သတင်း

တပ်ဖွဲ့ ဝင် အမျိုးသမီး တစ်ဦးက စစ်ရှောင်နှင့် တော်လှန်ရေး တပ်များမှ ကျပ် သိန်း ၃၀၀ နီးပါး လိမ်လည် သတင်းနှင့် မီဒီယာ ကွန်ရက်။ 
၂၀၂၅ ခုနှစ်၊ ဒီဇင်ဘာလ ၁၂ ရက်။ PNDF-KK တပ်ဖွဲ့ဝင်တစ်ဦးသည် တော်လှန်ရေး အဖွဲ့အစည်း အမည်ခံ၍ စစ်ရှောင်နှင့် ရဲဘော်များထံမှ ကျပ် သိန်း ၃၀၀ နီးပါး လိမ်လည်ထွက်ပြေးသွားသည်။ ပအိုဝ်းအမျိုးသား ကာကွယ်ရေးတပ်ဖွဲ့ - ခမ်းကောင် (PNDF – KK) မှ တပ်ဖွဲ့ဝင် အမျိုးသမီးတစ်ဦးသည် တော် လှန်ရေး တပ်ဖွဲ့ဝင်များနှင့် စစ်ဘေးရှောင် ပြည်သူများထံမှ စုစုပေါင်း ငွေကျပ် သိန်း ၃၀၀ နီးပါး လိမ်လည် ယူကာ ထိုင်းနိုင်ငံသို့ ထွက်ပြေးတိမ်းရှောင်သွားခဲ့ကြောင်း PNDF-KK နှင့် လိမ်လည်ခံရသူများက ပြောသည်။ ကရင်နီ တော်လှန်ရေး ရဲဘော်တစ်ဦးက “သူက တစ်ယောက်တည်း မဟုတ်တဲ့အခါကျတော့ Group နဲ့ရှိတော့ ရှင်းရှင်းပြောရင် ဒါကြားဖြန့်လုပ်တဲ့ပုံစံနဲ့ သွားဆင်တူနေပြီပေါ့နော်။ အကြောင်းမျိုးမျိုး အသနားခံပြီးတော့ လိမ် တယ်။ အဲ့လိုမျိုး လိမ်နည်းပေါင်းစုံပေါ့။ လိမ်ယူပြီဆိုကတည်းက ကျားဖြန့်ငွေလိမ်ဂိုဏ်းနဲ့ တူတူပဲပေါ့ နော်” ဟု ပြောသည်။ ငွေကြေးလိမ်လည်မှုများကို ကျူးလွန်ခဲ့သူမှာ ရဲဘော်သဲသဲ (ခ) မကေကေဦး ဆိုသူဖြစ်ပြီး၊ ၎င်းအား တပ်ပြေးမှု၊ တပ်ဖွဲ့အမည်အလွဲသုံးစားလုပ်မှု၊ ငွေကြေးလိမ်လည်မှုနှင့် အခြားပြစ်မှုများ ကြောင့် ဒီဇင်ဘာလ ၈ ရက်နေ့တွင် PNDF-KK ဗဟိုစစ်ကော်မရှင်မှ အလိုရှိသူအဖြစ် တရားဝင် ဝရမ်းထုတ်ပြန်ခဲ့သည်။ ရဲဘော်သဲသဲသည် တော်လှန်ရေးတပ်ဖွဲ့ဝင် ၈ ဦးနှင့် စစ်ဘေးရှောင်ပြည်သူများအပါအဝင် စုစုပေါင်း ၈ ဦးထံမှ ငွေကျပ် သိန်း ၃၀၀ နီးပါးကို နည်းမျိုးစုံဖြင့် လိမ်လည်ယူခဲ့ခြင်းဖြစ်ကြောင်း ကရင်နီ တော်လှန်ရေး ရဲဘော်တစ်ဦးက ပြောသည်။ လိမ်လည်ခံရသည့် အမှုကိစ္စများထဲတွင် တော်လှန်ရေးတပ်ဖွဲ့ဝင်များ၏ ရန်ပုံငွေများနှင့် စစ်ဘေးရှောင် ပြည်သူ များ၏ စုဆောင်းငွေများ ပါဝင်ခဲ့ပြီး၊ အချို့ငွေပမာဏများမှာ သိန်းချီရှိကြောင်း လိမ်လည်ခံရသူများနှင့် တော် လှန်ရေး ရဲဘော်များက ပြောသည်။ စီးပွားရေး တွဲဖက်လုပ်ကိုင်နေသူတစ်ဦးထံမှ ၉၃ သိန်း၊ ကလေးဆေးကုသရန် စုထားသည့် တော်လှန်ရေး ရဲဘော်တစ်ဦးထံမှ ၃၀ သိန်းနှင့် ဓာတ်ဆီဝယ်ရောင်းလုပ်သည့် အမျိုးသမီးတစ်ဦးထံမှ ၁၃ သိန်း စသည်ဖြင့် လိမ်လည်ခဲ့ခြင်းဖြစ်သည်။ ဓာတ်ဆီဝယ်ရောင်းလုပ်ငန်း လုပ်ကိုင်သူ အမျိုးသမီးတစ်ဦးကလည်း “ညီမတို့ ဓာတ်ဆီဝယ်ရောင်းတော့ သူ့အသိ ချယ်ရီကုန်းကားဝပ်ရှော့က သူက ရဲဘော်တွေကို ဈေးသက်သက်သာသာနဲ့ ပေးတာ၊ နင်တို့လိုချင် ငါမှာပေးမယ် တဲ့၊ ငါလည်း အမြတ်နည်းနည်းရတာပေါ့တဲ့ သူ့ဆေးဖိုး ကာမိအောင် ဆိုပြီးပြောတော့ အဲ့ဟာဆို ဝယ်ရောင်း မယ် ဆိုပြီး တစ်ပေပါမှာပေးမယ် ငွေတော့ကြိုလွှဲရမယ်ဆိုပြီး ပြောလို့ လွှဲပေးလိုက်တာ ၁၃ သိန်း၊ ဆီပေပါက ရောက် မလာဘူး” ဟု ပြောသည်။ ရဲဘော်သဲသဲသည် တပ်ဖွဲ့အမည်နှင့် တပ်ဖွဲ့ဝင်ကတ်ပြားကို အလွဲသုံးစားပြုခြင်း၊ စစ်ဘေးရှောင်များအချင်းချင်း စာနာကူညီတတ်မှုကို အသုံးချခြင်း စသည့် မတူညီသည့် လိမ်လည်မှု နည်းလမ်းများဖြင့် ကျူးလွန်ခဲ့ကြောင်း PNDF-KK ၏ ထုတ်ပြန်ချက်က ဖော်ပြသည်။ လက်ရှိတွင် PNDF-KK က ရဲဘော်သဲသဲ၏ ကျူးလွန်မှုများ အားလုံးကို စုံစမ်းဖော်ထုတ်ကာ နစ်နာသူများ အတွက် တရားမျှတမှုရအောင် ဆောင်ရွက်သွားမည်ဟု ထုတ်ပြန်ထားသော်လည်း ငွေကြေးလိမ်လည်သူမှာ ထိုင်းနိုင်ငံသို့ ထွက်ပြေးတိမ်းရှောင်နေသည်ဟု မြေပြင်ရဲဘော်များက ပြောသည်။ ကရင်နီပြည် အတွင်း၌ ပြီးခဲ့သည့် နိုဝင်ဘာလ ၁၃ ရက်နေ့က တော်လှန်ရေး ရဲဘော်ဟန်ဆောင်ကာ လူအယောက် ၆၀ ကျော်ထံမှ ရန်ပုံငွေနှင့် ထောက်ပံ့ကြေးများ လိမ်လည်ယူခဲ့သူ ကိုဆုပြည့်အောင်ကို ကရင်နီပြည် ရဲတပ်ဖွဲ့ (KSP) က ဖမ်းဆီးရမိခဲ့သည့် ဖြစ်စဉ်လည်း ရှိခဲ့သည်။ ဤဖြစ်စဉ်များက တော်လှန်ရေးနယ်မြေများအတွင်း ဂိုဏ်းဖွဲ့လိမ်လည်မှုများ တိုးပွားလာနေသည့် အန္တရာယ်ကို မီးမောင်းထိုးပြနေပါသည်။ ဓါတ်ပုံ - ပအိုဝ်းအမျိုးသား ကာကွယ်ရေးတပ်ဖွဲ့ - ခမ်းကောင် (PNDF - KK)  

