NMG Doh – Page 131 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Aug 21

ဝက်လက်နှင့် စစ်ကိုင်း မြို့နယ် အစပ်ကို စစ်ကော်မရှင် စစ်ကြောင်းထိုး၊ လေကြောင်းတိုက်ခိုက်မှု လုပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။ စစ်ကိုင်းတိုင်းဒေသကြီးထဲရှိ ဝက်လက်နှင့် စစ်ကိုင်းမြို့နယ်အစပ်ကို စစ်ကော်မရှင်တပ်က မြေပြင်မှ စစ်ကြောင်းများထိုးနေသည့် အပြင် လေကြောင်း တိုက်ခိုက်မှုများ ဆက်တိုက် လုပ်နေသည်ဟု မြေပြင် သတင်းအရင်းအမြစ်များက ပြောသည်။ ဝက်လက်နှင့် စစ်ကိုင်းမြို့နယ်အစပ်တွင် စစ်တပ်က စစ်ကြောင်းထိုးနေသည်မှာ တစ်လခန့် ကြာလာပြီ ဖြစ်သည့် အပြင် ယခုရက်ပိုင်းတွင် လေကြောင်းအသုံးပြု တိုက်ခိုက်မှုများ ဆက်တိုက်လုပ်နေသည်ဟု ဆိုသည်။ “သူတို့က နေ့စဥ် ရက်ဆက်ပဲ ရက်တောင် မခြားဘူး။ တိုက်ပွဲဖြစ်တဲ့ နေရာတွေ ပစ်တယ်။ တိုက်ပွဲမဖြစ်တဲ့ ကျေးရွာတွေလည်း ပတ်ပစ်တယ်။ ထိခိုက် မှုတွေလည်း ရှိတယ်။ သေဆုံးမှုတွေလည်း ရှိတယ်။ ဝက်လက်မှာတော့ ထိခိုက်ဒဏ်ရာရကြတာ။ စစ်ကိုင်းမှာ တော့ သေဆုံးမှုတွေပါ ရှိနေတာ” ဟု ဝက်လက် သတင်း ကွန်ရက် (Wetlet Informational Network) အဖွဲ့မှ တာဝန်ရှိသူတစ်ဦးက ပြောသည်။ ပြီးခဲ့သည့် ဇူလိုင်လ ၁၇ ရက်နေ့က ဧရာဝတီမြစ်ကြောင်းအတိုင်း စစ်သင်္ဘောများ ဆန်တက်ပြီးချိန်မှ စတင်ကာ စစ်ကော်မရှင်တပ်၏ မြေပြင်စစ်ကြောင်းများ လှုပ်ရှားလာခြင်း ဖြစ်ပြီး မြစ်ကမ်းဘေးမှ ကျေးရွာများကို နယ်မြေ ရှင်းလင်းရေးပုံစံဖြင့် စစ်ကြောင်းထိုးနေခြင်း ဖြစ်သည်ဟု ဆိုသည်။ ဩဂုတ်လ ၁၁ ရက်နေ့မှ စတင်ကာ စစ်ကိုင်းမြို့နယ်၊ ဝက်လက်မြို့နယ်ရှိ ကျေးရွာများကို နေ့စဥ်မပြတ် လေကြောင်း အသုံးပြု တိုက်ခိုက်နေခြင်းဖြစ်သည်ဟု Wetlet Informational Network အဖွဲ့ တာဝန်ရှိသူက ပြောသည်။ ထို့ပြင် မြေပြင်မှ စစ်တပ် စစ်ကြောင်း မလှုပ်ရှားနိုင်အောင် တော်လှန်ရေး အင်အားစုများက တိုက်ခိုက်သဖြင့် နှစ်ဖက်ကြား မြေပြင်တွင်လည်း အပြန်အလှန် ထိတွေ့မှုများရှိနေသည်ဟု စစ်ရေး သတင်းအရင်းအမြစ်များက ပြောသည်။ စစ်တပ်၏ စစ်ရေး လှုပ်ရှားမှု အခြေအနေနှင့် ပတ်သက်၍ စစ်ရေး သတင်းအရင်းအမြစ် တစ်ဦးက “ကျနော်တို့ သတင်းရတာကတော့ ဧရာဝတီ မြစ်ကမ်းတစ်လျှောက်ကို စစ်ကြောင်း ထိုးမယ်လို့ သတင်းရတယ်။ လက်ရှိ သူ တို့ ထိုးနေတဲ့ ပုံစံကလည်း အဲ့တိုင်းပဲ။ ကားလမ်းပေါ်ကို မတက်ဘဲနဲ့ မြစ်ရိုး တစ်လျှောက်ပဲ ထိုးနေတာဗျ။ မြေ ပြင်တိုက်ပွဲကလည်း မပြင်းထန်ဘူးဗျာ။ မြေပြင်စစ်ကြောင်း မတိုးနိုင်အောင်လောက်ပဲ ကာထားတာ ရှိတယ်။ တစ်ဖက်နဲ့ တစ်ဖက် ပြင်းထန်နေတာမျိုးတော့ မရှိဘူးဗျ” ဟု ပြောသည်။ ထိုစစ်ကော်မရှင် စစ်ကြောင်းမှာ တပ်မ ၃၃ လက်အောက်ခံ တပ်ဖွဲ့များနှင့် ပြည်သူ့စစ်တပ်ဖွဲ့ဝင်များ ပူးပေါင်းကာ အင်အား ၈၀ ကျော်ဖြင့် စစ်ကြောင်းထိုးနေခြင်း ဖြစ်သည်ဟု ဆိုသည်။ ယခု စစ်ရေးလှုပ်ရှားမှု မတိုင်ခင်က အဆိုပါ စစ်ကြောင်းသည် စစ်ကိုင်းမြို့နယ် မင်းကွန်းဘုရား ရှိရာ ဒေသ တစ်ဝိုက်တွင် စစ်ရေးလှုပ်ရှားခဲ့ကြသည်ဟု မြေပြင် သတင်းအရင်းအမြစ်များက ပြောသည်။ ထို့ကြောင့် မြေပြင်စစ်ကြောင်းအပြင် လေကြောင်းအသုံးပြု တိုက်ခိုက်မှု မြင့်တက်လာနေသောကြောင့် ဒေသခံ အရပ်သားများ အနေဖြင့် လေကြောင်းအန္တရာယ်နှင့် ပတ်သက်၍ ကြိုတင်ပြင်ဆင်မှုများ လုပ်ကြရန် ကာကွယ် ရေး တပ်ဖွဲ့များက တိုက်တွန်းထားသည်။ ယခု ဩဂုတ်လ ၁ ရက်နေ့မှ ၁၄ ရက်နေ့အထိ လဝက်အတွင်း မြန်မာနိုင်ငံ တစ်ဝှမ်းရှိ မန္တလေး၊ စစ်ကိုင်း၊ မကွေး၊ ရခိုင် အပါအဝင် အခြား တိုင်းနှင့်ပြည်နယ် ၁၀ ခုတွင် စစ်တပ်၏ လေကြောင်း တိုက်ခိုက်မှုကြောင့် အရပ်သား ၈၆ ဦး သေဆုံးခဲ့ပြီး ၁၆၇ ဦး ဒဏ်ရာရရှိခဲ့သည်ဟု အမျိုးသား ညီညွတ်ရေး အစိုးရ NUG က ထုတ်ပြန်ထား သည်။

