သတင်း

အစ္စရေးက အရန် တပ်ဖွဲ့ဝင် ၆၀,၀၀၀ ကို စစ်မှုထမ်းရန် ဆင့်ခေါ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဩဂုတ်လ ၂၂ ရက်။ အရှေ့အလယ်ပိုင်း ဂါဇာကမ်းမြောင်ဒေသတွင် အစ္စရေးနဲ့ ဟားမတ်စ်တို့အကြား တိုက်ပွဲများ ဆက်လက်ဖြစ်ပွားနေပြီး အစ္စရေး နိုင်ငံက အရန် တပ်ဖွဲ့ဝင် ၆၀,၀၀၀ အားစစ်မှုထမ်းရန် ဆင့်ခေါ်ခဲ့သည်။ အစ္စရေးဝန်ကြီးချုပ် Benjamin Netanyahu (ဘင်ဂျမင် နက်တန်ယာဟု) က ဟားမတ်စ်အဖွဲ့၏ စစ်ရေးစွမ်းရည်များ အပြီးသတ်ဖျက်ဆီးနိုင်ရန်နှင့် အစ္စရေးလူမျိုးများ၏ လုံခြုံရေးကို အပြည့်အဝ အာမခံနိုင်စေရန် စစ်ပွဲကို ဆက်လက်ဆင်နွှဲသွားမည်ဟု ပြောလိုက်သည်။ ထို့အပြင် ဂါဇာမြို့တော်သိမ်းပိုက်ရေးအတွက် မကြာမီမှာ ခွင့်ပြုချက်ပေးမည်ဟု လည်း ဆိုလိုက်သည်။ ဟားမတ်စ်အဖွဲ့ကလည်း အစ္စရေး၏ တိုက်ခိုက်မှုများကို ပြင်းထန်စွာ တုံ့ပြန်သွားမည်ဟုလည်း ကြေညာထားသည်။ ဟားမတ်စ်ခေါင်းဆောင်များက အစ္စရေး၏ လုံခြုံရေးဆိုင်ရာ ပြောဆိုချက်များသည် ဂါဇာဒေသကို အပြည့်အဝ ထိန်းချုပ်ရန် ကြိုးစားနေခြင်း ဖြစ်သည်ဟု ပြောပြီး ပါလက်စတိုင်းပြည်သူတွေအနေဖြင့် နယ်မြေများကို ကာကွယ်သွားမည်ဟု ပြောသည်။ အမေရိကန်နှင့် အီဂျစ်အပါအဝင် နိုင်ငံတကာအသိုင်းအဝိုင်းက ငြိမ်းချမ်းရေးရရှိရန် ကြိုးပမ်းနေသော်လည်း သိသာထင်ရှားသည့်  အပစ်အခတ်ရပ်စဲရေး အလားအလာ မရှိသေးဟု အကဲခတ်များက ပြောသည်။ အစ္စရေးဘက်ကတော့ ဓါးစာခံများ အားလုံး လွှတ်ပေးပြီး အစ္စရေးက တောင်းဆိုထားသည့် အခြေအနေများကို လက်ခံမည်ဆိုပါက အပစ်အခတ် ရပ်စဲမည်ဟု ဆိုသည်။ လက်ရှိအခြေအနေတွင် ဂါဇာဒေသခံပြည်သူများအနေဖြင့် လူသားချင်းစာနာမှုဆိုင်ရာ အကူအညီများ အရေးပေါ်လိုအပ်နေပြီး နိုင်ငံတကာကလည်း ပဋိပက္ခကို အမြန်ဆုံး အဆုံးသတ်နိုင်ရန် မျှော်လင့်နေကြသည်။

အစ္စရေးက အရန် တပ်ဖွဲ့ဝင် ၆၀,၀၀၀ ကို စစ်မှုထမ်းရန် ဆင့်ခေါ်

အစ္စရေးက အရန် တပ်ဖွဲ့ဝင် ၆၀,၀၀၀ ကို စစ်မှုထမ်းရန် ဆင့်ခေါ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၂ ရက်။  အရှေ့အလယ်ပိုင်း ဂါဇာကမ်းမ…

  • August 22, 2025
ဂျာမဏီက မြေရှားပြန်လည်သန့်စင်ရေး တိုးမြှင့် လုပ်မည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   တရုတ်နိုင်ငံ၏ မဟာဗျူဟာမြောက် မြေရှားသတ္တု ပိုင်ဆိုင်မှုကို စိန်ခေါ်ရန် ကြိုးပမ်းချက် တစ်ခု ထပ်မံ ပေါ်ထွက်လာခဲ့သည်။   ဂျာမဏီနိုင်ငံ Bitterfeld မြို့သည် ဥရောပအတွက် မြေရှားသတ္တု ပြန်လည် သန့်စင် ထုတ်လုပ်ရေး လုပ်ငန်း လုပ်ဆောင်ရန် တွန်းအားပေးခံရသည့် မြို့ ဖြစ်လာသည်။   ယခင်က အရှေ့ဂျာမဏီက မြို့ငယ်လေး ဖြစ်သော Bitterfeld မြို့ သည် ဘာလင်မြို့၏ အနောက်တောင်ဘက် ၈၆ မိုင် အကွာတွင် တည်ရှိသည်။   ထိုမြို့လေးတွင် စွန့်ပစ်ပစ္စည်းများမှ မြေရှားသတ္တုကို ပြန်လည် သန့်စင်သည့် လုပ်ငန်းကို ၂၀၂၄ ခုနှစ်တွင် စတင်ခဲ့သည်။   မိသားစု လုပ်ငန်း ဖြစ်သော ဂျာမန် နည်းပညာအုပ်စု Heraeus က အဆိုပါ စက်ရုံကို စတင်ခဲ့သည်။ စတင်ဖွင့်လှစ်ချိန်တွင် ဥရောပရှိ အကြီးဆုံး မြေရှား ပြန်လည် သန့်စင်ရေး လုပ်ငန်း ဖြစ်ခဲ့သည်။   စက်ရုံက တစ်နှစ်ကို မြေရှား တန် ၆၀၀ ထုတ်လုပ်ရန် မူလက ရည်ရွယ်ထားခဲ့သော်လည်း မကြာမီက တစ်နှစ်ကို တန်ချိန် ၁၂၀၀ ထုတ်လုပ်နိုင်အောင် အစီအစဉ်များ ရေးဆွဲလာကြသည်။   ဂျာမဏီနိုင်ငံ၏ ကားလုပ်ငန်း၊ စက်မှုနှင့် စိုက်ပျိုးရေး အင်ဂျင်နီယာလုပ်ငန်း၊ စွမ်းအင်နှင့် ကာကွယ်ရေး ကဏ္ဍ များသည် ပြည်ပမှ တင်ပို့သော မြေရှား သတ္တုကို မှီခိုနေကြရသည်။   ၂၀၃၀ ခုနှစ်တွင် ဥရောပသည် လိုအပ်သော မြေရှား ကုန်ကြမ်း၏ ၁၀ ရာခိုင်နှုန်းကို တူးဖော်ထုတ်လုပ်ပြီး သန့်စင်မှုကို ၄၀ ရာခိုင်နှုန်း လုပ်ဆောင်ကာ ပြန်လည် သန့်စင် အသုံးပြုမှုကို ၂၅ နှုန်း ရှိအောင် လျာထားချက် ချမှတ်ထားသည်။

