NMG Doh – Page 136 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Jan 19

ရွေးကောက်ပွဲ နောက်ပိုင်း စစ်ပွဲနှင့် လူ့အခွင့်အရေး ချိုးဖောက်မှုများ မြင့်တက်လာနိုင်ဟု တက်ကြွလှုပ်ရှားသူများ ပြော သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။ ရွေးကောက်ပွဲအလွန် ကာလတွင် စစ်ရေးပဋိပက္ခနှင့် လူ့အခွင့် အရေး ချိုးဖောက်မှုများ ပိုမိုမြင့်တက် လာနိုင်သည်ဟု ရွေးကောက်ပွဲစောင့်ကြည့်သူများနှင့် တက်ကြွလှုပ်ရှားသူများက သတိပေး ပြောဆိုလိုက်သည်။ စစ်တပ်က နိုင်ငံရေးထွက်ပေါက် အဖြစ် အပိုင်း ၃ ပိုင်းခွဲ၍ ကျင်းပနေသည့် ရွေးကောက်ပွဲသည် လူထုအား အကျပ်ကိုင် ခြိမ်းခြောက်မှုများဖြင့် ဖော်ဆောင်နေခြင်း ဖြစ်ပြီး၊ ယင်းရွေးကောက်ပွဲအလွန်၌ စစ်ရေး ပဋိပက္ခများနှင့် လူ့အခွင့်အရေးချိုးဖောက်မှုများ ယခုထက် ပိုမိုဆိုးရွားလာနိုင်ကြောင်း သတိပေးလိုက်ခြင်း ဖြစ် သည်။ ကချင်အမျိုးသမီး အစည်းအရုံး-ထိုင်းနိုင်ငံ (KWAT) မှ စည်းရုံးလှုံ့ဆော်ရေးအဖွဲ့ တာဝန်ခံ ဆန်ထွယ် က “ကျမ တို့ မြင်တာကတော့ ဒါကတော့ သူတို့အနေနဲ့ သူတို့နဲ့ မိတ်ဖက်တဲ့ နိုင်ငံတကာတွေနဲ့ ချိတ်ဆက်ပြီးမှ မြန်မာနိုင်ငံ သူတို့ရဲ့ ဒီစီးပွားရေး လမ်းကြောင်းတွေ ဖွင့်ယူပြီးမှ တိုင်းရင်းသားဒေသတွေမှာ စစ်ပဋိပက္ခ ပိုပြီးမှ ဖွင့်ဖို့အတွက် ကို သူတို့ပိုက်ဆံတွေ ရှာသွားနိုင်တဲ့ အခြေအနေလည်း ရှိလာနိုင်တယ် ဒါကြောင့်မို့လို့ ဒီ Election အလွန်ပေါ့ နော်။ ရွေးကောက်ပွဲ အလွန်ကတော့ ပဋိပက္ခတွေနဲ့ သတ်ဖြတ်မှုတွေ ပိုများနိုင်တယ်ဆိုတဲ့ဟာမျိုးကိုလည်း ကျမ တို့ တွေ့ရတယ်ပေါ့နော်” ဟု ပြောသည်။ စစ်ကော်မရှင်သည် ၎င်းတို့၏ ရွေးကောက်ပွဲ ပထမပိုင်းကို ၂၀၂၅ ခုနှစ်၊ ဒီဇင်ဘာလ ၂၈ ရက်တွင် လည်းကောင်း၊ ဒုတိယပိုင်းကို ၂၀၂၆ ခုနှစ်၊ ဇန်နဝါရီလ ၁၁ ရက်တွင်လည်းကောင်း ကျင်းပခဲ့ပြီးဖြစ်ကာ ကျန်ရှိနေသည့် တတိယ ပိုင်းကို ဇန်နဝါရီလ ၂၅ ရက်တွင် ဆက်လက်ပြုလုပ်ရန် စီစဉ်ထားသည်။ ရွေးကောက်ပွဲ ပြင်ဆင်သည့် ကာလတစ်လျှောက်လုံးတွင် စစ်ကော်မရှင်သည် ဥပဒေ အမျိုးမျိုးထုတ်ပြန်ကာ လူထုအား ဖမ်းဆီးထောင်ချခြင်း၊ မဲမထည့်ပါက တက္ကသိုလ်တက်ခွင့် မပြုခြင်းနှင့် စစ်ဘေးရှောင်များ နေရပ် မပြန်ပါက နေအိမ်များကို မီးရှို့မည်ဟု ခြိမ်းခြောက်ခြင်းများ လုပ်ဆောင်ခဲ့သည်။ ထို့အပြင် ကျေးရွာများအတွင်း စစ်ကြောင်းထိုး ဝင်ရောက်ကာ နေအိမ်များကို မီးရှို့ခြင်း၊ လေကြောင်း တိုက်ခိုက် မှုများဖြင့် အရပ်သားများကို ပစ်မှတ်ထားခြင်းနှင့် ခရီးသွားလာခွင့် ကန့်သတ်ခြင်းစသည့် လူ့အခွင့်အရေး ချိုးဖောက်မှုများကို အရှိန်မြှင့်ကျူးလွန်ခဲ့သည်ဟု