NMG Doh – Page 135 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Jan 20

ဗန်းမောက်မြို့တဝက်ခန့်ကို စစ်ကော်မရှင်နှင့် ရှမ်းနီတပ်များ ပြန်လည် ထိန်းချုပ် သတင်းနှင့် မီဒီယာ ကွန်ရက်။  ၂၀၂၆ ခုနှစ် ဇန္နဝါရီလ ၂၀ ရက်။ စစ်ကိုင်းတိုင်းဒေသကြီး အထက်ပိုင်းရှိ ဗန်းမောက်မြို့၏ တစ်ဝက်ခန့်ကို စစ်ကော်မရှင်တပ်နှင့် ရှမ်းနီးတပ်မတော် SNA ပူးပေါင်းတပ်များ ပြန်လည်ထိန်းချုပ်ထားပြီဟု မြေပြင် စစ်ရေးသတင်းရင်းမြစ်က ပြောသည်။ တော်လှန်ရေးအင်အားစုများ သိမ်းပိုက်ထားသည့် စစ်ကိုင်းတိုင်းဒေသကြီး အထက်ပိုင်းရှိ ဗန်းမောက်မြို့တွင် စစ်ရေး အခြေအနေ ပြောင်းလဲမှုများရှိလာပြီး၊ စစ်ကော်မရှင်နှင့် SNA ပူးပေါင်းတပ်များက မြို့၏ တစ်ဝက်ခန့်ကို ယခုသတင်းပတ်တွင်း ပြန်လည်ထိန်းချုပ်လိုက်ခြင်း ဖြစ်သည်။ ပြီးခဲ့သည့် ဇန်နဝါရီလ ၁၈ ရက်နေ့တွင် မြို့ပေါ်ရှိ လွှဆင်ကုန်းရပ်ကွက်နှင့် မြနန္ဒာရပ်ကွက်များကို စစ်ကော်မရှင် ဘက်က ပြန်လည်စိုးမိုးနိုင်ခဲ့ကြောင်း စစ်ရေးသတင်းရင်းမြစ်တစ်ဦးက အတည်ပြုသည်။ “ဟုတ်တယ်၊ ဟုတ်တယ်။ မြို့ရဲ့ တစ်ဝက်လောက်ကို ပြန်ထိန်းချုပ်သွားတာ တစ်နေ့တုန်းကပဲ။ သူတို့က ရပ်ကွက်နှစ်ခုကို သိမ်းပိုက်လိုက်တာ။ အဲ့မှာ တစ်ဝက်လောက်က ပါသွားတာပေါ့” ဟု ၎င်းက ပြောသည်။ ဗန်းမောက်မြို့ကို ပြီးခဲ့သည့် ၂၀၂၅ ခုနှစ်၊ စက်တင်ဘာလ ၂၀ ရက်နေ့တွင် တော်လှန်ရေးအင်အားစုများက အပြီး သတ် သိမ်းပိုက်နိုင်ခဲ့ခြင်းဖြစ်သည်။ သို့သော် မြို့ပြင်သို့ ဆုတ်ခွာသွားသည့် စစ်ကော်မရှင်တပ်နှင့် SNA ပူးပေါင်းအဖွဲ့သည် မြို့ကို ပြန်လည်ရရှိရန် လေကြောင်းပစ်ကူများ၊ ဟုမ္မလင်းအခြေစိုက် တပ်မ ၃၃ မှ စစ်ကူများဖြင့် အပြင်းအထန် ကြိုးပမ်းလာခဲ့ရာမှ ယခုကဲ့သို့ မြို့ပေါ်ရပ်ကွက်အချို့ကို ပြန်လည်သိမ်းပိုက်နိုင်ခဲ့ခြင်း ဖြစ်သည်။ အဆိုပါ တိုက်ပွဲအတွင်း လက်နက်ခဲယမ်း မလုံလောက်မှုကြောင့် တော်လှန်ရေးတပ်ဖွဲ့ဝင်အချို့ ဆုတ်ခွာပေးခဲ့ ရသလို၊ မြနန္ဒာရပ်ကွက် တိုက်ပွဲအတွင်း ပြည်သူ့ကာကွယ်ရေး တပ်ဖွဲ့ဝင် (PDF) ရဲဘော် ၃ ဦးကိုလည်း စစ်ကော်မရှင်တပ်က ဖမ်းဆီးသတ်ဖြတ်ခဲ့ကြောင်း မြေပြင်သတင်းရင်းမြစ်က ပြောသည်။ ဗန်းမောက်မြို့သိမ်းတိုက်ပွဲ အပြီး နောက်ဆက်တွဲ စစ်ရေးအခြေအနေနှင့် ပတ်သက်၍ အဆိုပါ သတင်းရင်းမြစ် က ယခုကဲ့သို့ ဆက်လက်ပြောဆိုသည်။ “မြို့သိမ်းပြီးကတည်းက တိုက်ပွဲတွေကလည်း မငြိမ်နေပါဘူး။ ဖြစ်လိုက်၊ ရပ်လိုက်နဲ့ပေါ့။ သူတို့ဘက်ကလည်း ပြန်ပြီး မြို့ကို စစ်ကြောင်းပြန်ထိုးနေတာ။ တိုက်ပွဲက အဲ့ကတည်းကကို မငြိမ်ပါဘူး” ဟု ပြောသည်။ လက်ရှိ တိုက်ပွဲများကြောင့် ဗန်းမောက်မြို့ပေါ် ရပ်ကွက်များအပြင် စက်တော၊ အလယ်ရွာ၊ နားယကာ၊ ကံရွာ၊ ကြောင်လည်၊ ပင်ဟင်းခါး၊ ခမိုးနှင့် မြစ်သေးချင်း ကျေးရွာများမှ ဒေသခံ ၂,၀၀၀ ကျော်သည် ဘေးလွတ်ရာ တောတောင်များ အတွင်းသို့ ထွက်ပြေးတိမ်းရှောင်နေကြရသည်။ ဗန်းမောက်မြို့သည် ကချင်ပြည်နှင့် စစ်ကိုင်းတိုင်းအစပ်တွင် တည်ရှိပြီး ရွှေနှင့် သစ်ကဲ့သို့သော သယံဇာတများ ပေါများသည့်အပြင်၊ စစ်ရေးအရလည်း အလွန်အရေးပါသည့် ဗျူဟာကျသော ဒေသတစ်ခု ဖြစ်သည်။ ဗန်းမောက်မြို့ကို စစ်ကော်မရှင်တပ်က ပြန်လည်စိုးမိုးနိုင်သွားပါက အနီးအနားရှိ အမျိုးသားညီညွတ်ရေး အစိုးရ NUG က ထိန်းချုပ်ထားသည့် အင်းတော်နှင့် ပင်လည်ဘူးမြို့များဆီသို့ စစ်ကြောင်းများ ဆက်လက် ထိုးဖောက် လာနိုင်သည်။ ထို့ကြောင့် ဗန်းမောက်မြို့သည် စစ်ကိုင်းတိုင်းအထက်ပိုင်း စစ်ရေးဗျူဟာအတွက် အဓိကသော့ချက်ဖြစ်ကြောင်း စစ်ရေးနှင့် နိုင်ငံရေး လေ့လာသူများက သုံးသပ်ထားကြသည်။ ဓါတ်ပုံ - Maw Seain Tai Nine News နှင့် (ဗန်းမောက်မြို့ Facebook page - ပုံဟောင်း)

