်ကော်မရှင်တပ်သည် စစ်ရေးဖိအားပေးမှုများ အပြင် နိုင်ငံရေးအရလည်း ၎င်းတို့ကျင်းပမည့် ရွေးကောက်ပွဲအတွက် နယ်မြေစိုးမိုးမှုရရန် ကြိုးပမ်းနေခြင်းဖြစ်သည်ဟု ဒေသတွင်းက တက်ကြွလှုပ်ရှား သူများနှင့် စစ်ရေးလေ့လာသူများက သုံးသပ်ကြသည်။

တနိုင်းဒေသ တိုက်ပွဲများ ပြင်းထန်၊ ဗျူဟာ စခန်းနှင့် မှော်များကို စစ်ကော်မရှင် ထိုးစစ်ဆင်

Jan 8

ကမ္ဘာ့ အကြီးဆုံး Tomorrowland ဂီတပွဲတော်ကြီး ထိုင်းနိုင်ငံတွင် ကျင်းပမည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ ကမ္ဘာကျော် အကနှင့် ဂီတပွဲတော်ကြီးဖြစ်သော Tomorrowland ကို ၂၀၂၆ ခုနှစ်၊ ဒီဇင်ဘာလတွင် ထိုင်းနိုင်ငံ၊ ချွန်ဘူရီခရိုင်၌ ကျင်းပသွားရန် ဆုံးဖြတ်လိုက်သည်။ အဆိုပါပွဲတော်အတွက် ကြိုတင်စာရင်းသွင်းခြင်း (Pre-registration) ကို ယနေ့ ဇန်နဝါရီလ ၈ ရက်၊ မြန်မာစံတော်ချိန် နေ့လယ် ၃ နာရီခွဲတွင် စတင်ဖွင့်လှစ်ပြီဖြစ်သည်။ ယခင်က ဘယ်လ်ဂျီယံနိုင်ငံ၌သာ ကျင်းပခဲ့သဖြင့် အာရှသားများအတွက် ဗီဇာနှင့် ငွေကြေးအခက်အခဲရှိခဲ့သော်လည်း ယခုအခါ အနီးကပ်ဆုံးနေရာဖြစ်သည့် ထိုင်းနိုင်ငံသို့ ရောက်ရှိလာခြင်း ဖြစ်သည်။ ဤပွဲတော်ကို ပုံမှန်အားဖြင့် ဘယ်လ်ဂျီယံ နိုင်ငံတွင် နှစ်စဉ် ကျင်းပခဲ့ပြီး ကမ္ဘာတဝှမ်းမှ နာမည်ကြီး DJ များ၊ ဂီတ ဝါသနာ ရှင်များ ပါဝင် ဆင်နွဲကြသည်။ နေရာထိုင်ခင်းများတွင် ကွင်းပြင်တွင် တဲထိုးနေထိုင်သည်မှ ကြယ်ငါးပွင့် အဆင့် ဇိမ်ခံ အခန်းများ အထိ ပါဝင်လေ့ရှိသည်။ ပွဲတက်ရောက်လိုသူများသည် Tomorrowland ဝက်ဘ်ဆိုက်တွင် အကောင့်ဖွင့်လှစ်ထားရန် လိုအပ်ပြီး မတ်လ ၇ ရက်နေ့တွင် လက်မှတ်များကို ကမ္ဘာအနှံ့ စတင်ရောင်းချမည်ဖြစ်သည်။ ဤပွဲတော်ကြီးကြောင့် ထိုင်းနိုင်ငံအတွင်းသို့ လာမည့် ၅ နှစ်အတွင်း ဘတ်ငွေ ၂၁ ဘီလီယံခန့် ဝင်ရောက်လာမည်ဟု ခန့်မှန်းထားပါသည်။

