နိုင်ငံတကာသတင်း

ဒေါ်အောင်ဆန်းစုကြည်အား ချွင်းချက်မရှိ လွှတ်ပေးရန် US နိုင်ငံခြားရေး ဌာနနှင့် အာဆီယံ ဥက္ကဋ္ဌတောင်းဆို   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၇ ရက်။   အမေရိကန် နိုင်ငံခြားရေး ဝန်ကြီးဌာနနှင့် အာဆီယံဥက္ကဋ္ဌတို့က ဖမ်းဆီးထိန်းသိမ်းခံထားရသူ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများအားလုံးကို ခြွင်းချက်မရှိ အမြန်ဆုံးပြန်လည်လွှတ်ပေးရန် ယနေ့ ဩဂုတ် ၇ ရက် သောကြာနေ့တွင် ထပ်မံတောင်းဆိုလိုက်ကြကြောင်း ရိုက်တာ သတင်းတွင် ဖော်ပြထားသည်။   ဒီမိုကရေစီနည်းကျ ရွေးကောက်တင်မြှောက်ထားသည့် အရပ်သားအစိုးရကို ၂၀၂၁ ခုနှစ် ဖေဖော်ဝါရီလ စစ်တပ်က အာဏာသိမ်းပြီးနောက်ပိုင်း ဒေါ်အောင်ဆန်းစုကြည်၏ ကျန်းမာရေးနှင့် ပတ်သက်၍ စိုးရိမ်ပူပန်မှုများ ရှိနေခဲ့ရာမှ ပြီးခဲ့သည့် တနင်္လာနေ့တွင် အပြည်ပြည်ဆိုင်ရာ ကြက်ခြေနီကော်မတီ (ICRC) ကိုယ်စားလှယ်တစ်ဦးသည် ဒေါ်အောင်ဆန်းစုကြည်နှင့် တွေ့ဆုံခွင့်ရရှိခဲ့သည်။   အမေရိကန်နိုင်ငံခြားရေးဌာနနှင့် အာဆီယံဥက္ကဋ္ဌတို့က သီးခြားစီထုတ်ပြန်သည့် ကြေညာချက်များတွင် ICRC ၏ အဆိုပါတွေ့ဆုံမှုကို ကြိုဆိုကြောင်းနှင့် အသက် ၈၁ နှစ်အရွယ် နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည်အနေဖြင့် ကျန်းမာရေးစောင့်ရှောက်မှုများ အပါအဝင် ပုံမှန်တွေ့ဆုံခွင့်ရရှိရေးအတွက် စတင်မှုတစ်ခုဖြစ်ရန် မျှော်လင့်ကြောင်း ဖော်ပြထားကြသည်။   "၂၀၂၁ ခုနှစ် ဖေဖော်ဝါရီလကတည်းက မြန်မာနိုင်ငံမှာ ဖမ်းဆီးထိန်းသိမ်းခံထားရသူတွေဆီ ပိုမိုဝင်ရောက်တွေ့ဆုံခွင့်ရဖို့ တိုက်တွန်းပါကြောင်းနဲ့ ဒေါ်အောင်ဆန်းစုကြည်ကို အပြည့်အဝနဲ့ ခြွင်းချက်မရှိ ပြန်လည်လွှတ်ပေးရေးအပါအဝင် ထိန်းသိမ်းခံထားရသူ အားလုံးကို လွှတ်ပေးဖို့ ကျွန်ုပ်တို့ရဲ့ တောင်းဆိုမှုကို ထပ်လောင်းပြောကြားလိုပါတယ်" ဟု အာဆီယံဥက္ကဋ္ဌ၏ ထုတ်ပြန်ချက်တွင် ဖော်ပြထားသည်။   အမေရိကန်နိုင်ငံခြားရေးဌာနကလည်း X လူမှုကွန်ရက်တွင် "ဒီတွေ့ဆုံမှုဟာ ဒေါ်အောင်ဆန်းစုကြည်ထံ ပုံမှန်လူသားချင်းစာနာထောက်ထားမှုဆိုင်ရာ ဝင်ရောက်ကူညီခွင့်ရရှိရေးအတွက် စတင်မှုတစ်ခုဖြစ်ပြီး နိုင်ငံရေးအကျဉ်းသားများအားလုံးဆီ ပိုမိုဝင်ရောက်ကူညီခွင့်ရရှိရေးအတွက် လမ်းစတစ်ခုဖြစ်လာဖို့ မျှော်လင့်ပါတယ်" ဟု ရေးသားထားကာ ဒေါ်အောင်ဆန်းစုကြည်အား "ချက်ချင်းနဲ့ ခြွင်းချက်မရှိ လွှတ်ပေးရန်" တောင်းဆိုခဲ့သည်။   ထို့အပြင် အမေရိကန်နိုင်ငံခြားရေးဌာနက အာဏာသိမ်းပြီးနောက် ဖြစ်ပွားခဲ့သည့် ပဋိပက္ခများကို အဆုံးသတ်နိုင်ရေးအတွက် မြန်မာစစ်တပ်အနေဖြင့် တွေ့ဆုံဆွေးနွေးမှုများ ပြုလုပ်ရန် တိုက်တွန်းခဲ့သည်။   အာဆီယံဥက္ကဋ္ဌကလည်း အာဆီယံ၏ ဘုံသဘောတူညီချက် ၅ ချက်ပါ ငြိမ်းချမ်းရေးမူအတိုင်း မြန်မာနိုင်ငံရှိ သက်ဆိုင်သူအားလုံးနှင့် ထိတွေ့ဆက်ဆံရာတွင် အာဆီယံအထူးသံတမန်၏ အခန်းကဏ္ဍကို ထပ်လောင်းအတည်ပြုခဲ့သည်။ အာဆီယံအထူးသံတမန်အနေဖြင့် မြန်မာနိုင်ငံသို့ သွားရောက်ကာ ဒေါ်အောင်ဆန်းစုကြည် အပါအဝင် သက်ဆိုင်သူအားလုံးနှင့် တွေ့ဆုံခွင့်ရရှိရန် မျှော်လင့်ကြောင်းလည်း ထုတ်ပြန်ချက်တွင် ဖော်ပြထားသည်။   #ဒေါ်အောင်ဆန်းစုကြည် #AungSanSuKyi