ဂျာမဏီက မြေရှားပြန်လည်သန့်စင်ရေး တိုးမြှင့် လုပ်မည် 

ဂျာမဏီက မြေရှားပြန်လည်သန့်စင်ရေး တိုးမြှင့် လုပ်မည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရက်။  တရုတ်နိုင်ငံ၏ မဟာဗျူဟာမြောက် မြေရှားသ…

  • August 21, 2025
တရုတ်နိုင်ငံက ခေတ်သစ်စစ်ပွဲအတွက် သုံးစွဲနိုင်မည့် ပြည်တွင်းဖြစ် လက်နက်များ ပြသမည် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   တရုတ်နိုင်ငံသည် လာမည့် စက်တင်ဘာလတွင် ပြုလုပ်မည့် စစ်ရေးပြ အခမ်းအနားတွင် ပြည်သူ့ လွတ်မြောက် ရေး တပ်မတော် PLA ၏ ခေတ်မီ လက်နက်များကို ထုတ်ပြမည်ဟု ကြေညာလိုက်သည်။   လက်နက်များအားလုံးသည် တရုတ်ပြည်တွင်း ထုတ်များသာ ဖြစ်မည်ဟု ဆိုသည်။   ၂၀၁၉ ခုနှစ် အမျိုးသားနေ့တွင် လုပ်ခဲ့သည့် စစ်ရေးပြ အခမ်းအနား နောက်ပိုင်း ထုတ်လုပ်သည့် ခေတ်မီ မျိုးဆက်သစ် လက်နက်များကို ပြသသွားမည်ဟု စစ်ရေးပြ အခမ်းအနား ကျင်းပရေးရုံးမှ ဗိုလ်ချုပ် Wu Zeke က ပြောသည်။   မျိုးဆက်သစ် လက်နက်များထဲ ထူးထူးခြားခြား ပါဝင်မည့် လက်နက်များကိုလည်း ပွဲကျင်းပရေး ဆိုင်ရာ ဗိုလ်ချုပ်ဝူက ပြောပြထားသည်။   ပထမ အဆင့်တွင် တင့်ကား အသစ်များ၊ လေယာဉ်တင် သင်္ဘောတွင် သုံးနိုင်သည့် လေယာဉ်များ၊ တိုက်လေယာဉ်များ ပါဝင်မည်ဟု ဆိုသည်။   ဒုတိယအနေဖြင့် လူမပါသည့် လက်နက်များနှင့် ဉာဏ်ရည်မြင့် နည်းပညာသုံး လက်နက်ပစ္စည်းများ ဖြစ်သည့် မောင်းသူမဲ့ လေယာဉ်များ၊ တန်ပြန်တိုက်ခိုက်ရေး ဒရုန်းများနှင့် အီလက်ထရောနစ် လက်နက်များ ပါဝင်သည်ဟု ဆိုသည်။   ဒရုန်း အသစ်များ၊ အီလက်ထရောနစ် ဂျမ်မာများ ပါဝင်ပြီး ခေတ်သစ်စစ်ပွဲများ အတွက် တရုတ်၏ စွမ်းဆောင် ရည်ကို ပြသမည်ဟု ဆိုသည်။   တတိယ အမျိုးအစားများထဲတွင် အသံထက် မြန်သည့် ဒုံးကျည်များ၊ သင်္ဘောဖျက် လက်နက်များ၊ လေကြောင်း ကာကွယ်ရေး စနစ်များနှင့် ဒုံးကျည်ကာကွယ်ရေး စနစ်များ ပါဝင်မည်ဟု ဆိုသည်။   ဒီ စစ်ရေးပြ အခမ်းအနားကို ဒုတိယကမ္ဘာစစ် ဂျပန်စစ်တပ် လက်နက်ချခြင်း နှစ် ၈၀ မြောက် အခမ်းအနား အနေဖြင့် ပြုလုပ်သွားမည်ဟု ဆိုသည်။

တရုတ်နိုင်ငံက ခေတ်သစ်စစ်ပွဲအတွက် သုံးစွဲနိုင်မည့် ပြည်တွင်းဖြစ် လက်နက်များ ပြသမည်

တရုတ်နိုင်ငံက ခေတ်သစ်စစ်ပွဲအတွက် သုံးစွဲနိုင်မည့် ပြည်တွင်းဖြစ် လက်နက်များ ပြသမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရက်။ တရုတ်နို…