ဝက်လက်နှင့် စစ်ကိုင်း မြို့နယ် အစပ်ကို စစ်ကော်မရှင် စစ်ကြောင်းထိုး၊ လေကြောင်းတိုက်ခိုက်မှု လုပ်

Aug 21

စက်တပ်လေထီး တိုက်ခိုက်မှုကြောင့် အဖွားအို တစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။ စက်တပ် လေထီးဖြင့် တိုက်ခိုက်ခံရသဖြင့် အသက် ၇၀ ကျော် အရွယ် အဘွားအို တစ်ဦးသေဆုံးပြီး အခြား တစ်ဦး ခြေထောက် ဖြတ်လိုက်ရသည်ဟု ဒေသခံများက ပြောသည်။ စစ်ကိုင်းတိုင်းဒေသကြီး၊ ဆားလင်းကြီးမြို့နယ်ထဲက မိုးကြိုးပြင်တောင်ကျေးရွာကို စစ်ကော်မရှင်တပ်က ပါရာမော်တာ စက်တပ် လေထီးဖြင့် ပစ်ခတ်ခဲ့သဖြင့် အသက် ၇၀ ကျော် အရွယ် အဘွားတစ်ဦး သေဆုံးခဲ့ရ သည်ဟု ဒေသခံများက ပြောသည်။ ဒေသခံ အမျိုးသမီးတစ်ဦးက “စစ်ရေးအခြေအနေကတော့ ကြေးနီစီမံကိန်းက ဒီရှေ့ရက်တွေမှာ အနောက်ဘက် က ကျေးရွာတွေကို စစ်ကြောင်း ထိုးလာတာတွေ ရှိတယ်။ အဲ့ဒီနောက်မှာ ပါရာမော်တာနဲ့ လာပြီးတော့ ကြဲတာ။ အဘွားအို တစ်ဦးသေတယ်။ တစ်ဦးက ဒဏ်ရာရသွားတာ” ဟု ပြောသည်။ ဩဂုတ်လ ၁၈ ရက်နေ့ မွန်းလွှဲပိုင်း ၂ နာရီဝန်းကျင် အချန်တွင် မုံရွာ အနောက်မြောက်တိုင်း စစ်ဌာနချုပ် (နမခ) မှ တက်လာသော ပါရာမော်တာ စက်တပ် လေထီးဖြင့် တိုက်ခိုက်ခဲ့ခြင်း ဖြစ်ပြီး နောက်ထပ် ဒေသခံ အမျိုးသား တစ်ဦးမှာ ထိခိုက်ဒဏ်ရာကြောင့် ခြေထောက် တစ်ဖက်ဆုံးရှုံးသွားသည်။ သေဆုံးသူ အဘွားသည် အသက် ၇၀ကျော် အရွယ်ရှိပြီ ဖြစ်သည့် ဒေါ်သောင်းခင် ဆိုသူဖြစ်သည်။ ထို့အပြင် မိုးကြိုးပြင်ကျေးရွာ အပါအဝင် ကျေးရွာအချို့က ပြည်သူများမှာ ဩဂုတ်လ ၂၀ ရက်နေ့ အချိန်ထိ ဘေးလွှတ်ရာ နေရာများတွင် တိမ်းရှောင်နေရဆဲ ဖြစ်သည်ဟု ဆိုသည်။ ဆားလင်းကြီးမြို့နယ်ရှိ ဝမ်ပေါင် ကြေးနီစီမံကိန်း လုပ်ကွက်တွင် စစ်ကော်မရှင် တပ်ဖွဲ့များသည် အာဏာ သိမ်းပြီးနောက်ပိုင်းမှ စတင်ကာ ယနေ့အချိန်ထိ နေရာယူထားကြသည်။ ဩဂုတ်လ ၁၆ ရက်နေ့တွင် အဆိုပါ ကင်းယူထားသည့် စစ်ကောင်စီတပ်ဖွဲ့များသည် အင်အား ၄၀ ကျော်ဖြင့် ဝမ်ပေါင် ကြေးနီ စီမံကိန်း၏ အနောက်ဘက်တွင်ရှိသည့် ကျေးရွာအချို့ကို စစ်ကြောင်း ပတ်ထိုးနေခြင်း ဖြစ် သည်ဟု ဒေသခံများက ပြောသည်။ ဒေသခံတစ်ဦးက “ကျနော်တို့ သုံးသပ်မိတာကတော့ အင်အား အများအပြားနဲ့ စစ်ကြောင်း လှုပ်ရှားတာ မဟုတ် တော့ ကိစ္စကြီးငယ် တစ်ခုခုရှိလို့ ဖြစ်ပါလိမ့်မယ်။ ရွေးကောက်ပွဲကြောင့်တော့ မဟုတ်လောက်သေးဘူး။ အင်အားလည်း နည်းတယ် ဆိုတော့လေ။ အကြောင်းရင်း တစ်ခြား တစ်ခု ရှိလို့ထင်တယ်” ဟု ပြောသည်။ ထို့အပြင် စစ်ကြောင်းပတ်ထိုးနေသည့် အဆိုပါ စစ်ကြောင်းမှာ ကျောက်ဖြူတိုင် ကျေးရွာကိုလည်း လက်နက် ကြီးနှင့် ပစ်ခတ် တိုက်ခိုက်ခဲ့သဖြင့် သေဆုံးမှုများရှိသည်ဟု သိရသော်လည်း NMG က သီးခြား အတည်မပြုနိုင်သေးပါ။ ဩဂုတ်လဆန်း ၃ ရက်နေ့ကလည်း ဆားလင်းကြီးမြို့နယ်၊ အရှေ့ခြမ်းတွင် ရှိသည့် ကျေးရွာအချို့ကို စစ်တပ်က ပါရာမော်တာ စက်တပ် လေထီးဖြင့် ဗုံးကြဲတိုက်ခိုက်ခဲ့သောကြောင့် ဒေသခံများ ထွက်ပြေး တိမ်းရှောင်ခဲ့ရ သေး သည်။ စစ်ကောင်စီတပ်သည် လာမည့် ဒီဇင်ဘာလ ၂၈ ရက်နေ့တွင် ရွေးကောက်ပွဲ ကျင်းပမည်ဟု ထုတ်ပြန်ထားသည့် အပြင် ရွေးကောက်ပွဲ ဖြစ်မြောက်ရေးအတွက် နိုင်ငံတစ်ဝှမ်းရှိ ၎င်းတို့ လက်လွှတ်ထားရသည့် မြို့များ အပါအဝင် တော်လှန်ရေး အင်အားစုများ လှုပ်ရှားရာနေရာများကို သိသိသာသာ ထိုးစစ်များ ဆင်နေခြင်း ဖြစ်သည်။