ဒေါ်အောင်ဆန်းစုကြည်အား ချွင်းချက်မရှိ လွှတ်ပေးရန် US နိုင်ငံခြားရေး ဌာနနှင့် အာဆီယံ ဥက္ကဋ္ဌတောင်းဆို

ဒေါ်အောင်ဆန်းစုကြည်အား ချွင်းချက်မရှိ လွှတ်ပေးရန် US နိုင်ငံခြားရေး ဌာနနှင့် အာဆီယံ ဥက္ကဋ္ဌတောင်းဆို  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩ…

  • August 7, 2026
ထိုင်းစာသင်ကျောင်း ပစ်ခတ်မှု အနည်းဆုံး ၇ ဦး သေဆုံး ပြီး ၁၅ ဦး ဒဏ်ရာရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၇ ရက်။   ထိုင်းနိုင်ငံ၊ ဘန်ကောက်မြို့မြောက်ပိုင်း နွန်သဘူရီ (Nonthaburi) ခရိုင်ရှိ အမျိုးသား အထက်တန်းကျောင်း တစ်ကျောင်းတွင် ယနေ့ သောကြာနေ့ (သြဂုတ်လ ၇ ရက်) နံနက်ပိုင်းက သေနတ်ပစ်ခတ်မှုတစ်ခု ဖြစ်ပွားခဲ့ရာ အနည်းဆုံး လူ ၇ ဦး သေဆုံးပြီး ၁၅ ဦး ဒဏ်ရာရရှိခဲ့ကြောင်း ထိုင်းသတင်းဌာနများတွင် ဖော်ပြသည်။   အဆိုပါ ဖြစ်စဉ်တွင် အသက် ၉ တန်းအရွယ် ကျောင်းသားတစ်ဦးသည် ကျောင်းဝင်းအတွင်းသို့ လက်နက်ငယ်ယူဆောင်လာကာ ဝင်ရောက်ပစ်ခတ်ခဲ့ခြင်း ဖြစ်သည်။   ဒဏ်ရာရရှိသူ အများစုမှာ သေနတ်ထိမှန်ခြင်းကြောင့်ထက် အထိတ်တလန့်ဖြစ်ကာ ရုန်းရင်းဆန်ခတ် ထွက်ပြေးရာမှ ဒဏ်ရာရရှိခဲ့ကြခြင်းဖြစ်ကြောင်း သိရသည်။   အစောပိုင်း ကောလာဟလများတွင် ရဲတပ်ဖွဲ့က သေနတ်သမားအား အရှင်ဖမ်းဆီးရမိခဲ့သည်ဟု ထွက်ပေါ်ခဲ့သော်လည်း အမှန်တကယ်တွင်မူ ၎င်းသည် နောက်ဆုံးအချိန်၌ မိမိကိုယ်ကို အဆုံးစီရင်သွားခဲ့ခြင်း ဖြစ်သည်။   ၎င်း၏ လွယ်အိတ်အတွင်း၌ မပေါက်ကွဲသေးသည့် ခဲယမ်းအမြောက်အမြား ကျန်ရှိနေခဲ့ကြောင်းလည်း စစ်ဆေးတွေ့ရှိရသည်။   ယင်းဖြစ်ရပ် ဖြစ်ပွားပြီးနောက် ထိုင်းနိုင်ငံ၏ လူမှုကွန်ရက်စာမျက်နှာများထက်တွင် စာသင်ကျောင်းများ၏ လုံခြုံရေးနှင့် ပတ်သက်၍ ကျယ်ကျယ်ပြန့်ပြန့် ဆွေးနွေးပြောဆိုမှုများ ထွက်ပေါ်လျက်ရှိသည်။    #Nonthaburi #StudentShoots

ထိုင်းစာသင်ကျောင်း ပစ်ခတ်မှု အနည်းဆုံး ၇ ဦး သေဆုံး ပြီး၁၅ ဦး ဒဏ်ရာရ 

ထိုင်းစာသင်ကျောင်း ပစ်ခတ်မှု အနည်းဆုံး ၇ ဦး သေဆုံး ပြီး၁၅ ဦး ဒဏ်ရာရ  သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၇ ရက်။  ထိုင်းနိုင်ငံ၊ ဘ…

