သတင်း

အမြင့်ပေ ၃ သောင်းကျော်တွင် လေယာဉ် အင်ဂျင် မီးလောင်၍ အရေးပေါ် ဆင်းသက်ခဲ့ရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။   ခရီးသည် ၂၇၃ ဦးနှင့် လေယာဉ်အမှုထမ်း ၈ ဦး လိုက်ပါလာသည့် ဘိုးရင်း 757 လေယာဉ်ကြီးဟာ ဂရိနိုင်ငံ ကော်ဖူး Corfu လေဆိပ်မှ ပျံတက်လာခဲ့သည်။   ဦးတည်သည့် အရပ်မှာ ဂျာမဏီနိုင်ငံ ဒတ်ဆဲလ်ဒေါ့ဖ် Dusseldorf မြို့သို့ ဖြစ်သည်။   အမြင့်ပေ ၃၆,၀၀၀ ၌ ပျံသန်းနေစဉ် ခရီးသည် အချို့က ညာဘက် လေယာဉ်တောင်ပံ အောက်ဖက်မှ မီးရောင်‌ များကို တွေ့လာခဲ့ရသည်။   အမြင့်ပေ သုံးသောင်းကျော်၊ အလုံပိတ် သတ္တု ပြွန်ချောင်းထဲတွင် မီးလောင်နေသည်ကို မြင်လိုက်ရခြင်းသည် ခရီးသည်များကို ထိတ်လန့် တုန်လှုပ်သွားစေခဲ့သည်။   အချို့ ခရီးသည်များက လေယာဉ်ပေါ်တွင် သုံးနိုင်သော ဖုန်းများ၊ အင်တာနက် ဆက်သွယ်ရေးများမှ တဆင့် ချစ်ခင်ရသူများကို နောက်ဆုံး နှုတ်ဆက်စာများ ပေးပို့ခဲ့ကြသည်။   သို့သော်လည်း လေယာဉ်မှူးနှင့် အမှုထမ်းများက လေယာဉ်ကို အရေးပေါ် ဆင်းသက်ရန် ဆုံးဖြတ်ခဲ့ကြသည်။   လေယာဉ်ကို အီတလီ နိုင်ငံသို့ လမ်းကြောင်းပြောင်းပြီး အရေးပေါ် ဆင်းသက်ခဲ့သည်။   ညာဖက် အင်ဂျင် မီးလောင် ကျွမ်းခဲ့ သော်လည်း လေယာဉ်မှူးနှင့် လေယာဉ်အမှုထမ်းများမှာ ဘိုးရင်း 757 လေယာဉ်ကြီးကို လေဆိပ်သို့ ဘေးကင်းလုံခြုံစွာနှင့် ဆင်းသက်နိုင်ခဲ့သည်။   အရေးပေါ် ဆင်းသက်ခဲ့သည့် ဘရင်ဒီစီ Brindisi မြို့တွင် တည်းခိုရန် အခန်း လုံလုံလောက်လောက် မရှိခဲ့ပေ။ သို့သော် အရေးပေါ် စောင်များ စီစဉ်ပြီး ခရီးသည် အချို့မှာ လေဆိပ်တွင်သာ အိပ်စက်ခဲ့ကြရသည်။   “ဒါဟာ အင်မတန် ကြောက်စရာကောင်းတဲ့ အတွေ့အကြုံဖြစ်တယ်၊ Good Bye ဆိုတဲ့ စာသားတွေ ပို့ပြီးပါပြီ၊ ဒီတခါတော့ ပြီးသွားပြီလို့ပဲ ထင်ခဲ့မိတယ်” ဟု ခရီးသည်တစ်ယောက်က ဂျာမဏီက ဘင်လ် Bild ဟု ခေါ်သော သတင်းဌာနကို ပြောပြခဲ့သည်။

အမြင့်ပေ ၃ သောင်းကျော်တွင် လေယာဉ် အင်ဂျင် မီးလောင်၍ အရေးပေါ် ဆင်းသက်ခဲ့ရ

အမြင့်ပေ ၃ သောင်းကျော်တွင် လေယာဉ် အင်ဂျင် မီးလောင်၍ အရေးပေါ် ဆင်းသက်ခဲ့ရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။  ခရီးသည် ၂၇၃ ဦးန…