ဗန်းမောက်မြို့တဝက်ခန့်ကို စစ်ကော်မရှင်နှင့် ရှမ်းနီတပ်များ ပြန်လည် ထိန်းချုပ်

Jan 20

စစ်ကော်မရှင် သုံ့ပန်းများအပါအဝင် အကျဉ်းသား ၈၀ ခန့် ထောင်ဖောက်ပြေး၊ ဒေသခံများ လုံခြုံရေး စိုးရိမ်နေရ သတင်းနှင့် မီဒီယာကွန်ရက်။  ၂၀၂၆ ခုနှစ်၊ ဇန္နဝါရီလ ၂၀ ရက်။ ကရင်နီပြည်၊ မယ်စဲ့မြို့နယ်ရှိ အကျဉ်းသား ၈၀ ခန့် ထောင်ဖောက်ပြေးမှုကြောင့် ဒေသခံများနှင့် စစ်ဘေးရှောင် များ လုံခြုံရေးစိုးရိမ်နေကြသည်။ မယ်စဲ့မြို့နယ်ရှိ အကျဉ်းထောင်တစ်ခုမှ စစ်သုံ့ပန်းများအပါအဝင် အကျဉ်းသား ၈၀ ဝန်းကျင်သည် လက်နက်များ နှင့် အတူ ထောင်ဖောက်ပြေး လွတ်မြောက်သွားခဲ့သဖြင့် ဒေသခံပြည်သူများနှင့် စစ်ဘေးရှောင်များအကြား လုံခြုံရေးအတွက် စိုးရိမ်ထိတ်လန့်မှုများ ဖြစ်နေကြသည်။ အဆိုပါဖြစ်စဉ်ကြောင့် အမျိုးသမီးများနှင့် ကလေးငယ်များအတွက် ပိုမိုစိုးရိမ်ရကြောင်း ကရင်နီအမျိုးသမီး အစည်းအရုံး (KNWO) ဥက္ကဋ္ဌ မော်ဖရေးမြာက ယခုကဲ့သို့ ပြောသည်။ “အထူးသဖြင့် အမျိုးသမီးတွေ ကလေးတွေက ဥပမာ-ကလေးတွေ စစ်ရှောင်စခန်းကနေ ကျောင်းသွား တက်ရ တာမျိုး၊ စစ်ရှောင်စခန်းကနေ အပြင်ဘက်ကို ရေသွားခပ်တာ၊ ထင်းတွေ သွားရှာတာ အဲ့လိုမျိုး တချို့ကလည်း စားဝတ်နေရေးအတွက် ရုန်းပြီးတော့မှ ရှာဖွေတာမျိုးတွေရှိတယ်။ ဆိုတော့ ဒီလိုမျိုး ကိစ္စတစ်ခုပေါ်လာတဲ့ အခါ မှာ သူတို့လက်နက်လည်း ပါသွားတယ်၊ အဲ့လိုမျိုး ဖြစ်နေတော့ တွေ့တဲ့သူတွေကို သူတို့ သတ်ဖြတ်မှာမျိုး၊ လူ့အခွင့်အရေး ထပ်ချိုးဖောက် ကျူးလွန်မှာမျိုးတွေကို လူထုတွေ၊ အထူးသဖြင့် အမျိုးသမီးတွေက နည်းနည်း ကြောက်လန့်တာမျိုးတွေ ရှိတာပေါ့နော်။” ပြီးခဲ့သည့် ဇန်နဝါရီလ ၁၈ ရက်နေ့က ကရင်နီပြည် ကြားကာလ အုပ်ချုပ်ရေးကောင်စီ (IEC) ၏ တရားရေးဌာန အောက်ရှိ အကျဉ်းထောင် (၂) မှ အကျဉ်းသားများသည် လက်နက် ၉ လက်ကိုပါ ယူဆောင်ကာ ထွက်ပြေးသွားခဲ့ခြင်း ဖြစ်သည်။ ထွက်ပြေးသွားသူများထဲတွင် စစ်ကော်မရှင်တပ်မှ ဖမ်းဆီးရမိထားသည့် စစ်သုံ့ပန်းများ ပါဝင်နေပြီး အရေ အတွက် များပြားခြင်း၊ လက်နက်များ ပါသွားခြင်းတို့ကြောင့် လူ့အခွင့်အရေး ချိုးဖောက်မှုများ ထပ်မံဖြစ်ပွားလာ မည်ကို ဒေသခံများက စိုးရိမ်နေကြခြင်း ဖြစ်သည်။ လက်ရှိတွင် ထွက်ပြေးလွတ်မြောက်သွားသူများကို ပြန်လည်ဖမ်းဆီးနိုင်ခြင်း မရှိသေးသဖြင့် မယ်စဲ့ဒေသခံ များမှာ ညပိုင်းအချိန်များတွင် အထူးသတိထား နေထိုင်နေကြရသည်။ မယ်စဲ့ဒေသခံ အမျိုးသားတစ်ဦးကလည်း ၎င်းတို့၏ စိုးရိမ်မှုနှင့် ပတ်သက်၍ “လက်နက် သေနတ်တွေလည်း ပါတယ်ဆိုတော့ ပိုစိုးရိမ်ရတယ်။ လူက များတယ်ကောနော်။ သူတို့ ထွက်ပြေးပြီးတော့မှ ကျနော်တို့ ရွာသား တွေနား ပြန်ဝင်လာမလား၊ ရန်ပြန်လာရှာမလား၊ တပ်စခန်းအနေနဲ့ သူတို့ ပြန်လာလုပ်မလား၊ တစ်ခါတစ်လေ သူတို့ ဆာငတ်တာတို့ရှိပြီးမှ ကျနော်တို့ ပြည်သူတွေဆီ၊ ရွာသားတွေဆီ ရောက်လာ နိုင်မလားဆိုတဲ့အချက်နဲ့ ပတ်သက်ပြီးတော့ အနည်းအကျဉ်းတော့ စိုးရိမ်ရပါတယ်။ သတိဆိုတာ ပိုတယ်မရှိဘူး ဆိုတဲ့အနေနဲ့တော့ သတိထားပြီး နေကြပါတယ်” ဟု ပြောသည်။ ဤဖြစ်စဉ်နှင့် ပတ်သက်၍ ကရင်နီပြည် ကြားကာလ အုပ်ချုပ်ရေးကောင်စီ (IEC) ၏ ပြည်ထဲရေးဌာနက ဇန်နဝါရီလ ၁၈ ရက်နေ့တွင် ထုတ်ပြန်ချက်တစ်ရပ် ထုတ်ပြန်ခဲ့ပြီး၊ ပြည်သူများ လုံခြုံရေးအတွက် တော်လှန်ရေး ပူးပေါင်းတပ်ဖွဲ့များ၊ ရဲဌာနနှင့် အုပ်ချုပ်ရေးအဖွဲ့များက လုံခြုံရေးအစီအမံများ ချမှတ်ဆောင်ရွက်နေကြောင်း ဆိုသည်။ လူထုအနေဖြင့် သတ်မှတ်ထားသည့် စည်းကမ်းချက်များကို လိုက်နာရန်လည်း တိုက်တွန်းထားသည်။ KNWO ဥက္ကဋ္ဌ မော်ဖရေးမြာက “ဖြစ်နိုင်လို့ရှိရင် အမျိုးသမီး၊ ကလေးတွေက စစ်ရှောင်စခန်းက သတ်မှတ်ထား တဲ့ စည်းကမ်းချက် လမ်းညွှန်မှုနဲ့အညီ လိုက်နာပြီးတော့မှ စခန်းပြင်ပကို မထွက်ဖို့ရယ်၊ အနီးကပ် ကိုယ့်မိသားစု နဲ့ အတူ နေထိုင်ဖို့၊ စားဝတ်နေရေးက ခက်ခဲတာတစ်ပိုင်း ဆိုပေမဲ့ သတ်မှတ်ထားတဲ့ဟာ မလိုက်နာလို့ သွားလာ ရင် အဲ့ဒီရန်သူနဲ့တိုးရင် ကိုယ့်အသက်အန္တရာယ်က ပိုပြီးတော့ ကြီးလာနိုင်တဲ့ အနေအထားမှာ ရှိပါတယ်။ အဓိက ကြားကာလ အုပ်ချုပ်ရေးတွေနဲ့ နယ်မြေဒေသ လုံခြုံရေးတွေ ထုတ်ပြန်ထားတဲ့ ညွှန်ကြားစာတွေကို ဒီအတော အတွင်းမှာ လိုက်နာပြီးတော့မှ ပုံမှန်အတိုင်းကို စိတ်လေးကို တည်တည်ငြိမ်ငြိမ်ရှိပေးဖို့ KNWO ဘက်ကနေ ပြောချင်ပါတယ်” ဟု ပြောသည်။ လက်ရှိတွင် IEC နှင့် ကရင်နီ တော်လှန်ရေးတပ်ဖွဲ့များသည် အခြေအနေကို ပြန်လည်ထိန်းချုပ်နိုင်ရန် စီစဉ်ဆောင် ရွက်နေပြီး၊ ပြည်သူများအနေဖြင့် အွန်လိုင်းပေါ်တွင် ပျံ့နှံ့နေသည့် သတင်းများကြောင့် အလွန်အမင်း စိုးရိမ် ထိတ်လန့်မှု မရှိကြရန်နှင့် တရားဝင် သတင်းအချက်အလက်များကိုသာ စောင့်ကြည့်ကြရန် အသိပေးထားသည်။ ဒေသခံများကမူ ယခုကဲ့သို့သော ဖြစ်စဉ်မျိုး နောက်နောင်ထပ်မံ မဖြစ်ပွားစေရေးအတွက် တာဝန်ရှိသူများ အနေ ဖြင့် ပိုမိုသတိပြု ဂရုစိုက်ကြရန် မျှော်လင့်နေကြသည်။ ဓာတ်ပုံ - Min Tar (ပုံဟောင်း)

