NMG Doh – Page 136 – Network Media Group

NMG Doh

Author: NMG Doh

Aug 7

TNLA တပ်အတွင်း အခြား တိုင်းရင်းသားများပါ လာရောက် ပူးပေါင်း သတင်းနှင့် မီဒီယာကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ တအာင်း (ပလောင်) လူမျိုးများ အပြင် အခြားတိုင်းရင်းသား လူမျိုးစုများကလည်း ၎င်းတို့၏ တပ်တွင် ဆန္ဒ အလျောက် ပါဝင် စစ်မှုထမ်းလာကြကြောင်း တအာင်းအမျိုးသား လွတ်မြောက်ရေး တပ်မတော် (TNLA) က ပြောသည်။ အထူးသဖြင့် မိုးကုတ်၊ မိုးမိတ်ကဲ့သို့ လူမျိုးပေါင်းစုံနေထိုင်သည့် ဒေသများတွင် တအာင်းလူမျိုး မဟုတ်သည့် အခြားသော လူမျိုးစုများက တပ်ဖွဲ့ဝင်အဖြစ် ပါဝင်လာမှုများ ရှိနေကြောင်း တအာင်းတပ် TNLA ၏ ပြောရေး ဆိုခွင့်ရှိသူ လွေးယေဦးက ပြောသည်။ “တခြား လူမျိုးစုတွေလည်း ပါဝင်လာတာ တွေ့ရပါတယ်။ အထူးသဖြင့် မိုးကုတ် မိုးမိတ်လို ဒေသမျိုးဆိုရင် တအာင်းလူမျိုးစု မဟုတ်တဲ့ သူတွေလည်း ပါဝင်လာတာ တွေ့ရပါတယ်။ ဒီအပေါ်မှာလည်း ကျမတို့ ကြိုဆို ပြီးတော့ ဆောင်ရွက်တာတွေလည်း ရှိပါတယ်” ဟု ဩဂုတ်လ ၅ ရက်နေ့က ပြုလုပ်သော online သတင်းစာ ရှင်းလင်းပွဲတွင် လွေးယေဦးက ပြောဆိုလိုက်ခြင်း ဖြစ်သည်။ TNLA ၏ စစ်မှုထမ်းဥပဒေသည် တအာင်းလူမျိုးများကိုသာ အဓိက ရည်ရွယ်သော်လည်း အခြားသော တိုင်းရင်း သား လူမျိုးစုများ အနေဖြင့် ၎င်းတို့ ဆန္ဒရှိပါက သက်ဆိုင်ရာ ရပ်ကွက်ထောက်ခံစာနှင့် တကွ စနစ်တကျ စိစစ် လက်ခံပေးလျက်ရှိကြောင်း လွေးယေဦးက ဆက် ပြောသည်။ “ကျမတို့ PSLF/TNLA သည် လက်ရှိ လောလောဆယ်မှာတော့ မူအရ ဒီဥပဒေအရ သတ်မှတ်ထားတာကတော့ ကျမတို့သည် ဒီတအာင်းလူမျိုးကိုပဲ ၁၈ နှစ်ပြည့်ပြီးတဲ့ သူတွေကိုပဲ ဒီတရား ဥပဒေအရ ကျနော်တို့ ကောက်ခံနေ တာ ဖြစ်ပါတယ်။ တခြား လူမျိုးစုတွေကတော့ သူတို့ရဲ့ ဒီပါဝင်လာနိုင်မှုကတော့ ကျနော်တို့ ကြိုးပမ်းတာမျိုး တွေ ရှိပါတယ်။” တအာင်းတပ် TNLA သည် မိုးကုတ်မြို့ရှိ ဂေါ်ရခါးလူမျိုးများအား အတင်းအကျပ် စစ်သား စုဆောင်းနေသည် ဆိုသော သတင်းများ ထွက်ပေါ်နေခြင်းနှင့် ပတ်သက်၍လည်း ၎င်းက ဒေသလုံခြုံရေးအတွက် ပူးပေါင်းပါဝင်ရန် လူမျိုးစု ခေါင်းဆောင်များနှင့် ညှိနှိုင်းဆွေးနွေးခြင်းသာ ဖြစ်ပြီး အတင်းအကျပ် စုဆောင်းခြင်းမျိုး မရှိဘူးဟု ဆိုသည်။ TNLA အနေဖြင့် တော်လှန်ရေး ရည်မှန်းချက်တူသည့် မည်သည့် လူမျိုးစုကိုမဆို ဆန္ဒအလျောက် ပူးပေါင်း ပါဝင် လာမှုအား ကြိုဆိုလျက်ရှိပြီး ဒေသတည်ငြိမ်ရေးနှင့် တရားဥပဒေ စိုးမိုးရေး လုပ်ငန်းများတွင် အတူတကွ လက်တွဲ ဆောင်ရွက်သွားမည်ဟု ဆိုသည်။ ညီနောင်မဟာမိတ်သုံးဖွဲ့၏ ‘၁၀၂၇’ စစ်ဆင်ရေး နောက်ပိုင်း တအာင်းတပ် TNLA သည် ရှမ်းပြည်မြောက်ပိုင်းရှိ မြို့နယ် အများအပြားကို ထိန်းချုပ်နိုင်ခဲ့သော်လည်း၊ လက်ရှိတွင် စစ်ကော်မရှင်တပ်၏ ပြန်လည်ထိုးစစ်များကို ပြင်းထန်စွာ ရင်ဆိုင်နေရသည်။ အထူးသဖြင့် လတ်တလောတွင် နောင်ချိုမြို့ကို စစ်ကော်မရှင်က လေကြောင်းတိုက်ခိုက်မှုနှင့်အတူ အဓမ္မ စုဆောင်းထားသည့် စစ်မှုထမ်း အင်အား အလုံးအရင်းသုံးကာ ပြန်လည် သိမ်းပိုက်ခဲ့ခြင်းသည် TNLA အတွက် စစ်ရေးအရ ဖိအားတစ်ခုဖြစ်စေခဲ့သည်။ ထို့အပြင် ကျောက်မဲ၊ သီပေါနှင့် မိုးကုတ်ကဲ့သို့သော မြို့များ၏ အနီးဝန်းကျင်တွင်လည်း တိုက်ပွဲများ ဆက်လက် ဖြစ်ပွားနေပြီး နှစ်ဖက်စလုံးမှ မဟာဗျူဟာကျသည့် နယ်မြေများကို ထိန်းချုပ်နိုင်ရန် အပြန်အလှန် ကြိုးပမ်းနေ သည့်အတွက် ဒေသတွင်း နှစ်ဘက်ကြား စစ်ရေးတင်းမာမှုများ မြင့်တက်နေသည်။

