သတင်း

နိုင်ငံရေး အကျဉ်းသူများ အရေပြားရောဂါ ပြင်းထန်စွာ ဖြစ်ပွားနေဟု WOPP ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   နိုင်ငံတစ်ဝန်းရှိ အကျဉ်းထောင်များတွင် နိုင်ငံရေး အကျဉ်းသူ အများအပြား အရေပြားရောဂါ ဆိုးရွားစွာ ခံစားနေရပြီး တစ်ကိုယ်ရေသုံး ပစ္စည်းများနှင့် ဆေးဝါးများလိုအပ်နေသည်ဟု နိုင်ငံရေးအကျဉ်းသူများ အဖွဲ့ - WOPP က ပြောသည်။   နိုင်ငံရေးအကျဉ်းသူများ အဖွဲ့- WOPP၏ ပြန်ကြာရေးတာဝန်ရှိသူ မစုမြတ်က “အဓိကအဖြစ်များတဲ့ အရေပြား ရောဂါကတော့ ထောင်ထဲမှာလက်ရှိကတော့ ဝဲနဲ့ ပွေးကတော့ အဓိက အဖြစ်များပါတယ်ရှင့်။ အကျဉ်းထောင် တိုင်း လိုလိုမှာ ဖြစ်နေတာရှင့်။ မိုးတွင်းကာလမှာ ပိုပြီး‌တော့ ဆိုးလာတဲ့ အခြေအနေတွေ ရှိလာတယ်။ ဘယ်လို ဆိုးလာလည်း ဆိုရင် ၇၀ ရာခိုင်နှုန်းလောက် အထိကို အရေပြားရောဂါ ကူးစက်ခံနေရတယ် ဆိုတာသိရတယ်” ဟု ပြောသည်။   အကျဉ်းထောင် အသီးသီးတွင် ရေမသန့်ရှင်းမှု၊ ရက်လွန် သို့မဟုတ် နှစ်လွန်ဆေးဝါးများ ပေးမှု၊ မိသားစုများမှ ပို့ပေးသည့် ဆေးဝါးများ မရရှိမှု၊ နေရာမသန့်ရှင်းမှုနှင့် နေရာကြပ်တည်းမှု စသည်တို့ကြောင့် နိုင်ငံရေး အကျဉ်းသူများသည် အရေပြား ကူးစက်ရောဂါ ပိုမိုဖြစ်ပွားလာခြင်းဖြစ်သည်ဟု မစုမြတ်က ဆက်ပြောသည်။   “ရေချိုးရင်လည်း ဒီနေရာမှာပဲ ချိုးရတယ်။ ဒါပေမဲ့ ချိုးရတဲ့နေရာမှာလည်း လူအများနဲ့ ချိုးရတယ်။ ချိုးရေ တွေက လုံလောက်မှုမရှိဘူး။ အဲ့ခါကြတော့ တစ်ယောက်နဲ့ တစ်ယောက် ပြန်ပြီးတော့ ကူးစက်နိုင်ခြေက အရမ်း များတယ်။ ဒါ့အပြင် ပြန်ပြီးတော့ အိပ်တဲ့နေရာရော စားတဲ့နေရာရော ဒီတစ်နေရာတည်း ဖြစ်နေတဲ့ အခြေ အနေကြောင့်လည်း ပိုပြီးတော့ မသန့်ရှင်းတာကြောင့် ပိုဆိုးလာတာတွေ့ရတယ်ရှင့်။”   မိသားစုများမှ ပေးပို့သည့် ဆေးဝါးများတွင် ပုလင်းနှင့်ထည့်ထားသော ဆေးဝါးများကို ထောင်တွင်းသို့ ပေးသွင်း ခွင့်မပြုခြင်း၊ ထောင်ဝန်ထမ်းများ သိထားသော ဆေးဝါးများ မဟုတ်ခဲ့ပါက အကျဉ်းထောင် ဆရာဝန်နှင့် စစ်ဆေး ခြင်း မလုပ်ဘဲ ပေးသွင်းခွင့်မပြုခြင်းတို့ကြောင့် ကူးစက်မှုများ ပိုဆိုးလာခြင်း ဖြစ်သည်ဟု ဆိုသည်။   ထို့အပြင် ဖြစ်ပေါ်နေသည့် ရောဂါများကို စစ်ဆေးခြင်း မလုပ်ဘဲ အဖျားပျောက်ဆေး၊ အကိုက်အခဲပျောက်ဆေး အနေဖြင့် အသုံးများသည့် Paracetamol ကိုသာပေး၍ ကုသခြင်းတို့ကြောင့် ရောဂါများ၊ ကူးစက်ခြင်းများ ပိုမို ဆိုးရွာလာသည်ဟုလည်း ဆိုသည်။   နိုင်ငံတစ်ဝန်းရှိ အကျဉ်းထောင်များတွင် အရေပြားကူးစက် ရောဂါ ဖြစ်ပွားမှုမှာ ပြီးခဲ့သည့် ဇွန်လကတည်းက စတင်ဆိုးရွာလာခဲ့ခြင်း ဖြစ်သည်ဟု WOPP က ပြောသည်။   အကျဉ်းထောင်များတွင် နိုင်ငံရေး အကျဉ်းသူများအတွက် သန့်ရှင်းသည့် နေရာထိုင်ခင်း၊ သန့်ရှင်းသည့် သောက် သုံးရေ၊ ကျန်းမာရေးနှင့် ညီညွှတ်သည့် အစားအသောက်များ၊ တစ်ကိုယ်ရေသုံး ပစ္စည်းများ၊ ဆေးဝါး၊ လစဉ်သုံး ပစ္စည်းများနှင့် အတွင်းခံများ အဓိက လိုအပ်နေသည်ဟု ဆိုသည်။   နိုင်ငံတစ်ဝန်းရှိ အကျဉ်းထောင်များထဲတွင် WOPP ၏ စာရင်းအရ နိုင်ငံရေးအကျဉ်းသူ စုစုပေါင်း အယောက် ၆,၀၀၀ ကျော်ရှိသည်ဟု သိရသည်။

နိုင်ငံရေး အကျဉ်းသူများ အရေပြားရောဂါ ပြင်းထန်စွာ ဖြစ်ပွားနေဟု WOPP ပြော 

နိုင်ငံရေး အကျဉ်းသူများ အရေပြားရောဂါ ပြင်းထန်စွာ ဖြစ်ပွားနေဟု WOPP ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  နိုင်ငံတစ်ဝန်းရှိ…