  • August 7, 2026
သတင်းထောက်သေဆုံးမှု အစ္စရေးကို စစ်ရာဇဝတ်မှုဖြင့် စွပ်စွဲ   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၇ ရက်။   လက်ဘနွန်နိုင်ငံအတွင်း အမျိုးသမီး သတင်းထောက်တစ်ဦး အစ္စရေးစစ်တပ်၏ လေကြောင်းတိုက် ခိုက်မှုကြောင့် သေဆုံးခဲ့ရသည့် ဖြစ်စဉ်သည် စစ်ရာဇဝတ်မှုမြောက်ကြောင်း လူ့အခွင့်အရေးအဖွဲ့များက ဩဂုတ်လ ၆ ရက်နေ့တွင် ပူးတွဲကြေညာလိုက်သည်။   ပြီးခဲ့သည့် ဧပြီလအတွင်း အစ္စရေးနှင့် ဟစ်ဇ်ဘိုလာတို့အကြား တိုက်ပွဲများ ပြင်းထန်နေချိန်၌ တောင်ပိုင်းတိုက်ပွဲဇုန်အတွင်း သတင်းသွားရောက်ရယူခဲ့သည့် လက်ဘနွန်သတင်းထောက် အာမဲလ် ခါလီလ် (Amal Khalil) သည် အစ္စရေး၏ လေကြောင်းတိုက်ခိုက်မှုကြောင့် သေဆုံးသွားခဲ့ရသည်။   အဆိုပါ ဖြစ်စဉ်နှင့်ပတ်သက်၍ အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ (Amnesty International) နှင့် Human Rights Watch အပါအဝင် လူ့အခွင့်အရေးအဖွဲ့များက အစ္စရေးစစ်တပ်သည် ၎င်းအား အမျိုးသမီး သတင်းထောက်မှန်း သိလျက်နှင့် တမင်ပစ်မှတ်ထား တိုက်ခိုက်ခဲ့ခြင်းဖြစ်သည်ဟု စွပ်စွဲထားသည်။   ထို့အပြင် လေကြောင်းတိုက်ခိုက်မှုကြောင့် ဒဏ်ရာပြင်းထန်စွာရရှိပြီး အဆောက်အအုံအပျက်အစီးများအောက် ပိတ်မိနေခဲ့သည့် သတင်းထောက် ခါလီလ်ထံသို့ ကယ်ဆယ်ရေးဆေးအဖွဲ့များ ဝင်ရောက်ကူညီခွင့်မရရှိစေရန် အစ္စရေးဘက်က နာရီပေါင်းများစွာ ဟန့်တားပစ်ခတ်ခဲ့ကြောင်းလည်း ကြေညာချက်တွင် ဖော်ပြထားသည်။   သတင်းထောက် ခါလီလ်သည် ဆေးကုသခွင့်မရဘဲ သွေးလွန်ပြီး သေဆုံးသွားခဲ့ရခြင်းဖြစ်ရာ ယင်းလုပ်ရပ်သည် စစ်ရာဇဝတ်မှုမြောက်ကြောင်း လူ့အခွင့်အရေးအဖွဲ့များက ထောက်ပြထားသည်။   အစ္စရေးစစ်တပ်ဘက်ကမူ ယင်းစွပ်စွဲချက်များနှင့် ပတ်သက်၍ သတင်းထောက်များကို တမင်ပစ်မှတ်ထား တိုက်ခိုက်ခြင်းမျိုး မရှိဘဲ အနီးအနားရှိ ဟစ်ဇ်ဘိုလာအဖွဲ့ဝင်များကို ရှင်းလင်းစဉ် ဖြစ်ပွားခဲ့ခြင်းဖြစ်ကြောင်း ၎င်းတို့၏ အကြိုစုံစမ်းစစ်ဆေးမှုများအရ ပြန်လည်တုံ့ပြန်ထားသည်။   ၂၀၂၃ ခုနှစ်မှစတင်ကာ လက်ဘနွန်စစ်ပွဲအတွင်း သေဆုံးခဲ့ရသည့် သတင်းထောက်ပေါင်း ၁၁ ဦးအထိ ရှိလာပြီဖြစ်သည်။   Photo:AFP   #AmalKhalil

သတင်းထောက်သေဆုံးမှု အစ္စရေးကို စစ်ရာဇဝတ်မှုဖြင့် စွပ်စွဲ

သတင်းထောက်သေဆုံးမှု အစ္စရေးကို စစ်ရာဇဝတ်မှုဖြင့် စွပ်စွဲ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၇ ရက်။  လက်ဘနွန်နိုင်ငံအတွင်း အမျိုးသမီး …

