သတင်း

စစ်ရေး ပူးပေါင်း လုပ်ဆောင်ရန် နွေဦးတော်လှန်ရေး မဟာမိတ် တပ်ပေါင်းစု ဖွဲ့စည်း သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၆ ရက်။ လေးနှစ်နီးပါးကြာမြင့်လာသည့် နွေဦးတော်လှန်ရေးတွင် စစ်ရေးအရွေ့ကို ပိုမိုအားကောင်းစေရန် ရည်ရွယ်၍ တော်လှန်ရေးအင်အားစု ၁၉ ဖွဲ့ ပါဝင်သည့် နွေဦးတော်လှန်ရေးမဟာမိတ်တပ်ပေါင်းစု (Spring Revolution Alliance - SRA) ကို ဒီဇင်ဘာ ၁၅ ရက်နေ့တွင် တရားဝင် ဖွဲ့စည်းကြောင်း ထုတ်ပြန်ကြေညာလိုက်သည်။ ဤတပ်ပေါင်းစု ပေါ်ပေါက်လာခြင်းသည် နိုင်ငံတစ်ဝှမ်းရှိ တော်လှန်ရေးအင်အားစုများ အကြား စုစည်းမှု ခိုင်မာ စေပြီး၊ အာဏာသိမ်းစစ်တပ်ကို တိုက်ခိုက်ရာတွင် ပိုမိုမဟာဗျူဟာကျသည့် ပူးပေါင်းတိုက်ပွဲဝင်မှုများ ဖော်ဆောင်နိုင်ရေးအတွက် အရေးပါသော အလှည့်အပြောင်းတစ်ခုဖြစ်ကြောင်း SRA က ဆိုသည်။ SRA တွင် ကရင်နီအမျိုးသားများ ကာကွယ်ရေးတပ် (KNDF)၊ ဗမာပြည်သူ့လွတ်မြောက်ရေးတပ်တော် (BPLA)၊ ချင်းညီနောင် (CB)၊ မွန်ပြည်တော်လှန်ရေးတပ် (MSRF) နှင့် ကျောင်းသားလက်ရုံးတပ်တော် (SAF) ကဲ့သို့သော အဓိကကျသည့် တိုက်ပွဲဝင်အဖွဲ့များ ပါဝင်သည်။ နိုင်ငံတစ်ဝှမ်း ဒေသအသီးသီးမှ အခြေစိုက်သည့် ၎င်းတို့၏ စုစုပေါင်းအင်အားမှာ သောင်းဂဏန်းအထိ ရှိနေကြောင်း SRA က အသိပေးထားသည်။ SRA အဖွဲ့ဝင် ကိုမင်းဟန်ထက် က လေးနှစ်နီးပါးကြာလာသည့် တော်လှန်ရေးကာလအတွင်း စုစည်းမှု ပိုမို ခိုင်မာစေရန်နှင့် စစ်ရေးအရွေ့အားကောင်းစေရန် အတွက် တပ်ပေါင်းစုကို ဖွဲ့လိုက်ခြင်း ဖြစ်သည်ဟု သတင်းမီဒီယာ များကို ပြောဆိုထားသည်။ ၎င်းတို့၏ ရည်မှန်းချက်မှာ ‘တပ်ပေါင်းစုဖြင့် အောင်ပွဲခံမည်’ ဟူသည့် ကြွေးကြော်သံအတိုင်း စစ်ရေးထိုးစစ်များ ကို ဆက်လက်ဆောင်ရွက်သွားရန် ဖြစ်သည်။ SRA ၏ ဦးဆောင်ကော်မတီအဖွဲ့ဝင်နှင့် ပြောရေးဆိုခွင့်ရှိသူ ခွန်းဘီထူး က တပ်ပေါင်းစု ဖွဲ့စည်းခြင်း မပြုမီ ကတည်းက အမျိုးသားညီညွတ်ရေးအစိုးရ (NUG) ၏ ကာကွယ်ရေးဝန်ကြီးနှင့် ယာယီသမ္မတတို့နှင့် တွေ့ဆုံ ညှိနှိုင်းမှုများ ပြုလုပ်ခဲ့ကြောင်း PVTV ကို ပြောသည်။ ကိုခွန်းဘီထူး က “အရေးကြီးတဲ့ အနှစ်သာရတစ်ခုကတော့ ဒီနေ့တော်လှန်ရေးမှာ ကျနော်တို့ရဲ့ အရင်းမြစ်တွေ၊ ကျနော်တို့ရဲ့ အဆက်အသွယ်တွေ၊ ကျနော်တို့ရဲ့ ထောက်ပို့လမ်းကြောင်းတွေကို အတူတူမျှဝေသုံးစွဲပြီးမှ ဒီတော်လှန်ရေးခရီးကို တောင့်ခံပြီးမှ ဖြတ်ကျော်ကြဖို့ရယ် အောင်မြင်မှုတွေကို ဆွတ်ခူးပေးနိုင်ဖို့ အတွက်ကို ကျနော်တို့ သဘောတူလိုက်တဲ့ဟာက အရေးကြီးဆုံး တော်လှန်ရေးရည်မှန်းချက် ဖြစ်ပါတယ်” ဟု ပြောသည်။ SRA သည် NUG နှင့် ချိတ်ဆက်မှု အားကောင်းကောင်းဖြင့် ဆက်လက် ဆောင်ရွက်သွားမည်ဖြစ်ပြီး၊ NUG ၏ Command and Control (COC) အောက်တွင် ရပ်တည်သည့် PDF/ပကဖ များကိုသာမက၊ ERO (တိုင်းရင်း သား လက်နက်ကိုင်အဖွဲ့) များ၏ စီမံမှုအောက်တွင် မရှိသော တပ်ဖွဲ့များကိုပါ စုစည်းကာ တော်လှန်ရေး အရှိန် အဟုန်ကို မြှင့်တင်ရန် ရည်ရွယ်သည်ဟု ၎င်းက ဖြည့်စွက်ပြောသည်။ ဗမာအမျိုးသား တော်လှန်ရေးတပ်မတော် (BNRA) ကလည်း ဒီဇင်ဘာ ၁၆ ရက်နေ့ ထုတ်ပြန်သော သဝဏ်လွှာတွင် ဤမဟာမိတ်တပ်ပေါင်းစု ပေါ်ပေါက်လာခြင်းကို ဝမ်းမြောက်ဂုဏ်ယူစွာ ကြိုဆို ကြောင်း ဖော်ပြခဲ့သည်။ "စစ်ရေးကဏ္ဍ" ကို ပိုမိုကောင်းမွန်သည့် အခြေအနေသို့ မြှင့်တင်နိုင်မည့် SRA ၏ အင်အားသည် နွေဦးတော်လှန် ရေးအတွက် မျှော်လင့်ချက်ရောင်နီ ဖြစ်ကြောင်း BNRA က သုံးသပ်ထားသည်။ ဤတပ်ပေါင်းစု ဖွဲ့စည်းနိုင်ရေးအတွက် တော်လှန်ရေးတပ်ဖွဲ့ ၇ ဖွဲ့သည် ၂၀၂၅ ခုနှစ်၊ မေလတွင် စတင် ညှိနှိုင်းခဲ့ ကြပြီး၊ နိုဝင်ဘာလ ပထမအပတ်၌ ကနဦးတွေ့ဆုံဆွေးနွေးပွဲ ပြုလုပ်ခဲ့သည်။ ထို့နောက် ဘုံသဘောတူညီချက်များ ရရှိခဲ့ပြီးနောက် လွတ်မြောက်နယ်မြေ တစ်ခုတွင် နိုဝင်ဘာလ ၂၁ ရက်နေ့မှ စ၍ သုံးရက်ကြာ တပ်ပေါင်းစုဖြစ်မြောက်ရေး ညီလာခံကို ကျင်းပကာ အဖွဲ့ဝင် ၁၉ ဖွဲ့ဖြင့် SRA ကို အောင်မြင်စွာ ဖွဲ့စည်းနိုင်ခဲ့ခြင်း ဖြစ်သည်။  