လူ့အခွင့်အရေးလှုပ်ရှားသူများက ထောက်ပြသည်။ သျှမ်းသံတော်ဆင့်သတင်းဌာန အယ်ဒီတာချုပ် စိုင်းမိဏ်း ကလည်း “စစ်ဘေးစစ်ဒဏ်ကလည်း ဆက်ဖြစ်လာနိုင် ဖွယ်ရှိတယ်။ ဘာလို့လည်းဆိုတော့ ခုနတုန်းက ပြောသလို စစ်ရှိန်က ကျနော်တို့ တိုင်းပြည်မှာ လျော့မသွားဘူး။ တိုက်ပွဲရပ်တယ်ဆိုတာကလည်း ယာယီရပ်ထားတဲ့ပုံစံပဲ ဖြစ်နေတဲ့ အနေအထားပေါ့နော်” ဟု ပြောသည်။  စစ်ကော်မရှင်က ၎င်းတို့စီစဉ်ထားသည့်အတိုင်း ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP) အနိုင်ရ ရှိရေးမှ တစ်ဆင့် နိုင်ငံရေး ထွက်ပေါက်ရှာနေသော်လည်း တော်လှန်ရေး အင်အားစုများကမူ ရွေးကောက်ပွဲ ရလဒ်ကို လက်ခံမည်မဟုတ်ဘဲ တိုက်ပွဲများကို ပိုမိုအရှိန်မြှင့်သွားရန် ပြင်ဆင်နေကြသည်။ ကရင်နီပြည် အင်အားစုကိုယ်စားလှယ် ခွန်းသောမတ်စ် က “ရွေးကောက်ပွဲ ပြီးသွားရင်လည်း ကျနော် ထင် တယ်။ စစ်ရေးနဲ့ ပတ်သက်ပြီးတော့ လျှော့ကျသွားမယ့် အခြေအနေမျိုး မရှိဘူး။ ရွေးကောက်ပွဲ ပြီးသွားရင် တောင်မှ ကျနော်တို့ တော်လှန်ရေးဖက်ကတော့ ဒီထက်ပိုအားကောင်းတဲ့ အခြေအနေမျိုးတွေ ပြင်ဆင်မှုတွေ ရှိတယ်။ အဲတော့ ဒီထက်ပိုပြင်းတဲ့ တိုက်ပွဲမျိုးတွေ ဒီထက်ပို ကျယ်ပြန့်မဲ့ တိုက်ပွဲမျိုးတွေ ဆက်ပြီးတော့ သွားမဲ့ အခင်းအကျင်းမျိုးပဲ ရှိပါတယ်ပေါ့” ဟု ပြောသည်။ စစ်ရေးအရ အရှိန်မြှင့်တင်မှုများနှင့် အတူ စစ်အာဏာရှင်စနစ် အမြစ်ပြတ်ရေးအတွက် အမျိုးသမီး အဖွဲ့အစည်း များ အပါအဝင် တော်လှန်ရေး အင်အားစုများအကြား နိုင်ငံရေးအရ ဗျူဟာမြောက် စုစည်းမှုများကလည်း ပိုမိုအားကောင်းလာနေသည်။ မြန်မာ့အမျိုးသမီးသမဂ္ဂ (BWU) မှ မတင်တင်ညို က “ဒီတစ်ခေါက် နွေဦးတော်လှန်ရေးက မဖြစ်မနေ ဒီအာဏာ ရှင်ကို အဆုံးသတ်ရမယ်ဆိုတဲ့ ခံယူချက်က အခုထိ ခိုင်ခိုင်မာမာရှိနေဆဲပဲ။ ရွေးကောက်ပွဲက ဘယ်လိုရလဒ်ပဲ ရ ရှိလာ ရရှိလာ ကျမတို့ကတော့ ပြည်သူလူထုတွေ အားလုံးရဲ့ အကျိုးစီးပွားကို ရှေးရှုတဲ့ အနေနဲ့ကတော့ စစ် အာဏာရှင်စနစ်နဲ့ အာဏာရှင် မှန်သမျှ ပြုတ်ကျဖို့အတွက်တော့ ဆက်ပြီးတော့ တွန်းလှန်သွားရမယ်။ ဒီအချိန် မှာ ဗျူဟာမြောက် တွန်းလှန်မှုမျိုးတွေ ဖြစ်ဖို့လိုတယ်။ ဗျူဟာမြောက် စုစည်းမှုမျိုးတွေ ဖြစ်ဖို့လိုတယ်” ဟု ပြောသည်။ လက်ရှိတွင် တော်လှန်ရေး အင်အားစုများက နိုင်ငံတကာ အသိုင်းအဝိုင်းအနေဖြင့် စစ်ကော်မရှင်၏ အတု အယောင် ရွေးကောက်ပွဲ ကို အသိအမှတ်မပြုရန်နှင့် တော်လှန်ရေး အဖွဲ့အစည်းများ၏ အုပ်ချုပ်ရေး ယန္တရား များကိုသာ အမြန်ဆုံး အသိအမှတ်ပြု ကူညီပေးကြရန် တောင်းဆိုထားကြသည်။ #ရွေးကောက်ပွဲ #လူ့အခွင့်အရေးချိုးဖောက်မှု #စစ်ပွဲ #စစ်ကော်မရှင်

