NMG Doh – Page 131 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Jan 28

ဗြိတိန်ဝန်ကြီးချုပ် တရုတ်သမ္မတနှင့် တွေ့ဆုံရန် ထွက်ခွာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၈ ရက်။ ဗြိတိန်ဝန်ကြီးချုပ် ကီယာ စတာမာ (Keir Starmer) သည် ဗြိတိန်ထိပ်သီး စီးပွားရေးလုပ်ငန်းရှင်များ နှင့်အတူ တရုတ်နိုင်ငံ၊ ပေကျင်းမြို့သို့ ခရီးလှည့်လည်ရန် ထွက်ခွာသွားပြီ ဖြစ်သည်။ ဤခရီးစဉ်သည် ၂၀၁၈ ခုနှစ်နောက်ပိုင်း ဗြိတိန်ဝန်ကြီးချုပ်တစ်ဦးအနေဖြင့် တရုတ်နိုင်ငံသို့ ပထမဆုံးအကြိမ် သွားရောက်သည့် ခရီးစဉ်ဖြစ်ပြီး၊ ဝန်ကြီးချုပ်သည် ဇန်နဝါရီလ (၂၉) ရက်၊ ကြာသပတေးနေ့တွင် တရုတ်သမ္မတ ရှီကျင့်ဖျင်နှင့် တွေ့ဆုံဆွေးနွေးသွားရန် ရှိသည်။ အဆိုပါ ခရီးစဉ်တွင် HSBC ဘဏ်၊ GSK ဆေးဝါးကုမ္ပဏီနှင့် Jaguar Land Rover ကဲ့သို့သော ဗြိတိန်နိုင်ငံ၏ ထိပ်တန်းစီးပွားရေးနှင့် ယဉ်ကျေးမှုဆိုင်ရာ ခေါင်းဆောင် ၆၀ ခန့် လိုက်ပါသွားကြသည်။ ဝန်ကြီးချုပ် စတာမာက ဗြိတိန်၏ တရုတ်နိုင်ငံအပေါ် ထားရှိသည့် သဘောထားမှာ ယခင်က မရေမရာ ဖြစ်ခဲ့သော်လည်း၊ လက်တွေ့တွင် နှစ်သက်သည်ဖြစ်စေ၊ မနှစ်သက်သည်ဖြစ်စေ တရုတ်နိုင်ငံသည် ဗြိတိန်အတွက် အရေးပါသော နိုင်ငံဖြစ်ကြောင်း ပြောကြားခဲ့သည်။ ထို့ပြင် တရုတ်နိုင်ငံနှင့် မဟာဗျူဟာမြောက် တည်ငြိမ်သော ဆက်ဆံရေး တည်ဆောက်ခြင်းသည် ဗြိတိန်၏ အမျိုးသားအကျိုးစီးပွားအတွက် အလွန်အရေးကြီးကြောင်း ၎င်းက ယုံကြည်သည်ဟု ဆိုသည်။ သို့သော် ဝန်ကြီးချုပ်၏ ခရီးစဉ်နှင့် ပတ်သက်၍ ပြည်တွင်း၌ စိန်ခေါ်မှုများနှင့် ဝေဖန်မှုများစွာ ပေါ်ထွက်လျက်ရှိသည်။ အထူးသဖြင့် တရုတ်နိုင်ငံအတွင်းရှိ ဝီဂါ (Uyghur) မွတ်စလင်များအပေါ် တရုတ်အစိုးရ၏ ဆက်ဆံမှုများနှင့် ဟောင်ကောင်ဒီမိုကရေစီအရေး လှုပ်ရှားသူ ဂျင်မီလိုင် (橫) ကို ထောင်ဒဏ်တစ်သက်တစ်ကျွန်း ချမှတ်ထားသည့် ကိစ္စရပ်များအပေါ် လူ့အခွင့်အရေးဆိုင်ရာ ဝေဖန်ထောက်ပြမှုများ ရှိနေသည်။ တစ်ချိန်တည်းမှာပင် ဗြိတိန်ထောက်လှမ်းရေးအဖွဲ့ (MI5) က တရုတ်နိုင်ငံ၏ သူလျှိုလုပ်ငန်းများသည် ဗြိတိန်နိုင်ငံ၏ အမျိုးသားလုံခြုံရေးအတွက် နေ့စဉ်နှင့်အမျှ ခြိမ်းခြောက်မှု ဖြစ်ပေါ်စေကြောင်း သတိပေးထားသည်။ ဗြိတိန်အခြေစိုက် ကွန်ဆာဗေးတစ်ပါတီမှ ပရီတီ ပါတေးလ် (Priti Patel) ကလည်း ဝန်ကြီးချုပ် စတာမာအနေဖြင့် လန်ဒန်မြို့တွင် ဥရောပ၌ အကြီးဆုံးဖြစ်လာမည့် တရုတ်သံရုံးအဆောက်အအုံသစ် ဆောက်လုပ်ခွင့် ပြုလိုက်ခြင်းမှာ တရုတ်အစိုးရအပေါ် အလျှော့ပေး လိုက်လျောလွန်းရာ ရောက်သည်ဟု ပြင်းပြင်းထန်ထန် ဝေဖန်ပြောကြားထားခဲ့သည်။

