NMG Doh – Page 128 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
English News
NMG အကြောင်း
Contact

Home
Author Archive

NMG Doh

Author: NMG Doh

Aug 27

ဖားကန့် ပစ်ခတ်မှု အမျိုးသမီး ၃ ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ ကချင်ပြည်၊ ဖားကန့်မြို့တွင် စစ်ကော်မရှင်တပ်၏ ပစ်ခတ်မှုကြောင့် အမျိုးသမီးတစ်ဦး သေဆုံးပြီး ၃ ဦး ထိမှန် ဒဏ်ရာရခဲ့သည်ဟု ဒေသခံများက ပြောသည်။ တိုက်ပွဲများ ဖြစ်ပွားနေသည့် ဖားကန့်မြို့တွင် စစ်ကော်မရှင်တပ်က စစ်ကြောင်းထိုးရင်း ပစ်ခတ်မှုကြောင့် ဒေသခံ ပြည်သူများ ထိမှန်သေဆုံး ဒဏ်ရာရခဲ့ခြင်း ဖြစ်သည်ဟု ဆိုသည်။ ဒေသခံတစ်ဦးက “မှော်စီစာ တောင်ပေါ်ကျောင်းမှာ တပ်စွဲထားတဲ့ စစ်ကောင်စီအုပ်စုထဲက အင်အား ၁၀၀ ကျော်က ဖားကန့်ကို ခြေလျင် စစ်ကြောင်းထိုးတယ်။ တစ်လမ်းလုံး ဟိုပစ်ဒီပစ် လုပ်သွားတာတွေ ရှိတယ်။ အမျိုးသမီး တစ်ဦးကတော့ ပန်းတင်တံတား ထိပ်မှာတော့ ပြည်သူတွေ ပစ်ခတ်ခံရတယ်။ အမျိုးသမီးတစ်ဦးက ပွဲချင်းပြီး သေဆုံးသွားတယ်။ အဲ့ဒီနောက်တော့ အဲ့ဒီစစ်ကြောင်းက ဗျူဟာကုန်းကို ထပ်ဝင်သွားတယ်။ စုပေါင်း ရုံးမှာလည်း နေရာယူထားကြတယ်လို့ သိရတယ်” ဟု ပြောသည်။ ဩဂုတ်လ ၂၅ ရက်နေ့ (ယမန်နေ့)၊ နံနက်ပိုင်း ၇ နာရီ အချိန်ခန့်တွင် မှော်စီစာကျေးရွာ ဘုရားကုန်း၌ တပ်စွဲထား သည့် အင်အား ၁၀ ၀ကျော်ရှိသော စစ်ကော်မရှင် ပူးပေါင်းတပ်ဖွဲ့သည် ဖားကန့်မြို့ ဗျူဟာကုန်းသို့ ခြေလျင်ဖြင့် သွားရောက် ပူးပေါင်းစဥ် လမ်းတစ်လျှောက် ပစ်ခတ်မှုများ ပြုလုပ်ခဲ့ခြင်း ဖြစ်သည်။ ထို့ကြောင့် ဖားကန့်မြို့အဝင် ပန်းတင်တံတားအနီးတွင် အထက်ပါ ဒေသခံများ ပစ်ခတ်ခံခဲ့ရခြင်း ဖြစ်ပြီး အဆိုပါ စစ်ကြောင်းသည် ဖားကန့်မြို့ပေါ်သို့ ဆက်လက် ထွက်ခွာသွားသည်ဟု ဒေသခံများက ပြောသည်။ ပြီးခဲ့သည့် ဩဂုတ်လ ၂၄ ရက်နေ့ကလည်း နမ္မဖြစ်ကျေးရွာတစ်ဝိုက်တွင် စစ်ကော်မရှင် တပ်ဖွဲ့ဝင်များ စီးလာသည့် အိမ်စီးကားတစ်စီးကို ကချင်လွတ်လပ်ရေး တပ်မတော် KIA နှင့် ပူးပေါင်းတပ်တို့က ကြားဖြတ် တိုက်ခိုက်ခဲ့ရာ ဒရုန်း ၅ စီး၊ ကားတစ်စီး အပါအဝင် စစ်သုံ့ပန်းများကို အရှင်ဖမ်းမိခဲ့သေးသည်။ ကင်းထောက်ဒရုန်း ၁ စီးနှင့် တိုက်ခိုက်ရေး ဒရုန်း ၄ စီးကို KIA က သိမ်းဆည်းရမိခဲ့သည်ဟု သိရပြီး အဆိုပါ ဖြစ်စဥ်နောက်ပိုင်း ဩဂုတ်လ ၂၄ ရက်နေ့တွင် ဖားကန့် - လုံးခင်း လမ်းမကြီး၌ အရပ်သား ကားတစ်စီးကို စစ်တပ်က ဖမ်းဆီးခဲ့သည်။ ဖားကန့်မြို့ မြောက်ဘက်ခြမ်းရှိ မှော်ဝမ်းကြီး၊ မှော်ဝမ်းလေး၊ ရှရော်ခ၊ ညောင်ပင်ကုန်း၊ အမှိုက်ပုံကျေးရွာ တစ်ဝိုက်တွင်လည်း နှစ်ဖက်ကြား စစ်ရေး ဆက်လက် တင်းမာနေပြီး ဒရုန်းအသုံးပြု တိုက်ခိုက်မှုများ ဆက်တိုက် လုပ်နေသည်ဟု ဒေသခံများက ပြောသည်။ ဖားကန့် စစ်ရေး အခြေအနေ စောင့်ကြည့်နေသူ တစ်ဦးက “လက်ရှိ စစ်ရေးအခြေအနေကတော့ မှော်ဝမ်းကြီး၊ မှော်ဝမ်းလေး တစ်ဝိုက်ဘက်မှာတော့ စစ်ရေး တင်းမာနေတယ်။ အမှိုက်ပုံရွာဘက်မှာတော့ တောက်လျှောက် အပြန်အလှန် ပစ်ခတ်မှုတွေ ရှိတယ်။ စစ်တပ် ဘက်ကတော့ ဒရုန်းများများ အသုံးပြုပြီးတော့ ဒရုန်းဗုံးတွေ ကြဲချတာတွေ လက်နက်ကြီး ပစ်ခတ်တာ တွေ ပြင်းပြင်းထန်ထန် လုပ်တယ်လို့ ကြားရတယ်” ဟု ပြောသည်။ ဖားကန့်မြို့တွင် စစ်ကော်မရှင်တပ်နှင့် ရှမ်းနီတပ် ပူးပေါင်းအဖွဲ့က ပြီးခဲ့သည့် မေလနောက်ဆုံး အပတ်မှ စတင်ကာ ဖားကန့်မြို့ကို ထိုးစစ်ဆင်ခဲ့ပြီး KIA ပူးပေါင်းတပ်နှင့် နေ့စဥ် ထိတွေ့မှုများ ဖြစ်ပွားနေသည်။ ထို့အပြင် ဖားကန့်မြို့ကို ဝင်ရောက်နိုင်သည့်လမ်းများကိုလည်း စစ်တပ်နှင့် ရှမ်းနီတပ်က ပြန်လည် ထိန်းချုပ်ထား သည်။ လက်ရှိတွင် တင်းမာလာသည့် နှစ်ဖက်ကြားက စစ်ရေးအခြေနေများကြောင့် ဖားကန့်မြို့နယ်အတွင်းရှိ ရှရော်ခ၊ လုံးခင်း၊ ဆိုင်းတောင်၊ မှောစီစာစသည့် ကျေးရွာများ အပါအဝင် ရွာပေါင်းများစွာက ဒေသခံထောင်နှင့်ချီမှာ ဘေးလွှတ်ရာများသို့ စစ်ဘေး တိမ်းရှောင်နေကြရသည်။ အလားတူ ဖားကန့်မြို့ကို ဝင်ရောက်နိုင်သည့် လမ်းကြောင်းများကို စစ်တပ်နှင့် ပူးပေါင်းအဖွဲ့တို့က ပိတ်ဆို့ထား သည့်အတွက် ဒေသတွင်း ကုန်ဈေးနှုန်းများ မြင့်တက်ကာ စက်သုံးဆီပါ ပြတ်တောက်နေသည်။ စစ်ကောင်စီတပ်သည် မြန်မာနိုင်ငံတစ်ဝှမ်းရှိ ၎င်းတို့လက်လွှတ်ထားရသည့် မြို့များကို ပြန်လည် ရယူရန် အရှိန် အဟုန်မြင့် ကြိုးစားလာနေပြီး ကချင်ပြည်တွင် ဖားကန့်မြို့၊ ဗန်းမော်မြို့နှင့် အင်းတော်ကြီးဒေသ အပါအဝင် ဝိုင်းမော်မြို့တွင်လည်း တိုက်ပွဲများ ဆက်လက် ဖြစ်ပွားနေသည်။

