NMG Doh – Page 133 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Jan 23

တနှစ်အတွင်း ရန်ကုန်တိုင်း၌ စစ်ကော်မရှင်၏ ဖမ်းဆီးမှု ခံရသူ ၂၀၀၀ ကျော်ရှိ။ ၁၅၀၀ နီးပါး ပျောက်ဆုံးနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ ရန်ကုန်တိုင်းအတွင်းရှိ မြို့နယ်အသီးသီးတွင် ၂၀၂၅ ခုနှစ် တစ်နှစ်တာအတွင်း စစ်ကော်မရှင်၏ မတရား ဖမ်းဆီး ခြင်းခံရသူ စုစုပေါင်း ၂,၀၃၅ ဦးအထိ ရှိခဲ့ကြောင်း Rangoon Scout Team (RST) အဖွဲ့က ထုတ်ပြန်လိုက်သည်။ အဆိုပါ ဖမ်းဆီးမှုများသည် ကိုကိုကျွန်းမြို့နယ်မှအပ ကျန်ရှိသည့် မြို့နယ် ၄၄ ခုလုံးတွင် ဖြစ်ပွားခဲ့ခြင်းဖြစ်ပြီး စစ်မှုထမ်းရန်အတွက် လမ်းပေါ်တွင် ဖမ်းဆီးခြင်း၊ နေအိမ်များအထိ လိုက်လံရှာဖွေခြင်းနှင့် နိုင်ငံရေးအရ စွပ်စွဲ ဖမ်းဆီးခြင်းများ ပါဝင်နေသည်။ RST မှ သတင်းအချက်အလက်ဆိုင်ရာ တာဝန်ရှိသူတစ်ဦးက “လူ ၂,၀၃၅ ဦးက ဖမ်းဆီးခံရတဲ့ လူဦးရေ စုစုပေါင်းပါ။ စစ်မှုထမ်းအတွက် လမ်းပေါ် လိုက်ဆွဲတာတွေကော၊ စာရင်းနဲ့ အိမ်ထိလိုက်ရှာဆွဲတာတွေကော ပါပါတယ်။ အဲ့အပြင် တော်လှန်ရေးအလုပ်တွေ လုပ်လို့၊ စစ်တပ်ကို ဝေဖန်လို့၊ ရွေးကောက်ပွဲကို ဝေဖန်လို့ စသဖြင့် စွပ်စွဲပြီး ဖမ်းတာတွေလည်း ပါပါတယ်ဗျ” ဟု ပြောသည်။ မှတ်တမ်းများအရ ဖမ်းဆီးခံရသူ ၂,၀၃၅ ဦးအနက် ၂၈၂ ဦးသာ ပြန်လည်လွတ်မြောက်ခဲ့ပြီး ၂၉၄ ဦးမှာ အကျဉ်း ထောင်များနှင့် စစ်သင်တန်းကျောင်းများသို့ ပို့ဆောင်ခံခဲ့ရသည်ဟု RST က ဇန်နဝါရီလ ၂၁ ရက်နေ့တွင် ထုတ်ပြန်သည်။ ကျန်ရှိသည့် ၁,၄၅၉ ဦးမှာမူ မည်သည့်နေရာသို့ ရောက်ရှိနေမှန်းမသိဘဲ ယနေ့တိုင် ပျောက်ဆုံးနေဆဲဖြစ်သည်ဟု ထုတ်ပြန်ချက်ထဲတွင် ဖော်ပြထားသည်။ အထူးသဖြင့် စစ်မှုထမ်းဥပဒေဖြင့် ဖမ်းဆီးခေါ်ဆောင်ခံရသူ ၃၉၃ ဦးရှိသည့်အနက် ၁၇၇ ဦးမှာ စစ်သင်တန်း ကျောင်းများသို့ ရောက်ရှိသွားခဲ့ကြောင်း RST က ဖော်ပြသည်။ အဆိုပါ စစ်မှုထမ်းရန် ဖမ်းဆီးခံရသူများထဲမှ ၂၉ ဦးမှာ ငွေကြေးဖြင့် ပြန်လည်ရွေးချယ်နိုင်သဖြင့် လွတ်မြောက် လာခဲ့ပြီး ၁၅ ဦးမှာမူ ကိုယ်တိုင် ထွက်ပြေးလွတ်မြောက်နိုင်ခဲ့ကြသည်။ RST တာဝန်ရှိသူက “စစ်မှုထမ်းအတွက် ဖမ်းခံရတဲ့ စာရင်းက ကျနော်တို့ လူရင်းတွေဆီက သိရတာကော၊ မီဒီယာသတင်းတွေကော ပါပါတယ်။ ပိုက်ဆံနဲ့ ပြန်ရွေးလိုက်နိုင်တာတွေရော အဲကနေ သိရတာပေါ့နော်။ အဲ့ ဖြစ်စဉ်တွေကလည်း ကာယ ကံရှင်တွေနဲ့ နီးစပ်သူတွေဆီက သိရတာနဲ့ မီဒီယာသတင်းတွေကနေ ဒေတာယူထား တာပါ။ ကျနော်တို့ သိရ သလောက် ဒေတာတွေပါ။ မြေပြင်နဲ့တော့ အနည်းငယ်ကွာနိုင်ပါတယ်။ ဒီစာရင်းထက် တော့ မလျော့နိုင်ပါဘူး” ဟု ဆက်လက်ရှင်းပြသည်။ ၂၀၂၅ ခုနှစ်အတွင်း စစ်မှုထမ်းအပတ်စဉ် ၉ မှ ၂၀ အထိ ခေါ်ယူခဲ့ရာတွင် ရန်ကုန်တိုင်းအတွင်း၌ အပတ်စဉ် ၁၂ ခုစာအတွက် လူဦးရေ ၆,၀၀၀ ခန့်အထိ စစ်မှုထမ်းရန် စုဆောင်းဖမ်းဆီးခံခဲ့ရနိုင်သည်ဟု RST က ခန့်မှန်းထား သည်။ ရန်ကုန်သည် လူဦးရေ အများဆုံးရှိရာ ဒေသဖြစ်သဖြင့် အခြားပြည်နယ်နှင့် တိုင်းများထက် အဖမ်းအဆီး ပိုမိုများပြားနိုင်ကြောင်းလည်း သုံးသပ်ကြသည်။ မြို့နယ်အလိုက် ဖမ်းဆီးမှုများတွင် သာကေတမြို့နယ်သည် လူဦးရေ ၁၅၀ ဝန်းကျင်ဖြင့် အများဆုံးဖြစ်ပြီး၊ မြောက်ဒဂုံမြို့နယ်တွင် ၁၁၀ ဝန်းကျင်ဖြင့် ဒုတိယအများဆုံးဖြစ်သည်။ သင်္ဃန်းကျွန်း၊ မြောက်ဥက္ကလာ၊ အင်းစိန်၊ လှိုင်နှင့် တာမွေမြို့နယ်တို့တွင်လည်း တစ်မြို့နယ်လျှင် လူ ၁၀၀ နီးပါးခန့်စီ ဖမ်းဆီးခံခဲ့ရကြောင်း ဆိုသည်။ ယခုထုတ်ပြန်သည့် စာရင်းတွင် ခိုးဆိုးလုယက်မှု၊ မူးယစ်ဆေးဝါးနှင့် ရာဇဝတ်မှုများကြောင့် ဖမ်းဆီးခံရသူများ မပါဝင်ဘဲ စစ်ကောင်စီကို ဆန့်ကျင်မှုနှင့် အကြောင်းမဲ့ မတရားဖမ်းဆီးခံရသူများကိုသာ သီးသန့်ကောက်ယူ ထား ခြင်းဖြစ်ကြောင်း RST က ဆိုသည်။ လက်ရှိတွင် ရန်ကုန်မြို့နေ လူငယ်များမှာ လမ်းပေါ်ထွက်ရန်ပင် လုံခြုံမှုမရှိတော့ဘဲ စစ်ဘေးအန္တရာယ်၏ ခြိမ်းခြောက်မှုအောက်တွင် ရှင်သန်နေထိုင်နေကြရသည်။