  • August 7, 2026
သေဒဏ်ချခံထားသည့် ဘင်္ဂလားဒေ့ရှ် ဝန်ကြီးချုပ်ဟောင်း နေရပ်ပြန်မည်ဟု ကြေညာ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၇ ရက်။   အိန္ဒိယနိုင်ငံသို့ ထွက်ပြေးတိမ်းရှောင်နေခဲ့ရသည့် ဘင်္ဂလားဒေ့ရှ် ဝန်ကြီးချုပ်ဟောင်း ရှိတ်ဟာစီနာ (Sheikh Hasina) က လာမည့် ဒီဇင်ဘာလတွင် နိုင်ငံတွင်းသို့ ပြန်လည်ဝင်ရောက်မည်ဖြစ်ကြောင်း ကြေညာလိုက်သည်။   ရှိတ်ဟာစီနာသည် ပြီးခဲ့သည့် ၂၀၂၄ ခုနှစ်အတွင်း လူပေါင်း ၁,၄၀၀ နီးပါး သေဆုံးခဲ့ရသည့် လူငယ်များဦးဆောင်သော ဆန္ဒပြမှုများအပြီး အိန္ဒိယ နိုင်ငံသို့ ထွက်ပြေး တိမ်းရှောင်ခဲ့ရသည်။   ရာထူးမှ ဖယ်ရှားခံရခြင်း (၂) နှစ်ပြည့် အထိမ်းအမှတ်အနေဖြင့် ပြီးခဲ့သည့် ဗုဒ္ဓဟူးနေ့က အိန္ဒိယနိုင်ငံ၊ နယူးဒေလီမြို့တွင် ပြုလုပ်ခဲ့သော ၎င်း၏ ပထမဆုံးအကြိမ် လူသိရှင်ကြား မိန့်ခွန်းပြောကြားမှုတွင် အထက်ပါအတိုင်း ထည့်သွင်းပြောကြားခဲ့ခြင်း ဖြစ်သည်။   အသက် ၇၈ နှစ်အရွယ်ရှိပြီဖြစ်သော ရှိတ်ဟာစီနာက မိမိအနေဖြင့် ဖမ်းဆီးခံရမည် သို့မဟုတ် ထောင်ကျမည်ဆိုလျှင်ပင် ပြည်သူများထံသို့ ပြန်လာမည်ဖြစ်ကြောင်း ပြောကြားခဲ့သည်။   ပြီးခဲ့သည့် ၂၀၂၅ ခုနှစ်တွင် ဘင်္ဂလားဒေ့ရှ်နိုင်ငံ ဒါကာခုံရုံးက ဟာစီနာအား လူသားမျိုးနွယ်အပေါ် ကျူးလွန်သည့် ရာဇဝတ်မှုများဖြင့် မျက်ကွယ်သေဒဏ် ချမှတ်ခဲ့ပြီး ၎င်း၏ အာဝါမီလိဂ် (Awami League) ပါတီကိုလည်း ဖျက်သိမ်းခဲ့သည်။   ထို့ကြောင့် ၎င်းအနေဖြင့် ဘင်္ဂလားဒေ့ရှ်နိုင်ငံသို့ ပြန်လည်ခြေချသည်နှင့် တစ်ပြိုင်နက် ချက်ချင်း ဖမ်းဆီးခံရမည့် အခြေအနေတွင် ရှိနေသည်။   #SheikhHasina

သေဒဏ်ချခံထားသည့်ဘင်္ဂလားဒေ့ရှ် ဝန်ကြီးချုပ်ဟောင်း နေရပ်ပြန်မည်ဟု ကြေညာ

သေဒဏ်ချခံထားသည့်ဘင်္ဂလားဒေ့ရှ် ဝန်ကြီးချုပ်ဟောင်း နေရပ်ပြန်မည်ဟု ကြေညာ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၇ ရက်။  အိန္ဒိယနိုင်ငံသို့ …

  • August 7, 2026
မြန်မာ-ထိုင်း ကုန်သွယ်မှုတိုးမြှင့်ရေးနှင့် ပူးပေါင်းဆောင်ရွက်မှု MoU များ လက်မှတ်ထိုး   သတင်းနှင့် မီဒီယာ ကွန်ရက်။ 
၂၀၂၆ ခုနှစ်၊ ဩဂုတ်လ ၇ ရက်။   ထိုင်းနိုင်ငံသို့ တရားဝင်အလည်အပတ် ရောက်ရှိနေသည့် မြန်မာစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်သည် ထိုင်းဝန်ကြီးချုပ် အနုတင်ချန်ဗီရာကူလ် (Anutin Charnvirakul) နှင့် တွေ့ဆုံ၍ နှစ်နိုင်ငံစီးပွားရေးဆိုင်ရာ ကိစ္စရပ်များကို ဆွေးနွေးခဲ့ပြီး နားလည်မှုစာချွန်လွှာများ လက်မှတ်ရေးထိုးခဲ့ကြောင်း ဘန်ကောက်ပို့စ် သတင်းစာတွင် ဖော်ပြထားသည်။   ထိုသို့ တွေ့ဆုံဆွေးနွေးရာတွင် နှစ်နိုင်ငံ ကုန်သွယ်မှုပမာဏကို လက်ရှိအခြေအနေထက် ပိုမိုတိုးချဲ့ကာ အမေရိကန်ဒေါ်လာ ၁၂ ဘီလီယံအထိ ရောက်ရှိရန် ရည်မှန်းချက်ထား ဆွေးနွေးခဲ့ကြသည်။   ထို့အပြင် ရွှေ့ပြောင်းအလုပ်သမားအရေး၊ နယ်စပ်ဖြတ်ကျော် ရေထုညစ်ညမ်းမှု ထိန်းသိမ်းရေးနှင့် အာကာသနည်းပညာ ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ ၃ ရပ်ကိုလည်း သဘောတူ လက်မှတ်ရေးထိုးခဲ့ကြသည်။   နယ်စပ်ကုန်သွယ်ရေးနှင့် လုံခြုံရေးကဏ္ဍတို့နှင့် ပတ်သက်၍ ရပ်ဆိုင်းနေသည့် မြဝတီ-မယ်ဆောက် အမှတ် (၂) ချစ်ကြည်ရေးတံတားကို ပြန်လည်ဖွင့်လှစ်ကာ နယ်စပ်ကုန်သွယ်ရေးကို ပြန်လည်မြှင့်တင်ရန် သဘောတူညီခဲ့ကြသည်။   ၎င်းအပြင် မူးယစ်ဆေးဝါးနှင့် အွန်လိုင်းငွေလိမ်လည်မှု (Scams) စသည့် နယ်စပ်ဖြတ်ကျော် မှုခင်းများကို ပူးပေါင်းနှိမ်နင်းရန်လည်း ဆွေးနွေးခဲ့ကြသည်။   အဆိုပါ ဆွေးနွေးပွဲတွင် ထိုင်းနိုင်ငံမှတစ်ဆင့် အိန္ဒိယသမုဒ္ဒရာကိုဖြတ်ကာ အာရှတိုက်အနောက်ပိုင်းသို့ အတိုဆုံးလမ်းကြောင်းဖြင့် ကုန်စည်ပို့ဆောင်နိုင်မည့် ထားဝယ်ရေနက်ဆိပ်ကမ်းနှင့် အထူးစီးပွားရေးဇုန် စီမံကိန်းကို ပြန်လည်အကောင်အထည်ဖော်ရန် မြန်မာဘက်မှ ဆွေးနွေးခဲ့ပြီး ထိုင်းရင်းနှီးမြှုပ်နှံသူများကို ဖိတ်ခေါ်ခဲ့သည်။   ထိုင်းနိုင်ငံဘက်ကလည်း မြန်မာနိုင်ငံနှင့် စီးပွားရေး ပူးပေါင်းဆောင်ရွက်မှု အခန်းကဏ္ဍသစ် ဖွင့်လှစ်ရန် အသင့်ရှိနေကြောင်း ပြောကြားခဲ့သည်။   #MOU #Myanmar #Thailand