ဖားကန့် ပစ်ခတ်မှု အမျိုးသမီး ၃ ဦး ဒဏ်ရာရ

Aug 27

ထောင်ဘူးဝတွင် ပြန်လည် ဖမ်းဆီးခံရသော နိုင်ကျဉ်း ၇၄ ဦးရှိပြီ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ စစ်ကော်မရှင်သည် လွတ်ရက်စေ့သည့် နိုင်ငံရေး အကျဉ်းသားများအား ထောင်ဗူးဝတွင်ပင် ပြန်လည် ဖမ်းဆီးမှု များ လုပ်လျက်ရှိရာ ဖမ်းဆီးခံရသူ ၇၄ ဦး ရှိသွားပြီဟု မြန်မာနိုင်ငံလုံး ဆိုင်ရာ နိုင်ငံရေး အကျဉ်းသားများ ကွန်ရက် PPNM က ပြောသည်။ စစ်အာဏာသိမ်းကာလအတွင်း လွတ်ရက်စေ့ နိုင်ကျဉ်းများကို ထောင်ဗူးဝ၌ပင် ပုဒ်မ အမျိုးမျိုးတပ်ကာ ပြန်လည်ဖမ်းဆီး အမှုတပ်ခြင်းများကို ရည်ရွယ်ချက်ရှိရှိ လုပ်ဆောင်လျှက်ရှိရာ ပြန်လည် ဖမ်းဆီးခံသူ ၇၄ ဦး ရှိပြီးဖြစ်ကြောင်း PPNM မှ မှတ်တမ်းတင်ထားသည်။ နိုင်ငံရေး အကျဉ်းသားများ ကွန်ရက် (PPNM) ၏ ဦးဆောင်ကော်မတီဝင် ကိုသိုက်ထွန်းဦးက “ထောင်က လွတ် ပြီ ဆိုတဲ့ခါမှာ နောက်အမှုတပ်တာမျိုး တရားရုံးတွေ နယ်မြေရဲစခန်းတွေမှာ ဆက်ပြီး ဖမ်းခိုင်းထားလို့ ဖမ်း ဝရမ်းရှိလို့ ပုံစံမျိုးနဲ့ ပြန်လည် ဖမ်းဆီးခံရတာများပါတယ်။ အများအားဖြင့်တော့ အကြမ်းဖက်တွေကို ထောက် ပံ့တယ်ဆိုပြီး ၅၀ ညနဲ့ ပြန်ဖမ်းတယ်။ တစ်ချို့တွေလည်း ၅၂ ပုဒ်မ(က) နဲ့ ပြန်ဖမ်းတာမျိုး ရှိပါတယ်။ ပြီးတော့ ၅၀၅-က နဲ့ ပြန်ပြီးမှ ဖမ်းဆီးတာမျိုးတွေလည်း ရှိပါတယ်။ ဒီပုဒ်မ ၃ ခုကို ကျနော်တို့ အဓိက တွေ့ရပါတယ်” ဟု ပြောသည်။ ဩဂုတ်လ ၇ ရက်နေ့တွင် လွတ်ရက်စေ့ဖြင့် လွတ်မြောက်လာသည့် နိုင်ငံရေးအကျဉ်းသူ မမိုးဆန်းစုကြည်ကို လည်း အကြမ်းဖက်ဥပဒေ ပုဒ်မ ၅၂-ကဖြင့် ပြန်လည် ဖမ်းဆီးလိုက်ကြောင်း PPNM က ဆိုသည်။ လွတ်ရက်စေ့သည့် နိုင်ငံရေး အကျဉ်းသားများအား ထောင်ဗူးဝမှ ပြန်လည်ဖမ်းဆီးနေသည့် အခြေအနေများနှင့် ပတ်သက်၍ ကိုသိုက်ထွန်းဦးက ယခုကဲ့သို့ ဆက်ပြောသည်။ “အများအားဖြင့်တော့ အစောပိုင်းဖမ်းတုန်းက ဘာပုဒ်မမှ မကပ်ဘဲနဲ့ လွတ်ရက်စေ့ပြီး ထောင်ကနေ ပြန်လွတ် လာတဲ့အချိန်ကျမှ တခြားပုဒ်မတွေ ကပ်ပြီး ဖမ်းဆီးတာ ကျနော်တို့တွေ့ရတယ်။ ပြန်ဖမ်းခံရတဲ့သူ တော်တော် များများက အရင် မှတ်တမ်းတွေရှိပြီးမှ အပြင်ကို ရောက်ရင်လည်း ပြန်လုပ်နိုင်လောက်တယ်လို့ သူတို့ ယူဆ ထားတဲ့သူတွေ ပြီးတော့ သူတို့သံသယဖြစ်တဲ့လူတွေကို သူတို့ ပြန်လည်ဖမ်းဆီးတာ ကျနော်တို့ တွေ့ရပါတယ်။” လွတ်ရက်စေ့သည့် နိုင်ငံရေး အကျဉ်းသားများ ထောင်ဗူးဝ၌ ပြန်လည်ဖမ်းဆီးခံရမှုသည် လွိုင်ကော် အကျဉ်း ထောင်၊ ကလေးအကျဉ်းထောင်၊ သရက်အကျဉ်း နှင့် သာယာဝတီထောင်တို့တွင် အဓိကတွေ့ရသည်ဟု ကိုသိုက်ထွန်းဦးက ပြောသည်။ ထို့အတူ အိုးဘိုထောင်၊ အင်းစိန်ထောင်၊ ဒိုက်ဦး၊ သရက်၊ မိတ္ထီလာ၊ ကသာ၊ မြစ်ကြီးနား အကျဉ်းထောင်၊ ညောင်ရွှေ၊ ရွှေဘို၊ မြိတ်၊ မြင်းခြံ၊ ပုသိမ် ပခုက္ကူနှင့် သထုံအကျဉ်းထောင်တို့တွင် လွတ်ရက်စေ့ပြီး ထောင်ဗူးဝတွင် ပြန်လည်ဖမ်းဆီးမှုများ ဖြစ်နေသည်ဟု ဆိုသည်။ နိုင်ငံရေးအကျဉ်းသူများအဖွဲ့ (WOPP) ဦးဆောင် တာဝန်ခံ မဇူးဇူးမေယွန်းက “အဓိကအကြောင်းအရင်း ကတော့ စစ်တပ်ရဲ့ ရည်ရွယ်ချက် ကတော့ ရှင်းပါတယ်။ အဓိကကတော့ နိုင်ငံရေး အကျဉ်းသားတွေကို သူတို့ရဲ့ ဓားစာခံ လိုမျိုးနဲ့ ထည့်ထားတာ ဖြစ်တယ်။ ဒါကို ပြည်သူတွေနဲ့ တော်လှန် အင်အားစုတွေ ဘက်ကလည်း သိဖို့ လိုအပ် သလို နိုင်ငံတကာဘက်ကလည်း ဖိအားအမျိုးအမျိုး အကြမ်းဖက် စစ်ကောင်စီကို ပေးဖို့လိုအပ်တယ်” ဟု ပြော သည်။ လွတ်ရက်စေ့သော်လည်း ထောင်ဗူးဝတွင် ပြန်လည်ဖမ်းဆီးမှုအပြင် နိုင်ငံရေးအကျဉ်းသားများအပေါ် အခြား နည်းလမ်း အမျိုးမျိုးဖြင့် အခွင့်အရေး ချိုးဖောက်နေမှု အခြေအနေကို မဇူးဇူးမေယွန်းက ယခုကဲ့သို့ ဆက် ပြောသည်။ “လွတ်ရက်စေ့ပေမဲ့ ထောင်ဗူးဝကနေ ပြန်လည်ဖမ်းဆီးပြီးတော့ အကြောင်းအမျိုးမျိုးနဲ့ တစ်ခြားအမှုတွေ တပ် ပြီးတော့ပေါ့နော် ပြီးရင်ပုဒ်မကြီးတွေနဲ့ တပ်ပြီးတော့ပြန်လည် ဖမ်းဆီးတာပေါ့နော်။ အဲ့ဒီအပြင်ကို ညှင်းပမ်း နှိပ်စက်မှုတွေ အကြောင်းအမျိုးမျိုးနဲ့ ထောင်ထဲမှာ ပြစ်ဒဏ် တိုက်ထဲမှာ ထည့်တာမျိုးတွေထိ ကျူးလွန် ခံရပါ တယ်။ အကျဉ်းထောင်ထဲမှာ အပ်တိုတစ်ချောင်းတောင် ကိုင်ပိုင်ခွင့်မရှိတဲ့ နိုင်ငံရေး အကျဉ်းသူတွေကို အပြင် ကနေပြီးတော့ သူတို့က လေးခွတွေနဲ့ ပစ်တာမျိုး ဒီလိုမျိုးဖြစ်စဉ်တွေလည်း ရှိခဲ့တယ်ပေါ့နော်။ ခြိမ်းခြောက် တာမျိုးတွေ လုပ်နေတာလည်း ရှိတယ်ပေါ့နော်။“ ထို့အတူ နိုင်ငံရေးအကျဉ်းသားများကို မိသားစုများနှင့် ဝေးလံသည့် အကျဉ်းထောင် နေရာများသို့ ထောင်ပြောင်း ပို့လိုက်သည့်အတွက် ပါဆယ်နှင့် ထောင်ဝင်စာတွေ့ရန် အခက်အခဲများလည်း ကြုံနေရသည်ဟု WOPP က ပြော သည်။ စစ်ကော်မရှင်တပ်၏ နိုင်ငံရေးအကျဉ်းသားများအား လွတ်ရက်စေ့သည့်တိုင်အ ထောင်ဗူးဝတွင်ပင် ပုဒ်မ အမျိုး မျိုးတပ်ကာ ပြန်လည်ဖမ်းဆီး အမှုတပ်ခြင်းများ ရည်ရွယ်ချက်ရှိရှိ လုပ်ဆောင်နေခြင်းနှင့် အကျဉ်းထောင်ထဲ၌ လူ့အခွင့်အရေး ချိုးဖောက်မှုများအား ဆက်လက် ထုတ်ဖော်ပေးသွားမည်ဟု နိုင်ကျဉ်းအရေး လုပ်ဆောင်နေသူ များက ပြောသည်။

