NMG Doh – Page 137 – Network Media Group

NMG Doh

Author: NMG Doh

Aug 4

စက်လှေများ ကုန်သယ်ခွင့် မရသဖြင့် စောင့်ဆိုင်းနေရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ သြဂုတ်လအတွက် ကုန်သယ်ယူခွင့် မျှောစာမရရှိသေးသဖြင့် စက်လှေများ စောင့်ဆိုင်းနေရသည်ဟု မြိတ်အခြေစိုက် စက်လှေမောင်းသူ အချို့က ပြောသည်။ လူကြီးလမ်းကြောင်း ရှိသည်ဟု ဆိုကာ သြဂုတ်လအတွက် ကုန်ပစ္စည်း သယ်ဆောင်ခွင့် မျှောစာ ထုတ်မပေး သဖြင့် စောင့်ဆိုင်းနေရခြင်းဖြစ်သည်ဟု စက်လှေမောင်းသူများက ပြောသည်။ ကျွန်းစုမြို့နယ် မဲတောကျေးရွာအုပ်စုရှိ ကျေးရွာများဆီသို့ ကုန်ပစ္စည်းများ သယ်ယူ ပို့ဆောင်ပေးနေသည့် စက် လှေများကို စစ်ကောင်စီက အကြောင်းပြချက် အမျိုးမျိုးပြကာ မျှောစာ ထုတ်မပေးသဖြင့် စောင့်ဆိုင်း နေရ သည်ဟု စက်လှေမောင်းသူ တစ်ဦးက ပြောသည်။ မြိတ်နှင့် ကျွန်းစုမြို့နယ်များတွင် ယခင်က ကုန်ပစ္စည်း သယ်ယူခွင့် (မျှောစာ)ကို တစ်လလျှင် တစ်ကြိမ် ထုတ်ယူ ခဲ့ရပြီး ယခုသြဂုတ်လအတွက် မျှောစာကို အကြောင်းပြချက် အမျိုးမျိုးပေးကာ ထပ်မံ၍ မထုတ်ပေးသေးခြင်း ကြောင့် မြိတ်မြို့ဆိပ်ကမ်းတွင် စက်လှေများ ပိတ်မိနေကြကာ မျှောစာကို စောင့်ဆိုင်းနေကြရသည်ဟု စက်လှေပိုင်ရှင်များက ပြောသည်။ စက်လှေပိုင်ရှင်တစ်ဦးက “မျှောစာလုပ်ဖို့အတွက် လမကုန်ခင်ကတည်းက မြိတ်ကို တက်သွားတာပါ၊ အခုက လူကြီး လမ်းကြောင်းရှိနေလို့ ပြောဆိုနေပြီး မျှောစာကို ထုတ်မပေးသေးဘူး၊ ရွာကိုလည်း ပြန်ခွင့်မပေးသေး တော့ အတော်လေး ပင်ပန်းနေကြရပြီ” ဟု ပြောသည်။ စစ်ကော်မရှင်မှ မြိတ်ဆိပ်ကမ်းတွင် ရှိနေသည့် ကုန်ပစ္စည်း သယ်ယူပို့ဆောင်ပေးနေသည့် စက်လှေများကို ဇူလိုင် လ မကုန်ခင်လောက်ကတည်းက ကုန်ပစ္စည်း သယ်ယူခွင့်(မျှောစာ) အသစ်လုပ်ရမည် ဆိုသည့် အကြောင်းပြ ချက်ဖြင့် သယ်ယူခွင့်မပေးခဲ့ခြင်း ဖြစ်သည်။ မြိတ်မြို့မှ ကုန်တင်ကုန်ချ ပြုလုပ်နေသည့် ကျွန်းစုမြို့နယ်ဘက်မှ စက်လှေများမှာ ကုန်သယ်ယူခွင့် (မျှောစာ)ကို ကျွန်းစုမြို့ပေါ်တွင် သွားရောက် ထုတ်ယူကြရခြင်း ဖြစ်သည်။ စက်လှေများသည် လမ်းခရီးတွင် တွေ့ရသည့် စစ်သင်္ဘောများထံ ဆိုက်ကပ်ရကာ ကုန်သယ်ယူခွင့် (မျှောစာ) ကို ထုတ်ပြ စစ်ဆေးခံရပြီး စစ်ကော်မရှင် တာဝန်ရှိသူများက ဖြတ်သန်းခွင့်ပြုမှသာ သွားလာခွင့်ရသည်ဟု စက်လှေ ပိုင်ရှင်များက ဆိုသည်။ ယခုကဲ့သို့ စက်လှေများ ထွက်ခွာခွင့်မရသေးဘဲ ကြန့်ကြာနေရသည့် အတွက် ပင်လယ်အတွင်း ကျွန်းများမှ ကျေးရွာများတွင် အခြေခံစားသောက် ကုန်နှင့် ဆန်များ ပြတ်လပ်သွားမည်ကို စိုးရိမ်နေကြရသည်။