မြန်မာ-ထိုင်း ကုန်သွယ်မှုတိုးမြှင့်ရေးနှင့် ပူးပေါင်းဆောင်ရွက်မှု MoU များ လက်မှတ်ထိုး 

မြန်မာ-ထိုင်း ကုန်သွယ်မှုတိုးမြှင့်ရေးနှင့် ပူးပေါင်းဆောင်ရွက်မှု MoU များ လက်မှတ်ထိုး  သတင်းနှင့်မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၇ ရက်။  …

  • August 7, 2026
အီလွန်မာ့စ်ခ်၏ SpaceX Falcon 9 ဒုံးပျံ အစိတ်အပိုင်း လကမ္ဘာပေါ်သို့ ဝင်ဆောင့်မိဟု ယူဆရ   သတင်းနှင့် မီဒီယာ ကွန်ရက်။
၂၀၂၆ ခုနှစ်၊ ဩဂုတ်လ ၆ ရက်။   အမေရိကန် စပေ့စ်အိက်စ် (SpaceX) ကုမ္ပဏီ၏ ဒုံးပျံအပျက်အစီး အစိတ်အပိုင်းတစ်ခုသည် လကမ္ဘာပေါ်သို့ အရှိန်ပြင်းစွာ သွားရောက်ဆောင့်မိခဲ့ပြီဟု ပညာရှင်များက ယူဆထားကြသည်။   အဆိုပါ အစိတ်အပိုင်းမှာ ၂၀၂၅ ခုနှစ် ဇန်နဝါရီလတွင် လကမ္ဘာပေါ် ဆင်းသက်မည့် ယာဉ်နှစ်စီးကို တင်ဆောင်လွှတ်တင်ခဲ့သည့် Falcon 9 ဒုံးပျံ၏ အထက်ပိုင်း (Upper Stage) ဖြစ်သည်။   ၆ ဘီး ကုန်တင်ကားတစ်စီးစာမျှရှိပြီး အလေးချိန် ၅ တန်ခန့်ရှိသော အဆိုပါ အစိတ်အပိုင်းသည် အာကာသထဲတွင် လွင့်မျောနေရာမှ လကမ္ဘာပေါ်သို့ တစ်နာရီလျှင် မိုင်ပေါင်း ၅,၄၀၀ (တစ်နာရီ ၈,၆၉၀ ကီလိုမီတာ) အရှိန်ဖြင့် လကမ္ဘာ၏ အနောက်ဘက်အစွန်းရှိ "အိုင်စတိုင်း" (Einstein) ကျင်းကြီးအနီးသို့ သွားရောက်ဆောင့်မိခဲ့ခြင်းဖြစ်သည်။   အမေရိကန် အမျိုးသား လေကြောင်းနှင့် အာကာသ အုပ်ချုပ်ရေးအဖွဲ့ (NASA) ၏ ပြောရေးဆိုခွင့်ရှိသူက အဆိုပါ ဝင်ဆောင့်မှုကြောင့် ကမ္ဘာမြေပေါ်ရှိ ပြည်သူများအတွက် ဘေးအန္တရာယ် တစ်စုံတစ်ရာမရှိကြောင်း အတည်ပြုပြောကြားထားသည်။   ဒုံးပျံ ဝင်ဆောင့်မှုကြောင့် အကျယ် ၁၈ မီတာနှင့် အနက် ၄ မီတာရှိသော ကျင်းသစ်တစ်ခု ဖြစ်ပေါ်သွားမည်ဟု ခန့်မှန်းထားသည်။     မိုင်ပေါင်းများစွာ ကျယ်ပြန့်သည့် လကမ္ဘာမှ ဖုန်မှုန့်နှင့် အပျက်အစီး စိမ့်လှိုင်း (Plume) များ ထွက်ပေါ်လာမည်ဖြစ်သည်။   ယခုဖြစ်စဉ်သည် မတော်တဆမှုတစ်ခု ဖြစ်သော်လည်း ဒုံးပျံ၏ အရှိန်နှင့် အလေးချိန်ကို အတိအကျ သိရှိထားသဖြင့် သဘာဝ ဥက္ကာခဲများ ကျရောက်မှုကို တိုင်းတာသည့် စံချိန်စံညွှန်းများ ညှိယူရန်   (Calibration) အတွက် လည်းကောင်း၊ ထွက်ပေါ်လာသည့် ဖုန်မှုန့်များကို လေ့လာ၍ လကမ္ဘာ၏ ပါဝင်ပစ္စည်း ဖွဲ့စည်းပုံကို သိရှိနိုင်ရန်အတွက် လည်းကောင်း၊ အနာဂတ်တွင် လကမ္ဘာပေါ် အခြေစိုက်စခန်း ဆောက်လုပ်မည့် အာကာသယာဉ်မှူးများအတွက် အာကာသ အပျက်အစီးများ၏ ဘေးအန္တရာယ်ကို ကြိုတင်တွက်ချက်နိုင်ရန်အတွက် လည်းကောင်း သိပ္ပံပညာရှင်များအတွက် များစွာ အသုံးဝင်မည်ဖြစ်ဟု ပညာရှင်တွေက ဆိုပါတယ်။   #SpaceX  #SpaceXFalcon9