ထောင်ဘူးဝတွင် ပြန်လည် ဖမ်းဆီးခံရသော နိုင်ကျဉ်း ၇၄ ဦးရှိပြီ

Aug 27

ခက်ခဲသော သတင်းသမားများအား IPCM ကူညီမည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ စစ်ကော်မရှင်၏ မတရားဖိနှိပ်မှုများကြောင့် အခက်အခဲများနှင့် ရင်ဆိုင်နေကြရသည့် သတင်းသမားများအတွက် လုံခြုံစွာနေထိုင်နိုင်ရေး ကူညီထောက်ပံ့မှုများ လုပ်ပေးသွားမည်ဟု လွတ်လပ်သော မြန်မာသတင်း မီဒီယာ ကောင်စီ IPCM ကပြောသည်။ ပြည်ပတွင် ရောက်နေသည့် သတင်းသမားများအတွက်လည်း တရားဝင် စာရွက်စာတမ်း ရရှိရေးအတွက် အကူအညီ ပေးသွားမည်ဟု လွတ်လပ်သော မြန်မာသတင်းမီဒီယာကောင်စီ IPCM ကပြောသည်။ IPCM ဥက္ကဋ္ဌ နန်းဖော့ဂေက “အဓိကကတော့ ဒီ IPCM ရဲ့ အရေးပေါ် ကူညီထောက်ပံ့မှုဆိုတာကတော့ ငွေသားပဲ ဖြစ်မှာပေါ့နော်။ ဘာဖြစ်လို့လဲဆိုတော့ တစ်ဦး တစ်ယောက်ချင်းစီရဲ့ လိုအပ်ချက်က မတူကြဘူး။ ပုံစံမတူတဲ့ ထောက်ပံ့မှုမျိုး မဟုတ်ဘဲနဲ့ ငွေကြေးနဲ့ပဲ အတိုင်း အတာ ပမာဏတစ်ခုထိကို ထောက်ပံ့တာမျိုးနဲ့ အဲ့ဒီအပေါ်မှာ ဥပမာအားဖြင့် သူတို့ရဲ့ နေထိုင်ခွင့်အတွက်ကို လက်မှတ်ကုန်ကျမှုလားပေါ့နော် ဒါမှမဟုတ် တစ်နည်းလမ်း ပြောင်းရွှေ့ဖို့အတွက် ကုန်ကျမှုတွေလား အားလုံး ကတော့ ငွေသားနဲ့ပဲပေးသွားမယ်” ဟုပြောသည်။ စစ်ကော်မရှင်၏ မတရားဖိနှိပ်မှုများကြောင့် ပြည်တွင်း၌ သတင်းလုပ်ငန်းများ လုပ်ဆောင်ရန် အခက်အခဲ များ နှင့် ရင်ဆိုင်ကြရပြီး သတင်းသမားများမှာ ပြည်ပနိုင်ငံများနှင့် နယ်စပ်ဒေသများသို့ ထွက်ပြေးတိမ်းရှောင် ခဲ့ကြရသည်။ ပြည်တွင်း၌ ရှိနေသည့် သတင်းထောက်များမှာလည်း အခက်အခဲမျိုးစုံနှင့် ရင်ဆိုင်နေကြရသည်။ အခက်အခဲ မျိုးစုံ ကြုံနေရသည့် အခြေအနေများ၌ပင် သတင်းလုပ်ငန်းများမှာ ရပ်တန့်မသွားခဲ့ပေ။ ပြည်ပရောက် သတင်းထောက်တစ်ဦးက “လက်ရှိပြည်ပကို ရောက်နေတဲ့ သတင်းသမား တစ်ယောက်အနေနဲ့ ကတော့ ပထမဦးဆုံး ရင်ဆိုင်ရတဲ့ အခက်အခဲကတော့ အထောက်အထားရှိရှိနဲ့ နေထိုင်နိုင်ဖို့ အခက်အခဲရယ်၊ နေစရာရယ်ပေါ့နော် အဲ့ဒါတွေ လိုအပ်တယ်ပေါ့နော်။ စိတ်ပိုင်းဆိုင်ရာ ဆိုရင်လည်း မိသားစုနဲ့ ခွဲနေရတဲ့ခါမှာ စိတ်ပိုင်းဆိုင်ရာ ခံစားမှုတွေ လည်းရှိတယ်။ နောက် နေစရာ၊ စားစရာ အဆင်မပြေတော့ လက်ရှိမှာလည်း တော် တော် ဒုက္ခရောက်နေကြတဲ့ သူတွေရှိတော့ နေစရာနဲ့စားစရာ အဓိက ဖြည့်ဆည်းပေးစေချင်တယ်။ လစာ လျှော့ ထားတာတွေလည်းရှိတော့ တကယ့်တကယ် အခက်အခဲဖြစ်နေတဲ့ သတင်းသမားတွေကို ထောက်ပံ့ပေးစေချင် တယ်” ဟု ပြောသည်။ IPCM မှ အရေးပေါ် အကူအညီပေးမည့် အစီအစဉ်ထဲတွင် သတင်းသမား တစ်ဦးချင်းအတွက် ပြည်တွင်း ပြည်ပ ရွှေ့ပြောင်းနေထိုင်မှု ကုန်ကျစရိတ် ကူညီထောက်ပံ့ခြင်းနှင့် နိုင်ငံပြင်ပတွင် တရားဝင် နေထိုင်ခွင့် အထောက် အထားရရှိရန် ကူညီထောက်ပံ့ပေးခြင်းတို့ ပါဝင်သည်။ ပြည်ပရောက် အမျိုးသား သတင်းထောက်တစ်ဦးက “IPCMက ကူညီနေတဲ့ဟာကို ကောင်းတယ်လို့ ကျနော်က တော့ မြင်ပါတယ်။ တကယ့်တကယ် ဒုက္ခရောက်နေတဲ့ သတင်းထောက်တွေကို ရှာဖွေပြီးတော့မှ တတ်နိုင် သလောက် ကူညီပေးပါ။ ကိုယ်နဲ့လက်သင့်ရာ ကိုယ်နဲ့ရင်းနှီးတဲ့ သတင်းထောက်တွေကိုပဲ အဲ့လိုမျိုးဟာတွေကို တော့ ရှောင်ကျဉ် ပေးစေချင်လိုပါတယ်” ဟု ပြောသည်။ လွတ်လပ်သော မြန်မာသတင်းမီဒီယာ ကောင်စီအနေဖြင့် သတင်းသမားများအတွက် အရေးပေါ်အကူအညီ ထောက်ပံ့မှုပေးနိုင်ရန် အတွက် ပံ့ပိုးပေးနိုင်မည့် အစုအဖွဲ့များနှင့် ချိတ်ဆက်ညှိနှိုင်းပြီး ဆက်လက်ကြိုးပမ်း သွားမည်ဟု နန်းဖော့ဂေက ဆက်ပြောသည်။ “ရေရှည်လို့တော့ အပြည်အဝ အာမ မခံရဲသော်လည်း စဉ်ဆက်မပြတ် အကူအညီ ရှာပေးသွားမယ်ပေါ့ နော်။ အတိုင်းအတာ တစ်ခုလောက်ထိပေါ့လေ။ အပြည့်အစုံ တောက်လျှောက် ကူညီတာမျိုး မဟုတ်ဘဲနဲ့ တစ်ကြိမ်စာ တစ်ကြိမ်စာ အဲ့လိုမျိုးပေါ့နော်။ အရေးပေါ် ဆိုကတည်းက အရေးပေါ်လိုလို့ရှိရင် အရေးပေါ် ကူညီ တယ်။ နောက်ဆက်ပြီးတော့လည်း အခက်အခဲတွေကလည်း ရှိနေကြအုံးမှာပဲ ဆိုတော့ IPCM အနေနဲ့ကလည်း ဆက်ပြီးတော့ ကူညီနိုင်ဖို့အတွက်ကိုလည်း ကျန်တဲ့ ပံ့ပိုးပေးနိုင်တဲ့ အစုအဖွဲ့တွေနဲ့လည်း ဆက်လက်ပြီးတော့ ဆွေးနွေးမှုတွေ ချိတ်ဆက်မှုတွေပေါ့နော် ညှိနှိုင်းဆောင်ရွက်မှုတွေလည်း ဆက်လုပ်သွားမှာပါ။” သတင်းသမားများ အနေဖြင့် mmrsafetysupport.ipcm@protonmail.com အီးမေးလ်ကို ဆက်သွယ် မေးမြန်းစုံစမ်းနိုင်သည် ဟု IPCM က ဩဂုတ်လ ၁၅ရက်နေ့တွင် ထုတ်ပြန်ထားသည်။ အရေးပေါ် အကူအညီထောက်ပံ့မှုကို မြန်မာနိုင်ငံအတွင်း သတင်းမီဒီယာလုပ်ငန်း လုပ်ကိုင်မှုကြောင့် အန္တရာယ် ရှိပြီး နိုင်ငံပြင်ပတွင် နေထိုင်ကြသော သတင်းသမားများ သို့မဟုတ် မီဒီယာလုပ်ငန်းတွင် လုပ်ကိုင်နေသူများ၊ ပြည်တွင်း၌ အရေးပေါ် ရွှေ့ပြောင်းနေထိုင်ရသူ သတင်းသမားများနှင့် မီဒီယာ လုပ်ငန်းတွင် လုပ်ကိုင် နေသူများ သာ ဖြစ်ရမည်ဟု ဆိုသည်။ ကိုယ်ရေးအချက်အလက်တို့ကို တင်ပြနိုင်ရမည် ဖြစ်ပြီး အရေးပေါ် ကူညီထောက်ပံ့ခြင်း လျှောက်လွှာများကို IPCM ၏ အလုပ်အမှုဆောင် ကော်မတီအဖွဲ့ဝင်များ၊ လွတ်လပ်သော သတင်းမီဒီယာ ပညာရှင်များပါဝင်သည့် ကော်မတီမှ စိစစ်ဆုံးဖြတ်ကာ အရေးပေါ် ထောက်ပံ့မှုပေးသွားမည်ဟု ဆိုသည်။