စစ်ကော်မရှင် သုံ့ပန်းများအပါအဝင် အကျဉ်းသား ၈၀ ခန့် ထောင်ဖောက်ပြေး၊ဒေသခံများ လုံခြုံရေး စိုးရိမ်နေရ

Jan 20

တစ်နှစ်အတွင်း အမျိုးသမီး ၈၀၀ နီးပါး စစ်ကော်မရှင်ကြောင့် သေဆုံးဟု BWU ထုတ်ပြန် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၀ ရက်။ မြန်မာနိုင်ငံတစ်ဝန်း တစ်နှစ်အတွင်း အမျိုးသမီး ၈၀၀ နီးပါး သေဆုံးခဲ့ပြီးနောက် စစ်ကော်မရှင်တပ်၏ လူ့အခွင့်အရေးချိုးဖောက်မှုများ ရပ်တန့်ရန် BWU တောင်းဆိုလိုက်သည်။ မြန်မာနိုင်ငံတစ်ဝန်းတွင် ပြီးခဲ့သည့် ၂၀၂၅ ခုနှစ်အတွင်း စစ်ကော်မရှင်၏ အကြမ်းဖက်ဖြိုခွင်းမှုများနှင့် တိုက်ပွဲ များကြောင့် အမျိုးသမီး စုစုပေါင်း ၇၉၂ ဦး သေဆုံးခဲ့ရပြီးနောက်၊ ဆိုးဝါးလှသည့် လူ့အခွင့်အရေး ချိုးဖောက်မှု များကို အမြန်ဆုံးရပ်တန့်စေရန် အာဆီယံနှင့် နိုင်ငံတကာအသိုင်းအဝန်းသို့ မြန်မာ့အမျိုးသမီးသမဂ္ဂ (BWU) က တောင်းဆိုလိုက်သည်။ BWU ၏ တွဲဖက်အထွေထွေအတွင်းရေးမှူး – ၂ မယဉ်မျိုးလှိုင်က ကျူးလွန်သူများ ပြစ်ဒဏ်မှ ကင်းလွတ်ခွင့်ရနေ ခြင်းကို အဆုံးသတ်ရန်နှင့် နိုင်ငံတကာအနေဖြင့် စစ်ကော်မရှင်နှင့် ဆက်သွယ်မှုကို ဖြတ်တောက်ရန် ယခုကဲ့သို့ ပြောသည်။ “စစ်အုပ်စုက သူတို့ တရားဝင်မှုရဖို့အတွက် အကြမ်းဖက်မှုတွေကို ကျူးလွန်နေတာဖြစ်တယ်။ ဒါကြောင့်မို့လို့ သူတို့နဲ့ နိုင်ငံတကာအသိုင်းအဝန်းက အလုပ်တွေလုပ်တယ်၊ ဆက်သွယ်ဆက်ဆံတယ်ဆိုလို့ရှိရင် ဒါက အကြမ်း ဖက်မှုတွေကို အားပေးရာရောက်တယ်ဆိုတဲ့ အချက်နဲ့ပေါ့နော်။ ကျမတို့က နိုင်ငံတကာအသိုင်းအဝန်းကို သူတို့နဲ့ ဆက်သွယ်ဆက်ဆံမှုတွေ ဆက်မလုပ်ဖို့ တိုက်တွန်းချင်တာဖြစ်ပါတယ်” ဟု ၎င်းက ပြောသည်။ မြန်မာ့အမျိုးသမီးသမဂ္ဂ (BWU) က ဇန်နဝါရီလ ၁၅ ရက်နေ့တွင် ထုတ်ပြန်သည့် ၂၀၂၅ ခုနှစ် နှစ်ပတ်လည် အစီရင်ခံစာအရ တစ်နှစ်တာအတွင်း အသက် ၁၈ နှစ်အောက် မိန်းကလေးငယ် ၁၅၄ ဦးနှင့် ကိုယ်ဝန်ဆောင် အမျိုးသမီး ၅ ဦး အပါအဝင် အမျိုးသမီး ၇၉၂ ဦး သေဆုံးခဲ့ကာ ၈၁၅ ဦး ထိခိုက်ဒဏ်ရာရရှိခဲ့ကြောင်း ဖော်ပြ ထားသည်။ သေဆုံးရသည့် အဓိကအကြောင်းရင်းမှာ စစ်ကော်မရှင်၏ လေကြောင်း တိုက်ခိုက်မှုကြောင့် ဖြစ်ပြီး အမျိုးသမီး ၆၂၁ ဦးအထိ အသက်ဆုံးရှုံးခဲ့ရခြင်း ဖြစ်သည်။ ထို့အပြင် လက်နက်ကြီး ပစ်ခတ်မှုကြောင့် ၁၀၂ ဦး၊ မတရား သတ်ဖြတ်ခံရမှုကြောင့် ၃၉ ဦးနှင့် မြေမြှုပ်မိုင်း၊ မီးရှို့သတ်ဖြတ်မှု၊ လိင်ပိုင်းဆိုင်ရာ အကြမ်းဖက်မှုနှင့် ထောင်တွင်း ဆေးဝါးကုသခွင့် မရရှိမှုတို့ကြောင့် ကျန်ရှိသည့် အမျိုးသမီးများ သေဆုံးခဲ့ရကြောင်း အစီရင်ခံစာတွင် အသေးစိတ်ဖော်ပြထားသည်။ ဒေသအလိုက် သေဆုံးမှုစာရင်းတွင် စစ်ကိုင်းတိုင်းသည် အမျိုးသမီး ၂၁၇ ဦးဖြင့် အများဆုံးဖြစ်ပြီး မန္တလေး တိုင်းတွင် ၁၂၃ ဦးနှင့် ရခိုင်ပြည်တွင် ၁၁၉ ဦးဖြင့် ဒုတိယနှင့် တတိယ အများဆုံးဖြစ်ကြောင်း ဖော်ပြသည်။ ရှမ်း၊ မကွေး၊ ပဲခူးနှင့် ကရင်နီ (ကယား) ပြည်တို့တွင်လည်း သေဆုံးမှုများ မြင့်တက်နေဆဲ ဖြစ်သည်။ စစ်ကော်မရှင်သည် လူနေရပ်ကွက်များနှင့် အရပ်သားများရှိရာ နေရာများကို ပစ်မှတ်ထားကာ လေကြောင်း တိုက်ခိုက်မှုများ ပြုလုပ်နေခြင်းအပေါ် ကချင်လူ့အခွင့်အရေး စောင့်ကြည့်ရေးအဖွဲ့ (KHRW) ကလည်း ရှုတ်ချထားသည်။ KHRW ပြောရေးဆိုခွင့်ရှိသူ ဂျေကော့က “စစ်ကောင်စီက ပြည်သူလူထုတွေ နေတဲ့နေရာတွေ၊ လုပ်ငန်းလုပ်တဲ့ နေရာတွေမှာ ရည်ရွယ်ချက်ရှိရှိ လေကြောင်းတိုက်ခိုက်တာ ပိုများပါတယ်။ ဒီလိုအခြေအနေမှာ ကလေးတွေ အပါအဝင် သေဆုံးမှုတွေ ရှိပါတယ်။ မြန်မာပြည်မှာ လူ့အခွင့်အရေးချိုးဖောက်နေတဲ့ စစ်ကောင်စီအုပ်စုကို အမြန်ဆုံး အရေးယူဆောင်ရွက်ပေးဖို့ နိုင်ငံတကာစစ်ခုံရုံးကို ကျနော်တို့အနေနဲ့ တိုက်တွန်းချင်ပါတယ်။ ပြီး တော့ နိုင်ငံတကာအသိုင်းအဝန်းအနေနဲ့ ပြည်သူလူထုနဲ့အတူ ဆက်လက်ရပ်တည်ပေးဖို့ တောင်းဆိုလိုပါတယ်” ဟု ပြောသည်။ လက်ရှိတွင် စစ်ကော်မရှင်တပ်သည် စစ်ရာဇဝတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ဗြောင်ကျကျ ဆက်လက် ကျူးလွန်နေခြင်းကြောင့် အမျိုးသမီးများသည် နေ့စဉ်နှင့်အမျှ အသက်အန္တရာယ် ခြိမ်းခြောက်ခံနေရသည်။ ထို့ကြောင့် နိုင်ငံတကာအနေဖြင့် စစ်ကော်မရှင်ထံသို့ လက်နက်ခဲယမ်းနှင့် လေယာဉ်ဆီများ မရောက်ရှိစေရန် တိကျသည့် ဒဏ်ခတ်ပိတ်ဆို့မှုများ ပြုလုပ်ပေးရန်နှင့် အရပ်သားများကို ပစ်မှတ်ထားသည့် ရက်စက်ကြမ်းကြုတ် မှုများ ရပ်တန့်ရန် ဖိအားပေး လုပ်ဆောင်ပေးကြပါရန် BWU က ထုတ်ပြန် တောင်းဆိုထားသည်။ ဓာတ်ပုံ - AA Info Desk (ပုံဟောင်း)

တစ်နှစ်အတွင်း အမျိုးသမီး ၈၀၀ နီးပါး စစ်ကော်မရှင်ကြောင့် သေဆုံးဟု BWU ထုတ်ပြန်

Jan 20

နိုင်ငံအချို့က အမေရိကန်ကို ဗီဇာ ပြန်ပိတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၀ ရက်။ အမေရိကန်သမ္မတ ဒေါ်နယ်ထရန့်အစိုးရက နိုင်ငံပေါင်း ၃၉ နိုင်ငံအပေါ် ခရီးသွားလာခွင့် ကန့်သတ်လိုက်ပြီးနောက် အာဖရိကနှင့် အာရှနိုင်ငံအချို့က အမေရိကန်နိုင်ငံသားများအပေါ် ဗီဇာကန့်သတ်မှုများဖြင့် အပြန်အလှန် တုံ့ပြန်လာကြသည်။ အာဖရိကနိုင်ငံများဖြစ်သော မာလီ၊ ချဒ်၊ နိုင်ဂျာနှင့် ဘာကီးနားဖားဆို တို့သည် အမေရိကန်နိုင်ငံသားများအား ဗီဇာထုတ်ပေးမှုကို လုံးဝရပ်ဆိုင်းလိုက်ပြီး အပြန်အလှန်မူဝါဒ (Reciprocal Move) ကို ကျင့်သုံးလိုက်ကြသည်။ အလားတူ ပါကစ္စတန်နိုင်ငံသည်လည်း ယခင်က အမေရိကန်နိုင်ငံသားများ ရရှိခဲ့သည့် အခမဲ့ ဆိုက်ရောက်ဗီဇာစနစ်ကို ဖျက်သိမ်းလိုက်ပြီး ဗီဇာကြေး ဒေါ်လာ ၆၀ ပေးဆောင်ရန်နှင့် စိစစ်ချိန် ၇ ရက်အထိ စောင့်ဆိုင်းရန် သတ်မှတ်လိုက်သည်။ အမေရိကန်သည် လုံခြုံရေးအကြောင်းပြချက်ဖြင့် ၂၀၂၅ ခုနှစ်အတွင်း နိုင်ငံပေါင်း ၃၉ နိုင်ငံအား ဗီဇာပိတ်ခဲ့ပြီး၊ ၂၀၂၆ ဇန်နဝါရီတွင် ရွှေ့ပြောင်းအခြေချဗီဇာ ရပ်ဆိုင်းမည့် နိုင်ငံ ၇၅ နိုင်ငံကို ထပ်မံကြေညာခဲ့သည်။ အမေရိကန်က ဗီဇာပိတ်ပင်ထားသော နိုင်ငံများထဲတွင် မြန်မာနိုင်ငံလည်း ပါဝင်သည်။