  • August 20, 2025
နိုင်ငံခြား ကျောင်းသား ၆၀၀၀ ကျော် အမေရိကန်က ဗီဇာ ဖျက်သိမ်း 

 သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။   အမေရိကန်နိုင်ငံက ယခုနှစ်အတွင်း နိုင်ငံရပ်ခြားမှ ကျောင်းလာတက်နေသော ကျောင်းသား ၆,၀၀၀ ကျော်၏ ဗီဇာများကို ရုတ်သိမ်းခဲ့သည်ဟု အစိုးရက ထုတ်ပြန်ခဲ့သည်။   ဗီဇာများ ရုတ်သိမ်းရသည့် အကြောင်းအရင်းများနှင့် ပတ်သက်၍ ဥပဒေ ချိုးဖောက်မှု၊ ဗီဇာ ရက်လွန်ခြင်း နှင့် အကြမ်းဖက်မှုကို ထောက်ခံသည်ဆိုသော စွပ်စွဲချက်များ ပါဝင်သည်။   အစိုးရ ပြောရေး ဆိုခွင့်ရှိသူက ကျောင်းသား ၄,၀၀၀ ခန့်သည် ဥပဒေ ချိုးဖောက်မှုများ ကျူးလွန်ခဲ့သည်ဟု ဆိုသည်။   ချိုးဖောက်မှုများ ဆိုရာတွင် ရန်လိုတိုက်ခိုက်မှု၊ အရက်/မူးယစ်ဆေးဝါး လွှမ်းမိုးမှုအောက်တွင် ယာဉ်မောင်းနှင် မှုနှင့် ခိုးမှုများ ပါဝင်သည်။   ကျောင်းသား အယောက် ၂၀၀ မှ ၃၀၀ ခန့်မှာ အမေရိကန်က အကြမ်းဖက်အဖွဲ့ဟု သတ်မှတ်ထားသည့် အဖွဲ့အစည်းများ အပေါ် လူမှု ကွန်ရက် အပါအဝင် ထောက်ခံရေးသားမှုများကြောင့် ငြင်းပယ်ခြင်း ဖြစ်သည်ဟု ဆိုသည်။

နိုင်ငံခြား ကျောင်းသား ၆၀၀၀ ကျော် အမေရိကန်က ဗီဇာ ဖျက်သိမ်း

နိုင်ငံခြား ကျောင်းသား ၆၀၀၀ ကျော် အမေရိကန်က ဗီဇာ ဖျက်သိမ်း သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။  အမေရိကန်နိုင်ငံက ယခုနှစ်အတွင်း…

  • August 20, 2025
ယူကရိန်း၊ အမေရိကန်တို့နှင့် သုံးပွင့်ဆိုင်တွေ့ဆုံရေး ကရင်မလင် ပယ်ချ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၂၀ ရက်။   အမေရိကန် သမ္မတ ဒေါ်နယ် ထရန့်က ရုရှား သမ္မတ နှင့် ယူကရိန်း သမ္မတတို့ တွေ့ဆုံနိုင်ရန် ကြိုးပမ်းနေစဉ်မှာ ပင် ကရင်မလင် နန်းတော်က တွေ့ဆုံရေးကို ပယ်ချလိုက်သည်။   သမ္မတ ဒေါ်နယ် ထရန့်က ရုရှားသမ္မတ ပူတင်နှင့် အလာစကာတွင် တွေ့ဆုံခဲ့ပြီး ယူကရိန်း သမ္မတကိုလည်း အိမ်ဖြူတော်က ဘဲဥပုံ ခန်းမကြီးတွင် တွေ့ဆုံခဲ့သည်။   သမ္မတ သုံးဦး တွေ့ဆုံနိုင်မည်ဟု မျှော်လင့်ကြောင်းလည်း ပြောခဲ့သည်။ ယခုတော့ ထိုကိစ္စများ ဖြစ်မလာတော့ ပေ။   သမ္မတ ထရန့်က‌တော့ စစ်ပွဲ ရပ်ဆိုင်းဖို့အတွက် သမ္မတ ပူတင်နှင့် သမ္မတ ဇယ်လန်းစကီးတို့ တွေ့ဆုံဖို့ ထပ်မံ တောင်းဆိုထားသည်။   အဆိုပါ ပဋိပက္ခမှာ “ခက်ခဲတဲ့ ကိစ္စရပ်” ဖြစ်သည်ဟု သမ္မတ ထရန့်က ပြောလိုက်ပြီး သမ္မတ ပူတင်အနေနှင့် ရန်လိုမှုများကို အဆုံးသတ်ရန် စိတ်မဝင်စားခြင်းလည်း ဖြစ်နိုင်သည်ဟု ပြောသည်။   သမ္မတ ပူတင်က စစ်ပွဲ ပြီးဆုံးရေး မလုပ်ခဲ့ပါက “ကြမ်းတမ်းတဲ့ အခြေအနေကို” ရင်ဆိုင်ရလိမ့်မည်ဟု သူက ထပ်မံ ခြိမ်းခြောက်လိုက်သည်။   ယခု တွေ့ဆုံမှုများ မတိုင်ခင်တွင် ရုရှားက ဒွန်ဘာ့စ်နှင့် သိမ်းဆည်းနယ်မြေများကို ၎င်းတို့ကို ပေးပါက စစ်ရပ်ဆိုင်း ပေးမည်ဟု ပြောခဲ့ကြောင်း သမ္မတ ထရန့်က ပြောခဲ့သည်။   ပြီးခဲ့သည့် ရက်ပိုင်းအတွင်း အမေရိကန် သမ္မတသည် ယူကရိန်း သမ္မတနှင့် ဥရောပက ထိပ်သီးခေါင်းဆောင် များနှင့် တွေ့ဆုံပြီး ယူကရိန်း၏ လုံခြုံရေးကို အမေရိကန် နှင့် ဥရောပတို့ ပူးတွဲ တာဝန်ယူသွားမည်ဟု ပြောဆိုခဲ့ သည်။   ထို့နောက်တွင် ရုရှားက တွေ့ဆုံရေးကို ပယ်ချခဲ့ခြင်း ဖြစ်သည်။