စက်တပ်လေထီး တိုက်ခိုက်မှုကြောင့် အဖွားအို တစ်ဦး သေဆုံး

Aug 21

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။ ကရင်နီပြည်၊ ဒီးမော့ဆိုမြို့ကို အပြည့်အဝ ပြန်လည်ထိန်းချုပ်နိုင်ပြီ ဖြစ်ကြောင်း စစ်ကော်မရှင်တပ်က ထုတ်ပြန် မှုမှာ ဝါဒဖြန့်ခြင်းသာ ဖြစ်သည်ဟု ကရင်နီတော်လှန်ရေးတပ်ဖွဲ့များက ပြောသည်။ ဒီးမော့ဆိုမြို့ကို ထိန်းချုပ်နိုင်ရေး စစ်ကော်မရှင်တပ်က ကြိုးပမ်းနေဆဲဖြစ်ပြီး မြေပြင်တွင် တိုက်ပွဲများ ပြင်းပြင်း ထန်ထန် ဖြစ်ပွားနေသည်ဟု ဒေသခံ ကာကွယ်ရေး တပ်ဖွဲ့များက ပြောသည်။ ဒီးမော့ဆိုမြို့နယ် ကာကွယ်ရေးတပ်မှ တပ်ဖွဲ့ဝင်တစ်ဦး “တစ်မြို့လုံးကို ထိန်းချုပ်နိုင်တာ မဟုတ်သေးဘူး။ အဓိက မြို့မနေရာကိုပဲ ရထားတာပါ။ ဒီအရှေ့ဘက်ကို တော်တော်ရထားတယ်။ အနောက်ဘက်မှာတော့ ဒေါငံ ခါးကနေ မားနာပလော့ထိ ရထားတယ်” ဟု ပြောသည်။ ‘ရန်နိုင်မင်း’ စစ်ဆင်ရေးအဖြစ် သြဂုတ်လ ၄ ရက်နေ့မှ ၁၉ ရက်နေ့အထိ ထိုးစစ်ဆင်ပြီး နောက် မြို့တစ်ခုလုံးကို ထိန်းချုပ်နိုင်ခဲ့ခြင်း ဖြစ်သည်ဟု စစ်ကော်မရှင်တပ်က ကြေညာခဲ့သည်။ သို့သော် မြေပြင်ရှိ တော်လှန်ရေး တပ်ဖွဲ့များ၏ ပြောပြချက်အရ မြို့မဧရိယာနှင့် အချို့သော နေရာများကိုသာ ထိန်းချုပ်ထားနိုင်သေးသည်ဟု ဆိုသည်။ ဒီးမော့ဆိုမြို့ အဝင်ဆိုင်းဘုတ်၊ ငွေတောင်ဆည်၊ မြို့နယ်ခန်းမ၊ ဆေးရုံနှင့် အထက်တန်းကျောင်း ရှေ့၌ ရိုက်ထား သော ဓါတ်ပုံများနှင့် အတူ စစ်ကော်မရှင်တပ်က မြို့ကို ထိန်းချုပ်လိုက်ပြီဟု ထုတ်ပြန်လာသည်။ အဆိုပါ ထုတ်ပြန်မှုမှာ ဝါဒဖြန့်ခြင်း သက်သက်သာဖြစ်ကြောင်း၊ သတင်းအမှားသာ ဖြစ်ကြောင်း မြေပြင် ရှိ သတင်းအရင်းအမြစ်များက ပြောသည်။ စစ်ကော်မရှင်တပ်သည် ဒေသအခြေစိုက် ခလရ ၁၀၂ နှင့် ခမရ ၄၂၇ တို့ကို အခြေစိုက်ကာ အင်အား ၃၀၀ ကျော် ဖြင့် ဒီးမော့ဆို အနောက်ဘက်ခြမ်းရှိ ဒေါငံခါးကျေးရွာဘက်သို့ စစ်ကြောင်း နှစ်ကြောင်းဖြင့် ဆက်လက် စစ်ကြောင်းထိုးနေသည်ဟု မြေပြင် သတင်းအရင်းအမြစ်က ပြောသည်။ ထို့အပြင် လေကြောင်း၊ လက်နက်ကြီး၊ တင့်ကားအပြင် အထူးသဖြင့် ဒရုန်းများကို အဓိက အသုံးပြုကာ မြို့ကို ပြန်လည်ရရှိရေး အပြင်းအထန် ကြိုးစားနေသည်ဟု ဒေသတွင်းရှိ ကာကွယ်ရေးတပ်ဖွဲ့များက ဆိုသည်။ စစ်ကော်မရှင်၏ ထုတ်ပြန်ချက်အရ သြဂုတ်လ ၄ ရက်နေ့တွင် ဒီးမော့ဆိုမြို့ မြောက်ဘက်ခြမ်းရှိ ရွှေယောက် ရပ်ကွက်နှင့် အရှေ့တောင်ဘက်ရှိ ပါဒေါဒူကျေးရွာတို့မှ စတင်ထိုးစစ်ဆင်ခဲ့သည်ဟု