နိုင်ငံအချို့က အမေရိကန်ကို ဗီဇာ ပြန်ပိတ်

Jan 20

ဂျပန်ဝန်ကြီးချုပ်က ကြားဖြတ်ရွေးကောက်ပွဲ ကျင်းပရန် ဆုံးဖြတ် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၀ ရက်။ ဂျပန်နိုင်ငံ၏ ပထမဆုံး အမျိုးသမီးဝန်ကြီးချုပ် ဆာနိုင်း တာကာအိချိ (Sanae Takaichi) သည် ၎င်းအပေါ် လူထုထောက်ခံမှုနှုန်း မြင့်မားနေသည့် အချိန်ကို အခွင့်ကောင်းယူ၍ အောက်လွှတ်တော်ကို ဖျက်သိမ်းကာ ကြားဖြတ်ရွေးကောက်ပွဲ ကျင်းပရန် ဆုံးဖြတ်လိုက်သည်။ ရာထူးသက်တမ်း ၃ လအတွင်း လူထုထောက်ခံမှု ၆၀ ရာခိုင်နှုန်းကျော် ရရှိထားသည့် ဝန်ကြီးချုပ်သည် လာမည့် ဖေဖော်ဝါရီ ၈ ရက်တွင် ရွေးကောက်ပွဲကျင်းပရန် စီစဉ်နေခြင်းဖြစ်သည်။ ဂါးဒီးရန်းသတင်းစာ၏ သုံးသပ်ချက်အရ ဤခြေလှမ်းသည် အာဏာရ LDP ပါတီ၏ လွှတ်တော်အတွင်း အားနည်းနေသော မဲအရေအတွက်ကို ပြန်လည်မြှင့်တင်ရန်နှင့် ၎င်း၏ခေါင်းဆောင်မှုအပေါ် ပြည်သူထံမှ တရားဝင်လုပ်ပိုင်ခွင့် (Mandate) ရယူရန် ကြိုးပမ်းခြင်း ဖြစ်သည်ဟု ဆိုသည်။ အစီအစဉ်အရ ဇန်နဝါရီ ၂၃ ရက်တွင် အောက်လွှတ်တော်ကို ဖျက်သိမ်းမည်ဖြစ်သည်။ ကရာတေး ခါးပတ်နက်ရရှိထားသူ၊ အားလပ်ချိန်တွင် ဒရမ်တီးခြင်းနှင့် ဆိုင်ကယ်ကြီးများ စီးခြင်းကို ဝါသနာပါသူ ဝန်ကြီးချုပ် တာကာအိချိသည် တရုတ်နိုင်ငံအပေါ် ပြတ်သားသော သဘောထားရှိသူဖြစ်သည်။ ထိုင်ဝမ်လုံခြုံရေးအတွက် ဂျပန်၏ ကာကွယ်ရေးစနစ်ကိုလည်း အသစ်ပြန်လည် တည်ဆောက်နေသူ ဖြစ်သည်။ ၎င်းက ဝန်ကြီးချုပ်အဖြစ် ဆက်လက်ဆောင်ရွက်ရန် သင့်တော်မှု ရှိ၊ မရှိကို ပြည်သူများက တိုက်ရိုက်ဆုံးဖြတ်ပေးစေလိုကြောင်း ပြောကြားခဲ့သည်။

ဂျပန်ဝန်ကြီးချုပ်က ကြားဖြတ်ရွေးကောက်ပွဲ ကျင်းပရန် ဆုံးဖြတ်

Jan 20

တရုတ်နိုင်ငံက ဂြိုဟ်တုပေါင်း ၂ သိန်းကျော် လွှတ်တင်ရန် စီစဉ် သတင်းနှင့် မီဒီယာ ကွန်ရက်။  ၂၀၂၆ ခုနှစ်၊ ဇန္နဝါရီလ ၂၀ ရက်။ တရုတ်နိုင်ငံသည် အာကာသထဲသို့ ဂြိုဟ်တုပေါင်း ၂ သိန်းကျော် လွှတ်တင်ရန်အတွက် နိုင်ငံတကာ ကြေးနန်းဆက်သွယ်ရေးအဖွဲ့ (ITU) ထံသို့ လျှောက်ထားလိုက်သည်။ အဆိုပါစီမံကိန်းတွင် ဂြိုဟ်တုအစုအဖွဲ့ပေါင်း ၁၂ ခုကျော် ပါဝင်ပြီး အကြီးဆုံးအစုအဖွဲ့နှစ်ခုဖြစ်သည့် CTC-1 နှင့် CTC-2 တို့တွင် တစ်ဖွဲ့လျှင် ဂြိုဟ်တု ၉၆,၀၀၀ ကျော်စီ လွှတ်တင်သွားမည်ဖြစ်သည်။ ဤစီမံကိန်းကို China Mobile ကဲ့သို့သော ဆက်သွယ်ရေးကုမ္ပဏီကြီးများနှင့် ပုဂ္ဂလိက အာကာသကုမ္ပဏီများ ပူးပေါင်းဆောင်ရွက်မည်ဖြစ်ပြီး အာကာသနည်းပညာနှင့် လှိုင်းနှုန်းစဉ်နေရာဦးရန် ရည်ရွယ်ခြင်းဖြစ်သည်။ အကယ်၍ ဤစီမံကိန်း အောင်မြင်ပါက တရုတ်၏ ဂြိုဟ်တုအရေအတွက်သည် လက်ရှိကမ္ဘာပတ်လမ်းအတွင်းရှိ ဂြိုဟ်တုအရေအတွက်ထက် ၁၀ ဆခန့် များပြားလာမည်ဖြစ်သည်။ တရုတ် ဂြိုလ်တုများက အမေရိကန်မှ အီလွန်မာ့စ်၏ SpaceX ထက်ပင် ကျော်လွန်သွားမည်ဖြစ်သည်။ ဤသည်မှာ တရုတ်နိုင်ငံ၏ ရေရှည်အာကာသ မဟာဗျူဟာဖြစ်ပြီး ပြင်ဆင်မှုလုပ်ငန်းစဉ်များမှာ ၂ နှစ်မှ ၇ နှစ်အထိ ကြာမြင့်နိုင်သည်ဟု ဆိုသည်။