ရွေးကောက်ပွဲ နောက်ပိုင်း စစ်ပွဲနှင့် လူ့အခွင့်အရေး ချိုးဖောက်မှုများ မြင့်တက်လာနိုင်ဟု တက်ကြွလှုပ်ရှားသူများ ပြော

Jan 19

အထက်တန်း ကျောင်းသူအား မုဒိမ်းပြုကျင့်သူတရားခံကို ဖမ်းမိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။ ရှမ်းပြည်၊ တောင်ကြီးမြို့ အထက်တန်းကျောင်းတစ်ကျောင်းမှ အသက် ၁၉ နှစ် အရွယ် ကျောင်းသူ တစ်ဦးအား အဓမ္မပြုကျင့်ခဲ့သည့် တရားခံကို ဖမ်းမိပြီဟု နီးစပ်သည့် ကျောင်းသား မိဘများက ပြောသည်။ ယမန်နေ့ (ဇန်နဝါရီ ၁၈) ၌ သစ်တောရပ်ကွက်၊ အနောက်ဘက် တောင်ကြီးဟိုတယ်လ် အနီးတွင် ဖမ်းမိခဲ့ပြီး အောင်မြေသစ် အထက်တန်းကျောင်းအုပ်၏ သားဖြစ်သူ အသက် ၂၉ နှစ်အရွယ် ကိုဇာနည်သွေး ဆိုသူက ကျူးလွန်ခဲ့ခြင်း ဖြစ်သည်။ ထိုကျောင်းတွင် အပ်နှံထားသည့် ကျောင်းသားမိဘ တစ်ဦးက “သူ့အမျိုးသမီးလည်း ကျောင်းမှာပဲ ဆရာမ လုပ်နေပါတယ်။ သူ့အမျိုးသမီးနဲ့တော့ မဆိုင်ပေမယ့် ကျမတို့ ကလေးကိုတော့ ဆက်ထားဖို့ စဉ်းစားနေပါ တယ်။ ပိုက်ဆံညှစ်ပြီး ပြုကျင့်တာဆိုတော့ တွေးကြည့်တာနဲ့တင် နှလုံးရောဂါ ရစရာပါ။ ကျောင်းသားမိဘ အားလုံး သတိထားစေချင်ပါတယ်” ဟု ပြောသည်။ ရှမ်းပြည်တောင်ပိုင်း၊ တောင်ကြီးမြို့၊ သစ်တောရပ်ကွက်၊ အမှတ် ၉၄ ကျန်းမာရေးရုံးလမ်းတွင် ဖွင့်လှစ်ထား သည့် အောင်မြေသစ် အထက်တန်းကျောင်းတွင် ဇန်နဝါရီလ ၁၅ ရက်နေ့ နေ့လည် ၁၂ နာရီခွဲ အချိန်၌ မုဒိမ်းမှု ဖြစ်ပွားခဲ့သည်ဟု ဆိုကြသည်။ ဖြစ်စဉ်မှာ ဖျားနာနေသည့် ကျောင်းသူတစ်ဦးက ၎င်း၏ အခန်း၌ ခေတ္တအနားယူနေစဉ် ကိုဇာနည်သွေးဆိုသူမှ ရောက်ရှိလာပြီး မဖွယ်မရာ ဓါတ်ပုံများရယူကာ သိန်း ၂၀ ပေးရမည်ဟု ခြိမ်းခြောက်ခဲ့ခြင်း ဖြစ်သည်။ ထိုမှတဖန် ကျောင်းသူဖက်မှ အတူနေရန် ငြင်းဆန်သည်နှင့် တပြိုင်နက် ကိုဇာနည်သွေးက အဓမ္မပြုကျင့်ခဲ့ပြီး နောက်တိမ်းရှောင် ထွက်ပြေးသွားခဲ့သည်ဟု ဆိုသည်။ ကျောင်းဝန်ထမ်းများနှင့် နီးစပ်သူ တစ်ဦးက “ကလေးမလေးက သားအိမ်ပေါက်တယ်လို့ ကြားတယ်။ ဆေးရုံမှာ ပဲ။ တချို့ကလေးတွေကိုတော့ မိဘတွေ ပြန်လာခေါ်သွားတယ်။ ကျောင်းက ဆက်ဖွင့်မှာပါ” ဟု ပြောသည်။ လက်ရှိတွင် ကျူးလွန်သူအား တောင်ကြီးမြို့မ ရဲစခန်းတွင် ချုပ်နှောင်ထားပြီး (ပ) ၁၅/၂၀၂၆ ရာဇသတ်ကြီး ပုဒ်မ ၃၇၆ ဖြင့် မိသားစုဝင်များက တရားစွဲဆိုထားသည်။ တောင်ကြီးမြို့တွင် စစ်အာဏာသိမ်းပြီးနောက်ပိုင်း ခိုးဆိုးလုယက်မှု၊ မူးယစ်ဆေးမှုနှင့် မုဒိမ်းမှုများ မကြာခဏ ဖြစ်ပွားလေ့ရှိပြီး အများစုမှာ စစ်ကော်မရှင် လက်အောက်ခံ ရဲတပ်ဖွဲ့မှ မဖမ်းဆီးနိုင်သည့် အပြင် လာဘ်ပေး လာဘ်ယူများလည်း ပြုလုပ်နေကြသည်ဟု မြို့ခံများက ပြောသည်။

