NMG Doh – Page 129 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Aug 26

ရုရှားအတွင်းပိုင်းကို ပစ်ခတ်နိုင်စွမ်းရှိသည့် ဒုံးကျည်များ ယူကရိန်းသို့ ပို့ရန် အမေရိကန် အတည်ပြု သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ လာမည့် ရက်သတ္တပတ်နည်းငယ် အတွင်းတွင် ထောင်နှင့်ချီသော အမေရိကန်လုပ် ဝေဟင်မှ မြေပြင်ပစ် ပဲ့ထိန်း ဒုံးကျည်များကို ယူကရိန်းသို့ ပေးပို့ရန် ဝါရှင်တန်က အတည်ပြုလိုက်သည်။ ERAM ဟု ခေါ်သော ပစ်ခတ်မှု အကွာအဝေး တိုးမြှင့်ထားသည့် တိုက်ခိုက်ရေး ဒုံးကျည် (Extended Range Attack Munitions) များသည် ကုန်ကျစရိတ်သက်သာပြီး တိုက်ခိုက်မှု စွမ်းရည်အသစ်ကို ရစေမည် ဖြစ်သည်။ အဆိုပါ ဒုံးကျည်များသည် ဝေဟင်မှ မြေပြင်ပစ် ဒုံးကျည်များ ဖြစ်ပြီး ယူကရိန်းအနေဖြင့် ရုရှားနိုင်ငံ အတွင်းပိုင်း တွင် ရှိသော ပစ်မှတ်များကို ပစ်ခတ်နိုင်စွမ်းရှိလာတော့မည် ဖြစ်သည်။ ယခု ပေးပို့မည့် ERAM ဒုံးကျည် ၃၃၅၀ သည် ခရုဇ် ဒုံးကျည်စနစ်နှင့် ပေါင် ၅၀၀ ဗုံးများ ပူးတွဲထားခြင်းဖြစ်ပြီး မိုင် ၁၅၀ မှ ၂၈၀ အတွင်း ပစ်မှတ်များကို ပစ်ခတ်နိုင်မည် ဖြစ်သည်။ ရုရှား၏ ကာကွယ်ရေး စနစ်များ၊ အတွင်းဘက်ကျသော စစ်တပ်သုံး ပစ္စည်း သိုလှောင်ရုံများ၊ တံတားများ၊ ကွပ်ကဲရေး စခန်းများနှင့် ရေတပ် အခြေစိုက် စခန်းများကို တိုက်ခိုက်နိုင်စွမ်း ရှိလာမည် ဖြစ်ပြီး တိကျမှုက ၁၀ မီတာ (၃၃ ပေ) လွဲချော်မှု အတွင်းတွင်သာ ရှိသည်ဟု ဆိုသည်။ ယခု ပေးပို့မည့် ERAM ဒုံးကျည်များနှင့် အမည်ဖော်မထားသည့် လက်နက်များ၏ တန်ဖိုးသည် အမေရိကန် ဒေါ်လာ သန်း ၈၅၀ ဖိုးရှိသည်။ ဤငွေကြေးကို ယူကရိန်း၏ ဥရောပ မဟာမိတ်များက ပေးချေပေးမည် ဖြစ်သည်။ သို့သော်လည်း အမေရိကန်က အဆိုပါ လက်နက်များကို ရုရှားနိုင်ငံအတွင်း ပစ်ခတ်ခွင့် ပြုထားမထားမှာ အတည်မပြုနိုင်သေးကြောင်း အမည်မဖော်လိုသည့် အမေရိကန် စစ်အရာရှိက Wall street Journal ကို ပြောသည်။ ယခင်ကလည်း အမေရိကန် က လှူဒါန်းထားသော တာဝေးပစ် စစ်နည်းပညာဒုံးစနစ် ATACMS များကို မူ ရုရှားနိုင်ငံအတွင်းသို့ ပစ်ခတ်ခွင့်ကို ပိတ်ပင်ထားခဲ့သည်။ ATACMS များသည် အမေရိကန်၏ ဂြိုလ်တု အချက်အလက်များကို အသုံးပြုရသဖြင့် အမေရိကန်က ခွင့်မပြု ပါက အသုံးပြုနိုင်ခြင်း မရှိပါ။ သို့သော်လည်း သမ္မတ ဇယ်လန်းစကီးက ယူကရိန်းနိုင်ငံသည် တာဝေးပစ် ဒုံးကျည်များကို ကိုယ်တိုင် ထုတ်လုပ် နိုင်စွမ်းရှိပြီ ဖြစ်ပြီး အမေရိကန်နှင့် ဥရောပ မဟာမိတ်များ၏ ခွင့်ပြုချက် မရှိလည်း ရုရှားနိုင်ငံကို ပစ်ခတ်နိုင် သည်ဟု ပြောသည်။

ရုရှားအတွင်းပိုင်းကို ပစ်ခတ်နိုင်စွမ်းရှိသည့် ဒုံးကျည်များ ယူကရိန်းသို့ ပို့ရန် အမေရိကန် အတည်ပြု