ကမ္ဘာ့ အကြီးဆုံး Tomorrowland ဂီတပွဲတော်ကြီး ထိုင်းနိုင်ငံတွင် ကျင်းပမည်

Jan 8

ချင်းမိုင်မြို့ နေအိမ်မီးလောင်မှုကြောင့် မိသားစုဝင် ၅ ဦး သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ ထိုင်ဝမ်နိုင်ငံ၊ ချင်းမိုင်မြို့၊ ပါဒဲ့တ်ရပ်ကွက်ရှိ နေအိမ်တစ်လုံးတွင် ဇန်နဝါရီလ ၇ ရက် ညသန်းခေါင်အချိန်၌ မီးလောင်မှုဖြစ်ပွားခဲ့ရာ မိသားစုဝင် (၅) ဦး ဆုံးပါးသွားခဲ့သည်။ သေဆုံးသူများထဲတွင် အသက် (၅) နှစ်အရွယ် အမြွှာညီမငယ်နှစ်ဦး၊ အသက် (၃၈) နှစ်အရွယ် ဇနီးမောင်နှံနှင့် အသက် (၇၀) အရွယ် အဘွားတစ်ဦးတို့ ပါဝင်သည်။ မီးသည် နေအိမ်အောက်ထပ်မှ စတင်လောင်ကျွမ်းခဲ့ခြင်းဖြစ်ပြီး အိမ်တစ်အိမ်လုံး၌ သံပန်းများကို အလုံပိတ်တပ်ဆင်ထားသောကြောင့် အိမ်နီးချင်းများက အချိန်မီ ကယ်တင်နိုင်ခြင်း မရှိခဲ့ပေ။ မီးသတ်တပ်ဖွဲ့ဝင်များ ရောက်ရှိလာချိန်တွင် အပေါ်ထပ်၌ မိသားစုဝင်အားလုံး သတိလစ်နေသည်ကို တွေ့ရှိခဲ့ရပြီး မီးခိုးမွန်း၍ သေဆုံးခဲ့ခြင်းဖြစ်နိုင်သည်ဟု အာဏာပိုင်များက ခန့်မှန်းထားသည်။ ယခုဖြစ်စဉ်သည် နေအိမ်များတွင် လုံခြုံရေးအတွက် သံပန်းများတပ်ဆင်ရာ၌ အရေးပေါ်ထွက်ပေါက် (Fire Escape) ထည့်သွင်းရန် အရေးကြီးကြောင်း သင်ခန်းစာလည်း ဖြစ်သည်။ #ChiangMai #မီးလောင် #ချင်းမိုင်

ချင်းမိုင်မြို့ နေအိမ်မီးလောင်မှုကြောင့် မိသားစုဝင် ၅ ဦး သေဆုံး

Jan 8

“ကျားဖြန့်”ခေါင်းဆောင် ချန်ကျိအား တရုတ်နိုင်ငံသို့ လွှဲပြောင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ ကမ္ဘောဒီးယားနိုင်ငံ၏ အချမ်းသာဆုံးပုဂ္ဂိုလ်တစ်ဦးဖြစ်သူ ချန်ကျိ (Chen Zhi) ကို ကမ္ဘောဒီးယား အာဏာပိုင်များက ဖမ်းဆီးပြီးနောက် ၂၀၂၆ ခုနှစ်၊ ဇန်နဝါရီလ ၇ ရက်နေ့တွင် တရုတ်နိုင်ငံသို့ လွှဲပြောင်းပေးအပ်ခဲ့သည်။ ချန်ကျိနှင့်အတူ တရုတ်နိုင်ငံသားနှစ်ဦးဖြစ်သည့် ဇူဂျီလျန်းနှင့် ရှောက်ဂျီဝေ တို့ကိုလည်း တစ်ပါတည်း လွှဲပြောင်းခဲ့သည်။ Prince Group ကို တည်ထောင်သူဖြစ်သူ ချန်ကျိသည် ကမ္ဘာတစ်ဝန်းရှိ လူများအား ဒေါ်လာဘီလီယံချီ လိမ်လည်နေသည့် "ကျားဖြန့်" ဟုခေါ်ဆိုသော အွန်လိုင်းငွေလိမ်လုပ်ငန်းများကို ဦးဆောင်နေသူအဖြစ် စွပ်စွဲခံထားရသည်။ ၎င်းသည် သီဟာနုဗီးလ် (Sihanoukville) ရှိ ၎င်း၏ နည်းပညာဥယျာဉ်အတွင်း လူများအား အဓမ္မစေခိုင်းကာ ငွေလိမ်လုပ်ငန်းများ လုပ်ဆောင်စေခြင်းနှင့် ငွေကြေးခဝါချခြင်းများကို ကျူးလွန်ခဲ့သည်ဟု ဆိုသည်။ ချန်ကျိ၏ Prince Group သည် ဘဏ်လုပ်ငန်း၊ အိမ်ခြံမြေ၊ လေကြောင်းလိုင်းနှင့် ခရီးသွားလုပ်ငန်းအပါအဝင် လုပ်ငန်းအများအပြားကို လုပ်ကိုင်နေသဖြင့် ၎င်း၏ ရင်းနှီးမြှုပ်နှံသူများမှာ ငွေကြေးဆုံးရှုံးမည်ကို စိုးရိမ်လျက်ရှိသည်။ ချန်ကျိသည် ၂၀၁၄ ခုနှစ်တွင် ကမ္ဘောဒီးယားနိုင်ငံသား ဖြစ်ခွင့်ရခဲ့သော်လည်း ၂၀၂၅ ခုနှစ်၊ ဒီဇင်ဘာလတွင် ၎င်း၏ နိုင်ငံသားအဖြစ်ကို ပယ်ဖျက်ခြင်း ခံခဲ့ရသည်။ အမေရိကန်က ၎င်း၏ ဘစ်ကွိုင် (Bitcoin) တန်ဖိုး ၁၄ ဘီလီယံခန့်နှင့် ဟောင်ကောင်၊ ထိုင်ဝမ်တို့ကလည်း ၎င်း၏ ပိုင်ဆိုင်မှုအများအပြားကို သိမ်းဆည်းထားပြီး ဖြစ်သည်။ ချန်ကျိမှာ တရုတ်ဥပဒေနှင့် အညီ စီရင်ခြင်းခံရမည် ဖြစ်သည်။

