NMG Doh – Page 171 – Network Media Group

ပင်မစာမျက်နှာ
သတင်း
ဓါတ်ပုံများ
ဗွီဒီယို
ထုတ်ပြန်ကြေညာချက်
နိုင်ငံတကာသတင်း
NMG အကြောင်း
Contact

Home
Author Archive

NMG Doh

Author: NMG Doh

Oct 25

ARSA အစွန်းရောက်အဖွဲ့၏ ရက်စက်မှုကြောင့် အရပ်သားနှစ်ဦး သေဆုံး၊ AA အရေးပေါ် သတိပေးချက် ထုတ်ပြန် သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၅ ရက်။ ရခိုင်-ဘင်္ဂလားဒေ့ရှ် နယ်စပ်ဒေသနေ ပြည်သူများအတွက် အာရက္ခတပ်တော် (AA) က အရေးပေါ် သတိပေး ချက် ထပ်မံထုတ်ပြန်လိုက်သည်။ အစ္စလာမ်မစ် အစွန်းရောက် ARSA အဖွဲ့ က ခရီးသွားပြည်သူများကို ဖမ်းဆီးသတ်ဖြတ်မှုများ ဆက်တိုက် လုပ်ဆောင်နေခြင်းကြောင့် ယင်းသတိပေးချက်ကို ထုတ်ပြန်ရခြင်း ဖြစ်သည်။ AA က ပြည်သူများကို မဖြစ်မနေမှသာ သွားလာရန်နှင့် လုံခြုံရေးတပ်ဖွဲ့ဝင်များကို သတင်းပို့ပြီးမှ သွားလာရန် သတိပေးလိုက်ချိန်တွင် အောက်တိုဘာလ ၂၂ ရက်နေ့က မောင်တောမြို့နယ်၌ ဖြစ်ပွားခဲ့သည့် ရက်စက်သော ဖြစ်စဉ်တစ်ခု ပေါ်ထွက်လာခဲ့သည်။ အောက်တိုဘာ ၂၂ ရက်နေ့ နေ့လယ်က မောင်တောမြို့နယ်ထဲတွင် စားသောက်ကုန် ဝယ်ယူပြီး ပြန်လာသည့် ခရီးသည်တင်ယာဉ် တစ်စီးသည် မြိုယုရွာအရှေ့ဘက် တံတားနားတွင် ARSA အကြမ်းဖက်အဖွဲ့၏ ခြုံခို တိုက်ခိုက်ခြင်းကို ခံခဲ့ရသည်။ ကားပေါ်ပါလာသည့် ခရီးသည်များနှင့် ကားသမားကို ဖမ်းဆီးခေါ်ဆောင်သွားခဲ့ပြီးနောက် AA က လိုက်လံ ရှာဖွေခဲ့သည်။ AA ၏ ရှာဖွေမှုအပြီးတွင် ခရီးသည်များဖြစ်သည့် အသက် ၃၀ အရွယ် ဒေါ်ဝေဝေစိုး နှင့် အသက် ၄၀ အရွယ် ဒေါ်နိုင်နိုင်ဆွေ တို့ကို သေနတ်ဖြင့် ပစ်သတ်ခံထားရသည့် အလောင်းများအဖြစ် တွေ့ရှိခဲ့ရသည်။ ပို၍ ထိတ်လန့်စရာမှာ သေဆုံးသွားသော မိခင် ဒေါ်ဝေဝေစိုး၏ အလောင်းဘေးတွင် ၃ နှစ်အရွယ် သမီးငယ်လေး ကို အသက်ရှင်လျက် တွေ့ရှိခဲ့ရခြင်း ဖြစ်သည်။ ကားသမား အပါအဝင် ထိခိုက်ဒဏ်ရာရသူ နှစ်ဦးကိုလည်း AA က တွေ့ရှိခဲ့သည်။ AA က ARSA အဖွဲ့၏ ရည်ရွယ်ချက်ရှိရှိ အရပ်သားပစ်မှတ်ထား သတ်ဖြတ်မှုများကြောင့် ပြည်သူများ အသက် အိုးအိမ်စည်းစိမ် ခြိမ်းခြောက်ခံရနိုင်သည့်အတွက် တောတောင်ထဲနှင့် လူပြတ်သည့်နေရာများတွင် တစ်ဦး တည်း သို့မဟုတ် လူနည်းစုဖြင့် သွားလာခြင်းကို အတတ်နိုင်ဆုံး ရှောင်ကြဉ်ရန် သတိပေးထားသည်။ ကျန်းမာရေးကိစ္စကဲ့သို့ မဖြစ်မနေသွားလာရမည်ဆိုပါကပင် အာရက္ခပြည်သူ့ တော်လှန်ရေး အစိုးရ၏ တာဝန်ရှိ သူများကို သတင်းပေးပို့ပြီးမှ သွားလာကြဖို့ AA က အရေးပေါ် ထပ်မံနှိုးဆော်ထားကြောင်း သိရသည်။