Aug 26

အစ္စရေးက ဂါဇာရှိ ဆေးရုံကို ပစ်ခတ်၊ သတင်းသမား ၅ ဦးအပါအဝင် လူ ၂၀ သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ ဂါဇာကမ်းမြောင်က ဆေးရုံတစ်ခုကို အစ္စရေး တိုက်ခိုက်မှုကြောင့် သေဆုံးခဲ့သူ လူ ၂၀ ထဲတွင် သတင်းသမား ၅ ဦး ပါဝင်ခဲ့သည်။ ပထမတစ်ချက် ပစ်ခတ်မှုသည် ဆရာဝန်များ နေထိုင်ရာ အခန်းများနှင့် ခွဲစိတ်ခန်းများရှိရာ (Nasser) နာ့ဆာ ဆေးရုံ၏ စတုတ္ထထပ်ကို ထိမှန်ခဲ့သည်ဟု ဂါဇာကျန်းမာရေး ဝန်ကြီးဌာန၏ မှတ်တမ်းဌာန တာဝန်ခံက AP သတင်းဌာနကို ပြောသည်။ ဒုတိယ ပစ်ခတ်မှုမှာ ဆေးရုံ၏ပြင်ပ လှေကားကို ထိမှန်ခဲ့ပြီး လူ ၁၇ ဦး သေဆုံးခဲ့သည်။ ထိုအထဲတွင် ကျန်းမာရေးအဖွဲ့ဝင်များ၊ ကယ်ဆယ်ရေး လုပ်သားများနှင့် သတင်းသမားများ ပါဝင်သည်။ တိုက်ခိုက်မှုကို ဩဂုတ်လ ၂၅ ရက်နေ့တွင် လုပ်ဆောင်ခဲ့ခြင်း ဖြစ်သည်။ သတင်းသမားများသည် အင်တာနက် လိုင်းမိရန်နှင့် တိုက်ရိုက်ရုပ်သံ လွှင့်ထုတ်မှုများ အတွက် အပြင် လှေကားကို အသုံးပြုလေ့ရှိကြသည်ဟု ဆိုသည်။ သေဆုံးသွားသော သတင်းသမားများတွင် ရိုက်တာ သတင်းဌာနမှ ကင်မရာသမား ဟူဆမ် အယ်လ် မဆရီ (Hussam al-Masri)၊ အလွတ်တန်း သတင်းထောက် Mariam Dagga (မေရီယမ် ဒက်ဂါ)၊ Al jazeera နှင့် Middle East Eye သတင်းဌာနများ အတွက် အလုပ်လုပ်ပေးနေသော မိုဟာမက် ဆလာမာ (Mohammed Salama)၊ Middle East Eye သတင်းဌာန၏ အလွတ်တန်း သတင်းသမား အဖြစ် အလုပ် လုပ်နေသူ အာမက် အဘူ အာဇစ် (Ahmad Abu Aziz) နှင့် သတင်းဌာန အတည်ပြုချက် မရသေးသည့် မိုအာ့စ် အဘူ တာဟာ (Moas Abu Taha) တို့ ဖြစ်ကြသည်ဟု BBC သတင်းက ဖော်ပြသည်။ နိုင်ငံခြား သတင်းသမား အစည်းအရုံး FPA က အစ္စရေး စစ်တပ်နှင့် ဝန်ကြီးချုပ်ရုံး အနေဖြင့် သတင်းသမားများ အား တိုက်ခိုက်မှုအတွက် ချက်ချင်း ဖြေရှင်းချက် ပေးရန် တောင်းဆိုခဲ့သည်။ အစ္စရေး စစ်တပ်က ကြေညာချက်ထုတ်ပြန်ရာတွင် ထိုနယ်မြေကို တိုက်ခိုက်မှုများ လုပ်ခဲ့ကြောင်း ဝန်ခံထားပြီး မသက်ဆိုင်သူများ ပါဝင်သွားသည့်အတွက် ဝမ်းနည်းကြောင်းနှင့် သတင်းသမားများကို ပစ်မှတ် မထားခဲ့ကြောင်း ဖော်ပြထားသည်။ လွန်ခဲ့သည့် နှစ်ပတ်ကလည်း Al jazeera က သတင်းထောက် ၄ ဦး အပါအဝင် သတင်းသမား ၆ ဦး သေဆုံးခဲ့ သည့် တိုက်ခိုက်မှု ဖြစ်ပွားခဲ့သေးသည်။ ထိုတိုက်ခိုက်မှုမှာလည်း အခြား ဆေးရုံတစ်ခုအနီးတွင် တိုက်ခိုက်ခဲ့ခြင်း ဖြစ်သည်။ ဂါဇာ စစ်ပွဲသည် သတင်းသမား သေဆုံးမှု အများဆုံး ဖြစ်ပွားသည့် စစ်ပွဲလည်း ဖြစ်သည်။ သတင်းသမားများ ကာကွယ်ရေး ကော်မတီ (Committee to Protect Journalists - CPJ) ၏ ထုတ်ပြန်ချက် အရ ယခု စစ်ပွဲအတွင်း သေဆုံးသွားသည့် သတင်းသမား ၁၉၂ ဦး ရှိပြီ ဖြစ်သည်။