ဆိုသည်။ ထို့နောက် အောင်မင်္ဂလာ၊ စည်ပင်သာယာရပ်ကွက်များအပါအဝင် မြို့ပေါ်ရှိ ရဲစခန်း၊ ထွေအုပ်ရုံးစသည့် အစိုးရ ရုံးများကို ဆက်တိုက်သိမ်းပိုက်ကာ သြဂုတ်လ ၁၉ ရက်နေ့တွင် မြို့တစ်ခုလုံးကို အလုံးစုံသိမ်းပိုက်နိုင်ပြီဟု ထုတ် ပြန်ခဲ့ခြင်း ဖြစ်သည်။ စစ်ကော်မရှင်တပ်သည် အင်အားအလုံးအရင်းဖြင့် ရှမ်း - ကရင်နီ နယ်စပ်ရှိ မိုးဗြဲမြို့ကို ဇူလိုင်လ ၁၆ ရက်နေ့တွင် ပြန်လည် ထိန်းချုပ်နိုင်ခဲ့ပြီးနောက် ဒီးမော့ဆိုမြို့ကိုလည်း ပြန်လည် ထိန်းချုပ်နိုင်ရေး ကြိုးစားနေခြင်း ဖြစ်သည်။ ကယန်းအမျိုးသား တပ်မတော် (KNA) နိုင်ငံရေး ဦးဆောင်ကော်မတီမှ ခွန်းရဲခေါင်က “လက်နက်ကိုင် တော်လှန် ရေးမှာလည်း ကျနော်တို့ အားကောင်းတဲ့ အချိန်မှာ ရန်သူစိုးမိုးတဲ့ နယ်မြေတွေကို စိုးမိုးသိမ်းပိုက်ထားတာ ရှိ သလို၊ ကျနော်တို့ဘက်က အားနည်းလာတဲ့ အခါမှာ လည်း ရန်သူရဲ့ အလုံးအရင်းနဲ့ ဝိုင်းဝန်း ပိတ်ဆို့ပြီးတော့မှ တိုက်ခိုက်တာ ခံရပါတယ်၊ ဒါဟာ တော်လှန်စစ်ရဲ့ သဘော သဘာဝပဲ ဖြစ်ပါတယ်။ ဒီအတွက်ကြောင့် ရန်သူရဲ့ တိုးချဲ့လာတဲ့အပေါ်မှာ ကျနော်တို့ စစ်ရေးအရ ဘယ်လို တုံ့ပြန်ကြမလဲဆိုတာကို စဉ်းစား တိုင်ပင်ပြီးတော့မှ ရန်သူကို ချေမှုန်းနိုင်တဲ့ နည်းနာတွေကို စုစည်းပြီး ဒါကို ကျနော်တို့ တုံ့ပြန်သွားကြရမှာ ဖြစ်ပါတယ်” ဟု ပြောသည်။ ဖယ်ခုံ၊ မိုးဗြဲ၊ ဒီးမော့ဆိုမြို့တို့ကို ကရင်နီ တော်လှန်ရေး တပ်များက တစ်လေးလုံး စစ်ဆင်ရေးကာလ အတွင်း ထိန်းချုပ်ထားခဲ့ပြီးနောက် ဒေသခံများ နေရပ်သို့ ပြန်လည်နေထိုင်ခဲ့ကြသည်။ သို့သော် လက်ရှိ စစ်တပ်၏ ထိုးစစ်များကြောင့် မိုးဗြဲ၊ ဖယ်ခုံနှင့် ဒီးမော့ဆိုမြို့နယ်တို့ထဲမှ ဒေသခံ တစ်သောင်းခွဲ ကျော်မှာ ထပ်မံ ထွက်ပြေး တိမ်းရှောင်နေကြရသည်ဟု ကရင်နီပြည် ကြားကာလ အုပ်ချုပ်ရေး ကောင်စီ IEC နှင့် အကူtညီပေးနေသော အဖွဲ့အစည်းများက ပြောသည်။ ဒီးမော့ဆိုမြို့ ထိုးစစ်အတွင်း စစ်တပ်က အရပ်သားများကို လူသားဒိုင်းကာ အဖြစ် အသုံးပြုခဲ့ကြောင်း ကရင်နီ အမျိုးသားများ ကာကွယ်ရေးတပ် (KNDF) က သြဂုတ်လ ၁၈ ရက်နေ့တွင် ထုတ်ပြန်ခဲ့ပြီး လွိုင်ကော် - ဒီးမော့ဆို - ဖရူဆို ပြည်ထောင်စုလမ်းမကြီးနှင့် လမ်းသွယ်များကို အသုံးမပြုရန် ပြည်သူများကို သတိပေးထားသည်။ ယခုနှစ်ကုန်တွင် ကျင်းပမည်ဟု ထုတ်ပြန်ထားသော ရွေးကောက်ပွဲအတွက် စစ်ကော်မရှင်တပ်မှ နယ်မြေ စိုးမိုးမှု ပြန်လည်ရယူနေခြင်း ဖြစ်သည်။