တနှစ်အတွင်း ရန်ကုန်တိုင်း၌ စစ်ကော်မရှင်၏ ဖမ်းဆီးမှု ခံရသူ ၂၀၀၀ ကျော်ရှိ။ ၁၅၀၀ နီးပါး ပျောက်ဆုံးနေ

Jan 23

သတင်းသမားများ အလုပ်လုပ်ရာတွင် ပဋိပက္ခ အခြေအနေများက အကြီးမားဆုံး စိန်ခေါ်မှု ဖြစ်လာ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ လက်ရှိဖြစ်ပွားနေသည့် ပဋိပက္ခများအတွင်း သတင်းထောက်များ အတွက် ဘေးကင်းလုံခြုံရေးနှင့် သတင်း လွတ်လပ်စွာ ရယူခွင့်ရရှိရေးသည် အကြီးမားဆုံးသော စိန်ခေါ်မှုဖြစ်နေကြောင်း လွတ်လပ်သော မြန်မာ သတင်းမီဒီယာ ကောင်စီ (IPCM) က သတိပေး ပြောကြားလိုက်သည်။ စစ်အာဏာ သိမ်းပြီးနောက်ပိုင်း မြန်မာနိုင်ငံသည် ကမ္ဘာ့အဆိုးဆုံး သတင်းလွတ်လပ်ခွင့် ဖိနှိပ်ခံရသည့် နိုင်ငံများ စာရင်းတွင် ပါဝင်နေပြီး၊ စစ်ကော်မရှင် ထိန်းချုပ်ရာ ဒေသများသာမက တော်လှန်ရေးတပ်ဖွဲ့များ ထိန်းချုပ်ရာ နယ်မြေအချို့တွင်လည်း လုံခြုံရေးအကြောင်းပြချက်ဖြင့် သတင်းလုပ်ငန်း လွတ်လပ်စွာ လုပ်ကိုင်ခွင့် ကန့်သတ်ခံနေရသည်ဟု ဆိုသည်။ IPCM ၏ အတွင်းရေးမှူး ဦးတိုးဇော်လတ်က “လုံခြုံရေး အကြောင်းပြချက်နဲ့ လွတ်လပ်စွာ သတင်းယူခွင့် တစ်ချို့ နေရာတွေမှာ မရှိပါဘူး။ သတင်းသမားတွေ သတင်းရယူပိုင်ခွင့်ကို လုံလုံခြုံခြုံနဲ့ အထူးသဖြင့်တော့ နှစ်ဖက်စလုံးမှာပါပဲ စစ်ကောင်စီအုပ်ချုပ်တဲ့ နေရာကော တခြား တော်လှန်ရေးအုပ်စု အုပ်ချုပ်တဲ့ နေရာတွေ မှာပါ ပြောတာပါ။ ဥပမာ - အညာလို ဒေသမှာလည်း ပသုံးလုံးနဲ့ကြားမှာ သတင်းရယူဖို့ အခက်အခဲ အများကြီး ရှိတယ်လို့ မြေပြင်သတင်းတွေက ပြောပါတယ်” ဟု ပြောသည်။ မြေပြင်တွင် သတင်းရယူနေသည့် ကရင်နီအခြေစိုက် အမျိုးသမီးသတင်းထောက် တစ်ဦးကလည်း ပဋိပက္ခ ဒေသများအတွင်း ကြုံတွေ့ရသည့် အခက်အခဲကို ယခုကဲ့သို့ ပြောသည်။ “စစ်ဘက်ဆိုင်ရာနဲ့ ပတ်သက်ပြီးတော့ သတင်းယူဖို့ သွားတဲ့အခါမှာဆိုရင် ကျမတို့ တပ်ရင်းတပ်ဖွဲ့ အများကြီးနဲ့ ကြုံရတယ်ပေါ့နော်။ သူတို့က ဒီဟာကို မယူပါနဲ့ ဒီဟာကို မလုပ်ပါနဲ့ ကိုယ့်ကို ပြောလိုက်လို့ရှိရင် ကိုယ့်မှာ တခြားရွေးချယ်စရာ မရှိဘူးပေါ့နော်။ အဲ့လို ကြုံရတဲ့အခါဆိုရင် စိတ်ထဲမှာ နည်းနည်း အောင့်လာတယ် ပြီးရင် ကြောက်လာတယ်။” ပြီးခဲ့သည့်ကာလအတွင်း သတင်းမီဒီယာသမားများ အပေါ် ကိုယ်ထိလက်ရောက် ကျူးလွန်မှုများနှင့် ဖမ်းဆီးမှု များ ဆက်တိုက်ဖြစ်ပွားခဲ့သည်။ ၂၀၂၄ ခုနှစ်ကုန်ပိုင်းတွင် အရာတော်မြို့နယ်၌ အမျိုးသမီးသတင်းထောက် မငြိမ်းချမ်းစုကြည် ကိုယ်ထိ လက် ရောက် စော်ကားခံခဲ့ရသလို၊ ၂၀၂၅ ခုနှစ်အတွင်း၌လည်း မောင်တောအခြေစိုက် သတင်းထောက် မမုဒြာကို အာရက္ခတပ်တော် (AA) က ဖမ်းဆီးခဲ့သည့် ဖြစ်စဉ်များ ရှိခဲ့သည်။ ထို့ပြင် အလွတ်တန်း သတင်းထောက် မဆွတ်ရိန်ပန် (ခေါ်) ဆွမ်ကိုလည်း စစ်ကော်မရှင်က ပုဒ်မအမျိုးမျိုးဖြင့် ထောင်ဒဏ် ၁၃ နှစ်အထိ ချမှတ်ခဲ့သည်။ စစ်အာဏာသိမ်းပြီး ၅ နှစ်တာကာလအတွင်း စစ်ကော်မရှင်၏ ဖမ်းဆီးနှိပ်စက်မှုနှင့် သတ်ဖြတ်မှုများကြောင့် သတင်းသမား ၇ ဦး သေဆုံးခဲ့ရပြီး ၂၀၀ ကျော် ဖမ်းဆီးခံခဲ့ရသည်။ လက်ရှိ ဇန်နဝါရီလ ဒုတိယပတ်အထိ သတင်းသမား ၂၇ ဦး (အမျိုးသမီး ၅ ဦးအပါအဝင်) မှာ အကျဉ်းထောင် များ၌ ပြစ်ဒဏ်ကျခံနေရဆဲ ဖြစ်သည်။ ၎င်းတို့အနက် ၁၄ ဦးမှာ ထောင်တစ်သက် အပါအဝင် နှစ်ရှည်ထောင်ဒဏ် များ ချမှတ်ခံထားရသည်။ ဦးတိုးဇော်လတ်က “ရှေ့လျှောက် ရွေးကောက်ပွဲအလွန် မီဒီယာကဏ္ဍတွေကတော့ စိန်ခေါ်မှုတွေ ပိုများပါမယ်။ အဲ့အတွက် သတင်းမီဒီယာ သမားတွေရဲ့ လုံခြုံရေး လွတ်လပ်စွာ သတင်းရရှိရေး အဲ့ဒါတွေကို ကြိုးစားလုပ်ကိုင် သွားတဲ့ အခါမှာ အထူးသဖြင့် လွတ်မြောက်နယ်မြေမှာ အုပ်ချုပ်နေတဲ့ တော်လှန်ရေး အဖွဲ့အသီးသီးရဲ့ ပူးပေါင်း ဆောင်ရွက်မှုကို ကျနော်တို့အနေနဲ့ အဓိက ညှိနှိုင်းဆောင်ရွက်ဖော်ဆောင်သွားမယ်” ဟု ရှေ့လုပ်ငန်းစဉ်ကို ပြော သည်။ IPCM အနေဖြင့် သတင်းသမားများ လုံခြုံစွာ သတင်းရယူနိုင်ရေးအတွက် ကရင်အမျိုးသားအစည်းအရုံး KNU၊ ကရင်နီပြည် ကြားကာလအုပ်ချုပ်ရေး ကောင်စီ IEC၊ တအာင်းတပ်မတော် TNLA၊ အမျိုးသား ညီညွတ်ရေး အစိုးရ NUG နှင့် ချင်းညီနောင် (Chin Brotherhood) စသည့် အဖွဲ့အစည်းများနှင့် ညှိနှိုင်းဆောင်ရွက်မှုများ ပြုလုပ်ခဲ့ပြီး ဆက်လက် လုပ်ဆောင် သွားမည်ဟု ဆိုသည်။ ထို့ပြင် IPCM ၏ ဇန်နဝါရီ ၁၇ ရက်နှင့် ၁၈ ရက်နေ့များတွင် ကျင်းပခဲ့သည့် ဒုတိယအကြိမ်မြောက် ညီလာခံကို တက်ရောက်လာသော ကိုယ်စားလှယ်များက မြန်မာနိုင်ငံရှိ အကျဉ်းထောင်အသီးသီးတွင် ဖမ်းဆီးခံထားရသည့် သတင်းသမား ၂၇ ဦးကို ခြွင်းချက်မရှိ အမြန်ဆုံးပြန်လွှတ် ပေးရန်နှင့် သတင်းသမားများအပေါ် ပစ်မှတ်ထား ဖမ်းဆီးနှိပ်စက်ခြင်းများကို ချက်ချင်းရပ်တန့်ရန် တောင်းဆိုခဲ့ကြသည်။ လက်နက်ကိုင်ပဋိပက္ခကြားတွင် သတင်းသမားများ လုံခြုံစွာသတင်းရယူပိုင်ခွင့်ကို အာဏာပိုင်များက လေးစား အသိအမှတ်ပြုရန်နှင့် နိုင်ငံတကာအဖွဲ့အစည်းများအနေဖြင့်လည်း လွတ်လပ်သော မြန်မာသတင်းမီဒီယာများ ရေရှည်ရပ်တည်နိုင်ရေးအတွက် ပံ့ပိုးကူညီပေးရန် ဇန်နဝါရီလ ၁၉ ရက်နေ့တွင် ထုတ်ပြန် တောင်းဆိုထားသည်။ ဓာတ်ပုံ - RFA (ပုံဟောင်း)