အစ္စရေးက ဂါဇာရှိ ဆေးရုံကို ပစ်ခတ်၊ သတင်းသမား ၅ ဦးအပါအဝင် လူ ၂၀ သေဆုံး

Aug 26

ဒရုန်းဗုံးသီး ကျကွဲမှုကြောင့် စစ်ကော်မရှင် တပ်သားများနှင့် လှေလုပ်သား ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ ပုလောမြို့ရှိ ဆိပ်ကမ်းတွင် ဒရုန်းဗုံးသီး လွတ်ကျ၍ စစ်ကော်မရှင် တပ်သားအချို့နှင့် လှေလုပ်သား ၃ ဦး သေဆုံးခဲ့သည်။ တနင်္သာရီတိုင်း၊ မြိတ်ခရိုင်၊ ပုလောမြို့ရှိ ဆိပ်ကမ်းတွင် ငါးဖမ်းစက်လှေပေါ်၌ ပေါက်ကွဲမှုဖြစ်ပွားခဲ့ပြီး စစ်ကော်မရှင် တပ်ဖွဲ့ဝင် အချို့ နှင့်လှေပိုင်ရှင် အပါအဝင် လှေလုပ်သား သုံးဦးတို့ သေဆုံးသွားခဲ့သည်ဟု မြို့ခံများက ပြောသည်။ အမှတ် ၂ ရပ်ကွက်နေထိုင်သူ အသက် ၄၀ ခန့်အရွယ် အမျိုးသားတစ်ဦးက “ဂျိမ်းဆိုပြီး ပေါက်ကွဲသံက အတော် လေး ကျယ်တယ်၊ လှေပါ မြှုပ်သွားတာ။ အလောင်းတွေကို ပြန်ရှာနေတုန်းပါပဲ၊ အကုန်လုံး ရှာတာ မတွေ့ကြ သေးဘူး၊ လှေထဲမှာ ပါလာတဲ့ စစ်သားတွေလည်း သေကုန်တာ အများကြီးပဲလို့ သိရတယ်” ဟု ပြောသည်။ ဩဂုတ်လ ၂၃ ရက်နေ့ ည ၁၀ နာရီခွဲခန့်က ပေါက်ကွဲမှု ဖြစ်ပွားခဲ့ခြင်းဖြစ်သည်။ မြိတ်မြို့မှ ငါးဖမ်းစက်လှေဖြင့် သယ်ဆောင်လာသော လက်နက်ခဲယမ်းများကို အမှတ် ၂၈၅ ခြေလျင်တပ်ရင်းသို့ ပို့ဆောင်ရန် ပုလောဆိပ်ကမ်း တံတားတွင် ကမ်းပေါ်သို့တင်ချိန် ဒရုန်းဗုံးသီး မတော်တဆ လွတ်ကျ၍ ပေါက်ကွဲမှု ဖြစ်ပွားခဲ့ခြင်း ဖြစ်သည်။ ပေါက်ကွဲမှုကြောင့် ပုလောမြို့နယ်ခံ လှေပိုင်ရှင် တစ်ဦးနှင့် လှေလုပ်သားနှစ်ဦးမှာ နေရာတွင်ပင် သေဆုံးသွားခဲ့ ပြီး စစ်ကော်မရှင် အရာရှိတစ်ဦးနှင့် အခြားအဆင့် နှစ်ဦး စုစုပေါင်း ရုပ်အလောင်း သုံးလောင်းကို ရရှိထားသည် ဟု မြို့ခံတစ်ဦးက ဆိုသည်။ အခြား စစ်ကော်မရှင် တပ်သားများ၏ အလောင်းများကို ရှာမ‌တွေ့သေးသည့် အပြင် ဆိပ်ကမ်းတွင် လုံခြုံရေး တာဝန်ယူထားသည့် တပ်ဖွဲ့အချို့လည်း ထိခိုက်မှုရှိခဲ့ကြောင်း မြို့ခံအချို့က ပြောသည်။ ထို့အပြင် နစ်မြုပ်သွားသည့် စက်လှေနှင့်အတူ စစ်ကော်မရှင် တပ်ဖွဲ့ဝင် အလောင်းများ၊ လက်နက်ခဲယမ်းများ ကို ရေငုပ်၍ ပြန်လည် ဆယ်ယူရှာဖွေနေကြသည်ဟု ဆိုသည်။ စစ်ကော်မရှင် တပ်ဖွဲ့က မြိတ်မြို့မှ ပုလောမြို့သို့ လက်နက်ခဲယမ်းများကို ငါးဖမ်းစက်လှေနှင့် ကင်းမွန်မီးထွန်း လှေများကို အသုံးပြု၍ ပို့ဆောင်နေခြင်းဖြစ်ကြောင်း ပုလောဒေသခံအချို့က ပြောသည်။ စစ်ကော်မရှင်တပ်ဖွဲ့နှင့် ပြည်သူ့ကာကွယ်ရေး ပူပေါင်းတပ်ဖွဲ့တို့ ဇူလိုင်လ ၂၄ ရက်နေ့မှ စတင်၍ ရက်ရှည် တိုက်ပွဲများ ပြင်းထန်လျက် ရှိနေသဖြင့် မြိတ် - ရန်ကုန်သွား ကားလမ်းမကြီးကို ပိတ်ထားရသည်ဟု ခရီးသည် တင် ယာဥ်မောင်းများက ပြောသည်။

ဒရုန်းဗုံးသီး ကျကွဲမှုကြောင့် စစ်ကော်မရှင် တပ်သားများနှင့် လှေလုပ်သား ၃ ဦး သေဆုံး

