သတင်း

ကင်ဂျုံအန်းကို နိုင်ငံတော် ရေးရာ ကော်မရှင် ဥက္ကဋ္ဌအဖြစ် ပြန်လည်ခန့်အပ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၃ ရက်။   မြောက်ကိုရီးယား ခေါင်းဆောင် ကင်ဂျုံအန်းဟာ အနောက်တိုင်းဝတ်စုံကို ဝတ်ဆင်ထားပြီး သူ့ရဲ့အဘိုးနဲ့ ဖခင်တို့ရဲ့ ရုပ်တုကြီးနှစ်ခုရှေ့မှာ ထိပ်တန်းအရာရှိတွေနဲ့အတူ စင်မြင့်အလယ်မှာ ထိုင်နေတာကို တွေ့ရပါတယ်။   ဒီဓါတ်ပုံကို မတ်လ ၂၃ ရက် တနင်္လာနေ့မှာ ထုတ်ပြန်ခဲ့တာက‌တော့ ကိုရီးယား ဗဟို သတင်း အေဂျင်စီ KCNA လို့ခေါ်တဲ့ မြောက်ကိုရီးယားရဲ့ နိုင်ငံပိုင် သတင်းဌာန ဖြစ်ပါတယ်။   ဒီရုပ်ပုံနဲ့ အတူ ဖော်ပြတဲ့ အကြောင်းအရာကတော့ မြောက်ကိုရီးယားနိုင်ငံရဲ့ အာဏာပိုင် ဥပဒေပြုလွှတ်တော်က ကင်ဂျုံအန်းကို နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌအဖြစ် ပြန်လည်ရွေးချယ်တင်မြှောက်လိုက်တဲ့ အကြောင်းပဲ ဖြစ်ပါတယ်။   နျူကလီးယား လက်နက်ပိုင်ဆိုင်ထားတဲ့ မြောက်ကိုရီးယားရဲ့ အမြင့်ဆုံး မူဝါဒချမှတ်ရေးနဲ့ အုပ်ချုပ်ရေးအဖွဲ့ဖြစ်တဲ့ နိုင်ငံတော်ရေးရာကော်မရှင် (State Affairs Commission) ရဲ့ အကြီးအကဲအဖြစ် ကင်ဂျုံအန်းကို ပြန်လည်ခန့်အပ်ကြောင်း KCNA သတင်းဌာနက ကြေညာခဲ့တာပါ။   "ဒီကနေ့ (မတ်လ ၂၂ ရက်) မှာ ကျင်းပတဲ့ ၁၅ ကြိမ်မြောက် ပြည်သူ့လွှတ်တော် ပထမအကြိမ် ညီလာခံမှာ ရဲဘော်ကင်ဂျုံအန်းကို မြောက်ကိုရီးယားနိုင်ငံရဲ့ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌအဖြစ် ပြန်လည်ရွေးချယ်လိုက်ပါတယ်" လို့ KCNA က ဖော်ပြခဲ့ပါတယ်။   အဲဒီ ဆုံးဖြတ်ချက်ဟာ မြောက်ကိုရီးယား ပြည်သူတစ်ရပ်လုံးရဲ့ တစ်ခဲနက် ဆန္ဒကို ထင်ဟပ်တာဖြစ်တယ်လို့လည်း သတင်းမှာ ပါရှိပါတယ်။   ဝေဖန်သူတွေကတော့ မြောက်ကိုရီးယားရဲ့ ရွေးကောက်ပွဲတွေဟာ ကြိုတင်သတ်မှတ်ထားပြီးသား ဖြစ်ပြီး ခေါင်းဆောင်ပိုင်းအတွက် ဒီမိုကရေစီနည်းကျ ယောင်ယောင်ပြရုံသက်သက်သာ ဖြစ်တယ်လို့ ထောက်ပြကြပါတယ်။   ကင်ဂျုံအန်းဟာ ၁၉၄၈ ခုနှစ်မှာ သူရဲ့အဘိုးဖြစ်သူ ကင်အီဆွန်း တည်ထောင်ခဲ့တဲ့ မြောက်ကိုရီးယားနိုင်ငံရဲ့ တတိယမြောက် အုပ်ချုပ်သူဖြစ်ပြီး ၂၀၁၁ ခုနှစ် ဖခင်ဖြစ်သူ ကွယ်လွန်ပြီးနောက်ပိုင်းကစလို့ အုပ်ချုပ်ခဲ့တာပါ။   ဒီညီလာခံမတိုင်ခင်မှာ လွှတ်တော်ကိုယ်စားလှယ် ၆၈၇ ဦးကို အရင်ရွေးချယ်ခဲ့ကြပြီး အသက် ၁၇ နှစ်အထက် မြောက်ကိုရီးယားနိုင်ငံသားတွေအနေနဲ့ အာဏာရပါတီက တင်သွင်းထားတဲ့ တစ်ဦးတည်းသော ကိုယ်စားလှယ်လောင်းကို ထောက်ခံဖို့ ဒါမှမဟုတ် ကန့်ကွက်ဖို့ပဲ ရွေးချယ်ခွင့်ရှိတာပါ။   လွှတ်တော်ကိုယ်စားလှယ်သစ်တွေကို ၉၉.၉၃ ရာခိုင်နှုန်းက ထောက်ခံမဲပေးခဲ့ပြီး ၀.၀၇ ရာခိုင်နှုန်းကသာ ကန့်ကွက်ခဲ့ကြောင်း၊ မဲပေးသူဦးရေ ၉၉.၉၉ ရာခိုင်နှုန်း ရှိခဲ့ကြောင်း KCNA က ဆိုပါတယ်။   နိုင်ငံရဲ့ တတိယ ခေါင်းဆောင်လည်း ဖြစ် တတိယ မျိုးဆက်လည်း ဖြစ်တဲ့ ကင်ဂျုံ အန်းက တော့ သူ့ရဲ့ ဆက်ခံသူအဖြစ် သမီးဖြစ်သူ ကင်ဂျူအေ Kim Ju Ae ကို မကြာသေးခင်က ရွေးချယ်ထားပါတယ်။

ကင်ဂျုံအန်းကို နိုင်ငံတော် ရေးရာ ကော်မရှင် ဥက္ကဋ္ဌအဖြစ် ပြန်လည်ခန့်အပ်

ကင်ဂျုံအန်းကို နိုင်ငံတော် ရေးရာ ကော်မရှင် ဥက္ကဋ္ဌအဖြစ် ပြန်လည်ခန့်အပ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၃ ရက်။  မြောက်ကိုရီးယား ခေါင…