ဗြိတိန်ဝန်ကြီးချုပ် တရုတ်သမ္မတနှင့် တွေ့ဆုံရန် ထွက်ခွာ

Jan 27

အီရန်နိုင်ငံက မြန်မာစစ်အုပ်စုထံ လေယာဉ်ဆီနှင့် လက်နက်ကုန်ကြမ်းများ လျှို့ဝှက်တင်ပို့နေကြောင်း ရိုက်တာ သတင်းဌာန ထုတ်ဖော် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၇ ရက်။ ရိုက်တာသတင်းဌာန၏ စုံစမ်းစစ်ဆေးမှုအရ အီရန်နိုင်ငံသည် မြန်မာစစ်ကောင်စီထံသို့ လေယာဉ်ဆီနှင့် လက်နက်ထုတ်လုပ်ရာတွင် အသုံးပြုသည့် ယူရီးယား (Urea) ဓာတုပစ္စည်းများကို လျှို့ဝှက်တင်ပို့နေသည်။ ၂၀၂၄ ခုနှစ် အောက်တိုဘာလမှ ၂၀၂၅ ခုနှစ် ဒီဇင်ဘာလအထိ အီရန်သည် လေယာဉ်ဆီ တန်ချိန်ပေါင်း ၁၇၅,၀၀၀ ခန့် (သင်္ဘော (၉) ကြိမ်စာ) ကို ပေးပို့ခဲ့သည်။ ထိုသို့ တင်ပို့ရာတွင် "အရိပ်သင်္ဘော" (Shadow Fleet) ဟု ခေါ်ဆိုသည့် တည်နေရာဖုံးကွယ်ထားသော Reef နှင့် Noble ရေနံတင်သင်္ဘောနှစ်စင်းကို အသုံးပြုခဲ့ပြီး၊ တည်နေရာပြစနစ် (AIS) ကို အီရတ်နိုင်ငံအနီးတွင် ရှိနေသယောင် လိမ်လည်ပြသ၍ ရန်ကုန်မြို့ရှိ ဆိပ်ကမ်းများသို့ လာရောက်ပို့ဆောင်ခဲ့ခြင်း ဖြစ်သည်။ အီရန်ထံမှ ရရှိသည့် လေယာဉ်ဆီများကြောင့် စစ်ကောင်စီသည် လေကြောင်းတိုက်ခိုက်မှုများကို အရှိန်မြှင့်တင်နိုင်ခဲ့ပြီး ၁၅ လအတွင်း အရပ်ဘက်ပစ်မှတ်ပေါင်း ၁,၀၀၀ ကျော်ကို ဗုံးကြဲတိုက်ခိုက်ခဲ့သည်။ ထို့အပြင် လက်နက်နှင့် ယမ်းများထုတ်လုပ်ရန် ယူရီးယား တန်ချိန် ၄ သိန်းမှ ၆ သိန်းကြားကိုလည်း တင်ပို့ခဲ့ရာ၊ ယင်းနောက်ပိုင်းတွင် လေကြောင်းတိုက်ခိုက်မှုကြောင့် အရပ်သား ၁,၇၂၈ ဦးအထိ သေဆုံးခဲ့ရသည်။ အထူးသဖြင့် ၂၀၂၅ ခုနှစ်အတွင်း ချင်းပြည်နယ်၊ ဗန်ဟားရွာ စာသင်ကျောင်းနှင့် ရခိုင်ပြည်နယ်၊ မြောက်ဦးဆေးရုံတို့ ဗုံးကြဲခံရမှုများသည် အဆိုပါ လောင်စာဆီများ ရောက်ရှိနေသည့် အချိန်ကာလနှင့် တိုက်ဆိုင်နေကြောင်း ရိုက်တာသတင်းဌာနက ထောက်ပြထားသည်။ ယခင်က ရိုဟင်ဂျာအရေးနှင့် ပတ်သက်၍ မြန်မာစစ်တပ်ကို ဝေဖန်ခဲ့သော အီရန်သည် ယခုအခါ စီးပွားရေးပိတ်ဆို့မှုများကြောင့် ငွေကြေးရရှိရန်အတွက် စစ်ကောင်စီနှင့် နိုင်ငံရေး၊ စီးပွားရေးအရ ပူးပေါင်းဆောင်ရွက်လာခြင်း ဖြစ်သည်ဟု သုံးသပ်ထားသည်။

အီရန်နိုင်ငံက မြန်မာစစ်အုပ်စုထံ လေယာဉ်ဆီနှင့် လက်နက်ကုန်ကြမ်းများ လျှို့ဝှက်တင်ပို့နေကြောင်း ရိုက်တာ သတင်းဌာန ထုတ်ဖော်

Jan 27

ရုရှားဓာတ်ငွေ့ တင်သွင်းမှုကို ဥရောပသမဂ္ဂ အပြီးတိုင်ပိတ်ပင်ရန် သဘောတူ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၇ ရက်။    ဥရောပသမဂ္ဂ (EU) အဖွဲ့ဝင်နိုင်ငံများမှ စွမ်းအင်ဝန်ကြီးများသည် ရုရှားနိုင်ငံမှ ဓာတ်ငွေ့တင်သွင်းမှုကို အပြီးတိုင်ပိတ်ပင်ရန် ဘရပ်စ်ဆဲလ်မြို့၌ ကျင်းပသော အစည်းအဝေးတွင် နောက်ဆုံးအတည်ပြုချက် ပေးလိုက်ပြီ ဖြစ်သည်။ သဘောတူညီချက်အရ အဖွဲ့ဝင်နိုင်ငံများသည် ရုရှားသဘာဝဓာတ်ငွေ့အရည် (LNG) ကို ၂၀၂၆ ခုနှစ် နှစ်ကုန်ပိုင်းတွင်လည်းကောင်း၊ ပိုက်လိုင်းဓာတ်ငွေ့ကို ၂၀၂၇ ခုနှစ် စက်တင်ဘာလကုန်တွင် လည်းကောင်း အပြီးတိုင် ရပ်ဆိုင်းရမည် ဖြစ်သည်။ ရုရှား၏ ယူကရိန်းကျူးကျော်မှုအပေါ် အရေးယူရန်အတွက် ဤပိတ်ပင်မှုကို ဥပဒေကြောင်းအရ အတည်ပြုခဲ့ခြင်းဖြစ်သော်လည်း ရုရှားအပေါ် စွမ်းအင်မှီခိုနေရသည့် ဟန်ဂေရီနှင့် ဆလိုဗက်ကီးယားနိုင်ငံတို့က ကန့်ကွက်ခဲ့ကြသည်။ ဟန်ဂေရီနိုင်ငံသည် ယခုဥပဒေကို ဥရောပတရားရုံးတွင် တရားစွဲဆို ကန့်ကွက်သွားမည်ဟု ဆိုသည်။ အတည်ပြုလိုက်သော ဥပဒေအရ ဥရောပကုမ္ပဏီများသည် ရုရှားနှင့် ဓာတ်ငွေ့စာချုပ်အသစ်များ ချုပ်ဆိုခွင့်မရှိတော့ဘဲ စာချုပ်ဟောင်းများကိုလည်း သတ်မှတ်ရက်အတွင်း ဖျက်သိမ်းရမည်ဖြစ်သည်။ လိုက်နာခြင်းမရှိသော ကုမ္ပဏီများကို ၎င်းတို့၏ တစ်နှစ်တာ ဝင်ငွေစုစုပေါင်း၏ ၃.၅ ရာခိုင်နှုန်းအထိ ဒဏ်ရိုက်အရေးယူသွားမည် ဖြစ်သည်။