သတင်းသမားများ အလုပ်လုပ်ရာတွင် ပဋိပက္ခ အခြေအနေများက အကြီးမားဆုံး စိန်ခေါ်မှု ဖြစ်လာ

Jan 23

စစ်ကော်မရှင်ကို ချင်း လူ့အခွင့်အရေး အဖွဲ့က တရားစွဲဆိုမှု တီမောတရားရုံးက လိုက်ခံလိုက်ပြီ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ ချင်းပြည် အတွင်း ကျူးလွန်ခံသည့် စစ်ရာဇဝတ်မှုများအတွက် စစ်ခေါင်းဆောင်များကို အရှေ့တီမောတရားရုံး၌ တရားစွဲဆိုမှု စတင်လိုက်သည်။ ချင်းပြည်အတွင်း စစ်ကော်မရှင်တပ်က ကျူးလွန်ခဲ့သည့် အစုလိုက်အပြုံလိုက် သတ်ဖြတ်မှုများနှင့် စစ်ရာဇဝတ် မှုများအတွက် ဗိုလ်ချုပ်မှူးကြီး မင်းအောင်လှိုင် အပါအဝင် ထိပ်တန်းစစ်အရာရှိ ၁၀ ဦးကို အရှေ့တီမော (တီမော လက်ရှ်တေး) နိုင်ငံတရားရုံးတွင် တရားစွဲဆိုထားမှုကို တရားဝင်လက်ခံလိုက်ပြီ ဖြစ်ကြောင်း ချင်းလူ့အခွင့်အရေး အဖွဲ့ (CHRO) က ထုတ်ပြန်သည်။ အဆိုပါ တရားစွဲဆိုမှုကို ချင်းလူ့အခွင့်အရေးအဖွဲ့ (CHRO)၊ လန်ဒန်အခြေစိုက် Myanmar Accountability Project (MAP) နှင့် တီမောအခြေစိုက် ဥပဒေရေးရာအဖွဲ့တို့ ပူးပေါင်း၍ ဇန်နဝါရီလ ၁၂ ရက်နေ့တွင် တရားဝင် လျှောက်ထားခဲ့ခြင်း ဖြစ်သည်။ CHRO အဖွဲ့ စီမံကိန်းမန်နေဂျာ ဆလိုင်းမာန်ဟရဲလျန်က “တီမောနိုင်ငံမှာ သူတို့နိုင်ငံဥပဒေနဲ့ တရားရေး နည်း လမ်းတွေ ရှိတယ်ပေါ့‌နော်။ သူတို့ရဲ့ တရားဥပဒေနည်းလမ်းအရ ကျနော်တို့ စွဲချက်တင်တဲ့ပုဂ္ဂိုလ်တွေကို သူတို့ အမှုတွေ စီစစ်ပေးမယ်။ ပြီးရင်တော့ သူတို့ အရေးယူဆောင်ရွက်မှုတွေ လုပ်ပေးမယ်လို့တော့ ကျနော်တို့က မျှော်လင့်ပါတယ်” ဟု ပြောသည်။ အရှေ့တီမောနိုင်ငံသည် ၎င်းတို့နိုင်ငံ ပြင်ပတွင် ဖြစ်ပွားသည့် ပြစ်မှုများကို နိုင်ငံတကာ တရားစီရင်ပိုင်ခွင့် (Universal Jurisdiction) အရ လက်ခံစစ်ဆေးရန် ဖွဲ့စည်းပုံ အခြေခံဥပဒေ၌ လမ်းဖွင့်ပေးထားသည့်အတွက် ယခုကဲ့သို့ ရွေးချယ် တရားစွဲဆိုရခြင်း ဖြစ်ကြောင်း CHRO က ပြောသည်။ “တီမောနိုင်ငံကတော့ မြန်မာနိုင်ငံ ချင်းလူမျိုးလိုဘဲ အာဏာရှင်စနစ် လက်အောက်မှာ သူတို့နေပြီးတော့ စစ် ရာဇဝတ်မှုတွေ လူသားမျိုးနွယ်စုတွေ အပေါ်ကျူးလွန်တဲ့ ပြစ်မှုတွေ သူတို့ခံစားခဲ့တဲ့ နိုင်ငံဖြစ်တယ်ပေါ့နော်။ အဲ့ဒီအပြင် တီမောနိုင်ငံက သူတို့နိုင်ငံပြင်ပမှာဖြစ်တဲ့ ဒီလိုပြစ်မှုတွေကို သူတို့နိုင်ငံမှာတရားစီရင်ခွင့်ကို သူတို့ရဲ့ ဖွဲ့စည်းပုံ အခြေခံဥပဒေနဲ့ သူတို့ ဥပဒေက လမ်းဖွင့်ပေးထားတာဖြစ်တယ်။ အဲ့ဒီအတွက်ကြောင့် တီမောနိုင်ငံကို ရွေးပြီးတော့ ကျနော်တို့ တရားစွဲဆိုထားတာဖြစ်ပါတယ်” ဟု ဆလိုင်းမာန်ဟရဲလျန်က ဆက် ပြောသည်။ တရားစွဲဆိုမှုတွင် ၂၀၂၂ ခုနှစ်အတွင်း မတူပီမြို့နယ်၌ ကလေးတစ်ဦးနှင့် ဂျာနယ်လစ်တစ်ဦး အပါအဝင် ၈ ဦးကို လည်ပင်းလှီးဖြတ် သတ်ဖြတ်မှု၊ ခရစ်ယာန် သင်းအုပ်ဆရာ ၄ ဦးကို သတ်ဖြတ်မှု၊ မင်းတပ်မြို့နယ်ဆေးရုံနှင့် ဘာသာရေး အဆောက်အအုံများကို လေကြောင်းမှ တိုက်ခိုက်မှုစသည့် အဓိကအချက် ၅ ချက်ကို အခြေခံထားသည်။ ဤတရားစွဲဆိုမှုအပေါ် စစ်ကော်မရှင်ဘက်က ပြင်းပြင်းထန်ထန် တုံ့ပြန်ခဲ့ပြီး ရန်ကုန်ရှိ အရှေ့တီမောသံရုံး ယာယီ တာဝန်ခံကို ဇန်နဝါရီလ ၁၆ ရက်နေ့တွင် နေပြည်တော်သို့ ဆင့်ခေါ်ကာ ကန့်ကွက်ခဲ့သည်။ စစ်ကော်မရှင်က အရှေ့တီမောအနေဖြင့် အာဆီယံပဋိညာဉ်ကို ချိုးဖောက်ကာ မြန်မာ့ပြည်တွင်းရေးကို စွက်ဖက် နေသည်ဟု စွပ်စွဲထားသည်။ သို့သော် ဆလိုင်းမာန်ဟရဲလျန်ကမူ “တီမောနိုင်ငံက ဒီမိုကရေစီနိုင်ငံ ဖြစ်တယ်။ တီမောအနေနဲ့ သူ့ရဲ့ နိုင်ငံရေး ဥပဒေအတိုင်း ဆောင်ရွက်တာဖြစ်တဲ့ အတွက်ကြောင့် အာဆီယံရဲ့ ပဋိညာဉ်တွေ ဘာမှ ချိုးဖောက်တာ မရှိဘူး။ တကယ်တမ်း ဆိုရင်တော့ အာဆီယံနိုင်ငံရဲ့ လူ့အခွင့်အရေး ကာကွယ်စောင့်ရှောက်ရမယ် ဒီမိုကရေစီ မြှင့်တင် ရမယ်ဆိုတဲ့ဟာကို တီမောနိုင်ငံအနေနဲ့ ပိုပြီးတော့တောင် ကျနော်တို့ မြန်မာပြည်သူလူထုရဲ့ အသံကို နားထောင် ပေးတယ်လို့ပဲ ကျနော်တို့ကတော့ ဆိုချင်ပါတယ်” ဟု တုံ့ပြန်သည်။ ၂၀၂၃ ခုနှစ် အောက်တိုဘာလအတွင်းကလည်း ချင်းတိုင်းရင်းသားများက ဖိလစ်ပိုင်နိုင်ငံ၌ တရားစွဲဆို ရန် ကြိုးပမ်းခဲ့သော်လည်း ပယ်ချခံခဲ့ရဖူးသည်။ အရှေ့တီမောနိုင်ငံသည် မြန်မာ့နွေဦးတော်လှန်ရေးကို အစောပိုင်းကတည်းက ထောက်ခံခဲ့ပြီး အမျိုးသား ညီညွတ်ရေး အစိုးရ (NUG) ကိုလည်း တရားဝင်ဖိတ်ကြား ထိတွေ့ဆက်ဆံမှုများ ပြုလုပ်ခဲ့သည့် နိုင်ငံဖြစ်သည်။  ဓာတ်ပုံ - Mari Alkatiri #အရှေ့တီမော #ချင်းလူ့အခွင့်အရေးအဖွဲ့ #CHRO