Aug 26

စစ်ကော်မရှင် တပ်နှင့် ဆက်စပ်သည်ဆိုသော ဆီအုန်းခြံမှ ဝန်ထမ်းခြောက်ဦး ဖမ်းဆီးခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ စစ်ကော်မရှင်တပ်နှင့် ဆက်စပ်မှု ရှိနေသည်ဟု ဆိုကာ ဦးပိုင်ကုမ္ပဏီပိုင် ဆီအုန်းခြံမှ ဝန်ထမ်း ခြောက်ဦးနှင့် မိသားစုဝင်တစ်ဦးတို့ ဖမ်းဆီးခံလိုက်ရသည်။ ထားဝယ်ခရိုင်၊ ရေဖြူမြို့နယ်၊ ကံပေါက်ကျေးရွာအုပ်စု ဂန့်ဂေါ်တောင်ကျေးရွာတွင် ရှိသည့် ဦးပိုင်ကုမ္ပဏီပိုင် ဆီအုန်းခြံမှ ဝန်ထမ်း ခြောက်ဦးနှင့် မိသားစုဝင်တစ်ဦးကို ပြည်သူ့ကာကွယ်ရေး ပူးပေါင်းတပ်က ဖမ်းဆီး ခေါ်ဆောင် သွားသည်ဟု ရွာသားများက ပြောသည်။ ပြည်သူ့ကာကွယ်ရေး ပူးပေါင်းတပ်ဖွဲ့၏ ပြန်ကြားရေး တာဝန်ရှိသူက “ဖမ်းဆီးထားတဲ့ ဝန်ထမ်းတွေက စစ်ကော် မရှင် တပ်ဖွဲ့နဲ့ ဆက်စပ်နေတာမျိုး ရှိတယ်လို့ ဆိုတာကြောင့် မေးမြန်းစစ်ဆေးနေတာပါ။ ပြီးရင်တော့ ပြန်လွှတ် ပေးသွားမှာပါ။ မဆိုင်တဲ့ ရွာသားတွေကိုတော့ ပြန်လွှတ်ပေးလိုက်ပြီးပါပြီ” ဟု ပြောသည်။ သြဂုတ်လ၂၃ ရက်နေ့ နံနက်ပိုင်းက ဂန့်ဂေါ်တောင်ကျေးရွာရှိ ဆီအုန်းခြံနှင့် ဘူတာရုံအနီးမှ နာရေး အိမ်တစ်အိမ် တွင် အခြားရွာသား အယောက် ၂၀ ကျော်နှင့်အတူ ဖမ်းဆီးခံရခြင်း ဖြစ်သည်။ ထိုနေ့ ညပိုင်းတွင်ပင် ရွာသား ၂၀ကျော်ကို ပြန်လွှတ်ခဲ့သော်လည်း ဆီအုန်းခြံ ဝန်ထမ်း ခြောက်ဦးနှင့် မိသားစုဝင် တစ်ဦးတို့ကိုမူ ပြည်သူ့ ကာကွယ်ရေး ပူးပေါင်းတပ်ဖွဲ့က ထိန်းသိမ်း စစ်ဆေးနေသည်ဟု ဂန့်ဂေါ်တောင် ရွာသားတစ်ဦးက ဆိုသည်။ ဆီအုန်းခြံသည် ကလိန်အောင် - ကံပေါက် လမ်းပိုင်းတွင် တည်ရှိကာ ဆီအုန်းခြံအပြင် ဆီအုန်းကြမ်း စက်ရုံ လည်းရှိပြီး ဝန်ထမ်းအများစုသည် စစ်ကော်မရှင်တပ်၏ စစ်မှုထမ်းဟောင်းများ ဖြစ်ကြသည်။ ဆီအုန်းခြံဝန်ထမ်းများ ဖမ်းဆီးခံရပြီးသည့်နောက် စစ်ကော်မရှင်တပ်ဖွဲ့မှ ကံပေါက် - ကလိန်အောင် လမ်းပိုင်း တွင် စစ်ကြောင်းထိုးကာ တောနင်းရှာဖွေနေသည်ဟု ရွာသား အချို့က ဆိုသည်။ ကလိန်အောင် - ကံပေါက် လမ်းပိုင်းတွင် စစ်ရေးလှုပ်ရှားမှု လုပ်နေစဥ် ရွာသားများ ကြားညှပ်နိုင်သဖြင့် ဆီ အုန်းဝန်ထမ်းများကို ခေတ္တခေါ်ယူကာ ထိန်းသိမ်းခဲ့ခြင်းသာ ဖြစ်သည်ဟု ပြည်သူ့ကာကွယ်ရေး ပူးပေါင်းတပ်ဖွဲ့၏ ပြန်ကြားရေး တာဝန်ရှိသူက ပြောသည်။ စစ်ကြောင်းထိုးနေသည့် အခြေအနေကြောင့် ကံပေါက် ဆီအုန်းခြံနှင့် ဘူတာရုံအနီး နေထိုင်သည့် ရွာသားများ နေအိမ်တွင် မနေရဲဘဲ ယာယီပြောင်းရွှေ့နေထိုင် နေကြရသည်ဟု ဆိုသည်။ ကံပေါက် ဆီအုန်းခြံအနီးရှိ ဖားချောင်းကျေးရွာအုပ်စုထဲမှ ရွာသားများမှာလည်း စစ်ကော်မရှင်တပ်မှ စစ် ကြောင်း ထိုးလာမည်ကို စိုးရိမ်၍ ဘေးလွှတ်ရာသို့ တိမ်းရှောင်နေကြကြောင်း ရွာသားများက ဆိုသည်။