  • August 27, 2025
ဖရူဆိုသို့ စစ်ကြောင်းထိုးလာသော စစ်ကော်မရှင်တပ်များ တိုက်ခိုက်ခံနေရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   ကရင်နီပြည်၊ ဖရူဆိုမြို့နယ်ထဲသို့ စစ်ကြောင်းထိုးလာနေသည့် စစ်ကော်မရှင်တပ် တိုက်ခိုက်ခံရပြီး ထိခိုက် သေဆုံးမှုများ ရှိနေသည်။   ကရင်နီ တော်လှန်ရေး ပူးပေါင်းအဖွဲ့က စစ်ကော်မရှင် စစ်ကြောင်းကို ဟန့်တား တိုက်ခိုက်နေသဖြင့် မြေပြင်တွင် နှစ်ဖက်ကြား တိုက်ပွဲများ ပြင်းထန်နေသည်ဟု မြေပြင် သတင်းအရင်းအမြစ်က ပြောသည်။   ကရင်နီ တော်လှန်ရေး ပူးပေါင်းအဖွဲ့ တာဝန်ရှိသူတစ်ဦးက “သူတို့ ‘ကဒါးလား’ အထိတော့ ရောက်ပြီပေါ့နော်။ မနေ့က စဖြစ်တယ်။ တိုက်ပွဲတွေတော့ တောက်လျှောက် ဆက်ပြီးတော့ ဖြစ်နေသေးတယ်ပေါ့နော်” ဟု ပြော သည်။   နှစ်ဖက်ကြား တိုက်ပွဲမှာ ဩဂုတ်လ ၂၅ ရက်နေ့က စဖြစ်ခဲ့သည်ဟု ဆိုသည်။   ဩဂုတ်လ ၂၅ ရက်နေ့က တိုက်ခိုက်ခံရမှုထဲ စစ်သား ၃ ဦး သေဆုံးခဲ့သည့်အပြင် ၆ ဦး ထိမှန် ဒဏ်ရာ ရခဲ့သည်ဟု ကရင်နီ တော်လှန်ရေး ပူးပေါင်းတပ်ဘက်က ပြောသည်။   ဒီးမော့ဆိုမြို့နယ်ဘက်မှ ထိုးစစ်ဆင်လာသည့် အင်အားရာဂဏန်းပါရှိသော စစ်ကြောင်းသည် လက်ရှိတွင် ဖရူဆို မြို့မှ ၈ မိုင်ခန့် အကွာတွင်ရှိသော ထီးသော်ကူးနှင့် ကဒါးလားကျေးရွာထဲ၌ ဝင်ရောက်နေရာယူထားပြီး စစ်ရေး ဆက်လက်တင်းမာနေသည်ဟု ဆိုသည်။   ထို့အပြင် ဒီးမော့ဆိုမြို့နယ်ထဲ၌လည်း တိုက်ပွဲများ ဆက်လက်ပြင်းထန်နေပြီး စစ်ကော်မရှင်တပ်၏ ဒရုန်းနှစ်စီး ကို ကရင်နီ ပူးပေါင်းတပ်ဖွဲ့ဘက်က ဖျက်ဆီးနိုင်ခဲ့သည်။   ဒီးမော့ဆိုမြို့နယ်မှ ဖရူဆိုမြို့နယ်ဘက်ကို ပြည်ထောင်စု လမ်းမကြီးအတိုင်း စစ်ကော်မရှင်တပ်က စစ်ကြောင်း ထိုးနေခြင်း ဖြစ်သည်။   ကရင်နီ တော်လှန်ရေး တပ်ဖွဲ့ဝင်တစ်ဦးက “တိုက်ပွဲက ဆက်တိုက်ဖြစ်တော့ ချေမှုန်းရေးတက်တဲ့ အချိန် သူ့တို့ ဘက်က ထိခိုက်ကျဆုံးမှု နည်းနည်းရှိတယ်ပေါ့နော်။ လောလောဆယ် ကဒါးလား၊ ထီးသော်ကူး အထိတော့ သူတို့ နေရာယူထားတယ်ပေါ့နော်” ဟု ပြောသည်။   စစ်ကော်မရှင်တပ်ဘက်က သေဆုံးဒဏ်ရာရသူများကို ဆိုင်ကယ်ဖြင့် လာရောက်သယ်ဆောင်ကာ ဒီးမော့ဆိုမြို့ ဘက်သို့ ပြန်လည်ပို့ဆောင်ခဲ့သည်ဟု ဆိုသည်။   ဩဂုတ်လ ၂၅ ရက်နေ့တွင် ဖရူဆိုအခြေစိုက် စစ်ကော်မရှင် တပ်စခန်းသည် ပြည်သူများ အစုလိုက်အပြုံလိုက် မီးရှို့သတ်ဖြတ်ခံခဲ့ရသော ဖရူဆိုအနောက်ခြမ်းရှိ မိုဆိုကျေးရွာအနီးထဲ နေရာအထိ စစ်ကြောင်းထိုးလာခဲ့သည်ဟု ဒေသခံများက ပြောသည်။   ဖရူဆိုမြို့နယ်တွင် စစ်ကော်မရှင်တပ် လက်အောက်ခံ အမှတ် (၁၄) တန်းမြင့် စစ်ရေးလေ့ကျင့်ရေးကျောင်း အပြင် ခမရ - ၄၂၈၊ ခမရ - ၅၃၁ တို့ အခြေချ တပ်စွဲထားသည်။   ဒီးမော့ဆိုမြို့နယ်ဘက်မှ ထွက်လာသော အဆိုပါ စစ်ကြောင်းသည် ဆက်လက် စစ်ကြောင်းထိုးရန် ပြင်ဆင်နေပြီး ဘောလခဲ အထိ စစ်ကြောင်းထိုးနိုင်သည်ဟု စစ်ရေးလေ့လာသုံးသပ်သူများက ပြောသည်။   Photo - CJ ဖရူဆိုမြို့အတွင်း ဝင်ရောက်စစ်ကြောင်းထိုးနေသည့် စစ်ကောင်စီတပ်သားများ (ပုံဟောင်း )  

ဖရူဆိုသို့ စစ်ကြောင်းထိုးလာသော စစ်ကော်မရှင်တပ်များ တိုက်ခိုက်ခံနေရ

ဖရူဆိုသို့ စစ်ကြောင်းထိုးလာသော စစ်ကော်မရှင်တပ်များ တိုက်ခိုက်ခံနေရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  ကရင်နီပြည်၊ ဖရူဆိုမြို…

  • August 27, 2025
တောင်ကျရေကြောင့် ချင်းမိုင်ခရိုင်အတွင်း လူနှစ်ဦး သေဆုံး၊ တစ်ဦး ပျောက်ဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   မုန်တိုင်း Kajiki အရှိန်ကြောင့် မိုးသည်းထန်စွာ ရွာသွန်းခဲ့သည့်အတွက် ထိုင်းနိုင်ငံ၊ ချင်းမိုင်ခရိုင်အတွင်း တောင် ကျရေများ ကျဆင်းလာကာ အိမ်များ မျောပါပြီး လူ ၂ ဦး သေဆုံးခဲ့သည်။   ထို့အပြင် ကလေးငယ် တစ်ဦးပါ ပျောက်ဆုံးနေခဲ့သည်ဟု The Nation သတင်းတွင် ဖော်ပြထားသည်။   ချင်းမိုင်ခရိုင်၊ မယ့်ချမ် (Mae Cham) မြို့နယ်အတွင်း ဩဂုတ်လ ၂၆ ရက်နေ့ (အင်္ဂါနေ့) ညက မိုးသည်းထန်စွာ ရွာသွန်းခဲ့ခြင်းကြောင့် တောင်ကျရေများ ကျလာပြီး အိမ်များ မျောပါ သွားခဲ့သည်။   ပန်အုန် (Pang Ung) ကျေးရွာရှိ နေအိမ် ၇ လုံးလည်း လုံးဝ ပျက်စီးသွားခဲ့သည်ဟု ဆိုသည်။   ညပိုင်းတွင် လူ  ၃ ဦး ပျောက်ဆုံးနေခဲ့ရာမှ ဩဂုတ်လ ၂၇ ရက်နေ့ (ယနေ့) နံနက်ပိုင်းတွင် ၂ ဦးကို သေဆုံးလျက် တွေ့ရှိခဲ့သည်။   လူ ၁၀ ဦး ဒဏ်ရာရသွားခဲ့ပြီး ဒဏ်ရာရသူများကို မယ်ဟောင်ဆောင် ခရိုင်ရှိ ခွန်ယွမ်း (Khun Yuam) နှင့် ချင်းမိုင်ခရိုင်ထဲက မယ့်ချမ် ဆေးရုံတို့တွင် ဆေးကုသပေးထားသည်။   ပျောက်ဆုံးနေတဲ့သူမှာ အသက် ၁၂ နှစ်အရွယ် ကလေးမလေး ဖြစ်သည်။   မယ်ဟောင်ဆောင် ခရိုင်၊ ခွန်ယွမ်းတွင် မြေပြိုပြီး သစ်ပင်များ လဲကျခြင်းကြောင့် လမ်းများ ပိတ်နေသည်ဟု ဆိုသည်။  

တောင်ကျရေကြောင့် ချင်းမိုင်ခရိုင်အတွင်း လူနှစ်ဦး သေဆုံး၊ တစ်ဦး ပျောက်ဆုံး

တောင်ကျရေကြောင့် ချင်းမိုင်ခရိုင်အတွင်း လူနှစ်ဦး သေဆုံး၊ တစ်ဦး ပျောက်ဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  မုန်တိုင်း Kaji…