အထက်တန်း ကျောင်းသူအား မုဒိမ်းပြုကျင့်သူတရားခံကို ဖမ်းမိ

Jan 19

ပစ္စည်းယူ လူသတ်သူ အား ကရင်နီ ရဲတပ်ဖွဲ့ ဖမ်းဆီး အမှုဖွင့် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၉ ရက်။ အမျိုးသမီးတစ်ဦးအား ဓါးနှင့် ထိုးသတ်ပြီး လက်ကိုင်ဖုန်း လုယူခဲ့သူ တစ်ဦးကို ကရင်နီပြည် ရဲတပ်ဖွဲ့ (KSP)က ဖမ်းဆီးကာ အမှုဖွင့် စစ်ဆေးနေပြီဟု တာဝန်ရှိသူများက ပြောသည်။ ကျူးလွန်သူမှာ အသက် ၂၅ နှစ်ဝန်းကျင် အရွယ်ရှိ အမျိုးသား တစ်ဦးဖြစ်ပြီး ကရင်နီပြည်၊ ဒီးမော့ဆိုမြို့နယ်၊ ငွေတောင်ကျေး ရွာတွင် နေထိုင်သူ ဖြစ်သည်ဟု ဆိုသည်။ KSP ဒုရဲချုပ် ကိုဘိုဘိုက “အခု လူသတ်မှုနဲ့ပက်သက်ပြီး ကရင်နီပြည်ရဲ အမှတ် (၁) ရဲစခန်း (ပ) ၁/၂၀၂၆ ရာဇ သတ်ကြီး ဥပဒေပုဒ်မ - ၃၀၂ နဲ့ အမှုဖွင့် အရေးယူဆောင်ရွက်နေပါတယ်ဗျ။ ဘာကြောင့်သတ်တယ် ဆိုတာက တော့ စုံစမ်းနေဆဲပါဗျ။ ခုမှ မေးမြန်းစစ်ဆေးနေတုန်းပါဗျ” ဟု ပြောသည်။ KSP အနေဖြင့် လူသတ်မှု ဖြစ်ပွားပြီးနောက် နယ်မြေခံ တပ်ရင်းများသို့ သတင်းပို့ထားသည်ဖြစ်ရာ ၎င်းအား ဒီးမော့ဆိုမြို့နယ်၊ ပဆေးလာကျေးရွာ၌ ဇန်နဝါရီလ ၁၄ ရက်နေ့ညတွင် လက်ရဖမ်းဆီးနိုင်ခဲ့သည်ဟု ဆိုသည်။ ၎င်းမှာ လူသတ်မှုကျူးလွန်ပြီးနောက် လုယက်ခဲ့သည့်ဖုန်းအား ဒီးမော့ဆိုမြို့နယ်၊ ပဆေးလာကျေးရွာ၌ လာရောက် ရောင်းချခဲ့ခြင်း ဖြစ်သည်။ KSP အနေဖြင့် မိမိတို့ ထိန်းချုပ်နယ်မြေများတွင် ယခု ကျူးလွန်သည့် အမှုသာမက ပြီးခဲ့သည့်နှစ်အတွင်း လူသတ်မှု အားလုံးကို ဖမ်းဆီးအရေးယူနိုင်ခဲ့သည် ဖြစ်ရာ ပြည်သူများ အနေဖြင့် စိုးရိမ်ထိတ်လန့်စရာ မလိုဘူး ဟု ဒုရဲချုပ် ကိုဘိုဘိုက ဆက်ပြောသည်။ ”ဒီလူသတ်မှု ဆိုရင်ပေါ့နော်၊ ၂၀၂၅ ခုနှစ် တစ်နှစ်မှာဆိုရင် ကျနော်တို့ ကရင်နီပြည် ရဲဌာန ရဲစခန်းအမှတ် ၁ ကနေ အမှတ် ၁၇ ထိ ရဲစခန်းတွေကနေ အမှုဖွင့် အရေးယူတဲ့ ဒီလူသတ်မှု အားလုံးပေါင်း ၇ မှု ရှိပါတယ်ပေါ့ နော်။ အဲဒီ ၇ မှုစလုံးကို ကျနော်တို့ လူသတ်တရားခံကို ဖမ်းဆီးအရေးယူ ထောင်ချနိုင်ခဲ့ပါတယ်။” ဇန်နဝါရီလ ၁၂ ရက်နေ့တွင် ဒီးမော့ဆိုမြို့နယ်ရှိ ကျေးရွာတစ်ရွာမှ နွားကျောင်းရန် ထွက်လာသည့် အသက် ၄၅ နှစ်အရွယ် ဒေါ်ပိုင်ဆိုသူမှာ ရွာနှင့် တစ်မိုင်ခန့်ဝေးသည့် လမ်းခုလတ်နေရာတွင် ဓါးဖြင့် ထိုးသတ်ခံလိုက်ရခြင်း ဖြစ်သည်။ ဒေါ်ပိုင်အား ဝမ်းဗိုက်နှင့် လည်ပင်းနေရာတို့တွင် ဓါးဖြင့် ထိုးသတ်၍ ဖုန်းလုယက် ထွက်ပြေး ခဲ့သူအား KSP နယ်မြေခံတပ်ရင်းများ၏ အဆင့်ဆင့် ပူးပေါင်းဆောင်ရွက်မှုများဖြင့် လက်ရဖမ်းဆီးနိုင်ခဲ့ခြင်း ဖြစ်သည်ဟု ဆိုသည်။ ကရင်နီပြည် ကြားကာလ အုပ်ချုပ်ရေးကောင်စီ (IEC) လက်အောက်ခံ KSP အနေဖြင့် လူသတ်မှု၊ ခိုးမှု၊ လုယက် မှုများအား ဖမ်းဆီးအရေးယူဆောင်ရွက်လျက် ရှိသော်လည်း လက်နက်ကိုင် အဖွဲ့အစည်းများ ပါဝင်ပတ်သက်နေ သည့် မူးယစ်ဆေးဝါးနှင့် KTV ကိစ္စများကိူမူ အရေးယူနိုင်ရန် ခက်ခဲနေဆဲ ဖြစ်သည်ဟု စစ်ဘေးရှောင်များ အကြားတွင် ဝေဖန်ပြောဆိုနေကြသည်။