စစ်ကော်မရှင် တပ်နှင့် ဆက်စပ်သည်ဆိုသော ဆီအုန်းခြံမှ ဝန်ထမ်းခြောက်ဦး ဖမ်းဆီးခံရ

Aug 26

စစ်ကော်မရှင် အုပ်ချုပ်ရေး အဖွဲ့ဝင်များအား လက်နက်ကိုင် အဖွဲ့က ဖမ်းဆီးခေါ်ဆောင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ မြိတ်ခရိုင် မြိတ်မြို့ နယ် မဇောကျေးရွာအုပ်စုရှိ စစ်ကော်မရှင်ခန့် အုပ်ချုပ်ရေးအဖွဲ့ဝင် ၃ ဦးကို လက်နက်ကိုင် အဖွဲ့တစ်ဖွဲ့က လာရောက် ဖမ်းဆီးသွားသည်ဟု ရွာသားများက ပြောသည်။ ဖမ်းဆီးခံရသူ သုံးဦးသည် စစ်ကော်မရှင်တပ်၏ စစ်မှုထမ်းအတွက်ဟု ဆိုကာ ငွေကြေး အဓမ္မကောက်ခံနေသူ များဖြစ်သည်ဟု ဆိုသည်။ အသက် ၄၀ ခန့်အရွယ် ကြေးနန်းတိုင် ရွာသားတစ်ဦးက “အဖမ်းခံရတဲ့ လက်မဲကျေးရွာမှ ဦးထွန်းသန်းက ကြေးနန်းတိုင် တံတား စစ်ဆေးရေးဂိတ်မှာ အမြဲတမ်းလိုလို ရှိနေတယ်။ နောက်ပြီးတော့ သကန်တောင်ပုက ဦးလူပိန်က စစ်တပ်နဲ့ အတူသွားလာတတ်ပြီး ရဲဝတ်စုံကိုလည်း ဝတ်ဆင်လေ့ရှိတယ်” ဟု ပြောသည်။ မဇောကျေးရွာအုပ်စု လက်မဲကျေးရွာ အုပ်ချုပ်ရေးအဖွဲ့ဝင် မြေယာကော်မတီဝင် ဦးထွန်းသန်း ကို နေအိမ်တွင် လက်နက်ကိုင်ဆောင်ထားသည့် အဖွဲ့တစ်ဖွဲ့က ဩဂုတ်လ ၂၂ ရက်နေ့ ည ၉ နာရီခန့်က လာရောက် ဖမ်းဆီးသွား ခြင်း ဖြစ်သည်။ ထို့အပြင် ဩဂုတ်လ၂၃ ရက်နေ့ နံနက် ၃ နာရီခန့်တွင် မဇောကျေးရွာအုပ်စုအတွင်း သကန်တောင်ပုကျေးရွာမှ အ သက် ၅၀ ခန့်အရွယ်ရှိ ရာအိမ်မှူး ဦးသန်းဝင်းနှင့် ဦးလူပိန် ဆိုသူတို့ ၂ ဦးကိုလည်း နေအိမ်များတွင် ထပ်မံ၍ ဝင်ရောက် ဖမ်းဆီးသွားသေးသည်ဟု ရွာသားတစ်ဦးက ဆိုသည်။ အလားတူ မဇောကျေးရွာအုပ်စု တောတန်းကျေးရွာအုပ်ချုပ်ရေးမှူး ဦးအေးသန်း ဆိုသူကိုပါ ဝင်ရောက် ဖမ်းဆီး ခဲ့သော်လည်း နေအိမ်တွင် မရှိသဖြင့် လွတ်မြောက်သွားသည်ဟု ရွာသားအချို့က ပြောသည်။ ဦးသန်းထွန်းနှင့် ဦးလူပိန်တို့က စစ်မှုထမ်းအတွက် စာရင်းပြုစုပေးရာတွင်လည်း အဓိက ပါဝင်သူများ ဖြစ်ကြပြီး စစ်ကော်မရှင် တပ်ဖွဲ့နှင့်ပူးပေါင်း၍ စစ်မှုထမ်းမဲပေါက်သည်ဟု ဆိုကာ ကျေးရွာများ၌ ငွေကောက်ခံရာများတွင် လည်း ပါဝင်ခဲ့သည်ဟု ဆိုသည်။ ဖမ်းဆီးခံထားရသူများနှင့် အဆက်အသွယ် မရရှိသေးသည့်အပြင် လက်ရှိအချိန်ထိ မည်သည့် လက်နက်ကိုင် အဖွဲ့အစည်းက ဖမ်းဆီးသွားသည်ကို မသိရသေးကြောင်း ရွာသားများက ပြောသည်။