  • August 27, 2025
ဆီးချိုသွေးချိုရောဂါ ပျောက်ကင်းစေမည့် ကုထုံးသစ် အောင်မြင်မှုများရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   ဆီးချိုသွေးချို ရောဂါ ကုထုံးသစ် တစ်ခုကို စမ်းသပ်နေရာတွင် အောင်မြင်မှုများ ရလာနေသောကြောင့် ဆီးချို သွေးချို ရောဂါ ပျောက်ကင်းအောင် ကုသနိုင်မည့် လမ်းစ ပေါ်လာနေပြီဟု ဆိုသည်။   ကုထုံးသစ်မှာ ရိုးတွင်းချဉ်ဆီကုသမှု ဖြစ်သည်။   ဓါတ်ခွဲခန်းက ထုတ်လုပ်ထားသော ရိုးတွင်းချဉ်ဆီများကို ဆီးချိုသွေးချို အမှတ် ၁ အမျိုးအစား (Type 1 Diabetes) ရောဂါသည် အချို့နှင့် စမ်းသပ်ရာတွင် အင်ဆူလင် ဆေးထိုးစရာ မလိုတော့သည် အထိ တိုးတက် မှုများ ရလာနေသည်ဟု ဆိုသည်။   ပြင်းထန်သော Type 1 ဆီးချိုသွေးချို ရောဂါသည် ၁၂ ဦးကို ဓါတ်ခွဲခန်းတွင် ထုတ်လုပ်တဲ့ ရိုးတွင်းချဉ်ဆီမှ လုပ်ထားသည့် ပန်ကရိယဆဲလ်များကို ထိုးသွင်းပေးခဲ့ခြင်း ဖြစ်သည်။   တနှစ်ကြာသည့် အချိန်တွင် ၁၀ ဦးသည် အင်ဆူလင် ဆေးထိုးစရာ မလိုအပ်တော့ကြောင်း နယူး အင်္ဂလန် ဆေးပညာ ဂျာနယ် (New England Journal of Medicine) တွင် ဖော်ပြသည်။   ကျန်နှစ်ဦးမှာ အင်ဆူလင် ထိုးနေရဆဲ ဖြစ်သော်လည်း သွေးထဲရှိ သကြားဓါတ် ထိန်းချုပ်မှု တိုးတက်လာနေ သည်ဟု ဆိုသည်။    သားအိမ်တွင် ရှိသော သားငံရည်က ဆဲလ်များကို အင်ဆူလင် ထုတ်ပေးသည့် ပန်ကရိယက ဆဲလ်များ အဖြစ် ပြောင်းလဲပြီး အသုံးပြုထားခြင်း ဖြစ်သည်။   ပန်ကရိယ ဆဲလ်များကို လူနာ၏ အသည်းထဲသို့ ထိုးပေးခြင်း ဖြစ်သည်။   ထိုဆဲလ်များက အသည်းထဲတွင်  ဆက်ရှိနေပြီး အင်ဆူလင်ကို ထုတ်ပေးခြင်း ဖြစ်သည်။  

ဆီးချိုသွေးချိုရောဂါ ပျောက်ကင်းစေမည့် ကုထုံးသစ် အောင်မြင်မှုများရ

ဆီးချိုသွေးချိုရောဂါ ပျောက်ကင်းစေမည့် ကုထုံးသစ် အောင်မြင်မှုများရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  ဆီးချိုသွေးချို ရောဂါ က…

  • August 27, 2025
ရုရှား ရေနံစက်ရုံ ရပ်ဆိုင်းမှုကြောင့် ရေနံဈေးတက်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   ရေနံချက် စက်ရုံများကို ယူကရိန်းက တိုက်ခိုက်မှုကြောင့် ရုရှား ရေနံ တင်ပို့မှု ကျဆင်းလာပြီး ကမ္ဘာ့ ရေနံဈေးတက်လာနေသည်။   တဖက်တွင်လည်း ရုရှားက ဗျူဟာမြောက်အရေးပါသည့် Dnipropetrovsk ဒေသအတွင်း ခြေကုတ်ဝင်ယူ လာနေသည်။   ယူကရိန်းက ရုရှား၏ စွမ်းအင် အခြေခံ အဆောက်အအုံများကို ဒရုန်း တိုက်ခိုက်မှုများ တိုးမြှင့်လုပ်ဆောင် လာနေသည်။   တနင်္ဂနွေနေ့က ရေနံတင်ပို့သည့် ဆိပ်ကမ်း တစ်ခုကို တိုက်ခိုက်ခဲ့ပြီး လွန်ခဲ့သည့် ရက်သတ္တပတ်ကလည်း ရေနံချက်စက်ရုံကြီး တစ်ခုကို တိုက်ခိုက်ခဲ့သည်။   အဆိုပါ ရေနံချက်စက်ရုံက တစ်နှစ်ကို မက်ထရစ်တန် ၅ သန်း သို့မဟုတ် တစ်ရက်ကို ရေနံစည် ၁၀၀,၀၀၀ ထုတ်လုပ်နိုင်သည်။   တဖက်တွင်လည်း အပစ်အခတ်ရပ်စဲရေး ကြိုးပမ်းနေသော အမေရိကန် သမ္မတ ဒေါ်နယ် ထရန့်က ရုရှားအပေါ် ပိတ်ဆို့ အရေးယူမှုများ ပြင်းပြင်းထန်ထန် တိုးချဲ့ လုပ်ဆောင်မည်ဟု ပြောနေခြင်းကလည်း ရေနံဈေးကို တက် စေသည်။   တနင်္လာနေ့က Brent Crude Future ရှယ်ယာ ၁.၅၈ % တက်သွားပြီး West Texas Crude Intermediate Future ရှယ်ယာ ၁.၇၉% တက်သွားခဲ့သည်။   တချိန်တည်းမှာပင် ရုရှားက ယူကရိန်းအပေါ် ထိုးစစ်များ တိုးမြှင့်လာနေပြီး Donetsk ဒေသကို ကျော်ပြီး Dnipropetrovsk ဒေသကို ခြေကုတ်ဝင်ယူနေပြီ ဖြစ်ကြောင်း ယူကရိန်းက ဝန်ခံလိုက်သည်။   အဆိုပါ ဒေသကို ရုရှားက ရရှိသွားပါက ယူကရိန်း စစ်တပ်၏ စိတ်ဓါတ်ရေးရာကို အကြီးအကျယ် ခြိမ်းခြောက် နိုင်မည်ဟု လေ့လာသူများက ဆိုသည်။

ရုရှား ရေနံစက်ရုံ ရပ်ဆိုင်းမှုကြောင့် ရေနံဈေးတက်

ရုရှား ရေနံစက်ရုံ ရပ်ဆိုင်းမှုကြောင့် ရေနံဈေးတက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  ရေနံချက် စက်ရုံများကို ယူကရိန်းက တိုက်ခိ…