စစ်ရေး ပူးပေါင်း လုပ်ဆောင်ရန် နွေဦးတော်လှန်ရေး မဟာမိတ် တပ်ပေါင်းစု ဖွဲ့စည်း

စစ်ရေး ပူးပေါင်း လုပ်ဆောင်ရန် နွေဦးတော်လှန်ရေး မဟာမိတ် တပ်ပေါင်းစု ဖွဲ့စည်း သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၆ ရက်။  လေးနှစ…

  • December 16, 2025
လာမည့်နှစ်တွင် လူ ၁၂ သန်းကျော် ဆာလောင်မွတ်သိပ်မှုဒဏ်ခံရမည်ဟု WFP ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ လာမည့် ၂၀၂၆ ခုနှစ်တွင် မြန်မာပြည်သူ ၁၂ သန်းကျော်သည် ဆာလောင်မွတ်သိပ်မှုဒဏ်ကို ပြင်းထန်စွာ ခံစားရနိုင် သည်ဟု ကမ္ဘာ့စားနပ်ရိက္ခာအစီအစဉ်အဖွဲ့ကြီး (WFP) က သတိပေး ထုတ်ပြန်လိုက်သည်။ နိုင်ငံအနှံ့ ပဋိပက္ခများ ပြင်းထန်လာခြင်း၊ စစ်တပ်၏ ပိတ်ဆို့ဖြတ်တောက်မှုများကြောင့်နှင့် နေရပ်စွန့်ခွာရသူ (IDPs) အရေအတွက်မှာလည်း ၄ သန်းနီးပါးအထိ မြင့်တက်လာနိုင်ခြင်းတို့ကြောင့် မြန်မာနိုင်ငံ၏ လူသားချင်းစာနာ ထောက်ထားမှု အခြေအနေသည် စိုးရိမ်ဖွယ်အဆင့်သို့ ရောက်ရှိလာနေပြီး မြန်မာ့ဝမ်းရေး အကျပ် အတည်းမှာ အလွန်အမင်း ဆိုးရွားလာနေကြောင်း WFP က ဒီဇင်ဘာလ ၁၁ ရက်နေ့တွင် ထုတ်ပြန်သည်။ WFP ၏ ထုတ်ပြန်ချက်အရ လက်ရှိတွင် ကလေးငယ်များနှင့် မိခင်ပေါင်း လေးသိန်းကျော်သည် အာဟာရချို့တဲ့ မှုကို ပြင်းပြင်းထန်ထန် ခံစားနေရသည်။ ၎င်းတို့သည် နေ့စဉ်စားသောက်ရေးအတွက် အာဟာရ နည်းပါးလှသည့် ထမင်းဖြူသက်သက် သို့မဟုတ် ဆန်ပြုတ်ကျဲကျဲကိုသာ အားပြုမှီဝဲနေကြရသည့် အခြေအနေကို ရင်ဆိုင်နေရသည်ဟု WFP က ဆိုသည်။ စစ်ကိုင်းတိုင်းဒေသမှ စစ်ဘေးရှောင် မိခင်တစ်ဦးက “ကျမတို့တောထဲမှာ ပုန်းနေရတော့ ဘယ်သူမှ လာမကူနိုင် ဘူး။ ကလေးတွေအတွက် နို့မှုန့်ဆို ဝေးရောပဲ။ အိမ်က ပါလာတဲ့ ဆန်လေးနဲ့ ဆန်ပြုတ်ကျဲကျဲပဲ ပြုတ်တိုက်နေ ရတာ။ ကလေးတွေ ပိန်သွားတာ တွေ့ရတော့ မိခင်တစ်ယောက် အနေနဲ့ ရင်ထဲမှာ အရမ်းနာကျင်ရတယ်” ဟု ပြောသည်။ စစ်ကိုင်းတိုင်းဒေသကြီး၊ ကလေးမြို့နယ်တွင် ပြီးခဲ့သည့် သုံးလကျော်က စစ်ကော်မရှင်တပ်များ စစ်ကြောင်းထိုး ဝင်ရောက်ပြီးနောက် မြို့ဝင်/ထွက် လမ်းမကြီးများကို ပိတ်ဆို့ထားမှုကြောင့် တောတောင်အတွင်း ထွက်ပြေး တိမ်းရှောင်နေကြရသည့် ဒေသခံ ထောင်နှင့်ချီသည်လည်း စားနပ်ရိက္ခာ ပြတ်လပ်မှုနှင့် ရင်ဆိုင်နေရသည် ဟု စစ်ဘေးရှောင်များအား အကူအညီပေးနေသူများနှင့် ဒေသခံများက ပြောသည်။ သုံးလကျော်ကြာ လမ်းကြောင်းပိတ်ဆို့ ခံထားရခြင်းကြောင့် အစားအသောက် အကူအညီများ ရရှိရန် ခက်ခဲနေ ပြီး စစ်ရှောင်ပြည်သူ အများစုသည် ဆန်ပြုတ်ကျဲကျဲကိုသာ ကျိုချက်အားပြု စားသောက်နေရသည်ဟု အကူအညီပေးရေးအဖွဲ့များက ထောက်ပြသည်။ ကလေးမြို့လူထုတိုက်ပွဲ ဦးဆောင်ကော်မတီ ပြောရေးဆိုခွင့်ရှိသူက “အရေးပေါ်က ဆန်နဲ့ရိက္ခာနဲ့၊ ဒီအရေးပေါ် လူသုံးကုန်ပစ္စည်းတွေလည်း လိုတယ်။ လက်ရှိ ရာသီဥတုပြောင်း ကာလကြောင့်မို့လို့ ဒီဖျားနာတာတွေရော ဖြစ်နေကြတော့ ဒီအရေးပေါ် ကျန်းမာရေး ကူညီစောင့်ရှောက်မှုတွေ လိုအပ်ပါတယ်။ လိုတာ ပြောရရင်တော့ အကုန်ပဲဗျာ” ဟု ပြောသည်။ WFP မြန်မာနိုင်ငံဆိုင်ရာ ဌာနေကိုယ်စားလှယ် မစ္စတာ မိုက်ကယ်ဒန်ဖို့ဒ် (Mr. Michael Dunford) က မြန်မာနိုင်ငံ၏ အခြေအနေသည် ကမ္ဘာပေါ်၌ အဆိုးရွားဆုံးသော အကျပ်အတည်းများထဲမှ တစ်ခုဖြစ်နေသော် လည်း နိုင်ငံတကာ၏ အာရုံစိုက်မှု နည်းပါးနေကြောင်း ထောက်ပြထားသည်။ “မြန်မာနိုင်ငံရဲ့ အခြေအနေဟာ ကမ္ဘာပေါ်မှာ အဆိုးရွားဆုံး ဆာလောင်မွတ်သိပ်မှု အကျပ်အတည်းတွေထဲက တစ်ခု ဖြစ်ပါတယ်။ ဒါပေမဲ့ ကံမကောင်းစွာပဲ နိုင်ငံတကာရဲ့ အာရုံစိုက်မှုဟာ အခြားနေရာတွေလောက် မရရှိသေးဘူး ဆိုတာကို ကျနော်တို့ ထောက်ပြလိုပါတယ်” ဟု မစ္စတာ ဒန်ဖို့ဒ်က ပြောသည်။ ထို့အပြင် စစ်ကော်မရှင်တပ်၏ ပိတ်ဆို့မှုသည် အလှူရှင်များ၏ ကူညီထောက်ပံ့မှုများကို စစ်ရှောင်များထံ အရောက်ပို့ဆောင်ရန် အခက်အခဲ ဖြစ်စေသည်ဟု ကရင်နီပြည်မှ စစ်ဘေးရှောင်တစ်ဦး၏ က ပြောသည်။ “အခုလို တိုက်ပွဲတွေ ပြင်းထန်နေတဲ့အချိန်မှာ လမ်းတွေကလည်း ပိတ်ထားတော့ အပြင်က အကူအညီတွေ လာဖို့ အရမ်းခက်တယ်။ လာရင်တောင်မှ စစ်သားတွေရဲ့ စစ်ဆေးတာ၊ ပိတ်ပင်တာတွေ အများကြီး ခံရတယ်။ ဒါကြောင့် အလှူရှင်တွေ ဘယ်လောက်ပဲ ကူညီချင်ချင်၊ ဒီပစ္စည်းတွေက ကျနော်တို့ စစ်ရှောင်တွေဆီကို အရောက်လာဖို့ မလွယ်ဘူး။ ဒါကြောင့် စားနပ်ရိက္ခာက တဖြည်းဖြည်း ပြတ်လပ်လာတယ်။” ကုလသမဂ္ဂ အဖွဲ့အစည်းများ အနေဖြင့် ရန်ပုံငွေ အလွန်အမင်း နည်းပါးနေမှုနှင့် ရင်ဆိုင်နေရသောကြောင့် ၂၀၂၆ ခုနှစ်တွင် အကူအညီ လိုအပ်နေသူ ၁၂ သန်းကျော်ထဲမှ ၁.၃ သန်းကိုသာ အကူအညီပေးရန် ရည်မှန်းထားပြီး ယင်း အတွက်ပင် အမေရိကန်ဒေါ်လာ ၁၂၅ သန်း အရေးတကြီး လိုအပ်နေသည် ဟု WFP က နိုင်ငံတကာကို တောင်းဆိုထားသည်။ ဓါတ်ပုံ - Karenni Humanitarian Team (KHT)