ခက်ခဲသော သတင်းသမားများအား IPCM ကူညီမည်

Aug 27

ရွေးကောက်ပွဲကို တော်လှန်ရေး နယ်မြေများတွင် လုပ်ခွင့် ပြုမည်မဟုတ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။ စစ်ကော်မရှင်က ကျင်းပရန် လုပ်နေသည့် ရွေးကောက်ပွဲကို တော်လှန်ရေးတပ်ဖွဲ့များ ထိန်းချုပ်ထားသည့် ဒေသများထဲ၌ လုပ်ခွင့်ပြုမှာ မဟုတ်ဘူးဟု တော်လှန်ရေးအင်အားစုများက ပြောဆိုလိုက်သည်။ ပြည်သူလူထု၏ သဘောဆန္ဒမပါဘဲ စစ်ကော်မရှင်က ကျင်းပပြုလုပ်မည့် ရွေးကောက်ပွဲကို အတွေးအခေါ် အရ ဖြစ်စေ လုပ်ဟန်အရဖြစ်စေ ပြတ်ပြတ်သားသား ဆန့်ကျင်သည်ဟု ကယန်းအမျိုးသား တပ်မတော် KNA က ဩဂုတ်လ ၂၀ ရက်နေ့မှာ ထုတ်ပြန်သည်။ ကယန်းအမျိုးသား တပ်မတော် (KNA) ၏ နိုင်ငံရေး ဦး ဆောင်ကော်မတီ ခွန်းရဲခေါင် “ဒီမိုကရေစီမရှိဘဲ လုပ်တဲ့ ရွေး ကောက်ပွဲဆိုတာ စစ်အာဏာရှင်ဟာ စစ်အာဏာသက်စွန်းရှည်ဖို့အတွက် ဆောင်ရွက်တဲ့ လုပ်ဆောင်ချက်ပဲ ဖြစ်ပါတယ်။ ကျနော်တို့ ကယန်းအမျိုးသား တပ်မတော်အနေနဲ့ အတွေးအခေါ်အရရော ရပ်တည်ချက်အရရော နည်းနာအရရော တစ်ခုမှ ကျနော်တို့မထောက်ခံနိုင်ပါဘူး။ အသိအမှတ် မပြုနိုင်ပါဘူး။ ကျနော်တို့ စိုးမိုးထားတဲ့ နယ်မြေတွေမှာကတော့ စစ်‌ကောင်စီရွေးကောက်ပွဲက ဖြစ်မှာမဟုတ်ဘူး။ ဖြစ်တာကိုလည်း ကျနော်တို့က ခွင့်ပြု မှာ မဟုတ်ပါဘူး” ဟု ပြောသည်။ ကရင်အမျိုးသား အစည်းအရုံး KNU၊ အာရက္ခတပ်တော် AA၊ ကချင်လွတ်လပ်ရေး တပ်မတော် KIA နှင့် ကရင်နီ အမျိုးသားတိုး တက်ရေးပါတီ KNPP စသည့် တိုင်းရင်းသား တော်လှန်ရေးအဖွဲ့များ အပါအဝင် နွေဦးတော်လှန် ရေး အင်အားစုများက စစ်ကော်မရှင်က လုပ်မည့် တရားမဝင်ရွေးကောက်ပွဲကို လက်မခံကြောင်း တရားဝင် ပြောဆိုထားကြပြီး ဖြစ်သည်။ ထို့အပြင် စစ်ကော်မရှင်၏ ရွေးကောက်ပွဲက ပြည်တွင်း ပဋိပက္ခကို ပိုမိုကြီးထွားလာစေနိုင်သည် ဟု အမျိုးသမီး များ အဖွဲ့ချုပ် (မြန်မာနိုင်ငံ) WLB အထွေထွေအတွင်းရေးမှူး နာင်းမို့မို့ က ပြောသည်။ “ဒီရွေးကောက်ပွဲက ကျမတို့ နိုင်ငံရဲ့ လက်ရှိဖြစ်နေတဲ့ ပဋိပက္ခရော အရင်ကရော နှစ်ပေါင်းများစွာ ဖြစ်နေတဲ့ ပြည်တွင်း လက်နက်ကိုင် ပဋိပက္ခတွေကို ကျော်လွှားနိုင်မယ့် ရွေးကောက်ပွဲ မဟုတ်နေဘူး။ ဒီရွေးကောက်ပွဲက ဒီပဋိပက္ခတွေကို အဖြေရှာ တဲ့ နည်းလမ်း မဟုတ်နေဘူးပေါ့နော်။ ဆိုတော့ ဒီရွေးကောက်ပွဲကို လုပ်ခြင်းအား ဖြင့် ပိုလို့တောင်မှ ပဋိပက္ခတွေ တိုးနိုင်တယ်။ ကျမတို့ရဲ့ ဒီနိုင်ငံရေး မတည်ငြိမ်မှုတွေ သတ်မှုဖြတ်မှုတွေက ပိုများ လာနိုင်တဲ့ ရွေးကောက်ပွဲ ဖြစ်တယ်ပေါ့နော်။ အဲ့ကြောင့်မို့လို့ ဒီရွေးကောက်ပွဲက လုံးဝ ကျင်းပလို့ မဖြစ်ဘူး။“ စစ်ကော်မရှင်က ရွေးကောက်ပွဲကို ဟန်ပြပဲ လုပ်ခြင်းသာဖြစ်ပြီး ၎င်းတို့ အာဏာတည်မြဲရေးနှင့် ပြည်သူလူထု အပေါ် ကျူးလွန်နေသည့် စစ်ရာဇဝတ်မှုများမှ ပြစ်ဒဏ်ကင်းလွတ်ခွင့်ရရေးအတွက် ကြိုးပမ်းနေခြင်း ဖြစ်သည်ဟုလည်း အမျိုးသား ညီညွတ်ရေး အစိုးရ (NUG) က ဆိုသည်. ထို့ကြောင့် တော်လှန်ရေးအင်အားစုများ အနေဖြင့် စုစည်းညီညွတ်စွာဖြင့် ဆန့်ကျင်ကြဖို့ NUG ဝန်ကြီးချုပ်ရုံး ပြောခွင့်ရ ဦးနေဘုန်းလတ်က တိုက်တွန်းထားသည်။ ဦးနေဘုန်းလတ်က “၂၀၂၀ ရွေးကောက် ပွဲ ရလဒ်အရ ပေါ်ပေါက်လာတဲ့ ပြည်ထောင်စု လွှတ်တော် ကိုယ်စားပြု ကော်မတီဟာ ၂၀၂၁ခုနစ် မတ်လ ၃၀ ရက်နေ့မှာ ၂၀၀၈ ဖွဲ့စည်းပုံအခြေခံဥပဒေကို ပယ်ဖျက်ကြောင်း ကြေညာ ခဲ့ပြီ ဖြစ်တာကြောင့် ဒီအခြေခံ ဥပဒေ အောက်ကနေ လုပ်ဆောင်လျှက်ရှိတဲ့ တရားမဝင် အတုအယောင် ရွေး ကောက်ပွဲ အပါအဝင် အကြမ်းဖက် စစ်အုပ်စုရဲ့ လုပ်ရပ်မှန်သမျှဟာ တရားဝင်မှုမရှိတဲ့ ဥပဒေမဲ့ လုပ်ရပ်တွေ သာဖြစ်တယ်” ဟု ပြောသည်။ စစ်ရာဇဝတ်မှုကို အကြိမ်ကြိမ် ကျူးလွန်နေပြီး ပြည်သူလူထု အပေါ် လက်နက်အားကိုးနှင့် နေ့စဉ်ရက်ဆက် သတ်ဖြတ်နေသည့် စစ်ကော်မရှင်က ကျင်းပမည့် ရွေကောက်ပွဲက စစ်အာဏာရှင်စနစ် သက်ဆိုးရှည်ရေး အတွက်သာ ဖြစ်သောကြောင့် အားလုံး ဆန့်ကျင်ကြဖို့ကိုလည်း KNA က တိုက်တွန်းထားသည်။ ခွန်းရဲခေါင်က “စစ်ကောင်စီလုပ်တဲ့ ရွေးကောက်ပွဲကို လက်နက်ကိုင်တဲ့နည်းနဲ့ဖြစ်စေ လက်နက်မကိုင်ဘဲ အာဏာဖီဆန်ရေး No Vote မဲမပေးရေး လှုပ်ရှားမှုနဲ့ဖြစ်စေ ဒီလှုပ်ရှားမှုတွေ အားလုံးကိုပေါင်းစပ်ပြီး စစ် အာဏာရှင် သက်စွန်းရှည်ရေးဆောင်ရွက်တဲ့ ရွေးကောက်ပွဲကို ဝိုင်းဝန်းဆန့်ကျင်သွားဖို့ ပြောချင်ပါတယ်” ဟု ပြောသည်။ စစ်ကော်မရှင်က လာမည့် ဒီဇင်ဘာလ ၂၈ ရက်နေ့တွင် ရွေးကောက်ပွဲ ကျင်းပပြုလုပ်သွားမည်ဟု တရားဝင် ကြေညာထားပြီး ဖြစ်သည်။ အဆိုပါ ရွေးကောက်ပွဲ အပိုင်း(၁) မြို့နယ် (၁၀၂) မြို့နယ်၌ ကျင်းပမှာ ဖြစ်သည်ဟု စစ်ကော်မရှင်က ဖွဲ့ထားပေး သော ပြည်ထောင်စု ရွေးကောက်ပွဲ ကော်မရှင်က ဩဂုတ်လ ၂၀ ရက်နေ့တွင် ထုတ်ပြန် ကြေညာထားသည်။ ကချင်ပြည်တွင် ၆ မြို့နယ်၊ ကယား (ကရင်နီ)နှင့် ချင်းပြည်တွင် ၂ မြို့နယ်စီ၊ ကရင်ပြည်နှင့် ရခိုင်ပြည်တို့တွင် ၃ မြို့နယ်စီ၊ ရန်ကုန်တိုင်း၊ စစ်ကိုင်းတိုင်းနှင့် ရှမ်းပြည်ထဲတွင် ၁၂ မြို့နယ်စီ၊ တနင်္သာရီတိုင်း၌ ၄ မြို့နယ်၊ မကွေးတွင် ၉ မြို့နယ်၊ မန္တလေးတိုင်း၊ ပဲခူးတိုင်း၊ ဧရာဝတီတိုင်းနှင့် နေပြည်တော်တို့၌ ၈ မြို့နယ်စီနှင့် မွန်ပြည်တွင် ၅ မြို့နယ် ရွေးကောက်ပွဲ လုပ်သွားမည်ဟု ထုတ်ပြန်ထားသည်။ ဓါတ်ပုံ - AFP