  • August 27, 2025
ဖားကန့် ပစ်ခတ်မှု အမျိုးသမီး ၃ ဦး ဒဏ်ရာရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   ကချင်ပြည်၊ ဖားကန့်မြို့တွင် စစ်ကော်မရှင်တပ်၏ ပစ်ခတ်မှုကြောင့် အမျိုးသမီးတစ်ဦး သေဆုံးပြီး ၃ ဦး ထိမှန် ဒဏ်ရာရခဲ့သည်ဟု ဒေသခံများက ပြောသည်။   တိုက်ပွဲများ ဖြစ်ပွားနေသည့် ဖားကန့်မြို့တွင် စစ်ကော်မရှင်တပ်က စစ်ကြောင်းထိုးရင်း ပစ်ခတ်မှုကြောင့် ဒေသခံ ပြည်သူများ ထိမှန်သေဆုံး ဒဏ်ရာရခဲ့ခြင်း ဖြစ်သည်ဟု ဆိုသည်။   ဒေသခံတစ်ဦးက “မှော်စီစာ တောင်ပေါ်ကျောင်းမှာ တပ်စွဲထားတဲ့ စစ်ကောင်စီအုပ်စုထဲက အင်အား ၁၀၀ ကျော်က ဖားကန့်ကို ခြေလျင် စစ်ကြောင်းထိုးတယ်။ တစ်လမ်းလုံး ဟိုပစ်ဒီပစ် လုပ်သွားတာတွေ ရှိတယ်။ အမျိုးသမီး တစ်ဦးကတော့ ပန်းတင်တံတား ထိပ်မှာတော့ ပြည်သူတွေ ပစ်ခတ်ခံရတယ်။ အမျိုးသမီးတစ်ဦးက ပွဲချင်းပြီး သေဆုံးသွားတယ်။ အဲ့ဒီနောက်တော့ အဲ့ဒီစစ်ကြောင်းက ဗျူဟာကုန်းကို ထပ်ဝင်သွားတယ်။ စုပေါင်း ရုံးမှာလည်း နေရာယူထားကြတယ်လို့ သိရတယ်” ဟု ပြောသည်။   ဩဂုတ်လ ၂၅ ရက်နေ့ (ယမန်နေ့)၊ နံနက်ပိုင်း ၇ နာရီ အချိန်ခန့်တွင် မှော်စီစာကျေးရွာ ဘုရားကုန်း၌ တပ်စွဲထား သည့် အင်အား ၁၀ ၀ကျော်ရှိသော စစ်ကော်မရှင် ပူးပေါင်းတပ်ဖွဲ့သည် ဖားကန့်မြို့ ဗျူဟာကုန်းသို့ ခြေလျင်ဖြင့် သွားရောက် ပူးပေါင်းစဥ် လမ်းတစ်လျှောက် ပစ်ခတ်မှုများ ပြုလုပ်ခဲ့ခြင်း ဖြစ်သည်။   ထို့ကြောင့် ဖားကန့်မြို့အဝင် ပန်းတင်တံတားအနီးတွင် အထက်ပါ ဒေသခံများ ပစ်ခတ်ခံခဲ့ရခြင်း ဖြစ်ပြီး အဆိုပါ စစ်ကြောင်းသည် ဖားကန့်မြို့ပေါ်သို့ ဆက်လက် ထွက်ခွာသွားသည်ဟု ဒေသခံများက ပြောသည်။   ပြီးခဲ့သည့် ဩဂုတ်လ ၂၄ ရက်နေ့ကလည်း နမ္မဖြစ်ကျေးရွာတစ်ဝိုက်တွင် စစ်ကော်မရှင် တပ်ဖွဲ့ဝင်များ စီးလာသည့် အိမ်စီးကားတစ်စီးကို ကချင်လွတ်လပ်ရေး တပ်မတော် KIA နှင့် ပူးပေါင်းတပ်တို့က ကြားဖြတ် တိုက်ခိုက်ခဲ့ရာ ဒရုန်း ၅ စီး၊ ကားတစ်စီး အပါအဝင် စစ်သုံ့ပန်းများကို အရှင်ဖမ်းမိခဲ့သေးသည်။   ကင်းထောက်ဒရုန်း ၁ စီးနှင့် တိုက်ခိုက်ရေး ဒရုန်း ၄ စီးကို KIA က သိမ်းဆည်းရမိခဲ့သည်ဟု သိရပြီး အဆိုပါ ဖြစ်စဥ်နောက်ပိုင်း ဩဂုတ်လ ၂၄ ရက်နေ့တွင် ဖားကန့် - လုံးခင်း လမ်းမကြီး၌ အရပ်သား ကားတစ်စီးကို စစ်တပ်က ဖမ်းဆီးခဲ့သည်။   ဖားကန့်မြို့ မြောက်ဘက်ခြမ်းရှိ မှော်ဝမ်းကြီး၊ မှော်ဝမ်းလေး၊ ရှရော်ခ၊ ညောင်ပင်ကုန်း၊ အမှိုက်ပုံကျေးရွာ တစ်ဝိုက်တွင်လည်း နှစ်ဖက်ကြား စစ်ရေး ဆက်လက် တင်းမာနေပြီး ဒရုန်းအသုံးပြု တိုက်ခိုက်မှုများ ဆက်တိုက် လုပ်နေသည်ဟု ဒေသခံများက ပြောသည်။   ဖားကန့် စစ်ရေး အခြေအနေ စောင့်ကြည့်နေသူ တစ်ဦးက “လက်ရှိ စစ်ရေးအခြေအနေကတော့ မှော်ဝမ်းကြီး၊ မှော်ဝမ်းလေး တစ်ဝိုက်ဘက်မှာတော့ စစ်ရေး တင်းမာနေတယ်။ အမှိုက်ပုံရွာဘက်မှာတော့ တောက်လျှောက် အပြန်အလှန် ပစ်ခတ်မှုတွေ ရှိတယ်။ စစ်တပ် ဘက်ကတော့ ဒရုန်းများများ အသုံးပြုပြီးတော့ ဒရုန်းဗုံးတွေ ကြဲချတာတွေ လက်နက်ကြီး ပစ်ခတ်တာ တွေ ပြင်းပြင်းထန်ထန် လုပ်တယ်လို့ ကြားရတယ်” ဟု ပြောသည်။   ဖားကန့်မြို့တွင် စစ်ကော်မရှင်တပ်နှင့် ရှမ်းနီတပ် ပူးပေါင်းအဖွဲ့က ပြီးခဲ့သည့် မေလနောက်ဆုံး အပတ်မှ စတင်ကာ ဖားကန့်မြို့ကို ထိုးစစ်ဆင်ခဲ့ပြီး KIA ပူးပေါင်းတပ်နှင့် နေ့စဥ် ထိတွေ့မှုများ ဖြစ်ပွားနေသည်။   ထို့အပြင် ဖားကန့်မြို့ကို ဝင်ရောက်နိုင်သည့်လမ်းများကိုလည်း စစ်တပ်နှင့် ရှမ်းနီတပ်က ပြန်လည် ထိန်းချုပ်ထား သည်။   လက်ရှိတွင် တင်းမာလာသည့် နှစ်ဖက်ကြားက စစ်ရေးအခြေနေများကြောင့် ဖားကန့်မြို့နယ်အတွင်းရှိ ရှရော်ခ၊ လုံးခင်း၊ ဆိုင်းတောင်၊ မှောစီစာစသည့် ကျေးရွာများ အပါအဝင် ရွာပေါင်းများစွာက ဒေသခံထောင်နှင့်ချီမှာ ဘေးလွှတ်ရာများသို့ စစ်ဘေး တိမ်းရှောင်နေကြရသည်။   အလားတူ ဖားကန့်မြို့ကို ဝင်ရောက်နိုင်သည့် လမ်းကြောင်းများကို စစ်တပ်နှင့် ပူးပေါင်းအဖွဲ့တို့က ပိတ်ဆို့ထား သည့်အတွက် ဒေသတွင်း ကုန်ဈေးနှုန်းများ မြင့်တက်ကာ စက်သုံးဆီပါ ပြတ်တောက်နေသည်။   စစ်ကောင်စီတပ်သည် မြန်မာနိုင်ငံတစ်ဝှမ်းရှိ ၎င်းတို့လက်လွှတ်ထားရသည့် မြို့များကို ပြန်လည် ရယူရန် အရှိန် အဟုန်မြင့် ကြိုးစားလာနေပြီး ကချင်ပြည်တွင် ဖားကန့်မြို့၊ ဗန်းမော်မြို့နှင့် အင်းတော်ကြီးဒေသ အပါအဝင် ဝိုင်းမော်မြို့တွင်လည်း တိုက်ပွဲများ ဆက်လက် ဖြစ်ပွားနေသည်။

ဖားကန့် ပစ်ခတ်မှု အမျိုးသမီး ၃ ဦး ဒဏ်ရာရ

ဖားကန့် ပစ်ခတ်မှု အမျိုးသမီး ၃ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  ကချင်ပြည်၊ ဖားကန့်မြို့တွင် စစ်ကော်မရှင်တပ်၏ ပစ်…