  • August 21, 2025
မြောက်ကိုရီးယားကို အမေရိကန်မှ လက်နက်ခိုးပို့သည့် တရုတ်နိုင်ငံသား ထောင် ၈ နှစ်ကျ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   အမေရိကန် ပြည်ထောင်စုမှ မြောက်ကိုရီးယားနိုင်ငံသို့ လက်နက်များ တရားမဝင် ပို့ဆောင်မှုဖြင့် တရုတ်နိုင်ငံ သား တစ်ဦးကို ထောင်ဒဏ် ၈ နှစ် ချမှတ်လိုက်သည်ဟု အမေရိကန် တရားရေးဌာနက ပြောသည်။   အသက် ၄၂ နှစ် အရွယ် Shenghua Wen က ကယ်လီဖိုးနီးယားမှ ပစ္စည်းများ ပို့ပေးခဲ့သည့်အတွက် မြောက်ကိုရီးယား အရာရှိများဆီမှ အမေရိကန် ဒေါ်လာ ၂ သန်းရခဲ့သည်ဟု ဆိုသည်။   ကယ်လီဖိုးနီးယား ပြည်နယ် အွန်တာရီယိုတွင် နေထိုင်သည့် မစ္စတာ Wen ကို နိုင်ငံတကာ စွမ်းအင် စီးပွားရေး ပါဝါ အက်ဥပဒေ နှင့် နိုင်ငံခြား အစိုးရ၏ တရားမဝင် အေးဂျင့် အဖြစ် လုပ်ဆောင်မှုများနှင့် အမိန့်ချခဲ့ခြင်း ဖြစ်သည်။   Wen သည် ၂၀၁၂ ခုနှစ်တွင် အမေရိကန်နိုင်ငံကို ကျောင်းသား ဗီဇာနှင့် ဝင်ရောက်ခဲ့ပြီး ၂၀၁၃ ခုနှစ်တွင် ဗီဇာ ကုန်သွားခဲ့သည်။   သို့သော်လည်း Wen သည် ဗီဇာရက်လွန်ဖြင့် အမေရိကန်တွင် ဆက်လက်နေထိုင်ဲခ့ခြင်း ဖြစ်သည်။   တရားရေး အေဂျင်စီ၏ အဆိုအရ မစ္စတာ Wen သည် အမေရိကန် ပြည်ထောင်စုကို မရောက်မှ တရုတ်နိုင်ငံ ရှိ မြောက်ကိုရီးယား သံရုံးက အရာရှိများနှင့် တွေ့ဆုံခဲ့ပြီး ၎င်းအရာရှိများက Wen ကို မြောက်ကိုရီးယား ကိုယ်စား ပစ္စည်းများ ဝယ်ယူဖို့ ညွှန်ကြားခဲ့သည်။   ၂၀၂၂ ခုနှစ် အတွင်း မြောက်ကိုရီးယား အရာရှိ နှစ်ဦးက အွန်လိုင်း စကားပြော ပလက်ဖောင်း တစ်ခုမှ ဆက်သွယ် လာပြီး Wen ကို သေနတ်များနှင့် အခြား ပစ္စည်းများ ခိုးသယ်ပေးရန် ဆက်သွယ်လာခဲ့သည်ဟု အမေရိကန် တရားရေးဌာနက ပြောသည်။   ၂၀၂၃ ခုနှစ် အတွင်း၌လည်း အနည်းဆုံး ကွန်တိန်နာ ၃ လုံးနှင့် အပြည့် ပစ္စည်းများကို တရုတ် ဆိပ်ကမ်း တစ်ခုမှ မြောက်ကိုရီးယားကို ပို့ဆောင်ပေးခဲ့သည်။   Wen က ကွန်တိန်နာတွင်ပါသည့် ပစ္စည်းများကို လွှဲပြောင်းဖော်ပြခဲ့သည်ဟု အမေရိကန် တရားရေးက ဆိုသည်။   ၎င်းက Huston တွင် ရှိသည့် လက်နက် လုပ်ငန်းတစ်ခုကိုလည်း မြောက်ကိုရီးယားက ပိုက်ဆံနှင့် ဝယ်ယူ ခဲ့သေးသည်။   လက်နက်များကို Texas မှ ကယ်လီဖိုးနီးယားကို သယ်ယူပြီး သင်္ဘောနှင့် ပေးပို့ခြင်း ဖြစ်သည်။   လွန်ခဲ့သည့် နှစ် စက်တင်ဘာလ အတွင်းက ၉ မမ ကျည်ဆံ ၆၀,၀၀၀ ကို မြောက်ကိုရီးယားသို့ ပို့ဖို့ ဝယ်ယူခဲ့သည်။   Wen က အပြစ်ကျူးလွန်ကြောင်းကို တရားရုံး၌ ပြီးခဲ့သည့်နှစ် ဇွန်လကတည်းက ဝန်ခံခဲ့ပြီး တရားရုံးက ယခုနှစ် မှာမှ ပြစ်ဒဏ်ချမှတ်ခဲ့ခြင်း ဖြစ်သည်။   မြောက်ကိုရီးယား နိုင်ငံသည် ကုလသမဂ္ဂ လုံခြုံရေး ကောင်စီ ဆုံးဖြတ်ချက်အရ လက်နက်ရောင်းဝယ်မှု ပိတ်ဆို့ ခံထားရသော နိုင်ငံ ဖြစ်ပါတယ်။   အလားတူ အမေရိကန်နိုင်ငံကလည်း ပဲ့ထိန်းဒုံးကျည်များနှင့် ပတ်သက်၍ မြောက်ကိုရီးယားနိုင်ငံကို သီးခြား အရေးယူ ပိတ်ဆို့မှု လုပ်ထားသည်။

မြောက်ကိုရီးယားကို အမေရိကန်မှ လက်နက်ခိုးပို့သည့် တရုတ်နိုင်ငံသား ထောင် ၈ နှစ်ကျ