“ကျားဖြန့်”ခေါင်းဆောင် ချန်ကျိအား တရုတ်နိုင်ငံသို့ လွှဲပြောင်း

Jan 8

အမေရိကန်ပြည်ထောင်စုက နိုင်ငံတကာအဖွဲ့အစည်း ၆၆ ဖွဲ့မှ နှုတ်ထွက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၈ ရက်။ အမေရိကန်ပြည်ထောင်စုသည် ၂၀၂၆ ခုနှစ်၊ ဇန်နဝါရီလ ၇ ရက် (ဗုဒ္ဓဟူးနေ့) တွင် နိုင်ငံတကာအဖွဲ့အစည်းပေါင်း (၆၆) ခုမှ တရားဝင်နှုတ်ထွက်ခဲ့ကြောင်း အိမ်ဖြူတော်က ထုတ်ပြန်ကြေညာသည်။ ၎င်းအဖွဲ့အစည်းများတွင် ကုလသမဂ္ဂလက်အောက်ခံအဖွဲ့ (၃၁) ဖွဲ့နှင့် အခြားနိုင်ငံတကာအဖွဲ့အစည်း (၃၅) ဖွဲ့ ပါဝင်သည်။ နိုင်ငံခြားရေးဝန်ကြီး မာကိုရူဘီယိုနှင့် အိမ်ဖြူတော်၏ ထုတ်ပြန်ချက်အရ အဆိုပါအဖွဲ့အစည်းများသည် အမေရိကန်၏ အကျိုးစီးပွားကို ဆန့်ကျင်နေသည့်အပြင် အခွန်ထမ်းပြည်သူများ၏ ငွေကြေးများကို ဖြုန်းတီးနေခြင်းနှင့် "Woke" ဟုခေါ်ဆိုသော လူမှုပြုပြင်ပြောင်းလဲရေး အစီအစဉ်များကိုသာ ဦးစားပေးဖော်ဆောင်နေခြင်းတို့ကြောင့် ယခုကဲ့သို့ နှုတ်ထွက်ရခြင်းဖြစ်သည်ဟု ဆိုသည်။ နှုတ်ထွက်လိုက်သော အဖွဲ့အစည်းများထဲတွင် ရာသီဥတုပြောင်းလဲမှုဆိုင်ရာ မူဘောင်အဖွဲ့ (UNFCCC)၊ လူဦးရေနှင့် မျိုးဆက်ပွားကျန်းမာရေးဆိုင်ရာ ရန်ပုံငွေအဖွဲ့ (UNFPA) နှင့် အမျိုးသမီးအခွင့်အရေးဆိုင်ရာအဖွဲ့ (UN Women) တို့ကဲ့သို့ အရေးကြီးအဖွဲ့များ ပါဝင်နေသည်။ ထိုသို့နှုတ်ထွက်မှုကြောင့် ကမ္ဘာကြီးပူနွေးလာမှုကို တားဆီးရန် ကြိုးပမ်းချက်များ ထိခိုက်နိုင်သကဲ့သို့ ကမ္ဘာလုံးဆိုင်ရာ လူသားချင်းစာနာမှုလုပ်ငန်းများအတွက် ရန်ပုံငွေ ထက်ဝက်ခန့် လျော့နည်းသွားနိုင်ကြောင်း ပညာရှင်များက စိုးရိမ်လျက်ရှိသည်။ သို့သော်လည်း အမေရိကန်သည် ကုလသမဂ္ဂလုံခြုံရေးကောင်စီ (UNSC)၊ နိုင်ငံတကာအဏုမြူအေဂျင်စီ (IAEA) နှင့် နေတိုး (NATO) တို့ကဲ့သို့ မဟာဗျူဟာအရ အရေးပါသောအဖွဲ့အစည်းများတွင်မူ ဆက်လက်ပါဝင်နေမည်ဖြစ်သည်။ မြန်မာနိုင်ငံကဲ့သို့သော အကျပ်အတည်းကြုံတွေ့နေရသည့် နိုင်ငံများအတွက်မူ ကုလသမဂ္ဂမှတစ်ဆင့်ရရှိသော ဒုက္ခသည်ကူညီရေး၊ အမျိုးသမီးအခွင့်အရေးနှင့် မိခင်နှင့်ကလေး စောင့်ရှောက်ရေး ရန်ပုံငွေများ သိသိသာသာ လျော့နည်းသွားနိုင်သည့် အလားအလာရှိနေသည်။။

