NMG Doh – Page 223 – Network Media Group

NMG Doh

Author: NMG Doh

Jan 9

ရမ်းဗြဲလေကြောင်းတိုက်ခိုက်မှု အရပ်သား ၄၁ ဦးသေဆုံး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၉ ရက်။ ရခိုင်ပြည်၊ ရမ်းဗြဲမြို့နယ်တွင် လေကြောင်းတိုက်ခိုက်မှုကြောင့် ဒေသခံ အရပ်သား ၄၁ ဦး သေဆုံးခဲ့ပြီး ၅၂ ဦး ထိခိုက်ဒဏ်ရာ ရရှိခဲ့သည်ဟု ဒေသတွင်း ကူညီကယ်ဆယ်ရေး ဆောင်ရွက်နေသူများက ပြောသည်။ ရမ်းဗြဲမြို့နယ်၊ ကျော်နီမော်ကျေးရွာအား ယမန်နေ့ (ဇန္နဝါရီ ၈) နေ့လည် ၁ နာရီအချိန်ခန့်၌ စစ်ကောင်စီတပ်က လေကြောင်းမှ ဗုံးကြဲတိုက်ခိုက်ခဲ့ရာတွင် ရွာ၏ တောင်ပိုင်း၊ မြောက်ပိုင်းနှင့် အလယ်ပိုင်းရပ်ကွက်တို့ရှိ လူနေအိမ် များ ရာနှင့်ချီ မီးလောင်ပျက်စီးခဲ့ခြင်း ဖြစ်သည်။ ကူညီကယ်ဆယ်ရေး ဆောင်ရွက်ပေးနေသည့် မြေပြင်အရင်းအမြစ် တစ်ဦးက “၅၂ ဆိုတာက အခုဆေးရုံမှာ ရောက်နေသလောက်ပေါ့နော်။ မနေ့ညရော ဒီနေ့ရော အခြေအနေတွေ ရှုပ်ထွေးနေလို့ မကောက်နိုင်သေးဘူး။ စာရင်းကတော့ ဒီထက်များမှာပါ။ အလောင်းမတွေ့သေးတာတွေနဲ့ ဆိုတော့။ ဆေးရုံမှာလည်း အရက်ပြန်တွေ၊ ဆေးတွေ ပြတ်နေပြီ” ဟု ပြောသည်။ ထို့အပြင် လေကြောင်း တိုက်ခိုက်မှုကြောင့် အိမ်ခြေ ၆၀၀ ကျော် ထိခိုက်ပျက်စီးနိုင်ခြေရှိပြီး လက်ရှိတွင် ဆေးနှင့် ဆက်စပ်ပစ္စည်း အကူအညီများ အရေးပေါ် လိုအပ်နေကြသည်ဟု ဆိုသည်။ အဆိုပါ ဖြစ်စဉ်မှာ ရခိုင်ပြည်အတွင်း လေကြာင်းတိုက်ခိုက်မှုများ အနက် အရပ်သား ထိခိုက်မှု အများဆုံးဖြစ်ပြီး ထိခိုက်သူများမှာ မူဆလင်လူမျိုး အများစု ဖြစ်သည်။ ကျောက်နီမော်ကျေးရွာတွင် နေထိုင်သူတစ်ဦးက “ဆုံးတာက ကလေးတော်တော် များတယ်။ ၁၈ အောက်တွေ ၁၀ အောက်တွေရော။ တိုက်ပွဲဖြစ်တာ မဟုတ်ပါဘူး။ ဒီတိုင်းနေ့လည်ခင်း အချိန်ကြီး ရုတ်တရက် လာကြဲသွား တာပါ” ဟု ပြောသည်။ တိုက်ပွဲဖြစ်ပွားခြင်းမရှိဘဲ ပြည်သူလူထု နေထိုင်နေသည့် ကျေးရွာအား ပစ်မှတ်ထား ဗုံးကြဲမှုကြောင့် လူအများ အပြား သေဆုံးရခြင်းသည် စစ်ရာဇဝတ်မှုမြောက်ကြောင်း အာရက္ခတပ်တော်( AA) ပြောခွင့်ရသူ ဦးခိုင်သုခက နိရဉ္စရာသတင်းဌာနကို ပြောဆိုထားသည်။ ရမ်းဗြဲမြို့ကို ၂၀၂၄ ခုနှစ် မတ်လ ၁၁ ရက်နေ့တွင် ရခိုင်တပ်တော် (AA)က သိမ်းယူနိုင်ခဲ့ပြီးနောက် ပြီးခဲ့သည့် ဒီဇင်ဘာလ ၂၉ ရက်နေ့၌ ငြိမ်းချမ်းရေးဆွေးနွေးရန် အသင့်ရှိသည်ဟု ထုတ်ပြန်ခဲ့သည်။ ထို့ကြောင့် AA ထုတ်ပြန်ချက်အား စစ်ကောင်စီဖက်မှ မလိုက်နာသည့်သဘော ပြသသည့် အနေဖြင့် ယခုကဲ့သို့ စစ်ရာဇဝတ်မှု ကျူးလွန်ခြင်း ဖြစ်သည်ဟု ရခိုင်စစ်ရေး ကျွမ်းကျင်သူ အချို့က သုံးသပ်မှုများ ရှိနေသည်။  (ဓါတ်ပုံ - Arakan Princess Media)