မြောက်ကိုရီးယားကို အမေရိကန်မှ လက်နက်ခိုးပို့သည့် တရုတ်နိုင်ငံသား ထောင် ၈ နှစ်ကျ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရက်။  အမေရိကန် …

  • August 21, 2025
ဆီဆိုင်တွင် မီးရှို့ဖျက်ဆီးခံရသော နေအိမ် ၁၀၀ ကျော်သွားပြီ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   ရှမ်းပြည်နယ်တောင်ပိုင်း၊ ပအိုဝ်းဒေသ ဆီဆိုင်မြို့နယ်အတွင်း စစ်ကော်မရှင်တပ်နှင့် ပအိုဝ်းပြည်သူ့စစ်အဖွဲ့ (PNO) တို့၏ မီးရှို့ဖျက်ဆီးမှုများကြောင့် ပျက်စီးသွားသည့် နေအိမ်အရေအတွက် ၁၀၀ ကျော်အထိ ရှိသွားပြီ ဖြစ်သည်။   ဆီဆိုင်မြို့နယ်ထဲက တပူးထို၊ နောင်ဘို၊ နောင်ထော် ကျေးရွာတို့က နေအိမ်များကို မီးရှို့ဖျက်ဆီးခဲ့ခြင်း ဖြစ်သည် ဟု ပအိုဝ်းအမျိုးသား လွတ်မြောက်ရေး တပ်မတော် (PNLA) ၏ ပြောခွင့်ရ ဗိုလ်မှူးကြီးခွန်ရိန်းယံက ပြောသည်။   “ဒီ တပူးထိုတွေ၊ နောင်ဘိုတွေ၊ နောင်ထော် ကျေးရွာတွေ အားလုံး စုပေါင်းရင်တော့ မီးရှို့ခံရတဲ့ နေအိမ်က စာရင်း အတိအကျ ပြုစုလို့ မရသေးဘူးဆိုပေမယ့် နေအိမ်ကတော့ ၁၀၀ တော်တော် ကျော်လာပြီလို့ ပြောလို့ ရပါတယ်။ ခန့်မှန်းခြေကတော့ မီးရှို့ခံရတဲ့ အိမ်တွေက ၁၀၀ ကျော်နေပြီ ဖြစ်ပါတယ်။”   ဩဂုတ်လ ၆ ရက်နေ့မှ စတင်ကာ ထိုးစစ်ဆင်လာသော ပအိုဝ်းပြည်သူ့စစ်အဖွဲ့ PNO နှင့် စစ်ကော်မရှင်တပ် သည် အဆိုပါ ကျေးရွာများ အတွင်းသို့ ဝင်ရောက် မီးရှို့ချိန်တွင် ပြည်သူလူထု၏ နေအိမ်များ အတွင်းမှ တန်ဖိုးရှိ ပစ္စည်းများကိုလည်း ကားများဖြင့် သယ်သွားကြသည်ဟု ဆိုသည်။   ထိုသို့ အဖိုးတန်ပစ္စည်းများကို သယ်ပြီးသွားမှသာ နေအိမ်များကို မီးရှို့ဖျက်ဆီးခဲ့ခြင်း ဖြစ်သည်ဟု ဗိုလ်မှူးကြီး ခွန်ရိန်းယံက ပြောသည်။   “ကျေးရွာထဲမှာ တိုက်ပွဲဖြစ်ပွားမှု မရှိဘဲနဲ့ သူတို့ပဲ ဝင်ရှို့လာတာပေါ့လေ။ အဓိကကတော့ ပြည်သူလူထုတွေရဲ့ ပစ္စည်းတွေကို သူတို့ ယူတယ်။ ကားတွေနဲ့ အခေါက်ခေါက်အခါ သယ်တယ်။ ပြီးတော့မှ အိမ်ကိုမီးရှို့တယ်ဆိုတဲ့ ပုံစံမျိုးကို တွေ့နေရတယ်။”   တပူးထိုကျေးရွာမှာ ယခင်ကလည်း သုံး-လေးကြိမ် ထက်မက မီးရှို့ခံထားရခြင်း ဖြစ်ပြီး၊ စစ်ကော်မရှင်တပ်နှင့် PNO ပူးပေါင်းတပ်တို့က ယခုလထဲတွင်လည်း နေ့စဉ် တစ်အိမ်ပြီး တစ်အိမ် ဆက်တိုက် မီးရှို့နေခြင်း ဖြစ်သည်ဟု ဆိုသည်။   လက်ရှိတွင် PNO နှင့် စစ်ကော်မရှင်တပ်တို့၏ လုပ်ရပ်များကြောင့် ဒေသခံပြည်သူ ၂,၀၀၀ ကျော် မှာ နေရပ်မှ စွန့်ခွာထွက်ပြေးနေရပြီး စားနပ်ရိက္ခာ၊ ဆေးဝါးနှင့် အမိုးအကာများ အရေးပေါ်လိုအပ်ကြဟု အကူအညီ ပေးနေ သူများက ပြောသည်။   ဩဂုတ်လ ၆ ရက်နေ့မှ စတင်ကာ အင်အား ၁,၀၀၀ ကျော်ဖြင့် ထိုးစစ်ဆင်လာသော စစ်ကော်မရှင်တပ်နှင့် ပအိုဝ်းပြည်သူ့စစ် ပူးပေါင်းတပ်တို့သည် နောင်ထောဝ်ကျေးရွာရှိ ကယန်းပိုင်းရပ်ကွက်နှင့် နောင် ထောဝ်ကုလားလမ်း ကျေးရွာတို့မှ နေအိမ် ၂၄ လုံးထက်မနည်းကိုလည်း  မီးရှို့ဖျက်ဆီးခံခဲ့သေးသည်။   ထို့အပြင် စလောင်းထောင်ကျေးရွာမှ အသက် ၃၈ နှစ်အရွယ် အမျိုးသားတစ်ဦးလည်း ပစ်သတ်သွားခဲ့သည်ဟု PNLA က သြဂုတ်လ ၁၃ ရက်နေ့တွင် ထုတ်ပြန်ထားသည်။