စက်လှေများ ကုန်သယ်ခွင့် မရသဖြင့် စောင့်ဆိုင်းနေရ

Aug 4

မြိတ်-ရန်ကုန် ကားလမ်းပိတ်၊ စားသောက်ကုန် ဈေးတက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ မြိတ် - ရန်ကုန် ကားလမ်း ပိတ်နေသဖြင့် စားသောက်ကုန် စျေးနှုန်းများ မြင့်တက်နေသည်ဟု ဒေသခံပြည်သူများ က ပြောသည်။ မြိတ် - ပုလော လမ်းပိုင်းကို ပိတ်ထားသည့် အတွက် မြိတ်မြို့နယ်၊ ကျွန်းစုမြို့နယ်၊ တနင်္သာရီမြို့နယ် နှင့် ဘုတ်ပြင်းမြို့နယ်တို့တွင် ကုန်စိမ်းနှင့် စားသောက်ကုန်ပစ္စည်းများ ဈေးတက်နေခြင်း ဖြစ်သည်။ ဒေသတွင်း တိုက်ပွဲများကြောင့် မြိတ် - ရန်ကုန် လမ်းကို ဖြတ်သန်းသွားလာခွင့် ပိတ်ထားသဖြင့် ကုန်စိမ်းနှင့် စားဖိုချောင်သုံး စားသောက်ကုန် ပစ္စည်းများ ဈေးတက်နေသည်ဟု မြိတ်မြို့ခံများက ပြောသည်။ ကုန်စိမ်းရောင်းချနေသူ နောက်လယ်ရပ်ကွက်နေ အသက် ၃၅ နှစ်အရွယ် အမျိုးသမီးတစ်ဦးက “အရင်လမ်း မပိတ်ခင်က မြိတ်မြို့မှာ ကြက်ဥတစ်လုံးကို ၅၀၀ ပေါ့နော်။ အခုတော့ ၈၀၀ ပေးဝယ်စားရတယ်။ ကန်စွန်း ရွက်နဲ့ ချဉ်ပေါင်တောင် တစ်စည်းကို ၁၀၀၀ ပေးရတယ်။ ငရုတ်သီးစိမ်းဆို တစ်ဆယ်သား ငါးထောင်ပေးရ တယ်” ဟု ပြောသည်။ အချို့ကုန်စိမ်းများမှာ လမ်းမပိတ်မီ အချိန်ကထက် သုံးဆခန့် ဈေးတက်သွားသည်ဟု ကုန်စိမ်းရောင်းချနေသူ နောက်လယ်ရပ်ကွက်နေ အမျိုးသမီးက ပြောသည်။ မြိတ်ခရိုင်အတွင်းရှိ ပလမြို့ အနီးဝန်းကျင်တွင် စစ်ကော်မရှင်တပ်နှင့် ပြည်သူ့ကာကွယ်ရေး ပူးပေါင်းတပ်တို့ကြား ရက်ရှည် တိုက်ပွဲပြင်းထန်နေပြီး လေကြောင်းနှင့် လက်နက်ကြီး ပစ်ခတ်တိုက်ခိုက်မှုများကြောင့် လမ်းပိုင်း ဖြတ် သန်းသွားလာခွင့်ကို ဇူလိုင်လ ၂၅ ရက်နေ့မှစတင်ကာ ပိတ်ထားလိုက်ကြောင်း မြိတ်ခရိုင်တပ်ရင်း (၁) က ထုတ်ပြန်ထားသည်။ ခရမ်းချဉ်သီး၊ ဂေါ်ဖီထုပ်၊ ကြက်သွန်ဖြူ၊ ကြက်သွန်နီ စသည့် မီးဖိုချောင်းသုံး ပစ္စည်းများလည်း ရေလမ်းခရီးမှ သယ်ယူခဲ့ရာတွင် အချို့မှာ ပုပ်ပွပျက်စီးကုန်သည်ဟုလည်း ကုန်စိမ်းသည်များက ပြောသည်။ ကုန်စိမ်းများ စျေးတက်နေသည့်အပြင် ဆန်တစ်အိတ်ကို လမ်းစရိတ်နှင့် အတင်အချစရိတ် အတွက်ပါ ထည့် ပေါင်းလျှင် ပျမ်းမျှ ကျပ်နှစ် သောင်းခန့်အထိ စျေးတက်လာသည်ဟု မြို့ခံကုန်သည်များက ဆိုသည်။ မြိတ်မြို့တွင် ရောင်းချနေသည့် ကုန်စိမ်း အများစုကို ရန်ကုန်မြို့ကဲ့သို့ တိုင်းပြင်ပမှ ကားဖြင့် တင်သွင်းပြီး ထားဝယ်၊ ပလောက်၊ ပုလောမြို့တို့မှလည်း လှေများဖြင့် ရေကြောင်းမှ ကုန်စည်များ သယ်နေကြရသည်ဟု ဆိုသည်။ ဓါတ်ပုံ - Myeik Breaking News