ရမ်းဗြဲလေကြောင်းတိုက်ခိုက်မှု အရပ်သား ၄၁ ဦးသေဆုံး

Jan 9

စစ်မှုထမ်းခေါ်ဆိုမှု နာဂဒေသမှ လိုက်ပါသူ မရှိသေး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၉ ရက်။ နာဂဒေသတွင် စစ်မှုထမ်းရန်အတွက် စစ်ကောင်စီက တစ်ဦးကို ငွေကျပ် သိန်း ၃၀ ပေးပြီး ခေါ်ယူစုဆောင်းနေ သော်လည်း လိုက်မည့်သူ မရှိသေးဟု ဒေသခံများက ပြောသည်။ နာဂကိုယ်ပိုင်အုပ်ချုပ်ခွင့်ရဒေသ၊ လေရှီးမြို့နယ်တွင် ကျေးရွာတစ်ရွာလျှင် လူဦးရေ ၂ ဦးမှ ၅ ဦးနှုန်းဖြင့် စစ်မှု ထမ်းရန်အတွက် ဇန်နဝါရီလအတွင်း မြို့နယ်ထွေအုပ်ရုံးမှ စာထုတ်ကာ ခေါ်ယူနေကြောင်း လေရှီး ဒေသခံများက ပြောသည်။ လေရှီးမြို့ခံ အမျိုးသား တစ်ဦးက “ပြီးခဲ့တဲ့ နှစ်ပတ်ကျော်ကတည်းက ကျနော့် နာမည်လည်း ပါတယ်။ ကျနော် တို့ ရွာက ငါးယောက်လို့ ပြောတယ်။ လူဦးရေပေါ်မူတည်တယ်။ ရွာတိုင်းတော့ မဟုတ်ဘူး။ သွားတဲ့ လူတော့ မရှိဘူး။ စာက အုပ်ချုပ်ရေးမှူးတွေဆီက တစ်ဆင့်ရောက်တာ” ဟု ပြောသည်။ နိုင်ငံတဝှမ်းတွင် စစ်မှုထမ်း အပတ်စဉ် ၈ အတွက် လူစုဆောင်းမှုများ၊ ခေါ်ယူမှုများ လုပ်နေပြီ ဖြစ်သော် လည်း လေရှီးမြို့နယ်အတွင်း ယခုအကြိမ် စစ်မှုထမ်းခေါ်ယူခြင်းမှာ ၆ ကြိမ်မြောက် ဖြစ်သည်ဟု ဒေသခံများက ပြောသည်။ ယခု ၆ ကြိမ်မြောက် စစ်မှုထမ်းခေါ်ဆိုမှုတွင် စစ်မှုထမ်းရန် လိုက်ပါသူများအား ငွေကျပ်သိန်း ၃၀ ပေးမည်ဖြစ်ပြီး စစ်မှုထမ်းမသွားပါက အိမ်တိုင်ရာရောက် ဖမ်းဆီးမည်ဖြစ်ကြောင်း ခြိမ်းခြောက်ပြောဆိုမှုများလည်း ရှိနေသည်ဟု လေရှီးမြို့ ဒေသခံများက ပြောသည်။ လေရှီးမြို့ခံ အမျိုးသားက “သတင်းတော့ သေချာတယ်။ အခုကျေးရွာ တစ်ရွာကို မဲနှိုက်ပြီး နှိုက်လို့ရတဲ့ သူကို မြန်မာငွေ သိန်း ၃၀ ပေးပြီး စစ်ကောင်စီက ခေါ်ဆောင်သွားမယ် ပေါ့နော်။ တကယ်လို့ ခေါ်လို့မရရင် ကိုယ်တိုင် လာပြီး လာဆွဲယူမယ်တဲ့။ ကျနော်တို့ဆီမှာတော့ ယောက်ကျားလေးတွေပဲ ခေါ်တာ” ဟု ပြောသည်။ လေရှီးမြို့နယ်တွင် ကျေးရွာစုစုပေါင်း ၆၂ ရွာရှိပြီး လေရှီးမြို့နှင့် ဆွမ္မရာမြို့ ဟူ၍ရှိပြီး ကျေးရွာတစ်ရွာ လျှင် အနည်းဆုံး တစ်ဦးနှုန်း လိုက်ပါရန် ခေါ်ယူနေကြောင်း လေရှီးမြို့နယ်အုပ်ချုပ်ရေးအဖွဲ့နှင့် နီးစပ်သူ တစ်ဦးက ပြောသည်။ “လေရှီးမြို့နယ်မှာ အခုတစ်ခါ စစ်ကောင်စီက စစ်မှုထမ်းဖို့ခေါ်နေပြန်ပြီးလေ။ တစ်ရွာတစ်ယောက် စာရင်း ပေးပါဖို့ ကျေးရွာ အုပ်ချုပ်ရေးမှူးတွေကို သတင်းပေးပို့ထားတယ်လို့ ကြားတယ်။ အခုက ရွာတိုင်းကို စာပို့ ထားပြီး မရရင် မြို့နယ်က ဆင့်ခေါ်မယ်ပြောတယ်” ဟု ပြောသည်။ စစ်ကောင်စီ၏ စစ်မှုထမ်း ခေါ်ဆိုမှု ၅ ကြိမ်တွင် လေရှီးမြို့နယ်မှ စစ်မှုထမ်းသွားသူ ၁၀ ဦး ရှိခဲ့ပြီး နာဂဒေသမှ စစ်မှုထမ်း သွားသူများသည် မုံရွာမြို့နှင့် မန္တလေးမြို့တို့တွင် စစ်သင်တန်း တက်ကြရသည်ဟု စစ်မှုထမ်းပါ သွားသူများ၏ မိဘဆွေမျိုးများက ဆိုသည်။ စစ်မှုထမ်း ဥပဒေ ထုတ်ပြန် အသက်သွင်းပြီးနောက် အစောပိုင်း ခေါ်ဆိုမှုများတွင် နာဂကိုယ်ပိုင် အုပ်ချုပ်ခွင့်ရ ဒေသများဖြစ်သည့် နန်းယွန်းမြို့ နယ်၊ လဟယ်မြို့နယ်နှင့် လေရှီးမြို့နယ်တို့မှ ပြည်သူအချို့မှာ မိမိဆန္ဒအလျောက် စစ်မှုထမ်းသူများပင် ရှိခဲ့သည် ဟု အုပ်ချုပ်ရေး အဖွဲ့နှင့် နီးစပ်သူများက ပြောသည်။ နာဂ ကိုယ်ပိုင် အုပ်ချုပ်ခွင့်ရဒေသ ဖြစ်သည့် လဟယ်မြို့နယ်၊ လေရှီးမြို့နယ်နှင့် နန်းယွန်းမြို့နယ်တို့မှ စစ်မှုထမ်း သွားသူ အယောက် ၁၀၀ ကျော်ရှိခဲ့ပြီး လဟယ်မြို့နယ်က တစ်ဦးမှာ ၂၀၂၄ ခုနှစ် အောက်တိုဘာလတွင် ရှေ့တန်း တစ်နေရာ၌ သေဆုံးသွားခဲ့သည်။