ဆီဆိုင်တွင် မီးရှို့ဖျက်ဆီးခံရသော နေအိမ် ၁၀၀ ကျော်သွားပြီ

ဆီဆိုင်တွင် မီးရှို့ဖျက်ဆီးခံရသော နေအိမ် ၁၀၀ ကျော်သွားပြီ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရက်။  ရှမ်းပြည်နယ်တောင်ပိုင်း၊ ပအိုဝ်…

  • August 21, 2025
ဝက်လက်နှင့် စစ်ကိုင်း မြို့နယ် အစပ်ကို စစ်ကော်မရှင် စစ်ကြောင်းထိုး၊ လေကြောင်းတိုက်ခိုက်မှု လုပ်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   စစ်ကိုင်းတိုင်းဒေသကြီးထဲရှိ ဝက်လက်နှင့် စစ်ကိုင်းမြို့နယ်အစပ်ကို စစ်ကော်မရှင်တပ်က မြေပြင်မှ စစ်ကြောင်းများထိုးနေသည့် အပြင် လေကြောင်း တိုက်ခိုက်မှုများ ဆက်တိုက် လုပ်နေသည်ဟု မြေပြင် သတင်းအရင်းအမြစ်များက ပြောသည်။   ဝက်လက်နှင့် စစ်ကိုင်းမြို့နယ်အစပ်တွင် စစ်တပ်က စစ်ကြောင်းထိုးနေသည်မှာ တစ်လခန့် ကြာလာပြီ ဖြစ်သည့် အပြင် ယခုရက်ပိုင်းတွင် လေကြောင်းအသုံးပြု တိုက်ခိုက်မှုများ ဆက်တိုက်လုပ်နေသည်ဟု ဆိုသည်။    “သူတို့က နေ့စဥ် ရက်ဆက်ပဲ ရက်တောင် မခြားဘူး။ တိုက်ပွဲဖြစ်တဲ့ နေရာတွေ ပစ်တယ်။ တိုက်ပွဲမဖြစ်တဲ့ ကျေးရွာတွေလည်း ပတ်ပစ်တယ်။ ထိခိုက် မှုတွေလည်း ရှိတယ်။ သေဆုံးမှုတွေလည်း ရှိတယ်။ ဝက်လက်မှာတော့ ထိခိုက်ဒဏ်ရာရကြတာ။ စစ်ကိုင်းမှာ တော့ သေဆုံးမှုတွေပါ ရှိနေတာ” ဟု ဝက်လက် သတင်း ကွန်ရက် (Wetlet Informational Network) အဖွဲ့မှ တာဝန်ရှိသူတစ်ဦးက ပြောသည်။   ပြီးခဲ့သည့် ဇူလိုင်လ ၁၇ ရက်နေ့က ဧရာဝတီမြစ်ကြောင်းအတိုင်း စစ်သင်္ဘောများ ဆန်တက်ပြီးချိန်မှ စတင်ကာ စစ်ကော်မရှင်တပ်၏ မြေပြင်စစ်ကြောင်းများ လှုပ်ရှားလာခြင်း ဖြစ်ပြီး မြစ်ကမ်းဘေးမှ ကျေးရွာများကို နယ်မြေ ရှင်းလင်းရေးပုံစံဖြင့် စစ်ကြောင်းထိုးနေခြင်း ဖြစ်သည်ဟု ဆိုသည်။   ဩဂုတ်လ ၁၁ ရက်နေ့မှ စတင်ကာ စစ်ကိုင်းမြို့နယ်၊ ဝက်လက်မြို့နယ်ရှိ ကျေးရွာများကို နေ့စဥ်မပြတ် လေကြောင်း အသုံးပြု တိုက်ခိုက်နေခြင်းဖြစ်သည်ဟု Wetlet Informational Network အဖွဲ့ တာဝန်ရှိသူက ပြောသည်။   ထို့ပြင် မြေပြင်မှ စစ်တပ် စစ်ကြောင်း မလှုပ်ရှားနိုင်အောင် တော်လှန်ရေး အင်အားစုများက တိုက်ခိုက်သဖြင့် နှစ်ဖက်ကြား မြေပြင်တွင်လည်း အပြန်အလှန် ထိတွေ့မှုများရှိနေသည်ဟု စစ်ရေး သတင်းအရင်းအမြစ်များက ပြောသည်။   စစ်တပ်၏ စစ်ရေး လှုပ်ရှားမှု အခြေအနေနှင့် ပတ်သက်၍ စစ်ရေး သတင်းအရင်းအမြစ် တစ်ဦးက “ကျနော်တို့ သတင်းရတာကတော့ ဧရာဝတီ မြစ်ကမ်းတစ်လျှောက်ကို စစ်ကြောင်း ထိုးမယ်လို့ သတင်းရတယ်။ လက်ရှိ သူ တို့ ထိုးနေတဲ့ ပုံစံကလည်း အဲ့တိုင်းပဲ။ ကားလမ်းပေါ်ကို မတက်ဘဲနဲ့ မြစ်ရိုး တစ်လျှောက်ပဲ ထိုးနေတာဗျ။ မြေ ပြင်တိုက်ပွဲကလည်း မပြင်းထန်ဘူးဗျာ။ မြေပြင်စစ်ကြောင်း မတိုးနိုင်အောင်လောက်ပဲ ကာထားတာ ရှိတယ်။ တစ်ဖက်နဲ့ တစ်ဖက် ပြင်းထန်နေတာမျိုးတော့ မရှိဘူးဗျ” ဟု ပြောသည်။   ထိုစစ်ကော်မရှင် စစ်ကြောင်းမှာ တပ်မ ၃၃ လက်အောက်ခံ တပ်ဖွဲ့များနှင့် ပြည်သူ့စစ်တပ်ဖွဲ့ဝင်များ ပူးပေါင်းကာ အင်အား ၈၀ ကျော်ဖြင့် စစ်ကြောင်းထိုးနေခြင်း ဖြစ်သည်ဟု ဆိုသည်။   ယခု စစ်ရေးလှုပ်ရှားမှု မတိုင်ခင်က အဆိုပါ စစ်ကြောင်းသည် စစ်ကိုင်းမြို့နယ် မင်းကွန်းဘုရား ရှိရာ ဒေသ တစ်ဝိုက်တွင် စစ်ရေးလှုပ်ရှားခဲ့ကြသည်ဟု မြေပြင် သတင်းအရင်းအမြစ်များက ပြောသည်။   ထို့ကြောင့် မြေပြင်စစ်ကြောင်းအပြင် လေကြောင်းအသုံးပြု တိုက်ခိုက်မှု မြင့်တက်လာနေသောကြောင့် ဒေသခံ အရပ်သားများ အနေဖြင့် လေကြောင်းအန္တရာယ်နှင့် ပတ်သက်၍ ကြိုတင်ပြင်ဆင်မှုများ လုပ်ကြရန် ကာကွယ် ရေး တပ်ဖွဲ့များက တိုက်တွန်းထားသည်။   ယခု ဩဂုတ်လ ၁ ရက်နေ့မှ ၁၄ ရက်နေ့အထိ လဝက်အတွင်း မြန်မာနိုင်ငံ တစ်ဝှမ်းရှိ မန္တလေး၊ စစ်ကိုင်း၊ မကွေး၊ ရခိုင် အပါအဝင် အခြား တိုင်းနှင့်ပြည်နယ် ၁၀ ခုတွင် စစ်တပ်၏ လေကြောင်း တိုက်ခိုက်မှုကြောင့် အရပ်သား ၈၆ ဦး သေဆုံးခဲ့ပြီး ၁၆၇ ဦး ဒဏ်ရာရရှိခဲ့သည်ဟု အမျိုးသား ညီညွတ်ရေး အစိုးရ NUG က ထုတ်ပြန်ထား သည်။