  • March 23, 2026
စွမ်းအင်အရင်းအမြစ်များ အတိုက်ခံရပါက Hormuz ဟော်မုဇ် ရေလက်ကြား လုံးဝ ပိတ်ပစ်မည်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၃ ရက်။   အမေရိကန်သမ္မတ ဒေါ်နယ်ထရန့်က အီရန်နိုင်ငံအနေဖြင့် ဟော်မုဇ်ရေလက်ကြား (Strait of Hormuz) ကို ပြန်လည်ဖွင့်လှစ်ခြင်းမရှိပါက ၎င်း၏ လျှပ်စစ်ဓာတ်အားပေးစက်ရုံများကို တိုက်ခိုက်ဖျက်ဆီးမည်ဟု ရာဇသံပေးထားရာ အီရန်ဘက်ကလည်း အလားတူ လက်တုံ့ပြန်သွားမည်ဟု ထုတ်ဖော်ပြောဆိုလိုက်သည်။   အကယ်၍ အမေရိကန်၏ တိုက်ခိုက်မှုကို ခံရပါက ဟော်မုဇ်ရေလက်ကြားကို အကန့်အသတ်မရှိ ပိတ်ပစ်မည်ဖြစ်သည့်အပြင် ဒေသတွင်းရှိ အမေရိကန်နှင့် ဆက်နွှယ်သော အခြေခံအဆောက်အအုံများကိုပါ တိုက်ခိုက်သွားမည်ဟု အီရန်က သတိပေးထားသည်။   သမ္မတထရန့်က သတ်မှတ်ထားသည့် ၄၈ နာရီ ရာဇသံသည် ယနေ့ တနင်္လာနေ့ ညနေပိုင်း (မြန်မာစံတော်ချိန် အင်္ဂါနေ့ မွန်းတည့်ချိန်ခန့်) တွင် ပြည့်မြောက်မည်ဖြစ်သည်။   တစ်ချိန်တည်းမှာပင် အပြည်ပြည်ဆိုင်ရာ စွမ်းအင်အေဂျင်စီ (IEA) အကြီးအကဲ ဖာတစ် ဘီရိုလ်း (Fatih Birol) က လက်ရှိအခြေအနေသည် ၁၉၇၀ ပြည့်လွန်နှစ်များက ကြုံတွေ့ခဲ့ရသော ရေနံအကျပ်အတည်းထက် ပိုမိုဆိုးရွားနေပြီး ကမ္ဘာ့စီးပွားရေးအတွက် ကြီးမားသော ခြိမ်းခြောက်မှုဖြစ်နေကြောင်း သတိပေးခဲ့သည်။   အထူးသဖြင့် ဟော်မုဇ်ရေလက်ကြားကို အဓိကအားကိုးနေရသော အာရှနိုင်ငံများသည် ယခုအကျပ်အတည်း၏ဒဏ်ကို အဆိုးရွားဆုံး ခံစားရနိုင်ကြောင်း သိရသည်။   လက်ရှိတွင် အီရန်၏ ဒုံးကျည်တိုက်ခိုက်မှုများကြောင့် ကာတာနိုင်ငံ၏ သဘာဝဓာတ်ငွေ့ (LNG) တင်ပို့မှုများ ရပ်တန့်သွားခဲ့သည်။   IEA အနေဖြင့် ဈေးကွက်တည်ငြိမ်စေရန် အရန်ရေနံစည်ပေါင်း သန်း ၄၀၀ ထုတ်ပေးထားသော်လည်း ယင်းမှာ ယာယီဖြေရှင်းချက်သာဖြစ်သည်။   ဟော်မုဇ်ရေလက်ကြား ပြန်လည်ပွင့်လှစ်မှသာလျှင် အကျပ်အတည်း ပြေလည်နိုင်မည်ဖြစ်ကြောင်း ကျွမ်းကျင်သူများက သုံးသပ်ထားကြသည်။   #ဟော်မုဇ်ရေလက်ကြား #Hormuz #LNG

စွမ်းအင်အရင်းအမြစ်များ အတိုက်ခံရပါက Hormuz ဟော်မုဇ် ရေလက်ကြား လုံးဝ ပိတ်ပစ်မည်

စွမ်းအင်အရင်းအမြစ်များ အတိုက်ခံရပါက Hormuz ဟော်မုဇ် ရေလက်ကြား လုံးဝ ပိတ်ပစ်မည် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၃ ရက်။  အမေရိကန…

  • March 23, 2026
ဟော်မုဇ်ရေလက်ကြားကို ၄၈ နာရီအတွင်း ပြန်ဖွင့်ရန် ထရန့် ရာဇသံပေး သတင်းနှင့် မီဒီယာကွန်ရက်။
၂၀၂၆ ခုနှစ်၊ မတ်လ ၂၂ ရက်။   ဟော်မုဇ်ရေလက်ကြားကို ၄၈ နာရီအတွင်း ပြန်လည်ဖွင့်လှစ်ခြင်းမရှိပါက အီရန်၏ လျှပ်စစ်ဓာတ်အားပေးစက်ရုံများကို အမေရိကန်က အမြစ်ပြတ်ချေမှုန်းသွားမည်ဟု အမေရိကန်သမ္မတ ဒေါ်နယ်ထရန့်က ပြောကြားလိုက်သည်။   အမေရိကန်နှင့် အစ္စရေးတို့က အီရန်နိုင်ငံကို တိုက်ခိုက်ပြီးနောက်တွင် ကမ္ဘာလုံးဆိုင်ရာ ရေနံတင်ပို့မှု၏ ၂၀% ဖြတ်သန်းသွားသည့် ဟော်မုဇ်ရေလက်ကြားကို အီရန်က ပိတ်ဆို့ထားခဲ့ခြင်းဖြစ်သည်။   ဟော်မုဇ်ရေလက်ကြား မဖွင့်ပေးပါက အီရန်နိုင်ငံတွင် လျှပ်စစ်မီးရှိတော့မည်မဟုတ်ဟု သမ္မတထရန့်က ပြောသည်။   အကယ်၍ မိမိတို့၏ ဓာတ်အားပေးစက်ရုံများ တိုက်ခိုက်ခံရပါက အရှေ့အလယ်ပိုင်းဒေသရှိ အမေရိကန်နှင့် ဆက်နွှယ်နေသော စွမ်းအင်ဆိုင်ရာ အခြေခံအဆောက်အအုံအားလုံးကို လက်တုံ့ပြန်သွားမည်ဟု အီရန်က တုံ့ပြန်သတိပေးထားသည်။   ဆော်ဒီအာရေဗျနှင့် ယူအေအီး (UAE) တို့က ယနေ့နံနက်ပိုင်းတွင် အီရန်ဘက်မှ ဒုံးကျည်ဖြင့် တိုက်ခိုက်မှုများကို ကြားဖြတ်ဟန့်တားနိုင်ခဲ့သည်ဟု ဆိုသည်။   တစ်ချိန်တည်းမှာပင် အစ္စရေးက အီရန်မြို့တော် (တီဟီရန်) ကို ယမန်နေ့ညပိုင်းက လေကြောင်းမှ အပြင်းအထန် တိုက်ခိုက်ခဲ့သည်ဟု ပြောကြားသည်။   အစ္စရေးတောင်ပိုင်းကို အီရန်ဘက်က တိုက်ခိုက်မှုများကြောင့် လူပေါင်း ၁၆၀ ကျော် ဒဏ်ရာရရှိခဲ့ကြောင်း အရေးပေါ်ကယ်ဆယ်ရေးအဖွဲ့များက ပြောသည်။   သမ္မတထရန့်သည် သူ၏ Truth Social လူမှုကွန်ရက်စာမျက်နှာမှ ဤသတိပေးချက်ကို အမေရိကန် အရှေ့ဘက်စံတော်ချိန် (EST) အရ မတ်လ ၂၁ ရက် (စနေနေ့)၊ ည ၇ နာရီ ၄၄ မိနစ် (မြန်မာစံတော်ချိန် မတ်လ ၂၂ ရက် (တနင်္ဂနွေနေ့) နံနက် ၇ နာရီ ၁၄ မိနစ်) တွင် တင်ခဲ့ခြင်းဖြစ်သည်။   သို့ဖြစ်ရာ မြန်မာစံတော်ချိန် မတ်လ ၂၄ ရက် (အင်္ဂါနေ့ နံနက် ၇ နာရီ ၁၄ မိနစ်) တွင် သတ်မှတ်ချိန် ၄၈ နာရီ ပြည့်မည်ဖြစ်သည်။   #ဟော်မုဇ်ရေလက်ကြား #Trump #ဒေါ်နယ်ထရန့်    

ဟော်မုဇ်ရေလက်ကြားကို ၄၈ နာရီအတွင်း ပြန်ဖွင့်ရန် ထရန့် ရာဇသံပေး

ဟော်မုဇ်ရေလက်ကြားကို ၄၈ နာရီအတွင်း ပြန်ဖွင့်ရန် ထရန့် ရာဇသံပေး သတင်းနှင့် မီဒီယာကွန်ရက်။၂၀၂၆ ခုနှစ်၊ မတ်လ ၂၂ ရက်။ ဟော်မုဇ်ရေလက်ကြားကို ၄၈ နာရီအတ…