စစ်မှုထမ်းခေါ်ဆိုမှု နာဂဒေသမှ လိုက်ပါသူ မရှိသေး

Jan 9

စစ်ကောင်စီ၏ ရိက္ခာဆန် အိတ် ၃၀၀၀ နီးပါးကို ပင်လယ်ပြင်တွင် KNU ဖမ်းဆီး သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၉ ရက်။ စစ်ကောင်စီ၏ ရိက္ခာ ဆန်အိတ် ၃၀၀၀ နီးပါး ကို တနင်္သာရီမြို့နယ်နှင့် ဘုတ်ပြင်းမြို့နယ်ကြားရှိ လေညာဒေသ ပင်လယ် ပြင်တွင် KNU က ဖမ်းဆီးရမိခဲ့သည်။ စစ်ကောင်စီတပ်၏ ဆန်အိတ်ပေါင်း ၂၈၅၀ အိတ်ကို စက်လှေပေါ်တွင် သိမ်းဆည်းရမိခဲ့ခြင်း ဖြစ်သည်ဟု KNU တပ်မဟာ (၄) မြိတ် - ထားဝယ်ခရိုင် အတွင်းရေးမှူး ပဒို စောအယ်နားက ပြောသည်။ ပဒိုစောအယ်နားက “စက်လှေထဲမှာ ပါလာတာ။ အားလုံး ၇ ယောက်ပါပဲ။ သူတို့ကို လောလောဆယ်တော့ ထိန်း သိမ်းထားတယ်။ အရပ်သားတွေ ဖြစ်နေတော့လည်း အရေးယူဖို့ကခက်နေပြန်တယ်” ဟု ပြောသည်။ ဆန်အိတ်ပေါင်း ၂၈၅၀ အိတ်နှင့် ရိက္ခာပစ္စည်းများ သယ်ဆောင်လာသည့် မြတ်သီရိအောင် အမည်ရှိ စက်လှေ တစ်စီးကို တနင်္သာရီမြို့နယ်နှင့် ဘုတ်ပြင်းမြို့နယ်ကြားရှိ လေညာဒေသ ပင်လယ်ပြင်တွင် ကရင်အမျိုးသား လွတ်မြောက်ရေးတပ်မတော်မှ ဇန်နဝါရီလ ၂ ရက်နေ့က သိမ်းဆည်းရမိခဲ့ခြင်း ဖြစ် သည်။ သိမ်းဆည်းရမိခဲ့သည့် ပစ္စည်းများကို လိုအပ်သလို အသုံးပြုသွားမည် ဖြစ်ကြောင်း ပဒိုစောအယ်နားက ဆိုသည်။ စစ်ကောင်စီတပ်အတွက် ရိက္ခာများ တင်ဆောင်လာသည့် စက်လှေကိုမူ KNU က သိမ်းဆည်းထားပြီး စက်လှေ မှာ ဘုတ်ပြင်းမြို့နယ်၊ ရွှေဂဲညိုကျေးရွာမှ ပျူစောထီးခေါင်းဆောင် ဦးရှိန်ညွန့် နှင့် အဆက်အသွယ်ရှိနေသည်ဟု ဆိုသည်။ စစ်ကောင်စီက ပြည်သူများ၏ ကားများ၊ စက်လှေများကို ချောဆွဲ၍ ပစ္စည်းများပို့ခြင်း၊ ရိက္ခာပို့ခြင်းနှင့် လူနာပို့ ခြင်းများကို လုပ်ဆောင်နေကြခြင်း ဖြစ်သည်။ ပြီးခဲ့သည့် ၂၀၂၃ ခုနှစ် ဒီဇင်ဘာလ ၂၆ ရက်နေ့ ညနေပိုင်းကလည်း စစ်ကောင်စီ၏ မေတ္တာဗျူဟာကုန်း စခန်းသို့ ပို့ဆောင်မည့် ဆန် ၆၈ အိတ်၊ ဆီနှင့် စားသောက်ကုန်များ တင်ဆောင်လာသည့် ရိက္ခာကားတစ်စီးကို ထားဝယ်မြို့ နယ်၊ ဟိန္ဒူးချောင်းကျေးရွာ အနီးတွင် KNU တပ်မဟာ (၄)၊ KNLA တပ်ရင်း ၁၂ က ဖမ်းဆီးခဲ့သေးသည်။

စစ်ကောင်စီ၏ ရိက္ခာဆန် အိတ် ၃၀၀၀ နီးပါးကို ပင်လယ်ပြင်တွင် KNU ဖမ်းဆီး

Jan 9

မုဒိန်းမှု ကျူးလွန်သူ CDM စစ်သားအား မြိတ် ပ.လ.ဖ က ဖမ်းဆီး တရားစွဲ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၉ ရက်။ မြိတ်ခရိုင်၊ တနင်္သာရီမြို့နယ်၊ ကျေးရွာတစ်ခုတွင် ခုနှစ်တန်းကျောင်းသူအား မုဒိမ်းပြုကျင့်ခဲ့သူ CDM စစ်သားကို အချုပ်ချပြီး တရားစွဲဆိုထားသည်ဟု တနင်္သာရီမြို့နယ် ပြည်သူ့လုံခြုံရေးအဖွဲ့ - ပ.လ.ဖ တာဝန်ရှိသူက ပြော သည်။ တကူကျေးရွာအုပ်စုအတွင်းရှိ ရွာတစ်ရွာတွင် အသက် ၁၅ နှစ်အရွယ် ခုနစ်တန်းကျောင်းသူတစ်ဦး ၂၀၂၄ ခုနှစ် ဒီဇင်ဘာလ ၉ ရက်နေ့က အဓမ္မပြုကျင့်ခံခဲ့ရသည်ဟု တနင်္သာရီမြို့နယ် ပညာရေး ဘုတ်အဖွဲ့က ဒီဇင်ဘာလ ၃၀ ရက်နေ့တွင် ထုတ်ပြန်ထားသည်။ နေအိမ်တွင် မိဘများမရှိချိန် အဆိုပါနေ့ ည ၉ နာရီခန့်က ခုနစ်တန်းကျောင်းသူ၏ အိပ်ယာထဲသို့ ကျူးလွန်ခဲ့သူ အမျိုးသား ဝင်ရောက်လာကာ လည်ပင်းကို ဓါးဖြင့်ထောက်ပြီး ခြိမ်းခြောက် အဓမ္မပြုကျင့်ခဲ့ခြင်း ဖြစ်ကြောင်း ထုတ်ပြန်ချက်ထဲတွင် ရေးသားထားသည်။ ကျူးလွန်ခဲ့သူ အမျိုးသားမှာ အသက် ၃၅ နှစ်အရွယ် စစ်ကောင်စီ တပ်သားတစ်ဦး ဖြစ်ပြီး အာဏာသိမ်းပြီး နောက် ရွာကိုပြန်ရောက်လာသည့် CDM တစ်ဦးလည်းဖြစ်ကြောင်း ရွာသားများက ပြောသည်။ အသက် ၅၀ ခန့်အရွယ် ရွာသားတစ်ဦးက “သူက စစ်ထဲလိုက်သွားပြီး ရွာမှာမနေတာ ကြာပြီ၊ ပြီးခဲ့တဲ့နှစ်ကမှ CDM လုပ်ပြီး တပ်ကထွက်ပြေးလာတာ။ ရွာကိုပြန်ရောက်လာတော့ PDF တွေက ကူညီကြည့်ရှုပေးထားတာ” ဟု ပြောသည်။ အခင်းဖြစ်ပွားပြီး နောက်နေ့ နံနက်တွင် ကျူးလွန်ခံရသူ ကျောင်းသူကိုယ်တိုင်က မိဘများအား ဖြစ်စဥ်ကို ပြန်လည်ပြောပြခဲ့သဖြင့် တာဝန်ရှိသူများအား အသိပေးတိုင်ကြားခဲ့ရာမှ ဖမ်းဆီးခဲ့ခြင်းဖြစ်သည်။ ကျူးလွန်ခဲ့သူ အမျိုးသားကို အမှုဖြစ်ပွားပြီး နှစ်ရက်အကြာ ဒီဇင်ဘာလ ၁၁ ရက်နေ့တွင် တနင်္သာရီမြို့နယ် ပြည်သူ့ကာကွယ်ရေးအဖွဲ့ က သွားရောက်ဖမ်းဆီးခဲ့ပြီးနောက် တနင်္သာရီမြို့နယ် ပြည်သူ့လုံခြုံရေးအဖွဲ့ထံသို့ လွှဲပြောင်းပေးခဲ့ခြင်းဖြစ်ကြောင်း ပလဖတာဝန်ရှိသူက ဆိုသည်။ ပြစ်မှုကျူးလွန်ခဲ့သူ အမျိုးသားကို တနင်္သာရီမြို့နယ် ပြည်သူ့အုပ်ချုပ်ရေးအဖွဲ့၏ မြို့နယ်တရားရေး အဖွဲ့မှ ရာဇသတ်ကြီး ပုဒ်မ ၃၇၆ ဖြင့် တရားစွဲဆိုထားပြီး တရားစီရင်ရေးနှင့် ပြစ်ဒဏ်ချမှတ်ရေးကို ဆက်လက် လုပ်ဆောင် နေကြသည်ဟု တာဝန်ရှိသူက ပြောသည်။ လက်ရှိတွင် အဓမ္မကျူးလွန်ခြင်းခံရသည့် ကျောင်းသူကို လိုအပ်သည့် ဆေးဝါးကုသမှုများနှင့် စောက်ရှောက် မှုများကို မြို့နယ် - ပ.လ.ဖ အဖွဲ့မှ လုပ်ဆောင်ပေးနေသည်ဟု ဆိုသည်။