မြိတ်-ရန်ကုန် ကားလမ်းပိတ်၊ စားသောက်ကုန် ဈေးတက်

Aug 4

ညောင်ဦး မြို့နယ်အတွင်း စစ်ကော်မရှင် စစ်ကြောင်း ကြားဖြတ်တိုက်ခံရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ ညောင်ဦး - ချောက် ကားလမ်းပေါ်ရှိ ကြအိုကျေးရွာမှ ကျောက်ပြင်ကန်ကျေးရွာသို့ ဦးတည် စစ်ကြောင်း ထိုးလာ သည့် အင်အား ၁၀၀ ခန့်ရှိ စစ်ကော်မရှင် စစ်ကြောင်းကို တော်လှန်ရေးတပ်ဖွဲ့ဝင်များက ကြားဖြတ်တိုက်ခိုက်ခဲ့သည်ဟု မြေပြင် သတင်းအရင်းအမြစ်များက ပြောသည်။ မန္တလေးတိုင်း၊ ညောင်ဦးမြို့နယ်၊ ညောင်ဦး - ချောက် ကားလမ်းဘေးရှိ ကျေးရွာများကို ပုဂံမြို့မှ ထွက်လာသည့် သံချပ်ကာကား ၂ စီးနှင့် အင်အား ၂၀၀ ခန့်ရှိသည့် စစ်ကြောင်းမှ ကျောက်ပြင်ကန်ကျေးရွာဘက်သို့ ခွဲထွက်လာ သည့် စစ်ကြောင်းကို တိုက်ခိုက်ခြင်းဖြစ်သည်ဟု ဒေသခံအချို့က ပြောသည်။ Black Eagle တော်လှန်ရေး တပ်ဖွဲ့တာဝန်ရှိသူ တစ်ဦးက “ကြအိုနဲ့ မြေသန့်တောင်မှာ ညအိပ်တာ မနက်စော စော စစ်ကြောင်းခွဲပြီး တက်လာတာကို ရွာမရောက်ခင် ကြို စောင့်ပြီး လမ်းကဖြတ်တိုက်ခဲ့တာ သူတို့ဘက်က ထိခိုက် ဒဏ်ရာရတာတွေ များနိုင်တယ်” ဟု ပြောသည်။ ကျောက်ပြင်ကန်ကျေးရွာ၌ နေထိုင်သူတစ်ဦးက ကြအိုနှင့် ကျောက်ပြင်ကန် အကြားရှိ ဒေသအခေါ် ကိုသိန်းဇံ ကုန်း တောင်ဘက်က အုတ်ကျင်းအနီးတွင် ဩဂုတ်လ ၁ ရက်နေ့၊ နံနက် ၆ နာရီကျော် အချိန်ခန့်တွင် တော်လှန် ရေး တပ်ဖွဲ့ဝင်များက တိုက်ခိုက်ခဲ့ခြင်းဖြစ်သည်ဟု ဆိုသည်။ တိုက်ပွဲဖြစ်စဉ်ကို ထန်းတက်ရင်းမြင်တွေ့ခဲ့သည့် ဇကရွာသားတစ်ဦးက “စစ်သားတွေ သေနတ်မှန်ပြီး လဲကျ ကုန်တာ မနည်းဘူး။ အစိတ် သုံးဆယ်လောက်ရှိမယ်။ သေနတ်တောင် မပစ်တတ်ကြဘူး ထင်ပါတယ်။ တော် တော်များများက မိုးပေါ် ထောင်ပစ်နေတာဗျ ပျူတွေထင်တာပဲ” ဟု ပြောသည်။ စစ်ကြောင်းကို ဦးဆောင်လာသည့် စစ်ကြောင်းမှူးဖြစ်သူမှာ ဩဂုတ်လ ၂ ရက်နေ့တွင် သေဆုံးသွားသည်ကို အတည်ပြုနိုင်ခဲ့ကြောင်းနှင့် တပ်ဖွဲ့ဝင် ၁၀ ဦးခန့် ထိခိုက်ဒဏ်ရာရရှိသည်ဟု Black Eagle အဖွဲ့တာဝန်ရှိသူက ပြောသည်။ Black Eagle အဖွဲ့တာဝန်ရှိသူက “တိုက်ပွဲ အသာစီးရပေမဲ့ ထပ်ပြီး စစ်ကူတွေ လာနိုင်တာရယ် အင်အားချင်း မမျှတာရယ်ကြောင့် ရွာသားတွေကို ဘေးလွတ်ရာကိုခေါ်ထုတ်ပြီး နောက်ဆုတ်ပေးခဲ့ရတယ်” ဟု ပြောသည်။ နှစ်ဖက်ကြား ပစ်ခတ်မှုများ ဖြစ်နေချိန် နံနက် ၁၁ နာရီကျော်ခန့်တွင် ဖောကား ၂စီးရောက်လာပြီး တစ်စီးပေါ်သို့ ဒဏ်ရာရရှိသူများနှင့် အလောင်းများဟု ယူဆရသူ အချို့ကို တင်ဆောင်သွားသည်ဟု ဆိုသည်။ ထို့အပြင် ကျန်ဖောကားတစ်စီးဖြင့် ကျောက်ပြင်ကန်ကျေးရွာ အတွင်းရှိ အရပ်သား နေအိမ်များထဲမှ ဆန်အိတ် များ နှင့် ဆီပုံးများကို ယူဆောင်ကာ ဂန့်ဂါကျေးရွာဘက်သို့ ပြန်လည်ထွက်ခွာသွားသည် ဟု မျက်တွေ့ရှိသူ တစ်ဦးက ပြောသည်။ ပြီးခဲ့သည့် ဇူလိုင်လ ၆ ရက်နေ့မှ ၁၂ ရက်နေ့အတွင်း ပုဂံ - ညောင်ဦး အရှေ့တောင်ဘက်ရှိ ကျေးရွာများကို စစ်ကော်မရှင် တပ်ဖွဲ့ဝင်များက တစ်ပတ်ခန့် ရက်ဆက် စစ်ကြောင်းထိုးလာခဲ့ပြီး တိုက်ပွဲ ဖြစ်ပွားခြင်းမရှိဘဲ ပွဲတိုင်း၊ ချောင်းရှည်၊ အနောက်အုံ၊ ဇီးစမြင်၊‌ ကျောက်ပြင်ကန်၊ မြောင်၊ မီးလောင်ဖျား‌တောင်နှင့် မီး‌ လောင်ဖျား မြောက်ကျေးရွာ စုစုပေါင်း ရွာပေါင်း ၈ ရွာကို မီးရှို့ခဲ့သေးသည်။