  • August 27, 2025
ထောင်ဘူးဝတွင် ပြန်လည် ဖမ်းဆီးခံရသော နိုင်ကျဉ်း ၇၄ ဦးရှိပြီ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   စစ်ကော်မရှင်သည် လွတ်ရက်စေ့သည့် နိုင်ငံရေး အကျဉ်းသားများအား ထောင်ဗူးဝတွင်ပင် ပြန်လည် ဖမ်းဆီးမှု များ လုပ်လျက်ရှိရာ ဖမ်းဆီးခံရသူ ၇၄ ဦး ရှိသွားပြီဟု မြန်မာနိုင်ငံလုံး ဆိုင်ရာ နိုင်ငံရေး အကျဉ်းသားများ ကွန်ရက် PPNM က ပြောသည်။   စစ်အာဏာသိမ်းကာလအတွင်း လွတ်ရက်စေ့ နိုင်ကျဉ်းများကို ထောင်ဗူးဝ၌ပင် ပုဒ်မ အမျိုးမျိုးတပ်ကာ ပြန်လည်ဖမ်းဆီး အမှုတပ်ခြင်းများကို ရည်ရွယ်ချက်ရှိရှိ လုပ်ဆောင်လျှက်ရှိရာ ပြန်လည် ဖမ်းဆီးခံသူ ၇၄ ဦး ရှိပြီးဖြစ်ကြောင်း PPNM မှ မှတ်တမ်းတင်ထားသည်။   နိုင်ငံရေး အကျဉ်းသားများ ကွန်ရက် (PPNM) ၏ ဦးဆောင်ကော်မတီဝင် ကိုသိုက်ထွန်းဦးက “ထောင်က လွတ် ပြီ ဆိုတဲ့ခါမှာ နောက်အမှုတပ်တာမျိုး တရားရုံးတွေ နယ်မြေရဲစခန်းတွေမှာ ဆက်ပြီး ဖမ်းခိုင်းထားလို့ ဖမ်း ဝရမ်းရှိလို့ ပုံစံမျိုးနဲ့ ပြန်လည် ဖမ်းဆီးခံရတာများပါတယ်။ အများအားဖြင့်တော့ အကြမ်းဖက်တွေကို ထောက် ပံ့တယ်ဆိုပြီး ၅၀ ညနဲ့ ပြန်ဖမ်းတယ်။ တစ်ချို့တွေလည်း ၅၂ ပုဒ်မ(က) နဲ့ ပြန်ဖမ်းတာမျိုး ရှိပါတယ်။ ပြီးတော့ ၅၀၅-က နဲ့ ပြန်ပြီးမှ ဖမ်းဆီးတာမျိုးတွေလည်း ရှိပါတယ်။ ဒီပုဒ်မ ၃ ခုကို ကျနော်တို့ အဓိက တွေ့ရပါတယ်” ဟု ပြောသည်။   ဩဂုတ်လ ၇ ရက်နေ့တွင် လွတ်ရက်စေ့ဖြင့် လွတ်မြောက်လာသည့် နိုင်ငံရေးအကျဉ်းသူ မမိုးဆန်းစုကြည်ကို လည်း အကြမ်းဖက်ဥပဒေ ပုဒ်မ ၅၂-ကဖြင့် ပြန်လည် ဖမ်းဆီးလိုက်ကြောင်း PPNM က ဆိုသည်။   လွတ်ရက်စေ့သည့် နိုင်ငံရေး အကျဉ်းသားများအား ထောင်ဗူးဝမှ ပြန်လည်ဖမ်းဆီးနေသည့် အခြေအနေများနှင့် ပတ်သက်၍ ကိုသိုက်ထွန်းဦးက ယခုကဲ့သို့ ဆက်ပြောသည်။   “အများအားဖြင့်တော့ အစောပိုင်းဖမ်းတုန်းက ဘာပုဒ်မမှ မကပ်ဘဲနဲ့ လွတ်ရက်စေ့ပြီး ထောင်ကနေ ပြန်လွတ် လာတဲ့အချိန်ကျမှ တခြားပုဒ်မတွေ ကပ်ပြီး ဖမ်းဆီးတာ ကျနော်တို့တွေ့ရတယ်။ ပြန်ဖမ်းခံရတဲ့သူ တော်တော် များများက အရင် မှတ်တမ်းတွေရှိပြီးမှ အပြင်ကို ရောက်ရင်လည်း ပြန်လုပ်နိုင်လောက်တယ်လို့ သူတို့ ယူဆ ထားတဲ့သူတွေ ပြီးတော့ သူတို့သံသယဖြစ်တဲ့လူတွေကို သူတို့ ပြန်လည်ဖမ်းဆီးတာ ကျနော်တို့ တွေ့ရပါတယ်။”   လွတ်ရက်စေ့သည့် နိုင်ငံရေး အကျဉ်းသားများ ထောင်ဗူးဝ၌ ပြန်လည်ဖမ်းဆီးခံရမှုသည် လွိုင်ကော် အကျဉ်း ထောင်၊ ကလေးအကျဉ်းထောင်၊ သရက်အကျဉ်း နှင့် သာယာဝတီထောင်တို့တွင် အဓိကတွေ့ရသည်ဟု ကိုသိုက်ထွန်းဦးက ပြောသည်။   ထို့အတူ အိုးဘိုထောင်၊ အင်းစိန်ထောင်၊ ဒိုက်ဦး၊ သရက်၊ မိတ္ထီလာ၊ ကသာ၊  မြစ်ကြီးနား အကျဉ်းထောင်၊ ညောင်ရွှေ၊ ရွှေဘို၊ မြိတ်၊ မြင်းခြံ၊ ပုသိမ် ပခုက္ကူနှင့် သထုံအကျဉ်းထောင်တို့တွင် လွတ်ရက်စေ့ပြီး ထောင်ဗူးဝတွင် ပြန်လည်ဖမ်းဆီးမှုများ ဖြစ်နေသည်ဟု ဆိုသည်။   နိုင်ငံရေးအကျဉ်းသူများအဖွဲ့ (WOPP) ဦးဆောင် တာဝန်ခံ မဇူးဇူးမေယွန်းက “အဓိကအကြောင်းအရင်း ကတော့ စစ်တပ်ရဲ့ ရည်ရွယ်ချက် ကတော့ ရှင်းပါတယ်။ အဓိကကတော့ နိုင်ငံရေး အကျဉ်းသားတွေကို သူတို့ရဲ့ ဓားစာခံ လိုမျိုးနဲ့ ထည့်ထားတာ ဖြစ်တယ်။ ဒါကို ပြည်သူတွေနဲ့ တော်လှန် အင်အားစုတွေ ဘက်ကလည်း သိဖို့ လိုအပ် သလို နိုင်ငံတကာဘက်ကလည်း ဖိအားအမျိုးအမျိုး အကြမ်းဖက် စစ်ကောင်စီကို ပေးဖို့လိုအပ်တယ်” ဟု ပြော သည်။   လွတ်ရက်စေ့သော်လည်း ထောင်ဗူးဝတွင် ပြန်လည်ဖမ်းဆီးမှုအပြင် နိုင်ငံရေးအကျဉ်းသားများအပေါ်  အခြား နည်းလမ်း အမျိုးမျိုးဖြင့် အခွင့်အရေး ချိုးဖောက်နေမှု အခြေအနေကို မဇူးဇူးမေယွန်းက ယခုကဲ့သို့ ဆက် ပြောသည်။   “လွတ်ရက်စေ့ပေမဲ့ ထောင်ဗူးဝကနေ ပြန်လည်ဖမ်းဆီးပြီးတော့ အကြောင်းအမျိုးမျိုးနဲ့ တစ်ခြားအမှုတွေ တပ် ပြီးတော့ပေါ့နော် ပြီးရင်ပုဒ်မကြီးတွေနဲ့ တပ်ပြီးတော့ပြန်လည် ဖမ်းဆီးတာပေါ့နော်။ အဲ့ဒီအပြင်ကို ညှင်းပမ်း နှိပ်စက်မှုတွေ အကြောင်းအမျိုးမျိုးနဲ့ ထောင်ထဲမှာ ပြစ်ဒဏ် တိုက်ထဲမှာ ထည့်တာမျိုးတွေထိ ကျူးလွန် ခံရပါ တယ်။ အကျဉ်းထောင်ထဲမှာ အပ်တိုတစ်ချောင်းတောင် ကိုင်ပိုင်ခွင့်မရှိတဲ့ နိုင်ငံရေး အကျဉ်းသူတွေကို အပြင် ကနေပြီးတော့ သူတို့က လေးခွတွေနဲ့ ပစ်တာမျိုး ဒီလိုမျိုးဖြစ်စဉ်တွေလည်း ရှိခဲ့တယ်ပေါ့နော်။ ခြိမ်းခြောက် တာမျိုးတွေ လုပ်နေတာလည်း ရှိတယ်ပေါ့နော်။“   ထို့အတူ နိုင်ငံရေးအကျဉ်းသားများကို မိသားစုများနှင့် ဝေးလံသည့် အကျဉ်းထောင် နေရာများသို့ ထောင်ပြောင်း ပို့လိုက်သည့်အတွက် ပါဆယ်နှင့် ထောင်ဝင်စာတွေ့ရန် အခက်အခဲများလည်း ကြုံနေရသည်ဟု WOPP က ပြော သည်။   စစ်ကော်မရှင်တပ်၏ နိုင်ငံရေးအကျဉ်းသားများအား လွတ်ရက်စေ့သည့်တိုင်အ ထောင်ဗူးဝတွင်ပင် ပုဒ်မ အမျိုး မျိုးတပ်ကာ ပြန်လည်ဖမ်းဆီး အမှုတပ်ခြင်းများ ရည်ရွယ်ချက်ရှိရှိ လုပ်ဆောင်နေခြင်းနှင့် အကျဉ်းထောင်ထဲ၌ လူ့အခွင့်အရေး ချိုးဖောက်မှုများအား ဆက်လက် ထုတ်ဖော်ပေးသွားမည်ဟု နိုင်ကျဉ်းအရေး လုပ်ဆောင်နေသူ များက ပြောသည်။

ထောင်ဘူးဝတွင် ပြန်လည် ဖမ်းဆီးခံရသော နိုင်ကျဉ်း ၇၄ ဦးရှိပြီ 

ထောင်ဘူးဝတွင် ပြန်လည် ဖမ်းဆီးခံရသော နိုင်ကျဉ်း ၇၄ ဦးရှိပြီ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  စစ်ကော်မရှင်သည် လွတ်ရက်စေ့သည့်…

  • August 27, 2025
ခက်ခဲသော သတင်းသမားများအား IPCM ကူညီမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   စစ်ကော်မရှင်၏ မတရားဖိနှိပ်မှုများကြောင့် အခက်အခဲများနှင့် ရင်ဆိုင်နေကြရသည့် သတင်းသမားများအတွက် လုံခြုံစွာနေထိုင်နိုင်ရေး ကူညီထောက်ပံ့မှုများ လုပ်ပေးသွားမည်ဟု လွတ်လပ်သော မြန်မာသတင်း မီဒီယာ ကောင်စီ IPCM ကပြောသည်။   ပြည်ပတွင် ရောက်နေသည့် သတင်းသမားများအတွက်လည်း တရားဝင် စာရွက်စာတမ်း ရရှိရေးအတွက် အကူအညီ ပေးသွားမည်ဟု လွတ်လပ်သော မြန်မာသတင်းမီဒီယာကောင်စီ IPCM ကပြောသည်။   IPCM ဥက္ကဋ္ဌ နန်းဖော့ဂေက “အဓိကကတော့ ဒီ IPCM ရဲ့ အရေးပေါ် ကူညီထောက်ပံ့မှုဆိုတာကတော့ ငွေသားပဲ ဖြစ်မှာပေါ့နော်။ ဘာဖြစ်လို့လဲဆိုတော့ တစ်ဦး တစ်ယောက်ချင်းစီရဲ့ လိုအပ်ချက်က မတူကြဘူး။ ပုံစံမတူတဲ့ ထောက်ပံ့မှုမျိုး မဟုတ်ဘဲနဲ့ ငွေကြေးနဲ့ပဲ အတိုင်း အတာ ပမာဏတစ်ခုထိကို ထောက်ပံ့တာမျိုးနဲ့ အဲ့ဒီအပေါ်မှာ ဥပမာအားဖြင့် သူတို့ရဲ့ နေထိုင်ခွင့်အတွက်ကို လက်မှတ်ကုန်ကျမှုလားပေါ့နော် ဒါမှမဟုတ် တစ်နည်းလမ်း ပြောင်းရွှေ့ဖို့အတွက် ကုန်ကျမှုတွေလား အားလုံး ကတော့ ငွေသားနဲ့ပဲပေးသွားမယ်” ဟုပြောသည်။   စစ်ကော်မရှင်၏ မတရားဖိနှိပ်မှုများကြောင့် ပြည်တွင်း၌ သတင်းလုပ်ငန်းများ လုပ်ဆောင်ရန် အခက်အခဲ များ နှင့် ရင်ဆိုင်ကြရပြီး သတင်းသမားများမှာ ပြည်ပနိုင်ငံများနှင့် နယ်စပ်ဒေသများသို့ ထွက်ပြေးတိမ်းရှောင် ခဲ့ကြရသည်။   ပြည်တွင်း၌ ရှိနေသည့် သတင်းထောက်များမှာလည်း အခက်အခဲမျိုးစုံနှင့် ရင်ဆိုင်နေကြရသည်။ အခက်အခဲ မျိုးစုံ ကြုံနေရသည့် အခြေအနေများ၌ပင် သတင်းလုပ်ငန်းများမှာ ရပ်တန့်မသွားခဲ့ပေ။   ပြည်ပရောက် သတင်းထောက်တစ်ဦးက “လက်ရှိပြည်ပကို ရောက်နေတဲ့ သတင်းသမား တစ်ယောက်အနေနဲ့ ကတော့ ပထမဦးဆုံး ရင်ဆိုင်ရတဲ့ အခက်အခဲကတော့ အထောက်အထားရှိရှိနဲ့ နေထိုင်နိုင်ဖို့ အခက်အခဲရယ်၊ နေစရာရယ်ပေါ့နော် အဲ့ဒါတွေ လိုအပ်တယ်ပေါ့နော်။ စိတ်ပိုင်းဆိုင်ရာ ဆိုရင်လည်း မိသားစုနဲ့ ခွဲနေရတဲ့ခါမှာ စိတ်ပိုင်းဆိုင်ရာ ခံစားမှုတွေ လည်းရှိတယ်။ နောက် နေစရာ၊ စားစရာ အဆင်မပြေတော့ လက်ရှိမှာလည်း တော် တော် ဒုက္ခရောက်နေကြတဲ့ သူတွေရှိတော့ နေစရာနဲ့စားစရာ အဓိက ဖြည့်ဆည်းပေးစေချင်တယ်။ လစာ လျှော့ ထားတာတွေလည်းရှိတော့ တကယ့်တကယ် အခက်အခဲဖြစ်နေတဲ့ သတင်းသမားတွေကို ထောက်ပံ့ပေးစေချင် တယ်” ဟု ပြောသည်။   IPCM မှ အရေးပေါ် အကူအညီပေးမည့် အစီအစဉ်ထဲတွင် သတင်းသမား တစ်ဦးချင်းအတွက် ပြည်တွင်း ပြည်ပ ရွှေ့ပြောင်းနေထိုင်မှု ကုန်ကျစရိတ် ကူညီထောက်ပံ့ခြင်းနှင့်  နိုင်ငံပြင်ပတွင် တရားဝင် နေထိုင်ခွင့် အထောက် အထားရရှိရန် ကူညီထောက်ပံ့ပေးခြင်းတို့ ပါဝင်သည်။   ပြည်ပရောက် အမျိုးသား သတင်းထောက်တစ်ဦးက “IPCMက ကူညီနေတဲ့ဟာကို ကောင်းတယ်လို့ ကျနော်က တော့ မြင်ပါတယ်။ တကယ့်တကယ် ဒုက္ခရောက်နေတဲ့ သတင်းထောက်တွေကို ရှာဖွေပြီးတော့မှ တတ်နိုင် သလောက် ကူညီပေးပါ။ ကိုယ်နဲ့လက်သင့်ရာ ကိုယ်နဲ့ရင်းနှီးတဲ့ သတင်းထောက်တွေကိုပဲ အဲ့လိုမျိုးဟာတွေကို တော့ ရှောင်ကျဉ် ပေးစေချင်လိုပါတယ်” ဟု ပြောသည်။   လွတ်လပ်သော မြန်မာသတင်းမီဒီယာ ကောင်စီအနေဖြင့် သတင်းသမားများအတွက် အရေးပေါ်အကူအညီ ထောက်ပံ့မှုပေးနိုင်ရန် အတွက် ပံ့ပိုးပေးနိုင်မည့် အစုအဖွဲ့များနှင့် ချိတ်ဆက်ညှိနှိုင်းပြီး ဆက်လက်ကြိုးပမ်း သွားမည်ဟု နန်းဖော့ဂေက ဆက်ပြောသည်။   “ရေရှည်လို့တော့ အပြည်အဝ အာမ မခံရဲသော်လည်း စဉ်ဆက်မပြတ် အကူအညီ ရှာပေးသွားမယ်ပေါ့ နော်။ အတိုင်းအတာ တစ်ခုလောက်ထိပေါ့လေ။ အပြည့်အစုံ တောက်လျှောက် ကူညီတာမျိုး မဟုတ်ဘဲနဲ့ တစ်ကြိမ်စာ တစ်ကြိမ်စာ အဲ့လိုမျိုးပေါ့နော်။ အရေးပေါ် ဆိုကတည်းက အရေးပေါ်လိုလို့ရှိရင် အရေးပေါ် ကူညီ တယ်။ နောက်ဆက်ပြီးတော့လည်း အခက်အခဲတွေကလည်း ရှိနေကြအုံးမှာပဲ ဆိုတော့ IPCM အနေနဲ့ကလည်း ဆက်ပြီးတော့ ကူညီနိုင်ဖို့အတွက်ကိုလည်း ကျန်တဲ့ ပံ့ပိုးပေးနိုင်တဲ့ အစုအဖွဲ့တွေနဲ့လည်း ဆက်လက်ပြီးတော့ ဆွေးနွေးမှုတွေ ချိတ်ဆက်မှုတွေပေါ့နော် ညှိနှိုင်းဆောင်ရွက်မှုတွေလည်း ဆက်လုပ်သွားမှာပါ။”   သတင်းသမားများ အနေဖြင့် mmrsafetysupport.ipcm@protonmail.com အီးမေးလ်ကို ဆက်သွယ် မေးမြန်းစုံစမ်းနိုင်သည် ဟု IPCM က ဩဂုတ်လ ၁၅ရက်နေ့တွင် ထုတ်ပြန်ထားသည်။   အရေးပေါ် အကူအညီထောက်ပံ့မှုကို မြန်မာနိုင်ငံအတွင်း သတင်းမီဒီယာလုပ်ငန်း လုပ်ကိုင်မှုကြောင့် အန္တရာယ် ရှိပြီး နိုင်ငံပြင်ပတွင် နေထိုင်ကြသော သတင်းသမားများ သို့မဟုတ် မီဒီယာလုပ်ငန်းတွင် လုပ်ကိုင်နေသူများ၊ ပြည်တွင်း၌ အရေးပေါ် ရွှေ့ပြောင်းနေထိုင်ရသူ သတင်းသမားများနှင့် မီဒီယာ လုပ်ငန်းတွင် လုပ်ကိုင် နေသူများ သာ ဖြစ်ရမည်ဟု ဆိုသည်။   ကိုယ်ရေးအချက်အလက်တို့ကို တင်ပြနိုင်ရမည် ဖြစ်ပြီး အရေးပေါ် ကူညီထောက်ပံ့ခြင်း လျှောက်လွှာများကို IPCM ၏ အလုပ်အမှုဆောင် ကော်မတီအဖွဲ့ဝင်များ၊ လွတ်လပ်သော သတင်းမီဒီယာ ပညာရှင်များပါဝင်သည့် ကော်မတီမှ စိစစ်ဆုံးဖြတ်ကာ အရေးပေါ် ထောက်ပံ့မှုပေးသွားမည်ဟု ဆိုသည်။