မုဒိန်းမှု ကျူးလွန်သူ CDM စစ်သားအား မြိတ် ပ.လ.ဖ က ဖမ်းဆီး တရားစွဲ

Jan 9

ထားဝယ်မြို့နယ်အတွင်း ဗုံးကြဲမှုကြောင့် ရွာသား နှစ်ဦး ဒဏ်ရာရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၉ ရက်။ ထားဝယ်မြို့နယ်အတွင်းရှိ ကျေးရွာ တစ်ရွာကို စစ်ကောင်စီက ဗုံးကြဲတိုက်ခိုက်ရာ အရပ်သား နှစ်ဦး ဒဏ်ရာရခဲ့သည်ဟု ရွာသားများက ပြောသည်။ တိုက်ပွဲမရှိဘဲ ဇန်နဝါရီလ ၇ ရက်နေ့ နံနက် ၁၁ နာရီ ၄၅ မိနစ်ခန့်က စစ်ကောင်စီမှ ထားဝယ်မြို့နယ် ဘန်းချောင်း ဒေသထဲရှိ မေတ္တာမြို့ တောင်ဘက်ခြမ်းရှိ ကွမ်းချောင်းကြီးကျေးရွာကို ဗုံးသီးနှစ်လုံး ကြဲချသွားခဲ့ခြင်း ဖြစ်သည်။ ဗုံးကြဲချခံရမှုကြောင့် ကျေးရွာအတွင်းက အမျိုးသားတစ်ဦးနှင့် အမျိုးသမီးတစ်ဦး ထိခိုက်ဒဏ်ရာများ ရရှိခဲ့သည် ဟု ရွာသားတစ်ဦးက ဆိုသည်။ ထို့အပြင် လူနေအိမ်တစ်ဆောင်လည်း ထိခိုက်ပျက်စီးမှု ရှိခဲ့သည်။ အသက် ၄၀ ခန့်အရွယ် ရွာသားတစ်ဦးက “ကံကောင်းတယ်လို့ ဆိုရမယ်၊ ရွာသားတွေက ရွာထဲမှာရှိနေတာ၊ ဂျက်ဖိုက်တာလို့ပြောတဲ့ လေယာဥ်နဲ့ ကြဲချတဲ့ ဗုံးတွေက ရွာအလယ်က ဘောလုံးကွင်းနားက အိမ်တွေမှာ ကျ တာ၊ တိုက်ပွဲလည်း မဖြစ်ဘဲနဲ့” ဟု ပြောသည်။ ဗုံးများမှာ ကရင်အမျိုးသား အစည်းအရုံး KNU တပ်မဟာ ၄ အုပ်ချုပ်နယ်မြေ ဖြစ်သည့် ကွမ်းချောင်းကြီး ကျေးရွာ ဘောလုံးကွင်းအနီးဝန်းကျင်တွင် ကျရောက်ပေါက်ကွဲခဲ့ခြင်း ဖြစ်သည်။ လွန်ခဲ့သည့် လေးရက်ခန့်က မေတ္တာမြို့ရှိ စစ်ကောင်စီဗျူဟာကုန်းကို ကျောက်မဲတောင် ရဲစခန်းမှ ထွက်လာသည့် စစ်ကောင်စီတပ်ဖွဲ့ အင်အားတစ်ရာခန့်က လက်နက်နှင့် ရိက္ခာများ ဖြည့်တင်းရန်အတွက် ရောက်ရှိနေသည်ဟု KNU တပ်မဟာ ၄ ၏ မြိတ် - ထားဝယ်ခရိုင်မှ အတွင်းရေးမှူး ပဒို စောအယ်နားက ဆိုသည်။ ၂၀၂၄ ခုနှစ်၊ ဒီဇင်ဘာလ နောက်ဆုံးပတ်ထဲတွင်လည်း လောင်းလုံးမြို့နယ်အတွင်းရှိ ကျောက်နီမော်ကျေးရွာက စစ်ကောင်စီစခန်းများ တိုက်ခိုက်ခံရချိန်တွင် စစ်ကောင်စီတပ်က တိုက်လေယာဥ်ဖြင့် ဗုံးကြဲခဲ့သည့်အပြင် စစ်သင်္ဘောကနေလည်း လက်နက်ကြီးများဖြင့် ပစ်ခတ်ခဲ့သေးသည်။ စစ်ကောင်စီတပ်၏ စစ်သင်္ဘောပေါ်မှ လက်နက်ကြီးများဖြင့် ပစ်ခတ်မှုများကြောင့် ကျောက်နီမော်ရွာထဲရှိ နေအိမ် အများအပြား မီးလောင်ပျက်စီးခဲ့ရသည်ဟု ရွာသားများက ပြောသည်။