ယူကရိန်း၊ အမေရိကန်တို့နှင့် သုံးပွင့်ဆိုင်တွေ့ဆုံရေး ကရင်မလင် ပယ်ချ

ယူကရိန်း၊ အမေရိကန်တို့နှင့် သုံးပွင့်ဆိုင်တွေ့ဆုံရေး ကရင်မလင် ပယ်ချ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၂၀ ရက်။  အမေရိကန် သမ္မတ ဒေါ်နယ…

  • August 20, 2025
ပုလောမြို့နယ်ထဲက ကျေးရွာများကို  စစ်ကော်မရှင်တပ် ဗုံးကြဲ၊ ကလေး ၁ ဦး သေဆုံး၊ ၄ ဦး ဒဏ်ရာရ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၀ ရက်။   တိုက်ပွဲဖြစ်ပွားခြင်း မရှိဘဲ ပုလောမြို့နယ် ဇရပ်ဆိပ်ကျေးရွာအုပ်စုထဲက (မိမ္မ) မိန်းမမြို့ကျေးရွာနှင့် ဘိုင်းပြင် ကျေးရွာ ကြားကို စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့သဖြင့် ကလေးတစ်ဦး သေဆုံးပြီး ထိခိုက် ဒဏ်ရာ ရသူများလည်း ရှိသည်ဟု ရွာသားများက ပြောသည်။   ဇူလိုင်လ ၁၉ ရက်နေ့၊ နံနက် ၁၀ နာရီခွဲ အချိန်ခန့်က မြိတ်လေတပ်မှ ထွက်ခွာလာသည့် ဂျက်ဖိုက်တာဖြင့် ဗုံးကြဲတိုက်ခိုက်ခဲ့သည့် အပြင် စက်သေနတ်ဖြင့်ပါ ပစ်ခတ်ခဲ့ခြင်း ဖြစ်သည်။   ထိုသို့ တိုက်ခိုက်ခံရမှုကြောင့် အသက် ၁၀ နှစ်ခန့်အရွယ် ကလေးငယ်တစ်ဦး သေဆုံးခဲ့ပြီး အသက် ၆၀ အရွယ် အမျိုးသမီးကြီးနှစ်ဦး အပါအဝင် ပြည်သူ လေးဦး ဒဏ်ရာရရှိထားသည်ဟု ပြည်သူ့ကာကွယ်ရေးတပ်မတော် မြိတ်ခရိုင် အမှတ် (၁) တပ်ရင်း တာဝန်ရှိသူက ဆိုသည်။   လေကြောင်းတိုက်ခိုက်ခံခဲ့ရသည့် ကျေးရွာများအနီးတွင် နှစ်ဖက်ကြာ၌ ထိတွေ့တိုက်ပွဲ ဖြစ်ပွားနေခြင်း မရှိဘူးဟု  ရွာသားများက ဆိုသည်။   ရွာသားတစ်ဦးက “အခုလက်ရှိမှာက ရှာဖွေကယ်ဆယ်ရေးတော့ ဆက်ပြီး လုပ်နေတုန်းပါပဲ။ နောက်ထပ် စာရင်း ထပ်တိုးလာနိုင်ပါသေးတယ်” ဟု ပြောသည်။   ထို့အပြင် မိန်းမမြို့ကျေးရွာမှ နေအိမ်သုံးလုံးမှာလည်း လေကြောင်း ဗုံးကြဲတိုက်ခိုက်ခံရမှုကြောင့် ထိမှန် ပျက်စီးသွားခဲ့သည်ဟု အဆိုပါ ဒေသခံ ရွာသားက ပြောသည်။   ဇူလိုင်လ ၁၆ ရက်နေ့ကလည်း တနင်္သာရီမြို့နယ်အတွင်း မောတောင်နယ်စပ် ကုန်သွယ်ရေးလမ်းပေါ်ရှိ သိန်ခွန်းကျေးရွာကို လေယာဉ်ဖြင့် ဗုံးကြဲတိုက်ခိုက်ခဲ့ပြီးနောက် စက်သေနတ်ဖြင့်ပါ ပစ်ခတ်ခဲ့သေးသော်လည်း လူထိခိုက်မှု မရှိခဲ့ကြောင်း ရွာသားတစ်ဦးက ဆိုသည်။   စစ်ကောင်စီတပ်က မောတောင်နယ်စပ် လမ်းကို ပြန်လည်ထိန်းချုပ်နိုင်ရေး အင်အားဖြည့်တင်းပြီး စစ်ကြောင်း ထိုး တိုက်ခိုက်နေသည်မှာ ၇ လ ကျော်လာပြီ ဖြစ်သော်လည်း ရှေ့ဆက်မတိုးနိုင်ဘဲ သိန်ခွန်းကျေးရွာဝန်းကျင်၌ သာ ရှိနေသေးသည်။