TNLA တပ်အတွင်း အခြား တိုင်းရင်းသားများပါ လာရောက် ပူးပေါင်း

Aug 7

သံတောင်ကြီး မြေပြိုမှုကြောင့် ကလေး ၂ ဦးအပါအဝင် လူ ၈ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ ကရင်ပြည်၊ တောင်ငူခရိုင်၊ သံတောင်ကြီးမြို့နယ်အတွင်း မြေပြိုမှုကြောင့် ကလေး ၂ ဦး အပါအဝင် ဒေသခံ ၈ ဦး သေဆုံးခဲ့သည်ဟု ဒေသခံများက ပြောသည်။ သံတောင်ကြီးမြို့နယ် အတွင်း နေ့စဉ်ရက်ဆက် မိုးသည်းထန်စွာ ရွာသွန်းပြီးနောက် မြေပြိုမှုများ ဖြစ်ခဲ့သော ကြောင့် ကလေး ၂ ဦး နှင့် အမျိုးသမီး တစ်ဦး အပါအဝင် ဒေသခံ ၈ ဦး သေဆုံးခဲ့ခြင်း ဖြစ်သည်။ ဒေသခံအမျိုးသားတစ်ဦးက “ဩဂုတ်လ ၄ရက်နေ့နဲ့ ၅ ရက်နေ့မှာဖြစ်တဲ့ ဥယျာဉ်ခြံမြေပြိုမှုမှာတော့ ဥယျာဉ် ခြံထဲမှာနေတဲ့ လူပုဂ္ဂိုလ် ၄ ဦး အသက်ဆုံး သွားတယ်။ နောက်ပြီးတော့ သံတောင်ကြီးမြို့မှာရှိတဲ့ မြေက ထပ်ပြီးပြိုတော့ တော်တော်များများ ထိခိုက်ပျက်စီးတာကို တွေ့ရတယ်ပေါ့နော်။ အဲ့မှာ မိသားစု ၄ ယောက် အသက်ပေးရတာ တွေ့ရတယ်။ ယောက်ကျားလေး အများစုက ဥယျာဉ်ခြံမှာ ညသွားအိပ်စောင့်တော့ ပါသွား တယ်။ မိသားစု ၄ ဦးကတော့ ညတုန်းက အိမ်မှာနေရင်းနဲ့ သစ်ပင်ပိ မြေပြိုမှုထဲပါသွားတယ်” ဟု ပြောသည်။ မြေပြိုမှုကြောင့် လူနေအိမ်အများအပြားလည်း ပျက်စီးကုန်သည်ဟု ဆိုသည်။ အလားတူ သံတောင်ကြီးနှင့် ဆက်ထားသောလမ်းများ၊ တံတားများအပြင် ဥယျာဉ်ခြံမြေ အများအပြားလည်း မြေပြိုမှုကြောင့် ပျက်စီးသွား ခဲ့သည်ဟု ဆိုသည်။ နေအိမ်မှာ ပြန်လည်ပြုပြင်နိုင်ရေး အတွက်လည်း အကူအညီများ လိုအပ်နေသည်ဟု ဒေသခံများက ပြောသည်။ ဒေသခံတစ်ဦးက “လတ်တလော အကူအညီကတော့ ကျနော်တို့ အခုထိခိုက်နစ်နာတဲ့သူတွေ ပျက်စီးတဲ့ အိမ် မိသားစုတွေ ကူညီတာရှိမယ်။ အားပေးတာရှိမယ်။ ဒါပေမဲ့ ရေရှည်အတွက်ကျတော့ စိုက်ပျိုးမြေတွေ ပြန်ပြီး ပြုပြင် မွမ်းမံဖို့ ရှိတာပေါ့နော်။ ဒါတွေလည်းအကူအညီပေးနိုင်ဖို့အတွက် တင်ပြလိုပါတယ်။ နိုင်ငံတကာကိုရော အကူအညီ တောင်းချင်ပါတယ်။ ကျနော်တို့ဒေသက သူများသိပ်မသိတဲ့နေရာ ဆိုတော့ အခုလက်ရှိ ခံစားနေရတဲ့ အချိန်မှာ ကျနော်တို့ ရေရှည်အကူအညီတွေ လိုအပ်တာပေါ့နော်။ အထူးသဖြင့် စိုက်ပျိုးထုတ်လုပ်တဲ့ဟာ” ဟု ပြောသည်။ သံတောင်ကြီးမြို့နယ်ထဲက ထီးပူခီးကျေးရွာ ပတ်ပတ်လည်တွင်လည်း မြေပြိုမှုများ ဖြစ်ခဲ့သောကြောင့် ရွာလုံး ကျွတ် ဘေးလွတ်ရာ နေရာသို့ ရွှေ့ပြောင်းထားရသည်။ မြေပြိုမှုကြောင့် ဥယျာဉ်ခြံမြေ အများအပြား ပျက်စီးဆုံးရှုံးမှုနှင့် ပတ်သက်၍လည်း အထက်ပါ ဒေသခံက “ရေရှည် ခက်ခဲသွားပါလိမ့်မယ်။ မြေပြိုသွားတဲ့အတွက် ပြန်ပြီးတော့ စိုက်ပျိုးလို့ မရနိုင်တာရှိတယ်။ သစ်ပင်၊ သစ်ကိုင်းတွေ၊ ကျောက်တွေနဲ့ ဖုံးလွမ်းနေတဲ့ အတွက်ကြောင့် ပြန်လည် ရှင်းထုတ်ရမှာ အနည်းဆုံး နှစ်ချီပြီ တော့ နှစ်နှစ်၊ သုံးနှစ်ချီပြီးတော့ လုပ်ရတာလေး။ ဆိုတော့ အနည်းဆုံးတော့ လေးငါးနှစ်အတွင်း ဥယျာဉ်ခြံ လုပ်သားတွေအတွက် အများကြီးအခက်အခဲ ဖြစ်နိုင်ပါတယ်“ ဟု ပြောသည်။ သံတောင်ကြီးဒေသခံများမှာ ဥယျာဉ်ခြံမြေ စိုက်ပျိုးရေး လုပ်ငန်းကို အဓိက လုပ်ကိုင်ကြခြင်း ဖြစ်သည်။ ဥယျာဉ်ခြံမြေတွင် အဓိက အားဖြင့် ဖာလာ၊ တညင်း၊ ကွမ်းသီး၊ ကွမ်းရွက်၊ နနွင်းတို့ကို စိုက်ပျိုးကြသည်ဟု ဒေသခံများက ပြောသည်။ အဆိုပါဒေသတွင် နှစ်စဉ်နှစ်တိုင်း မိုးရာသီကာလအတွင်း မြေပြိုမှုများဖြစ်ပွားခဲ့သော်လည်း ယခုကဲ့သို့ လူသေဆုံးသည် အထိ ပြင်းထန်မှု မရှိခဲ့ဘူးဟု ဒေသခံများက ပြောသည်။ သံတောင်ဒေသခံ အမျိုးသားက “ဒီနှစ်ကတော့ တော်တော် ထူးထူးခြားခြား အရမ်းကြီး ဖြစ်နေတယ်။ ဇူလိုင်လ ကုန်ပိုင်း ကတည်းက မိုးအကြီးအကျယ်ရွာတော အဲ့မှာဥယျာဉ်ခြံနဲ့ အိမ်တစ်ချို့ မြေပြိုတာပါတယ်။ ဥယျာဉ်ခြံ ဧက ထောင်ကဏန်းလောက်ရှိမယ်။ အိမ်က ၁၅ အိမ်ပေါ့နော်။ အဲ့တုန်းကတော့ လူထိခိုက်မှု မရှိပါဘူး။ မြေ ထပ်ပြိုမယ့် အခြေအနေလည်းရှိသေးတယ် တစ်ချို့နေရာတွေမှာပေါ့နော်။ အဲ့မှာနွေရာသီတုန်းက ငလျင် ဒဏ်ရှိထားတယ်လေ” ဟု ပြောသည်။ မြေပြိုမှုကြောင့် ဥယျာဉ်ခြံမြေ အများအပြား ပျက်စီးဆုံးရှုံးကုန်သည့်အပြင် နေအိမ်များလည်း အများကြီး ပျက်စီးကုန်သည်ဟု သံတောင်ကြီး စိန့်ဂျော့ဂျ် လူငယ်အဖွဲ့က တာဝန်ရှိသူ တစ်ဦးက ပြောသည်။ ထို့အပြင် မြေပြိုမှုကြောင့် တောင်ငူ - သံတောင်ကြီးလမ်းကိုလည်း ဩဂုတ်လ ၆ ရက်နေ့၊ နံနက်ပိုင်းတွင် ပိတ်ထားခဲ့ရသည်ဟု ဆိုသည်။ ပိတ်ထားရသည့် တောင်ငူ - သံတောင်ကြီး လမ်းပိုင်းကို အမြန်ဆုံးပြန်အသုံးပြုနိုင်ရေး ဒေသတွင်းရှိ လူငယ်များ၊ ကူညီကယ်ဆယ်ရေး အဖွဲ့များနှင့် မြန်မာနိုင်ငံ လူမှုကယ်ဆယ်ရေး အသင်းတို့ကို ပူးပေါင်းရှင်းလင်းမှုများကို လုပ်နေကြသည်ဟု ဆိုသည်။ ဓါတ်ပုံ - Naw Dee Dee Htoo (Facebook)