ထားဝယ်မြို့နယ်အတွင်း ဗုံးကြဲမှုကြောင့် ရွာသား နှစ်ဦး ဒဏ်ရာရ

Jan 8

ပုလော စရဖရုံးကို ပကဖ စီးနင်းမီးရှို့ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၈ ရက်။ မြိတ်ခရိုင်၊ ပုလောမြို့ပေါ်ရှိ စစ်ဘက်ရေးရာ လုံခြုံရေးတပ်ဖွဲ့ - စရဖရုံးကို ပြည်သူ့ကာကွယ်ရေးတပ်ဖွဲ့က ဝင်ရောက်စီးနင်းပြီးနောက် မီးရှို့ဖျက်ဆီးခဲ့သည်ဟု မြို့ခံများက ပြောသည်။ ပုလောမြို့၊ အမှတ် (၂) ရပ်ကွက်ရှိ စရဖရုံးကို PDF များက ဇန္နဝါရီလ ၆ ရက်နေ့၊ ည ၁၁ နာရီကျော် အချိန်ခန့်က ဝင်ရောက်တိုက်ခိုက်ပြီး မီးရှို့ဖျက်ဆီးခဲ့ခြင်း ဖြစ်သည်။ မြိတ်ခရိုင်၊ အမှတ် (၁) တပ်ရင်းမှ တာဝန်ရှိသူတစ်ဦးက “ကျနော်တို့ဘက်က လက်ဦးမှုရယူပြီး အရင်ဆုံး ဝင်ပစ် တာပါ။ သူတို့က လေးငါးချက်လောက်ပစ်ပြီး အကုန်လုံး ထွက်ပြေးသွားတယ်။ လက်နက်တွေတော့ မရခဲ့ဘူး၊ မီးရှို့ခဲ့တယ်။ ရုံးတခြမ်းတော့ မီးလောင်သွားတယ်။ သူတို့ ဘက်က စစ်ကူလာပြီး တိုက်ခိုက်တာမျိုး မရှိပါဘူး” ဟု ပြောသည်။ စီးနင်းတိုက်ခိုက်ခဲ့မှုကို ပြည်သူ့ကာကွယ်ရေးတပ်မတော်၊ မြိတ်ခရိုင်အမှတ် ၁ တပ်ရင်းမှ တပ်ဖွဲ့ဝင်များက ပြုလုပ် ခဲ့ခြင်းဖြစ်သည်။ တိုက်ခိုက်ခံရသည့် စရဖရုံးတွင် စစ်ကောင်စီ တပ်သားများ အပါအဝင် ဝန်ထမ်း ရှစ်ဦးခန့် နေထိုင်ကြသည်ဟု ပြည်သူ့ကာကွယ်ရေးတပ်ဖွဲ့ဝင် တစ်ဦးက ဆိုသည်။ ဝင်ရောက်စီးနင်းခံရချိန်တွင် စစ်ကောင်စီတပ်ဘက်မှ သေနတ်ဖြင့် ခြောက်ချက်၊ ခုနှစ်ချက်ခန့် ပစ်ခတ်ပြီး ထွက်ပြေးသွားကြသည်ဟု ဆိုသည်။ စစ်ကောင်စီတပ်ဖွဲ့ဝင်များ ထွက်ပြေးသွားပြီးနောက် စရဖ ရုံးကို ဝင်ရောက်ရှာဖွေခဲ့ရာ သေနတ်ကျည်ဘောက် နှစ်ခု၊ ကျည်တောင့် တစ်ရာနှင့် စာရွက်စာတမ်းများ သိမ်းဆည်းရမိခဲ့ပြီး ပြည်သူ့ကာကွယ်ရေး တပ်ဖွဲ့များက အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း မြိတ်ခရိုင်၊ အမှတ် (၁) တပ်ရင်းမှ တာဝန်ရှိသူက ဆိုသည်။ သေနတ်သံများ ရပ်သွားပြီးနောက် နာရီပိုင်းအကြာတွင် မီးသတ်ကား နှစ်စီးဖြင့် လာရောက်၍ မီးငြိမ်းသတ် သွားကြောင်း မြို့ခံများက ပြောသည်။ ဇန္နဝါရီလ ၇ ရက်နေ့၊ နံနက်ပိုင်းတွင် စရဖရုံးအနီးရှိ လမ်းသွယ်များကို စစ်ကောင်စီဘက်က ပိတ်ချထားပြီး မြို့ခံများကိုလည်း ရပ်ကွက်အတွင်းမှ ထွက်ခွာခွင့် မပြုကြောင်း မြို့ခံများက ဆိုသည်။ ပြီးခဲ့သည့် ၂၀၂၂ ခုနှစ် ဒီဇင်ဘာလတွင်လည်း ပုလောမြို့နယ်၊ စီမံအုပ်ချုပ်ရေး အဖွဲ့ရုံး၊ မြန်မာ့စီးပွားရေး ဘဏ်နှင့် မြို့နယ် ရွေးကောက်ပွဲ ကော်မရှင်ရုံး၊ ဝန်ထမ်းအိမ်ရာ အနီးရှိ မြန်မာ့စီးပွားရေးဘဏ်တို့ သေနတ်ဖြင့် ပစ်ခတ်ခံခဲ့ရ သေးသည်။