ဝက်လက်နှင့် စစ်ကိုင်း မြို့နယ် အစပ်ကို စစ်ကော်မရှင် စစ်ကြောင်းထိုး၊ လေကြောင်းတိုက်ခိုက်မှု လုပ်

ဝက်လက်နှင့် စစ်ကိုင်း မြို့နယ် အစပ်ကို စစ်ကော်မရှင် စစ်ကြောင်းထိုး၊ လေကြောင်းတိုက်ခိုက်မှု လုပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရက…

  • August 21, 2025
စက်တပ်လေထီး တိုက်ခိုက်မှုကြောင့် အဖွားအို တစ်ဦး သေဆုံး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   စက်တပ် လေထီးဖြင့် တိုက်ခိုက်ခံရသဖြင့် အသက် ၇၀ ကျော် အရွယ် အဘွားအို တစ်ဦးသေဆုံးပြီး အခြား တစ်ဦး ခြေထောက် ဖြတ်လိုက်ရသည်ဟု ဒေသခံများက ပြောသည်။   စစ်ကိုင်းတိုင်းဒေသကြီး၊ ဆားလင်းကြီးမြို့နယ်ထဲက မိုးကြိုးပြင်တောင်ကျေးရွာကို စစ်ကော်မရှင်တပ်က ပါရာမော်တာ စက်တပ် လေထီးဖြင့် ပစ်ခတ်ခဲ့သဖြင့် အသက် ၇၀ ကျော် အရွယ် အဘွားတစ်ဦး သေဆုံးခဲ့ရ သည်ဟု ဒေသခံများက ပြောသည်။   ဒေသခံ အမျိုးသမီးတစ်ဦးက “စစ်ရေးအခြေအနေကတော့ ကြေးနီစီမံကိန်းက ဒီရှေ့ရက်တွေမှာ အနောက်ဘက် က ကျေးရွာတွေကို စစ်ကြောင်း ထိုးလာတာတွေ ရှိတယ်။ အဲ့ဒီနောက်မှာ ပါရာမော်တာနဲ့ လာပြီးတော့ ကြဲတာ။ အဘွားအို တစ်ဦးသေတယ်။ တစ်ဦးက ဒဏ်ရာရသွားတာ” ဟု ပြောသည်။   ဩဂုတ်လ ၁၈ ရက်နေ့ မွန်းလွှဲပိုင်း ၂ နာရီဝန်းကျင် အချန်တွင် မုံရွာ အနောက်မြောက်တိုင်း စစ်ဌာနချုပ် (နမခ) မှ တက်လာသော ပါရာမော်တာ စက်တပ် လေထီးဖြင့် တိုက်ခိုက်ခဲ့ခြင်း ဖြစ်ပြီး နောက်ထပ် ဒေသခံ အမျိုးသား တစ်ဦးမှာ ထိခိုက်ဒဏ်ရာကြောင့် ခြေထောက် တစ်ဖက်ဆုံးရှုံးသွားသည်။   သေဆုံးသူ အဘွားသည် အသက် ၇၀ကျော် အရွယ်ရှိပြီ ဖြစ်သည့် ဒေါ်သောင်းခင် ဆိုသူဖြစ်သည်။   ထို့အပြင် မိုးကြိုးပြင်ကျေးရွာ အပါအဝင် ကျေးရွာအချို့က ပြည်သူများမှာ ဩဂုတ်လ ၂၀ ရက်နေ့ အချိန်ထိ ဘေးလွှတ်ရာ နေရာများတွင် တိမ်းရှောင်နေရဆဲ ဖြစ်သည်ဟု ဆိုသည်။   ဆားလင်းကြီးမြို့နယ်ရှိ ဝမ်ပေါင် ကြေးနီစီမံကိန်း လုပ်ကွက်တွင် စစ်ကော်မရှင် တပ်ဖွဲ့များသည် အာဏာ သိမ်းပြီးနောက်ပိုင်းမှ စတင်ကာ ယနေ့အချိန်ထိ နေရာယူထားကြသည်။   ဩဂုတ်လ ၁၆ ရက်နေ့တွင် အဆိုပါ ကင်းယူထားသည့် စစ်ကောင်စီတပ်ဖွဲ့များသည် အင်အား ၄၀ ကျော်ဖြင့် ဝမ်ပေါင် ကြေးနီ စီမံကိန်း၏ အနောက်ဘက်တွင်ရှိသည့် ကျေးရွာအချို့ကို စစ်ကြောင်း ပတ်ထိုးနေခြင်း ဖြစ် သည်ဟု ဒေသခံများက ပြောသည်။   ဒေသခံတစ်ဦးက “ကျနော်တို့ သုံးသပ်မိတာကတော့ အင်အား အများအပြားနဲ့ စစ်ကြောင်း လှုပ်ရှားတာ မဟုတ် တော့ ကိစ္စကြီးငယ် တစ်ခုခုရှိလို့ ဖြစ်ပါလိမ့်မယ်။ ရွေးကောက်ပွဲကြောင့်တော့ မဟုတ်လောက်သေးဘူး။ အင်အားလည်း နည်းတယ် ဆိုတော့လေ။ အကြောင်းရင်း တစ်ခြား တစ်ခု ရှိလို့ထင်တယ်” ဟု ပြောသည်။   ထို့အပြင် စစ်ကြောင်းပတ်ထိုးနေသည့် အဆိုပါ စစ်ကြောင်းမှာ ကျောက်ဖြူတိုင် ကျေးရွာကိုလည်း လက်နက် ကြီးနှင့် ပစ်ခတ် တိုက်ခိုက်ခဲ့သဖြင့် သေဆုံးမှုများရှိသည်ဟု သိရသော်လည်း NMG က သီးခြား  အတည်မပြုနိုင်သေးပါ။   ဩဂုတ်လဆန်း ၃ ရက်နေ့ကလည်း ဆားလင်းကြီးမြို့နယ်၊ အရှေ့ခြမ်းတွင် ရှိသည့် ကျေးရွာအချို့ကို စစ်တပ်က ပါရာမော်တာ စက်တပ် လေထီးဖြင့် ဗုံးကြဲတိုက်ခိုက်ခဲ့သောကြောင့် ဒေသခံများ ထွက်ပြေး တိမ်းရှောင်ခဲ့ရ သေး သည်။   စစ်ကောင်စီတပ်သည် လာမည့် ဒီဇင်ဘာလ ၂၈ ရက်နေ့တွင် ရွေးကောက်ပွဲ ကျင်းပမည်ဟု ထုတ်ပြန်ထားသည့် အပြင် ရွေးကောက်ပွဲ ဖြစ်မြောက်ရေးအတွက် နိုင်ငံတစ်ဝှမ်းရှိ ၎င်းတို့ လက်လွှတ်ထားရသည့် မြို့များ အပါအဝင် တော်လှန်ရေး အင်အားစုများ လှုပ်ရှားရာနေရာများကို သိသိသာသာ ထိုးစစ်များ ဆင်နေခြင်း ဖြစ်သည်။  