ARSA အစွန်းရောက်အဖွဲ့၏ ရက်စက်မှုကြောင့် အရပ်သားနှစ်ဦး သေဆုံး၊ AA အရေးပေါ် သတိပေးချက် ထုတ်ပြန်

Oct 25

ဖားကန့် KIA တပ်ရင်းကို စစ်တပ်က နှစ်ရက်ဆက်တိုက် ဗုံး ၄၀ ကျော်ဖြင့် တိုက်ခိုက်  သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၅ ရက်။ ကချင်ပြည်နယ်၊ ဖားကန့်မြို့နယ်တွင် စစ်ရေးအခြေအနေများ ပြန်လည်တင်းမာလာနေပြီး၊ ဖားကန့်ရှိ ကချင်လွတ်လပ်ရေးတပ်မတော် (KIA) တပ်မဟာ ၉၊ တပ်ရင်း ၆ နေရာကို စစ်ကော်မရှင်တပ်က နှစ်ရက် ဆက်တိုက် လေကြောင်းမှ ဗုံးကြဲတိုက်ခိုက်ခဲ့သည်။ အောက်တိုဘာလ ၂၁ ရက်နေ့နှင့် ၂၂ ရက်နေ့တို့တွင် နှစ်ရက်ဆက်တိုက် လေကြောင်းဖြင့် တိုက်ခိုက်ခဲ့သည် ဟု ဒေသခံစစ်ရေးသတင်းရင်းမြစ်များထံမှ သိရသည်။ အဆိုပါ တိုက်ခိုက်မှုများကို မြစ်ကြီးနားမြို့မှ တက်လာသည့် Y-12 လေယာဉ် ဖြင့် ပြုလုပ်ခဲ့ခြင်းဖြစ်ပြီး၊ အောက် တိုဘာ ၂၁ ရက်နေ့၊ နံနက် ၇ နာရီဝန်းကျင်နှင့် ၂၂ ရက်နေ့ ည ၈ နာရီဝန်းကျင်တို့တွင် ဗုံးကြဲချခဲ့ခြင်း ဖြစ်သည်။ စစ်ရေးသတင်းရင်းမြစ်များ၏ ပြောကြားချက်အရ စစ်ကော်မရှင်တပ်သည် လေကြောင်းတိုက်ခိုက်မှု နှစ်ကြိမ် လုံးတွင် ဗုံးသီး အလုံး ၃၀ မှ ၄၀ ကျော် ထက်မနည်း အသုံးပြုခဲ့သည်ဟု သိရသည်။ လေကြောင်း တိုက်ခိုက်မှုကြောင့် တပ်ရင်း ၆ နေရာတွင် အပျက်အစီးများ ရှိခဲ့သော်လည်း လူထိခိုက်မှုမရှိ ကြောင်း ပြည်သူ့ကာကွယ်ရေး တပ်ဖွဲ့ဝင်တစ်ဦးက အတည်ပြုခဲ့သည်။ စစ်ကော်မရှင်တပ်၏ လေကြောင်းအသုံးပြု တိုက်ခိုက်နေမှုကို ဒေသခံလည်းဖြစ်သည့် ကာကွယ်ရေးတပ်ဖွဲ့ဝင် တစ်ဦးက ယခုကဲ့သို့ သုံးသပ်ပြောကြားခဲ့သည်။ “တပ်ရင်း ၆ ကို စကမဘက်က ဗုံးကြဲတာ နှစ်ကြိမ်ရှိပါပြီ။ အခြေအနေကတော့ ပျက်ဆီးမှုတွေရှိပေမဲ့ လူထိခိုက်မှု မရှိဘူးလို့ သိရပါတယ်။ အဓိကရည်ရွယ်ချက်ကတော့ စစ်ရေးသဘောအရ မြေပြင်မှာ သူတို့ စိတ်တိုင်းကျ လှုပ်ရှားလို့ မလွယ်တော့တဲ့ အခြေအနေမှာ လေကြောင်းကနေ တိုက်ခိုက်တာလို့ ထင်ပါတယ်။” လေကြောင်း တိုက်ခိုက်မှုများ မတိုင်မီ အောက်တိုဘာလ ၂၂ ရက်နေ့၊ ညနေ ၇ နာရီဝန်းကျင်ခန့်တွင် ဖားကန့်မြို့၊ လုံးခင်းကျေးရွာအုပ်စုရှိ ကျောက်ဝိုင်းအတွင်း သေနတ်ပစ်ခတ်သံများ ထွက်ပေါ်ခဲ့ပြီး ကျောက်ဝိုင်းရှိ ပြည်သူ များ ထိတ်လန့်တကြား ထွက်ပြေးခဲ့ကြရသည်။ Crown အမျိုးအစားကားတစ်စီးဖြင့် လက်နက်ကိုင်လူတစ်စုက ကျောက်ဝိုင်းအတွင်း ရောက်ရှိလာပြီး ကားပေါ်မှ သေနတ်ဖြင့် မိုးပေါ်ထောင်ပစ်ခတ်ကာ လူစုခွဲခဲ့ခြင်း ဖြစ်သည်ဟု မျက်မြင်တွေ့ရှိသူများထံမှ သိရသည်။ ဖားကန့်မြို့၏ လက်ရှိလူမှုဘဝ အခြေအနေကိုလည်း ဒေသခံပြည်သူတစ်ဦးက ယခုကဲ့သို့ ရှင်းပြခဲ့သည်- “လက်တလော ဖားကန့်အခြေအနေ ပြောရမယ်ဆိုရင် ပြည်သူတွေက စုဆောင်းရေး ဆွဲနေတာရော အလုပ်အကိုင်တွေ မလုပ်ရဲအောင် ဖြစ်နေကြတယ်။ အိမ်ထဲက မထွက်ရဲပေါ့။ မနေ့ကဘဲ ညခင်းပိုင်းလေး ကျောက်ဝိုင်းပေါ့၊ ကျောက်ဝိုင်းဆိုတာကတော့ ဖားကန့်မြို့ရဲ့ ဒေသအလိုက် ဝမ်းရေးဖြေရှင်းတဲ့ အလုပ်လို့ ပြောရမှာပေါ့။ ကျောက်ဝိုင်းထဲမှာလည်း သေနတ်ပစ်ဖောက်ပြီး လူစုခွဲခံရတယ်။ ဒါတွေက ပြည်သူလူထုကို တမင်တကာ ဒုက္ခရောက်အောင် လုပ်နေတယ်ဆိုတာ သိသာတာပေါ့။” ဖားကန့်မြို့တွင် ပြီးခဲ့သည့် အောက်တိုဘာလ ၂၀ ရက်နေ့က ဆိုင်းတောင်၊ မရှီကထောင် တစ်ဝိုက် နှစ်ဖက်ကြား ပစ်ခတ်မှုများ ဖြစ်ပြီးနောက်ပိုင်း မြေပြင်တိုက်ပွဲများ ငြိမ်သက်နေသော်လည်း၊ စစ်ကော်မရှင်တပ်က လေကြောင်း အသုံးပြု တိုက်ခိုက်မှုများ ဆက်လက်ရှိနေသဖြင့် နှစ်ဖက်တပ်များအကြား စစ်ရေးတင်းမာမှုများ ရှိနေဆဲ ဖြစ်သည်။ စစ်ကော်မရှင်တပ်သည် ၎င်းတို့ လက်လွှတ်ထားရသည့် မြို့ရွာများကို လာမည့် ရွေးကောက်ပွဲ မတိုင်မီ ထိန်းချုပ် နိုင်ရေး အရှိန်မြင့် ကြိုးပမ်းနေပြီး၊ ကချင်ပြည်တွင် ဖားကန့်မြို့အပါအဝင် ဝိုင်းမော်၊ ဗန်းမော်နှင့် ပူတာအိုမြို့တို့ တွင်ပါ နှစ်ဖက်တိုက်ပွဲများ ပြင်းထန်နေကြောင်း စစ်ရေးလေ့လာသူများက သုံးသပ်သည်။