ပုလော စရဖရုံးကို ပကဖ စီးနင်းမီးရှို့

Jan 8

ပုသိမ်တွင် တစ်ရက်လျှင် ၃ နာရီသာ လျှပ်စစ်မီးရ သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၈ ရက်။ ဧရာဝတီတိုင်း၏ မြို့တော် ပုသိမ်မြို့တွင် တစ်နေ့ကို လျှပ်စစ်မီး ၃ နာရီသာ ရရှိတော့သည်ဟု မြို့ခံများက ပြော သည်။ တစ်နေ့ကို ၃ ကြိမ်မီးပေးပြီး တစ်ခါမီးလာလျှင် ၁ နာရီကြာခန့်သာ လာသဖြင့် ထမင်းဟင်း ချက်ပြုတ်ရန်ပင် လုံလောက်ခြင်းမရှိပဲ ထင်း၊ မီးသွေးနှင့် ဂက်စ်များကို အသုံးပြုနေကြရသည်ဟု ပုသိမ်မြို့၊ အမှတ် ၁ ရပ်ကွက်မှ အသက် ၅၀ ကျော်ခန့် အမျိုးသမီးတစ်ဦးက ပြောသည်။ ၂၀၂၄ ခုနှစ် ဒီဇင်ဘာလ ၃၁ ရက်နေ့မှစတင်ကာ ဇန္နဝါရီလ ၇ ရက်နေ့အထိ တစ်နေ့လျင်လျှပ်စစ်မီး ၃ နာရီသာ ရရှိတော့သည်ဟု မြို့ခံများကပြောသည်။ ပုသိမ်မြို့ ကိုးဆုကျောင်းလမ်းမှ အသက် ၃၀ ကျော် လူငယ်တစ်ဦးက “ New Year နေ့တုန်းကတော့ ဓါတ်အား ချွတ်ယွင်းမှု တစ်ခုခုကြောင့် မီးပြတ်တယ် ထင်တာပေါ့။ အခုကတော့ တစ်ပတ်ကြာသွားပြီဆိုတော့ မီးပေးချိန် လျော့ချတာ သေချာသွားတယ်။ နှစ်သစ်မှာ မြန်မာပြည်‌သူတွေရဲ့ဘဝ ပိုညစ်သွားပေါ့” ဟု ပြောသည်။ မိတ္တူကူးလုပ်ငန်း လုပ်ကိုင်နေသူ တစ်ဦးက တစ်နေ့ကို ၂၁ နာရီ လျှပ်စစ်မီးပြတ်သဖြင့် အသေးစားအလတ်စား စီးပွားရေးလုပ်ငန်းရှင်များ ထိခိုက်ဆုံးရှုံးမှုများနေပြီး လုပ်ငန်းပါ ရပ်ဆိုင်းလိုက်ရသူများ ရှိလာနေပြီဟု ဆိုသည်။ လျှပ်စစ်ရုံးနှင့်နီးစပ်သူတစ်ဦးက “တစ်နေ့ကို ၃ နာရီပဲပေးမှာပါ။ ရေအားလျှပ်စစ် ဓါတ်အားစက်ရုံတွေနဲ့ ဓါတ်ငွေ့သုံး လျှပ်စစ်ဓါတ်အားထုတ် စက်ရုံတွေက ဓါတ်အား ထုတ်လုပ်မှု အကြီးအကျယ် လျော့ကျနေတယ် အဲဒါကြောင့် လုံလောက်အောင်ဘယ်လိုမှ မပေးနိုင်တော့ဘူးလေ။ နွေရာသီရောက်ရင် ပိုဆိုးနိုင်သေးတယ်” ဟု ပြောသည်။ လျှပ်စစ်မီး ရရှိချိန် လျှော့နည်းသွားသော်လည်း မီတာခမှာ လျှော့ကျသွားခြင်း မရှိဘဲ ယခင်အတိုင်းသာ ကောက် ခံနေသည်ဟု ဆိုကြသည်။ ဓါတ်အားခ ပိုပြီးပေးဆောင်နေခဲ့ရသူ ပုသိမ်မြို့ခံ တစ်ဦးက “မီးပေးတဲ့အချိန်‌သာ နည်းသွားတာ။ မီတာခကတော့ တစ်ခါမှ လျော့သွားတယ်ဆိုတာ မရှိဘူး။ မီတာပုံးက ဓါတ်တိုင်ပေါ်မှာဆိုတော့ တောင်းတဲ့အတိုင်း ပေးနေရတာ ပဲ။ မီတာခ သိန်းကျော်လာလို့ တိုင်ပေါ်က မီတာပုံးကို အောက်ပြန်ချတာ ၅ သောင်းပေးရတယ်။ ယူနစ်တွေ ပိုမှတ်ထားတာပါဗျာ။ မနည်းဘူး။ ရုံးကိုသွားရှင်းမှ စာရင်း ညှိပေးမယ်တဲ့ဗျာ” ဟု ပြောသည်။ တစ်နိုင်ငံလုံးတွင် တစ်ရက်လျှင် လျှပ်စစ်ဓါတ်အား လိုအပ်ချက် ၅၄၄၃ မဂ္ဂါဝပ် ရှိသော်လည်း ဓါတ်အား ထုတ် လုပ်နိုင်မှုမှာ တစ်ရက်လျှင် ၁၇၀၀ မဂ္ဂါဝပ်ခန့်သာ ထုတ်လုပ်နိုင်ကြောင်း၊ မြန်မာတစ်နိုင်ငံလုံးတွင် လျှပ်စစ်မီး များ ပြတ်တောက်ပြီး အလှည့်ကျ ဓာတ်အားပေး စနစ်ဖြင့် မီးပေးနေရမှုမှာ နိုင်ငံ၏ လျှပ်စစ်လိုအပ်ချက်ကို ၅၀ ရာခိုင်နှုန်းခန့်သာ ဓာတ်အားထုတ်လုပ်နိုင်ခြင်းကြောင့် ဖြစ်သည်ဟု စစ်ကောင်စီ၏ လျှပ်စစ်ဝန်ကြီးဌာနက ၂၀၂၄ ခုနှစ်၊ နိုဝင်ဘာလတွင် ဝန်ခံ ထုတ်ဖော်ပြောဆိုထားသည်။

