NMG Doh – Page 124 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Feb 5

ရုရှားနှင့် မြန်မာစစ်ကောင်စီအကြား ၅ နှစ်သက်တမ်းရှိ စစ်ရေးစာချုပ် ချုပ်ဆို သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၅ ရက်။ ရုရှားနိုင်ငံနှင့် မြန်မာစစ်ကောင်စီတို့အကြား ၂၀၃၀ ပြည့်နှစ်အထိ အကျုံးဝင်မည့် ၅ နှစ်သက်တမ်းရှိ စစ်ဘက်ဆိုင်ရာ ပူးပေါင်းဆောင်ရွက်ရေး သဘောတူညီချက်ကို လက်မှတ်ရေးထိုးခဲ့ကြောင်း ရုရှားအခြေစိုက် TASS သတင်းဌာနက ဖော်ပြခဲ့သည်။ ရုရှားလုံခြုံရေးကောင်စီ အတွင်းရေးမှူး ဆာဂေးရွှိုင်ဂူ မြန်မာနိုင်ငံသို့ လာရောက်သည့် ခရီးစဉ်အတွင်း ဤစာချုပ်ကို ချုပ်ဆိုခဲ့ခြင်းဖြစ်သည်။ အဆိုပါ သဘောတူညီချက်အရ ရုရှားနိုင်ငံသည် မြန်မာနိုင်ငံအား စစ်ရေးဘက်တွင်သာမက နိုင်ငံတကာမျက်နှာစာ၌ စစ်ကောင်စီဘက်မှ ရပ်တည်ပေးရန်အပါအဝင် ဘက်စုံကူညီမှုများ ပေးအပ်သွားမည်ဖြစ်သည်။ ပူးပေါင်းဆောင်ရွက်မှုများတွင် ထောက်လှမ်းရေး၊ လုံခြုံရေး၊ ဆိုက်ဘာတိုက်ခိုက်မှု ကာကွယ်ရေးနှင့် ငွေကြေးခဝါချမှု တိုက်ဖျက်ရေးတို့ ပါဝင်သည်။ ထို့အပြင် နျူကလီးယားနှင့် စွမ်းအင်ကဏ္ဍဆိုင်ရာ သင်တန်းများ ပေးအပ်ခြင်းနှင့် ရုရှား၏ ဂြိုဟ်တုနည်းပညာများကို အသုံးပြုနိုင်ရေးအတွက်လည်း အပြန်အလှန် သဘောတူညီခဲ့ကြသည်။

ရုရှားနှင့် မြန်မာစစ်ကောင်စီအကြား ၅ နှစ်သက်တမ်းရှိ စစ်ရေးစာချုပ် ချုပ်ဆို

Feb 5

ဒေါ်နယ်ထရမ့်နှင့် ရှီကျင်းပင် ကုန်သွယ်ရေး၊ ထိုင်ဝမ် အရေးများ တယ်လီဖုန်းဖြင့် ဆွေးနွေး သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၅ ရက်။ အမေရိကန်ပြည်ထောင်စုနှင့် တရုတ်နိုင်ငံတို့အကြား တင်းမာမှုများ လျှော့ပါးစေရန် ရည်ရွယ်၍ အမေရိကန်သမ္မတ ဒေါ်နယ်ထရမ့်နှင့် တရုတ်သမ္မတ ရှီကျင့်ဖျင်တို့သည် ၂၀၂၆ ခုနှစ်၊ ဖေဖော်ဝါရီလ ၄ ရက် (ဗုဒ္ဓဟူးနေ့) တွင် တယ်လီဖုန်းဖြင့် ဆက်သွယ်ဆွေးနွေးခဲ့ကြသည်။ အဆိုပါဆွေးနွေးမှုတွင် ပဲပိစပ်ကုန်သွယ်မှုနှင့် တိုင်ဝမ်အရေးတို့မှာ အဓိကအချက်များ ဖြစ်ခဲ့သည်။ တရုတ်နိုင်ငံအနေဖြင့် အမေရိကန်ထံမှ ပဲပိစပ်ဝယ်ယူမှုကို ယခင်တန်ချိန် ၁၂ သန်းမှ တန်ချိန် သန်း ၂၀ အထိ တိုးမြှင့်ရန် စဉ်းစားနေပြီး၊ ယင်းမှာ လာမည့် ဧပြီလတွင် ပြုလုပ်မည့် သမ္မတထရမ့်၏ ဘေဂျင်းခရီးစဉ်မတိုင်မီ ပြသသော ချစ်ကြည်ရေးလက္ခဏာတစ်ခုဖြစ်သည်။ သို့သော် အမေရိကန်က တိုင်ဝမ်သို့ ဒေါ်လာ ၁၁.၁ ဘီလီယံဖိုး လက်နက်ရောင်းချရန် စီစဉ်နေမှုကိုမူ သတိထားကိုင်တွယ်ရန် တရုတ်ဘက်က သတိပေးခဲ့သည်။ ထို့အပြင် နှစ်နိုင်ငံခေါင်းဆောင်များသည် အီရန်အရေး၊ ရုရှား-ယူကရိန်းစစ်ပွဲနှင့် စွမ်းအင်ကဏ္ဍများကိုလည်း ထည့်သွင်းဆွေးနွေးခဲ့ကြသည်။ အထူးခြားဆုံးအချက်မှာ သမ္မတ ရှီကျင့်ဖျင်သည် သမ္မတထရမ့်နှင့် မဆွေးနွေးမီ နာရီပိုင်းအလိုတွင် ရုရှားသမ္မတ ဗလာဒီမာပူတင်နှင့် ဗီဒီယိုကွန်ဖရင့်ဖြင့် ဆွေးနွေးခဲ့ပြီး ပူတင်အား တရုတ်နိုင်ငံသို့ လာရောက်ရန် ဖိတ်ကြားခဲ့ခြင်းဖြစ်သည်။ ဤလုပ်ရပ်သည် တရုတ်နိုင်ငံအနေဖြင့် အမေရိကန်နှင့် ဆက်ဆံရေးပြေလည်အောင် ကြိုးပမ်းနေသော်လည်း ရုရှားနှင့် မဟာဗျူဟာမြောက် မဟာမိတ်အဖြစ် ခိုင်မာစွာ ဆက်လက်ရပ်တည်နေကြောင်း ပြသလိုက်ခြင်း ဖြစ်သည်။