တရုတ်နိုင်ငံက ဂြိုဟ်တုပေါင်း ၂ သိန်းကျော် လွှတ်တင်ရန် စီစဉ်

Jan 20

ဖမ်းဆီးခံရသော အထောက်အထားမဲ့ မြန်မာလုပ်သားများ ထိုင်းရဲ မွေးနေ့ကို နှုတ်ဆက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၂၀ ရက်။ ထိုင်းနိုင်ငံ အတွင်း တရားမဝင် ဝင်ရောက်မှုဖြင့် ဖမ်းဆီးခံထားရသော မြန်မာအလုပ်သမားများက သူတို့အား ဖမ်းဆီးသည့် ရဲ၏ မွေးနေ့ပွဲကို သီချင်းဖြင့် နှုတ်ဆက်ခဲ့ကြသည်။ ထိုင်းနိုင်ငံအတွင်း တရားမဝင် ဝင်ရောက်လာသည့် မြန်မာနိုင်ငံသားများကို အာဏာပိုင်များက အရှိန်မြှင့် ဖမ်းဆီးလျက်ရှိရာ ဇန်နဝါရီ ၁၈ ရက်နှင့် ၁၉ ရက်တို့တွင် ကန်ချနဘူရီနှင့် အန်ထောင်းခရိုင်တို့၌ မြန်မာလုပ်သား ၇၀ ဦးခန့် ထပ်မံဖမ်းဆီးခံခဲ့ရသည်။ ဇန်နဝါရီ ၁၈ ရက်က ကန်ချနာဘူရီတွင် မြန်မာနိုင်ငံသား ၄၈ ဦးကို ဖမ်းဆီးရမိခဲ့ပြီး ဇန်နဝါရီ ၁၉ ရက်တွင် အန်ထောင်းခရိုင်၌ နောက်ထပ် ၂၂ ဦးကို ထပ်မံဖမ်းဆီးခဲ့ခြင်းဖြစ်သည်။ အန်ထောင်းခရိုင် ဖမ်းဆီးမှုတွင် ထူးခြားချက်အနေဖြင့် ဖမ်းဆီးသည့်အချိန်မှာ ဖမ်းဆီးရေးအဖွဲ့ ခေါင်းဆောင် ရဲတပ်ကြပ်ကြီး ဝီချိုင်၏ မွေးနေ့နှင့် တိုက်ဆိုင်နေရာ ဖမ်းဆီးခံထားရသည့် မြန်မာနိုင်ငံသားများက မွေးနေ့သီချင်း သီဆိုပေးခဲ့ကြသည်။ လက်ရှိတွင် မဲဆောက်မြို့နယ်အတွင်း၌လည်း မြန်မာလုပ်သား ၅၀ ခန့် ထပ်မံဖမ်းဆီးခံထားရသည်။ ဖမ်းဆီးခံရသူအားလုံးကို ဥပဒေအရ အရေးယူရန် သက်ဆိုင်ရာရဲစခန်းများသို့ ပို့ဆောင်ထားသည်ဟု ဆိုသည်။