ပုသိမ်တွင် တစ်ရက်လျှင် ၃ နာရီသာ လျှပ်စစ်မီးရ

Jan 8

ဆီဆိုင်တွင် တိုက်ပွဲ မဖြစ်ပဲ စစ်ကောင်စီမှ ဒရုန်းနှင့် တိုက်ခိုက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၈ ရက်။ ရှမ်းပြည်တောင်ပိုင်း၊ ဆီဆိုင်မြို့နယ်၊ ထီစုံကျေးရွာကို စစ်ကောင်စီက တိုက်ပွဲဖြစ်ပွားခြင်းမရှိဘဲ ဒရုန်းဖြင့် ၂ ကြိမ်တိတိ တိုက်ခိုက်ခဲ့ရာ ကားနှင့် အိမ်အချို့ မီးလောင်သွားခဲ့သည်ဟု စစ်ဘေးရှောင်နေရသည့် ကျေးရွာနေပြည်သူများက ပြောသည်။ တောင်ရှေ့ကျေးရွာအုပ်စု၊ ထီစုံကျေးရွာအား စစ်ကောင်စီက ဇန္နဝါရီလ ၆ ရက်နေ့၊ နံနက် ၉ နာရီအချိန်ခန့်တွင် မီးလောင်ဗုံး အသုံးပြု၍ ဒရုန်းဖြင့် တိုက်ခိုက်မှုကြောင့် လူနေအိမ် ၂ လုံးနှင့် ကားတစ်စီး မီးလောင်ပြာကျ ပျက်စီးခဲ့ရသည်ဟု ဆိုသည်။ ထီစုံကျေးရွာမှ ဆီဆိုင်မြို့သို့ တိန်းရှောင်လာသူ တစ်ဦးက “လွယ်ထွယ်ရွာမှာ တပ်စွဲထားတဲ့ စစ်ကောင်စီတပ် တွေက ဒရုန်းနဲ့ ထီစုံကျေးရွာဘက်ကို ကြဲတာပေါ့။ သူတို့က နေ့တိုင်းဒရုန်းနဲ့ကြဲတော့ ရွာသူရွာသားတွေလည်း ရွာထဲမှာ မနေရဲကြတော့ဘူးပေါ့နော်။ ပြီးတော့ အိမ်ခြေ ၁၀၀ ကျော်တောင် အဲဒီရှိတဲ့ ရွာတွေကလည်း ၂၄ အိမ် က စစ်ကောင်စီရဲ့ မီးလောင်ဗုံးတွေ၊ ဒရုန်းတွေ လက်နက်ကြီးတွေနဲ့ တိုက်ခိုက်လို့ ပျက်စီးသွားပြီပေါ့နော်” ဟု ပြောသည်။ ထီစုံကျေးရွာမှာ စစ်ကောင်စီ၊ ပအိုဝ်းပြည်သူ့စစ် (PNA) ပူးပေါင်းတပ်များ မကြာခဏ ဝင်ထွက်သွားလာလေ့ရှိပြီး ရိက္ခာစုဆောင်းခြင်း၊ ဖောက်ထွင်းခိုးယူမှုများ လုပ်ခံရလေ့ရှိသည်ဟု စစ်ဘေးရှောင်များက ပြောသည်။ ထို့အပြင် PNA မှ မကြာခဏ တပ်သားသစ် စုဆောင်းခြင်း၊ စစ်ဘေးရှောင်များ ပြန်လာသည့် အချိန်တွင် ဆက် ကြေး ကောက်ခံခြင်းများလည်း ပြုလုပ်လေ့ရှိပြီး တပ်သားသစ်နှင့် ဆက်ကြေး မရသည့်ရက်များတွင် ကျေးရွာ အား လက်နက်ကြီး၊ ဒရုန်းများဖြင့် ပစ်ခတ်ခြင်း စသည့်အကြမ်းဖက် လုပ်ရပ်များကို လုပ်လေ့ရှိသည်ဟု ဆိုကြ သည်။ ပအိုဝ်းအမျိုးသား လွတ်မြောက်ရေး တပ်မတော် (PNLA) စစ်ဖက်ဆိုင်ရာ ပြောရေးဆိုခွင့်ရှိသူ ခွန်ရိန်းယံက “မနေ့က ဖြစ်စဉ်မှာတော့ ပြည်သူလူထုကို ထိခိုက်တာ မရှိပါဘူး။ စစ်ကောင်စီက ဒရုန်းနဲ့ ဗုံးကြဲပြီးမှ အိမ်ကို မီးလောင်သွားတာ။ အဲဒါနဲ့ သတင်းရပြီးနောက်ပိုင်း တခြားအိမ်တွေကို မီးကူးစက်တာမျိုး မဖြစ်ရအောင် ကျနော်တို့ တပ်ဖွဲ့ကပဲ စွန့်စားပြီးတော့မှ မီးငြိမ်းသတ်ခဲ့တယ်ပေါ့နော်” ဟု ပြောသည်။ ထီစုံကျေးရွာတွင် PNLA တပ်ဖွဲ့ဝင်များ တပ်စွဲခြင်း၊ ဝင်ထွက်သွားလာခြင်းများ မရှိဘဲ စစ်ကောင်စီမှ ပအိုဝ်းကျေး ရွာများအား ရည်ရွယ်ချက်ရှိရှိ စစ်ရာဇဝတ်မှု ကျူးလွန်နေခြင်း ဖြစ်သည်ဟု ဆိုသည်။ အလားတူ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ပင်လောင်းမြို့နယ်တွင်လည်း ၂၀၂၄ ခုနှစ်အတွင်း လေကြောင်း တိုက်ခိုက်မှု ၁၇၆ ကြိမ်အထိ ရှိခဲ့ပြီး လူနေအိမ် ၁၈ လုံး၊ ဆေးခန်း တစ်ဆောင်၊ စာသင်ကျောင်းနှင့် ဘာသာရေး အဆောက်အအုံများ ထိခိုက်ပျက်စီးခဲ့ရသည်ဟု ဒေသတွင်း လူမှုအဖွဲ့အစည်း တာဝန်ရှိသူများက ဆိုသည်။