  • March 22, 2026
ကမ္ဘာ့ဖလားအတွက် ကြိုတင်ငှားရမ်းထားသော အခန်းသောင်းဂဏန်း ပယ်ဖျက်   သတင်းနှင့် မီဒီယာကွန်ရက်။
၂၀၂၆ ခုနှစ်၊ မတ်လ ၂၂ ရက်။   ကမ္ဘာ့ဘောလုံးအဖွဲ့ချုပ် FIFA သည် ပြီးခဲ့သည့်အပတ်က အမေရိကန်ပြည်ထောင်စု မြို့သုံးမြို့တွင် ကြိုတင်စာရင်းသွင်းထားသော ဟိုတယ်အခန်း သောင်းနှင့်ချီ၍ ပယ်ဖျက်ခဲ့သည်ဟု Philadelphia Inquirer သတင်းစာတွင် ဖော်ပြထားသည်။   ဖီလာဒဲလ်ဖီးယားမြို့တွင် ကြိုတင်စာရင်းသွင်းထားသည့် ဟိုတယ်အခန်း ၁၀,၀၀၀ အနက် ၂,၀၀၀ ကို ပယ်ဖျက်ခဲ့ပြီး အလားတူလုပ်ဆောင်မှုမျိုးကို အမေရိကန်ရှိ အခြားအိမ်ရှင်မြို့ အနည်းဆုံး နှစ်မြို့တွင်လည်း ပြုလုပ်ခဲ့သည်ဟု Philadelphia Inquirer က ဆိုသည်။   ယခုလအစောပိုင်းက မက္ကဆီကိုစီးတီးရှိ ဟိုတယ်ဘိုကင် ၄၀ ရာခိုင်နှုန်းကို FIFA က ပယ်ဖျက်ခဲ့သည်ဟူသော သတင်းများ ထွက်ပေါ်လာပြီးနောက် ထပ်မံဖြစ်ပွားလာခြင်းဖြစ်သည်။   အမေရိကန်ပြည်ထောင်စုတွင် လက်ရှိဖြစ်ပွားနေသော လူဝင်မှုကြီးကြပ်ရေးဆိုင်ရာ တင်းကျပ်မှုများကြောင့် လာမည့်ကမ္ဘာ့ဖလားပြိုင်ပွဲသို့ လာရောက်မည့် နိုင်ငံတကာမှ အားကစားသမားများနှင့် ပရိသတ်များ ဝင်ရောက်နိုင်မှုအပေါ် အကြီးအကျယ် သက်ရောက်မှုရှိလာနိုင်ကြောင်း ကမ္ဘာ့ဖလားပရိသတ်များအကြား စိုးရိမ်မှုများ မြင့်တက်နေသည်။   ယခုနှစ်နွေရာသီတွင် ကျင်းပမည့် ကမ္ဘာ့ဖလားပွဲစဉ် ၁၀၄ ပွဲအနက် ၇၈ ပွဲကို အမေရိကန်တွင် ကျင်းပမည်ဖြစ်ပြီး ကနေဒါနှင့် မက္ကဆီကိုတို့တွင် ၁၃ ပွဲစီ ကျင်းပမည်ဖြစ်သည်။   လူဝင်မှုကြီးကြပ်ရေးဆိုင်ရာ စိုးရိမ်မှုများသည် ကြီးမားလာသဖြင့် နယူးဂျာစီပြည်နယ် လွှတ်တော်အမတ် Nellie Pou က ယခုနှစ်နွေရာသီ အမေရိကန်တွင် ကျင်းပမည့် ကမ္ဘာ့ဖလားပွဲစဉ်များ သို့မဟုတ် ပရိသတ်ပွဲတော် (Fan Festival) များ ကျင်းပရာနေရာ၏ တစ်မိုင်ပတ်လည်အတွင်း မည်သည့်ဖက်ဒရယ်ရန်ပုံငွေကိုမျှ လူဝင်မှုကြီးကြပ်ရေးဆိုင်ရာ အရေးယူဆောင်ရွက်မှုများအတွက် အသုံးမပြုရန် တောင်းဆိုသည့် ဥပဒေမူကြမ်းတစ်ခုကို တင်သွင်းခဲ့သည်။   ထို့ကြောင့်ပင် FIFA အနေဖြင့် အိမ်ရှင်မြို့ အနည်းဆုံး သုံးမြို့၌ ကြိုတင်ဘိုကင်လုပ်ထားသော ဟိုတယ်အခန်းပေါင်း သောင်းနှင့်ချီ၍ ပြန်လည်ပယ်ဖျက်လိုက်သည့် သတင်းမှာ စိုးရိမ်စရာ ဖြစ်လာခဲ့သည်။   FIFA ၏ ဟိုတယ်စာချုပ်များနှင့် နီးစပ်သော်လည်း တရားဝင်ထုတ်ဖော်ပြောဆိုခွင့်မရှိသူတစ်ဦးကမူ ဘောလုံးအဖွဲ့ချုပ်အနေဖြင့် ကမ္ဘာလုံးဆိုင်ရာ အခမ်းအနားကြီးများတွင် ပြုလုပ်လေ့ရှိသည့် ပုံမှန်စာချုပ်ပါ လုပ်ထုံးလုပ်နည်းအတိုင်း ဆောင်ရွက်ခြင်းဖြစ်ကြောင်းနှင့် အခြားအိမ်ရှင်မြို့များတွင်လည်း ဟိုတယ်အခန်းများ ပြန်လည်လျှော့ချမှုများ ရှိနေကြောင်း အတည်ပြုခဲ့သည်။   အဆိုပါအခန်းများကို FIFA ဝန်ထမ်းများ၊ မီဒီယာအဖွဲ့အစည်းများနှင့် တက်ရောက်သူများအတွက် သီးသန့်ဖယ်ထားခြင်းဖြစ်သည်။   ကမ္ဘာ့ဖလားပြိုင်ပွဲမတိုင်မီ လိုအပ်သည့် အခန်းအရေအတွက်ကို FIFA က ပြန်လည်ညှိနှိုင်းလေ့ရှိသည်မှာ ထူးဆန်းသည့်ကိစ္စမဟုတ်သော်လည်း ယခုနှစ်တွင် ပြုလုပ်သည့် ဆုံးဖြတ်ချက်များ၏ ပမာဏနှင့် အချိန်အခါမှာ အမေရိကန်အိမ်ရှင်မြို့များအတွက် စိန်ခေါ်မှုတစ်ခု ဖြစ်နေသည်။ လုံခြုံရေးကုန်ကျစရိတ်များအတွက် ဖက်ဒရယ်အစိုးရထံမှ ရန်ပုံငွေရရှိမှု ကြန့်ကြာနေခြင်းကြောင့် နယူးဂျာစီ၊ ဘော့စတွန်၊ မိုင်ယာမီနှင့် ဆန်ဖရန်စစ္စကို အပါအဝင် အမေရိကန်အိမ်ရှင်မြို့ အများအပြားသည် အကြီးစားပရိသတ်ပွဲတော် (Fan Festivals) များ ကျင်းပမည့်အစီအစဉ်ကို လျှော့ချခဲ့ရသည်။ အဆိုပါပွဲတော်များသည် လက်မှတ်မဝယ်နိုင်သည့် ပရိသတ်များအကြား အလွန်ရေပန်းစားလှပြီး၊ ပွဲတော်အစီအစဉ်များ ပြောင်းလဲသွားခြင်းမှာ ဟိုတယ်ပိုင်ရှင်များနှင့် စားသောက်ဆိုင်များအတွက် နောက်ထပ်စိုးရိမ်စရာ ကိစ္စတစ်ခု ဖြစ်လာခဲ့သည်။ #FIFAWorldCup2026 #FIFA #WorldCup2026  

ကမ္ဘာ့ဖလားအတွက် ကြိုတင်ငှားရမ်းထားသော အခန်းသောင်းဂဏန်း ပယ်ဖျက်

ကမ္ဘာ့ဖလားအတွက် ကြိုတင်ငှားရမ်းထားသော အခန်းသောင်းဂဏန်း ပယ်ဖျက် သတင်းနှင့် မီဒီယာကွန်ရက်။၂၀၂၆ ခုနှစ်၊ မတ်လ ၂၂ ရက်။ ကမ္ဘာ့ဘောလုံးအဖွဲ့ချုပ် FIFA သ…