ခက်ခဲသော သတင်းသမားများအား IPCM ကူညီမည်

ခက်ခဲသော သတင်းသမားများအား IPCM ကူညီမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  စစ်ကော်မရှင်၏ မတရားဖိနှိပ်မှုများကြောင့် အခက်အခဲမျ…

  • August 27, 2025
ရွေးကောက်ပွဲကို တော်လှန်ရေး နယ်မြေများတွင် လုပ်ခွင့် ပြုမည်မဟုတ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၇ ရက်။   စစ်ကော်မရှင်က ကျင်းပရန် လုပ်နေသည့် ရွေးကောက်ပွဲကို တော်လှန်ရေးတပ်ဖွဲ့များ ထိန်းချုပ်ထားသည့် ဒေသများထဲ၌ လုပ်ခွင့်ပြုမှာ မဟုတ်ဘူးဟု တော်လှန်ရေးအင်အားစုများက ပြောဆိုလိုက်သည်။   ပြည်သူလူထု၏ သဘောဆန္ဒမပါဘဲ စစ်ကော်မရှင်က ကျင်းပပြုလုပ်မည့် ရွေးကောက်ပွဲကို အတွေးအခေါ် အရ ဖြစ်စေ လုပ်ဟန်အရဖြစ်စေ ပြတ်ပြတ်သားသား ဆန့်ကျင်သည်ဟု ကယန်းအမျိုးသား တပ်မတော် KNA က ဩဂုတ်လ ၂၀ ရက်နေ့မှာ ထုတ်ပြန်သည်။   ကယန်းအမျိုးသား တပ်မတော် (KNA) ၏ နိုင်ငံရေး ဦး ဆောင်ကော်မတီ ခွန်းရဲခေါင် “ဒီမိုကရေစီမရှိဘဲ လုပ်တဲ့ ရွေး ကောက်ပွဲဆိုတာ စစ်အာဏာရှင်ဟာ စစ်အာဏာသက်စွန်းရှည်ဖို့အတွက် ဆောင်ရွက်တဲ့ လုပ်ဆောင်ချက်ပဲ ဖြစ်ပါတယ်။ ကျနော်တို့ ကယန်းအမျိုးသား တပ်မတော်အနေနဲ့ အတွေးအခေါ်အရရော ရပ်တည်ချက်အရရော နည်းနာအရရော တစ်ခုမှ ကျနော်တို့မထောက်ခံနိုင်ပါဘူး။ အသိအမှတ် မပြုနိုင်ပါဘူး။ ကျနော်တို့ စိုးမိုးထားတဲ့ နယ်မြေတွေမှာကတော့ စစ်‌ကောင်စီရွေးကောက်ပွဲက ဖြစ်မှာမဟုတ်ဘူး။ ဖြစ်တာကိုလည်း ကျနော်တို့က ခွင့်ပြု မှာ မဟုတ်ပါဘူး” ဟု ပြောသည်။   ကရင်အမျိုးသား အစည်းအရုံး KNU၊ အာရက္ခတပ်တော် AA၊ ကချင်လွတ်လပ်ရေး တပ်မတော် KIA နှင့် ကရင်နီ အမျိုးသားတိုး တက်ရေးပါတီ KNPP စသည့် တိုင်းရင်းသား တော်လှန်ရေးအဖွဲ့များ အပါအဝင် နွေဦးတော်လှန် ရေး အင်အားစုများက စစ်ကော်မရှင်က လုပ်မည့် တရားမဝင်ရွေးကောက်ပွဲကို လက်မခံကြောင်း တရားဝင် ပြောဆိုထားကြပြီး ဖြစ်သည်။   ထို့အပြင် စစ်ကော်မရှင်၏ ရွေးကောက်ပွဲက ပြည်တွင်း ပဋိပက္ခကို ပိုမိုကြီးထွားလာစေနိုင်သည် ဟု အမျိုးသမီး များ အဖွဲ့ချုပ် (မြန်မာနိုင်ငံ) WLB အထွေထွေအတွင်းရေးမှူး နာင်းမို့မို့ က ပြောသည်။   “ဒီရွေးကောက်ပွဲက ကျမတို့ နိုင်ငံရဲ့ လက်ရှိဖြစ်နေတဲ့ ပဋိပက္ခရော အရင်ကရော နှစ်ပေါင်းများစွာ ဖြစ်နေတဲ့ ပြည်တွင်း လက်နက်ကိုင် ပဋိပက္ခတွေကို ကျော်လွှားနိုင်မယ့် ရွေးကောက်ပွဲ မဟုတ်နေဘူး။  ဒီရွေးကောက်ပွဲက ဒီပဋိပက္ခတွေကို အဖြေရှာ တဲ့ နည်းလမ်း မဟုတ်နေဘူးပေါ့နော်။ ဆိုတော့ ဒီရွေးကောက်ပွဲကို လုပ်ခြင်းအား ဖြင့် ပိုလို့တောင်မှ ပဋိပက္ခတွေ တိုးနိုင်တယ်။ ကျမတို့ရဲ့ ဒီနိုင်ငံရေး မတည်ငြိမ်မှုတွေ သတ်မှုဖြတ်မှုတွေက ပိုများ လာနိုင်တဲ့ ရွေးကောက်ပွဲ ဖြစ်တယ်ပေါ့နော်။ အဲ့ကြောင့်မို့လို့ ဒီရွေးကောက်ပွဲက လုံးဝ ကျင်းပလို့ မဖြစ်ဘူး။“   စစ်ကော်မရှင်က ရွေးကောက်ပွဲကို ဟန်ပြပဲ လုပ်ခြင်းသာဖြစ်ပြီး ၎င်းတို့ အာဏာတည်မြဲရေးနှင့် ပြည်သူလူထု အပေါ် ကျူးလွန်နေသည့် စစ်ရာဇဝတ်မှုများမှ ပြစ်ဒဏ်ကင်းလွတ်ခွင့်ရရေးအတွက် ကြိုးပမ်းနေခြင်း ဖြစ်သည်ဟုလည်း အမျိုးသား ညီညွတ်ရေး အစိုးရ (NUG) က ဆိုသည်.   