ညောင်ဦး မြို့နယ်အတွင်း စစ်ကော်မရှင် စစ်ကြောင်း ကြားဖြတ်တိုက်ခံရ

Aug 4

ရေဖြူမြို့နယ်အတွင်း အရပ်သား ရှစ်ဦးကို စစ်တပ်မှ ဖမ်းဆီး သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ ထားဝယ်ခရိုင်၊ ရေဖြူမြို့နယ်၊ ပရဒတ်ကျေးရွာတွင် စစ်ကော်မရှင်တပ်မှ ရွာသား ရှစ်ဦးကို ဖမ်းဆီးသွားခဲ့သည်ဟု ရွာသားများက ပြောသည်။ တနင်္သာရီတိုင်း ထားဝယ် အထူးစီးပွားရေးဇုန် ဧရိယာ၊ ရေနက်ဆိပ်ကမ်းရှိ ယာယီစစ်စခန်းသို့ ရောက်နေသည့် စစ်ကော်မရှင်စစ်ကြောင်းက သြဂုတ်လ ၂ ရက်နေ့ နံနက် ၆ နာရီခန့်တွင် နဘုလယ်ဒေသအတွင်းရှိ ပရဒတ်ကျေးရွာသို့ ရောက်ရှိ လာပြီး ရွာသားများကို ဖမ်းဆီးသွားခြင်း ဖြစ်သည်။ အသက် ၄၀ ခန့်အရွယ် ရွာသားတစ်ဦးက “ရွာအထဲမှာက ဖုန်းလိုင်းက လုံးဝမရဘူး၊ ပြောချင်ရင် ရွာအပြင် ထွက် ပြောနေကြရတယ်၊ စစ်ကြောင်းဝင်လာတာကို လိုင်းမရတော့ သတင်းမရဘူးလေ၊ စစ်တပ်ရွာထဲဝင် လာ တော့ နာရေးအိမ်မှာ ရှိနေတဲ့သူတွေ ဖမ်းခေါ်သွားတာ။ လမ်းမှာတွေ့တဲ့ သူတွေရော အကုန်ဖမ်းခေါ်သွားတာ” ဟု ပြောသည်။ ပရဒတ်ကျေးရွာက ရွာသား အမျိုးသား၊ အမျိုးသမီး စုစုပေါင်း အယောက် ၂၀ ခန့်ကို ကနဦး ဖမ်းဆီးသွားခြင်း ဖြစ်သည်။ ထို့နောက် နံနက် ၁၀ နာရီအချိန်ခန့်တွင် ဖမ်းဆီးထားသည့် ရွာသားများကို ခေါ်ဆောင်၍ စစ်ကြောင်း ပြန်လည် ထွက်ခွာသွားပြီးနောက် ထွက်ဝကျေးရွာအနီး အရောက်တွင် အမျိုးသမီးနှင့်သက်ကြီးပိုင်း အမျိုးသား အချို့ကို ပြန်လွှတ်ပေးခဲ့သည်။ သို့သော် အမျိုးသား ၈ ဦးကိုမူ ဆက်လက် ဖမ်းဆီးခေါ်ဆောင်သွားခဲ့ရာ ယနေ့အချိန်ထိ အဆင်အသွယ် မရသေး ဘူးဟု ရွာသားများက ပြောသည်။ နဘုလယ်ဒေသအတွင်းရှိ ပရဒတ်၊ လဲရှောင်၊ ထိန်ကြီး စသည့် ကျေးရွာသုံးရွာ၌ ဖုန်းနှင့် အင်တာနက် ဆက်သွယ် ရေးလိုင်းတို့ ပြတ်တောက်နေသည်မှာ တစ်ပတ်ခန့်ရှိလာပြီ ဖြစ်ကြောင်း ရွာသားများက ပြောသည်။ စစ်ကော်မရှင်စစ်ကြောင်းသည် နံနက် ၁၀ နာရီခန့်တွင် ဖမ်းဆီးထားသည့် အမျိုးသား ၈ ဦးနှင့်အတူ ရေနက်ဆိပ် ကမ်း အတွင်းသို့ ပြန်လည်ဝင်ရောက်သွားခဲ့သည်ဟု ရွာသားများက ဆိုသည်။ ထိုစစ်ကြောင်းမှ ဖမ်းဆီးသွားသည့် ပန်းတင်အင်းရွာသား ဆယ်ဦးမှာလည်း ယနေ့ သြဂုတ်လ ၃ ရက်နေ့ ညနေ ပိုင်း အချိန်ထိ ပြန်လွတ်လာခြင်းမရှိသေးဟု ဆိုကြသည်။

ရေဖြူမြို့နယ်အတွင်း အရပ်သား ရှစ်ဦးကို စစ်တပ်မှ ဖမ်းဆီး

Aug 4

တနင်္သာရီတိုင်း တိုက်ပွဲအတွင်း စစ်မှုထမ်း CDM တစ်ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ လောင်းလုံးမြို့နယ်ထဲက ပန်းတင်အင်းတိုက်ပွဲတွင် စစ်မှုထမ်း CDM တစ်ဦးသေဆုံးသွားခဲ့သည်ဟု ကာကွယ်ရေး တပ်ဖွဲ့တာဝန်ရှိသူများက ပြောသည်။ တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်၊ ပန်းတင်အင်းကျေးရွာတွင် ဖြစ်ပွားခဲ့သည့် တိုက်ပွဲအတွင်း ပြည်သူ့ကာကွယ်ရေး တပ်မတော်၊ ဒေါနတပ်ခွဲ ၆၊ ဝေဟင်တပ်ဖွဲ့မှ တပ်ဖွဲ့ဝင်တစ်ဦး ဦးခေါင်းကျည်ထိမှန်၍ သေဆုံးခဲ့သည်ဟု ဝေဟင်တပ်ဖွဲ့ တာဝန်ရှိသူက ပြောသည်။ ဒေါန ၆ တပ်ခွဲမှူးက “သူက တိုက်ပွဲကြားထဲမှာ ပိတ်မိနေတဲ့သူတွေကို ဝင်ပြီး ဆွဲထုတ်ပေးနေတာပါ၊ သူဆွဲထုတ် ပေးတဲ့သူတွေကတော့ လွတ်မြောက်ကုန်တယ်၊ သူကတော့ ဆောင်းထားတဲ့ ဦးထုတ်ကို ဖေါက်ပြီး ဦးခေါင်းကို ကျည်ထိပြီး ဆုံးသွားတယ်” ဟု ပြောသည်။ တိုက်ပွဲအတွင်း သေဆုံးသွားသူမှာ စစ်မှုထမ်းသင်တန်းဆင်း အသက် ၂၀ အရွယ် ရဲဘော်ဆပ်ပြာ ဆိုသူဖြစ်ပြီး ရေဖြူမြို့နယ်၊ ကံပေါက်ဒေသအခြေစိုက် စစ်ကောင်စီ၏ ခလရ ၂၇၃ တပ်ရင်းတွင် တာဝန်ကျစဉ်တွင် ထွက်ပြေး လာကာ ဝေဟင်တပ်ဖွဲ့ထံသို့ ဘက်ပြောင်းခိုလှုံလာသူ ဖြစ်သည်။ ပန်းတင်အင်းကျေးရွာသို့ စစ်ကြောင်းထိုးလာသည့် စစ်ကောင်စီစစ်ကြောင်းနှင့် ဓဝယ်အမျိုးသားလွတ်မြောက် ရေးတပ်တော် - DNLA၏ ဒူရကစစ်ကြောင်း ဦးဆောင်သော ပြည်သူ့ကာကွယ်ရေးပူးပေါင်းတပ်ဖွဲ့များအကြား ဇူလိုင်လ ၂၉ ရက်နေ့က ဆယ်နာရီခန့်အကြာ တိုက်ပွဲ ပြင်းထန်ခဲ့သည်။ ကံပေါက်ဒေသရှိ ရေကန်တောင်တိုက်ပွဲ မဖြစ်မီ တစ်လခန့်အလို ၂၀၂၄ ခုနှစ် နိုဝင်ဘာလအတွင်း အခြားစစ်မှု ထမ်း သင်တန်းဆင်း ရဲဘော်နှစ်ဦးနှင့်အတူ ရဲဘော်ဆပ်ပြာတို့ ရေကန်တောင်စခန်းမှ ဘက်ပြောင်းခိုလှုံလာခြင်း ဖြစ်ကြောင်း ဒေါန ၆ တပ်ခွဲမှူးက ဆိုသည်။ ပြည်သူ့ကာကွယ်ရေး တပ်ဖွဲ့ဝင်အဖြစ် တာဝန်ထမ်းဆောင်နေသည်မှာ ကိုးလခန့်ရှိနေပြီ ဖြစ်ပြီး ရဲဘော်ဆပ်ပြာ သည် ဝေဟင်တပ်ဖွဲ့ တွင် ပထမဆုံးကျဆုံးသည့် ရဲဘော်တစ်ဦး ဖြစ်သည်။ ရဲဘော်ဆပ်ပြာ၏ စျာပနကို ဇူလိုင်လ ၃၁ ရက်က ဂူသွင်းသင်္ဂြိုဟ်ခဲ့သည်ဟု ဝေဟင်တပ်ဖွဲ့ ဝင်များက ပြော သည်။ ပန်းတင်အင်းရွာတိုက်ပွဲတွင် စစ်တပ်ဘက်မှလည်း ၃၀ ဦးထက်မနည်း ထိခိုက်သေဆုံးသည်ဟု ဒူရက စစ်ကြောင်းက သတင်းထုတ်ပြန်ထားသည်။