လာမည့်နှစ်တွင် လူ ၁၂ သန်းကျော် ဆာလောင်မွတ်သိပ်မှုဒဏ်ခံရမည်ဟု WFP ပြော

လာမည့်နှစ်တွင် လူ ၁၂ သန်းကျော် ဆာလောင်မွတ်သိပ်မှုဒဏ်ခံရမည်ဟု WFP ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။ လာမည့် ၂၀၂၆ ခုနှစ်…

  • December 15, 2025
မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၅ ရက်။   တရုတ်၏ ကြီးကြပ်မှုဖြင့် တအာင်းအမျိုးသား လွတ်မြောက်ရေး တပ်မတော် (TNLA) မှ စစ်ကော်မရှင် တပ်ကို မိုးကုတ်-မိုးမိတ်ဒေသ နယ်မြေပြန်လွှဲပေးသည့် အစီအစဉ်ကို အမျိုးသားညီညွတ်ရေး အစိုးရ (NUG) က လက်မခံကြောင်း တရားဝင် ပြောဆိုလိုက် သည်။   NUG သည် အဆိုပါဒေသသို့ ပြန်လည် ဝင်ရောက်လာသော စစ်ကော်မရှင်တပ်များကို ပြည်သူလူထုနှင့် လက်တွဲ ၍ ဆက်လက်တိုက်ပွဲဝင်သွားမည်ဟု ပြောဆိုခဲ့ပြီး၊ လက်ရှိ တိုက်ပွဲများကြောင့် အရပ်သား သေဆုံးမှုများရှိနေ ကြောင်း ဒေသခံများက ဆိုသည်။ NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ဒီဇင်ဘာလ ၁၁ ရက်နေ့တွင် ထုတ် ပြန် ပြောဆိုခဲ့ခြင်းဖြစ်ပြီး၊ ထိုဒေသကို ပြန်လည်ထိန်းချုပ်နိုင်ရေး 'စစ်ဆင်ရေး စစ်ဦးစီးအဖွဲ့' ကို နိုဝင်ဘာလ ၉ ရက်နေ့ကပင် ဖွဲ့စည်းကာ စစ်ရေးလှုပ်ရှားမှုများ လုပ်ဆောင်ခဲ့ကြောင်း ပြောသည်။ တအာင်းတပ် TNLA နှင့် စစ်ကော်မရှင်တပ်တို့အကြား နိုဝင်ဘာလကုန်ပိုင်းက ပြုလုပ်ခဲ့သော နယ်မြေ ပြန်လွှဲ ပေးရေး သဘောတူညီချက်ကို NUG အနေဖြင့် လုံးဝလက်မခံနိုင်ကြောင်း ဦးနေဘုန်းလတ်က ပြောသည်။ “မိုးကုတ် - မိုးမိတ် ဒေသသို့ ကျူးကျော်ဝင်ရောက်လာသော အကြမ်းဖက် စစ်အုပ်စုတပ်တွေကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ပွဲဝင်လျက် ရှိနေပြီး နယ်မြေစိုးမိုးထိန်းချုပ်နိုင်မှု ပြန်လည်ရရှိနိုင်ရေး အတွက် ဆက်လက် တိုက်ပွဲဝင်နေပါတယ်။ မိုးကုတ်–မိုးမိတ်ဒေသသို့ ကျူးကျော်ဝင်လာတဲ့ စစ်အုပ်စုတပ်တွေ ကို ပြည်သူလူထုနဲ့ လက်တွဲပြီး ရွပ်ရွပ်ချွံချွံ ဆက်လက်တိုက်ခိုက်မယ့်အပြင် နယ်မြေစိုးမိုးမှု ပြန်လည်ရရှိရေး အတွက် စစ်ရေးအရှိန်မြှင့်သွားမယ်။” မိုးကုတ် - မိုးမိတ်ဒေသသည် နိုင်ငံရေးနှင့် စစ်ရေးအရ အထိမခံသော အခြေအနေဖြစ်သောကြောင့် တရားဝင် ထုတ်ပြန်ချက်များကို အဆောတလျင် မထုတ်ပြန်နိုင်ခဲ့သော်လည်း စစ်ဆင်ရေးများကို စနစ်တကျ ကွပ်ကဲ ဆောင်ရွက်ခဲ့ကြောင်း ဦးနေဘုန်းလတ်က ရှင်းပြသည်။ နိုဝင်ဘာလ ၃၀ ရက်နေ့မှ ဒီဇင်ဘာလ ၆ ရက်နေ့အတွင်း တိုက်ပွဲကြီး ၉ ပွဲအထိ ဖြစ်ခဲ့ပြီး စစ်ကော်မရှင်၏ အရေးပါသည့် စခန်းကုန်းတစ်ခုကို သိမ်းပိုက်နိုင်ခဲ့သည်ဟုလည်း NUG က အတည်ပြုထားသည်။ စစ်ကော်မရှင်တပ်များ မိုးကုတ်နှင့် မိုးမိတ်မြို့များသို့ ပြန်လည် ဝင်ရောက်လာပြီးနောက် နိုဝင်ဘာလ ၃၀ ရက်နေ့မှ စတင်၍ တိုက်ပွဲများ ဆက်တိုက်ဖြစ်ပွားခဲ့ကာ စစ်ကော်မရှင်တပ်က လေကြောင်း တိုက်ခိုက်မှုများကိုပါ လုပ်ခဲ့သည်။ မိုးမိတ်မြို့အနီး ဗုံးကြဲတိုက်ခိုက်မှုကြောင့် ကိုယ်ဝန်ဆောင် အမျိုးသမီးတစ်ဦး အပါအဝင် အရပ်သား ၁၁ ဦး သေဆုံးခဲ့သည် ဟု ဒေသခံများက ပြောသည်။ စစ်ရေးတင်းမာမှုများကြောင့် အရပ်သားပြည်သူများမှာ လုံခြုံရေးအရ ပိုမိုစိုးရိမ်ပူပန်နေရကြောင်း ဒေသခံ တစ်ဦးက ၎င်းတို့၏ အခြေအနေကို ယခုကဲ့သို့ ပြောသည်။ “အခုရက်ပိုင်းမှာ တိုက်ပွဲတွေ ပြန်ဖြစ်လာတော့ အရပ်သားတွေက ကြားထဲက ပိတ်မိပြီး ခံနေရတာပါ။ မိုးမိတ် ဘက် ဗုံးကြဲတိုက်ခိုက်တော့ ကလေးတွေ၊ ကိုယ်ဝန်ဆောင် အမျိုးသမီးတွေပါ သေဆုံးခဲ့ရတယ်။ ဒီလို နယ်မြေ ပြန်လွှဲတာတွေကြောင့် ပြည်သူတွေရဲ့ လုံခြုံရေး ပိုဆိုးလာတာကိုပဲ မြင်ရတယ်။” အဆိုပါဒေသတွင်း စစ်ရေးလှုပ်ရှားမှုများနှင့် ပတ်သက်၍ ကချင်လွတ်လပ်ရေးအဖွဲ့ (KIO/KIA) ၏ ပြောရေး ဆိုခွင့်ရှိသူ ဗိုလ်မှူးကြီးနော်ဘူကလည်း KIA ၏ မဟာမိတ်တပ်ဖွဲ့များ အပေါ် ကူညီထောက်ပံ့မည့် အခြေအနေကို ယခုကဲ့သို့ ပြောသည်။ “တိုက်ပွဲ ဖြစ်လို့ ရှိရင်တော့ အမြဲတမ်းကူညီကြတဲ့ သဘောမျိုးနဲ့ ကူညီတဲ့ အနေအထားလောက်တော့ ရှိမှာပါ။ ဒါပေမယ့် လက်တွေ့ အခြေအနေကတော့ ဘယ်လောက်အထိ ဘယ်လိုအခြေအနေ ရှိတယ်ဆိုတာကတော့ အခုကတော့ ကျနော်က ပြောလို့တော့ အဆင်မပြေဘူးခင်ဗျာ။” မိုးမိတ်မြို့နယ်တွင် KIA တပ်ရင်းများ၊ ABSDF နှင့် PDF များ ပူးပေါင်း၍ အခြေချထားကြောင်း၊ TNLA ဆုတ်ခွာ သည့် မိုးမိတ်မြို့နှင့်ပတ်သက်၍ KIA အနေဖြင့် စစ်ရေးအရ လုပ်ဆောင်ရန် မရှိသော်လည်း မဟာမိတ်တပ်ဖွဲ့များ စစ်ရေးလှုပ်ရှားလာပါက ကူညီသွားမည်ဟု ဗိုလ်မှူးကြီးနော်ဘူက နိုဝင်ဘာလတွင် သတင်းနှင့်မီဒီယာ ကွန်ရက် သတင်းဌာနကို ထုတ်ဖော်ပြောဆိုခဲ့ဖူးသည်။  