ပုလောမြို့နယ်ထဲက ကျေးရွာများကို  စစ်ကော်မရှင်တပ် ဗုံးကြဲ၊ ကလေး ၁ ဦး သေဆုံး၊ ၄ ဦး ဒဏ်ရာရ

ပုလောမြို့နယ်ထဲက ကျေးရွာများကို  စစ်ကော်မရှင်တပ် ဗုံးကြဲ၊ ကလေး ၁ ဦး သေဆုံး၊ ၄ ဦး ဒဏ်ရာရ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၂၀ ရက်။ …

  • August 20, 2025
စစ်ကော်မရှင် တပ်စခန်းများ အနီးမနေကြရန် KNU သတိပေး   သတင်းနှင့်vမီဒီယာ ကွန်ရက်။ ၂၀၂၅ ခုနှစ်၊ ဇူလိုင်လ ၂၀ ရက်။   စစ်ကောင်စီ တပ်စခန်းများအနီး နေထိုင်ကြသည့် ပြည်သူများ အနေဖြင့် စစ်ရေးအသိ စစ်ရေးသတိဖြင့် နေထိုင် သွားလာကြရန်နှင့် စစ်ကောင်စီတပ်ဖွဲ့ စခန်းချရာ နေရာများကို တတ်နိုင်သမျှ ရှောင်ကြရန် ကရင် အမျိုးသား အစည်းအရုံး - KNU တပ်မဟာ (၄) အထူးတပ်ဖွဲ့မှ  သတိပေးထုတ်ပြန်ထားသည်။   စစ်ရေးအရှိန် မြှင့်တင်ရန်ရှိနေသည့်အတွက် စစ်ကောင်စီတပ် စခန်းချ တပ်စွဲထားသည့် နေရာအနီးတွင် မနေကြ ရန် အသိပေးရခြင်း ဖြစ်ကြောင်း ဇူလိုင်လ ၁၇ ရက်နေ့က ထုတ်ပြန်ထားခြင်း ဖြစ်သည်။   KNU တပ်မဟာ (၄) မှ တာဝန်ရှိသူတစ်ဦးက “အသိပေးစာကတော့ ထုတ်ပြန်ထားပြီးပါပြီ။ တိုက်ပွဲဖြစ်လို့ မရွှေ့မပြောင်းတဲ့ သူတွေ ထိခိုက်မှုများ ရှိခဲ့ရင်တော့ တာဝန်ယူ ဆောင်ရွက်ပေးမှာ မဟုတ်ဘူး ဆိုတာလည်း သိအောင်တော့ ထည့်ရေးပေးထားတယ်” ဟု ပြောသည်။   ထို့အပြင် စစ်ကောင်စီကို ပံ့ပိုးကူညီခြင်း၊ သတင်းပေးခြင်း၊ ရိက္ခာထောက်ပံ့ပေးခြင်းစသည့် ကူညီမှုများ ကိုလည်း မလုပ်ကြရန် အထူးတားမြစ်ထားသည် ဟုလည်း KNU တပ်မဟာ (၄) မှ တာဝန်ရှိသူက ပြောသည်။   KNU တပ်မဟာ (၄) တပ်ဖွဲ့နှင့် မဟာမိတ် ပူးပေါင်းတပ်ဖွဲ့များ၏ စစ်ဆင်ရေး လုပ်ဆောင်ချိန်များ အတွင်း စစ်ကောင်စီတပ်ဖွဲ့ များနှင့် အနီးအနား တဝိုက်တွင် ရောက်ရှိနေပါကလည်း ထိတ်လန့်တုန်လှုပ်ခြင်း မရှိဘဲ ကျည်ကွယ် မျက်ကွယ်နေရာများတွင် အကာအကွယ်ယူ၍ တတ်နိုင်သမျှ လုံလုံခြုံခြုံ နေထိုင်ကြရန် ထုတ်ပြန် ချက်ထဲတွင် အကြံပြု တိုက်တွန်းထားသည်။   ထို့အပြင် နေအိမ်များတွင်လည်း ဗုံးခိုကျင်းများ စနစ်တကျ တူးထားရန်နှင့် အရေးကြီး စာရွက်စာတမ်းများ၊ တန် ဖိုးရှိ ပစ္စည်းများကို သေသေချာချာ ထုပ်ပိုးထားကြရန်ကိုလည်း မေတ္တာရပ်ခံ ထားသည်။   အလားတူ အမျိုးသားညီညွတ်ရေးအစိုးရ - NUG လက်အောက်ခံ ပြည်သူ့ကာကွယ်ရေး တပ်မတော်၊ မြိတ်ခရိုင် အမှတ် (၁) တပ်ရင်းကလည်း စစ်ရေးအရှိန်မြှင့် လုပ်ဆောင်သွားမည် ဖြစ်ကြောင်း ထုတ်ပြန်ထားသည်။