တနင်္သာရီတိုင်း တိုက်ပွဲအတွင်း စစ်မှုထမ်း CDM တစ်ဦး သေဆုံး

Aug 4

ကျောက်မဲမြို့ကို စစ်ကော်မရှင်တပ်က လေယာဉ်နှင့် ဗုံးကြဲ၊ ဒေသခံ ၃ ဦးထိမှန် ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ ရှမ်းမြောက်၊ ကျောက်မဲမြို့ကို စစ်ကော်မရှင်တပ်က ဂျက်ဖိုက်တာနှင့် ထပ်မံ ဗုံးကြဲတိုက်ခိုက်ခဲ့ရာ ဒေသခံ အမျိုးသမီး ၃ ဦး ထိမှန်ဒဏ်ရာ ရခဲ့သည်။ ဩဂုတ်လ ၄ ရက်နေ့၊ နံနက် ၁၀ နာရီခွဲအချိန်ခန့်တွင် ကျောက်မဲမြို့၊ ရပ်ကွက် ၆ ရှိ စျေးသစ်အနီးတဝိုက်ကို ပေါင် ၅၀၀ ဗုံးနှင့် ကြဲခဲ့ခြင်း ဖြစ်သည်ဟု ဒေသခ့များက ပြောသည်။ တအာင်း အမျိုးသမီးအဖွဲ့အစည်း TWO တာဝန်ရှိသူတစ်ဦးက “အရပ်သားရှိတဲ့ ရပ်ကွက်ထဲ ကျတာ ထိခိုက်မှု ရှိပါတယ်။ အိမ်တွေ ထိတယ်။ ပြည်သူ ၃ ဦး ထိတယ်။ အမျိုးသမီး ၃ ဦး လို့ သိရပါတယ်။ အရမ်းတော့ မစိုးရိမ် ရဘူးရှင့်” ဟု ပြောသည်။ အဆိုပါ လေကြောင်း ဗုံးကြဲတိုက်ခိုက်ခံရမှုထဲ ကျောက်မဲဒေသခံ အမျိုးသမီး ၃ ဦးထိမှန်ဒဏ်ရာ ရခဲ့သည့်အပြင် ကိုယ်ပိုင်ကျောင်း တစ်ကျောင်းမှ အဆောက်အအုံ၊ ဆေးခန်း တစ်ခု အပြင် နေအိမ် ၃ လုံး ထိမှန်ပျက်စီးသွားခဲ့ သည်။ ဒေသခံအမျိုးသမီး တစ်ဦးက “လေယာဉ်က နေ့တိုင်းလိုလို လာတယ် ဒီရက်ပိုင်းမှာနော်။ ဒီနေ့လာကြဲတာက ကိုယ်ပိုင်ကျောင်းနားပေါ့၊ ဘော်ဒါပေါ့ အဲ့နားမှာကျတာ။ အိမ်မှာတောင် သိပ်မနေရဲဘူး။ တခြားမှာ သွားနေဖို့ ကလည်း မလွယ်ဘူး။ အသံတွေကို အမြဲနားစွင့်နေရတယ်။ အဒေါ်တို့အိမ်မှာက ယောက်ကျားလေး မရှိဘူး။ မိန်းကလေးတွေပဲ အသံကြားတာနဲ့ အရမ်းကြောက်တယ်။ ပြေးလည်းမပြေးတတ်တော့ဘူး” ဟု ပြောသည်။ ယခု ဗုံးကျရောက် ပေါက်ကွဲမှုအတွင်း အသက် ၂၉ နှစ်ရွယ် ဒေါ်မီမီသွေး၊ အသက် ၃၈ နှစ်အရွယ် ဒေါ်မီမီရင်နှင့် အသက် ၆၀ နှစ်အရွယ် ဒေါ်အေးဝင်းတို့ ထိခိုက်ဒဏ်ရာရရှိခဲ့သည်။ ဇူလိုင်လ ပထမပတ်မှ ယခု ဩဂုတ်လ ပထမပတ်အထိ ကျောက်မဲမြို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှု ၈ ကြိမ်လုပ်ခဲ့သည်ဟု တအာင်းတပ် TNLA က ဩဂုတ်လ ၄ ရက်နေ့တွင် ထုတ်ပြန်သည်။ အဆိုပါ လေကြောင်းတိုက်ခိုက်မှု ၈ ကြိမ်အတွင်း သေဆုံးသူ ၃ ဦး ရှိခဲ့ပြီး ၁၇ ဦး ထိမှန်ဒဏ်ရာရခဲ့သည်ဟု TNLA ထုတ်ပြန်ချက်က ဆိုသည်။ ထို့အပြင် နေအိမ် ၄၂ လုံး၊ စာသင်ကျောင်း ၁ ကျောင်းနှင့် ဘုန်းကြီးကျောင်း ၁ ကျောင်းလည်း ဗုံးစထိမှန် ပျက်စီးသွားခဲ့သည်။ စစ်ကော်မရှင်တပ်က တအာင်းတပ်မတော် TNLA က ထိန်းချုပ်ထားသည့် မြို့ရွာများထဲ လေကြောင်း တိုက် ခိုက်မှု၊ လက်နက်ကြီးပစ်ခတ်မှုနှင့် ဒရုန်းသူံး ဗုံးကြဲမှုများ ဆက်တိုက်လုပ်နေပြီး ဇူလိုင်လအတွင်း၌လည်း နောင်ချို၊ ကွတ်ခိုင်၊ သီပေါ၊ မိုင်းလုံ၊ မိုင်းငေါ့နှင့် မိုးကုတ်မြို့တို့ကို လေကြောင်းမှ ဗုံးကြဲတိုက်ခိုက်ခဲ့သည်။