စက်တပ်လေထီး တိုက်ခိုက်မှုကြောင့် အဖွားအို တစ်ဦး သေဆုံး

စက်တပ်လေထီး တိုက်ခိုက်မှုကြောင့် အဖွားအို တစ်ဦး သေဆုံး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရက်။  စက်တပ် လေထီးဖြင့် တိုက်ခိုက်ခံရသဖြ…

  • August 21, 2025
ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   ကရင်နီပြည်၊ ဒီးမော့ဆိုမြို့ကို အပြည့်အဝ ပြန်လည်ထိန်းချုပ်နိုင်ပြီ ဖြစ်ကြောင်း စစ်ကော်မရှင်တပ်က ထုတ်ပြန် မှုမှာ ဝါဒဖြန့်ခြင်းသာ ဖြစ်သည်ဟု ကရင်နီတော်လှန်ရေးတပ်ဖွဲ့များက ပြောသည်။   ဒီးမော့ဆိုမြို့ကို ထိန်းချုပ်နိုင်ရေး စစ်ကော်မရှင်တပ်က ကြိုးပမ်းနေဆဲဖြစ်ပြီး မြေပြင်တွင် တိုက်ပွဲများ ပြင်းပြင်း ထန်ထန် ဖြစ်ပွားနေသည်ဟု ဒေသခံ ကာကွယ်ရေး တပ်ဖွဲ့များက ပြောသည်။   ဒီးမော့ဆိုမြို့နယ် ကာကွယ်ရေးတပ်မှ တပ်ဖွဲ့ဝင်တစ်ဦး “တစ်မြို့လုံးကို ထိန်းချုပ်နိုင်တာ မဟုတ်သေးဘူး။ အဓိက မြို့မနေရာကိုပဲ ရထားတာပါ။ ဒီအရှေ့ဘက်ကို တော်တော်ရထားတယ်။ အနောက်ဘက်မှာတော့ ဒေါငံ ခါးကနေ မားနာပလော့ထိ ရထားတယ်” ဟု ပြောသည်။   ‘ရန်နိုင်မင်း’ စစ်ဆင်ရေးအဖြစ် သြဂုတ်လ ၄ ရက်နေ့မှ ၁၉ ရက်နေ့အထိ ထိုးစစ်ဆင်ပြီး နောက် မြို့တစ်ခုလုံးကို ထိန်းချုပ်နိုင်ခဲ့ခြင်း ဖြစ်သည်ဟု စစ်ကော်မရှင်တပ်က ကြေညာခဲ့သည်။   သို့သော် မြေပြင်ရှိ တော်လှန်ရေး တပ်ဖွဲ့များ၏ ပြောပြချက်အရ  မြို့မဧရိယာနှင့် အချို့သော နေရာများကိုသာ ထိန်းချုပ်ထားနိုင်သေးသည်ဟု ဆိုသည်။   ဒီးမော့ဆိုမြို့ အဝင်ဆိုင်းဘုတ်၊ ငွေတောင်ဆည်၊ မြို့နယ်ခန်းမ၊ ဆေးရုံနှင့် အထက်တန်းကျောင်း ရှေ့၌ ရိုက်ထား သော ဓါတ်ပုံများနှင့် အတူ စစ်ကော်မရှင်တပ်က မြို့ကို ထိန်းချုပ်လိုက်ပြီဟု ထုတ်ပြန်လာသည်။   အဆိုပါ ထုတ်ပြန်မှုမှာ ဝါဒဖြန့်ခြင်း သက်သက်သာဖြစ်ကြောင်း၊ သတင်းအမှားသာ ဖြစ်ကြောင်း မြေပြင် ရှိ သတင်းအရင်းအမြစ်များက ပြောသည်။   စစ်ကော်မရှင်တပ်သည် ဒေသအခြေစိုက် ခလရ ၁၀၂ နှင့် ခမရ ၄၂၇ တို့ကို အခြေစိုက်ကာ အင်အား ၃၀၀ ကျော် ဖြင့် ဒီးမော့ဆို အနောက်ဘက်ခြမ်းရှိ ဒေါငံခါးကျေးရွာဘက်သို့ စစ်ကြောင်း နှစ်ကြောင်းဖြင့် ဆက်လက် စစ်ကြောင်းထိုးနေသည်ဟု မြေပြင် သတင်းအရင်းအမြစ်က ပြောသည်။   ထို့အပြင် လေကြောင်း၊ လက်နက်ကြီး၊ တင့်ကားအပြင် အထူးသဖြင့် ဒရုန်းများကို အဓိက အသုံးပြုကာ မြို့ကို ပြန်လည်ရရှိရေး အပြင်းအထန် ကြိုးစားနေသည်ဟု ဒေသတွင်းရှိ ကာကွယ်ရေးတပ်ဖွဲ့များက ဆိုသည်။   စစ်ကော်မရှင်၏ ထုတ်ပြန်ချက်အရ သြဂုတ်လ ၄ ရက်နေ့တွင် ဒီးမော့ဆိုမြို့ မြောက်ဘက်ခြမ်းရှိ ရွှေယောက် ရပ်ကွက်နှင့် အရှေ့တောင်ဘက်ရှိ ပါဒေါဒူကျေးရွာတို့မှ စတင်ထိုးစစ်ဆင်ခဲ့သည်ဟု ဆိုသည်။   ထို့နောက် အောင်မင်္ဂလာ၊ စည်ပင်သာယာရပ်ကွက်များအပါအဝင် မြို့ပေါ်ရှိ ရဲစခန်း၊ ထွေအုပ်ရုံးစသည့် အစိုးရ ရုံးများကို ဆက်တိုက်သိမ်းပိုက်ကာ သြဂုတ်လ ၁၉ ရက်နေ့တွင် မြို့တစ်ခုလုံးကို အလုံးစုံသိမ်းပိုက်နိုင်ပြီဟု ထုတ် ပြန်ခဲ့ခြင်း ဖြစ်သည်။   စစ်ကော်မရှင်တပ်သည် အင်အားအလုံးအရင်းဖြင့် ရှမ်း - ကရင်နီ နယ်စပ်ရှိ မိုးဗြဲမြို့ကို ဇူလိုင်လ ၁၆ ရက်နေ့တွင် ပြန်လည် ထိန်းချုပ်နိုင်ခဲ့ပြီးနောက် ဒီးမော့ဆိုမြို့ကိုလည်း ပြန်လည် ထိန်းချုပ်နိုင်ရေး ကြိုးစားနေခြင်း ဖြစ်သည်။   ကယန်းအမျိုးသား တပ်မတော် (KNA) နိုင်ငံရေး ဦးဆောင်ကော်မတီမှ ခွန်းရဲခေါင်က “လက်နက်ကိုင် တော်လှန် ရေးမှာလည်း ကျနော်တို့ အားကောင်းတဲ့ အချိန်မှာ ရန်သူစိုးမိုးတဲ့ နယ်မြေတွေကို စိုးမိုးသိမ်းပိုက်ထားတာ ရှိ သလို၊ ကျနော်တို့ဘက်က အားနည်းလာတဲ့ အခါမှာ လည်း ရန်သူရဲ့ အလုံးအရင်းနဲ့ ဝိုင်းဝန်း ပိတ်ဆို့ပြီးတော့မှ တိုက်ခိုက်တာ ခံရပါတယ်၊ ဒါဟာ တော်လှန်စစ်ရဲ့ သဘော သဘာဝပဲ ဖြစ်ပါတယ်။ ဒီအတွက်ကြောင့် ရန်သူရဲ့ တိုးချဲ့လာတဲ့အပေါ်မှာ ကျနော်တို့ စစ်ရေးအရ ဘယ်လို တုံ့ပြန်ကြမလဲဆိုတာကို စဉ်းစား တိုင်ပင်ပြီးတော့မှ ရန်သူကို ချေမှုန်းနိုင်တဲ့ နည်းနာတွေကို စုစည်းပြီး ဒါကို ကျနော်တို့ တုံ့ပြန်သွားကြရမှာ ဖြစ်ပါတယ်” ဟု ပြောသည်။   ဖယ်ခုံ၊ မိုးဗြဲ၊ ဒီးမော့ဆိုမြို့တို့ကို ကရင်နီ တော်လှန်ရေး တပ်များက တစ်လေးလုံး စစ်ဆင်ရေးကာလ အတွင်း ထိန်းချုပ်ထားခဲ့ပြီးနောက် ဒေသခံများ နေရပ်သို့ ပြန်လည်နေထိုင်ခဲ့ကြသည်။   သို့သော် လက်ရှိ စစ်တပ်၏ ထိုးစစ်များကြောင့် မိုးဗြဲ၊ ဖယ်ခုံနှင့် ဒီးမော့ဆိုမြို့နယ်တို့ထဲမှ ဒေသခံ တစ်သောင်းခွဲ ကျော်မှာ ထပ်မံ ထွက်ပြေး တိမ်းရှောင်နေကြရသည်ဟု ကရင်နီပြည် ကြားကာလ အုပ်ချုပ်ရေး ကောင်စီ IEC နှင့် အကူtညီပေးနေသော အဖွဲ့အစည်းများက ပြောသည်။   ဒီးမော့ဆိုမြို့ ထိုးစစ်အတွင်း စစ်တပ်က အရပ်သားများကို လူသားဒိုင်းကာ အဖြစ် အသုံးပြုခဲ့ကြောင်း ကရင်နီ အမျိုးသားများ ကာကွယ်ရေးတပ် (KNDF) က သြဂုတ်လ ၁၈ ရက်နေ့တွင် ထုတ်ပြန်ခဲ့ပြီး လွိုင်ကော် - ဒီးမော့ဆို - ဖရူဆို ပြည်ထောင်စုလမ်းမကြီးနှင့် လမ်းသွယ်များကို အသုံးမပြုရန် ပြည်သူများကို သတိပေးထားသည်။   ယခုနှစ်ကုန်တွင် ကျင်းပမည်ဟု ထုတ်ပြန်ထားသော ရွေးကောက်ပွဲအတွက် စစ်ကော်မရှင်တပ်မှ နယ်မြေ စိုးမိုးမှု ပြန်လည်ရယူနေခြင်း ဖြစ်သည်။

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော

ဒီးမော့ဆိုကို စစ်ကော်မရှင်တပ်များ အပြည့်အဝ မထိန်းချုပ်နိုင်သေးဟု ကရင်နီ တော်လှန်ရေး တပ်များ ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရ…