ဖမ်းဆီးခံရသော အထောက်အထားမဲ့ မြန်မာလုပ်သားများ ထိုင်းရဲ မွေးနေ့ကို နှုတ်ဆက်

Jan 19

ကသာတွင် တိုက်ပွဲများ ပြန်လည် ပြင်းထန်၊ စစ်ကော်မရှင်က အဆက်မပြတ် ဗုံးကြဲ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။ စစ်ကိုင်းတိုင်းဒေသကြီး၊ ကသာမြို့တွင် တိုက်ပွဲများ ပြန်လည်ပြင်းထန်လာနေပြီး စစ်ကော်မရှင်တပ်က လေကြောင်းမှ အဆက်မပြတ် ဗုံးကြဲတိုက်ခိုက်နေသည်ဟု မြေပြင်သတင်းရင်းမြစ်က ပြောသည်။ ကသာမြို့တွင် စစ်ကော်မရှင်တပ်နှင့် တော်လှန်ရေး မဟာမိတ် တပ်ပေါင်းစုများအကြား တိုက်ပွဲများ ပြန်လည် ပြင်းထန်နေပြီး စစ်တပ်ဘက်က ဂျက်ဖိုက်တာနှင့် ရဟတ်ယာဉ်များ အပါအဝင် လေကြောင်း အင်အား အလုံး အရင်းဖြင့် အပြင်းအထန် တိုက်ခိုက်နေသည်ဟု စစ်ရေးသတင်းရင်းမြစ်များက ပြောသည်။ မြေပြင်စစ်ရေးသတင်းရင်းမြစ်တစ်ဦးက “မနေ့ကတော့ တော်တော်ဆိုးတယ်။ ဒီနေ့လည်း (သေနတ်သံ) ကြား တော့ကြားရတယ်။ ဒါ‌ပေမဲ့ ဒီနေ့ကတော့ ခပ်ကြဲကြဲပဲ။ မနေ့ကတော့ ခပ်စိပ်စိပ်ကို လေယာဥ်ပျံ Y-12 တွေပျံ တယ်။ ဟက်စကီးဆို နှစ်စီးတွဲတွေပျံတယ်။ ဂျက်ဖိုက်တာတွေပျံတယ်။ တောက်လျှောက်ပေါ့။ အသေကြဲ အသေစော်နေတာ” ဟု ပြောသည်။ ပြီးခဲ့သည့် ဇန်နဝါရီလ ၁၇ ရက် (စနေနေ့) နံနက်ပိုင်းမှ စတင်ကာ ကသာမြို့အခြေစိုက် ခမရ (၃၀၉) တပ်ရင်း အနီးရှိ ဂေါက်ကွင်းနှင့် တပ်ဦးဘုန်းကြီးကျောင်းတစ်ဝိုက်တွင် နှစ်ဖက်တိုက်ပွဲများ ပြန်လည်စတင်ခဲ့ခြင်း ဖြစ်သည်။ ဇန်နဝါရီလ ၁၈ ရက်နေ့ (ယမန်နေ့)ကမူ စစ်ကော်မရှင်တပ်ဘက်က လေကြောင်းတိုက်ခိုက်မှုကို အရှိန်မြှင့်တင်ခဲ့ ကြောင်း စစ်ရေးသတင်းရင်းမြစ်က အတည်ပြုသည်။ ကသာမြို့သိမ်းတိုက်ပွဲမှာ ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၂၈ ရက်နေ့ စစ်ကော်မရှင်၏ ရွေးကောက်ပွဲကာလ တွင် စတင်ခဲ့ခြင်းဖြစ်ပြီး၊ ဇန်နဝါရီလ ၃ ရက်နေ့၌ တိုက်ပွဲအနည်းငယ်ငြိမ်သက်သွားခဲ့သော်လည်း ယခုအခါ ပြန်လည်ပြင်းထန်လာခြင်းဖြစ်သည်။ လက်ရှိတိုက်ပွဲများကြောင့် ခမရ (၃၀၉) အနီးရှိ ရပ်ကွက် (၅)၊ ရပ်ကွက် (၈) နှင့် ရပ်ကွက် (၉) တို့မှ နေအိမ်များစွာ မှာလည်း ထိခိုက်ပျက်စီးမှုများရှိနေသည်။ တိုက်ပွဲများ ပြန်လည် ပြင်းထန်လာမှုကြောင့် မြို့တွင်းသို့ ပစ္စည်းပြန်ယူရန် ပြင်ဆင်နေသည့် စစ်ဘေးရှောင်များ အနေဖြင့် မြို့တွင်းသို့ လုံးဝမဝင်ကြရန် သတိပေးမှုများ ထွက်ပေါ်နေသည်။ မန္တလေးမြို့တွင် စစ်ဘေးရှောင်နေရသည့် ကသာမြို့ခံ အမျိုးသမီးတစ်ဦးက မြို့တွင်းအခြေအနေနှင့်ပတ်သက်၍ ယခုကဲ့သို့ ပြောသည်။ “ကျမတို့ ကသာမြို့နဲ့လည်း အဆက်အသွယ်မရပါဘူး။ ပတ်ဝန်းကျင်ကနေ ကြားတဲ့လူတွေက ပြောပြပေး တာ။ အခြေနေက မကောင်းပါဘူး။ မနေ့တုန်းကလည်း ဗုံးတွေကြဲနေတယ်။ (မြို့ထဲ) မပြန်ခဲ့ကြနဲ့လို့ ပြောခဲ့ တာပဲ” ဟု အဆိုပါ အမျိုးသမီးက ပြောသည်။ ကသာမြို့ခံ အများစုမှာ တိုက်ပွဲစတင်ချိန် ကတည်းက မြစ်ကြီးနား၊ မန္တလေးမြို့ကြီးများအပြင် ဧရာဝတီ မြစ်ကမ်းဘေးရှိ ကျေးရွာများ၊ မိုးညှင်း၊ မိုးကောင်းနှင့် ရှမ်းပြည် မြောက်ပိုင်း မဘိန်းမြို့များအထိ ဖြန့်ကျက် ထွက်ပြေး တိမ်းရှောင်နေကြရသည်။ ကသာမြို့သိမ်းတိုက်ပွဲကို ကချင်လွတ်လပ်ရေး တပ်မတော် (KIA)၊ အမျိုးသား ညီညွတ်ရေး အစိုးရ (NUG) လက်အောက်ခံ ပြည်သူ့ကာကွယ်ရေးတပ် (PDF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF)၊ ပြည်သူ့လွတ်မြောက်ရေး တပ်မတော် (PLA) နှင့် နွေဦးတော်လှန်ရေး မဟာမိတ်တပ်ပေါင်းစု (SRA) တို့ ပူးပေါင်းကာ တိုက်ခိုက်နေခြင်း ဖြစ်သည်။ စစ်ကော်မရှင်ဘက်ကမူ ဗျူဟာမြောက်သည့် ကသာမြို့ကို လက်မလွှတ်ရရေးအတွက် လေကြောင်းအင်အားကို အလွန်အကျွံသုံးစွဲ၍ ခုခံနေကြောင်း စစ်ရေးလေ့လာသူများနှင့် မြေပြင်သတင်းရင်းမြစ်များက သုံးသပ်ကြသည်။