စစ်ကော်မရှင် တပ်စခန်းများ အနီးမနေကြရန် KNU သတိပေး

စစ်ကော်မရှင် တပ်စခန်းများ အနီးမနေကြရန် KNU သတိပေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဇူလိုင်လ ၂၀ ရက်။ စစ်ကောင်စီ တပ်စခန်းများအနီး နေထိုင်ကြသ…

  • August 20, 2025
စက်ရုပ်မေမေ ခေတ် ရောက်တော့မလား   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၉ ရက်။   လူသားများ၏ တာဝန်တစ်ခုမှာ မျိုးဆက်ပြန့်ပွားရေး ဖြစ်သည်ဟု သတ်မှတ်ထားခဲ့ကြသည်။   သို့သော်လည်း ဤကိစ္စရပ်တွင် အပြောင်းအလဲကြီး ဖြစ်လာတော့မည့် အလားအလာတွေ ဖြစ်ပေါ်လာနေသည်။   တရုတ်နိုင်ငံရှိ ကိုင်ဝါ နည်းပညာ Kaiwa Technology ကုမ္ပဏီက ကမ္ဘာ့ ပထမဆုံး သားအိမ်တုနှင့် ကလေး မွေးဖွားနိုင်တော့မည်ဟု ပြောလိုက်သည်။   လူပုံသဏ္ဍာန်မျိုး ပြုလုပ်ထားသော သားအိမ်တုပါသည့် စက်ရုပ်သည် လူသားများ ကဲ့သို့ပင် ၉ လလွယ် ၁၀ လဖွား ကလေးမွေးပေးနိုင်တော့မည်ဟု ဆိုသည်။ “စက်ရုပ်မေမေ” ဟု ခေါ်ဆိုရမည် ထင်သည်။   စက်ရုပ်၏ ရေမွှာရည်အိတ်ထဲတွင် သန္ဓေသားကို ကြီးထွားခိုင်းမှာ ဖြစ်ပြီး လိုအပ်သော အာဟာရ ဓါတ်ပစ္စည်း များကိုမူ ပိုက်တစ်ခုနှင့် ပို့ပေးမည် ဖြစ်သည်။   ကိုင်ဝါ ကုမ္ပဏီ အဆိုအရ ကုန်ကျစားရိတ်သည် အမေရိကန် ဒေါ်လာ ၁၃,၀၀၀ သာ ရှိလိမ့်မည်။   ယခင်က အငှား ကိုယ်ဝန်ဆောင်ခြင်း၊ ဖန်ပြွန်သန္ဓေ မျိုးပွားခြင်းများ ရှိခဲ့သော်လည်း ကိုယ်ဝန်ဆောင် မွေးဖွား သည့် လူမိခင် လိုအပ်ခဲ့သည်။   ယခု စက်ရုပ်မေမေမှာ မိခင်မပါဘဲ ပထမဆုံး ကိုယ်ဝန်ဆောင် ကလေးမွေးပေးတော့မည် ဖြစ်သည်။   လူနှင့် မစမ်းသပ်မီ သိုးများနှင့် စမ်းသပ်ခဲ့ပြီး အောင်မြင်ခဲ့သည်ဟု တရုတ် ကုမ္ပဏီက ဆိုသည်။   တစ်နှစ် အချိန်အတွင်း၌ ပထမဆုံး ကလေးမွေးပေးမည့် စက်ရုပ် နမူနာ ပုံစံ ထွက်ရှိလာမည်ဟု ဆိုသည်။   ကုမ္ပဏီက ကျင့်ဝတ်များ၊ ဥပဒေဆိုင်ရာ ကိစ္စများနှင့် ပတ်သက်၍ ကွမ်းတုံ အာဏာပိုင်များနှင့် ဆွေးနွေးထားပြီး ဖြစ်သည်ဟု ဆိုသည်။   စက်ရုပ်မှ ကလေးမွေးဖွားမှာ ဖြစ်သည့်အတွက် မျိုးဆက်ပွား ဆေးပညာနှင့် သိပ္ပံ နည်းပညာအရ ကြီးမားသော ထိုးဖောက်မှုကြီး ဖြစ်လာမည် ဖြစ်သော်လည်း မိခင်မေတ္တာနှင့် မိခင်၏ အခန်းကဏ္ဍ ပျောက်ဆုံးသွားမည့် ကိစ္စမှာမူ အငြင်းပွားစရာ အများအပြား ရှိနေအုံးမည်ဟု ယူဆနိုင်သေးသည်။