ဒေါ်နယ်ထရမ့်နှင့် ရှီကျင်းပင် ကုန်သွယ်ရေး၊ ထိုင်ဝမ် အရေးများ တယ်လီဖုန်းဖြင့် ဆွေးနွေး

Feb 5

နျူကလီးယား မပြန့်ပွားရေး စာချုပ် သက်တမ်းကုန်သွားပြီ သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၅ ရက်။ ကမ္ဘာ့အင်အားကြီးနိုင်ငံများဖြစ်ကြသော အမေရိကန်ပြည်ထောင်စုနှင့် ရုရှားနိုင်ငံတို့အကြား ချုပ်ဆိုထားသည့် "မဟာဗျူဟာမြောက် လက်နက်များ လျှော့ချရေးစာချုပ်" သို့မဟုတ် New START (New Strategic Arms Reduction Treaty) သည် ယနေ့ ၂၀၂၆ ခုနှစ်၊ ဖေဖော်ဝါရီလ ၅ ရက်နေ့တွင် သက်တမ်းကုန်ဆုံးသွားပြီ ဖြစ်သည်။ ဤသို့ နျူကလီးယားလက်နက် ထိန်းချုပ်ရေးဆိုင်ရာ နောက်ဆုံးလက်ကျန်စာချုပ် ပျက်ပြားသွားခြင်းကြောင့် ကမ္ဘာ့နိုင်ငံများအကြား လက်နက်အပြိုင်အဆိုင် ထုတ်လုပ်လာမည့်အရေးကို နိုင်ငံတကာခေါင်းဆောင်များနှင့် စစ်ဘက်ဆိုင်ရာပညာရှင်များက များစွာစိုးရိမ်လျက်ရှိကြသည်။ မဟာဗျူဟာမြောက် လက်နက်များ လျှော့ချရေးစာချုပ် (START) ကို ၁၉၉၁ ခုနှစ်တွင် ဆိုဗီယက်ယူနီယံနှင့် အမေရိကန်ပြည်ထောင်စုတို့အကြား ပထမဆုံးအကြိမ် လက်မှတ်ရေးထိုးခဲ့ကြသည်။ ဆိုဗီယက်ယူနီယံ ပြိုကွဲပြီးနောက် ၂၀၁၀ ပြည့်နှစ်၊ ဧပြီလ ၈ ရက်နေ့တွင် အမေရိကန်သမ္မတ ဘာရက်အိုဘားမားနှင့် ရုရှားသမ္မတ ဒီမီထရီမက်ဗီဒက်တို့က ချက်သမ္မတနိုင်ငံ၊ ပရဂ်မြို့၌ စာချုပ်သစ်ကို ထပ်မံလက်မှတ်ရေးထိုးခဲ့ကြရာမှ "New START" ဟု အမည်တွင်လာခဲ့ခြင်း ဖြစ်သည်။ အဆိုပါစာချုပ်၏ အဓိကသဘောတူညီချက်မှာ နှစ်နိုင်ငံလုံးတွင် တပ်ဆင်ထားသည့် နျူကလီးယားထိပ်ဖူး အရေအတွက်ကို ၁,၅၀၀ ထက် မကျော်လွန်စေရန်နှင့် တစ်ဖက်နိုင်ငံ၏ လက်နက်အခြေအနေကို အပြန်အလှန် သွားရောက်ကြည့်ရှု စစ်ဆေးနိုင်ရန်ဖြစ်သည်။ ယင်းသည် ကမ္ဘာ့နျူကလီးယားစစ်ပွဲ မဖြစ်ပွားစေရန် ထိန်းကျောင်းပေးထားသော အဓိကကျသည့် ယန္တရားတစ်ခုလည်း ဖြစ်သည်။ စာချုပ်သက်တမ်း ကုန်ဆုံးသွားခြင်းကြောင့် နျူကလီးယားလက်နက်ဆိုင်ရာ ပွင့်လင်းမြင်သာမှုများ ပျောက်ကွယ်သွားပြီး နိုင်ငံကြီးများအကြား သံသယများ ပိုမိုကြီးထွားလာနိုင်ကြောင်း ပညာရှင်များက ထောက်ပြကြသည်။ တစ်ဖက်နိုင်ငံ၏ လှုပ်ရှားမှုများကို မသိရှိနိုင်တော့သည့်အတွက် အမှားအယွင်းတစ်ခုခုကြောင့်ဖြစ်စေ၊ မှားယွင်းသော ဆုံးဖြတ်ချက်ကြောင့်ဖြစ်စေ နျူကလီးယားစစ်ပွဲအထိ ဦးတည်သွားနိုင်သည့် အန္တရာယ်ရှိနေသည်။ ရုရှားသမ္မတဟောင်း