အမေရိကန်ပြည်ထောင်စုက နိုင်ငံတကာအဖွဲ့အစည်း ၆၆ ဖွဲ့မှ နှုတ်ထွက်

Jan 7

ဝက်လက် ဗုံးကြဲတိုက်ခိုက်မှုအတွင်း ၂ လသား အပါအဝင် အရပ်သား ၄ ဦး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၇ ရက်။ စစ်ကိုင်းတိုင်း၊ ဝက်လက်မြို့နယ် အတွင်း တိုက်ပွဲမရှိဘဲ ဗုံးကြဲတိုက်ခိုက်ခံရပြီး ၂ လသား ကလေးအပါအဝင် ၄ ဦး သေဆုံးခဲ့သည်ဟု ဒေသခံများက ပြောသည်။ ဝက်လက်မြို့နယ်အတွင်းရှိ ကျေးရွာများကို စစ်ကော်မရှင်တပ်က လေကြောင်းမှ အကြောင်းမဲ့ ဗုံးကြဲတိုက်ခိုက်ခဲ့ ရာ နှစ်လသားအရွယ် ကလေးငယ်တစ်ဦးနှင့် သက်ကြီးရွယ်အိုများ အပါအဝင် အရပ်သား ၄ ဦး သေဆုံးသွားခဲ့ ကြောင်း ဒေသခံများက ပြောသည်။ မြေပြင်တွင် ကြုံတွေ့ခဲ့ရသည့် အခြေအနေနှင့်ပတ်သက်၍ ဒေသခံတစ်ဦးက “ဘာတိုက်ပွဲမှ မရှိဘဲ ဒီတိုင်း လာကြဲတာဗျ။ လေယာဉ်သံကြားလို့ ပြေးတုန်းရှိသေးတယ်၊ ဗုံးက ကျလာပြီ။ ရှောင်ချိန်တောင် မရလိုက်ကြ ဘူး။ ၂ လသား ကလေး ဆိုတာ ဘာမှတောင် မသိသေးရှာဘူး၊ အတော်လူစိတ်မရှိကြတာဗျ။ ရွာက စာသင် ကျောင်းရော၊ အိမ်တွေရော အကုန်မီးလောင်ကုန်တာပဲ” ဟု ပြောသည်။ ဇန်နဝါရီလ ၆ ရက်နေ့၊ နံနက်ပိုင်းတွင် မန္တလေး တံတားဦးလေဆိပ်မှ တက်လာသည့် တိုက်လေယာဉ် နှစ်စီးသည် ဝက်လက်မြို့နယ် တောင်ခြမ်းရှိ ပေါက်ကန်ဘူတာကျေးရွာနှင့် ရေသောက်ကန်ကျေးရွာရှိ စာသင်ကျောင်းများကို ပစ်မှတ်ထားကာ ဗုံး ၃ ကြိမ် ကြဲချခဲ့ခြင်းဖြစ်သည်။ အဆိုပါ တိုက်ခိုက်မှုကြောင့် ၂ လသားအရွယ် ကလေးငယ်တစ်ဦးနှင့် အသက် ၆၀ ကျော်၊ ၇၀ ကျော်အရွယ် အဖွားနှစ်ဦးမှာ နေရာ၌ပင် ပွဲချင်းပြီး သေဆုံးခဲ့ပြီး၊ ဦးခေါင်းတွင် ပြင်းထန်ဒဏ်ရာရရှိခဲ့သည့် အသက် ၄၀ အရွယ် အမျိုးသမီးတစ်ဦးမှာလည်း ဆေးကုသမှုခံယူနေစဉ် ညနေပိုင်းတွင် ထပ်မံသေဆုံးသွားခဲ့သည်။ ဗုံးဒဏ်ကြောင့် ကျေးရွာအတွင်းရှိ စာသင်ကျောင်း၊ လူနေအိမ်များနှင့် ကား၊ ဆိုင်ကယ်အချို့လည်း မီးလောင် ပျက်စီးခဲ့ရသည်။ ဝက်လက်မြို့နယ်အတွင်းတွင် စစ်ကော်မရှင်တပ်က လေကြောင်းတိုက်ခိုက်မှုများကို နေ့စဉ်နီးပါး ကျူးလွန်နေပြီး ပြီးခဲ့သည့် ဒီဇင်ဘာလအတွင်း၌ပင် ၁၄ ကြိမ်အထိ ဗုံးကြဲခဲ့ရာ သံဃာတော်များနှင့် ကလေးသူငယ်များအပါအဝင် စုစုပေါင်း ၂၆ ဦး သေဆုံးခဲ့ပြီး ဖြစ်သည်။ Wetlet Informational Network (ဝက်လက် သတင်းကွန်ရက်) မှ တာဝန်ရှိသူတစ်ဦးကလည်း “စစ်တပ်က မြေပြင်မှာ စစ်ကြောင်း ထိုးရုံ တင် မကဘဲ ပြည်သူတွေကို ပစ်မှတ်ထားပြီး လေကြောင်းကနေပါ စနစ်တကျ ကြိုတင်စီစဉ် တိုက်ခိုက်နေတာ ပါ။ တိုက်ပွဲမရှိတဲ့ နေရာတွေကို ဗုံးကြဲတာဟာ စစ်ရာဇဝတ်မှု ကျူးလွန်နေတာဖြစ်လို့ ဒါတွေကို သက်သေ အဖြစ် မှတ်တမ်းတင်ထားပါတယ်” ဟု ပြောသည်။ အမျိုးသားညီညွတ်ရေးအစိုးရ (NUG)၊ လူ့အခွင့်အရေး ဝန်ကြီးဌာန၏ ဇန်နဝါရီ ၄ ရက်နေ့၊ ထုတ်ပြန်ချက်အရ အာဏာသိမ်း ၅ နှစ်အတွင်း စစ်ကောင်မရှင်၏ လေကြောင်းတိုက်ခိုက်မှုဖြစ်စဉ်ပေါင်း ၄၄၉၈ ကြိမ် ရှိခဲ့သည်။ အဆိုပါ စစ်ကော်မရှင်၏ လေကြောင်းတိုက်ခိုက်မှုများကြောင့် သေဆုံးခဲ့ရသည့် အရပ်သားပြည်သူ ၄,၆၈၃ ဦး ရှိပြီး သေဆုံးသူများထဲတွင် အသက် ၁၈ နှစ်အောက် ကလေးသူငယ် ၆၃၇ ဦး ပါဝင်သည်ဟု ထုတ်ပြန်ထားသည်။