သံတောင်ကြီး မြေပြိုမှုကြောင့် ကလေး ၂ ဦးအပါအဝင် လူ ၈ ဦး သေဆုံး

Aug 7

စစ်သင်္ဘောများ ဗန်းမော်ရောက်၊ တိုက်ပွဲများ ဆက်ဖြစ်နေ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၇ ရက်။ စစ်ကော်မရှင်တပ်၏ စစ်သင်္ဘောများ ကချင်ပြည်၊ ဗန်းမော်ကို ရောက်လာသည့် အချိန်တွင် မြေပြင်၌ တိုက်ပွဲ များ ဖြစ်နေသည်ဟု မြေပြင် အခြေအနေကို သိသော သတင်းအရင်းအမြစ်များက ပြောသည်။ ဧရာဝတီ မြစ်ကြောင်းအတိုင်း ဆန်တက်လာသည့် စစ်သင်္ဘောများမှာ ဗန်းမော်သို့ ဩဂုတ်လ ၁ ရက်နေ့၊ ည ၉ နာရီ အချိန်ခန့်တွင် ရောက်လာသည်ဟု ဆိုသည်။ မြေပြင်ရှိ ကာကွယ်ရေး တပ်ဖွဲ့ဝင်တစ်ဦးက “စစ်သင်္ဘောအုပ်စုက ဗန်းမော်ကိုသွားတဲ့ ဧရာဝတီ မြစ်ကြောင်း တလျှောက်မှာ ဆိုရင် ကျနော်တို့ တော်လှန်ရေးတပ်ဖွဲ့တွေရဲ့ တိုက်ခိုက်တာကို အကြိမ်ကြိမ်ခံခဲ့ရတယ်။ ဒီလို ခံခဲ့ရတဲ့ ကြားကနေပဲ ဗန်းမော်ကို ၁ ရက်နေ့က ရောက်လာတယ်။ ဗန်းမော်ကို ရောက်တာနဲ့ ဒီရောက်ရောက် ချင်းပေါ့ဗျာ သယ်လာတဲ့ လက်နက်တွေ၊ ရိက္ခာတွေ ချပေါ့။ ရိုးရိုးရောက်လာတာ မဟုတ်ဘူးနော်။ လေကြောင်း က ပစ်ကူ၊ လုံခြုံရေးတွေ မြေပြင်ထိုးစစ်တွေနဲ့ ရောက်လာတာ” ဟု ပြောသည်။ စစ်လက်နက် ရိက္ခာများ လာပို့သည့် စစ်ကော်မရှင်တပ်၏ စစ်သင်္ဘောများ ရောက်လာသည့်အချိန် ဩဂုတ်လ ၁ ရက်နေ့မှ ၄ ရက်နေ့အထိ မြေပြင်တွင် တိုက်ပွဲများ ဖြစ်ပွားနေသည်ဟု ဆိုသည်။ အဆိုပါ စစ်သင်္ဘော ရေယာဉ်တန်းမှာ ဗန်းမော်ကို ရောက်ရောက်ချင်း စစ်လက်နက် ရိက္ခာများ ချပေးခဲ့သည် မြေပြင်ရှိ ကာကွယ်ရေး တပ်ဖွဲ့ဝင်က ပြောသည်။ “ဗန်းမော်ကို ကျနော်တို့က ပိတ်ဆို့ထားတာ တော်တော်ကြာပြီလေနော်၊ ၇ လကျော်လောက် ရှိလာပြီဆိုတော့ သူတို့တပ်တွေအတွက် ပြောရရင်တော့ သူတို့လူတွေအတွက် ရိက္ခာ၊ အစားအစာ၊ ဆေးတို့၊ လက်နက်တို့ကို လာ ပို့ပေးတာလို့ပဲ ပြောရမှာပေါ့” ဟု ကာကွယ်ရေးတပ်ဖွဲ့ဝင်က ဆက်ပြောသည်။ ထိုသို့ စစ်လက်နက်ရိက္ခာများ ချပေးချိန်တွင် ဗန်းမော်ကမ်းနားတလျှောက်ရှိ ကျေးရွာများထဲ လက်နက်ကြီး/ငယ် များနှင့် ပစ်ခတ်ခဲ့သည်ဟု ဆိုသည်။ စစ်လက်နက်ရိက္ခာများ ချပေးနေသည့်အပြင် စစ်ကော်မရှင်တပ်က ခွန်သာ၊ တပ်ကလေး၊ ရွှေကျီးနားကျေးရွာ များထဲ ဝင်ရောက်နိုင်ရေးလည်း ကြိုးစားနေ သည်ဟု မြေပြင် သတင်းအရင်းအမြစ်က ပြောသည်။ အလားတူ ထိုစစ်သင်္ဘောအုပ်စုကို လုံခြုံရေး ယူပေးသည့် အနေဖြင့်လည်း လေကြောင်းမှ ကမ်းနားတဝိုက်နှင့် ကမ်းဘေးက ကျေးရွာများထဲကို ဗုံးကြဲတိုက်ခိုက်ခဲ့မှုများ ရှိခဲ့သည်ဟု ဆိုသည်။ စစ်ကော်မရှင်တပ်၏ လေကြောင်း ဗုံးကြဲတိုက်ခိုက်မှုထဲတွင် ဗန်းမော်ကျွန်းကြီးကျေးရွာက အမျိုးသမီးတစ်ဦး ထိမှန်သေဆုံးခဲ့သည်ဟု Banmaw Scout Team အဖွဲ့က ဆိုသည်။ ထိုစစ်သင်္ဘော ရေယာဉ်တန်းမှာ ဩဂုတ်လ ၄ ရက်နေ့တွင် အထက်ကို ဆက်လက် ဆန်တက်ရန် ကြိုးစားနေ သည့်အပြင် မြေပြင်၌လည်း ပစ်ခတ်မှုများ ဆက်ဖြစ်နေသည်ဟု ဆိုသည်။