စစ်ကော်မရှင်ကို ချင်း လူ့အခွင့်အရေး အဖွဲ့က တရားစွဲဆိုမှု တီမောတရားရုံးက လိုက်ခံလိုက်ပြီ

Jan 23

မော်လူး လေကြောင်းတိုက်ခိုက်မှု ပကဖ နှင့် KIA ၅ ဦး သေဆုံး သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၂၃ ရက်။ စစ်ကိုင်းတိုင်း မော်လူးမြို့ ပြည်သူ့ကာကွယ်ရေး အဖွဲ့ (ပကဖ) ရုံးကို လေကြောင်းတိုက်ခိုက်မှုကြောင့် တော်လှန်ရေး တပ်သား ၅ ဦး သေဆုံးခဲ့သည်ဟု ဒေသခံများက ပြောသည်။ စစ်ကိုင်းတိုင်းဒေသကြီး၊ အင်းတော်မြို့နယ်၊ မော်လူးမြို့၊ မာန်ဟဲကျေးရွာရှိ ပြည်သူ့ကာကွယ်ရေးအဖွဲ့ (ပကဖ) ရုံးကို ဇန္နဝါရီလ ၂၁ ရက် ည ၁၁ နာရီခန့်က စစ်ကော်မရှင်တပ်က ဂျက်ဖိုက်တာဖြင့် လေကြောင်းတိုက်ခိုက်မှု ပြုလုပ်ခဲ့သဖြင့် ကာကွယ်ရေးတပ်ဖွဲ့ဝင် ၄ ဦးနှင့် KIA တပ်ဖွဲ့ဝင် ၁ ဦး သေဆုံးခဲ့ခြင်း ဖြစ်သည်။ အဆိုပါ တိုက်ခိုက်မှုကြောင့် အရပ်သား ၂ ဦး ထိခိုက်ဒဏ်ရာရရှိခဲ့သည့်အပြင် နေအိမ် ၂ လုံးနှင့် နွားတစ်ကောင် လည်း သေဆုံးပျက်စီးခဲ့ရသည်။ ကာကွယ်ရေးတပ်ဖွဲ့ဝင်များနှင့် နီးစပ်သည့် မော်လူးဒေသခံတစ်ဦးက “တည်နေရာကို သိလို့ကို တိုက်ခိုက်တာပေါ့နော်။ ပြီးတော့ ရုံးကလည်း လမ်းဘေးမှာလည်း ရှိနေတာပဲလေ။ အဲ့ဒီနေရာက တည်နေရာ လည်း ပေါက်ထားပြီးသားနေရာ” ဟု ပြောသည်။ ပြီးခဲ့သည့် ဇန်နဝါရီလ ၂ ရက်နေ့ကလည်း မာန်ဟဲကျေးရွာနှင့် တစ်ဆက်တည်းရှိသည့် ပဲခူးကျေးရွာမှ ပြည်သူ့ လုံခြုံရေးအဖွဲ့ (ပလဖ) ရုံးကို လေကြောင်းတိုက်ခိုက်ခဲ့ရာတွင် ၁၂ တန်းကျောင်းသူတစ်ဦး သေဆုံးခဲ့သေးသည်။ ထိုသို့ တော်လှန်ရေးတပ်ဖွဲ့များ၏ ရုံးနှင့် စခန်းများကို လူနေကျေးရွာများအတွင်း ထားရှိခြင်းကြောင့် လေကြောင်း တိုက်ခိုက်ခံရသည့်အခါ အရပ်သားများ မကြာခဏ ထိခိုက်သေဆုံးနေရမှုအပေါ် ဒေသခံများ အကြား ဝေဖန်ထောက်ပြမှုများ မြင့်တက်လာလျက်ရှိသည်။ တော်လှန်ရေးတပ်ဖွဲ့များ၏ ရုံးနှင့် စခန်းများကို ကျေးရွာများနှင့် အနည်း ဆုံး ၃ မိုင်ခန့် အကွာတွင်သာ နေရာချသင့်သည်ဟု ဒေသခံများ ပြောသည်။ ဒေသခံတစ်ဦးက “ပဲခူးရွာနားက ၁၂ တန်း ကျောင်းသူလေး သေတုန်းကလည်း အမှတ်တကယ်တော့ အဲ့နားမှာ ပလဖရုံးရှိတာ။ အဲ့ဒီရုံးကို ကြဲတာ ဒါပေမဲ့ အဲ့ရုံးကိုမထိဘဲ အဲ့ကျောင်းသူလေးကို သွားထိတာပေါ့။ စစ်ရေး အရ ဆိုရင် ဂိတ်တွေ တော်လှန်ရေးတပ်ဖွဲ့ရဲ့ ရုံးတွေကို စစ်ရေးအရ သတ်မှတ်ထားပြီးသား။ စစ်ဘက်ဆိုင်ရာက သတ် မှတ်ထားပြီးသား။ ဒါပေမဲ့ မလိုက်နာကြဘူး။ ရပ်ရွာနဲ့ အနည်းဆုံး ၃ မိုင်အကွာမှာ နေရမယ်ပေါ့နော်” ဟု ပြောသည်။ ပဲခူးကျေးရွာတွင် ကျောင်းသူတစ်ဦး သေဆုံးခဲ့ရပြီးနောက် ဒေသခံများက ဆန္ဒပြကန့်ကွက်မှုများ ပြုလုပ်ခဲ့သဖြင့် အဆိုပါ ပလဖရုံးကို ပြောင်းရွှေ့ပေးခဲ့ရသည်။ လက်ရှိတွင် စစ်ကိုင်းနှင့် ကချင်အစပ်ရှိ ကသာမြို့၌ မြို့သိမ်းတိုက်ပွဲများ ပြင်းထန်နေသဖြင့် စစ်ကော်မရှင်တပ်က လေကြောင်း တိုက်ခိုက်မှုများကို ဆက်တိုက်လုပ်ဆောင်နေသည်။ အလားတူ ကောလင်းနှင့် ဝန်းသိုမြို့နယ်အစပ်တွင်လည်း စစ်ကြောင်းပတ်ထိုးနေသဖြင့် တိုက်ပွဲများ ပြင်းထန်နေ ပြီး၊ ဇန်နဝါရီလ ၂၀ ရက်နေ့က ကောလင်းမြို့နယ် အရှေ့ခြမ်းရှိ ပကဖရုံး လေကြောင်းတိုက်ခိုက်ခံရမှုတွင်လည်း ပကဖ အဖွဲ့ဝင် ၈ ဦး သေဆုံးခဲ့သည်။ #မော်လူးလေကြောင်းတိုက်ခိုက်မှု #စစ်ကိုင်းတိုင်း