ကျောက်မဲမြို့ကို စစ်ကော်မရှင်တပ်က လေယာဉ်နှင့် ဗုံးကြဲ၊ ဒေသခံ ၃ ဦးထိမှန် ဒဏ်ရာရ

Aug 4

ဖားကန့်တိုက်ပွဲအတွင်း ကလေးအပါအဝင် အရပ်သား ၃ ဦး သေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၄ ရက်။ ကချင်ပြည်၊ ဖားကန့်မြို့နယ်ထဲ စစ်ကော်မရှင်တပ်နှင့် ကချင်လွတ်လပ်ရေး တပ်မတော် KIA ပူးပေါင်းအဖွဲ့တို့ အကြား တိုက်ပွဲများ ဆက်တိုပ်ဖြစ်နေပြီး အရပ်သား ထိမှန်သေဆုံးမှုများ ရှိနေသည်ဟု ဒေသခံများက ပြောသည်။ ဩဂုတ်လဆန်းမှာ ဩဂုတ်လ ၄ ရက်နေ့အထိ တိုက်ပွဲများ ဆက်တိုက် ဖြစ်နေသည်ဟု ဖားကန့်ဒေသခံများက ပြောသည်။ ဩဂုတ်လ ၃ ရက်နေ့နှင့် ၄ ရက်နေ့ နှစ်ရက်တာ တိုက်ပွဲအတွင်း ကလေးတစ်ယောက် အပါအဝင် အရပ်သား ၃ ဦး သေဆုံးခဲ့ပြီး ၁၀ ဦးထက်မနည်း ထိမှန်ဒဏ်ရာ ရခဲ့သည်ဟု ဖားကန့်ဒေသခံများက ပြောသည်။ ဖားကန့်ဒေသခံ အမျိုးသားတစ်ဦးက “ဗျူဟာကုန်းဘက်နေ လက်နက်ကြီးတွေနဲ့ ပစ်တာ။ အဲ့ဒီ လက်နက်ကြီး က မျောက်ဖြူမော်ရွာကို ကျပြီး အရပ်သားနဲ့ ကလေးသုံးနှစ်အရွယ်ကလေး လက်နက်ကြီးကျည် ထိပြီးသေ သွားတာဗျ။ လူကြီးလည်း တစ်ယောက်သေတယ်။ ဒဏ်ရာရတာက ၇ ယောက်ရှိတယ်။ ၃ ရက်နေ့တုန်းက တစ်ယောက် လက်နက်ကြီးထိပြီး သေတယ်။ သုံးယောက်ဒဏ်ရာရတယ်” ဟု ပြောသည်။ ကချင်လွတ်လပ်ရေး တပ်မတော် KIA နှင့် KPDF ပူးပေါင်းတပ်က ရှရော်ခကျေးရွာရှိ ညောင်ပင်ကုန်းနေရာကို ပြန်လည်ရရှိရေး ထိုးစစ်ဆင်နေပြီး နှစ်ဖက်ကြား တိုက်ပွဲများ ဆက်ဖြစ်နေသည်ဟု ဆိုသည်။ လက်နက်ကြီး လက်နက်ငယ် ပစ်ခတ်မှုများ ဆက်တိုက် ရှိနေပြီး စစ်တပ်က ပစ်လိုက်တဲ့ လက်နက်ကြီးကျည် များမှာ အရပ်သား ပြည်သူများ နေထိုင်သည့်ဘက်ကို ကျရောက်ပေါက်ကွဲမှုများ ဆက်တိုက်ဖြစ်နေသည်ဟု ဆိုကြသည်။ ဩဂုတ်လ ၄ ရက်နေ့မှာတော့ မျောက်ဖြူကျေးရွာက အသက် ၃ နှစ်အရွယ် ကလေးတစ်ဦးနှင့် အသက် ၃၅ နှစ်အရွယ် အမျိုးသားတစ်ဦး ထိမှန်သေဆုံးခဲ့ပြီး ဩဂုတ်လ ၃ ရက်နေ့တွင်မူ ရှရော်ခကျေးရွာမှ အမျိုးသား တစ်ဦး ထိမှန်သေဆုံးခဲ့သေးသည်။ အလားတူ ဆန်းကြွယ်ကျေးရွာတွင်လည်း လက်နက်ကြီးကျရောက် ပေါက်ကွဲခဲ့ခြင်းကြောင့် အသက် ၈၀ ကျော်အရွယ် အဘွားတစ်ဦးအပါအဝင် အရပ်သား ၄ ဦး ထိမှန်ဒဏ်ရာ ရခဲ့သည်ဟု ဖားကန့်မြို့ခံများက ပြော သည်။ စစ်ကော်မရှင်တပ်သည် ပြီးခဲ့သည့် ဧပြီလကတည်းက ဖားကန့်ဒေသထဲသို့ အင်အားအလုံးအရင်းဖြင့် စစ်ကြောင်းများ ခွဲကာ ဝင်ရောက်လာပြီး ဖားကန့်မြို့ကို ပြန်လည်ထိန်းချုပ်နိုင်ရေး ကြိုးပမ်းနေခြင်း ဖြစ်သည်။ မြေပြင်ရှိ စစ်ကော်မရှင် စစ်ကြောင်းအား ဖားကန့်ဗျူဟာကုန်းမှ လက်နက်ကြီး ပစ်ကူမှုများအပြင် လေကြောင်း မှပါ ဗုံးကြဲကာ စစ်ကူပေးနေသည်ဟု ဒေသခံများက ပြောသည်။