စစ်သင်္ဘောများ ဗန်းမော်ရောက်၊ တိုက်ပွဲများ ဆက်ဖြစ်နေ

Aug 7

ဖိအားများကို မဟာမိတ်များနှင့် ပူးပေါင်း ရင်ဆိုင်သွားမည်ဟု TNLA ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ စစ်ကော်မရှင်နှင့် တရုတ်၏ ဖိအားများအား ရင်ဆိုင်နိုင်ရန် မဟာမိတ် တော်လှန်ရေး အင်အားစုများ၏ အကူအညီ လိုအပ်သည်ဟု တအာင်းအမျိုးသား လွတ်မြောက်ရေး တပ်မတော် (PSLF/TNLA) က ပြောသည်။ ဩဂုတ်လ ၅ ရက်နေ့တွင် ပြုလုပ်သည့် တအာင်းတပ် PSLF/TNLA ၏ သတင်းစာရှင်းလင်းပွဲတွင် ပြောရေး ဆိုခွင့်ရှိသူ လွေးယေဦးက ပြောဆိုလိုက်ခြင်း ဖြစ်သည်။ “ဒီမြို့တွေကို ထိန်းချုပ်နိုင်ဖို့ ကျမတို့ဘက်ကလည်း ပြင်ဆင်မှုတွေ ထားရှိပါတယ်။ လိုအပ်တဲ့ အကူအညီတွေ လည်း ကျမတို့ဘက်ကနေ ရယူပါတယ်။ ဒီနိုင်ငံရေးမှာပဲ ပြောပြော၊ စစ်ရေးမှာပဲ ပြောပြော မဟာမိတ်ရဲ့ ပူးပေါင်း ပါဝင်မှုကတော့ အရမ်း အရေးကြီးပါတယ်။ ကျမတို့ ဒီအဖွဲ့အစည်း တစ်ဖွဲ့တည်းကတော့ တစ်ချို့ ကိစ္စ တွေမှာ တစ်ဖွဲ့တည်း လုပ်ဖို့ကတော့ နည်းနည်းလေး ခက်ခဲနေတာမျိုးဆိုတော့ အားလုံးကတော့ ဒီမဟာမိတ်ရဲ့ ပူးပေါင်း ပါဝင်မှုတွေနဲ့ပဲ ကြိုးပမ်း ဆောင်ရွက်နေတာ ဖြစ်ပါတယ်။” ပြီးခဲ့သည့် ဇူလိုင်လ ၁၆ ရက်နေ့တွင် စစ်ကော်မရှင်တပ်များက နောင်ချိုမြို့ကို ပြန်လည်ထိုးစစ်ဆင် သိမ်းပိုက်ခဲ့ ပြီးနောက် တအာင်းတပ် TNLA ဘက်မှ ယခုကဲ့သို့ ပြောဆိုလာခြင်း ဖြစ်သည်။ စစ်ကော်မရှင်တပ်က နောင်ချိုမြို့တွင် ၎င်းတို့၏ အုပ်ချုပ်ရေးယန္တရားများ ပြန်လည်ပတ်နေပြီ ဖြစ်၍ နောင်ချို မြို့ကို အခြေစိုက်စခန်းအဖြစ် အသုံးပြုကာ တအာင်းတပ် TNLA က ထိန်းချုပ်ထားသည့် ကျောက်မဲ၊ သီပေါနှင့် မိုးကုတ်မြို့များသို့ ဆက်လက် ထိုးစစ်ဆင်လာနိုင်ကြောင်း စစ်ရေးသုံးသပ်သူများ သုံးသပ်နေကြသည်။ လက်ရှိတွင် နောင်ချို - မိုးကုတ်လမ်းပိုင်း နေရာများတွင် စစ်ကော်မရှင်တပ်များနှင့် တအာင်း TNLA အပါအဝင် တိုင်းရင်းသား လက်နက်ကိုင် တပ်ဖွဲ့များ အကြား တိုက်ပွဲများ ဆက်လက် ဖြစ်ပွားနေဆဲဖြစ်ကြောင်း ဒေသတွင်း သတင်းများက ဆိုသည်။ TNLA ၏ ပြောရေးဆိုခွင့်ရှိသူ လွေးယေဦးက ၎င်းတို့အနေဖြင့် တော်လှန်ရေး ပန်းတိုင်နှင့် ရည်မှန်းချက်တူသည့် မည်သည့် အဖွဲ့အစည်းနှင့်မဆို ပူးပေါင်း ဆောင်ရွက်သွားရန် အသင့်ရှိသည်ဟု ဆက်ပြောသည်။ “ကျမတို့နဲ့ တော်လှန်ရေး ပန်းတိုင် ရည်မှန်းချက်တူတဲ့၊ သဘောထား တိုက်ဆိုင်တဲ့ အဖွဲ့အစည်းတွေ၊ အင်အားစု တွေနဲ့တော့ ပူးပေါင်းဖို့ရှိပါတယ်။ ကျမတို့ ၁၀၂၇ စစ်ဆင်ရေး အပိုင်း (၁ - ၂) ဖော်ဆောင်နေတဲ့ အချိန်မှာလည်း ဒီတော်လှန်ရေး အင်အားစုတွေကို ဖိတ်ခေါ်တာမျိုးတွေ ရှိပါတယ်။ တစ်ချို့ကလည်း ပါဝင်လာကြသလို တစ်ချို့ ကလည်း ဒီအခြေအနေ အရပ်ရပ်ကြောင့် မပါဝင်နိုင်သေးတာတွေလည်း တွေ့ရပါတယ်။” တအာင်းတပ်မတော် TNLA အနေဖြင့် ကျန်ရှိနေ မြို့များကို ဆက်လက် ထိန်းချုပ်ထားရန်ရန် လိုအပ်သည့် ပြင်ဆင်မှုများနှင့် အကူအညီများ ရယူသွားမည် ဖြစ်ပြီး မဟာမိတ်အားလုံး၏ ပူးပေါင်းပါဝင်မှုကို ရရှိရန် ဆက်လက် ကြိုးပမ်းနေသည်ဟုလည်း ထုတ်ဖော် ပြောဆိုထားသည်။ တရုတ်နိုင်ငံ၊ ကူမင်းမြို့၌ ပြုလုပ်ခဲ့သည့် ဧပြီလ ၂၈ ရက်နေ့မှ ၂၉ ရက်နေ့ အတွင်း စစ်ကော်မရှင်နှင့် တအာင်း အမျိုးသား လွတ်မြောက်ရေး တပ်မတော် (TNLA) တွေ့ဆုံမှု၌ ကျောက်မဲ၊ နောင်ချို၊ သီပေါ၊ မိုးကုတ်၊ မိုးမိတ်မြို့ တို့အား ပြန်ပေးရန် စစ်ကော်မရှင်က တောင်းဆိုခဲ့သည်။ ယခု ဩဂုတ်လ အတွင်း၌လည်း တရုတ်၏ ကြားဝင် ဆောင်ရွက်ပေးမှုဖြင့် တအာင်းတပ် TNLA နှင့် စစ်ကော် မရှင်တို့ ထပ်မံတွေ့ဆုံရန်ရှိနေသည်ဟု လွေးယေဦးက အတည်ပြုပြောဆိုသည်။