  • August 21, 2025
ဒီးမော့ဆိုနှင့် မော်ချီး ဒေသများကို စစ်ကော်မရှင် ဗုံးကြဲ၊ အရပ်သား ထိခိုက်မှုများရှိ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၁ ရက်။   ကရင်နီပြည်၊ ဒီးမော့ဆိုမြို့နယ်အတွင်းနှင့် ဖားဆောင်းမြို့နယ်တွင်းမှ မော်ချီးဒေသတို့ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်ခဲ့ရာ အရပ်သား ပြည်သူများ ထိမှန်သေဆုံး၊ ဒဏ်ရာ ရရှိခဲ့သည်။   စစ်ကော်မရှင်တပ်က မော်ချီးဒေသထဲကို ဩဂုတ်လ ၂၀ ရက်နေ့၊ နံနက် ၆ နာရီ ဝန်းကျင် အချိန်ခန့်တွင် လေကြောင်းမှ ထပ်မံ ဗုံးကြဲသောကြောင့် အရပ်သား ၁ ဦး သေဆုံးပြီး ၂ ဦး ထိမှန်ဒဏ်ရာရခဲ့သည်ဟု  ကရင်နီပြည် ကြားကာလ အုပ်ချုပ်ရေး ကောင်စီ (IEC) ကပြောသည်။   IEC အတွင်းရေးမှူး -၂ ဦးဗညားက “ဒီမနက် ၆နာရီ မော်ချီး လိုခါးလိုမှာ ဗုံးကြဲတာပေါ့နော်။ Y12 ဗုံးကြဲ လေယာဉ်နဲ့ပေါ့နော် လာကြဲသွားပါတယ်။ အဲ့မှာတော့ တစ်ယောက် သေဆုံးပြီ နှစ်ယောက် ဒဏ်ရာရတယ်။ နေအိမ်တစ်လုံး ထိခိုက်ပျက်စီးတာ တွေ့ရပါတယ်” ဟု ပြောသည်။   မော်ချီးဒေသထဲက လိုခါးလိုကျေးရွာကို Y12 လေယာဉ်ဖြင့် ထပ်မံ ဗုံးကြဲတိုက်ခိုက်ခဲ့ခြင်းဖြစ်သည်ဟု ဦးဗညားက ပြောသည်။   စစ်ကော်မရှင်တပ်သည် တိုက်ပွဲဖြစ်ပွားခြင်း မရှိဘဲ မော်ချီးဒေသကို ဆက်တိုက် လေကြောင်း အသုံးပြု ဗုံးကြဲ တိုက်ခိုက်နေသည်ဟု ဒေသခံများက ပြောသည်။   အလားတူ ဩဂုတ်လ ၂၀ ရက်နေ့ တစ်နေ့တည်း၌ပင် ဒီးမော့ဆိုမြို့နယ် အနောက်ခြမ်းက နေရာတစ်နေရာလည်း လေကြောင်းမှ ဗုံးကြဲတိုက်ခိုက်ခံခဲ့ရသေးသည်။   ဦးဗညားက “ဒီးမော့ဆို အနောက်ခြမ်းကိုတော့ ၁၁ နာရီ ဝန်းကျင်လောက်မှာတော့ ဗုံးလာကြဲသွားပါတယ်“ ဟု ပြောသည်။   ဒီးမော့ဆိုမြို့နယ်ထဲတွင် မြေပြင်၌လည်း စစ်ကော်မရှင်တပ်နှင့် ကရင်နီ တော်လှန်ရေး အင်အားစုများအကြား တိုက်ပွဲများ ပြင်းပြင်းထန်ထန် ဖြစ်ပွားလျှက်ရှိသည်။   တိုက်ပွဲများ ဖြစ်နေသောကြောင့် ဒီးမော့ဆိုမြို့နယ်ထဲက လွိုင်ကော် - ဒီးမော့ဆို - ဖရူဆို ပြည်ထောင်စု လမ်းမကြီးကို ပြည်သူများ မသွားလာကြရန် ကရင်နီအမျိုးသားများ ကာကွယ်ရေးတပ် KNDF က သတိပေးထား သည်။   စစ်ကော်မရှင်တပ်သည် ကရင်နီပြည်နယ်ထဲ မြေပြင်ထိုးစစ်များ ထိုးနေသည့် အပြင် အရပ်သားများကို ပစ်မှတ်ထားပြီး လေကြောင်းမှ ဗုံးကြဲတိုက်ခိုက်မှုများ ဆက်တိုက်ဗုံးကြဲ တိုက်ခိုက်နေသောကြောင့် အရပ်သားပြည်သူများ အစုလိုက်အပြုံလိုက် သေဆုံးမှုများ ရှိနေသည်။   မော်ချီးဒေသထဲက လိုခါးလိုကျေးရွာကို ဩဂုတ်လ ၁၉ ရက်နေ့က စစ်တပ်က Y12 လေယာဉ်ဖြင့် ဗုံးကြဲ တိုက်ခိုက်မှုကြောင့်  ဒေသခံပြည်သူ ၃ ဦး ထိမှန် ဒဏ်ရာရရှိခဲ့သည်။   အလားတူ ဩဂုတ်လ ၁၇ ရက်နေ့ကလည်း  မော်ချီးဒေသကို စစ်တပ်က လေ‌ကြောင်းမှ ဗုံးကြဲတိုက်ခိုက်မှု ကြောင့် က လေးငယ် ၅ ဦး အပါအဝင် အရပ်သား ၃၂ ဦး သေဆုံးခဲ့ကာ ၅ ဦး ထိခိုက်ဒဏ်ရာရရှိခဲ့ပြီး တိုက် ခိုက်ခံခဲ့ရသော နေရာများမှ ပြည်သူအချို့လည်း ပျောက်ဆုံးနေလျှက်ရှိသည်။   စစ်ကော်မရှင်တပ်က အရပ်သားပြည်သူများကို ပစ်မှတ်ထားပြီး ဗုံးကြဲတိုက်ခိုက်ခဲ့မှုကြောင့်  ဩဂုတ်လ ၁၇ ရက်နေ့မှ ၂၀ ရက်နေ့အထိ မော်ချီးဒေသရှိ အရပ်သားပြည်သူ ၃၃ ဦး သေဆုံးပြီး ထိမှန်ဒဏ်ရာရရှိသူ ၁၀ ဦး အထိ ရှိနေပြီ ဖြစ်သည်။   ကရင်နီပြည်ကြားကာလ အုပ်ချုပ်ရေး ကောင်စီ (IEC) က ကုလသမဂ္ဂနှင့် အာဆီယံ အပါအဝင် နိုင်ငံတကာ အစိုးရများ အနေဖြင့် စစ်ကော်မရှင်တပ်၏ ကြီးလေးသော စစ်ရာဇဝတ်မှု ကျူးလွန်နေမှုအပေါ်  ထိရောက်စွာ အရေးယူပေးရန် တိုက်တွန်း တောင်းဆိုထားသည်။

ဒီးမော့ဆိုနှင့် မော်ချီး ဒေသများကို စစ်ကော်မရှင် ဗုံးကြဲ၊ အရပ်သား ထိခိုက်မှုများရှိ

ဒီးမော့ဆိုနှင့် မော်ချီး ဒေသများကို စစ်ကော်မရှင် ဗုံးကြဲ၊ အရပ်သား ထိခိုက်မှုများရှိ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၁ ရက်။  ကရင်န…

  • August 21, 2025
×Close