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား

မိုးကုတ်၊ မိုးမိတ် ပြန်လည် လွှဲပြောင်းမှု လက်မခံကြောင်း NUG တရားဝင် ပြောကြား  သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  တရုတ်၏ ကြ…

  • December 15, 2025
ရွေးကောက်ပွဲမှာ စစ်ကျွန်ဘဝ သွပ်သွင်းရန်သာ ဖြစ်ကြောင်း လှုပ်ရှားသူများ သုံးသပ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ စစ်ကော်မရှင်က ကျင်းပရန် စီစဉ်နေသည့် အတုအယောင် ရွေးကောက်ပွဲသည် တရားမျှတမှု မရှိဘဲ စစ်အာဏာ ရှင်စနစ် သက်ဆိုးရှည်စေရန်နှင့် ပြည်သူများ စစ်ကျွန်ဘဝမှ ရုန်းထွက်၍ မရအောင် လုပ်ဆောင် ခြင်းသာ ဖြစ်သည်ဟု အရပ်ဘက် တက်ကြွလှုပ်ရှားသူများက ပြောဆိုလိုက်သည်။ စစ်ကော်မရှင်သည် ရွေးကောက်ပွဲ၏ အပိုင်း (၁) ကို လာမည့် ဒီဇင်ဘာလ ၂၈ ရက်နေ့၊ အပိုင်း (၂) ကို ၂၀၂၆ ခုနှစ်၊ ဇန်နဝါရီလ ၁၁ ရက်နေ့နှင့် အပိုင်း (၃) ကို ဇန်နဝါရီလ ၂၅ ရက်နေ့တို့တွင် အသီးသီး ကျင်းပသွားမည်ဟု ထုတ်ပြန်ကြေညာထားသည်။ အဆိုပါ ရွေးကောက်ပွဲသည် စစ်ကော်မရှင်၏ စီမံကိန်းဖြစ်သောကြောင့် ပြတ်ပြတ်သားသား ဆန့်ကျင်ကြရန် လိုကြောင်း ကျေးလက်မြေအဖွဲ့ ဒါရိုက်တာ ဒေါ်မူစဲက တိုက်တွန်းပြောဆိုသည်။ “ဒီအတုအယောင် ရွေးကောက်ပွဲသည် ကျမတို့ကို စစ်ကျွန်ဘဝကနေ ပြီးတော့မှ လုံးဝရုန်းထွက်လို့ မရအောင် လုပ်မယ့် ရွေးကောက်ပွဲ ဖြစ်တယ်။ သူတို့ရေးထားတဲ့ ရွေးကောက်ပွဲ ဥပဒေသည် ဒီလိုပဲ ဖြစ်တဲ့ အတွက်ကြောင့် မို့လို့ ဒီဥစ္စာကို ကျမတို့ ပြတ်ပြတ်သားသား ဆန့်ကျင်ရမယ်။ ပြတ်ပြတ် သားသား အတုအယောင် ရွေးကောက် ပွဲ ပါဆိုပြီး ကျမတို့ ထုတ်ဖော်ဖို့လိုတယ်။“ ထို့အပြင် ရွေးကောက်ပွဲ အကြိုကာလတွင် စစ်တပ်၏ ဖိနှိပ်မှုများ ပိုမိုမြင့်တက်လာကြောင်း မွန်ပြည် လူ့အခွင့်အရေး ဖောင်ဒေးရှင်း (HURFOM) ဒါရိုက်တာ နိုင်အဲမွန်က ထောက်ပြသည်။ “ရွေးကောက်ပွဲ ကာလနဲ့ စပ်လျင်းပြီးတော့ နယ်မြေ ပိတ်ပင်တားဆီးတာ၊ ကန့်သတ်တာရှိတယ်။ အချက် အလက်တွေ မခိုင်လုံဘဲနဲ့ ခရီးသွားတဲ့ ကိစ္စတွေကို တားမြစ်တာ ရှိလာတယ်။ အဲ့အပေါ်မှာ ငွေ တွေ မတရား တောင်းပြီးတော့မှ ပြီးသွားတာမျိုး၊ အကြောင်းမဲ့ ဖမ်းဆီးပြီးတော့မှ ငွေညှစ်တဲ့ ကိစ္စမျိုး၊ ဆိုင်ကယ်တို့ ကားတို့ သိမ်းလိုက်တာမျိုးတွေက ပို ဖြစ်လာတယ်။ စီးပွားရေး၊ လူမှုရေး၊ ယဉ်ကျေးမှု နဲ့ ပတ်သက်တဲ့ ESCR right တွေ ချိုးဖောက်မှု ပိုဖြစ်လာတယ်။” စစ်ကော်မရှင်သည် စစ်ရှောင်ပြည်သူများထံ စားနပ်ရိက္ခာ တင်ပို့မည့် လမ်းကြောင်းများကိုပါ ပိတ်ဆို့ နေသောကြောင့် အရေးပေါ် အကူအညီ လိုအပ်နေသည့် စစ်ရှောင်ပြည်သူများအတွက် အခြေခံ စားနပ်ရိက္ခာ ပြတ်လပ်မှုနှင့် ရင်ဆိုင်နေရသည်ဟု နိုင်အဲမွန်က ပြောသည်။ စစ်အာဏာရှင်စနစ် အမြစ်ပြတ်မှသာ ပြည်သူများ၏ မတရားမှုများကို အဆုံးသတ်နိုင်မည် ဖြစ်ကြောင်း NUG ယာယီသမ္မတ ဒူဝါလရှီးလကလည်း ၇၇ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အထိမ်းအမှတ် ပြောကြားချက်တွင် တိုက်တွန်းခဲ့သည်။ “ဖက်ဒရယ် ဒီမိုကရေစီစနစ် တည်ဆောက်ဖို့ကလည်း စစ်အာဏာရှင်စနစ်ကို ချေမှုန်းနိုင်ရေးနဲ့ တိုက်ရိုက် ဆက်စပ် နေပါတယ်။ စစ်အာဏာရှင် သက်ဆိုးရှည်နေသ၍ ပြည်သူတွေဟာ အချိန်တိုင်း လူ့အခွင့်အရေးကို ဆက်လက် ဆုံးရှုံးနေကြရအုံးမှာ ဖြစ်ပါတယ်။ ပြည်သူတွေ ကြုံနေရတဲ့ မတရားမှုတွေကို အဆုံးသတ်နိုင်ဖို့ စစ်အာဏာရှင်စနစ် အမြစ်ပြတ်ရေးကို အားသွန်ခွန်စိုက် လုပ်ဆောင်ဖို့ လေးနက်စွာ တိုက်တွန်း လိုပါတယ်။” နိုင်ငံတကာ အဖွဲ့အစည်းများ ဖြစ်သော သြစတြေးလျ သံရုံး၊ ယူကေ၊ ကနေဒါနှင့် ဥရောပသမဂ္ဂ (EU) တို့က လည်း စစ်ကော်မရှင်၏ ရွေးကောက်ပွဲသည် တင်းမာမှုနှင့် အကြမ်းဖက်မှုများကို ပိုမိုဆိုးရွား စေနိုင်ပြီး စစ်မှန် သည့် ဖြေရှင်းနည်းနှင့် ပိုမိုဝေးကွာစေနိုင်ကြောင်း ပူးတွဲ ထုတ်ပြန်ပြောဆိုထားသည်။ ဓာတ်ပုံ - စစ်ကိုင်းဒေသ သပိတ်အင်အားစု  