တပ်ဖွဲ့ ဝင် အမျိုးသမီး တစ်ဦးက စစ်ရှောင်နှင့် တော်လှန်ရေး တပ်များမှ ကျပ် သိန်း ၃၀၀ နီးပါး လိမ်လည်

တပ်ဖွဲ့ ဝင် အမျိုးသမီး တစ်ဦးက စစ်ရှောင်နှင့် တော်လှန်ရေး တပ်များမှ ကျပ် သိန်း ၃၀၀ နီးပါး လိမ်လည် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၂…

  • December 12, 2025
ရပ်ဆိုင်းထိန်းချုပ်ထားသော ရုရှားပိုင်ဆိုင်မှုများမှ ယူကရိန်းထောက်ပံ့ရေးအတွက် EU သဘောတူညီချက်ရရန် နီးစပ် သတင်းနှင့် မီဒီယာ ကွန်ရက်။ ၂၀၂၅ ခုနှစ် ဒီဇင်ဘာလ ၁၀ ရက်။ ဥရောပသမဂ္ဂ (EU) သည် ၂၀၂၆ ခုနှစ်နှင့် ၂၀၂၇ ခုနှစ်များအတွက် ယူကရိန်းကို ငွေကြေးထောက်ပံ့ရန် ဖြေရှင်းချက်တစ်ရပ်ရရှိရန် အတော်လေးနီးစပ်လာပြီဖြစ်ကြောင်း EU ထိပ်သီးအစည်းအဝေး ဥက္ကဋ္ဌ Antonio Costa (အန်တိုနီယို ကော့စတာ) က အင်္ဂါနေ့တွင် ပြောကြားခဲ့သည်။ အမေရိကန်၏ ငွေကြေးထောက်ပံ့မှုများ လျော့နည်းလာချိန်တွင် EU ခေါင်းဆောင်များက ယူကရိန်းကို နောက်နှစ်နှစ်စာ ငွေကြေးထောက်ပံ့ရန် အောက်တိုဘာ ၂၃ ရက်၌ ကတိပြုခဲ့ကြပြီး ယင်းကတိကို အကောင်အထည်ဖော်ရန် ဒီဇင်ဘာ ၁၈ ရက်တွင် ဘရပ်ဆဲလ်မြို့၌ ကျင်းပမည့် ထိပ်သီးအစည်းအဝေး၌ ဆုံးဖြတ်မည်ဖြစ်သည်။ EU အစိုးရအဖွဲ့ အများစုက လိုလားနေသည့် နည်းလမ်းမှာ ၂၀၂၂ ခုနှစ်တွင် ရုရှားက ယူကရိန်းကို ကျူးကျော်ပြီးနောက်ပိုင်း ဥရောပ၌ ရပ်ဆိုင်းထိန်းချုပ်ထားသော ယူရို ၂၁၀ ဘီလီယံ ($244.15 ဘီလီယံ) တန်ဖိုးရှိသည့် ရုရှားအစိုးရပိုင် ပိုင်ဆိုင်မှုများ၏ အကျိုးအမြတ်များကို အသုံးပြုရန်ဖြစ်သည်။ ရပ်ဆိုင်းသိမ်းဆည်းထားသော ပိုင်ဆိုင်မှု အများစုမှာ ဘယ်လ်ဂျီယံတွင် ရှိနေသည်။ သို့သော် EU နိုင်ငံများသည် အဆိုပါ ရံပုံငွေ သုံးစွဲမှုနှင့်ပတ်သက်၍ ရုရှားက တရားစွဲဆို အောင်မြင်ခဲ့ပါက ဖြစ်ပေါ်လာမည့် ဘဏ္ဍာရေးအကျိုးဆက်များကို ကျန်သော EU နိုင်ငံများက ဝေမျှထမ်းဆောင်မည်ဟူသော ကတိကဝတ်ကို လိုချင်နေကြသည်။ ထိုအာမခံချက်ပေးရေးနှင့် ပတ်သက်သည့် ဆွေးနွေးမှုများ ပြုလုပ်နေပြီး ဒီဇင်ဘာ ၁၈ ရက် ထိပ်သီးအစည်းအဝေးတွင် အပြီးသတ် ဆုံးဖြတ်ရန် စီစဉ်ထားသည်။ ကော့စတာက ဒီဇင်ဘာ ၁၈ ရက်တွင် ဆုံးဖြတ်ချက်ချမည်ဖြစ်သော်လည်း သဘောတူညီချက်ရသည်အထိ ဒီဇင်ဘာ ၁၉ ရက် သို့မဟုတ် ၂၀ ရက်အထိ ဆက်လက်ဆွေးနွေးသွားမည်ဟုလည်း ပြောကြားခဲ့သည်။

ရပ်ဆိုင်းထိန်းချုပ်ထားသော ရုရှားပိုင်ဆိုင်မှုများမှ ယူကရိန်းထောက်ပံ့ရေးအတွက် EU သဘောတူညီချက်ရရန် နီးစပ်

ရပ်ဆိုင်းထိန်းချုပ်ထားသော ရုရှားပိုင်ဆိုင်မှုများမှ ယူကရိန်းထောက်ပံ့ရေးအတွက် EU သဘောတူညီချက်ရရန် နီးစပ် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင…