ရုရှားဓာတ်ငွေ့ တင်သွင်းမှုကို ဥရောပသမဂ္ဂ အပြီးတိုင်ပိတ်ပင်ရန် သဘောတူ

Jan 27

အမေရိကန်က တောင်ကိုရီးယားသွင်းကုန်များအပေါ် အခွန်တိုးမြှင့် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၂၇ ရက်။ အမေရိကန်သမ္မတ ဒေါ်နယ်ထရန့်သည် တောင်ကိုရီးယားနိုင်ငံမှ တင်သွင်းသော ကုန်ပစ္စည်းများအပေါ် သွင်းကုန်ခွန်ကို ၁၅ ရာခိုင်နှုန်းမှ ၂၅ ရာခိုင်နှုန်း အထိ တိုးမြှင့်ကောက်ခံမည်ဟု ကြေညာလိုက်သည်။ တောင်ကိုရီးယားသည် ပြီးခဲ့သည့်နှစ်က ချုပ်ဆိုခဲ့သော ကုန်သွယ်ရေးသဘောတူညီချက်ပါ ကတိကဝတ်များကို လိုက်နာခြင်းမရှိ၍ ယခုလို တိုးမြှင့်ရခြင်း ဖြစ်သည်ဟု သမ္မတထရန့်က ဆိုသည်။ အထူးသဖြင့် အမေရိကန်တွင် ဒေါ်လာ ၃၅၀ ဘီလီယံ ရင်းနှီးမြှုပ်နှံမည်ဆိုသည့် အစီအစဉ်ကို ကိုရီးယားလွှတ်တော်ဘက်က အတည်ပြုရန် နှောင့်နှေးနေခြင်းအပေါ် သမ္မတထရန့်က မကျေမနပ် ဖြစ်နေခြင်းဖြစ်သည်။ တောင်ကိုရီးယားအစိုးရကမူ ယခုကဲ့သို့ အခွန်တိုးမြှင့်မှုကို အမေရိကန်ဘက်က ကြိုတင်အကြောင်းကြားခြင်း မရှိခဲ့ကြောင်း ပြောဆိုထားပြီး၊ ကိုရီးယားစက်မှုဝန်ကြီးသည် ဝါရှင်တန်မြို့သို့ သွားရောက်၍ အမေရိကန် ကူးသန်းရောင်းဝယ်ရေးဝန်ကြီးနှင့် အရေးပေါ် တွေ့ဆုံဆွေးနွေးရန် စီစဉ်နေကြောင်း သိရှိရပါသည်။ အမေရိကန်တွင် ရင်းနှီးမြှုပ်နှံမှုနှင့် ပတ်သက်၍ တောင်ကိုရီးယား လွှတ်တော်တွင် လာမည့် ဖေဖော်ဝါရီလ အတွင်း အတည်ပြုရန် စီစဉ်ထားသည်။