မော်လူး လေကြောင်းတိုက်ခိုက်မှု ပကဖ နှင့် KIA ၅ ဦး သေဆုံး

Jan 23

ထိုင်းနိုင်ငံအတွင်း တရားမဝင် နေထိုင်သူများနှင့် စီးပွားရေးလုပ်ငန်းများကို အရှိန်အဟုန်မြှင့် စစ်ဆေးဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ ထိုင်းနိုင်ငံတစ်ဝန်းတွင် တရားမဝင် နေထိုင်လုပ်ကိုင်နေသည့် နိုင်ငံခြားသားများကို စစ်ဆေးမှုများ ပြုလုပ်လျက်ရှိရာ စူရတ်ထာနီနှင့် ချင်းမိုင်မြို့တို့တွင် ဖမ်းဆီးအရေးယူမှုများ ပေါ်ပေါက်ခဲ့ပါသည်။ ဇန်နဝါရီလ ၂၂ ရက်နေ့က ကော့ဖငန်းအပန်းဖြေကျွန်းပေါ်ရှိ နေရာပေါင်း ၂၅ ခုကို ဝင်ရောက်ရှာဖွေခဲ့ရာ ထိုင်းနိုင်ငံသားအမည်ခံ (Nominee) ဖြင့် ဖွင့်လှစ်ထားသော စီးပွားရေးလုပ်ငန်းများနှင့် လူဝင်မှုကြီးကြပ်ရေး ဥပဒေ ချိုးဖောက်သူများကို စစ်ဆေးတွေ့ရှိခဲ့သည်။ စားသောက်ဆိုင်၊ ဟိုတယ်နှင့် အရောင်းဆိုင်များကို စစ်ဆေးခဲ့ရာတွင် ကုမ္ပဏီ ၅ ခုနှင့် နိုင်ငံခြားသား ၃ ဦးကို အမှုဖွင့် အရေးယူခဲ့ပါသည်။ အရေးယူခံရသူ အများစုမှာ မြန်မာနိုင်ငံသားများ ဖြစ်ကြသည်။ ချင်းမိုင်မြို့တွင်လည်း ပုဂ္ဂလိက ဘာသာစကားသင်ကျောင်းတစ်ကျောင်းကို ဝင်ရောက်စစ်ဆေးခဲ့သလို၊ အခြားတစ်ဖက်တွင်လည်း နိုင်ငံခြားသားများကို ထိုင်းနိုင်ငံသားအဖြစ် အထောက်အထားအတု ပြုလုပ်ပေးသည့် အဂတိလိုက်စားမှုဖြစ်စဉ်တစ်ခုအပေါ် အရေးယူခဲ့သည်။ တရုတ်နိုင်ငံသားများကို အမြဲတမ်းနေထိုင်ခွင့် အထောက်အထားအတု ပြုလုပ်ပေးခဲ့သည့် အတွက် ခရိုင်ဒုတိယအုပ်ချုပ်ရေးမှူး နှစ်ဦး အပါအဝင် ဝန်ထမ်း ၆ ဦးကို ကြာသပတေးနေ့က ဖမ်းဆီးအရေးယူလိုက်ပြီ ဖြစ်ပါသည်။

ထိုင်းနိုင်ငံအတွင်း တရားမဝင် နေထိုင်သူများနှင့် စီးပွားရေးလုပ်ငန်းများကို အရှိန်အဟုန်မြှင့် စစ်ဆေးဖမ်းဆီး

Jan 23

ရုရှား၏ "အရိပ်သင်္ဘောအုပ်စု" (Shadow Fleet) မှ ဆီတင်သင်္ဘောတစ်စီးကို ပြင်သစ်ရေတပ် ဖမ်းဆီး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ နိုင်ငံတကာပိတ်ဆို့မှုများကို ရှောင်တိမ်း၍ ရုရှားရေနံများ တင်ဆောင်လာသည်ဟု ယူဆရသည့် "Grinch" အမည်ရှိ ဆီတင်သင်္ဘောတစ်စီးကို ပြင်သစ်ရေတပ်က မြေထဲပင်လယ်အတွင်း စီးနင်းဖမ်းဆီးလိုက်သည်။ ဇန္နဝါရီ ၂၂ ကြာသပတေးနေ့ နံနက်ပိုင်းတွင် စပိန်နှင့် မော်ရိုကိုနိုင်ငံကြား ရေပြင်၌ ဗြိတိန်အပါအဝင် မဟာမိတ်များ၏ အကူအညီဖြင့် ဝင်ရောက်စီးနင်းခဲ့ခြင်းဖြစ်သည်။ အဆိုပါသင်္ဘောသည် ကိုမိုရိုစ် (Comoros) နိုင်ငံအလံကို အလံအတုအဖြစ် လွှင့်ထူကာ သွားလာနေခြင်းဖြစ်သည်ဟု ပြင်သစ်သမ္မတ အီမန်နျူရယ် မက်ခရွန်က ပြောကြားခဲ့သည်။ ရုရှားသည် ယူကရိန်း စစ်ပွဲရန်ပုံငွေအတွက် ပိုင်ရှင်အမည်မပေါ်သော သို့မဟုတ် အာမခံမရှိသော သင်္ဘောဟောင်းများကို အသုံးပြု၍ "Shadow Fleet" (အရိပ်သင်္ဘောအုပ်စု) ဖြင့် လျှို့ဝှက်ရေနံတင်ပို့နေခြင်း ဖြစ်သည်။ ယူကရိန်းသမ္မတ ဇယ်လန်းစကီးက ယခုဖမ်းဆီးမှုကို ကြိုဆိုခဲ့ပြီး ရုရှား၏ စစ်ပွဲရန်ပုံငွေ ရရှိနိုင်မည့် လမ်းကြောင်းများကို ယခုထက်ပို၍ ပြတ်သားစွာ ပိတ်ဆို့အရေးယူရန် တိုက်တွန်းခဲ့ပါသည်။