  • March 22, 2026
ကွတ်ခိုင်တွင် MNDAA က တအာင်း ဘာသာ ဆိုင်းဘုတ်များ အလံများ ဖြုတ်   သတင်းနှင့် မီဒိယာ ကွန်ရက်။
၂၀၂၆ ခုနှစ်၊ မတ်လ ၂၂ ရက်။    ရှမ်းပြည် မြောက်ပိုင်း၊ ကွတ်ခိုင်မြို့နယ်အတွင်းရှိ တအာင်းကျေးရွာအဝင် ဆိုင်းဘုတ်များကို ဖျက်ဆီးပြီးနောက် တအာင်းဘာသာနှင့် အလံများ အသုံးမပြုရန် MNDAA သတိပေးလိုက်သည်။   ကွတ်ခိုင်မြို့နယ်အတွင်းရှိ တအာင်းအမျိုးသား လွတ်မြောက်ရေး တပ်မတော် (TNLA) ထိန်းချုပ်ခဲ့သည့် ကျေးရွာများတွင် ရွာအဝင်ဆိုင်းဘုတ်များကို ဖျက်ဆီးခဲ့ပြီး တအာင်းဘာသာနှင့် အလံများ ထပ်မံအသုံးမပြုရန် ကိုးကန့်တပ်မတော် (MNDAA) က သတိပေးကန့်သတ်မှုများ ပြုလုပ်လာကြောင်း ဒေသခံများက ပြောသည်။   ကွတ်ခိုင်မြို့ရှိ ဒေသခံအမျိုးသားတစ်ဦးက “နောက်ဆုံးအကြိမ် သတိပေးတာလို့ ပြောတယ်။ သူတို့အုပ်ချုပ်ရင် သူတို့အလံပဲ သုံးရမယ့်သဘောပေါ့။ အလံကတော့ အကုန်ဖြုတ်ရတယ်။ လမ်းတွေရော ကျောင်းတွေရော အကုန်လုံးပါတယ်” ဟု လက်ရှိမြေပြင်အခြေအနေကို ပြောပြသည်။   MNDAA က ကွတ်ခိုင်မြို့ကို သိမ်းယူပြီးနောက်ပိုင်း နယ်မြေစိုးမိုးမှု အပြောင်းအလဲများ ပြုလုပ်လာခြင်းဖြစ်ကာ တအာင်းဘာသာဖြင့် ရေးထိုးထားသည့် ဆိုင်းဘုတ်များနှင့် အလံများကို အတင်းအဓမ္မ ဖယ်ရှားခိုင်းနေခြင်း ဖြစ်သည်။   မတ်လ ၂၀ ရက်နေ့က ပြုလုပ်သည့် အစည်းအဝေးတွင် ဟိုကျန့်၊ ဟွေခုတ်၊ တုံဆင်၊ ကုန်းချမ်း အပါအဝင် ကျေးရွာ ၁၄ ရွာမှ တာဝန်ရှိသူများကို ခေါ်ယူကာ တအာင်းအလံများ အသုံးမပြုရန်နှင့် တအာင်းဘာသာအစား မြန်မာ (သို့မဟုတ်) တရုတ်ဘာသာဖြင့်သာ ရေးသားရန် ညွှန်ကြားခဲ့ကြောင်း ရွာသားများက ပြောသည်။   ထို့အပြင် ကျေးရွာများအတွင်းရှိ TNLA တပ်ဖွဲ့ဝင်များအနေဖြင့် လက်နက်အပ်နှံကြရန်နှင့် ဆက်လက် တာဝန်ထမ်းဆောင်လိုပါက MNDAA ထံတွင်သာ အမှုထမ်းရန် ဖိအားပေးမှုများ ရှိနေသည်။   TNLA နှင့် နီးစပ်သည့် ဒေသခံတစ်ဦးက “လက်နက်ကိုင်ချင်ရင် သူတို့ဆီမှာပဲ ကိုင်ရမယ်တဲ့။ လစာလည်း ပေးမယ်ပြောတယ်။ သူတို့အဖွဲ့မဝင်ချင်လည်း လက်နက်လာအပ်ရင် နေခွင့်ပေးမယ်ပြောတယ်” ဟု ပြောသည်။   လက်ရှိတွင် MNDAA သည် ဒေသခံများအား TNLA နှင့် ဆက်စပ်မှု ရှိ၊ မရှိ စစ်ဆေးမှုများ ပြုလုပ်နေသဖြင့် ဆက်စပ်သူအချို့မှာ ဘေးလွတ်ရာသို့ ထွက်ပြေးတိမ်းရှောင်နေကြရဆဲဖြစ်သည်။   ၁၀၂၇ စစ်ဆင်ရေးနောက်ပိုင်း မဟာမိတ်တပ်ဖွဲ့များအကြား နယ်မြေခွဲဝေမှု တင်းမာမှုများ ဖြစ်ပေါ်ခဲ့ပြီးနောက် မတ်လ ၂၁ ရက်နေ့တွင် နှစ်ဖက်တပ်များအကြား အပစ်ရပ်သဘောတူညီမှု ရယူနိုင်ခဲ့သည်ဟု သတင်းများ ထွက်ပေါ်နေသည်။   အဆိုပါ သဘောတူညီချက်တွင် တပ်များ ပြန်လည်နေရာချထားရေး၊ သုံ့ပန်းလဲလှယ်ရေးနှင့် နယ်မြေခွဲဝေရေး ကိစ္စရပ်များ ပါဝင်သည်ဟု ဆိုသော်လည်း မြေပြင်တွင် မဟာမိတ်အချင်းချင်းကြား ယဉ်ကျေးမှုနှင့် စာပေဆိုင်ရာ ကန့်သတ်မှုများကြောင့် ဒေသခံ တအာင်းတိုင်းရင်းသားများ အကြား စိုးရိမ်ပူပန်မှုများ မြင့်တက်လျက်ရှိသည်။   #TNLA #MNDAA #TNLA_MNDAAတင်းမာမှု #ကွတ်ခိုင်တိုက်ပွဲ #ညီနောင်မဟာမိတ်  

ကွတ်ခိုင်တွင် MNDAA က တအာင်း ဘာသာ ဆိုင်းဘုတ်များ အလံများ ဖြုတ်

ကွတ်ခိုင်တွင် MNDAA က တအာင်း ဘာသာ ဆိုင်းဘုတ်များ အလံများ ဖြုတ် သတင်းနှင့် မီဒိယာ ကွန်ရက်။၂၀၂၆ ခုနှစ်၊ မတ်လ ၂၂ ရက်။   ရှမ်းပြည် မြောက်ပ…