  • December 11, 2025
ထိုင်း-ကမ္ဘောဒီးယား တင်းမာမှုများကြောင့် SEA ဂိမ်းမှ ကမ္ဘောဒီးယားအသင်း နုတ်ထွက် သတင်းနှင့် မီဒီယာကွန်ရက်။ ၂၀၂၅ ခုနှစ် ဒီဇင်ဘာလ ၁၀ ရက်။ ထိုင်းနိုင်ငံက အိမ်ရှင်အဖြစ် လက်ခံကျင်းပနေသော ၃၃ ကြိမ်မြောက် အရှေ့တောင်အာရှ အားကစားပြိုင်ပွဲ (SEA ဂိမ်း) မှ ကမ္ဘောဒီးယား ကစားသမားအားလုံးသည် ယနေ့မနက်ပိုင်းတွင် နုတ်ထွက်သွားခဲ့သည်။ ယင်းသို့ နုတ်ထွက်ရခြင်းမှာ ထိုင်း-ကမ္ဘောဒီးယား နယ်စပ်တွင် တင်းမာမှုများ ပြန်လည်ဖြစ်ပွားလာပြီးနောက် ဒီဇင်ဘာ ၉ ရက်နေ့၌ ထိုင်းနိုင်ငံက ကမ္ဘောဒီးယားနိုင်ငံထဲရှိ ဒုံးကျည် သိုလှောင်စခန်းများကို တိုက်လေယာဉ်များဖြင့် တိုက်ခိုက်ခဲ့ခြင်းကြောင့် ဖြစ်သည်။ ကမ္ဘောဒီးယား အမျိုးသား အိုလံပစ်ကော်မတီ၏ အတွင်းရေးမှူးချုပ် Vath Chamroeun (ဗာ့သ် ချမ်ရုန်) က အရှေ့တောင်အာရှ အားကစားပြိုင်ပွဲ အဖွဲ့ချုပ် (SEAGF) သို့ ယနေ့မနက် ၁၀ နာရီခွဲတွင် နုတ်ထွက်ကြောင်း စာပို့ အကြောင်းကြားခဲ့သည်။ နုတ်ထွက်ရခြင်း၏ အဓိကအကြောင်းရင်းမှာ အားကစားသမားများ၏ ဘေးကင်းလုံခြုံရေးအတွက် စိုးရိမ်မကင်းဖြစ်ရခြင်းနှင့် မိသားစုဝင်များ၏ တောင်းဆိုမှုများကြောင့် ခက်ခဲသော ဆုံးဖြတ်ချက်ကို ချမှတ်ခဲ့ရခြင်းဖြစ်ကြောင်း ကော်မတီက အကြောင်းကြားစာတွင် ဖော်ပြသည်။ နိုဝင်ဘာလ ၂၆ ရက်နေ့ကတည်းက ဘောလုံး၊ ဘောလီဘောနှင့် ကိုယ်ခံပညာ စသည့် အားကစား အမျိုးအစား ၉ မျိုးမှ နုတ်ထွက်ခဲ့ပြီးဖြစ်သည်။ ယခုအခါတွင်မူ ကျန်ရှိနေသော အားကစားသမား ၁၁၀ ဦးလုံး နုတ်ထွက်သွားခြင်းဖြစ်သည်။ ကမ္ဘောဒီးယား အမျိုးသား အိုလံပစ်ကော်မတီသည် နုတ်ထွက်သွားသည့် အားကစားသမား ၁၁၀ အပါအဝင် အားကစားအဖွဲ့ ထွက်ခွာရေးအတွက် SEAGF နှင့် ပူးပေါင်းဆောင်ရွက်သွားမည်ဟုလည်း ပြောကြားခဲ့သည်။

ထိုင်း-ကမ္ဘောဒီးယား တင်းမာမှုများကြောင့် SEA ဂိမ်းမှ ကမ္ဘောဒီးယားအသင်း နုတ်ထွက်

ထိုင်း-ကမ္ဘောဒီးယား တင်းမာမှုများကြောင့် SEA ဂိမ်းမှ ကမ္ဘောဒီးယားအသင်း နုတ်ထွက် သတင်းနှင့် မီဒီယာကွန်ရက်။၂၀၂၅ ခုနှစ်၊ ဒီဇင်ဘာလ ၁၀ ရက်။  ထိုင်းနိ…

  • December 11, 2025
တောင်ကိုရီးယား လေကြောင်းကာကွယ်ရေးဇုန်အတွင်း ရုရှား-တရုတ် စစ်ဘက်လေယာဉ်များ ဝင်ရောက် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၁၀ ရက်။ တရုတ်-ဂျပန် တင်းမာမှုများအကြား ရုရှားနှင့် တောင်ကိုရီးယားနိုင်ငံများပါ ပါဝင်လာနေသော အခြေအနေတစ်ရပ် ဖြစ်ပေါ်လာခဲ့သည်။ တောင်ကိုရီးယား ပူးတွဲဦးစီးချုပ်ရုံး၏ ထုတ်ပြန်ချက်အရ ရုရှားစစ်ဘက်လေယာဉ် ၇ စီးနှင့် တရုတ်စစ်ဘက်လေယာဉ် ၂ စီး စုစုပေါင်း ၉ စီးသည် အင်္ဂါနေ့ မနက် ၁၀ နာရီခန့်တွင် ကိုရီးယား လေကြောင်းကာကွယ်ရေး ဇုန် (KADIZ) အတွင်းသို့ ဝင်ရောက်လာခဲ့သည်။ ထိုသို့ ဝင်ရောက်လာမှုကြောင့် တောင်ကိုရီးယားသည် ၎င်း၏ ဂျက်တိုက်လေယာဉ်များကို စေလွှတ်ခဲ့ရသည်။ တောင်ကိုရီးယား စစ်တပ်က အဆိုပါလေယာဉ်များသည် လေကြောင်းပိုင်နက်ထဲသို့ ဝင်ရောက်ခဲ့ခြင်းမဟုတ်ဘဲ လေကြောင်းကာကွယ်ရေး ဇုန်အတွင်းသို့သာ ဝင်ရောက်ခဲ့ခြင်းဖြစ်ကြောင်း ပြောကြားခဲ့သည်။ ကျူးကျော်လာသော လေယာဉ်များသည် နာရီဝက်အတွင်း ထိုနယ်မြေမှ ပြန်လည်ထွက်ခွာသွားသည်ဟုလည်း ယွန်ဟပ်သတင်းဌာနက ဖော်ပြသည်။ တရုတ်ကာကွယ်ရေးဝန်ကြီးဌာနကမူ ၎င်းတို့၏ လေယာဉ်များသည် တရုတ်-ရုရှား နှစ်ပတ်လည် ပူးပေါင်းဆောင်ရွက်မှု အစီအစဉ်များ၏ အစိတ်အပိုင်းအဖြစ် ရုရှားစစ်တပ်နှင့် ပူးတွဲလေ့ကျင့်ရေး ပြုလုပ်ခဲ့ခြင်းဖြစ်သည်ဟု ထုတ်ပြန်သည်။ တရုတ်နှင့် ရုရှားတို့သည် ၂၀၁၉ ခုနှစ်ကတည်းက KADIZ အတွင်းသို့ စစ်ဘက်လေယာဉ်များ ပျံသန်းသည့် ပူးတွဲလေ့ကျင့်မှုများ ပြုလုပ်ခဲ့ဖူးပြီး၊ ၂၀၂၂ ခုနှစ်တွင် ရုရှားက ယူကရိန်းစစ်ပွဲ စတင်ပြီးနောက်တွင် နှစ်နိုင်ငံအကြား သံတမန်နှင့် ကာကွယ်ရေးဆိုင်ရာ ဆက်ဆံရေးများကို ပိုမိုတိုးမြှင့်ခဲ့သည်။ ပြီးခဲ့သည့်နှစ် နိုဝင်ဘာလကလည်း ယခုကဲ့သို့ KADIZ အတွင်း ဝင်ရောက်လာသော တရုတ်နှင့် ရုရှားလေယာဉ်များကြောင့် တောင်ကိုရီးယားက ဂျက်တိုက်လေယာဉ်များ စေလွှတ်ခဲ့ရဖူးသည်။

တောင်ကိုရီးယား လေကြောင်းကာကွယ်ရေးဇုန်အတွင်း ရုရှား-တရုတ် စစ်ဘက်လေယာဉ်များ ဝင်ရောက်

တောင်ကိုရီးယား လေကြောင်းကာကွယ်ရေးဇုန်အတွင်း ရုရှား-တရုတ် စစ်ဘက်လေယာဉ်များ ဝင်ရောက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၁၀ ရက်။  …