စက်ရုပ်မေမေ ခေတ် ရောက်တော့မလား

စက်ရုပ်မေမေ ခေတ် ရောက်တော့မလား သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၉ ရက်။  လူသားများ၏ တာဝန်တစ်ခုမှာ မျိုးဆက်ပြန့်ပွားရေး ဖြစ်သည်ဟု သတ…

  • August 19, 2025
ဂါဇာ ထိုးစစ်ကြီး စတော့မည်ဟု အစ္စရေး စစ်တပ် အကြီးအကဲပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၉ ရက်။   ဂါဇာမြို့ကို ထိန်းချုပ်နိုင်ရေးအတွက် ထိုးစစ်ကြီး မကြာခင် စတင်တော့မည်ဟု အစ္စရေး စစ်တပ် အကြီးအကဲ အီယာလ် ဇာမီယာ (Eyal Zamir) က တနင်္ဂနွေနေ့က ထုတ်ပြောခဲ့သည်။   စစ်ဆင်ရေး နောက်တဆင့်ဖြစ်သော “ဂစ်ဒီယန်ရဲ့ စစ်ရထားများ” ဟု ခေါ်ဆိုသည့် စစ်ဆင်ရေးကို မကြာမီတွင်  ဆက်လက် လုပ်သွားမည်ဟု အစ္စရေး စစ်တပ် အကြီးအကဲ အီယာလ် ဇာမီယာ Eyal Zamir က စစ်ဆင်ရေး စီမံကိန်းများ ရေးဆွဲနေစဉ် ပြောကြားခဲ့ခြင်း ဖြစ်သည်။   တချိန်တည်းမှာပင် အစ္စရေး အငြိမ်းစား စစ်ဘက် ထောက်လှမ်းရေးမှူးချုပ်က စစ်ပြီးဆုံးရန် ပါလက်စတိုင်း ၅၀,၀၀၀ ခန့် သတ်ပစ်ရန် လိုအပ်ကြောင်း ပြောဆိုချက်လည်း ပေါက်ကြားလာခဲ့သည်။   လာမည့် အဆင့်တွင် အစ္စရေးစစ်တပ်သည် ဂါဇာမြို့တွင် ဟားမက်စ်အဖွဲ့ကို ပြတ်ပြတ်သားသား ချေမှုန်းနိုင်သည် အထိ ထိုးစစ်အရှိန်ကို ဆက်လက် မြှင့်တင်သွားမည်ဟု ဆိုသည်။   မြေပြင်၊ ဝေဟင်နှင့် ရေပြင်တို့၌ ၎င်းတို့၏ စွမ်းဆောင်ရည် အားလုံးကို အသုံးပြုသွားမည်ဟု ဇာမီယာက ဆိုသည်။   အစ္စရေး စစ်တပ် အနေဖြင့် ဂါဇာတွင် ဖမ်းဆီးခံထားရသော အသက်ရှင်နေဆဲ ဓားစာခံများကို သာမက သေဆုံး သူများကိုပါ နေရပ်သို့ ပြန်လည် ခေါ်ဆောင်ပေးရေးအတွက် ကျင့်ဝတ်ပိုင်းအရ တာဝန်ရှိနေကြောင်း ၎င်းက ဖြည့်စွက် ပြောကြားခဲ့သည်။   အစာငတ်မွတ်မှုများလည်း ဆက်လက်ပျံ့နှံ့ ဖြစ်ပေါ်လျက်ရှိကာ လွန်ခဲ့သည့် ၂၄ နာရီအတွင်း အစာငတ်မွတ်မှုနှင့် အာဟာရ ချို့တဲ့မှုများကြောင့် ကလေးငယ် ၂ ဦး အပါအဝင် လူ ၇ ဦး သေဆုံးခဲ့သည်။   သို့ဖြစ်၍ ဂါဇာ၌ အစာငတ်မွတ်မှုကြောင့် သေဆုံးသူ စုစုပေါင်းမှာ ကလေးငယ် ၁၁၀ ဦး အပါအဝင် ၂၅၈ ဦး ရှိလာခဲ့ပြီ ဖြစ်သည်။