ဝက်လက် ဗုံးကြဲတိုက်ခိုက်မှုအတွင်း ၂ လသား အပါအဝင် အရပ်သား ၄ ဦး သေဆုံး

Jan 7

စစ်ကော်မရှင် တိုက်ခိုက်မှုများကြောင့် ကချင်တွင် တစ်နှစ်အတွင်း အရပ်သား ၁၃၀ ကျော် သေဆုံး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၇ ရက်။ ကချင်ပြည်တွင် စစ်ကော်မရှင်တပ်၏ တိုက်ခိုက်မှုများကြောင့် တစ်နှစ်အတွင်း အရပ်သား ၁၃၀ ကျော် သေဆုံးခဲ့ သည်ဟု ကချင် လူ့အခွင့်အရေး အဖွဲ့က ပြောသည်။ ကချင်ပြည်အတွင်း ၂၀၂၅ ခုနှစ် တစ်နှစ်တာကာလအတွင်း စစ်ကော်မရှင်တပ်၏ လေကြောင်းနှင့် လက်နက်ကြီး တိုက်ခိုက်မှုများကြောင့် အပြစ်မဲ့အရပ်သား ၁၃၀ ကျော် သေဆုံးခဲ့ရကြောင်း ကချင် လူ့အခွင့်အရေး စောင့်ကြည့် အဖွဲ့ (KHRW) က ဇန်နဝါရီလ ၇ ရက်နေ့တွင် ထုတ်ပြန်သည့် နှစ်စဉ်အစီရင်ခံစာတွင် ဖော်ပြထားသည်။ KHRW ၏ ထုတ်ပြန်ချက်အရ ပြီးခဲ့သည့်နှစ်အတွင်း စစ်ကော်မရှင်တပ်၏ တိုက်ခိုက်မှုများကြောင့် အရပ်သား ၁၃၃ ဦး သေဆုံးကာ ၁၁၇ ဦး ပြင်းထန်ဒဏ်ရာရရှိခဲ့ကြောင်း သိရသည်။ ထိုသို့ သေဆုံးမှုများထဲတွင် အနည်းဆုံး ၅ ကြိမ်ထက်မနည်းမှာ လူအစုလိုက်အပြုံလိုက် သေဆုံးခဲ့ရသည့် လေကြောင်း ဗုံးကြဲမှုများဖြစ်ပြီး ဗန်းမော်မြို့နယ် အတွင်းရှိ စစ်ဘေးရှောင် စခန်းတစ်ခုကို ဗုံးကြဲတိုက်ခိုက်မှုတွင် ပြည်သူအယောက် ၃၀ ကျော် တစ်ပြိုင်နက် သေဆုံးခဲ့ရသည့် ဖြစ်စဉ်မှာ အဆိုးရွားဆုံးဖြစ်ခဲ့သည်။ ဗန်းမော်ဒေသခံ စစ်ဘေးရှောင် အမျိုးသားတစ်ဦးက “ကျနော်တို့က စစ်ဘေးလွတ်ရာ ထွက်ပြေးနေရတဲ့ သူတွေ ပါ။ ဘာလက်နက်မှလည်း မရှိဘူး၊ ဘာတိုက်ပွဲမှလည်း မရှိဘဲနဲ့ အိပ်နေတဲ့အချိန် ညကြီးမင်းကြီး လာကြဲသွား တာ။ ကလေးတွေရော လူကြီးတွေရော ဟိုတစ်စ ဒီတစ်စနဲ့ ကောက်ခဲ့ရတာပါ။ ဒီအခြေအနေတွေက ဘယ် တော့မှ မမေ့နိုင်တော့မယ့် အဖြစ်အပျက်တွေပါ။ ဗမာစစ်တပ်က တမင်သက်သက် အရပ်သားတွေကို သတ် ဖြတ်နေတာပါ” ဟု ပြောသည်။ KHRW က စစ်ကော်မရှင်တပ်၏ အဆိုပါ လုပ်ရပ်များသည် အရပ်သားများကို ပစ်မှတ်ထားသဖြင့် စစ်ရာဇဝတ်မှု ကို ပြောင်ပြောင်တင်းတင်း ကျူးလွန်နေခြင်းဖြစ်ကြောင်း၊ ကျူးလွန်သူများကို နိုင်ငံတကာတရားရုံးများတွင် အပြစ်ပေး အရေးယူနိုင်ရန် ခိုင်လုံသည့် သက်သေ အထောက်အထားများနှင့်တကွ ဆက်လက် ကြိုးပမ်းသွားမည် ဖြစ်ကြောင်း ဆိုသည်။ ကချင်ဒေသတွင်း အခြေစိုက်သည့် အရပ်ဘက်အဖွဲ့အစည်းတစ်ခုမှ တာဝန်ရှိသူတစ်ဦးကလည်း စစ်ကော်မရှင်၏ လုပ်ရပ်များ အပေါ် ယခုလို မှတ်ချက်ပြုသည်။ “စစ်တပ်က တစ်ဖက်မှာ သူတို့ရဲ့ ရွေးကောက်ပွဲ ယန္တရားကို အသက်သွင်းဖို့ မြို့ပေါ်တွေမှာ ဟန်ပြကြိုးစားနေ ပေမဲ့ တခြားတစ်ဖက်မှာတော့ ပြည်သူတွေကို ဒီလိုပဲ ရက်ရက်စက်စက် သတ်ဖြတ်နေတုန်းပါပဲ။ ဒါဟာ နိုင်ငံ တကာကို လှည့်စားနေတာဖြစ်လို့ ဒီအကြမ်းဖက်မှုတွေကို ကမ္ဘာက နှုတ်ပိတ်မနေဘဲ ချက်ချင်းတားဆီးပေးဖို့ ကျမတို့ တောင်းဆိုချင်ပါတယ်” ဟု ပြောသည်။ လက်ရှိတွင် ကချင်ပြည် အတွင်း စစ်ရေးတင်းမာမှုများ ဆက်ရှိနေဆဲဖြစ်ပြီး ပြည်သူများအနေဖြင့် လုံခြုံရေး အထူးသတိထားရန်နှင့် လေကြောင်းရန် ကာကွယ်ရေးများကို ဂရုပြုကြရန် လူ့အခွင့်အရေးအဖွဲ့များက သတိပေးနှိုးဆော်ထားသည်။ တစ်ဖက်တွင်လည်း စစ်ကော်မရှင်၏ ရွေးကောက်ပွဲ လုပ်ငန်းစဉ်များကို တော်လှန်ရေး အင်အားစုများက နည်း မျိုးစုံဖြင့် တန်ပြန်ဟန့်တားလျက်ရှိရာ ဒေသတွင်း စစ်ရေးနှင့် နိုင်ငံရေး အခြေအနေမှာ ပိုမိုရှုပ်ထွေးလျက်ရှိ ကြောင်း မြေပြင် သတင်းရင်းမြစ်များက ဆိုသည်။