ရွေးကောက်ပွဲမှာ စစ်ကျွန်ဘဝ သွတ်သွင်းရန်သာ ဖြစ်ကြောင်း လှုပ်ရှားသူများ သုံးသပ်

သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  စစ်ကော်မရှင်က ကျင်းပရန် စီစဉ်နေသည့် အတုအယောင် ရွေးကောက်ပွဲသည် တရားမျှတမှု မရှိဘဲ စစ်အ…

  • December 15, 2025
နယ်စပ် ခြံစည်းရိုးတွင် တံတားပေါက်များ တပ်ဆင်ပေးမည့် ကမ်းလှမ်းချက် နာဂဒေသခံများ ပယ်ချ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၁၅ ရက်။   အိန္ဒိယအစိုးရက မြန်မာ-အိန္ဒိယ နယ်စပ်ရှိ နာဂဒေသတွင် ခြံစည်းရိုးကာရံရာတွင် သဘောတူညီချက် ရရန်အတွက်  မီတာ ၈၀၀ ခြားတိုင်း ဂိတ်ပေါက်များ ဖွင့်ပေးမည်ဟူသော ကမ်းလှမ်းချက်ကို ညီညွတ်သော တန်ရှန်းနာဂကောင်စီ (UTNC) နှင့် ဒေသခံများက ပယ်ချလိုက်သည်။   နယ်စပ်ခြံစည်းရိုးကာရံမှုသည် နာဂမိသားစုများကို ခွဲခြားစေပြီး၊ အဆိုပါ ဂိတ်ပေါက်များမှာလည်း လွတ်လပ်ခွင့် ကို ပိတ်ပင်မည့် ‘ချော့သိပ်မှု’ သာ ဖြစ်သည် ဟု ဒေသခံများက ပြောဆိုသည်။ အိန္ဒိယ၏ နယ်စပ်ခြံစည်းရိုး ကာရံမှုလုပ်ငန်းများသည် နယ်စပ် တစ်ဖက်တစ်ချက်ရှိ နာဂမိသားစုများကို ခွဲခြား လိုက်သကဲ့သို့ ဖြစ်သွားမည်ကို စိုးရိမ်သောကြောင့် ဒေသခံများ၏ ပြင်းပြင်းထန်ထန် ကန့်ကွက်မှုများနှင့် ရင်ဆိုင် နေရသည်။ အဆိုပါကန့်ကွက်မှုများကြောင့် လုပ်ငန်းခွင် ထိခိုက်မှုမရှိစေရန် အတွက်သာ အိန္ဒိယဘက်မှ ယခုကဲ့သို့ ဂိတ်ပေါက်များ ထားရှိပေးမည့် အစီအစဉ်ကို နိုဝင်ဘာလ နောက်ဆုံးအပတ်က UTNC နှင့် တွေ့ဆုံပွဲတွင် တင်ပြခဲ့ ခြင်း ဖြစ်သည်။ သို့သော်လည်း ဤကမ်းလှမ်းချက် အပေါ် ယုံကြည်မှု မရှိကြောင်း ဒေသခံများက ပြောသည်။  “ဒါတွေက လက်တွေ့မကျပါဘူး။ ဒါက သူတို့လုပ်ချင်တဲ့ဟာ တစ်ခုကို လုပ်ဖို့အတွက် ချော့သိပ်တဲ့ သဘောလောက်ပဲလို့ ကျနော်တို့က ယူဆပါတယ်။ သူတို့ ဖောက်ပေးသည့် တိုင် အောင် ဒီလမ်းပေါက်လေးတွေက ကျနော်တို့အတွက် လွတ်လပ်တဲ့ ကူးလူးဆက်ဆံမှု မဖြစ်နိုင်ဘူးဗျ။ ဘာလို့လဲ ဆိုတော့ ဒီအပေါက်တွေက အချိန်မရွေး ပိတ်လို့ရတယ်၊ အချိန်မရွေး သတ်မှတ်လို့ရတဲ့ အပေါက်တွေ ဖြစ်သွား မှာဗျ” ဟု နန်းယွန်းဒေသခံ အမျိုးသားတစ်ဦးက ပြောသည်။ နယ်စပ်ခြံစည်းရိုး ကာရံပြီး တံခါးပေါက်များ ဖွင့်ပေးမည့်ကိစ္စသည် လုံခြုံရေး အကြောင်းပြချက်ဖြင့် အချိန်မရွေး ပြန်လည်ပိတ်ပစ်နိုင်သည့် အန္တရာယ်ရှိနေကြောင်း UTNC တာဝန်ရှိသူ တစ်ဦးက သုံးသပ်သည်။ “အဲ့ဒီလိုခြားပြီး တံခါးပေါက် ဖွင့်ပေးမယ်ဆိုတဲ့ ကိစ္စကလည်း ပြည်သူက လက်ခံနိုင်မှာမဟုတ်ဘူး။ ဘာကြောင့် လဲဆိုရင် အစိုးရ လုံခြုံရေးအတွက် လုပ်နေတာ ဖြစ်တဲ့အတွက် အကြောင်း တစ်ခုခုကြောင့် နောက်နောင်မှာ ချန် ထားသော်ငြားလည်းပဲ ပြဿနာတွေ ဖြစ်လာရင် တံခါးပေါက် ပြန်ပိတ်သွားတာမျိုးတို့ ဖြစ်နိုင်တယ်။ ဒါကြောင့် ပြည်သူအတွက်တော့ ဘယ်လိုမှ ဒါက လွတ်လပ်မယ်လို့ မယူဆနိုင်တာ ဖြစ်တဲ့ အတွက်ကြောင့် လက်ခံမှာ မဟုတ်ဘူး။” အိန္ဒိယ အစိုးရသည် ယခင်က နယ်စပ်နေပြည်သူများ ဗီဇာမလိုဘဲ ၁၆ ကီလိုမီတာ အထိ ဝင်ထွက်သွားလာခွင့် ပြုထားသည့် Free Movement Regime (FMR) စနစ်ကို ရုတ်သိမ်းရန် ဆုံးဖြတ်ပြီးနောက် ယခုကဲ့သို့ ခြံစည်းရိုး ကာရံခြင်းများကို အရှိန်မြှင့်လုပ်ဆောင်လာခြင်း ဖြစ်သည်။ အိန္ဒိယ-မြန်မာ နယ်စပ်တစ်လျှောက် နာဂလူမျိုးများ နေထိုင်ရာ နယ်နိမိတ် စုစုပေါင်း အရှည်မှာ နာဂလန်း ပြည် နယ် တစ်ခုတည်းတွင်ပင် ၂၁၅ ကီလိုမီတာ (၁၃၄ မိုင်) ခန့် ရှိကြောင်း အိန္ဒိယအစိုးရ သတင်းရင်းမြစ်များနှင့် ဒေသန္တရအစီရင်ခံစာများက ဖော်ပြသည်။ UTNC အနေဖြင့် ဒေသခံ ပြည်သူလူထု၏ ဆန္ဒအရ ခြံစည်းရိုး ကာရံခြင်းကို လုံးဝ ရပ်တန့်ပေးရန်သာ ဆက် လက် တောင်းဆိုသွားမည်ဖြစ်ပြီး၊ အိန္ဒိယအစိုးရက ဆက်လက်တင်းမာနေပါက ကန့်ကွက်မှုများကို ပိုမိုပြင်းထန် စွာ လုပ်ဆောင်သွားမည် ဖြစ်ကြောင်း နာဂဒေသခံများက ပြောသည်။