ပစ္စည်းယူ လူသတ်သူ အား ကရင်နီ ရဲတပ်ဖွဲ့ ဖမ်းဆီး အမှုဖွင့်

Jan 19

EU နှင့် တောင်အမေရိကနိုင်ငံများ လွတ်လပ်သော ကုန်သွယ်မှု ဇုန် တည်ထောင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၈ ရက်။ ဥရောပသမဂ္ဂ (EU) နှင့် (အာဂျင်တီးနား၊ ဘရာဇီး၊ ပါရာဂွေး၊ ဥရုဂွေး)တို့ ပါဝင်သော တောင်အမေရိက ကုန်သွယ်ရေးအဖွဲ့ Mercosur (မာရ်ကိုဆူးရ်) တို့သည် ၂၀၂၆ ခုနှစ်၊ ဇန်နဝါရီလ (၁၇) ရက်နေ့တွင် လွတ်လပ်သော ကုန်သွယ်မှုသဘောတူညီချက်ကို လက်မှတ်ရေးထိုးခဲ့ကြသည်။ အဆိုပါ သဘောတူညီချက်သည် လူဦးရေ သန်း (၇၀၀) ကျော်ရှိသော ဈေးကွက်ကို ချိတ်ဆက်ပေးမည်ဖြစ်ပြီး ကမ္ဘာ့ GDP ၏ လေးပုံတစ်ပုံခန့်ကို ကိုယ်စားပြုမည်ဖြစ်သည်။ ယင်းသဘောတူညီချက်အရ ကုန်သွယ်မှုကဏ္ဍ (၉၀) ရာခိုင်နှုန်းကျော်အတွက် သွင်းကုန်ခွန်များကို ပယ်ဖျက်သွားမည်ဖြစ်သည်။ အဆိုပါခြေလှမ်းသည် အမေရိကန်၏ အကာအကွယ်ပေးရေးဝါဒကို တုံ့ပြန်လိုက်ခြင်းဖြစ်သလို၊ တောင်အမေရိကဒေသတွင် တရုတ်နိုင်ငံ၏ စီးပွားရေးသြဇာ ကြီးထွားလာမှုကို ထိန်းညှိရန်လည်း ရည်ရွယ်သည်။ သို့ရာတွင် လွတ်လပ်သော ကုန်သွယ်မှုဇုန် တည်ဆောက်ခြင်းနှင့် ပတ်သက်၍ ဥရောပရှိ လယ်သမားများက ၎င်းတို့၏ စိုက်ပျိုးရေးဈေးကွက်ကို ထိခိုက်နိုင်သဖြင့် ကန့်ကွက်မှုများ ရှိနေသည်။ အဆိုပါ သဘောတူညီချက်သည် ဥရောပလွှတ်တော်၏ အတည်ပြုချက်ရရှိပြီးနောက် အသက်ဝင်လာမည် ဖြစ်သည်။

EU နှင့် တောင်အမေရိကနိုင်ငံများ လွတ်လပ်သော ကုန်သွယ်မှု ဇုန် တည်ထောင်

Jan 19

ဥရောပသမဂ္ဂ (EU) နှင့် အမေရိကန်တို့အကြား ကုန်သွယ်ရေးတင်းမာမှုဆက်ဖြစ်နေ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၈ ရက်။ ဂရင်းလန်ကျွန်းကိစ္စနှင့် ပတ်သက်၍ အမေရိကန်အစိုးရက ဥရောပနိုင်ငံအချို့အပေါ် အခွန်တိုးမြှင့်ကောက်ခံရန် စီစဉ်နေသည့်အပေါ် ဥရောပသမဂ္ဂ (EU) က ပြင်းထန်စွာ တုံ့ပြန်ရန် ပြင်ဆင်နေသည်။ ဇန်နဝါရီလ (၁၈) ရက်နေ့တွင် ပြုလုပ်သော အစည်းအဝေး၌ EU သံအမတ်ကြီးများသည် အမေရိကန်အစိုးရကို သံတမန်နည်းလမ်းဖြင့် တိုက်တွန်းရန်နှင့် အကယ်၍ ဖေဖော်ဝါရီလ (၁) ရက်နေ့တွင် အမေရိကန်က အခွန်တိုးမြှင့်မှုကို အမှန်တကယ် လုပ်ဆောင်လာပါက လက်တုံ့ပြန်သွားရန် ဆုံးဖြတ်ခဲ့ကြသည်။ လက်တုံ့ပြန်မှုအနေဖြင့် အမေရိကန်ကုန်စည်များအပေါ် ယူရို (၉၃) ဘီလီယံဖိုး အခွန်ပြန်လည်ကောက်ခံခြင်းအပြင် "Trade Bazooka" ဟု ခေါ်ဆိုသော Anti-Coercion Instrument (ACI) ယန္တရားကို အသုံးပြုရန် စီစဉ်ထားသည်။ ယင်းယန္တရားအရ အမေရိကန်ကုန်စည်များကို အခွန်အဆမတန် တိုးကောက်ခြင်း၊ ရင်းနှီးမြှုပ်နှံမှု ကန့်သတ်ခြင်း၊ အစိုးရတင်ဒါများမှ ပိတ်ပင်ခြင်းနှင့် နည်းပညာကုမ္ပဏီများ၏ ဝန်ဆောင်မှုများကို ကန့်သတ်ခြင်းတို့ ပြုလုပ်နိုင်မည်ဖြစ်သည်။ လက်ရှိတွင် သတိပေးသည့်အနေဖြင့် ဇန္နဝါရီလ နှောင်းပိုင်းတွင် အတည်ပြုရန် ရှိသည့် EU-US ကုန်သွယ်ရေးသဘောတူညီချက်ကို အတည်မပြုဘဲ ဆိုင်းငံ့ထားရန် ဆုံးဖြတ်ထားသည်။