ဒီမီထရီမက်ဗီဒက်က ဤစာချုပ်ပျက်ပြားခြင်းသည် လူတိုင်းအတွက် ထိတ်လန့်စရာဖြစ်ကြောင်းနှင့် ကမ္ဘာစစ်အထိ ဦးတည်သွားနိုင်ကြောင်း သတိပေးထားသည်။ ရုရှားနိုင်ငံခြားရေးဝန်ကြီးဌာနကမူ ၎င်းတို့၏ အမျိုးသားလုံခြုံရေးအတွက် လိုအပ်သော စစ်ဘက်ဆိုင်ရာ အစီအမံများကို ဆက်လက်လုပ်ဆောင်သွားမည်ဟု ထုတ်ပြန်ထားသည်။ တစ်ဖက်တွင်လည်း အမေရိကန်သမ္မတ ဒေါ်နယ်ထရမ့်က စာချုပ်သက်တမ်းကုန်ဆုံးသွားခြင်းအပေါ် စိုးရိမ်မှုမရှိဘဲ ယခုထက် ပိုမိုကောင်းမွန်သည့် စာချုပ်သစ်ကို ထပ်မံချုပ်ဆိုနိုင်မည်ဟု ယုံကြည်နေသည်။ သို့သော် သမ္မတထရမ့်အနေဖြင့် စာချုပ်သစ်တွင် တရုတ်နိုင်ငံကိုပါ ပါဝင်စေလိုသော်လည်း တရုတ်ဘက်က စိတ်ဝင်စားမှုမရှိခြင်းနှင့် စာချုပ်သစ်ချုပ်ဆိုရန် အချိန်ကြာမြင့်နိုင်ခြင်းတို့ကြောင့် လက်နက်ထိန်းချုပ်မှုမဲ့နေသည့် ယခုကာလသည် အလွန်အန္တရာယ်ကြီးမားနေသည်ဟု ဝေဖန်မှုများရှိနေသည်။ ထို့အတူ ပုပ်ရဟန်းမင်းကြီး လီယို (Pope Leo) ကလည်း လက်နက်ပြိုင်ဆိုင်မှုအသစ်ကို ရှောင်ရှားရန်နှင့် စာချုပ်သစ်အတွက် အစွမ်းကုန်ကြိုးစားကြရန် တိုက်တွန်းမိန့်ကြားထားသည်။ လက်ရှိကမ္ဘာ့နျူကလီးယား အခြေအနေ ၂၀၂၅ ခုနှစ်၊ ခန့်မှန်းချက်များအရ ကမ္ဘာပေါ်တွင် ရုရှားနိုင်ငံသည် နျူကလီးယားထိပ်ဖူး ၅,၄၅၉ ခုဖြင့် အများဆုံးပိုင်ဆိုင်ထားပြီး၊ အမေရိကန်ပြည်ထောင်စုက ၅,၁၇၇ ခု၊ တရုတ်နိုင်ငံက ၆၀၀ ခု စသည်ဖြင့် အစဉ်လိုက် ပိုင်ဆိုင်ထားကြသည်။ နိုင်ငံ နျူကလီးယားထိပ်ဖူး အရေအတွက် (စုစုပေါင်း) ရုရှား ၅,၄၅၉ အမေရိကန် ၅,၁၇၇ တရုတ် ၆၀၀ ပြင်သစ် ၂၉၀ ဗြိတိန် ၂၂၅ အိန္ဒိယ ၁၈၀ ပါကစ္စတန် ၁၇၀ အစ္စရေး ၉၀ မြောက်ကိုရီးယား ၅၀ (၂၀၂၅ ခုနှစ်ခန့်မှန်းစာရင်းအရ) ကမ္ဘာပေါ်တွင် နိုင်ငံအလိုက် နျူကလီးယား ထိပ်ဖူး ပိုင်ဆိုင်မှု ဇယား လက်ရှိတွင် အမေရိကန်၊ ရုရှားနှင့် တရုတ်တို့သည် အသံထက်မြန်သည့် ဒုံးကျည်များ (Hypersonic missiles) နှင့် အဆင့်မြင့် ရေအောက်ဒရုန်းများကဲ့သို့သော ခေတ်မီနျူကလီးယားနည်းပညာများကို အပြိုင်အဆိုင် တိုးမြှင့်ထုတ်လုပ်နေကြသည်။ နိဂုံးချုပ်အားဖြင့် နျူကလီးယားအင်အားကြီးနိုင်ငံများအကြား လက်နက်ထိန်းချုပ်ရေးစာချုပ်များ မရှိတော့ခြင်းသည် ကမ္ဘာကြီးကို မတည်ငြိမ်မှုများနှင့် အန္တရာယ်များပြည့်နှက်နေသော ခေတ်သစ်တစ်ခုအတွင်းသို့ တွန်းပို့လိုက်ခြင်းဖြစ်ကြောင်း ပညာရှင်များက တညီတညွတ်တည်း သုံးသပ်ထားကြပါသည်။