  • March 22, 2026
မူဆယ်-လားရှိုးလမ်းမပေါ်ရှိ KIA ဂိတ်များကို MNDAA က ဖယ်ရှားခိုင်းခြင်းမရှိ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၂ ရက်။   မူဆယ်-လားရှိုး ပြည်ထောင်စု လမ်းမကြီးပေါ်ရှိ ကချင်လွတ်လပ်ရေး တပ်မတော် (KIA) ၏ စစ်ဆေးရေး ဂိတ်များကို ကိုးကန့်တပ် (MNDAA) က ဖယ်ရှားခိုင်းသည်ဆိုသည့် သတင်းများမှာ အခြေအမြစ်မရှိကြောင်း KIA ဘက်က တုံ့ပြန်ပြောဆိုလိုက်သည်။   ၁၀၂၇ စစ်ဆင်ရေးနောက်ပိုင်း ရှမ်းပြည်မြောက်ပိုင်းတွင် တိုင်းရင်းသားလက်နက်ကိုင် မဟာမိတ်တပ်ဖွဲ့များ အကြား နယ်မြေစိုးမိုးမှု အပြောင်းအလဲများ ဖြစ်ပေါ်နေသည်။   ကွတ်ခိုင်တွင် ကိုးကန့်တပ် MNDAA နှင့် တအာင်းတပ် TNLA တို့ အကြား တိုက်ပွဲများ ဖြစ်ပွားပြီးနောက် မူဆယ်-လားရှိုး ပြည်ထောင်စုလမ်းမကြီးပေါ်ရှိ ကချင်လွတ်လပ်ရေး တပ်မတော် (KIA) ၏ စစ်ဆေးရေးဂိတ်များကို ကိုးကန့်တပ် (MNDAA) က ဖယ်ရှားခိုင်းသည်ဆိုသည့် သတင်း များ ထွက်ပေါ် လာခဲ့သည်။   အဆိုပါ သတင်းများနှင့် ပတ်သက်၍ KIA ဘက်က အခြေအမြစ်မရှိကြောင်း ပြန်လည်တုံ့ပြန်လိုက်ပြီး လက်ရှိ အချိန်အထိ တစ်စုံတစ်ရာ အကြောင်းကြားလာခြင်း မရှိသေးဟု ဆိုသည်။   ပြီးခဲ့သည့် မတ်လ ၁၄ ရက်နေ့က ကွတ်ခိုင်မြို့နယ်အတွင်း ညီနောင်မဟာမိတ်နှစ်ဖွဲ့ဖြစ်သည့် တအာင်းတပ် (TNLA) နှင့် ကိုးကန့်တပ် (MNDAA) တို့အကြား ထိတွေ့တိုက်ပွဲများ ဖြစ်ပွားခဲ့ပြီးနောက် MNDAA က ကွတ်ခိုင်မြို့ တစ်ခုလုံးကို ထိန်းချုပ်လိုက်သည့် အခြေအနေတွင် ယခုကဲ့သို့ ဂိတ်များဖယ်ရှားခိုင်းသည့် သတင်း များ လူမှုကွန်ရက်နှင့် မီဒီယာအချို့တွင် ပျံ့နှံ့လာခဲ့ခြင်းဖြစ်သည်။   အဆိုပါ သတင်းများနှင့်ပတ်သက်၍ KIO/KIA ၏ ပြောရေးဆိုခွင့်ရှိသူ ဗိုလ်မှူးကြီးနော်ဘူက “သူတို့ဘက်ကနေ အကြောင်းကြားလာတာ မရှိပါဘူး။ ဂိတ်ကို ဖယ်ခိုင်းတာလည်း မရှိဘူး” ဟု အတည်ပြု ပြောသည်။   KIA အနေဖြင့် သိန္နီနှင့် ကွတ်ခိုင်အကြားရှိ ဟိုမုန်းအပါအဝင် အဓိကနေရာနှစ်ခုတွင် အခွန်ကောက်ခံသည့် ဂိတ်များနှင့် လုံခြုံရေးဂိတ်များ ရှိနေဆဲဖြစ်သော်လည်း ပြည်ထောင်စုလမ်းမကြီးပေါ်တွင် အခွန်ကောက်ခံခြင်း ကိုမူ ရပ်ဆိုင်းထားသည်မှာ ကြာပြီဖြစ်ကြောင်း ဆိုသည်။   ဗိုလ်မှူးကြီးနော်ဘူက “ကျနေည်တို့ ဘက်ကနေတော့ ဒီပြည်ထောင်စု လမ်းမပေါ်မှာကတော့ အခွန်အကောက် တွေ မကောက်ဖို့ကတော့ ကျွန်တော်တို့ ဗဟိုကော်မတီရဲ့ ဆုံးဖြတ်ချက်ချထားတာကတော့ ကြာပါပြီ။ အဓိက ကတော့ ဂိတ် ၂ ဂိတ် ဖြစ်ပါတယ်။ ဟို ကျနော်တို့ ဟိုမုန်းဆိုတဲ့ နေရာနဲ့ ဟို သိန္နီနဲ့ ကွတ်ခိုင်အကြားပေါ့ ဒီ ၂ နေရာပါပဲ။ အဓိက ကျနော်တို့ အခွန်ကောက်တဲ့ ဂိတ်ကတော့ ဒါတွေက အခု အခွန်ကောက်တာက အခု မလုပ် တော့ဘူးလေ။ ကြာပါပြီ အဲဒီမှာ ဗဟိုကော်မတီရဲ့ ဆုံးဖြတ်ချက်ပါပဲ ဒီအခွန်တွေ မကောက်တာကတော့ ကြာ ပါပြီ။ ကျန်တဲ့နေရာမှာတော့ ဂိတ်တော့ရှိပါတယ်။ ဒါပေမဲ့ ဘယ်လို ပြောရမှာလဲ လုံခြုံရေး ဂိတ်တွေပေါ့။ အဲဒါတွေကတော့ ရှိပါတယ်။ အခုလည်း ရှိပါတယ် အဲဒါတွေကတော့” ဟု အသေးစိတ် ရှင်းပြသည်။   လက်ရှိတွင် MNDAA ဘက်မှ ကွတ်ခိုင်မြို့နယ်အတွင်း နယ်မြေစိုးမိုးမှုပိုင်းဆိုင်ရာ ပြန်လည်စီမံခန့်ခွဲမှုများ လုပ်ဆောင်နေခြင်းကြောင့် မဟာမိတ်တပ်ဖွဲ့များအကြား နားလည်မှုလွဲမှားခြင်းများ မရှိစေရန် KIA ဘက်မှ ဗဟိုကော်မတီ၏ လမ်းညွှန်ချက်ကိုသာ အဓိကထား ကိုင်တွယ်သွားမည်ဟု ဆိုသည်။   ၁၀၂၇ စစ်ဆင်ရေးအပြီး ရှမ်းမြောက်ဒေသတွင် တိုင်းရင်းသား လက်နက်ကိုင်တပ်ဖွဲ့ အသီးသီးက နယ်မြေ ထိန်း ချုပ်မှုများ မြှင့်တင်လာသဖြင့် အဖွဲ့အချင်းချင်းကြား နယ်မြေထိစပ်မှုနှင့် ဂိတ်များအရေးမှာ စစ်ရေး၊ နိုင်ငံရေး အရ အထူးစိတ်ဝင်စားစရာ ဖြစ်နေသော်လည်း လက်ရှိအချိန်အထိ KIO/KIA အား တရားဝင် အကြောင်းကြား ကန့်ကွက်လာမှုမျိုး မရှိသေးဘူးဟု ဆိုသည်။   ဓာတ်ပုံ - KSSM (ပုံဟောင်း) KIA စစ်ဆေးရေးဂိတ်မှ MNDAA တပ်ဖွဲ့သိမ်းယူသွားသည့် စစ်ဆေးရေး ဂိတ်သုံး ပစ္စည်းများ ပြန်လာပို့ပေးနေစဉ်။   #KIA #MNDAA #KIAဂိတ်  

မူဆယ်-လားရှိုးလမ်းမပေါ်ရှိ KIA ဂိတ်များကို MNDAA က ဖယ်ရှားခိုင်းခြင်းမရှိ

မူဆယ်-လားရှိုးလမ်းမပေါ်ရှိ KIA ဂိတ်များကို MNDAA က ဖယ်ရှားခိုင်းခြင်းမရှိ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၂ ရက်။  မူဆယ်-လားရှိ…