အီလွန်မာ့စ်ခ်၏ SpaceX Falcon 9 ဒုံးပျံ အစိတ်အပိုင်း လကမ္ဘာပေါ်သို့ ဝင်ဆောင့်မိဟု ယူဆရ

အီလွန်မာ့စ်ခ်၏ SpaceX Falcon 9 ဒုံးပျံ အစိတ်အပိုင်း လကမ္ဘာပေါ်သို့ ဝင်ဆောင့်မိဟု ယူဆရ သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၆ ရက်။  …

  • August 6, 2026
ရုရှားနှင့် ယူကရိန်းတို့အကြား ဒရုန်းထုတ်လုပ်ရေးဆိုင်ရာ ပစ်မှတ်များကို အပြန်အလှန် တိုက်ခိုက် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ ရုရှားနှင့် ယူကရိန်း စစ်ပွဲအတွင်း နည်းပညာနှင့် ဒရုန်းထုတ်လုပ်ရေး ကဏ္ဍများကို ပစ်မှတ်ထားသည့် နှစ်ဖက်တိုက်ခိုက်မှုများ သိသိသာသာ ပြင်းထန်လာနေသည်။ ဩဂုတ်လ ၄ ရက် အင်္ဂါနေ့က ရုရှားနိုင်ငံအတွင်း မြို့တစ်မြို့၌ ကားဗုံးပေါက်ကွဲမှုဖြစ်ပွားခဲ့ရာ "ဗင်မ်ပိုင်ယာ" (Vampire) ဒရုန်းများ ထုတ်လုပ်ပေးနေသည့် စက်ရုံမှူး ဗလာဒီမီယာ ထကာချက် ပြင်းထန်စွာ ဒဏ်ရာရရှိခဲ့ပြီး ၎င်း၏ ယာဉ်မောင်းဖြစ်သူ သေဆုံးသွားခဲ့သည်။ ယင်းသည် ပြီးခဲ့သည့်သီတင်းပတ်အတွင်း ရုရှား ဒရုန်းထုတ်လုပ်သူများ ပစ်မှတ်ထားခံရသည့် ဒုတိယမြောက် ဖြစ်စဉ်ဖြစ်သည်။ ပထမဖြစ်စဉ်မှာ ဇူလိုင်လကုန်ပိုင်းက ဖြစ်ပွားခဲ့ပြီး "ဂက်ဒ်ဖလိုင်း" (Gadfly) ဒရုန်းအမျိုးအစားကို တီထွင်ထုတ်လုပ်သူ သေနတ်ဖြင့် ပစ်ခတ်တိုက်ခိုက်ခံခဲ့ရခြင်းဖြစ်သည်။ တစ်ချိန်တည်းမှာပင် ရုရှားတပ်ဖွဲ့များဘက်ကလည်း ယူကရိန်းမြို့တော် ကီးယက်ဖ် (Kyiv) တွင် တည်ရှိသော အမေရိကန်ကုမ္ပဏီပိုင် ဒရုန်းထုတ်လုပ်ရေးစက်ရုံကို ဒုံးကျည်ဖြင့် ပထမဆုံးအကြိမ် ပစ်ခတ်တိုက်ခိုက်ခဲ့သည်။ အဆိုပါစက်ရုံသည် ရုရှား၏ လျှပ်စစ်သံလိုက် လှိုင်းနှောင့်ယှက်မှု (Jamming) များကို ခံနိုင်ရည်ရှိသော အဝေးပစ်ဒရုန်းများကို တစ်လလျှင် အစီးရေ ၁,၀၀၀ အထိ ထုတ်လုပ်ပေးနေသည့် စက်ရုံဖြစ်သည်။ စစ်ပွဲကြာရှည်လာသည်နှင့်အမျှ နှစ်ဖက်စလုံးက စစ်မြေပြင်တွင် အရေးပါသည့် ဒရုန်းထုတ်လုပ်မှုနှင့် ကွပ်ကဲမှုကွန်ရက်များကို အဓိကထား ပစ်မှတ်ထားလာကြသည်။ #VampireDrone