အမေရိကန်က တောင်ကိုရီးယားသွင်းကုန်များအပေါ် အခွန်တိုးမြှင့်

Jan 27

Starlink နဲ့ အပြိုင် ဖြစ်လာနိုင်မယ့် ဂြိုလ်တု အင်တာနက် ဝန်ဆောင်မှုကို Blue Origin စတင်မည် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၇ ရက်။ ကမ္ဘာ့ အချမ်းသာဆုံး သူဌေးကြီး တစ်ဦး ဖြစ်ပြီး Amazon ကုမ္ပဏီကို ထူထောင်ခဲ့တဲ့ Jeff Bezos ဟာ Star Link နဲ့ ပြိုင်ဘက် ဖြစ်လာနိုင်မယ့် Tera Wave ဂြိုလ်တု အင်တာနက် ဝန်ဆောင်မှုကို စတင်လုပ်ဆောင်တော့မယ်လို့ ကြေညာလိုက်ပါတယ်။ သူတည်ထောင်ထားတဲ့ Blue Origin ကုမ္ပဏီဟာ TeraWave လို့ အမည်ပေးထားတဲ့ ဂြိုဟ်တုအင်တာနက် ကွန်ရက်တစ်ခုကို တည်ဆောက်သွားမယ်လို့ ဗုဒ္ဓဟူးနေ့က ကြေညာခဲ့ပါတယ်။ ဒီဝန်ဆောင်မှုကို အဓိကအားဖြင့် စီးပွားရေးလုပ်ငန်းကြီးများ၊ Data Center များနဲ့ အစိုးရဌာနတွေကို ပစ်မှတ်ထား ပံ့ပိုးပေးသွားမှာဖြစ်ပါတယ်။ စုစုပေါင်း ဂြိုဟ်တု ၅,၄၀၈ စင်း ကို အာကာသထဲ လွှတ်တင်ဖို့ စီစဉ်ထားပါတယ်။ အချက်အလက်ပေးပို့မှုနှုန်းဟာ တစ်စက္ကန့်ကို 6 Terabits (6 Tbps) အထိ မြန်ဆန်မယ်လို့ ကုမ္ပဏီက ဆိုပါတယ်။ ဆိုလိုတာက အင်တာနက်က ရုပ်ရှင် တစ်ခုကို ၁ စက္ကန့်အတွင်း ဒေါင်းလုဒ် လုပ်နိုင်တဲ့ မြန်နှုန်း ဖြစ်ပါတယ္။ ပထမဆုံး ဂြိုဟ်တုအုပ်စုကိုတော့ ၂၀၂၇ ခုနှစ်၊ စတုတ္ထသုံးလပတ် မှာ စတင်လွှတ်တင်ဖို့ ရည်မှန်းထားပါတယ်။ ဒီဝန်ဆောင်မှုဟာ လက်ရှိ ဂြိုဟ်တု ၉,၀၀၀ ကျော်နဲ့ သုံးစွဲသူ ၉ သန်းရှိတဲ့ Elon Musk ရဲ့ Starlink ကို အဓိက ယှဉ်ပြိုင်မှာဖြစ်သလို၊ Jeff Bezos ကိုယ်တိုင် တည်ထောင်ခဲ့တဲ့ Amazon ကုမ္ပဏီရဲ့ Leo အင်တာနက်ဝန်ဆောင်မှုနဲ့လည်း ပြိုင်ဘက် ဖြစ်လာမှာပါ။ Blue Origin ဟာ အာကာသခရီးသွားလုပ်ငန်းနဲ့ ဒုံးပျံလွှတ်တင်ရေးကို အဓိကလုပ်ဆောင်နေတဲ့ ကုမ္ပဏီဖြစ်ပါတယ်။ ပြီးခဲ့တဲ့နှစ် နိုဝင်ဘာလအတွင်းမှာ NASA ရဲ့ အာကာသယာဉ်နှစ်စင်းကို New Glenn ဒုံးပျံနဲ့ အောင်မြင်စွာ လွှတ်တင်နိုင်ခဲ့သလို၊ ဒုံးပျံတွန်းကန်စက် (Booster) ကိုလည်း မြေပြင်ပေါ်သို့ အောင်မြင်စွာ ပြန်လည်ဆင်းသက်နိုင်ခဲ့တဲ့ မှတ်တိုင်တစ်ခုကို စိုက်ထူနိုင်ခဲ့ပါတယ်။

Starlink နဲ့ အပြိုင် ဖြစ်လာနိုင်မယ့် ဂြိုလ်တု အင်တာနက် ဝန်ဆောင်မှုကို Blue Origin စတင်မည်

Jan 26

ကျေးရွာ အများစု ချန်လှပ်ခံရသည့် ရွေးကောက်ပွဲ ကိုယ်စားပြုမှု မရှိဟု ရှမ်းမြောက် ဒေသခံများ ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၆ ရက်။ ကျေးရွာအများစု ချန်လှပ်ခံရသည့် ရှမ်းမြောက်တွင် ကျင်းပခဲ့သည့် ရွေးကောက်ပွဲသည် ကိုယ်စားပြုမှုမရှိဟု ဒေသခံများနှင့် ကိုယ်စားလှယ်လောင်းများက ပြောသည်။ စစ်ကောင်မရှင်၏ အပိုင်း (၃) ရွေးကောက်ပွဲကို ရှမ်းပြည် မြောက်ပိုင်းရှိ ကျောက်မဲ၊ သီပေါနှင့် မက်မန်းမြို့နယ် များတွင် ဇန်နဝါရီလ ၂၅ ရက်နေ့က ကျင်းပခဲ့ကြသည်။ သို့သော် ကျောက်မဲမြို့နယ်ရှိ ကျေးရွာအုပ်စု အများစုမှာ ရွေးကောက်ပွဲ တွင် ပါဝင်ခွင့်မရဘဲ ချန်လှပ်ခံထားရ သည့်အတွက် ကိုယ်စားပြုမှုမရှိသလို တရားမျှတမှုလည်း ကင်းမဲ့နေကြောင်း ကိုယ်စားလှယ်လောင်းများနှင့် ဒေသခံများက ဝေဖန်လိုက်သည်။ ကျောက်မဲမြို့နယ်တွင် ကျေးရွာအုပ်စုပေါင်း ၈၁ အုပ်စု ရှိသည့်အနက် မြို့ပေါ်ရပ်ကွက် ၉ ခုနှင့် ကျေးရွာအုပ်စု ၅ အုပ်စု (စုစုပေါင်း၏ ၆ ရာခိုင်နှုန်းခန့်) တွင်သာ စစ်ကော်မရှင်က မဲရုံ ၂၅ ရုံဖြင့် ရွေးကောက်ပွဲ ကျင်းပနိုင်ခဲ့ခြင်း ဖြစ်သည်။ အထူးသဖြင့် ရှမ်းတိုင်းရင်းသားအများစု နေထိုင်ရာ ကျေးရွာများမှာ ရွေးကောက်ပွဲကျင်းပသည့် နယ်မြေအတွင်း မပါဝင်ခဲ့ပေ။ ယင်းအခြေအနေနှင့် ပတ်သက်၍ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) နှင့် နီးစပ်သူတစ်ဦးက “အခုကျင်းပတဲ့ ရွေးကောက်ပွဲမှာ ရှမ်းတိုင်းရင်းသားတွေ အများဆုံးနေထိုင်တဲ့ ရွာတွေ မပါဝင်ဘူးပေါ့ဗျာ။ ဒါကြောင့် ဒီရွေးကောက်ပွဲဟာ ဒေသခံတွေကို ကိုယ်စားပြုမှုမရှိသလို တရားမျှတမှုလည်း မရှိပါဘူး" ဟု သုံးသပ် ပြောဆိုသည်။ ၁၀၂၇ စစ်ဆင်ရေးအတွင်း TNLA ထိန်းချုပ်မှုအောက် ရောက်ရှိခဲ့သည့် ကျောက်မဲမြို့ကို စစ်တပ်က ၂၀၂၅ ခုနှစ် အောက်တိုဘာလတွင် ပြန်လည်သိမ်းယူခဲ့သော်လည်း မြေပြင်စိုးမိုးမှုမှာ မြို့ပေါ်အနီးတဝိုက်တွင်သာ ရှိနေသည်။ တိုက်ပွဲများကြောင့် စစ်ဘေးရှောင် နေရသူများမှာလည်း နေရပ်သို့ ပြန်မလာနိုင်သေးဘဲ ကျန်ရှိနေသည့် ဒေသခံများမှာလည်း ရွေးကောက်ပွဲအပေါ် စိတ်ဝင်စားမှု ကင်းမဲ့နေသည်ဟု ဆိုကြသည်။ ကျောက်မဲမြို့ခံတစ်ဦးက “မြို့ထဲမှာ မဲလာပေးတဲ့သူက လက်ချိုးရေလို့ရတယ်။ မဲရုံပိတ်ခါနီးတဲ့အထိ တစ် ယောက်စ နှစ်ယောက်စပဲ လာကြတာ။ စစ်တပ်ကတော့ မဲပေးသူ ၅ သောင်းကျော်ရှိတယ်လို့ ထုတ်ပြန် ထားပေမဲ့ လက်တွေ့မှာတော့ မဲရုံတွေက ခြောက်ကပ်နေတာပါ။ လူတွေက မဲပေးဖို့ထက် လုံခြုံရေးအတွက်ပဲ စိုးရိမ်နေကြတာ” ဟု ပြောသည်။ သီပေါမြို့နယ်တွင်လည်း မဲရုံ ၄၁ ရုံဖွင့်လှစ်ကာ မဲပေးပိုင်ခွင့်ရှိသူ ၆ သောင်းကျော်ရှိသည်ဟု ဆိုသော်လည်း လက်တွေ့တွင် မဲပေးသူ မရှိသလောက် နည်းပါးခဲ့ကြောင်း မြို့ခံများက အတည်ပြုသည်။ ကျောက်မဲမြို့နယ်၏ လွှတ်တော်ကိုယ်စားလှယ်နေရာများတွင် စစ်တပ်ကျောထောက်နောက်ခံပြု ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ (USDP) က နေရာအများစုတွင် ပြိုင်ဘက်မရှိ အလိုအလျောက် အနိုင်ရထားပြီး ဖြစ်သည်။ ပြည်သူ့လွှတ်တော်နေရာတွင် USDP နှင့် SNDP (ကျားဖြူ) ပါတီတို့သာ ယှဉ်ပြိုင်ပြီး ပြည်နယ်လွှတ်တော်နေရာ တွင်မူ USDP တစ်ပါတီတည်းသာ ဝင်ရောက်ယှဉ်ပြိုင်ခဲ့ခြင်း ဖြစ်သည်။ ဓါတ်ပုံ - ကျောက်မဲ (ပြန်/ဆက်)