ကသာတွင် တိုက်ပွဲများ ပြန်လည် ပြင်းထန်၊ စစ်ကော်မရှင်က အဆက်မပြတ် ဗုံးကြဲ

Jan 19

တရုတ်ထောက်ခံမှု ရရန် မြစ်ဆုံ စီမံကိန်း ပြန်စခြင်းဖြစ်ဟု လေ့လာသူများက ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။ မြစ်ဆုံစီမံကိန်းအား စစ်ကော်မရှင်က ပြန်စတင်ရန် ကြိုးပမ်းမှုမှာ တရုတ်၏ ထောက်ခံမှုရယူရန် နိုင်ငံရေး အလဲအထပ်လုပ်ခြင်း ဖြစ်သည်ဟု လူ့အခွင့်အရေးတက်ကြွလှုပ်ရှားသူများနှင့် နိုင်ငံရေးလေ့လာသူများက သုံးသပ်ပြောဆိုလိုက်သည်။ စစ်ကော်မရှင်က ကချင်ပြည်ရှိ မြစ်ဆုံစီမံကိန်းအား ပြန်လည် အကောင်အထည်ဖော်ရန် ကြိုးပမ်းလာမှုသည် ၎င်းတို့ကျင်းပမည့် ရွေးကောက်ပွဲအတွက် တရုတ်အစိုးရထံမှ ထောက်ခံမှုရယူရန်နှင့် နိုင်ငံတကာတွင် တရားဝင် မှု ရရှိရန် ရည်ရွယ်သည့် “နိုင်ငံရေးအလဲအထပ်” တစ်ခုသာဖြစ်ကြောင်း ထောက်ပြမှုများ ရှိနေသည်။ နိုင်ငံတကာ၏ အပယ်ခံဖြစ်နေရသော စစ်ကော်မရှင်သည် စီးပွားရေးနှင့် နိုင်ငံရေး အကျပ်အတည်းများမှ လွတ် မြောက်ရန် မြစ်ဆုံစီမံကိန်းအား နိုင်ငံရေးလက်ကွက်တစ်ခု အနေဖြင့် အသုံးချနေခြင်းဖြစ်ကြောင်း ကချင် လူ့အခွင့်အရေး စောင့်ကြည့်ရေး အဖွဲ့ (KHRW) ပြောရေးဆိုခွင့်ရှိသူ ဂျေကော့က ပြောသည်။ ဂျေကော့ က “စစ်ကောင်စီက နိုင်ငံတကာမှာ အပယ်ခံနေရတဲ့ အခြေအနေ ရှိပါတယ်။ စီးပွားရေးအနေနဲ့ရော နိုင်ငံရေး အနေနဲ့ရော အကြပ်အတည်းကို ရင်ဆိုင်နေရတဲ့ အခြေအနေ ဖြစ်ပါတယ်။ မြစ်ဆုံစီမံကိန်းကို သူတို့က အိမ်နီးချင်း နိုင်ငံတွေရဲ့ ထောက်ခံမှုတွေ ငွေကြေးတွေကို အကူအညီ ရယူပြီးမှ နိုင်ငံရေး လက်ကွက်တစ်ခုအနေ နဲ့ အသုံးချဖို့ သူတို့ ကြိုးစားနေပါတယ်” ဟု ပြောသည်။ ပြည်သူလူထု၏ ဆန္ဒအရ ၂၀၁၁ ခုနှစ် ဦးသိန်းစိန် အစိုးရလက်ထက်ကတည်းက ရပ်နားခဲ့သည့် မြစ်ဆုံစီမံကိန်း အား စစ်ရေး၊ နိုင်ငံရေး ကျပ်တည်းနေချိန်တွင် အတင်းအကျပ် ပြန်လည်စတင်ရန် ကြိုးပမ်းခြင်းမှာ ၎င်းတို့၏ အာဏာတည်မြဲရေး အတွက်သာ ဖြစ်ကြောင်း အမျိုးသားညီညွတ်ရေးအစိုးရ (NUG) ဘက်ကလည်း တုံ့ပြန်ထားသည်။ NUG ပြောရေးဆိုခွင့်ရှိသူ ဦးနေဘုန်းလတ် က “အခုလိုအချိန်မှာ စစ်အုပ်စုက မြစ်ဆုံစီမံကိန်းကို ပြန်စဖို့ ကြိုး စားတာဟာ ၎င်းတို့ရဲ့ အာဏာတည်မြဲရေးအတွက် နိုင်ငံရဲ့ နှလုံးသားကို ထိုးကျွေးလိုက်တာပဲ ဖြစ်ပါတယ်” ဟု ဝေဖန်ခဲ့သည်။ စစ်ကော်မရှင်သည် မြစ်ဆုံစီမံကိန်းကို လက်နက်သဖွယ် အသုံးချကာ ၎င်း၏ နောက်ဆုံးကျည်ဆံအဖြစ် အသုံးချနေခြင်းဖြစ်ပြီး၊ ယင်းစီမံကိန်းကြောင့် ကချင်ပြည်နယ်အတွင်း စစ်ရေးပဋိပက္ခများ ပိုမိုကြီးထွားလာနိုင် ကြောင်း ကချင်အမျိုးသမီး အစည်းအရုံး-ထိုင်းနိုင်ငံ (KWAT) မှ သတိပေးသည်။ စီမံကိန်းကြောင့် မြန်မာနိုင်ငံ၏ ရေကြောများ ပျက်စီးနိုင်သည့်အပြင် စစ်ကော်မရှင်က ယင်းဒေသအား ထိန်းချုပ် ရန် အကြမ်းဖက်နည်းလမ်းများကို ပိုမိုသုံးစွဲလာနိုင်ကြောင် KWAT မှ စည်းရုံးလှုံ့ဆော်ရေးအဖွဲ့ တာဝန်ခံ ဆန်ထွယ် က ပြောသည်။ ဆန်ထွယ် က “မြစ်ဆုံစီမံကိန်း ပြန်လုပ်ဖြစ်တယ်ဆိုရင်တော့ မြန်မာတစ်နိုင်ငံလုံးရဲ့ ရေကြောအကုန်လုံးကို ပျက်စီးစေတဲ့ အရာတွေအများကြီးရှိတယ်။ ဒါကို လက်တွေ့ ဆက်လက်လုပ်ဆောင်မယ်ဆိုရင်တော့ ပဋိပက္ခ တွေ ပိုပြီးမှ တိုးပွားစေမယ်၊ မြန်မာစစ်တပ်အနေနဲ့လည်း ဒီဒေသကို ထိန်းချုပ်ဖို့အတွက် ရရာနည်းလမ်းနဲ့ သူတို့ ဆက်ပြီးလုပ်မယ် ပိုပြီးမှ Violence Action (အကြမ်းဖက်မှု)တွေနဲ့ ကချင်ဒေသကို ထိန်းချုပ်ဖို့သူတို့ ကြိုးစား လာမယ့် အခြေအနေလည်းတွေ့ရတယ်။ ဒါက အသေအကြေ အပျက်အစီး ပိုများစေမယ့် လုပ်ရပ်လည်း ဖြစ် လာနိုင်တယ် ပေါ့နော်” ဟု သုံးသပ်သည်။ စစ်ကော်မရှင်သည် ပြီးခဲ့သည့်နှစ် ဩဂုတ်လ ၂၉ ရက်နေ့တွင် ဧရာဝတီမြစ်ဆုံ-မြစ်ညာမြစ်ဝှမ်း ရေအားလျှပ်စစ် စီမံကိန်း ဦးဆောင်အဖွဲ့ကို ဖွဲ့စည်းခဲ့ပြီး တရုတ်နိုင်ငံမှ SPICYN ကုမ္ပဏီနှင့် ပူးပေါင်းဆောင်ရွက်ရန် ညွှန်ကြားခဲ့ သည်။ ထို့နောက် ၂၀၂၅ ခုနှဏ်၊ ဒီဇင်ဘာလ ၁၆ ရက်နေ့တွင်လည်း ဒုတိယ စစ်ခေါင်းဆောင် ဒုဗိုလ်ချုပ်မှူးကြီး စိုးဝင်း ကိုယ်တိုင် ကချင်ပြည်သို့ သွားရောက်ကာ မြစ်ဆုံဒီဇိုင်းအသစ်များ အတွက် တရုတ်နှင့် ညှိနှိုင်းနေပြီဖြစ်ကြောင်း ထုတ်ဖော်ပြောဆိုခဲ့သည်။ တစ်ဖက်တွင်လည်း အမျိုးသား ကာကွယ်ရေးနှင့် လုံခြုံရေးကောင်စီရုံး (ကာလုံ) က စီမံကိန်းနှင့် ပတ်သက်၍ အထောက်အထား မခိုင်လုံဘဲ ကန့်ကွက်ပါက အရေးယူမည်ဟု ဆိုကာ ပြည်သူလူထုအား ဥပဒေဖြင့် ခြိမ်းခြောက်ထားသည်။ သို့သော်လည်း ကချင်လူ့အခွင့်အရေး စောင့်ကြည့်ရေးအဖွဲ့ (KHRW) အပါအဝင် ဒေသခံအဖွဲ့အစည်းများကမူ ပြည်သူ့ဆန္ဒမပါသည့် မြစ်ဆုံစီမံကိန်းအား လုံးဝကန့်ကွက်ကြောင်း ဆက်လက် ထုတ်ဖော်ပြောဆိုနေကြသည်။ ဓာတ်ပုံ - စစ်အာဏာရှင်ဆန့်ကျင်ရေး လူထုကွန်ရက် (ဖားကန့်မြို့နယ်)

တရုတ်ထောက်ခံမှု ရရန် မြစ်ဆုံ စီမံကိန်း ပြန်စခြင်းဖြစ်ဟု လေ့လာသူများက ပြော

« Prev 1 … 133 134 135 136 137 … 1,114 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို — August 20, 2026 2:35 pm
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ် — August 20, 2026 2:33 pm
ထိုင်း-မြန်မာ နယ်စပ်ဖြတ်ကျော်ရာဇဝတ်မှုများ နှိမ်နင်းရန် စစ်ဦးစီးချုပ်များဆွေးနွေး — August 20, 2026 2:30 pm

Recent Posts

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ်

Archives

Archives

×Close