နယ်စပ် ခြံစည်းရိုးတွင် တံတားပေါက်များ တပ်ဆင်ပေးမည့် ကမ်းလှမ်းချက် နာဂဒေသခံများ ပယ်ချ

နယ်စပ် ခြံစည်းရိုးတွင် တံတားပေါက်များ တပ်ဆင်ပေးမည့် ကမ်းလှမ်းချက် နာဂဒေသခံများ ပယ်ချ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  အိ…

  • December 15, 2025
ထိုင်းတွင် လေဆိပ်လုံခြုံရေးတင်းကျပ်မည်ဟု ထိုင်း လဝက ပြော သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ ထိုင်း-ကမ္ဘောဒီးယားနယ်စပ် တင်းမာမှု မြင့်တက်လာခြင်းကြောင့် ထိုင်းလေဆိပ်များတွင် လုံခြုံရေး စစ်ဆေးမှုများကို တင်းကျပ်လိုက်သည်။ ဗီဇာမလိုဘဲ ဝင်ရောက်လာသည့် ကမ္ဘောဒီးယားနိုင်ငံသားများနှင့် နိုင်ငံခြားသား ကြေးစားစစ်သားများ ဝင်ရောက်မှုကို တင်းတင်းကျပ်ကျပ် စိစစ်ရန် အမိန့်ပေးထားကြောင်း လူဝင်မှုကြီးကြပ်ရေးဗျူရိုက တနင်္လာနေ့တွင် ထုတ်ပြန်ခဲ့သည်။ Suvarnabhumi, Don Mueang, Chiang Mai, Phuket နှင့် Hat Yai အပါအဝင် အဓိက နိုင်ငံတကာ လေဆိပ်များတွင် လုံခြုံရေး တိုးမြှင့်ထားသည်။ လုံခြုံရေး စစ်ဆေးမှုများကြောင့် နိုင်ငံကူးလက်မှတ် စစ်ဆေးသည့် နေရာများတွင် ပုံမှန် မိနစ် ၂၀ မှ ၄၅ မိနစ်ခန့်အထိ စောင့်ဆိုင်းရမည့် အချိန် ပိုကြာနိုင်ကြောင်း ဗျူရိုက အသိပေးခဲ့သည်။ ရဲမှူးချုပ် Choengron Rimpadee ၏ ပြောကြားချက်အရ တိုက်ပွဲများ ပြင်းထန်လာခြင်းကြောင့် ထိုင်းလုံခြုံရေးကို ခြိမ်းခြောက်မည့် လုပ်ငန်းများ ဆောင်ရွက်ရန် နိုင်ငံခြားသားများက ဗီဇာမလိုဘဲ ဝင်ရောက်ခွင့် အစီအစဉ်ကို အလွဲသုံးစားပြုနိုင်ခြေရှိသဖြင့် လုံခြုံရေး တိုးမြှင့်ရခြင်း ဖြစ်သည်။ အရှေ့ဥရောပနှင့် အာရှမြောက်ပိုင်း ဒေသမှ ခရီးသည်များကို ကြေးစားစစ်သား ငှားရမ်းလေ့ရှိသောကြောင့် အဓိက စိစစ်သွားမည်ဟု ဆိုသည်။ လက်ရှိတွင် ထိုင်းနှင့် ကမ္ဘောဒီးယားကြား စီးပွားဖြစ် လေကြောင်းခရီးစဉ်များမှာ ပုံမှန်အတိုင်း ပြေးဆွဲနေဆဲ ဖြစ်သည်။

ထိုင်းတွင် လေဆိပ်လုံခြုံရေးတင်းကျပ်မည်ဟု ထိုင်း လဝက ပြော

ထိုင်းတွင် လေဆိပ်လုံခြုံရေးတင်းကျပ်မည်ဟု ထိုင်း လဝက ပြော သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  ထိုင်း-ကမ္ဘောဒီးယားနယ်စပ်…