ကျေးရွာ အများစု ချန်လှပ်ခံရသည့် ရွေးကောက်ပွဲ ကိုယ်စားပြုမှု မရှိဟု ရှမ်းမြောက် ဒေသခံများ ပြော

Jan 26

လက်နက်ကြီး ပစ်ခတ်မှုများကြောင့် ဖားကန့်ရွေးကောက်ပွဲ မဲပေးသူ နည်းပါး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၆ ရက်။ ကချင်ပြည်၊ ဖားကန့်မြို့တွင် ဇန်နဝါရီလ ၂၅ ရက်နေ့က ကျင်းပခဲ့သည့် စစ်ကော်မရှင်၏ အပိုင်း (၃) ရွေးကောက် ပွဲသည် မြို့ပေါ်တွင် လက်နက်ကြီးများ ကျရောက်ပေါက်ကွဲမှုများကြောင့် မဲလာပေးသူမရှိဘဲ တိတ်ဆိတ်စွာ ပြီးဆုံးသွားခဲ့ကြောင်း ဒေသခံများက ပြောသည်။ စစ်ကော်မရှင်သည် ရွေးကောက်ပွဲ ကျင်းပနိုင်ရန် ဖားကန့်မြို့အဝင်အထွက် တံတားများကို ဇန်နဝါရီ ၂၃ ရက်နေ့ ကတည်းက ပိတ်ဆို့ကာ ဗျူဟာကုန်းအနီးရှိ ရပ်ကွက် (၄) ခုတွင် မဲရုံများ ပြင်ဆင်ခဲ့သော်လည်း မြေပြင်တွင် မဲပေးမည့်သူမရှိဘဲ ဝန်ထမ်းအချို့သာ ပေးခဲ့ကြသည်ဟု ဆိုသည်။ ဖားကန့်မြို့ခံတစ်ဦးက မြေပြင်အခြေအနေကို “မဲရုံတွေကတော့ ဖွင့်ထားတာပဲ၊ ဒါပေမဲ့ တစ်မြို့လုံးက ဘယ်သူ မှလည်း မဲသွားမပေးဘူး၊ အိမ်ထဲမှာပဲ အောင်းနေကြတာ။ အပြင်မှာလည်း လက်နက်ကြီးသံတွေက လည်း ကြားနေရတာဆိုတော့ ဘယ်သူက သွားပေးရဲမှာလဲ။ ဝန်ထမ်းအချင်းချင်းပဲ ပေးနေတာ တွေ့ရတယ်” ဟု ပြောသည်။ ရွေးကောက်ပွဲကျင်းပချိန်တွင် ဖားကန့်ဗျူဟာကုန်းနှင့် ရဲစခန်းဘက်မှ လက်နက်ကြီးများ တရစပ်ပစ်ခတ်ခဲ့သလို၊ ကချင်လွတ်လပ်ရေး တပ်မတော် KIA နှင့် KPDF ပူးပေါင်းတပ်ဖွဲ့များဘက်ကလည်း မဲရုံများရှိရာဘက်သို့ ဒရုန်းဗုံးများဖြင့် ပြန်လည်တိုက်ခိုက်ခဲ့ခြင်းကြောင့် တိုက်ပွဲများ ပြင်းထန်ခဲ့သည်။ မြေပြင်၌ ကူညီပေးနေသူတစ်ဦးက “လက်နက်ကြီးကျည်က မြို့ပေါ်ရပ်ကွက်တွေထဲ ကျတာ။ တောင်ပြိုရွာမှာ တစ်ယောက်၊ ဆိပ်မူမှာ နှစ်ယောက် ထိတယ်။ မြို့ပေါ်မှာလည်း ထိတာရှိတော့ အားလုံးပေါင်း ၅ ယောက်ထက် မနည်း ဒဏ်ရာရထားတယ်။ အဲဒီထဲက ၃ ယောက်ကတော့ တော်တော်စိုးရိမ်ရလို့ ခွဲစိတ်ခန်းဝင်နေရတယ်” ဟု ပြောသည်။ ရွေးကောက်ပွဲကျင်းပနိုင်ရန် မြို့ပေါ်ရှိ လမ်းဆုံလမ်းခွများနှင့် အချက်အချာကျသော နေရာများတွင် လုံခြုံရေး အင်အား အလုံးအရင်းဖြင့် ချထားကာ စစ်ဆေးမှုများ တင်းကျပ်ထားသော်လည်း၊ မြေပြင်တွင် လက်နက်ကြီး သံများနှင့် တိုက်ပွဲများ ဆက်တိုက်ကြားနေရသည်ဟု ဆိုကြသည်။ ထို့ပြင် မြို့ခံများကမူ ၎င်းတို့၏ ဆန္ဒအစစ်အမှန်ကို ကိုယ်စားမပြုသည့် ဤရွေးကောက်ပွဲအပေါ် စိတ်ဝင်စားမှု ကင်းမဲ့နေကြသည်ကို တွေ့ရှိရသည်ဟု မြေပြင်သတင်းရင်းမြစ်က ပြောသည်။ စစ်ကော်မရှင်ကမူ ဖားကန့်မြို့တွင် ပြည်သူများ အေးချမ်းတည်ငြိမ်စွာ မဲပေးခဲ့ကြသည်ဟု ထုတ်ပြန်ထားသော် လည်း၊ လက်တွေ့တွင် ဖားကန့်ပြည်သူများမှာ မဲမပေးဘဲ နေအိမ်များ၌သာ နေထိုင်ခြင်းဖြင့် ရွေးကောက်ပွဲကို ဆန့်ကျင်ခဲ့ကြကြောင်း မြေပြင်သတင်းရင်းမြစ်က ပြောသည်။ ဖားကန့်မြို့နယ်အတွင်း စစ်ကောင်မရှင်၏ အပိုင်း (၃) ရွေးကောက်ပွဲ အတွက် မဲရုံပေါင်း (၁၉) ရုံကို ဇန်နဝါရီလ ၂၅ ရက်နေ့ နံနက် ၆ နာရီမှစတင်ကာ ဖွင့်လှစ်ခဲ့သည်ဟု ထုတ်ပြန်ထားသည်။ စစ်ကော်မရှင်သည် ဖားကန့်မြို့ပေါ်ရှိ စုပေါင်းရုံး၊ အခြေခံပညာအထက်တန်းကျောင်းနှင့် ငှက်ပျောတောကျောင်း တို့တွင် မဲရုံအမှတ် (၃၄) မှ (၄၉) အတွင်းရှိ မဲရုံများကိုလည်းကောင်း၊ ကာမိုင်းမြို့နှင့် လီဒိုလမ်းကြောရှိ ကျေးရွာ များဖြစ်သော ဒွန်ဘုန်းခ၊ လဝါး၊ ဒွန်ဘန်၊ မန်ပန်၊ နောင်းမြီ၊ ဝါရာဇွပ်၊ ရှဒူဇွပ်၊ ကောင်ရာနှင့် နန့်ယားကျေးရွာ အုပ်စုတို့တွင် မဲရုံအမှတ် (၁၅) မှ (၂၉) အထိ မဲရုံများကိုလည်းကောင်း စုစုပေါင်း (၁၉) ရုံ ဖွင့်လှစ်ခဲ့သည်ဟု ထုတ်ပြန်ထားသည်။ သို့သော်လည်း ရွေးကောက်ပွဲ ကျင်းပချိန်တွင် ဖားကန့်ဗျူဟာကုန်းနှင့် ရဲစခန်းအနီး တစ်ဝိုက်အပါအဝင် မဲရုံများ ပြင်ဆင်ထားရာ မြို့ပေါ်ရပ်ကွက်များအတွင်း လက်နက်ကြီးများ တရစပ်ပစ်ခတ်မှုနှင့် ပေါက်ကွဲမှုများ ဖြစ်ပွားခဲ့သည်။ ထို့ကြောင့် မြို့ပေါ်ရပ်ကွက်များနှင့် တောင်ပြို၊ ဆိပ်မူကျေးရွာတို့တွင် လက်နက်ကြီးကျည် ကျရောက် ပေါက်ကွဲမှု ကြောင့် ဒေသခံ ၅ ဦးထက်မနည်း ပြင်းထန်စွာဒဏ်ရာရရှိခဲ့သည်။