  • December 11, 2025
ကမ္ဘာ့စစ်တုရင် စံချိန်သစ်ကို တင်လိုက်သည့် အိန္ဒိယက ၃ နှစ်သားလေး သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၉ ရက်။ အိန္ဒိယနိုင်ငံမှ အသက် ၃ နှစ်အရွယ် ကလေးငယ်တစ်ဦးသည် နိုင်ငံတကာ စစ်တုရင်အဖွဲ့ချုပ် (FIDE) ၏ တရားဝင် အဆင့်သတ်မှတ်ချက် (Rating) ကို ရယူနိုင်ခဲ့သည့် ကမ္ဘာ့အငယ်ဆုံး စစ်တုရင်ကစားသမားအဖြစ် မှတ်တမ်းဝင်သွားခဲ့သည်။ ဒီဇင်ဘာ ၆ ရက်နေ့တွင် FIDE က ကြေညာခဲ့သည့်အတိုင်း Sarwagya Singh Kushwaha (ဆာဝက်ဂျာဆင်း ကုရှ်ဝါဟာ) သည် အသက် ၃ နှစ်၊ ၇ လနှင့် ရက် ၂၀ ဖြင့် ယင်းစံချိန်ကို တင်ခဲ့ခြင်းဖြစ်သည်။ FIDE Rating ရရှိရန် အဆင့်သတ်မှတ်ခံထားရသူ အနည်းဆုံး ၅ ဦးကို အနိုင်ယူပြီး အနိမ့်ဆုံး Rating ၁၄၀၀ ရရှိရန် လိုအပ်သော်လည်း Sarwagya လေးကမူ Rapid Rating ၁၅၇၂ ဖြင့် စတင်ပွဲထွက်နိုင်ခဲ့သည်။ အိန္ဒိယ နိုင်ငံ Madhya Pradesh ပြည်နယ်မှလာသည့် Kushwaha သည် အသက် ၂ နှစ်ခန့်ကတည်းက စစ်တုရင် စတင်ကစားခဲ့ပြီး တစ်ရက်လျှင် ၄ နာရီမှ ၅ နာရီအထိ ကစားလေ့ရှိသည်။ ဖခင်ဖြစ်သူ Siddharth Singh က ၎င်း၏သားသည် ရွယ်တူကလေးများထက် ပိုမို စိတ်ရှည်သည်းခံနိုင်ပြီး စားပွဲပေါ်တွင် ငြိမ်သက်စွာ ထိုင်နိုင်ခြင်းသည် အဓိက အားသာချက်ဖြစ်ကြောင်း ပြောကြားခဲ့သည်။ ၂၀၂၅ ခုနှစ်အတွင်း Kushwaha လေးသည် အသက် ၂၀ ကျော် ကမ္ဘာ့အဆင့်ဝင် ပြိုင်ဘက် ၃ ဦးကို အနိုင်ယူခဲ့သည့် မှတ်တမ်းများလည်း ရှိခဲ့သည်။ ယခင်က စံချိန်ဟောင်းပိုင်ရှင်မှာလည်း အိန္ဒိယနိုင်ငံမှပင် ဖြစ်သည့် Anish Sarkar ဖြစ်ပြီး သူသည် အသက် ၃ နှစ်၊ ၈ လနှင့် ၁၉ ရက်အရွယ်တွင် Rating ၁၅၅၀ ရခဲ့ဖူးသည်။ Kushwaha လေးကမူ အသက်ပိုငယ်သည့်အပြင် Rating လည်း ပိုမြင့်ခဲ့သည်။

ကမ္ဘာ့စစ်တုရင် စံချိန်သစ်ကို တင်လိုက်သည့် အိန္ဒိယက ၃ နှစ်သားလေး

ကမ္ဘာ့စစ်တုရင် စံချိန်သစ်ကို တင်လိုက်သည့် အိန္ဒိယက ၃ နှစ်သားလေး သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။ အိန္ဒိယနိုင်ငံမှ အသက် ၃ န…

  • December 9, 2025
ကုလသမဂ္ဂ အကူအညီ ရန်ပုံငွေများ သိသိသာသာ လျှော့ချ သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၉ ရက်။ ကုလသမဂ္ဂ (UN) သည် လူသားချင်းစာနာမှုဆိုင်ရာ အကူအညီလိုအပ်ချက်များ စံချိန်တင် မြင့်မားနေချိန်တွင်ပင် လာမည့် ၂၀၂၆ ခုနှစ်အတွက် ရန်ပုံငွေပမာဏကို ယခင်နှစ်က မျှော်မှန်းခဲ့သည့် ပမာဏ၏ ထက်ဝက်တိတိအထိ လျှော့ချလိုက်ရကြောင်း ထုတ်ပြန်ကြေညာခဲ့သည်။ ထိုသို့ လျှော့ချရခြင်းမှာ အဓိက အလှူရှင်နိုင်ငံများ၏ ထောက်ပံ့မှု သိသိသာသာ လျော့ကျသွားသောကြောင့် ဖြစ်သည်ဟု ဆိုသည်။ UN ၏ ထုတ်ပြန်ချက်အရ ၂၀၂၅ ခုနှစ် တစ်နှစ်လုံးတွင် အလှူငွေ ဒေါ်လာ ၁၂ ဘီလီယံသာ ရရှိခဲ့ပြီး ယင်းပမာဏမှာ ၁၀ နှစ်အတွင်း အနိမ့်ဆုံးဖြစ်ကာ စုစုပေါင်း လိုအပ်ချက်၏ လေးပုံတစ်ပုံကျော်ကျော်ကိုသာ ဖြည့်ဆည်းပေးနိုင်ခဲ့သည်။ အမေရိကန်သမ္မတ ဒေါ်နယ်လ် ထရမ့်နှင့် ဂျာမနီကဲ့သို့ အဓိက အနောက်နိုင်ငံ အလှူရှင်များက အကူအညီများကို ဖြတ်တောက်လိုက်ခြင်းကြောင့် UN ၏ ဘဏ္ဍာရေး အခြေအနေ တင်းကျပ်လျက်ရှိသည်။ UN အကူအညီဆိုင်ရာ အကြီးအကဲ Tom Fletcher က ယခု ရန်ပုံငွေ ဖြတ်တောက်မှုကြောင့် အကူအညီ အရေးတကြီး လိုအပ်နေသူ သန်း ၂၅၀ ထဲမှ အသက်အန္တရာယ် အနီးဆုံး ဖြစ်သည့် ၈၇ သန်း ကိုသာ ဦးစားပေး ကူညီရန်အတွက် ဒေါ်လာ ၂၃ ဘီလီယံ တောင်းခံရန် ဆုံးဖြတ်လိုက်ရကြောင်း ပြောကြားခဲ့သည်။ ကျန်ရှိသော သန်းချီသည့် လူများအား အကူအညီပေးနိုင်တော့မည် မဟုတ်ကြောင်း UN က ဝန်ခံလိုက်သည်။ ၂၀၂၆ ခုနှစ်အတွက် ဦးစားပေး အကူအညီ အများဆုံး လိုအပ်သော ဒေသများအဖြစ် ဂါဇာ၊ ဆူဒန်နှင့် ဆီးရီးယား တို့ကို သတ်မှတ်ထားပြီး၊ Norwegian Refugee Council (NRC) လို အဖွဲ့အစည်းများကလည်း ဒီမိုကရက်တစ် ကွန်ဂိုနှင့် မြန်မာနိုင်ငံ တို့လို နေရာများတွင် အကူအညီ မရသူ သန်းချီ ရှိလာမည်ကို စိုးရိမ်ကြောင်း ထုတ်ဖော် ပြောကြားခဲ့သည်။

ကုလသမဂ္ဂ အကူအညီ ရန်ပုံငွေများ သိသိသာသာ လျှော့ချ

ကုလသမဂ္ဂ အကူအညီ ရန်ပုံငွေများ သိသိသာသာ လျှော့ချ သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။  ကုလသမဂ္ဂ (UN) သည် လူသားချင်းစာနာမှု…