နျူကလီးယား မပြန့်ပွားရေး စာချုပ် သက်တမ်းကုန်သွားပြီ

Feb 4

ဖလမ်းသို့တက်လာသည့် စစ်ကူစစ်ကြောင်း ကြားဖြတ်တိုက်ခိုက်ခံရ၊ ၃၀ ကျော်သေဆုံး   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၄ ရက်။ ချင်းပြည် မြောက်ပိုင်း၊ တော်လှန်ရေးတပ်ဖွဲ့များ သိမ်းပိုက်ထားသည့် ဖလမ်းမြို့သို့ စစ်ကူပေးရန် တက်လာသော စစ်ကော်မရှင် စစ်ကြောင်း ကြားဖြတ်တိုက်ခိုက်ခံရပြီး ဗိုလ်မှူးတစ်ဦး အပါအဝင် စစ်ကော်မရှင် တပ်သား ၃၆ ဦး သေဆုံးကာ လက်နက်ခဲယမ်းအမြောက်အမြား သိမ်းဆည်းရမိခဲ့သည်။ ပြီးခဲ့သည့် ဖေဖော်ဝါရီ ၃ ရက်၊ နံနက်ပိုင်းက စစ်ကိုင်းတိုင်း၊ ကလေးမြို့ဘက်မှ ဖလမ်းမြို့သို့ ဦးတည် တက်လာသည့် အင်အား ၂၀၀ ကျော်ပါ စစ်ကော်မရှင် စစ်ကြောင်းကို သိုင်းငင်းနှင့် ဖလမ်းမြို့အကြားတွင် ချင်းညီနောင် (CB) နှင့် ချင်းအမျိုးသားတပ်မတော် (CNA) ပူးပေါင်းတပ်ဖွဲ့များက စောင့်ကြိုတိုက်ခိုက်ခဲ့ခြင်း ဖြစ်သည်။ ၂ နာရီနီးပါး ကြာမြင့်ခဲ့သည့် အဆိုပါ တိုက်ပွဲအတွင်း စစ်ကော်မရှင်ဘက်မှ အလောင်း ၃၆ လောင်းနှင့်အတူ လက်နက် ၃၀ ကျော်ကို ချင်းပူးပေါင်းတပ်ဖွဲ့များက သိမ်းဆည်းရမိခဲ့ပြီး တော်လှန်ရေးရဲဘော် ၄ ဦး ကျဆုံးကာ ၇ ဦး ဒဏ်ရာရရှိခဲ့သည်။ မြေပြင်သတင်းရင်းမြစ်တစ်ဦးက တိုက်ပွဲအခြေအနေနှင့် ပတ်သက်၍ “သူတို့က ဖလမ်းကို ပြန်ရဖို့ အင်အား အလုံးအရင်းနဲ့ စစ်ကူလွှတ်နေတာ။ ဒါပေမဲ့ ကျနော်တို့ဘက်က လမ်းကြောင်းတွေကို ဝိုင်းဝန်းပိတ်ဆို့ထားတော့ သူတို့ ရှေ့မတိုးနိုင်ဘဲ တန့်နေတယ်။ မြေပြင်မှာ အထိနာတော့ လေကြောင်းနဲ့ ဒရုန်းကိုပဲ အလွန်အကျွံသုံးပြီး ပစ်နေပေမဲ့ ဒီနေ့အထိ မြို့နားကိုတောင် သူတို့ မကပ်နိုင်သေးဘူး” ဟု ပြောသည်။ ဖလမ်းမြို့ကို ၂၀၂၅ ခုနှစ် ဧပြီလကတည်းက ချင်းတော်လှန်ရေးတပ်ဖွဲ့များက သိမ်းပိုက်ထားခြင်းဖြစ်ပြီး စစ်ကော်မရှင်တပ်သည် အဆိုပါမြို့ကို ပြန်လည်ရရှိရန် ပြီးခဲ့သည့် အောက်တိုဘာလ ကတည်းက လမ်းကြောင်း နှစ်ခုခွဲကာ အင်အားတစ်ထောင်ကျော်ဖြင့် ထိုးစစ်ဆင်နေခြင်း ဖြစ်သည်။ လက်ရှိတွင် ချင်းပြည်အစိုးရ၊ ကာကွယ်ရေးဝန်ကြီးဌာန၏ ထိန်းချုပ်မှုအောက်ရှိ ပူးပေါင်းတပ်ဖွဲ့များသည် ဖလမ်းမြို့ပတ်ဝန်းကျင်ရှိ စစ်ကော်မရှင်တပ်များကို ပိတ်ဆို့ဖြတ်တောက်ထားဆဲ ဖြစ်ပြီး စစ်ရေးအရှိန်မှာ ဆက်လက် ပြင်းထန်နေဆဲဖြစ်ကြောင်း မြေပြင်သတင်းရင်းမြစ်များက ပြောသည်။

ဖလမ်းသို့တက်လာသည့် စစ်ကူစစ်ကြောင်း ကြားဖြတ်တိုက်ခိုက်ခံရ၊ ၃၀ ကျော်သေဆုံး  

Feb 4

အစိုးရသစ်မဖွဲ့မီ အာဏာချုပ်ကိုင်နိုင်မည့် အတိုင်ပင်ခံကောင်စီဥပဒေကို စစ်ခေါင်းဆောင်ပြဋ္ဌာန်း   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၄ ရက်။ ယာယီသမ္မတနှင့် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ရွေးကောက်ပွဲအပြီး အစိုးရသစ် အဖွဲ့ မဖွဲ့စည်းမီ လပိုင်းအလို ဖြစ်သော ဖေဖော်ဝါရီလ ၃ ရက်နေ့တွင် ‘ပြည်ထောင်စုအတိုင်ပင်ခံ ကောင်စီ ဥပဒေ’ ကို အတည်ပြုပြဋ္ဌာန်းလိုက်သည်။ အဆိုပါ ဥပဒေသစ်အရ ဖွဲ့စည်းမည့် ပြည်ထောင်စုအတိုင်ပင်ခံ ကောင်စီတွင် ဥက္ကဋ္ဌတစ်ဦးနှင့် အဖွဲ့ဝင်များ ပါဝင်မည်ဖြစ်ပြီး ၎င်းတို့အား နိုင်ငံတော်သမ္မတက ခန့်အပ်တာဝန်ပေးရမည်ဖြစ်သည်။ သို့သော်လည်း လက်ရှိနိုင်ငံရေး အခြေအနေအရ ယင်းကောင်စီ ဥက္ကဋ္ဌနေရာကို ဗိုလ်ချုပ်မှူးကြီး မင်းအောင်လှိုင် ကိုယ်တိုင် ရယူရန် သို့မဟုတ် နောင်တက်လာမည့် အစိုးရအဖွဲ့အပေါ် ဥပဒေကြောင်းအရ လွှမ်းမိုးချုပ်ကိုင်နိုင်ရန် ရည်ရွယ်၍ ဤဥပဒေကို ထုတ်ပြန်ခဲ့ခြင်းဖြစ်ကြောင်း ဝေဖန်မှုများ ထွက်ပေါ်နေသည်။ ယခင် NLD အစိုးရလက်ထက်က ဒေါ်အောင်ဆန်းစုကြည် ရယူခဲ့သည့် နိုင်ငံတော်အတိုင်ပင်ခံ ရာထူးကို ဖွဲ့စည်းပုံ အခြေခံဥပဒေနှင့် မညီဟု ဝေဖန်ကန့်ကွက်ခဲ့သော စစ်ခေါင်းဆောင်သည် ယခုအခါတွင်မူ ၎င်းကိုယ်တိုင် အလားတူပုံစံ ရာထူးသစ်တစ်ခုကို ဥပဒေအသစ်ဖြင့် ဖန်တီးလိုက်ခြင်းလည်း ဖြစ်သည်။ နိုင်ငံရေးအကဲခတ်များက ဤဥပဒေပြဋ္ဌာန်းချက်သည် စစ်ကော်မရှင်က ဦးစီးကျင်းပသည့် ရွေးကောက်ပွဲ အပြီး တွင် အရပ်သားအစိုးရတစ်ရပ် ပေါ်ပေါက်လာစေကာမူ စစ်ခေါင်းဆောင်အနေဖြင့် နိုင်ငံတော်အာဏာကို နောက် ကွယ်မှ ဆက်လက်ချုပ်ကိုင်ထားနိုင်မည့် နိုင်ငံရေးထွက်ပေါက်တစ်ခုအဖြစ် ရှုမြင်နေကြသည်။