စစ်ကော်မရှင် တိုက်ခိုက်မှုများကြောင့် ကချင်တွင် တစ်နှစ်အတွင်း အရပ်သား ၁၃၀ ကျော် သေဆုံး

« Prev 1 … 107 108 109 110 111 … 1,082 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

စလော့ဂိမ်း သိန်း ၁၅၀ ရှုံးသဖြင့် ယာဉ်မောင်းတစ်ဦး အဆုံးစီရင်
မောင်တောမြို့နယ်အတွင်း ထိုးဖောက်လာသည့် ARSA အဖွဲ့ နှင့် AA တိုက်ပွဲဖြစ်
အီရန် ခေါင်းဆောင်ကြီး အယာတိုလာ ခါမေနီအတွက် ရက်ရှည်ဈာပနအခမ်းအနားများ ပြင်ဆင်
TikTok တိုက်ရိုက်ထုတ်လွှင့်မှုအတွင်း နမ်းခဲ့သည့် အင်ဒိုနီးရှားစုံတွဲတစ်တွဲကို ကြိမ်ဒဏ် ၂၁ ချက်စီ အပြစ်ပေး
တားမြစ်ချက်ကို မလိုက်နာသည့် ရှေးရိုးစွဲ SSPX အဖွဲ့ကို ဗာတီကန် သာသနာ ထုတ်ပယ်

Archives

Archives

×Close