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော

Aug 21

ဒီးမော့ဆိုနှင့် မော်ချီး ဒေသများကို စစ်ကော်မရှင် ဗုံးကြဲ၊ အရပ်သား ထိခိုက်မှုများရှိ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။ ကရင်နီပြည်၊ ဒီးမော့ဆိုမြို့နယ်အတွင်းနှင့် ဖားဆောင်းမြို့နယ်တွင်းမှ မော်ချီးဒေသတို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ပြည်သူများ ထိမှန်သေဆုံး၊ ဒဏ်ရာ ရရှိခဲ့သည်။ စစ်ကော်မရှင်တပ်က မော်ချီးဒေသထဲကို ဩဂုတ်လ ၂၀ ရက်နေ့၊ နံနက် ၆ နာရီ ဝန်းကျင် အချိန်ခန့်တွင် လေကြောင်းမှ ထပ်မံ ဗုံးကြဲသောကြောင့် အရပ်သား ၁ ဦး သေဆုံးပြီး ၂ ဦး ထိမှန်ဒဏ်ရာရခဲ့သည်ဟု ကရင်နီပြည် ကြားကာလ အုပ်ချုပ်ရေး ကောင်စီ (IEC) ကပြောသည်။ IEC အတွင်းရေးမှူး -၂ ဦးဗညားက “ဒီမနက် ၆နာရီ မော်ချီး လိုခါးလိုမှာ ဗုံးကြဲတာပေါ့နော်။ Y12 ဗုံးကြဲ လေယာဉ်နဲ့ပေါ့နော် လာကြဲသွားပါတယ်။ အဲ့မှာတော့ တစ်ယောက် သေဆုံးပြီ နှစ်ယောက် ဒဏ်ရာရတယ်။ နေအိမ်တစ်လုံး ထိခိုက်ပျက်စီးတာ တွေ့ရပါတယ်” ဟု ပြောသည်။ မော်ချီးဒေသထဲက လိုခါးလိုကျေးရွာကို Y12 လေယာဉ်ဖြင့် ထပ်မံ ဗုံးကြဲတိုက်ခိုက်ခဲ့ခြင်းဖြစ်သည်ဟု ဦးဗညားက ပြောသည်။ စစ်ကော်မရှင်တပ်သည် တိုက်ပွဲဖြစ်ပွားခြင်း မရှိဘဲ မော်ချီးဒေသကို ဆက်တိုက် လေကြောင်း အသုံးပြု ဗုံးကြဲ တိုက်ခိုက်နေသည်ဟု ဒေသခံများက ပြောသည်။ အလားတူ ဩဂုတ်လ ၂၀ ရက်နေ့ တစ်နေ့တည်း၌ပင် ဒီးမော့ဆိုမြို့နယ် အနောက်ခြမ်းက နေရာတစ်နေရာလည်း လေကြောင်းမှ ဗုံးကြဲတိုက်ခိုက်ခံခဲ့ရသေးသည်။ ဦးဗညားက “ဒီးမော့ဆို အနောက်ခြမ်းကိုတော့ ၁၁ နာရီ ဝန်းကျင်လောက်မှာတော့ ဗုံးလာကြဲသွားပါတယ်“ ဟု ပြောသည်။ ဒီးမော့ဆိုမြို့နယ်ထဲတွင် မြေပြင်၌လည်း စစ်ကော်မရှင်တပ်နှင့် ကရင်နီ တော်လှန်ရေး အင်အားစုများအကြား တိုက်ပွဲများ ပြင်းပြင်းထန်ထန် ဖြစ်ပွားလျှက်ရှိသည်။ တိုက်ပွဲများ ဖြစ်နေသောကြောင့် ဒီးမော့ဆိုမြို့နယ်ထဲက လွိုင်ကော် - ဒီးမော့ဆို - ဖရူဆို ပြည်ထောင်စု လမ်းမကြီးကို ပြည်သူများ မသွားလာကြရန် ကရင်နီအမျိုးသားများ ကာကွယ်ရေးတပ် KNDF က သတိပေးထား သည်။ စစ်ကော်မရှင်တပ်သည် ကရင်နီပြည်နယ်ထဲ မြေပြင်ထိုးစစ်များ ထိုးနေသည့် အပြင် အရပ်သားများကို ပစ်မှတ်ထားပြီး လေကြောင်းမှ ဗုံးကြဲတိုက်ခိုက်မှုများ ဆက်တိုက်ဗုံးကြဲ တိုက်ခိုက်နေသောကြောင့် အရပ်သားပြည်သူများ အစုလိုက်အပြုံလိုက် သေဆုံးမှုများ ရှိနေသည်။ မော်ချီးဒေသထဲက လိုခါးလိုကျေးရွာကို ဩဂုတ်လ ၁၉ ရက်နေ့က စစ်တပ်က Y12 လေယာဉ်ဖြင့် ဗုံးကြဲ တိုက်ခိုက်မှုကြောင့် ဒေသခံပြည်သူ ၃ ဦး ထိမှန် ဒဏ်ရာရရှိခဲ့သည်။ အလားတူ ဩဂုတ်လ ၁၇ ရက်နေ့ကလည်း မော်ချီးဒေသကို စစ်တပ်က လေ‌ကြောင်းမှ ဗုံးကြဲတိုက်ခိုက်မှု ကြောင့် က လေးငယ် ၅ ဦး အပါအဝင် အရပ်သား ၃၂ ဦး သေဆုံးခဲ့ကာ ၅ ဦး ထိခိုက်ဒဏ်ရာရရှိခဲ့ပြီး တိုက် ခိုက်ခံခဲ့ရသော နေရာများမှ ပြည်သူအချို့လည်း ပျောက်ဆုံးနေလျှက်ရှိသည်။ စစ်ကော်မရှင်တပ်က အရပ်သားပြည်သူများကို ပစ်မှတ်ထားပြီး ဗုံးကြဲတိုက်ခိုက်ခဲ့မှုကြောင့် ဩဂုတ်လ ၁၇ ရက်နေ့မှ ၂၀ ရက်နေ့အထိ မော်ချီးဒေသရှိ အရပ်သားပြည်သူ ၃၃ ဦး သေဆုံးပြီး ထိမှန်ဒဏ်ရာရရှိသူ ၁၀ ဦး အထိ ရှိနေပြီ ဖြစ်သည်။ ကရင်နီပြည်ကြားကာလ အုပ်ချုပ်ရေး ကောင်စီ (IEC) က ကုလသမဂ္ဂနှင့် အာဆီယံ အပါအဝင် နိုင်ငံတကာ အစိုးရများ အနေဖြင့် စစ်ကော်မရှင်တပ်၏ ကြီးလေးသော စစ်ရာဇဝတ်မှု ကျူးလွန်နေမှုအပေါ် ထိရောက်စွာ အရေးယူပေးရန် တိုက်တွန်း တောင်းဆိုထားသည်။

ဒီးမော့ဆိုနှင့် မော်ချီး ဒေသများကို စစ်ကော်မရှင် ဗုံးကြဲ၊ အရပ်သား ထိခိုက်မှုများရှိ