ရုရှား၏ “အရိပ်သင်္ဘောအုပ်စု” (Shadow Fleet) မှ ဆီတင်သင်္ဘောတစ်စီးကို ပြင်သစ်ရေတပ် ဖမ်းဆီး

Jan 23

ပြန်လည် မောင်းနှင်သော ကမ္ဘာ့အကြီးဆုံး နျူကလီးယားစက်ရုံ ပြန်လည် ရပ်ဆိုင်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ ဂျပန်နိုင်ငံရှိ ကမ္ဘာ့အကြီးဆုံး ကာရှီဝါဇာကီ-ကာရီဝါ (Kashiwazaki-Kariwa) နျူကလီးယား ဓာတ်အားပေး စက်ရုံကို ပြန်လည်မောင်းနှင်ရန် ကြိုးပမ်းခဲ့သော်လည်း လုပ်ငန်းစဉ်စတင်ပြီး နာရီပိုင်းအကြာမှာပင် ပြန်လည်ရပ် ဆိုင်းလိုက်ရသည်။ ဓါတ်အားပေး စက်ရုံ၏ အမှတ် (၆) ရီအက်တာကို ဗုဒ္ဓဟူးနေ့တွင် စတင်မောင်းနှင်စဉ် အချက်ပေးခေါင်းလောင်း (Alarm) မြည်လာခဲ့သည့်အတွက် လုံခြုံရေးအရ လုပ်ငန်းစဉ်များကို ချက်ချင်းရပ်တန့်ကာ စစ်ဆေးမှုများ ပြုလုပ်ခဲ့ခြင်းဖြစ်သည်ဟု လည်ပတ်မှု ကို တာဝန်ယူသော Tepco ကုမ္ပဏီက ပြောသည်။ သို့သော်လည်း Tepco ကုမ္ပဏီ၏ ထုတ်ပြန်ချက်အရ လက်ရှိအချိန်တွင် ရီအက်တာမှာ တည်ငြိမ်မှုရှိပြီး ပြင်ပသို့ ရေဒီယိုသတ္တိကြွမှု ယိုစိမ့်ထွက်လာခြင်း မရှိကြောင်း အတည်ပြုထားသည်။ ၂၀၁၁ ခုနှစ် ဖူကူရှီးမား နျူကလီးယားဘေးအန္တရာယ် ဖြစ်ပွားပြီးနောက် ဂျပန်တစ်နိုင်ငံလုံးရှိ ရီအက်တာ ၅၄ ခုလုံးကို ပိတ်ထားခဲ့ခြင်းဖြစ်သည်။ ဂျပန်အစိုးရအနေဖြင့် ၂၀၅၀ ပြည့်နှစ်တွင် ဖန်လုံအိမ်ဓာတ်ငွေ့ ထုတ်လွှတ်မှု လုံးဝမရှိစေရေး (Net Zero) ရည်မှန်းချက်အတွက် နျူကလီးယားစွမ်းအင်ကို ပြန်လည်အသုံးပြုရန် ကြိုးပမ်းနေသော်လည်း ဒေသခံပြည်သူများကမူ ဘေးအန္တရာယ်လုံခြုံရေးအတွက် စိုးရိမ်မကင်းဖြစ်ကာ ကန့်ကွက်ဆန္ဒပြမှုများ ရှိနေသည်။