ရုရှားနှင့် ယူကရိန်းတို့အကြား ဒရုန်းထုတ်လုပ်ရေးဆိုင်ရာ ပစ်မှတ်များကို အပြန်အလှန် တိုက်ခိုက်

ရုရှားနှင့် ယူကရိန်းတို့အကြား ဒရုန်းထုတ်လုပ်ရေးဆိုင်ရာ ပစ်မှတ်များကို အပြန်အလှန် တိုက်ခိုက် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၆ ရက်။ …

  • August 6, 2026
စစ်မက်ဖြစ်ပွားချိန် အကျပ်အတည်းများကို ရင်ဆိုင်နိုင်ရန် ထိုင်ဝမ်ပြင်ဆင် သတင်းနှင့် မီဒီယာ ကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ ထိုင်ဝမ်နိုင်ငံတွင် စစ်ပွဲဖြစ်ပွားလာပါက ကြုံတွေ့ရမည့် စိန်ခေါ်မှုများကို တုံ့ပြန်ရန် အဓိကဦးတည်သည့် ၁၀ ရက်ကြာ "ဟန်ကွမ်း" (Han Kuang) စစ်ရေးလေ့ကျင့်မှုကို ဗုဒ္ဓဟူးနေ့တွင် စတင်လိုက်ပြီဖြစ်သည်။ နှစ်စဉ် ကျင်းပမြဲဖြစ်သော ယခုစစ်ရေးလေ့ကျင့်မှုတွင် ယခင်နှင့်မတူဘဲ မျှော်လင့်မထားသည့် ရန်သူ့လှုပ်ရှားမှုများအပေါ် စစ်သေနာပတိများ၏ လက်ငင်းတုံ့ပြန် ကွပ်ကဲနိုင်စွမ်းကို အဓိကထား စမ်းသပ်သွားမည်ဖြစ်သည်။ စစ်ရေးလေ့ကျင့်မှု၏ ထူးခြားချက်များမှာ - ၁။ စစ်ပွဲအတွင်း ဆက်သွယ်ရေး လှိုင်းနှုန်း အကန့်အသတ်ရှိချိန်၌ ပြည်သူများ၏ ဆက်သွယ်ဆောင်ရွက်နိုင်စွမ်းကို စမ်းသပ်ရန် အင်တာနက် လှိုင်းနှုန်းများကို လျှော့ချထားမည်ဖြစ်သည်။ ၂။ အမေရိကန်စစ်တပ်၏ နည်းဗျူဟာများကို ပြောင်းလဲကျင့်သုံးသွားမည်ဖြစ်သည်။ ၃။ ရှေ့တန်းသတင်းထုတ်ပြန်မှုနှင့် ရန်သူ့သတင်းတုများကို တုံ့ပြန်နိုင်ရေးအတွက် သတင်းထောက်များ ပူးတွဲလိုက်ပါသည့် သတင်းတု တုံ့ပြန်ရေးစနစ်ကို စမ်းသပ်သွားမည်ဖြစ်သည်။ ယခု စစ်ရေးလေ့ကျင့်မှုတွင် အရန်တပ်ဖွဲ့ဝင် ၂၀,၀၀၀ ကျော် ပါဝင်ပြီး တိုက်လေယာဉ်များနှင့် စစ်သင်္ဘောများ အရေးပေါ် နေရာချထားမှု၊ စစ်လက်နက်ပစ္စည်းများ ရွှေ့ပြောင်းမှုနှင့် ပစိဖိတ်ကမ်းလွန် ထောက်ပံ့ရေးလမ်းကြောင်း ကာကွယ်ရေး စစ်ဆင်ရေးများကိုပါ စိစစ်စမ်းသပ်သွားမည်ဖြစ်ကြောင်း ထိုင်ဝမ်စစ်တပ်က ထုတ်ပြန်ထားသည်။ Photo:AFP #Taiawn #HanKuang

စစ်မက်ဖြစ်ပွားချိန် အကျပ်အတည်းများကို ရင်ဆိုင်နိုင်ရန် ထိုင်ဝမ်ပြင်ဆင်

စစ်မက်ဖြစ်ပွားချိန် အကျပ်အတည်းများကို ရင်ဆိုင်နိုင်ရန် ထိုင်ဝမ်ပြင်ဆင် သတင်းနှင့် မီဒီယာ ကွန်ရက်။၂၀၂၆ ခုနှစ်၊ ဩဂုတ်လ ၆ ရက်။ ထိုင်ဝမ်နိုင်ငံတွင် …