အစိုးရသစ်မဖွဲ့မီ အာဏာချုပ်ကိုင်နိုင်မည့် အတိုင်ပင်ခံကောင်စီဥပဒေကို စစ်ခေါင်းဆောင်ပြဋ္ဌာန်း  

Feb 4

ရုရှားကိုယ်စားလှယ်နှင့်တွေ့ဆုံမှုတွင် စစ်ခေါင်းဆောင် ပြန်လည်ပေါ်ထွက်လာ   သတင်းနှင့်မီဒီယာ ကွန်ရက်။ ၂၀၂၆ ခုနှစ်၊ ဖေဖော်ဝါရီလ ၄ ရက်။ သတင်းမီဒီယာများနှင့် လူမြင်ကွင်းမှ ရက်အတန်ကြာ ပျောက်ဆုံးနေခဲ့သော ယာယီသမ္မတနှင့် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် (ယမန်နေ့) ဖေဖော်ဝါရီ ၃ ရက်နေ့တွင် ရုရှားကိုယ်စားလှယ်အဖွဲ့ နှင့် တွေ့ဆုံကာ လူမြင်ကွင်းသို့ ပြန်လည်ရောက်ရှိလာသည်။ ဗိုလ်ချုပ်မှူးကြီး မင်းအောင်လှိုင်သည် နေပြည်တော်တွင် ရုရှားနိုင်ငံ၊ လုံခြုံရေးကောင်စီ အတွင်းရေးမှူး ဆာဂေးရွှိုင်းဂူ ဦးဆောင်သောအဖွဲ့နှင့် တွေ့ဆုံခဲ့ကြောင်း စစ်ကော်မရှင်က သတင်းထုတ်ပြန်ထားသည်။ ထိုသို့တွေ့ဆုံရာတွင် မြန်မာနှင့် ရုရှားနှစ်နိုင်ငံကြား ပူးပေါင်းဆောင်ရွက်နေသည့် ကဏ္ဍအသီးသီးကို ဆွေးနွေးခဲ့ ကြပြီး အထူးသဖြင့် ကာကွယ်ရေးနှင့် လုံခြုံရေးကဏ္ဍ၊ ဆိုက်ဘာလုံခြုံရေးနှင့် သတင်းအချက်အလက် လုံခြုံရေးဆိုင်ရာ ကိစ္စရပ်များကို အလေးထား ဆွေးနွေးခဲ့ကြသည်ဟု ဆိုသည်။ ထို့ပြင် လက်ရှိ ဒေသတွင်း ပြဿနာတစ်ရပ် ဖြစ်နေသော အွန်လိုင်းငွေကြေးလိမ်လည်မှု တိုက်ဖျက်ရေးတွင် လည်း ရုရှားနှင့် ပူးပေါင်းဆောင်ရွက်မည့် ကိစ္စရပ်များ ပါဝင်ကြောင်း ဖော်ပြထားသည်။ စစ်ခေါင်းဆောင်သည် မန္တလေးမြို့ရှိ အလယ်ပိုင်းတိုင်းစစ်ဌာနချုပ် (လပခ) သို့ ရောက်ရှိနေစဉ် တော်လှန်ရေး တပ်ဖွဲ့တစ်ခု၏ ရှော့တိုက်ဒုံးဖြင့် တိုက်ခိုက်ခြင်းကို ခံခဲ့ရသည်ဟု သတင်းများ ထွက်ပေါ်ခဲ့ပြီးနောက်ပိုင်း လူမြင်ကွင်းမှ ရက်အတန်ကြာ ပျောက်ဆုံးနေခဲ့ခြင်း ဖြစ်သည်။ ထိုအတောအတွင်း နိုင်ငံတော်ပြန်တမ်း အချို့တွင် ဗိုလ်ချုပ်မှူးကြီး မင်းအောင်လှိုင်၏ အမည်ဖြင့် လက်မှတ်ရေး ထိုး ထုတ်ပြန်မှုများ ရှိခဲ့သော်လည်း လူကိုယ်တိုင် ပေါ်ထွက်လာခြင်း မရှိသည့်အတွက် ကျန်းမာရေးနှင့် ပတ်သက်၍ ကောလဟာလ အမျိုးမျိုး ထွက်ပေါ်ခဲ့သည်။ ယမန်နေ့က ထုတ်ပြန်ခဲ့သည့် ရုပ်သံနှင့် ဓာတ်ပုံမှတ်တမ်းများတွင် စစ်ခေါင်းဆောင်ကို ရုရှားကိုယ်စားလှယ်နှင့် အတူ ပြန်လည်မြင်တွေ့ခဲ့ရပြီးနောက် ၎င်း၏လက်မှတ်ဖြင့် ‘ပြည်ထောင်စုအတိုင်ပင်ခံကောင်စီဥပဒေ’ ကိုလည်း ချက်ချင်းဆိုသလို ထုတ်ပြန်ခဲ့သည်။ လေ့လာသူများကမူ ယခုကဲ့သို့ လူမြင်ကွင်းသို့ ပြန်လည်ပေါ်ထွက်လာခြင်းနှင့် ဥပဒေသစ်တစ်ရပ်ကို အလျင် အမြန် ထုတ်ပြန်ခြင်းသည် စစ်ခေါင်းဆောင်၏ အာဏာတည်မြဲရေးနှင့် နိုင်ငံရေးအရ အကာအကွယ်ယူရန် ပြင်ဆင်မှုတစ်ခု ဖြစ်နိုင်သည်ဟု သုံးသပ်နေကြသည်။ #ဗိုလ်ချုပ်မှူးကြီးမင်းအောင်လှိုင် #စစ်ကော်မရှင်