ရွေးကောက်ပွဲကို တော်လှန်ရေး နယ်မြေများတွင် လုပ်ခွင့် ပြုမည်မဟုတ်

Aug 26

မြောက်ဦးမြို့ လေကြောင်း တိုက်ခိုက်ခံရမှုထဲ ကလေးများ အပါအဝင် အရပ်သား ၁၂ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ အာရက္ခတပ်တော် ULA/AA က ထိန်းချုပ်ထားသည့် ရခိုင်ပြည်၊ မြောက်ဦးမြို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ၁၂ ဦး သေဆုံးခဲ့သည်။ မြောက်ဦးမြို့၊ ဒိုင်းကျီရပ်ကွက်ထဲ ဩဂုတ်လ ၂၅ ရက်နေ့၊ ည ၁၁ နာရီခွဲအချိန်ခန့်တွင် ဂျက်ဖိုက်တာနှင့် ဗုံးနှစ်လုံး ကြဲခဲ့ခြင်း ဖြစ်သည်ဟု အာရက္ခတပ်တော် ULA/AA က ထုတ်ပြန်သည်။ ထိုလေကြောင်း တိုက်ခိုက်မှုထဲ အလှူလုပ်ရန် ပြင်ဆင်နေသည့် ဒိုင်းကျီရပ်ကွက်ထဲက အပြစ်မဲ့ပြည်သူများ မိသားစု လိုက် သေဆုံးကုန်သည်ဟု အာရက္ခတပ်တော် ULA/AA က ဩဂုတ်လ ၂၆ ရက်နေ့တွင် ထုတ်ပြန်သည်။ မြောက်ဦး ဒေသခံတစ်ဦးက “မြောက်ဦးမြို့က ဒိုင်းကျီရပ်ကွက်ထဲ ကြဲတာပါ။ ပေါင် ၅၀၀ ဗုံးနှစ်လုံးကြဲခဲ့တာ ပါ။ အိမ်တွေလည်း ရစရာမရှိအောင် ပျက်စီးကုန်တယ်။ တချို့အိမ်က ဘာမှကို ရစရာမရှိတော့ဘူး။ လူနေရပ် ကွက်ထဲ ကြဲတာ ဟုတ်ပါတယ်။ လူ ၁၂ ယောက်သေသွားပြီ။ ဒဏ်ရာရထဲတဲ့အထဲမှာလည်း အသက်အန္တရာယ် စိုးရိမ်ရတဲ့လူတွေလည်း ရှိသေးတယ်” ဟု ပြောသည်။ ဗုံးကြဲ တိုက်ခိုက်မှုထဲ ကလေး ၅ ဦး အပါအဝင် အပြစ်မဲ့ပြည်သူ ၁၂ ဦး သေဆုံးခဲ့ရပြီး အယောက် ၂၀ ထိမှန်ဒဏ် ရာ ရခဲ့သည်ဟု ဒေသခံများက ပြောသည်။ ထို့အပြင် ဒိုင်းကျီရပ်ကွက်ထဲက နေအိမ် ၈ လုံးလည်း ထိမှန်ပျက်စီးသွားသည်ဟု ဆိုကြသည်။ “ပေါင် ၅၀၀ ဗုံးအရှိန်က ဘယ်လောက် ပြင်းလဲဆိုရင် အိမ်တွေ အစအန မရလောက်အောင် ပျက်စီးကုန်တာ တွေ ရှိတယ်။ မြေကြီးဆို လူတစ်ရပ်စာလောက် ချိုင့်ဝင်သွားတယ်။ မနက်အထိတောင်မှ မီးတောက်တွေ ကျန်နေတုန်း ဗျ။ အားလုံးအိပ်မောကျချိန်လို့ပဲ ပြောရမယ် ဗုံးကြဲတဲ့အချိန်ကလေ။ ကလေးတွေပါတယ်။ လူကြီး အသက်ကြီး ပိုင်းတွေလည်း ပါတယ်” ဟု မျက်မြင်ဒေသခံ တစ်ဦးက ပြောသည်။ အပြစ်မဲ့ ပြည်သူတွေ ထိခိုက်သေဆုံးမှု များအောင် တမင် ရည်ရွယ်ချက်ရှိရှိနှင့် ညအချိန် ပြည်သူများ အိပ်မော ကျနေချိန်၌ လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်ဟု ဆိုကြသည်။ အလားတူ ဇန္နဝါရီလ ၁၈ ရက်နေ့ ညနေပိုင်းတွင်လည်း မြောက်ဦးမြို့နယ်၊ ရမ်းချောင်းကျေးရွာ အနီးတစ်ဝိုက် အား စစ်တပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့မှုကြောင့် AA က ထိန်းသိမ်းထားသော စစ်သုံ့ပန်း မိသားစု များထဲမှ ကလေးငယ်နှင့် အမျိုးသမီးစုစုပေါင်း ၂၈ ဦးသေဆုံးခဲ့ပြီး ၂၅ ဦး ဒဏ်ရာရရှိခဲ့သည်ဟု AA က ထုတ်ပြန် ထားသည်။ ယခု ၂၀၂၅ ခုနှစ်အတွင်း ရခိုင်ပြည်အတွင်းရှိ ကျောက်တော်၊ ရသေ့တောင်၊ မြောက်ဦး၊ ရမ်းဗြဲမြို့နယ်တို့ထဲ စစ်တက် လေကြောင်းမှ တိုက်ခိုက်မှုများ လုပ်ခဲ့ရာ အပြစ်မဲ့ပြည်သူ ၈၆ ဦး သေဆုံးခဲ့သည်ဟု အာရက္ခတပ်တော် ULA/AA ၏ စာရင်းများအရ သိရသည်။

မြောက်ဦးမြို့ လေကြောင်း တိုက်ခိုက်ခံရမှုထဲ ကလေးများ အပါအဝင် အရပ်သား ၁၂ ဦးသေဆုံး

Aug 26