ဖားကန့် KIA တပ်ရင်းကို စစ်တပ်က နှစ်ရက်ဆက်တိုက် ဗုံး ၄၀ ကျော်ဖြင့် တိုက်ခိုက် 

Oct 25

ကန်ပက်လက် မင်္ဂလာပွဲ ဗုံးကြဲခံရ၊ အရပ်သား ၄ ဦး သေဆုံး၊ ၁၅ ဦး ဒဏ်ရာရ သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၅ ရက်။ ချင်းပြည်၊ ကန်ပက်လက်မြို့ အနီးရှိ မင်္ဂလာဆောင်ပွဲတစ်ခုကို စစ်ကော်မရှင်တပ်က ဂျက်ဖိုက်တာဖြင့် ဗုံးကြဲ တိုက်ခိုက်ခဲ့ရာ အရပ်သား ၄ ဦး သေဆုံးပြီး၊ ၁၅ ဦးထက်မနည်း ထိခိုက်ဒဏ်ရာရခဲ့သည်ဟု ဒေသခံများထံမှ သိရသည်။ ဖြစ်စဉ်မှာ အောက်တိုဘာလ ၂၄ ရက်နေ့၊ နံနက်ပိုင်း ၉ နာရီ ၂၀ မိနစ်ခန့်က ဖြစ်ပွားခဲ့ခြင်းဖြစ်ပြီး၊ စစ်တပ်က နှစ်ကြိမ်ဆက်တိုက် လေကြောင်းမှ တိုက်ခိုက်ခဲ့သည်။ ပထမအကြိမ်တွင် ဗုံးတစ်လုံး၊ ဒုတိယအကြိမ်တွင် ဗုံးနှစ်လုံးဖြင့် စုစုပေါင်း ဗုံးသုံးလုံး ကြဲချခဲ့ကြောင်း ဒေသခံတစ်ဦးက ပြောသည်။ ဗုံးကြဲတိုက်ခိုက်ခံရသည့် နေရာသည် CDF - ကန်ပက်လက် စစ်ဦးစီးချုပ် ဆလိုင်းအောင်လိန်း၏ မင်္ဂလာဆောင် ပွဲ ကျင်းပသည့်နေရာဖြစ်ပြီး၊ စစ်တပ်သည် မင်္ဂလာဆောင်ဖိတ်စာမှတစ်ဆင့် နေရာနှင့် အချိန်အတိအကျကို သိရှိ၍ ပစ်မှတ်ထား တိုက်ခိုက်ခဲ့ခြင်းဖြစ်ကြောင်း သတင်းများက ဖော်ပြသည်။ CDF - ကန်ပက်လက် ပြောရေးဆိုခွင့်ရှိသူကလည်း လေကြောင်းတိုက်ခိုက်မှု ဖြစ်ပွားခဲ့သည်ကို အတည်ပြုသည်။ ဗုံးကြဲတိုက်ခိုက်မှုကြောင့် သေဆုံးသူ အရပ်သား ၄ ဦးတွင် NLD လွှတ်တော်အမတ်ဟောင်း ဦးစံခင်၏သား ဦးခင်မောင်ရင် အပါအဝင် အမျိုးသားသုံးဦးနှင့် အမျိုးသမီးတစ်ဦး ပါဝင်ကြောင်း ချင်းသတင်းဌာနများက ရေးသားသည်။ ဒဏ်ရာရရှိသူ ၁၅ ဦးအနက် ၅ ဦး၏ ဒဏ်ရာအခြေအနေမှာ ပြင်းထန်သည်ဟု သိရသည်။ စစ်အုပ်စုသည် အောက်တိုဘာလအတွင်း ချင်းပြည်နယ်ရှိ မင်းတပ်၊ မတူပီ၊ ဟားခါး၊ တွန်းဇံမြို့နယ်များ တွင် လည်း လေကြောင်းတိုက်ခိုက်မှုများ ဆက်တိုက်ပြုလုပ်ခဲ့ရာ ကလေးငယ်များအပါအဝင် ဒေသခံ အရပ်သားများ ထိခိုက်သေဆုံးမှု များပြားခဲ့သည်။

ကန်ပက်လက် မင်္ဂလာပွဲ ဗုံးကြဲခံရ၊ အရပ်သား ၄ ဦး သေဆုံး၊ ၁၅ ဦး ဒဏ်ရာရ

Oct 24

ဖားကန့် မြေစာပုံပြိုကျ၊ ရေမဆေးသမား ၂ ဦး ထပ်မံသေဆုံး  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ ကချင်ပြည်နယ်၊ ဖားကန့်ကျောက်စိမ်းဒေသတွင် မနေ့က မြေစာပုံပြိုကျမှုကြောင့် အသက်နှင့်ရင်းပြီး ကျောက် ရှာဖွေနေသော ရွှေ့ပြောင်းရေမဆေးသမား နှစ်ဦး ထပ်မံသေဆုံးခဲ့သည်။ ယင်းဖြစ်စဉ်သည် ဝမ်းစာအတွက် အသက်စွန့်နေရသည့် ဖားကန့်ဒေသ၏ ဘဝများကို မီးမောင်းထိုးပြနေသည်။ အောက်တိုဘာလ ၂၃ ရက်နေ့၊ ညနေ ၄ နာရီခန့်က ဖားကန့်မြို့နယ်၊ နမ့်မှော်ရွာရှိ ကုမ္ပဏီပိုင် မြေစာပုံဟောင်း လုပ်ကွက်တစ်ခုမှာ ရေမဆေးကျောက်ရှာဖွေနေစဥ် မြေစာပုံ ရုတ်တရက် ပြိုကျကာ အမျိုးသားနှစ်ဦး မြေအောက်သို့ ပါသွားခဲ့ခြင်းဖြစ်သည်။ ချက်ချင်း ကယ်ဆယ်ခဲ့သော်လည်း ပါသွားသည့် အမျိုးသားနှစ်ဦးလုံးမှာ ပွဲချင်းပြီး သေဆုံးခဲ့သည်ဟု ဒေသခံတွေ က ပြောသည်။ သေဆုံးသူနှစ်ဦးမှာ ဒေသခံများမဟုတ်ဘဲ ဝမ်းရေးအတွက် ရောက်လာသည့် ရွှေ့ပြောင်းလုပ်သားများ ဖြစ်သည်။ ကယ်ဆယ်ရေးလုပ်ငန်းများတွင် ပါဝင်ခဲ့သည့် အသက် ၁၄ နှစ်အရွယ် အမျိုးသားငယ်လေး တစ်ဦးမှာလည်း ဒဏ်ရာအနည်းငယ် ရရှိခဲ့ကြောင်း သိရသည်။