ရုရှားကိုယ်စားလှယ်နှင့်တွေ့ဆုံမှုတွင် စစ်ခေါင်းဆောင် ပြန်လည်ပေါ်ထွက်လာ  

Feb 4

မိသားစုအတွက် ၂ မိုင်ခွဲ ရေကူးအကူအညီတောင်းခဲ့သူ ၁၃ နှစ်သား သူရဲကောင်းကလေးငယ် သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဖေဖော်ဝါရီလ ၄ ရက်။ ဩစတေးလျ ကမ်းခြေတစ်ခုမှာတော့ အမေဖြစ်သူနဲ့ မိသားစုအတွက် ၂ မိုင် ခွဲလောက်ပင်လယ်ပြင် ကို ရေကူးပြီး အကူအညီသွားတောင်းခဲ့တဲ့ ၁၃ နှစ်သားလေးဟာ သူရဲကောင်းအဖြစ်နဲ့ အများက ချီးကျူးခဲ့ကြရပါတယ်။ အဖြစ်အပျက်ကလေးဖြစ်ခဲ့တာကတော့ ပြီးခဲ့တဲ့ ဇန္နဝါရီလ ကုန်ပိုင်း သောကြာနေ့က ဖြစ်ပါတယ်။ သြစတြေးလျနိုင်ငံရဲ့ Quindalup ကွင်ဒါလု(ပ်) ကမ်းခြေမှာပါ။ ဂျိုအန် အက်ပယ်လ်ဘီး Joanne Appelbee နဲ့ သူ့ရဲ့ ကလေး ၃ ယောက်ဟာ အားလပ်ရက်မှာ ပျော်ပျော်ပါးပါး ကယက်လှေစီးနေခဲ့ကြပါတယ်။ အဲဒီ အချိန်မှာပဲ ရုတ်တရက် တိုက်ခတ်လာတဲ့ လေပြင်းနဲ့ လှိုင်းလုံးတွေက သူတို့ကို ကမ်းခြေနဲ့ မိုင်ပေါင်းများစွာ ဝေးရာ ပင်လယ်ပြင်ထဲကို ဆွဲခေါ်သွားခဲ့ပါတယ်။ အခြေအနေက စက္ကန့်နဲ့အမျှ စိုးရိမ်ရလာတဲ့အခါမှာ မိခင်ဖြစ်သူ ဂျိုအန်ဟာ ခက်ခဲတဲ့ ဆုံးဖြတ်ချက်တစ်ခုကို ချခဲ့ရပါတယ်။ အဲဒါကတော့ အသက် ၁၃ နှစ်အရွယ် သားကြီးဖြစ်သူ အော်စတင် Austin ကို အကူအညီတောင်းဖို့ ကမ်းခြေဆီ ရေကူးခိုင်းလိုက်တာပါပဲ။ Austin ဟာ ကနဦးမှာ လှေငယ်လေးနဲ့ ထွက်လာခဲ့ပေမဲ့ လှေက ရေဝင်ပြီး မြုပ်သွားခဲ့ပါတယ်။ အဲဒီနောက်မှာ သူဟာ အသက်ကယ်အင်္ကျီကို ဝတ်ပြီး ရေကူးခဲ့ပေမဲ့ အင်္ကျီက သူ့ရဲ့ အရှိန်ကို နှေးကွေးစေတယ်လို့ ယူဆပြီး အသက်အန္တရာယ်ကြားကနေ အင်္ကျီကို ချွတ်ချခဲ့ပါတယ်။ ၂ မိုင်ခွဲကျော် ခရီးကို ၄ နာရီကြာအောင် မနားတမ်း ကူးခတ်ခဲ့ပြီးနောက် ညနေ ၆ နာရီမှာတော့ သူဟာ ကမ်းခြေကို မောဟိုက်စွာနဲ့ ရောက်ရှိခဲ့ပါတယ်။ တစ်ဖက်မှာလည်း မိခင်ဖြစ်သူဟာ ကျန်ရှိနေတဲ့ ကလေးနှစ်ယောက်ကို ပျောက်မသွားအောင် ဖက်တွယ်ထားရင်း ပင်လယ်ပြင်ထဲမှာ ၁၀ နာရီကြာအောင် အသက်လုခဲ့ရပါတယ်။ အော်စတင်ရဲ့ အကူအညီတောင်းခံမှုကြောင့် လူပျောက်ရှာတဲ့ ကယ်ဆယ်ရေး ရဟတ်ယာဉ်က သူတို့ကို တွေ့ရှိချိန်မှာတော့ သူတို့ဟာ ကမ်းခြေကနေ ၉ မိုင် (၁၄ ကီလိုမီတာ) အထိ ဝေးရာကို မျောပါနေခဲ့ပါပြီ။ ကလေးငယ်တွေဟာ အအေးဒဏ်ကြောင့် တုန်ရီနေပြီး ခြေထောက်တွေမှာ အာရုံမရှိတော့တဲ့အထိ ဖြစ်နေခဲ့ရပါတယ်။ ကယ်ဆယ်ရေး အဖွဲ့ဝင် တစ်ဦးက အော်စတင်ရဲ့ ကြိုးစားမှုဟာ superhuman လူသားစွမ်းဆောင်ရည်ထက် ပိုတဲ့ လုပ်ဆောင်ချက်ဖြစ်တယ်လို့ ချီးကျူးခဲ့ပါတယ်။ ဒါပေမဲ့ Austin ကတော့ သူဟာ သူရဲကောင်းမဟုတ်ပါဘူးလို့ ငြင်းဆိုပါတယ်။ သူက သူ့အနေနဲ့ လုပ်သင့်တာကို လုပ်ခဲ့တာပါ လို့ပဲ ရိုးရိုးလေး ပြောခဲ့ပါတယ်။ ဒီနေ့မှာတော့ သတ္တိရှိတဲ့ သားဖြစ်သူကြောင့် မိခင်ဖြစ်သူ Joanne ဟာ သူ့ရဲ့ ရင်သွေး ၃ ယောက်လုံးနဲ့အတူ ဘေးကင်းရာကို ပြန်ရောက်ခဲ့ပြီ ဖြစ်ပါတယ်။