တအာင်းတပ် ထိန်းချုပ်ထားသည့် ကျောက်မဲနှင့် မိုးကုတ်မြို့ကို စစ်တပ်က လေကြောင်းမှ ဗုံးကြဲတိုက်ခိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ ရှမ်းမြောက်နှင့် မန္တလေးတိုင်းထဲရှိ တအာင်းတပ် TNLA က ထိန်းချုပ်ထားသည့် မြို့တို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုခဲ့ရာ ကိုရင် ၃ ပါး နှင့် အရပ်သား ၃ ဦး ထိမှန်ဒဏ်ရာ ရခဲ့သည်။ တအာင်းတပ် TNLA သိမ်းထားသည့် ရှမ်းပြည်မြောက်ပိုင်းက ကျောက်မဲမြို့နယ် လေကြောင်းမှ ဗုံးကြဲတိုက်ခိုက် ခံရမှုထဲ ကိုရင် ၃ ပါးနှင့် အမျိုးသား ၁ ဦး ထိမှန်ဒဏ်ရာရခဲ့သည်။ ဩဂုတ် ၂၅ ရက်နေ့၊ နံနက် ၁၁ နာရီကျော်အချိန်ခန့်တွင် ကျောက်မဲမြို့နယ်၊ ပိန္နဲကုန်းရပ်ကွက်၊ ဝါဆိုကျောင်း ဘက်ကို တိုက်ပွဲဖြစ်ပွားခြင်းမျိုး မရှိဘဲ လေကြောင်းမှ ဗုံးကြဲသွားခြင်း ဖြစ်သည်ဟု တအာင်းတပ် TNLA က ထုတ်ပြန်သည်။ အလားတူ နေအိမ် ၂၂ လုံး၊ ကျောင်းဆောင် ၄ ဆောင်နှင့် ကားနှစ်စီးလည်း ထိမှန်ပျက်စီးသွားသည်ဟု TNLA က ဆိုသည်။ “ပလောင်တပ်က ဝင်လို့ လေကြောင်းကနေ တိုက်တယ် အဲ့လိုပြောကြတယ်။ ဘာမှ မဆိုင်ဘူး တကယ်တော့ စစ်တပ်က ကြဲချင်လို့ကို ကြဲတာ။ ဝါဆိုကျောင်းဘက်မှာ တိုက်ပွဲလည်း မရှိဘူး။ အဲ့ဒါကို လေယာဉ်နဲ့ ဗုံးကြဲသွား တာ။ အဲ့မှာ ကျောင်းက သာမဏေပေါ့ ကိုရင် ၃ ပါး ဒဏ်ရာရတယ်။ ပြည်သူတွေထဲက ထိတာလည်း ရှိတယ်။ အိမ်အပျက်အစီးလည်း များတယ်” ဟု ဒေသခံ အမျိုးသမီးတစ်ဦးက ပြောသည်။ ထို့အပြင် ကျောက်မဲနှင့် နောင်ချိုမြို့နယ် အစပ်က အသက် ၁၂၅ နှစ်ကျော် သက်တမ်းရှိသည့် ဂုတ်ထိပ်တံတားမှာ လည်း ဩဂုတ်လ ၂၄ ရက်နေ့၊ နံနက်ပိုင်းတွင် ဖျက်ဆီးခံလိုက်ရသည်။ အဆိုပါ ကိစ္စနှင့် ပတ်သက်၍လည်း စစ်ကော်မရှင်တပ်နှင့် တအာင်းတပ် TNLA တို့က အပြန်အလှန် စွပ်စွဲနေကြ သည်။ ထို့အပြင် ဩဂုတ်လ ၂၅ ရက်နေ့ ည ၁၁ နာရီအချိန်ခန့်တွင် တအာင်းတပ် (TNLA) ထိန်းချုပ်ထားသည့် မိုးကုတ် မြို့ကို စစ်တပ်က လေကြောင်းမှ ထပ်မံ ဗုံးကြဲတိုက်ခိုက်ခဲ့သည်။ မန္တလေးတိုင်း၊ မိုးကုတ်မြို့နယ်ထဲက စည်ပင်သာယာရပ်ကွက်ကို တိုက်ပွဲမရှိဘဲ လေကြောင်းမှ ဗုံးကြဲခဲ့ခြင်း ကြောင့် အရပ်သား ၁ ဦး ထိခိုက်ဒဏ်ရာရပြီး နေအိမ် ၅ လုံး ထိမှန်ပျက်စီးခဲ့သည်ဟု တအာင်းတပ်က ဩဂုတ်လ ၂၆ ရက်နေ့တွင် သတင်း ထုတ်ပြန်ထားသည်။ မိုးကုတ်ဒေသခံ အမျိုးသမီးတစ်ဦးက “အခုကလေ အသံကြားရင်ကို ဘယ်ပြေးလို့ ပြေးရမှန်း မသိတော့ဘူး။ မိုးကုတ် လေကြာင်းတိုက်ခိုက်မှုက အရှေ့ပိုင်း စည်ပင်သာယာရပ်ကွက်ပေါ့နော်။ ဂေါ်ရခါးဘုရားကျောင်း ရှေ့မှာ ကျတာပါ” ဟု ပြောသည်။ သြဂုတ်လအတွင်း စစ်တပ်က မိုးကုတ်မြို့ကို လေကြောင်းမှ အကြိမ်ကြိမ် ဗုံးကြဲ တိုက်ခိုက်ခဲ့ခြင်းကြောင့် ကလေးနှင့် အမျိုးသမီး အပါအဝင် လူပေါင်း ၄၀ ကျော် သေဆုံးခဲ့ပြီး ဖြစ်သည်။ ထိုသို့ လေကြောင်းမှ တိုက်ခိုက်မှုမျာကြောင့် ထိခိုက်ဒဏ်ရာရသူလည်း အယောက် ၂၀ ကျော်သွားပြီ ဟု မိုးကုတ် ဒေသခံများက ပြောသည်။ စစ်တပ်က နောင်ချိုမြို့ကို ပြန်ထိန်းချုပ်အပြီး မိုးကုတ်၊ ကျောက်မဲ၊ သီပေါမြို့နယ်တို့ကို မြေပြင် စစ်ကြောင်း အပြင် လေကြောင်းကနေပါ ဗုံးကြဲတိုက်ခိုက် ဖိအားပေးနေသည်ဟု လေ့လာသူများ သုံးသပ်ပြောဆိုနေကြ သည်။