ဥရောပသမဂ္ဂ (EU) နှင့် အမေရိကန်တို့အကြား ကုန်သွယ်ရေးတင်းမာမှုဆက်ဖြစ်နေ

Jan 19

ဒေါ်နယ်ထရန့်က အဖွဲ့ဝင်ကြေး ၁ ဘီလီယံ ထည့်ဝင်ရမည့် ငြိမ်းချမ်းရေးဘုတ်အဖွဲ့ ဖွဲ့စည်း သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၈ ရက်။ အမေရိကန်သမ္မတ ဒေါ်နယ်ထရန့်သည် ကမ္ဘာ့ပဋိပက္ခများကို ဖြေရှင်းရန် ရည်ရွယ်၍ "Board of Peace" (ငြိမ်းချမ်းရေးဘုတ်အဖွဲ့) ကို ဖွဲ့စည်းရန် ကြိုးပမ်းလျက်ရှိပြီး နိုင်ငံပေါင်း (၆၀) ခန့်ကို အဖွဲ့ဝင်အဖြစ် ပါဝင်ရန် ဖိတ်ကြားခဲ့သည်။ အဆိုပါဘုတ်အဖွဲ့တွင် သမ္မတထရန့်က တစ်သက်တာဥက္ကဋ္ဌအဖြစ် တာဝန်ယူမည်ဖြစ်ပြီး၊ အဖွဲ့ဝင်နိုင်ငံများမှာ (၃) နှစ်သက်တမ်း သတ်မှတ်ထားသည်။ အမြဲတမ်း အဖွဲ့ဝင်ဖြစ်လိုပါက အမေရိကန်ဒေါ်လာ (၁) ဘီလီယံ ထည့်ဝင်ရမည်ဟု သတ်မှတ်ထား သည်။ အဆိုပါဘုတ်အဖွဲ့သည် ပထမဆုံးလုပ်ငန်းစဉ်အဖြစ် ဂါဇာပဋိပက္ခကို ကိုင်တွယ်ဖြေရှင်းမည်ဖြစ်ပြီး နောက်ပိုင်းတွင် အခြားကမ္ဘာ့ပဋိပက္ခများအထိ ချဲ့ထွင်ဆောင်ရွက်သွားရန် ရည်မှန်းထားသည်။ ယင်းသို့ ဖွဲ့စည်းမှုအပေါ် ဟန်ဂေရီ၊ ဗီယက်နမ်၊ အီတလီနှင့် ကနေဒါနိုင်ငံတို့က ပူးပေါင်းရန် အပြုသဘောဆောင်သော တုံ့ပြန်မှုများ ရှိခဲ့သော်လည်း၊ တစ်ဖက်တွင် ကုလသမဂ္ဂ (UN) ၏ အခန်းကဏ္ဍ မှေးမှိန်သွားနိုင်သည့်အပေါ် နိုင်ငံတကာခေါင်းဆောင်အချို့က စိုးရိမ်လျက်ရှိကြသည်။ ကုလသမဂ္ဂဘက်ကမူ နိုင်ငံများအနေဖြင့် မိမိတို့စိတ်ကြိုက် အဖွဲ့အစည်းများ ဖွဲ့စည်းပိုင်ခွင့်ရှိသော်လည်း ကုလသမဂ္ဂအနေဖြင့် ၎င်း၏ လုပ်ငန်းတာဝန်များကို ဆက်လက်ထမ်းဆောင်သွားမည်ဖြစ်ကြောင်း တုံ့ပြန်ထားသည်။

ဒေါ်နယ်ထရန့်က အဖွဲ့ဝင်ကြေး ၁ ဘီလီယံ ထည့်ဝင်ရမည့် ငြိမ်းချမ်းရေးဘုတ်အဖွဲ့ ဖွဲ့စည်း