ဆီဆိုင်တွင် တိုက်ပွဲ မဖြစ်ပဲ စစ်ကောင်စီမှ ဒရုန်းနှင့် တိုက်ခိုက်

Jan 8

လွတ်ငြိမ်းချမ်းသာခွင့်တွင် နိုင်ငံရေး အကျဉ်းသား ၃၅၀ နီးပါးသာ လွတ်မြောက် သတင်းနှင့် မီဒီယာ ကွန်ရက်။ ၂၀၂၅ ခုနှစ်၊ ဇန္နဝါရီလ ၈ ရက်။ စစ်ကောင်စီ ကြေညာသည့် နိုင်ငံရေး အကျဉ်းသား လွတ်မြောက်သည့် အရေအတွက်မှာ မြေပြင် အခြေအနေနှင့် ကွဲလွဲနေသည်ဟု မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ယက် (PPNM) က ပြောသည်။ PPNM အနေဖြင့် မြန်မာနိုင်ငံတစ်ဝှမ်းရှိ အကျဉ်းထောင် ၄၀ ကျော်အား စောင့်ကြည့် စာရင်းကောက်ယူခဲ့ရာတွင် နိုင်ငံရေး အကျဉ်းသား ၂၀၈ ဦး၊ နိုင်ငံရေး အကျဉ်းသူ ၁၃၁ ဦး စုစုပေါင်း ၃၄၄ ဦးခန့်သာ လွတ်မြောက်လာ ကြ သည်ဟု ဆိုသည်။ မြန်မာနိုင်ငံတစ်ဝှမ်း ၇၇ ကြိမ်မြောက် လွတ်လပ်ရေးနေ့ အထိမ်းအမှတ်အဖြစ် စစ်ကောင်စီက အကျဉ်းသား ၅၈၆၄ ဦး အား လွတ်ငြိမ်းချမ်းသာခွင့် ပြုခဲ့သည်ဟု ၎င်းတို့ လက်အောက်ခံ မီဒီယာများတွင် ဖော်ပြထားပြီး နိုင်ငံရေး အကျဉ်းသား ၆၀၀ ကျော်ပါဝင်သည်ဟု စစ်ကောင်စီက ပြောခဲ့သည်။ ယင်းပြောကြားချက်မှာ မြေပြင်အခြေအနေနှင့် ကွဲလွဲနေသည်ဟု (PPNM) ဦးဆောင်ကော်မတီဝင်ဖြစ်သူ ကိုသိုက်ထွန်းဦးက ပြောသည်။ “မြေပြင်အခြေအနေမှာ စစ်ကောင်စီ ထိန်းချုပ်ထားတဲ့ ထောင်အများစုက လွှတ်ပေးခဲ့တာတွေ ရှိတယ်ပေါ့ နော်။ ဗန်းမော်မှာလည်း စစ်ရေးတင်းမာနေတယ်။ စစ်ကောင်စီ ထိန်းချုပ်မှုအောက်မှာ ရှိနေဆဲ ဖြစ်တယ်။ အဲမှာရှိတဲ့ နိုင်ငံရေး အကျဉ်းသားတွေလည်း လွတ်လာတာလည်း မတွေ့ရဘူး။ ပြီးတော့ စစ်တွေမှာလည်း မတွေ့ ရဘူး။ အဲတော့ မြေပြင်အခြေ အနေနဲ့တော့ မဆိုင်ဘူးထင်တယ်။ ကျနော်တို့ ပြောလို့ရတာကတော့ ၅၀၅ ပုဒ်မ တွေ သူတို့ဆီမှာ ရှိတဲ့စာရင်းတွေကို ထည့်တွက်ထားသလားဆိုတာတော့ စစ်ကောင်စီကို မေးခွန်း ပြန်ထုတ်ရမှာ ဖြစ်တယ်။ ဒါပေမယ့် ဒီလိုမျိုး မေးခွန်းထုတ်လိုက်ခြင်း အားဖြင့် သူတို့တွေရဲ့ မှားယွင်းမှုကို ဒီဖက်ကိုလည်း ရောချ နိုင်တယ်ပေါ့နော်။ ကလိန်ဉာဏ်ဆင်ပြီး ပြန်ပြောတာမျိုးလည်း ဖြစ်နိုင်ပါတယ်။” ထို့အပြင် စစ်ကောင်စီ၏ လွတ်ငြိမ်းချမ်းသာခွင့်ပေးသည့် ထုတ်ပြန်ချက်ထဲတွင်လည်း တစ်သက်တစ်ကျွန်း ပြစ်ဒဏ်ကျခံရမည့် အကျဉ်းသား/သူ ၁၄၄ ဦးကိုလည်း ထောင်ဒဏ် ၁၅ နှစ်သို့ ပြောင်းလဲကျခံရမည်ဟု ပါရှိပြီး ၎င်းတို့မှာ မည်သူမည်ဝါ ဖြစ်သည်ဟု ဖော်ပြမထားသဖြင့် ဆက်လက်စောင့်ကြည့် စစ်ဆေးသွားမည်ဟု ကိုသိုက်ထွန်းဦးက ပြောသည်။ “နိုင်ငံရေး အကျဉ်းသား အများစုက လွတ်ရက် နီးတဲ့သူတွေလို့ ပြောချင်ပါတယ်။ ကျနော်တို့ နိုင်ငံရေး အကျဉ်း သားတွေ ထပ်သိရရင်လည်း ထုတ်ပြန်ချက်မှာပဲ Update ထည့်သွားဖို့ပါပဲ။ အဓိကအားဖြင့်တော့ မှတ်တမ်း မှတ်ရာတွေ ကျန်ရှိစေချင်တဲ့ဆန္ဒ ဖြစ်ပါတယ်။ နောက်တချက်က စစ်ကောင်စီရဲ့ လိမ်လည်မှုတွေကို ကျနော်တို့ အနေ နဲ့ ဖော်ထုတ်နိုင်ဖို့ ရည်ရွယ်ခဲ့တာ ဖြစ်တဲ့အတွက် ကျနော်တို့ ဒီစာရင်းတွေဟာ အရေအတွက်အားဖြင့်ပဲ ပြု စုနိုင်သေးတာ ဖြစ်တယ်။ နာမည်အသေးစိတ်တွေကအစ ပြုစုဖို့ကြတော့ ဒီကာလ အရမ်းခက်ခဲတယ်ပေါ့။ ဒါ ပေမယ့် ဘယ်လောက် လွတ်လာတယ်၊ ဘယ်လောက်ကျန်သေးတယ် ဆိုတာကိုတော့ ခန့်မှန်းတွက်ချက်နိင်ရေး အတွက် ကြိုးစားဆောင်ရွက်နေပါတယ်။” ယခင်နှစ် လွတ်ငြိမ်းချမ်းသာခွင့်ပေးသည့် ရက်များတွင်လည်း လွတ်ငြိမ်းစာရင်း ပါရှိသည့် နိုင်ကျဉ်းများအား ထောင်အာဏာပိုင်များက အခြား ရာဇဝတ် အကျဉ်းသားများဖြင့် စောင့်ကြည့်ခိုင်းခြင်း၊ သတင်းပို့ခိုင်းခြင်း၊ ပြဿနာများ ဖန်တီး၍ တိုက်ပိတ်ခြင်းများ ပြုလုပ်ဖူးသဖြင့် အလားတူ ဖြစ်ရပ်များ ထပ်မံကြုံရမည်ကို စိုးရိမ်ရ သည်ဟု နိုင်ကျဉ်းဟောင်းများက ဆိုသည်။ စစ်ကောင်စီ၏ လွတ်ငြိမ်းချမ်းသာခွင့်တွင် ထောင် ၄၀ ကျော်အနက် ရွှေဘို၊ အိုးဘို၊ မြင်းခြံ၊ ပြည်၊ မအူပင်၊ တောင်ငူ၊ ပခုက္ကူ၊ အင်းစိန်၊ ဟင်္သာတ၊ ကလေး၊ မကွေး၊ ပေါင်းတည်၊ မိတ္တီလာ၊ ဒိုက်ဦး၊ မိုးညှင်း၊ သာယာဝတီ စသည့်ထောင်ပေါင်း ၁၆ ခုသာ ပါဝင်ခဲ့ပြီး ကျန်သည့်ထောင်များတွင် နိုင်ကျဉ်း တစ်ဦးတစ်ယောက်မျှ မပါဝင်ခဲ့ ဟု PPNM က ကောက်ယူရရှိခဲ့သည့် စာရင်းများအရ သိရသည်။ လွတ်ငြိမ်းချမ်းသာခွင့် ပြုရာ၌လည်း အကျဉ်သားများအား နောက်တစ်ကြိမ် ပြစ်မှုထပ်မံ ကျူးလွန်ပါက ယခင် ပြစ်ဒဏ်ကိုပါ တပေါင်းတစည်းတည်း ကျခံရမည်ဆိုသည့် ကန့်သတ်ချက်နှင့် ပြန်လွှတ်ပေးခဲ့ခြင်း ဖြစ်သည်။

လွတ်ငြိမ်းချမ်းသာခွင့်တွင် နိုင်ငံရေး အကျဉ်းသား ၃၅၀ နီးပါးသာ လွတ်မြောက်

« Prev 1 … 221 222 223 224 225 … 1,085 Next »

ဗုဒ္ဓဟူးနေ့ည ရုပ်သံသတင်း (၁၃-၅-၂၆)

ဒီနေ့ အစီအစဉ်တွေထဲမှာတော့…..

– ချင်းပြည်နဲ့ စစ်ကိုင်းတိုင်းမှာ စစ်တပ်က လေကြောင်းက ဗုံးကြဲလို့ စစ်သုံ့ပန်းတွေ အပါအဝင် လူသေဆုံး

– ရှမ်းမြောက်-ကချင် အစပ် မဘိမ်းဘက်မှာ စစ်တပ်က အင်အားအမြောက်အများ တိုးချဲ့

– ထိုင်းရောက် မြန်မာတွေ လုံခြုံရေးနဲ့ အလုပ်လုပ်ဖို့ အကန့်အသတ်တွေက ဘာတွေလဲ။

– UFC ခါးပတ်ပိုင်ရှင် ဂျော့ရှူဝါဗန် ထိုင်းနဲ့ မလေးရှားကို လာဖို့ရှိ

– အမေရိကား-တရုတ် ထိပ်သီး အစည်းအဝေး မတိုင်ခင် ဘာတွေ ကြိုတင် ပြင်ဆင်နေသလဲ

– ပီကင်း ထိပ်သီး ဆွေးနွေးပွဲ မတိုင်ခင် ဖိလစ်ပိုင်နဲ့ အမေရိကန် စစ်လေ့ကျင့်မှု

– ယူကရိန်း ဒရုန်းတွေက စစ်ပွဲတွေအတွက် ခေတ်သစ်တစ်ခု ပြောင်းစေမလား

– ၂ နှစ်ကျော်က မြုပ်သွားတဲ့ ရုရှား သင်္ဘောမှာ ဘာတွေပါသလဲ