  • December 15, 2025
ထိုင်း-ကမ္ဘောဒီးယား နယ်စပ် ဆူရင်းတွင် ဒုံးကျည်များ ပစ်ခတ်၊ နယ်မြေအချို့ကို ထိုင်းပြန်သိမ်း၊ ပင်လယ်ဝင်ပေါက်ကို ထိုင်းထိန်းချုပ် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ တစ်ပတ်ကျော်ကြာ မြင့်လာပြီဖြစ်သော ထိုင်း-ကမ္ဘောဒီးယား နယ်စပ်တိုက်ပွဲများမှာ ဆက်လက် ဖြစ်ပွားလျက်ရှိသည်။ ယနေ့ဒီဇင်ဘာလ ၁၅ ရက် နံနက်တွင် ထိုင်းနယ်စပ် ဆူရင်းခရိုင်ရှိ ထကွိုင်ဘုရားကျောင်းနှင့် တောင်ကုန်းအမှတ် ၃၅၀ ကို ကမ္ဘောဒီးယားဘက်မှ BN-21 အလိုအလျောက် အတွဲလိုက် ဒုံးကျည်များဖြင့် ပစ်လွှတ်ခဲ့သည်ဟု ထိုင်းဘက်က ကြေညာခဲ့သည်။ မနက် ၆ နာရီကျော် အချိန်တွင် ထိုင်းဘက်ကလည်း ပြန်လည်ပစ်ခတ်ခဲ့ကြောင်း ဘန်ကောက်ပို့စ်သတင်းစာက ဖော်ပြသည်။ တနင်္ဂနွေနေ့ကမူ ထိုင်းတော်ဝင်ရေတပ် ပြောရေးဆိုခွင့်ရှိသူ ဗိုလ်ချုပ်ကြီး Parach Rattanachaiyapan က ထိုင်းစစ်တပ်သည် Trat (ထရက်) ကမ်းရိုးတန်းခရိုင်ရှိ အချုပ်အခြာအာဏာပိုင် နယ်မြေများကို ပြန်လည်သိမ်းပိုက်နိုင်ခဲ့ပြီး ပြိုင်ဘက်အင်အားစုများကို နှင်ထုတ်ခဲ့ပြီဖြစ်ကြောင်း ပြောကြားခဲ့သည်။ တိုက်ပွဲများကြောင့် ဒီဇင်ဘာ ၁၄ ရက် ညပိုင်းတွင် ကမ္ဘောဒီးယားအစိုးရသည် နယ်စပ်ဖြတ်ကျော်ဝင်ထွက်မှု လမ်းကြောင်းအားလုံးကို လုံးဝ ပိတ်ဆို့ဆိုင်းငံ့လိုက်ကြောင်း ကြေညာခဲ့သည်။ လက်ရှိပဋိပက္ခတွင် နှစ်ဖက်စလုံးမှ စစ်သားနှင့် အရပ်သား အနည်းဆုံး ၂၅ ဦးခန့် သေဆုံးခဲ့ပြီး လူပေါင်း ငါးသိန်းကျော် နေရပ်စွန့်ခွာခဲ့ရသည်။ ထိုင်းအစိုးရသည် အရှေ့တောင်ပိုင်း Trat ခရိုင်တွင် ညမထွက်ရအမိန့် ထုတ်ပြန်ထားသည်။ ငြိမ်းချမ်းရေး ကြားဝင်စေ့စပ်သူ အမေရိကန်သမ္မတ ဒေါ်နယ်လ် ထရမ့်က နှစ်နိုင်ငံ အပစ်အခတ် ရပ်စဲရန် သဘောတူညီပြီဟု ကြေညာခဲ့သော်လည်း ထိုင်းအရာရှိများကမူ ထိုသဘောတူညီချက်ကို ငြင်းဆိုခဲ့ပြီး၊ အပစ်အခတ်ရပ်စဲရေးကို မြေပြင်အခြေအနေပေါ် မူတည်၍သာ ထိုင်းက ဆုံးဖြတ်မည်ဟု ပြောဆိုခဲ့သည်။ ထပ်မံ၍ ထိုင်းနိုင်ငံသည် တနင်္ဂနွေနေ့တွင် ကမ္ဘောဒီးယား ပင်လယ်နယ်နိမိတ်ကို စတင် ပိတ်ဆို့လိုက်သည်ဟု ထိုင်းနိုင်ငံ လူထုဝန်ဆောင်မှု ရုပ်သံက သတင်းထုတ်ပြန်သည်။ ဤပိတ်ဆို့မှုသည် ကုန်တင်သင်္ဘော၊ ငါးဖမ်းသင်္ဘောနှင့် ရေနံတင်သင်္ဘောများ အပါအဝင် မည်သည့်နိုင်ငံ မှတ်ပုံတင်ဖြင့်မဆို ကမ္ဘောဒီးယားသို့ ဝင်ရောက်လာမည့် ပင်လယ်ပြင်သွား ရေယာဉ်အားလုံးကို တားမြစ်မည်ဖြစ်ပြီး၊ လောင်စာဆီ၊ စစ်လက်နက်ပစ္စည်းနှင့် အရေးပါသော စစ်ရေးပစ္စည်းများ ပိတ်ဆို့ရန် ရည်ရွယ်ကြောင်း ထိုင်းက ပြောကြားသည်။

ထိုင်း-ကမ္ဘောဒီးယား နယ်စပ် ဆူရင်းတွင် ဒုံးကျည်များ ပစ်ခတ်၊ နယ်မြေအချို့ကို ထိုင်းပြန်သိမ်း၊ ပင်လယ်ဝင်ပေါက်ကို ထိုင်းထိန်းချုပ်

ထိုင်း-ကမ္ဘောဒီးယား နယ်စပ် ဆူရင်းတွင် ဒုံးကျည်များ ပစ်ခတ်၊ နယ်မြေအချို့ကို ထိုင်းပြန်သိမ်း၊ ပင်လယ်ဝင်ပေါက်ကို ထိုင်းထိန်းချုပ်  သတင်းနှင့် မီဒီယာ က…

  • December 15, 2025
ဩစတြေးလျ၊ ဘွန်ဒီကမ်းခြေတွင် ဂျူးလူမျိုးများအား သားအဖ နှစ်ဦးက တိုက်ခိုက် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ ဩစတြေးလျနိုင်ငံ၊ နယူးဆောက်ဝေးလ်စ်ပြည်နယ်၊ နာမည်ကျော် ဘွန်ဒီကမ်းခြေ (Bondi Beach) ၌ ဂျူးဘာသာဝင်များ၏ ဟာနူကာ (Hanukkah) ပွဲတော် စတင်သည့် ညတွင် သေနတ်သမားနှစ်ဦး ဝင်ရောက် တိုက်ခိုက်ခဲ့ခြင်းကြောင့် အနည်းဆုံး ၁၆ ဦး သေဆုံးပြီး ၄၀ ဦးခန့် ဒဏ်ရာရရှိခဲ့သည်။ သေဆုံးသူများထဲတွင် ၁၂ နှစ်အရွယ် ကလေးတစ်ဦး ပါဝင်ပြီး၊ ဆေးရုံ၌ ဆေးကုသမှု ခံယူနေရသူများထဲတွင် ကလေးငယ် သုံးဦးနှင့် ရဲအရာရှိနှစ်ဦးလည်း ပါဝင်သည်ဟု နိုင်ငံတကာ သတင်းများက ဆိုသည်။ တိုက်ခိုက်သူနှစ်ဦးမှာ အသက် ၅၀ အရွယ် ဖခင်ဖြစ်သူနှင့် ၂၄ နှစ်အရွယ် သားဖြစ်သူ (ပါကစ္စတန်နိုင်ငံသား) Naveed Akram (နာဗီ့ဒ် အာ့က်ရမ်) တို့ဖြစ်ကြပြီး၊ ဖခင်ဖြစ်သူမှာ ရဲများ၏ ပစ်ခတ်မှုကြောင့် သေဆုံးခဲ့ပြီး သားဖြစ်သူမှာမူ စိုးရိမ်ရသည့် အခြေအနေဖြင့် ဆေးရုံတွင် ကုသမှု ခံယူနေရသည်။ ဩစတြေးလျ ဝန်ကြီးချုပ် အန်ထော်နီ အယ်လ်ဘာနီးစ် (Anthony Albanese) က ဤပစ်ခတ်မှုသည် ဩစတြေးလျနိုင်ငံသား ဂျူးလူမျိုးများကို ပစ်မှတ်ထားသည့် အကြမ်းဖက်လုပ်ရပ်နှင့် အစ္စရေးဆန့်ကျင်ရေး (Antisemitism) လုပ်ရပ်ဖြစ်ကြောင်း ပြစ်တင်ရှုတ်ချ ပြောကြားခဲ့သည်။  ရဲတပ်ဖွဲ့၏ ထုတ်ပြန်ချက်အရ တိုက်ခိုက်သူများသည် သေနတ်အရှည်များကို အသုံးပြုခဲ့ကြပြီး၊ ပစ်ခတ်မှုအပြီး ကမ်းခြေနှင့် မျဉ်းပြိုင် လမ်းမပေါ်ရှိ ကားတစ်စီးအတွင်း၌ လက်လုပ်ဖောက်ခွဲရေး ပစ္စည်းများလည်း တွေ့ရှိခဲ့ကြသည်။ ထို့အပြင်၊ ပစ်ခတ်မှု ဖြစ်ပွားနေစဉ်အတွင်း တိုက်ခိုက်သူတစ်ဦး၏ သေနတ်ကို အသက်စွန့်၍ ဝင်ရောက်လုယူပြီး လက်နက်ချခိုင်းခဲ့သူ အရပ်သားတစ်ဦးဖြစ်သော အာမက် အယ်လ် အာမက် (Ahmed al Ahmed) ၏ ရုပ်သံမှတ်တမ်းများ ထွက်ပေါ်လာခဲ့ပြီး၊ ၎င်းအား နယူးဆောက်ဝေးလ်စ် ဝန်ကြီးချုပ်က အမှန်တကယ် သူရဲကောင်း ဖြစ်ကြောင်း ချီးကျူးဂုဏ်ပြုခဲ့သည်။ ၂၀၂၃ ခုနှစ် အောက်တိုဘာ ၇ ရက်နေ့ ဂါဇာစစ်ပွဲ စတင်ပြီးနောက်ပိုင်း ဩစတြေးလျနိုင်ငံတွင် အစ္စရေးဆန့်ကျင်ရေးနှင့် မွတ်ဆလင်များအပေါ် မုန်းတီးမှုဆိုင်ရာ ဖြစ်ရပ်များ သိသိသာသာ တိုးများလာခဲ့ကြောင်း သတင်းများက ဖော်ပြသည်။