  • March 22, 2026
ပုသိမ်တွင် စက်သုံးဆီ ပြတ်လပ်လုနီးပါးဖြစ်   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ မတ်လ ၂၂ ရက်။   ဧရာဝတီတိုင်းမြို့တော် ပုသိမ်တွင် စက်သုံးဆီဈေးနှုန်းများ အဆမတန် မြင့်တက်ကာ ပြတ်လပ်မှုနှင့် စတင်ကြုံတွေ့နေရပြီဟု မြို့ခံများက ပြောသည်။   ပုသိမ်မြို့တွင် စက်သုံးဆီဈေးနှုန်းများ တဟုန်တိုး မြင့်တက်လာကာ ပြင်ပဈေးကွက်၌ ၉၂ တစ်လီတာလျှင် ကျပ် ၅,၅၀၀ အထိ စံချိန်တင် ဈေးနှုန်းမြင့်တက်နေသည့်အပြင် ဝယ်ယူရန် ခက်ခဲမှုများကြောင့် အခြေခံလူတန်းစားများဖြစ်သည့် ကယ်ရီသမားများ၊ လယ်သမားများနှင့် ငါးဖမ်းလုပ်ငန်းရှင်များ စားဝတ်နေရေး အခက်အခဲနှင့် ရင်ဆိုင်နေရသည်။   ပုသိမ်မြို့တွင် မတ်လ ၂၀ ရက်နေ့မှ စတင်ကာ စက်သုံးဆီဆိုင်ကြီးများ၌ ၉၂ တစ်လီတာလျှင် ၃,၆၈၀ ကျပ်ဖြင့် ရောင်းချပေးနေသော်လည်း အပြင်ဆိုင်များတွင်မူ ၅,၅၀၀ ကျပ်အထိ ဈေးပေါက်နေခြင်းဖြစ်သည်။ ဆီဆိုင်ကြီးများတွင် ဝယ်ယူရာ၌လည်း နာရီဝက်ထက်မနည်း တန်းစီစောင့်ဆိုင်းရသည့်အပြင် ကန့်သတ်ချက်ဖြင့်သာ ရောင်းချပေးနေသဖြင့် အခက်ကြုံနေရကြောင်း ဆီတန်းစီနေသူအချို့က ပြောသည်။   ဆိုင်ကယ်ဖြင့် ဆီတန်းစီခဲ့သူတစ်ဦးက “ဆိုင်မှာ တန်းစီပြီးဝယ်ရတာ တစ်ခါရဖို့ အနည်းဆုံး နာရီဝက်လောက်ကြာတယ်။ နေပူကြီးထဲမှာ ဆိုင်ကယ်တစ်စီးမှ ၅,၀၀၀ ဖိုးပဲ ရောင်းပေးတာ။ စုံတစ်နေ့၊ မတစ်နေ့ဆိုတော့ ၂ ရက်မောင်းဖို့ တစ်လီတာကျော်ကျော်လေးပဲ ရတာပေါ့။ ဒါကလည်း ပေးတာ ပြည့်ဦးမှ” ဟု ပြောသည်။     စက်သုံးဆီရရှိရန် အချိန်ပေးတန်းစီနေရသဖြင့် ကယ်ရီယာဉ်မောင်းများမှာ အငှားလိုက်ရန် အချိန်လျော့နည်းသွားပြီး နေ့စဉ်ဝင်ငွေ ထက်ဝက်ခန့် လျော့ကျသွားကာ စားဝတ်နေရေးအတွက် ပိုမိုကျပ်တည်းလာသည်ဟု ဆိုသည်။   စက်သုံးဆီဈေးနှုန်း မြင့်တက်မှုသည် သယ်ယူပို့ဆောင်ရေးကဏ္ဍသာမက စိုက်ပျိုးရေးနှင့် ငါးဖမ်းလုပ်ငန်းများကိုပါ တိုက်ရိုက်ရိုက်ခတ်လျက်ရှိသည်။ စိုက်ပျိုးရေးလုပ်ငန်းခွင်၌ ရေတင်ရန်အတွက် ဆီဝယ်ယူရခက်ခဲနေမှုအပေါ် လယ်သမားတစ်ဦးက ယခုကဲ့သို့ ပြောသည်။   “ဆီမရတော့ ရေမတင်နိုင်ဘူး။ အချိန်မီအောင် ရေရဖို့ ဈေးကြီးပေးပြီး ဝယ်ရတယ်။ ဒါတောင် လက်သိပ်ထိုးငွေပေးပြီး ဝယ်ရတာတောင် ခခယယ တောင်းတောင်းပန်ပန်ပေါ့။ ရောင်းပေးတာကိုပဲ ကျေးဇူးတင်ရသေးတယ်။”   ထို့ပြင် ပုသိမ်မြို့နှင့် မိုင် ၃၀ ကျော်ဝေးသည့် ချောင်းသာနှင့် ငွေဆောင်ကမ်းခြေတစ်ဝိုက်ရှိ ကျေးရွာများတွင်လည်း ဆီဝယ်ယူရန် မရှိသလောက် ရှားပါးနေသဖြင့် ငါးဖမ်းလှေများ ပင်လယ်ပြင်သို့ မထွက်နိုင်ဘဲ ဖြစ်နေသည်။ ငွေဆောင်ကားလမ်းမကြီးဘေးရှိ သစ်ဖြူကျေးရွာသားတစ်ဦးက ပြင်ပဈေးကွက်တွင် တစ်ဘူးလျှင် ၇,၅၀၀ ကျပ်အထိ ပေးဝယ်နေရသော်လည်း ပစ္စည်းမရှိသည့် အခြေအနေဖြစ်နေသည်ဟု ဆိုသည်။   စက်သုံးဆီဈေးနှုန်း မြင့်တက်မှုကြောင့် ဧရာဝတီတိုင်းအတွင်း စားသောက်ကုန်ဈေးနှုန်းများ အားလုံးမြင့်တက်သွားပြီး ကားခ၊ သင်္ဘောခများမှာလည်း နှစ်ဆခန့် ဈေးတက်သွားခဲ့သည်။   စက်သုံးဆီလုပ်ငန်းရှင်များ၏ သုံးသပ်ချက်အရ အရှေ့အလယ်ပိုင်းဒေသ စစ်မီးတောက်လောင်မှု ကြာရှည်နေပါက စက်သုံးဆီဈေးနှုန်းများ ဆက်လက်မြင့်တက်နိုင်ကာ ဆီပြတ်လတ်မှုအန္တရာယ်နှင့်ပါ ကြုံတွေ့ရနိုင်သည်ဟု ဆိုသည်။   #ပုသိမ် #လောင်စာဆီ #စက်သုံးဆီပြတ် #ဧရာဝတီတိုင်း  

ပုသိမ်တွင် စက်သုံးဆီ ပြတ်လပ်လုနီးပါးဖြစ်

ပုသိမ်တွင် စက်သုံးဆီ ပြတ်လပ်လုနီးပါးဖြစ် သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၂ ရက်။  ဧရာဝတီတိုင်းမြို့တော် ပုသိမ်တွင် စက်သုံးဆီဈေး…