လက်နက်ကြီး ပစ်ခတ်မှုများကြောင့် ဖားကန့်ရွေးကောက်ပွဲ မဲပေးသူ နည်းပါး

Jan 26

ရွေးကောက်ပွဲအပေါ် နိုင်ငံတကာ အသိအမှတ်ပြုမှု အရေးမကြီးဟု ဗိုလ်ချုပ်မှူးကြီးပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၆ ရက်။ စစ်ကော်မရှင်က ဦးစီးကျင်းပနေသည့် ရွေးကောက်ပွဲအပေါ် နိုင်ငံတကာက အသိအမှတ်ပြုခြင်း ရှိ၊ မရှိထက် မဲလာပေးသည့် ပြည်သူများကိုသာ အသိအမှတ်ပြုကြောင်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်သည်။ မန္တလေးမြို့၊ ချမ်းမြသာစည်မြို့နယ်အတွင်း ကျင်းပနေသည့် အပိုင်း (၃) ရွေးကောက်ပွဲ မဲရုံများသို့ သွားရောက် ကြည့်ရှုစဉ် သတင်းမီဒီယာများနှင့် တွေ့ဆုံရာတွင် စစ်ခေါင်းဆောင်က ထည့်သွင်းပြောဆိုခဲ့ခြင်း ဖြစ်သည်။ ၎င်းက ရွေးကောက်ပွဲအပေါ် နိုင်ငံတကာ၏ ဝေဖန်ကန့်ကွက်မှုများကို ပယ်ချခဲ့ပြီး မြန်မာ့ပြည်တွင်းရေးအဖြစ်သာ ရှုမြင်ကြောင်း ဆိုသည်။ "မြန်မာပြည်ထဲက ပြည်သူတွေ မဲပေးတာလေ။ သူတို့အပြင်က လူတွေ မဲပေးတာ မဟုတ်ဘူး။ ဒါကို နိုင်ငံခြားက အသိအမှတ်ပြုတာ၊ မပြုတာ ကျွန်တော်တို့ နားမလည်(ပေးနိုင်)ဘူး။ ပြည်သူက မဲပေးတာ ကျွန်တော်တို့ အသိအမှတ်ပြုမယ်။ ဒီလိုပဲ သွားရမယ်" ဟု ဗိုလ်ချုပ်မှူးကြီး မင်းအောင်လှိုင်က ပြောသည်။ ထို့ပြင် အပိုင်း ၁ နှင့် ၂ ရွေးကောက်ပွဲများတွင် စစ်တပ်ကျောထောက်နောက်ခံပြု ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) က အပြတ်အသတ် အနိုင်ရနေခြင်းမှာ တပ်နှင့် နီးစပ်၍ မဟုတ်ဘဲ ပြည်သူက ပေးချင်သည့်သူကို ပေးခြင်းသာဖြစ်ကြောင်း ၎င်းက ခုခံပြောဆိုခဲ့သည်။ မဲလာမပေးသူများနှင့် ပတ်သက်၍မူ ၎င်းတို့နှစ်သက်သည့် ကိုယ်စားလှယ်မပါခြင်း သို့မဟုတ် လုံခြုံရေး အခြေအနေကြောင့် ဖြစ်နိုင်ကြောင်း သုံးသပ်ခဲ့သည်။ "လာပေးတဲ့သူတွေက သူတို့ ထောက်ခံချင်တဲ့ လူတွေပါလို့ မဲလာပေးတာ။ သူတို့ ထောက်ခံချင်တဲ့ လူတွေ မပါဘူးဆိုရင် မဲလာပေးမှာ မဟုတ်ဘူး" ဟု ၎င်းက ဆက်လက်ပြောဆိုသည်။ စစ်ခေါင်းဆောင်က ထိုသို့ပြောဆိုနေသော်လည်း အာဆီယံကမူ ဤရွေးကောက်ပွဲရလဒ်ကို အသိအမှတ် ပြုမည် မဟုတ်ကြောင်းနှင့် လေ့လာသူများ စေလွှတ်မည်မဟုတ်ကြောင်း ထုတ်ဖော်ပြောဆိုထားသည်။ ဇန်နဝါရီလ ၂၅ ရက်နေ့က ကျင်းပသည့် အပိုင်း (၃) ရွေးကောက်ပွဲကို နိုင်ငံအနှံ့ မြို့နယ် ၆၁ မြို့နယ်တွင် ပြုလုပ် နေခြင်းဖြစ်ပြီး မန္တလေးတိုင်းအတွင်းရှိ ချမ်းမြသာစည်၊ ပုသိမ်ကြီးနှင့် မြင်းခြံ အပါအဝင် ၈ မြို့နယ် ပါဝင်သည်။ သို့သော်လည်း နယ်မြေမတည်ငြိမ်သည့် မိုးကုတ်၊ စဉ့်ကူးနှင့် နွားထိုးကြီးမြို့နယ်များတွင်မူ ရွေးကောက်ပွဲ ကျင်းပနိုင်ခြင်း မရှိကြောင်း မြေပြင်သတင်းရင်းမြစ်များက ပြောသည်။ မြေပြင်အခြေအနေတွင်မူ ဖားကန့်ကဲ့သို့သော မြို့နယ်များ၌ မဲရုံများ ခြောက်ကပ်နေပြီး တိုက်ပွဲများကြောင့် ဒေသခံများ ဘေးလွတ်ရာ ရှောင်တိမ်းနေရသည့် အခြေအနေများ ရှိနေကြောင်း ဒေသတွင်းသတင်းရင်းမြစ်များ က ပြောသည်။