Jan 19

ကရင်နီဒေသမှ ထောင်ဖောက်ပြေးသည့် စစ်သုံ့ပန်း အရာရှိတစ်ဦး ထိုင်းတွင် ဖမ်းမိ သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဇန်နဝါရီလ ၁၉ ရက်။ ကရင်နီပြည်၊ မယ်စဲ့မြို့နယ်ရှိ အကျဉ်းထောင်မှ ထောင်ဖောက်ပြေးခဲ့သည့် စစ်ကော်မရှင် စစ်သုံ့ပန်း ၈၀ ခန့် အနက် ဒု-ဗိုလ်အဆင့်ရှိသူ တစ်ဦးကို ထိုင်းနိုင်ငံဘက်ခြမ်းတွင် ဖမ်းဆီးရမိခဲ့ကြောင်း ထိုင်းသတင်းဌာန အချို့ တွင် ဖော်ပြသည်။ ပြီးခဲ့သည့် ဇန်နဝါရီ ၁၇ ရက်၊ နံနက်အစောပိုင်းတွင် မယ်စဲ့မြို့နယ်ရှိ ကရင်နီပြည် ကြားကာလအုပ်ချုပ်ရေး ကောင်စီ (IEC) ထိန်းချုပ်ရာ အကျဉ်းထောင်မှ စစ်သုံ့ပန်း ၈၀ ဝန်းကျင်သည် လက်နက်ငယ် ၉ လက်နှင့်အတူ ထောင်ဖောက်ပြေးခဲ့ခြင်းဖြစ်သည်။ ထိုသို့ထွက်ပြေးရာတွင် အကျဉ်းထောင်ဝန်ထမ်း ၂ ဦးကိုလည်း အတူခေါ်ဆောင်သွားခဲ့သည်ဟု IEC က ထုတ်ပြန်သည်။ ကရင်နီတပ်ပေါင်းစုက လိုက်လံရှာဖွေနေစဉ်အတွင်း ဇန်နဝါရီလ ၁၈ ရက်နေ့၊ ညနေပိုင်းတွင် ထိုင်းနိုင်ငံ၊ မယ်ဟောင်ဆောင် ခရိုင်အတွင်းသို့ ဝင်ရောက်လာသည့် စစ်ကော်မရှင် ဒု-ဗိုလ်အဆင့်ရှိ ပိုင်စိုးသူကို ထိုင်းရဲတပ်ဖွဲ့က ဖမ်းဆီးရမိခဲ့ပြီး နယ်မြေခံစစ်တပ်ထံ လွှဲပြောင်းပေးခဲ့သည်။ ထိုင်းသတင်းရင်းမြစ်များ၏ အဆိုအရ အခြားထွက်ပြေးနေသည့် စစ်ကော်မရှင် တပ်သား ၁၀ ဦးခန့် သည်လည်း ထိုင်းနိုင်ငံအတွင်းသို့ ဝင်ရောက်နေပြီး၊ ၎င်းတို့အနက် တပ်ရင်းမှူးနှင့် တပ်ခွဲမှူးအဆင့်ရှိသူအချို့ ပါဝင်နေသည်ဟု ဆိုသည်။ ထွက်ပြေးသွားသည့် စစ်ကော်မရှင် တပ်သားများသည် တော်လှန်ရေးအဖွဲ့များထံတွင် စစ်သုံ့ပန်းအဖြစ် ဆက်လက် အဖမ်းခံရခြင်းထက် ထိုင်းအာဏာပိုင်များထံတွင် အဖမ်းခံပြီး မြန်မာစစ်ကောင်စီထံ ပြန်လည် ပို့ဆောင်ခံရရန် ကြားခံလူများမှ တစ်ဆင့် ကြိုးပမ်းနေကြခြင်း ဖြစ်သည်ဟု ဆိုသည်။ IEC အတွင်းရေးမှူး ဦးဗညားက အကျဉ်းထောင်အတွင်းစည်းပေါက်သွားသဖြင့် ယခုကဲ့သို့ ဖြစ်ပွားခဲ့ခြင်း ဖြစ်ကြောင်း ဝန်ခံထားပြီး လုံခြုံရေးပိုင်းကို ပြန်လည်စိစစ်နေကြောင်း သတင်းမီဒီယာများကို ပြောဆိုထားသည်။ လက်ရှိတွင် မယ်စဲ့နှင့် မော်ချီးဒေသရှိ ပြည်သူများအား လုံခြုံရေးသတိရှိရန် တိုက်တွန်းထားပြီး ထွက်ပြေး လွတ် မြောက်နေသူများကို ဖမ်းဆီးရမိရေးအတွက် ကရင်နီတပ်ပေါင်းစုက ဆက်လက်ရှာဖွေလျက်ရှိသည်။

ကရင်နီဒေသမှ ထောင်ဖောက်ပြေးသည့် စစ်သုံ့ပန်း အရာရှိတစ်ဦး ထိုင်းတွင် ဖမ်းမိ

Jan 16

အမေရိကန်တွင် ကရင်လူငယ်များဖြင့် ဖွဲ့စည်းထားသည့် K-Fam ဂိုဏ်းဝင်များကို လက်နက်များနှင့်အတူ ဖမ်းဆီးရမိ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၆ ရက်။ အမေရိကန်နိုင်ငံ၊ နီဘရားစကားပြည်နယ်၊ ဒေါက်ဂလပ်စ်ခရိုင်တွင် မြန်မာနှင့် ထိုင်းနိုင်ငံတို့မှ ရွှေ့ပြောင်းလာသည့် ဒုက္ခသည် ကရင်လူငယ်များဖြင့် ဖွဲ့စည်းထားသော "K-Fam" အမည်ရှိ လူမိုက်ဂိုဏ်းဝင် (၃) ဦးကို ရဲတပ်ဖွဲ့က ဖမ်းဆီးရမိခဲ့သည်။ လွန်ခဲ့သည့် စနေနေ့ ဇန္နဝါရီလ ၁၀ ရက် နံနက်ပိုင်းတွင် မော်တော်ယာဉ်တစ်စီးကို တားဆီးစစ်ဆေးရာမှ ယာဉ်မောင်းဖြစ်သူ အသက် (၃၀) အရွယ် ကပေါ်ထူး (Kapaw Htoo) မှာ မူးယစ်သောက်စားထားသည်ကို တွေ့ရှိခဲ့ရပြီး ကားပေါ်ပါ လူငယ် (၃) ဦးလုံးမှာ ဂိုဏ်းဝင်များဖြစ်ကြောင်း သိရှိခဲ့ရခြင်းဖြစ်သည်။ ရဲတပ်ဖွဲ့၏ ရှာဖွေမှုအရ ကားအတွင်းမှ အခိုးခံထားရသည့် ပစ္စတိုသေနတ်များ၊ နံပါတ်ဖျက်ထားသည့် AR-15 ရိုင်ဖယ်တစ်လက်၊ အော်တိုပစ်ခတ်နိုင်ရန် ပြုပြင်ထားသည့် သေနတ်တစ်လက်နှင့် မျက်နှာဖုံးစွပ်များကို သိမ်းဆည်းရမိခဲ့သည်။ ယာဉ်မောင်း ကပေါ်ထူးအား မူးယစ်မောင်းနှင်မှု၊ ခိုးရာပါလက်နက် လက်ဝယ်ထားရှိမှုတို့ဖြင့် အမှုဖွင့်ထားပြီး အသက် (၂၂) နှစ်အရွယ် ကျော်ပွား (Kyaw Pwa) နှင့် အမည်မဖော်ပြသည့် အသက် (၁၇) နှစ်အရွယ် လူငယ်တစ်ဦးတို့ကိုလည်း လက်နက်မှုများဖြင့် တရားစွဲဆိုထားသည်။ K-Fam ဂိုဏ်းသည် အိုမားဟားမြို့အနီးရှိ ကရင်လူငယ်များဖြင့် အသစ်ဖွဲ့စည်းထားသည့် ဂိုဏ်းတစ်ခုဖြစ်ပြီး လက်နက်ကိုင်ဆောင်မှုနှင့် ရာဇဝတ်မှုများတွင် ပါဝင်ပတ်သက်နေကြောင်း ရဲတပ်ဖွဲ့က ထုတ်ပြန်ထားသည်။