ဖားကန့် မြေစာပုံပြိုကျ၊ ရေမဆေးသမား ၂ ဦး ထပ်မံသေဆုံး 

Oct 24

မော်လိုက်-ကလေးထောင်၌ ဆေးကုသခွင့်အတွက် လာဘ်ငွေ သိန်း ၂၀ အထိ တောင်းခံနေဟု PPNM ပြော  သတင်းနှင့်မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ စစ်ကိုင်းတိုင်း၊ မော်လိုက် - ကလေးအကျဉ်းထောင်မှ ထောင်အာဏာပိုင်များသည် အကျဉ်းသားများ၏ အရေး ပေါ် ဆေးကုသခွင့်ကို လာဘ်ငွေတောင်းယူပြီးမှ ခွင့်ပြုပေးနေကြောင်း မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများ ကွန်ရက် (PPNM) က ထုတ်ဖော် ပြောကြားလိုက်သည်။ အကျဉ်းသားများသည် ပြင်ပဆေးကုသခွင့်ရရန် ထောင်အရာရှိများကို တစ်ကြိမ်လျှင် ကျပ် ၅ သိန်းမှ ကျပ်သိန်း ၂၀ ကြား ပေးနေရပြီး၊ ထောင်အာဏာပိုင်များက ၎င်းတို့၏ ကိုယ်ပိုင်အပျော်အပါး KTV ဖိုးကိုပါ တောင်းဆို သည်ဟု PPNM က ဆိုသည်။ PPNM ၏ ထုတ်ပြန်ချက်အရ အရေးပေါ်လူနာများ ပြင်ပဆေးကုသခွင့်ရရန် ထောင်ပိုင်ကြီးနှင့် အရာရှိတချို့ကို လာဘ်ငွေပေးမှသာ ခွင့်ပြုပေးနေခြင်းဖြစ်သည်။ ဆေးဝါးကုသခွင့် ထိန်းချုပ်ခံရမှုကြောင့် နိုင်ငံရေးအကျဉ်းသားတချို့သည် မသန်စွမ်းဖြစ်သွားရသည့်အထိ ဆိုးရွားသော အခြေအနေများ ရင်ဆိုင်နေရသည်။ PPNM စာရင်းများအရ ၂၀၂၅ ခုနှစ်၊ ဇန်နဝါရီလမှ အောက်တိုဘာလအထိ ဆေးကုသမှု မရရှိခြင်းကြောင့် နိုင်ငံရေး အကျဉ်းသား ၂၈ ဦးအထိ ကျဆုံးခဲ့ပြီး ဖြစ်သည်။

မော်လိုက်-ကလေးထောင်၌ ဆေးကုသခွင့်အတွက် လာဘ်ငွေ သိန်း ၂၀ အထိ တောင်းခံနေဟု PPNM ပြော 

Oct 24

နမ္မတူ မြေပြင်နှင့် လေကြောင်း တိုက်ခိုက်မှုများကြောင့် ဒေသခံ ၅၀၀ ကျော် ထွက်ပြေး   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ ရှမ်းပြည် မြောက်ပိုင်း၊ TNLA ထိန်းချုပ်ထားသည့် နမ္မတူမြို့သည် ယခုလအတွင်း စစ်ကော်မရှင်တပ်၏ ပြင်းထန် သော တိုက်ခိုက်မှုများနှင့် ရင်ဆိုင်နေရပြီး၊ လေကြောင်းတိုက်ခိုက်မှု ၅ ကြိမ်အထိ ကြုံတွေ့ခဲ့ရသည်။ အောက်တိုဘာလ ၂၃ ရက်နေ့၊ ညပိုင်းက နမ္မတူမြို့ပေါ်ကို စစ်တပ်က ဂျက်တိုက်လေယာဉ်ဖြင့် ဗုံးထပ်မံကြဲချခဲ့ ခြင်း ဖြစ်သည်။ ယခင်တိုက်ခိုက်မှုများတွင် ကလေးအပါအဝင် အရပ်သား ၃ ဦး သေဆုံးခဲ့ပြီး၊ နေအိမ်၊ စာသင်ကျောင်းနှင့် ဘုန်းကြီးကျောင်းများ ပျက်စီးခဲ့သည်ဟု သိရသည်။ လက်ရှိတွင် စစ်ကောင်စီတပ်က နမ္မတူမြို့ဘက်သို့ မြေပြင်ထိုးစစ်များပါ ဆင်နွှဲလာနေသဖြင့် ဒေသခံ ၅၀၀ ကျော်ခန့် ထပ်မံ ထွက်ပြေးတိမ်းရှောင်နေရသည်။ တိုက်ပွဲများကြောင့် သတင်းအချက်အလက်နှင့် ဆက်သွယ်ရေးများပါ ပြတ်တောက်နေသဖြင့် စစ်ဘေးရှောင်များ အတွက် လူသားချင်းစာနာမှု အကူအညီများ အရေးတကြီး လိုအပ်နေကြောင်း အကူအညီပေးနေသူများက ပြော သည်။