  • March 22, 2026
ရွေးကောက်ပွဲ ကာလ စစ်ကော်မရှင်က ဒစ်ဂျစ်တယ် အမှောင်ချခဲ့ဟု IPCM စွပ်စွဲ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မတ်လ ၂၂ ရက်။   ရွေးကောက်ပွဲ ကာလအတွင်း စစ်ကော်မရှင်က နည်းပညာသုံး၍ သတင်းမီဒီယာများကို ဒစ်ဂျစ်တယ်အမှောင်ချပြီး ပြည်သူ့သတင်းသိပိုင်ခွင့်ကို ပိတ်ဆို့ဖြတ်တောက်ခဲ့သည်ဟု IPCM ထုတ်ပြန်သည်။   မြန်မာစစ်အုပ်စုသည် အတုအယောင် ရွေးကောက်ပွဲကာလအတွင်း ဆက်သွယ်ရေး အော်ပရေတာများကို ဖိအားပေးကာ အင်တာနက်နှင့် လွတ်လပ်သော မီဒီယာဝက်ဘ်ဆိုက်များကို ၉၀ ရာခိုင်နှုန်းကျော်အထိ စနစ်တကျ ပိတ်ဆို့ဖြတ်တောက်ခဲ့ကြောင်း လွတ်လပ်သော မြန်မာသတင်းမီဒီယာကောင်စီ (IPCM) က ပြောသည်။   ပိတ်ဆို့မှုအခြေအနေနှင့်ပတ်သက်၍ IPCM အတွင်းရေးမှူး ဦးတိုးဇော်လတ်က “မြန်မာပြည်မှာ လွတ်လပ်တဲ့ မီဒီယာတိုက်တွေကို ပိတ်ဆို့ထားတယ်။ ရွေးကောက်ပွဲ မတိုင်ခင်တုန်းက ၇၉ ရာခိုင်နှုန်းလောက် ပိတ်ထားပါ တယ်။ ဒါပေမဲ့ ရွေးကောက်ပွဲနဲ့ ရွေးကောက်ပွဲ အချိန် ၃ လကို ကျနော်တို့ လေ့လာကြည့်တဲ့ အချိန်မှာ ၉၃ ရာခိုင်နှုန်းအထိ ပိတ်သွားပါတယ်။ ဒီတစ်ခေါက် ပိုခေတ်မှီ လာတာကတော့ ပိတ်လို့ ပိတ်မှန်း မသိဘူး။ လွတ် လပ်တဲ့ မီဒီယာတိုက်ကို သွားရင် အင်တာနက်က နှေးသလိုလို ဆိုက်ကပဲ ဝင်လို့ မရသလိုလို အဲ့လိုဖြစ်အောင် တမင် နည်းပညာနဲ့ လုပ်ထားတယ်ဆိုတာ ကျနော်တို့ တွေ့ရှိပါတယ်” ဟု ပြောသည်။   ဒစ်ဂျစ်တယ်နည်းပညာသုံး၍ သတင်းအမှောင်ချမှုများသည် သတင်းသမားများအတွက် သတင်းရယူရန် ခက်ခဲစေရုံသာမက ပြည်သူလူထု၏ သတင်းအမှန်သိပိုင်ခွင့်ကိုပါ ဆိုးရွားစွာ ထိခိုက်စေလျက်ရှိသည်။       လွတ်လပ်သော မြန်မာသတင်းမီဒီယာကောင်စီ (IPCM) နှင့် (Human Rights in Myanmar) HRM အဖွဲ့တို့ ပူးပေါင်း၍ စစ်ကော်မရှင်၏ သတင်းစီးဆင်းမှု ပိတ်ဆို့ဖြတ်တောက်မှုများ အပေါ် မတ်လ ၁၆ ရက်နေ့တွင် အစီရင်ခံစာ ထုတ်ပြန်ခဲ့သည်။   အဆိုပါအစီရင်ခံစာအရ စစ်ကော်မရှင်သည် အာဏာသိမ်းချိန်မှစ၍ အင်တာနက်ပိတ်ဆို့မှုများ လုပ်ဆောင်ခဲ့ သော်လည်း ၂၀၂၅-၂၀၂၆ ရွေးကောက်ပွဲကာလတွင် နည်းပညာအသစ်များ အသုံးပြုကာ ပိုမိုတိုးမြှင့်လုပ်ဆောင် ခဲ့သည်ဟု ဆိုသည်။   စစ်ကော်မရှင်သည် ၎င်းတို့ထိန်းချုပ်ထားသည့် ဆက်သွယ်ရေးအော်ပရေတာများမှ တစ်ဆင့် လူကြည့်များသည့် ပင်မ မီဒီယာများသာမက တိုင်းရင်းသားမီဒီယာများနှင့် ဒေသအခြေပြုမီဒီယာများကိုပါ ကန့်သတ်ပိတ်ပင်ခဲ့သည်။   ထိုသို့ သတင်းအမှောင်ချထားမှုကြောင့် မြေပြင်ရှိ လူ့အခွင့်အရေး ချိုးဖောက်မှုများကို အချိန်နှင့်တစ်ပြေးညီ တင်ပြရန် အလွန်ခက်ခဲလာကြောင်း Narinjara သတင်းဌာနမှ သတင်းထောက် အေးမြတ်ခိုင်က ပြောသည်။   “သတင်းတစ်ခု ရဖို့ကို အရင်လိုမျိုး အချိန်နဲ့တပြေးညီ တိတိကျကျ အတည်ပြုမှုဆိုတဲ့ အပိုင်းမှာလည်း အရမ်း အားနည်း သွားတာတွေ ရှိတယ်။ ဖုန်းလိုင်းတွေ ဆက်သွယ်ရေး မရတော့ ရတဲ့အချိန်မှ တင်ပြနိုင်တယ်။ ဆက် သွယ်ရတဲ့ သတင်း အရင်းအမြစ်တွေကလည်း အကန့်အသတ်တွေ ရှိသွားတယ်။ အင်တာနက်လိုင်း ဖြတ် တောက် ခံထားရတဲ့ ကြားကာလတွေမှာဆိုရင် ဒေသခံပြည်သူရဲ့ သေဆုံးမှုတွေ၊ မတရား ညင်းပန်းနှိပ်စက် ခံရမှုတွေ၊ လူ့ အခွင့်အရေး ချိုးဖောက်ခံရမှုတွေ ဆိုတာကလည်း အရင်ကထက် ပိုပြီးတော့မှ များပြားတဲ့ အခြေအနေ မျိုးတွေကို တွေ့ရတယ်ပေါ့နော်။”   လက်ရှိတွင် ရခိုင်ဒေသ၌ ဖုန်းလိုင်းနှင့် အင်တာနက် ဖြတ်တောက်ခံထားရသည်မှာ နှစ်နှစ်ကျော် ကြာမြင့်လာပြီ ဖြစ်ရာ ဒေသခံများမှာ ‘မျက်စိပိတ်၊ နားပိတ်’ အခြေအနေနှင့် ရင်ဆိုင်နေရသည်ဟု ဆိုသည်။   စစ်ကော်မရှင်ပိုင် MPT နှင့် Mytel တို့အပြင် နိုင်ငံအတွင်းရှိ ဆက်သွယ်ရေးကုမ္ပဏီ ၁၂၀ ခန့်သည်လည်း လိုင်စင် သိမ်းဆည်းမည့် ခြိမ်းခြောက်မှုများကြောင့် စစ်တပ်၏ ပိတ်ဆို့ရေးယန္တရားတွင် ပါဝင်ကူညီခဲ့ကြသည်ဟု ဦးတိုးဇော်လတ်က ဆက်ပြောသည်။   “တကယ်တော့ မီဒီယာ Service ကုမ္ပဏီတွေသည် တကယ်တော့ နိုင်ငံတကာ ဥပဒေတွေအရ စားသုံးသူတွေကို ပိတ်ဆို့ခွင့် မရှိပါဘူး။ ဒါပေမဲ့ အဲ့ဒီ ကုမ္ပဏီ ၁၂၀ လုံးက စစ်တပ်ကို မကျော်လွန်နိုင်တော့ ကြောက်ကြောက်နဲ့ အကုန်လုံး ပိတ်ခဲ့တာတွေ့ပါတယ်။”   စစ်ကော်မရှင်က ဒစ်ဂျစ်တယ်နည်းပညာဖြင့် သတင်းအမှောင်ချရန် ကြိုးပမ်းနေသည့် တချိန်တည်းမှာပင် Facebook (Meta), Youtube နှင့် X (Twitter) ကဲ့သို့သော နိုင်ငံတကာနည်းပညာ ကုမ္ပဏီကြီးများက စစ်ကော်မရှင်၏ ဝါဒဖြန့်အကောင့်များနှင့် မိုင်တဲလ်ကုမ္ပဏီနှင့် ပတ်သက်သည့် အကောင့်ပေါင်း ထောင်ချီကို ဖယ်ရှားခြင်းဖြင့် တုံ့ပြန်ခဲ့ကြကြောင်း Justice For Myanmar (JFM) က အချက်အလက်များထုတ်ပြန်ခဲ့သည်။   IPCM နှင့် လူ့အခွင့်အရေး လှုပ်ရှားသူများကမူ ယခုကဲ့သို့သော သတင်းစီးဆင်းမှု ပိတ်ဆို့ခြင်းသည် စစ်ကော်မရှင်က ကျူးလွန်နေသည့် လူ့အခွင့်အရေး ချိုးဖောက်မှုများကို ဖုံးကွယ်ရန် ကြိုးပမ်းခြင်းဖြစ်သည်ဟု ဝေဖန်ရှုတ်ချထားကြပြီး ပြည်သူများ၏ သတင်းသိပိုင်ခွင့်ကို ကာကွယ်ပေးရန် တောင်းဆိုထားကြသည်။   #IPCM #သတင်းအမှောင်ချ #သတင်းလွတ်လပ်ခွင့်  

ရွေးကောက်ပွဲ ကာလ စစ်ကော်မရှင်က ဒစ်ဂျစ်တယ် အမှောင်ချခဲ့ဟု IPCM စွပ်စွဲ

ရွေးကောက်ပွဲ ကာလ စစ်ကော်မရှင်က ဒစ်ဂျစ်တယ် အမှောင်ချခဲ့ဟု IPCM စွပ်စွဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၂ ရက်။  ရွေးကောက်ပွဲ ကာလ…