Aug 20

အမြင့်ပေ ၃ သောင်းကျော်တွင် လေယာဉ် အင်ဂျင် မီးလောင်၍ အရေးပေါ် ဆင်းသက်ခဲ့ရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။ ခရီးသည် ၂၇၃ ဦးနှင့် လေယာဉ်အမှုထမ်း ၈ ဦး လိုက်ပါလာသည့် ဘိုးရင်း 757 လေယာဉ်ကြီးဟာ ဂရိနိုင်ငံ ကော်ဖူး Corfu လေဆိပ်မှ ပျံတက်လာခဲ့သည်။ ဦးတည်သည့် အရပ်မှာ ဂျာမဏီနိုင်ငံ ဒတ်ဆဲလ်ဒေါ့ဖ် Dusseldorf မြို့သို့ ဖြစ်သည်။ အမြင့်ပေ ၃၆,၀၀၀ ၌ ပျံသန်းနေစဉ် ခရီးသည် အချို့က ညာဘက် လေယာဉ်တောင်ပံ အောက်ဖက်မှ မီးရောင်‌ များကို တွေ့လာခဲ့ရသည်။ အမြင့်ပေ သုံးသောင်းကျော်၊ အလုံပိတ် သတ္တု ပြွန်ချောင်းထဲတွင် မီးလောင်နေသည်ကို မြင်လိုက်ရခြင်းသည် ခရီးသည်များကို ထိတ်လန့် တုန်လှုပ်သွားစေခဲ့သည်။ အချို့ ခရီးသည်များက လေယာဉ်ပေါ်တွင် သုံးနိုင်သော ဖုန်းများ၊ အင်တာနက် ဆက်သွယ်ရေးများမှ တဆင့် ချစ်ခင်ရသူများကို နောက်ဆုံး နှုတ်ဆက်စာများ ပေးပို့ခဲ့ကြသည်။ သို့သော်လည်း လေယာဉ်မှူးနှင့် အမှုထမ်းများက လေယာဉ်ကို အရေးပေါ် ဆင်းသက်ရန် ဆုံးဖြတ်ခဲ့ကြသည်။ လေယာဉ်ကို အီတလီ နိုင်ငံသို့ လမ်းကြောင်းပြောင်းပြီး အရေးပေါ် ဆင်းသက်ခဲ့သည်။ ညာဖက် အင်ဂျင် မီးလောင် ကျွမ်းခဲ့ သော်လည်း လေယာဉ်မှူးနှင့် လေယာဉ်အမှုထမ်းများမှာ ဘိုးရင်း 757 လေယာဉ်ကြီးကို လေဆိပ်သို့ ဘေးကင်းလုံခြုံစွာနှင့် ဆင်းသက်နိုင်ခဲ့သည်။ အရေးပေါ် ဆင်းသက်ခဲ့သည့် ဘရင်ဒီစီ Brindisi မြို့တွင် တည်းခိုရန် အခန်း လုံလုံလောက်လောက် မရှိခဲ့ပေ။ သို့သော် အရေးပေါ် စောင်များ စီစဉ်ပြီး ခရီးသည် အချို့မှာ လေဆိပ်တွင်သာ အိပ်စက်ခဲ့ကြရသည်။ “ဒါဟာ အင်မတန် ကြောက်စရာကောင်းတဲ့ အတွေ့အကြုံဖြစ်တယ်၊ Good Bye ဆိုတဲ့ စာသားတွေ ပို့ပြီးပါပြီ၊ ဒီတခါတော့ ပြီးသွားပြီလို့ပဲ ထင်ခဲ့မိတယ်” ဟု ခရီးသည်တစ်ယောက်က ဂျာမဏီက ဘင်လ် Bild ဟု ခေါ်သော သတင်းဌာနကို ပြောပြခဲ့သည်။

အမြင့်ပေ ၃ သောင်းကျော်တွင် လေယာဉ် အင်ဂျင် မီးလောင်၍ အရေးပေါ် ဆင်းသက်ခဲ့ရ

Aug 20

နိုင်ငံခြား ကျောင်းသား ၆၀၀၀ ကျော် အမေရိကန်က ဗီဇာ ဖျက်သိမ်း    သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။ အမေရိကန်နိုင်ငံက ယခုနှစ်အတွင်း နိုင်ငံရပ်ခြားမှ ကျောင်းလာတက်နေသော ကျောင်းသား ၆,၀၀၀ ကျော်၏ ဗီဇာများကို ရုတ်သိမ်းခဲ့သည်ဟု အစိုးရက ထုတ်ပြန်ခဲ့သည်။ ဗီဇာများ ရုတ်သိမ်းရသည့် အကြောင်းအရင်းများနှင့် ပတ်သက်၍ ဥပဒေ ချိုးဖောက်မှု၊ ဗီဇာ ရက်လွန်ခြင်း နှင့် အကြမ်းဖက်မှုကို ထောက်ခံသည်ဆိုသော စွပ်စွဲချက်များ ပါဝင်သည်။ အစိုးရ ပြောရေး ဆိုခွင့်ရှိသူက ကျောင်းသား ၄,၀၀၀ ခန့်သည် ဥပဒေ ချိုးဖောက်မှုများ ကျူးလွန်ခဲ့သည်ဟု ဆိုသည်။ ချိုးဖောက်မှုများ ဆိုရာတွင် ရန်လိုတိုက်ခိုက်မှု၊ အရက်/မူးယစ်ဆေးဝါး လွှမ်းမိုးမှုအောက်တွင် ယာဉ်မောင်းနှင် မှုနှင့် ခိုးမှုများ ပါဝင်သည်။ ကျောင်းသား အယောက် ၂၀၀ မှ ၃၀၀ ခန့်မှာ အမေရိကန်က အကြမ်းဖက်အဖွဲ့ဟု သတ်မှတ်ထားသည့် အဖွဲ့အစည်းများ အပေါ် လူမှု ကွန်ရက် အပါအဝင် ထောက်ခံရေးသားမှုများကြောင့် ငြင်းပယ်ခြင်း ဖြစ်သည်ဟု ဆိုသည်။