ဩစတြေးလျ၊ ဘွန်ဒီကမ်းခြေတွင် ဂျူးလူမျိုးများအား သားအဖ နှစ်ဦးက တိုက်ခိုက်

ဩစတြေးလျ၊ ဘွန်ဒီကမ်းခြေတွင် ဂျူးလူမျိုးများအား သားအဖ နှစ်ဦးက တိုက်ခိုက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  ဩစတြေးလျနိ…

  • December 15, 2025
ထိုင်းက နယ်မြေတချို့ ပြန်သိမ်းထားပြီး ကမ္ဘောဒီးယားကို ရေကြောင်း ပိတ်ဆို့ထား သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၅ ရက်။ ထိုင်းစစ်တပ်သည် Trat (ထရတ်) ကမ်းရိုးတန်းခရိုင်အတွင်းရှိ ၎င်းတို့၏ "အချုပ်အခြာအာဏာပိုင် နယ်မြေများ" ကို ပြန်လည်သိမ်းပိုက်နိုင်ခဲ့ပြီး ပြိုင်ဘက်အင်အားစုအားလုံးကို နှင်ထုတ်နိုင်ခဲ့ကြောင်း ထိုင်းတော်ဝင်ရေတပ်၏ ပြောရေးဆိုခွင့်ရှိသူ ဗိုလ်ချုပ်ကြီး Parach Rattanachaiyapan က တနင်္ဂနွေနေ့တွင် ထုတ်ပြန်ခဲ့သည်။ ထိုင်းချယ်နယ် 3 နံနက်ခင်းသတင်း၏ ဖော်ပြချက်အရ ထိုင်းစစ်တပ်သည် ကြည်းတပ်၊ ရေတပ်နှင့် လေတပ်တို့ ပူးပေါင်း၍ တနင်္ဂနွေနေ့ နံနက်အစောပိုင်းအထိ နယ်စပ်တစ်လျှောက် စစ်ဆင်ရေးများကို ဆက်လက်လုပ်ဆောင်လျက်ရှိပါသည်။ ထို့အပြင် Surin (စုရင်း) ခရိုင်ရှိ Ta Khwai (ထာ့ခွိုင်) အပါအဝင် အခြားဒေသအချို့တွင်လည်း ပြောက်ကျားတိုက်ပွဲများနှင့် မောင်းသူမဲ့လေယာဉ် (ဒရုန်း) ဖြင့် တိုက်ခိုက်မှုများ ဆက်လက်ဖြစ်ပွားလျက်ရှိပါသည်။ တိုက်ပွဲများ အရှိန်အဟုန် မြင့်မားလာခြင်းကြောင့် ကမ္ဘောဒီးယားအစိုးရသည် ဒီဇင်ဘာ ၁၄ ရက် ညပိုင်းတွင် ထိုင်းနိုင်ငံနှင့်ရှိသော နယ်စပ်ဖြတ်ကျော်ဝင်ထွက်မှု လမ်းကြောင်းအားလုံးကို နောက်ထပ်အကြောင်းကြားစာ ထုတ်ပြန်သည်အထိ လုံးဝ ပိတ်ဆို့ဆိုင်းငံ့လိုက်ကြောင်း ကြေညာခဲ့ပါသည်။ လက်ရှိဖြစ်ပွားနေသော ပဋိပက္ခများကြောင့် နှစ်ဖက်စလုံးမှ စစ်သားနှင့် အရပ်သား အနည်းဆုံး ၂၅ ဦးခန့် သေဆုံးခဲ့ရပြီး လူဦးရေ စုစုပေါင်း ငါးသိန်းကျော်သည် နေရပ်စွန့်ခွာ ထွက်ပြေးတိမ်းရှောင်ခဲ့ကြရသည်။ အခြေအနေ ထိန်းချုပ်ရေးအတွက် ထိုင်းအစိုးရသည် နိုင်ငံ၏ အရှေ့တောင်ပိုင်း Trat ခရိုင်တွင် ညမထွက်ရအမိန့်ကို ထုတ်ပြန်ထားပါသည်။ နိုင်ငံတကာ၏ ဖိအားပေးမှုများဖြင့် အပစ်အခတ်ရပ်စဲရေး သဘောတူညီချက်တွင် ပါဝင်ခဲ့ဖူးသော အမေရိကန်သမ္မတ ဒေါ်နယ်လ် ထရမ့်က ထိုင်းနှင့် ကမ္ဘောဒီးယားနိုင်ငံတို့သည် အပစ်အခတ်ရပ်စဲရန် သဘောတူညီခဲ့ကြောင်း ကြေညာခဲ့သော်လည်း ထိုင်းအရာရှိများကမူ တိုက်ပွဲများ ရပ်တန့်ရန် သဘောတူညီမှု မရှိသေးကြောင်း ငြင်းဆိုခဲ့ကြသည်။ ထိုင်းနိုင်ငံအနေဖြင့် အပစ်အခတ်ရပ်စဲရေးကိစ္စကို မြေပြင်အခြေအနေများပေါ်တွင် မူတည်၍သာ ဆုံးဖြတ်သွားမည်ဟု ပြောဆိုခဲ့ပါသည်။ ထပ်မံတင်းမာလာသည့် အခြေအနေအရပ်ရပ်အနေဖြင့်၊ တနင်္ဂနွေနေ့တွင် ထိုင်းနိုင်ငံ လူထုဝန်ဆောင်မှု ရုပ်သံမှ ထိုင်းနိုင်ငံသည် ကမ္ဘောဒီးယား ပင်လယ်နယ်နိမိတ်ကို စတင်ပိတ်ဆို့လိုက်ပြီဖြစ်ကြောင်း သတင်းထုတ်ပြန်ခဲ့သည်။ ထိုင်းစစ်တပ်၏ ကြေညာချက်အရ ကုန်တင်သင်္ဘော၊ ငါးဖမ်းသင်္ဘော သို့မဟုတ် ရေနံတင်သင်္ဘောဖြစ်စေ၊ မည်သည့်နိုင်ငံ မှတ်ပုံတင်ဖြင့်မဆို ကမ္ဘောဒီးယားနိုင်ငံသို့ ဝင်ရောက်လာမည့် ပင်လယ်ပြင်သွား ရေယာဉ်အားလုံးကို ပိတ်ဆို့သွားမည်ဖြစ်သည်။ အဆိုပါ ရေကြောင်းပိတ်ဆို့မှု၏ အဓိကရည်ရွယ်ချက်မှာ ကမ္ဘောဒီးယားနိုင်ငံသို့ လောင်စာဆီ၊ စစ်လက်နက်ပစ္စည်းနှင့် အခြားစစ်ရေးအရ အရေးပါသော ပစ္စည်းများ ရောက်ရှိမှုကို တားဆီးရန်ဖြစ်ကြောင်း ထိုင်းနိုင်ငံက ပြောကြားထားပါသည်။

ထိုင်းက နယ်မြေတချို့ ပြန်သိမ်းထားပြီး ကမ္ဘောဒီးယားကို ရေကြောင်း ပိတ်ဆို့ထား

ထိုင်းက နယ်မြေတချို့ ပြန်သိမ်းထားပြီး ကမ္ဘောဒီးယားကို ရေကြောင်း ပိတ်ဆို့ထား သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၅ ရက်။  ထိုင်း…

  • December 15, 2025
×Close