  • August 6, 2026
မြန်မာစစ်အုပ်စုခေါင်းဆောင် ထိုင်းနှင့် စီးပွားရေးဆိုင်ရာ သဘောတူညီချက်များ လက်မှတ်ထိုးမည် သတင်းနှင့် မီဒီယာကွန်ရက်။ ၂၀၂၆ ခုနှစ်၊ ဩဂုတ်လ ၆ ရက်။ မြန်မာစစ်အုပ်စုခေါင်းဆောင် ဦးမင်းအောင်လှိုင် ဦးဆောင်သော အဖွဲ့သည် ထိုင်းနိုင်ငံအစိုးရ၏ တရားဝင်ဖိတ်ကြားချက်အရ ယနေ့တွင် ထိုင်းနိုင်ငံသို့ ရောက်ရှိလာခဲ့သည်။ ထိုင်းဝန်ကြီးချုပ်၏ ပြောကြားချက်အရ ယခုခရီးစဉ်အတွင်း နှစ်နိုင်ငံ နယ်စပ်ကုန်သွယ်ရေး ပိတ်ဆို့ထားမှုများ၊ နယ်စပ်ဒေသ လုံခြုံရေးနှင့် နယ်စပ်ဖြတ်ကျော် ရာဇဝတ်မှုများ၊ အွန်လိုင်း ငွေလိမ်ဂိုဏ်းများ နှိမ်နင်းရေးနှင့် နယ်စပ်ဖြတ်ကျော် ပတ်ဝန်းကျင် ညစ်ညမ်းမှုဆိုင်ရာ ကိစ္စရပ်များကို ပဓာနထား ဆွေးနွေးသွားမည်ဖြစ်သည်။ အဆိုပါခရီးစဉ်အတွင်း မြန်မာကုန်သည်ကြီးများအသင်းမှ ကိုယ်စားလှယ်အများအပြားလည်း လိုက်ပါလာပြီး ထိုင်းစီးပွားရေးလုပ်ငန်းများနှင့် နားလည်မှုစာချွန်လွှာ (MoU) အများအပြား လက်မှတ်ရေးထိုးရန် ရှိကြောင်း လေ့လာသူများက သုံးသပ်ထားသည်။ ထို့အပြင် ဘန်ကောက်မြို့ Queen Sirikit Convention Center ၌ ထိုင်း-မြန်မာ ချစ်ကြည်ရေးအသင်းမှ ဦးစီးကျင်းပသည့် "ထိုင်း-မြန်မာ စီးပွားရေးဖိုရမ် ၂၀၂၆" ကိုလည်း အချိန်ကိုက် ကျင်းပသွားမည်ဖြစ်ကြောင်း ဦးဆောင်ကျင်းပသည့် အဖွဲ့က ကြေညာထားသည်။ အဆိုပါ စီးပွားရေးဖိုရမ်သို့ စစ်အုပ်စုခေါင်းဆောင် ဦးမင်းအောင်လှိုင်နှင့် ထိုင်းဝန်ကြီးချုပ် အနုတင် ချာန်ဗီရာကူးလ် တို့ တက်ရောက် အမှာစကား ပြောကြားမည်ဟု Khaosod သတင်းတွင် ဖော်ပြထားသည်။ မနေ့ကလည်း စစ်အုပ်စုခေါင်းဆောင်ကို ကြိုဆိုမည့် အခမ်းအနား ပြင်ဆင်မှုများကို ထိုင်းဝန်ကြီးချုပ်ကိုယ်တိုင် ကြီးကြပ်ကွပ်ကဲနေသည်ကို ထိုင်းသတင်းများ၌ တွေ့ရှိရသည်။ စစ်အုပ်စုခေါင်းဆောင်၏ ခရီးစဉ်နှင့် ပတ်သက်၍ မြန်မာလှုပ်ရှားတက်ကြွသူများက ပြင်းထန်စွာ ကန့်ကွက်ထားကြပြီး ရိုဟင်ဂျာ အဖွဲ့အစည်းတစ်ခုကမူ စစ်အုပ်စုခေါင်းဆောင်အား ဖမ်းဆီး၍ ဝရမ်းထုတ်ထားသည့် အာဂျင်တီးနားတရားရုံးသို့ လွှဲပြောင်းပေးရန် ထိုင်းအစိုးရကို တောင်းဆိုထားသည်။ လွန်ခဲ့သည့် ဇူလိုင်လနှောင်းပိုင်းကလည်း မြန်မာစစ်အုပ်စုနှင့် ထိုင်းနိုင်ငံ၏ PTTEP စွမ်းအင်ကုမ္ပဏီတို့အကြား သဘာဝဓာတ်ငွေ့ဆိုင်ရာ သဘောတူညီချက်အသစ်တစ်ရပ် လက်မှတ်ရေးထိုးခဲ့ကြသည်။ #ဦးမင်းအောင်လှိုင် #အနုတင်ချာန်ဗီရာကူးလ်

မြန်မာစစ်အုပ်စုခေါင်းဆောင် ထိုင်းနှင့် စီးပွားရေးဆိုင်ရာ သဘောတူညီချက်များ လက်မှတ်ထိုးမည်

မြန်မာစစ်အုပ်စုခေါင်းဆောင် ထိုင်းနှင့် စီးပွားရေးဆိုင်ရာ သဘောတူညီချက်များ လက်မှတ်ထိုးမည် သတင်းနှင့် မီဒီယာကွန်ရက်။၂၀၂၆ ခုနှစ်၊ ဩဂုတ်လ ၆ ရက်။ မြန…

  • August 6, 2026
×Close