နမ္မတူ မြေပြင်နှင့် လေကြောင်း တိုက်ခိုက်မှုများကြောင့် ဒေသခံ ၅၀၀ ကျော် ထွက်ပြေး  

Oct 24

မောင်တော ARSA တိုက်ခိုက်မှုတွင် အရပ်သား ၂ ဦး သေဆုံး၊ မိခင်အလောင်းဘေး သမီးငယ်ကို တွေ့ရှိ   သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ ရခိုင်ပြည်၊ မောင်တောမြို့နယ်၌ အစ္စလာမ်မစ် အစွန်းရောက် ARSA အဖွဲ့၏ ခြုံခိုတိုက်ခိုက်မှုကြောင့် အပြစ်မဲ့ အရပ်သားအမျိုးသမီးနှစ်ဦး သေဆုံးခဲ့ပြီး၊ ထိတ်လန့်ဖွယ်ရာအဖြစ် မိခင်၏ အလောင်းဘေးတွင် ၃ နှစ် သမီးငယ် လေးကို အသက်ရှင်လျက် တွေ့ရှိခဲ့ရသည်။ အောက်တိုဘာလ ၂၂ ရက်နေ့ နေ့လယ်ပိုင်းက မောင်တောမြို့နယ်ထဲတွင် စားသောက်ကုန် ဝယ်ယူပြီး ပြန်လာ သော ခရီးသည်တင်ယာဉ်တစ်စီးသည် မြိုယုရွာအရှေ့ဘက် တံတားနားတွင် ARSA ၏ တိုက်ခိုက်ခြင်းကို ခံခဲ့ရ သည်။ ခရီးသည်များနှင့် ကားသမားကို ဖမ်းခေါ်သွားခဲ့ပြီးနောက် အာရက္ခတပ်တော် (AA) က လိုက်လံရှာဖွေခဲ့သည်။ AA ၏ ရှာဖွေမှုအပြီးတွင် ခရီးသည်များဖြစ်သည့် အသက် ၃၀ နှစ် အရွယ် ဒေါ်ဝေဝေစိုး နှင့် အသက် ၄၀ နှစ် အရွယ် ဒေါ်နိုင်နိုင်ဆွေ တို့ကို သေနတ်ဖြင့် ပစ်သတ်ခံထားရသည့် အလောင်းများ အဖြစ် တွေ့ရှိခဲ့ရသည်။ သေဆုံးသူ မိခင် ဒေါ်ဝေဝေစိုး၏ အလောင်းဘေးတွင်မူ ၎င်း၏ ၃ နှစ်အရွယ် သမီးငယ်လေး မခိုင်မြတ်မွန်ကို အသက်ရှင်လျက် တွေ့ရှိခဲ့ခြင်းဖြစ်သည်။ ကားသမားအပါအဝင် ထိခိုက်ဒဏ်ရာရသူ နှစ်ဦးကိုလည်း AA က တွေ့ရှိခဲ့သည်။ AA က ARSA အဖွဲ့၏ အရပ်သားပစ်မှတ်ထား သတ်ဖြတ်မှုများကို ရှုတ်ချပြီး၊ နယ်စပ်ဒေသနေ ပြည်သူများ အနေဖြင့် လုံခြုံရေးအဖွဲ့များကို ကြိုတင်အသိပေးပြီးမှသာ သွားလာကြရန် အရေးပေါ် သတိပေးနှိုးဆော်ထား သည်။

မောင်တော ARSA တိုက်ခိုက်မှုတွင် အရပ်သား ၂ ဦး သေဆုံး၊ မိခင်အလောင်းဘေး သမီးငယ်ကို တွေ့ရှိ  