  • December 9, 2025
ဥရောပ-တရုတ် ကုန်သွယ်ရေး မညီမျှမှုပြင်ဆင်ရန် ပြင်သစ်တောင်းဆို သတင်းနှင့်  မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၉ ရက်။ ပြင်သစ်သမ္မတ အီမန်နျူရယ် မက်ခရွန်သည် ဥရောပသမဂ္ဂ (EU) နှင့် ကုန်သွယ်ရေးတွင် ကြီးမားစွာ ပိုလျှံနေသည့် တရုတ်နိုင်ငံအား ယင်းကိစ္စကို ဖြေရှင်းရန်အတွက် အရေးယူဆောင်ရွက်မှုများ ပြုလုပ်ရန် တိုက်တွန်း ပြောကြားလိုက်သည်။ ဒီဇင်ဘာ ၅ ရက်မှ ၇ ရက်အထိ တရုတ်နိုင်ငံသို့ သွားရောက်ခဲ့သည့် ခရီးစဉ်အပြီး တနင်္ဂနွေနေ့ (ဒီဇင်ဘာ ၇ ရက်) တွင် ပြင်သစ်စီးပွားရေးသတင်းစာ Les Echos ကို ပြောကြားရာ၌ မက်ခရွန်က ၎င်းအနေဖြင့် တရုတ်သမ္မတ ရှီကျင့်ဖျင်ကို တရုတ်ဘက်မှ မတုံ့ပြန်ပါက ဥရောပသားများအနေဖြင့် မလွဲမရှောင်သာ ပြင်းထန်သော အရေးယူဆောင်ရွက်မှုများ လုပ်ဆောင်လာရမည်ဖြစ်ကြောင်း တိတိကျကျ ပြောကြားခဲ့ကြောင်း ဖွင့်ဟခဲ့သည်။ ယင်းအရေးယူမှုများသည် အမေရိကန်ပြည်ထောင်စုက ပြုလုပ်ခဲ့သည့်အတိုင်း တရုတ်ထုတ်ကုန်များအပေါ် အကောက်ခွန်များ စည်းကြပ်ခြင်းမျိုး ဖြစ်နိုင်သည်ဟုလည်း ၎င်းက ဆိုသည်။ ၂၀၂၄ ခုနှစ်တွင် EU နှင့် တရုတ်နိုင်ငံတို့အကြား ကုန်သွယ်ရေးလိုငွေသည် ယူရို ဘီလီယံ ၃၀၀ ကျော် ($350 ဘီလီယံ) အထိ ကျော်လွန်ခဲ့ကြောင်း Les Echos က ဖော်ပြသည်။ မက်ခရွန်သည် ၎င်း၏ခရီးစဉ်အတွင်း တရုတ်သမ္မတ ရှီကျင့်ဖျင်အပြင် ဝန်ကြီးချုပ် လီချန် နှင့် နိုင်ငံခြားရေးဆိုင်ရာ အကြီးအကဲ ဝမ်ယိတို့နှင့်ပါ တွေ့ဆုံခဲ့သည်။ ကုန်သွယ်ရေးလိုငွေကို လျှော့ချရန် တရုတ်၏ တိုက်ရိုက်ရင်းနှီးမြှုပ်နှံမှုများကို EU က ပိုမိုလက်ခံသင့်သော်လည်း တရုတ်စီးပွားရေးလုပ်ငန်းများအား "သားရဲတိရစ္ဆာန်များ" ကဲ့သို့ ပြုမူလုပ်ဆောင်ခွင့် မပေးသင့်ကြောင်းလည်း သမ္မတ မက်ခရွန်က အလေးပေးပြောကြားခဲ့သည်။

ဥရောပ-တရုတ် ကုန်သွယ်ရေး မညီမျှမှုပြင်ဆင်ရန် ပြင်သစ်တောင်းဆို

ဥရောပ-တရုတ် ကုန်သွယ်ရေး မညီမျှမှုပြင်ဆင်ရန် ပြင်သစ်တောင်းဆို  သတင်းနှင့်  မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။  ပြင်သစ်သမ္မတ အီ…

  • December 9, 2025
ကမ္ဘောဒီးယား ဒုံးကျည် သိုလှောင်ရုံကို ထိုင်းက F-16 လေယာဉ်များဖြင့် တိုက်ခိုက် သတင်းနှင့် မီဒီယာ ကွန်ရက်။
၂၀၂၅ ခုနှစ်၊ ဒီဇင်ဘာလ ၉ ရက်။ ထိုင်းဘုရင့်လေတပ် (Royal Thai Air Force) က ဒီကနေ့ ဒီဇင်ဘာလ ၉ ရက်နေ့တွင် ကမ္ဘောဒီးယားနိုင်ငံ၊ ဥဒုံမီးချိုင်း (Udon Meechai) ပြည်နယ်ရှိ ဆမ်ရွန်း (Samrong) မြို့လယ်ရှိ အတွဲလိုက် ဒုံးကျည်များ ဖြစ်သည့် BM-21 ဒုံးကျည် သိုလှောင်ရုံ တစ်ခုကို ဖျက်ဆီးခဲ့သည်က ပြောကြားခဲ့သည်။ ထိုင်းလေတပ်သည် လေဆာဖြင့် လမ်းညွှန်သည့် ဗုံးများ (laser-guided bombs) ကို အသုံးပြု၍ ဖျက်ဆီးခဲ့ပြီး ယင်းစစ်ဆင်ရေးအတွက် F-16 ကို အသုံးပြုခဲ့သည်ဟု ထိုင်းလေတပ်ကို ကိုးကား၍ Khaosod  သတင်းဌာနက သတင်းဖော်ပြသည်။ အဆိုပါ သိုလှောင်ရုံသည် ထိုင်းနိုင်ငံကို တိုက်ခိုက်ရာတွင် အသုံးပြုခဲ့သော လက်နက်ကြီးများ ကို သိုလှောင်ထားသည့် နေရာဖြစ်ကြောင်း လေတပ်က ဖော်ပြသည်။ လေကြောင်းတိုက်ခိုက်မှုကြောင့် မြေပြင်တွင် အင်အားပြင်းထန်သော ထပ်ဆင့်ပေါက်ကွဲမှုများ (secondary explosions) ဖြစ်ပွားခဲ့သည်ဟု ထိုင်းလေတပ်က ထုတ်ပြန်သည်။ ဤတိုက်ခိုက်မှုမတိုင်မီက ကမ္ဘောဒီးယားသည် ထိုင်းနိုင်ငံရှိ နေရာများစွာကို BM-21 ဒုံးကျည်များ၊ လက်နက်ကြီးများ နှင့် အသေခံ ဒရုန်းများ (suicide drones) ဖြင့် ပြင်းပြင်းထန်ထန် တိုက်ခိုက်မှုများ လုပ်ဆောင်နေကြောင်း ထိုင်း စစ်တပ်က သတင်းထုတ်ပြန်သည်။   အင်္ဂါနေ့ နံနက်ပိုင်းကစ၍ မိမိကိုယ်ကို ခုခံကာကွယ်ခွင့် အရ ထိုင်းစစ်တပ်က တုံ့ပြန်နေကြောင်းလည်း ဖြည့်စွက်ပြောကြားခဲ့သည်။ ထိုင်းလက်နက်ကိုင်တပ်ဖွဲ့များက ကမ္ဘောဒီးယားအပေါ် သည်းခံနိုင်စွမ်း ကုန်ဆုံးပြီ ဖြစ်ပြီး စစ်ပွဲအတွက် အပြည့်အဝ ပြင်ဆင်ထားကြောင်း အတည်ပြု ပြောဆိုခဲ့သည်။ ကမ္ဘောဒီးယားတပ်ဖွဲ့များက လက်နက်ကြီးများ အသုံးပြုသည် ဟု အတည်ပြုနိုင်ပါက ထိုင်းနိုင်ငံအနေဖြင့် ကြိုတင်တိုက်ခိုက်မှုများ ပြုလုပ်ရန် အသင့်ရှိကြောင်း ထိုင်းစစ်တပ်က အခိုင်အမာ ပြောကြားခဲ့သည်။