ဖိအားများကို မဟာမိတ်များနှင့် ပူးပေါင်း ရင်ဆိုင်သွားမည်ဟု TNLA ပြော

Aug 7

စစ်ကော်မရှင် တပ်ဖွဲ့ဝင် ၂ ဦး ဘက်ပြောင်း ခိုလှုံ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ ထားဝယ်ခရိုင် သရက်ချောင်းမြို့နယ်ထဲက စစ်ကော်မရှင်တပ်ဖွဲ့ဝင် နှစ်ဦး KNLA ထံ လက်နက်နှင့်အတူ ဘက်ပြောင်း ခိုလှုံလာသည်ဟု တာဝန်ရှိသူက ပြောသည်။ ထားဝယ်ခရိုင် သရက်ချောင်းမြို့နယ် ထားဝယ် - မြိတ်သွား ကားလမ်းပေါ်ရှိ ဝင်းဝရဲစခန်းမှ စစ်ကော်မရှင်တပ်ဖွဲ့ ဝင် နှစ်ဦး ဘက်ပြောင်း ခိုလှုံလာသည်ဟု ကရင်အမျိုးသားအစည်းအရုံး - KNU တပ်မဟာ (၄) မှ တာဝန်ရှိသူ တစ်ဦးက ပြောသည်။ သြဂုတ်လ ၄ ရက်နေ့က ကရင်အမျိုးသား လွတ်မြောက်ရေးတပ် - KNLA တပ်ရင်း ၁၂ တပ်မဟာ (၄) ထံသို့ တပ် အသက် ၂၀ အရွယ် တပ်သားဇော်ဇော် နှင့် အသက် ၄၂ နှစ်အရွယ် တပ်သား မင်းစိုးတို့ နှစ်ဦးမှာ လက်နက်များနှင့် အတူ ဘက်ပြောင်းခိုလှုံလာခြင်း ဖြစ်သည်။ “ချိတ်ဆက်ကူညီပေးခဲ့တဲ့ တပ်သား မောင်ကျော်ကျော်ကို ငွေကျပ်သိန်း ၂၀၊ တပ်သားဇော်ဇော်နဲ့ မင်းစိုးတို့ နှစ်ဦးကို ကျပ်သိန်း ၄၀ စီ ဆုချီးမြှင့်ပေးခဲ့ပါတယ်” ဟု KNU တပ်မဟာ ၄ မှ တာဝန်ရှိသူတစ်ဦးက ပြောသည်။ ယခင်က ဘက်ပြောင်းခိုလှုံလာသူ တပ်သား မောင်ကျော်ကျော် ဆိုသူ၏ ချိတ်ဆက်ကူညီမှုဖြင့် ထပ်မံဘက် ပြောင်း လာခြင်းဖြစ်ပြီး ၎င်းတို့နှင့်အတူ MA-1 သေနတ် တစ်လက်၊ MA-2 သေနတ် တစ်လက်၊ ကျည်ဘောက် ရှစ်ခု၊ ကျည်ဆံ ၄၀၀ ပါ ယူဆောင်လာခဲ့ကြောင်း KNU တပ်မဟာ ၄ တာဝန်ရှိသူက ပြောသည်။ ဘက်ပြောင်းခိုလှုံလာသူ နှစ်ဦးသည် ခလရ ၄၀၃ တပ်ရင်းမှ ဖြစ်ကြပြီး ဝင်းဝရဲစခန်းတွင် တာဝန်ကျနေသူများ ဖြစ်ကြသည်ဟု ဆိုသည်။ ဝင်းဝစခန်းမှ စစ်ကော်မရှင် တပ်ဖွဲ့ဝင်နှစ်ဦး ထွက်ပြေးသဖြင့် ဝင်းဝကျေးရွာထဲတွင်း တစ်အိမ်တက်ဆင်း ဝင်ရောက်ရှာဖွေခြင်းနှင့် ရွာသားများကို စစ်ဆေးမေးမြန်းခြင်းများ ပြုလုပ်နေကြောင်း KNU တပ်မဟာ ၄ တာဝန် ရှိသူက ပြောသည်။ အလင်းဝင်လိုသည့် စစ်ကော်မရှင်တပ်ဖွဲ့ဝင်များကို ချိတ်ဆက် အကူအညီပေး နေသည့် ပြည်သူ့ပန်းတိုင်အဖွဲ့က ကောက်ယူထားသည့် မှတ်တမ်းများအရ ဇူလိုင်လအတွင်း အလင်းဝင်ပူးပေါင်း၊ လက်နက်ချနှင့် စစ်သုံ့ပန်း စစ်သားအပြင် ရဲတပ်ဖွဲ့ဝင်နှင့် ပြည်သူ့စစ်အဖွဲ့ဝင် စုစုပေါင်း ၂၄၃ ဦးရှိခဲ့သည်ဟု ထုတ်ပြန်ထားသည်။ ဇူလိုင်လအတွင်း တော်လှန်ရေး တပ်ဖွဲ့များနှင့် ပူးပေါင်းလာသူများမှာ ပဲခူးတိုင်း၊ တနင်္သာရီတိုင်း၊ မကွေးတိုင်း၊ စစ်ကိုင်းတိုင်း၊ မန္တလေးတိုင်း၊ ရန်ကုန်တိုင်း၊ ကရင်ပြည်၊ ရှမ်းပြည်၊ ကရင်နီပြည်၊ ရခိုင်ပြည်၊ ချင်းပြည်၊ မွန်ပြည် နှင့် ကချင်ပြည်တို့က ဖြစ်သည်ဟု ပြည်သူ့ပန်းတိုင်အဖွဲ့၏ ထုတ်ပြန်ချက်တွင် ဖော်ပြထားသည်။