စစ်ကော်မရှင် အုပ်ချုပ်ရေး အဖွဲ့ဝင်များအား လက်နက်ကိုင် အဖွဲ့က ဖမ်းဆီးခေါ်ဆောင်

Aug 26

ညောင်ဦး ဗုံးကြဲမှု ကလေးအပါအဝင် အရပ်သား ၂ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ တိုက်ပွဲမဖြစ်ဘဲ ညောင်ဦးတွင် လေယာဥ် ၃ စီးဖြင့် ဗုံးကြဲတိုက်ခိုက်ခဲ့ရာ ကလေးအပါအဝင် အရပ်သား နှစ်ဦး ထိမှန်သေဆုံးခဲ့သည်။ ညောင်ဦးမြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကော်မရှင် လက်အောက်ခံ လေတပ်မှ လေယာဉ် ၃ စီးနှင့် လာရောက်ပြီး ကျေးရွာအတွင်း ဗုံးကြဲသွားခြင်းဖြစ်သည်ဟု ဒေသခံများက ပြောသည်။ လေကြောင်းမှ ဗုံးကြဲတိုက်ခိုက်ခံရမှုထဲတွင် ကလေးငယ် ၁ ဦး အပါအဝင် အရပ်သား ၂ ဦးသေဆုံးပြီး ၃ ဦး ဒဏ်ရာရခဲ့သည်ဟု Black Eagle PDF-Bagan အဖွဲ့က ပြောသည်။ အသက် ၅၀ ကျော် ကျောက်ပြင်ကန်ရွာသား တစ်ဦးက “မထင်ထားဘူးလေ တိုက်ပွဲက ဖြစ်တာ မဟုတ်ဘူး။ ရှေ့နောက် ၃ စီးလာတာ အလယ်က လေယာဉ်က ဗုံးချသွာတာ နိမ့်နိမ့်လေး မဟုတ်ဘူး။ အမြင့်ကြီးကနေချတာ အဲဒီကျမှပဲ ပြေးကြရတာပေါ့။ ဒါမျိုး ဒီတစ်ခါပဲကြုံဖူးတာလေ” ဟု ပြောသည်။ မန္တလေးတိုင်း၊ ညောင်ဦးမြို့နယ်ထဲက ကျောက်ပြင်ကန်ကျေးရွာကို ဩဂုတ်လ ၂၃ ရက်နေ့၊ မွန်းလွဲ ၃ နာရီ ၄၅ မိနစ်အချိန်ခန့်က အရှေ့ဘက်မှ ပျံသန်းလာသည့် လေယာဉ် ၃ စီးမှ ဗုံး ၂ လုံး ကြဲချသွားခြင်း ဖြစ်သည်ဟု ကျောက်ပြင်ကန်ကျေးရွာ‌ ဒေသခံအချို့က ပြောသည်။ ဗုံး ၂ လုံးမှာ ရွာတောင်ဘက် ဘုရားကုန်းတွင် ကျရောက်ပေါက်ကွဲခဲ့ခြင်း ဖြစ်ပြီး ရွာသားတစ်ဦး နှင့် အသက် ၈ နှစ်ခန့် အရွယ် ၃ တန်းကျောင်းသား တစ်ဦး သေဆုံးခဲ့ကာ ရွာသားသုံးဦး ဒဏ်ရာရရှိခဲ့သည်ဟု ဒေသခံများက ပြောသည်။ အခြားရွာသားတစ်ဦး “ပေါက်ကွဲအားက တော်တော်ကို ပြင်းတာ။ ရွာအနောက်တောင်ဘက် အထိ ဗုံးအစတွေ ရောက်တယ်။ ဘုရားတန်ဆောင်းတော့ အုတ်နံရံ‌တွေ ပြိုကျတာ ပေါ့” ဟု ဆိုသည်။ ထိမှန်ဒဏ်ရာ ရရှိထားသူများမှာ ဆေးကုသမှု ခံယူနေရသည့်အပြင် စစ်တပ်၏ ဗုံးကြဲတိုက်ခိုက်မှုထဲ ဘုရားနှင့် ဘုရားတစောင်းနေရာ၊ အနီးဝန်းကျင်က နေအိမ် ၅ လုံး ထိမှန်ပျက်စီးသွားသည်ဟု ရွာသားများက ပြောသည်။ လာရောက် ဗုံးကြဲသည့် လေယာဉ် ၃ စီးသည် အရှေ့အရပ်မှ ပျံသန်းလာခြင်း ဖြစ်ပြီး ဗုံးကြဲပြီးနောက် အရှေ့ တောင် အရပ် မိတ္ထိလာ လေတပ်ဘက်သို့ ပျံသန်းသွားသည်ဟု မျက်မြင်တွေ့ရှိသူများက ပြောသည်။ ဒေသခံများမှာ နီးစပ်ရာကျေးရွာများသို့ ထွက်ပြေးတိမ်းရှောင်နေကြရပြီး ရွာသားအချို့သာ နွားစာ‌ကြွေးရန် အိမ်စောင့်ရန် ပြန်လာကြသည်ဟု ဆိုသည်။ ဩဂုတ်လ ၁ ရက်နေ့ကလည်း ကြအိုကျေးရွာနှင့် ကျောက်ပြင်ကန်ကျေးရွာ အကြားရှိ ဒေသအခေါ် ကိုသိန်းဇံ ကုန်းတောင်ဘက်ရှိ အုတ်ကျင်းအနီးတွင် စစ်ကြောင်းထိုးလာသည့် အင်အား ၁၀၀ ကျော်ခန့်ရှိသော စစ်တပ် စစ်ကြောင်းကို တော်လှန်ရေး တပ်ဖွဲ့ဝင်များက ကြားဖြတ် တိုက်ခိုက်ခဲ့ကြသည်။ ဇူလိုင်လ ၆ ရက်နေ့မှ ၁၂ ရက်နေ့အတွင်းကလည်း ပုဂံ-ညောင်ဦး အရှေ့တောင်ဘက်ရှိ ကျေးရွာများကို စစ်ကော်မရှင် တပ်ဖွဲ့ဝင်များက တစ်ပတ်ခန့် ရက်ဆက် စစ်ကြောင်းထိုးလာခဲ့ပြီး တိုက်ပွဲဖြစ်ပွားခြင်းမရှိဘဲ ပွဲတိုင်း၊ ချောင်းရှည်၊ အနောက်အုံ၊ ဇီးစမြင်၊‌ ကျောက်ပြင်ကန်၊ မြောင်၊ မီးလောင်ဖျား‌တောင်နှင့် မီး‌လောင်ဖျားမြောက်ကျေးရွာ တို့ကို မီးရှို့ဖျက်ဆီးခဲ့သေးသည်။