ကမ္ဘောဒီးယား ဒုံးကျည် သိုလှောင်ရုံကို ထိုင်းက F-16 လေယာဉ်များဖြင့် တိုက်ခိုက်

ကမ္ဘောဒီးယား ဒုံးကျည် သိုလှောင်ရုံကို ထိုင်းက F-16 လေယာဉ်များဖြင့် တိုက်ခိုက် သတင်းနှင့် မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။ ထိုင်းဘုရင့…

  • December 9, 2025
စစ်ရှောင်ဘဝ 'ငတ်မွတ်ခြင်း' နှင့် 'စိတ်ဒဏ်ရာ'များ ကြားမှ မယိမ်းယိုင်သည့် မိခင်များ
 သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ ဒီဇင်ဘာလ ၉ ရက်။ အားမီ ရေးသည်။ +++ ဖုံးကွယ်ထားရသည့် မျက်ရည်များ +++ ကရင်နီ စစ်ဘေးရှောင် တစ်ဦး ဖြစ်သူ ဒေါ်ကားခူဖောက စစ်ဘေးရှောင်ဘဝ အခက်အခဲများကို ပြောပြသည်။ “ကိုယ်ပြေးလာရတဲ့ လမ်းခရီးက ကိုယ်အသတ်ခံရမှာလား၊ သူတို့နဲ့ တွေ့မလား၊ အဲ့ဒီအချိန်ဆို အဒေါ်လေ ငိုမတတ်လောက်အောင် ခံစားရတယ်။ ငိုနေတာတောင်မှ မျက်ရည်မကျတဲ့အဆင့် အထိပေါ့နော်” ဟု လွန်ခဲ့သည့် နှစ်များ၏ ဖိစီးမှုကို ပြန်ပြောင်းပြောပြသည်။ ဒေါ်ကားခူဖော၏ ခင်ပွန်းသည်ကို စစ်အုပ်စုက သတ်ဖြတ်ခဲ့သည်။ ခင်ပွန်းသည် အသတ်ခံရသည့် အချိန်မှာ သူ့ဘဝအတွက် အဆိုးရွားဆုံး စိတ်ဒဏ်ရာကို ခံစားခဲ့ရသည်ဟု ဒေါ်ကားခူဖောက ပြောပြသည်။ မည်သို့ပင် စိတ်ထိခိုက်သည် ဖြစ်စေ ဒေါ်ကားခူဖောတယောက် မိသားစုဝင်များ စိတ်ဓါတ်ကျမည်ကို စိုးရိမ်သည်။ လက်ရှိပင်ပန်းဆင်းရဲမှုများကို မိသားစုဝင်များ မမြင်စေရန် ညဘက် အိပ်ယာထဲတွင်သာ အံကြိတ်နေခဲ့ရသည်ဟု ပြောပြသည်။ ကရင်နီ စစ်ရှောင်အမျိုးသမီး ဒေါ်ကားခူဖော သည် ၂၀၂၁ ခုနှစ်၊ မေလ ၂၉ ရက်နေ့ကတည်းက စစ်ဘေး စတင် ရှောင်ခဲ့ရသူ ဖြစ်သည်။ ကျန်းမာရေးမကောင်း၊ အလုပ်မရှိသည့်ကြားမှ မိသားစု စားဝတ်နေရေးနှင့် သားသမီးများ ငတ်ပြတ်မည်ကို စိုးရိမ်စိတ်ကြောင့် တစ်ခါတစ်ရံ ‘ရူးချင်သည့်စိတ် အထိ’ ဖြစ်လာရသည်ဟုလည်း ၎င်းက ဖွင့်ဟသည်။ +++ လူသားချင်းစာနာမှု ပျောက်ဆုံး၊ အငတ်ဘေးခြိမ်းခြောက်မှု +++ စစ်အာဏာသိမ်းပြီးနောက် ငါးနှစ်နီးပါးကာလအတွင်း ကရင်နီ (ကယား) ပြည်မှ စစ်ဘေးရှောင်ပြည်သူများသည် စစ်ကော်မရှင်တပ်၏ တိုက်ခိုက်မှုဒဏ်၊ လူ့အခွင့်အရေး ချိုးဖောက်မှုများအပြင် နိုင်ငံတကာ အထောက်အပံ့ ပြတ်တောက်မှုကြောင့် ‘အငတ်ဘေး’ အန္တရာယ်နှင့် စိတ်ပိုင်းဆိုင်ရာ ဖိအားမှုများကို ရင်ဆိုင်နေရသည်။ စစ်ရှောင်ကာလ ကြာမြင့်လာသည်နှင့်အမျှ လူသားချင်းစာနာမှု အကူအညီများ ပြတ်တောက်လာခြင်းက စစ်ရှောင်များကို အကြီးအကျယ် ဒုက္ခရောက်စေသည်။ ကရင်နီ စစ်ရှောင်အမျိုးသမီးများ၏ ပြောပြချက်အရ အလှူရှင်များ မလာသည်မှာ တစ်နှစ်ခန့် ရှိပြီဖြစ်ပြီး ဒေါ်ကားခူဖောတို့ကဲ့သို့ အခြေခံစားသောက်ကုန် နှစ်နှစ်ကျော် မရရှိသူများလည်း ရှိလာသည်။ လွိုင်ကော်မှ ဒီးမော့ဆိုသို့ စစ်ရှောင်လာသူ အမျိုးသမီး တစ်ဦးက “တစ်ချို့တောင်မှ ထမင်းနပ်မမှန်တော့ဘူး။ တစ်ရက်တစ်ရက် ရှာစားနေရတယ်။ တစ်အား ဒုက္ခရောက်တယ်လေး။ အလှူရှင်လည်း မလာတော့ ပိုဆိုးသွား တာ” ဟု လက်ရှိအခြေအနေကို ထုတ်ဖော်ပြောသည်။ Karenni Human Rights Group (KnHRG) ၏ မှတ်တမ်းများအရ စစ်ကော်မရှင်သည် စိုက်ပျိုးသီးနှံများ ရိတ် သိမ်းနေသော တောင်သူများကို ဒရုန်းဗုံးနှင့် လက်နက်ကြီးများဖြင့် ရည်ရွယ်ချက်ရှိရှိ တိုက်ခိုက်နေပြီး၊ အရပ်သား ၏ ဝင်ငွေရလမ်းကြောင်းနှင့် စားနပ်ရိက္ခာ လမ်းကြောင်းကို ပိတ်ဆို့နေခြင်း ဖြစ်နိုင်ကြောင်း သုံးသပ်သည်။ ဩဂုတ်လမှ အောက်တိုဘာလအတွင်း ဒီးမော့ဆိုနှင့် ဖရူဆိုမြို့နယ်တို့တွင် စပါးရိတ်သိမ်းနေသည့် တောင်သူ ၂ ဦး သေဆုံးပြီး ၈ ဦး ဒဏ်ရာရရှိခဲ့သည်။ ကရင်နီတပ်မတော် (KA) စစ်ရေးချုပ် ဗိုလ်မှူးကြီး ဘုန်းနိုင် က “တိုက်ပွဲမရှိဘူး။ ခြောက်လှန့်ပြီးတော့ ပစ်တယ် လေ။ လူထုတွေ အလုပ်မလုပ်နိုင်အောင် ငတ်အောင်လေ” ဟု စစ်ကော်မရှင်၏ ရည်ရွယ်ချက်ကို