Oct 24

KK Park အလုပ်သမား ထောင်ချီ ထိုင်းဘက်ထွက်ပြေး၊ ကျားဖြန့်အဆောက်အအုံ ဖျက်ဆီးခံရ  သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၄ ရက်။ မြန်မာ - ထိုင်းနယ်စပ်၊ မြဝတီမြို့နယ်ရှိ KK Park ကျားဖြန့်လုပ်ငန်းခွင် ၌ စစ်ရေးတင်းမာမှုများကြောင့် အလုပ်သမား ထောင်နှင့်ချီ ထိုင်းနိုင်ငံဘက်သို့ ထွက်ပြေးတိမ်းရှောင်လာခဲ့ကြပြီး၊ မြန်မာဘက်ခြမ်းတွင်လည်း အဆောက်အအုံအချို့ ဖောက်ခွဲဖျက်ဆီးခံခဲ့ရသည်။ စစ်တပ်က KK Park ကို ထပ်မံဝင်ရောက်မည်ဟူသော သတင်းများ ထွက်ပေါ်လာခြင်းကြောင့် အောက်တိုဘာ ၂၃ ရက်နေ့တွင် အလုပ်သမားများ အုတ်အော်သောင်းနင်း ထွက်ပြေးခဲ့ကြခြင်းဖြစ်သည်။ အများစုသည် ရွှေကုက္ကိုလ်မြို့သစ်ဘက်သို့ တိမ်းရှောင်ကြပြီး၊ တချို့မှာ သောင်ရင်းမြစ်ကို ဖြတ်ကူး၍ ထိုင်းနိုင်ငံ၊ မဲဆောက်မြို့ဘက်သို့ အလုံးအရင်းဖြင့် ဝင်ရောက်လာခဲ့သည်။ ထိုင်းနိုင်ငံ၊ တာ့ခ်ခရိုင် အာဏာပိုင်များ၏ ထုတ်ပြန်ချက်အရ အောက်တိုဘာလ ၂၃ ရက်နေ့၊ ညနေပိုင်းအထိ KK Park မှ ထွက်ပြေးလာသူ ၆၇၇ ဦး ထိုင်းဘက်သို့ ရောက်ရှိလာသည်။ တရားမဝင် ဝင်ရောက်လာသူများကို ထိုင်းလူဝင်မှု ကြီးကြပ်ရေးဌာနက တင်းတင်းကျပ်ကျပ် စစ်ဆေးနေပြီး၊ ဖမ်းဆီးထိန်းသိမ်းခံရသူ ထောင်နှင့်ချီ ရှိသည်။ ၎င်းတို့အနက် တရုတ်နိုင်ငံသား အများဆုံးပါဝင်ပြီး၊ ပတ်စ်ပို့မရှိသူများနှင့် မှုခင်းရာဇဝတ်မှု မှတ်တမ်းရှိသူများပါ တွေ့ရှိရကြောင်း ထိုင်းစစ်တပ်က ထုတ်ပြန်ထားသည်။ တစ်ချိန်တည်းတွင် မြန်မာဘက်ခြမ်း၌လည်း KK Park ထဲရှိ ကျားဖြန့်လုပ်ငန်း လုပ်ကိုင်သည့် အဆောက်အအုံ အချို့ကို စစ်တပ်နှင့် BGF တို့ ပူးပေါင်း၍ အောက်တိုဘာ ၂၃ ရက် ညနေ ၆ နာရီခန့်တွင် ဖောက်ခွဲဖျက်ဆီးခဲ့ သည်ဟု BGF အရင်းအမြစ်များက အတည်ပြုသည်။