တအာင်းတပ် ထိန်းချုပ်ထားသည့် ကျောက်မဲနှင့် မိုးကုတ်မြို့ကို စစ်တပ်က လေကြောင်းမှ ဗုံးကြဲတိုက်ခိုက်

Aug 26

ကန့်ဘလူမြို့နယ်ထဲ စစ်ကြောင်းထိုးလာသည့် စစ်တပ်နှင့်ပျူ ပူးပေါင်းတပ် ပြည်သူ ၉ ဦးကို ဖမ်းဆီးသတ်ဖြတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ စစ်ကိုင်းတိုင်း၊ ကန့်ဘလူမြို့နယ်ထဲက ကျေးရွာ ၆ ရွာကို စစ်ကော်မရှင်တပ်နှင့် ပျူစောထီးအဖွဲ့က စစ်ကြောင်း ထိုးချိန် အပြစ်မဲ့ပြည်သူ ၉ ဦးကို ဖမ်းဆီးပြီး သတ်ဖြတ်သွားသည်ဟု မြေပြင် သတင်းအရင်းအမြစ်များက ပြောသည်။ ကန့်ဘလူမြို့နယ်ထဲက ထိန်တောရွာသား ၅ ဦးနှင့် ကျေးပင်အက်ရွာသား ၄ ဦး တို့ကို မီးရှို့သတ်ဖြတ်ခဲ့ခြင်း ဖြစ်သည်။ ကျေးပင်အက် ရွာသားတစ်ဦးက “ပြည်သူတွေ ပျောက်တာက စုစုပေါင်း ၉ ယောက်၊ ထိန်တောဘက်မှာ မီးရှို့ သတ်ထားတာ ၅ ယောက်လို့ ပြောတယ်။ ကျနော်တို့ရွာ ကျေးပင်အက်မှာ အလောင်း ၄ လောင်း တွေ့တယ်။ ဘယ်သူဘယ်ဝါတော့ မှန်းလို့ မရဘူး။ ပျောက်ဆုံးနဲ့ လိုက်စစ်နေရတာ။ ကျနော်တို့ရွာမှာ သတ်သွားတာ တော် တော် ဆိုးပါတယ်ဗျာ။ ဓားနဲ့ခုတ်သတ်ပြီး အလောင်းတွေ မီးရှို့သွားတာဗျ” ဟု ပြောသည်။ ထို့အပြင် ပြည်သူပိုင် နေအိမ်အလုံးရေ ၄၃၀ ခန့်ကိုလည်း မီးရှို့ဖျက်ဆီးသွားသည်ဟု ကျွန်းလှ တက်ကြွ လှုပ်ရှား သူများအဖွဲ့က ဩဂုတ်လ ၂၄ ရက်နေ့တွင် ထုတ်ပြန်ထားသည်။ စစ်ကော်မရှင်တပ်က နိုင်ငံအနှံ့ လေကြောင်းမှ ဗုံးကြဲတိုက်ခိုက်မှုများ အပြင် မြေပြင်ကနေလည်း စစ်ကြောင်း များ ဆက်တိုက်ထိုးနေခြင်းကြောင့် ပြည်သူလူထုအတွက် လုံခြုံရေးပိုင်း စိန်ခေါ်မှု ဖြစ်နေသည်ဟု ဆိုကြသည်။ အင်အား ၂၀၀ ကျော်ရှိသည့် စစ်တပ်နှင့် ပျူစောထီးအဖွဲ့က ဩဂုတ်လ ၁၆ ရက်နေ့မှ ဩဂုတ်လ ၂၀ ရက်နေ့ အထိ ကန့်ဘလူမြို့နယ်ထဲက ကျေးရွာများကို မီးရှို့ဖျက်ဆီးခဲ့ခြင်း ဖြစ်သည်ဟု ကျွန်းလှ တက်ကြွ လှုပ်ရှားသူ များအဖွဲ့က ဆိုသည်။ ရွာမရွာသစ်က နေအိမ် ၄ လုံး၊ ထိန်တော(တ/မ)ကျေးရွာက နေအိမ် ၇၅ လုံး၊ သရက်တောကျေးရွာက နေအိမ် ၇၈ လုံး၊ အင်္ဂါဒေါင့်ကျေးရွာမှ နေအိမ် ၃၁ လုံး၊ ကိုင်းရိုးကျေးရွာက နေအိမ် ၁၂ လုံးနှင့် ကျေးပင်အက်ကျေးရွာက နေအိမ် ၂၃၀ လုံး တို့ကို မီးရှို့ဖျက်ဆီးခဲ့သည်။ ထို့အပြင် စာသင်ဆောင် ၄ ဆောင် ကိုလည်း မီးရှို့ဖျက်ဆီးခဲ့သည်ဟု ကျွန်းလှ တက်ကြွ လှုပ်ရှားသူများအဖွဲ့၏ ထုတ်ပြန်ချက်အရ သိရသည်။ သြဂုတ်လ၂၄ ရက်နေ့တွင်လည်း ထိုစစ်ကြောင်းမှာ ကျီကျင်းကျေးရွာဘက်သို့ စစ်ကြောင်းထိုးဝင်ရောက်ကာ နေအိမ်များကို မီးရှို့ဖျက်ဆီးခဲ့သည့်အပြင် ကျေးရွပတ်ပတ်လည် နေရာများအား Drone ဗုံးသီးချ တိုက်ခိုက်နေသည်ဟု ဆိုသည်။ အဆိုပါ စစ်ကြောင်းကြောင့် ကျေးရွာပေါင်း ၆ ရွာက ရွာသားများမှာမူ ဘေးလွှတ်ရာသို့ ထွက်ပြေးတိမ်းရှောင် နေကြရသည်။

ကန့်ဘလူမြို့နယ်ထဲ စစ်ကြောင်းထိုးလာသည့် စစ်တပ်နှင့်ပျူ ပူးပေါင်းတပ် ပြည်သူ ၉ ဦးကို ဖမ်းဆီးသတ်ဖြတ်  