ညောင်ဦး ဗုံးကြဲမှု ကလေးအပါအဝင် အရပ်သား ၂ ဦး သေဆုံး

Aug 25

ထိုင်းနိုင်ငံက ကျောင်းသား ဗီဇာ ၁၀,၀၀၀ နီးပါး ပယ်ဖျက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၅ ရက်။ ထိုင်းနိုင်ငံသည် သတ်မှတ်ချက်နှင့် မကိုက်ညီသော ကျောင်းသား ဗီဇာဟု ခေါ်ဆိုကြသော ပညာရေး ဗီဇာ ၁၀,၀၀၀ နီးပါးကို ရုတ်သိမ်းခဲ့သည်ဟု ဆိုသည်။ အဆင့်မြင့်ပညာရေး၊ သိပ္ပံ၊ သုတေသနနဲ့ တီထွင်မှု ဝန်ကြီးဌာန က ဒီဂရီ သင်တန်းမဟုတ်သော ရက်တို ပညာရေး အစီအစဉ်များတွင် စာရင်းသွင်းထားသော ကျောင်းသားများအတွင်းမှ မေလ ၁၄ ရက်နေ့က ထုတ်ပြန်ခဲ့သည့် လုပ်ထုံးလုပ်နည်းများနှင့် မကိုက်ညီသူများ၏ ဗီဇာများကို ပယ်ဖျက်ရန် လူဝင်မှု ကြီးကြပ်ရေး ရဲကို အမိန့်ပေးခဲ့ခြင်း ဖြစ်သည်။ ဝန်ကြီးဌာနအနေနဲ့ လူဝင်မှု ကြီးကြပ်ရေး အာဏာပိုင်တွေနဲ့ ပူးပေါင်းဆောင်ရွက်ပြီး ရက်တို ပညာရေး အစီအစဉ်များကို စောင့်ကြည့်နိုင်မည့် ပြည့်စုံသည့် ဒေတာဘေ့စ် စနစ်တစ်ခုကို အသစ် တည်ဆောက်ထားသည်ဟု အဆင့်မြင့်ပညာရေး ဝန်ကြီးက ပြောသည်။ လုပ်ထုံးလုပ်နည်း အသစ်တွင် ရက်တို ပညာရေး အစီအစဉ်များ လုပ်ဆောင်နေသည့် ပညာရေး အဖွဲ့အစည်းများသည် ကျောင်းသားများ၏ ကျောင်းခေါ်ချိန်ကို စီစစ်နိုင်မည့် အချက်အလက်များ အပါအဝင် လစဉ်အစီရင်ခံစာများကို ပေးပို့ရမည် ဖြစ်သည်။ အဓိကအားဖြင့် ကျောင်းသား ဗီဇာ ရယူပြီး အခြား လုပ်ငန်းများ လုပ်ဆောင်နေခြင်းကို တိုက်ဖျက်ရန် ဖြစ်သည်ဟု ဝန်ကြီးဌာနက ပြောသည်။

ထိုင်းနိုင်ငံက ကျောင်းသား ဗီဇာ ၁၀,၀၀၀ နီးပါး ပယ်ဖျက်

Aug 25

အမေရိကန်သို့ ပေးပို့သည့် စာတိုက်ဝန်ဆောင်မှုများ ရပ်ဆိုင်းမည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၅ ရက်။ ကုန်သွယ်ခွန်ကိစ္စ ရှင်းလင်းမှု မရှိသောကြောင့် ကမ္ဘာအနှံ့မှ စာတိုက်ဝန်ဆောင်မှုများက အမေရိကန်ကို စာနဲ့ ပါဆယ်ပစ္စည်းပေးပို့မှုများ ရပ်ဆိုင်းထားမည် ဟု ဆိုသည်။ ယခု ဩဂုတ်လကုန်မှ စပြီး အမေရိကန်နိုင်ငံသို့ ပေးပို့သည့် ပါဆယ်များကို သွင်းကုန်ခွန်ပေးဆောင်ရတော့မည် ဖြစ်သည်။ အမေရိကန် သမ္မတ ဒေါ်နယ်ထရန့်က ကမ္ဘာတဝှမ်း အခွန်ကင်းလွတ်ခွင့် ချွင်းချက်များကို အဆုံးသတ်စေသည့် စီမံခန့်ခွဲမှု အမိန့်ကို ဇူလိုင်လက လက်မှတ်ရေးထိုးခဲ့ပြီး ယခုလ ၂၉ ရက်နေ့တွင် စတင် အသက်ဝင်မည် ဖြစ်သည်။ ဒေါ်လာ ၁၀၀ အောက် တန်ဖိုးရှိသည့် လက်ဆောင်ပစ္စည်းများအတွက် အခွန်ကင်းလွတ်ခွင့် ဆက်ရှိနေမည် ဖြစ်သော်လည်း ယင်းထက် တန်ဖိုးရှိသော ပစ္စည်းများကို တခြား သွင်းကုန်ပစ္စည်းများ နည်းတူ မူရင်း နိုင်ငံကို လိုက်ပြီး အခွန်ကောက်ခံ သွားမည် ဖြစ်သည်။ အင်္ဂလန်အခြေစိုက် Royal Mail နဲ့ ဂျာမဏီအခြေစိုက် DHL စတဲ့ စာပို့ ဝန်ဆောင်မှုများက ၎င်းတို့အနေနှင့် စည်းကမ်း အသစ်များနှင့် အလုပ်လုပ်ကိုင်နိုင်သည့် ခိုင်မာသော စနစ်တစ်ခု ပေါ်လာသည် အထိ အမေရိကန်သို့ ပစ္စည်း ပေးပို့မှု ရပ်ဆိုင်းထားမည်ဟု ဆိုသည်။ သမ္မတ ထရန့်အစိုးရ အဖွဲ့က ကုန်ပစ္စည်းများကို သင်္ဘောနဲ့ တရားဝင် မပို့ပဲ စာတိုက်မှ ပို့ဆောင်ကာ အခွန်ရှောင်ခြင်း၊ တရားမဝင် ပစ္စည်း ပို့ဆောင်ခြင်းတို့ကို ဖယ်ရှားရန် စာတိုက်မှ လာသော ပစ္စည်းများအပေါ် အခွန်ကောက်ခံခြင်း ဖြစ်သည်ဟု ဆိုသည်။ ဥရောပ စာပို့စနစ်များဖြစ်သော Royal Mail နဲ့ DHL တို့က ဩဂုတ်လ ၂၉ ရက် စနေနေ့မှ စ၍ အမေရိကန်သို့ ပစ္စည်းပေးပို့ခြင်းကို ရပ်ဆိုင်းထားမည်ဟု ဆိုသည်။ Online ဈေးရောင်းသည့် ကုမ္ပဏီဖြစ်သော Etsy ကတော့ Australia Post, Canada Post, Royal Mail နဲ့ Evri တို့မှ တဆင့် အမေရိကန် ကိုပို့ဆောင်မည့် ပစ္စည်းအမှာများကို ဩဂုတ်လ ၂၅ ရက်က စပြီး ရပ်တန့်သွားမည်ဟု ဆိုသည်။