ပြန်လည် မောင်းနှင်သော ကမ္ဘာ့အကြီးဆုံး နျူကလီးယားစက်ရုံ ပြန်လည် ရပ်ဆိုင်း

Jan 23

မုဒိန်းမှု ဖြစ်ပွားသော ကျောင်းမှ ကျောင်းသူကျောင်းသားများအား အခြားသို့ မပြောင်းရွှေ့ရန် ကျောင်းမှ ကြိုးပမ်းနေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ မုဒိန်းမှု ဖြစ်ပွားခဲ့သော စာသင်ကျောင်းမှ ကျောင်းသူကျောင်းသားများအား အခြား ကိုယ်ပိုင်ကျောင်း ၆ ကျောင်းက အခမဲ့ လက်ခံသင်ကြားပေးသွားမည်ဟု ပြောဆိုထားသော်လည်း မူလကြောင်းမှ မပြောင်းရွှေ့စေရန် ကြိုးပမ်းလျက် ရှိသည်ဟု မြို့ခံများက ပြောသည်။ ရှမ်းပြည်တောင်ပိုင်း၊ တောင်ကြီးမြို့ရှိ အောင်မြေသစ် ကျောင်းအုပ်ဆရာမကြီး၏ သားဖြစ်သူ ကျောင်းဆရာ ကိုဇာနည်သွေးက Grade 12 ကျောင်းသူတစ်ဦး ကို ဇန်နဝါရီလ ၁၅ ရက်နေ့တွင် မုဒိမ်းမှု ကျူးလွန်ခဲ့ပြီးနောက်ပိုင်း၊ အဆိုပါကျောင်းရှိ ကျောင်းသား/သူများမှာ စိတ်ပိုင်းဆိုင်ရာ လုံခြုံမှုမရှိတော့ဘဲ ကျောင်းပြောင်းရွှေ့ရန် ပြင်ဆင်လာကြခြင်း ဖြစ်သည်။ ကျောင်းပြောင်းရွှေ့လိုသည့် ကလေးတစ်ဦး၏ မိဘတစ်ဦးက “စာမေးပွဲက နောက်လ ၄ ရက်ဆိုရင်ပဲ ရောက်နေပြီလေ။ ဆိုတော့ အမျိုးမျိုး စဉ်းစားရတာပေါ့နော်။ အဓိကတော့ ကလေးရဲ့ ဆန္ဒပေါ့။ သူ့ကို မေးတယ်၊ ဆက်တက်ချင်လား ဆိုတော့ သူက အဲဒီကျောင်းမှာ တက်ရမယ်ဆိုရင် စာမေးပွဲ မဖြေတော့ဘူးဆိုလို့ အခုပဲ ပြောင်းပေးမှာပါ။ ကြော်ငြာထားတဲ့ ကျောင်းတွေအပြင် တခြားကျောင်းတွေလည်း တိုးတိုးတိတ်တိတ် လက်ခံနေကြပါတယ်” ဟု ၎င်း၏ အခက်အခဲကို ပြောပြသည်။ သို့သော်လည်း အဆိုပါ ကျောင်းက Grade 11 နှင့် Grade 12 ကျောင်းသားများအား ကျောင်းပြောင်းခွင့်မပြုပဲ အခြားအတန်းမှ ကျောင်းသူ/သားများ ကျောင်းပြောင်းပါကလည်း သွင်းထားသည့် ငွေများ ပြန်အမ်းပေးမည်မဟုတ်ကြောင်း ပြောထားသည်ဟု ဆိုသည်။ လက်ရှိတွင် Diamond Hill Academy က ကျောင်းသား ၈၅ ဦးခန့်ကို အခမဲ့သင်ကြားပေးမည်ဖြစ်ပြီး၊ ပညာ ဓိက ကိုယ်ပိုင်ကျောင်းကလည်း Grade 10 မှ 12 အထိ ကျောင်းသား/သူများကို တာဝန်ယူသွားမည်ဟု ဆိုသည်။ Grade 10 မှ 12 အထိ ကျောင်းသား/သူများအား ပညာဆက်လက်သင်ယူနိုင်စေရေး အတွက် ပညာဓိကကျောင်း မှ ‌‌အခမဲ့ တာဝန်ယူပေးပြီး စာမေးပွဲဆက်လက် ဖြေဆိုနိုင်စေရေးအတွက် ကူညီ‌ ပေးသွားမည် ဖြစ်ကြောင်း ဇန်နဝါရီလ ၂၀ ရက်နေ့တွင် ထုတ်ပြန်ထားသည်။ ထို့အပြင် တောင်တန်းချယ်ရီ၊ Future Star၊ RCT နှင့် TGI Centre 2 တို့ကလည်း အသီးသီး အခမဲ့ကူညီသင် ကြားပေးမည်ဟု ထုတ်ပြန်ထားကြသည်။ တောင်ကြီးမြို့တွင် နာမည်အကျော်ဆုံးဖြစ်သည့် Royal College Taunggyi (RCT) တွင်လည်း ရွှေ့ပြောင်းလာ မည့် ကျောင်းသား/သူများအား ညနေ ၂ နာရီမှ ၅ နာရီခွဲအထိ အခမဲ့ သင်ကြားပေးသွားမည်ဟု ကြေညာထား သည်။ ကျောင်းပြောင်းရွှေ့မှုများနှင့် ပတ်သက်၍ အောင်မြေသစ်ကျောင်းဘက်မှ အစောပိုင်းတွင် အဟန့်အတားများ ရှိခဲ့ကြောင်း မိဘတစ်ဦးက ယခုကဲ့သို့ ပြောသည်။ “အစကတော့ ပြောင်းရင် စာမေးပွဲဖြေကတ် ထုတ်မပေးဘူးလို့ ခြောက်ထားတာ။ နောက်တော့ လူတွေက လိုင်းပေါ် မှာ အရမ်းတက်ဆဲကြတော့မှ မိန်းကလေးတွေကို ပြောင်းခွင့်ပေးတာ။ အခုတော့ မိန်းကလေးက ပြောင်းလို့ ရပြီ။ မိန်းကလေးဆောင်လည်း ပိတ်ထားပြီ။” အခြား ကိုယ်ပိုင်ကျောင်းတစ်ကျောင်းတွင် လုပ်ကိုင်နေသည့် အမည်မဖော်လိုသူ ဆရာမတစ်ဦးကလည်း ပြောင်း ရွှေ့လာမည့် ကလေးငယ်များ၏ စိတ်ပိုင်းဆိုင်ရာ အခြေအနေမှာ အထူးဂရုစိုက်ရမည့် အနေအထားဖြစ် ကြောင်း ထောက်ပြသည်။ “အခုထိလည်း လက်ခံနေတုန်းပဲ။ အချိန်မရွေးလာခဲ့ပါ။ ကလေးတွေ အနေနဲ့လည်း အာဘော်မတူတာတို့ သင် ကြားနည်းစနစ် မတူတာတို့တော့ ရှိမှာပေါ့လေ။ သူတို့ကိုတော့ ဒီကာလမှာ ပိုဂရုစိုက်ရမှာပါ။ သူတို့က စိတ်ဒဏ် ရာ ရထားကြတာဆိုတော့ တခြားကလေးနည်းတူ ပြောဆိုဆက်ဆံလို့ မရပါဘူး” ဟု ၎င်းက ပြောသည်။ ကျူးလွန်သူ ကိုဇာနည်သွေးအား ရာဇသတ်ကြီးပုဒ်မ - ၃၇၆ ဖြင့် အမှုဖွင့်ထားသော်လည်း ကျူးလွန်ခံရသည့် ကျောင်းသူမှာ သားအိမ်ပေါက်ပြဲဒဏ်ရာဖြင့် ဆေးရုံတွင် ဆက်လက်ကုသမှု ခံယူနေရဆဲ ဖြစ်သည်။ အဆိုပါဖြစ်စဉ်အပေါ် တောင်ကြီးမြို့ခံများက အပြင်းအထန် ကန့်ကွက်နေကြပြီး တရားခံဘက်မှ ရှေ့နေလိုက် ပေးမည့်သူကိုပါ လူမှုရေးပြစ်ဒဏ် (Social Punishment) ပေးရန် ပြင်ဆင်နေကြကြောင်း မြို့ခံအချို့က ပြောသည်။ ပညာရေးဝန်ကြီးဌာနက အောင်မြေသစ်ကျောင်းအား အရေးယူမည်ဟု ကြေညာထားသော်လည်း လက်တွေ့တွင် မူ အမျိုးသမီးဆောင် ပိတ်သိမ်းရုံမှအပ ကျန်စာသင်ဆောင်များမှာ ပုံမှန်အတိုင်း ဆက်လက်ဖွင့်လှစ်နေဆဲ ဖြစ်ကြောင်း ဒေသခံများက ပြောသည်။

မုဒိန်းမှု ဖြစ်ပွားသော ကျောင်းမှ ကျောင်းသူကျောင်းသားများအား အခြားသို့ မပြောင်းရွှေ့ရန် ကျောင်းမှ ကြိုးပမ်းနေ