စစ်ကော်မရှင် တပ်ဖွဲ့ဝင် ၂ ဦး ဘက်ပြောင်း ခိုလှုံ

Aug 7

လူငယ် ၁၁ ဦးကို စစ်မှုထမ်းရန် ထားဝယ်တွင် ဖမ်းဆီးခေါ်ဆောင် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ ထားဝယ်တွင် စစ်မှုထမ်းအတွက် လူငယ် ၁၁ ဦးကို စစ်ကော်မရှင်တပ်က ဖမ်းဆီးသွားသည်ဟု နီးစပ်သူများက ပြောသည်. တနင်္သာရီတိုင်း၊ ထားဝယ်မြို့ပေါ်ရှိ ရပ်ကွက်များအတွင်းက လူငယ် ၁၁ ဦးကျော်ကို စစ်ကော်မရှင်တပ်က ဖမ်းဆီးခေါ်ဆောင်သွားသည် ဟု ရပ်ကွက်နေ ပြည်သူများက ပြောသည်။ သြဂုတ်လ ၄ ရက်နေ့၊ ညက ရှမ္မလည်ဆွဲရပ်ကွက်မှ လူငယ် ၅ ဦး၊ တလိုင်းထိန်ရပ်ကွက်မှ လူငယ် ၁ ဦး၊ ဥဿရံ ရပ်ကွက်မှ လူငယ် ၅ ဦးတို့ကို စစ်ကော်မရှင်တပ်က ဖမ်းဆီးသွားခြင်း ဖြစ်သည်။ ရှမ္မလည်ဆွဲရပ်ကွက်တွင် နေထိုင်သူ အသက် ၅၀ ခန့်အရွယ် အမျိုးသားတစ်ဦးက “သူတို့က အိမ် တစ်အိမ်ချင်းစီ ကို ဝင်စစ်တယ်။ နာမည်ပါတဲ့ လူတွေ့တာနဲ့ စစ်မှုထမ်း ဆင့်ခေါ်စာ တခါတည်း ပေးပြီး ခေါ်သွားတာ၊ ဘာမှ အကြောင်းပြလို့ မရဘူး” ဟု ပြောသည်။ စစ်ကော်မရှင်တပ်ဖွဲ့ဝင်များက အမည်စာရင်း အတိအကျဖြင့် နေအိမ်များအထိ လာရောက်ပြီး ဖမ်းဆီးခေါ် ဆောင်နေခြင်း ဖြစ်သည်ဟု ဆိုကြသည်။ ယခု ၁၁ ယောက် ဖမ်းဆီးခံရမှုထဲတွင် စစ်မှုထမ်း ဥပဒေအရ အသက် အကျုံးမဝင်တော့သည့် ဥဿရံရပ်ကွက်မှ အသက် ၄၀ ကျော်အရွယ် အမျိုးသားတစ်ဦး ပါဝင်နေသည်ဟု ဆိုသည်။ ထားဝယ်မြို့ရှိ လူငယ်များကို စစ်မှုထမ်းဆင့်ခေါ်စာ ပေးပို့ခံရပြီးသည့်နောက် လူငယ်အများအပြားမှာ ထွက်ပြေး တိမ်းရှောင်သွားကြသဖြင့် ယခုကဲ့သို့ ဦးစွာဖမ်းဆီးပြီးမှသာ စစ်မှုထမ်းရမည်ဟုဆိုကာ မိသားစုဝင်များထံသို့ ဆင့်ခေါ်စာ ထုတ်ပြန်ခြင်း၊ ပေးပို့ခြင်းများ ရှိလာနေသည်ဟု မြို့ခံများက ဆိုသည်။ လက်ရှိတွင် ဖမ်းဆီးခံရသူအများစုမှာ အသက် ၂၀ မှ အသက် ၂၅ နှစ်အကြားရှိ လူငယ်အမျိုးသားများ ဖြစ်ကြပြီး ဧည့်စာရင်းဖြင့် နေထိုင်သူများ မဟုတ်ဘဲ ထားဝယ်မြို့ အိမ်ထောင်စု စာရင်းဖြင့် နေထိုင်သူများ ဖြစ်ကြောင်း မြို့ခံများက ပြောသည်။ စစ်ကောင်စီတပ်က စစ်မှုထမ်းအတွက် အဓမ္မ ဖမ်းဆီး စုဆောင်းထားသူများကို ထားဝယ်မြို့ သပြေချောင်း တပ် နယ်ရှိ အမှတ် ၄၀၁ ခြေလျင်တပ်ရင်းတွင် စုဆောင်းထားသည်ဟု ဆိုသည်။ ထိုမှတစ်ဆင့် ပလောက်မြို့ရှိ အမှတ် ၁၂ တပ်မတော် တန်းမြင့် လေ့ကျင့်ရေး သင်တန်းကျောင်းသို့ ရေလမ်း ခရီးမှ ပို့ဆောင်ပေးလျက် ရှိသည်ဟု အုပ်ချုပ်ရေး အဖွဲ့နှင့် နီးစပ်သူများက ပြောသည်။