အမေရိကန်သို့ ပေးပို့သည့် စာတိုက်ဝန်ဆောင်မှုများ ရပ်ဆိုင်းမည်

Aug 25

Kajiki မုန်တိုင်း အင်္ဂါနေ့ညနေပိုင်းတွင် ထိုင်းနိုင်ငံသို့ ဝင်ရောက်နိုင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၅ ရက်။ ဗီယက်နမ်နှင့် လာအို နိုင်ငံများကို ဖြတ်လာမည့် Kajiki မုန်တိုင်းသည် အားပျော့လာပြီး ဩဂုတ်လ ၂၆ ရက် ညနေပိုင်းတွင် လေဖိအားနည်း ရပ်ဝန်း အဖြစ် ထိုင်းနိုင်ငံသို့ ဝင်ရောက်လာနိုင်သည်ဟု ထိုင်းမိုးလေဝသဌာနက ထုတ်ပြန်ထားပါသည်။ မုန်တိုင်းအားပျော့သွားမည်ဖြစ်သော်လည်း ထိုင်းနိုင်ငံအနှံ့ မိုးသီးထန်စွာ ရွာသွန်းမှုများ ရှိနိုင်သည်ဟု မိုးလေဝသ ဌာနကို ကိုးကား၍ ဘန်ကောက်ပို့စ် (Bangkok Post) သတင်းဌာနက သတင်းဖော်ပြသည်။ မုန်တိုင်း နောက်ဆက်တွဲများ အဖြစ် ထိုင်းနိုင်ငံ အရှေ့မြောက်ပိုင်းတွင် တနင်္လာနေ့နှင့် အင်္ဂါနေ့တွင် လည်းကောင်း ထိုင်းနိုင်ငံ မြောက်ပိုင်းတွင် တနင်္လာနေ့မှ ဗုဒ္ဓဟူးနေ့အထိလည်းကောင်း မိုးသည်းထန်ပြီး လေပြင်းများ ကျရောက်နိုင်သည်ဟု ထိုင်းမိုးလေဝသ ဌာနက ဆိုသည်။ အများဆုံး သက်ရောက်မှု ရှိနိုင်သည့် ခရိုင်များမှာ Bung Kan, Chiang Mai, Chiang Rai, Lampang, Lamphun, Loei, Mae Hong Son, Nakhon Phanom, Nan, Nong Bua Lam Phu, Nong Khai, Phayao, Phrae, Sakon Nakhon, Udon Thani and Uttaradit တို့ ဖြစ်ကြောင်း မိုးလေဝသဌာန အထွေထွေ ဒါရိုက်တာ Ms. Sukanyanee Yawinchan က ပြောသည်။ မိုးသည်းထန်စွာ ရွာသွန်းမည့် နေရာများတွင် ထိုင်းနိုင်ငံ အရှေ့ပိုင်း ခရိုင်များနှင့် ထိုင်းတောင်ပိုင်းဒေသ၏ အနောက်ခြမ်းများသည် ပါဝင်နိုင်သည်ဟု ဆိုသည်။ Photo: Meteorological Department

Kajiki မုန်တိုင်း အင်္ဂါနေ့ညနေပိုင်းတွင် ထိုင်းနိုင်ငံသို့ ဝင်ရောက်နိုင်

« Prev 1 … 127 128 129 130 131 … 1,048 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

တရုတ်ခရီးသွား လျော့နည်းသော်လည်း ဂျပန်ခရီးသွားလုပ်ငန်း စံချိန်တင်တိုးတက်
မော်စကိုနှင့် ရုရှားအနှံ့ ယူကရိန်းက ဒရုန်းစစ်ဆင်ရေး ဆင်နွှဲ
အီရန်က UAE နျူကလီးယားစက်ရုံကို ဒရုန်းဖြင့် တိုက်ခိုက်
ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်

Archives

Archives

×Close