ဂါဇာ ထိုးစစ်ကြီး စတော့မည်ဟု အစ္စရေး စစ်တပ် အကြီးအကဲပြော

ဂါဇာ ထိုးစစ်ကြီး စတော့မည်ဟု အစ္စရေး စစ်တပ် အကြီးအကဲပြော သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၉ ရက်။  ဂါဇာမြို့ကို ထိန်းချုပ်နိုင်ရေးအ…

  • August 19, 2025
အမေရိကန်နှင့် ဥရောပက ယူကရိန်း လုံခြုံရေးအတွက် ပူးတွဲ တာဝန်ယူမည်   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၉ ရက်။   ယူကရိန်း သမ္မတ ဗိုလိုဒီမာ ဇယ်လန်းစကီးက အိမ်ဖြူတော်ကို အနက်ရောင် ဝတ်စုံနှင့် ရောက်ရှိလာခဲ့သည်။   အမေရိကန် သမ္မတ ဒေါ်နယ် ထရန့်က ဇယ်လန်းစကီး ကားမှ ဆင်းသည်အထိ လာကြိုသည်။   ထို့နောက်တွင် သမ္မတ နှစ်ဦးနှင့် ဥရောပ သမဂ္ဂက ခေါင်းဆောင်များ နာရီအတော်ကြာ ဆွေးနွေးခဲ့ကြသည်။   ရုရှား သမ္မတ ဗလာဒီမာ ပူတင်၊ ယူကရိန်း သမ္မတ ဗိုလိုဒီမာ ဇယ်လန်းစကီးနှင့် အမေရိကန် သမ္မတ ဒေါ်နယ် ထရန့်တို့ ပါဝင်သော ဆွေးနွေးပွဲ တစ်ခု ဖြစ်လာတော့မည်ဟု ဆွေးနွေးပွဲ အပြီးတွင် အမေရိကန် သမ္မတက ပြောသည်။   ဥရောပနှင့် အမေရိကန် ပူးတွဲ၍ ယူကရိန်း၏ လုံခြုံရေးကို တာဝန်ယူသွားမည်ဟု အမေရိကန် သမ္မတက ပြောသည်။   တနင်္လာနေ့ ဆွေးနွေးပွဲ အပြီးတွင် ယူကရိန်းနှင့် အမေရိကန် ပြည်ထောင်စုအကြား ဒေါ်လာ ဘီလီယံ ၉၀ ဖိုး လက်နက်များ လွှဲပြောင်းမှု ဖြစ်လာမည်ဟု ယူကရိန်း သမ္မတ ဇယ်လန်းစကီးက ပြောလိုက်သည်။   အဆိုပါ အမေရိကန် လက်နက်များသည် ယူကရိန်းတွင် မရှိခဲ့ဖူးသော လက်နက်များဖြစ်သည့် လေကြောင်း စနစ်များ၊ ဒုံကျည် တုန့်ပြန်ရေး စခန်းများနှင့် သမ္မတ ဇယ်လန်းစကီး ထုတ်မပြောချင်သေးသော ပစ္စည်းများ ပါဝင်မည်ဟု ယူကရိန်း သမ္မတက ပြောပါတယ်။

အမေရိကန်နှင့် ဥရောပက ယူကရိန်း လုံခြုံရေးအတွက် ပူးတွဲ တာဝန်ယူမည်

အမေရိကန်နှင့် ဥရောပက ယူကရိန်း လုံခြုံရေးအတွက် ပူးတွဲ တာဝန်ယူမည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၉ ရက်။  ယူကရိန်း သမ္မတ ဗိုလိုဒီမာ…