မိသားစုအတွက် ၂ မိုင်ခွဲ ရေကူးအကူအညီတောင်းခဲ့သူ ၁၃ နှစ်သား သူရဲကောင်းကလေးငယ်

Feb 4

ထိုင်းနိုင်ငံတွင် "ကြက်တူရွေးအဖျား" (Parrot Fever) တွေ့ရှိကြောင်း အတည်ပြု သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဖေဖော်ဝါရီလ ၄ ရက်။ ထိုင်းနိုင်ငံတွင် "ကြက်တူရွေးအဖျား" (Parrot Fever) ဟု လူသိများသည့် ကူးစက်ရောဂါပိုး တစ်မျိုးအား ပထမဆုံးအကြိမ် စစ်ဆေးတွေ့ရှိရကြောင်း အတည်ပြုထုတ်ပြန်ကာ သတိပေးချက်များ ထုတ်ပြန်ထားသည်။ အဆိုပါရောဂါပိုး ကူးစက်ခံရသည့် ပထမဆုံးလူနာကို ၂၀၂၅ ခုနှစ် နှောင်းပိုင်းတွင် စတင်တွေ့ရှိခဲ့ခြင်း ဖြစ်သည်။ ရောဂါကူးစက်ခံရသူမှာ ငှက်များကို လေဝင်လေထွက် မကောင်းသောနေရာ၌ မွေးမြူထားသူဖြစ်ပြီး၊ ငှက်လှောင်အိမ်များ သန့်ရှင်းရေးလုပ်ဆောင်စဉ် နှာခေါင်းစည်း (Mask) နှင့် လက်အိတ် (Gloves) စသည့် ကာကွယ်ရေးပစ္စည်းများ အသုံးမပြုခဲ့ခြင်းကြောင့် ကူးစက်ခံရခြင်းဖြစ်သည်ဟု ခန့်မှန်းရသည်။ လက်ရှိတွင် အဆိုပါလူနာမှာ ဆေးကုသမှု ခံယူပြီးနောက် ကျန်းမာရေး ပြန်လည်ကောင်းမွန်လာပြီဖြစ်သည်။ ရောဂါအကြောင်းနှင့် ကူးစက်ပုံ ဤရောဂါသည် ဘက်တီးရီးယားပိုးတစ်မျိုးကြောင့် ဖြစ်ပွားခြင်းဖြစ်ပြီး ကြက်တူရွေး၊ ခို၊ ဘဲ၊ ကြက်ဆင် အပါအဝင် ငှက်အမျိုးမျိုးနှင့် ကြက်ဘဲမျိုးနွယ်ဝင် တိရစ္ဆာန်များတွင် တွေ့ရှိရတတ်သည်။ ငှက်အညစ်အကြေးအခြောက်များ၊ အမွေးအတောင်များနှင့် ငှက်များမှထွက်သည့် အရည်များမှတစ်ဆင့် လွင့်စင်လာသော အမှုန်အမွှားများကို ရှူရှိုက်မိရာမှ လူသို့ ကူးစက်ခြင်း ဖြစ်သည်။ ၎င်းသည် အသက်ရှူလမ်းကြောင်းဆိုင်ရာ ရောဂါများနှင့် ဆင်တူသဖြင့် သတိမမူမိဘဲ ရှိတတ်သည်။ ရောဂါလက္ခဏာများမှာ - · အပြင်းအဖျားတက်ခြင်းနှင့် ချမ်းတုန်ခြင်း၊ · ပြင်းထန်စွာ ခေါင်းကိုက်ခြင်း၊ · ကြွက်သားများ နာကျင်ကိုက်ခဲခြင်းနှင့် · ချောင်းခြောက်ဆိုးခြင်းတို့ ဖြစ်ပွားတတ်ပါသည်။ ကာကွယ်ရန် အကြံပြုချက်များ ရောဂါကူးစက်မှုကို ကာကွယ်နိုင်ရန်အတွက် မလိုအပ်ဘဲ ငှက်များနှင့် ငှက်အညစ်အကြေးများကို တိုက်ရိုက်ကိုင်တွယ်ခြင်းမှ ရှောင်ကြဉ်ရမည်။ ငှက်လှောင်အိမ်များ သန့်ရှင်းရေးလုပ်ဆောင်ပါက နှာခေါင်းစည်းနှင့် လက်အိတ်များကို မပျက်မကွက် ဝတ်ဆင်ရမည်ဖြစ်ပြီး၊ တိရစ္ဆာန်များကို ကိုင်တွယ်ပြီးတိုင်း လက်ကို ဆပ်ပြာဖြင့် စင်ကြယ်အောင် ဆေးကြောရမည်။ ထို့ပြင် ဖျားနာခြင်း သို့မဟုတ် ချောင်းဆိုးခြင်းများ ဖြစ်ပွားလာပါက မိမိတွင် ငှက်များနှင့် ထိတွေ့ဖူးသည့် ရာဇဝင်ရှိပါက ဆရာဝန်ထံ အတိအကျ ပြောပြရန် တိုက်တွန်းထားပါသည်။