ရွေးကောက်ပွဲအပေါ် နိုင်ငံတကာ အသိအမှတ်ပြုမှု အရေးမကြီးဟု ဗိုလ်ချုပ်မှူးကြီးပြော

Jan 26

အမေရိကန် တရားရုံးတစ်ခုက မြန်မာနိုင်ငံသားများအပေါ် ပြည်နှင်ဒဏ်ပေးခြင်းမှ အကာအကွယ်ပေးမှုကို သက်တမ်းတိုး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၆ ရက်။ အမေရိကန်ရောက် မြန်မာနိုင်ငံသားများအား ပြည်နှင်ဒဏ်ပေးခြင်းမှ အကာအကွယ်ပေးထားသည့် ယာယီ ကာကွယ်မှု အခြေအနေ Temporary Protected Status (TPS) အစီအစဉ်ကို ရပ်ဆိုင်းရန် ထရန့်အစိုးရ၏ ကြိုးပမ်းမှုကို အမေရိကန်ဖက်ဒရယ်တရားသူကြီးတစ်ဦးက တားမြစ်ပိတ်ပင်လိုက် သည်။ အမေရိကန်ပြည်ထောင်စုသို့ ရောက်ရှိနေသည့် မြန်မာရွှေ့ပြောင်းနေထိုင်သူ ၃,၆၀ဝ ကျော်အား ပြည်နှင်ဒဏ်ပေးခြင်းမှ အကာအကွယ်ပေးထားသည့် အစီအစဉ်ကို ရပ်ဆိုင်းရန် ထရန့်အစိုးရ၏ ဆုံးဖြတ်ချက်ကို အမေရိကန်ဖက်ဒရယ်တရားသူကြီးတစ်ဦးက ပိတ်ပင်လိုက်ကြောင်း ဒေသတွင်းသတင်းဌာနများက ဖော်ပြခဲ့ကြသည်။ အမေရိကန် ပြည်ထောင်စု အီလီနွိုက်ပြည်နယ်မှ တရားသူကြီး မက်သရူး ကန်နယ်လီ (Matthew Kennelly) က စာမျက်နှာ ၅၇ မျက်နှာပါရှိသည့် ဆုံးဖြတ်ချက်တစ်ရပ်ကို ထုတ်ပြန်ခဲ့ခြင်း ဖြစ်သည်။ ပြည်တွင်းလုံခြုံရေးဝန်ကြီး ခရစ္စတီနိုမ် (Kristi Noem) ၏ TPS ရပ်ဆိုင်းရန် ဆုံးဖြတ်ချက်သည် မြန်မာနိုင်ငံအတွင်း ဖြစ်ပွားနေသည့် လက်ရှိအခြေအနေများကို လုံလောက်စွာ ထည့်သွင်းစဉ်းစားရန် ပျက်ကွက်ခဲ့ကြောင်း ၎င်းက ထောက်ပြခဲ့သည်။ ဝန်ကြီး ခရစ္စတီ နိုမ်က မြန်မာနိုင်ငံ၏ အခြေအနေများမှာ တိုးတက်ကောင်းမွန်လာသဖြင့် နေရပ်ပြန်ပို့ရန် သင့်တော်ပြီဟု ခုခံပြောဆိုခဲ့သော်လည်း၊ အခြားအစိုးရအရာရှိများ၏ အစီရင်ခံစာများတွင်မူ မြန်မာနိုင်ငံအတွင်း လေကြောင်းတိုက်ခိုက်မှုများ၊ လက်နက်ကြီးများဖြင့် ပစ်ခတ်မှုများ၊ ကျေးရွာများအား မီးရှို့ဖျက်ဆီးမှုများနှင့် လူသားချင်းစာနာထောက်ထားမှုဆိုင်ရာ လိုအပ်ချက်များ အလွန်မြင့်မားနေကြောင်း ဖော်ပြထားသည်ဟု တရားသူကြီးက ရေးသားခဲ့သည်။ ဝန်ကြီးနိုမ်၏ လုပ်ဆောင်ချက်မှာ မြန်မာနိုင်ငံ၏ အခြေအနေ ပြောင်းလဲမှုအပေါ် အခြေခံခြင်းထက် ၎င်း၏ မူဝါဒဖြစ်သော လူဝင်မှုကြီးကြပ်ရေးကို ကန့်သတ်ရန်နှင့် TPS အစီအစဉ်များကို ယေဘုယျအားဖြင့် ဖျက်သိမ်းရန်ဟူသော ပုဂ္ဂိုလ်ရေး ရည်မှန်းချက်ကို ရှေ့တန်းတင်ခဲ့ခြင်းဖြစ်ကြောင်း တရားသူကြီးက စွပ်စွဲထားသည်။ ထို့ကြောင့် တရားသူကြီးက ပြည်တွင်း လုံခြုံရေး ဝန်ကြီးဌာန၏ TPS ရပ်ဆိုင်းရန် ဆုံးဖြတ်ချက်ကို ဆိုင်းငံ့ထားရန် ဆုံးဖြတ်ခဲ့သည်။ သို့ဖြစ်ရာ နောက်ထပ် တစ်စုံတစ်ရာ အမိန့်ချမှတ်ခြင်းမပြုမီ သို့မဟုတ် ဝန်ကြီးဌာနက အယူခံဝင်ပြီး အယူခံ နိုင်သွားခြင်း မရှိပါက လအနည်းငယ် သို့မဟုတ် တစ်နှစ် ကျော်အချိန်ထိ မြန်မာနိုင်ငံသား ၃၆၀၀ ခန့်မှာ TPS ကာကွယ်မှုကို ဆက်လက် ရရှိနေမည်ဖြစ်သည်။ သို့သော်လည်း မြန်မာနိုင်ငံ၏ အခြေအနေများ သိသိသာသာ ပြောင်းလဲကောင်းမွန်သွားသည်ဟု အမေရိကန်အစိုးရက သတ်မှတ်နိုင်ပါက (သို့မဟုတ် တရားရုံးတွင် သက်သေပြနိုင်ပါက) အချိန်မရွေး ပြန်လည်ရပ်ဆိုင်းခံရနိုင်ခြေ ရှိသည်။

အမေရိကန် တရားရုံးတစ်ခုက မြန်မာနိုင်ငံသားများအပေါ် ပြည်နှင်ဒဏ်ပေးခြင်းမှ အကာအကွယ်ပေးမှုကို သက်တမ်းတိုး

« Prev 1 … 129 130 131 132 133 … 1,114 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို — August 20, 2026 2:35 pm
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ် — August 20, 2026 2:33 pm
ထိုင်း-မြန်မာ နယ်စပ်ဖြတ်ကျော်ရာဇဝတ်မှုများ နှိမ်နင်းရန် စစ်ဦးစီးချုပ်များဆွေးနွေး — August 20, 2026 2:30 pm

Recent Posts

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ်

Archives

Archives

×Close