  • August 19, 2025
မော်ချီး သတ္တုတွင်းဒေသ စစ်ကော်မရှင် ဗုံးကြဲ၊ လူ အသေအပျောက်များဟု ဒေသခံများပြော   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဩဂုတ်လ ၁၇ ရက်။   ခဲသတ္တုတွင်းများရှိရာ ကရင်နီပြည်၊ မော်ချီးမြို့ကို စစ်တပ်က တစ်ရက်အတွင်း နှစ်ကြိမ် လေကြောင်းမှ ဗုံးကြဲတိုက်ခိုက်ခဲ့ရာ အရပ်သားသေဆုံးမှုအပြင် နေအိမ်များ ထိမှန်ပျက်စီးခဲ့သည်ဟု ဒေသခံများ က ပြောသည်။   ဘောလခဲခရိုင်၊ ဖားဆောင်းမြို့နယ်ထဲက မော်ချီးကို ဩဂုတ်လ ၁၇ ရက်နေ့၊ နံနက် ၈ နာရီဝန်းကျင်တွစ် တစ်ကြိမ်၊ နေ့လည် ၁၂ နာရီခန့်တွင် တစ်ကြိမ် လေကြောင်းမှ ဗုံးကြဲတိုက်ခိုက်ခဲ့ခြင်း ဖြစ်သည်။   ဒေသခံတစ်ဦးက “မော်ချီးကို လေယာဉ်နဲ့ ဗုံးကြဲသွားတယ်ဆိုတာ ဟုတ်ပါတယ်ဗျ။ စစ်ကောင်စီက လေယာဉ်နဲ့ လာကြဲတာ တစ်ရက်တည်းမှာပဲ နှစ်ကြိမ်ပါဗျ။ အိမ်တွေရော ဆေးရုံရော ထိခိုက်ပျက်စီးသွားပါတယ်။” ဟု ပြောသည်။   သတင်းနှင့် မီဒီယာ ကွန်ရက်က သေဆုံးသူ ၂ ဦးကိုသာ အတည်ပြုနိုင်သေးသော်လည်း ဒေသတွင် သတင်းမီဒီယာ များက သေဆုံးသူ ဦးရေ ၂၀ ကျော်ရှိသည်ဟု ပြောထားသည်။   မော်ချီးဒေသအတွင်းရှိ ဆေးရုံနှင့် မူကြိုကျောင်းနေရာတို့အား စစ်တပ်က လေကြောင်းမှ ဗုံးကြဲတိုက်ခိုက်ခြင်း ဖြစ်သည်ဟု ဆိုသည်။   မော်ချီးမြို့က လိုခါးလိုကျေးရွာရှိ ပြည်သူ့ဆေးရုံမှာ နံနက်ပိုင်းတွင် လေကြောင်းမှ ဗုံးကြဲတိုက်ခိုက်ခံခဲ့ရပြီး (၁၆) ကုန်းရပ်ကွက်ရှိ မူကြိုကျောင်းမှာ နေ့လည်ပိုင်းတွင် ဗုံးကြဲတိုက်ခိုက်ခံရခြင်း ဖြစ်သည်။   အဆိုပါ ဗုံးကြဲတိုက်ခိုက်ခံရမှုထဲ အရပ်သား ထိမှန် သေဆုံးမှုများအပြင် ထိခိုက်ဒဏ်ရာရရှိသူလည်း များကြောင်း မြေပြင်တွင် အကူအညီပေးနေသူများက ပြောသည်။   သို့သော် ထိမှန်သေဆုံးသူနှင့် ထိခိုက်ဒဏ်ရာ ရရှိသူ စာရင်းကိုမူ အတိအကျ မသိရသေးပေ။   လေကြောင်းမှ ဗုံးကြဲတိုက်ခိုက်ခံရမှုများထဲ နေအိမ်များ၊ ဆိုင်ခန်းများ၊ စားသောက်ဆိုင်၊ ဆေးရုံနှင့် မူကြိုကျောင်း နေရာတို့ ထိမှန်ပျက်စီးကုန်သည်ဟု ဆိုသည်။   မြေပြင်တွင် အကူအညီပေးနေသူ တစ်ဦးက “တိုက်နယ်ဆေးရုံပေါ့နော် ဒီဆေးရုံကတော့ တော်တော်လေး ပျက် သွားတယ်။ လူလည်း ထိတယ်။ ဒဏ်ရာ ရတဲ့လူလည်း များတယ်။ အသေးစိတ်တော့ ပြောလို့ရမသေးဘူး” ဟု ပြောသည်။   မြေပြင်တွင် တိုက်ပွဲဖြစ်ပွားနေခြင်းမျိုး မရှိဘဲ လေကြောင်းမှ ဗုံးကြဲတိုက်ခိုက်ခံရခြင်း ဖြစ်သည်ဟု ဆိုကြသည်။   အဆိုပါ လေကြောင်း ဗုံးကြဲတိုက်ခိုက်မှုမှာလည်း အရပ်သားပြည်သူများကို ပစ်မှတ်ထား တိုက်ခိုက်ခြင်း ဖြစ်သည်ဟု ဆိုသည်။   စစ်ကော်မရှင်တပ်သည် ဇူလိုင်လအတွင်း၌လည်း မော်ချီးဒေသကို လေကြောင်းမှ ဗုံးကြဲ တိုက်ခိုက်မှု ၃ ကြိမ် ထက်မနည်းလုပ်ခဲ့ရာ ဒေသခံ ၁၁ ဦး သေဆုံးခဲ့ပြီး ၅ ဦးထက်မနည်း ထိမှန်ဒဏ်ရာရရှိခဲ့သည်။

မော်ချီး သတ္တုတွင်းဒေသ စစ်ကော်မရှင် ဗုံးကြဲ၊ လူ အသေအပျောက်များဟု ဒေသခံများပြော

မော်ချီး သတ္တုတွင်းဒေသ စစ်ကော်မရှင် ဗုံးကြဲ၊ လူ အသေအပျောက်များဟု ဒေသခံများပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဩဂုတ်လ ၁၇ ရက်။  ခဲသတ္တုတွင…

  • August 17, 2025
×Close