နိုင်ငံခြား ကျောင်းသား ၆၀၀၀ ကျော် အမေရိကန်က ဗီဇာ ဖျက်သိမ်း

Aug 20

ယူကရိန်း၊ အမေရိကန်တို့နှင့် သုံးပွင့်ဆိုင်တွေ့ဆုံရေး ကရင်မလင် ပယ်ချ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။ အမေရိကန် သမ္မတ ဒေါ်နယ် ထရန့်က ရုရှား သမ္မတ နှင့် ယူကရိန်း သမ္မတတို့ တွေ့ဆုံနိုင်ရန် ကြိုးပမ်းနေစဉ်မှာ ပင် ကရင်မလင် နန်းတော်က တွေ့ဆုံရေးကို ပယ်ချလိုက်သည်။ သမ္မတ ဒေါ်နယ် ထရန့်က ရုရှားသမ္မတ ပူတင်နှင့် အလာစကာတွင် တွေ့ဆုံခဲ့ပြီး ယူကရိန်း သမ္မတကိုလည်း အိမ်ဖြူတော်က ဘဲဥပုံ ခန်းမကြီးတွင် တွေ့ဆုံခဲ့သည်။ သမ္မတ သုံးဦး တွေ့ဆုံနိုင်မည်ဟု မျှော်လင့်ကြောင်းလည်း ပြောခဲ့သည်။ ယခုတော့ ထိုကိစ္စများ ဖြစ်မလာတော့ ပေ။ သမ္မတ ထရန့်က‌တော့ စစ်ပွဲ ရပ်ဆိုင်းဖို့အတွက် သမ္မတ ပူတင်နှင့် သမ္မတ ဇယ်လန်းစကီးတို့ တွေ့ဆုံဖို့ ထပ်မံ တောင်းဆိုထားသည်။ အဆိုပါ ပဋိပက္ခမှာ “ခက်ခဲတဲ့ ကိစ္စရပ်” ဖြစ်သည်ဟု သမ္မတ ထရန့်က ပြောလိုက်ပြီး သမ္မတ ပူတင်အနေနှင့် ရန်လိုမှုများကို အဆုံးသတ်ရန် စိတ်မဝင်စားခြင်းလည်း ဖြစ်နိုင်သည်ဟု ပြောသည်။ သမ္မတ ပူတင်က စစ်ပွဲ ပြီးဆုံးရေး မလုပ်ခဲ့ပါက “ကြမ်းတမ်းတဲ့ အခြေအနေကို” ရင်ဆိုင်ရလိမ့်မည်ဟု သူက ထပ်မံ ခြိမ်းခြောက်လိုက်သည်။ ယခု တွေ့ဆုံမှုများ မတိုင်ခင်တွင် ရုရှားက ဒွန်ဘာ့စ်နှင့် သိမ်းဆည်းနယ်မြေများကို ၎င်းတို့ကို ပေးပါက စစ်ရပ်ဆိုင်း ပေးမည်ဟု ပြောခဲ့ကြောင်း သမ္မတ ထရန့်က ပြောခဲ့သည်။ ပြီးခဲ့သည့် ရက်ပိုင်းအတွင်း အမေရိကန် သမ္မတသည် ယူကရိန်း သမ္မတနှင့် ဥရောပက ထိပ်သီးခေါင်းဆောင် များနှင့် တွေ့ဆုံပြီး ယူကရိန်း၏ လုံခြုံရေးကို အမေရိကန် နှင့် ဥရောပတို့ ပူးတွဲ တာဝန်ယူသွားမည်ဟု ပြောဆိုခဲ့ သည်။ ထို့နောက်တွင် ရုရှားက တွေ့ဆုံရေးကို ပယ်ချခဲ့ခြင်း ဖြစ်သည်။

ယူကရိန်း၊ အမေရိကန်တို့နှင့် သုံးပွင့်ဆိုင်တွေ့ဆုံရေး ကရင်မလင် ပယ်ချ

Aug 20

ပုလောမြို့နယ်ထဲက ကျေးရွာများကို စစ်ကော်မရှင်တပ် ဗုံးကြဲ၊ ကလေး ၁ ဦး သေဆုံး၊ ၄ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၀ ရက်။ တိုက်ပွဲဖြစ်ပွားခြင်း မရှိဘဲ ပုလောမြို့နယ် ဇရပ်ဆိပ်ကျေးရွာအုပ်စုထဲက (မိမ္မ) မိန်းမမြို့ကျေးရွာနှင့် ဘိုင်းပြင် ကျေးရွာ ကြားကို စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့သဖြင့် ကလေးတစ်ဦး သေဆုံးပြီး ထိခိုက် ဒဏ်ရာ ရသူများလည်း ရှိသည်ဟု ရွာသားများက ပြောသည်။ ဇူလိုင်လ ၁၉ ရက်နေ့၊ နံနက် ၁၀ နာရီခွဲ အချိန်ခန့်က မြိတ်လေတပ်မှ ထွက်ခွာလာသည့် ဂျက်ဖိုက်တာဖြင့် ဗုံးကြဲတိုက်ခိုက်ခဲ့သည့် အပြင် စက်သေနတ်ဖြင့်ပါ ပစ်ခတ်ခဲ့ခြင်း ဖြစ်သည်။ ထိုသို့ တိုက်ခိုက်ခံရမှုကြောင့် အသက် ၁၀ နှစ်ခန့်အရွယ် ကလေးငယ်တစ်ဦး သေဆုံးခဲ့ပြီး အသက် ၆၀ အရွယ် အမျိုးသမီးကြီးနှစ်ဦး အပါအဝင် ပြည်သူ လေးဦး ဒဏ်ရာရရှိထားသည်ဟု ပြည်သူ့ကာကွယ်ရေးတပ်မတော် မြိတ်ခရိုင် အမှတ် (၁) တပ်ရင်း တာဝန်ရှိသူက ဆိုသည်။ လေကြောင်းတိုက်ခိုက်ခံခဲ့ရသည့် ကျေးရွာများအနီးတွင် နှစ်ဖက်ကြာ၌ ထိတွေ့တိုက်ပွဲ ဖြစ်ပွားနေခြင်း မရှိဘူးဟု ရွာသားများက ဆိုသည်။ ရွာသားတစ်ဦးက “အခုလက်ရှိမှာက ရှာဖွေကယ်ဆယ်ရေးတော့ ဆက်ပြီး လုပ်နေတုန်းပါပဲ။ နောက်ထပ် စာရင်း ထပ်တိုးလာနိုင်ပါသေးတယ်” ဟု ပြောသည်။ ထို့အပြင် မိန်းမမြို့ကျေးရွာမှ နေအိမ်သုံးလုံးမှာလည်း လေကြောင်း ဗုံးကြဲတိုက်ခိုက်ခံရမှုကြောင့် ထိမှန် ပျက်စီးသွားခဲ့သည်ဟု အဆိုပါ ဒေသခံ ရွာသားက ပြောသည်။ ဇူလိုင်လ ၁၆ ရက်နေ့ကလည်း တနင်္သာရီမြို့နယ်အတွင်း မောတောင်နယ်စပ် ကုန်သွယ်ရေးလမ်းပေါ်ရှိ သိန်ခွန်းကျေးရွာကို လေယာဉ်ဖြင့် ဗုံးကြဲတိုက်ခိုက်ခဲ့ပြီးနောက် စက်သေနတ်ဖြင့်ပါ ပစ်ခတ်ခဲ့သေးသော်လည်း လူထိခိုက်မှု မရှိခဲ့ကြောင်း ရွာသားတစ်ဦးက ဆိုသည်။ စစ်ကောင်စီတပ်က မောတောင်နယ်စပ် လမ်းကို ပြန်လည်ထိန်းချုပ်နိုင်ရေး အင်အားဖြည့်တင်းပြီး စစ်ကြောင်း ထိုး တိုက်ခိုက်နေသည်မှာ ၇ လ ကျော်လာပြီ ဖြစ်သော်လည်း ရှေ့ဆက်မတိုးနိုင်ဘဲ သိန်ခွန်းကျေးရွာဝန်းကျင်၌ သာ ရှိနေသေးသည်။