လူငယ် ၁၁ ဦးကို စစ်မှုထမ်းရန် ထားဝယ်တွင် ဖမ်းဆီးခေါ်ဆောင်

Aug 7

ဖမ်းဆီးခံ နဘုလယ် ရွာသား ၄ ဦး ပြန်လွတ်၊ ၄ ဦးကျန် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၇ ရက်။ စစ်ကော်မရှင်တပ်၏ ဖမ်းဆီးခြင်းခံရသူ နဘုလယ် ဒေသခံရွာသား ၈ ဦး အနက် ၄ ဦးကို ပြန်လည် လွတ်မြောက် လာပြီဟု နီးစပ်သူများက ပြောသည်။ ကျန်သည့် ၄ ဦးမှာ သြဂုတ်လ ၅ ရက်နေ့ ညနေပိုင်း အချိန်အထိ ပြန်လည်လွတ်မြောက်လာကြခြင်း မရှိကြသေး ဘူးဟု ဆိုသည်။ ထားဝယ် အထူးစီးပွားရေးဇုန် ဧရိယာအတွင်းရှိ ရေနက်ဆိပ်ကမ်း စစ်စခန်းသို့ ရောက်ရှိနေသည့် စစ်ကော်မရှင် တပ်ဖွဲ့က ဩဂုတ်လ ၂ ရက်နေ့ နံနက်ပိုင်းတွင် နဘုလယ်ဒေသထဲက ပရဒတ်ကျေးရွာအတွင်းသို့ ဝင်ရောက်ခဲ့ ပြီးနောက် ရွာသားများကို တစ်ရွာဝင် တစ်ရွာထွက် ဖမ်းဆီးသွားခဲ့ခြင်း ဖြစ်သည်။ အသက် ၄၀ ခန့်အရွယ် ပရဒတ် ရွာသားတစ်ဦးက “စစ်တပ်ထဲ ခေါ်ဆောင်တဲ့အချိန် မျက်နှာတွေ ပိတ်ပြီးမှ ခေါ် သွားတာလို့ လွတ်မြောက်လာတဲ့ သူတွေက ပြန်ပြော ပြတယ်။ တပ်ထဲရောက်တော့ ကြိုးနဲ့ရိုက်တယ်။ PDF တွေကို မြင်ဖူးတယ် မဟုတ်လားလို့ မေးတယ်။ သူတို့ စခန်းရှိတဲ့နေရာက ဘယ်နေရာမှာလဲ၊ သူတို့ ဘယ်လို သွားလာနေထိုင်ကြသလဲ ဆိုပြီးမေးတယ်။ ပြန်လွှတ်ပေးတော့လည်း မျက်နှာပိတ်သေးတယ်လို့ ပြောပြကြ တယ်” ဟု ပြောသည်။ စစ်ကော်မရှင်တပ်က ဖမ်းဆီးသွားသူများမှာ မယင်းကြီးရွာသား ၂ ဦးနှင့် ပရဒတ်ရွာသား ၆ ဦးတို့ ဖြစ်ပြီး မယင်း ကြီးရွာသား ၁ ဦး နှင့် ပရဒတ်ရွာသား ၃ ဦးတို့မှာ ဩဂုတ်လ ၄ ရက်နေ့၊ ညနေ ၃ နာရီ အချိန်ခန့်က ပြန်လွတ်လာ သည်ဟု ဆိုသည်။ ပြန်လွှတ်လာသည့် ရွာသားများ၏ ပြောပြချက်အရ ရိုက်နှက် နှိပ်စက်ခံခဲ့ကြရသည်။ ထို့အပြင် ၎င်းတို့အား ပြည်သူ့ကာကွယ်ရေး တပ်ဖွဲ့ (PDF) များနှင့် ဆက်စပ်မှု ရှိမရှိနှင့် PDF အဖွဲ့များ၏ လှုပ်ရှားသွား လာမှု အခြေအနေများကို မေးမြန်းစစ်ဆေးခဲ့သည်ဟု ဆိုသည်။ စစ်ကော်မရှင်တပ်မှ ဩဂုတ်လ ၂ ရက်နေ့တွင် နဘုလယ်ဒေသရှိ မယင်းကြီးနှင့် ပရဒတ်ကျေးရွာထဲသို့ စစ်ကြောင်းထိုး ဝင်ရောက်ခဲ့ပြီးနောက် ရွာသားများကို ဖမ်းဆီးသွားခြင်း ဖြစ်သည်။ ထိုနေ့က ဖမ်းဆီးခံရသူ အရေအတွက်မှာ ရွာသား ၂၀ ခန့်ရှိသည်ဟု ဆိုကြသည်။ ဖမ်းဆီးခံရသူများအနက် သက်ကြီးပိုင်းနှင့် အမျိုးသမီးများကို ပြန်လွှတ်ပေးခဲ့ကာ ရွာသား ၈ ဦးကိုမူ ရေနက်ဆိပ် ကမ်းရှိ စစ်တပ်စခန်း နေရာသို့ ဖမ်းဆီးခေါ်ဆောင်သွားခြင်း ဖြစ်သည်။ ဆက်လက် ဖမ်းဆီးခံထားရသည့် ရွာသား ၄ ဦးအတွက် ၎င်းတို့၏ မိသားစုဝင်များက စိုးရိမ်နေရသည်။