ဖားကန့်တိုက်ပွဲအတွင်း ကလေးအပါအဝင် အရပ်သား ၃ ဦး သေဆုံး

Aug 2

စစ်ကော်မရှင်တပ် ရွာသားတစ်ဦးကို ပစ်သတ်ကာ ၁၀ ကို ဖမ်းဆီးသွား သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ သြဂုတ်လ ၂ ရက်။ လောင်းလုံးမြို့နယ်ထဲက ပန်းတင်အင်းကျေးရွာ မြောက်ပိုင်းတွင် စစ်ကော်မရှင် တပ်ဖွဲ့က နေအိမ် ၁၀ ကျော်ကို မီးရှို့ဖျက်ဆီးခဲ့ပြီးနောက် ရွာသားတစ်ဦးကို ပစ်သတ်သွားဟည်။ ထို့အပြင် ရွာသား ၁၀ ဦးကိုပါ စစ်ကော်မရှင်တပ်က ဖမ်းဆီးခေါ်ဆောင်သွားသည်ဟု ရွာသားများက ပြောသည်။ ပစ်သတ်ခံရသူမှာ ရေဖြူမြို့နယ်၊ မူးဒူးဒေသခံ ခမ်းမဲ ဆိုသူ လူငယ်အမျိုးသားဖြစ်ပြီး ပန်းတင်အင်းကျေးရွာသူ နှင့် အိမ်ထောင်ကျပြီး ရွာတွင် နေထိုင်သူဖြစ်ကြောင်း ဆိုသည်။ ဇူလိုင်လ ၂၉ ရက်နေ့ နံနက်ပိုင်းက စတင်ပြီး အင်အား ၇၀ ခန့်ရှိ စစ်ကော်မရှင်တပ် စစ်ကြောင်းကို ထားဝယ်အမျိုးသားလွတ်မြောက်ရေး တပ်တော် - DNLA တပ်ဖွဲ့နှင် ပူးပေါင်း မဟာမိတ် တော်လှန်ရေးတပ်ဖွဲ့များက ပန်းတင် အင်းကျေးရွာ မြောက်ပိုင်းရှိ ကွက်သစ်စာသင်ကျောင်း အနီးတွင် ဝင်ရောက်တိုက်ခိုက်ခဲ့ခြင်း ဖြစ်သည်။ ထိုနေ့က နှစ်ဖက်တိုက်ပွဲမှာ အချိန်အားဖြင့် ၁၀ နာရီကျော်ကြာ ဖြစ်ခဲ့ပြီးနောက် စစ်ကော်မရှင်တပ်က ကွက်သစ် ဘောလုံးကွင်း အနီးရှိသည့် နေအိမ် ၁၀ ကျော်ကို မီးရှို့ခဲ့ကာ လူငယ်အမျိုးသား တစ်ဦးကိုလည်း ပစ်သတ်သွားခဲ့ခြင်း ဖြစ်သည်။ အသက် ၄၀ ခန့်အရွယ် အမျိုးသမီးတစ်ဦးက “ဘော်လုံးကွင်းအနားက အိမ် ၁၁ ဆောင်နဲ့ ရွာအထဲက တစ်ဆောင် ကို မီးရှို့ဖျက်ဆီးခဲ့တယ်။ အိမ်တွေမှာရှိနေတဲ့ ငွေကြေး ကျပ်သိန်းသုံးရာကျော်ကိုလည်း စစ်တပ်က ယူသွားတယ်” ဟု ပြောသည်။ အလားတူ ငွေကြေား ကျပ်သိန်းငါးဆယ်နှင့် သိန်းခြောက်ဆယ်ကျော် ပါသွားသည့် အိမ်များလည်း ရှိနေကာ သိန်း ၁၀၀ ကျော်အထိ ပါသွားသည့် အိမ်များပင်ရှိနေကြောင်း ရွာသားများက ဆိုသည်။ မီးရှို့ခံလိုက်ရသည့် နေအိမ်များ အနက် နေအိမ်တစ်ဆောင်တွင်မူ မိုးအကုန်တွင် အလှူလုပ်ရန် စုဆောင်းထား သည့် ငွေကျပ် သိန်း ၃၀၀ နှင့် ရွှေသား ၃၅ ကျပ်သားမှာ မီးလောင်ရာတွင် ပါသွားခဲ့သည်။ သို့သော် ရွှေမှာ အရည်ပျော်ပြီး အခဲအတိုင်း ပြန်လည်ရရှိခဲ့ကာ ငွေသားပိုက်ဆံများ မီးလောင်ဆုံးရှုံးသွားခဲ့သည် ဟု ရွာသားများက ပြောသည်။ တိုက်ပွဲ ဖြစ်ပွားပြီးသည့်နောက် စစ်ကော်မရှင်တပ် စစ်ကြောင်းက ပန်းတင်အင်းကျေးရွာသို့ အင်အား ဖြည့်တင်း လာသည့် အင်အား ၅၀ ခန့်ပါ စစ်ကြောင်းနှင့်အတူ ဇူလိုင်လ ၃၀ ရက်နေ့ ညနေ ၄ နာရီခန့်က ထားဝယ် ရေနက်ဆိပ်ကမ်းရှိ ယာယီစခန်းဘက်သို့ ထွက်ခွာသွားသည်ဟု ရွာသားများက ဆိုသည်။ ရေနက်ဆိပ်ကမ်း ယာယီစခန်းသို့ ထွက်ခွာချိန်တွင်ရွာသား ၁၀ ဦးကို စစ်ကောင်စီစစ်ကြောင်းမှ ဖမ်းဆီးခေါ် ဆောင်သွားခဲ့သည်။ ဖမ်းဆီး ခေါ်ဆောင်သွားခြင်းခံရသည့် ရွာသားများမှာ သြဂုတ်လ ၁ ရက်နေ့ ညနေပိုင်းအချိန်ထိ ပြန်လည်လွတ်မြောက်လာခြင်း မရှိသေးကြောင်း ရွာသားများက ပြောသည်။