ပုလောမြို့နယ်ထဲက ကျေးရွာများကို စစ်ကော်မရှင်တပ် ဗုံးကြဲ၊ ကလေး ၁ ဦး သေဆုံး၊ ၄ ဦး ဒဏ်ရာရ

Aug 20

စစ်ကော်မရှင် တပ်စခန်းများ အနီးမနေကြရန် KNU သတိပေး သတင်းနှင့်vမီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၀ ရက်။ စစ်ကောင်စီ တပ်စခန်းများအနီး နေထိုင်ကြသည့် ပြည်သူများ အနေဖြင့် စစ်ရေးအသိ စစ်ရေးသတိဖြင့် နေထိုင် သွားလာကြရန်နှင့် စစ်ကောင်စီတပ်ဖွဲ့ စခန်းချရာ နေရာများကို တတ်နိုင်သမျှ ရှောင်ကြရန် ကရင် အမျိုးသား အစည်းအရုံး - KNU တပ်မဟာ (၄) အထူးတပ်ဖွဲ့မှ သတိပေးထုတ်ပြန်ထားသည်။ စစ်ရေးအရှိန် မြှင့်တင်ရန်ရှိနေသည့်အတွက် စစ်ကောင်စီတပ် စခန်းချ တပ်စွဲထားသည့် နေရာအနီးတွင် မနေကြ ရန် အသိပေးရခြင်း ဖြစ်ကြောင်း ဇူလိုင်လ ၁၇ ရက်နေ့က ထုတ်ပြန်ထားခြင်း ဖြစ်သည်။ KNU တပ်မဟာ (၄) မှ တာဝန်ရှိသူတစ်ဦးက “အသိပေးစာကတော့ ထုတ်ပြန်ထားပြီးပါပြီ။ တိုက်ပွဲဖြစ်လို့ မရွှေ့မပြောင်းတဲ့ သူတွေ ထိခိုက်မှုများ ရှိခဲ့ရင်တော့ တာဝန်ယူ ဆောင်ရွက်ပေးမှာ မဟုတ်ဘူး ဆိုတာလည်း သိအောင်တော့ ထည့်ရေးပေးထားတယ်” ဟု ပြောသည်။ ထို့အပြင် စစ်ကောင်စီကို ပံ့ပိုးကူညီခြင်း၊ သတင်းပေးခြင်း၊ ရိက္ခာထောက်ပံ့ပေးခြင်းစသည့် ကူညီမှုများ ကိုလည်း မလုပ်ကြရန် အထူးတားမြစ်ထားသည် ဟုလည်း KNU တပ်မဟာ (၄) မှ တာဝန်ရှိသူက ပြောသည်။ KNU တပ်မဟာ (၄) တပ်ဖွဲ့နှင့် မဟာမိတ် ပူးပေါင်းတပ်ဖွဲ့များ၏ စစ်ဆင်ရေး လုပ်ဆောင်ချိန်များ အတွင်း စစ်ကောင်စီတပ်ဖွဲ့ များနှင့် အနီးအနား တဝိုက်တွင် ရောက်ရှိနေပါကလည်း ထိတ်လန့်တုန်လှုပ်ခြင်း မရှိဘဲ ကျည်ကွယ် မျက်ကွယ်နေရာများတွင် အကာအကွယ်ယူ၍ တတ်နိုင်သမျှ လုံလုံခြုံခြုံ နေထိုင်ကြရန် ထုတ်ပြန် ချက်ထဲတွင် အကြံပြု တိုက်တွန်းထားသည်။ ထို့အပြင် နေအိမ်များတွင်လည်း ဗုံးခိုကျင်းများ စနစ်တကျ တူးထားရန်နှင့် အရေးကြီး စာရွက်စာတမ်းများ၊ တန် ဖိုးရှိ ပစ္စည်းများကို သေသေချာချာ ထုပ်ပိုးထားကြရန်ကိုလည်း မေတ္တာရပ်ခံ ထားသည်။ အလားတူ အမျိုးသားညီညွတ်ရေးအစိုးရ - NUG လက်အောက်ခံ ပြည်သူ့ကာကွယ်ရေး တပ်မတော်၊ မြိတ်ခရိုင် အမှတ် (၁) တပ်ရင်းကလည်း စစ်ရေးအရှိန်မြှင့် လုပ်ဆောင်သွားမည် ဖြစ်ကြောင်း ထုတ်ပြန်ထားသည်။

စစ်ကော်မရှင် တပ်စခန်းများ အနီးမနေကြရန် KNU သတိပေး

« Prev 1 … 129 130 131 132 133 … 1,048 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

တရုတ်ခရီးသွား လျော့နည်းသော်လည်း ဂျပန်ခရီးသွားလုပ်ငန်း စံချိန်တင်တိုးတက်
မော်စကိုနှင့် ရုရှားအနှံ့ ယူကရိန်းက ဒရုန်းစစ်ဆင်ရေး ဆင်နွှဲ
အီရန်က UAE နျူကလီးယားစက်ရုံကို ဒရုန်းဖြင့် တိုက်ခိုက်
ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်

Archives

Archives

×Close