ထို့ကြောင့် တော်လှန်ရေးအင်အားစုများ အနေဖြင့် စုစည်းညီညွတ်စွာဖြင့် ဆန့်ကျင်ကြဖို့ NUG ဝန်ကြီးချုပ်ရုံး ပြောခွင့်ရ ဦးနေဘုန်းလတ်က တိုက်တွန်းထားသည်။   ဦးနေဘုန်းလတ်က “၂၀၂၀ ရွေးကောက် ပွဲ ရလဒ်အရ ပေါ်ပေါက်လာတဲ့ ပြည်ထောင်စု လွှတ်တော် ကိုယ်စားပြု ကော်မတီဟာ ၂၀၂၁ခုနစ် မတ်လ ၃၀ ရက်နေ့မှာ ၂၀၀၈ ဖွဲ့စည်းပုံအခြေခံဥပဒေကို ပယ်ဖျက်ကြောင်း ကြေညာ ခဲ့ပြီ ဖြစ်တာကြောင့် ဒီအခြေခံ ဥပဒေ အောက်ကနေ လုပ်ဆောင်လျှက်ရှိတဲ့ တရားမဝင် အတုအယောင် ရွေး ကောက်ပွဲ အပါအဝင် အကြမ်းဖက် စစ်အုပ်စုရဲ့ လုပ်ရပ်မှန်သမျှဟာ တရားဝင်မှုမရှိတဲ့ ဥပဒေမဲ့ လုပ်ရပ်တွေ သာဖြစ်တယ်” ဟု ပြောသည်။   စစ်ရာဇဝတ်မှုကို အကြိမ်ကြိမ် ကျူးလွန်နေပြီး ပြည်သူလူထု အပေါ် လက်နက်အားကိုးနှင့် နေ့စဉ်ရက်ဆက် သတ်ဖြတ်နေသည့် စစ်ကော်မရှင်က ကျင်းပမည့် ရွေကောက်ပွဲက စစ်အာဏာရှင်စနစ် သက်ဆိုးရှည်ရေး အတွက်သာ ဖြစ်သောကြောင့် အားလုံး ဆန့်ကျင်ကြဖို့ကိုလည်း KNA က တိုက်တွန်းထားသည်။   ခွန်းရဲခေါင်က “စစ်ကောင်စီလုပ်တဲ့ ရွေးကောက်ပွဲကို လက်နက်ကိုင်တဲ့နည်းနဲ့ဖြစ်စေ လက်နက်မကိုင်ဘဲ အာဏာဖီဆန်ရေး No Vote  မဲမပေးရေး လှုပ်ရှားမှုနဲ့ဖြစ်စေ ဒီလှုပ်ရှားမှုတွေ အားလုံးကိုပေါင်းစပ်ပြီး စစ် အာဏာရှင် သက်စွန်းရှည်ရေးဆောင်ရွက်တဲ့ ရွေးကောက်ပွဲကို ဝိုင်းဝန်းဆန့်ကျင်သွားဖို့ ပြောချင်ပါတယ်” ဟု ပြောသည်။   စစ်ကော်မရှင်က လာမည့် ဒီဇင်ဘာလ ၂၈ ရက်နေ့တွင် ရွေးကောက်ပွဲ ကျင်းပပြုလုပ်သွားမည်ဟု တရားဝင် ကြေညာထားပြီး ဖြစ်သည်။   အဆိုပါ ရွေးကောက်ပွဲ အပိုင်း(၁) မြို့နယ် (၁၀၂) မြို့နယ်၌ ကျင်းပမှာ ဖြစ်သည်ဟု စစ်ကော်မရှင်က ဖွဲ့ထားပေး သော ပြည်ထောင်စု ရွေးကောက်ပွဲ ကော်မရှင်က ဩဂုတ်လ ၂၀ ရက်နေ့တွင် ထုတ်ပြန် ကြေညာထားသည်။   ကချင်ပြည်တွင် ၆ မြို့နယ်၊ ကယား (ကရင်နီ)နှင့် ချင်းပြည်တွင် ၂ မြို့နယ်စီ၊ ကရင်ပြည်နှင့် ရခိုင်ပြည်တို့တွင် ၃ မြို့နယ်စီ၊ ရန်ကုန်တိုင်း၊ စစ်ကိုင်းတိုင်းနှင့် ရှမ်းပြည်ထဲတွင် ၁၂ မြို့နယ်စီ၊ တနင်္သာရီတိုင်း၌ ၄ မြို့နယ်၊   မကွေးတွင် ၉ မြို့နယ်၊ မန္တလေးတိုင်း၊ ပဲခူးတိုင်း၊ ဧရာဝတီတိုင်းနှင့် နေပြည်တော်တို့၌ ၈ မြို့နယ်စီနှင့် မွန်ပြည်တွင် ၅ မြို့နယ် ရွေးကောက်ပွဲ လုပ်သွားမည်ဟု ထုတ်ပြန်ထားသည်။   ဓါတ်ပုံ - AFP

ရွေးကောက်ပွဲကို တော်လှန်ရေး နယ်မြေများတွင် လုပ်ခွင့် ပြုမည်မဟုတ်

ရွေးကောက်ပွဲကို တော်လှန်ရေး နယ်မြေများတွင် လုပ်ခွင့် ပြုမည်မဟုတ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၇ ရက်။  စစ်ကော်မရှင်က ကျင်း…

  • August 27, 2025
×Close