Aug 26

စစ်ကော်မရှင်က လုပ်မည့် ရွေးကောက်ပွဲကို လုံးဝလက်မခံဟု KNU ပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ စစ်ကော်မရှင်က လုပ်မည့် ရွေးကောက်ပွဲမှာ စစ်တပ်ကို အကျိုးပြုမည့် လူနှင့် ပါတီရွေးပွဲဖြစ်သည်ဟု ကရင် အမျိုးသား အစည်းအရုံး KNU က ဩဂုတ်လ ၂၆ ရက်နေ့တွင် ထုတ်ပြန် ပြောဆိုလိုက်သည်။ ထို့အပြင် နိုင်ငံရေးပါတီများနှင့် ပြည်သူလူထု အနေဖြင့် အဆိပ်ပင်ရေလောင်းသည့် သမိုင်းတရားခံ ဖြစ်သွားနိုင် သောကြောင့် စစ်ကော်မရှင် ၏ ရွေးကောက်ပွဲကို နည်းလမ်းပေါင်းစုံနှင့် ရှောင်ရှားနိုင်ကြဖို့လည်း KNU က တိုက်တွန်းထားသည်။ စစ်တပ်က ဦးဆောင်ပြီး လုပ်မည့် အဆိုပါ ရွေးကောက်ပွဲမှာ အတုအယောင် ရွေးကောက်ပွဲဖြစ်သည့်အတွက် လုံးဝ လက်မခံကြောင်း KNU ဗဟိုက ဆိုသည်။ ထိုရွေးကောက်ပွဲမှာ ဥပဒေကြောင်းအရ တရားမဝင်ခြင်း၊ ပြည်သူအားလုံး ပါဝင်နိုင်သည့် အခြေအနေတွင် မရှိခြင်းနှင့် လိုသလို အဖြေထုတ်နိုင်သည့် ရွေးကောက်ပွဲ ဖြစ်သောကြောင့် KNU အနေဖြင့် လုံးဝလက်မခံဘူးဟု ဆိုသည်။ စစ်အာဏာရှင်စနစ်ကို သက်ဆိုးရှည်စေရေးအတွက် လုပ်သော ရွေးကောက်ပွဲဖြစ်ပြီး နိုင်ငံတွင်း ပဋိပက္ခကို ပိုမို ပြင်းထန်လာစေရုံ သာမက ဒေသတွင်း မတည်ငြိမ်မှုကိုပါ ဆက်ဖြစ်စေမည်ဟု KNU က ထောက်ပြထားသည်။ အလားတူ စစ်ကော်မရှင်က ပြဌာန်းထားသော ရွေးကောက်ပွဲ အကာအကွယ်ပေးရေး ဥပဒေနှင့် ပုဂ္ဂိုလ်ဆိုင်ရာ လုံခြုံမှု ကာကွယ်ပေးရေး ဥပဒေကလည်း ပြည်သူလူထုကို အကြောက်တရားများ ရရှိစေရန် ခြိမ်းခြောက်ထား သည့် ဥပဒေများသာ ဖြစ်သည်ဟု KNU က ဆိုသည်။ စစ်ကော်မရှင်သည် ရွေးကောက်ပွဲ လုပ်ရန် အတင်းအကျပ် ပြင်ဆင်ကြိုးစားနေခြင်းက အာဆီယံ ဘုံသဘော တူညီချက် ၅ ရပ်ကို အကောင်အထည်ဖော်ရန် မျက်ကွယ်ပြုခြင်းလည်း ဖြစ်သည်ဟု KNU က ဆိုသည်။

စစ်ကော်မရှင်က လုပ်မည့် ရွေးကောက်ပွဲကို လုံးဝလက်မခံဟု KNU ပြော

Aug 26

အင်ဒို - အမေရိကန်ပါသော ၁၃ နိုင်ငံ စစ်လေ့ကျင့်ရေး ပြုလုပ် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၆ ရက်။ အင်ဒိုနီးရှားနိုင်ငံတွင် အမေရိကန် ပါဝင်သော နိုင်ငံစုံ စစ်လေ့ကျင့်ရေး တစ်ခုကို လုပ်ဆောင်နေသည်။ အဆိုပါ လေ့ကျင့်ရေးကို ဩဂုတ်လ ၂၅ ရက်နေ့ တနင်္လာနေ့တွင် စတင်ခဲ့ပြီး စက်တင်ဘာလ ၄ ရက်နေ့အထိ လုပ်ဆောင်သွားမည် ဖြစ်သည်။ အမေရိကန်က တရုတ်၏ ခြိမ်းခြောက်မှု ကြီးမားလာသည်ဟု မြင်နေချိန်တွင် ယခု ပြုလုပ်သော စစ်လေ့ကျင့် ရေးကို အာရှပစိဖိတ်ဒေသ တည်ငြိမ် လုံခြုံရေး အတွက် လုပ်ဆောင်ခြင်း ဖြစ်သည်ဟု ပြောထားသည်။ “Super Garuda Shield” (ဆူပါ ဂရူဒါ ရှီးလ်ဒ်) စစ်လေ့ကျင့်ရေးကို မြန်မာလို “အလွန်အစွမ်းထက်သော ဂဠုန် ဒိုင်းလွှား” ဟု အဓိပ္ပာယ် ဖွင့်ဆိုနိုင်သည်။ စစ်လေ့ကျင့်မှုတွင် အင်ဒိုနီးရှားက စစ်အင်အား ၄,၀၀၀ နှင့် အမေရိကန်မှ အင်အား ၁,၃၀၀ တို့ပါဝင်ပြီး အခြား နိုင်ငံ ၁၁ နိုင်ငံမှလည်း ပါဝင်မည် ဖြစ်သည့်အတွက် စုစုပေါင်း နိုင်ငံ ၁၃ နိုင်ငံ ပါဝင်မည်ဖြစ်သည်။ အိမ်ရှင် အင်ဒိုနီးရှားနှင့် အမေရိကန် စစ်တပ်များအပြင် ဩစတြေးလျ၊ ဂျပန်၊ စင်္ကာပူ၊ ကနေဒါ၊ ပြင်သစ်၊ ဂျာမဏီ၊ တောင်ကိုရီးယား၊ နယူးဇီလန်၊ ယူကေနိုင်ငံနှင့် အခြား နိုင်ငံအချို့ ပါဝင်သည်။ အိန္ဒိယ၊ ပါပူဝါ နယူးဂီနီ နှင့် တီမောလက်ရှ်တေး နိုင်ငံတို့က လေ့လာသူများ စေလွှတ်ခဲ့သည်။ ထူးခြားသည်မှာ ယခုနှစ်တွင် ဂျပန်နိုင်ငံက ကျည်း၊ ရေ၊ လေ လှုပ်ရှားမှု သုံးခုလုံးတွင် ပထမဆုံးအနေဖြင့် အပြည့်အဝ ပါဝင်ခဲ့ခြင်း ဖြစ်သည်။ တရုတ်နိုင်ငံက အမေရိကန်နိုင်ငံသည် အာရှ - နေတိုး (Asia - NATO) အဖွဲ့ ဖွဲ့စည်းရန် ပြင်ဆင်ခြင်း ဖြစ်သည်ဟု စွပ်စွဲထားပြီး အမေရိကန်ကမူ ယခုစစ်ရေးလေ့ကျင့်မှုမှာ တရုတ်နိုင်ငံကို ရည်ရွယ်လုပ်ဆောင်ခြင်း မရှိဟု ငြင်းဆိုထားသည်။ ယခု စစ်ရေး လေ့ကျင့်မှုတွင် ကျည်း၊ ရေ၊ လေ တပ်ဖွဲ့များ ဟန်ချက်ညီ ပူးပေါင်းတိုက်ပွဲဝင်မှုကို လေ့ကျင့်ခြင်း ဖြစ်ပြီး လေထီးခုန်ခြင်း၊ ကမ်းတက်ခြင်း အပြင် အနောက်ဆူမာထရားနှင့် အခြားဒေသများရှိ ကျွန်းများကို ပြန်လည် သိမ်းယူသည့် နမူနာ စစ်ရေး လေ့ကျင့်မှု ဖြစ်သည်။ ဤစစ်လေ့ကျင့်ရေးကို ၂၀၀၉ ခုနှစ်က စတင်ကာ နှစ်စဉ် လုပ်ဆောင်ခဲ့သော်လည်း ယခုနှစ် လေ့ကျင့်မှုမှာ အကြီးမားဆုံး ဖြစ်သည်။

အင်ဒို – အမေရိကန်ပါသော ၁၃ နိုင်ငံ စစ်လေ့ကျင့်ရေး ပြုလုပ်

« Prev 1 … 126 127 128 129 130 … 1,048 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

Bloody Ballot Boxes and an Election Under the Shadow of “Made in China” — February 16, 2026 2:29 pm
IDPs Face Severe Medicine Shortages in Paletwa Township — November 7, 2024 3:02 pm
1,000 Displaced Need Urgent Aid in Pinlaung Township, Shan State — October 30, 2024 1:52 pm

Recent Posts

တရုတ်ခရီးသွား လျော့နည်းသော်လည်း ဂျပန်ခရီးသွားလုပ်ငန်း စံချိန်တင်တိုးတက်
မော်စကိုနှင့် ရုရှားအနှံ့ ယူကရိန်းက ဒရုန်းစစ်ဆင်ရေး ဆင်နွှဲ
အီရန်က UAE နျူကလီးယားစက်ရုံကို ဒရုန်းဖြင့် တိုက်ခိုက်
ဒေါ်နယ်ထရန့်ကို ရှီကျင့်ဖျင် ကော်ဇောနီဖြင့် ကြိုဆို
ထိုင်းနိုင်ငံတွင် အရက် သောက်သုံးရောင်းချမှု အပေါ် ထပ်မံတင်းကြပ်

Archives

Archives

×Close