Jan 23

ထောင်အာဏာပိုင်များ စီးပွားရှာမှု တိုးမြင့်လာနေ သတင်းနှင့် မီဒီဲယာကွန်ရက်။ ၂၀၂၆ ခုနှစ်၊ ဇန္နဝါရီလ ၂၃ ရက်။ စစ်ကိုင်းတိုင်းဒေသကြီး၊ ကလေးအကျဉ်းထောင်အတွင်း အာဏာပိုင်များ စီးပွားရှာနေမှုနှင့် လူ့အခွင့်အရေး ချိုးဖောက်မှုများ မြင့်တက်လာနေသည်ဟု နိုင်ငံရေး အကျဉ်းသားရေး စောင့်ကြည့်နေသူများက ပြောသည်။ ကလေးအကျဉ်းထောင်ရှိ ထောင်အာဏာပိုင်အချို့သည် တရားမဝင်ပစ္စည်းများအား ဈေးတင် ရောင်းချ ခြင်း၊ အကျဉ်းသားများအား ငွေညှစ်ခြင်းနှင့် ကိုယ်ထိလက်ရောက် နှိပ်စက်ခြင်းများ ကျူးလွန်ကာ အကျဉ်း ထောင်ကို ကိုယ်ကျိုးရှာ ဈေးကွက်တစ်ခုသဖွယ် အသုံးချနေကြောင်း မြန်မာနိုင်ငံလုံးဆိုင်ရာ အကျဉ်းသားများ ကွန်ယက် (PPNM) နှင့် ဒေသခံသတင်းရင်းမြစ်များထံမှ သိရသည်။ PPNM ပြောရေးဆိုခွင့်ရှိသူ မရောင်နီလင်းက “လာဘ်ပေးလာဘ်ယူလုပ်တာတွေ၊ အမြတ်တင်ပြီးတော့ ရောင်း ချနေတာမျိုးတွေ၊ တရားမဝင်ပစ္စည်းတွေကို သွင်းပေးပြီးတော့ တရားမဝင်ပစ္စည်းတွေကို သွင်းပေးတယ် ဆိုတာမှာ ဝန်ထမ်းတွေဆီကနေမှပဲ သွင်းလို့ရကြတာပေါ့နော်။ ဒီဝန်ထမ်းတွေက သွင်းပေးပြီးလို့ရှိရင်လည်း မတန်တဆတွေ ပြန်ပြီးတော့ ရောင်းချတယ်။ ပြောရမယ် ဆိုလို့ရှိရင် ထောင်ထဲမှာ စီးပွားရေးလုပ်နေကြ တာ မျိုး ဖြစ်ပါတယ်။ စီးပွားရေးလုပ်တဲ့အခါမှာလည်း အကျဉ်းသား/သူတွေရဲ့ ငွေတွေ၊ ပြီးလို့ရှိရင် ဒီနိုင်ငံရေး အကျဉ်းသား/သူတွေကို ခေါင်းပုံဖြတ်ပြီးတော့မှ ရောင်းချနေတာမျိုးတွေ ဖြစ်ပါတယ်” ဟု ပြောသည်။ ထောင်အာဏာပိုင်များက ကွမ်းပေါင်းနှင့် အကျဉ်းသားများ ကိုယ်တိုင်စိုက်ပျိုးထားသည့် သီးနှံများကို ဈေးနှုန်း ၃ ဆခန့်အထိ အမြတ်တင်ရောင်းချကာ အကျဉ်းသားများအပေါ် ခေါင်းပုံဖြတ်မှုများ ပြုလုပ်နေကြောင်း PPNM က ထုတ်ပြန်လိုက်သည်။ ကလေးအကျဉ်းထောင်အတွင်း ငွေကြေးမပေးဆောင်နိုင်သည့် အကျဉ်းသားများမှာ မြောင်းဖော်ခြင်း၊ တောင် ယာလုပ်ကိုင်ခြင်း၊ အိမ်သာဆေးခြင်းနှင့် အမှိုက်ရှင်းခြင်းစသည့် ပင်ပန်းသောအောက်ခြေသိမ်းအလုပ် (ဘောက်ဆင်း) များကို လုပ်ကိုင်နေရသည်။ ထိုသို့ လုပ်ကိုင်ရာမှ ထွက်ရှိလာသည့် ဟင်းသီးဟင်းရွက်နှင့် သီးနှံများကိုလည်း အာဏာပိုင်များက မတရားယူ ဆောင်ကာ ငွေကြေးတတ်နိုင်သည့် အကျဉ်းသားများထံ ပြန်လည်ရောင်းချနေကြောင်း နိုင်ကျဉ်းဟောင်းများက PPNM ကို ပြောသည်။ “ကလေးထောင်မှာက အခုက ထောင်အာဏာပိုင်တွေက စီးပွားရေးသမားတွေလို ဖြစ်နေတာ။ ပါဆယ်တွေ ကိုလည်း စစ်ဆေးတဲ့နေရာမှာ သူတို့လိုချင်တာကို ယူတယ်၊ ပြီးရင် အထဲမှာ အကျဉ်း သားတွေ စိုက်ထားတဲ့ ဟာကို အပြင်ဈေးထက် အများကြီးတင်ပြီး ပြန်ရောင်းစားနေတာ။ ငွေမရှိတဲ့သူတွေ ဆိုရင် ထောင်ထဲမှာ တော်တော်လေး ငတ်ငတ်ပြတ်ပြတ်နဲ့ ဒုက္ခရောက်နေကြရတယ်” ဟု ပြောသည်။ အဆိုပါ အကျဉ်းထောင်တွင် ကြီးကြပ်ရေးမှူးတစ်ဦးမှာ ရာထူးတိုးလာပြီးနောက်ပိုင်း အကျဉ်းသား များထံမှ ငွေညှစ်၍ အခန်းပြောင်းခြင်း၊ အိပ်ဆောင်ရွှေ့ခြင်းများ ပြုလုပ်ကာ လာဘ်ပေးလာဘ်ယူမှုများကို အထင်အရှား ကျူးလွန်နေကြောင်း အကျဉ်းဦးစီးနှင့် နီးစပ်သူများက ပြောသည်။ မရောင်နီလင်း၏ အဆိုအရ အဆိုပါ ကြီးကြပ်ရေးမှူးသည် ၎င်းကိုယ်တိုင် ကျူးလွန်ခြင်းမျိုး မဟုတ်ဘဲ မူးယစ်ဆေးဝါးမှုဖြင့် ကျခံနေရသူ တစ်ဦးကို လက်ပါးစေအဖြစ် အသုံးချကာ အရောင်းအဝယ်ပြုလုပ်ခြင်း၊ အခြားအကျဉ်းသားများထံ လာရောက်သည့် ပါဆယ်ပစ္စည်းများထဲမှ စားစရာများ ကို ယူခိုင်း၍ စားသောက်ခြင်းများ လုပ်ဆောင်နေကြောင်း သိရသည်။ မရောင်နီလင်းက “တရားမဝင် တင်သွင်းပြီးတော့ ရောင်းချတာမျိုးတွေက အကျဉ်းထောင်တိုင်းမှာ လိုလို ဖြစ်နေတယ်။ စီးပွားရှာ နေတယ်လို့ ကျနော်တို့အနေနဲ့ကတော့ မြင်ပါတယ်ပေါ့နော်။ ထပ်ပြီးတော့ ပြောရ မယ်ဆိုလို့ရှိရင်တော့ အကျဉ်း ထောင်တွေက စီးပွားရှာရမယ့် နေရာမဟုတ်ပါဘူး၊ စီးပွားရေးဈေးကွက်တစ်ခု မဟုတ်ပါဘူး” ဟု ဆက်ပြောသည်။ လက်ရှိတွင် ကလေးအကျဉ်းထောင်၌ စားနပ်ရိက္ခာ လုံလောက်မှုမရှိသည့်အပြင် နိုင်ငံရေးအကျဉ်းသား မိသားစု ဝင်များ ပို့ဆောင်သည့် ရိက္ခာများကိုလည်း အာဏာပိုင်များက ဖြတ်ယူစားသောက်နေသဖြင့် အခြေခံလူတန်းစား အကျဉ်းသားများအတွက် ပိုမိုခက်ခဲနေကြောင်း PPNM က ဆိုသည်။ အလားတူ ရန်ကုန်၊ အင်းစိန်အကျဉ်းထောင်တွင်လည်း အဆောင်မှူး ကျော်လင်းထွန်း ဆိုသူက အဆောင် စည်း ကမ်း အကြောင်းပြ၍ လာဘ်ယူခြင်းနှင့် ရိုက်နှက်နှိပ်စက်ခြင်းများ ကျူးလွန်နေကြောင်း PPNM က ထုတ်ပြန် ထားသည်။ #အကျဉ်းထောင် #နိုင်ငံရေးအကျဉ်းသား #PPNM #စစ်ကိုင်းတိုင်း #ထောင်အာဏာပိုင်

ထောင်အာဏာပိုင်များ စီးပွားရှာမှု တိုးမြင့်လာနေ

« Prev 1 … 131 132 133 134 135 … 1,114 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို — August 20, 2026 2:35 pm
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ် — August 20, 2026 2:33 pm
ထိုင်း-မြန်မာ နယ်စပ်ဖြတ်ကျော်ရာဇဝတ်မှုများ နှိမ်နင်းရန် စစ်ဦးစီးချုပ်များဆွေးနွေး — August 20, 2026 2:30 pm

Recent Posts

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ်

Archives

Archives

×Close