စစ်ကော်မရှင်တပ် ရွာသားတစ်ဦးကို ပစ်သတ်ကာ ၁၀ ကို ဖမ်းဆီးသွား

Aug 2

စစ် ကော်မရှင်တပ်က တစ်ရက်အတွင်း ပလမြို့ကို လေကြောင်းဖြင့် သုံးကြိမ် ဗုံးကြဲ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ သြဂုတ်လ ၂ ရက်။ ပုလောမြို့နယ်၊ ပလမြို့တွင် စစ်ကော်မရှင်တပ်နှင့် ပြည်သူ့ကာကွယ်ရေးတပ်တို့ကြား တိုက်ပွဲများ ပြင်းထန်စွာ ဖြစ်ပွားနေပြီး စစ်တပ်က လေကြောင်းဖြင့်ပါ သုံးကြိမ်ဗုံးကြဲကာ တိုက်ခိုက်ခဲ့သည်ဟု မြို့ခံများက ပြောသည်။ ဩဂုတ်လ ၁ ရက်နေ့ မွန်းတည့်ချိန်မှ စ၍ ညနေပိုင်း ၄ နာရီဝန်းကျင်ထိ စစ်ကော်မရှင်တပ်က လေကြောင်းမှ ဂျက်တိုက်လေယာဉ်ဖြင့် နှစ်ကြိမ် ဗုံးကြဲတိုက်ခိုက်ကာ ရဟတ်ယာဉ်ဖြင့်လည်း တစ်ကြိမ် ဗုံးကြဲတိုက်ခိုက်ခဲ့ခြင်း ဖြစ်သည်။ အသက် ၅၀ ခန့်အရွယ် စစ်ရှောင်နေရသူ မြို့ခံတစ်ဦးက “လေကြောင်းကနေ ဗုံးနဲ့ကြဲတာ သုံးကြိမ်ရှိပြီ၊ လူထိ ခိုက်တာတော့ မသိရသေးဘူး တိုက်ပွဲက ဖြစ်နေသေးတော့ စစ်ရှောင်နေရပြီးပုန်းနေကြရတယ်၊ အိမ်နှစ်ဆောင် လည်း မီးလောင်နေတယ်လို့ ကြားသိနေရတယ်၊ ဘယ်သူမှ သွားကြည့်မရဲဘူး အားလုံးက အသက်လုနေကြရတဲ့ အချိန်မှာ” ဟု ပြောသည်။ ဗုံးကြဲတိုက်ခိုက်ခဲ့ခြင်းကြောင့် ပလမြို့ပေါ်ရှိ လူနေအိမ်နှစ်ဆောင် မီးလောင်ပျက်စီးခဲ့ကြောင်း မြို့ခံများက ဆို သည်။ ပလမြို့အတွင်းရှိ စစ်ကော်မရှင်တပ်ဖွဲ့က တွေ့မြင်သမျှ ပြည်သူများကို သေနတ်ဖြင့် ပစ်ခတ်လျက်ရှိနေသည့် အပြင် လေကြောင်းမှလည်း နေ့စဥ်ဆက်တိုက် ဗုံးကြဲနေသည့်အတွက် မြိုခံများမှာ ဘေးလွတ်ရာသို့ ထွက်ပြေး တိမ်းရှောင် နေကြရသည်။ စစ်ကော်မရှင်တပ်၏ လေကြောင်းမှ ပထမအကြိမ်တွင် ဂျက်တိုက်လေယာဉ်ဖြင့် ဗုံး ၂ လုံး၊ ဒုတိယအကြိမ်၌ ရဟတ်ယာဉ်ဖြင့် ဗုံး ၁၅ လုံးနှင့် တတိယအကြိမ်တွင် ဂျက်တိုက်လေယာဉ်ဖြင့် ဗုံး ၂ လုံး လာကြဲသွားသည်ဟု မြို့ခံများက ပြောသည်။ ပလမြို့နှင့် အနီးတဝိုက်ရှိ ကျေးရွာများတွင် ဇူလိုင်လ ၂၄ ရက်နေ့မှ ဩဂုတ်လ ၁ ရက်နေ့အထိ စစ်ကော်မရှင် တပ်နှင့် ပြည်သူ့ကာကွယ်ရေးတပ်ဖွဲ့များ အကြား တိုက်ပွဲများ ပြင်းထန်စွာ ဖြစ်ပွားနေပြီး လေကြောင်းမှ ဗုံးကြဲတိုက်ခိုက်မှုများကိုလည်း နေ့စဥ်နီးပါး လုပ်နေသည်ဟု ဆိုကြသည်။ လေကြောင်း တိုက်ခိုက်မှုများကြောင့် ရွာသား ၆ ဦး သေဆုံးခဲ့ပြီး ဘုန်းကြီး ၂ ပါး ပျံလွန်တော်မူခဲ့သည့်အပြင် ပြည်သူ ၁၀ ဦး ထက်မနည်း ဒဏ်ရာရရှိခဲ့သည်။

စစ်ကော်မရှင်တပ်က တစ်ရက်အတွင်း ပလမြို့ကို လေကြောင်းဖြင့် သုံးကြိမ် ဗုံးကြဲ

« Prev 1 … 135 136 137 138 139 … 1,048 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