KK Park အလုပ်သမား ထောင်ချီ ထိုင်းဘက်ထွက်ပြေး၊ ကျားဖြန့်အဆောက်အအုံ ဖျက်ဆီးခံရ 

Oct 23

ကလေး-တမူးလမ်းမတွင် စစ်ကြောင်းနှစ်ကြောင်း ညှပ်ထိုး၊ ဒေသခံ ၁ သောင်းကျော် ထွက်ပြေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ အောက်တိုဘာလ ၂၃ ရက်။  စစ်ကိုင်းတိုင်းဒေသကြီး၊ ကလေးမြို့နှင့် တမူးမြို့နယ်ကြားရှိ မြန်မာ - အိန္ဒိယ နယ်စပ်ကို ဆက်သွယ်ထားသော အာရှလမ်းမကြီးပေါ်တွင် စစ်ရေးတင်းမာမှုများ မြင့်တက်နေပြီး ဒေသခံတစ်သောင်းကျော် ဘေးလွတ်ရာကို ထွက်ပြေးနေရသည်။ စစ်ကောင်စီတပ်က အဆိုပါလမ်းမကြီးပေါ်သို့ စစ်ကြောင်းနှစ်ကြောင်းခွဲ၍ ညှပ်ပိတ်ထိုးနေသဖြင့် တိုက်ပွဲများ ပြင်းထန်လျက်ရှိကြောင်း ဒေသခံသတင်းရင်းမြစ်များက ပြောသည်။ ထိုသို့ စစ်ကြောင်းထိုးမှုကြောင့် ဒေသခံ ကျေးရွာပေါင်း ၅၀ ကျော်မှ ပြည်သူ တစ်သောင်းကျော် သည် ဘေးလွတ် ရာသို့ ထွက်ပြေးတိမ်းရှောင်နေရပြီး လူသားချင်းစာနာမှုဆိုင်ရာ အကူအညီများ အရေးပေါ် လိုအပ်လျက်ရှိ ကြောင်း သိရသည်။ ကလေးမြို့ဘက်မှ စစ်ကြောင်းတစ်ကြောင်း၊ တမူးမြို့နယ် ပန်းသာကျေးရွာဘက်မှ စစ်ကြောင်းတစ်ကြောင်း သည် အင်အားအလုံးအရင်းဖြင့် အာရှလမ်းမကြီးပေါ်သို့ ဝင်ရောက်လာခြင်းဖြစ်သည်။ အောက်တိုဘာ ၂၂ ရက်နေ့တွင် ကလေးဘက်မှ စစ်ကြောင်းသည် စော်ဘွားရေရှင်ကျေးရွာအနီး၊ တမူးဘက်မှ စစ်ကြောင်းက နန်းမွန်းတားကျေးရွာအနီး တွင် PDF ပူးပေါင်းတပ်ဖွဲ့များနှင့် တိုက်ပွဲဖြစ်ပွားနေပြီး စစ်ကြောင်း နှစ်ခုမှာ ညှပ်ပိတ်ထိုးသည့် အနေအထား ဖြစ်နေကြောင်း စစ်ရေးသတင်းရင်းမြစ်များက သုံးသပ်သည်။ ဤထိုးစစ်ကြောင့် ကလေးမြို့နယ်မြောက်ပိုင်းရှိ တော်လှန်ရေးတပ်ဖွဲ့များ၏ စခန်းအချို့ကိုလည်း ယာယီ လက်လွှတ်ခဲ့ရသည်။ စစ်ကြောင်းထိုးမှုများကြောင့် ကလေး - တမူး လမ်းမကြီးတစ်လျှောက်နှင့် မြောက်ပိုင်းဒေသတစ်လျှောက်မှ ရွာပေါင်း ၅၀ ကျော်က ပြည်သူများသည် တောတောင်များထဲသို့ ထွက်ပြေးတိမ်းရှောင်နေရပြီး စစ်ရှောင်ဦးရေ မှာ တစ်သောင်းကျော် ခန့် ရှိနေသည်။ စစ်ရှောင်အများစုမှာ ကိုယ်လွတ်ရုန်း ထွက်ပြေးလာကြရသဖြင့် အစားအသောက်၊ ဆန်၊ မိုးကာ၊ အိုးခွက်ပန်းကန် စသည့် အခြေခံပစ္စည်းများ လုံးဝမပါလာသည့် မိသားစုများ အများအပြား ရှိနေသည်။ စစ်ရှောင်များအနက် ကိုယ်ဝန်ဆောင်မိခင်၊ သက်ကြီးရွယ်အိုနှင့် နာမကျန်းဖြစ်သူများ ပါဝင်နေ သောကြောင့် ဆေးဝါးနှင့် ကျန်းမာရေးစောင့်ရှောက်မှုများ အရေးပေါ် လိုအပ်နေသည်။ စစ်ကော်မရှင်တပ်၏ စစ်ကြောင်းထိုးမှုများအတွင်း ကလေး - တမူး လမ်းပိုင်းတစ်လျှောက်ရှိ ကျေးရွာများတွင် အောက်တိုဘာ ၁၇ နှင့် ၁၈ ရက်နေ့များ၌ အရပ်သား ၁၀ ဦးထက်မနည်း သတ်ဖြတ်ခံခဲ့ရသည် ဟု ဒေသခံများက ပြောဆိုသည်။ စစ်ကိုင်းတိုင်းဒေသခံများသည် စစ်အာဏာသိမ်းပြီးနောက်ပိုင်း နေအိမ်များ မီးရှို့ခံရခြင်း၊ အိုးမဲ့အိမ်မဲ့ ဖြစ်ရခြင်း တို့နှင့် ကြုံတွေ့ခဲ့ရပြီး ယခုအခါ စစ်ကြောင်းများကြောင့် ဘေးလွတ်ရာ ထပ်မံ ထွက်ပြေးတိမ်းရှောင်နေရကာ လူသားချင်းစာနာမှု အကူအညီများ အရေးပေါ် လိုအပ်လျက်ရှိသည်။

ကလေး-တမူးလမ်းမတွင် စစ်ကြောင်းနှစ်ကြောင်း ညှပ်ထိုး၊ ဒေသခံ ၁ သောင်းကျော် ထွက်ပြေး

« Prev 1 … 169 170 171 172 173 … 1,115 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ

×Close

News

မီဒီယာများအတွက် နည်းပညာကုမ္ပဏီကြီးများကို အခွန်ကောက်မည့် ဥပဒေ ဩစတြေးလျ အတည်ပြု — August 21, 2026 8:07 pm
ထိုင်ဝမ် ကာကွယ်ရေးဘတ်ဂျက် စံချိန်တင် အတည်ပြု — August 21, 2026 8:04 pm
အမေရိကန်-တောင်ကိုရီးယား စစ်ရေးလေ့ကျင့်မှု ရုတ်တရက် ရပ်ဆိုင်း — August 21, 2026 8:02 pm

Recent Posts

ရွှေကူ လေကြောင်းတိုက်ခိုက်မှုတွင် ကိုယ်ဝန်ဆောင် အမျိုးသမီးအပါ အရပ်သားများ ဒဏ်ရာရ
သောင်ရင်းမြစ်ရေတက်ပြီး မြဝတီနှင့် မဲဆောက်တွင် ရေကြီးရေလျှံမှုဖြစ်
အင်းလေးရေ မြင့်တက်လာ၍ ကြိုတင်ရွှေ့ပြောင်းမှုများ ပြုလုပ်
မြောင် ဘုန်းကြီးကျောင်း ဥပုသ်နေ့တွင် ဗုံးကြဲခံရ၍ ၁၂ ဦး ထက်မနည်း သေဆုံး
ဂွနှင့်သံတွဲကို စစ်တပ်က လေယာဉ်အုပ်ဖွဲ့ ဗုံးကြဲမှုကြောင့် စစ်ဘေးရှောင်များ ဒဏ်ရာရ

Archives

Archives

×Close