အမေရိကန်တွင် ကရင်လူငယ်များဖြင့် ဖွဲ့စည်းထားသည့် K-Fam ဂိုဏ်းဝင်များကို လက်နက်များနှင့်အတူ ဖမ်းဆီးရမိ

Jan 16

ဒေသတွင်းတင်းမာမှုကို တုံ့ပြန်ရန် ဂျပန်နှင့် ဖိလစ်ပိုင်တို့ လုံခြုံရေးစာချုပ်များ လက်မှတ်ရေးထိုး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဇန္နဝါရီလ ၁၆ ရက်။ ဖိလစ်ပိုင်နှင့် ဂျပန်နိုင်ငံတို့သည် ဒေသတွင်း၌ တရုတ်၏ နယ်မြေချဲ့ထွင်လာမှုနှင့် တောင်တရုတ်ပင်လယ် တင်းမာမှုများကို ရင်ဆိုင်ရန်အတွက် ၂၀၂၆ ခုနှစ်၊ ဇန်နဝါရီလ ၁၅ ရက်တွင် စစ်ဘက်ဆိုင်ရာ သဘောတူညီချက်နှစ်ရပ်ကို လက်မှတ်ရေးထိုးခဲ့ကြသည်။ ဤပူးပေါင်းဆောင်ရွက်မှုသည် အမေရိကန်၊ ဂျပန်နှင့် ဖိလစ်ပိုင် သုံးနိုင်ငံ မဟာဗျူဟာမြောက် မဟာမိတ်ဖွဲ့မှုကို ပိုမိုခိုင်မာစေမည်ဟု ဖိလစ်ပိုင် သမ္မတက ပြောသည်။ ပထမသဘောတူညီချက်မှာ "စစ်ဘက်ဆိုင်ရာ ထောက်ပံ့မှုနှင့် ဝန်ဆောင်မှု အပြန်အလှန်လဲလှယ်ရေး သဘောတူညီချက်" (ACSA) ဖြစ်ပြီး နှစ်နိုင်ငံစစ်တပ်အချင်းချင်း ရိက္ခာနှင့် အပိုပစ္စည်းများကို အပြန်အလှန် အလျင်အမြန် ပံ့ပိုးပေးနိုင်မည်ဖြစ်သည်။ ဒုတိယအနေဖြင့် "တရားဝင် လုံခြုံရေး အကူအညီ" (OSA) အစီအစဉ်အရ ဂျပန်နိုင်ငံက ဖိလစ်ပိုင်သို့ အမေရိကန်ဒေါ်လာ ၆ သန်း ထောက်ပံ့မည်ဖြစ်ကာ အဆိုပါငွေကြေးကို ဂျပန်ကလှူဒါန်းထားသည့် အမြန်ပြေးမော်တော်ဘုတ်များ ထားရှိမည့် အဆောက်အအုံများ တည်ဆောက်ရာတွင် အသုံးပြုမည်ဖြစ်သည်။ ဂျပန်နိုင်ငံခြားရေးဝန်ကြီး Motegi က ပိုမိုဆိုးရွားလာသော မဟာဗျူဟာမြောက် ပတ်ဝန်းကျင်ကြောင့် ဤသို့ပူးပေါင်းဆောင်ရွက်ရန် လိုအပ်ကြောင်း ပြောကြားခဲ့ပြီး နှစ်နိုင်ငံလုံးက ပင်လယ်ရေကြောင်း လွတ်လပ်စွာ သွားလာခွင့်နှင့် တရားဥပဒေစိုးမိုးရေးကို မြှင့်တင်ရန် ကတိပြုခဲ့ကြသည်။

ဒေသတွင်းတင်းမာမှုကို တုံ့ပြန်ရန် ဂျပန်နှင့် ဖိလစ်ပိုင်တို့ လုံခြုံရေးစာချုပ်များ လက်မှတ်ရေးထိုး

« Prev 1 … 134 135 136 137 138 … 1,114 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို — August 20, 2026 2:35 pm
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ် — August 20, 2026 2:33 pm
ထိုင်း-မြန်မာ နယ်စပ်ဖြတ်ကျော်ရာဇဝတ်မှုများ နှိမ်နင်းရန် စစ်ဦးစီးချုပ်များဆွေးနွေး — August 20, 2026 2:30 pm

Recent Posts

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ်

Archives

Archives

×Close