ထိုင်းနိုင်ငံတွင် “ကြက်တူရွေးအဖျား” (Parrot Fever) တွေ့ရှိကြောင်း အတည်ပြု

Feb 4

ထိုင်းနိုင်ငံ အထွေထွေရွေးကောက်ပွဲနှင့် မြန်မာနိုင်ငံသားများ အပေါ် ပါတီများ၏ သဘောထား သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဖေဖော်ဝါရီလ ၄ ရက်။ လာမည့် ၂၀၂၆ ခုနှစ်၊ ဖေဖော်ဝါရီလ ၈ ရက် (တနင်္ဂနွေနေ့) တွင် ထိုင်းနိုင်ငံ၌ အစိုးရသစ်တစ်ရပ် ပေါ်ထွက်လာစေရန်အတွက် အထွေထွေရွေးကောက်ပွဲကို ကျင်းပသွားမည် ဖြစ်သည်။ လက်ရှိတွင် လူကြိုက်များရေပန်းစားနေသည့် အဓိကပါတီကြီး (၄) ခုရှိပြီး၊ ၎င်းတို့၏ မူဝါဒများနှင့် မြန်မာနိုင်ငံအပေါ် ထားရှိသည့် သဘောထားများကို ဘန်ကောက်ပို့စ် (Bangkok Post) သတင်းစာက ဖော်ပြထားသည်။ ၁။ ဘွန်ဂျိုင်ထိုင်းပါတီ (Bhumjaithai Party) လက်ရှိ ယာယီဝန်ကြီးချုပ် အနုတင် ချာန်ဝီရကူးလ် (Anutin Charnvirakul) ဦးဆောင်သည့် ပါတီဖြစ်သည်။ မြန်မာနိုင်ငံနှင့် ပတ်သက်၍ တရားမဝင် အလုပ်သမားများ ဝင်ရောက်မှုနှင့် မှောင်ခိုပစ္စည်းစီးဆင်းမှုများကို တားဆီးနိုင်ရန်အတွက် နယ်စပ်တစ်လျှောက် တံတိုင်းများ တည်ဆောက်သွားမည့် မူဝါဒကို ကိုင်စွဲထားသည်။ ၂။ ပြည်သူ့ပါတီ (People’s Party) နတ်ထဖုန်း ရောင်ပန်ညာဝပ် (Natthaphong Ruengpanyawut) ဦးဆောင်သော ဤပါတီသည် ဖျက်သိမ်းခံလိုက်ရသည့် Move Forward ပါတီ၏ မျိုးဆက်သစ်ဖြစ်ပြီး လူငယ်ထုနှင့် မြို့ပြလူထုကြားတွင် အားပေးမှု အများဆုံး ရရှိထားသည်။ နိုင်ငံခြားသား အလုပ်သမား မှတ်ပုံတင်ခြင်း လုပ်ငန်းစဉ်များကို ပိုမိုရိုးရှင်း ပွင့်လင်းမြင်သာစေရန်နှင့် ပွဲစားခများ၊ အဂတိလိုက်စားမှုများကို တိုက်ဖျက်ရန် ကတိပြုထားသည်။ ထို့ပြင် နယ်စပ်ဒုက္ခသည်များကို လူသားချင်းစာနာမှုဆိုင်ရာ အကူအညီများ ပိုမိုပေးအပ်ရန်နှင့် ၎င်းတို့၏ လုံခြုံရေးကို အာမခံချက်ပေးရန် လိုလားသည်။ ဤပါတီ အာဏာရလာပါက မြန်မာအတိုက်အခံ အင်အားစုများနှင့် ဆက်ဆံရေး ပိုမိုကောင်းမွန်လာဖွယ် ရှိသည်။ ၃။ ဖွေထိုင်းပါတီ (Pheu Thai Party) ဝန်ကြီးချုပ်ဟောင်း တပ်ဆင်ရှင်နာဝပ်၏ ထောက်ခံသူများနှင့် မျိုးဆက်များ ဦးဆောင်သည့် ပါတီဖြစ်သည်။ ဝန်ကြီးချုပ် ပေထုံတန်ရှင်နာဝပ် ရာထူးမှ ဖယ်ရှားခံရပြီးနောက် ယော့ချနန် ဝမ်စဝပ် (Yodchanan Wongsawat) က ဦးဆောင်လျက်ရှိသည်။ စီးပွားရေးဆိုင်ရာ မူဝါဒများကို ဦးစားပေးပြီး "သူဌေးဖြစ်စေမည့် အစီအစဉ်" အဖြစ် နေ့စဉ် ဘတ် (၁) သန်းဆု (၉) ဆု မဲဖောက်ပေးမည့် အစီအစဉ်ဖြင့် မဲဆွယ်လျက်ရှိသည်။ မြန်မာနိုင်ငံသားများနှင့် ပတ်သက်၍ ပြန်လည်မောင်းထုတ်ခြင်းထက် စနစ်တကျ မှတ်ပုံတင်စေခြင်းကို ပိုမိုလိုလားသော ပါတီဖြစ်သည်။ ၄။ ဒီမိုကရက်ပါတီ (Democrat Party) ထိုင်းနိုင်ငံ၏ သက်တမ်းအရင့်ဆုံး ပါတီဖြစ်ပြီး ပါတီခေါင်းဆောင်ဟောင်း အဖိဆစ် ဝေ့ချာချီဝ (Abhisit Vejjajiva) ပြန်လည်ပါဝင်လာခြင်းကြောင့် စိတ်ဝင်စားမှု မြင့်တက်နေသည်။ ၎င်းတို့၏ မူဝါဒမှာ လူ့အခွင့်အရေး (Human Rights) အပေါ် အခြေခံသော်လည်း၊ ယခု ၂၀၂၆ ရွေးကောက်ပွဲတွင်မူ အခြားပါတီများနည်းတူ တရားမဝင် ဝင်ရောက်မှုများကို စနစ်တကျ ထိန်းချုပ်သွားမည်ဟု ပြောဆိုထားသည်။

ထိုင်းနိုင်ငံ အထွေထွေရွေးကောက်ပွဲနှင့် မြန်မာနိုင်ငံသားများ အပေါ် ပါတီများ၏ သဘောထား

« Prev 1 … 122 123 124 125 126 … 1,114 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို — August 20, 2026 2:35 pm
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ် — August 20, 2026 2:33 pm
ထိုင်း-မြန်မာ နယ်စပ်ဖြတ်ကျော်ရာဇဝတ်မှုများ နှိမ်နင်းရန် စစ်ဦးစီးချုပ်များဆွေးနွေး — August 20, 2026 2:30 pm

Recent Posts

မောင်တော၌ စစ်ကျန်ဗုံးသီး ပေါက်ကွဲ၍ ကလေးငယ် ၁၀ ဦး ဒဏ်ရာရ
စစ်ကိုင်းတိုင်း ကနီ၌ စစ်တပ် စစ်ကြောင်းထိုး၍ ပြည်သူ ၁၀,၀၀၀ ခန့် စစ်ရှောင်နေရ၊ ဒေသခံအချို့ ဖမ်းခံရ
နတ်ရေကန်သို့ စစ်ကူလာသည့် စစ်တပ်ကို AA ကြားဖြတ်တိုက်ခိုက်
အချိုရည် သောက်သူများ အစာအိမ်ကင်ဆာ ဖြစ်နိုင်ချေ ၃ ဆပို
ဓာတ်ဆီပြတ်လပ်မှုကြောင့် မော်စကိုနှင့် ရုရှားတစ်ဝှမ်း ရောင်းချမှု ကန့်သတ်

Archives

Archives

×Close