ဖမ်းဆီးခံ နဘုလယ် ရွာသား ၄ ဦး ပြန်လွတ်၊ ၄ ဦးကျန်

Aug 6

နတ်အိမ်တောင်စခန်းသို့ စစ်ကူလာသည့် စစ်ကော်မရှင်တပ် စစ်ကြောင်း တိုက်ခိုက်ခံရ၊ ၄ ဦးသေဆုံး

Aug 6

ဖားကန့်ဗျူဟာကုန်းမှ လက်နက်ကြီးဖြင့် ပစ်ခတ်မှုကြောင့် အရပ်သား နှစ်ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၆ ရက်။ ကချင်ပြည်၊ ဖားကန့်မြို့နယ်ထဲက ယူမာကျေးရွာကို စစ်ကော်မရှင်တပ်၏ ဖားကန့်ဗျူဟာကုန်းမှ လက်နက်ကြီး နှင့် ပစ်ခတ်ခဲ့သောကြောင့် အရပ်သား နှစ်ဦး သေဆုံးခဲ့သည်။ ဩဂုတ်လ ၅ ရက်နေ့၊ ည ၈ နာရီအချိန်ခန့်တွင် ယူမာကျေးရွာဘက်ကို ဖားကန့်ဗျူဟာကုန်မှ လက်နက်ကြီးနှင့် ပစ်ခတ်သောကြောင့် အရပ်သား ၂ ဦး သေဆုံးခဲ့ပြီး ၁၄ ဦး ပြင်းထန်ဒဏ်ရာများ ရခဲ့သည်ဟု ဖားကန့်ဒေသခံများ က ပြောသည်။ ဖားကန့်ဒေသခံတစ်ဦးက “အေး လိုင်းပေါ်မှာလည်း သူများတွေ တင်ထားတာ တွေ့မှာပါ။ ယူမာရွာကို လက် နက်ကြီးနဲ့ လှမ်းပစ်တာ။ ဖားကန့် ဗျူဟာကုန်းကနေပေါ့နော်။ အေး ပစ်တာက ဒီမြန်မာစစ်တပ်ပေါ့။ ပြောရ ရင်တော့ နှစ်ယောက် သေသွားတယ်” ဟု ပြောသည်။ ထို့အပြင် ဩဂုတ်လ ၅ ရက်နေ့တွင် ရှရော်ခကျေးရွာထဲက နေအိမ်တစ်လုံးပေါ်လည်း လက်နတ်ကြီးကျည် ကျရောက်ခဲ့ပြီး မီးလောင်ပျက်စီးသွားသည်ဟု ဆိုသည်။ အလားတူ ဩဂုတ်လ ၄ ရက်နေ့ကလည်း ဖားကန့်ဗျူဟာကုန်းမှ ပစ်ခတ်လိုက်သော လက်နက်ကြီးကျည်မှာ ရှရော်ခကျေးရွာထဲ ကျရောက်ခဲ့သောကြောင့် သေဆုံးသူ တစ်ဦး ရှိခဲ့သည်ဟု ဖားကန့်ဒေသခံ အမျိုးသားတစ်ဦး က ပြောသည်။ ဖားကန့်ဒေသ၌ စစ်ကော်မရှင်တပ်၏ လက်နက်ကြီးဖြင့် ပစ်ခတ်မှုများကြောင့် အရပ်သား သေဆုံးမှုများ ဆက် တိုက်ရှိနေပြီး ဩဂုတ်လ ၃ ရက်နေ့နှင့် ၄ ရက်နေ့ နှစ်ရက်တာ တိုက်ပွဲထဲတွင် ကလေးတစ်ဦး အပါအဝင် အရပ်သား ၃ ဦး သေဆုံးခဲ့သည်။ ဩဂုတ်လ ၂ ရက်နေ့တွင် ကချင်လွတ်လပ်ရေး တပ်မတော် KIAနှင့် PDF ပူးပေါင်းအဖွဲ့တို့က ရှရော်ခကျေးရွာရှိ ညောင်ပင်ကုန်းစခန်းနေရာကို လက်လွှတ်ခဲ့ရပြီးနောက် နှစ်ဖက်ကြား တိုက်ပွဲများ ပြင်းထန်နေခြင်း ဖြစ်သည်။ အဆိုပါ ညောင်ပင်ကုန်းနေရာကို KIA နှင့် PDF ပူးပေါင်းအဖွဲ့တို့က ပြန်လည်ရရှိရေး ထိုးစစ်ဆင်ခဲ့ရာ ဩဂုတ်လ ၄ ရက်နေ့တွင် ပြန်လည် သိမ်းပိုက်နိုင်ခဲ့သည်ဟု ဒေသခံများက ပြောသည်။ ဖားကန့်မြို့၊ အေးမြသာယာအတက်က ညောင်ပင်ကုန်း စခန်းနေရာတွင် ဩဂုတ်လ ၆ ရက်နေ့၊ မွန်းလွှဲ ၁ နာရီ ၄၅ မိနစ် အချိန်ခန့်တွင်လည်း လက်နက်ကြီး၊ လက်နက်ငယ် ပစ်ခတ်သံများ ကြားနေရသည်ဟု ဆိုသည်။

ဖားကန့်ဗျူဟာကုန်းမှ လက်နက်ကြီးဖြင့် ပစ်ခတ်မှုကြောင့် အရပ်သား နှစ်ဦးသေဆုံး

« Prev 1 … 134 135 136 137 138 … 1,048 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