ထောက်ပြသည်။ KnHRG က ယင်းလုပ်ရပ်များသည် လူသားချင်းစာနာမှုဆိုင်ရာ ကြီးမားသော စိန်ခေါ်မှုဖြစ်ပြီး ရေရှည်တွင် အငတ်ဘေး ကြုံတွေ့လာနိုင်သည် ဟု သတိပေးထားသည်။ +++ စစ်ရေးတင်းမာမှုနှင့် အရပ်သားလုံခြုံရေး +++ ကရင်နီ (ကယား) ပြည်နယ်တွင် စစ်ကော်မရှင်တပ်နှင့် ကရင်နီတော်လှန်ရေး တပ်ပေါင်းစုတို့အကြား စစ်ရေး တင်းမာမှုများ ဆက်တိုက်မြင့်တက်နေသဖြင့် ဒေသခံပြည်သူများ၏ လုံခြုံရေးအခြေအနေမှာ စိုးရိမ်ဖွယ်ရာ ဖြစ်လာနေသည်။ နိုဝင်ဘာလ ၁၁ ရက်နေ့မှစ၍ ဖရူဆို - ဘောလခဲလမ်းပိုင်း တစ်နေရာတွင် ထိတွေ့တိုက်ပွဲများ ဖြစ်ပွားနေပြီး စစ်ကောင်စီတပ်ဖွဲ့က လက်နက်ကြီးများဖြင့် ရမ်းသမ်းပစ်ခတ်မှုများ ပြုလုပ်ခဲ့ကြောင်း ဒေသခံများက ပြောသည်။ နိုဝင်ဘာလ ၆ ရက်နေ့မှစ၍ ပြည်သူများ စစ်ရေးနယ်မြေထဲ မရောက်ရှိစေရန်နှင့် စစ်ကောင်မရှင်တပ်၏ ရည်ရွယ်ချက်ရှိရှိ တိုက်ခိုက်မှုများမှ ရှောင်ရှားနိုင်ရန်အတွက် ဖရူဆို - ထားလဲ - နန်းဖဲ - ဘောလခဲ လမ်းမကြီး တစ်လျှောက်နှင့် လမ်းသွယ်များအားလုံးကို KNDF က ရက်အကန့်အသတ်မရှိ ပိတ်ဆို့ထားရသည်။ စစ်ကော်မရှင် တပ်ဖွဲ့၏ လက်နက်ကြီးဖြင့် ပစ်ခတ်မှုကြောင့် အရပ်သားပစ်မှတ်များ ထိမှန်ပျက်စီးမှုများလည်း ရှိခဲ့သည်။ နိုဝင်ဘာလ ၁၃ ရက်နေ့တွင် ဖရူဆိုမြို့ အနောက်ဘက်ရှိ ကျေးရွာတစ်ရွာထဲသို့ လက်နက်ကြီးကျည် ၄ လုံးအထိ ကျရောက်ပေါက်ကွဲခဲ့သော်လည်း လူအထိအခိုက်မရှိခဲ့ပေ။ နိုဝင်ဘာ ၁၂ ရက်နေ့တွင်လည်း နန်းမယ်ခုံမြို့နယ် အတွင်း စစ်ကော်မရှင်၏ လက်နက်ကြီး ပစ်ခတ်မှုများကြောင့် ဘုန်းကြီးကျောင်းမုခ်ဦး ပျက်စီးခဲ့ပြီး အရပ်သားတစ်ဦးမှာ လက်နက်ကြီးအစ ရှပ်ထိဒဏ်ရာရခဲ့သည်။ လွိုင်ကော်မြို့နယ် အရှေ့ဘက်ခြမ်းရှိ စစ်ရှောင်စခန်းတစ်ခုတွင် ခိုလှုံနေသည့် အိမ်ထောင်စု တစ်ထောင်ဝန်းကျင် သည် စစ်ကော်မရှင်တပ်၏ မြေပြင်စစ်ကြောင်းထိုးလာမှုနှင့် လေကြောင်းတိုက်ခိုက်မှုများကြောင့် ဘေးကင်းရာ သို့ ထပ်ဆင့် ရွှေ့ပြောင်းတိမ်းရှောင်နေကြရသည်။ အဆိုပါ တိုက်ပွဲများကြောင့် ယခုကဲ့သို့ စပါးနှင့် မြေပဲ ရိတ်သိမ်းရမည့် ရာသီချိန်တွင် ဒေသခံတောင်သူများမှာ ၎င်းတို့၏ စိုက်ခင်းထဲသို့ မဝင်ရဲကြတော့ဘဲ အသက်မွေးဝမ်းကျောင်းအတွက် အခက်အခဲများနှင့် ရင်ဆိုင်နေရ ကြောင်း စစ်ရှောင်များနှင့် ဒေသခံများက ပြောသည်။ လက်ရှိ ကရင်နီပြည်၏ စစ်ရေးတင်းမာမှုကြောင့် စစ်ရှောင်များ၏ လုံခြုံရေးနှင့် စိတ်ကျန်းမာ ရေးသည် ပြင်းထန် စွာ ထိခိုက်နေသည်။ +++ စိတ်ဖိစီးမှု မြင့်တက်ခြင်းနှင့် အိမ်တွင်း ပဋိပက္ခ +++ စစ်ဘေးရှောင်ကာလ ကြာမြင့်လာခြင်း၊ စားဝတ်နေရေးနှင့် လုံခြုံရေးဆိုင်ရာ စိန်ခေါ်မှုများ ပြင်းထန်လာခြင်းတို့ ကြောင့် ကရင်နီ စစ်ဘေးရှောင်ပြည်သူများ၏ စိတ်ပိုင်းဆိုင်ရာ ကျန်းမာရေးအခြေအနေသည် ပြိုလဲမှုအန္တရာယ် နှင့် ရင်ဆိုင်နေရကြောင်း စစ်ရှောင်အမျိုးသမီးများနှင့် ဒေသခံလူ့အခွင့်အရေးအဖွဲ့များက ပြောသည်။ လွိုင်ကော်မှ စစ်ရှောင်အမျိုးသမီး၏ ဖွင့်ဟပြောဆိုချက်များအရ ဝင်ငွေမရှိခြင်း၊ အလှူရှင်မလာခြင်းနှင့် စစ်ရေး အန္တရာယ်များ ပေါင်းစပ်ပြီး နေ့စဉ် စိတ်ဖိစီးမှုဒဏ်ကို ခံစားနေရသည်။ ဝင်ငွေမရှိခြင်းနှင့် ကုန်ဈေးနှုန်း မြင့်တက်ခြင်းတို့ကြောင့် မိသားစုအတွင်း စကားများခြင်း၊ ရန်ဖြစ်ခြင်းများ ဖြစ်ပေါ်လာပြီး အိမ်ထောင်ရေးပါ ထိခိုက်လာသည်။ မိဘများသည် ကလေးများ၏ တောင်းဆိုမှုကို မဖြည့်ဆည်း နိုင်သောအခါ စိတ်တိုကာ အော်မိခြင်းများပင် ဖြစ်ပေါ်လာသည်။ လွိုင်ကော်မှ စစ်ရှောင်အမျိုးသမီး က “ကလေးကို စိတ်တိုပြီးတော့ အော်မိတယ်။ မိသားစုတွေနဲ့ အိမ်ထောင် ရေးလည်း စကားများရန်ဖြစ် စားဝတ်နေရေး အဆင်မပြေတဲ့ အခါကြတော့လေ။ စိတ်ဓာတ်က တစ်ဝက် ကျ သွားပြီပေါ့နော်” ဟု ရင်ဖွင့်သည်။ ထို့အပြင် စစ်ကောင်မရှင်တပ်၏ ညပိုင်း လေကြောင်းနှင့် လက်နက်ကြီး ပစ်ခတ်မှုများကြောင့် စစ်ရှောင်များ သည် အိပ်မရသော ညများစွာ ကြုံတွေ့ရပြီး ယင်းက စိတ်ဖိစီးမှုကို ပိုမိုမြင့်တက်စေသည်။ စစ်ရှောင်တစ်ဦးက “စိတ်ဆို ရူးချင်တဲ့စိတ် အထိတောင် ဖြစ်လာတယ်” ဟု ၎င်း၏ ပြင်းထန်သော ဖိစီးမှုကို ဖွင့်ဟသည်။ စိတ်ဖိစီးမှုများ ပြင်းထန်လာခြင်းကြောင့် စစ်ရှောင်များထဲတွင် နှလုံးဖောက်ခြင်း၊ သွေးတိုးတက်ခြင်း ကဲ့သို့သော ရုပ်ပိုင်းဆိုင်ရာ ကျန်းမာရေးပြဿနာများပါ ဖြစ်ပေါ်လာနေကြောင်း သိရသည်။ အာဟာရချို့တဲ့မှုနှင့် ကလေးများ၏ ပညာရေး အနာဂတ် ဝင်ငွေမရှိခြင်းနှင့် ကုန်ဈေးနှုန်း မြင့်တက်ခြင်းတို့က ကလေးများ၏ အာဟာရနှင့် ပညာရေးကို တိုက်ရိုက် ထိခိုက်နေစေသည်။ ငတ်မွတ်မှုနှင့် စိတ်ဖိစီးမှုတို့အပြင် အာဟာရချို့တဲ့မှုဒဏ်ကိုလည်း စစ်ရှောင်ကလေးငယ်များ ရင်ဆိုင်နေရသည်။ ဝင်ငွေမရှိခြင်းကြောင့် မိဘများက ကလေးများကို အာဟာရပြည့်ဝသော အသားငါး၊ ကြက်ဥများ ဝယ်မကျွေးနိုင် ဘဲ ရှိနေသည့် အရာကိုသာ ချော့မော့ကျွေးနေရသည်ဟု ဆိုသည်။ ဒေါ်ကားခူဖောက “ရေလုံပြုတ်လေးနဲ့ ဟင်းရည်လေးနဲ့ စားရရင်တောင်မှ ကံကောင်းပေါ့” ဟုသာ ချော့မော့ပေး နိုင်ကြောင်း ဖွင့်ဟသည်။ ဒေါ်ကားခူဖော၏ သမီးအကြီးမှာ မိသားစု၏ စားဝတ်နေရေး ဖိစီးမှုကြောင့် မောင်လေးများကို ဦးစားပေးရန် ကျောင်းဆက်မတက်တော့ပေ။ သမီးကြီး ကျောင်းထွက်လိုက်သော်လည်း ကျန်ကလေးငယ်များ၏ ကျောင်းလခပင် မတတ်နိုင်တော့သည့် အခြေအနေသို့ ရောက်ရှိနေသည်ဟု ဆိုသည်။ ကရင်နီ လူ့အခွင့်အရေးအဖွဲ့ (KnHRG) ကမူ စစ်ဘေးရှောင် လူဦးရေ နှစ်သိန်းကျော် အရေးပေါ် အကူအညီ လိုအပ်နေပြီး၊ ရေရှည်အတွက် စိတ်ကျန်းမာရေး စောင့်ရှောက်မှု အပါအဝင် အရေးပေါ် လူသားချင်းစာနာ ထောက်ထားမှု အကူအညီများ ပေးနိုင်ရေးအတွက် နိုင်ငံတကာအသိုင်းအဝိုင်းမှ ညှိနှိုင်းဆောင်ရွက်ပေးရန် တောင်းဆိုထားသည်။ ထိုစစ်ရှောင်များသည် ပိုမို ခိုင်မာသော စိတ်ဓာတ်ဖြင့် ရပ်တည်နိုင်ရန်အတွက် ရေရှည် အသက်မွေးဝမ်းကျောင်း ပညာရပ်များ သင်ယူခွင့် နှင့် အလှူရှင်များ၏ အမြဲမပြတ် ထောက်ပံ့ကူညီမှု လိုအပ်နေကြောင်း တောင်းဆို တိုက်တွန်းထားသည်။ +++ မယိမ်းယိုင်သည့် ဆုံးဖြတ်ချက် +++ စစ်ကော်မရှင်တပ်က ကုန်ဈေးနှုန်းသက်သာမှုကို အကြောင်းပြ၍ သော်လည်းကောင်း၊ ငွေကြေးထောက်ပံ့မှုများ (သို့မဟုတ်) ရွေးကောက်ပွဲဖြင့် သော်လည်းကောင်း နေရပ်ပြန်ရန် မျှားခေါ်မှုများ ရှိနေသော်လည်း စစ်ရှောင် အမျိုးသမီးများ၏ ဆုံးဖြတ်ချက်မှာ ခိုင်မာသည်။ ဒေါ်ကားခူဖော ၏ ပြတ်သားသော စကားမှာ “ငါတို့ ဘယ်လောက်ပဲ အခက်အခဲ ကြုံတွေ့နေပါစေ၊ ငတ်ပြတ်နေ ပါစေ လုံးဝ မပြန်ဘူး။ ဒီနိုင်ငံရေး မပြီးမချင်း အဒေါ်တို့က လုံးဝမပြန်ဘူးလို့ ဆုံးဖြတ်ထားတယ်” ဟု ပြော သည်။ အခက်အခဲမည်သို့ကြုံရသည်ဖြစ်စေ အောင်ပွဲရမည်ဆိုသော စိတ်မှာ လျော့ပါးသွားခြင်းတော့ မရှိကြပေ။ ကရင်နီ စစ်ရှောင်အမျိုးသမီးများ၏ ဖွင့်ဟပြောဆိုချက်များ အရ ၎င်းတို့ဘဝသည် အလွန်ပင်ပန်း ဆင်းရဲသော် လည်း ‘အရေးတော်ပုံ မအောင်မချင်း လုံးဝနေရပ်မပြန်’ ဟူသော မယိမ်းယိုင်သည့် ဆုံးဖြတ်ချက်ဖြင့် ရပ်တည် နေကြသည်ဟု ဆိုသည်။ လွိုင်ကော် စစ်ရှောင်အမျိုးသမီး ကလည်း “ပြန်မသွားချင်ဘူး။ ပြန်သွားရင်တော့ စစ်ခွေးလူပဲ ဖြစ်မှာပေါ့။ ကိုယ်က ကိုယ့်ပြည်သူဘက်ပဲ ကိုယ်ရပ်တည်မယ်။ အရေးတော်ပုံ မအောင်မချင်းသမျှတော့ မပြန်ကိုး မပြန် တာ” ဟု ထပ်လောင်းပြောသည်။

စစ်ရှောင်ဘဝ ‘ငတ်မွတ်ခြင်း’ နှင့် ‘စိတ်ဒဏ်ရာ’များ ကြားမှ မယိမ်းယိုင်သည့် မိခင်များ

စစ်ရှောင်ဘဝ 'ငတ်မွတ်ခြင်း' နှင့် 'စိတ်ဒဏ်ရာ'များ ကြားမှ မယိမ်းယိုင်သည့် မိခင်များ သတင်းနှင့်မီဒီယာ ကွန်ရက်။၂၀၂၅ ခုနှစ်၊ ဒီဇင်ဘာလ ၉ ရက်။ အားမီ ရေ…

  • December 9, 2025
×Close