  • March 22, 2026
တောင်ကြီးတွင် ရှမ်းကွင်းဘေးရှိ ဆိုင်ခန်း ၂၀၀ ကျော် အဓမ္မ ဖျက်သိမ်းခိုင်းနေ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ မတ်လ ၂၂ ရက်။   ရှမ်းပြည် အစိုးရအဖွဲ့၏ ရာထူးအပြောင်းအလဲ မတိုင်မီ စီမံကိန်းများ အမြန်ဆုံး စတင်အကောင်အထည်ဖော်ရန် တောင်ကြီး ရှမ်းကွင်းဘေးရှိ ဆိုင်ခန်းနှင့် အိမ်ရာများကို အတင်းအဓမ္မ ဖျက်သိမ်းခိုင်းနေသည်။   တောင်ကြီးမြို့၊ ရှမ်းပြည်နယ် အားကစားကွင်းဘေးရှိ လူနေတိုက်ခန်းများနှင့် ဆိုင်ခန်းပေါင်း ၂၀၀ ကျော်ကို မတ် ၁၈ ရက်နေ့ မှစတင်၍ အပြီးသတ်ဖျက်သိမ်း ပြောင်းရွှေ့နေရကြောင်း ဒေသခံများနှင့် လမ်းသွားလမ်းလာများ က ပြောသည်။   ပြည်နယ်ဝန်ကြီးချုပ် ဦးအောင်အောင်၏ အမိန့်ဖြင့် မတ်လ ၂၀ ရက်နေ့ကို နောက်ဆုံးထား ဖျက်သိမ်းခိုင်းထား ခြင်း ဖြစ်ပြီး သတ်မှတ်ရက်အတွင်း မဖျက်သိမ်းပါက ဘူဒိုဇာများဖြင့် အတင်းအဓမ္မ ဖျက်ဆီးမည်ဟု ခြိမ်း ခြောက်ထားသဖြင့် ဆိုင်ခန်းရှင်များမှာ အခက်အခဲများစွာကြားမှ ကိုယ်တိုင်ဖျက်သိမ်းနေကြရခြင်း ဖြစ်သည်။   အဆိုပါ ဖျက်သိမ်းမှုနှင့် ပတ်သက်၍ မြို့နယ်စည်ပင်သာယာရေးအဖွဲ့နှင့် နီးစပ်သူတစ်ဦးက “ဒီဇင်ဘာ ကတည်း က ဖျက်ခိုင်းထားတာ။ လူတွေကလည်း စာတင်ထားတယ်ဆိုတော့ ပေါ့ကြတာပေါ့။ ဒီကြားထဲ မဖျက်ခိုင်းတော့ ဘူးဆိုပြီး အမိန့်ထွက်သေးတယ်။ အဲဒါကြောင့်လည်း ပါတာပေါ့။ နောက်တော့ မဲရှုံးတော့ ရှုံးမဲမဲပြီး ပြန်ဖျက် ခိုင်းတာ။ အခုက လွှတ်တော်မစခင် ဦးအောင်အောင်က သူရှုပ်ထားသမျှ အကုန်ရှင်းခဲ့မှာ။ အဲဒီသဘောပဲ” ဟု ပြောသည်။   လက်ရှိတွင် ကုန်ဈေးနှုန်းကြီးမြင့်မှု၊ စက်သုံးဆီရှားပါးမှုနှင့် လုပ်အားခစရိတ် ကြီးမားမှုများကြောင့် ဆိုင်ခန်းရှင် များမှာ ကိုယ်တိုင်ကိုယ်ကျ ပါဝင်ဖျက်သိမ်းနေရပြီး စီးပွားရေးအရ ထိုးနှက်ချက်ကြီးစွာ ကြုံတွေ့နေရသည်။   အစိုးရဘက်မှ အားကစားကွင်း အရှေ့ဘက်ရှိ လူနေတိုက်ခန်းများအတွက် မင်းကျန်စစ်အိမ်ရာတွင် အငှားစာချုပ် ဖြင့် ပြန်လည်နေထိုင်ခွင့် (သို့မဟုတ်) ကျပ်သိန်း ၅၀ တန် ဂရမ်ပါမြေကွက်ဖြင့် အစားထိုးပေးမည်ဟု ဆိုထား သော်လည်း ဆိုင်ခန်းရှင်များအတွက်မူ နေရာမမျှတမှုများ ရှိနေသည်ဟု ဆိုကြသည်။   အားကစားကွင်း တောင်ဘက်ရှိ ကားပစ္စည်းဆိုင်များကို ရွှေညောင်မြို့ရှောင်လမ်းဘေးသို့လည်းကောင်း၊ မြောက် ဘက်ရှိ စားသောက်ဆိုင်များကို အဝေရာမီးပုံးပျံကွင်းဘေးသို့လည်းကောင်း ပြောင်းရွှေ့ခိုင်းထားရာ မြို့လည် ခေါင် နေရာကောင်းများမှ မြို့စွန်သို့ ရောက်ရှိသွားသဖြင့် အရောင်းအဝယ်ပျက်စီးမည်ကို ဆိုင်ခန်းရှင်များက စိုးရိမ်နေကြသည်။   ဆိုင်ခန်းရှင်တစ်ဦးက “မီးပုံးပျံကွင်းဘက်ဆိုတာ အဝေးသင်တက္ကသိုလ်တက်တဲ့ အချိန်လောက်ပဲ ရောင်းရတာ။ ကျန်တဲ့ရာသီဆိုရင် ဈေးဦးပေါက်ဖို့တောင် အနိုင်နိုင်ပါ။ ပြန်ရတဲ့နေရာကလည်း ဘာမှအဆင်မပြေဘူး။ ကား ပစ္စည်းဆိုင်တွေဆိုရင် ရွှေညောင်အထိ သွားရတာဆိုတော့ နေ့တိုင်း အတက်အဆင်းလုပ်ရမယ့် ဆီဖိုးနဲ့တင် မနည်းဘူး။ ဒီကာလကြီးမှာ အခုလိုပြောင်းရတာ အပူပေါ်အပူဆင့်တာပါပဲ” ဟု ရင်ဖွင့်သည်။   အဆိုပါ ဖျက်သိမ်းသည့်နေရာတွင် လူငယ်စင်တာ၊ ရေကူးကန်နှင့် အားကစားနည်းများအတွက် တိုးချဲ့ဆောက် လုပ်မည်ဟု ဝန်ကြီးချုပ်က အကြောင်းပြထားသော်လည်း မြို့ခံများကမူ ၎င်းတို့၏ ကိုယ်ကျိုးစီးပွား လာဘ်ပေး လာဘ်ယူမှုများအတွက်သာ ဖြစ်သည်ဟု မြို့ခံများက ဝေဖန်နေကြသည်။   စစ်အာဏာသိမ်းပြီးနောက်ပိုင်း တောင်ကြီးမြို့တွင် တာဝန်ကျသည့် အရာရှိကြီးများမှာ မြို့စည်ပင်သာယာရေးကို အကြောင်းပြကာ စီမံကိန်းအမျိုးမျိုး ဖော်ဆောင်၍ ကိုယ်ကျိုးရှာမှုများ ရှိနေကြောင်း Non-CDM သတင်းရင်း မြစ်များကလည်း အတည်ပြုပြောဆိုထားသည်။   လက်ရှိတွင် ရှမ်းပြည်အတွင်း စစ်ရေးပဋိပက္ခများနှင့် မတည်ငြိမ်မှုများ ရှိနေသည့်ကြားမှ ယခုကဲ့သို့ မြို့ပြ စီမံကိန်းများကို အတင်းအဓမ္မ အကောင်အထည်ဖော်နေခြင်းမှာ ပြည်သူလူထုအပေါ် ဝန်ထုပ်ဝန်ပိုး ပိုမိုဖြစ် စေကြောင်း ဒေသခံများက ဆိုကြသည်။   #တောင်ကြီး #ဆိုင်ခန်း #ဖျက်သိမ်းခံရ  

တောင်ကြီးတွင် ရှမ်းကွင်းဘေးရှိ ဆိုင်ခန်း ၂၀၀ ကျော် အဓမ္မ ဖျက်သိမ်းခိုင်းနေ

တောင်ကြီးတွင် ရှမ်းကွင်းဘေးရှိ ဆိုင်ခန်း ၂၀၀ ကျော် အဓမ္မ ဖျက်သိမ်းခိုင်းနေ သတင်းနှင့် မီဒီယာ ကွန်ရက်။၂၀၂၆ ခုနှစ်၊ မတ်လ ၂၂ ရက်။  ရှမ်းပြည် အ…

  • March 22, 2026
×Close